رواية ابناء الحسوم "شمسون" الفصل العاشر 10 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

كــافي طيبة!
الوادم الداست گلبنا مو غريبة..!

━━━━━━  ━━━━━━

لاول مرة من بعد خمسة سنوات يحاوطني هذا الشعور.. شعور العجز، صوت الطلق جلجل من البيت مخترقاً جدار قلبي، اختفت الاصوات وراهة مالك وفاهد تركوا كيان المنهارة واگعة بالگاع تبچي بخبال ودخلو للبيت..

عيوني عليها واحس بالضعف ماعرف شلون اگدر اواسيها شلون راح اساعدها واحضنها شلون اطلع منا واظهر نفسي گدامهم راح يعرفون اني الي جبت الشرطة واخرب كلشي سويته وراح ضحيتها شاب.. شاب اله ذنب او ماله ذنب اله ايد لو ما اله ماعرف شي ما جاي اعرف بشنو افكر عقلي مشوش..

تحركت من مكاني اسحل بروحي سحل، اتابع المسكينة گاعدة بالگاع تصرخ وحدها راح صوتها اضطريت اتركها تعيش هالشعور وحدها وطلعت من الباب الامامي متوجهة للبيت..

الطريق كله افكر هل يستحقون هذا الشي لو لا؟ اني وعدت نفسي وابوية راح اندم شمسون وابچي دم بس ليش گلبي يوجعني هسة ما توقعت يوصل الموضوع للموت ويروح ابنه بشربة مي..

وصلت البيت دخلت جوه وكالعادة ابوية بالصالة منتظرني من شاف وضعي اشرلي بيده اتقرب منه وگام مستغرب..

-فادي: شبيچ باباتي سويتي الي اتفقنا عليه؟

-اي

-انسحلوا؟

-لا

-ليش؟؟؟

-عدهم معارف بالشرطة وتكتمولهم

-خررررب روحك شمسووون بكل مكاان حاطله زلممم يطمطمون عااره وقذاارته

-صار شي ثاني

-شنو صار بعد!!

-فاهد قتل اخوه

-شنو؟

-فاهد كتل شُهيب بابا بأذني سمعت صوت الطلقات

-لا مستحيل

-حتى اني ما صدگت بس شهدت كلشي

سرح ابوية يفكر تركته واگف ورحت لغرفتي، تمددت على فراشي بملابسي ماريد افكر بشي بس اريد انام واخلص هاليوم الغريب.. لكن للاسف ما غفت عيني ولا لثانية..

لگيت نفسي الفجر گاعدة بسيارتي وافتر بالشوارع عسى يزور عيني نوم.. استمر وضعي المخربط لثلاث ايام متواصلة ما داومت ولا جاوبت أي اتصال من جماعة الدوام ولا خليت صبا تروح لشركتهم يمكن خوف او جُبن مني بس ماريد اسمع شي يشوشني اكثر..

حسيت بـ 8:00 الصبح على اتصال صبا جاوبتها واني شبه غافية..

-مسرة: اهووو شتردين

-صبا: وجعو

-شكو متصلة ما اخلص منچ اني

-عدلي لسانچ لا اگصه بت ثرى

-ولي

-ليش تخليني افشر؟

-شكوو شكو يبووو شيسدها بعد

-صبا: مشتاقتلچ

-اني ممشتاقة لاحد

-لانچ عار

-صح

-ومطية وزمالة ونعالة هم

-هاي شمعرفچ؟

-مسرة گومي من فراشچ سبحي واكشخي تمكيجي وعدلي شعرچ وتعالي للشركة لا ادوس بثربچ

-ماريد تعبانة، اليوم هم راح اغيب

-مسرة تره انتِ المديرة!!

-وشكو تسووني قندرة ماريد اصير مديرة

-هيچ فهاوة ما شايفة اذا هي مديرة الشركة ما راضية على مكانها

-حبي خليني ادير حياتي بالاول بعدين ادير الشركة

-بلا لغوة زايدة الچ نص ساعة اذا ما اشوفچ هنا ادوس بـ.....

-هيووو سكتي شبيچ وجع افتهمت

-ليش تقاطعيني؟ يعني الا ادوس بـ....

طبگت الموبايل بوجهها لسانها يتعب وصخ ومن يسألوها ليش متتحكمين بنفسچ وكلامچ تگول مو بيدي هو وحده يغرد..

سحلت روحي من الفراش ورحت اسبح، كملت بسرعة وطلعت لبست أي شي صار بوجهي، شلت شعري بكباية مهووسة عالية وطلعت من البيت گالبة الخلقة..

دخلت الشركة والموظفين يروشون عادي ضيقت عيوني ادور على فلانة وعلانة وشلتانه.. ملاحظة ذني موظفات يشتغلن هنا اشكالهن مو راحة وتحسوهن من جوه الجوه صبا سمتهن فلانة وعلانة وشلتانة.. عذرونا على التفاهة بس اني اؤمن بنظرية كل انسان بهاي الدنيا يحتاج جرعة تفاهة تخلي يمشي يومه على خير..

توجهت للمكتب اجرجر بروحي شگد اكره هالشركة ما عجبتني كلشي بيها مينجرع عدى فاضل ونشوان طبعاً حباب وفطير خوش رجال اما الباقين يوغفون على الگلـ....

-مسرة: انتَ عايش!

تمتمتها بخفوت وصل لمسامعه، صرنا وجه بوجه لابس ومتأنق وبيده ملفات ديمشي على طوله طبيعي وبصفه اخته ونشوان من الجهة الثانية، من شاف صدمتي ابتسم وفتح ايده بطريقة شوفيني وگال بأستغرب..

-شُهيب: نگول الحمدلله

ضحكت على حركته وعلى تفاجئه، واضح محد افتهم السالفة غير كيان الي ملامحها تغيرت لكن سرعان ما گالت بلطافة..

-كيان: اكيد انتِ مسرة قيثارة مو صح؟

-مسرة: بشحمها ولحمها

-كيان: اخيراً اللتقينا كلش چان عندي فضول اشوفچ نشوان هوايه يحچي بيچ

-مسرة: حبيبتي يا هلا، انتِ كيان الجميلة اخت اشهب شفتچ بالحفلة

-نشوان: يا حفلة؟

-كيان: اءء شسمها هاي مال.. مال هذاك الواحد الـ..

-شُهيب: حفلة فاهد

-نشوان: حفلة فاهد اخوك؟؟؟

-شُهيب: اي

-نشوان: شوداكم هناك شُهيب؟؟ شلون ترحون لبيت فاهد انتو مو...

-شُهيب: بعدين نحچي نشوان

قاطعه بسرعة وركز انظاره عليَّ، ابتسم وسأل بنبرة هادئة..

-شُهيب: افترقنا بالحفلة وين رحتي؟ ما شفتچ بعد؟

ابتسمت تك خد مفتهمة سؤاله هالرجال يشُك بيه وللان ماخذ وضعية التحقيق والاستجواب، ماهتميت ولا خليت على بالي عدلت الجنطة البيدي وگلت ببساطة..

-لان حضرتك عطت بوجهي وطلبت مني اعوفك وحدك

-شُهيب: بخصوص هالشي اني...

-مسرة: اسف؟

ابتسم على اسلوبي وهز راسه اي، اردف بنبرة هادئة..

-شُهيب: صدگيني اني...

-مسرة: متندم؟

-شُهيب: احم، اي اني بس..

-مسرة: زعلان لان حطيتني بهيچ موقف؟ لتخاف شعورك طبيعي المفروض تزعل وتلزم حداد هم

ما حچى بقى صافن بدون لا تتغير ملامحه الهادئة لثواني قبل لا يرجع يبتسم ويهز راسه بقلة حيله، رفعت تك حاجب وكتفت ايدي لجسمي..

-مسرة: انتو تچفصون وبعدين تعتذرون

-شُهيب: حقچ عليَّ ما چان لازم احچي بهاي النبرة بس چنت خايف على كيان

-مسرة: ادري حقك

-نشوان: كلشي ما جاي افتهم شبيكم

-كيان: بعدين نشوان

-شُهيب: عدنا شغل متراكم افتهمت بيچ ما مداومة صارلچ ثلاث ايام؟

-مسرة: وانتَ؟

-شبيه اني

-واضح هم ممداوم صارلك ثلاث ايام؟

-اي، چان عندي ظرف

-حتى اني

-قصدچ چان عندچ ظرف؟

-اي

-طيب مو مشكلة بس عدنا شغل هواي هاي الملفات لازم نشتغلهم

فتح واحد منهم گدامي يراويني، ذبيت نفس اعدل بالخصلات المبعثرة على وجهي اباوعله كلشي مابي حتى شخط ماكو بوجهه شنو فاتني يا ترى بالحفلة؟..

-شُهيب: لَيدي مسرة؟

انتبهت لنفسي طولت بالصفنة عليه حمحمت وسويت الوضع طبيعي واني اجرد الملف بعيوني هزيت راسي واشرت بيدي واني اعبره واگول..

-مسرة: اللحگني للمكتب..

**

"كيان"
الكل صفن وره كلماتها وحركتها كأنها تأمره امر يجي وراها للمكتب، اني وشُهيب الي بقى متصنم بمكانه ونشوان الي صار يضحك ويصفگ بيده خفيف..

-نشوان: تعجبني هالبنية كلش تعجبني

-كيان: حسب علمي شُهيب يأمر مينأمر بس حبييييت

-نشوان: راح تمشي شُهيب مسطررة

درنا انظارنا على شُهيب ساكت ما حچى شي اعرف بي ممتعود احد يتأمر عليه بس بعد الشغل شغل وانحط امام الامر الواقع..

