رواية عشق وإبتلاء الفصل الثامن والثلاثون 38 - بقلم الكاتبة شمس السعدي

البارت الثامن والثلاثون
#عشق_وإبتلاء💔
#بقلمي_شمس

اجينه من السوگ . شفت رنا عدنا هي واولادها .
گاعده يم بيبي .
وتخوزر بيه .

ماما . هلو رناوي شلونج .
رنا .. هلو عمه .

اني مااحجي وياها .
اخذت غراضي ودخلت للغرفه .
بدلت وطلعت .
لگيتها تحجي وي ماما .

تگلها عمه ماسه مهما يكون اسمها مطلگه .
ومااريدها تروح وترجع وي مرتضى .
الناس شتگول عليها وعليه .

ماما .. عيب عمه شنو هذا الحجي . اولا مرتضى اخوها
وثانيا سارة وياهم تروح ترجع بعد شنو هذا الحجي .

رنا .. عمه انتي تعرفين شي واني اعرف شي .

ماما .. وشنو الشي الي تعرفيه .گولي حتى نفتهم .

رنا .. عمه انتي مريضه ومااريد اضوجج .

ماما .. گولي لتخافين ميصير بيه شي .

اجيت اني وگفت گبالها گلتلها يله گولي شنو الي تعرفيه عني .

گالت . عمه اني ماردت احجي بس هي جبرتني .
ماسه حاطه عينها على مرتضى من قبل ماتتزوج
ومن تزوجني انقهرت متشوفيها گمت تطلع عيوب بحمودي حتى تتطلگ بينما احمد كان معيشها بدلال .
تلبس شكل وتنزع شكل .

اني بقيت 😲😲 هيج ماكنت متوقعه تفتري عليه هيج افتراء .

ماما . شنو هذا الحجي عيب عليج متستحين .
همه اخوه وبحياتها مگالتله غير خويه .
هسا لو تاهمتها وي واحد ثاني جان صدگت .
بس وي مرتضى .
گومي رنا روحي البيتج . وعيب هذا الحجي المره الثانيه اگول الماهر على سوالفج .

بيبي هديه . الله يطيح حظج يرنا خلي يجي ماهر واني اسولفله .

صدگ الساني ميعرف يجاوب او يرد ع تفاهاتها .
ماگدرت تگول رجلي جان حاط عينه عليها .
تهمتني اني حاطه عيني عليه .

باوعت الماما . گالت لتخافين اعرف مستحيل تسويها .
لو ردتي جان اخذتي الي ترديه من مرته بس اعرف بنتي واخلاقها ..

ارتاحيت من حجت ماما هيج اول مره تمدحني بهذا الشكل .
گالت . بس اتصلي ع ساره وگليلها روحن وارجعن وحدجن بخط لتروحين وي مرتضى مالي خلگ مشاكل .

-لا ماما . اروح وياه ليش اخاف واتراجع واني ممسويه خطأ . مرتضى اخويه وراح يبقى طول عمره مثل اخويه وممجبوره اخاف من افكار رنا المريضه واگله ماامشي وياك للجامعه لان مرتك تغار . والله عيب .

خليها تفكر مثل متريد يجي يوم وتتعود ع الوضع وتعرف هي كانت غلطانه .

قررت بعد مااخاف ولااتراجع . ومااسمح الاي احد يهين بيه .
بيبي قبل مااروح للسوگ . گالت لتشترين اسود اشتري الوان .
الحزن بالگلب ييمه . وانتي بعدج شابه وراح تدخلين كليه .
من تداومين فكي حزنج انتي وساره بعدجن حدييثات .
وجدجن. هم مايقبل تبقن بالاسود ..
ماما مقبلت بس بعدين بيبي قنعتها ..

بأول يوم دوام . مالبست جبه .
لبست تنوره وقميص وفوگاه ستره . ولفيت الشال ولبست نظارات شمسيه .
طلعت اخبل فديتني .
خليت بس كحل وماسكرا . وعيوني كبار برزن وطلعن حلوات .
اخذت جنطتي وطلعت ..
لگيت مرتضى وساره منتظريني بالسياره .
صعدت لورى وگلت صباح الخير .
گال مرتضى ولج ماسه شطالعه لو ادري جايب وياي شي احارب بي ..

هههههه مو الهلدرجه .

شلون اشتغل حارس عليجن .انتي والاخت هنا يأشر على ساره .

