رواية عشق المومنين(أبناء الساده) الفصل التسعون 90 - بقلم نازك الحمراني

السلام عليكم..لاتنسو اختي سجى من صالح دعائكم...
١...ذي الحجٓة
مٓتبآركينٰ بـزَواجْ النوُرينٔ

‏عن رسول الله صلى الله عليه وآله وسلم
(أنما أنا بشر مثلكم ، اتزوج فيكم وأزوجكم إلا فاطمة ، فإن تزويجها نزل من السماء))

............
زينه///إما عِشقٌ بِطهارة أو وحدة بلا ذنب

من رجعت من بیت عقیله اخذت الجهال بيدي سيد علي ودره وريماس انخلسو من الصياح الصار

اثناء رجعتي البيتنه أجوي شرطة للفاتحة چان مجتبى حاير بالناس التجي
عقيلة رجعت تايهه متدري بالدنية شنو صار بيهه ام مهدي دائما ضغطهه مرتفع وانطيهه حبوب تنام بقيت وحدي بالفاتحه ماعرف بيمن احير

احير بريماس لو بالناس الجاي يعزونه لو احير بقهري على شباب سيد مهدي وهو ابن اعز اخو ابن سيد صادق الحنين

من غير مشاگل ام عامر طلايبهه الطلعهن من جوة الكاع

وسيد علي من يمشي ويباوع بالوجه لا ابوه يمة ولا امه وكل شوي يجي يحط راسة على حضن بيبيته لو حضني لو حضن سيد مجتبى من يجي يمنه شوي

ماچنه طفل عقله چبیر مبطل سؤال عن ابوه..ومن يسال ميريد يگول میت بس یوگف جدامنه یگول

-بابا وین لاح(راح)مایحبني عافني هنااا
ماما ليش ماتجي تاخذني وينهه ليش عايفتني دره اختي اريدها ليش تسكتون

جاوبته ام غفران

-بيبي أكعد يمنا لا تضيع انت رجال صرت

يصفن علينا ينزلن دموعه بلا بچي حتى يثبت النه هو مو زغير..من يشوف ماكو جواب یلبس گمامته السوده ويروح العمه

احاول ادير الفاتحه رغم العاملات بلبیت علی قدم وساق..وگرایبنه العلاوي وياهن شالن الفاتحه

ريماس متعلقه بيه وبعقيله اكثر.بقت يمي
تبچي الى ان غفت بحضني گومتها لان گمامه ونفس النسوان خلیتهه بلغرفة والتهيت بالقراية

امي هي تستقبل النسوان ام مهدي متقبل تدخل للغرفة تنام تغفى بمكانهه وتفز على صوت النسوان وبچیهم

التزمنه بتعلیمات السید وکتبنا

من طلعت من الغرفه لمحت ميسم وام ميسم بين النسوان مصدگت شجابهه منو ذكرها بينه

عيوني غوشن من البچي لمحت ميسم لابسه اسود تنورة وقميص شيفون اسود وجواه بدي اسود ميستر شي لان كلشي طالع على راسه شال اسود خفيف
دقايق وكامت هي وامها اجني سلمن واخذن من خاطري

وكفت رديتلهن السلام والعاملات يصبون الغدة صوت ام عامر واكفة وتصيح بين النسوان

ـ فدووواتك ررربي بينت حوووبتي بيهم بينت حوووبة ااابوية الرجال العجووز الخلص عمرة يخددم بجددهم ابو عمامة الحظ والبختت

ـ اانتي شبييج ليش بس تتعاركين وولچ وهاي ياأاا حووبة ياضالمة متخافين الله يضربچ بصحتچ وعافيتچ

تخصرت من جوه عبایتها تعیط

ـ مااااامسووية شي حتى يضربني فااارغة من أكل الحررام قابل مثلكم صعدتو على اچتاف الناس المسكيينة

ردت اعبرها لزمني النسوان عطت بيها

ـ والله العظيم ااذا انهد عليچ راح اشوفچ آنجوم الضهرتشمتين الموت مابي شمااته

ـ اشمت واشمت حق آبوية حقنة ااااخذتو شووفو شلون بعد سنين طلع بيييكم

ـ حقيش جباانة يااحق التحچيين بي ولچ اامج لو ماخوش ادمية چان كلت اانتي بنت حرااام مو بنت(ام راهي))

ـ اي ززين تتذكررين (ابو راهي)هذا ابوية النكسر ضهرة عليكم تالي مانطيتو حقهة وصارت ثروو ااابوچ بالملاين وابوية بقى فقيررر ماعندة يااكل

ـاي اي ااافلوس وياحق الاخذناه خلي الجدر مستور هو اابوچ چان یشتغل ابوية حاله حال ابو سلام جد عقيله من كبررر أبوي نطا فوك تعب زياده ورااااااااح اانتي شتخررطين لو عاجبچ تاخذين كتلة منيي

رفعت ایدها تصیح

ـ اسمعو يانااس ابوية كسر ضهررة يشتغل عدهم ويداري املاكهم ويكبر بگیعانهم تااالي بس شوووي كبر سرحو من شغلة وعاافو ولكم حتى بيييت مانطوو يادوب خمستالاف دينااار انطووو وطلع
وهو سننييين ویاهم محد منهم يعرف عن الشغل شي كلة بيد ابوية همه بلاا ابوية الله يرحمة يضيعوون وفلسوهم ترووح

ـ وشهد شاهد من اهلهااا سمعتو ياناس يعني لا ابوية شارك ابوهه بفلوووس ولا اخذنة منهم شيي تحاسبنة لان طلع ابوهه تقاعد من شغل ابوية

انتي انسانة مررريضة يا ام عامرر حتى من تحچين الله يوكعج بشر اعمالج تريدين تشوهين سمعتنة اشوهت سمعتچ انتي بينتي للناس شكد وحدة متستحي ومتخافين الله

ووچ ضربتي مرة ارملة وحامل بدون اااي سبب غير حقدچ التارس كلبچ مافيد وياج طرد والاحجي أبتعدي عنا وعوفينه بحالنا

وهنا النسوان بيهن اليهدئن بينة وبيهن الساكاتات ويسمعن فضايح شوي وهنا من سمعنه ابوية اتخربط ونقلوه المستشفى

غميتهاطلعت اركض مالحكت بابوية ردت اخابر مادري وين شامرة تلفوني التفتت يمنة يسرة ماشفت سيد علي اكيد وية عمة راح رجعت دخلت الغرفة حتي ادور تلفوني شفت ميسم بيدهه ريماس...

