رواية عشق البدوي الفصل الرابع 4 - بقلم نور الشمس

السلام عليكم ..

حبايبي خلونه نتفق بين يوم ويوم انزل بارت لأن صياغتها تصعب عليه مو مثل باقي القصص بس احداثها حلوه والجايه احلى واحلى لذلك حبيت اكتبها رغم.صعوبتها

..................

توجهنه ع دارهم  ديوان كبير معزول عن باگي  دارهم 
كاسينو بسواد
صوت تلاوتوو سحرني هدأ روحي وسكن المها
كنت متألم ع الوالده وكيف راح اتعايش مع الوالد وحرمتوو مع انو هي ماشكت العمر كله لاكن انا حاس فيها اناظرها امي مزيونه ماگاصرنها شي
طولها متوسط
عيونها تسحر طويله وكحيله
الكل يمدح فيها هبة ريح ( شاطره)

السانها معسول كامله والكامل الله
الا انها ماعندها حظ الوالد مكتفا فيها
ولا عدل معها

جراح كبير العيله فينا الي بعدوو
عذاري اكبر مني بسنتين وبعديها هند
اكبر مني بسنه
وانا حاليا عمري ٢٦
وسجاد اخووي من ابوي اصغر مني ب ٥ سنين
واياد اصغر مني ب٦
والصغيره الحلوه شوگ اسمها اشواق وحنا نسميها شوگ
هذي روحها فينا وكنها متربيه معانا الي يشوفها يكول انها بنت امي حصه ماهي بنت الحظريه زمن

حته شوفتها تنطي لنا اكثر كثير يشبهونها لنا
هذي الحين تدرس خامس علمي

كنت جالسن اسمع الدعاء بصوتو بعد ماختم تلاوة القرءان نسيت روحي وانا افكر بكل الي حولي

اه ياامي  وش بخاطرج ودي اعرف الي بخاطرج وبشو تحسين

طلعنه منهم بعد مافضا المجلس وتعارفنه عليهم واعرفوني اخو سجاد

كطع فكري صوت سجاد وهوه يكول

..يخوي شنو الي مضايگك انت.. شوفتنه تضايگك كانك ماتبا نسكن معكم وانا الي فرحان اكون گريب لكم انت والبنات وجراح والله ثم والله يمكن ماتصدكني الا اني ماكذبت حته امي الي هيه امك انا احبها من خاطري وماني مجبور غلاها من غلاوتكم

..لا يالحبيب والله الي مصبرني ع شيلتنه نكون جنبكم وماعارضت ابوي انت واياد وشوگ وامكم هم غاليه عليه الا اني شايل بكلبي من ابوي وانت تدري ليش

..اهوو بعد يشكي منك يكول مايسمع كلمتي ولا يبا شوفتي ماهو مثل جراح اولدي ..كل همو يعارضني

..ماسال روحوو ليش ؟ انا اتصرف معوو هالتصرف
لانوو ظلمنه وظلم امي كثير ظلمها

الا عوفك منوو ومني

وعلمني التعيينات كيفها ابا اگدم تعيين ع الصحه
انت ماناوي اتعيين

..انا مالي تعيين خريج معهد تنكلوجيا قسم.ميكانيك ماكو تعيينات بقسمي ناوي اكمل هندسة ميكانيك اهلي
يمكن احسن مستقبلي

..ضحكت ايه اهم شي مستقبلك وشحلوك كنت اتحچا ابدوي ادري انك علشاني اتبدوون والله انك حظري ولد احظريه واتحچا مثلهم بعد

..اي والله وانت الصادگ انا من.وعيت ع الدنيا وانا احظري بس من اشوفك احب اتبدوون معك
حتى اخوك جراح ابدوي ولد ابدويه حرمتوو بدويه بس هوه صار احظري من كثر اشغاله وصدقانه كلهم حظر
وانت بعد من تكرب منا راح نسويك احظري

..بعيد عن خشمك  انا ماابدل لوني لو ابدله كان بدلتوو بديار الغرب والا وي ربعي بسنين الدراسه
صاروو هم يتكلمون ابدوي

