رواية ابناء الحسوم "شمسون" الفصل العشرون 20 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

قالت: أتهوى؟
قلتُ: نعم أهوى
ابتسمت وقالت: من؟
قلتُ: من أبتسم... ✨

━━━━━━  ━━━━━━

اللم فضيع صار بـ لساني احسه انبتر، طعم الدم اختلط بـ لعابي ولعابه، حسيت بطعم مقرف راح اتقيء، دفعته عني بقوة ما گدرت ثگيل دفعته من جديد بقوة اكبر وقبل لا يستوعب وترجع عيونه تنفتح انطيته راشدي فر وجهه لسه ما استوعب الراشدي الاول وانطيته راشدي ثاني على خده الاخر وگلبي مقبطط بالحقد.. ثانية وانطيته الثالث مديت ايدي انطي الرابع ولزم ايدي يقيدني..

-شُهيب: كافي

نترت ايدي منه روحي لعبانة بلعت دم لساني واحس راح اتقيء، نزلت اگنبص اگعد اريد اضيع الطعم بدون لا اتقيء وهو نزل ويايه يحط ايده بصف حلگي خاف اذب من راسي..

دفرت ايده ودفرته كله عني، گمت على حيلي ورجع يسيطر على جسمي حتى ما اضربه..

-هددددني كلللللب

-مسرة اهدددي

فلتت نفسي منه ورجعت اضرب بصدره وبوجهه بحقد بغضب بروح شايطة اريد املخه واطلع عيونه، يحارب ايدي حتى ما اللوح وجهه بس حركتي اسرع منه ميسيطر، فگست عينه بأظفري طببته جوه اقلع بؤبؤ عينه صاح متألم يحط ايده على وجهه ووگف على جهة فاقد توازنه..

-سرسررري ساااقط

تفلت الدم الي بحلگي بالگاع ورحت اركض من الدرج اصعد لغرفتي، ثواني وسمعت صوت خطوات ورايه ويصيح بأسمي حتى اوگف، نزعت كعبي اذبه وركضت اسرع ما عولت شوكت اوصل للغرفة دخلت وقفلت الباب عليَّ اهرول للحمام..

وخرت شعري عن وجهي وبعد ماگدرت اسيطر على نفسي تقيأت كلشي اكلته بالحفلة طعم زفورة الدم ملى حلگي من وراه النذل عض لساني عضة موت يريد ينتقم الحقير الخسيس..

ارتاحيت اجر نفس گعدت على البانيو واتذكر الصار ولا تخيلته راح يتصرف هيچ توقعت يفقد اعصابه يضربني وارجعله الضربة، يرگعني بالحايط وارجعها اله يرزلني وارزله ما توقعته يبوسني ويعض لساني عضة احسه انشلع!!

تلمست لساني بألم وگمت اشوفه بالمراية صاير احمر دم، غسلت حلگي مرة ثانية وطلعت للغرفة البنات نايمات ثلاثتهن، بدلت ملابسي بدون صوت ونمت بشعري ومكياجي غفت عيني ثانية وفزيت على صوت اشعار اجاني على موبايلي، رفعت التلفون اشوفه من نفس الرقم الغريب الدزلي فيديو شُهيب وهو يبوس بالشگرة، كاتب..

"اتقِ شر الحليم اذا غضب"

ثواني وكتب..

"يلعب على الحبلين ابن الحَسوم"

اخذت سكرين للرقم ودزيته لـ سام يشوفلي تابع المن وحضرته مالي نفس لسوالف الجهال، شمرت جهازي ورجع اجاني اشعار جديد توقعته نفس الشخص من رقم ثاني بس طلع هالمرة شُهيب، كاتب..

"اني اسف على الصار، راح احاول احل موضوع الخطبة"

حضرته هم وذبيت جهازي وما نمت للصبح افكر عقلي هلك، من الصباحيات گعدن جولي وصبا يتأنقن علمود الريوگ وكيان وحدها تلطم على مادري شنو وطلعت من الغرفة متقبل تجاوب احد من يسألها شبيچ..

-جولي: راح تبقين بفراشچچ سرور؟

-صبا: عوفيها تدلل العروس الجديدة

-جولي: ليش نايمة بمكياجچ وشعرچ؟

-مسرة: مچان الي خلگ امسحه تعبانة

-صبا: واضح الهالات واصلة لركبچ ثانياً شبيها شفايفچ وارمة؟

-مسرة: اسولفلچن بس بلا رعونية؟

ما لحگن يسمعني ثنينهن فتحهن عيونهن وعاطن بنفس الوقت وبنفس الحماس..

-شُهيب السبب؟؟؟؟

ضربت وجهي بأيدي تردون صبا وجولي ينجمعن بمكان واحد وماكو رعونية وافكار فاسقة؟ لاااا مستحيل خليني اطلب مليون دولار احسن..

-جولي: ما اصدگ ماا اصدددگ ولچ هذا ما طلع همووسي هذا حموسييي

-صبا: يعيييش هموسي الهامس يعيييش

-مسرة: كملتن؟

-صبا: لا طبعاً!! نريد نعرف كلشيي ادق التفاصيل تحچيلنا ولچ والله شكيت اكو شي من رجعتي بالليل وطبيتي للحماااام

-جولي: اني سمعتچ تتقيأين عزززاااا

-مسرة: وين وين وين راح بالچن ايععع شنو هالتفكير السزز

-جولي: مسرة اني شاكة بيج مو طبيعية ولا هو طبيعي سولفيلنا شصاير بيناتكم؟

-مسرة: ما صار بس البارحة ظليت اتعارك وياه وهو يگلي روحي عني اأذيچ واني انچلبت صياح ودردمه ورزايل وهو يعيد روحي لا اوجعچ انوب اني شفته يتأمر عليَّ تسودنت ظليت استهزأ بي واضحك وما اشوفه غير هجم عليَّ وسواهة وعض لساني ما اسولفلچن على الدم الطلع بوري وانفتح من حلگي الحقير اخذ حقه هيچ

