رواية عزلاء أمام سطوة ماله ج ١.....للكاتبه الرائعه مريم غريب الفصل الثالث والثلاثون 33 - بقلم Shaimaa Gonna

  

يخرج "عثمان" من الغرفة و هو يغلي من الغضب و يلعن كل شئ أمامه ...

تصطاده "صفية" و هي تصعد الدرج :

-عثمان عثمان ! .. قالتها و هي تهرول صوبه

توقف "عثمان" و هو يتأفف بضيق شديد ، لتأتي أخته بسرعة و تقول بإبتسامة :

-مساء الخير يا عثمان.

إلتفت "عثمان" لها و رد بإقتضاب :

-أهلا يا صافي.

صفية بإستغراب :

-مالك يا عثمان ؟ شكلك مضايق كده ليه ؟!

عثمان بإنفعال :

-إنتي مالك مضايق و لا مش مضايق . إنجزي إنتي و قولي عايزه مني إيه ؟؟؟

أجفلت "صفية" و قالت بشئ من الإرتباك :

-طيب خلاص من غير عصبية . أنا مش قصدي اتدخل فيك !

تنفس "عثمان" بعمق ، ثم قال بعد أن هدأ نفسه :

-و لا يهمك يا حبيبتي . أنا إللي آسف إني إتعصبت عليكي . قوليلي بقي كنتي عايزه إيه ؟

توردت "صفية" خجلا و أخفضت رأسها و هي تقول بتلعثم :

-كنت . كنت عايزه أكلمك في موضوع كده !

عثمان بترقب :

-موضوع إيه إتكلمي ؟؟

صفية بتوتر :

-صالح كان كلمني إنهاردة في موضوع جوازنا.

عثمان بعدم فهم :

-يعني إيه ؟ ماله موضوع جوازكوا ؟!

صفية بتردد :

-صالح عايز الجواز يتم خلال الشهر الجاي بالكتير !

عثمان بإستنكار ممزوج بالحدة :

-نعم ! جواز إيه إللي يتم خلال شهر ده ؟ هو بيستهبل ؟ بابا لسا مافتش علي شهرين و سيادته عايز يتجوز ؟؟؟

صفية ببراءة :

-و الله أنا قولتله كده و قولتله ماينفعش عشان مامي كمان
بس هو قالي إننا مش ضروري نعمل فرح كبير ممكن تبقي حفلة عائلية بس .. ثم تنهدت بحزن و قالت :

-و بعد ده كله قولتله عثمان هو إللي هيقرر حاجة زي دي . يا يوافق يا مايوافقش .. القرار ليك يا عثمان و أنا هرضي بيه أيا كان.

نظر لها "عثمان" مليا ... ثم قال بعد تفكير :

-طيب يا صافي . أنا حاسس إنك ميالة للحل ده .. أنا موافق عشانك إنتي
بس لازم نسأل ماما الأول.

صفية بفرحة :

-يعني إنت موافق بجد يا عثمان ؟؟؟

عثمان بإبتسامة :

-أيوه يا حبيبتي . موافق . مبروك يا صافي.

ضحكت "صفية" بسرور شديد و قفزت عليه لتضمه بقوة و هي تهدل :

-الله يبارك فيك يا حبيبي . الله يبارك فيك . ربنا يخليك ليا يا عثمان يآااا رب.

ضحك عثمان بدوره و قال :

-ماشي يا ستي . و الله لو أعرف إن جوازك من صالح هيخليكي مبسوطة كده كنت جوزتك من زمان ده أنا كنت فاكرك مش مستلطفاه و كنت متوقع تفركشوا في أي لحظة !

إبتعدت "صفية" عنه و قالت بإستياء :

-نفركش إيه يا عثمان ؟ إحنا بنحب بعض.

-أوك . عموما مبروك بردو.

-الله يبارك فيك . بس مش هتقولي إنت بقي إيه إللي مضايقك ؟!

عاد "عثمان" للتجهم من جديد ..

صفية بقلق :

-يا عثمان بليز قولي إنت شكلك مش طبيعي خالص !

زفر "عثمان" بكدر و تمتم بخفوت :

-أنا ضربت سمر !

