رواية ابناء الحسوم "شمسون" الفصل التاسع 9 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

الليل وأنت عَـلي چــا ويــن المروة
خلوها واحــد يجي لــوو انـتَ لــوو هــوه 🤎.

━━━━━━  ━━━━━━

"مسرة"
گاعدة بسيارتي گدام البيت ماعرف شلون راح يدخلوني وحاطين ثلاث حرس بالباب، شبه فقدت الامل من مرت ربع ساعة على گعدتي اشوف المعازيم يدخلون والحرس يوگفوهم يسألون عن هوياتهم..

زفرت نفس ونويت ما ادخل اكمل شغلي منا بس هالشي خطر وراح يرصدوني بالكامرات، دورت بعيوني على شي يساعدني وچان اللگف زميلي "نور" من اب عراقي وام جزائرية اعرفه من ايام الجامعة وهسة هو عضو بوحدة من اهم الشركات هنا ويملك اسهم بشركات اخرى ومستثمر جديد بشركة المانيا.. بأختصار واحد طاگ للنعال..

شفته يقفل بسيارته والعجيب طلع يعرف ولد شمسون هه طبعاً يعرف ولد شمسون منو ميعرفهم ذولة الكلاب، نزلت من سيارتي بسرعة شبه اهرول اله بعده ما دخل جوه ديحچي بالتلفون جبت شعري على جهة وحدة حتى يبين وجهي وعبرت منه اسوي روحي ما اشوفه وصار مثل ما ردت بالضبط..

-نور: مسرة قيثارة؟

لحد يضحك على "قيثارة" مو وكتها بعدين نتناقش على لقبي واشرح سالفته خلوني مركزة ويه نور..

-مسرة: نعم؟

-نور: مسرة شلونچ؟ ما عرفتيني اني نور.. نور جواد الشمري

-مسرة: لا مستحيل نور العبقري؟ شنو هالصدفة العجيبة

-نور: احلى صدفة وينچ انتِ متنشافين بس نسمع بأسمچ يلمع بمجال الاعمال الكل يحچي بنجاحاتچ ونجاح والدچ

-مسرة: تسلم نور كلك ذوق، هاي شنو انتَ جاي لحفلة فاهد؟ يعني تعرفه انتَ؟

-نور: ماعندي علاقة بفاهد بس اخو مالك يصير صديقي علساس نلتقي بره بس گال اخو مسوي حفلة ولازم يحضر يحرسه

ضحك وره كلمة "يحرسه" ابتسمت وياه وفوراً گلت..

-مسرة: حلو اني هم جاية هنا صديقتي عزمتني بس شو مدا اشوفها وخاف ميدخلوني

-منو صديقتچ؟

-بشرى بيضون

اخترعت اسمها هسة من عقلي اساساً نور مو من النوع يدقق فـ مو مهم..

-نور: ماعرفها صراحة بس اتصلي بيها خوما تبقين واگفة هنا

-اي خوش فكرة

سويت روحي اتصل بيها وگفت على جهة واشوفه يباوعلي ما دخل منتظرني بالضبط الي ردته بالضبط، نزلت موبايلي من على اذني ومثلت النرفزة دگيت رجل بالگاع ونفخت هوا ضايجة..

-مسرة: متجاوب بس لا عافتني هاي والله ما ارجع للبيت قبل لا احلل ملابسي ومكياجي

-هههه تحبين تدخلين وياي؟

-لا خاف اسببلك احراجات

-بالعكس ماكو أي احراجات

-ماشي بس علما تجي بشرى ما اوعدك ابقى وياك

-مثل متحبين

الكشرة شگت وجهه شبي هذا دطير منو بحالك، اخيراً عبرت وياه البوابة گلهم هو عازمني واني "الديت" مالته خزرته وره هالكلمة ضحك ومسح على ذقنه يعتذر مني..

-نور: اسف بس اعرف جماعة فاهد نحسين ما يدخلون أي كان

-وتگلهم اني الديت مالتك؟

-اني اسف مسرة عذريني ما چنت اعرف الكلمة راح تزعجچ

-اي تزعج صراحة اتمنى متعيدها

-صار بعيوني

اشرلي ندخل خلاني اتقدم عليه وفتت جوه، وصلنا لغرفة من الغرف وگفنا على جهة شوية وصوت الاغاني كلش جوي الهوسة اموت على الاصوات العالية اكره اگولها بس لسبع ثواني اني واگفة بجانب نور استمتعت..

-مسرة: شوف هاي بشرى دزتلي مسج تگول هي هنا منتظرتني بغرفة بيها شباك چبير، فرصة سعيدة اللتقينا نور شكراً اتمنى تستمتع بوقتك

-نور: صدگيني اني اسعد

تركته واگف ياخذ كاس يشرب منه ويباوعلي، ما ركزت بكلامي ومادري شنو مسلتت شنو غرفة بيها شباك چبير شنو بشرى منتظرتني؟ يله نغلس ونكمل الخطة سرور هسة احتاج اللگه غرفة فاهد شمسون!

دخلت لصالة امشي واسأل ومحد يعرف وينها، طلعت منها ورحت لصالة عملاقة واحد يضيع بيها هم گضيتها امشي واسأل الى ان رصدت عيني شاب يملك شعر عسلي ناعم لابس جاكيت جلد واگف على جهة ولازگ بنية بي آآآه يا للسعادة ليلتي دتصير احلى واحلى..

-مسرة: اووه واو اشهب شمسون هنا؟

اللتفتو ثنينهم هو والبنية الي بجانبه، چانت كلش حلوة ومبينة اصغر منه بهوايه.. شابة بياضها ناصع بملامح كورية وعيون كبار مجرورة تلمع جوه الاضوية..

