رواية عشق البدوي الفصل الثامن والثلاثون 38 - بقلم نور الشمس

مساء الحب ❤

لا تحبس الكلام الطيب في قلبك
ولا تكتمه عن أحد ، 

أمدح من يستحق
   
وأشكر من أسدى لك معروفاً

وقل فبعضهم يستمد سعادته من كلماتك

وبعضهم يصنع منها تفاؤله 

لا تبخل فالكلمات مصانع للسعاده والأمل والحب
                   ولكل شئ جميل ،

الكلام الطيب عباده وهدايه قد تغير مسار يوم
أحدهم بكلمه طيبه زرعتها في قلبه فنمت ، واورقت واثمرت نجاحا

………………… ..

مرام…

نزلنه جوه گعدت يم كميل العب بابنه كرار اني اسمي كروشي لأن دبدوب وتيشيرته كل شويه طافر من يم بطنه فدوة يخبل ودي اگرطه ماخذ حلاة ابو كلها
جان بحضن ابوو اخذته من حضنه عبالك اريد اشغل نفسي بي اعرف الموضوع مو سهل وراح يتفسر الغير تفسير اني اصلا لو مااعرف مصطفى ميضم شي عني جان كلت اله غاية بس مامعقوله بعداكو شي اباله رملة عدها ولد وبنية هسه واتعودت ع حياتها وصارت عادي عدها من نذكرة يمها بحديث عابر او شي ماكو ذيج اللمعة بعيونها
وهوه هم علاقته بزوجها كلش قوية ومبيين مرتاح وياه الدنيا تتغير والمشاعر هم يجري عليها تغيير
مااعرف احس نفسي متوترة من يمي

جانوو
امي وابويه كاعدين وقبل ليروحون ينامون احنه نتأخر فاتحهم مصطفى بالموضوع

..يابه يمه عندي موضوع وياكم اني قررت اخطب واريد بهذي الاجازه خاطب وعاقد

باوعت الفرحه بعيون ابويه حيل فرح وكله ياالله من باجر ندورلك

جاوبه

..لا يابه المرة موجودة واني مختارها رايد منكم تباركولي وتخطبون

..ها ونعرفها احنه

..تعرف اهلها

امي ضاجت وگالتله يعني الحجي السمعته مضبوط واخر من يعلم احنه

..حسب الي سامعته يمه كولي السمعتي واكلج مضبوط لو لا

..كالتلي خالتك وتريد حماة رملة ليش ..وليش حبوبتك وعمامك يعرفون گبلنه

باوعتله اتنهد براحه وعبالك متحضر للجواب عيونه تتنقل بين امي وبين ابوي الي يريد يعرف كلشي حسيته مافهم شي

جاوبهم بثقه بعد ما رجع راسه ع التخم يريد يسترخي ورجع عدل گعدته

..اول شي الموضوع اليوم اني كلفت عمي ياسر يكل الحبوبه وباقي عمامي واني بنفسي اكول الكم الظاهر استعجل وحجاها قبلي بعدين اختصر عليكم مو زين اول وتالي انتي كايله الخالتي كلشي وابويه مفاتح حبوبتي عادي يعني بالحالتين اليوم دارين

بعدين موضوع رملة ماله علاقه ومايهمني لاتربطون شي بشي بنية عجبتني اخلاق واهلها خوش ناس وانتو تعرفوهم ومناسبينهم يعني السالفة ذيج انسوها

كميل حاجه امي

..خلي نفهم منه يمه خالتي شعليها بعدين عيب موضوع رملة انسوو عيب وحرام بنية اتزوجت وبذمة رجال لاكلساع جايبيها بالطاري

دار ع ابوي وكله شرايك يابه

..والله يابه اذا هوه مقتنع هذا هوو اخطبله اني اريد اشوفه مرتاح اكثر واحد مأذيني هوه الي يريده يدلل عليه

نودي عليهم ويصير خير
بس انت رايد حياة جديده صح

..ان شاءالله يابه جديدة والماضي حاركه ترة صدكني صدفه صارت مو اكثر

..هذا هوو خل امك وحبوبتك واختك يرحن يخطبن من باجر ونشوف رايهم وطلباتهم والله كريم

..الله كريم  كالها وعينه ع امي حاجاها
يمه شوو احسج مامقتنعه

..خايفه عليك يمه اذا الي ابالي صدك ماتحصل بس الوجع والمرار فدوة خليني اشوفلك وحده تلوكلك وتسعدك وتهنيك