-جولي: اوووف عنيف

-صبا: بلا هيلگه جولي تأدبي، كملي سرور شصار وراهة؟؟

-ما صار

-صبا: نسأل السؤال المعتاد ما انطيتي راشدي وراهة؟؟؟

-مسرة: راشديااات شبعته كفخات شفيت گلبي

-جولي: ههههههههههههههههه لچ خطية ليش تزعلي

-مسرة: لساني لسه يوجعني وشفايفي زرگ مو بوسة الحيوان افتراس

-جولي: سؤال وجاوبيني بصراحة، انتو ماكو بيناتكم علاقة؟

-مسرة: لچ لااا والله لا

-جولي: ولا حب من طرف واحد منكم؟

-مسرة: هم لا، ما انكر اني معجبة بشخصيته وحنيته ولطافته ويايه بس مو مال احبه يعني يعجبني يكون صديق لا اكثر

-صبا: اويلي يالحنية وهو شاگ حلگچ ههههههههههههه

-مسرة: شگد چلبة

-جولي: ههههه تره صدگ كلامها، المهم انخطبتوا وخلص عود يجي الحب بعدين

-مسرة: ولا يجي ماريده لو يموت ما اقبل بي

-صبا: عود نشوف دگومي گومي نتريگ ومن تشوفي ما اوصيچ هم مدي لسانچ عليه مترتين

-مسرة: ولا امده اصلاً ما احچي وياه

-جولي: عفية، حطي خافي عيوب على شفايفچ هم لا تفضحينا

گمت بوجهي للحمام سبحت وفرشت اسناني، تمكيجت، بدلت وطلعت وياهن ننزل نتريگ، صرت وجه بوجه وياه لابس مناظر شمسية عبرته بدون لا اصبح عليه وبداخلي نشوة سعادة ضام عينه المفگوسة اكيد..

توزعنا حول طاولة اني والبنات والريوگ چان عبارة عن تساؤلات تخص شُهيب..

-صبا: ليش لابس نظرات شمسية؟

-مسرة: لان البارحة فگست عينه

-جولي: وااااااااااو

-صبا: شگد عنيفة انتِ مسرة مو گتلچ خففي من هالعنف شوية

-مسرة: يستاهل قلعت بؤبؤ عينه قلع بأظفري وما ارتاح گلبي

-جولي: صبا انطيني المربى، سرور اني اشوفه يخبل وميستاهل

-مسرة: تره خطبني گدام الكل وما كلف على نفسه يحچي ويايه بالموضوع وانوب قبلي چان ويه وحدة ودزولي فيديو وهمه بوضع يخزي شتردوني اسوي؟ اكيّف واسجد شكر لله لانه تكرم عليَّ وباسني شنو چنت ميتة على بوسته ام العضة؟؟

-صبا: اني ويه مسرة بكلشي تسوي جولي انتِ انچبي واكلي

-جولي: راح انچب واگوم لان ماقبل على شُهيب احبه مو بيدي

-مسرة: حبتچ حييية ام سبع روس وضرووس شلحگتي تحبي ولچ!!

-جولي: كلش هوت احب هيچ زلم

-مسرة: روحيله ديلا يلا روحيله خلي يعضعض بيچ

-جولي: ههههههه رايحة

راحت تاركتنا لحظات واجاني اشعار على موبايلي رفعته اشوفه چان رسالة من نشوان كاتبلي..

"حذائچ بقى عندي البارحة"

"حذائي؟"

رفعت راسي اشوف نشوان شبي وين لگه حذائي؟ باوعتله لگيته يسولف ويه التوأم ومروان وفاضل هم جاي ومندمجين اااخ منك شُهيب!

"مسرة: ليش موبايل نشوان يمك؟!"

"حرام؟"

"رجعله التلفون لا احضره هو هم"

"شبيچ شايله سيف على العالم"

"ماريد احچي وياك هي گوة"

"لا تحچين كتبتلچ حذائچ بقى يمي تعالي اخذي"

"ماريده عوفه الك لبسه يمكن يفيدك"

"!!!!!!!!"

ضحكت على ردة فعله رفعت راسي اشوفه نزع النظارة من عيونه مو كلش متأثرة او يمكن اني ماشوف من بعيد، عفست وجهي احس عيب اكتبله هيچ اووووف والله لو غير شُهيب اسحله سحل بالرزايل بس عذروني شخصيته متسمح لاحد يهينه يجبرك تحترمه شلون مادري وبدال ما عبالكم فشلتوه تحسون انتو تفشلتو وتردون بس ترگعون السالفة وهالموضوع زاعجني لان احترمه زيادة عن اللزوم هسة فد نمونة هو واحسبله حساب؟؟

"شبيك اقصد لـ ماريا لو لـ كيان يفيدهم الحذاء حلو"

اي اي سكتو كـ الكلب كتبتها ارگع الكتبته قبل شوية حبابين سماح بس هالمرة والله لو تعرفوا وتشوفون شخصيته محد يلومني يا اخي الرجال محترم هي گوة..

"ميحتاجون احذية"

"اوكي"

سكت شوية وطلعلي "يكتب..." انتظرت اشوف شنو راح يدز بس شو طول شنو ديكتبلي جريدة؟ رفعت عيوني اشوفه لگيت الموبايل بيده ومبتسم ويه جولي الي اجت تحچي وياه يا حقيرة يا جولي!!