تشتت تركيزي من حسيت برجال يوگع نفسه عليَّ، دفعته عني وصار يعتذر ما اهتميتله بس فتحت عيوني واذاناتي وكل حواسي من رجع يحاوطني ويعرف عن نفسه وگال اسمه الكلب ابن الكلب العار ابن العار السگط الزبالة الحقيير النذذل اتعس خلق الله حشى خَلقه.. هارون شمسون!!

-مسرة: هلا

-هارون: صارلچ شگد تشتغلين ويه شُهيب؟

لحظات چانت وما شفته الا طاااار من جانبي اي اي والله طار شُهيب لزمه من خوانيگه ويدفعه على محجر الدرج وعيونه يتطاير منها الشرار، انتشر الفزع بالموجودين من الموقف الغريب ومن عياط هارون الملى المكان..

-هارون: شبيييك شبيييييك منو وياك انتَ!!!

-شُهيب: بس شوفة وجهك تلعب نفسي وخر من يمناا لا تندگ بشي خاص بيه هارون!

-هارون: اني شمسويلك؟؟؟ سألت البنية انتَ شكووو

-شُهيب: روووح منا لا تطلع صوتيي

ينتر من بين اسنانه ابد ما علت موجة صوته رغم العصبية الي هو بيها وشوفة هالشي مرعب چان و تمنيت من كل قلبي يبقى مسيطر ع نفسه وميثور لان شوفته بهالحال الغاضب وترني..

-هارون: شُهيب چنك مشتاق نتصاارع مثل ايام قبل ونشوف منو يفوز هههههههههههههههه

-شُهيب: حركاتك الطفولية الساذجة تسوي عندي جالي روح اللعب ويه الي بگدك وليدي لا تخليني اوصخ ايدي بييك!!

حسيت حركته ودفاعه عني لسبب، لان عصبيته مو طبيعية ونظراته لهارون وهجمته المفاجئة عبالك خاف منه يچفص بشي گدامي وتلاحگ للموقف من دفعه عني..

عت نفسه هارون من بين ايدين شُهيب وصار يسب مسبات ويفشر فشار من العيار الثقيل كل هذا وشُهيب ما جاوبه بقى ياخذ نفس ويزفر بهدوء يسيطر على اعصابه..

-هارون: هاا شو خفت؟؟

-شُهيب: روح منا

-هارون: متريدها تشوف الوحش الي بداخلك مو ههههههههههه

بقى شُهيب يهدأ نفسه وميجاوبه مدا افهم هارون منين يعرفني؟؟ وشلون عرف اني اشتغل ويه شُهيب؟ هسة اني اعرفه اي بيها مجال لان سامعة بكل خياساته واجرامه بس هو يعرفني ويستفز شُهيب بيه هالشي غريب!

-هارون: لا يغرچ هدوئه خلي يطلعلچ وجهه الثاني تظلين يومين متغفى عيننچ ههههههههه

-شُهيب: اخر مرة اعيدها روح من وجهي هارون

اخيراً استجاب، تركنا وراح يضحك بصوت عالي مثل المجانين ويصيح بنص الناس "شُهيب ابن ماريا"، "شُهيب ابن شمسون"، "شُهيب ابن الحَسوم"، "شُهيب نمر ابوه"..

يصيح بعلو صوته نرفزني وخوفني عبالك مو صاحي، بينما شُهيب ابد ما علق ولا حتى باوعلي بقت عينه تتابع هارون الحقير وهو يروح لغرفة بعيدة عننا..

-مسرة: ما تخيلتك تجي لهيچ حفلات

رجع انظاره عليَّ وعقدة خفيفية بين حواجبه يمكن نسى وجودي او مستغرب سؤالي المفاجئ، اردفت..

-مسرة: شكلك كلاسيكي ومو جوك هالاماكن

-شُهيب: فعلاً

-مسرة: اگلك هذا شبي المخبل؟ ينرفز الله يساعد اهله عليه

-ميتين

-شنو؟

-هذا ابن عمي امه وابوه ميتين وربى عند ابويه

اهاااا وصلت الفكرة اي دگولو من البداية شمسون مربي لان مبين شاخط وماخذ خيط من خباله..

-مسرة: على العموم اتسائل هاي الحفلة مال منو تعرف صاحبها؟ لان صديقتي جرجرتني هنا ويه خطيبها وفني اگول لبشرى ماروح لمكان غير تاكل راسي

-ماعرف مال منو

جاوبني وعيونه طايرة يدور اكيد الكورية الحلوة الي چانت جاية وياه، خفيت ابتسامتي الماكرة يسوي روحه غشيم وميعرف وهو بيت اخو اويلي منكم يولد شمسون..

تركني واگفة بلا كلام زايد وشفته يروح لواحد من الحماية الواگفين يحچي وياهم بلغة البلد بصوت عالي بسبب صوت الاغاني..

-شُهيب: شفت بنية طويلة بملامح آسيوية؟؟؟

-الحماية: لا

راح لغير واحد وهم سأل وانوب راح على بنات يسأل عنها وهيچ بقى يتنقل من واحد للثاني مثل التايه ويطب بالغرف يدور عليها الى ان رجع لنفس الحماية الاول يسأله..

-شُهيب: مالك وين؟؟

اشرله الرجال على الغرفة الي صايرة بداخل الصالة فيكة غريبة وهندسة معمارية حلوة عحبتني، هز راسه وگال..

-شُهيب: متأكد هو هنا؟؟؟

-الحماية: نعم

ذب نفس مرتاح ورجع يوگف بصفي واضح ارتاح من عرف البنية دخلت لهاي الغرفة وهي عند مالك.. جيد وهاي كسبت معلومة جديدة وهي شُهيب يثق بمالك لدرجة ترك البنية عنده بدون لا يخاف او يقلق رغم علاقتهم بالشركة مبينة مو زينة..

وگف مقابيلي مباشرة بس عيونه تشرد كل مكان طول ما اني واگفة باله مشغول وعيونه على الغرفة وعلى الدرج ماعرف ليش، رصدت هارون واگف بعيد ويباوع لـ شُهيب ويضحك ورجع بنفس الطريق الي اجه منه..

