رواية عشق المومنين(أبناء الساده) الفصل الثالث وأربعون 43 - بقلم نازك الحمراني

السلام عليكم...الفاتحه لروح اختي سجى

و أيّ جمالٍّ بعد فاطِمُ يذكرُ
‏وبها الجمالُ وكلُّ وردٍ يُزهِرُ..متباركين

.............
سيد مجتبى

أحب في الأنسان صفة أكثر من اللين،
سلامٌ على كل ابن آدم ليّن إذا صادق، هين إذا خاصم، رفيق في الشدة، رقيق في النصيحة، لا يشقى في صحبته أحد
صعدت ألمجمع مسطور متعجب من ألي سوته ميسم وخاصه من فتحت بلوتوث على مسجل السياره وشغلت على أغنيه

رغم صعدت جدامي الشقتهم وصوت كعبها بأذني وهي تخطي بس منتهبت مشدوه بلي سوته...جريئه وحاده'جريئه بقوه مماره عليه شخصيتها الي مر عليه ياأما وحده تگون خفيفيه وأكرهه هيچ نوع ياأما تحاول تچذبني بحرگات بذيئه بس مثل كاركتر ميسم ابد

أي أعرف أنا دخلت جامعه'وشفت أشگال البنات اعرف شايف گوم من گل بلد گد ماأسافر واوروح سياحه بس ممحتگ أباي وحده وحتى من يصدف يصير كلام بيني وبين أي زميله أتعامل وياهن بحدود الزماله..

ممفگر ولا عمري فگرت أدخل بدائرة الشاب اليحب وتالي يخطب سفراتي الترگيا ولبنان،وأيران ونستي واحلى شي عندي
ميسم شيء أگشن دخل عليه أقتحم حواجز بداخلي
حواجز ممفگر أتعداهن أبد

فطنت على نفسي رافع راسي لفوك شقتهم لوين ماصعدت وهي داخله وانا لسى واگف اناضر خيالها

تبسمت على وضعي طلعت المفتاح افتح الباب دخلت للشقه شمرت المفاتيح رحت غسلت أيدي بلمغسله

تمشيت أفتح جنطة السفر ادور الظروف الي جدي مخلي بيهن أفلوس الناس المتكفلهم رتبتهن على الميز

رحت الغرفتي غيرت ملابس لبست بجامه بيضه وسويتر أبو السحاب اصفر أخذت الفايل من لنطاني ياه حسين كعدت ارتب اوراق الصيدليه والاجور والمصاريف حتى العلاجات اكتب،الكلفه وشنو بعد نحتاج الى كملت دخت كد ماجمعت وطرحت بدون ماادري اخذت غفوه على التخم فزيت على صوت اذان الظهر

فرگت عيوني گمت اتوضيت فرشت سجادتي صليت من كملت صلاة رحت للثلاجه طلعت برتقالتين سويت عصير فرش

وهنا عقلي ياخذ وينطي بين غفران وميسم اقارن منوالي هي راح تكون الزوجه المستقبليه
ميسم رغم صار ايام متشاوفين جاي اشوفها اكثر
من مااشوف غفران وهم كركترها اقرب لحياتي
رغم هية سافرة بلبس وبحياتها بس روحها المرحة وطريقة كلامها اجتماعيه

وغفران الي احنا مناسبيهم من اربع سنوات كلما اروح اتقدم الها ترفض، واشوفه بصدف وهي حرفيٱ مناسبه لحياة اهلي والجدي الي يحبها ويعزها ويريدها اليه واصلا غفران من تشوفني كانما شايفه ابليس ماادري ليش
أضوج مني اخخخخ يارب محتار فد مره

وحتى اقتل التوتر رحت الجهاز الجري بقيت ادرب ناسي نفسي گد البرد وگد التفگير أدربت على الجه‍از احتريت نزلت منه فتحت السحاب ردت انزعه اندك باب بيتنا

أي هذا عمي أبو غايب رحت مستعجل اكيد هوه جاية يجيب الغدا
.فتحت الباب دون حذر گد ماجعت واشوف ميسم بيدها صينية ومبتسمه جاي تحچي سديت الباب بسرعه لان سحاب سويتر مفتوح كلش للاخير

بقيت واکف شنو أسوي ثواني ولازم أرجع وافتح ألباب سديت ألسحاب عدلت بگلت شعري نازل على عيوني سحبت گلنگس مسحت وجهي من التعرق

تنهدت ورجعت فتحت الباب الها

-اهلا تامرين بشي

ردت بابتسامه
-ماما دزت غدا الحضرتك كالت عيب وحده وهماتين واكيد مااكو احد يطبخ اله

-اشكركم لكن لويش كلفتو على نفسكم عمو ابو غايب ممخليني انا احب اكل المطاعم

-اممم يله ياعيني دوخذه أريد أخذ أكل الجوارينه حالتهم الماديه فد مره تعبانه وانت تعطلني

فرحت من تحچي هيچ بيها صفات هواي مثلي وأهم صفه أحبها بنفسي تتفقد العوائل الحالتهم نازله

كالت
_ها دكتور مجتبى هسه ابقى واگفة والاكل حيبرد ورجليه دثلج فد مره هههه

صفنت على ردها وضحكته ماليه وجهه وخدودها وشفافها الممتلئه سحرتني رديت بتشتت وگلبي يضرب قفصي الصدري يريد يقتحم ميسم وروح ميسم

ابتسملي الدنيا تحله

-لا العفو أذا تحبين تفضلي ولا اكول انا اخذه منچ تعبتج

مدیت ایدي اخذت الصينيه خليتها على الطبله ورجعت الها لكيتها رايحه صعدت الدرج ركض

ذيل احصان مسويه شعرها يتمايل ويه ميلان جسمها من تصعد الدرج صفنت التراك الابسته حلو عليها لونه وردي مرسوم عليه شخصيات كارتونيه ومقسم،
ومخصر
وبارز تفاصيلها استغفرت ربي من هيچ صفنه جاي ادخل صوت كحه مديت راسي شفت عمي ابو غايب جاي عليه

-السلام عليكم چنت منتظرك

-وعليكم السلام سيد تفضل هاي السفرطاس دزته ام غايب الك بيه سهم غداك
التفت على صينية الأكل كتله

-تفضل ادخل عمي مشكور گلفت نفسك،

-حقك يعمي شفت بيت ام حسام دزولك أگل،

-أي نعم الله عليهم توقعت أنت گایل آلهم

-لا يعمي،شلون أگولن وهن نسوان وحدهن وام غايب هي الي تجهز ألك

سديت الباب واشرتله على القنفه يستريح گتله

-شوف عمي...سواء أنتم اوهمه أن أروح المطعم صاحب جدي أشو الأكل نظيف،مثل أكل ألبيت
رد

-جدك ماننسى افضاله

_الفضل الله وهسه عندي موضوع وياك

كعد على تخم

_گول مولاي

-شوف عمي ابو غايب كملت كلشي حتى انروح نوزع
الفلوس

-اتغدى هسه اروح اجهز چاي بين ماتگمل وگلشي سهل

راح عمي ابو غايب للمطبخ وانه سحبت الصينيه لحد عندي ريحة الاكل طيبه مرگة دجاج حمره وتمن أبيض وزلاطة شونذر،وصحن محطوط بيه اوراق خس،وروبه

سميت باسم الله وبقيت أكل ألى أن شبعت
كمت اغسل ايدي اجى عمي ابو غايب لازم صينية الچاي
اخذتها منه بين ماغسلت رجعت يمه وانا واگف شربت ستگاني الچاي خليته على الطلبه

-ها عمي نتوگل

-یله ابني

-بس اروحا انزع السروال وارجع الك..رحت غيرت لملمت الظروف بجنطه شبابيه على چتف قبل لاافتح الباب گال عمي أبو غايب

-ولو تعتبره تدخل مني وانا عمك
وكفت اسمع منه

-گول عمي انت مو غريب علينه وشیطلع منك اخذه ابالي انشاء الله

-اعرف سيد لهذا اكلك عوف ميسم لاتدخل وياها
انت وهي في غنى عنها

-قصدك أنا أعاكسها اتحارش بيهة

-لا لا اعرفك واعرف تربيتك ماتطلع العيبه منك ولا من اخوك بس ابتعد منها

-ليش عمي ومنو مقترب حتى ابتعد

-أليوم وصلتها وهذا المجمع ناسه تحب تشم خبر انا شفتك من نزلت اثنينگم آضحگون لا تأمل البنيه على شي وانت ماراح اطبقه لان من تريد تزوج راح تزوج وحده من ثوبك ،وطوايفك وهي تبقى مجرد نزوه وهية ماتناسبكم

نزلت الجنطه من چتفي صفنت عليه يعني أنا معتبر ميسم نزوه انا الطول عمري ماداخل بعلاقات ولا أحب هيچ شي
معقوله اعتبر ميسم نزوه ردت اعيط واحچي بس هنا ناقشت عقلي وقلبي گالولي صدك ميسم نزوه بلنسبه ألك هزيت راسي وگتله

.-آبو غايب هييچ ماخذ نظره عليه مع الاسف

نصى راسه مقهور ورجع گالي.

