رواية ابناء الحسوم "شمسون" الفصل التاسع عشر 19 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لّما رآني في هواه مُتيما
عرف الحبيبُ مقامهُ فـ تدللا ♥️

━━━━━━  ━━━━━━

"جنات"
دخلنا القاعة ومحد بينا گدرت تغطي انبهارها، كلشي هنا فخم و راقي الثريات النازلة على شكل شلال من كرستالات ناعمة والكراسي واسعة ولونهم بنفسجي مخملي والطاولات الزجاجية الصغيرة المقابيل كل كرسي والڤازات الكرستال المتروسة ورد لافندر شي خيال ويفوق الخيال..

-تسنيم: هاي اجمل قاعة داخلتلها بحياتي

-ايات: مهتمين بأدق التفاصيل ذووق كلش

ركزنا بالحيطان المزخرفة والجامات المقفولة عارضين بيهن المجوهرات وصايرات بين الناس كل الي يتعده يگدر يشوفهن ويتيه بجمالهن هاي من غير صور بنات وشباب يخبلون لابسين مجوهرات ومبين هاي طريقة عرضهم للمجموعة الجديدة..

-تسنيم بضحك: جناوي لازم صورتچ تكون وياهم على كمية المجوهرات اللابستها ههههه

-ايات: مو حلوات

-تسنيم: تحچين صدگ؟ والله يخبلن

-ايات: الفستان مو حلو مخربهن

-تسنيم: بالعكس!! احلى شي الفستان ايوو سكتي ذوقچ خربان

ضحكت بمرح متدري ايات دتطلع حرگتها وقهرها مني بهالطريقة، ماردت اللبس الفستان بس اضطريت بالخصوص اني ما اشتريت فستان فخم فستاني كلش عادي صبيت تركيزي كله ويه ايات وتسنيم وردتهن يطلعن احلى شي هنا لانهن چانن متحمسات على خطبتهم من ولد شمسون تالي ولا وحدة منهن انخطبت وحظي الاغبر وگع بيها..

مالك جابلي بوكس ابيض چبير بي الفستان وبنصه المجوهرات، ما اچذب واسوي روحي فد مرة الفستان يخبل مو بس يخبل تفاصيله مبهرة بس ما بينت اعجابي گدام البنات خفت على مشاعر ايات..

الفستان لونه اخضر زمردي من فوگ ليجوه مخصر فيت يجي على الجسم ويجي فوگاه مثل البشت الطويل بس مو عريض لدرجة يكون بشت عبارة عن احجار وكرستالات مرصعة من فوگ ليجوه من گدما ثگيل گوة دا امشي بي بس شي خيالي..

جاب ويه الفستان قناع اسود بفصوص ذهبي واخضر غامق يغطي بس العيون وبعد ثلاث انواع احجبة حتى اني اختار اليناسبني، اخذت الربطة الستن شفتها تطلع حلوة وياه ولبستها على الطريقة التركية واكيد ما اخفي جمال الاكسسوارات الجابهم يعرف ينسق هالحقير..

عدلت رداناتي اسحبهن اغطي كف ايدي حسيت ببرودة هنا وبديت اضوج والمعازيم لسه مو الكل وصل.. سولفت ويه تسنيم وايات كل شوية تقاطعني وتحاول تغيضني واسكت عنها يعني شنو اگدر اسويلها؟ هي مقهورة ومتضايقة انوب ارجع اتعارك وياهة وازيد الطين بله؟

-يا اهلاً ببنات اخوية الجميلات

اجه الططوة الكبرى عمي شمسون، بوسنا وحدة وحدة على خدها ووصل الي باس خدي بوسة مطولة استغربتها وابتعد عني يباوع بعيوني ويحچي بخفوت..

-عيونچ جنة من الخضار ولابسة اخضر شوية شوية على گلب مَلكي

ماگدرت ابتسم لا ارادي انرسمت ملامح القرف بوجهي ضحك بصوت يرجع راسه وره مستمتع وسحبني من خصري يمشيني بعيد عن البنات..

-ما طايقة ملك ليش عمو جنات ليش

-مع احترامي الك عمو اني ما رايدة هذا الزواج من البداية ماريد لا مالك ولا غيره

-بس صار بعد وتقبلي الامر الواقع مالك ميتعوض وراح تتذكرين كلامي بالايام الجاية

-خير ان شاء الله

-وهو اختارچ من دون البنات ورادچ لا تكسرين گلبه

عگدت حاجبي مستفهمة جملته، اكدلي بـ هزة راس خفيفة ونزل نفسه يهمس قريب اذني..

-هو رادچ جنات من الاول

-شلون؟؟

-عجبتي

-اني حچيت وياه قبل بيوم من العقد وما صارحني بهيچي شي؟؟

-يمكن استحى مالك خجول شوية

-وايات شنو؟؟ ليش تلاعب بيها من البداية ليش زرعتوا بگلبها الامل؟؟

-ايات متناسب مالك بابا حبيبتي اني احبها واتمنالها السعادة بس شخصيتها تزيد حالة مالك سوء وراح تدمره

-شلون بله!؟

-مالك حساس وعاطفي زيادة عن اللزوم واني فرحت من غير رأيه لان ينرادله وحدة صغيرة وحلوة لهلوبة ولسانها عسل مثلچ يا عسل

-مالك تلاعب بينا وعندك هالشي عادي؟؟

-اكيد مو عادي اني ما ارضى احد يزعلكم ويتلاعب بيكم بس بعد هذا مالك يحب البنات الصغار

-لا اني متأكدة هو گال ماريدها صغيرة ويميل للبنات الكبار اكثر

-هذا بس حچي حبيبتي ابني واعرفه عدل معقولة تعرفين ابني اكثر مني؟ يخررررب على الصغار يموت على ربهن

-ايععععع خلي يحترم نفثه وعمره اثفة عمو جاي احچي على ابنك بث احترگ دمميي

-هو مو چبير لدرجة تگولين ايع لان راد بنية صغيرة بس حقچ هذا بابا بعد انتِ شوفي شلون تتصرفين وياه وأدبي

-اتطلگ منه اني ماريده!!

-لا لا لا ماكو شي اسمه طلاق بقاموسنا

-عمو فدوة مااريده

-ميخالف عمو بعد شتسوين اخذي حقچ منه وانتِ زوجته وغيري مثلما تحبين وطلعيله گلب بصف گلبه

بوسني مرة ثانية وعافني بضيمي دمي يغلي وروحي تفور اني رحت اتفق وياه يهربني تالي ربطني بي لان عاجبته؟؟

-تسنيم: جناوي تعالي اجه مالك

-جنات: اني اعلمه هالفگر

رحت اتقرب من مكانه وشايله غضب الدنيا كله بداخلي لگيته واگف يسولف ويه ثنين زلم متأنق على اخر حباية ويجدح جدح النذل من ركزت انظاري بي لاحظته لابس جوه بدلته الرسمية قميص لونه زيتي نفس لون فستاني بالضبط ياااابة شگد حقدت عليه!!

-ايات: ما جاي اصدگ شلحگتو ترهمون؟؟؟

-جنات: والله مادري بي لابس نفس لون فستاني

-ايات: اي اي ظلي چذبي انتِ ما جاي اصدگ اني ربيتج!!

-جنات: لان انتِ ربيتيني لازم تصدگيني ايات احلفلچ بروح اميي اني معليه اصلاً ما ردته والله ومن چنت بالحديقة گتله...

-ايات: لتظلين تعيديلي نفس الاسطوانة جنات!! انتِ غدرتي اختچ ولعبتي عليهاا شلون هلچ گلبچ تلعبين عليَّ؟؟

-تسنيم: ايات لتستعجلين بالحكم عليها خليها تشرحلچ مستحيل جنات تخلي عينها على الرجال التحبي

-ايات: زعلي مو لان احبه!! زعلانة لان اني ربيتها ربيت طفلة منافقة حقيرة تغوي الزلم بلسانها ووجهها!