-شُهيب: من رخصتچ

تركني واگفة وراح على جهة هارون الى ان اختفى من انظاري، ماهتميت وبقيت افتر وادور بالبيت على غرفة فاهد شمسون.. صعدت للطابق الثاني وفتحت باب غرفة واخترعت من المنظر الشفته، رجال ومرة بوضع يلعب النفس..

طبگت الباب بسرعة ودخلت لغرفة ثانية وهم وضع رذيل اكثر، فتت لاكثر من غرفة وكلهن بيهن ناس، شلون راح اعرف ياهي غرفته هالشي مستحيل احتاج مساعدة شُهيب..

رحت لاخر غرفة افتحها ما انفتحت حاولت بيها اتمعچل طلعت مقفولة على الاغلب هاي غرفته الخاصة! انتفضت من اجتني دفعة من زلم ثنين ديتعاركون وواحد يدفع بالثاني ويتضاربون.. ركضت انزل جوه اطب لصالة واطلع من صالة الى ان وگفت من شفت ممر فارغ يؤدي لصالة اضويتها خافتة و مو هوسة ما واصل صوت الموسيقى الها لدرجة الصخب..

فتت بالممر وچان اشوف شُهيب وهارون! واگفين يحچون وذكروا اسم "ماريا" وراهة جابو طاري اسمي ما لحگت اللقط شي واضح من حديثهم لان شُهيب مد اصابعه وطعن هارون بيهن ببطنه بدون لا يستخدم سچينة ولا خنجر ولا آلة حادة بس واضح هالطعنة أللمها مبرح لان صوت هارون ملى الصالة وفوراً وگع بالگاع..

وگفت اللزگ روحي بالحايط حتى ميشوفوني وعيوني على هارون الساند نفسه على ايده ويگح ويتقيء دم ويعيط متوجع بعلو صوته..

-هارون: اااااااااااخ يابن الحرااااااااام

لثانية شكيت شُهيب طعنه بشي حاد بسبب صياحه والدم الي جاي يتقيئه هارون بس جسمه كلشي مابي لا مطعون ولا ينزف، شُهيب يباوعله ببرود ممهتم والجگارة بحلگه يدخن طبيعي، نفخ الدخان على جسد هارون الواگع ورفسه برجله حتى يگوم..

-شُهيب: متبوگ كم حركة من فاهد تدافع بيها على نفسك وضعك يزعل هارون

-هارون: ابن ال....

سكت گاطم حچايته ما كمل بقى يتنفس بصوت عالي واخيراً بعد فترة هدأ وصار يضحك بمكانه ويضرب ايده بالگاع..

-هارون: الله ياخذذذك لا تسوي هالحركة هههههههههههههه

وگف على حيله لازم معدته ويمسح حلگه من الدم، تقرب منه شُهيب بحركة هادئة مثل طبعه وگال بنبرة تحذيرية..

-شُهيب: هارون لا تندگ ويه الاكبر منك واسمع الكلمة

-هارون: ما سويت شي بس حچيت وياهة

-شُهيب: ماريد اشوفك تحوم حواليها مرة ثانية، تشوف مسرة راحت يمين انتَ تروح يسار مفهوم؟!

-هارون: ههههههه ليش مهتم بيها لهدرجة؟

-شُهيب: يعني ما كفاك السويته بيك ماشي

-هارون: لا لا ولك ااااااااخ

رجع كرر نفس الحركة مال الاصابع لـ هارون وهذا الغبي بقى يتقيء دم مرة ثانية ولازم بطنه يتلوى من الوجع، جره شُهيب من رقبته وخلاهم يصيرون وجه بوجه ويحچي بكل هدوء وروية..

-شُهيب: ما احب احد يلمس أشياء تخصني لو نسيت هالشي هارون وحاب اذكرك بطريقتي؟

-هارون: مسرة صارت تخصك هسة

شدد على رقبته من وره وهذاك يصرخ بألم ويتقيء لدرجة ماعت روحه يمكن حتى مصارينه طلعن..

-شُهيب: اذا شفتك طااخ مسررة طخخة بسس طخةة احسب روحك بخبر كان، لا تندگ بيه لا اللحگك بـ امك وابوك العار

-هارون بمكر: هاي اول مرة اشوف واحد مهووس بشريكته لهدرجة واخيراً عرفنا نقطة ضعف شُهيب شمسون

رفع اصابعه يريد يعيد الحركة ونتر بغضب مكتوم..

-شُهيب: استر على روحك بعد مرة وحدة اعيدها وتصعد لربك

-هارون: لا لا بشرفك راح امووووت خرب غيرتك فهمتت

-شُهيب: صير آدمي من البداية لو الا تنسحل

رجع الجگاره بـ فمه وابتعد عنه يمسح ايده بمنديل محطوط على الطاولة الي بجانبهم، كمل من ايده ومسح حلگ هارون من الدم وگال..

-شُهيب: عيب تطلع محمر بالدم شيگولن عنك البنات الحلوات

-هارون: ارجعلكياهة وشرفي

-انتظرك على نار

حچاهة مستهزأ وطفه جگارته برقبة هارون وهذاك ظل بس يصيح ويتوعد، طلع من الصالة واني هرولت ابتعد قبل لا يلگفني ورجعت لنفس المكان الي چنة واگفين بي قبل شوية وعقلي يدور بسبب محادثتهم..

رجع يمشي برهاوة وهدوء كلشي مابي ولا كأن زوع هارون مصارينه علما گال بس وبدون لا يستخدم شي سواهة بأيده المجردة..

-مسرة: انتَ بخير؟

هز راسه اي واستقر يوگف بجانبي..