-ماشي مو نزوه بس انت هسه شنو راح تسمي نفسك ابنيه جابت غدا الباب شقتك؛وصلتها للمجمع نزلتو اضحگون ونظراتگم البعض ماتتفسر أخذني على گد عقلي انت جاوب

كعدت على كرسي قريب عليه اسال نفسي واجاوب اذا
اذا ميسم مو نزوه شنو اعتبرها وانا مجرد عرفتها من ايام يعني مجرد ايام تصادفنه بيهن معقوله أحبها زين أذا احبها شنو مصير حبنا
وهي انسانه سافره،اندهشت من تفگري أي حب هذا بس لا ألي احس مجرد ابنيه خلتني اطلع من الي چنت اعیشه هناك بكربلاء
اي من اول ماشفتها حسيت أكو شي بيها يشدني حيل
گتله
-لا عمي ميسم مو نزوه ميسم شي حلو مشايفه ولاعايشه قبل شي حبيته واريد استمر بيه

-انت تحبها بويه مووو ومبين عليك

-تقريبا او بداية اعجاب

-لاااا تقريبا ولااااشي فگر بوضعك وباهلك،وبتقاليدگم الحب مو گلشي

_ليش الحب مو گلشي

_لأن الحب ينتهي وتبقى التقاليد والعرف اشياء ثابته بداخل كل واحد منكم هي وانتم ثوابتگم مختلفه اختلاف جذري قبل لاتخطي فگرر زين

-مااافگر لان حبیت حبيت الاحساس الحسيته وياها من شوفه

-بهل سرعه

-مااعرف

-اذا ماتعرف اعرفك الشي اليجي بسرعه ينتهي بسرعه فكر زين
وشوف روحك تتقبل بهيج وضعه تزوج

-الله كريم عمي هسة اروحة وراي اروح لصيدليه ومناك نوزع أفلوس الأيتام الدزهم جدي

رگبت سيارتي ورحنة وزعنه الضروف للمحتاجين
وگل اشوي اتصل بجدي أخذ عنوان شگل رغم من سنين هذا أختصاصي بس متشتت

گملنه ورجعت ابو غايب للمجمع

وطلعت بدربي لصدليه افكر بميسم الي دا احسه أعجاب ولا حبيته
وخن اجرب ابتعد منها احسن وماصادف وياه لن قربها يوترني
وصلت رگنت سيارتي ودخلت لصيدليه شفت دكتور حسين
سلمت عليه وعيوني من ألتفگير مغنتبه

حاجاني دكتور حسين

_شنو هل نشاط هسه فتحت لااااا السالفه مو خاليه شبيك متوتر وعليمن أدور

-لاا ماكو شي بس تعبان وبالي يم اهلي

-هاحسبالي ضايع الك شي

باوعت عليه رافع حواجبه يهزهن أشرت الة بيدي

_أ شبيك اليوم هااااا

-لااا سيد مابيه بس عبالي مضيع

عفته ورحت لرفوف بلمخزن ألداخلي أشوف الادوية اكو نقص اسجله

لفت انتباهي طقطقة كعب نساي
وأشم عطرر نسائي سمعت سلمت على دكتور حسين وگفت أريد أسمع ألها واشوفها تتعامل ويا مثل ماتعاملني من شوفني

وكفت قريب على الحايط جدامي لوگر كزاز تناوعت شفت سلامها محترم ورسمي تحچي وياه على گد شغل وصديقي حسين يوجهه على رفوف بيهن وگل دوه من الادوية عليه السعر

يعني دكتور حسين متقصد دازني حتى يراويني انو هي كفوء اليه أو يريد يخيليني اراقبها مايعرف انا اريد ابتعد منها ماريد شي بس عليمن اجذب على روحي

لابس بنطلون گابوي ,وقميص مخصر وردي جوه البنطلون والستره الگابوي قصيره گلش مبين خصرها الحذاء ألابسته بوت حجل شاموا يجذب النظر
الشعر كعكه مسويته خصلات منه متناثره بعشوائيه تسلب ألفؤاد

بياضها الناصع عمري ماشفت مثله'او عين اليحب عميه'حواجبها,وعيونها السود الي عاكس شعرها الاسود السرح عليهن ضايف جمال مخملي دافي

شي يگلي روح بس س سيطرت على روحي مالتفت بقت أتسجل وتگتب نزلت راسي مااطلع الها ولا راح اطلع هي وانا اختلاف چبير بيناتنا

سمعت صوت كعب تقرب مني ميسم دخلت كانها تفأجات من شافتني...نصت بخجل وابتسامها گلها حيوية وفرحة

-مساء الخير دكتور

رفعت راسي وهية صدمة قربها الزايد عليه بحيث احس العالم توقف بهل لحضات أرتبكت على يا جهة اصفن على أي جهة انطي وجهي وكيف اغض البصر

عفت عيوني مفتوحة ولارمشت متذگرحجاية سيد مهدي تنحسب نضرة وحدة بس اقشمر على روحي تهت بخلق الله سبحانه

اعرف هي بيضه بس هسه الاشوفه مو بس وجه ابيض لا وجهه صافي خالي من تلوين العيون هاي قضيه بوحدها سوووود سوادهن حجري مثل عيون المهره مناضر مخليتهن براسها رافعة كذلته

تنهدت ورديت سلام جاوبتها

_ مساء النور

صفنت وعدسات عيونها تتفحص وجهي

تأتا بلحجي كالت

-دكتووور وين الادوية يراد أجرد البقيه

اشرت الهة على صفحة ثانية مقابيلي شايلة بيدها سجل وقلم راحت وتركتني بحيرة المشاعر والقلب

حالي مثل جندي يحاول النجاة
البحر امامه يغرقه
والعدو ورائه يهلگه
أما للسان حالي يقول
‏
يارب انا أخ ذاك السيد التقي
سخر لي الأصلح
والأنقى ،
والأوفى بحق قلب أخي

أيدي بجيوبي أاسرق نضرات الهة شوفهة مركزة وتسجل خصلاتها النازلات يتمايلن ويه أقل حرگه منها ساعه تخليهن ورى أذنها ساعه تنزل المناضر وصعدهن تلم الخصل والكذل

التفتت اليه عفتها بدون أي كلمه وطلعت رحت كعدت على كرسي مقابيلي دكتور حسين
حاجاني وهو يناوشني مگ الگهوه

_سويتها بلحليب المگثف بلا شگر مثل متحبها

_شگرٱ

_ ها الست كملت الجرد

جاوبته

_وانت اول ما أجت گربتها

_لا والله هي گالت مااحب اضيع وقت

ردت عليه

_عفتها أتكمل ألصفحة ألثانية

-اوك لعد انتظرها

_اي جاي اخذ القائمة من تگمل حتى أروح للمخزن وجيب باقي الادوية

-تمام بس استعجل لاتتاخر لان اليوم طاح حظ حظي اريد اكعد

دنكت اسجل بلحاسبه الفلوس

_انت استعجل

رد

-وليش انت ماتستعجله شبيك قاسي

رفعت راسي ردت اجاوز عليه بس شفته مبتسم ومخلي ايده جوة حنجه سارح ويقلد

اشرت على روحي وكتله

_اني قاسي متوهم

هز راسه معنى لا

اجت ميسم وقدمت قائمة دكتور حسين كلتله

_تفضل دكتور كملت

اشرلي عليها عود انا قاسي ومتعبها

راحت للبراد تشرب ميء

رجع التفت الكت حسين دك بقلم على ميز ومبتسم عليه

_وين صفنت

رفعت حاجبي وتشر بلقلم

_لاتركز وياي هذن سوالفي لاضبطهن عليه

ضحك ورفع اديه

_ العفو سيدنا أني رايح اجيب بقية الغراض

اخذ سويجه والقوائم وطلع اضحك عليه وهز ايدي

انتبهت شفته تباوع عليه درت وجهي عنه والتهت بشغل واشوف مگ الگهوه بقى بيه ربع أنشال ونحط
واحد بداله كوب قهوه حتر