-جنات: ما راح ازعل من كلامچ لان اعرفچ معصبة ومتعنين شي من الگلتي تبقين امي واختي الربتني وتعبت عليَّ

شفت الدموع تلالي بعيونها دارت وجهها عني حتى ما اشوفها وهي تبچي، الحسرة ذبحتني وماهتميت لمنظري گدام الناس ولا لشي ثاني غير اختي ردت اراضيها بأي شكل من الاشكال..

حطيت راسي على كتفها وحضنتها من خصرها نص حضنة نزلت دمعتي همست بيني وبينها..

-اني اثفة (اسفة) ايات والله گلبي جاي يتگطع

-ايات: تعبانة

-ريته بيه التعب

-اسم الله عليج لتحچين هيچ

-ثامحتيني؟

-انطيني شوية مجال جنات خليني استوعب الصار بينا

-الچ كل المجال بث لتخليني انام بصف غيرچ بالليل تعرفيني اخاف

-ليش تخافين هالايام عند تسنيم نمتي

-ماريد غيرچ

اخيراً ابتسمت ودارت نفسها عليَّ حضنتني وباست راسي الدنيا ما سعتني من الفرح لو بيدي اظل اطفر هنا بالقاعة وافشل نفسي وافشل الحقير مالك..

-ايات: اجه

اللتفتت بسرعة اشوف عليمن دتباوع وشفت مالك يتقدم علينا وبيدي گلاصين عصير، سلم علينا واشرلي اروح وياه..

-جنات: ما اجي

-مالك: جنات احنه شنو اتفقنا؟

-ما اتفقت وياك شي انتَ اتفقت وحدك

-بس خلي تمر هالليلة على خير وشنو تردين اسوي

-تطلگني

-جنات

-ما اجي لعد

-ايات: روحي جناوي

-جنات: ماريد اروح ويه الططوة ماريدد

-ايات: تحملي بس اليوم

نفخت هوا طيرت بي مالك تمنيت اللزم شعره المرتب واكفشه لحدما يبرد گلبي، مشيت وياه كتف بكتف ووصلنا لطاولة عالية مابيها كراسي وگفنا حولها وقدملي العصير..

-جنات: ما اشرب خمر

-مو كحول هذا

-ما اثق بيك وخر

ضحك مستهزأ وحط العصير على الطاولة، باوعتله من طرف عيني واتذكر كلام عمو شمسون..

-جنات: شكو لابث مثلي؟

-مالك: لابس مثلچ؟

-القميص

نزل عيونه يباوع للقميص مالته ورفع انظاره الي فتح عيونه متفاجئ وضحك خفيف..

-مادري مو ببالي

-اممممم علينااا

-صدگيني مادري

-مو حتى الثلج گلينا

-بيمن احلفلچ وتصدگين؟

-وبسامير بالهواا دگينا

-هاي شنو؟

-اثكت انتَ مو عراقي متعرف هالثوالف

-ثانياً مو اني اختاريت فستانچ مساعدتي جابته الچ بس انطيتها قياسچ

-وانتَ شمعرفك بقياسي؟؟

-شفت ملابسچ

-عززا بعينننك رحت تدور بملابثي ؟؟؟

-لان اعرف ما راح تنطيني قياسچ المضبوط وتسنيم ما قبلت تساعدني خافت منچ

-وتروح تدور بأغراضي!

-اي بس شبيچ ليش هيچ مخربطة؟

-بكيفيي

-هو صح بس توقعت البنات يكونن ارتب

-شگد حلوو يدور بأغراضي ويصيح ليش مخربطة

-خلص خلص اسحب كلامي

-عشتوو يدور بأغراضي

-يمعودة اسف اعتذر

-عشتووو

-شيسكتها بعد

-عشتووو يدور بشغلاتي الخاثة

نفخ يمسح على وجهه ولحيته ويدردم بلغة ما افهمها ضيگت عيوني عليه وتقربت اهمسله..

-جاي تفشر عليَّ؟

نزل نفسه ورجع جاوبني بنفس الهمس..

-لا

-لعد شنو جاي تگول؟

-جاي اگول شنو هالبلوة الوگعت على راسي

-هاي ليش دتتهامسون؟

اللتفتنا ثنينه على الصوت الهامس الجاي يقلدنا وشفت مالك ابتسم من شافها بنية شقراء طويلة لبسها مفصخ جسمها ومفاتنها ظاهرة بوضوح..

-توقعتچ متجين

-لا بيبي ما راح افوت هذا الايڤنت خصوصاً وانتَ دعيتني شخصياً

-مالك: جنات هذي نورسين تصير بنت المليونير الروسي آرون، نورسين هذي جنات

-نورسين: هلو جنات بس ما عرفتها منو؟ صديقتك لو شنو

-مالك: خطيبتي

-نورسين: خطيبتك؟؟

-مالك: اي

-نورسين: مستحيل!!

تباوعلي منقرفة وكاشة وجهها شگد نرفزتني ايعع هاي هم الها عين وتعلق النخلة؟

-جنات: لازم ما عاجبيچ عيوني؟

-نورسين: لا بيب كلش حلوة انتِ بس صغيرة ههههههه ما توقعت مالك يحب الصغار اعرفه مو ستايله

-جنات: وحبهن من خلالي

-نورسين: اوكي حبي هههههه

يمة هاي شنو الطينة؟؟ تمنيت افعص راسها بعدني اريد اغرد ومالك سكتني من گال..

-مالك: العمر مجرد رقم اهم شي عقلها چبير وشفت هالشي بـ جنات

-نورسين: الله يديمكم حبي شريد اني قابل

انطتنا ظهرها تشرب من عصيري بس وجهها راح ينفجر عووع شگد حسودة وحقودة وهذا الططوة ادري بي جاي يضحك عليَّ من گال العمر مجرد رقم بس راح اغلس لان هاي سدت نفسي..

-مسرة قيثارة!!

هذا صوت نورسين وهي تهمس بأنفعال، ركزت انظاري على المكان الي دتباوع منه وفعلاً شفت مسرة تدخل ويه بنات ثنين والصدفة لابسة نفس لون فستاني بالضبط..

مسرة الها حضور خاص وتجذب شكو واحد تتعده من عنده بيوم عيد ميلاد شُهيب لاحظتها وهسة هم تكرر الموقف، مشيتها واثقة وظهرها مستقيم راسها مرفوع وكأنها تملك المكان هاي من غير اناقتها الواضحة..

رافعة شعرها بـ كبة مهووسة عالية ونازلة منها كم خصلة متبعثرة طالعة تجنن ولابسة فستان حرير لونه اخضر زمردي مفتح من يم الزنود ومغطية ايدها بفروة، مكياجها بارز ملامحها وكعبها بسمار عالي لدرجة تتسائلون هاي شلون تگدر تمشي بي..

-نورسين: مدا اصدگ!

-مالك: اممم

-نورسين: هاي مسرة مالك؟؟ مسرة قيثارة؟!!

-مالك: اي

-نورسين: هي مهندسة شجابها هنا؟؟

-مالك: ابوها وابوية اصدقاء ودعوهم

-جنات: تعرفيها؟

-نورسين: اني الاعرفها!

كملت العصير وحطته على الميز تنطي مسرة ظهرها حتى متشوفها، نورسين مفضوحة متگدر تسيطر على ملامحها واعصابها مبين مسرة ضاغطتها بطريقة من الطرق وصراحة فرحت خليها تنلصم هالبرج ايڤل..

-جنات بهمس: هاي شبيها صاحبتك؟

-مالك بهمس: مو صاحبتي

-خوش افتهمت بث شبيها مضغوطة من مثرة؟

-سالفة بيناتهن مادري بيها

زفرت هوا متنرفزة وترفع بفستانها المبين منه مفاتنها اللاحظها تدير عيونها كل شوية تدور على شي او احد وممرتاحة..

-نورسين: هسة يجيني ابوية تعالي الا تسلمين عليها

-مالك: گليله ماريد

دقايق واجه رجال چبير مبين ابوها بوسها وسلم عليها وحچه وياهة بلغة ما فهمتها بس شفت مالك گام يضحك ويضم بحلگه وهي صارت تتذمر وتأشر بيدها كأنها دتگول "لا".. ثواني وسحلها من ايدها ياخذها وياه..