-شُهيب: انتِ دائماً تجين لهيچ حفلات؟

سؤال بسيط، سريع ويخجل.. استحيت اصارحه بالحقيقة واگله اي اني مضطرة اجي لهيچ حفلات حتى اخلص لابوية شغله، استحيت اگله اني صار كم سنة عايشة هالاجواء الفاسقة كله بسبب ناس ميخافون ربهم.. استحيت وبقيت مستحية ابتسمت وحركت راسي بـ لا..

-مسرة: لا بس مچنت متوقعتها بهذا السوء، لو بس اعرف صاحب الحفلة منو عاجبني ارزله على هالاجواء السخيفة

-ميفيد

-شنو؟!!

اصرخ ما اسمع صوته تقرب مني يحچي بأذني بصوت عالي..

-ميفييد

-ليش؟؟

-لان هو سخيف نفس حفلااته

-يعني تعرفه انتَ؟

گلب عيونه متنرفز وحرك راسه "اي" ضحكت على حركته ورجعت اصرخ..

-مو گلت ماعرفه

-استحيت اگول هاي حفلة اخوية الصغير

-اووووه عندك بعد اخ؟؟؟

-اي

-شنو اسمه؟

-فاهد

هزيت راسي اي وتركته اروح افتر بالصالة شوية بس عيوني بقت على شُهيب، تغيرت الاغنية لوحدة سخييفة منحطة وكلامها يكزبر الجلد والناس الي هنا تخبلوو بالمعنى الحرفي صار الرقص بفلس وحتى بيهم نزعو ملابسهم من گدما انچلبو فتحت عيوني مصدومة من بنية تقربت على شُهيب تحاوط رقبته وتهمسله بشي بوجهه تريد تتقرب منه..

دفعها عنه بسرعة متقزز ورجعت تقربت وحدة ثانية لبسها مغري كلش وحرفياً لزمته من بنطرونه! هو ميشوفني بس اني اشوفه واشوف شلون ينتر بيهن ويأشرلهن يوخرن عنه وهنه بس يضحكن ويرقصن گدامه..

فتحت عيوني على الثالثة الي اجت وراه تحضنه من خصره وتنام على كتفه ذني شبيهن؟؟ السالفة مو طبيعية انتبهت الكل بهذا الوضع المربك ناس صايرة فوگ ناس اكو عركة صارت على جهة وجهة ثنين حايرين بعالمهم الوردي الرذيل وعلى جهة بنات يضحكن ويه ثلاث شباب ويتماوعن بحركات خفيفة..

حرفياً حيوانات! مو بشر طبيعيين خصوصاً البنات متخبلات ويذبن ارواحهن على الشباب ويرقصن بطريقة هستيرية جنونية وهنا تأكدت شكوكي وصار وقت الجد، فوراً اتصلت على الشرطة من رقمي الثاني هذا الوقت المناسب..

ولد شمسون الكلب ديلعبون بالبنات يخلوهن يتعاطن بطريقة من الطرق ويخبلوهن والله اعلم شيصير وراهة، نويت اكمل طريقي لغرفة فاهد بس شلون راح اللگاهة والكل مو بوعيه هنا؟ رجعت لـ شُهيب بيدي گلاص عصير اخذته اريد اشرب وجره من ايدي بسرعة..

-شُهيب: لا تشربين او تاكلين شي منا

-مسرة: شربت منه

-بيچ شي؟ انتِ زينة؟؟

-اي بس ليش تسأل

-بعد لا تاكلين شي ابد

وصلت الفكرة المخدرات موجودة بالعصير! وهذا السبب ليش الكل متخبل هنا خصوصاً البنات دا اشوف الشباب دينطوهن عصاير وهمه مدا يشربون شي رصدت عيني اكثر من واحد، ذبيت الكاسة من ايدي ما شربت منه بس چذبت عليه حتى اشوف ردة فعله وعرفت السالفة..

-مسرة: وحبيبتك ما راح تحذرها؟

-منو؟

-الكورية الحلوة

-مو حبيبتي كيان اختي وهي بأمان ويه مالك

-اختك من امك وابوك؟

-لا تصير بنت زوج امي

-هاا يعني كيان اخت نشوان مو؟

-اي

توترت واني اشوف الوقت يمشي ما بقى شي والشرطة توصل وياخذون كل الموجودين بهذا البيت ومن ضمنهم اني ولحد الان ما لگيت غرفة فاهد ولا لگيته..

-مسرة: غريب وينه اخوك ما شفناه؟

-شُهيب: ماعرف

-دا ادور على صديقتي بشرى ويمكن راحت ويه خطيبها يسلمون عليه خليني اروح وياهم

-لا اوگفي

-ها؟

حك مكان حاجبه حسيته ميريدني اروح لسببٍ معين..

-مسرة: راح تجي ويايه؟

-ماگدر لازم اروح لاختي، انتبهي على نفسچ وابقي بعيدة عن المشاكل

-يااا اشايفني راعية مشاكل

-لا العفو ابد وينچ وين المشاكل

-انتَ وهذاك هارون الرشيد اكبر مشكلچيين

-چنها دگمة ولسانها شطوله

حچاهة بصوت ناصي وضحك ورغم الموسيقى الصاخبة سمعتها، طنگرت وانطيته ظهري اعوفه واروح بس حسيت بتردد قبل لا اعوفه واطلع حسيت بأحساس غريب حاوطني خصوصاً بعدما نبهني وما خلاني اشرب من العصير.. زائد اذا اجو الشرطة راح ينسحل وياهم وبما ان هو ابن شمسون اكيد يتعاطى وراح يطلع بالتحليل وتنلاص عليه..

-مسرة: اگلك بطلت بشرى اكيد تريد تبقى هنا خلينا نطلع احنه لعبت نفسي من الاجواء

-شُهيب: وين؟

-مادري بس خلينا نطلع من هالبيت اجواءه مو حلوة ابد

سكت يباوعلي وملامحه تغيرت هستوه چان يضحك وهسة رجع للجمود ماعرف شنو بالضبط ردة فعله انقهرت من نفسي اني شعليه بيهم خليني اطلع وحدي شكو شايله همه!