سديت الموبايل احطه على الطاولة ورجعت آكل عيوني عليهم هو ميحچي بس مبتسم ويهز براسه وجولي انفتحت وراح تسردله تاريخ العشيرة، انتبهت لروحي مركزة بيهم زيادة عن اللزوم وخرت عيوني بسرعة واللتهيت بأكلي..

اخذت علبة الشكر احطلي بالچاي واجاني اشعار جديد على تلفوني، فتحته شفته كاتب..

"عوفي الشكر"

ابتسمت بداخلي وتجاهلت الرسالة حطيت الچيلة الاولى بالچاي ورجع دزلي..

"چيلة كافية"

ما اهتميت رفعت عيوني اشوف جولي لسه تحچي وياه وهو عين وياهة وعين عليَّ وعين بالموبايل يكتب، ضحكت على منظرة وتركيزه وسويت روحي دا اضحك ويه صبا الدتاكل.. اجيت وحطيت الچيلة الثانية وهم كتبلي..

"مسرة كافي!"

رفعت حاجبي وباوعتله عناد وحطيت الثالثة، بلم وجهه ووصلني اشعار جديد..

"تردين تموتين روحچ لو شنو؟!"

حطيت الچيلة الرابعة وبداخلي ارگص چوبي عذروو خفيفتكم بس ما اتحممل من واحد يهتم بيه فاقدة حنية سودة عليَّ والحنون عليَّ لو بيدي اروح اعضه وابوسه لحدما اخلصه بس طبعاً ما راح ابوس هذا ابو عضة ميستاهل..

"يمعودة راح اللغي الخطوبة والله متسوه تكتلين نفسچ!"

حطيت الچيلة الخامسة واشوف عيونه راح تطلع من وجهه خطت الچاي ورفعته اشرب منه بس ضگت من نتفه حتى ما اأذي نفسي لعبت نفسي من الحلا بس اكيد ما بينت هالشي وسويت روحي مستمتعة..

غمضت عيوني وعضيت على شفتي السفلية امثل اني مستمتعة بهالچاي اليگطع حلاوة ورحت لغير عالم.. فتحت عيوني اشوفه مبتسم ابتسامة جانبية ورافعلي حاجبه شكو هذا شبي؟!

-صبا: خلصتي من تصوير فلم الاغراءات مالتچ؟

-مسرة: شنو

-صبا: افتهمنا انخطبتو شبيكم تهيلگتو تعضيله بشفتچ وهو متسرسح عليچ ثگلو اولادي ثگلو عيب منا العالم

-مسرة: ولچ لااا شنو هاي فهمتي غلط انتِ

-صبا: اتوقع واضح انتِ دتغري مسرة عيب تستخفين عليه بعدكم ما عقدتوا صيري ادمية وانچبي

ما جاوبتها لان اجتني رسالة جديدة منه..

"تستاهلين الرزالة بس صبا دواچ"

"مسرة: انتَ متستحي!"

"اني؟"

"اييي"

"ليش يابة؟"

"ميخصك خوش!!"

"شلون ميخصني وانتِ تهمتيني اني ماستحي؟"

حسيت بديت اچفص ذبيت التلفون وخزرته، ضحك يمسح على شعره يرجعه ليوره كشولت بوجهه وهو يزيد بالضحك.. اجه صديقه ابو عيون حط ايده على كتفه يسولف وياه ويضحكون سوه ذولة ديضحكون عليَّ؟!

"لا تشربين هذا الچاي انتِ ما تحبي راح اجيبلچ چاي اخضر لغرفتچ"

طلعتني من عصبيتي هالرسالة فرحتني بس ما بينت، بوزت وكتبت..

"ماريد منك شي ابو عضة!"

رجعت التلفون بجيبي حتى بعد ما اشوف رسائله وگمت ارجع للغرفة بدون البنات، دقايق واندگت باب غرفتي فتحتها شفتها الـ room service بيدها صينية صغيرة وبوسطها كوب وكم بسكتة بالشوفان، ابتسمت وگالت بلغة البلد..

-مدموزيل وين تحبين احط الصينية؟

-تگدرين تفوتيها جوه شكراً الچ

دخلت تحطها على الميز ردت اسألها منين هذا وشفت كارت موجود وياهن، تشكرت منها وطلعت هي من الغرفة.. سحبت الكارت الصغير شفت مكتوب..

"شامتكِ التي فوق فمكِ، هل تحفظ الاسرار؟..
صحتچ مهمة بالنسبة الي، استمتعي بالچاي المُر مسرات"

اءءءء.. تمام تغلب عليَّ هالشيطان گمت اطفر والله وارافس واطلگ واصيح يعرف شلوون يتعامل ويه النسوان ابو عضة!! بس لا ميصير انسى هو ديلعب عليَّ وعلى هاي الشگرة سرور لتتهيلگين..

گعدت اشرب الچاي الاخضر متستمتعة الابتسامة غصب تنرسم على وجهي من اعيد قراءة الرسالة ضميتها بجنطتي ورجعت للواقع....

**

-جنات: شبيچ تزاگطين مثل المطي

-كيان: ولچ اخاف انفضح الله ياخذك فاهد عساك ما تهنيت

-جنات: تنفضحين من شنو؟

-كيان: باعي رگبتي خوما مبين شي؟ باعيلي زين حبابة فحصيني

-ولچ شيبين منها وانتِ لابثة لفاف؟

-راح اموت من الخوف قبل شوية مروان راد يجره من رگبتي يگول حارة

-هو شنو اكو هناك وضامته؟

سحبت اللفاف من رگبتي تشوف وشهگت..

-جنات: هذا شنو الازرگ؟؟ كيان انتِ مضروبة؟؟؟

-كيان: معضوضة من چلب مسعوور

-جنات: هاي شوكت؟؟

-كيان: فاهد البارحة الكلب ابن الكلب عضني برگبتي وشلون مكان حساس الا يريد يفضحني هالكلب المسعور!!