-مالك: وچان ياخذها غصب عنها

-ياا اخذها لمثرة؟

-هههههه اي

-شمعنى؟

-لانهن نفس العمر وضروري نورسين تكون صداقات تنفعها

-مبين تعرفها ومتحبها

-بعد ماعرف بهاي....

**

-كيان: فاهد هدددني لا تجرجر بيه هيچ فضحتناا

-فاهد: تعالي كوري اني اعلمچ اليوم

-شكو شكوو

دفعني على الحايط وصار مقابيلي يقيد حركتي ميخليني اروح، لزمني من متوني ويحچي بحرگة وعيونه ناطة..

-من وراچ اليوم تعاركت ويه ابوية عرركة الها اول مالها تالي ولچ انيي شمسون يگول عني مههمل وماگدر لبنية بطوول اصبعيي

-امشي لكك مسودن بطول اصبعك شنوو

-اصبع رجلي هم مو ايدي يعجبچ هلا ميعجبچ طبچ مررض فوگ مررض

-طبك انتَ مرض فوگ مررض!!

-سمعيني كوري راح تفضين سالفتنا لان بعد ما اطيقچ اني گوة لازم روحي ما اكتلچ وازوعچ حليب امچ

-اووووي يمة دا ارجف من الخووف

-كياااان

-لتعيطط ولك كلنا عدنا صوت ونگدر ننبح بيي لا تفضحنااا الله يفضحك

-قنعتي اخوتچ لو بعدچ؟!!

-بعد بعددد ولك حتى شوشو الهادئ طيح حظي بالرزايل من رجعت من بيتك ولك سودت وجه اخوتي الله يسود وجهكك دنيا واخرة

-بعد بعد ادعي بدون دعوتچ اني وجهي اسود انوب تدعين

-فاهد اكرهك يبوو على امك هددني

-ولچ شنو يبو على اممك ادبسزز

-اشوف الكل يغلط عليها وانتَ تسكت من اجت لكيان متقبل موووو

-مووو

-الله ياخذك الك لعد والله الا ادعي عليك صبح وعصر لحدما تمووت واخلص

-وتترملين بعد منو ياخذچ غير اني مسوي فضل وقبلت بيچ ام عيون مجرورة

-عيوني تسواك يابو عيون بزوونة

-لچ هاي عيوني الكل يتمناها بس انتِ ماعندچ ذوق

-اي اي هدنيي ولك متوني ماتت!!

ضاغط على متوني حيل وكلما اصيح يضغط اكثر يخبث ويايه، يضحك من اشوفني اعصب واطفر ويزيد بحقارته..

-فاهد: كوري من الاخر احنه انخطبنا انچبي وتقبلي المُر الواقع

-لو تموووت

-لا تخليني اتصرف غير تصرف وياچ

-شتسويلي مثلاً؟؟ تكتلني؟؟ والله اخواني يطيحون حظكك! تخطفني؟؟ والله اخواني يشگوك نصين! تزعلني؟؟ والله اخواني....

عطت بعلو صوتي من عضني برگبتي عضة مووت شلعها شلع ابن الكلب، گمت ارافس من الوجع احس المنطقة اشتعلت نار..

-فاهد: تستاهلين

-حقيييييييييييييييير

-خررب ولچ صوتچ لا ننفضح

-ولللك انفضحت تخزززيت حظي طااااح ولك لو يشوفوها اخواني يطيحون حظي وحظظظك يا طايح الحظظظ

-متبين فستانچ بي رگبة حاسب حسابي

-عسى حسابك عسير بيوم القيامة يالعفونة گووول امين

-عسير رمان لو برتقال؟

-ولك شعوطت روحي راح امووت من الوجع عبالك مو سنون انسان

-صح سنون ذيب عندي

-سنون مطططي

خزرني ونزل بعد يريد يعضني وگمت اعيط بصوت اعلى وخر مني يكمم بفمي حتى اسكت ومننفضح احنه واگفين بختلة مننشاف بس الصوت يوصل..

-فاهد: بنت النعال صوووتچ

-طايح الحظظظ ماكو نعالة غير اممك

-اي اي يله سكتي

-لا تعضني بعد راح امووت

-كلما تعصبيني اعضچ خلي يكون بعلمچ

-وكلما تعضني اني اصيح وافضحك

-ميخالف الناس راح تتخيل جاي نسوي شي ثاني وانتِ تصيحين محد راح يتخيلها عضة كوريتي

غمز من گالها تمنيت احط اصابعي بعيونه الصفر اطلعهن وادوسهن بنعالي..

-كيان: فاجرر فاسق مرااهق مخببل

-الله الله الله

-فاهد كافي هدني زورگت متوني شبييك

-اهدچ بشرط تكملين خطتنا كيان لا عبالچ اني رايدچ والله العظيم مو بحالچ بس اريد اخلص من هالمهمة الابوية دبسها بيه

-شمعنى بيك دبسها وليش عقدولي عليك بالتحديد؟؟

-لان مالك راح يتعاطف وياچ يالفهيمة يشوفچ اخته الصغيرة وگلبه الرقيق ميتحمل يضغط عليچ! اما اني ادووس راسچ بالقندرة!!

-اخته الصغيرة؟ الله يتتقم منك يفاهد يابن مادري منوو

-امي يگولون اسمها شامة

-شامة؟؟؟ شهالاسم!!

-امي مغربية شتتوقعين يكون اسمها!

-الله ينتقم منك يا فاهد ابن شاممة خووش اني اعلمك انطيتني اسم امك الا اسمطك بسحر اخليك تهزلي خصر كلما تفز من نوومك

-اهزلچ هسة بدون سحر

رخى ايده مني ضربته على صدره منقرفة وهو يضحك، دفعته اعبره وگمزت من ضربني على جسمي من وره الحقيير..

-كيان: نذذذل وصخخخ والله الا اسمططك بسححر اصبررلي

-انتظره على نار كوريتي

تمشيت للقاعة اعدل بنفسي واجر بأكمام فستاني، لبست القناع على وجهي عبارة عن قناع اسود مقدف يناسب ملابسي، فستاني اسود طويل بأكمام طويلة ورقبة عالية مابي أي تفاصيل غير عن بروش ذهبي بمنطقة الصدر والباقي عبارة عن قطعة وحدة جاية عدله بقماش مقدف، فاتحة شعري على طولة مسرحته ومكباج بسيط..

دخلت للقاعة وشفت مالك وجنات وبنات عم شُهيب واگفات على جنب، غمضت عيوني امحي شكو فكرة حقد على جنات براسي لان مالها ذنب وهي هم مجبورة على مالك..

-تسنيم: كيان هلوو تعالي اوگفي ويانه

ابتسمت ورحت انضم وياهن احاول قدر المستطاع ابين روحي طبيعية...

**

-صبا: شو محد نعرف هنا

-جولي: لان مو جماعتنا ذولة

-مسرة: والله لوما ابوية ولا اجي بس مضيعة وقت وصرف ابتسامات مالها داعي

وهسة هم اضطرينا نرسم ابتسامة مجاملة من تقدم من عدنا رجال چبير بالعمر وبجانبه بنية شگره بس شنو من طول وشكل عليها دخيل الله، سلم الرجال على ابوية و صاحني يكمل التعارف يحچون بالانكليزي..

-فادي: آرون هذي بنتي الوحيدة مسرة هي مهندسة مدنية وبالجديد فتحت شركتها الخاصة

-آرون: وااو صغيرتي شنو هذي الانجازات فادي بنتك مثلك مجتهدة ومثابرة وجميلة جداً

ضحكو ضحكة جماعية مجاملة بحتة واردف آرون وهو يقدم البنية الشابة..

-آرون: واني هذي اميرتي الوحيدة نورسين هم مهندسة وتشتغل وياي بالشركة، نورسين يمكن انتِ تعرفين مسرة مو بنتي؟

-نورسين: احم.. اممم يمكن اللتقينا بالجامعة

-فادي: صدگ تعرفون بعض سرور؟

-مسرة: غريب اني ماتذكر شايفتچ انتِ درستي هنا؟

-نورسين: اي

دفعها ابوها من ظهرها بخفة حتى تجي تگعد ويانه على الطاولة واستلمنها البنات..