_أتفضل

أخذته وشكرتها

راحت ورى الميز ترتبه أجو دخلو ثنين شباب

قدمو اله الوصفه تحضر العلاج الهم من بعيد منتبه عليه وتعاملها بسلوب واحترام

انتبهت عيونه الولد ورى ألشاب الي انطه الوصفه طايرة ونضرته مقززة على ميسم

عفت الحاسبه ورحت تمشي يمهم وعايف ايدي بجيوبي صرت مقابيلهم رفعت تك حاجبي الة وخزرته حس على نفسة ونزل راسه
حجت بعصبية وية ميسم التفت على رفوف الادويه

_أنطيني الوصفة اني حضرهة

فتحت عيونها مصدومة من نبرة صوتي بلكلام
كملت علاج ونطيته للولد وبعدني اخزر بثاني دفع فلوس ومشو اسمعه

ثاني كله والك ماشفته شلون چنها صاروخ

مشيت خطوات سريعة من ورة ألميز اريد اوصلهم
مااحس الاا ايد لزمت ردن الستره ألتفت واشوف ميسم وجهه محقتن احمر ودموع بعينه

-عفيه عوفهم لااصير مشكلة

مسحت وجهي اتناوع الايدها الازمتني

تناوعت لعيونها المتوسلات واثر دمعه عالقه بجفنها حسيت باحساس غريب نفس الأحساس من صعدت يمي نفس الاحساس من سالني عمي ابو غايب عن مشاعري بيها
ماريد هذا الاحساس يرجع اليه

اكو ضيق او أكو شغف اي شغف أن اخذها الصدري واطبطب عليها واخليها تحس بلأمان بس متضايق وضيق قوي انا ماأگدر اسوي هيچ لان حرام
آي ماأكدر وهي دموعها نزلت على وجنتها شگد حساسه
شگد بریئه یاربي اريدها

عقلي يرفض حبها وقلبي يستجيب
وهيهات أن قلبي لعقلي يجيب

غمضت عيوني أجاهد شعور الغرام،هي ماتحل عليه ليش أنا أريد احس بدفيء دموعها.....رجعت بحلقت بيها لان دارت وجههه عني...نطتني ظهرها

وبياض رقبتها الناصع ينادي كل عفيف متبتلي
أه ثم أه لو صار العناق للعشاق حلالآ
لكنت أول ألمتعانقين،
لكنت أول من للشفاه لاثمين
لوشمت على رقبتها حبآ لم يكتب عنه ألمؤلفين

راحت من كدامي وهية مرتبكة ودخلت للمخزن ترتب الأدوية رحت كعدت وبالي مشغول بيها مره الها يفكر
ومره عليها يخطط

رن جهازي والمتصل جدي فتحت خط عليه

-ياااهلا بجدي شلونك شو مااجيت مو كلت تجيني قبل شهر رمضان المبارك لو ملتهي ويه حبيب الگلب

-اولا اهمد وبطل تصیر خفیف وگول آسلام عليكم

-وعلیگم السلام

-عفیه علیك وانا ان شاء الله رمضان كريم يهل عليك وعلى امة محمد ويارب لافاقدين ولامفقودين بس ردتك تجي اول يوم شهر رمضان المبارك يمنة ليش ماجيت اليوم

-الله اگرم یاجدي اذا ماكو اشگال فرمضان اكيد باچر وهذا الشي مو بصالحي لان اريد أكمل ترتيب گلشی

-زين يابعد جدك انت شلونك شغلك شلونه صيدليتك
عيونك أشلونهن بعدهن عفيفات
لو غيرهن هوى بغداد

-هاااا شنهاي جدي هوى بغداد يغيرني عفااااا بس انت جاي تلوف ويايه بلحچي ليش مااجيت

-ماكدرت اجيك هل ايام ضغطي موتمام
ان شاء الله جايك بس يمرن يومين من ايام شهر مبارك أجي بحيل الله زين انت ماتجي أنشوفك نطئمن عليك
جدتك مشتاقه ألك لان تحبك
رديت بضحكة

- زين اني وشغلي الحمد الله وعيوني سالمات لاتخاف عليهن وهلابيك بكل وقت اريدك تدخل
صيدليتي بدخلتك زيد البركة
وتعذرني مااگدر اجي لآن عدنة بضاعة اسبوع لو اكثر اني يمگم ياالعزيز

-ان شاء الله مرزوق بس اصير زين اجيك وشوف الوضع
في امان الله وليدي
گملت اتصال وصحت على ميسم
علمود نقفل لآن آلشارع فرغ العالم تحضر اول ليلة لشهر رمضان المبارك ونرجع للبيت
اجتني
.
-استاذ كملت الادوية تحتاج شي

-لااا تسلمين خل نقفل

طلعنة قفلت صيدلية هية مشت جدامي وگفت على صفحة تريد تأجر تكسي
تمشیت لشارع تناوع گتلها

- اني راجع للبيت تعالي اوصلج
طلعت السویچ رگبت سیارتي اجت بدون كلام وصعدت
تحرگت السيارة وچنت منتظر منها تسوي شي بس هي هلمره مشغلت اي مسجل ولا ابدت اي حرگه گتلها

-باچرر ماكو دوام آلصبح يصير ِلدوام ورة ثنتين
ان شاء لله وانا ماگدر اتواجد دكتور حسين
موجود من حجيت هيج
التفت بكل جسمها وشكلها قلقانه.

- ليش استاذ بيك شي
درت وجهي عليهة وبتسمت
حست على روحه وكعدت عدل وخلت شعرهة ورة اذنه

- لاا ماكو شي بس عندي شكم شغلة أكملهن وداوم يوم ثاني اني موجود
-هاا على راحتك دكتور
وصلنه للبيت هية نزلت وشكرت
واني رحت للاسواق اشتري كم شغلة للسحور كملت ورجعت للبيت غسلت تعبان ونويت اقامة عشرة ايام صيام وتفكير ميسم اخذ من طاقتي نمت مااحسيت لاا صبح
بلعشرة حتى سحور رايح عليه
كملت يوم بين مشاوري وبين فرة وخابرت دكتور حسين أطمن وكال زين الحمد لله توجهت لزيارة الامام الكاظم
عليه السلام كملت زيارة ورحت
فطرت بلمطعم كضته فررة بسيارة وتفكير أكل راسي
ويامن تورط كلبي رجعت للبيت تعبان والسحور مابقى كم ساعة انتظرت بين جهاز جري
وبين تلفزيون
أسحرت وصليت ونمت مااكعدت الااا بثنعش سبحت وصليت صارت بلوحدة ونص بدلت وطلعت نزلت عبالي اشوفه و وصلهة بس ماالكيتها صعدت سيارة ورحت لصدليه
دخلت دكتور حسين موجود گتله

-ها وجه البومه شو وحدك
رد
-اي وحدي قابل شسوي
-يله حكمل ترتيب الادويه
-ليش ماتكعد اريدك جيك الادوية بلمخزن جبير بلفرع ثاني لن محتاجين كم علاج
رديت عليه وانا اكعد على الكرسي
-خليني ارتاح شوية حلگي يابس
-دگووووم مو محتاجيهن واخذ وياك ست ميسم تعرف للادوية عدهة بسجل نقص
وگفت نشیط
-صدک شنو مااجت ست ميسم

-لاا اجت قبل شوية انتة متأخر ربع ساعة موجودة جوة
جاي ارد عليه اجت تمشي ولابسه مشمر
اخذت مناظر من جيبي ولبسته مااريد عيوني تفضحني
ردت
-رمضان كريم دكتور اني جهزت گولشي
-الله أكرم
كلشي بيها يجذب النظر لابسة شال نيلي شامرته على شعرهة وكذلة نصه طالعة تنورة عريضة لون نيلي وسترة بيضة وحذا رياضي ابيض مااحس لاا دكتور حسين يحاچیني
-دكتورنا رمضان كريم ترة تأخرتو كون بلربعة انتم جاين درت وجهي الة وهوة رافع تك حاجب
كحت وحاجيته
-ترى انا مااعدي شي وانتي ست ميسم
-أني هماتين معندي شي
-فدوه للهماتين للعينين،للحاجبين
ردت
-استاذ گولت شی