..لاتخافين يمه مو الي ابالج ..ادعيلي انتي والله يسعدني ان شاءالله لاتخافين

..ان شاءالله شريد اني اريد سعادتك

راحو اهلي واحس هواي حجي يردون يحجوه بس مقدرين حالته ويعرفونه لو صار اعصاب يعني اتجنبوه

حاجيت كميل

..دكتور بنتي شوكت تمشي يكلولي حيل ضعيفه شسويلها

..مايهمج شيكولون خلي يكولون اهم شي حركتها وصحتها مو ضعيفه طبيعيه ومشي ع راحتها تمشي الها مجال الحد السنة ونص
اذا تاخرت بعدها اكلج راجعي بيها بس اكتبلج فيتامين انطيها عادي

..بيبتها خبلتني هيه وبيبية ركاد كل ميجون ويشوفوها يكولن راخيه وصوجج ماعلمتيها ع الحجله جان مشت من وكت

..مالج علاقه عبري ..الحجله اصلا اني ماانصح بيها مخاطرها اكثر وكل فايده مابيها مالها علاقة بالمشي ترة مرات تكون سبب بتقووس الرجلين

..الحمدلله..  مايقتنعن شنو يقنعهن

..مو شرط يقتنعن اهم شي انتي اقتنعي وسايريهن عادي اذا ميتقبلن لتناقشيهن بس مريومه صحتها تمام لتخافين عليها

...الحمدلله الامهات هم احتارن ذاك اليوم باللقاح اكوو طفل بكد كروري الطبيبة الي بالمستوصف تكل الامه سويله ريجيم وقللي رضعاته وزنه زايد

..هاي جديدة اسمع بيها هم بالمستشفى يمنه اكو دكاترة ينصحون بيها بس اني ماانصح بيها طفل بهيج عمر طبيعي يسمن وبس تزيد حركته ويمشي يضعف
الا اذا بقه اكثر من سنه ونص وبعده يرضع حليب صناعي انصح الأم تفطمه من الرضاعه وتبدي توكله اكل صحي وتنطي حليب مره او مرتين باليوم
هيج تكدر تجنبه هواي مشاكل

...شفته شال كروري يبووس بي ويضحك كال

..يعني هسه اني گلبي ينطيني اقلل رضعاته هالحلوو هذا..  هوه الريجيم كبار ميتحملوه خلو الطفل ياكل يرضع بس بصورة صحيحه وكلشي تمام

ظلينه نسولف ونتناقش بهواي امور بعدها كميل وزوجته راحوو وبقينه اني ومصطفى وصار يحجيلي كلشي وكتله سبب خوفي كال ابد ليظل بالج واني مو جاهل حته اكسر گلب وحده اروح اتزوج بالعكس اتمنالها كل خير رملة تبقى ذكرى ومرحلة مرت بحياتي..  اتقويت منها بكد مااتعذبت
عادي مرحله اتعديتها 

..الله كريم واذا زوجتك سمعت شلون

..شتسمع يعني بنت عمي ع اساس اليه ومن كبرنه عرفنه بالامراض واهلنه عارضو وخلص ليش تصعبينها عليه اكثر

ضحكت لا ممصعبتها بس نحجي بكلشي
صدگ هيه شسمها

ابتسمت اتذكرتها

مها..  اسمها مها وهيه هم مثل المها حلوه

..احم احم اتشوقت اشوفها صار هواي مشايفتها اصلا مااذكرها من بعيد جنت اشوفها بالمدرسة مو صديقتي هيه ولا بمرحلتي اكبر مني بسنه

..اي السنة تتخرج هية

..ان شاءالله..  الله يهنيك حبيبي تستاهل كل خير

..حبيبتي تسلميلي ع هالدعوه الحلوة

كلييلي انتي وركاد شلونكم صحتج تحاليلج الاخيررة شلونها

..الحمدلله ركاد كلش زين يحبني مقدرني ممقصر بشي والتحاليل الطبيبة تكول كلشي تمام الحد هسه ماكو شي يخووف وتكلي انتي شابه فرصج اكثر للشفاء  التام ابد لتخافين وتفكرين

..الحمدلله هوه انتي هسه ورد مابيج شي لتفكرين وتقلقين للبعيد خليها ع الله اشوفج ضعفانه حيل بس لاتقلقين زيادة

..لا مو قلق والله خلص هسه كلت اعيش يومي بس الحمية الغذائية سبب يمكن عادي اذا ضعيفه المهم صحتي تمام