شهقت "صفية" و قالت بصدمة :

-يانهار إسود . إنت إتجننت يا عثمان ؟ دي حامل إزاي تمد إيدك عليها ؟؟!!

عثمان بضيق :

-أنا ماضربتهاش جامد . هو كان ألم بس
أعمل إيه إستفزتني !

صفية بحنق :

-حرام عليك يا عثمان . البنت رقيقة جدا و شكلها مؤدبة ليه تضربها ؟ ماتعرفش تتفاهم معاها بطريقة تانية ؟؟

عثمان بنفاذ صبر :

-خلاص بقي يا صفية أنا مش ناقصك.

لوت "صفية" ثغرها بعدم رضا ، لكنها قالت بصوت هادئ و حازم في آن :

-طيب خلاص . بس لازم تروح تصالحها دلوقتي.

تململ "عثمان" و هو يقول بتذمر :

-هي الغلطانة مش أنا.

صفية بصرامة :

-هتروح تصالحها دلوقتي يا عثمان . ماتنساش إنها حامل و نفسيتها أكيد وحشة بالذات في الشهور الأولي . ماينفعش تزعلها.

عثمان بإنزعاج :

-أوك خلاص . هروح أصالحها.

صفية بإبتسامة :

-أيوه كده.

في هذه اللحظة ، إنضما كلا من "هالة" و "مراد" لهما ..

عثمان بذهول :

-مرآااد ! مش معقوول !!

أقبل "مراد" علي صديقه و هو يمسك بيد "هالة" بقوة بينما الأخيرة تبتسم بغبطة شديدة ..

-صاحبي يا صاحبي صديق السوء رجعلك تاني .. قالها "مراد" مبتسما ، ثم إحتضن "عثمان" دون أن يترك يد "هالة"

عثمان بدهشة :

-إيه يابني إللي رجعك ؟ مش قلت خلاص هتستقر هناك ؟!

نظر "مراد" إلي "هالة" بحب و قال :

-بصراحة أنا ماكنتش قادر أمشي . و رجعت مخصوص عشان هالة.

عثمان بإستغراب :

-رجعت مخصوص عشان هالة ؟ أنا مش فاهم حاجة !

نقل "مراد" نظره إليه و أجابه بثقة :

-أنا و هالة بنحب بعض يا عثمان و أنا رجعت عشان أتجوزها و أخدها معايا و أنا مسافر.

نظر "عثمان" له و ضرب كفيه ببعضهما و هو يقول بتعجب :

-لا حول و لا قوة إلا بالله . إيه حكاية الجواز معاكوا إنهاردة أنا عايز أفهم ؟ كلوا دلوقتي بقي عايز يتجوز ؟!

ضحك "مراد" بخفة و قال :

-أعمل إيه حبيتها . لما سافرت إكتشفت إني مش قادر أعيش منغيرها . المهم دلوقتي قولي أنكل رفعت فين عشان أطلبها منه و نخلص الموضوع بسرعة أنا نازل إسبوع بس و ماينفعش أتأخر علي الشغل.

عثمان بإبتسامة :

-أنكل رفعت يا سيدي هتلاقيه دلوقتي في الشركة طير عليه بسرعة قبل ما يختفي في أي حتة و ماتقدرش توصله.

مراد بغمزة :

-لأ ماتقلقش . أنا مش هاسيبه إنهاردة قبل ما يوافق يجوزني هالة بكره بالكتير.

عثمان ضاحكا بمرح :

-ماشي ياسيدي . ربنا معاك .. ثم نظر إلي "هالة" و تابع بصدق :

-مبروك يا هالة.

هالة برقتها المعهودة :

-الله يبارك فيك يا عثمان . ميرسي.

و ذهبا الثنائي المرح ، لتقول "صفية" بتذكير :

-عثمان . مش هتروح تصالح سمر !

•••••••••••••••••••••••••••••••••••••••••••••••••••••••••••

كانت تضع "ملك" النائمة في الفراش ... عندما دخل عليها محمحما بشئ من التوتر

إستدارت "سمر" إليه و رمقته بإزدراء شديد ، ثم مشت صوب الحمام ..