جاوبتها
-ها ميسم خير

ـ سمعت صوتهه تبچي واجيت عليههة

ـ زين اتذكرتي عندچ طفلة

ـ عيب تحچين زينة اني مناسيتهه اصلا حتى اتذكر بيهه

ـ اي صح.. جيبيهه خلي اوكلهه

ـ لا أخذهه ويايه بين متخلص فاتحتكم
وتعالو اخذوهه

ـشنووووو تاخذيهه منو يكول ابوهه يقبل

ـ يعني بقائهه يمكم شراح يفيدكم اشو الكل ملتهي عنهه

ـ احترمي نفسچ شنو ملتهين عنهه شفتيه وصخة ملابسهه لو كاتلهه الجوع لو لايجة بالشوارع ومندري بيهه بعز مصيبتنة وعينة عليهه وشايليهه على راسنه

ـعمة ماقصدت هيچ ادري بيچ ممقصرة وياههه بالعكس بس كلت اخذهه هالچم يوم بين متخلص فاتحتكم ورجعو اخذوهه انا اصلا بهالايام ماعندي شي

ـاستغفرت الله وكعدت بمكاني حتى نسيت ليش دخلت الغرفة ونسيت ابوية اتخربط..

-انتضري خلي يجي سيد مجتبى وكليلة اذا قبل اخذيهه ما اكدر انطيچ موافقة من يمي

ـ اي طبعا متكدرين تنطين موافقة قابل انتي ابوهه لو امهه..

حچت هالكلمتين وعافتني وطلعت... دخيلك ربي هالناس جاية تتعارك بالمصاب ماعدهه حرمة لشي حسبي الله ونعم الوكيل عليهن

كعدن النسوان يتغدن استغليتهه فرصة ورحت لبيت سيد مهدي حتى احضر ملابس آلريماس خاف تاخذهه وياهه

واجيب ملابس لسيد علي المفاتيح عندي فتحت الباب ودخلت ورجع كدامي شريط الضرب لعقيلة من ام عامر تحسبنت

فتحت باب الغرفة شفت الكنتور مكلوب ومفتوحه كل بيبانة استغربت مانتبهت على هالشي البارحه من اجوي اهل عقيلة واخذو عقيلة والجهال وجنطة الوثائق

التهيت بريماس لان سمعتهه تبچي مدذكر البيت جان هيج لو من قفلته بعدين انفتح عفت كلشي وقفلت البيت ورجعت لبيتنة بالطريق شفت هوسة يم باب سيارة شرطة واكفة ونازلين منهه اثنين زلم رحت اركض لبيتنة..

ـ نعم تفضلو

ـ جاين على(ساجدة عبد)ام عامر عليهه شكوة

ـ هذا مووبيته يصير بضهر بيتنة بيهه من ذيچ الجهه.. ليش منو مشتكي

ـ شكوة عليهه من عقيله ( ام علي) تهمتها بلضرب والتعدي اللفضي والجسدي بناء على تقرير المستشفى .. انطيني عنوان بيتهه وين

ـ هذا بيتهه ورانه من هذا الشارع تفوع اول بيت لونة تبني ..

راحو الشرطة بس بقيت مترددة واكل بنفسي لو حاجيتلهم عن بيت‌سيد مهدي يمكن مبيوك .. لا يجوز عقيلة اخذت الذهب مالتهه .. استغفر الله هسة انا ليش تايهه يمي كاميرات واروح اشوف

رجعت آلبيت سيد مهدي رجعت الكاميرات لقبل يوم وشفت عقيله اخذوهه اهلهه وانا طلعت اركض لريماس

وام عامر دخلت للبيت انتقلت للكاميرا الثانية شفتهه دخلت الغرفة عقيلة طلعت اخذت علاكة كلش جبيرة اعرف هالعلاكة بيهه ذهب عقيلة كلش هواي وطلعت ووراهه تقريبا بساعه اجيت قفلت الباب

رجعت للبيت لمحت سيارة ابو عامر شاخطهه ويمشي سريع ومجتبى يركض عليهم وعلي بالشارع صفنت هذا شطلعه وشنووصار

عرفت اكوشي چبير دخلت للعزة سمعت من جنة ام عامر مرة ابنهه جانت تريد تاخذ سيد علي حتى تساومهم وميسجنوهه اضاهر عرفت الشرطة تلاحكهه...

رجع مجتبى من المستشفى وعرف بكلشي وخبر الشرطة وسحبو ام عامر للحبس لان اشرطة الفيديو ادلة قوية بامرر قاضي صدرت ورفض يتنازل عن الدعوة

عمامنة ادخلو بيهه بس سيد مجتبى بقى متمسك برائية وانسجنت ام عامر تلث ایام بس ابو عامر عندة واسطة قوية وكدر يلكة ثغرة ويطلعهه بكفاله..

مجتبى//أمّاهُ يا زَهراء ،روحي مُتعبة قلبي مكسور.يميني قطعت،ظهري أنحنا اماه يازهراء رَتليّ علىٰ قلبي آية الإطمئنان

اول ايام من فراقي الاخوي چنت اروح اصعد للسطح أکعد بزویة اسوي الشي المااكدر اسوي جدام الناس

اصرخ وصيح وا بچي بحرگه مثل طفل یرید امه بحیث بچیت الی ان تعبت مددت جسمي على شتايكر السطح ونمت بعد سهر ايام تعب وركض

بعد مده من مرت ايام من العزا صعدت للسطح هل مره مو بچیت مجرد عيوني جامده صافنه علی السما ماعرف شنو اسوي..
عقلي وروحي وگلبي كلمن بجهه یدورن

ثالث مره..صعدت للسطح عيوني آلفراغ افكر بسيد مهدي شگد محتاجه مو بس انا مرته جهاله جدي امي المن عفتهم اليه

اما قاومت حزني ختزلت ادموعي الحاره لازم افكر وافكر بشي الاجل احبابي وجهال اخوي

بقيت أفكر شلون اعتني بناسي..وشلون ارضي الكل بدون ان ازعل واحد منهم
...وفوك هل شي ممتعود اخدم غيري عايش النفسي زين سيد مهدي اشلون مراضيهم كلهم

امي بقت تتقبل استشهاد سيد مهدي او مصدومه لان صبح ولليل كاعده بطارمه
واتنتظر جيه

عقيله خايفين عليهة انه او ام غفران نفتر بيهة من طبيب لطبيب..مامريدها توصل مرحلة الانهيار

