رواية عشق البدوي الفصل الثالث 3 - بقلم نور الشمس

اول مره اكره نفسي من اكون كاعده بدون شغل لان گعدتي سببها الامتحانات مااكدر اشارك وياهم

كميل اخوي عنده الدراسه ثم الدراسه

يريد الكل مثله شطار وهوه الطفره الوحيده بالعائله والعمام كلهم..

الكل معلمين مدرسين بنات وولد الوحيد هوه الي طلع طب واتزوج وهوه يدرس جنت طفله بذاك.الوقت بس اتذكر زواجه واتذكر فرحته وفرحة حبوبه وامي جانت بعدهي صغيره وصارت عمه

اتزوج بنت عمي جان عمرها ١٦ سنه حبها بس للاسف هيه انجبرت عليه مرادته بعد الزواج عرف هالشي وتعبت وتعبته الى ان تعودت عليه صار عدهم هيثم وللاسف كان معاق
والسبب تكرار وكثرة زواج الاقارب مخلفت منه بس هيثم
وبعد مصار عمر هيثم سنه انتلت بماطور المي  الله يرحمها وماتت حيل تأذه عليها صار كم سنه ع وفاتها هيثم هسه خامس ابتدائي
امي صارت ام اله واحنه كلنه ندير بالنه عليه حبيب للكل كميل متعلق بي كلش بس صار بعد وفاة المرحومه رقيه حدي وعصبي بشكل واصلا وقته قليل يتواجد ويانه اما يدرس اما بالدوام لحد الان ممفكر يتزوج ولا ذاب اللون  الاسود
عجزو ابويه وعمامي وحته عمي جعفر  الي هوه ابوها اجاه بنفسه وكله اني اخطبلك بنفسي بس فكر بنفسك رفض رفض قاطع ويصير عصبي ايام من يفتحون وياه موضوع الزواج
دائما يردد ويعتقد انو هوه مكدر يشوفها حبه بهذي الفتره البسيطه محقق ذرة من احلامه وياها يكول

  لو ادري بهذا حد عمرها مكان اطلبت منها الزواج ولا اهلها جبروها ولا هيه تعبت وانجبرت ولا اني تعلقت بيها كان باقي مكمل دراستي ويمكن الكي غيرها يشغلني
بس وين يشغله غيرها وهوه الي هسه ممفكر بغيرها ابد رغم صار سنين.. اتزوج بعمر ٢١
وحاليا عمره ٣٣ 

 
كميل اضافه الوظيفته الي هيه الطب وارث الصووت الجميل من حبوبتي العلويه ام هاشم
صوتها يطيح الطير من السمه هيج قبل يكولون عنها رغم هذا متستخدمه بس بنعي من تذكر اهلها لو تنعي ع جدي لو ع المرحوم عمي صادق الي هوه انعدم باحداث.سنة ٩١  او تقرأ الاهل البيت بيوم عشرة عاشور
وهذا الصوت ورثناه اني وكميل هم كميل يقرأ قرءان ضابط احكامه وتلاوته   بما انو صوت رجولي وبي خامة خشونه كميل صوته احلى
لذلك بايام محرم من يجتمعون عمامي ابيت عم ابويه  السيد مهدي
يجتمعون جمعه شياب وشباب يقرالهم عن جلوس
وهاي صار سنين متتبدل العاده والكل ينتظرون محرم حته كل واحد منه يبرز حبه ال اهل البيت بشي معيين منجزع ابد ولا اعتراض على حكم الله مثل ميفسره البعض
نعرف حقهم ونعرف همه قدمو انفسهم واهلهم بسبيل الله الي نسويه حزن عليهم ومواساة للرسول مو اكثر
اباوع الامي 
امي تحضر البيت تكسي جدرانه بالسواد
هذي السنه اشوفهم كلهم ومااكدر اشارك وياهم اول سنه تصادف امتحاناتي وي محرم

مصطفى واكف يسجل طلبات امي شنو تحتاج  للمجالس
مخليه عيني بكتابي واذني يمهم
اووف نار بيه شلون يعني السنه انحبس هنا مو عدل هذا
كميل مو هوه هم يحضر دراسات ويريد يختص بطب الاطفال  وميترك عادته ويروح يوميه بالليل من باجر
اني وحد شنوو

ماصبرت حاجيت امي

..يمه شنو اني صدگ مااروح وياكم يوم الطبخ ولا عشرة محرم نحييها للصبح اذا اقرأ واعوض الايام.الجايه تعوفوني اروح

