رواية عــز الــدليم و(بنت الشيوخ) الفصل الخامس عشر 15 - بقلم ﮼ميم﮼الُِ﮼فُرج

عــز الــدليم

M_meramahmed

الــكاتبة ... ميم ال فـــرج ♡´'♡

ــــــــــــــــــــــــــــــــــــــــــــــــــــــــــــــــــــــــــــــــــ

وسهرت منتظراً لطلَّةِ نوره
لَعَلِّيْ أرى من نوره الآفاقِ

لكنه أمسى ليَحْجُبَ نوره
عني فيُظلم داخلي الاعماقِ

لا الليل يرحمني ولا ظلماته
لا تختفي من ناريَ الأشواقِ

فأنا يتيم الليل فيه وياله
يُتْمَ الحنين معذبَ العشاقِ

لا السهد فارقني ولا نومي أتى
لم يلقَ تفويضاً إلى الأحداقِ

ــــــــــــــــــــــــــــــــــــــــــــــــــــــــــــــــــــــ

.
.
.
.
.

قمراء .... فتح اعيونه بصدمه

بعدني عنه وراح يركض لجمانه الطايحه بالگاع يضرب بخدها يريدها تصحه

قمراء .. كمت ابجي ومن بين شهكاتي كتله ...

" ماكو ماكوو ماتحس حيدر فدوه لا تخليها تموت

ابوالاكبر  ...

" خلص خلص بلا بكى روحي حدري بسرعه هاتي عبايه لك والها خلينه انلحگ على النفس الي فيها

وينك گمره لاتخلين احد يشوفك فاهمه

قمراء .... 

نزلت اهرول بسرعه قبل لاوصل الغرفتي لكيت عبايات كدامي على القنفه البصاله مال الطابق الثاني  مادري   اخذتهن ورحت واني مادري المنو

تلگاني حيدر اخذ العبايه شمرها على جمانه وشالها

ابوالاكبر ...

"  گمر حدري گبلي شوفي في احد تحت وانه وراج

نزلت وحيدر شايل جمانه وراي

ماجان اكو واحد هستوهم زفوو مهيمن وكلها الناس طشت بقوو كم واحد كاعدين بالديوانيه

والنسوان بغرفة الحجيه منتضرين من مهيمن  البياض

طلعه من باب الحديقه الوره للسياره حطاها ابو الاكبر بالاخير اني كعدت يمها وحطيت راسها بحضني

بعده ممحرك السياره سمعنه صوت الرمي يعني مهيمن خلص عصرني گلبي على منضر جمانه الي منتهيه وهو متهني شگد الگلب حقير ينطي نفسه الشخص ميستهاله ويبقى مجلب  بحبه هسه جمانه اشافت منه وحبته اذا هو طول عمره مطنشها

قمراء ...

"  اوووف هل گلب الاغبر

ماحسيت بالطريق حيدر جان طاير بسرعه وصلنه ركض فتح الباب وشالها دخل يركض واني وراه

تلگو الطوارئ اخذوها منه كلها تعرفه وتصيح ها شيخ وها شيخ

الدكتور  ....

" دخلوها الغرفه الانعاش بسرعه على جهاز النبضات

خذوها وضلينه اني وحيدر ننتضر الفرج مرت  عشر دقايق اجه ممرض يركض اخذ علبه باايده ورجع ركض ....

لحگه حيدر واني كمت وراه

حسيت رجليه ثگلن بعد مايعينني اخطي من المنضر الي شفته دخل الرعب بداخلي وشكو ذره بجسمي رجفت

اباوع من الشباج الشفاف الي يطل على الغرفه مال الانعاش

شفت جمانه شادين شالها على شعرها مثل التوربان

مخلين الغطى على جسمها وبس
اكتافها وشويه من صدرها طالع والاجهزه كلها وايرات مشكله بجسمها

اشوفها شلون ترفع لفوگ وترجع بقوه على السرير اثر الضربات الكهربائي الي جاي يسويها الها الدكتور

بعد ماشالتني رجليه كعدت بالگاع وتجيت ضهري على الحايط
حسيت قوتي تبخرت من شفتها
مثل الي يرد تطلع روحه هل منضر خلاني احتقر الحب والي علمنه عليه شستفادت هسه هي معقوله الحب يدمر الهل حد معقوله اكو احساس مثل الحب يخلي گلبك يوگف منه ااذا كان هيج المفروض يسمون موت وحب

وشويه وطلع الدكتور تلگى ابوالاكبر

"ابوالاكبر ....

"  بشر دكتور شصار

الدكتور ...

"  سوينه العلينه والحمدلله گدرنه انرجع النبض بكشل طبيعي بس للاسف المريضه تعرضت الذبحه قلبيه وگلبها ضعيف ماتحمل لو ماملحگينها بالوقت المناسب كان ضربتها جلطه اثر ارتفاع حاد بالضغط جان خسرنه المريضه والليله راح تبقى تحت المراقبه الحمدلله على سلامتها

كلام الطبيب جان صدمه النه معقوله جلطه مره وحده وهو شنو جلطه شنو ضغط هي شكد عمرها اصلا حتى هيج يصير بيها

اشوف حيدر كعد على الكرسي اليمي مهدود حيله دنگ وحط ايده على راسه

ابوالاكبر ...