كمت امسح وجهي خلاص شئت ام أبيت انه الوحيد البقيت وبركبني اربع عوائل

اجت ميسم طلبت ريماس تاخذها وياها
رفضت اول مره بس قتنعت گالت

-انت براسك الفاتحه واهلك واهل اخوك خليها يمي ايام وتعال اخذها

ودعت ابنيتي والدموع ترسات عيونها بس اشوف روحتها چم یوم احسن من ِآن
تبقی هنا والظرف صعب

خربطت عقيله..رحنا كل احنا للمستشفى
گالت الطبیه

منوو بیگم من اهل المريضه هنا
جاوب جدي

-احنه احنه بعد عمچ احنة هذا الیمی أخو زوجها يعني اهل زوجها وهاي امهة وخالهه وانا جدها

جاوبت

ـ انريد احد منكم يوقع على العمليه لان المريضه حامل وجاي تنزف وحالتها خطره

ـ عملية شنو بنتي ياستار

ـ لازم نتخلص من الحمل ونظف رحمها
ولازم موافقه من الزوج او اهلها

رد جدي
- شلون تريدون تقتلون الطفل

جاوبت
-اهم شي سلامة مرت اخوي ياجدي نوافق؟

ـ والطفل وليدي هاي روح وامانة اخوك

ـ وعقيلة هم روح وهمين امانة اخوي وهسة صارت اب وام لطلفين بعد ابوهم

دكتورة سحر من بعيد اجت علينا تمشي بسرعه تعدت الممرضه والدكتوره

-صبرررر دكتوره صبر اي عمليه تقصدين متستوجب النزف وقفنا الحمد لله

-بس الطفل بلا نبض چيكتهه وشفت مابي نبض

- خلينا نتاكد اكيد الجنين يكون مرهق بالنزف و لاتنسين المريضة هواي تعبت وتعرضت لعنف جسدي وهالشي حتما اثر على الجنين

-بس يا دكتوره تاكدنه وانتي جنتي ويانه

-اي صح بس اريد اتاكد مره ثانيه

-براحتچ تاکدي بس خلي بالچ جاي تصرفين بعاااااطفه
وتعطلين العمل والغرفه ممليه حالات وتاخرنه على مريضات واهتمينه بيهه لان زوجة زميلنه الله يرحمة وحالتهه خاصه

-ميخالف دكتوره بس هل مره
رد جدي

ـ وانا راح اصلي صلاة الحاجة وصلاه الحجة عليه السلام وصلاة الامام موسى ابن جعفر وان شالله تبشروني بسلامة الام والجنين
ردت الطبيبة

ـ ان شالله

-تفضلي دكتورة روحي چیگي المريضة لان وراي عملية مراره الحاله مستعجله
تقربت الدكتورة سحر

-متاكده دكتوره مرت اخوي ابنها يطلع مبي شي

-سید مجتبی گول آنشاء الله لان ماعرف ليش احساس قوي يكلي الجنين عايش واجيت اخبركم لان هل انسانه رب العالمين مخلي سره عندها خصوصا من توفت بنتها واخذها المرحوم انه ايقنت هي بيهة شي من رب العالميين

-اعتمد عليچ ماتعرفین السید شگد وصاني على جهاله

-ليش گالك تووم

-مو بشكل مباشر بس لمح اليه بالي على سيد علي واخوانه ولان چنت مقهور مرگزت شنو یقصد خوانه من جاوبته گتله آنشاء الله سيد باذن الله راح يصير لسيد علي اخ يعينه على مرضه مثل ماانت عنتني وساعدتني

-والله ياخويه البارحه نقلي البغداد تاخرت لان صار ظرف ويجوز مرت دكتور سيد مهدي الله يرحمة هي السبب وخلاني مسبب الهه

-يارب هسه شنو اسوي

-كمل الاجرات اليه وتنتظرني بغرفتي

-تمام
فرحت بحچي الدكتوره رحت للاستشاريه ومنها بقيت افتر حتى اكمل اجرائات بيتت عقيله بلمستشفى وحجزت
الها غرفه خاصه
كملت كلشي صحت الام غفران اجت يمي

-گول یمه

-خاله حجزت غرفه العقيله وهسه روحي الها رتبي ملابسها حتى اخلي العامله تجيب سرير وتنقلها الغرفتها

-اي عيوني مشكور خاله

-واجبي خاله هي وجهال اخوي واجبي

ـ يايمة مالهه احد هالعقيلة غير الله وانت من بعد الله

ـ بعيوني مرة اخوي وجهالهه

عفتها ورحت كملت الاجرائات الانتظار صعب لزمت نقالي اگلب بصوري انا وسيد مهدي حتى من هو نايم وبيه كورونا اخذت صور وياه...حتى من الاوكسجين مربوط بحلگه اخذت صور..

أنتضر شفت الدكتورة سحر دخلت الغرفتها ورحت وراهه طاير سلمت كعدت يمها

-بشري دكتوره

-مااخفي عليك الوضع يامجتبى لان چانت تعبانه مررره والنزف والاجهاد الي تعرضت اله عقيله فوق الخيال بس أرادة رب العالمين أكبر واكبر

ـ الحمد لله مرت اخوي اشلون صارت

ـالحمد الله وهم ابشرگ الاطفال بيهم نبض

-أطفال يعني

- اي توم وسبحانك ربي يعني مثل ماگال الك السيد الله يرحمه عقيله حامل بتوم چنت اتصور المشیمه متقدمه چنت اتخیل قطع لحم جامده بسبب النزف والضرب بس لحيت بسونار طلع نبض لان تعرف الحمل مو هواي صار اله..