-لا عیني سلامتچ تفضلي
طلعنا ركبنا سيارة اخذت بلوتوث شغلت منأجات باسم الكربلائي صافن ونضري ليجدام
واحاجي روحي ذاك اليوم اغاني اليوم مناجات خوش يعني وية الحال تقلب وهسة هية عود متحجبة والله لويشوفج جدي ليكون بلقمچي يدگني

وصلنه نزلنة للمخزن وكلنا جرد واخذنا علاج محتاجيه
رجعنا لسيارة وحاجته كتلهة

-عاشت الايادي خوش ضابطة الشغل

-تسلم دكتور هذا شغلي
واليوم امي سلم عليك تكول لاتفطر فطورك يوصلك ثواب مسوين

-تسلم ان شاء الله واصل لاتكلف نفسه اني اروح للمطعم افطر

-لاا ماكو كل زحمة هوة ثواب
وصلنا نزلنا لصدلية ونمشي ونسولف دخلت
واشوف جدي كاعد يم دكتور حسين يسولف رحت عليه سلمت گاملي حضنته مشتاقلك جدي اباوع الجدي يسلم وعينه على ميسم
-والله احلى مفاجا جدي

رد عليه وعينه دور ورة ميسم

-هلا بوليدي اي كلت افأجئك ويأشر بعيونه وراي التفت ميسم وكفة وراي تبسمت وكتله انت تعرف دكتور حسين
وهاي ست ميسم صيدلانية هناا
اجت سلمت عليه رمضان كريم
عموو
رد عليه

-علينا وعليكم ان شاء الله شهر رمضان خير
جدو باوع عليه وينصي وجه احتقن احمر راحت ميسم واجت نصت عليه

-جدوو عيوني أنت تعبان خلينا نرجع للبيت جماعة يبقون ضحكت وهمسا

-عيونك عزيزي بالك جدو انت صايم
التفت عليه

- عيوني ولك
لو عيونك يااحلو امشي للبيت والنة حجي ثاني وبعد شكم يوم سنوية ابن عمك لازم تحضر

-اخذني وياك حتى السايق مالتك يرجعنه سوه

-خوش نفطر ونرجع

-تدلل بس انت شنو نويت

-النيه عشر ايام لان شغل
...........
...........
سيد مهدي//

حدثني عن الله ؟!

- هو ذاك الركن الشديد والملجأ الوحيد هو أقرب إلينا من حبل الوريد يري زلاتنا ولا يفضحنا ،يسترنا ويغفر لنا ويردنا إليه رداً جميلاً

رجعنا للعراق والنفوس مرتاحه لان طابت بأنيس النفوس فندما أنظر إلى مراقِدكُم يقل إحباطي وأنسى هزائِمي و يختفي كُل هذا الظلام بِداخِلي

وبوجوه الممهدين رغم گل الي حسيته بس ابقى انسان تقودني المشاعر والخوف

وخوفي على أبني سيد علي..ولحد الان ماكايل العقيله التقارير دزيتهن الطبيب الهندي..لان صحتها تعبانه يكفي الصار وياها..العصريه كاعد بلستقبال اتصلت علیه غفران

-السلام عليكم

-وعليكم السلام

-سيد مكدرت اخابر عقيله..بس ابوي تعبان فد مره يريد يشوف عقيله

-تمام خويه نص ساعه واجيبها لان تعرفين طياره وسفر ومن رجعت خليتها ترتاح هل أيام'

-لا حقك هم رمضان وهي اختي عنوديه ادري بيها ماتفطر حتى لو مريضه

-أي والله وتعبتني شگد احاچیها

-میفید اسالني

-الله يحفظها اليه

-يارب

غلقته من غفران أجيت للغرفة يم عقيله كاعده بلكاع تلاعب بسيد علي وشعرها محلول على طوله كعدت ماد رجل ومثني رجل

صرت وراها هداء جسمها وستگان رغم چان یهتز ویه للعبها ويه سيد علي بديت ألملم‌ خصلات شعرها واحاچیها
قارورتي حبيبة عمري ..

-مازال رجعنا من ايران واعرف انتي أنتي صايمه وراح يجي الفطور خليني أوديچ الأهلچ
آجت تلتفت علیه مخلیتها لان آلملم شعرها سويته تلث خصل اضفر بيها واسولف

كالت

-يعني أروح اشوف ماما وخالو

-اي حبيبي تشوفيهن بس تنطيني وعد

-شنو

-تاگلین هواي

-سهله أصلا أكل ماما ميتفوت

-وبعد عندي شرط ديربالچ علی أبن الهواشم اريده يكون طفل نشيط سيد علي تعبتي بيه من ألمشاگل والتفگیر والبچي شوفي النتيجه ابنه صحته مهلگد
اريدچ تفگرین الف مره من تنقهرین أنو ماا أفگر زاید لأن

يقُول اللَّهُ تَعَالَى في الحديث القدسي: أَنَا عِنْدَ ظَنِّ عَبْدِي بِي، وَأَنَا مَعَهُ إِذَا ذَكَرَنِي، فَإِنْ ذَكَرَنِي فِي نَفْسِهِ ذَكَرْتُهُ فِي نَفْسِي.

وانتي مؤمنه إستشعري هذا المعنى وتفكّري بيه

ردت
-أنشاء الله
گملت ضفر شعرها گمت وگومتها ویایه..بدلت ملابسها
لبست ألنقاب شلت دنجت باست سيد علي وگالت

اللّهُم ولا تدع لنا كسراً
إلا وبضلعِ فاطمٍ جبرته

_يارب يارب ياعقيله ينجبر خاطرنه

اخذت منها سيد علي بس مجرد لبسته قمصله
طلعت سلمت على أمي وجدي
رگبنه السیاره عقیله فرحانه لازمه العلالیگ بیدها وتعدد شنو جابت غراض وشنو شترت الغفران والاهلها..

وصلنه مديت ايدي اسحب سيم حتى افتح ألباب فتحته دخلت عقيله جدامي ونشوف غفران طلعت من الصاله
وجهه حزين ودموعه بعينه
دخلنه وچانت غفران واكفه يم باب الصالة شمرت عقيله ألعلاليك وتحاضنن..سوولي طريق لكيت أبو علي
مدد بلفراش
.
-السلام عليكم ..

-عليكم السلام...هلا بوليدي زياره مقبوله

-تقبل أعمالنا واعمالكم عمي خير عمي سلامتك .

-مابيه شي بس هذا القهر الي يكتل أبن ادم وينهي الفراك يأذي ووليدي الراح طيحني وماخلاني أصحى

وكما قـال امـير المـؤمنين عـلي عليه السلام

حزني على مدى الأيام طويل
وعيني على الأحباب تسيّل
أبكي اذا فارقتهم يوماً
فكيف اذا كان الفراق طويل

-سلام الله عليه فعلا ألله يساعدك عمي والله الضنى عزيز شفتها بوليدي سيد علي من تخربط .

-شفت هاي هو بعده زغير وراك من يگبر،ویدخل جامعه
-یارب یحفظلك ألبقيه

‐امين يارب اشلون هسه السيد الزغير..

-الحمد الله منتظرين تقارير من الهند وانت جده انريدك أتصحصح

-هسه صرت زينه بشوفت بنيتي عقيله تعرف من أشوف عقيله أتذكر أختي ناجيه ألله يرحمها چانت حنینه فد
مره مااتحب آحد یزعل منها شایلتنه گل آحنا .

-الله یرحمها آگول الحنیه عند ام سيد علي اظاهر وراثه

-اي بويه..بس ماترحون تفطرون عدنا

-مو مستعجلين حبيت انشوفكم ساعه ونروح

-لا تفطرون ويانا
التفت وعقيله تتناوعلي منتظره مني جواب وعرفت تريد تبقى الورى الفطور
جاوبته

-ماشي عمي اليوم ناكل من ايد عمتي
ابتسم اليه عقيله كتلها بصوت يسمعو ألكل .