-شُهيب: تمام خليني اصيح كيان

هزيت راسي موافقته وعيوني تدور على فاهد شمسون ما شايفته بالواقع بس بالصور ابوية گال راح تميزي من ضخامة جسمه مو كلش طويل بس عضلاته اوڤر يله سرور دوري على واحد عضلاته اوڤر..

-شررررطة يا قووووم اجت الشرررررطة

وره هالجملة ما سمعت غير الهوسة گبت والحماية تورشعوا بالبيت صارت فوضى عارمة متعودة على هاي الاجواء بس مو لهدرجة، ناس صارت تدوس على ناس والحماية صوتهم يجلجل بالبيت يعيطون على الكل حتى يطلعون من الباب الخلفي..

لزمت واحد من الحماية وسألته بصياح..

-مسرة: غرفة فاهد شمسون ووين؟؟؟

حركلي بأيده ماعرف، لازم ادخل لغرفة فاهد واجيب الاوراق!! بس ماكو وقت لازم اطلع قبل لا توصل الشرطة رحت ويه الحشد اطلع واشوفهم يمشون جموع غفيرة ماعرف منين ديجون ووين چانو متختلين كلها تمشي بنفس الاتجاه يتبعون واحد لابس اسود ولازم لاسلكي، عيوني لقطت شُهيب تايه ويصيح بأسم اخته يدورها انقهرت على وضعه وصرت ادورها بين الناس..

-شُهيب: كيااااان وينچ كيييييان

يصيح ويتفحص بالوجوه يلزم شكو وحدة لابسة ازرق يديرها عليه ويخيب امله من يشوفها بنية غريبة، حسيت بشعور الذنب فضيع حاوطني شبيييچ مسرة شتحسين شسالفتچ!!

ذبيت نفس ومسحت على وجهي قررت قراري خلص رحت افتر بالبيت ادور كيان متناسية غرفة فاهد ابتعدت عن الباب الخلفية امشي واتلفت والاصوات مستمرة، انرطمت بجسد واحد من الحماية بلا كلام زايد لزمني من متوني يمشيني للباب الخلفي يريد يطلعني، صحت بي يوخر عني واتعارك وياه ميقبل يهدني نابت اصابعه بزنودي زورگني النذل..

-مسرة: وللللك وخررر لا تلمسنيييي

اتملص منه واتعارك وياه وهو بس يدردم ويأشرلي نطلع عباله ما افهم لغته، ضربته بعكسي ببطنه بس چانت اغبى حركة اسويها بحياتي حرفياً انگلب عليَّ طنطل وبرمشة عين فر راسي براشدي شعل وجهي شعل..

بعدني ما مستوعبة الصار وشالني على اكتافه يمشي بيه نَفسي انگطع من الموقف وانتبهت وين حاط ايده على جسمي خبلني ضربت ظهره حيل وملخت راسه الاگرع بأظافري..

-مسرة: ابننن الكللللب ولك انييي تنطيني راشدددي اليوم انعل واللدديك

ودگ كتل على صلعته ملخت ظهره بأظافري وراسه حتى دم گام يطلع كل هذا وميخليني انزل مستمر يمشي بيه يطب من غرفة يطلع من الثانية، عضيت اذانه بكل قوتي رادت تنشلع لولا عياطه العالي، شمرني بالگاع وگعت على ظهري متألمة تسودن تقرب يريد يرفسني حضرت نفسي ارجع الرفسة بكعبي وقاطع رفساتنه ثنينه بوكس اجاه على غفلة مطله بالگاع..

طفرت من مكاني اشوف منو هذا وچان اللگاه شهاب!! لحظة هو اسمه شهاب لو شُهيب؟ اني قبل شوية گلت شُهيب هذا اسمه الحقيقي لو اني مخربطة؟ ياخي لازم احفظ اسم هالبني ادم بس مو مهم هسة المهم عفية بشريكي الساندني..

زارتني نوبة ضحك على الموقف، ضحكت من كل گلبي اللتفت عليَّ مصدوم گوة كتمت الضحكة والخفة الي ظهرت فجأة بس شسوي هاي اول مرة واحد يتعارك علمودي وانغرمت بالفكرة..

گعدت على جهة حطيت رجل على رجل اشوف المعركة الطاحنة الي صارت كضني واكضك على گولة صبا دگ كتل لزم الاگرع ملخه تملخ جنزه تجنز انبهرت بقتالهم حبيت كلش ولولا العيب چان طفگتله.. ارجع واگول متعودة على هالاحداث بس ممتعودة احد يمد ايده عليَّ ما فوخت گلبي بي ابن الزنا هذا!!

گمت من مكاني طلعت المبرد من جنطتي وهجمت عليه نويت ادچه بي وحسيت بـ اشهب يدفعني على الدرج ويعيط بيه..

-طلعي منا بسرعة

-ما اطلع الا انحر هالجرو نحرر

-تنحري بمبرد؟؟؟ روحي يمعودة

-ما فاااخ گلبي

-اني افوخلچ گلبچ بس روووحي

يحچي ويايه وهجم الاگرع عليه يضربه وهجمو وياه ثنين بعد لا انلاصت السالفة نحتاج دفاع يجونه، رحت افتر على مساعدة والهوسة للان ما فضت بقيت ادور وادور اريد مساندة لـ شُهيب.. بينما اني ادور حسيت بشخص يدفعني من اكتافي دفرت ايده ورفعت ايدي سمطته براشدي فريت وجهه..

-هاي شبيچ!

-مسرة: ها هذا انتَ ماعرفتك

-شُهيب: ليش انطيتيني راشدي؟!