-توووم يااااخويه يااامهيدي ياعضيدي اجاك التريده سند العلي مو بس واحد اثنین ااااخ ياربي فدوه ياربي ماخليتني اتخجل ويه اخوي بشري دكتوره شلون صحتهم

-اهداء اهداء الحمد الله انا والطبيبة ماقصرنه وياهه النزف العدها ميخوف هسه تبقى يمنا فد تلث ايام

وتبقی تحت رعايتنا وبعدها تاخذوهه عادي بس تحتاج راحه نفسية وجسدية جدا ضرورية
وگفت فرحان ودي اضحك لان کدرت احافظ على امانة اخوي

بس حتى الضحكه راحت مني وماتكدر توصل الشفتي

طلعت من الغرفه كاتم حزني بسرعه رحت للحمامات وكفت جدام المرايه منتظر يطلع ولد

ثواني فرغ الحمام وراح سديت الباب رجعت للمغاسل ابچي ومتوجي عليهم
ضاگت بیه الوسیعه یاربي والقهر تعبني

اوگف وارجع اگعد حرت القهر لبگلبي وين اودي لو يطلع ويه الروح چان دعیت علی نفسي

اريد اصرخ اصيح مااااگدر وجع الفراك يموت ياكل الگلب والچبد ثلمه ثلمه

رن نقالي غسلة وجهي حتى محد يلاحظ چنت ابچي مسحت وجهي عدلت قميصي وطلعت

مافتحت النقال اريد ابشر جدي ولگیت ‌دگتوره سحر مخبرتهم وسابقتني بهل خبر

كل الايام صارت سوده..امي اكعد يمها اگابلها اصبر علیها بس من اشوفها حاضنه صورة سيد مهدي وتصرخ تحاچي اموت واموت الف موته

اروح الجدي الگا واکف جدام الحایط معلگه صورة ابوي وجدي يحاچیهم
اروح السید علي اسئلته التخليني عاجز اجاوب عاجز أحچي

مرت الايام وانه اركض يمنى ويسرى بين والدتي صحتها بنازل وبين جدي كل اشوي يتخربط ويوكع بسب جفاء وحقارة عمامي وتمردهم والكل يطالب بلبقايه مال ورث

جدتي تخاف على ولدها وتريد تنطيهم حصتها وجدي وزينه يرفضون تنطي
وهي تريد رضاتهم لان اكثر وقتها يمهم

بعد ايام وجع رجعت أداوم واشوف الدنيا مو هي مثل ماچنت اشوفها حسیت بتفاهتها بعد مچانت حلوه بعیني حسیت بگل خطوه امشیها سواء للشغل أو للبيت انا الشخص الوحيد حزين بهاي الدنيا

اتناوع للوجوه الناس تضحك رغم كل واحد فاگد اله عزیز لیش انا وگفت الدنیا
لیش بقیت اسیر الحزن والقهر

هواي بصلاتي احاچي ربي واگله ربي انا ماأستحق اعيش لان چنت عایش بحس أخوي هسه أخوي مات چنت مدلل بجاله
وهسه خلافه‌تبهذلت

حاولت أخفف وجع گلبي ودموعي الحابسهم حتى ابقى قوي جدام جهال أخوي، زوجته،وجدام امي،و جدي
صرت ألتقي بكل شخص علاقته طيبه بأخويه عسى ينطيني موقف اوسالفه عن أخوي مااعرفها

وهاي السالفه أعيشها بكل تفاصيلها
ألاول مره أحس بعجز من روحي بعجز من الضحكه
بعجز حتى من ملابسي مااكدر أكمل حياتي بعد اخوي وذا أكملها مو بشخصية مجتبى الطاك الدنيا چلاق

آگملها بشخصیة اخ فاقد أخوه وهذا اصعب شي
مرت عشرين يوم على فراق اخوي هل فتره كبرتني دهر الشيب ترس شعري

اول مره اتناوع الوجهي بعد عشرين يوم
واشوف لحيتي الشيب مغطيها..شعري
الشيب واصل للفرك وماادري

وهسه عرفت من يگولون قهر یوم یگبر
عشرین سنه....صحباني وسفراتهم هجرت
احاول اطلع جهال أخوي الي متنزه وبين أركض بعلاج وتهديد عمامي المستمر

بيومها رحت للدوام بس مكدرت أكمل لان الدنيا ظلمه بعيني اخذت اجازه وطلعت بوجهي للنجف أشكي همي شوقي
الاخوي

الطريق بلا توقف سقته الشوق نساني العطش والحوع..زرت امير المؤمنين رحت بوجهي للمگبره

كعدت يمه كبره لازم بطل المي وعلاكه بيها قران سيد مهدي وضياء الصالحين ومسبحته محبسه بيدي
كعدت وحدي يم الكبر التفت يمنى يسرى محد هنا

فرصه اريد افرغ دموعي المحبوسه من ۲٠يوم بجيت يمه الى ان فرغت كل دموعي طلعت كتب‌ اخوي من العلاگه وقريت سورة(يس)قريت زياره عاشوراء كلما اقراء اذكر صوته الحلو

الحظه طلعت موبايلي من ٢٠يوم اقرا زيارة عاشوراء المرضى كورونا يصبر عليهم طلعتها وشغلتها ابچي على صوته
ودعائه العذب

دموعي نزلن الى ان خويت خليت العلاكه جوه راسي تمددت طول بطول عیني للقبر وولنمل الییمشي بعيد من عنده

رجعت الذيچ الحظه من طلعت من الغرفه اجيب علاجه

تمشيت صالة المستشفى اعرف بوقتها من رجعت للغرفه بيدي فايل أخوي اول مادخلت عليه وهو ساجد

شميت ريحة الموت شميتها ودخلت بانفي مو حچي لا مثل ماتشتم ريحة الخشب المبلل لا ريحة الكافور بلمغيسل.. لمستها بيدي شفت جسمه اخوي بارد متصلب هنا عرفت للموت ريحه تخوف مرعبه تاخذ كل عزيز

هواي بچیت مثل الي أنگفخت علی راسي جسمي يختض وصوت اخوي الحنين وايده الدافيه وكلامه المرتب

-سيد مجتبى أگعد وووین جاي هنانه أگعد نتلفت ملابسك تراب وانت نازك

التفت فاتح عیوني ردت أحچي حط ایده علی ظهري والثانيه على حلگي وگال

-لااااا تحچي يخوي‌ بس گول انا لله وانا الیه راجعون ولا حول ولا قوة الا باالله العظيم
وخر ایده ورددت(انا لله وانا الیه راجعون ولا حول ولا قوة الا باالله العظيم )