كثير سمعت نگد وناس اتعيب بس مايهمني
حكهم مايعرفون اصلي مايهموني
الا انا اذا اهتميت انعاب انا اعرف اصلي وعيب اهتم الكلامهم
بكرا انا بسافر انا والجده العنود يومين بالكثير وحنا هنا

..باجر ابوي يشيلكم هنا وين بتروح انت

..مايهمني اجيكم هان بعد منشيل

..يولد الوالد يزعل ليه تهيج اعصابوو

..خلوو يجرب الزعل مايخالف 

ثاني يوم.غبشت انا والجده وحدرنه نحوو الباديه

الجده ردت روحها من شافت خويانها واهاليهم
وانا اخذت الربع ونحرنا الجول (رحنا نتجول في الباديه )

تعطلنا يمهم كم يوم ورجعنا
گلبي وجعني يوم كربت الديار
مااعرف كيف تكون عيشتنه
دخلت وعيوني تنظر

ابوي موجود وحوالينه الاولاد والبنيات امي بالمطبخ
وحرمتوو ماهي بالدار تذكرت اهي اداوم

رحب بالجده وحب راسها

كربت انا ليه سلمت باحترام رغم البرود الي يحيطني

..كيف حالك يبووي

..هلا بولد ابوه الحمدلله كيف حالك انت تعال يبوك شوف حجرتك تعجبك والا تشوف غيرها

..مايهمني يبوي اهم شي الوالده عجبها المكان.والا لا

عليت صوتي اسمع امي هالكلام

نظرلي ابوي بنظره فيها كلام فيها اعتذار حسيتوو حس فيني
ردت علي امي وهي فرحانه السؤالي

..لاتهم يالحبيب بوجودك انت وخويك والبنيات  بخير الف الحمدلله

..عساج يالغاليه

اجتني شوگ حضنتها وحبيتها

كيف احوالك يالحبيبه

..بخير مادام صرنه سوه مانتفارگ بعد صح يولد ابووي

..الا منتفارك بس الموت يفركنه
كربي علي بسألك سؤال

..امر

..امي وابوي كيف احوالهم تطالبوو والا شوو

..ماكنها شايفتوو حاول معها الا هي صامده

..وش حلوج انتي واخبارج يازين منطوكچ بحجايانا (حلوو حجيج بلهجتنا )

..تره تعبت وانا اتحجه ابدوي شرايك انخليها للصعاب

اتصدك.مشتاقتلك هواي واريدك تساعدني بالدراسه

..اساعدج بالي اكدرلوو تامرين

الجده ودوها حجرتها سكتت بعد ماعاتبت ابوي وسمعت اخواني كم كلمه تخص امهم
سكتوو ماحجوو شي

اليوم.كلوو خلصتوو وانا عيني من امي والوالد اشووفوو ودوو يحاجيها بس اهي ماكنها شايفتوو
ارتحت الحمدلله ماهي مضايگه بالعكس اعصابها بارده واحس ابوي الي محترگ وضايعه علوموو

امي ام سجاد احبها واحترمها لانها تحبني
ومالومها ع شي لانها مالها ذنب لو كان ابوي اهوو يبغا امي ويبغا يواصلنه ماكدرت اتبعدوو بس اهوو الي تجوز وماعرف يعدل خالف حتى شرع الله
وكبل مايزعلنا زعل الباري

مانزعل منوو مهما يكون اهوو والد واجب طاعتوو لاكن يشيل خاطرنه منوو جراح مايهموو لاكن حنا لا كلشي كنا نحسبلو حساب لوعة امي وكيف طفا شبابها كلام الحريم عنها ونظرة الحزن بعيونها من يتكلمن عنها بكسرة خاطر
ماتحب هالنظره هي وانجبرت تسمعها واتعايش ايام ماهي بايامها