-صبا: بنفس كلية مسرة؟

-نورسين: لا بس چانت عدنا مواد مشتركة اتذكرچ بسبب لقبچ

-جولي: هههههه الكل يحفظ مسرة بسبب لقبهم الغريب

-صبا: شنو حس عمو فادي من اختار قيثارة لقب الكم يا اختي يضحكك

-مسرة: دسكتي شبعت تنمر من وراه

-جولي: بنات اجو الباقين

-صبا: اول مرة البنات يجون قبل الولد

تقربوا من عدنا الشلة سلموا علينا ولاحظت نورسين توگف وتحضن الاطلس من خصره حضنه سريعة لدرجة الرجال ما استوعب شوكت تقربت وشوكت فلتت نفسها منه..

-نورسين: وينك چنت انتظرك اطلس

-الاطلس: ما چنت اعرف راح تجين

-نورسين: ههههه ردتها مفااجأة

-عمر: ياااااي شلون مفاجأة

-نورسين: ههههه عمووري لتعيب عليَّ تره ازعل

-عمر بأستهزاء: لا كلشي ولا نوره تزعل تره الاطلس يضرب عن الطعام

-الاطلس: عمر!!

-نورسين: روووحي هو اموت عليك بيبي

ضحكت بغنج تعدل بشعرها وترفع بفستانها، احد غيري لعبت نفسه هنا لو بس اني؟

-جولي بهمس: لعبت نفسي

-صبا بهمس: الحمدلله عبالي بس اني

-مسرة بهمس: اني لو زوجة الاطلس انحرها نحرر

گعدنا حول طاولتنا وهي ويانه اندقيت دق!!! الريحني الاطلس باله مو وياهة وممنطيها وجه بس هي ما شالت عيونها عنه ابد ولا حتى زاحتهم لدرجة اني من يمي انضغطت وتمنيت احط اصابعي بعيونها واصحيها على زمانها واگلها هذا متزوج ومُلك لوحدة!!

محد يحچي والكل على الصامت گضاها، شُهيب ماكو توقعته ويه ابوه واخوانه لان سمعت راح يجون الصحافة ويردون ياخذولهم صور جماعية وضروري يتواجد، اخيراً اجه ابو نورسين وصاحها حتى تروح وياه وشفت نشوان يذب نفس متعب..

-نشوان: گاعد شاد على اعصابي

-علي: حتى اني

-عمر: يا اخي تنرررفززز

-الاطلس: شباب شبيكم!

-علي: اوووي حياتچييي ميرضى احد يحچي على نوره مالته

-الاطلس: نوره مالتي شنو؟؟ شو ما تستحون انتو!

-عمر: اطلس اذا انتَ مجبور تكمل صداقتك وياهة اغمزلنا اي والله حبيبي كلشي ولا صحتك النفسية تتضرر

-نشوان: اگلك عمير هي مو استقرت بالمغرب شرجعها؟

-عمر: ولك هي مسوية الدول روحه رده يومية بمكان تنفه عن نفسها

-مروان: نشوان اختك وين؟

-نشوان: ويه ماريا شفتهن جوه

-علي: شُهيب وين شو ما شفناه بعد

-عمر: ضحكتو علينا بهالسفرة لا شفناكم لا طلعنا سوه حتى السيد ما شفناه

-علي: والله الگعدة ماصخة بدون فاضل معقولة ما رجع من ايران!

-نشوان: اي طلعتله سالفة جديدة وبقى

-علي: چا هاي السفرة مالها نكهة اعذرنا شوشو انتَ هم غدرت بينا وما طلعنا وياك وطگت رواحتنا

-نشوان: اسكت عدنا ظروف بالبيت وراسنا راح ينفجر كل يوم مشكلة

اللتفتت على صوت ابوية يصيحلي وبجانبة مجموعة رجال ونساء، رحتلهم وبده السلام والتعارف ودام لفترة طويلة، اخر واحد ابوية اخذني نسلم عليه هو نور جواد وابوه فوراً لبست القناع على عيوني وشردت اوگف على جهة المشروبات اخذ عصير..

وبينما اني هنا خاتلة انتبهت لـ حديث غريب ديصير واحد من الحماية الواگفين ديسولف ويه ماريا ام شُهيب ديحچون بلغة البلد..

-ماريا: صدگ وين؟

-بغرفتي فوگ عندي كل انواع الافلام كلشي يعجبچ موجود

حچاهة بغمزة لعوبة، ركزت كل حواسي وياهم والماسك مغطي وجهي مو واضحة هويتي منو بس اريد اعرف هالحقير شنو يريد من هاي المسكينة؟!

-ماريا: افلام ابيض واسود عندك؟

-كلشي عندي انتِ بس تعالي

-ماريا: جيبهن هنا نتابع

-شلون هنا گدام الناس ميصير عيب

-مو.. مو اخاف

-ليش تخافين هو شكو

-ابني ميقبل اروح ويه احد غريب يزاعلني

-لا تگليله رحتي ويه واحد منتأخر ساعتين وننزل

-الفلم طوله ساعتين؟

-لو بيدي الفلم للصبح بس ميخالف نختصره بساعتين

-ماريا. اخاف اخاف ماريد

-انتِ اسمچ ماريا گلتيلي مو؟ تعالي وياي ماريا ومتندمين اني ما اخوف

-بس اشوف الفلم وننزل زين؟

-زين

وگف گلبي من راحت وياه كيان وين عنها شلون يعوفوها وحدها وهي بعقل ينضحك عليه بكلمتين!!

عجلت خطواتي امشي وراهم واستوقفهم صوتي..

-مسرة: خالة ماريا؟

-ماريا: مسررة هلوو

-مسرة: هلو حبي ها هاي وين رايحة؟

-ماريا: رايحة اتابع فلم ويه هذا مليت منا

-مسرة: اممم حلو تقبلون اجي وياكم؟

ابتسم النذل ابتسامة وصخة وكأنه لگه صيدتين الليلة بينما ماريا زادت سعادتها وصارت تضحك فرحانة وتجرجر بيدي تمشيني وياهة..

-ماريا: اي اي يله خلينا نروح سوه

-مسرة: يله نروح

تمشينا للمصعد والطولان يمشي ورانة دخلنا جوه وهو هم من كل عقله ديجي والضحكة شاگة وجهه المقرف، دفعته من صدره بقوة اطلعه بره المصعد ووخرت القناع من عيوني..

-مسرة: ولي عن وجهي

-الحماية: بس..

-مسرة: ماريد اشوف خلقتك يللااا

كشيته بيدي عگد حواجبه ما عاجبه ابو وجه الازرگ ما شفيت بي گلبي بس مو وكتها لازم اوصل ماريا لغرفتها قبل لا يستغلها احد ثاني..

وصلنا لغرفة ماريا وطلبت من الريسبشن مجموعة افلام ماعدهم ابيض واسود جبتلها رومانسي لان مبين شنو تحب هي ردت أي شي يلهيها، عرضتلها على الشاشة ووصيتهم يجيبولها نمنمات حتى تتونس..

-مسرة: خالة اني راح انزل للحفلة لان عندي شغل اريدچ تتابعين الفلم زين وتسولفيلي شنو يصير مو تعوفي على النص وتنزلين تره اسألچ واذا مجاوبتي اسألتي نتزاعل

-ماريا: تعالي تابعي وياي

-اذا تابعتي وحدچ هالمرة اوعدچ فد يوم اجي لبيتچ ونتابع سوه ونسهر

-اي ماشي

هزيت راسي وطلعت اعوفها وداخلي يغلي غلي لو مملحگتها چان اغتصبها هالذكر العار علساس هي ممبين عقلها بي شي يشوفها امرأة جميلة صح بس واضح عليها من تحچي مثل براءة الاطفال!

رجعت للقاعة ادور على سام شفته واگف على جهة يسولف ويه حماية واحد من الرجال اشرتله بيدي اجاني بسرعة..