-نشوان: حتى اسمه لحد هسة ما حفظته

-كيان: هههههههه تصيحلك اشهب؟

-نشوان: ولچ اي والاخ هنا مستسلم حتى ميعدل اسمه بحلگها

-كيان: عززه تجنن تره شُهيب كلش حبيتها

-شُهيب: كافي

-نشوان: ضافت جو حلو للشركة بعدما چنه بـ سُبات شتوي عميق

رمق شُهيب نشوان بنظرة قاتلة عود يريده يسكت وهذاك ماكو راح يطير من الفرح والضحك على شنو مادري انوب عداني خلاني افطس ضحك وياه..

-شُهيب: شباب شسالفة

-نشوان: حبيتها حبيتهاااا

يذب بجسمه على شُهيب يريد يوگعهم متت ضحك ولا عبالك بالشركة همه همزين واگفين بممر على جهة وماكو احد يشوفنا..

-شُهيب: وخر نشوان لا تلزگ وتصير مكروه

-نشوان: اوگفو كيان شجابچ انتِ اليوم شعندچ جاية؟

-كيان: شعليك عفونة

-نشوان: وسمم جاي اسأل، اشهب شجاب كيان؟

-كيان: هههههههه هههههههههه اشهب هههههههه

-نشوان: ساعة تصيحله اشهب ساعة شهاب ساعة شُهب لعبت بأسمه فلك

-شُهيب: راح يلزگون

-نشوان: يله اشهب جاوب

-شُهيب: صيحلي اشهب بعد مرة وحدة وشوف شسوي

-كيان: اي عيني اي ميحب اسم اشهب الا منها

-شُهيب: اني صوچي جبتچ وياي اليوم

-كيان: احم.. اء اني معليه هذا نشوان هو عفونة

-نشوان: هسة يله روح لا تخليها تنتظرك هواي روحلها للمكتب للمكتببب للمكتبببببب

يحرك حواجبه بطريقة مشيطنة ويغمز بعيونه خزره اشهب اقصد شُهيب بحدة ودفعه من كتفه..

-شُهيب: لا تصير ارعن

-نشوان: الفضول كاتلتي اريد اعرف شنو راح يصير

-كيان: حتى اني شُهيب خليني اجي اشوف

-شُهيب: شنو تشوفون شبيكم انتو؟!

تركنا متنرفز يروحلها للمكتب، بقينا اني ونشوان نباوعله وهو يبتعد، حاوطني من كتفي يحضني نص حضنه وهمس..

-نشوان: شجابچ اليوم فاكهة حياتي؟

-كيان: اليوم اول يوم تدريب الي عفونة!

-نشوان: لاااه مستحيل شو ماعرف اني

-لو يهمك چان عرفت

-للمرة المليون كيان اني اخوچ مو صاحبچ وجاي تنكدين عليَّ

-الله يعني عادي اصاحب؟؟

-اي اذا چنتي متنازلة عن هالوجه الحلو صاحبي

-يعني شتسوي مثلاً؟ شُهيب ميخليك تلمس اظفر من اظافري لا اني ولا حبيبي

-منو هذا قندرتچ؟

فزيت طافرة بمكاني اجانه صوته من ورانه مثل الطبر وشگ روسنا، انداريت عليه مبتسمة..

-كيان: هلو عمري مروان شلونك

-مروان: منو حبيبچ؟

-كيان: نشوان.. اي هذا العفونة حبيبي شعندي غيره اني

حضنت ذراع نشوان حتى يماشيني عاد نشوان استاذ بالچذب والتأليف..

-نشوان: منيلها خرگة حبيب؟ غير اشگه واشگ اهله

-مروان: هم عبالي

الحاجب معگود وكاره عيشته مروان من قبل هيچ دائماً وحيد وضايج لا فد يوم حب لا فد يوم غازل بنية حتى لو عابرة ابد كله وحده حتى صداقات ميكون، لمعت فكرة بـ بالي ابتسمت واني اهمس لـ نشوان الي يفهمني من نبرة صوتي..

-كيان: شنو رأيك؟

-نشوان بهمس: انچبي

-كيان: والله مناسبين حبيتهم

-مروان: على شنو تتبسبسون؟

-كيان: شنو رأيك بمسرة مروان؟

سألته فوراً بدون مراوغة استغرب وزادت عگدة حاحبه..

-مروان: شبيها؟

-كيان: حلوة مو؟ تره تموت البنية وانيقة كلش تعجبني

-مروان: اي بس شعلينا بيها؟

-كيان: يعني اي؟ اي قصدك حلوة مو؟؟

-مروان: شبيچ كيان

-نشوان: معليك بهاي العفونة تعال راويني المخطط الي اشتغلت عليه

تركوني وحدي ومشو متوجهين لمكتب مروان واني امشي وراهم لحدما دخلنا المكتب سوه..

-كيان: اگلكم يعني مسرة مديرتكم صارت؟

-نشوان: اشترت نسبة 64% من الشركة وصارت شريكة شُهيب فـ يعني اي مديرتنا صارت

-مروان: شعندچ هنا كيان؟

-كيان: اليوم اول يوم تدريب الي شُهيب جابني وگال ابقي دائماً وياي حتى يعلمني

-نشوان: لعد روحيله ليش تضيعين وقتچ كبد

-كيان: مو استحي هو بمكتب مسرة

-مروان: شيسوي هناك من الصبح؟

-نشوان: هي طلبته

ضحك وره كلامه بمرح الوحيد الي عاجبته الوضعية هو نشوان يموت على سوالف الفسوق ودائماً عقله يشطح بكلشي وويه كل الناس..

قررت اروح لـ شُهيب بعدما نشوان ومروان ثنينهم گالو الامر عادي وماطول هو طلب ابقى وياه معناها يعنيها فعلاً ويريدني اكسب من خبرته، تمشيت ببطئ خجلانة اروح حاولت اماطل بالوقت يمكن هو يرجعلي بس ماله اثر..

تلمست ايدي بعدها توجعني من الصار، حسيتها انكسرت من گدما ضربت على گاع المسبح ببيت فاهد واني اسمع صوت الطلق يصوب جسم اخوية، عصرت عيوني واني استرجع الصار والخوف الي عشته..

گمت بعد نوبة بكاء مريرة من الگاع اخط برجليه لداخل البيت ادعي بكل ما عندي من ايمان الي سمعته يكون غلط ومو الي ببالي وما نفذوا طلب فاهد من امر يطلقون على شُهيب النار..

دخلت الممر ادور بعيوني الي ما نشفت من دموعها، اول ما دخلت الصالة شفته بوجهي واگف على طوله منطيني ظهره وبأيده مسدس يفتح بي يتأكد من طلقاته وثنين واگعين بالگاع يصارعون الموت..

تحركت كم خطوة للامام اريد اتأكد هذا هو لو جاي اتخيله، انفاسي سريعة وروحي تلوب صدر صوت من كعب حذائي واني امشي حابسة انفاسي مع اللتفاتة شُهيب السريعة عليَّ موجه السلاح بوجهي..

-شُهيب: كيان

متسمرة بمكاني مرعوبة من الجثث الي بالگاع وهمه يصدرون اصوات تأوه موجوعين والدم يجري منهم ملوث الارض.. ماعرف مرعوبة من وجه شُهيب المطفر عليه دم وخربطة شعره وهندامه ولهثانه العالي..

قاطع حبل افكاري المخيفة تقدمه عليَّ مهرول يضم المسدس بحزامه من الخلف ويضم سچينة تشبه الخنجر بجيب جاكيته، حضني لصدره بكل قوته انتفض بين ايده مطوقة رقبته ما مصدگة هو گدامي..

-شُهيب: انتِ زينة حبيبتي؟ محد اذاچ؟؟؟

بعدني عنه يتفحص وجهي وجسمي هزيت راسي اي وحچيت واني ابچي..

-شُهيب وينك انتَ وينك راح اموت من الخوف

بدون كلام سحبني من ايدي يطلعني بره البيت خطواته سريعة وعيونه تتابع المكان بحذر، دخلنا لسيارته والرجفة لحد هاي اللحظة بجسمي ودموعي تجري..

-شُهيب شصاير اشرحليي

-ما صار شي حبيبتي ليش تبچين؟

يحچي بهدوء استفزني جريت ايده وعطت بحرگة..

-فاهد.. فاهد راد يقتلك شُهيب

ما ابدى ردة فعل غير بلع ريگه وكمل سياقة محاول يتحكم بأنفاسه اللاهثة وعيونه الحايرة..

-فاهد راد يقتلك شنو هالبرود اخوك راد يموتك!!

-بس ما متت

-بس چان متت خلاص! ماريا!! ماريا تموت ورااك.. واني؟؟ چان يتمتني مرة ثانية شُهيببب

صرخت اضرب على وجهي ورجليه وقف السيارة يركنها على جهة ساحب ايدي يقيدهم، عيونه بعيوني ويحچي بصوت خافت هادئ..

-اني بخير كيان لا تخافين ما صارلي شي، طمنيني عنچ انتِ احد ضوجچ بشي؟؟ احد زعجچ؟؟ مالك چان وياچ مو ما عافچ؟؟

سأل كل هالاسئلة بسرعة وحدة وره الثانية بدون لا يجر نفس، ماگدرت اجاوبه من البچي حضني لصدره مقرب جسمي لكرسيه يهدأني، عجزت افهم هالانسان متعرف شنو يجول بباله هل هو خايف؟ حزين؟ مقهور؟ حاقد؟ لو معصب ماگدر اعرف شنو بعقله لان ببساطة ميبدي أي تغير بملامحه..