-جنات: عود ليش عضچ مناك اوووي توجع شكلها

-تموت تملخخ رگبتي مشعولة نار

-يا حبيبتي ذولة شبيهم كلهم ططوات

-اي والله بس اگلج شنو يعني ططوات؟

-يعني فگررر يا فگررر

-اي والله فگر الله ياخذهم طبعاً ياخذ فاهد وشمسون مالك وشهوبي مو من ضمنهم

-عشتووو وليش مالك مو من ضمنهم؟؟ ادعي عليه اددعي وفشي گلبچ معليچ اني بظهرچ

-لا ولچ ليش تدعين عليه ليش هو اكو احسن من مالك

-خيوليي هالفگر ابن الفگر العار ابن العاار الثاقط ابن الثاقطط

-انچبي ما اسمحلچ

-وانتِ منو حتى تثمحيلي ومتثمحيلي!

-اني اكبر منج وجاي اعلمچ مالك خوش رجال لا تظلمي

-اذا خوش رجال ما تزوجتي؟؟ شكو جبتو الي!

-سكتيي خليني بضيمي

-تسنيم: شبيچن تتبسبسن

-كيان: لا هيچ سوالف عادية، اگلچن بنات منو تفتهم بالتلفونات؟

-جنات: ايو تعرفلهن

-كيان: ايات عفية شوفي تلفوني ماعرف شبي ديمعلس وتنحذف مني شغلات من وحدهن

انطيتها تلفوني تشوفه گلبت بي شوية وراحت على الاعدادات، قلقتني ردة فعلها من تغيرت ملامحها وگالت بأستغراب..

-ايات: كيان هذا موبايلچ مراقب! اكو احد داخل لموبايلچ مهكري

-كيان: مهكري؟؟؟

-ايات: اي هاي اكو جهاز ثاني داخل وياچ باعي مبين هنا

مديت نفسي اشوف ماعرف مافتهم بهالسوالف بس گلبي وگف منو ممكن يهكر جهازي ويدخل بي وشنو يردون؟؟ عندي صور وفيديوات خاصة شنو هالمصيبة يا ربي وشنو هالمشاكل الجاي توگع على راسي!!

-كيان: اذا اخذته لشركة موبايلات يگدرون يعرفون منو المهكرني؟

-ايات: اتوقع اي اخذي احسن

-تسنيم: شبيها العالم صايرين واحد يتجسس على الثاني عجيب

-ايات: كيان شوفي اخوانچ لتسكتين يمكن ينگلب الموضوع ضدچ بعدين

-كيان: اكييد راح اگلهم بس هسة شُهيب گاعد ويه جماعته خلي يفرغ واروح اسولفله

-تسنيم: اي احسن، بنات البارحة هم شميتوا ريحة عطاب جايه من بره الغرفة الفجر؟

-جنات: اي اني شميت من گمت اصلي عبالك شي ديحترگ

-ايات: سألت عمو شمسون الصبح گال صار عطل بواحد من الاضوية مو شي مهم

عقلي فصل مو وياهن عصرت مخي افكر منو ممكن يريد يهكرني معقولة فاهد؟ بس ليش وشنو راح يستفاد؟؟ وخاف اگول لـ شُهيب ويكتشف علاقتي بفاهد وتنلاص عليَّ!

-هااا لچ خايسة

فزيت على شخص يحاوطني من رگبتي ضحكت من شفته نشوان باس خدي وعضه خفيف..

-نشوان: شتسوي ولك

-كيان: گاعدين نتريگ انتَ شنو هالحركات السخيفة گدام العالم تحضن وتبوس ومادري شنو

-نشوان: اختي واذا هسة

-كيان: وخر شوشو اني زعلانة منك

-نشوان: لاا سوف اموت من القهر

-كيان: دوخر وخرر چنك سحلية من تلطش

ابتعد مني يضحك وبنفس الوقت جر اللفاف من رگبتي، شهگت مرعوبة وشددت عليه ماقبل اهده..

-نشوان: لچ نزعي حارة لا تحصفين

-كيان: هااا لا لا باردة اريد ابقى لابسته

-وينه البرد يمعودة الفندق دافي نزعي اختنگت من يمي

-لا نشوان حباب ماريد لا تلزگ

-شبيچ مخروعة وترجفين؟ شو جيبي اللفاف شبيها رگبتچ؟

-جنات: يمعود عوفها البنية ملتهبة بلاعيمها مو زين عليها الهوا هذا لفاف ايات

-ايات: شنو؟

عضتلها شفه جنات بمعنى سايريني وصل الايعاز لآيات وكملت الچذبة..

-ايات: اي اي انطيتها حتى لا تتمرض الهوا جاي يأذيها كيان ابد لا تنزعي مو زين

-نشوان: حبيبتي انتِ مريضة؟

-كيان: احم اي متشوفني اگحگح

سويت روحي اگح وحطيت راسي على كتف جنات اعيش دور المرض..

-جنات: ثودة عليَّ بعد بيتي متثتاهلين يا روحي شوفها چنها نعامة معوشة

-كيان: نعامة معوشة شنووو

-ايات: يعني نعامة مريضة

-نشوان: هههههههه متشوفين شر يروحي اجيبلچ علاج شي؟

-كيان: لا گلبي ما احتاج

-نشوان: زين انتبهي على روحچ نعامتي

عافنا وراح وذني الحقيرات يضحك عليَّ، نفخت روحها جنات وگالت بعظمة..

-جنات: والله بدوني تديحن اي بعلي

-تسنيم: هههههه اجه رجلچ گومي

-جنات: اوووععع هم گالت نعالچ

-كيان: گبررر لفچ يالفگررر مو شكول نعمة والله العظيم

-ايات: ختولي غبية هاي

من بعيد مالك راح للبوفيه ياخذ ريوگ واشرلها على شي يمكن ديسألها تريگتي وهي تباوعله وتطنگر معاجبها غميناهة ثلاثتنا وگمت ارجع للغرفة انسدت نفسي..