الهذا اخذت عهدن على نفسي

مااتجوز لين يدگ گلبي دگت العشگ
مااورط حرمه وياي وانا عارف البدوي مايرهم بليه عشگ ان مايدگ من اول يدگ من تالي
وساعتها يهد كلشي ويتبع دكات كلبوو

نمت بذاك اليوم بعد تفكير اطويل انتها براحه على وضع الوالده

احس الكل منسجمين

ثاني يوم خلصتوو مع ربيعتي
وبعدها يوم طلعه للسوك يوم نروح للگهوه يوم همه جوو عندي
جراح يجي بالليل مانشوفوو الثاني يوم ع الموعد

انا وسجاد والربع يوميه نتردد البيت الساده
ليلة السابع رحنا لهم ورجعنا من المجلس متأخرين
ثاني يوم صحيت الصبح من نومي شفت الكل كاعدين
صوت الباب يندگ طلعت ورن جوالي

...

مرام ..

الايام.الراحت كلها حبست نفسي اقرا اعرف كميل راح يمتحني قبل ليوافقون ع الروحه
شفت الكل متحضرين حاجيت كميل

..كميل اني قريت امتحني حته اروح وي امي
قاطعني صوت ابوي

..وين.ترحين ودراستج وابن اخوج منو يمه

..بابا صار كم يوم ادرس عفيه لاتحرمني من الروحه

قاطع كلامي وهوه بالباب يريد يطلع

..ماكو روحه كعدي واقري وعينج على ابن اخوج

ايست من الروحه ونزلت دموعي واني عيني ع كميل وامي

حاجاه كميل سيد اني امتحنها وخليها تروح حبوبتي تريدها قبل شويه حاجتني

باوعلي ابويه وهوه يحاجي كميل شوفها اذا مكمله خلها تروح شريد منها بس هيثم ياهوو اله

..يابه اني اظل يمه باجر مجاز خلي يروح ويانه وبالليل اجيبه وارجع

..براحتك ..خليها تروح ام دميعه تعرف شلون تقنعني

اووف
اليوم اني فرحانه حيل رايحه البيت جدوو واخيرا بابا سمحلي اروح لان امتحاني باقيله يومين وبابا حاول يمنعني بس شاف دموعي نزلت وافق حبيبي ميرفضلي طلب اكيد تنزل دموعي هوه اني اكدر افووت هاليوم اووف اليوم عدهم الاجواء غير
اجواء محرم ماانكر دور كميل بموافقة الوالد لو مو هوه حته دموعي هم ميشفعن الي

الليله سابع محرم رغم الألم الي يجتاح انفسنه والشعور المؤلم الي نحس بي لكن نتحضر بلهفه الهذا اليوم بالذات لأن من صغرنه نجتمع كلنه النساء ابيت جدوو وعمامي واولاد عمهم يسوون العزاء ابيت عم ابويه فرق بيتين عن بيت جدوو.

الحد ساعه 12بالليل النساء تروح ويبقن بس امي ونسوان عمامي
ويبدون عمامي بالطبخ يسهرون همه وبعض من عماتي للصبح ويبدلوهم الناموو بالليل امي دائما شغلها الصبح هيه الي تشرف ع الصب واحنه البنات نوزع عادي منطقتنه كلها اقارب وناس تعرف ناس محد يتعرض الوحده بينه ابد اصلا ولد المنطقه همه الي يحمونه ومنو المارايدته امه ويگرب صوبنه
طبخنه بالليل واني وياهم عيوني راحت من ثرم البصل وكل شويه ويجي مصطفى يقلد عليه

..لچ يرادلچ تانكي من العطور انغطج بي ومتروح منج هالريحه

ضحكت
اني ومصطفى اصدقاء كلش وبيناتنه ميانه حتى هوه يشكيلي ويفضفضلي عن حبه الممنوع الرمله بت عمي اشووف عيونه شلون.تتغير نظرتها من يشوفها تساعد ولان امها تدري هيه تحبه وهوه يحبها
اليوم مخلتها هنا اخذتها وراحت وياها
جنت اشووفه يكابر ويسوي نفسه مو مهتم بس اني اعرفه رديت عليه ردته يغير مزاجه بالعناد وياي