..هم صح الرشاقه حلوة

..لتقشمرني الي بي اني نحافة مو رشاقه

..هههههه انتي اعرف بعد

ختمنه سهرتنه بسوالف قالقتنه وسوالف بيها ضحكنه وذكريات باقية الهسه عالقه باذهانا

اجيت لفراشي اريد انام طار من عيني النوم
نمت الفجر ثاني يوم صحيت الصبح عادي وساعدت امي وزينب بتنظيف وتعزيل البيت والطبخ

صار الليل اجاني اتصال من ركاد

..الوو

..هلا حبيبه ساعه وانا عندج تراني في الطريج

..هلا بيك حبيبي ماعندي شي ياريت لو هسه

..مستعجله ع ملگاي يالعمر

..مشتاقتلك والله

..وانا بعد مشتاگ. .  مريوم لاتنوميها خلها كاعده ابا اشوفا تراني حيل ملهوف الشوفتا

..اممم راح اخليها ولو صارت تنافسني بس الخاطرك راح اغلس واترك افكاري الي تكلي نوميها من هسه

..هههههههه اتركيها افكارك ماهي صحيحه هي بنتي وانتي دنيتي

.. ضحكت مثل متريد حبيبي مو تتاخر

..ماني متأخر خذي راحتج يالحبيبة

……… .

شووگ..

ثاني يوم الي راضاني بي اخذني للطبيبة وكالت تحسس قصبات عندج  الحمل يساعد ع رجوعها الج  انتي اصلا عندج اصابة سابقه مثل متكولين

انطتني علاج ومنعتني من هواي اكلات منها المخللات والاجباس والبهارات القوية الطماطة الموز والبيض

احس روحي جعت من هسه  شنو اكل اذا هذا كله ممنوع

من غير الي خلتهم بقائمة تحت التجربة مثل السمك والخيار اووف شويه باقيلي وابجي
طلعت وياسر يضحك عليه

..شبيج انعقجتي من منعوج من الطرشي صحتج اهم حبي

حجاها بضحك

..شو شمتان بيه بعدين ابنك مدري بنتك الي تريد اني شنوو

..ابني وبنتي مو اهم منج صحتج اهم عوفي الي يريده والتزمي بعلاجچ واكلج

..واذا طلعت بوجهه خيارايه مثل الي مشتهيتها هسه

..رحمه الاهلج لاتقلقيني بعدين انتي ماكلتهن واكلتي لما مليتي يعني ميطلعن بس انتي اشتهي بالمعقول

..ياسر اريد رطب حباب

..ياصبر ايوب ومنين. اجيبلج رطب وهوه اسمه ماينذكر بالسوگ

..واني شعلية

..حافظها اني شعلية قابل اني الرايده ابنك الراد
ابني خلي يتأدب من هسه ويعرف الي يريده شنوو منين اجيبله رطب  اني

..والله كلشي اكوو بس انت مااتعب نفسك من اتنست مرام ورادت رگي (بطيخ احمر)
جابلها ركاد وماكال الها منين اجيب صح تعب يلله لكاه بس جابه

..اخوج فارغ ماعنده لاشغل ولاعمل منتظر مرام شنو تريد ويجيبلها اني مو فارغ والله هسه اذا هذا السوگ ردتي كله اجيبلجياه بس مال اروح اتصل واكلف جماعه بالعلوة ودورولي هيج ويسالوني ليش والمن والله زوجتي تتنسه واكفه تره وعيب هم اصبري واول مايدخل اجيبلج

سكتت ماحاجيته وابالي اعرف تفكيره عنده عيب يكلف احد ويكلهم زوجتي تريد والله ياربي شنو العيب بالموضوع
ومنيله اخوي فارغ بالعكس عنده شغل ومسؤوليته اكثر بين بيته وابوي وحته الجدة يروحلها ويجيبها

عادي امشي احسن الي
ماضجت لان مو ذاك الموضوع الي يستحق ازعل واضوج بس والله مشتهيته حيل وبنفسي

حاول يشتريلي شنو اريد وكلشي يشوفه يريد ياخذه الي بس حته يقنعني بس هيه الحامل من تشتهي شي شنو الي يجي بمكانه اكيد ماكوو
اخذت الي عجبني وكتله مااريد بعد وعادي تره مو ضايجه اتصرف وياي عادي اذا ماكو هوه منين تجيب
انت

ضحك گال

..مبينه ابد مو ضايجه والله اول ميطب السوگ اخلي الرطب يوصل الراسج

رجعنه للبيت وامورنه تمام وحياتي الحمدلله رغم المشاكل والصعوبات الي تواجهني مرات بس الحمدلله ممتندمه ع زواجي بياسر ابد