" سود الله وجهك يامهيمن

قمراء

...رفعت نضري اله بصدمه

ابوالاكبر ...

"  وشبلاج يگمره ضنج ماني خابر الي  بجوف جمانه شنهو انه اعرف الي يحب من حركه يدو وجمانه مهي حابه حب عادي جمانه عاشگه ومصيبه العاشگ چايده  ... لكن المصگوع يترك المنه وبينه ويركض على الغرب ... عجل بنوت كتال عمك يمهيمن

نهضت على حيلي  ...

" يلا يگمره گومي اوصلك للبيت وارجع ابگى معاها

"  لا حيدر ماكدر اعوفها وحدها

"  شبلاج يمعثوره انه اردج حتى تغطين على غيابها وتكولين نايمه بغرفتك ما اني بااغي احد يعرف بالي صاير معاها وتأمنين الطريق لمن اجيبها الصبح يلا يگمره يلا

قمراء رجعني للبيت بسرعه وهو رجع للمستشفى ..

بوجهي الغرفتي كلها نايمه ماكو حس

ماجاني نوم واني افكر بجمانه بالي يمها شراح يصير بيها يا رب دخيلك  تلطف بيها 

طر الفجر واني گاعده

نزلت جوه طلعت للحديقه افتر بيها اجه ابالي ارتبها وازرع بيها تصير احلا

تقربت يم السرداب ........ دفعت الباب مقفول ...

ياترى شنو خلف هل باب الي ضامينه صار سنين محد مسموحله يعرف معقوله ليلى تكون هنا لو منو

رجعت للمطبخ شفت الحجيه جاي تتوضه رجعت الغرفتي وبين افكاري

طلعت اني اباوع من الكاعد منو النايم بعد ماابوالاكبر دز مسج كال خرجت جمانه امني الطريق هههههه حسيت نفسي جندي عنده امني الطريق هههههه

جانت ستوها الشمس طالعه ماكو احد ما طول شويه ودخل حيدر ساند جمانه ركضت سندتها من الجه الثانية وصعدناها للغرفه حيدر راح لشغله واني شويه ونزلت

جانو كاعدين يجهزون ريوگ للعرسان اكو عرسان يكعدون هسه دخلت اساعدهم

جاي ارتب بالستكاين فزيت من قطعه ااثلج الي نزلت لضهري

قمراء ..  اششششششششاااه ليش ولج ابتهال خرعتيني

ابتهال ..... هههههه فززتج ولج وين بالج ماتكوليلي

قمراء  ... وين هنا

نرجس ... قمراء بس لابعدج تفكرين بالسرداب

ابتهال ... ياسرداب شكو

نرجس ... سرداب الحديقه الوره

ابتهال ... عزززا بعيني ولج قمراء شلج بهاي السالفه

قمراء ... لا لا شنو يعني سؤال سئلته وبس

ابتهال ... زين عجل

نرجس ... اكول بنات وين جمان مامبينه

قمراء ... طفرت ... كلتلها

يمي نامت اليوم يمي حيدر عنده خفاره وضلت وياي

ابتهال ... اي وشبيج نكزتي

..  لامابيه شي

نرجس ... روحي كعديها حبيبه خلي تساعدنه

قمراء ... اي

رحت واني گلبي يدگ بلعومي من الخوف خاف يشكون بيه زين هي حاط كانونه شلون تنزل شتكول

دخلت الغرفه السرير فارغ

قمراء .. جمان جمان حبيبي وينج

نفتح باب الحمام وطلعت

جمانه ... ها قمراء

قمراء ... يسئلون عليج جوه

... اي هو اني اريد احدر تحت

... وين كانونتج

.. شلعتها

.. ليش عندج ابر

... ماريد مااحتاج

... جمانه حبيبي

...  قمراء خلص لاتفتحين الموضوع فدوه خلي نحدر

سكتت واخذت ايدها اسندها على الدرج

وصلنه اخر بايات صارو كدامنه مهيمن ومرته كاعدين يتريكون

صديت الجمانه جانت  نضراتها بارده لكن قبضت ايدها الي دخلت اضافرها بجفي هذا يدل على كبر البركان البيها

تركت ايدي وكملت طريقها ليهم

جمانه .... شفت جكليت يمهم اخذته

طشيت عليهم واني اهلهل ....