-تعرفين أشگد آحبچ نصت بخجل واعرفها ماتحب احچي جدام اهلها هيچ بس انا تفگیري غيري انا اشوف اي وقت او اي لحظه متاحه أعبر عن حبي الها
بقينه للفطور فطرنه والضحكه ترست الوجوه وعقيله فرحانه توزع بلهدايه والصوغات،خلصنه الفطور ام غفران كل شوي تجي تجب النه شي مخلتنه كاعدين
الى أن أتصل بيه جدي مغنتب غلقته وعرفت يريدنه نرجع للبيت
گمت مبتسم وعیوني للساعه

-الساعه هسه ٩وسيد علي لازم ياخذ علاجه وعقيله همات اليوم احلى يوم فطرت وصليت انشاء الله اعيدها وهمين عمه انريد كبة حامض شلغم غير تموت
ردت
-الف عافيه يمه تستاهل

ودعتهم شلت سيد علي من حضن عمتي چان غافي على ايدها ودعناهم خليت ابني ورى مددته
رگبنه انا وعقیله، تنهدت واعرف جدي من حچيه ماراضي وزعلان زين هو گالي رايح البغداد اشوف اخوك فتح الصيدليه حتى افاجئه سالتني عقيله

-ها سيد اتفگر لعد السيد سمعك احچایه
سحبت ایدها ابوسها .

-لا حبیبه بلعگس حسیت نفسي بيتنا بس جدي ضايج من اتصل بيه

-انشاء الله خير

-انشاء الله

وصلنا رگنت السیاره..
ونزلت من سيارة شلت سيد علي
وعقيلة وياي تمشي رادت تاخذة مني كتلهة لا اني ودي للغرفة دخلي انتي ارتاحي وتمددي واني جاي وراجدخلت للبيت وتلكتني امي .. وتحجي بصوت ناصي

- سيد مهدي روح شوف جدك صير نار وطاك عده عرج الهواشم من اجة من بغداد وهو بس يستغفر حتى صاعد ضغطه بس لاسالفة يم اخوك مجتبى

-وشبي اخوي وهيج معصب جدي ...
خل دخل سيد علي للغرفة لن نايم لايفز واروح لجدي
رحت لغرفة عفت سيد بجربايته
دنكت على عقيلة وهية ممطولة على جرباية بوسته بكصته قارورتي ابقي مرتاحة وتمددي ونامي على ضهرج اليوم مامددتي وكعدة سيارة كسرتج
اني رايح لجدي ورجعلج لان مشتاق

أُحبك ' وكأن الله خَلق عيناي لِتنظر إليك و على البقية تُحرم
تبسمت عقيلة وردت عليه

-واني هم اشتاق الك حتى لو تبعد مني دقائق تقربت
لثمتها بين عيونهت حبيتي أشوف جدي واجي وطلعت
رحت للاستقبال سلمت عليه

-سلام عليكم جدي شلونك

-وعليكم السلام هلا بوليدي

-شبيك جدي ليش صاعد ضغطك

-اااخ يا سيد مهدي شكلك من وراى اخوك حالهة مايسر

-شبي اخوي خابرته مابي شي زين ومرتاح وصدليته هم زينة وهية بعدة بدايته

-سالفة مو يم صيدلية وشغلة سالفته من ورى وحده
موظف يمه صيدلانية

-وشكو بيه جدي هذا عمل وتعرف اخوي ماتطلع منه العيبة فرر دنيا كله مايوم سمعت اوعرفت سوة شي يغضب الله سبحانه وتعالى لاتفكر زايد

-ادري بأخوك مايسوي الحرام بس البنيه شفته قمبلة موقؤتة وتلمع من فوك ليجوة ولسانه عسل تخبل اكبر واحد مو نوب اخوك مجتبى بعدة عازب لاتلف عقله ويزوجه وهية مو من ثوبنة
تبسمت على جدي وعلى وصفه

-هااااا جدي يعني جدي شفتها انت مرة وحدة
وستنجدت هذا كله وتلف عقل أكبر واحد بس لا لفت عقلك
شال عوچیته طگاني برجلي

-استجن استجن لا انت واخوك عليه شفت اشكال والوان مارف گلبي على أي حرمه

-اي اعرف مولاي اتلاطف بس انت ليش خايف

-يابعد جدك اشلون ماااا أخاف وانت هم لازم تخاف مثلي على اخوك

-جدي عضيدي بعقلة مو يم بغداد فكرة يم كربلاء

-لاااا تغشم روحك ولا أگول ادري بيك أطمطم اله
اخوك غفران رفضته ومتريدة وظني ناوي على بغداد
من عيونه اليدور بيهن منا ومنا
ومن هسة اذا كلك انت گله لاااا والف لاااا
هاي قمبلة تصير مرة لخوك معناها تفجر البیت والی بیه

_اليوم تحچي بلقنابل خو روح الجدتي

_گوم سيد گووووم لمريتك لا ابتلي بيك

گمت اتمشى العقيله...گتلها تنتظرني دخلت واشوفها نايمه ندهتها بهداي لايگعد سيد علي

_عقيله عقيله...قارورتي'حبيبتي'ام علي' حب حياتي

تچتفت وشعرها المدد على المخده وجهه تعبان فد مره مو. مال أكلف عليها

فيا قاروتي وقبل ان تنامي
أريدكِ أن تعرف بأنني
أموت فيك يومياً،
اموت حباً
اموت فكراً
وانني في كل مره
ظننت بها أني نجوت من الموت من هذا الحب القوي وجدتني أهوى بك
ولو توغلتِ سبعين قاعاً،
يبقى قلبي يشعر بك هنا،
ويردد في كل دعاء إنك بداخلي أكثر
من أي شخصاً اخر

عقيله//
الروح التّي حملها علي بن أبي طالب "عليهِ واله السلام"، لم ترها الشمس من قبل، والإسلام الذي مشى بهِ لم تعرفه أقدامنا إلى الآن، كلنا كاذبون فيهِ وعلي أكبر من الصدق، وحين يكون الإنسان أكبر من المفهوم يحير بهِ الكلام

فعلي بن ابي طالب لا يعرف "المصالح" و لا يداري أحدا و لا يساوم على الحق من أجل المصلحة
‏روحه ليست روحاً تستوعب المصالح، روحه قطعة واحدة، حق و حقيقة مطلقة
تهدمت والله اركان الهدی

سديت الاذاعه الي محملته بلقناة ونزعت السماعه رغم لليلة لسى بعدها بس اول مايدخل شهر رمضان انا اتجهز الها وجهز نفسي،

رغم الحمل وفقر الدم استمريت بصيام رجعت اخذ غفوة حتى ولو قليلة

لان كملت الفطور ،بيدي النقال اريد اطلع من المطبخ اجت عمتي وكفت يمي تنتر

-هااااا وين خاتون اشو ابنچ عند العلویه خاف يختنك هي تعرف اداري احسن منج

وسید مهدي ابني عنده اليوم اربع عمليات يعني احنا والليل يله يجي للبيت ووووين رايحة لغرفتچ من هسة لووووو حضرت جنابچ تعلمتي على التختخه والتسندح

جاوبتها بريج يابس من عطش الصيام

-عمه جهزت كلششَششششششي العصاير بثلاجه برتقال ونومي بصره وسكنجبيل والاگل كامل وحتی غطيته بسلفون تمن بس يتهدر ارید اخذ غفوة قبل الفطور بساعة ورايه لليلة القدر

هزت ايدها معاجبها

-رووووحي هو اكدرررر احچي الكل يسد حلگي ومااااااااايخلني افگه بگلمه ليگول وصية الكل وتارثة الساده

-عمه تدللين وصار ماراح انام هسه اذا يعجبچ وراح آطلع للحديقة.

-اي هييچ احسن

عافتتي وراحت فتحت باب المطبخ رحت للحديقه الوری المطبخ جدامها اشجار يعني اليطب واليطلع لايشوفني ولا اشوفه ‌كعدت على المرجوحة،بيني وبين نفسي استرجع الايات الاحفظهم واي ايه قرأنيه تجي بالي اكررها حتى ابقى على طول حافظه القرأن عن ظهر قلب

لا يقلقك طول الإنتظار ،
ما دام أن الله يرعى تعاقب لحظاتك بحنانه.