ألمته هذه النظرة ، فأعترض طريقها بسرعة و أمسك بذراعها ..

-علي فكرة أنا ماكنتش ناوي أمد إيدي عليكي ! .. غمغم "عثمان" متحاشيا النظر في عيناها ، و أكمل :

-إنتي أستفزتيني يا سمر . رغم إني قولتلك قبل كده إن أمي أغلي حاجة في حياتي إتجاهلتي ده و إهانتيها قدامي . أمي أغلي عندي من نفسي يا سمر ربنا فوق و هي تحت
أنا عمري ما زعلتها و لا حتي أبويا زعلها لأن أصلا مافيش زيها في الدنيا دي كلها . هي ست كلها رقة و حنان . ملاك و كل الناس بيحبوها و هي كمان عمرها ما كرهت حد .. ماتستاهلش أبدا الكلام إللي قولتيه عليها يا سمر.

شدت "سمر" ذرعها من يده و قالت بجمود :

-أنا ما أهانتش أمك . ماقولتش عليها حاجة وحشة
يمكن قللت منها منغير قصد بس إنت إللي كان عندك إستعداد تتصرف معايا بالهمجية دي
ما ده مش جديد عليك . إنت عملت أكتر من كده و كسرتني . و رغم ده كله أنا ما سألتكش لحد دلوقتي إنت عملت كده ليه.

عثمان مقطبا بخزي :

-أنا بعترف إني غلط فيكي كتير . و آذيتك . بس أنا دلوقتي عايز أعوضك و إنتي مش مدياني فرصة !

سمر بسخرية :

-هتعوضني عن إيه ؟ هو إنت دوست علي رجلي و كلمة آسف هتغفرلك عندي ؟ لازم تعرف إنك إنت السبب في تدمير حياتي . إنت إللي ساومتني و أجبرتني علي الغلط . كنت عارف إني محتاجة فلوسك عشان أختي مش عشاني . كنت عارف و متأكد إني هركعلك و هوافق علي كل شروطك
و عشان تبعد الذنب عن نفسك كنت كل شوية بتفكرني إنك ماضربتنيش علي إيدي . ماغصبتنيش . صح إنت عندك حق . أنا عملت معاك كل حاجة برضايا . إنت ماغصبتش عليا أي حاجة . عشان كده أتوقع منك دلوقتي إنك ماتغصبنيش علي العيشة معاك . أرجوك طلقني !

و نطقت أخر كلمة بصعوبة شديدة ..

ليمسك كفاه الضخمتان بأعلي ذراعها فتطوقهما تماما .. هزها "عثمان" بيده قائلا بعصبية :

-مش هطلقك يا سمر . مش ممكن . إنتي مراتي و حامل في إبني أو بنتي . مستحيل أتخلي عنكوا.

سمر بنشيج مكتوم :

-أوعدك إني مش همس إبنك أو بنتك . هحافظ علي الحمل و لما أولد أنا مستعدة أتناز آا ..

-إسكتي ! .. قاطعها و هو يهزها من جديد ، و كانت كفاه ترتجفان و تبعثان ذلك الإرتجاف عميقا في عظامها

أكمل بصرامة :

-مش هطلقك يا سمر . إنتي و إللي في بطنك ملكي . ملكي أنا .. عمرك ما هتقدري تنكري ده أو تبعدي عني . أنا حقيقة و أمر واقع في حياتك . خليكي فاهمة كده كويس.

ثم تركها ، بل ترك لها الغرفة مجددا و خرج

أما هي ، فإنفجرت بالبكاء ثانيةً ...

•••••••••••••••••••••••••••••••••••••••••••••••••••••••••••

بعد مرور يومان ..

في الصباح ينزل "عثمان" من غرفته ليذهب إلي عمله ، فيقابل شقيقته و إبنة عمه في وسط الدرج

عثمان بإبتسامة :

-صباح الخير هوانم !

هالة / صفية :

-صبـاح النوور يا عثمان.