-اشلونك عضيدي

جاوبته بدمع وقهر
-اليضيع عضيده يبقاله لون يخوي الفراك يعمي

-اريدك تقراء ويايه هذا الدعاء((اَللَّهُمَّ لَكَ الْحَمْدُ وَلَكَ النِّعْمَةُ، وَلَكَ الْمَنُّ، تَكْشِفُ الْعُسْرَ وَتُعْطِي الْيُسْرَ، وَتَقْضي بِالْحَقِّ وَتَعْدِلُ بِالْقِسْطِ، وَتَهْدِي السَّبيلَ، تَبْارَكَ وَجْهُكَ سُبْحانَكَ وَبِحَمْدِكَ، لا اِلهَ اِلاَّ أَنْتَ رَبُّ السَّماواتِ وَرَبُّ الْاَرَضينَ وَمَنْ فيهِنَّ وَرَبُّ الْعَرْشِ الْعَظِيمِ((كررته بيقين ورددتاَللَّهُمَّ لَكَ الْحَمْدُ وَلَكَ النِّعْمَةُ، وَلَكَ الْمَنُّ، تَكْشِفُ الْعُسْرَ وَتُعْطِي الْيُسْرَ، وَتَقْضي بِالْحَقِّ وَتَعْدِلُ بِالْقِسْطِ، وَتَهْدِي السَّبيلَ، تَبْارَكَ وَجْهُكَ سُبْحانَكَ وَبِحَمْدِكَ، لا اِلهَ اِلاَّ أَنْتَ رَبُّ السَّماواتِ وَرَبُّ الْاَرَضينَ وَمَنْ فيهِنَّ وَرَبُّ الْعَرْشِ الْعَظِيمِ))

گال
-عفيه بعضيدي...اسال الله ان تبني لك الملائكة بيتا في الجنة ويسموه بيت الحامدين الصابرین

ردت اضحك وجاوبه لان رجع النصائحه الحلوه بس رن نقالي نصيت راسي حتى اشوف من المتصل فعلا يرن والمتصل ميسم غلقته منها بغضب واعرف تريد تقنعني تبقي (ريماس)يمها بعد اسبوع

رديت رفعت راسي تتناوع السيد مهدي مالكيته اختفى گمت فاز مقهور ارید ادوره وينه اصيحه

رأسن كعدت من نومي أصيح بدموع و بحقيقه مررره فززتني من حلم چان مصعدني السابع سما فزیت واگع علی وجهي السابع ارض وصوتي مبحوح يصيح وينك عضيدي وينك وينك وينك
وكفت والتراب تارس ملابسي ترس

رفعت راسي السماء المغرب صاير هسه عيني ألقبر اخوي لملمت غراضي ودعت سيد مهدي بست القبر وقبل لا اطلع تمشيت خطوات لكيت مريه وابنها عدها چنبر كاعدين يبيعون ماي طلعت من محفظتي افلوس

-تفضلي خاله بلا امر عليچ يوميه علگي بخور ورشي على قبر عضيدي مي ورد

-تدلل يمه الله يصبرك بس مووو هوايه

-ميخالف خاله يوميه علگي بخور
ابتعدت والفلوس هي دفعت بلا عن اخوي..

تمشيت الى حضرت امير المؤمنين أكمل زيارتي وصلت للحضره ويه اذان المغرب خليت التربه اجى يمي يصلي السيد سرمد الباكستاني مثل كل مره يبچي دموعه ابد متنشف ولا حسرته تنتهي

چنت اگول هذا السيد يخلص عمره بس بچي الدنيا حلوه..بس بعد افراك اخوي
صرت افرح اشوف واحد يبچي حتى اگابله وابچي وياه

سلمت علیه صلينه سوه انا ويه من كملت صلاتي على صوت نشغاته كمت زرت بداخل الحضره صليت ركعتين رجع موبايلي رن فتحت خط

هاي امي

-هلاااااا يمه

-وووينك بالي عليك ليش مااتشيله

-والله يااايمه مشغول

-تعال ابن مهدي خبص الدنيا يبچي تعال اله يمه الولد لاااا يموت من البچي وين انت

-،جاااي مااتاخررر

ودعت الامام وطلعت بسرعه اسوق سيارتي اريد اسكت دموووعي لان الحلم والدعاء باالي ویجوز عضيدي اجا‌ عليه ينبهني على(علي) ماااصنت الامانه

سقت بسرعه وصلت البيتنا صوت علي يكسر الگلب یصیح (بابا‌ تعاااااال حموت علیك عوف الناس الله هوو
يطيبهم))

وصلت يمه چان متمدد علی مرمر یبچي وامي وجدي وعمه زينه يحاولون يسكتو يمه موبايل اللعاب وهو ولااا
باله بس البچي

شافني كام ركض عليه نصيت حضنته شلته احاچي

-هااااا سيد علي مو كتلك اليوم اتاخر وانت زلمة البيت
ليش تبچي

-مااجى بابا انت كلت يعالج الناس يعني الناس اهم مني

-لاااااحبيبي هذا شغله وانت مو گلت اگبر اصیر طبیب مثل بابا

-لاااا ماصیر مثل بابا لان شغله خلاني وحدي ماما بلمستشفى احتي(اختي)عد عفران(غفران)

-لااااا دكول وحدك انا وياك

-لااااا انت هم تروح للمستشفى مثل بابا وهم راح يجي يوم تروح هناك وماترجع مثله
الكل بچى من حچي سيد علي وانا مطلوب مني اصيرر ويه كل موقف صلب وماآبچي بلعت الحزن بلع مثل واحد يبلع لگمه غصب جاوبته بحة صوت

-يله عموو تعال نتمشى بشارع

-وحدنه جيب ريماس حتى تلعب ويانه

-يومين وتجي انشاء الله

عقيله/امير المؤمنين يقول بحب فاطمه
حبيب ليس يعدله حبيب..
وما لسواه في قلبي نصيب
حبيب غاب عن عيني وجسمي..
وعن قلبي حبيبي لا يغيب...
.................
بعد الصار وفاجعه موت حبيبي براسي
ماتطلع فصلت عن كلشي عن العالم حياتي اتواصل بيها على كد الصلاة وقرائة القران

جسمي كله أنخرر،الفراك صار طلقات ناريه زرفت كل عظم كل خليه بجسمي وصرت عاجزه حتى عن المشي

صوتي الچان احچي بيه ويه جهالي رجع اختفى،وتلاشا

جسمي چنت أداري جهالي صار عاجز حتى من الملابس

الاكل طعمه مره بحلگي وذا وصل البلعومي،يصير راسن غثيان

بيتي الچان ونستي وومملگتي وطني،
انسد ونغلق مثل گلبي،لان المشاكل لعليه چبیره وبس ینفتح تگبر اگثر
المستشفی صارت مگاني ومنامي
المغذي،والعلاجات صارت اگلي وشربي