..هيهيه نننه عيبت عليه مدام اني مسويته الوجه الله وبثواب سيدي ومولاي ابا الفضل ميهمني ولا اهتم الك انت حير بنفسك وبعدين انت مو اقل مني شوف ريحة الدخان البيك تسطر جنت تحضرلهم الحطب موو

..ههههه لچ اي غير الدنيا اطوورت والعالم وين صارت وحبوبتج بعدهي ع القديم ماتطبخ الا على نار ياريت لو هيه التطبخ صدگ بس حزامها وجفجيرها بيدها اليكول هيه ام الطبخ  وعمامج رايحين بيها

..حبوبه وجودها كافي لك هيه الاسست هالمراسيم وولدها يسوون على خطاها يارب تنعاد كل سنه بوجودها وسلامتكم كلكم

..امين حبيبه ..نامي ارتاحي باجر ورانه توزيع انتن الشارع بيتين وتكعدن واحنه يودونه المنطقتنه والمناطق المحيطه بينه وهنوب عمي ياسر السنه بدوامه العوائل المتكفلهن السنه صارن مسؤليتي اني وكميل

..ها الله يقويكم انت بس لاتتذمر وخلي هالشي بثواب الامام والوجه الكريم راح ترتاح وماتحس بتعب

..ان شاءالله ..يلله روحي نامي امي وصتني عليج

..ياخويه شوصتك هوه وين انه غير بنص اهلي روح نام وبالك مرتاح انه مانام لمن يخلص توزيعنه وشغلنه يلله
حاجانه عمي احمد

..بابا بدون ضحك وسوالف الليله ليلة عزاء هذي الليله ليلة الكفيل استمعوو للزياره وبس

ركزت مشغلين زيارة عاشوراء سمعتها وگلبي ملهوف الزيارتهم بس الصوت راح يخليني انعس
اخذت الهتفون وشغلت قصائد الملا باسم
اخذت النومي اسوود اطحنه احنه نسمي نومي بصره ليش ماادري
شويه وريحة الطبخ بدت تفوح طابخين عجل على تمن بحشوو ومرگة طرشانه بس تخبل المنطقه كلها تنتظر طبخنه كل سنه بهذا اليوم
من الصبح اجوو الجيران خلوو يمنه جداري عليها اسمائهم احنه اتصلنه بيهم بيت بيت حته نحجزلهم وعلى راحتهم ياخذوه
والباقي احنه نوزع الهم

جاي اشتغل وعمتي ام جلال زوجة عمي احمد انطتني اللوز لازمه سلگ والالوچه لازمها غسل وتنكيع
حته الفجر يبدون بطبخ الطرشانه

اجت حبوبه ضحكت من شفتها تذكرت مصطفى
صح كلامه تفتر بجفجيرها وجنها هيه التطبخ

حبوبه طويله متروسه بعدهي بحيلها الي يشوفها مايكول هاي الجناين.والاحفاد الها
حته اولاد احفادها داير مدارها

بيضه بحمار عيونها ملوونه
داگه دگ فوگ حاجبها ولايكعدن نسوان گبل يحجن.علي امهات التاتوو وهنه مسوياته گبل لايخترعونه اصلا حبوبه منهن داكه فوك حاجبها اخضر
وبحنچها تلث دگات بس يخبلن عليها ماادري لان احبها اشوفهن حلوات

من غير چفها الي متفننه بنقشه حته من تطلع تلبس كف ايد تكول حرام وگبل ماچنه نعرف الحرام.من الحلال ماكو وعي هسه

حاچت عمامي وهيه تفتح الجدوره

..گواكم الله اولادي  شدوو الهمه ولاتلتهون بهذا التليفون عوفوهن بس اليوم لو ماتكدرون