بطريقي للغرفة وشفت شمسون يااابة مو بس انسدت نفسي اريد ازوع! خصوصاً من ضحك بوجهي وجرني من ايدي وغصب عني يبوس بخدودي وراسي..

-شمسون: والله وكت كياني صارت چنتي

-عمو هدني اريد اروح

-تعالي تعالي خلينا نسولف

-مستعجلة لازم احضر جنطتي

-اي على طاري جنطتچ اليوم تحلين موضوعچ ويه فاهد حبيبة

-عمو!!

-ماقبل بالتأجيل بعد! اليوم تنهين السالفة ويه اخوانچ لا تنرفزيني

-ما راح يقبلوووون ميقبلوووون اخواني واعرفهم عددل مروان يذبحني ولا يزوجني فاهد

-بعد يمچ بقت هاي، زواجچ مقابل اخوانچ يبقون عايشين وبكيفچ

-عمو شنو تستفاد من زواجي والله راح اتخبل!!

انتفضت من لوى ايدي وره ظهري عين عليه وعين على الطريق اخاف يجي احد، نتر بحقد وعيونه راح تاكلني..

-الله يحبچ كيان سأليني شلون

سكتت ما احچي شدد على ايدي ورجع نتر..

-سأليني شلون!!

-شلون

-لانچ عزيزة عليَّ وگلبي مينطيني أاذيچ تدرين لو غيرچ شنو چان سويت بيها؟! سأليني شنو چان سويت بيها!!

-شنو چان سويت بيها

-اهد عليها خمممس چلاب من زلامي اخليهم يغتصبوهاا وينهشون بيها لحدما تطلع روحها تشهد موتها البطيء وادفنها بمكانها لا من شاف ولا من درى وصدگيني مسويها من قبل

رجف كلي ابلع بريگي خايفة من عصبيته وحقده ووحشيته، تقرب اكثر وهمس بغضب مكتوم..

-اني گوة مسيطر على فاهد ومقنعه يكمل هالزواج وعدته ازوجه حمرته مقابل يتزوجچ ويجيبچ ببيته لا تختبرين صبره كيان ما انصحچ لانه واگف على شعره يروح ويذبح اخوتچ گدام عيونچ

-حتى لو تزوجني راح اقنعه يعوفني اخبله والله

-انصحچ نصيحة؟

-اي؟؟

-لا تدوسين على الجني وتگولين بسم الله الرحمن الرحيم

نتر ايدي بقوة ودفعني على الحايط وعبر مني، حط ايده على گلبه وگال بضحكة ارعبتني..

-شمسون: شسوي بگلبي الأبوي يحبچ كيان.. بنيتي انتِ بنيتي

عافني وراح تركني بضيمي اكل روحي بروحي لو اموت نفسي وادگ واللطم وامنع نفسي عن الاكل هم ميزوجوني فاهد الخبل شلون راح اقنعهم..

-كيان: شلووون

حچيتها بصوت عالي بيني وبين روحي اريد فكرة تجي بعقلي ماكو..

-ها خبول شبيچ تحچين ويه روحچ

-كيان: فاهد

-فاهد: عيووووونه الصفر

-لا تستهزأ! فاهد اللگه حل ولا تخلينا نتزوج

-دطيري اني اريدنا نتزوج حتى اخذ حمرتي واشرد منا

-وين توليي وتعوفنيي

-لا كيان لااا بس لا حبيتيني؟؟ حبي لازم نتفق مو تحبيني وتملخين روحچ عليَّ حبيبتي انتِ گليبي تره اني گلبي لوحدة وبسس!! وهالوحدة تسوه راسچ وراس اخوانچ الخايسين

-هسة تضربك بوري وتتزوج

خزرني بحدة نطت عيونه عزه بعينه شلون عيون تخوف عليه مثل البزون بالليل..

-فاهد: اگصصص لسانچ اذا عدتيييي هالجملة كياااان لااااا تخبلينييييي

لطمت على وجهي يصيح بصوت عالي راح يفضحنا شبي هذا تسودن..

-اي اي سكتت ولك شبييك صوتك نصي خفى صوتك ان شاء الله

-لا تستفزينيييي

-افتهمتتت گبرر چنه سليمة الماكلين عشاها ولي عن وجهي

-هههههه شنو چان عشاها؟

فكيت حلگي ما مصدگة تناقضه هستوه چان عصبي وهسة يضحك؟؟

-فاهد: ما جاوبتي شنو چان عشاها؟

-منو؟

-سليمة

-يبوووو عليك شگد سئيل

-سئيل ولا مخبل لاف رگبتي بلفاف بهالحر

-من وراك لافته راح اختنگ خنگووك بكيبل شحن گول امين

-هههههههه دعوايچ حلوة تعجبني

عبرته اروح للغرفة وسد الباب ميخليني افوت دفعته من صدره ورجع يسد الباب بجسمه..

-فاهد لا تخبلني روح وخليني بضيمي

-كوري لا تصيرين مزعجة مو جاي نضحك شبيچ

-روح اللگيلك وحدة ثانية تضحك وياك

-امممم يعني متغارين

-اغار؟؟ انتَ عندك مراية بالبيت لو لا؟!

-عندي

-لعد روح شوف وجهك بيها

-والله جاي تجرحون مشاعري العضروطية

-فاهد

-ها

-تلعب النفس انتَ تدري؟

-وعيونچ الكورية ادري

-وسعلي يله

-هههههههههههههههههه بعيني

مد ايده بجرأة على جسمي ماعرف شديسوي ضربت ايده وصدره وجريت ايده اعضها اتوبه من هالفسوق والعقل الساقط..