-إيه علي فين العزم بدري كده ؟

صفية بحماسة :

-أنا و هالة رايحين Deep Mole نجيب شوية حاجات ليا عشان فرحي و ليها عشان خطوبتها و فرحها إللي هيتعملوا في وقت واحد ماعرفش إزاي دي !

عثمان بتفهم :

-إممم . مفهوم ربنا معاكوا .. و جاءته فكرة ، ليطلب منهما :

-طيب ممكن تاخدوا سمر معاكوا ؟ هي من ساعة ما جت هنا ماخرجتش خالص و أنا مش فاضي اليومين دول و مش هآمن عليها إلا معاكوا !

هالة برحابة :

-Sure يا عثمان . هناخدها معانا طبعا و ماتقلقش هتتبسط و هنخرجها من مود الحمل و الإكتئاب إللي هي فيه.

صفية بإثارة شديدة :

-أحلي حاجة إن العيلة بتزيد و الروتين إللي إحنا عايشين بيتغير . الواحد كان زهق و الله و سمر هي و أختها عملوا جو لطيف أووي في البيت . إطمن يا عثمان مراتك في إيد أمينة.

عثمان بإمتنان :

-شكرا ليكوا . أنا متأكد إنكوا هتحافظوا عليها .. ثم أخرج چزدانه من جيب سترته و سحب إحدي الكروت

-خدي يا صافي . الـATM ده و معاه الباسوورد . خليه معاكي و هاتي لسمر كل إللي هي عايزاه مع إنها مش هتعوز حاجة . بس خليه معاكي يمكن تحتاج حاجة !

أخذت "صفية" بطاقة الائتمان منه و قالت بإعجاب :

-ربنا يخليك ليها يا عثمان . أنا بجد مبسوطة إنها قدرت تخليك تحب و تبقي الشخص الحنين إللي واقف قدامي ده.

و ذهبت الفتاتان عند "سمر" .. دقت "صفية" الباب و دخلت تتبعها "هالة"

وجدتا "سمر" تهتم بشقيقتها كالعادة ..

صفية بإبتسامة :

-صباح الخير يا سمسمة !

سمر بإبتسامة شاحبة :

-صباح النور يا صافي . إزيك يا هالة ؟

هالة بود و رقة :

-الحمدلله يا سمر كويسة . إنتي إيه إخبارك و لوكا القمر عاملة إيه ؟!

-أهو كويسين . إيه جايين بدري كده عايزين حاجة ؟ أخوكي و إبن عمك لسا نازل دلوقتي حالا لو كنتوا جاينله !

صفية مصححة :

-لأ يا سمسمة إحنا جاينلك إنتي.

سمر بإستغراب :

-جاينلي أنا ؟ خير ؟!

و عرضت عليها "صفية" مرافقتها هي و "هالة" إلي السوق التجاري و شرحت لها الأمر ..

-و أنا إستأذنت عثمان و هو وافق .. قالتها "صفية" بإبتسامة عريضة

هالة مكملة :

-بجد وجودك معانا هيبسطنا جدا و هنقدر نتعرف علي بعض أكتر.

صمتت "سمر" لثوان ، ثم قالت بتهذيب :

-أنا طبعا بشكركوا علي الدعوة . بس آسفة مش هقدر أجي معاكوا !

صفية بإحباط :

-ليـــــــــه يا سمر ؟

سمر بلطف :

-و مين ياخد باله من ملك ؟ و أنا مش هقدر أسيبها مع أي حد هنا بردو . لازم تبقي جمبي دايما.

صفية بسهولة :

-خلاص هناخد تانيا معانا تخلي بالها منها و تبقي جمبك زي ما إنتي عايزة.

هالة برجاء :

-يلا بقي يا سمر بليييز . إحنا محتاجينك معانا.

سمر بعد تفكير :

-ماشي !

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

ذهبن ثلاثتهن إلي أحد أضخم الأسواق التجارية بالمدينة كلها ..

إقترحت "صفية" في البادئ :

-إيه رأيكوا نبتدي بالـBeauty Center ؟ أنا محتاجة أعمل look جديد لشعري عشان الفرح . و بعدين لما نخلص نروح نتغدا و نكمل لف علي علي المحلات . بس سمر طبعا مش هتلف معانا عشان البيبي هنسيبها في الكاڤيتيريا و لحد ما نخلص و نرجعلها.