-كيان: دم بوجهك منين؟؟ انتَ متعور؟؟

حرك راسه لا وسحب كلينس يمسح وجهه عرفت الدم من الزلم الي مجطلين حاولت اسكت نفسي واحچي بهدوء بدون عصبية..

-كيان: بعد ما فاهد اتصل بجماعته گلهم اريد طلقتين براسه ووحدة بگلبه..

بعدني عنه مركز ويه كلامي، مسحت عيوني وخشمي واردفت بخوف..

-توسلت بمالك يساعدك

هز راسه حتى اكمل وعيونه تاكل وجهي اكل، بلعت ريگ احاول اتذكر الصار عقلي تشوش فجأة من تذكرت الزلم المتصوبين بالبيت من دخلت..

-كيان: ماهتملي ولا باوعلي بس شفته اتصل بأحد وعافني وراح

-شُهيب: شوكت اتصل بالضبط؟

-كيان: وره فاهد بثواني

سرح بنظراته وكمل يسوق متوجه للبيت، نزلني لبيتنا الي ورثناه من امي اني واخواني بينما هو اكيد توجه للشقة مالته بنفس الهدوء الي وصلني بي..

ثلاث ايام عشتهن بجحيم تمنيت ادخن واريح راسي ردت وحاربت نفسي وما اخذتها اني تبت خلاص مستحيل اضعف! بدون تفكير اخذت موبايلي وحضرت ثامر وكل صديقاتي الحقيرات، حضرت مالك وكل شخص يخص شمسون ونويت ابدي بداية جديدة وما اضم على اهلي شي كافي الى متى ابقى بهذا الوضع!

رجعت للحاضر واني اشوفه واگف يحچي بالتلفون منفعل امام مكتب مسرة معقولة لسه ما دخل؟ ليش هالگد تأخر؟

-شُهيب

ابتسمت واني اگول اسمه انتبه لصوتي فوراً سد الموبايل ورجعه بجيبه يقابلني بأبتسامته الاحبها..

-بنيتي الحلوة

-كيان: شو ما رحت لمدام مسرة بطلتو على الاجتماع؟

-لا

-لعد شنو

-رايح هسة حابة تحضرين؟

-اي بس شو استحي منها

ابتسم يأشر بيده امامه حتى ادخل لمكتبها گدامه، عدلت ذيل الحصان مالتي وگذلتي القصيرة وضحكت لـ شُهيب واني اللزگ بي..

-خلينا ندخل سوه استحي حباب

ضحك بخفة يداعب گذلتي، طرق بابها على كيف سمعنا صوتها تسمحلنا بالدخول، خطيت اول خطوة داخل مكتبها كفختني ريحة صبغ الاظافر تارسة المكان..

ابتسمت واني اشوفها گاعدة على كرسي المكتب مالتها ساندة ايدها على الميز وتلون أظافرها بصبغ لونه ماروني غامق يناسب تماماً بشرتها الخمرية، بدون لا ترفع راسها وتشوفنا بقت مركزة ترسم على اظافرها وتگول بهدوء..

-مسرة: تأخرت

-شُهيب: مكالمة ضرورية

جاوبها وتقدم يگعد على الكرسي بينما هي بقت منسجمة تلون اظافرها الطويلة..

-مسرة: شهاب كأن انتَ گاعد على...

رفعت راسها ناحيته لتنحرف انظارها عليَّ، رسمت ابتسامة جميلة على وجهها وهي تگول بلطف..

-مسرة: يا اهلا بـ كيان الجميلة

-كيان: اهلا بيچ مدموزيل، اسفة اذا وقتي مو مناسب بس شُهيب رادني اتدرب عدكم حتى اكسب خبرة منه ومن اخواني

-مسرة: حلوو ليش لا

ابتسمت على جوابها المختصر متقدمة اوگف امامها مباشرة بينما هي بقت على ابتسامتها تكمل صبغ اظافرها، ما خلتني انتظر هوايه سدت العلبة مال الصبغ وگامت من مكانها تگول لـ شُهيب..

-مسرة: خلينه نگعد حول ذيچ الطاولة

وگف وياهة متوجهين للطاولة الصايرة بزاوية المكتب وحولها كراسي متقاربة من بعض جداً، دقايق ودخل فاضل سلم وگعد وياهم..

-فاضل: يا اهلاً وسهلاً بـ المهندسة كيان

-كيان: ههههه هلو فاضل اريدك تنطيني من اسرارك بالشغل

-فاضل: هااا هيچ السالفة لعد من هسة اتفق وياچ لا اعرفچ ولا تعرفيني

شُهيب هادئ ومسرة مبتسمة وتباوعلنا، قدملها شُهيب الملفات وهي فتحتهم تشوفهم بدون لا تحچي كلمة مجرد اشرتلي انظم الهم فرحت بتصرفها ما توقعتها راح تتقبل اتطلع على اسرار عملهم..

مرت ساعة تلو الاخرى وهمه منهمكين بالشغل، اتصلت مسرة على نشوان ومروان وصبا واجتمع الفريق كامل سوه، نشوان يحشش ومياخذ الامور بجدية ومروان يخزر بي حتى يسكت وفاضل خط السواك بحلگه يجلف سنونه البيض..

-نشوان: خريط هذا اي وعلي خريط

-صبا: كله من وره مروان

-مروان: صارت خربطة بالشغل من وره مروان، نشوان ضحك من وره مروان، فاضل يفرك سنونه بالسواك من وره مروان، صبا انكسر اظفرها من وره مروان

-صبا: صدگ انكسر اظفري من وراك اليوم واصبعي تعور اعتررف

-مروان: اني اسف لاظفرچ واصبعج بس عتقيني

-نشوان: خخخخخ

-فاضل: عيب تتفل هنا ابني

-نشوان: ما تفلت جاي اضحك

-صبا: مسرة غيري فريقنا ماريد اشتغل ويه مروان بعد خيولي

-مروان: خفة وراحة ثانياً خيولي شنو؟؟ شو انتِ ممحترمتني؟!

-صبا: طلعت من حلگي شبيك شگد تدقق

-مروان: مو صوچچ صوچ انسة مسرة حطتنا سوه رجاءاً غيري فريقنا مدموزيل

-مسرة: صدگ تحچون انتو؟

-صبا: اي اي ماريده

-مروان: مس مسرة خليها ويه فاضل هو صبره طويل ومستمع ممتاز وراح ينسجمون ويه بعض

-فاضل: لا العفو من انسة صبا لكن اني استشكل اشتغل مع النساء

-نشوان: مو تشتغل ويه مسرة؟؟!

-مسرة: شايفني رجال فاضل؟؟

-فاضل: لا عذراً منچ انسة مسرة بس اقصد احنه نشتغل فقط منسولف وناخذ وننطي

-نشوان: ايااا چذااب منو البارحة جابلها تفاحة خضرة؟؟

-فاضل: هسة غير يسكتتت

-شُهيب: جبتلها تفاحة خضرة؟؟؟

-فاضل: اي جبتلها لان الفتاة لا تأكل شيء طول اليوم وتدوخ هواي وشُهيب جاي يجيبلها جلاتين وهي عدها سكر اخي خاف ربك بيها

-مسرة: اووي سيد شكراً على اهتمامك سعيدة بهالشي اني

-شُهيب: تره انتِ گلتيلي تحبين الجلاتين والحلو يخليچ تفكرين زين مو ذنبي هذا!

-مسرة: اشش اسكت انتَ هاي بس گدام فاضل احچي هيچ استمر تجيبلي جلاتين معليك

-فاضل: وانتَ ليش اندقيت عزيزي شُهيب شمسون؟

-شُهيب: لان طلعتوني مو زين

-مسرة: وين اكو منك انتَ يله يله نرجع نشتغل

-نشوان: ليش محد يجيبلي جلاتين لو نشوان يبزز؟!

-فاضل: لا نشوان ازعل عليك مو جبتلك نعال لاستيك قبل اسبوعين؟!

همسها بينهم همس بس كلنا سمعنا ومتنا من الضحك على حركة نشوان جر السواك من سنون فاضل كسره وذبه على الطاولة..

-نشوان: اكرههكم كلكممم

-كيان: اووي

-فاضل: ماي بيبي زعل

-مروان: نشوان فشلتنا الله يفشلك مو هنا

-نشوان: سأرحل وسوف تندمون

-شُهيب: نشوان مو وكت سوالف الهجرة هسة

-صبا: خطية ليش هيچ ويه نشوان ازعل عليكم تره

-مروان: لا يمعودين كللشي ولا صبا تزعل دخيلكمم

-مسرة: والله صح

-نشوان: بعدني زعلان وراح اروح

-شُهيب: ميخالف

-نشوان: راح اروح والله ومتشوفون وجهي بعد للابد

-شُهيب: يوم منى هذا

-نشوان: بعد ماكو نشوان وماكو...