-اااخخخ شبيچ هههههههههههه

-لا تعيد هالحركات غبيي

-حلو جسمچ بالمناسبة

-احترم نفففسك

-بعد لا تلبسين ضيگ اغار

-عسااك تشتعل بغيرتك ميهمنيي ثانياً منيله لبسي ضيگ؟؟

مد ايده مرة ثانية على جسمي على جزأي العلوي بالتحديد يأشر..

-فاهد: تره مبين

-حقير وفاسق ومراهق وزبالة انتَ تدري؟!!

-كوري لا تدوسين بالحچي راح ازعل

-وزعلة الچلاب السوووود

عطت من نزل نفسه وهم عضني برگبتي بس مو بقوة البارحة جريته من شعره المنتف اوخره مني واسب بي..

-ابن الكلللب ولك ابن شااامة العارة اني اعلمك يالتاافه الصايعع

-ااااخ شعري تگطع هنه شعرتين وگوة ملزگهنن تردين تهلسيهن واصير ابو صلعة

-اهلسس بيك مثل الدجاجة حقيير رگبتي زورگت اليشوفني شيگوول

-يگول هاي غير مسربته طالعة على اخوانها

-اخواني يشرفووك يا العاار

-هم گالت اخواني يشرفوك...

لزمني من ايدي يقيدني ونزل يريد يعضني من جديد انبلع لساني وحسي ويه بلعة ريگي من الخرعة.. قاطع عضته صوت شهگة مسرة وهي تفتح الباب..

-مسرة: كيان وفاهد؟؟؟؟

-فاهد: هلو مسرة قيثارة

-مسرة: شتسوي هنا انتَ؟ ليش لازم كيان بهالطريقة؟!

-كيان: ههههههه ها مسرة ههههه هذا فاهد المراهق جاي يتشاقه ويايه ههههه

-مسرة: يتشاقه؟

-فاهد: اي ثنين مراهقين ويلعبون سوه تلعبين ويانه؟

-مسرة: شنو لعبتكم؟

-فاهد: عضني واعضك

-مسرة: لا شكراً

فاتت للغرفة واخيراً هدني فاهد شلون فشلة اذا سألتني شجاوبها؟ واذا وصلت الموضوع لـ شُهيب شسولف وشگول شلون اطمطم سواد وجهي؟!

عافني المسودن يضحك ويمدلي بلسانه مثل الزعاطيط، دخلت للغرفة شفت مسرة گاعدة على فراشها وبحضنها الحاسبة تشتغل..

-كيان: احم مسرة

-مسرة: كيان اذا تردين تسبحين هسة فوتي لا يجن صبا وجولي ويصير حرب على الحمام

هزيت راسي بـ اي واخذت المنشفة وفتت بدون لا انطق حرف ايدي على گلبي خايفة لا مسرة تحچي گدام اخواني وتنلاص عليَّ....

**

"مسرة"
رجعنا اخيراً لمدينتنا وبوجهي رحت اشوف ميوستي اكرم مو بالبيت بس صاحبته تفتر بالشورت وحمالة الصدر ممهتمة لاحد ولا محترمة احد.. متت قهر وزادت ضوجتي من الشفته ميس مضطرة تعيش ويه ابوها وتشوف صاحباته كل يوم هيچ يفترن گدامها؟؟ عمت عينييي لو عفتچ هنا حبيبة امچ!

رجعت للبيت وسويت لابوية هوسة جديدة وهو يقابلني ببروده المعتاد لاول مرة انهار بهالطريقة گدامه من بعد طلاقي من اكرم لليوم ما وصلت لهدرجة من التعاسة بس شوفة ميوسة بهذا الحال وشلون تخاف من صاحبة ابوها ومتقبل تنزل جوه دمرتني..

وهسة زواجي من شُهيب راح يزيد الامر سوء واكرم راح يستچلب عليَّ ضروري انهي هالزواج بأي طريقة كانت، ثاني يوم بدلت ملابسي وطلعت للشركة وبوجهي رحت لمكتبه دگيت الباب ودخلت..

-مسرة: صباح الخير

-شُهيب: صباح النور

گام من مكانه يغيره ويگعد على القنفة الجلد وگفت مقابيله وذبيت نفس متعب اسأل..

-شصار ويه ابوك حليت موضوع الخطبة؟

-البارحة دار حديث بيني وبينه بخصوص هالموضوع وگتله هالشي غلط واني ما اقبل بي...

-وبعدين؟

-اني احل الموضوع مسرة لا تعصبين وتستعجلين

-تره ابوك راح لابوية مرة ثانية واتفقوا على كلشي من دون علمي وهسة تلگيهم محضرين حتى السيد وكيك المهر

-صدگ تحچين!

-وداعتك

-ااااخ منه شلون يتصرف من كيفه!!

-شمدريني المهم هسة شنو راح تسوي؟

-اني اتصرف لتضوجين

-طلگني وخلصنا

-تره احنه بعدنا ما تزوجنا حتى اطلگ

-هفف خاني التعبير اقصد عوفني گول لابوك ماريدها وفض السالفة

-خو انتِ انهيها منچ رفضيني وخلص

-ماگدر ارفضك

-ليش؟

-لان ابوية راح يطلب سبب وماكو سبب مقنع للرفض حتى لو اگله دز ناس حتى يكتلوني!

-ما ردت اكتلچ!!

-اي اي ظل چذب ظل

-استغفرالله خلص انسي! گليله مرتبطة انتِ مو انخطبتي قبل كم يوم؟

-رفضته خشمه چبير

-رفضتي لان خشمه چبير؟!

-اي

-اكيد تشاقين

-هاي شبيك شعليك ليش رفضته هسة حير بينا ماريدك هي گوة!!