القهر بگلبي وانه ويه كل ايه اقرأ أتووسل ربي يحفظ ابني من كل مكروه وسوء كلبي نار عليه

اجتني منتهى احس هي يمي بس بالي بسورة النور استرجعها بتامل بششغف،فصلني عن العالم الى ان صاحت تهز المرجوحه حيييل

-دااااا احجي ويااااج صاررررر ساعة وين سارحه عاااااد گولي هاااااااا ست الحسن

أبتسمت الها فتحت عيوني وجهه احمر من الاعصاب جاوبتها برود قاتل

-جااااي استرجع القران خاف ناسيه ايه او سورة او حتى حركه،

-ووچ آنتي شلوون ووووواهس عندج بيه

-جربي جربي حفظي اية الكرسي كااااملة ورجعي حفظيها على گلبچ ردديها بينچ وبین نفسچ رح تحسین‌متعه ملکوتیه ماالها مثیل

جاوبت بتوتر گان عجبها الاگوله

-اااشلووون اقصد شتقصدین

-آنتي مو تردین تعرفین لیش سارحه بخيالي وليش هلكثر اندمج

-اهووووو قشمر‌ي بهل سوالف سيد مهدي مو انة ياخطافة الزلم

ردت اردها ااابتعدت مني كمت مستغفره ربي شهلحرب لنفسيه يارب رجعت للمطبخ أكمل ترتيبات الفطور ويه عمتي

مددنه المواعين،والعصاير الكل اجتمع فطرنا اجت زنان العامله شالتهن ساعدتها وغسلنه المواعين

رجعت للعلويه بعدها نايمه اخذت ابني منها ونتبهت على وجهه سيد علي هلايام من ينام يصير وجهه ازرك رضعته ونيمته بسريره يمي

دخلت للحمام اغتسلت غسول الطهارة اجهز نفسي الليلة القدر من طلعت دخل سيد مهدي متبسم اول ماشافني

-السلام عليكم قارورتي

-وعليكم السلام مولاي،الله يساعدك ...ها سيد جوعان

-لااأا حبي أكلت العتبه جابو النه ذيچ المشتهایه خلیت سید سيد حامد یسهم الچ لان اي شي اكله الچ حصه بيه

خجلت من گال هیچ تناوع الیه بوجه مستبشر

-بعدچ تخجلین،وتاااالي

-وتاالي يله سيد الحمام جاهز انلحك على صلاة النوافل

-تغلبيني دومچ

عفته يسبح حتى نكمل عباده حسب تشتهي بين مامشطت شعري وكملت

رتبت گرسي الصلاة السيد مهدي لان هل يام رجعت رجله تاذي ميگدر یصلي جلوس

ولن يكون الحب في الله إلا لو كان الإختيار بما يرضي الله
ولن تنبت زهرة الحب الطيب إلا اذا غرست في تربة طاهرة بقلب نقي أبيض

تبسم اليه رجع وگلي

-لااااا اريد السجاده احب اصلي على الكاع عاف الكرسي مددت سجادته وراها سجادتي خلیت القران علی مساندهن والسبح والتربة

بيده الخاولي ینشف، درت وجهي منه مااريد انطيه مجال لان يبقى يشاقى حتى لو انطي نظره واحنه ورانه صلاة وادعيه وورود هوايه

نزع روب الحمام ولبس ثوبه الابيض
طلع من المجر اليشماغ الاخضر خلاه على راسه لأن من مشط شعره بقى مبلل والسبلت العمودي شغال مايطفي علمودي
اندار عليه يباوع

دار وجهه اليه

-هاااااا صافنه

-الله يحفظك اليه والأبنه

-ويحفظچ الیه

-وين حطيتي شیشة عطر المسچ الجابه جدي هااااا ترى ادري غلستي مني وخليتني اسبح وحدي

-لاااااااا حبي مو انه سبقتك بغسول ألليلة

-زين عطر المسچ وین

-سيد تعرفه وين بس ميخالف انه كملت لبس اسدال الصلاة اجيتك
وكفت يم المجر طلعت العطر

-هذااا مكانه ورى الصندوك الخشبي

-اندل بس حلو من انتي تنطيني ياااااه بيدچ شایفه شنو احس باحلی احساس بعد تعب الدوام

اخذه مني ودنى عليه كلش وعيونه مركزه بيه وانه اتناوع الوسامته بهذا البس الي يخلي انيق،وسیم هيبه،
بیاض الثوب مخلي وجهه مضوي اکثر خاصه وهو محدد لحيته السوده الحلاق مرتبهه بدقه اله صفنت بيه كانما اول مره اشوفه

تناوعلي يعرف انه صافنه عليه لان كل مايلبس هيچ
نصیت وجهي الصار احمر حار...

-قارورتي ترى انه حلالچ،شرعا وگلشي

-موووو انته بهذا البس تصير هيبه ورجوله وقار طاغي لان هذا البس يلوك الك مولاي

تجرات حجيت وياه لان یستاهل کل کلمه حلوه فرح كلش وجهه صار مستبشر تقرب عليه جرني من ايدي حيييل خلى جبهته على جبهتي فرحان لان مدحته

-قارورتي،وسيدتي،تدرين راح انجن بييچ وحك جدي لو ماورد لليلة القدررر أااأاخ چان اتخذت غير أجرأئات
خليت ايدي على چتفه بست مکان اثر التربه

-خلینه نلحك على الصلاااااة مولاي

قرب بين حواجبه مقهور رفع وجهي بطرف اصابعه

-هوووواي اتعبين ويه السيد الزغير وتعبين بلبيت ليش ماترتاحين من اروح للدوام

-مااكدر سيد علي هووواي جاي يختنك الوقت الاشتغل بيه اخلي عند العلويه مساعدتني بيه بس هم‌ابقی قلقه علیه
وانت تخاف عليه اكثر ماتخاف علی ابنك سید علي

-مااريد اشوفچ ذابله ولا اشوفچ تعبانه،ارید اشوف وجهچ مورد دافي ارتاحي هووواي هملتي نفسسچ
درت وجهي بحجة اطلع السبحه الالكترونيه من المجر ضايجه ومقهوره على وليدي

جاي ادور عليهه حتى انصلي حسيت صدره بظهري وايديه تحاوطني
حرارة جسمه وحنانه وتبعله،ودلاله وي كل لمسه وحركه منه لمسته الي تخلني دوم انسی منغصات الدنيا وجعهه

واحس بحلاوة الروح،والسكون استسلمت المساته لان محتاجه حنانه يبرد حرورة خوفي

-حبيبتي احبچ

-وانه احبك
درت وجهي اله وايدي على صدره

-سید قبل ماانصلي ماگلتلي على السالفه الگلتلك بيها

-مااكدر اخليچ مو تعرفین اغارر ياأم علي
فما كانت الحسناء تكشف سترها لو كان أرباب البيوت رجال

-يعني تبقى حسررره بگلبي

-اممم يعني تروح الحسره من گلبچ ویحترك گلبي

-سلاااامتك لااا لااا كلشي ولا گلبك يحترك يولي گلبي

‏-تعرفین عقیله يكولون احلی احساس بلعالم مو الحب الأطمئنان فكيف انة أحبچ ومطمئن ویاچ انو عمرچ مارح
تضوجيني

-وانه همينه وياك ألحب بالحب والبادیء أظلم

-الحب مو بس بلقلب الحب بالدعآء والبوح للسمآء والدعاء بكل صلاة والبادیء أكرم

-مااگدر الك ابددد

-لاااان انه احببببچ اگثررر اکید
دنگت راسي ضااايجه خفيت دمعتي منه

-فدوه شگال الطبیب الهندي على ابني

-لاااااتفكرين لولا الله الحفيظ
لطاشت قلوبنا خوفا على انفسنا وعلى من نحب رغم ان الدنيا باتت مخيفة
لكنه الحفيظ نستودعه أحبتنا ونحن مطمئنين انهم في حفظ الحفيظ.
خلينه نصلي وندعي الله يوصل التقرير على خيرررر خلينه نصلي

-احبك اكثر من تنطيني هيج طاقه رغم اعرف انت خايف على سيد علي اكثر مني بس تحب دومك اطمني

-مو اطمنج گد ما عندي يقين انو ليلة القدر ليلة الاتصال بالله سبحانه وتعالى هي ليلة الدعاء المستمر لعدة ساعات وتغير الحال في هذه الليلة تمتزج القلوب بنور رباني وترتفع الروح محلقة بعالم القدس لتكون لحظة من لحظات التضرع تكفي العبد لتحول ذاته نحو الكمال ونحو قضاء الحوائج ومنها شفاء ابنه سيد علي

-ماعندي بعد كلامك اي اضافه لان معرف
منين اتجيت هذا الحجي الحلو ليخليني سارحه مدري بحب الله مدري بحبك