-لتبالغ ميتسمى راشدي خفيف تره امشي يله نطلع لتجينا الشرطة ترگصنا للصبح

-ترگصنا للصبح شنو

-امشي ماما امشي ابني

جريته من جاكيته ويايه اطلع بي وتذكرت اخته ياا كيان الجميلة وين، اللتفتت عليه شفته يمشي بهدوء مترهي ممهتم ابن الاوادم تفف على ابوك..

-مسرة: متمشي؟؟ تخليني اسحسل بيك!

-ليش تركضين؟

-الشرطة اجت تريدهم يسحلونا؟

-ليش يسحلونا شمسوين؟

-اشهب هدوئك بطله راح تموتني شي يوم

-شعليج بيه بابا ليش تسحلين بيه

-غير خايفة عليك! مو صوچك صوچي والقران اهتم بيك واگول شريكي وساعدني!

-خايفة عليَّ من شنو بالضبط؟

دا اجاوبه وانتبهت لشي، هذا ديستجوبني!! شهگت جوه انفاسي وبقيت مبحلقة بعيوني واگف بهدوء وايده بجيوب بنطرونه والدنيا محترگة هنا بس هوايه ناس طلعت، كرر سؤاله بهدوء اكبر وتقرب عليَّ نظراته مليانة مكر وشَك..

-شُهيب: من شنو خايفة بالضبط؟

-من الشرطة

-ليش خايفة من الشرطة؟

استجمعت قوتي وضحكت بأستهزاء، كتفت ايدي وگلت بثقة..

-اولاً لان ببساطة الشرطة متجي من عبث اكيد اكو شي غلط واجو بسببه! ثانياً اني وجه معروف ومو حلوة بحقي انسحل للمركز ويجي ابوية يطلعني گدام الكل!

لانت ملامحه شوية وكأن جوابي اقنعه، وخر عيونه عني واندار على الصالة يدور مرة ثانية..

-مسرة: ما لگيت كيان؟

-لا

طلع موبايله يدگ على رقم توقعتها هي بس مدا تجاوب، رجع التلفون بجيبه ثابت ما متأثر بس ملامحه مبينة قلق وخايف على اخته..

-مسرة: اكيد طلعت

-مادري

-امشي نطلع يمكن نلگاهة بره

-لا

-امشي مستحيل كيان تبقى بالبيت وره كل هالهوسة

-گلت ما اطلع!!

تركني ممهتم دگيت رجل بالگاع دمي يغلي هسة اني شعلييييه بي يبووو شعليه شعليه امشي مسرة طلعي مناا لتلزگين لو الا تنسحلين.. تركته يدور بالبيت وبس صوته يجلجل اسمعه يصيحلها والقلق بنبرته دمرتني عزه العزاني اني شكوو حتى على نبرته انتبهت خرب عرضك ابن شمسوون ورطتني بيك تفف على ابوك..

ما گدرت اطلع شي بداخلي يگول دوري وياه على كيان اشتعل گلبي الطيب الي موديني بستين داهية بس منظره وهو يدافعلي مدا يروح من راسي ماريد اورطه بسالفة تتضمن مخدرات، مشيت وراه ادور عجزنا ما لگيناهة صعدنا بالطابق الثاني شافني وراه امشي نظرلي مستغرب بس ما علق كملنا ندور ومالها اثر البنية فص ملح وذاب..

-راح تجي الشرطة يمعود راح تذب روحك بورطة اني سامعة عن هالحفلات گالو اذا اجت الشرطة وطلع اكو مواد ممنوعة بالبيت الكل ينسحل خلينا نطلع حباب

-روحي انتِ

-ابني اختك اكيد طلعت ليش تورط روحك ليييش

-ما اطلععع بدون اختيي روحي انتِ طلعيي مناا لا تبقين وراي تفترييين

نتر الكلام نتر بوجهي، ماعرف انصدمت من كلامه لو من اسلوبه لو من موقفي التافه الحقير واني اللحگه من غرفة للثانية مثل الذيل بالضبط!!

عضيت على لساني اتحكم بنفسي وطلعت من الغرفة اطلع مو من الباب الخلفي من الامامي الله ياخذك حقير هاي فوگما اريد اساعدك بس انتَ كلب نفس ابوك بالضبط اذا ابوك شمسون شتطلع انتَ غير واحد نذل خسيس ابن شارع..

فتحت الباب واسمع صوت صفارات الشرطة بعيدة استغربت ليش للان ما وصلو وشلون هذا الصاح عرف راح تجي الشرطة؟ ماهتميت وعبرت الحديقة وصولاً للمسبح واستوقفني منظر..

تقدمت بخطوات هادئة دخلت امشي على الحشيش شفت ثنين واگفين وبنية وياهم اصواتهم عالية بس ما افتهم شيحچون بعيدين عني..

تقربت اكثر وصرت وره شجرة چبيرة ركزت عيوني على البنية وچان تطلع كيان! هاي كيان نفس هيئتها بس شتسوي ويه ذولة؟ متدري بأخوها راح يتخبل وهو يدورها شتسوي هنا؟؟

وصلني صوت بكائها العالي انخمش گلبي خفت، اعترف خفت عليها ماعرف ليش ماعرف بس خفت من الي وياهة منو ذولة وشنو يردون وليش مدا يخلوها تعبر وتطلع؟؟

ما ترددت طلعت تلفوني بسرعة اتصل بـ أي احد يجيني هنا ويشوفلنه چارة وياهم بعده الموبايل يرن وسديته بسرعة واني اشوف مالك يطلع من البيت متوجه على الي محاوطين كيان تعال واضرب كل واحد بيهم بوكس وارگع راس براس.. محد بيهم دافع عن نفسه ولا رفعوا روسهم وگالو شي مال حاضر ابتعدو بسرعة وطلعو من المكان عرفتهم حماية..

تقربت اكثر وگنبصت وره شجيرة عالية "bush" صرت اگدر اسمعهم الاضاءة خافتة هنا ما انشاف بسهولة بس اسمع لمحادثتهم ولصوت كيان الباكي..