-سام: أمريني

-مسرة: سامو هذاك الطولان اريدك تطيحلي حظه

-سام: هذاك العنده شامة بخده؟

-مسرة: اي

-سام: صار

راح بدون لا يسألني شسوه لان تعودنا على هالشكولات، ذبيت نفس متعب ورجعت اللبس قناعي الي بنفس لون فستاني ومزين بـ كرستالات سودة..

رصدت عيني شُهيب من بعيد ديحچي ويه ابوه، وجه عيونه على جهة طاولتنا يشوف شي ومبين ما لگه الي ديدور عليه لان صار يدور عيونه بكل القاعة الى ان ركز انظاره عليَّ وماعرف شلون عرفني بالقناع.. ابتسمت وردلي الابتسامة وتقدم عليَّ حاط ايده بجيوبه..

-شُهيب: شلونچ ماي ليدي

-شلون...

قاطعني فوراً من گال بأبتسامة جانبية..

-راح تسأليني شلون عرفتچ بالقناع

-لا طبعاً

-اها؟

-وهل يخفى القمر؟

ضحك يهز راسه بـ اي ويجاريني..

-اكيد لا

-شفت؟ اشهب صاير ميعجبني شلون تفكر هالفترة

-عذري دماغي المشوش

-اممم اتمنى يكون مشوش بيه

-عندچ شك؟

-اكيد لا

ضحك وضحكت على ضحكته نعم يا سادة هذا النقاش اسمه sarcasm وجداً دارج عندي وهذا الهامس تعود عليه وصار يجاريني بكل مرة..

-مسرة: شصار على عرض الشركة الجبته الك بيوم عيد ميلادك وقعت الاوراق؟

-لا

-شعجب

-احتاج افكر بالموضوع شوية هاي خطوة صعبة وجديدة ضروري ارتب كلشي قبل لا اوقع

-اتمنى متوقع

-هاي ليش؟

-ماعرف.. احس لا

-الشركة لا لو شي ثاني لا؟

-شوف اني ماريد اعيق نجاحك بس احس صعبة تروح انتَ بنيت حياتك هنا وتعبت وسمعت بيك حتى الجامعة درستها هنا وما رحت للمنحة الي وصلتك من جامعة امريكية وچان حلمك هذا بس تركتها علمود امك زين هسة شلون تروح وتعوفها؟ ماريا متگدر تعيش بدونك

-اعرف

-فكر زين قبل لا توقع، فكر بيها وبأخوتك فكر.. فكر بينا كلنا الفريق

هز راسه بـ "اي" وابتسم انطاني العصير الي بيده وگال بهدوء..

-اناناس

اخذته منه اضحك يعرف اكثر عصير احبه هو الاناناس، شربت منه وبقيت اللوب اريد طريقة اقنعه ميوقع الاوراق لان راح اموت..

-مسرة: شُهيب لتوقع الاوراق لتجازف

-ليش متخوفة لهدرجة؟

-لان ماريدك تخسر البنيته واني سألت اصحاب الخبرة گالو مجازفة هاي اولاً الشركة مو هنا بـ شمال افريقيا ثانياً راح تبتعد عن اهلك وثالثاً راح تضطر تبيع حصتك بالشركة الموضوع يخوف والله

-چنتي متحمسة

-بس ماگدر اتخلى عنك اريدك يمي منين اجيب هموسي غيرك

-تلگين هواي يتمنون يشتغلون وياچ مسرة

-بس اني اريدك الك

-تلگين الاحسن مني

-ماريد

-راح تردين

-ما

-هههههههه بعدني افكر مسرة لا تتوترين

-قبل لا توقع انطيني خبر حباب

-فادي: سرور وينچ بابا

قاطعنا صوت ابوية، حسيت بأيده تضغط على معصمي بقوة يعصره متأكدة سمع اخر شي گلنه خرب حظي!! ترخصنا من شُهيب ورحت وياه وين ميريد توقعته ياخذني لـ نور جواد بس شو غلس عليهم..

-فادي: سرور شصار على الاوراق؟ ابن شمسون وقعهن لو بعده؟

-بعده

-مسررة!!!

-هسة چنه نحچي عليهن ديفكر بالموضوع بس اني گتله يگولي قبل لا يوقع

-ليش عود؟!!

-حتى شسمه.. حتى انطيك خبر بابا شبيك

-خوش، تعالي اراويچ شي تعالي

وگفنا على جهة واشر لحمايته ينطو شي، جابوله ظرف ابيض صغير اخذه منهم وقدمه الي..

-فادي: فتحي

فتحته وگلبي يدگ بقوة خايفة تكون مصيبة جديدة راح توگع على راس شُهيب، قريت الورقة الي بداخل الظرف وشفتهن معلومات حساب بنكي بيها هواي لغوة عبرته كله وركزت على المبلغ المكتوب بيها..

-مسرة بصدمة: هذا شنوو؟؟؟؟؟

-فادي: جاي تشوفين المبلغ؟

-اي بابا هذا شنوو؟؟ شنو هالمبلغ الضخم!! انتَ مطلوب؟؟؟

-لا

-لعد؟؟

-هذا حساب البنك مال شُهيب شمسون

فكيت عيوني وحلگي ويه بعض ما مصدگة الدا اسمعه والدا اشوفه، اموال طااااائلة أموال مستتتحيل ولا يمممكن يكون حصلها من شغل الشركة ولو يشتغل من عمره يوووم لليوم هم ميجمع هالگد هاي منيله هاي الملايييين منين جاب كل هاي الفلوس؟؟؟

-مسرة: اوگف لحظة خليني افتهم شغلة هاي فلوسه الخاصة لو هو مطلوب؟؟

-فلوسه الخاصة

-شلون؟ منين جاب هاي الفلوس؟؟

ابتسم تك خد يراقب انبهاري، رتب سترة بدلته الرسمية ونزل نفسه لمستواية يهمس بيني وبينه..

-من اگلچ عنه رئيس عصابة مافيا متصدگين وتجين تبچيلي وتگليلي لا بابا مستحيل هموسي زين ويختلف عن اخوته وابوه

سكت ثواني واردف بنبرة حاقدة..

-مافيات ذولة بابا مافيات! شغلهم بالخفية يلبسون اقنعة ويكونون علاقات بعيدة عن عالمهم حتى يمشون شغلهم بلا ما يشك بيهم احد

-مسرة: انتَ متأكد من هذا الشي؟

-مليون بالمية هذا الظرف وصلني قبل اسبوع، تدرين شُهيب شمسون شگد يربح بكل ساعة سرور؟

-ميهمني

-بالساعة الوحدة يربح 64 الف دولار! كل ساعة تمر وهو نايم، گاعد، ياكل، يشرب، يـ****، يشتغل يزيد حسابه البنكي 64 الف دولار!!

صابتني رجفة بعامودي الفقري شلون راح ابررله هالدليل القاطع بس اجه ببالي شي ويمكن يكون صحيح وتمنيت من كل گلبي يطلع صحيح..

-يمكن هاي فلوس شمسون وحاطهم بحساب شُهيب؟

-لا بابا لا حتى اني شكيت بهذا الشي ورحت اتأكد منه لا تخافين هاي فلوس شُهيب! شُهيب فقط!!

-ماعرف شنو اگول

-هموسچ ممثل بارع وجاي يلعب عليچ سرور ما عرفتچ لهدرجة ضعيفة وغبية..

تركني بعدما قذف كلماته الصعبة بوجهي، غيمت ملامحي والقلق احتل گلبي احس بالضياع ووجع مو طبيعي بگلبي ما اعرف سببه..

رجعت لطاولتنا اگعد وبالي كله ويه كلام ابوية، رجعت لوعيي صوت صبا تتسائل وجولي تجاوب..

-صبا: شبيچ مسرة شو عبالك ضايجة؟

-جولي: يجوز بسبب شُهيب ضاجت

-صبا: شنو قصدچ؟

-جولي: شفته ويه هاي الشگرة نورسين بباب الحمامات قبل شوية وطبع حمرة على وجهه مبين باسته

فكيت عيوني على وسعها وصبا ويايه معقولة؟؟ بس ما لحگنا نتسائل لان شفناهم يطلعون سوه من نفس المكان وبيد شُهيب كلينكس ديمسح وجهه وخدوده..