..ضحكت وكلت العموو بيبي بدت مشوارها

دارت عليه حاجتني

..ابدال هاي السوالف والحچي مالتجن المابي فايده
اقريلنه شي بصوتچ سمعينه

قريتلها القصيده الي تحبها

اه يبني شگول اعليك اه يبني

دولبني زماني بيك دولبني

دولبني زماني بيك ياسلوى

شلون انساك وانسى ايامك الحلوه

امك جابتك يمدلل وحالت

نالت من ثجيل الحمل مانالت

كملت باقي القصيده راحت هيه وكملنه شغلنه

كملنه الليله شغل وتعب بس شعور بداخلنه مينوصف

صار التوزيع اخذت وجبه ونبراس بنت عمتي وجبه وطلعنه كل وحده لزمت جهه من الفرع

اني امشي واتذكرت اووف هذي القطعه الجانت مصدر رعبي وشكم موقف صايرلي بيها صارت ڤله وبدل ماجنت اغمض من الخوف من اشوفها صرت بس اريد اشوف جمالها
بالعافيه ع الساكنها شنو هالجمال والترتيب
دكيت الباب
ماكو رد رجعت دكيت
سمعت صوت قرب ع الباب بس يتصل

..يالأخوو انت ظل معي لاتسكر خلني اشووف واردلك

استغربت اللهجه حسيت الباب انفتح دنگت راسي وگلت

..السلام عليكم
..واعليكام السلام ورحمة الله

..هذا ثواب من بيت العلويه للامام العباس عليه السلام

..عسنه واصل والنعم من ولد البدويه

..ظليت واگفه وهوه واگف ربكتني نظراته ..عفيه بس الصينيه حته ارجع اوزع بيها الصحون خلوها يمكم عادي

سرحت وانا اشوف هالحلوه جدامي فيها شي غريب يسحر وكاني ماشليف بنات بحياتي
طولها نتوسط ناعمه وجهه دائري بس كلشي فيها ناعم عيونها فيهن لو غريب تحسهن ملونات من تركز مابهن لون

شتت تركيزي صوتها وهي تريد الصحون

..ناديت  حرمة جراح ميثه ميثه  اكلطي هان.. خذي من يدي هذا ثوابن

درت عليها  من وين گلتي يابنت

جاوبته بارتباك احاول اعرف هذا منين عراقي لا بدوي خليجي تاهت عليه كتله

..هاا من بيت العلويه

..ايه گلتيلي لكني نسيت يلعنها من ذاكره جيبيلها الصحون ميثه
صديت صوبها ونشدته بدون تفكير

..وش اسمچ يبنت

..ها ..متفاجأه ومامصدگه هذا شنوو عراقي لو شنوو اشوو مسمعانه بلهجته ابد ولا عندي فكره عنه عبالك كاعد اباوع مسلسل بدوي

شفت.ارتباكها وخجلها اصريت اكثر
..گلت وش اسمچ

..مرام

..عز انچ ع المرام..

حجيتها بصوت عالي حسيتها ارتبكت وشبلاك يركاد هذي عيبه بحگك وحك اهلك
موكف بنات خلگ الله واتنشد واتغزل بعد
نطيتها الصحون وظليت اناظرها شفت مصطفى جاه صوبها
افاا هذي بنت الساده ربيعة خويي الله يستر عليها
دخلت للدار

ناديت سجاد

..يولد فيه بنت جات تطعم الطعام ثوابن للأمام
والله انها ملاك منزله من السما كأني زودتها معاها مدري وشبلاني والمصيبه اطلعت بنت الساده ربيعتك

..ضحكت وانت اي بنت حلوه تزودها معاها اجل شساويت بديار الغرب ..يخوك الا بنات الساده وبنات منطقتنه كلهن لاتگرب صوبهن سايم الله عليك ماهن من هالنوع

..والله انك بلا حيا وش شايف علي اضحك على بنات خلك الله ماني من هالنوع صح اتونس ارافك بس بنات الاصول ماگرب لهن الا هالبنت اهي اجبرتني كنها خشت مخي

..اياك حب وانحب بعيد عن الساده ونسبهم صعبين يخوك.ماينطون

..خلني اتوكد من گلبي والصعيبه ماتصعب علينه حنا ارجالها

يتبع..