-مالك: ما اذوچ كيان مو؟؟ ما سوولچ شي؟

-كيان ببكاء: لااا لاا بس ميخلوني اروح مالك منو ذولة ساعدني طلعنيي منااا اريد شُهيب اررريد اخوية

-مالك: لا تخافين ذولة زلم يشتغلون لفاهد هو ما عرفچ منو وأمرهم يوگفوچ

-لا عرفتها منو

حولت نظراتي على صوت الرجال الي طلع من البيت، بدون لا اشوف وجهه عرفته مثل ما گال ابوية طوله طبيعي بس جسمه ضخم كلش..

-مالك: فاهد عوف البنية شتريد منها؟

-فاهد: امص دمها

-مالك: شبيك انتَ تطلع مراجلك على طفلة؟؟

-فاهد: تتحمل مسوؤلية جيتها هنا

ختلت هي بظهر مالك ترجف وتبچي بحرگة وخوف متت قهر عليها من تقرب فاهد منها يحچي ببرود واستهزاء..

-فاهد: شفتها ما لابسة گلادة گلت اسويلها وحدة بطريقتي، اگص لسانها واعلگه برگبتها وندزها لأخوها هدية

-مالك: فااهد كافي گلت!

زادت كيان بالبكاء وتضمضم بروحها شگد كرهت الموقف تمنيت ادخل افجر راسه، فار دمي من وجه مسدس عليها ورجع يگول قرفان..

-فاهد: اهووو اني اكره البنات اليبچون كافي لا اكتم صوتچ على الاخر

-مالك: زودتها فاهد شتريد منها خليها ترجع لبيتهم لا تصير نذل

-فاهد: گلت ما ترجع الا اگص لسانها غير هالشي ماعندي

-كيان: والله ما سويت شي ما سوويت

-فاهد: منو گلچ تخطين رجليچ داخل ممتلاكاتي؟ شنوو هالجرأة جبتي اخوچ العاااار وجايه لبيتي بكل سفالة و******؟؟ شنو تلعبوون وياي انتووو ما رايدين أرواحكم؟؟

موجه السلاح عليها ويعيط بيها، دعيت من گلبي يجون الشرطة هسة، وينك شُهيب تعال لاختك لا يأذوهه!!

-كيان: شُهيب معلي اني ردت اجي هنا انيي لحيت هو معلي والله ومنقصد شي ابد

-فاهد: تجيبون الشرطة ولكم چلااااااب انييي ينلعب بيه وشرطة يجون لبيتي والله احرگكم حررررگ وخلي اخوچ يفيدچ بنت الكلببب

وجه السلاح عليها كلش يبست كيان من الخوف ماتت بچي جرها فاهد من ظهر مالك يريد يضربها طلقة گلبي گام يوجعني ماعرف شنو بيدي اسوي شلون اساعدها واني مجايبة مسدسي ولا وسيلة دفاع..

-مالك: فاااهد عوف البنية عووفهاا مشكلتك ويه شُهيب عووف اخته

-فاهد: وخرر مالك لا تصير بيك الطلقة وخررر

-مالك: فاهد انتَ مو بوعييك انتَ سكرران فااااهد

يصيح هرج الدنيا هراج متت بدمي حسيت سكري علگ غواش وصعد على عيوني من القهر، اشوفهم يتعاركون مالك يدفع بفاهد ويوخر السلاح عن كيان وهذاك فاقد يدفع بأخو يريد يرمي البنية..

-مالك: فاااهد وروووحهاا لأمي لو لمستههاا لمسة اشرررب من دمممك لا تگول مااا گلتتت

-فاهد: ليش تدافعلها شنو تعنيللللك؟؟؟

-مالك: اخت شُهيب هااااي تريد تورطناااا فاهد اصحححى شُهيب هذا لا تتخبل وتبليناا وياااه

-فاهد: گول تحبهاا لا تگول اختتت شُهيب العااار

-مالك: احبها شنوو بابا بگد بنتي وخر يمعود لا تفقد عقلك فكر بينا فكرر بيه ليش تريد تموتني انتَ تريدني امووت؟؟ تريد ابوك يموتني؟؟ احچي گووول تعرف اني الي أتعاقب على تصرفااتك وتهورك تعرف كلشش زينن

-فاهد: ليش يجي لبيتي شيرريد ليييش احنه اتفقنااا نبتعدد صار سنييين ما داخلين بيوت بعض ليييش رجع واجه هنا شنو غايته؟؟؟؟

-مالك: خلص الصار صاار مشكلتك وياه عوف اخته حبيبي انتَ فاهد دخيلك نزل السلاح نزله لا يصير بيها شي انتَ مو بوعيك

كل هالحچي وشُهيب ماكو! لا شُهيب موجود ولا الشرطة وين ولت الشرطة ليش ما اجت ليييش؟؟ اني بلغت متأكدة الشرطي گال همه جايين ليش ما الهم اثر!!

ايدي ترعش فقدت اعصابي من الهمجية الدا اشوفها يريد يقتل بنية مثل الوردة لان دخلت لبيته؟؟ شنو هالخبال؟؟

-شنو جاي يصير هنا؟

رخى جسمي وكلشي بيه من شفته ذبيت نفس مرتاح اي مرتاح على الاقل اجه شمسون بنفسه اكيد راح يحل الموضوع وميرضى على الديصير..

-فاهد: هاي الچلبة جابت عارها واجت لبيتي

-شمسون: كيان

-كيان: عمو ساعدني فدووة

-شمسون: فاهد ليش موجه السلاح عليها شبيك ابني؟

-فاهد: بلغو الشرطة علينا ولولا مالك متدخل چان انلااتصت

-شمسون: شلون حليت الموضوع مالك؟

-مالك: صديقي ضابط يشتغل هناك گلتلهم صار سوء تفاهم سحبوا شرطتكم قبل لا يوصلون بيتنا و تصير مو حلوة

عضيت على شفتي حيييل خرب روحكم حتى بالشرطة عدكم معارف قذرين نفسكم ويتكتمون على وصاختكم..