-صبا بهمس: شنو هااي لا لا جديات شنو هاي انصدمت!!

-جولي: ولچ شبيچ

-صبا: سكتن صعدت عندي الحموضة

-مسرة: حتى اني

-جولي: يجوز بوسة بريئة حبي لا تظنون بي سوء

-مسرة: ماكو بوسة بريئة بين رجال غريب ومرة جولي

-جولي: يعني مادري بعد بكيفكم

عيوني تلاحقهم شمسون جر شُهيب يحچي وياه اليوم كله همه يبسبسون بين بعض والشك بده يغزي گلبي، دقايق وبده الايڤنت وبدوا يعرضون بالمجموعة الجديدة انبهرت بالمجوهرات والافكار المبتكرة للتصاميم بس انبهاري ما طفى ضوجتي..

-عمر: اطلس تحضر لرزالة ابوك

طلع موبايله من جيبه مبين شخص ديتصل عليه وگال وهو يوجهه على عمر..

-الاطلس: من هسة بدت الرزايل

-علي: خرب عرضك شمسون مو عرض ضييييم

-عمر: لو بس اعرف يا طرگاعة ينطيهم هالافكار عقلي وگف الله يشيلهم

-الاطلس: اكره اگولها بس اتفق تعبانين على كلشي

-عمر: لك عليوي شوف هذا الدمليج خرب امك فاهد

-علي: دشوف العارضة اللابسة الدمليج!

-عمر: اطلس للمرة المية اگلك خلي نجيب عارضات فرنسيات والله يحلن القطعة

-الاطلس: عود نشوف

-علي: نريد هاي العارضة خلي اشوف بلكت تقبل تتعاقد ويانه

-عمر: تدفع الها الف؟ مالك عناد بيك يدفعلها مليون!

زفر الاطلس ضايج ومتنرفز ضحكت على تعليقاتهم واكثر واحد منفعل هو عمر ما افرق بين التوأم لانهم نسخ لصق بس سمعتهم يصيحوله واستوعبت ان هو مهندس ومصمم بنفس الوقت..

-علي: اگص ايدي اذا هالمجموعة بقت عندهم اسبوع هسة تروح لگف

-الاطلس: باع هذا البطران اشتروها منهم قبل العرض اصلاً

-عمر: يله ما راح اغار احنه هم اشتروا مجموعتنا قبل لا تنعرض بهاي احنه متساوين

-علي: اطلس اني استقيل

-عمر: ولك لااا شيگضي الشغل بدونك

-علي: اريد اشتغل وياهم

-الاطلس: شگد لحيتوا!

ضحك عمر وغمز لـ علي ونشوان يجاكرون بالاطلس..

-عمر: عيني مالك ذوووق هي گوة

-نشوان: والله صح انتَ شايف المجوهرات اليلبسهم يشگن الحلگ

-علي: مرتب وذوق وراقي ورزن و...

-الاطلس: وراح تنطردون بالنعل منا!!

حچاهة وضرب على الميز بخفة بعصبية، ضحكوا الولد وهو زفر نفس مغمض عيونه يداري عصبيته وواضح چفص وما راد يحچي هيچي گدامنا احنه البنات..

-علي: سدوا الموضوع شباب الاطلس ما يتحمل يسمع شي يخص مالك

-الاطلس: علي اليوم اريدك بالليل بسالفة

-علي: دخيلچ يا ام البنين شتريد مني ولك

-عمر: اطلس اني ما مرتاح اي بعلي ما مرتاح عوف اخوي بحاله

-الاطلس: اني اعلمكم انتو الزوج

-نشوان: شباب اليوم نطلع نسهر ما تونست بهاي الحفلة

-علي: بشرفك تاخذنا لمكان بي خير لان تعرف ما اروح لذنيچ بعد

-نشوان: شگد شريف عمت عيني

-عمر: ولك مو گتلك الشسمها ما ترضى

-نشوان: اي اي فهمت

-علي: چا شكو تستهزأ ابن الحلوو

خلص العرض وصفگنالهم وهوسنالهم وباركنالهم وكافي طلابة خلي نرجع لبيوتنا راح تطلع ارواحنا!!

-صبا: ماريد ارجع لاا حرامات

-مسرة: تردين تباتين هنا حضرتچ؟

-جولي: هاي الاخت معصبة هنا مادري شبيها المهم گالو اكو فقرة رقص سلو بعد خنشوف منو راح يطلب يرگص ويايه...

بعدها ممكملة الجملة واجه واحد يطلب تراقصه، ابتسمت تحط ايدها على فمها عود خجلانة، لبسنا الأقنعة من جديد واجه واحد يطلب مني اراقصه ورفضت بأحترام.. اندار على صبا يطلب منها ودخل مروان على الخط يگول بأستعجال..

-مروان: ترگصين وياي صبا؟؟

شهگت كيان بصوت وحطت ايدها على صدرها تگول مصدومة..

-كيان: مروان انتَ ترگص سلو ويه بنية!!

-مروان: اشششش

-صبا: شكراً على الطلب مروان بس لا اعذرني ما ارگص ويه أي واحد

-مروان: تردي مواصفات خاصة حضرتچ؟؟؟!!

-صبا: شبيك بسرعة عصبت يوووه ضوجتني

-مروان: بس فهميني شلونه التقبلين ترگصين وياه عنده ثلاث عيون لو خشمين؟!!

-كيان: حتى اني صار عندي فضول اعرف

-صبا: اكيد ميكون عنده خشمين ولا ثلاث عيون بس اني ومسرة عدنا قانون منرگص سلو الا ويه ختشيبنا او زوجنا غيره لا والف لا لو يجيني امير الامراء

-مسرة: صحيح

-مروان: اخ ريحتيني

-كيان: حلو حبيت الفكرة راح اطبقها ولو محد طلب يرگص ويايه غير نشوان عفونة بس هم ميخالف

-صبا: والله اووي يجي ياهو الچان اتمايل وياه ويلزم خصري ايععع تلعب نفسي

ما غابت عني ابتسامة مروان الي غيرت كل ملامحه العصبية وصار شكله يجنن خفاها جوه ايده وبقى يتأمل صبا المتدري بشي وحايرة تسولف ويه كيان..

-كيان: وجولي ماعدها هالقانون؟

-مسرة: لا لان جولي مختلفة عنا بكلشي شخصياتنا متناقضة وافكارنا هم بس رغم هذا احنه صديقات مقربات

گامو نشوان ومروان ويه التوأم يرحون على جهة مادري شيسوون بس شفت ولا واحد منهم رگص ويه بنية اللتهو ببعض، گام الاطلس يجاوب اتصال اجاله فززه من مكانه وراح بخطوات سريعة يطلع بره القاعة واحنه بقينا نتفرج على اليرگصون..

رصدت عيني مالك واگف ومقابيله بنية شابة اتذكرها تصير بنت عم شُهيب الي عيونها خضر مدا يرگصون واضح مندمجين بحديث شيّق بسبب حركات البنية، دورت بالمكان وشفت شمسون يراقص وحدة من العارضات وضحكاته الحقيرة واصلات الي، واخيراً شفت شُهيب..

واگف على جهة وفجأة ابوه سحبه من ايده وجر البنية نورسين من ايدها ودفعهم على بعض تلاحمت اجسادهم، ضحكت نورسين بدلع وحاوطته من رقبته ليقابلها بأبتسامة مجاملة ويحاوط خصرها.. حسيت بأحساس غريب واني اشوفهم احساس مو حلو ماعرف افسره..

-كيان: روح فاهد

انتبهت لـ فاهد جاي لطاولتنا على جهة كيان وماد ايده هاي شنو يريد يرگص وياهة؟؟!

-فاهد: يله كوري احنه شنو اتفقنا؟

-كيان: ولك اخواني لا يشوفونا والله يموتوني

-گومي گومي

-ما اجي روح

نزل نفسه عليها يهمس شي بأذنها وجر خصلة من شعرها الوره يلفه على اصبعه شوفتهم بهالحال صدمتني! فاهد وكيان؟؟؟

-كيان: گله مريضة

-فاهد: خوش بس اني معليه بعد

-هاي شبيك رگعلي يبووو عليك

-شلعتي گلبيي بكل سالفة لازم ابقى اتوسل!