هالة بتبرم :

-لأ إحنا ناكل الأول . أنا مافطرتش يا صافي !

وبختها "صفية" :

-يا بت إنتي دايما الأكل علي راس القايمة عندك ! إهدي شوية هناكل ياختي بس إصبري .. يلا بينا.

و بالفعل توجهن إلي مركز التجميل ، فأجلستهن المسؤولة في قاعة الإنتظار ريثما تحضر لهن ثلاثة أماكن ..

بعد قليل دوي جرس الإشعار بهاتف "صفية" ففتحته لتجد رسالة من أخيها ..

عثمان :

إيه يا صافي إنتوا فين كده ؟

صفية :

إحنا وصلنا المول أهو في الكوافير يا عثمان.

عثمان :

سمر عاملة إيه ؟؟؟

صفية :

أهي قاعدة جمبي
كويسة.

و إنتظرت رده ... لكنه صمت علي هذا ، فغادرت المحادثة ..

و إذا بالهاتف يعلن عن وصول رسالة جديدة

تنهدت "صفية" و فتحت رسالة أخري منه :

طيب صوريهالي منغير ما تاخد بالها
عايز أشوفها !

كتبت "صفية" بإستنكار :

و أنا هصورهالك منغير ما تاخد بالها إزاي يا عثمان ؟
دي قاعدة جمبي.

يرد "عثمان" بسرعة :

إخلصي يا صفية
دلوقتي.

تأففت "صفية" بضيق و نظرت من جانب عينها إلي "سمر" وجدتها شاردة بعمق ، هذه فرصتها إذن

رفعت هاتفهها ببطء حتي لا تلاحظها ، و عوجته بطريقة بلها ، و راحت تلتقط عدة صور ..

-بتعملي إيه يا صافي ؟! .. قالتها "هالة" بإستغراب ، لتلفت "صفية" لها و تغمغم بغضب :

-وطي صوتك يا غبية . مابعملش حاجة خليكي في إللي إنتي فيه .. و أشارت إلي مجلة الموضة الكامنة بين يديها

بعثت "صفية" بالصور إلي أخيها و هي تتمتم بتعجب :

-أخويا إتجنن و الله ... !!!!!

بعد برهة من الزمن ...

جاءت المسؤولة عن المكان و تحدثت بصوت رسمي رقيق :

-إتفضلوا معايا الأماكن جهزت خلاص !

صفية بحماسة :

-أوك جايين .. و لكن "سمر" لم تقوم و ظلت علي شرودها ، فلكزتها "صفية" بخفة في كتفها و قالت :

-سمر . إيه سرحانة في إيه ؟!

أفاقت "سمر" من شرودها و نظرت لها قائلة :

-هه ! لأ و لا حاجة
مش سرحانة في حاجة.

صفية بإبتسامة :

-طيب يلا عشان أماكنا جهزت.

سمر بإستغراب :

-أماكن إيه ؟

-أماكنا يا سمر . أومال هنعمل Hairstyle و Make_Up فين غير جوا ؟ إحنا في Beauty Center يا حبيبتي !

-لأ لأ آسفة مش عايزة .. قالتها "سمر" برفض قاطع

صفية بدهشة :

-مش عايزة إيه بس يا سمر ؟ قومي معانا لازم تعملي إللي إحنا هنعمله و لا إنتي جاية معانا ضيف شرف ؟

أجابتها "سمر" مبتسمة :

-بالظبط كده . أنا ماحبتش أزعلكوا عشان ألحيتوا عليا و كمان حبيت أمشي ملك شوية لكن أكتر من كده مش هقدر أعمل حاجة.

صفية بقنوط :

-ليه كده بس ؟؟؟

سمر بلطف :

-معلش . خليني علي راحتي من فضلك.

تنهدت "صفية" بإستسلام و قالت :

-أوك . إللي إنتي عايزاه . بس هتقعدي تستنينا فين ؟

سمر و هي تمسح علي شعر "ملك" بحنان :

-هاخد لوكا أشربها حاجة تحت في الكاڤيتيريا.