-اليسمعچ كاتل روحي

-شفايتللللك بوس ايدك وجه وگفه صبح ومسه لو صرتلك مرره

-ماريد ابوس ايدي ومكتفي بنفسي

-حل السالفة اشههب

-هي اسمي لسه ما حفظته ويردون يزوجونه اكو اكثر من هالتمسلت!

-شو عيدها

-شنو هي؟

-اخر كلمة گلتها

-تمسلت؟

-هاي شنو يعني طلعت تعرف لهذا الحچي بس تتفيك براسي؟

-مو وكتها خلينا نحل الموضوع قبل لا يكبر

-اي حلها ابو النسوان

-نعم؟!!

-ويسوي روحه متفاجئ هم

طلعت من المكتب روحي تلوب فكري كله ويه هذا الزواج ماريده واريده.. ماريده لان خايفة من اكرم ميرجعلي ميس واريده احس شُهيب هو الراح يرجعلي ميس بس بكل الاحوال ماگدر اجازف بـ ميس!..

ثاني يوم احنه بنفس الوضع الشركة مگلوبة رأساً على عقب واحس بـ شُهيب ممنطي اهمية لخطبتنا حاير بشي ثاني عجزت افهمه شنو بس واضح الموضوع عائلي لان نشوان ومروان مخبوصين مثله وطالعة روحهم..

العصر طلع شُهيب بشغل واني شفتها فرصة ارتاح وحدي، دخلت لمكتبي وتصنمت بمكاني من شفته گاعد على كرسييّ الخاص، حاولت ما اطول بصدمتي ودخلت اسد الباب ورايه..

-صقر ريماس

-سرور

-اشوفك جاي وگاعد بمكاني خير ان شاء الله؟

-اجيت اشوفچ

وگف على حيله يبتعد عن ميز المكتب ويتقرب يوگف بجانبي، عبرته ممهتمة ورحت اگعد بمكانه ضحك من بادلنا الاماكن ورجع يتقرب من الكرسي الگعدت عليه..

-صقر: راح تبقين تهربين مني؟

-ثقتك بروحك تقزز

-ههههههه اموت على لسانچ

-شتريد جاي هنا؟

-اجيت بشغل مسرة لا تخافين

-وهو؟

-اريد شركتكم تشرف على مشروعي الجديد

-ليش شركتنا بالتحديد؟

-لان انتِ مديرتها

-ثقتك بيه حلوة بس لا ترفع سقف امالك عالي شُهيب شريكي وكلمته التمشي

-بس مكانچ اعلى منه ونسبتچ اكبر

-ولو.. ما اتخطى كلامه

-مسرة قيثارة تهتم وتمشي بكلام رجل شي جداً غريب

-شُهيب مو أي رجل شُهيب مهندس

-ههههههههه واني مهندس

-مهندس بسوالف الفساد وغسيل الاموال اي صح

-ليش شُهيب مهندس بشنو؟ شو ابوه يحلفون براسه العارات!

-ميخصني الاب اني اشتغل ويه ابنه

-ليش مسويتله اعتبار لهدرجة؟! تحترمي زيادة عن اللزوم وما تنطين بي ليش؟!

-لان شخصيته تجبرك تحترمه فارض نفسه بدون فخفخة وغرور

-ويلي ويلي ويلي ويلييي

-مو ذنبي انك متعرف شُهيب شمسون

-يعجبچ؟

-شغله؟ اي اكيد ليش باقية وياه لعد

-هو شخصياً يعجبچ؟

-يوووه صقر ليش لازم تدخل مشاعرك بكل عمل تره احنه جايين نشتغل ونطور نفسنا مو نعشگ ونتمعشگ

-مادري كلامچ فسرلي غير شي

-كلامي نفسه سواء على شُهيب لو أمير الي بشركة ابوية ثنينهم اشتغلت وياهم وثنينهم عباقره واستفاديت من خبراتهم

-تمام حلو

-عندك شي ثاني؟

-اي اريد نتناقش على المشروع

-انتظر يجي شُهيب واحجز موعد على فراغه

-هههههههههههه من اگلچ مكبرته تگليلي هو يفرض احترامه مسرة شدعوة لا تعظمي لهدرجة!

-وانتَ ليش ضايج؟

-لان اتنرفز من ولد شمسون!

-ليش؟

-لانهم انذال وعدهم وجهين بس انتِ ما شايفة بس وجه واحد من شُهيب وهذا السبب متعجبة بي

-لا لتخاف اني شايفة الوجهين وراضية على الوجهين

-احبچ مسرة بس بديتي تنرفزيني

-يا حياتي اسفة اعتذر اني

ضحك يمسح على وجهه ايده ترجف راح يفقد اعصابه، تقرب مني كلش وگف گبالي مباشرة..

-صقر: بيناتكم علاقة غرامية؟

-تفكيرك سخيف الى درجة

-قنعنيني ماكو شي بيناتكم!

-وانتَ منو وتريدني اقنعك؟

-حلوة بنتچ ميس تدرين؟

-وخر عن وجهي صقر

-البارحة شفتها تطلع من الروضة نسخة مصغرة منچ

-مسرة: جاي حتى نتناقش مشروعك لو تريدني اسولفلك على بنتي؟!

-الثنين

-اطلع بره صقر

-والمشروع؟

-شوف غير شركة

-لا خلص اعتذر نرجع على المشروع لان مستعجل

زفرت نفس ورفعت شعري بذيل حصان عالي اهدأ بروحي رفعت عيني عليه شفته يباوعلي ومبتسم..

-مسرة: وين راح يكون المشروع؟!

-هنا

-شگد امكانيتك؟

فاجأني من نزل نفسه لمستوايه وثبت ايده على يدات الكرسي جمدت متفاجئة من گال بأبتسامة جانبية..