-روح روح بعدين نحچي

-اني ميخصني العليَّ سويته اروح اگله هي ما قبلت

-تعال شبييك

جرته من ايده واشرتله يتقرب منها، يحچون وجه بوجه وقريبين جداً جداً جداً على بعض، فاهد مركز بيها لدرجة عيونه طبعت بوجهها وهي تسولفله بشي مادري شنو..

عيون كيان منا ومنا تخاف لا واحد من اخوانها يلگفهم، شوية ووخر منها فاهد طلع جگارة يشعلها وشمر الدخان بوجه كيان يضحك وراح..

كيان متوترة تفرك بيدها وعيونها ما ثبتت حسيت بيها شگد خايفة لا تنلگف اوكي هذا شي غريب ان فاهد وكيان بيناتهم شي..

اخيراً خلصت الرقصة والكل رجع بمكانه ورجع للحفلة، صارت فقرات اخرى حلوة وره الرقص تأخر الوقت والحفل للان قائم، بعض الناس طلعو والبعض الاخر بقى يحضر الحفل الثاني الصاخب.. هنه حفل وره حفل، اول شي حفلة الايڤنت وبعدها حفلة نجاح الايڤنت ويكون حفل صاخب وكله سوالف فاسقة ما احضره بالعادة..

صاحني ابوية اروح وياه اتعرف على ناس جدد اخذت صبا ويايه ورحت بدون لا اتحلطم، وگفت حول طاولة واسعة واگفين حولها شمسون وولده ثلاثتهم واربع شباب على جهة واضح ينتمون الهم يشبهون فاهد يجوز اقاربهم وبعد رجال وسيدات اعمال والكل ديسولف ومنسجم ويضحك..

-شمسون: عفواً.. عفواً.. ممكن هدوء...

حچاهة بصوت عالي ادى لانتباه جميع الي حول الطاولة، ابتسم من لاحظ الكل وياه جلى حنجرته وگال بنبرة قوية مصحوبة بأبتسامة داخلية..

-شمسون: يمكن الوقت مو مناسب ولا المكان مناسب اطلب بيها هذا الطلب لكن ماردت اضيع هذي الفرصة الذهبية هههااههااههااا

ضحك الكل عدى ولده الثلاثة، شرب كمعة من كاسته وگال بحماس..

-شمسون: اني يسعدني ويزيدني شرف وسمو اطلب ايد الجميلة مسرة قيثارة لـ نمري شُهيب شمسون!

صدمة!! لا بل صاعقة واحسها وگعت على راسي وراس شُهيب الي ظل يغص بعصيره وظل يگح لدرجة مالك صار يضرب على ظهره وواحد من الرجال الواگفين بجانبه يگول بضحك..

-يمعود ما گلك اخطبلك جنية گال جميلة هههههههه على كيفك

ظل يگح ويضرب على صدره وشمسون يضحك ويگلهم هاي من الحب ما مصدگ..

حسيت نفسي صغيرة وتافهة من ردة فعله الحمرة اكتسحت وجهي تمنيت لابسة القناع واغطي بي فشلتي والي زاد وضعي سوء من شمسون گال..

-شمسون: ها فادي قيثارة بس لا ترفضون؟ شوف من هسة اگلك ترفض شُهيب يموت مو بس يغص هههاااهههاااههااا

-فادي: هههههههه نتشرف شمسون نتشرف

-شمسون: يعني هاي نعتبرها موافقة؟

-فتدي: بنيتك هي اكيد موافقين وين نلگه احسن من شُهيب

نااااار وگبت بيه تمنيت اللزم واحد واحد هنا واكفخه لحدما ارتاح! گلبي راح يوگف من الضحكات الي صارت ومباركات الجميع النا شُهيب يقابلهم بأبتسامة رسمية مجاملة بحتتتة واني اقابلهم بالصمت..

ما تحملت اوگف خمس دقايق هنا وترخصت اطلع من القاعة من الباب الخلفي وصبا و سام ورايه ركضت تنضم النا جولي متدري شكو وتتسائل..

-صبا: ولچ شمسون خطب مسرة لـ شُهيب ولو تشوفين شلون غص گدام الكل ولچ متت من القههرر

-جولي: ليش غص غير هو الي يكون طالبها؟؟؟

-صبا: مادري ماادري

دخلنا الغرفة وهنه مستمرات بالتحقيق والاستكشاف، يسألن ويجاوبن نفسهن واني ما اسولف على حالي وصدمتي والي زاد الوضع لوصة وقررف هو اشعار اجاني على موبايلي..

من رقم غريب دازلي فيديو انتظرته يحمل وقريت المكتوب جواه بالعربي..

"الجو قبل الخطوبة چان ناااار 🔥🔥"

فتحت الفيديو وانكتم صوتي من شفته شُهيب ويه وحدة ما مبينه ملامحها بس مبينة شگرة، ساندها على حايط وديبوسها ومو بوسه عادية لااا بوسة حميمية بحتة!!

حطيت ايدي على گلبي اداري دگاته احس سكري علگ المكان الموجودين بي بالفيديو بنفس الفندق هذا بس بالباب الخلفي ميزته لان هستوني طلعت منه!

شمرت تلفوني على الحايط تهشم تخبلت هذا شنووو يلعب عليَّ؟؟؟ يبوووس وحدة وانوب يجي يخطبني؟؟؟ طلعت من الغرفة تاركة الفروة بالغرفة ممهتمة لشي لازم اوصل لأبوية وابلغه انكشفت خطتنا وصار اللعب من طرفهم رحتي بين الرجلين يا مسرة!!

رجعت للقاعة واشرت لحماية ابوية يبلغوه اني انتظره بره، دقايق واجاني سحبته من ايده نروح لغرفته دخلني متفاجئ من تصرفاتي فتحلي باب الغرفة وفوراً صحت بي محترگ دمي..

-بااابااا شنو صاااار جوه؟؟؟

-انخطبتي سرور

-انتَ.. انتَ شللللون توافق بهالسرررعة؟؟؟ من شوووكت توافق بدون لا تسألني؟!!!!

-ما راح يتغير شي اذا سألتج بنياتي

-لعد ونور جواد؟؟؟ مو خبصتني حتى اوافق عليه شنو الي غير رأيك هسة؟؟؟

-ها تردين نور جواد انتِ؟

-اني مااااريد احد بس جاوب اسألتي بابا حبااب

-نور جواد انتهت سالفته لا تفتحيها بعد رفضتهم وخلص وهسة انخطبتي لـ شُهيب

-لا بابا لا تتشاقه ويايه صح؟؟

-لا بابا ليش هاي فوگما شُهيب طلع يحبچ وخطبچ؟

-شيحب مني وهو يريد يكتلني!!

-هسة يمكن صارت سهواً بابا سرور لا تخلين هيچ عوائق بطريقكم يا بنتي

-بابا انطيك الاوسكار على برودك

-حبيبتي لا تصعبيها الرجال ما ينعاب جميل ووسيم و...

-وغنيي وحلوو وطوويل وشاغوول ومرتب ومؤدب ويصلي ويصووم

-يصلي ويصوم؟

زفرت نفس افرك بيدي اريد أي شي يهدأني، رجع كرر سؤاله عليَّ وجاوبته بهدوء..

-اي مرة شفته يصلي

-شوفي بابا شلون رجال بلكت يهديچ للطريق الصح

-للطريق الصح وهو رئيس عصابة مافيااا؟؟

-حبيبتي هاي الامور بسيطة وتنحل، اني سعيد هذا الزوج الصالح الدعيت ربي يرزقچ بي بنياتي

-شوف سبحان الله بس مسرة زوجها الصالح مافيا ابن مافيا شوف شلون شي يونس فدووة

-صحيح يونس بابا الحياة المحترمة دائماً ملل واحد هم يحب ينفه عن نفسه

-باابا حبااب كافي تستهزأ واحچي ويايه بعقلانية

-تمام

-شمسون متفق وياك قبل لا يخطبني لابنه صح؟؟

-صح

-يعني شُهيب يعرف ابوه يريد يخطبني؟

-نعم الواضح هيچ

-لعد ليش غص گدام الناس هيچ وفشلني؟؟

-يجوز ماتوقع گدام الناس تتم الخطوبة

-بابا كللل الصار مو من ضمن الخطة!! انتَ جاي تلعب بكيفك!!