-مروان بمقاطعة: تفاهه ومصاخة ولعبان نفس وسوالف سرسرية وعفطية وطيحان حظ ندري ندري واحنه نطمح يجي هاليوم

-كيان: هاي شبيكم ويه شوشو ولا ادري بيك معنف بهاي الشركة حبيبي سودة عليَّ

-نشوان: شفتي اخوچ محد يحبه هنا بس انتِ تعالي ابوس خدچ

-صبا: نشوان لا تزعل اني احبك انتَ خوش وليد

-نشوان: بعد چبدي چبدچ دسمعوو الجواهر هنااا اريد اشتغل ويه صبا هالبنية تعزز من ثقتي بنفسي

-مسرة: راح نرجع نشتغل لو نتناقش وين راح يهاجر نشوان ويعوفنا؟

-نشوان: جاي افكر بالمكسيك شُهيب شتگول؟ لو متتحمل فراگي؟

-شُهيب: كل تكاليف السفر عليَّ انتَ بس روووح

ضحك يذب بروحه على شُهيب ويبوس بكتفه أخيراً شهوبي ضحك وياه الكل متعود على سوالف شوشو التنگرط يشوف روحه زعوطوط ويانه ومبين هنا هم فاضحنا بالشركة گدام مسرة وصبا..

-كيان: الله حلوة اجوائكم هنا تونس

-نشوان: تونس لو جزائر خخخخخ

-مروان: نشوااان جاي تتفل عليَّ شبييك

-فاضل: تفلتك طبت بحلگي لعبت نفسي اخي اتقِ الله

-شُهيب: طار على شعري يمعود

-نشوان: مو تفلة هاي شلاال لعبتو نفسنااا

كملو شغلهم شوية وفاضل والباقين طلعو يكملون شغل ثاني واني بقيت ويه مسرة وشُهيب.. ساعة يتناقشون وساعة يرسمون وساعة يكتبون وساعة يتعاركون او بالاحرى مسرة تتعارك وتتناقش بصوت عالي بينما شُهيب يبقى هادئ ويسمعها تفرغ غضبها بسبب تعب العمل بدون لا ينطي ردة فعل..

حطت مسرة القلم على الميز وگالت وهي تطقطق رقبتها..

-مسرة: تعبت صارلنا اربع ساعات على نفس المخطط مابي امل

-شُهيب: تصير هاي الحالات طبيعي لا تتوترين

-مسرة: ما متوترة وانما جزعت خلص ما راح نكمله طُز بي بس دنضيع وقتنا

سكت كالعادة وهي تشمر الملف لنهاية الطاولة وتاخذ ملف ثاني بينما هو سحب نفس الملف الي چانو يشتغلون بي يكمله..

-مسرة: عوفه خيولي لا تتعب نفسك من البداية غلط استلمنا هيچ شي مخربط ونشوان كلامه صح قبل شوية

-شُهيب: نحاول نلگه حل

-مسرة: حل لشنو وفلوسهم متكفي نص البناء؟ منين يدفعون الباقي وميزانيتهم محدودة

-شُهيب: هذا العمل مهم لصالح الشركة، لا نضيعه من ايدنا بسبب تعب

-مسرة: ماعندي مشكلة اتعب على شغل ومسويتها لساعات طويلة بس هذا مخربط شوف القياسات وشوف المواد الي يردوها

تقربت منه اكثر تأشرله بالقلم صراحة اني تعبت وجزعت رجليه خدرت اكثر من مرة بسبب گعدتي المتواصلة بدون استراحة شلون ميتعبون..

دارت انظارها عليه تأكدله العمل بهذا المشروع مستحيل بس شُهيب چان ما راضي ومُصر راح يلگون حل، ضحكت بتعب توخر الخصلات المتناثرة على وجهها..

-مسرة: يمة شگد عنودي

ضحكت وگامت من مكانها تهز براسها ما راضية على اصرار شُهيب، جابت شي من مكتبها الچبير انتبهت فتحت كيس صغير بي جلاتين اكلت منهن وقدمتلي وهي تگول..

-مسرة: هذا اخوچ جابلي كومة جلاتين البارحة باعي شلون يهتم بي خوش شريك

-كيان: ههههه يدلل طبعه

-مسرة: بس عنودي، شنو تسووله من يقفل؟

-كيان: ميفيد وياه شي الي براسه يسوي

سوت حركة لا بأيدها وهي تاكل بالجلاتين وتحچي بثقة ولا كأن هو موجود وديسمعها..

-ماكو هالشي بقاموسي حياتي ماكو واحد يعنفص على شغلة ويظل معاند واذا صار هالشي فـ راح اغير رأيه بطريقتي

كممت فمي اخفي ضحكتي وعيوني على شُهيب الي لاحظت شبح ابتسامة على وجهه ماعرف مستمتع من ثقتها ماعرف مستهزأ..

-مسرة: جوعانة اريد اكل تتغدون؟

-كيان: اني هم جعت

گمنا وشُهيب بقى گاعد ومستمر بصفنته على الملف الي عجزوا يشتغلوه، عزمناه يجي ويانه وگال ممشتهي هسة، طلعنا اني ومسرة نروح للمطعم المجاور للشركة بوفيه مفتوح هناك كل الموظفين يتغدون لان الشركة مابيها كافتيريا، اخذنا اكل وگعدنا نتغده..

گعدنا نسولف ويه بعض توقعتها مغرورة بس طلعت العكس تماماً تاخذ وتنطي وتضحك وتتشاقه..

-كيان: تدرين مدموزيل مسرة...

-مسرة: لتصيحيلي مدموزيل گولي بس مسرة يمعودة اموت من الرسميات

-كيان: الكل يصيحلچ بأسمچ هنا؟

-مسرة: بس صديقاتي واخوچ نشوان الكيوت اقبل الباقين شحدهم

-كيان: هههههه خلي نشوان يسمعچ تصيحيله كيوت وربي يهلهل للصبح

ضحكت بقوة تعدل شعرها ورجعت تگول بنفس الروح الحلوة..

-شگد احبه وصدگيني ما اقصدها بطريقة رومانسية بس سوالفه تجنن

-كيان: يونس كلش

قطعنا سوالفنا من اجت صبا گعدت ويانه وبدت بسوالفها الي واضح مسرة متعودة عليها فطستني ضحك وهي تأشر على واحد وتگول..

-صبا: خايبات كل الزلم حلوة شياكلون ذولة؟

-مسرة + كيان: نسوان!!

-صبا: دهر دِهر حالچن معزايات متفقات

-كيان: ههههه صبا تحچين نفس صديقتي العراقية الكول بس ختولي الحقيرة كرهتها

-صبا: شسوتلچ هاي الخايسة؟؟

-كيان: مصايب ختولي چنها سليمة بس المهم تحچين نفسها عراقية كللش

-صبا: اي اني عشت بالعراق هوايه اضافةً كل عطلة صيفية اروح ويه اهلي وعلمت مسرة على شكو كلمة طايح حظها وشغلة مستهترة فـ صارت نفسي بالضبط

-مسرة بضحك: يمعودة لترتاحين زايد ويفلت لسانچ گدام كيان تصير اخت اشهب لا تفضحنا گدامه ويطير برستيجنا

-صبا: ياااا شُهيب الحات ابو شعر العسلي اليملخخ؟؟

-مسرة: هاي وتوني نبهتها تلزم لسانها

-صبا: كيان صدگ اخوچ شُهيب؟ متتشابهون ابد صراحة اگولها بصراحة مو؟ انتِ اكيد تردين الصراحة ادري بيچ صح انتِ حلوة وتموتين بس هو يشئ شئ وشعره بحث اخر بداعة امچ شنو يستخدمله؟؟

ضحكت من گلبي على عبارتها تحچي بجدية وتحرك بيدها بنفس الوقت، مسرة گلبت عيونها بملل واشرتلي بطريقة معليچ بيها..

-كيان: شُهيب يصير ابن زوجة ابوية لذلك منتشابه ميربطنا دم

-صبا: شنو ما فهمت

-مسرة: باعي شُهيب شرحلي هو يصير ابن شمسون و چان عمره تسعة مدري عشرة سنوات من امه تزوجت ابو كيان ومروان ونشوان وهيچي صارو كلهم بحسبة الاخوان

-صبا: هاا فهمت يعني شُهيـ.... اخ گلبي بنات احس اخخ يمة..

قطعت كلامها وهي تباوع وراهة بدون لا اللتفتت عرفت شافت واحد حلو دخل للمطعم ابتسمت لحركتها والي يضحك اكثر ان تحچي بجدية ماعرف هي دتضحك لو تعنيها..

-صبا: سرور اني اسفة اذا راح اكون خفيفة وافضحچ بس شايفة هذا الزلمة اني احس من يدخل لازم يحطون موسيقى فخمة تحچي عن واحد فخم وهوا قوي يطير شعره من يتمشى صدگيني صدگيني لازم هالشي باعي الاناقة تموت خرب روحك وروح عدوك يا بعد گلبي گلبك...

انتبهت لمسرة بس ساكتة وعيونها على صبا وتفر بيدها، ما اهتميت اشوفه الا من انقبض گلبي وهي تكمل..

-صبا: لچ شعرهم شعرهم شلون هيچ حلو ويلعب بي الهوا؟ باعي حتى لحيته شلون مرتبة اگلچ راح اسألهم عن السر ولد شمسون ابد متتشاقى جيناتهم..

اللتفتت بسرعة ناحيته وچان اشوفه مالك! صبا دتحچي عن مالك بس شجابه هنا وليش عبالك ديدور على احد، بلعت ريگ وعيوني جمدت عليه لحدما لقطني من بعيد واجه يتقدم ناحيتي..

توترت واستغربت بنفس الوقت شعنده هنا وشيريد يسوي اكثر من السواه بيوم الحفلة!