-شمسون: كفو

تقرب على مالك ومسح على كتفه وشعره جر وجهه وباس خده بوسته خلفت صوت عالي لعبت نفسي مو بوسة حجامه..

-شمسون: منو بلغ بالضبط؟

-فاهد: شُهيب النغل

-شمسون: اممم

-كيان: معلينه احنه اصلاً ليش يبلغ شُهيب ما راد يجي والله وروح ابوية ما راد يجي اني جبته گوة توسلت بي يجي عمو صدگني والله ما سوه شي

-شمسون: وين شُهيب

-فاهد: جوه بالبيت

-شمسون: شيسوي بالبيت؟

-فاهد: يكرز حب ويه حمايتي

بچت كيان بقوة بعد جملته وگعت بالگاع تشهگ بصوت عالي وتغطي بوجهها وفاهد النذل الخبل المسودن يضحك مستمتع اني شورطني ويه ذولة ابوية وين دخلني!

-شمسون: متأكد من الجاي يصير جوه؟

-فاهد: مية بالمية

كممت فمي مصعوقة من اندار شمسون على فاهد وانطاه راشدي بكل قوته سواه هو والگاع واحد، شخصت عيوني من شفته يحط رجله على راس فاهد يدوسه بحذائه وهذاك ما تحرك من مكانه ابد وكأنه مستسلم لو متوقع حركة شمسون..

-شمسون: كفو

لا لا مستحيل اذا عاجبه الموضوع ليش ضربه؟ وليش حاط رجله على راسه وديدوسه هالشكل؟؟

-شمسون: بس صير حباب المرة الجاية

وخر رجله عن راسه وگومه من الگاع يعدل شعره، حمحم ووجه انظاره لـ مالك..

-شمسون: تصرف

-مالك: تمام

-شمسون: ممنوع تخلي يروح للمغرب هالفترة اذا افتهمت بي رايح انتَ تتعاقب

هز راسه مالك موافق بينما فاهد عدل وگفته وگال بحرگة..

-اروووح

-شمسون: كافي بابا

-فاهد: محد يوووگف بوووجهي احرگكم كلكممم بدون لا يرفلييي جفن

-شمسون: بابا ما صارلك اسبوع من راجع كافي فاهد

-فاهد: جاي يحووكون لشي احس اكو شي جاي يصير وره ظهري گلبي ما مرتاااح والله گلبيي جاي يتگطع حسسس بيه حسسسس

-شمسون: احس

-فاهد: لو تحس ما تخليني معلعل هيچ وتدمررررننيي

-شمسون: انطينا مجال ابني لا تتهور، مالك انتبه على اخوك ومثل ما وصيتك

عافهم وراح يطلع من الباب الامامي بقيت بمكاني مو فاهمة شي عقلي جوه ويه شُهيب شنو ديسوون بي انلزگت بي التهمة وهو ماله دخل ياربي شلون تنحل هاي..

-كيان ببكاء: اريد شُهيب

-مالك: تمام على كيفچ تعالي وياي

-فاهد: وين وين

-مالك: فاهد كافي راح يوگف گلبهاااا

-فاهد: لا انتظري لا تخلين گلبچ يوگف قبل گلب اخوچ تره نتزاعل

حچاهة بصوت لعوب وضحك بصوت عالي ضحكة مو طبيعية راجعة لانسان مو طبيعي، رفع موبايله لأذنه ثواني وگال وهو يضحك..

-فاهد: اريد وحدة بگلبه وثنين براسه

-كيان: لاااا لااااا ابوس ايدددك فاااهد هو ماله ذننب لااااا الله يخليك لااا هو اخووووك

-مالك: فااهد كاااافي گلت خلي يولييي يرجع لبيته فاااااهد

-فاهد: چؤ چؤ احنه متفقين ليش يخلف بالاتفاق؟ يعتب باب قصري الي حق اكتله اعتب باب بيته الفاشل اله حق يقتلني هذا اتفاقنا مالك بس يمكن گلبك الطيب نسى كالعادة

-مالك: ما نسيييت يا بني ادددم الرجال هو المسؤول على أهله عنده ام تموت وراه لو صارله شييي فكر بيهااا فكر بگلب اامه حرام عليييك

-فاهد: للاسف ماعندي ام وماعرف شلون الامهات يفكرون فـ ميهمني

-كيان: مالك ابوس ايدك ساعدنييي هذا اخوووك اخوووكم هذا من لحمكم ودمكم شلوون تكتلوو شلووون

تبچي ونازلة على رجلين مالك تتوسل جسمي يرعش من فوگ ليجوه راح يوگف گلبي من القهر انفاسي انگطعت توتر وخوف وندم ندم ندم ندم ليش ورطته لييش!! لييش خليت يصير كله هذا اني شسوويت!!

سندت ظهري على الشجيرة منهارة قوتي وگلبي دگاته تقره مليون ما اسمع بس صوت شهگات كيان وصراخها العالي من مالك ابتعد منها يحچي بالتلفون على جهة ظلت تدگ على وجهها من شافته ممهتملها ولا عبرها، انقمت گلبي من فاهد رجع اتصل عليهم وعاط..

-فاهد: ما جاي اشم ريحة موووووت يلااااااا

ثانية واقل من الثانية وسمعت صوت ثلاث طلقات هزت گلبي قبل لا تهز البيت......

يتبع....

━━━━━━  ━━━━━━

مستحيل!!!!! 😭😤

هارون الرشيد ينرفززز 😭😂😂

برأيكم شنو سبب عداوة الاخوان؟؟ وليش لهدرجة حاقدين على بعض 😒 كتبولي توقعاتكم 🫦😍🔥