رتبت اسدال الصلاة وبدينه انصلي،كملنه انه وياه ١٠٠ركعه كملت وانه أدعي
بدعاء االيله
اللَّهُمَّ صَلِّ عَلى مُحَمَّدٍ وَآلِ مُحَمَّدٍ وَاقسِم لي حِلماً يَسُدُّ عَنّي بابَ الجَهلِ، وَهُدىً تَمُنُّ بِهِ عَلَيَّ مِن كُلَّ ضَلالَةٍ، وَغِنىً تَسُدُّ بِهِ عَنّي بابَ كُلّ فَقرٍ، وَقوَّةً تَرُدُّ بِها عَنّي كُلَّ ضَعفٍ، وَعِزاً تُكرِمُني بِهِ عَن كُلِّ كُلَّ، وَرِفعَةً تَرفَعُني بِها عَن كُلِّ ضَعَةٍ، وَأمناً تَرُدُّ بِهِ عَنّي كُلِّ خَوفٍ، وَعافيَةً تَستُرُني بِها عَن كُلِّ بَلاءٍ، وَعِلماً تَفتَحُ لي بِهِ كُلَّ يَقينٍ، وَيَقيناً تُذهِبُ بِهِ عَنّي كُلَّ شَكٍّ، وَدُعاءً تَبسُطُ لي بِهِ الإجابَةَ في هذِهِ اللّيلَةِ وَفي هذِهِ السَّاعَةِ، السَّاعَةِ السَّاعَةِ السَّاعَةِ يا كَريمُ، وَخَوفاً تَنشُرُ لي بِهِ كُلَّ رَحمَةٍ، وَعِصمَةً تَحولُ بِها بَيني وَبَينَ الذُّنوبِ حَتَّى اُفلِحَ بها عِندَ المَعصومينَ عِندَكَ بِرَحمَتِكَ يا أرحَمَ الرَّاحِمينَ.

يارب شافي وعافي وليدي كل مااقرا اي دعاء يجي بالي بس صحة وليدي علي بين مفتحت مفاتيح الجنان رن نقال سيد مهدي.سديت الكتاب لان خايفه خاف خبر
موزين فترك عليه سيد مهدي گالي

-ياالله گولي ياالله هذا الدكتور الي عنده التقرير گولي يارب يارب

رددت بحرگة قلب والده
-يارررررررررب

خلى سيد مهدي النقال على اذنه رد سلام

-وعليكم السلام...اي الحمد الله احنه بس طمنه دكتور

سكت سيد مهدي والدكتور يحچي وهنا تغيرت ملامحه تناوعلي مقهوره وجهه صار احمر طك عرج الهواشم بكصته من العصبيه من القهر وهو مرة يتناوع عليه ومرة على گاروك سید علي اثر دمعه بطرف عينه نزلت وهو يردد

-لاحول ولا قوة الا باالله العلي العظيم؟

_گووول سيد

كعدت للگاع

_لازم عليه

انهاريت بلبچي اوليدي اول فرحه اليه يروح مناك

عفت كلشي ولزمت السبحه استغفر كعد يمي سيد مهدي يشرح اليه شنو معنى فتحه بلقلب وليش وليدي صار بيه

(اللهم لا اسئلك رد القضاء)

،،،،،،،،،،

جزء كبير من الراحة النفسية تَجدها في المُصالحة مع نفسك، أي أن تَتقبّل وَضعك أيًّا كان، أن تَتعامل مع ظروفك بواقعيّة، وأن تؤمن أن الدنيا ليست جنة، لكنّها ليست جحيمًا كذلك، فلا تَجلد ذاتك

سید مهدي//دخلنا البيت عمي وصادف سنوية عامر الله يرحمه هذا اليوم من دون ايام السنه اختنك بيه جدي وامي وسيد مجتبى يعرفون وضعي اشلون انقهر واروح للامام أختلي هناك
بس هل مره مساعدت عقيله

وابني سيد علي واجهت نفسي وراح احضر السنويه أو اليوم الي توفى بيه
عمتي أم عامر مسويه فطور..تنهدت قبل لا أدخل للبيت عيون عقيله من ورى النقاب تنطيني راحه مامنها راحه
كعدنه بصاله طولها ست أمتار والعرض خمس أمتار تخم قنفات موزوعه بترتيب كعدت يمي سيد مجتبى كل شوي يتنهد

ويصفن وباله شارد

-شسالفه عضيدي

-ماادري سيد مهدي احس اريدها ومااريدها شتگول انت ومنا جدي مايقبل ورافض فكرة شلون اوضفه بصدليه مو نوب ازوجها لوشايفة من شافها شاطن عيونه أستلمت منا محاضرة شكبره
مااعتقد يقبل

-اذا تحبها توكل وجدك عوفة عليه اني اقنعه

-انت تگول هییچ
-اي اذا اخوي اشوفه محتار انا وياه بگل خطوه ويدلل

-وذا مقبلت تلبس حجاب

-انت بطريقتك قنعها المرأه ترى الطف واحن وانعم من ورقة الريحان تصعدها گلمه

-لااا سید تری میسم من جماعة المرأه مساوايه لحقوق الرجل

-سيد مجتبى ترى كلهن نسوان والتفكير واحد يردن الامان،والصدق،والوفاء عند الرجال هاااا وهن ذكيات بهيچ موضوع وانت بيك گل الصفات الحلوه

-تشوف هییچ

-لااا متاکد وانا اروح ویاك الها وقنع جدي
لزم ايدي راد يبوسهاا جريتها منه

-لااا تصير لوگي ههههه

ضحكنا ورغم اسولف عيوني على عقيله كاعده يم امي من گامت اشوفها ضاجت گلت خاف امي غثتها بس لا هي ضاجت من حجت وياها زوجة مؤمل اخو عامر الله يرحمه
رجعت نصت راسها مسحت دمعه ونزلت النقاب حتى اداري حزنها نعصر قلبي عليها اشرت بيدي الها معنى
-شكو حبيبي

هزت راسها ماكوو شيي رجليه مأذيتني هي وايدي توجيت حتى أكوم الها اجى عمي ابو عامر وعمي ابو امير ،وعمي سلمت عليهم كلما اريد أكوم يجروني أكعد مافهمت اي شي من حچیهم

صاحت مرت عمي أم عامر

-يله عيني اتفضلو الاكل جاهز آلگل گام وعقیله بحضنها سيد علي والغصه بگلبها ودي اعرف شلون گلبهم ینطیهم یآذوها وهيه ماتحب تاذي نمله لو ألكل يتناوع الها مثلي چان فگرو الف مره یله یسلمون علیها مو ادور یأذوها

وصلت يمها لزمت ايدها اشرت السيد مجتبى اجى يمي
-ها سيد گول

-اخذ وليدي يمك مااگد اشیله الیوم رجلیه وایدي كلش ماذياتني وعقيله متگدر تاگل وهو بیدها

-صار یخوي تعااال حبيب عمك هم بنفس الوقت نروح انا وابن اخوي نقنع جدي حتى اجيبلك عمه بغداديه تجنن اخليكم تنسون الصلاه
درت على مجتبى خزرته رفع ايده گال
-سبحان الله شوف آبنك همين خزرني ولگم شلون نظرات هيچ قاسیین علیه رحموو حالي

ضحكت اله گتله

-انجنیت انت لازم ازوجك

-اي زوجني يرحم والديك
مااكدر بعد لاا عيط وصيح بلمكبرات يالة صدگون اريد أزوج
ضحكت عليه وتجهناا للتجمع

كعدنه على الطاوله الاكل بيها مالذ وطاب عامره بكل انواع الأكلات وكلمن حسب ذوق الكاعدين..كل واحد بينه تعرف عمتي شنو يحب وشنو ياگل
آلگل گعد ولی یمه جهاله یتناوعون للاگل ویمسحون شفافهم گد مایشیهي..بس محد يمد ايده اله من يأذن

يتوسط الطاوله جدي وعمي عیونه الیه وانا عيوني العقيله...الي سگتت واعرف من تسگت تبقی تستغفر الى ان تحس بنفسها هدئت

ابتسم اليه جدي من دونهم والي اشوف بيه القوه سند أذن الأذان ومحد مد ايده لان رفع ايد وكلنا رفعنه وياه يقراء دعاء الافطار والايد الثانيه يحرك مسبحته يسبح

تناوع لوجوه الكاعدين عمي قاسم وزوجته وابن عمي حازم وزوجته وابنهم وخواتهن واخوانهم كتف بكتف ويه ولد عمي ونسوانهم

وعمتي زينه ويمها امي انا وعقيله يمي کرسي سيد
مجتبى الي اجاه اتصال كانما صرنا صفين صف مقابل صف
تناوع جدي للكرسي الفارغ كرسي عامر الله يرحمه وهنا قراء سورة الفاتحه وقرينا گلنه وياه