واهلي الچنت اجیهم ساعة زمن انشلع گلبهم مني غفران كل يومين تجي تجيب يمي دره وتسولف اليه اشلون ادور ريحتي وماتنام على حجابي تنصحني اصير قويه الخاطره بس هذا الشي مو بيدي

هجرت الدنيا وهجرت العالم صرت حبيسه عالم سيد مهدي،بحيث اكره النهار أنتضر الليل يجي سيد مهدي يسولف ويايه وبنهار يبقى واكف بعيد عني لازم مسبحته ويحرسني ولازم قرأنه بس اخلص صلاة العشا يكعد يمي يسمع شگوتي

أربعين يوم وانه اشوف جهالي من بعيد لا اكدر ارفع ايد ولا انزل رجل خايفه عليهم وعلى أكلهم بس مكدر موو بيدي شگد ماقاومت
گومتني ماما تلبس حجابي نطتني النقاب گالت

-یله یمه لبسي راح نطلع انزور سيد مهدي
جسمي المكسر الحظه ردت اله الروح عفت امي ورحت الغرفة المستشفى بيها حمام دخلت سبحت ليفت جسمي
بصعوبه بس ليفت

خلصت لبست وكفت جدام المرايه انشف شعري واشوفه اشلون مبتور ورگبتي من ورى طالعه

ماهتميت لبست الحجاب والنقاب وطلعت جسمي منتعش بعد ايام بلمستشفى متكسر..طلعت تسندني امي غفران عدها بنتي ماشفتها
انطلقنه بسياره انه او ام سيد مهدي وجدي وعمه زينه

بحضني كعد سيد علي..بيدي سبحتي اسبح مره واقراء قران مره ثانيه
رحنا الحضرت امير المؤمنين كل خطوه امشيها اتذكره وتذكره صوته الحلوه يتعمد يقراء بصوت عالي زيارة امير المؤمنين حتى يجون الناس وراه ترفع ايدها وتزور

من اسئله ليش يبتسم يگلي

-زيارة امير المؤمنين شرف مايعلمه اله رب العالمين من اقراء الزياره بصوت عالي..أكو ناس اميه ماتعرف القرائه واكو جاي يتسلى حتى يكص صور وأكو جاي يزور بحب

وفطره مايعرف عظمة اجر قرائة الزياره فمن يسمعوني اقراء بصوت عالي وحنين احرك مشاعرهم فيجون اليه يسمعون بخشوع بهيچ احصل اجر الانصات واجر جذب عدد حقيقي من الزوار حتى لو چانو اثنین تلاثه

وانا مايجبر كسر قلبي قبل لا أعرفچ الا زيارة علي - ع -

من دخلت للحضره هنا اذكر ينتظرني
أطلع من باب الطوسي اذكر مواقفنه اروح الباب النذورات اذكر تفاصيلنه صعب‌المثله ينسي هذا أمني بوكت الخوف ماي بوكت العطش
سيد مهدي أسمه أخترق گلبي وتسلطن وتملك روحي
سيد مهدي ترتيله صافيه حزينه بدعاء كميل والجمعه
سيد مهدي هو الحب والزوج،والوطن بصورته الحقيقه سيد مهدي الخير فيما اختَاره الله وهو بدايَة هذا الخير وختامَه

زرت الامام
وصلنه سيد علي راح ويه عمه مانريده يدخل المكبره لسى انگله سید مهدي يداوم مستشفى..

دخلت للمكبره اسبقهم امشي بسرعه سمعت حچي نسوان جايات ويانه

يگولن
-باع‌حیلها بیه حیلین،تترکض بين الگبور رگض وهناك تچذب على عمتها حتى تشمر جهالها وماتتعب بيهم..ولي
دكول كيفت مات رجلها حصلت منه افلوس تكفي دهر
ولي دگول راح تاخذ حماها احلى من رجلها..

كل كلمه توصل الاذني وجع بس ماعاد توجعني وجع گد وجع موت وخسارة،
وفقد روح تنطیك الحب والأمان

هذا مو بس حالي حال كل شخص يفقد عزيز يبقى ابد مايهتم ولا يكسر گلبه کسر گد الموت..

خصوص لو چان‌المیت عزيز، حبیب محد یعرف شنو زوج یصیر حبیب شنو‌ معنی حبیب الحبیب مو ختیار الحبیب مثل القضاء والقدر
مثل ماننولد،ونكبر
مثل مانموت من دون رأينا،
ولا تدخل من عدنا

المعزه والحب هو اندفاع روح الروح،
ودخول روح ويه ريه روح وذا يسألوني عن الرُّوح ماعندي جواب الها الا مثل ماگال القران ؟هيَ من أمرِ ربِّي.

"فمااگدر اقنع الگل بمعزت‌‌ حبي،ولائي،
وفائي،وعشقي السيد مهدي

وصلت يم القبر بلهفه سبقتهم بحب‌ وعز بچیت یمه وبچییت بحیث ماادري شكد الوقت الي محنبه جسمي وراسي عليه

..ماگمت اله من سمعت صیاح النسوان یگعدون بام سید‌مهدي لان صرخت صريخ ام ثگلی

كل خطوه امشيها ورغم صدمتي بس للساني ماتوقف عن ذكر الله بقيت اردد

للهم اني خرجت من حولي وقوتي ودخلت في حولك وقوتك وسلمت امري اليك يارب
اللهم اجرني في مصيبتي واخلفني خيرا منها))

رجعنا من المقبره،وانه رجعت مثل ماانه اول ماوصلت کربلاء اغمى عليه ورجعت للسکون الحزین الموجع

سید مجتبی///
- قـال امـير المـؤمنين علي' عليه السلام
الْإِخْوَانُ زِينَةٌ فِي الرخَاءِ وَعُدَّةٌ فِي الْبَلَاءِ

فعلا چان زینه وظهر اليه هسه بقيت وحدي افتر بين اهلي وناسي،بلا عزوه صرت كلما اشتاق السيد مهدي

اروح للجامع مره اخذت ويايه سيد علي وقبل لاندخل

كالي سيد علي

-سيد مجتبى اريد اوح للحمامات

-مااااشي عموو

تمشینا للحمامات جاي ادخله وكف سالته

-ليش متدخل

كالي
-عمو نسيت ذكرني شنو أكول من ادخل الحمام الصبح كلتها وكل يوم أكولها بس هسه نسيتها