-أوك يا حبيبتي . طيب حيث كده بقي إتفضلي دي .. و فتحت حقيبتها و أعطتها نفس البطاقة التي أخذتها من "عثمان"

سمر بإستفهام :

-إيه دي ؟!

-دي ياستي الـATM بتاعة جوزك . إدهالي عشان لو إحتاجتي حاجة تاخديها و تسحبي منها المبلغ إللي إنتي عايزاه.

سمر بإباء :

-لأ شكرا مش عايزاها رجعيها في شنطتك لو سمحتي.

صفية بتبرم :

-الله بقي ! كل حاجة مش عايزة ؟ طيب أقول إيه أنا لعثمان ؟؟

سمر بهدوء :

-ماتقوليش حاجة خالص و بعدين أنا مش بعرف أستخدم البتاعة دي
و إن كان علي الفلوس أنا معايا فلوس ماتقلقيش.

صفية بعدم رضا :

-عثمان مش هيعجبه الكلام ده أبدا يا سمر . بس إللي يريحك .. هتاخدي تانيا معاكي ؟

و كأنها لم تحسب حساب في خطتها لتلك الشقراء الجالسة بجانبها ..

نظرت لها شزرا و قالت :

-طبعا هتيجي معايا.

أومأت "صفية" :

-تمام . عموما بردو إحنا مش هنتأخر هنا
مسافة ما أخلص أنا و هالة هتلاقينا قصادك.

سمر متقنة نبرتها و ملامحها التمثيلية :

-براحتكوا . خدوا وقتكوا و أنا مستنياكوا !

•••••••••••••••••••••••••••••••••••••••••••••••••••••••••••

في مؤسسة ( البحيري الكبري ) التابعة للعائلة ... يجلس "عثمان" مسترخيا في كرسي مكتبه حاليا و مكتب والده سابقا

كان ممسكا بهاتفهه ، يقلب بالصور التي بعثتها له أخته ..

ظل يتأملها طويلا .. وجهها الساكن ، نظراتها الشاردة ، هناك لغزا ما مسطورا علي ملامحها ، لكنها تظل جميلة دائما

كما عرفها ، من الخارج و الداخل .. بريئة و ساذجة و ضعيفة ، لا تملك شيئا من نفسها ، و لا تريد شيئا لا منه و لا من الحياة

جل ما تريده هو الصلاح و لأشخاص غيرها ، إنها تركيبة عجيبة و فريدة من نوعها .. و هنا يكمن سر جمالها و حبه لها ..

يدخل "رفعت البحيري" عليه فجأة و هو يهتف بحنق :

-يابني إنت فين ؟ من الصبح بطلبك و بسأل عليك . ماجتليش ليـــه ؟؟؟

عثمان بشرود :

-هو أنا إزاي حبيتها أووي كده ؟؟؟!!!

رفعت بإستغراب :

-نعم ياحبيبي !

و هنا إنتفض "عثمان" منتبها لحضور عمه ..

-عمي ! .. قالها "عثمان" بإرتباك ، و تابع :

-خير في حاجة ؟

رفعت و هو يقترب ليجلس قبالته :

-يابني أنا مستنيك من الصبح في مكتبي عشان نرتب و ننسق مع بعض لإجتماع مجلس الإدارة بتاع إنهاردة . ماجتش ليه ؟؟

عثمان بآسف :

-معلش يا عمي Sorry كنت مشغول في حاجة كده .. ثم قال بجدية :

-عموما ماتقلقش أنا محضر للآجتماع كويس و خطتي للسنة الجديدة جاهزة هنقعد بس أنا و إنت قبل الإجتماع بربع ساعة نتناقش في الخطوط العريضة قبل ما ندخل نشرح التفاصيل للأعضاء.

-طيب خلاص . طالما عامل حسابك مافيش مشكلة .. ثم صاح مستذكرا :

-صحيح عرفت إللي حصل لرشاد الحداد !

عثمان بإهتمام :

-لأ . إيه إللي حصله ؟؟؟

ضحك "رفعت" و أجابه :

-مش خسر في الإنتخابات و طلع من دايرته قفاه يقمر عيش.