صاح جدي

-وين سيد مجتبى
جاوبت

-هسه يجي جدي لان اجاه تلفون مهم
انتظرنه ثواني دخل سيد مجتبى كعد يمي وكعد بحضنه
ابني كال جدو يله اكلو

رفعت النقاب عقيله وبدينا ناكل..وصوت الخواشيك تضرب الصحون الكزاز وسيد مجتبى يوكل بأبني كملنا الفطور وغسلنة وتجهنا للاستقبال كعدنة بين سالفة وضحكة وخوي بصفي كاعد وابني يمه يلاعبه
وجدي بعد عني بتخم ويسولف ويه عمامي
وكدامنا كاعدةعقيلة وحده بتخم وتخم البصفه كاعدة امي وعمتي ام عامر كاعدة

أجت مرت مؤمل چنة ام عامر كعدت يم عقيلة تحاجيه بس ضل انتباهي يم قارورتي
حاجته زوجة مؤمل

-شلون حلو العم و ابن اخوه وسبحان الله بينهم شبه
قوي
عقيله جاوبت
-غير عمه وسيد مجتبى يشبه سيد مهدي أخوان

جاوبت زوجة مؤمل
-اي والله عمه وفعلا الساده يشابهون الفرق بس سيد مجتبى اشقر بس الناس ماتخاف الله تحچي ومع ذالك انا مسكتت ومخليت بذمتي وگتلچ عقیله انا شایفتچ مرتین وهای المرتین گلش ضجت من نفسي من صدگت

بقیت بحیره زوجة مؤمل تحچي ومقهوره على عقيله
وعقيله أدموعها نزلت عشره عشره بلا صوت دفعت الكرسي گمت حطیت ایدي على چتفها

-ليش تبچين رويحتي گولي من غاثچ
ماحچت درت وجهه الیه رفعت ایدي امسح دموعها وترجع تبچي وشهگاتها گسرت گلبي گتلها اتوسل الله علیچ احچي ليش تبچين اريدچ قویه مووو گتلچ انا بظهرچ محد یاذيچ مو گتلچ انا القوه الچ لیش بویه لیش تحسسيني مو كفوء الچ وتبچین خلسه لیش بویه

‏"القاوب التِي تُبنى عَلَىٰ حُبِ محمد وَ آلِ مُحمد تَكُون أَكثَرَ صَلابَةٍ واكثر حبٱ وحنان مِن غَيرِهَا"

صلر صوت شهگاتها عالي الكل وكف،وهي تبچي بسكوووت
صوت امي صار عالي ولاول مره اشوفها منفعله چانت واگفه یم زوجة مؤمل مدري شگالت الها تقربت العقيله لزمت ايدها ومسحت دموعها

-انااااا صدك احچي عليچ
لحد البارحة مأذيتج بس من توصل لشرف لااا لهنا وبس ويامن وياا ابني

-یمه شنو صایررر فهمیني
عاطت امي حييل وترفع ايدها

-شووووفي يااام عامر لهناااا وحدچ وتلزمیین حدودچ
كل مرة اسكت واجور على البنية
وتتهميه وتوزيني عليه واني ضالة اسمع بكلاامج
بعد عائلتي خط احمر انتي تتهمين زوجة ابني
وأبني سيد مجتبى يسووى راااسچ وراس گل اهلچ وهاااي چنتي كد ماطاهرره وشريفه تسوى طوايف اهلچ وخيرهم

گلگم سمعووو یاعمام‌ ولدي سمعن يانسونهم سمعن ياعلوياااات أم عااامر تتهم چنتي نايمه ويه حماهاااااا وتگول ابني سيد مهدي عااااجز من الحادث وسيد علي
هوو ابن سيد مجتبى

چنتي مكرووووده والفقيررررره وابنت اجاويد ولان شابعه ظلمه بطفولتها وضرب تخااف لان يتيمه واليتم يوجع تخاف ولان تعذبت بطفولتها تخاف من المشاكل تسمع وتسكت

بس لااااا لهنا وكافي ام عامرر انا ولدي الي ربيتهم دم بشبابي
صارو زلم والكل يهابوهم
اوكف بوجهج واكلج

ابني سيد مهدي تاج راسچ وعیب تگولین عاجز
وابني سيد مجتبى تاج راس اهلچ یخاف الله
وچنتي عقيله فخر الچ والبیتچ لان دخلت الگم

حضنت عقيله قارورتي هيچ یتهموها وانا واگف صحت
وعيوني المرت عمي

-بعد اذنك جدي...الله يلعنچ یا ام عامر وانت عمي اذا متسوي حل انا اسوي واسوي فعل ماتتوقعه مني
صاح عمي

-وشنوو تسوي يامؤدب هااااا تضربهة
سوالف ومشاكل عر وجر بينهن ماكو هيج حچي

تنهدت استغفر ربي
- تدري بيه ماا امد ايدي على مرة غير طريقة اكو أدب مرتك و الحجي طلع من بيتكم أحنة ماتهمناكم شوفت عينك واكو شهود لكن قسم باالله وتاالله أقلب عاليه واطي

-اشلون يامتدين والتربه ماكله وجهك عرفته منا وشسوي بالله

بعصبيه كاز على اسناني احاول اهدي نفسي

-انا اكلك ياعمي اشلون اصرف لان النبي الحبيب يگول ((العصا لمن عصا))وهي جاي ترمي محصنه بلزنا واذا متصرف اكو من ياخذ حقي وحق زوجتي واخوية وذا ماتصرف جدي انا اصرف

جدي صاااح

-گااااافيييي گاااافييي

سيد مجتبى/أتفاجأت من الحچي انا ويه مرت اخويه
اخذت سيد علي وديته للحديقة يم الجهال ورجعت

اسمع ام عامر تصيح

-اي مجتبى نايم وياهااااا ليش ضمون سالفة وانكشفت ومبين شبه قوي ولااسيد مهدي وين بعد الحادث والعمليات يخلف

هنا سيد مهدي وجه محتقن ويحاجي عمي لازمته امي وجدي حتى مايتعارك والحچي الي ماسامعه
صرت اسمعه من غير ام عامررر تصيح وتغلط ودعي

-النذل عاااايش ابو ايد ابلاتين عاااايش وعنده ولد ومرته حااامل وابني جوه التراب النذل يصيرله عائله وابني ماااااات ابني مااااااااات مااات موووتاه هووو ساق حييل موتاااه وهسه يكووو**الاخوه امرته

هنا ماتحملت الحچي طفرت من ورة عمي وجدي صعدت ميز الاكل هي طفره وهو صلختها براشدي طاحت للگاع احس ايدي تشنجت گد ما الراشدي حيل اجى بوجهه

مديت ايدي وكفتها جريتها من ربطتها مااشوف اله سيد مهدي لازم ايد عمي الي يريد يضربني بسچینه طویله من ظهري يريد يغدرني بس ايد سيد مهدي لازم مه المحد

وعمي يصيح ويتهدد
-بوووويه كض ولد اخوووك لااا أگتلهم هذا مجتبى النذل طك مرتي اله أهينه وهذا لازمني حييييييل

شاطتت روحي واشوف سيد مهدي شلون تفداني وصارت ايده جدام سچين عمي ورغم تجري دم عده لازمها ويدفعه هو والسجين مني

الجد/الصياح بگل مگان واحس كل الي بنيته وتعبت بيه بسنين تهدم اسكت هذا وراضي ذاك بس من شفت مجتبى طفر من وطك مرت عمه راشدي ويهدد بيده كاض ربطته و طيحها للكاع اجيت عليه صحت بيه

-مجتببببببببببببببببى
التفت على صوتي رفعت ايده طكيته راشدي حييييل
لااااازم اكطع العرگه والسواة مجتبى عيب وما يصير زلمة طك مراة حتى لوهوة صاحب الحك
رجع اليورى مجتبى ويباوعلي بأسف وغضب

سید مهدي تناوعلي بعتاب طبطب على چتف اخوه اخذ عقيله الي تبجي وترجف وحتى صوته مااطلع وامه وطلعووو

وزينه بنتي ركضت ورى سيد مجتبى الاول مره امد ايدي عليه گلي وصاك على اسنانه والعصبيه بوجهه يحچي ويأشر باصبعه

_ هاهية ياجدي الا اسوووووي الي بالي
وشوفكم مجتبى منو وماايسمع كلامكم وما أكتفي لاا اخذ حقي وحق اخوي من ابنك ومرته وكل واحد طعن شرفي وشرف عضيدي ومرته

#يتبع