اجاني صوت كميل حاجاني بخشونه

..عود اقري انتي هسه والله كريم.شكوو رايحه بناتنه هواي خير من الله عماتي ونسوان.عمامي وباقي البنات يحتاجنونج انتي يعني؟

..اووف ياربي شلون اقنعه يعاملني وكاني بنته حالي حال هيثم بحكم فارق العمر مااكدر اكله بكيف ابويه وهالسوالف واني ادري اصلا ابويه رافض هم
لازم اقنع كميل
كتله

..فدوه  اني مو علمود اساعدهم لا اني انتظر يوم يوم لحتا يجي موعد محرم انوب انحرم ليش فدوه مو انت تدري حبوبه تحب صوتي اقرالها

..الله كريم احاول اقنع ابوي بس لو السابع لو العاشر اختاري ..وخلي ابالج حبوبتج ماتدري بيج گبل محرم اتندنين باغاني  يومج  كله وبمحرم صرتي تقرين جان استحيتي حجيتها وابتسمتلها

..بكلبي كلت هنيال الشاف سنك والله الحمدلله ضحكت معناها اروح كتله

.. اختار السابع
بكلبي كلت 
الله كريم خلي اختار الاقرب وبلكي الله يهديهم ع يوم العاشر

عفته طلع وركزت بكتابي واني افكر بلكي كميل يقنع ابويه صدك ميردله طلب
عرفتوو كميل هوه الاخ الاكبر بيناتنه فرق بينه وبين مصطفى عشر سنين لان امي تتأخر بحملها

مصطفى عمره ٢٢ خريج تربيه علوم قرءان
وهذا خطيه هم مسكين ع حظه اهاليتنه منعوو زواج الاقارب نهائيا خافوو من الاعاقات والي اكدلهم كميل

ومصطفى  يحب رمله بت عمي جعفر وهيه هم.تحبه ومستحيل يصير بينهم زواج لان فوك ماهمه اولاد عم امهاتنه خوات يعني حبهم مستحيل يلگاله طريق خوف من الامراض
وكميل شرحلهم انو زواجه كان غلطه ولو هوه بوعي هسه ميعيدها
لان من الممكن الاجيال القادمه منه اذا بقت ع هذا السياق الي ينولد مو معاق يكون بليه اوو غبي قليل الاستيعاب
وهذا الشي خله عمامنه الكل اصروو ولدهم يتزوجون غريبات والاكثريه صاروو يتزوجون عاميات يعني من عوام الناس ميعود نسبهم للرسول

اما البنات كلش قليل بعوائلنه
احنه بيت السيد هاشم.اكبر واحد هوه ابويه
يجي بعده سيد صادق الله يرحمه انعدم باحداث.الانتفاضه الشعبانيه انعدم وجان شاب ممتزوج خاطب وبعد منسجن خطيبته اتزوجت
يجي
بعده سيد جعفر  عنده خمس ولد وبنتين رقيه الله يرحمها ورملة

والي بعده سيد  احمد  عنده ست اولاد وبنات اثنين
والي بعده سيد برير عنده اربع اولاد

والاخير اصغر من كميل اخويه ب ٤ سنين سيد ياسر  بعده ممتزوج والوحيد بالعائله يوصل الهالعمر وهوه بدون زواج نقيب بجهاز مكافحة الارهاب

عندي خمس اعمام من غير والدي وعمه وحده جبيرتها بنت بعمري الي هيه صديقتي واكثر من اخت الي ..نبراس بنت عمتي زينب 

نبراس هذي محظوظه تدرس ادبي تقرا باليوم اربع ساعات والباقي تسخيت
ماعدها مثل سيد كميل يوكف ع راسها ويسويلها جدوول

فززني صوت هيثم يريد مي

رحت انطيته مي واشوف امي مخبوصه وتحضر
كتلها

..سوده عليه يمه اجي اساعدج وحدج مخبوصه

..اسم.الله عليج من السواد خليج بدراستج مارايده منج شي

..بس اساعدج بشي بسيط

..مااريد كتلج لا تتحججين

..مو صوجكم والله صوچي اني كلب سمچه مااتوب منكم

..فقيره العلويه الزغيره عليمن اطلعين

..ضحكت.. علي صوتج عليه خلي السيد ابو كميل يسمع على شنوو تلمحين تقصدين ع حبوبه موو صحت بصوت عالي كولي كولي تقصدين حبوبتي مو فقيره واني طالعه عليها
قربت عليه وهيه تسد حلكي بايدها صحت اخخ من.قوة الكرصه الي شالت ايدي شيل