-عموو ادخل بلاااا لادكول شي

-لالا لا بابا علمني لاااازم أكول
نزلت جسمي كتله

-تدري انا هم علمني وعمري مانسيت تعلومه

-اي شنووو ذكرني

-اول ماتدخل گول ((أعُوذُ بِاللَّهِ مِنْ الْخُبُثِ وَالْخَبَائِثِ))

ضحك وكالي

-اي اعرف بس أحب اسمع صوتك يشبه صوت بابا حتى اعرف ليش نكولها من ندخل الحمام بيها فوائدها هواي
الحمام مكان تجتمع بيه النجاسه فمن نتعوذ من الخبث والخبائث حتى لا يصيبنه اذيه لان الخبث وهو الشر ، والخبائث هو النفوس الشريرة(من الجن والانس،سحر)

-عفيه عليك سيد علي

-لا تنسى انه تربية سيد مهدي

'

- خليني اعلمك شي علمنياه سيد مهدي كال( أحيانًا لا نحتاج الى الكثير ، فقط تنهيدة ترتّل إسم سيّدي ،أو دمعة ندمٍ تختصر كلّ الدهر ، على ذنبٍ شهد عليه المهدي
أفٍّ لدهري .. والخجل !

-احسنت عمو مجتبى

مسحت دمعتي دخلته ونتظرته يم الباب طلع راح راسن
للمغاسل غسل ايده طلع كلنسه ونشفها ورجع توضى هنا

شفت يقلد عضيدي بكلشي توضيت انا وياه صافن عليه وجهه مو وجهه طفل
الحزن تارس ملامحه عيونه مغوركه اندعي بگلبي عسى امه ترجع صحتها وتلمهم

الاشهر ولايام مرت بين شفاء وكسرت جدي بين امي السكر صعد العينها وطفت وحده منهن بين اركض بعلاج عقيله انا وام غفران..الى ان مر أكثر من سبع شهور..صرت اعيش مو النفسي تجردت من عدها ومن تعبها..

لحیتي صارت مرعبه هيچ یگلي سيد علي

-عموو زين لحيتك وجهك صاير هوسه قميصك الاسود مخرب عليك

احاول اجاري لان نريده يبطل بچي علمته
كل يوم صلاة العشاء والمغرب نصليهم بلجامع...

بيومها چنت بدوامي مريت على الغرفه الچان بیها عضيدي.قبل لا يتوفى بساعتين دخلت عليه لكيته يصلي
يشيل التربه كوه الكصته...من شافني

ابتسم كال
-لاأاا تسوي نفسك تقراء تقاريري وانا راح اعيش

جاوبته

-اهووو يا عضيدي لاااا تحچي بنهزاميه هيچ انت انسان عندك ايمان برب العالمين قوي ليش تتاخذل

جاوب بنبره تكسر الگلب

-هااااا هیچ یخوي لو ماانا وانت نعرف كورونا هاجمة اكثر واضعف شي بجسمي كورنا..نسبة كورنا(۷۰)بجسمي

منوو يعيش ويه هيچ رقم وحتی لو طبت وتشافیت بس یرجع ویدمر مناعتي ويموتني

نصيت راسي مقهور من حچیه بس مستبشر بوجهه المورد عکس الصبح چان ازرك

-انشاء الله طيب وترجع العائلتك

-شووف عضيدي انا راضي بلي قاسمه ربي اليه بس وصيتي اطبقهة كاامله

-ماكووو وصيه تعيش تعيش

-هسه ميخالف اسمعني ولا تعبني

-كووول

-عائلتي امانه برگبتك الى يوم الدين وماتعوفهم الى ان كل واحد بيهم يعتمد على نفسه خصوص سيد علي اريدك تعتبره حاله حال ريماس مثل معزت بنتك اريده

-لاااااا توصي عضيدي عائلتك عائلتي لاااااااا تفكر بيهم اهم شي صحتك

گال
-سيد علي اوصيك بيه وليدي مريض وعملية نسبة نجاحهه موو مضمونه

-سيد علي يعمر اكثر من عمرك وعمري بس كااااااااافي تكسررر كلبي الله شاهد عليه عائلتك مايحتاجون اله انت وان شاء الله اطيب
ابتسم والمرض بوجهه

-اعرف سید مجتبی انت كدها وگدود بس(ليطمئن قلبي

-وعقيله ترى وحدها ماتكدر

فتحت عيوني متفاجا

-هااااااا شنووو

-يعني هم اريدك تخاف عليها حالها حال اولادي

-اصونك واصون جهالك وزوجتك والله وحده راح يكون شاااهد عليه اشلون راح من تطلع من المستشفى اخليك ترتاح بلبيت وانا اداريهم..

-بس قصدي

-شنووو قصدك عضيدي
قطع كلامنه جيت امي اول مادخلت سلمت وكالت

-شلونك يمه مهيدي

جاوبها حتى لا تخاف عليه

-الحمد الله كلش زين يمه بفضل دعائچ

صفنت‌علی الغرفه والذكريات اتذگرت من دخلت الغرفة وشفته ساجد علی التربه والنقال يمة ...

آسترجعت ذاكرتي مثل المجنون ادور بعقلي وين النقال لان بالي شي واحد اجى وهووو نقال سيد مهدي ووووينه..

بسرعه طلعت نقالي خابرت امير فتح خط بلا سلااام رأساا كلتله

-اميررررر وين نقال سيد مهدي

- ولك دسلم شسالفه

- كووول ماااكو وكت وين نقاله

-خرب حظي عوود صدك بعد هاااي الاشهررر تذكرته

-ليششش وينه لااادكوول ذبيتة

- لا شسالفة ذبيتة شنو ..خليته هوو ومحفظة سيد مهدي،وساعته والسماعه والچراویه،بعلاگه زرگه،فووك المعرض

- يا معرض منهن الي بالديوانية لو الهول

ـ الي بالديوانية مالت الزلم فوكاهه

ـ متااكد
-اي اي طبعا گلش متاكد...