شارك "عثمان" عمه الضحك و قال بعدم تصديق :

-لأ مش ممكن . إللي أعرفه إنه صرف كتـيييير أووي و نزل بحملات تقيلة عشان يفوز . معقول يخسر ؟ حصلت إزاي دي ؟!

-ماتنساش إن كان قدامه منافسين عتاولة بردو
و كلهم عملوا زيه و أكتر منه و في الأخر العطا رسي علي إللي كلف أكتر.

عثمان بتشفي :

-يعني كده خسر المبالغ الخوزعبلاية إللي دفعها الدور ده و كمان خسر كرسيه في مجلس الشعب . آااه يا رشاد يا حداد . ضربة أخيرة و كانت قاضية .. قلبي عنده و الله
مش واجب بردو نبعتله ورد يا عمي و معاه كارت صغير كده نكتب عليه يجعلها أخر الأحزان !

إنفجرا الإثنان في الضحك ، ليقول "رفعت" :

-مافيش فايدة لسا تفكيرك شيطاني يابن أخويا . بس إوعي تعملها بجد إحنا مش ناقصين و ماصدقنا حكايتنا مع العيلة دي خلصت.

إبتسم "عثمان" بإزدراء و قال :

-حقيقي شخصية من أو×× الشخصيات إللي قابلتها في حياتي . كنت أتمني آذيه أكتر من كده و حلال فيه كل حاجة . بس زي ما قلت .. حكايتنا معاه خلصت و أنا قرفان من سيرته أصلا !

•••••••••••••••••••••••••••••••••••••••••••••••••••••••••••

في كاڤيتيريا المول الضخمة ..

تجلس "سمر" هي و شقيقتها و هذه المربية اللعينة إلي طاولة في الوسط

كانت "سمر" تنتظر فرصتها بصبر نافذ .. لم تستطع منع قدمها عن النقر علي الأرض بلا توقف ، بينما كانت "تانيا" تلاطف "ملك" و تضع لها أنبوبة شفط العصير بفمها الصغير لكي تشربه بسهولة

مرت الدقائق و العصبية لدي "سمر" تتزايد أكثر في كل لحظة ، فكرت في حيلة ما لتهرب من تلك الرقيبة دون أن يساورها الشك تجاهها

فكرت ، و فكرت ، و فكرت ... إلي أن وقعت عيناها أحد الأبواب هناك في الزاوية البعيدة

إنه حمام السيدات ، و حيث أن "تانيا" موجهة له ظهرها و هي جالسة ، فمؤكد لن تلاحظ تحركاتها ..

-إنتي لو سمحتي . إديني أختي ! .. قالتها "سمر" بصلابة و هي تمد ذراعيها صوب "تانيا" لتأخذ "ملك"

تساءلت "تانيا" بحيرة :

-في هاجة مدام سمر ؟

سمر بوجوم :

-معايا غيارات لملك في الشنطة هاخدها في الحمام و أغيرلها.

تانيا بإستغراب :

-بس I Think هي نضيفة . مش فيها هاجة !

سمر بصرامة ممزوجة بالحدة :

-أحب أتأكد بنفسي بردو . و بعدين إنتي ماتجادلنيش أنا حرة أصلا أعمل في أختي إللي أنا عايزاه مايخصكيش.

تانيا بإرتباك :

-I'm Sorry مدام سمر . أنا مش يقصد هاجة . أوك as you like . إتفضلي هضرتك.

و ناولتها الصغيرة ... أخذت "سمر" أختها و مضت إلي الحمام مباشرةً

قبل أن تدخل حانت منها إلتفاتة نحو "تانيا" .. وجدتها علي وضعها لم تحاول حتي رؤية أين ذهبت هي و الصغيرة

في هذه اللحظة بدأت "سمر" في الركض ، هرولت بخطوات متعرجة فالكسر في كاحلها لم يشفي تماما بعد ..