وصلنا للجامعه . جو جديد وحياة جديده عليه .
لازم اعيش وادرس وانجح وافرح .
كافي هم وكافي حزن .
من اليوم اني انسانه ثانيه .
الي طموحاتي ولازم احققها ومايوگف بوجهي احد .

كل واحد راح القسمه .
رحت للقسم مالتي . ماانكر خجلانه ومااعرف احد .
بس لازم اصير قويه .
سألت ع المرحله الاولى .
دلوني عليها . دخلت اكو بنات وشباب گاعدين .
گلت صباح الخير .

صباح النور.  ردوا .

گعدت يم بنيه هي حنطاويه بس ملامحها حلوه ومبين عليها فقيره .تعارفنا ع بعض ..
سلمت گالت اسمي وسن ..
اني اسمي ماسه .

عاشت الاسامي . حلو اسمج .

تسلمين اسم بيبتي هههه .
لازم حلوه مثلج .

هو اني طالعه عليها .

وسن .. انتي من وين .

-من الحله .
-اني من الناصريه واقسام ومااعرف وحده والخوف كاتلني .
-لاحبيبتي ليش الخوف اعتبريني صديقتج وماكو وحده ان شاء الله اني اهلي وعمامي من الناصريه .

-اها من وين وياعشيره .

-من قلعة سكر .. عشيرة (     ) ..

-احسن ناس وطيبين . احنا من الرفاعي قريبه عليها .
بس عمتي هناك بقلعة سكر متزوجه .

(بداخلي .. اوووف يالناصريه كلما انهزم منج انتي وراي وراي مكتوب عليه احب واصادق واخالط من الناصريه )

وسن .. واهل ابوج بالحله لو بالناصريه ..
بيبي من الحله وجدوا ترك الحله واجه عمودها هنا تزوجوا واستقروا هنا  وانتقلوا بعدين . يعني اصلها حلاويه بس جدوا من. قلعة سكر .

اها..  اي حقه .اذا الحلاويات هيج حلوات . حقه يترك كلشي ويجي وراها ههههه

ههههههه انتو الاحلى حبيبتي ..

گلتلها ماكو بنات وياج من الناصريه .

لا اكو بس بغير اقسام . 
بس اني انكليزي .
واكو انكليزي مرحله ثانيه وثالثه مو وياي بس بالقسم الداخلي نلتقي .

-اي شي تحتاجيه حبيبتي گولي واني مااقصر ان شاء الله.

ارتاحيت الوسن حيل مبينه حبابه .
وصرنا نطلع وندخل للمحاظره سويه .
وعرفتها ع سارة .
صارت گعداتنا سويه .
ومرات يجي مرتضى يمنا يشتريلنا اي شي ناكله لو مي .
بس وسن تستحي ومرات تگوم من يجي .
گام يجي قليل .

الجامعه حياة ثانيه . ونسيت همي وايام الحزينه بيها .
صحيح الدراسه صعبه .
بس شغلتني شويه .
بحيث ارجع للبيت تعبانه
والمشكله كلما ارجع نلكي الحارس ناطر ع الشباك .
تباوعلنا شوكت نرجع وشنسوي .
اسوي نفسي مشايفتها بس بداخلي اضحك على عقليتها لان غيرتها مو غيره طبيعيه مرض .
قصدي الحارس رنا😂 .
#بقلمي-شمس
يتبع…
………………… ....

هلو بنات طبعا اعتذر من متابعيني الراقيات لان البارحه منزلت بس عندي ضرف . والضرف مستمر الى الان .
بس ميهون عليه اتركم منتظرين .
وشكرا لكل الي اهتم الغيابي .
اما بالنسبه للي يدخلون خاص ويگولون .
سويتيها شطولها وفتيتي گلوبنا وبعد مااتابع .
ترى الي ميريد يتابع مجابرته .
تعاملي دايما حلو وياكم . ليش المقابل يرد الاحترام بالاساءة .
اني هم مارديت عليهم گبل نطيتهم حظر .
لان احب يكون متابعيني اسلوبهم راقي مثل اغلب البنات الي موجودات فديتهم . وفديت اسلوبهم .
احس نفسي وياهم عائله وحده .
واسفه ع الاطاله بس هسا فتحت الواتباد ولگيته مخبوص بالرسائل .
😘😘 احبكم