-مالك: مساء الخير

جاوبت صبا وحدها ولاحظت عيونه شلون تغيرت نظرتهن من باوع لـ مسرة، نقلت انظاري بيناتهم كم مرة ولمحت طيف ابتسامة من صبا ادى لأستغرابي وزاد حيرتي..

-مالك: اعتذر على المقاطعة، كيان ممكن احچي وياچ

هزيت راسي اي وگمت بسرعة ماعرف شبيه بس اريد اقطع النظرات الغريبة بيناتهم حتى من طلب يحچي ويايه چانت عيونه عليها..

وگفنا بزاوية المطعم مسح على وجهه ودار عيونه على مكان مسرة مرة ثانية نار واشتعلت بيه ماتحملت اسكت اكثر فوراً نترت..

-كيان: تريد تحچي ويايه لو وياهة؟؟

-مالك: منو هاي كيان؟

يأشر على مسرة بعيونه بدون لا يغير من وگفته، تأفأفت مزعوجة وكتفت ايدي لصدري..

-تصير شريكة شُهيب بالشركة

-اعرف بس شنو لقبها؟

-مسرة قيثارة

هز راسه ساكت وعدل الوشاح الي مغطي بي رقبته وبدون مماطلة سأل..

-شفتي فاهد اليوم؟ اجه للشركة هنا؟

-لا

-سمعتي شُهيب يحچي عنه؟

-لا

-تمام

تركني واگفة يريد يطلع من المكان حسرة تكونت بگلبي والخنگة ذبحتني..

-مالك

اندار يباوعلي تقدمت عليه كم خطوة عيني بعينه وسألته السؤال الي نخر راسي صارله ثلاث ايام..

-ليش سمحتله؟

بدون لا يجاوب حرك راسه بطريقة ما فهم كلامي، تقربت منه اكثر صرنا قريبين..

-ليش سمحتله يأمرهم يقتلوه؟ شلون هلك گلبك

-كيان اني مستعجل

رجع يريد يطلع وبحركة لا ارادية لزمته من ذراعه فوگ جاكيته اسحبه حتى يبقى..

-مالك فدوة هذا اخوك شلون تسمح بهيچ شي انتَ الاخ الچبير انتَ العاقل الرزن الهادئ شلون تقبل يموت واحد من اخوانك وانتَ واگف تتفرج!

-كيان..

سكت بعدما نطق اسمي وذب نفس متعب نزل عيونه على حذائه حسيته يريد يگول شي وتردد..

-كيان: انتَ اتصلت بيهم حتى ميسووهه مو؟

رفع عيونه عليَّ فوراً وره ما همست الحقيقة بيني وبينه، ابتسمت على نظراته المترددة القلقة وكملت بنفس النبرة الهامسة..

-هذا السبب شُهيب عايش هسة؟ انتَ صلحت تهور فاهد وأمرت رجاله ميسوون شي لاخوية مو؟

-لا.. غلطانة

حچاهة بهدوء وعيونه بعيوني بس نظرته فاضحته عيونه فاضحته هالانسان الرقة الي بعيونه مستحيل تكون لمجرم يقتل اخوه ويبقى واگف على طوله متأنق ومستمتع بحياته..

-كيان: انتَ تحب شُهيب وماكو مرة كرهته بيها دائماً بظهره حتى لو هو ميعترف بوجودك

ابتسمت على ملامحه الي رقت لثواني ورجعها للجدية بعد كلامي، بلع ريگ وحرك راسه لا وهمس بخفوت قبل لا يتركني ويروح..

-انتِ غلطانة

بقيت على ابتسامتي حتى من راح وعافني يكمل طريقه للخارج، ابتسمت وعيوني تلالت بالدموع لان اعرف الحقيقة واعرف مالك يحب شُهيب ويخاف عليه ويتفقده من حين لآخر حتى لو يجيله على طريق عركة يتعاركون بطريقة وحشية ويتفارقون مرة ثانية بس اعرف داخله مرتاح من يعرف شُهيب بخير وديعيش حياته بطريقة هادئة، يفرح من يشوف اخو عنده عائلة ومتحاوط من قبل ناس تحبه عكسه تماماً دائماً وحيد..

**

"مسرة"
رجعت للشركة وحدي صبا راحت لمكتب مروان يكملون شغلهم و كيان قررت ترجع لبيتهم فجأة گالت معدتها تأذيها.. اخذت بطريقي كوب قهوة عملاق لـ شُهيب اعرف بي بعده ديشتغل واكثر شي يحبه ويعدل مزاجه القهوة حسب كلام كيان..

دخلت المكتب شفته گاعد لحد الان نفس وضعه مركز كل حواسه على الملف حتى من دخلت الغرفة ما حس عليَّ..

-مسرة: تأخرت عليك؟

رفع راسه بسرعة وگال بلمعة بعيونه وابتسامة..

-شُهيب: حليت الموضوع

-مسرة: أي موضوع؟

-شُهيب: المشروع الي استلمناه..

مد الملف الي چنه نشتغل بي لاربع ساعات بدون فائدة، گلبت عيوني واني اشوف هالملل المزعج لعبت نفسي بس ما حچيت..

-شُهيب: اتصلت بيهم وانطيتهم خبر بكلشي وان فلوسهم متكفي وراح يكون المشروع ناقص وحتى لو ردنا نوفر مواد البناء راح تكون رديئة

-مسرة: ادري اتصلنا سوه چنت وياك من حاچيتهم

-شُهيب: لا لا.. رجعت اتصلت بيهم وانطيتهم حل وهو نشتغل الي يردوا وبنفس الجودة المطلوبة لكن الدفع يكون على شكل اقساط

-مسرة: مستحيل

گلتها واني احرك بيدي نافية تغيرت ملامحه ورجعت للجدية..

-مسرة: مستحيل اقبل بهذا الشي احنه منشتغل بالاقساط لانه خطر ويحـ..

-شُهيب: راح نطلب منهم نكون شركاء

-شنو؟

-الدفع يكون اقساط على دفعتين دفعات بمبالغ صغيرة والدفعة الثالثة نتنازل عنها بشرط تكون النا اسهم وياهم بالمشروع

-هاا!!

عدل گعدته مركز عيونه عليَّ، صفنت افكر بكلامه وكوب القهوة السفري للان بيدي ما انطيته بينما هو اردف بهدوء..

-حتى منخسر المشروع وحتى نمشي شغلهم وثنينا نستفاد هذا انسب حل، ممكن منستفاد منه هسة لكن بالمستقبل اكيد راح تترجم فكرتنا بطريقة حلوة

-واذا ما قبلوا

-اتصلت بيهم وقبلوا

حچاهة بأبتسامة واثقة، سكتت وعيوني مركزة بي ما خطر هالشي ببالي بيوم لان بكل بساطة ابوية من اول ما بديت اشتغل وياه علمني الاقساط ما مرغوبة بالعمل وراح تضيع هوايه اتعاب..

-جبتلك قهوة

حطيتها بجانب اوراقه بدون لا يحچي ابتسم واؤمئ براسه شاكرني، رحت لميز المكتب مالتي گعدت على الكرسي وتركته هو يشتغل بمكانه، احتاج اختلي بنفسي افكر بفكرته واحتاجيت استشارة من ابوية قبل لا انطي موافقتي راح اناقش بابا اليوم ضروري هالشي..

هسة ياله انتبهت طول ما اني بأستراحة الغدة هو گاعد هنا يشتغل على المشروع واكيد ما نزل يتغده لان واضح ما مغير من وضعيته..

لحد الان جاكيت بدلته الرسمية على الكرسي بجانبه معلگهة، مرخي ربطة عنقه وباقي بالقميص النيلي كاف رداناته بطريقة مرتبة مبينة الساعة الي بمعصم ايده..

لاحظته كل دقيقة يرفع عيونه على شاشات الي تعرض الكامرات مال الشركة، ضحكت بخفة واني اتابعه حرفياً كل خمس دقايق يرفع عينه يركز بالشاشة ثانية ويرجع يشتغل..

-كافي

اندار عليَّ ملامحه تستفسر شنو گلت، ريحت جسمي على الكرسي وفردت اديه على الجانبين..

-كافي تركز بالكامرات خليهم يعرفون يشتغلون خطية

افتهم عليَّ اقصد الموظفين، ابتسم منزل راسه يرجع يشتغل بدون لا يجاوب، گمت رجعت لمكاني بجانبه نكمل شغل سوه شوية ورجع يختلس نظرة على الشاشة من شافني اباوعله بسرعة نزل عيونه على الاوراق البيده يسوي روحه حباب وفقير..

ضحكت مغلسة وسحبت ملف لونه فستقي يختلف عن لون ملفات شركتنا فتحته اشوف البي ورفعت حاجبي على هالتحفة الفنية..

-مسرة: هذا شغلك؟

-اي

جاوبني وبقى مركز بالحاسبة يمد بالمستقيمات للمخطط، طلعت كل الاوراق اشوف وحدة وحدة مبهورة بس ما بالغت بأنبهاري گدامه صدگ الشغل مرتب ودقيق واضح ماخذ منه وقت طويل..

-مسرة: شگد اخذ منك وقت هذا؟

-تقريباً اسبوعين

-اوف!

-اشتغلت عليه لفترة طويلة حطيت كل طاقتي وجهدي بي ردته يكون مثالي

-شو ماعرف بوجوده اني؟

-لان هذا مشروع فردي ميخص الشركة انطلب مني وتسليمه الاربعاء

-حلو تشتغل شغل فردي هم؟

-اي صراحة لان احتاج هالشي..

سكت شوية ماعرفت ليش يحتاج يشتغل شغل اضافي فردي بس ما علقت حلو شخص يطور من نفسه..