تجاهلت الألم الذي شعرت به في أطرافها و واصلت الركض ، كانت هذه فرصتها الوحيدة للفرار منه و هو دون أن يدري قدمها لها علي طبق من فضة

حتما أنه عندما يكتشف الأمر سيود أن يصفع نفسه لفعله هذا ..

كان الناس ينظرون إلي "سمر" بإستغراب و هي تركض بهذا الشكل و بعضهم من شك في أمرها و لولا التشابه الكبير بينها و بين "ملك" لأجزموا أنها قامت بإختطافها

تجاهلت "سمر" الناس أيضا و إندفعت نحو هذا المصعد ما أن رأته ، كان يهم بالنزول ، لكنها لحقته و حشرت نفسها بين الركاب و هي تسمع همهماتهم المنزعجة و لكنها لم تآبه ..

هبط المصعد للطابق الأرضي ، فعادت تعدو بسرعة مرة أخري .. خرچت من المول أخيـــــــــــرا و هي تلهث من شدة المجهود الذي بذلته

أوقفت سيارة أجرة و إستقلت بها للحال و هي تقول للسائق :

-إمشي علطول ياسطي لو سمحت ! .. ثم أخرجت هاتفهها و قلبها يخفق وجلا

ضربت رقم أخيها الذي تحفظه عن ظهر قلب و وضعت السماعة علي أذنها ... ليأتي صوته بعد لحظات :

-ألو !

سمر بتلهف :

-فـآاادي أنا سمر
أرجوك ماتقفلش إستتي !

°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°

عند "صفية" و "هالة" ... بعد أكثر من ساعتان ، تنتهي أخيرا وصلة التجميل التي قامتا بها

دفعت "صفية" الحساب ، ثم ذهبت هي و هالة إلي الكاڤيتيريا لينضما إلي "سمر" و يقمن بطلب الغداء ..

-يآااااه أخيرا هناكل ! .. قالتها "هالة" بحبور شديد ، لتضحك "صفية" و ترد :

-يا طفسة . حاسبي علي نفسك بعد الجواز لو مشيتي علي كده هتبقي شبه البلونة و جوزك هيطفش منك.

هالة بغرور مصطنع :

-مين ده إللي يطفش مني يابنتي ؟ دودي حبيبي بيموت فيا أصلا و أنا عجباه في كل حالاتي.

صفية بضحك :

-طيب ياختي . إمشي قدامي بقي
زمان سمر زهقت من القاعدة مع تانيا.

و صلتا إلي حيث تجلس "تانيا" وحدها ، لتتساءل "صفية" بإستغراب :

-الله ! أومال فين سمر و ملك يا تانيا ؟!

تلتفت "تانيا" إليها و تجيب ببراءة :

-مش آرفة مس صافي . مدام سمر قالتلي رايهة الهمام مع ملك و لسا مش جت . بقالها نص ساعة . أنا إفتكرت هي راهتلك !

صفية بفزعة :

-لأ ماجتش . و بتقولي بقالها نص ساعة ؟ يانهار إسووود . ده عثمان منبه عليا عنيا ماتغفلش عنها.

هالة بتوتر حاولت إخفائه سدي :

-إهدي شوية يا صافي هندور عليها هتكون راحت فين يعني ؟ تعالي نشوفها في الحمام كده !

و فتشتا عليها في جميع الحمامات الموجودة بالمول و لكنها لم تكن موجودة ..

قلبت "صفية" و "هالة" المول كله بحثا عنها ، و أيضا لا أثر لها ... و في الأخير أبلغت "صفية" أمن المول فقاموا بمساعدتها و البحث معها

إستغرق الأمر ثلاث ساعات كاملة دون أي نتيجة ...

هالة و هي تتلفت حولها بتوجس :

-و بعدين يا صافي ؟ . بقالها 3 ساعات و قلبنا عليها المول كله !!

صفية بعصبية :

-إسكتي شوية بقي يا هالة . أنا مش ناقصاكي دلوقتي .. ثم قالت بتردد ممزوج بالخوف :

-كده . كده مافيش غير عثمان . ربنا يستر بقي !

و سحبت هاتفهها من الحقيبة بأصابع مترددة ، ثم طلبت رقم شقيقها .... !!!!!!!