..اووي يمه شبيج شني اصابع جلابتين

..ووجع حته وجع . مرام تردين تسويلي طلابه
ابوج يتخبل ولا احد يجيب طاري امه وانتي تردين تذبينها براسي

..اخخ على كيفج اصلا ابويه طلع قبل كميل وانتي تجردين طلباتج من مصطفى بس هيج حبيت اشاقه وياج

..أمداج ع هالشقه هذا

مشت امي وضحكت ..صدك لو سامع ابويه هالحجي عقوبة امي التجاهل لفترة غير معلومه يخليها تتمنى تسمع اسمها بصوته وتتعلم وتعرف غلطها كلش زين يلله يرجع يحاجيها وبعد ميحاجيها يحذرها

بس الي يشوف علاقة حبوبه بابوي ميلومه ابد
بالعمر جنهم اخوان متزوجه بعمر ١٣ سنه ومخلفته باول سنة زواج 
غير هذا علاقتهم كلش حلوه اصدقاء عبالك
حته باقي ولدها والجناين يتخبلن من هاي العلاقه
رغم علاقتها وياهم
بس بساعة القرارات المصيريه صوتها لايعلا عليه
ومن بعدها قرار والدي ينسمع
...........

في مكان اخر ..

كنت
اليوم انا ضيف عند واحد من الربع
ربيعتي  كلهم حظر
من ايام الاعداديه ترافگنه
وبعدها درسنه معهد طبي في  ذي قار 
وهوو معي ..علي  انا اسمي بوو حسين
وساعات اناديه علوان

ماشايفو من سنين روحي لايبه اعلى شوفتوو

بعد ماتخرجنه انا سافرت مع معارفن لي ع اساس اتجنس في احدى  الدول الاوربيه رحت سنتين ولاعت جبدي وروحي ماهوت عيشتهم

رديت لهان جنب اهلي وناسي
جدتي الي ربتني بحياة امي ووجودها
جدتي العنود اهي رويحتي الي اجبرتني  ارد من ديار الغرب لهان

رديت شفت ابوي بايع دارنه والدور الي يملكها
ومشتري بنصف الولايه بيتن جالسن يبينيه يبغا يكبره ويوطنه (يعيشنه) كلنا فيه
ويجمع حريمه الثنتين واولادهن حنا وخويانه
في بيت واحد لكن عنده خريطه معتمد عليها
شفت الحريم.مشغولين والبنيات حسباتهن تاخذهن وتردهن
كيف نكون مع بعض وكيف نتعايش
زوجة ابوي احظريه وخوياي مخلطين حظر على بدوو لهجتهم ماهي مثلي مكسره بيها من.الحظر وبيها من البدوو
لكن خويي الكبير جراح هذا لا منطوكوو گريب لي لكت انا اكثر واحد فيهم نتاثر بالجده لاني ربيبها 

ابوي تزوج الحظريه
بعد ماعيت امي على خواتي الزومهن تعليم ودراسه
كان يزتهن للمدرسه واهوو معاهن شاف مدرستهن وعشگها تزوجها وكسر شور الجده
الي لاول مرة يكسر شورها
ومايسمع كلامها
من هذا اليوم الجده صارت تكره الحظر وتكره التعليم وماعادت طايگه عيشت الحظر 

كنت اشوفهم محتارين ويفكرون كيف يجتمعون رغم حنا وخويانه ماتفارگنه ابد
كلها بجيهه  والجده العنود بجيهه
تولول وتهرج  هرجن ماهو مفهوم
متحسفة حياة البادية وتلوم ابوي وزواجتو من مرتو الحظريه اغسلت مخوو  وخلتوو ينسا هلوو وناسوو وتالي اعمارهم  يعيشون عيشة الحظر

وشفيها عيشتهم يجده بالله انها اسهل واروح

لكن اهي معذوره گال ماتگدر تعيش عيشة تحت الحجر
ياويل حالك يابوي الجده الها ثلاثين  سنة تعيش عيشة الحظر وهي مو خاش مخها هالعيشه
تبسمت وأنا اسمعها
تكلم.نفسها وهي تگول

..غمت عيشتن تكضي بين الحجران ..ول ول راحت ايام يلعب ببيوتنه الهوا

..وش فيها عيشة الحظر يجده منتي جالسه لاحاسه بحر صيف ولاابرد اشته
وش ودچ بعيشة الهوا