-شنو رأيچ بي؟

تغاضيت عن نظراته الفضولية على وجهي منتظرني انطي رأيي، حبيت موقفه من سألني دليل ان هذا الرجال بعيد كل البُعد عن الغرور ويتقبل اراء الاخرين.. سؤاله مو معناها عنده شك بشغله بس واضح حب ياخذ رأي مهندس ثاني يأيده وينبهه اذا اكو غلط بس المشكلة ماكو غلط نهائياً..

-حبيته كلش

زادت ابتسامته وقرب راسه شوية يشوف الاوراق بيدي، حطيتهن بيناتنه على الميز حتى ميتعب..

-شغلك حلو حبيت

-شكراً

حچاهة بأبتسامة صادقة، قلبت بالاوراق بيها اكثر من تصميم وواحد يگول للثاني اني شغلي ادق واحلى منك..

طلبت منه يفسرلي على كل واحد وشلون اشتغله وهو استقبل سؤالي بكل لطف وفعلاً شرحلي على واحد واحد والحلو كلهن لسه بخط ايده وبقلم رصاص ما ناقلهن للحاسبة او طابع حقوق عليهن ورغم هذا ما خاف مني اسرق افكاره..

-شكراً اشهب لان شرحتلي

-العفو، اسمي شُهيب

همسها بنبرة بصعوبة لقطتها اذاني بس ضحكتني شلون بيه ويه اسمه مدا اگدر احفظه..

-يا اخي اسمك صعب لو اني بيه مشكلة؟

-مو صعب بس انتِ متركزين

-لا مو هيچ اني مشكلتي ما احفظ اسماء بسهولة شوف كل الموظفين ما حفظت اسمائهم بسرعة حتى صديقكم السيد ما اتذكر اسمه فـ اصيحله سيد

-اسمه فاضل

-اي عفية، وبعد خليتي ازيدك من الشعر بيت تدري صبا صديقتي ظليت اشهر اصيحلها لو صابرين لو نها لو شذا لو غنا؟

-معقولة؟

-اي اي كلش فاشلة بحفظ الاسماء بس انتَ خوما تضوج اذا اخربط بأسمك؟

-بتاتاً

جاوبني وعيونه رجعها على الحاسبة، ابتسمت من اردف..

-بس اطلب منچ تنتبهين بالاجتماعات متخربطين او اذا تحبين اذكرچ بأسمي كل خمس دقايق بس حتى نتفادى الاحراجات وما اظل اقنع بيهم فوگ النص ساعة اني نفسي اشهب وشهاب التحچين بي

ضحكت فوراً تذكرت اخر اجتماع من لوصت بأسمه علما گلت بس، قابلني بأبتسامة هادئة ورجع يشتغل، مسحت جوه عيوني خفت يكون ساح الكحل وقررت اگوم اسويلي كوب شاي اخضر حتى اشتغل براحة، تلمست كوب قهوته شفتها بردت..

-ما شربت قهوتك لو خاف بردت تحب احميها؟

-لا شكراً

رجعتها بمكانها وگمت وما اسمع غير صوت شهگته، اللتفتت اشوف شبي واذا اللگه كوب القهوة واگع على الميز مدمر الملفات كلهن وواصله القهوة لحاسبته من جوه تالفة الدنيا، دگ گلبي بقوة وهمست متوترة..

-عزة شسويت اني

ركضت للميز اخذت باكيت الكلينس واجيت انشف المكان وهو يساعدني، ركضت على الملف الفستقي مالته اشيله گلبي وجعني من لگيته ناگع بالقهوة اليكتل صاير بصف الكوب مباشرة..

-لااا!!!

چان هذا صوتي واني اصرخ بقهر انفض الاوراق وحدة وحدة بس شنو انفض وشنو امسح الاوراق تدمرت والتصميم صار خريطة متت بدمي هم خجل وهم حزن..

-مسرة: اني اسفة صدگني ما قصدت

-اعرف اكيد ما قصدتي

الجملة الوحيدة الي حچاهة بهدوء تام وبقى ينظف المكان، ماعرفت هو يعنيها لو ديستهزأ بيه من گالها..

-شُهيب اعتذر منك اني تهورت من گمت و..

-عادي ما صار شي، فداچ

-شنو

-فداچ خلص راح الشر

عصبت بداله عصبت من نفسي ومن غبائي بينما هو هنا يگولي "فداچ"، ماعرفت شنو اگول وماتوقع اكو اعتذار راح يرجع الي خرب مشيت كم خطوة للخلف ووگفت وراه اعوفه ينظف المكان خجلانة واحس وجهي ولع من الفشلة..

اكثر من مرة صار ويايه هالموقف مو بقصدي بس حظي سيء كالعادة، مرة ويه ابوية وفشلني يصيح عليَّ گدام كل الموظفين ونعتني بالـ "مهملة" ومرة صار ويه مدير قسم الشؤون وهم عصب وظل يدردم ويخزر بيه رغم مكاني اعلى منه بس عذرته تعبه كله ضاع.. واخر مرة صار قبل لا اجي هنا ويه مهندس موظف عدنا وانگلب طنطل لدرجة وجهه انصبغ احمر ما وجه كلامه الي ابد بس ظل ينتر من يحچي ويه زملائه ويتأفأف..

وهالمرة اني واگفة وره شخص ماعرف شلونها ردة فعله الحقيقية بسبب تحكمه المخيف بأعصابه لا حچى ولا عيط ولا حتى عگد حاجبه اكتفى بقول كلمة "فداچ"!

-خليني اساعدك

رجعت اوگف بجانبه ما گال شي بس هز راسه يأيد الفكرة، مسحت الطاولة وهو ينفض الملفات ويرجع يرتبهن رغم تلفهن وراح ينذبن كلهن ولازم نشتغلهن او بالاحرى "يشتغلهن" من جديد..

-شُهيب تقبل اساعدك؟؟

-بشنو

-اشتغلهن وياك خصوصاً ذني

رفعت الملف الفستقي، حرك راسه نافي وگال بأبتسامة..

-لا راح يتعبچ

-لا عادي صدگني راح امشي على تخطيطك شوف الرصاص مو كله راح اگدر اعرف مسار التصميم

-لا ميخالف اني اشـ...

-لا تحط حقوقي بس اسمك يكون موجود واتعابك كلها الك اعتبر مساعدتي مجرد اعتذار

توسعت عيونه متفاجئ من كلامي، حرك ايده بطريقة لا وگال بسرعة..

-نهائياً مو هذا الفكرت بي بتاتاً لا يروح بالچ بعيد، اني راح اتصرف لا تشيلين هم

-اني خجلانة

-لا تخجلين يمعودة هاي الحوادث تصير هواي

بقى مبتسم عرفت ديهدأني و يريد يلطف الجو ويوخر شعور الخجل والذنب مني بس ليش زاد شعوري بالذنب واحس گلبي يوجعني؟ تخيلت اشتغل اسبوعين على تصميم واحط كل طاقتي بي ويجي غبي يخربه بلحظة..

-مسرة: امانة اذا احتاجيت شي اني موجودة تگدر تطلب شوكت ميعجبك

هز راسه وبنفس اللحظة رفع عيونه يباوع للكامرات سرعان ما عگد حاجبه من الي شافه هستوه ديريد يحچي وانفتحت باب المكتب مالتي بكل قوة لدرجة انرگعت بالحايط مخلفة صوت قوي..

اللتفتت اشوف منو هالقليل الادب الـ...

-شُهيب ابن الساقطة!!

دخل رجال معضل بطريقة مبالغ بيها لابس تيشرت نص ردن اسود بهالبرد وايده متروسة وشوم من اصابعه وصولاً لرقبته وحتى اذنه بيها وشم وترچية اللماس صغيرة مثقوبة بأذنه اليمنة، يب يا قوم اكيد كلنا عرفنا هذا فهد شمسون.. لحظة فهد لو فاهد؟ مادري المهم هذا يكون ابن الكلب شمسون هذا الجرو الصغير مالتهم..

-شُهيب: شتسوي هنا فاهد؟

اها شباب طلع اسمه فاهد بس حتى نبقى على تواصل ومنخرب الاحداث حفظوا ويايه عود..

-فاهد: شسويتلهم؟؟ احچي شسويت!!

ينتر نتر من يحچي وعيونه الصفر تجدح ومخبوط بياضها بالاحمر..

-شُهيب: مو وكته فاهد نحچي غير وقت

-فاهد: تحچي هسة وغصباً على الخلفتك ابن العا****

-شُهيب: فاهد!! گتلك اطلع لا المكان ولا الزمان مناسب

يخزر بي خزر وهذاك ما مهتم خطف شُهيب نظرة الي ورجعهن على فاهد كأن دينبهه بوجودي..

-فاهد: ما يهمنييي احد ما يهمني بشررر خلصنييي شتريد مني؟؟ شسووويت لزلاميي لازم انتَ ميت ليش همه الموتى هسة!!

ابتسمت بداخلي، طلع المستخبي شُهيب شمسون وگع قناعك الكيوت وفضحك اخوك طلعت سفاح ماهر شوف شلون ورطة هاي..

-شُهيب: فاهد اطلع بره

يحچي ببرود قاتل وهذاك عطب تعطب تقدم وبحركة سريعة مفاجأة ضرب شُهيب على كتفه ضربة قوية خلته ينرد وره..