كللووووووووووووش كللووووووووش

الف مبروك ابن عمي

نضرات مهيمن المستغربه ونضرات العروس المستحيه ومستغربه

تركتهم جمانه وطلعت

ركضت وراها قطعت طريقي بعد كلامها

جمانه ... رايحه الاهلي جمانه اتركيني لحالي

رجعت اكمل شغلي وبالي يمها مادري بشنو وله بشنو افكر تعبت من ابو الاكبر ومكالماته لو السرداب لو سلمان فوك هذا جمانه كلبي متكطع عليها

مرت ايام واسابيع علاقتي ويه ابو الاكبر بارده من عگب الطراگ ماتكلم وياي ولاتقرب مني

وكفه على المرايه احضر نفسي اله اريد اكسر هل حاجز حتى اكدر اوصل للي اريده

حطيت اخر لمساتي جنت لابسه ثوب كلوش قصير ربع ردن وشعري خليته على طوله العكش ... يحبه هيج

جاي احط عطر ودخل ...

باوعلي بمضرات بارده وعافني وراح للكنتور طلع ملابسه ودخل للحمام

خووووش اني الك حيدر

طلعت بالتليفون اغنيه ساجده ردح قللت الصوت وبديت اهز اني ماعرف ارگص بس ماشي حالي

كابلت المرايه وضليت ارگص ومغمضه عيني مندمجه حسيت ضربه قويه على الميز والغنيه انطفت

فتحت عيني حيدر كامش الخاولي بيده وخازرني

ابو الاكبر ...

" ربي يكويك ما شاء لله مواهب مدفونه كم سعر السهره

قمراء ... فتحت اعيوني بصدمه

حيدر ...

"اي ليه مصدومه لابسه لبس مشلتخ واغاني وتردحين فاتح مرگص وانه مدري

.... دمعت عيوني من خزرته

." بس حيدر

ابو الاكبر ...

"اتاج راسج انه  ...

دنكت راسي بقهر باوعلي من فوك ليجوه

... ابوالاكبر

شغل الاغنيه

"  ارگصيلي يبت مناهل

وراح كعد على القنفه وخله رجل على رجل

حسيت نفسي رخيصه بس ماستسلم

بديت اتمايل واركص اله ودلع عليه بس هو نضراته جانت حاده ومخنزر

كام بعصبيه طفه الاغنيه وجرني من شهري احسابك بعدين يبت مناهل دفعني وراح

شبي هذا متخبل اوووف يبت مناهل متخلصين ابد من هل لقب الزفتت صحت بصوت وضربت رجلي بالارض اووووووف

رحت على البلكون اشوفه يخابر ورايح راد بالحديقه الوره هسه شعليه بي يطبه طوب

لفيت راسي ونمت باالگاع شويه ودخل واحس خطواته نار من يمشيها

كبل نام على السرير مومثل كل مره يشيلني يخليني على السرير

وخرت الغطه عن راسي ختنكت حسيته نام وصوت شخيره مله الغرفه

كمت تقربت يم راسه بهدوء اباوع الشكله

فززني صوت من تليفونه يعلن عن وصول راساله فضول البيه خلاني افتحها

داز صور واحد كاعد على كرسي بمكان مثل الملهى ودير مدايره مشاريب

ومكتوب جواها

" سيدي هذا سلمان حصلته

نضربت على راسي هذا سلمان نفسه مو نفسه الي بالصوره شفته ويه مناهل هرولت للكنتور وبيدي التليفون طلعت الصندوگ البي الصور كعدت بالكاع وبسطت بيهن عين على الصندوگ وعين على حيدر النايم

طلعت الصور وبديت اقارنها اي يشبها كميه الشبهه فضيعه بس فرق العمر اكيد اكو فرق هاي الصور قديمه زين شنو الربط هذا اجابه لهنا شنو علاقته باامي

وصلت رساله ثاني مكتوب بيها

" تحليل

مالحگت اكمل الباقي لان نجريت من شعري ونرفعت ليفوگ عيون ابو الاكبر الي مخنزره باوعلي بغضبه

فتح عيونه بصدمه من شاف الموبايل بيدي والصوره رفع ايده بقوو راد يضربني لكن تراجع وقبض ايدي وضرب فخذ رجله

لحظه رعب يبس دمي من الخوف

قربني منه وهو كافش شعري وكال بغضب

ابوالاكبر ...

" تعديتي الحدود يگمره تماديتي كثير يبت مناهل حسابك بعدين

تركني واخذ تليفونه وسلاحه وراح يركض

الف فكره ابالي دخيلك ربي شنو هل غموض منو سلمان شدخله بمناهل شجاي يصير شنو وبين حسبه وحسبه اذن الفجر توضيت وتوجهت اصلي وادعي ربي يطلعني من هل متاهه الااني بيها لا الي بمناهل ولابليلى ولابعماد وجواد ادفع ثمن اغلاطهم انوب هذا سلمان مادري منو لطفك ربي

ماعرف شلون واني ادعي غمضت عيني وغفيت

فزيت مرعوبه على صوت صياح وهوسه

ونسوان تصايح

     ""مات بعز شبابه يبووووووووو

يتبـــــــــــــــــــــــــــــــــــع

هذا البارت لبات گلبي اتمنى يعجبكم

اتمنى متابعه حسابي

التصويت وتعليق على ارائكم الحلوه بالقصه

تفاعلكم سر نجاحي

حسابي انستا تنوروني

Tr._nym

تصبحون على خير

احبكم ♡❤