رگبت سیارني سقت بسرعه..حتى طلعت رون الى ان وصلت للبيت

اقرا دعاء(ياكاشف الكرب اكشف كربي)

بقيت اادور النقال چنت مرتبك وين راح مني ونسيته...جبت درج رجيته على المعرض صعدت

لگیت العلاگه..نزلتها طشرت غراضها الچراویه شميتها بعدها ريحته بيها لفيتها على رگبتي غراضه هواي نواعم خاصه بسيد مهدي من ضمنهم حلقته ومحبس

النقال.لكيته اخذته للشحن لان طافي
انتظرته بعدها رحت للمطبح جهزت كهوتي راسي دمرني

بين اطمأن على صحة جدي..رحت للنقال
لكيته صاير خمسين..دخل جدي للصاله
شاف نقال سيد مهدي

خابروني طلعت من البيت اشوف شكو وليش هدوء..لكيت امي نايمه وعمتي زينه مكيفه لان ريماس اجت

مسج من نقالي فتحته من ميسم كاتبه

-اشوكت اتلم شملنا؟

غلقت موبايلي

رجعت لديوانيه لكيت جدي يمسح ادموعه ويبجي وكف و گال

-بسرعه تعال ویایه

-وین جدی

-انروح البیت عقیله

-لیش هم تخربطت

-لاااا لاااا بس تعال بسرعه

-غير افتهم شكووو

-لاااا تفكر وانه ابوووك بسرعه تعال

انسیت النقال وموضوعه ركبت السياره ركب جدي ويايه..ورجع يبجي بحركه

حاولت اصبر عليه انا يراد من يصبر عليه

گتله

-ها جدي شقرررت على ام علي

-من تقرر الدكتوره يصير خير

-شني معناهة ماتعيش بيت اخوي الله يرحمه

-لاااا متقبل فلكيت الها بيت مقابيل اهلها
شتريته بس يراد ترتيبات اله وتلم جهالها وتعيش بيه

خوش بیت هم يم اهلها عينهم عليها لان عمامگ بعدهم رافعين على عقيلة قضيه تشكيگ بعقلها يردون يأخذون منهة البيت والمحلات والمجمعات والاراضي

_اني موحاچيتهم وأعاركتهم وحاجيت المحامي مالتهم
وگلت اله ترگ القضيه لآ خسرانه خسرانه وسبب گلشي مكتوب بأسم عقيلة والاوراق موجودة

-الطمع نساهم هاي افلوس يتيمه واله حوبة

-يله احسن شي سويته بيت يم اهلهة بس كون اطيب وتفطن على الجهاله وعمامي انا احاچیهم وتعارك وياهم من جديد

-قبل تگدر تتعارك وياهم

-ليش شنو الجد بلموضوع

-الجد بلموضوع ابو عامر وابو زيد عدهم واسطة چبيرة بدولة
واني خايف من هاي لمتهم لاايأذون عقيلة
واني تعبان مالي حيلهم وانت ماراح يخلوك هيچ قوي اخووك الله يرحمه چان گل واحد طامغه بكصته فما يحچون گلمه هسه بس آگلك الله يستر من جاي

-الله يسترر بس ثق ماراح اسكت الهم

وصلنه البيت ام غفران دكينه الباب وهم نزلت ويايه كارتون عصاير وحلويات والعاب للجهال

فتح النه ابو غفران

اول مادخلنه ركض سيد علي شلته

-اشلونك عموو

-زين مشتاق الك

-صار تلث ايام من اجيتك وطلعنه بسياره

-اي ميهم عمو

كعدنه بصاله اجت ام غفران سلمت علينه

كال جدي

-ام احمد اريد ابنيتنه تجي هنا

-هسه اصيحها..

راحت اشوي ورجعت وياها عقيله لابسه نقابها وعبائتهاسلمت علينه تقربت باست جدي تبچي

بچینه گل احنا..راسن جدي مد ايده الثوبه طلع نقال سيد مهدي

عقيله كالت

-هذاااا موبايل سيد مهدي وووينه اريده
مد ايده الها نطا

كتله

-جدي اشوووكت اخذته ليش مگتلي اني محتاجه

كام توجى على العصا وكال الام غفران

-بعد عمچ مشیني

گالت عقيله

-وووين جدي اسندك انه

جاوبها

-لاااااا تبقين يم ابو ريماس تسمعون السمعته انااأأأ

بعد ماطلعنا منهم واكفة عقيلة بلباب يمهة سيد علي ودرة

وين رايح جدي ابقى

-ادخلي يم عم الجهال ااااسمعي السمعته بويه

كالت عقيله تلجدي بصوت مبحوح

-ماااسمع شي اني ام السادة ام علي ودرة والي ابطني لاااا تتوقع راح تقنعني بشي

سيد مهدي زوجي الاول والاخير وانه ام الساده وجهالي يبقون على ذكرى ابوهم
ويبقون باسم ابوهم وبسسسسسسس
(ابناء سيد مهدي الهاشمي)(ابناء الساده)

كيف السبيل ياخليل الروح دلني
علني انتشل بقايا رفات ايامي البالية
من صقيع فقدانك...
تلاشت سحب افراحي
فبتُ لا اميز شيئاً من حياتي
تائهة فزعه الوذ كل ليلة لأحتضان
ثيابك... استنشق عطرك كمسكن وقتي
يخدر اوجاعي....
الخاتمه..
ماذكر ليس البدايه وماختم ليس النهايه
لنا للقاء انشاء الله ان جد شي لكن هنا تتوقف رحلتنا الملحميه الايمانيه النفسيه
الاجتماعيه..

رحله كل سطر فيها عبره وفائده..
الشقي من حرم متعة الحسنات والمتابعه
والمنافق من يقرئها بغضآ وسرآ

والمحسن من تلقف الحسنات معنا ونشر
وساعد وروج هنيء له نهر الاثابه

توقفت انتظر شفاء عقيله،شفاء سيد علي
وشفاء سيد باقر...وايضا عسى ام عامر تنال جزائها وابشركم

نصيحه.....‏مارِس الرَحمة قدرَ المُستطاع ، كُلما تلَطفت مع خلقِ الله ، زادَ الله لُطفَه حَولك،

ثاني شي
أشكر الادمن وكروبي نساء حائرات وخصوصااا ادمن جنة كربلاء الي تعبت وياي وسهرت لاجل تدقيق وتصحيح البارتات

واشكر وحنين وهدى وميس وام حلا واضواء على جهودهم..واشكر كل متابع كان اسلوبه راقي مهذب..

تعبتكم بتنزيل بسبب الظروف لذا قصتنا القادمه صادمه بس ماانزلها اله من اكتب كل الاجزاء الكم

اترككم برعاية الله سبحانه وتعالى ولا تنسون اول يوم من ذي الحجه طلعو صدقه حتى لو فد الف دينار وستهلو الشهر بدعاء الاستهلال حتى تكونون امنين طيلة هذا الشهرر
يوم الخميس 2022/7/1ذي الحجه
استودعكم الله في قصة قادمة..
نازك الحمراني