-فاهد: لاااا تحاچيني ببروووود لا تستفزززني بأسلوووبك هذااا تعرررفني مخبببل اذبحك هنااا والله اذبحك

-شتريد؟

-لا تحچي ببرووود لا تحچييييي

-فاهد اطلع انتَ سكران شتريدني اسويلك؟! اكو واحد يشرب هيچ وقت!

-اييي اني وبكيفييي انييي اسوي الي يعجبنيي لا تتحكم بيه انتَ عااار علينا انتَ غلططة ابوية انتَ غلللطة ودخلت لحياتنا

-صحيح تمام تفضل بره

-ولللك لا تحاچيني هيچ لا تحاچينيييي شسويتلهمم ليش اذيييتهم!!!

رغم عصبية فاهد وصوته الي رج المكتب رج عيوني راحت على شاشة الكامرات اتأكد اكو احد بالممرات لو لا وارتاحيت من شفت ماكو احد..

گعد شُهيب على الكرسي بكل هدوء ذب نفس وحط رجل على رجل، طلع جگارة من جيب بنطرونه وجداحة بلل شفايفه قبل لا يحطها بين شفايفه يشعلها، جر منها نفس بطيء وشمره على جهته اليمين بطريقة مستفزة وهذاك واگف يتفرگع..

-فاهد: ليييش اذيتهم جاااوبني؟؟؟

-شُهيب: منو يگول اني سويتها؟

-فاهد: ماكو غيرك چان موجود!!

-شنو دليلك؟

جر نفس ثاني من الجگارة ورجع ينفثه على جهته اليمين، ماعرف نسوا وجودي لو ممهتمين لوجودي من الاساس بس شو تحسست مو حلو شعور اللبسة..

-فاهد: توقيعك عيني كابيتان (سيدي)

-شُهيب بأستهزاء: ما چنت شايل قلم

-فاهد: طلقتين بالعامود الفقري تشل الضحية!! هذا توقيعك!!

-شُهيب: اذا تعرف هالشي ليش جازفت بأحسن رجالك مو حرامات؟

-فاهد: لان ردتك ميت!! تالي شليت حمايتي!!

-تصويبي ممتاز كالعادة مو؟

-شُهيييبب

-طمنني عنهم للاسف ما صار عندي وقت اقوم بالواجب وازورهم بالمستشفى، بشرني خوما واحد منهم مات؟

-لا حبيبي بس انشلت اطرافهم

-ها الحمدلله

-شُهيب انتَ على شنو ناوووي فهمننني راح اتتخبل من وراك يوم اللگاك ببيتي وقبل فترة لحگتني للمغرب شتريدد؟؟؟؟

-اريد سلامتك

غيمت ملامح فاهد وسد باب المكتب وبرمشة عين طلع سلاح من جيبه ووجهه على شُهيب الوجه عرگان والشرايين بارزة والعيون خابطة، واضح بصعوبة واگف على حيله بس قبضته ولزمته للمسدس قوية..

-فاهد: انطيك مهلة من واحد للثلاثة تحچي وتگول شنو رايد لو افرغ هالمسدس براسك!!!

عيوني تراقبهم شُهيب ما تحرك من مكانه بقى حاط رجل على رجل ويدخن بهدوء بينما فاهد بدأ العد توترت خوفاً من الموقف وخوفاً على سمعة الشركة ينسمع بيها اطلاق نار او تصير بيها حادثة قتل..

-فاهد: واحد.. ثنين... ثنين ونص... ثلـ..

بس نطق رقم ثلاثة فوراً داس على زناد المسدس، انخمشت روحي بدون لا اتحرك واني اشوف الرصاصة اجت فيت على شُهيب، اللتفتت اشوفه بقلب ينبض بقوة لگيته على گعدته الجگارة بين اصابعه والرصاصة عبرت من فوگ كتفه على بُعد شعره من لوح كتفه مخترقة الحايط الي وراه..

-شُهيب: هواي تجاوزت حدودك تدري؟

-فاهد: لا ياريت تعلمني مثل عادتك

-شُهيب: ان شاء الله عن قريب حبيبي فاهد

-فاهد: انتظرك

البرود الي محتل المكان وصوتهم الهادئ وهمه يحچون ووگفة فاهد الجريئة وگعدة شُهيب الواثقة افسر الموقف بـ "الهمجية البحتة"، بوسط استغرابي تقدم فاهد على اخوه يجر الجگارة من بين اصابعه يحطها بين شفايفه اخذ منها نفس نفسين ورجعها لـ شُهيب..

-فاهد: اسف بس اشتهيتها

-شُهيب: لا جديد، خلصت مسرحيتك؟ اطلع بره يله

ضحك فاهد بقوة يفرك عيونه الحمر ويمسح على وجهه المتعرق واضح مو صاحي ويمكن هذا سبب شُهيب ما سواله شي ماعرف صراحة؟..

-فاهد: منو هاي الحلوة؟

گالها وهو يباوعلي گلبت عيوني مزعوجة من وجوده، اردف ينطق بلسان ثگيل..

-فاهد: شو هاي ما خايفة من عدنا ليش؟

هم ما جاوبته نزلت عيوني على اظافري منتظرتهم يخلصون سوالفهم حتى اكمل شغلي لكن الي طلعني من طوري ورجف جسمي هو من تقدم فاهد يوگف مقابل مكتبي بالضبط ويگول بنبرة صوت متلاعبة..

-فاهد: ها هاي جايبها هنا تتونس بيها؟

بنفس اللحظة الحچاهة شلت كوب المي الحاطته على الميز وشمرت المي بوجهه، شهگ بصوت عالي ما متوقع تصرفي..

-فاهد: لا يا بنت الكلب

-مسرة: اطلع بررره لك!!

-فاهد: ولچ هاي عليمن تگولين لك؟؟؟؟

-مسرة: عليك يلا ولي برره يلااا

اكشه بيدي مثلما اكش ذبانة، فتح عيونه وبنفس اللحظة شُهيب گام يريد يتدخل ويدفع فاهد بعيد عني واشرتله يوخر حتى ميتدخل..

-مسرة: عوفني اني اتصرف ويه هالسلبوح

ضحك فاهد بقوة ضحك بصوت عالي كلش يمسح المي الشمرته بوجهه و يصفگ بيده مثل المجنون، اخيراً توقف عن الضحك وگال بمكر..

-فاهد: انتِ ويامن تورطتي عود عبالچ قوية ومصدگة روحچ؟ اليوم انعل والد والديچ بنت الـ.....

ما كمل جملته وشلت الگلاص اشمره عليه انرطم بصدره العريض نز بمكانه مصدوم ما خليته يستوعب فوراً گلت بهدوء وبصعوبة سيطرت على اعصابي..

-مسرة: تطلع بكرامتك لو اطلعك بدونها؟

-فاهد: ولچ انتِ ويااامن اندگيتييي تردين تموتتتين

-مسرة: عادي مندگة بهواي چلاب نفسك وما متت

-فاهد: بنت الـ*******

هجم عليَّ وره فشاره يريد يلوحني وشُهيب تدخل ماهتم لكلامي قبل شوية وصار بيناتنا بالضبط، دفعه من صدره بقوة ونتر..

-شُهيب: اطلع بره فاهد لا تسببلنا مشاااكل

-فاهد: ما جاي تشووف هاي بنت النعاال السااقطة تغلط عليَّ

-مسرة: محد ساقط هنا غيرك يالسكير المقرف يلااا بره شركتي بررره

-فاهد: ولللك جاي تسمعهههااا

-شُهيب: اي، اطلعع بره شركتهااا

-فاهد: اني اعلمچ لوما اشگچ ششششگ ما يطلع اسمي فاااهد

بعدني دا اجاوبه جواب اللصمه بي وما حسيت الا بـ شُهيب يطير وجهه ببوكس سفطه على الحايط، فتح عيونه فاهد مصدوم ايده على خده وكأن چان ما متوقعها ويمكن حتى البوكس زَيّد دوخته، اللتزم الهدوء لثانيتين قبل لا شُهيب يگول بعصبية وصوت عاالي ممتعودة عليه..

-شُهيب: اطلععععع بررره اخر مرة اعيدهااا لا تخلينيي اتصرف تصرف اندددم عليه بعددددين وتروح لابوية تتبچبچ!!!

-فاهد: شنو تتصرف؟؟؟ تجيب امك ترگصلنا؟؟؟ يابن ماريااا ام الزززلم

هنا طفح كيل الثنين هجم شُهيب على فاهد لزمه من خوانيگه ولزگه براشدي ثاني وتبعه راشديات وبوكسيات كتله كتلة برد گلبي بي حييل يضرب وين اليوجعه وهذاك هم قووي رغم سكران بس يرجع الضرب لدرجة من يوگع واحد منهم بالگاع تنهطر هطر، فاهد استمر يعاير شُهيب بس ما اسمع شنو ديگول وما افتهم بسبب ايد شُهيب الكاتمة حلگ فاهد ميخلي صوته يطلع كل هالعركة ومحد استرجى يدخل للمكتب رغم دا اشوف موظفين ثنين واگفين بباب مكتبي ويحچون ويه بعض ويأشرون على الباب..

دقايق وشفت مالك من الشاشة واگف بباب المكتب ويه الموظفين، ثانية وحدة استغرق حتى يفتح الباب على وسعها ودخل عليهم يفاككهم ويعيط حتى ينتبهوله..

اول من هدأ چان شُهيب مجروح بگصته ودگم قميصه مفتحة لاحظت وشوم بصدره، بعدت عيوني انقلها لفاهد حاله مو افضل تيشيرته متمزق وهم طالع صدره ووشومه برزت اكثر..