وره كم يوم اجتنه مرام وحجيتلها ع الرطب ورأي عمها باخوي ضحكت وگالت مو زين يتسوك عمي ياسر وفاتحله بيت ابد ميحب هالسوالف ويجوز صدگ يستحي بعدين موجود معلب ايراني طييب 

..لا والله مو مثل رطبنه العراقي مااحبه اريد نص مستوي ونص لا

وره يوم اندكت بابي المغرب
طلع ياسر فتح الباب واسمع ترحيبه حار مبيين الشخص الي بالباب معرفه
شويه وسمعت صوته بعد مااقترب للداخل
فدوه اروح الصوتك هذا ركاد

رحتله ملهوفه سلم عليه وكال مستعجل جيت اشوفج بس وكلت اشوف النسيب گبل لايلتحق
انطاني علاگه استحيت افتحها گدامه
شويه بقه ماطوول وراح

فتحت العلاگه واحس عيوني تحولن قلب الحب مثل حالة توم من يشوف لحم الفخذ

رطب عراقي نص مستوي ونص لا بس شكله مجمد
ومكتوب عليه معلومات مبيين من بغداد
فتحته واكلت منه جان بارد بس مو جامد احس هسه يلله ارتاحيت جنت اكل ومو منتبهه باوعت الياسر شو عاقد الحواجب وعيونه تريد تنتقم مني بكلبي ياستار كلت شنو شصاير ماردت احجي خلي اكمل اكلي عبالك جنت بمجاعه

..وحضرتج ماصبرتي رحتي الاخوج طلبتي منه شيكول هسه مو عيب تخليني بهيج موقف يستاهل الرطب تخبصين الامه عليه

..والله والله مطالبه من اخوي ولا كايلتله مرام البارحه حجيتلها من شفتها ويمكن هيه موصيته بعدين مابيها شي هكاذا هوه يعرف وين ينباع

..يمعوده عيب والله هسه شنوو يكول عني

..كلشي ميكول والله تعال ضوكه بس وحده اثنين مو اكثر

..والله كريمه شدعوه هالتلف

..ههههههه والله اني كريمه بس بغير شي عوف الرطب

…

مرام ..

اليوم يمنه ام ركاد والجدة وهم اول مااجن استلمن وضع مريومه وكل وحده تشخص شكل اني اشوفها تخبل مابيها شي بس ركاد يصدك ويظل قلق كل مره مااخليه ياخذها طبيب اليوم مليت وشفته مصدك كتله عادي ناخذها نتأكد

للضهر خابرتني امي كالت العصر حضري روحج نروح نخطب الاخوج

..يمه شلون عندي موعد الدكتور مريومه وعندي خطار هم عمتي والجدة بعدهن مرايحات اصلا

..بكيفج يمه اذا ماكدرتي معذوره غير مره روحي
من نريد نتفق هذي روحه اولية هيج روتين لأن اخوج مدبر اموره يلله كال النه هيج احنه ماكو راي النه

..كولي يالله ماما خلي الف عافية فدوة لتسمعي الصوفي خلي بفرحته واني غير مره اروح
بس خابروني وكلولي شيصير وياكم

..ان. شاءالله

راحت امي واني التهيت وياهن عمتي رغم خوفها علية من اتمرضت بس ماحبتني من كلبها ابد واضح هالشي ع تصرفاتها وملامحها
ماتكدر تغثني بشي بس بمريم هيج بيها وهيج مامهتميلها
رغم اعوف نفسي ممقصرة بي اتأثر واضوج

وركاد خطيه احسه صاير بينه بس صرت مااهتم واحسسه بشي كافي علينه القلق والتعب النفسي مو مال مشاكل بعد وهوه مثل مامتحمل هواي علمودي اتحمل هالشغلات البسيطه
بيومها العصر وصلهن للبيت لان عذاري جانت عدهم وماتجي البيتنه حته من سمعت بالمرض والشده الي بيها اني ماوصلتني بس تحاجي اخوها وتسأله عني يكولون هوه مكايلي ولايذكر هالشي يمي بس شوك. كالتلي دائما من ننجمع تسأل ركاد عنج
اما هند اتزوجت ودائما تجي هيه وزوجها علينه حبابه وزوجها مثل ذبة ركاد كلامه وهدوئه وطريقته بالتعبير

بس هوه كلش حلوو وشوگ مخليه دوبها من دوبه من تجي تكلها يروح فدوة للسيد تخلي هند اطفر اضحك ع سوالفهن

رحنه للطبيبه واكدت كلامي حجت نفس الي كاله كميل الي والحمدلله ارتاح ركاد من عرف ماكو شي
اني وافقت اخذها طبيب بس حته لايقلق زايد عرفته اقتنع بكلامهن