-الخطة چانت تتزوجين واحد من ولده مو الا مالك ثانياً مالك خطب

-ميهمني مالك بقدر ميهمني موافقتك على شُهيب شمسون!! بابا ليش تتلاعب بيَّ بهالطريقة ليييش كل مرة تصغرني هالشكل بله شيگول الرجال عليَّ چنت ناوي اكتلها وهسة خطبتها ووافقت بسرعة!!

-مسرة اهدأي بابا وجري نفس لا تعصبين

-شلون متريدني اعصب شلوون وانتَ مخرب حياتيي؟؟

-ما مخرب حياتچ احنه اتفقنا!! اتفقنااا ناخذ ثار امچ من شمسون وولده سوووه لو نسيتي امچ مسرررة!؟؟

-ما نسيتتت بس هسة اني هم ام!! اني مسؤولة عن حياااة طفلة ماريدها تعيشش معاناتيي وتشهد موتتي البطيييء جوه ايدين شمسوون وولده مرة ثاانية!!

-ما راح يصير بيچ شي صدگيني! راح تاخذين حق امچ وحقنا ترجعيي من عيونهم راح تكملين هاي الخطبة وتتزوجين واذا اضطر الوضع تخلفييين منه هم وتكملين البدينا بيي!!

-ليش ما اكمل البدينا بي واني بمكاني اذا تريدني اتزوج من واحد غني خليني اقبل بخطوبة نور جواد!! هو هم ابن واحد طااگ وعلى الاقل هو متفهم ولطيف ويحبنيي ويخاف عليَّ ومتقبل وضعي الكاامل على الاقل هو نظيييف ومو مجرم!!

-زواجچ من نور جواد غلط راح تبتعدين عن ثارنا وتنسي من تستقرين وتبنين اسرة جديدة

-ما اهمله وعد ما اهمله اكمل البدينا بي بس مااا اريد شُهيب لو اخرر واحد بالدنياا هم ما اقبل بي!!

-راح تقبلين ويلا روحي نامي وارتاحي باچر وراچ يوم طويل

دفعني من اكتافي يطلعني من الغرفة باسني من خدي وراسي وطبگ الباب يعوفني واگفة بره، رجلي خانتني تعبت وگلبي عاصرني عصر، تمشيت للدرج وگعدت على پاية افكر بهاي الكارثة..

مر وقت طويل اني على هالوضع ما اجه احد وقاطع تفكيري بسبب وجود مصعد محد يجي للدرج، اخيراً رتبت افكاري وقررت اروح لـ شُهيب اخلي هو يحل الموضوع ويسحب خطبته مني..

رجعت للمصعد ودست طابقهم، اتذكر مفتاح غرفته رقمه 82 رحت بسرعة ادگ الباب.. مرت فترة واني ادگ بالباب محد طلع توقعته ما موجود وردت اروح لولا الباب تنفتح..

شفته الاطلس عيونه بيها النوم وشعره مهووس الله يعلم ساعة بيش هسة واني هجمت على غرفة الرجال..

-مسرة: صاحبك هنا؟

-الاطلس: لا

-وين اللگاه تعرف؟

-لا

-شكراً واسفة لان گعدتك اعذرني

-مو مشكلة

-ساعة بيش؟

مد نفسه يشوف الساعة المعلگة على الحايط مسح عيونه وجاوبني بنعاس..

-3:18 الفجر

-اففف! ماشي اخذ راحتك

حرك راسه بمعنى اوكي او اهلاً وسهلاً وسد الباب نزلت اجر بذيال الخيبة وگعدت بالرسبشن انتظره، الفندق فرغ محد اكو غيري وغير مدير الرسبشن وملتهي بتلفونه، ما انتظرت هواي وشفته يدخل من باب الفندق شعره الناعم مهووس وصاير لونه اطوخ عبالك منگع ولابس نفس لبس الحفلة وقابض ايده بقوة وضامها بالقبوط..

تبعته بنظراتي لحدما دخل المصعد مشيت وراه وفتحت المصعد ادخل بي، ما رفع عيونه ولا انتبه هاي اني حاير بنفسه ووضعه الغريب..

شفت قطرة دم تنزل من جسمه للگاع ركزت بي ولاحظت قطرات اكثر بدت تنزل نزولاً من قبوطه الاسود.. يا ربي هذا وين چان وشنو چان يسوي!

-وين چنت؟

اللتفتت بسرعة على صوتي وبنفس الوقت انفتح المصعد، ذب نفس متعب من شافها اني ووخر شعره عن عيونه بأيد وباقي ضام الايد الثانية جوه القبوط..

-شُهيب: ليش گاعدة؟

-لتجاوب سؤالي بسؤال

-چنت طالع

-ادري بس وين؟

-هالشي ميخصچ

-مدمي من فوگ ليجوه وشعرك مخصل بالدم اتوقع يخصني هالشي

-مسرة روحي نامي

اشرلي بأيده حتى اطلع من المصعد ما قبلت وجريته من قبوطه بس اريد اتأكد من شي وشفت الشي الچنت متمنية اطلع غلطانة بي.. قميصه الابيض ناگع دم وكأن چان بمجزرة..

-مسرة: وكالعادة ما راح تگول المن كتلت هالمرة

-صحيح

نطقها ببرود وداس على المصعد للطابق مالتهم، وگفت المصعد مرة ثانية نفخ هوا متنرفز كلش كلشي بي متغير ملامحه، صوته، ريحته، اسلوبه واخلاقه كلشي غير..

-مسرة: فهمني انتَ شبيك؟

-مابيه شي روحي لغرفتچ گلت!

-شنو صار بالحفلة؟! ليش خطبتني لييش ما فاتحت ويايه الموضوع اذا ببالك هيچ خطوة؟

-مو ببااااااالي

صرخها بصوت صدى بالمكان عيونه ناطة ويرجف عصبية، قميصه مدمى ومضموم بالقبوط وشعره مخصل بالدم، ايده القابضها جوه القبوط واضح مضروبة وضامها عن العيون..

-لعد ليش ابوووك خطبني الك؟؟؟؟

-مادري

-بهالبرود تحچيهااا؟؟ خطبتوني گدام الكلللل غصييييت غصة اختنگت بعصيرك عبالك گلولللك راح نزوجك شيطاااانة مو بنيييية تالي تقابلني بهذا البرود؟؟؟

-اني اسف على ردة فعلي

-ميهمني اسفك لان صدمتي نفس صدمتك اني مارريدك شُهيب شمسون وراح تلغي هالخطوبة الفاشلة قبل لا تكبر وتصير صدگ!!

-ماگدر

-ميهمنييي اللگه حللل مااااريدك

-مسرة روحي ماريد ادوس بالحچي وازعلچ

-ليش هسة دتشوفني فرحانة؟؟

-رووووحي كااافي

ينتر بين سنونه نتر وفاتح عيونه شكله مرعب، فتحت عيوني نفسه ونترت بي..

-فهمني واشرحلي كلشيي اني ما راح اطلع منا الا تفسرلي الصار

-اني معصب ماررريد ااذيچ روووحيي

-أذينيي احچي أذذيينيي

-راااح احرگچ وازعلچ منيي لا تخلين الموضوع يوصل لهاي المواصييل

-اني اريدها توصل! گول كل العندك ما راح ارجع الا افتهم سالفتك شنو حتى لو كلامك يأذيني گوله

-ماا اذذيچ بالكلام اذذيچ بالأفعال روووحي!!

-شنوو تضربني مثلاً؟؟ هههههه والله ضحكتني انتَ......

ما لحگت اكمل جملتي وحسيت بأيدين قوية تسفطني على المصعد ويرفع ايدي فوگ وقبلة تسد حلگي.........

يتبع....

━━━━━━  ━━━━━━

اءءءءء 😶‍🌫️

منو يكره نورسين يرفع ايدددده 💋