-مسرة: سوالف مزعطة

گلتها واني اگعد على الكرسي، توجهت الانظار عليَّ رمشوا ثلاثتهم كم مرة بعيونهم يستوعبون واضح متفاجئين من كلمتي بس اي اني مو اسفة واعنيها..

-مالك: شصاير؟؟

-مسرة: انتَ اطلع

اشرت بعيوني على فاهد باوعلي بأستغراب اكبر، كشيته بأيدي نفس قبل شوية وكشولت ملامحي واني اگول..

-مسرة: يلا يلا راويني عرض چتافك الاوڤر يلا

-فاهد: ولكمممم هاي منووو المسوددنة

-شُهيب: مسودنة بعـ....

-مسرة (بمقاطعة): اطلع گلت لا تظل تلغي هنا مالي خلگ راسي يوجعني

-فاهد: اني اعلمچ بس انطيني صبببر ما يطلع اسمي فاهد اذا ما....

-مسرة: اعتذرت؟

-فاهد: شنو؟؟

-مسرة: وتبوس ايدي حتى اسامحك؟ لا عيوني ماكو داعي بس اطلع وچفيني شرك

ديجاوب ومالك لصم حلگه يجره يطلعه بره وياه وهذا يزاگط مثل المطي بالضبط عيونه ناطه وبس صوت دردمته ينسمع..

ما رجع الهدوء الا من طلعو من المكتب وشُهيب وياهم، حطيت ايدي على راسي اعصره دوخوني تفووو على ابوكم الاغبر..

-مسرة: لو متلفلف ونايم ذيچ الليلة ولا مخلف هالبعران

گمت من الكرسي اروح اسويلي شاي اخضر اريح نفسي شوية بلكت الصداع يروح، كملت تجهيزه ورجعت على الطاولة الچبيرة اكمل شغلي دقايق واندگت الباب ما احتاجيت اسأل منو شفته من الكامرات..

-مسرة: تعال

دخل وضعه احسن ومرتب قميصه ساد الدگم كلهن بس شعره للان مبعثر من وگف گدامي جر خصلاته للخلف يعدلهن، استند بأيده على الكرسي المقابيلي ذب نفس وغمض عيونه وگال بنفس صوته الهادئ..

-شُهيب: اعتذر على الصار

-مسرة: ماشي

-شُهيب: ما چان لازم...

-مسرة: يصير هيچ هنا؟

-شُهيب: نعم بالضبط

-مسرة: يلا تكبر وتنسى تعال نكمل شغل ماعدنا وقت

تغيرت نظراته من جملتي مبين تفاجئ لان ما تسائلت عن شي وشلون اني بهذا البرود بس فعلاً ميهموني عسى نارهم تاكل حطبهم واخلص منهم ولد شمسون وتخلص مهمتي الحقيرة!..

من بعد هالموقف وره كم يوم هم رجع فاهد ووياه هارون، رادوا يفوتون على الشركة يتعاركون اكيد وشُهيب دزلهم الحماية طردوهم بالنعل، عرفت سبب وجود الشاشات بغرفة شُهيب حتى يراقب منو يطب ويطلع ويسيطر على الوضع..

مضت ايامي سريعة بهاي الشركة ولسبب غريب صرت اتقبل شُهيب اوقات حتى انسى هو ابن شمسون واعامله على ان مهندس محترف ودا استفاد من افكاره الخطيرة..

بعيداً عن كونه ابن شمسون حابة اوصف شُهيب بالـ "نسمة" نسمة باردة حلوة تمر عليك بيوم مشمس حار.. هدوئه الي چنت اكرهه صرت اشوفه مريح للاعصاب وامووت عليه من يحچي والله بدون مبالغة صوته بي نغمة تريحني وتخفف همومي المستمرة عندي استعداد ابقى اسولف وياه اليوم كله بدون لا امل..

انسى الوقت من نشتغل سوه ونبقى ساعات نشتغل واني ادردم واسولف وانبطح وانمطل واتعارك واگمز واشگ هدومي.. لا چذب ما اشگ هدومي عيب بس اي اعصب كلش واتنرفز بسرعة من ميمشي الشغل عدل وهو يقابلني بهدوء ويسمعني للاخر ويختم عياطي بجملة "اهدأي وارتاحي اني اتصرف"..

هادئ، متواضع، ميحب الفخفخة الزايدة، انيق، محترم جداً وكلامه راقي ميغلط ولا يسب ولا يحلف ولا يعصر بروحه ويخبص نفسه وبس يريد يبرز عضلاته عود شوفوني اني المدير.. يحترم المرأة جداااااااً وهالشي لاحظته بي بأكثر من موقف.. ماعنده اسلوب اني رجال وانتِ مرة وكلمتي هي التمشي حتى ويه الموظفات يتناقش وياخذ وينطي ويمشي بأفكارنا احنه البنات اذا چانت منطقية..

ينطيني الحرية بالكلام وبالافعال، السكان بيدي واني اتحكم بسير الامور بأغلب الاحيان ويتقبل هالشي ومن ميعجبه تصرف او قانون نصيته يناقشني بهدوء وبكل مرك يقنعني كلللل مرة..

چني اخذت راحتي زايد واني اسولف بـ هموسي بس والله يخبل مريحني الله يريحه دنيا واخرة ااااخ لوما چنت نفسك ابن شمسون والعباس الا اتزوجك وغصباً عليك هم!!

لميت اغراضي واخذت حاسبتي وجنطتي وطلعت من الشركة ميتة تعب اليوم هوايه اشتغلنا، اول ما وصلت للبيت رحت اسبح وابدل بعدني واگفة گدام المراية اسوي عنايتي الليلية ودخل ابوية لغرفتي..

-فادي: شلونها بنيتي

-كلش زينة

-فادي: اشوفچ مرتاحة هالايام سرور شنو السبب

-الشغل ديمشي بطريقة حلوة وحبيت الموظفين اليشتغلون ويانه

-اييي الموظفين گلتيلي

-اي

-شصار ويه ابن شمسون؟

مجاوبت استمريت احط سيروم لوجهي وانتظره ينشف، اگدر اشوف ابوية من المراية عيونه تترقب مني جواب..

-مسرة: ما صار

-ليش؟؟؟

ذبيت نفس تعبان وهزيت راسي بقلة حيلة..

-فادي: مسرة عينچ بعينيي

-بابا اني تعبانة اليوم

-عييينچ بعيني گلتتت

انداريت عليه احط عيني بعينه، لزمني من متوني وگال بخفوت..

-نسيتي ثار امچ مسرة؟!!

-لا اكيد لاا

-لعد ليش ما جاي تشتغلين على الخطة؟!

-بس تعبانة هالفترة ردت ارتاح

-ترتاحين؟ لو ماعندچ ثقة بيه؟!

-تريد الصراحة؟

-اي سولفيلي بالصراحة

-بابا انتَ صارلك سنين توعدني اذا كملتي هالمهمة اني راح ارجعلچ حقچ، اذا مشيتي بهذا الطريق راح تربحين، اذا طلعتي ويه فلان راح تقوين الى ان سويتني وحدة ثانية.. لبستني قناع ميناسبني وميناسب شخصيتي لونتني مثلما تريد وعلى مزاجك انتَ استغليت بنتك الوحيدة

-بس هذا مو موضوعنا! اني دگيتلچ صدر وحلفت بروح امچ اذا جبتيلي خبر ولد شمسون كلشيي انوخذ منچ راح يرجعلچ واني اوگف بوجه الكل!!

مسح على شعري يخلل اصابعه بين خصلاتي واردف..

-هذا ثار امچ المظلومة! شمسون كتل امچ!! كتلها گدام عيونچ وولده اشتركوا بهاي جريمة القتل!! كتلووا ثرى لو نسيتي مسررة؟؟؟

-ما نسيت اكيييد ما نسييت شلون تريدني انسى التعاسة العشتهاا بسببه عشت يتييمة، ضاايعة، وضيعة وغريببة بسببه

-كل يووم حطي هذا الكلام براسچ ومشهد موت امچ گدام عيونچ ورجعيلنا حقنااا الي سلبوا من عدنا شمسوون وولده الانذال!! حق امچ وفلوسها وكلشيي باگو من عدنا ودمروچ ودمروني وراچ!

-اوعدك راح ارجع كل فللس انأخذ من امي وانغصب حقهاا كل دممعة نزلت من عيني واني اشوفها بدمهاا وهي حاامل بأخوية المات وياهة!! بابا ما انسى اني مستتتحيل انسى حقها لو اظل طول عمري كله بهاي التعاسة!!

-كفووو ببنيتي!! كفوو بحبيبة ابووها.. ذكريني بخطتناا مسرة اروي مسامعي وريحي گلبيي

فلتني من ايده يعوفني برجفتي العصبية، منظر امي ميروح من بالي.. دمها التناثر كل مكان وبطنها المفتوح ما انساه.. الغربة والالم العشته بدونها ما انسى مرارته.. گلت بشرود ووجه امي البريء انرسم براسي، گلت الوعد الي قطعته على نفسي لخاطرها، گلت اخيراً خطتنا الصار سنين نشتغل عليها بصوت مسموع جلجل بالغرفة...

-مسرة: اتزوج الملك، اقتل النمر وازيد بخبال المجنون....!

يتبع 🥵....

━━━━━━  ━━━━━━

توقعاتكمممم 🥲🔥؟؟

لتنسون التفاعل والتصويت منكم استمد الطاقة والحب للكتابة 🙂‍↕️🤍🫂