..مانت ابدوي ان ماحنيت للبداوه يولد

..عز اني احن وماردني من اديار الغرب الا حنيني
لكت ياجده تعودت ع العيشه هان لما احن اروح.ايام سفاري اروح للصيد والا لعمومتي اشم هوه الباديه واتنشط وارد
شرايچ ترحين معاي لعند اعمومتي وكرابتج كلهم يفرحوو بشوفتج
نغيير جوو لين مايكمل البيت ونعزم ع الشيل تكونين انتي مرتاحه

..نعم الراي يوليدي عز الله انك مانسيت الربا اخير من ولد بطني هالحاير بنسوانوو

..وشلچ فيه وانا موجود ..لكت ابوي يحبچ يجده لاتنكرين.. مسؤولياتوو چثيره  عذريه والي يسلمچ
ماانتي تكولين ركاد اولدي ولا هوو كلام.وبس

..حشا الا انت ولدي واغلا

حسيت اني ريحتها  بهالكلمتين الا ان علومها اتغيرت
وبانت عليها الراحه
ريت الراحه تنعطا لاعطيها لچ للدوم

اطلعت منها
اناظر امي مشغوله تجمع اغراضها
كلمتها

..شعلومها ام جراح

..يهلا بخير يروح امك

..عساج يالغاليه ..اشوف معزمين

..بكرا نحمل وننگل اغراضنه

..علي بركة الله

خابرت خويي سجاد خويي من ابوي رفيكي وحبيبي

..هلا يالحبيب

..هلا بيك ركاد الغالي شلونك كيف احوالك

..هساع ماعرفت اشلونك والا كيف احوالك

..ع كيفك يالحبيب الي تعجبك شلونك شخبارك والا شعلومك كلها واحد

..الوالد يمكم

..ايه تباه

..تنهدت بضيق لا وشبي منوو غير شوفتوو

..عرفته ضاج وحكه حاجيتو ..يخوي مابقه شي بار وحنا وانتم بيت واحد

..ايه مايفرك يالأخوو الفرك انا مانتفارك الي عرفته شاريلنه بديرة اهل امك ماوده يفارگ ريحتها والا خايف عليها تفارگ اهلها بس مايخاف من مفارك ولدوو صار سنين يتكلط عليهم بالسبوع مرة

..انحرجت منو ..انت مشتاكلي والا تعاتبني على زيجة امي من ابوك وانا وش بيدي عليكم والا على حالي لا تشيل الهم حنا كبرنه وانتوو كبرتوو بعدوو مامتوو وراه محد يموت وره احد

..ايه صح ..مااعاتبك انت الحبيب لكت اشكيلك الهم من بيشيل همي غيرك يولد ابوي وربيعي
الا اكوول وشرايك أجيك على گولتك تشوفني هالبيت الي ناوي الوالد يجمعنه بي

..اتدلل انا بالبيت اوصل كريب لنا وانا اعطيك العنوان

اخذت منو العنوان
ورحت شفت البيت تحفه كبير وواسع
حاسب حساب الكل
فرحت وگلبي وجعني بنفس الوكت
كيف امي اتحمل دخلتوو وطلعتوو من حرمتوو الي هيه بعيده عنها وماخذتوو اجل لو كربت وش يصير
خوياتي كيف يتحملن

كبرن واهن يشوفن فيه فرگ.بينهن وبين الباكي من.ولده

عذاري موظفه بالصحه مكمله كلية تمريض

وهند مكمله كلية تربية قسم لغة عربية

جراح گريب للوالد وايدوو اليمين اعمال ابوي وعقاراتو  اهو الي يديرها اما حلال الوالد الابل والخيل اهوو وعمامي اشغالهم بينهم مانتدخل بينهم

تمشينه انا وسجاد

اشوف الاجواء غير حركه وناس اتحضر
اجواء محرم عندهم غير

كلمني سجاد

هذا بيت الساده سيد جعفر والناس اتعرفهم باسم بيت العلويه ام هاشم
اوو بيت الساده

وهذا البيت الي تسمع صوت قراية القرءان منوو هذا بيت سيد مهدي عموو السيد هاشم
والي تسمع صوتو الدكتور كميل معروف هنا بطيب اخلاقوو ووكفاتوو وي الناس لو واحد تعلعل بانصاص الليالي يروحلوو مايردوو بنوب
تعال ندخل معهم اعرفك عليهم تراهم ربيعتي

يتبع ..