من رجعت خابرتني امي وكالت البنية حلوة ورملة تمدح بيها وكالت خاله متندمون واحمد اخوها فرح حته هوه وصلنه وكال مصطفى اكثر من اخ الله يحبها لو صارت اله ماراح ادخل اني لان اخو للاثنين بس اذا الله قاسمها تصير

فرحت وكتلها يعني رمله عادي عدها

..يايمه مكيفه شوو حته اني اتعجبت بس مبينه مرتاحه بعد هيه التتزوج تفكر بغير زوجها

كتلها صح

واتذكرت مخابرتها يجوز غلطت والله هداها الحمدلله احس هسه ارتاحيت شويه جنت خايفه تتاثر بس اني متأكده بينها وبين نفسها ينعاد عدها شعور الحزن ولو مؤقت

مرن يومين واني ع اتصال بمصطفى ودوامي قربت امتحانات الكورس الأول علية  ضغط صار واحس نفسي حيل ضعفت ضعفي صار نشاز يراد الطبيبه تغيرلي الجدول الغذائي وركاد نصحني اروح الاخصائية التغذية واشرحلها مشكلتي والي صار ومخاوفنه

وصدك رحت وغيرتلي شويه بالجدول وطلبت مني اكل وجبات قليلة باوقات متقاربه لان اني تدريجيا فقدت شهيتي
ونصحتني بأكل التين المجفف والكرزات وطلبت مني شهر وارجعلها وتشوف التغيير بوزني

والتحاليل اخر مرة جانت تمام باقي اسبوع التحليلي الي من بعده ابدي احلل كل ست اشهر

اكو قلق بس شي قليل الامل اكثر
بس ركاد القلق واضح عليه وقلقه اكثر مني صعب عليه اشوف حالته والقلق واصبور عليه بهذي المواقف مو شاطرة اني وافتقر للتصرف بصورة صحيحه بهذي الحالات

اما امي وابويه متصورين انو اني ماعندي اي شي بعد وشدة وخلصت بوكتها بس كميل ومصطفى يعرفون كلشي وكميل بنفسه يقرالي نتائج التحاليل
ودائما يكلي الخطورة عدت بس ابقي حللي حته تامنين

رجعت للبيت من الطبيبه وركاد طلع يجيب اللستة المطلوبه من الطبيبه توست وكرزات وتين مجفف وبعض الفاكهه

خابرني مصطفى كال وصلهم الرد الجماعه موافقين وباجر المشية وبنفس الوقت العقد

ثاني يوم رحت من الصبح الاهلي وركاد گال اجي وراج حضرتله ملابسه والي يحتاجه
وصلني وطلع بس بقه ع اتصال وي مصطفى وساعده بهواي امور هوه وسجاد الي حدد موعد خطوبته بعد اسبوعين هم
اتمنيت الله يديم علينه الافراح حلوو شعور الفرح
خاص الزواج فرحته غير من اشرف شخص غالي عليه يريد يتزوج

لضهر ابريه كال اتصلو بركاد خلي يجي يتغده وي عمامكم وولدهم عيب منه وهوه نسيبنه الوحيد بداخلي افرحت وحسيت اهلي مو مقدري اله وبس مقدريني الي

صار موعد المشية كميل كال نروح نمشي ومن يطلعون الرياجيل الغرب ندز عليجن تجن حته ناخر عقد السيد الوكت جيتجن

مخبوصين وكل وحده بينه محتارة تعدل بنفسها عزمت عمتي اني وميثه وعمتي ام سجاد هم
لمن اجن يلله خلصت وكدرت انتبه النفسي من مريم الي اتنحست بشكل من شافت الناس بس اللوتية تعرف اهلها وعماتها سكتت من شافتهن ورضت تكعد يمهن

ع السريع رحت كملت ترتيب نفسي
خابرني ركاد كال اجيناكم اني ومعي خمس سيارات اتجهزن انتي وشوفي من يجي معك اخذجن معاي
والباقي يتوزعن مااريد توكفين واطولين وكفتج بالباب خلي التليفون جنبج اول مايرن اطلعيلي

صدك اتوزعنه شوك وامها وي عمي ياسر وياهم حبوبه واني وعمتي ام ركاد ومريومه ويانه نبراس وي ركاد وكميل اخذ زينب وامي والباقي جماعة مصطفى منهم سجاد نسوان عمامي وباقي الاهل
وصلنه اهل العروسه وبدت مراسيم العقد

يتبع ..