-شگدما تريدين بس صيري الي

-لا بله؟

-والله

-روح عن وجهي

-مسرة ميت بيچ اني حسي بيه

-وخر ايدك عني

دفرت ايده اوخرهن ورجع ثبتهن بقوة اكبر عالجت وياه ادفعه ميتزحزح، يبست اطرافي من همس ببطئ وعيونه تاكل بوجهي..

-صيري الي واجيبلچ ميس وارجعها لحضنچ اليوم!

جريته من رباطه بعصبية اخنگه بي، ضحك على حركتي بس ما اهتميت زدت بالجر الى ان توقف عن الضحك ومبين عليه اختنگ بس ما تزحزح وابتعد عني النذل..

-مسرة: لا تجيب طاري بنتي على لسانك القذرر صقرر

-اريد اساعدچ

-ممحتاجة مساعدة احد خصوصاً من واحد حقير مثلك يساومني على جسدي!

-ليش عبالچ اريدچ ونسة؟! اني مستعد اعلن زواجنا ونكون زوجين حقيقيين وتجيبيلي اطفال يصيرون اخوان لـ ميس

-اخر مرة اگولها وخر ايدك النگسة عني!

-انتِ لو ميس احتاري من الاخير مسرة!!

-لو تبقى تهدد وتبتز بيه مناا لباچر صقر مهما بلغت قوتك ونفوذك بس مستحححيل تكون بقوة ام خايفها على طفلتها!!

بنفس هاي اللحظة انفتح باب المكتب ودخلو منها شُهيب وموظف اجنبي يشتغل ويانه مبتسمين ويسولفون، وگعت ابتسامة شُهيب من شاف وضعي ويه صقر وقربنا بس ماهتميت بلحظتها لو فكر بيه بغير طريقة او راح باله بعيد عصبيتي ورجفتي على ميس نستني كلشي..

وخرت ايدي عن رباط صقر وعدل وگفته يقهقه بخفة ويمسح على شفته السفلية وعيونه على شُهيب..

-صقر: معقولة تسمحين لموظفينچ يدخلون بدون طرق الباب؟ لا مسرة ما حبيتها منچ الواحد هم يحب خصوصية شوية

بدون لا يعبره طلع شُهيب ووياه الموظف ضحك صقر بصوت اعلى يصفگ بيده منتعشة روحه مادري على شنو..

-صقر: وصل شُهيب اخيراً حجزولي موعد وياكم واتصلوا بيه

-مسرة: تحلم

-صقر: لا تدخلين شغلچ ومنفعتچ المادية بحياتچ الشخصية جميلتي

طلع وهو يحچي الجملة النرفزة وصلت لاعلى مراحلها عندي، ظليت اخذ شهيق وزفير ونفضت شكو حچاية وتهديد وصلني من صقر وغلست عليه خيولي هالكلب الناطق هم اله عين ويهدد مقرف خايس..

نص ساعة ارتاحيت بيها وگمت اروح لـ مكتب شُهيب اليوم من دون الايام ما دگ الباب على حظي، دگيت باب المكتب مالته ما جاوبني.. طبيت شفته گاعد على الكرسي مالته جگارة مشعولة بالنفاضة وبيده طوبة مطاطية صغيرة يضربها على الحايط وترجعله..

-مسرة: تره دگيت الباب

ما جاوب بكلمات هز راسه بـ اي وبقى منطيني جانبه بالكرسي ويلعب بالطوبة..

-اگلك

تنهد بنفس قوي، ضرب الطوبة بشكل اقوى على الحايط ونطق بهدوء..

-اسمع

-مسرة: حچيت ويه ابوك؟

-اي

-شگال؟

حط الطوبة على الميز وگام يسوي كوب قهوة، حط الفنجان جوه مكينة القهوة وجاوب بشرود..

-شُهيب: ما قبل

-تشاقه اكيد!

-للاسف لا

-وانتَ شبيك عبالك راح تبچي لهدرجة ما طايق فكرة ارتباطنا؟!

-انتِ ما طايقة الموضوع واني ماحب اجبر احد عليَّ

-شنو گال ابوك بالضبط وليش ما قبل؟

-گال عيب حچيت ويه ابوها وما ارد بحچايتي خليها هي ترفضك

-مااا اگدرر افهمممم

-وابوية ما جاي يقتنع شبيدي اني

-انتَ ما لحيت عليه لو لاحح وياه يمكن يغير رأيه

-انتِ متعرفين ابويه من يقفل على شي

-هسة شلوون

-الحل الوحيد يمچ ترفضيني ونخلص من هالسالفة

-شلون قهرر هذااا تره ما طايقتك انييي

-بسبب اخر موقف بيناتنا مو؟ اني اسف اسف اسف اسف اسف چنت عصبيي وتخبلت من شفتچ تحاچيني بهاي الطريقة ردت اسكتچ بأي شكل من الاشكال وما ردت أاذيچ بنفس الوقت

-تسكتني ببوسة؟؟ شنوو أي بنية تحچي وياك من تكون عصبي تسكتهاا ببوسة؟؟؟

-اوف

-فوگاهة هو ابو الراي!! لساني نزززف دم من وراك بوري انفتح من حلگي متت وجععع بسببك بس شنو على گلبك الفااسق على اساس راح يهمك

-بس ردتچ تسكتين واني حذرتچ اكثر من مرة، چنت عصبي ما اشوف بعيوني وماردت اتصرف بشي اندم عليه بعدين وادري هذا مو تبرير لفعلتي بس الصار صار وماعندي شي اگوله غير اسف وحقچ عليَّ

شكله متندم من صدگ وملامحه تقره اعتذار، مو وكتها اطول بالسالفة احنه عدنا طامة كبرى لازم تنحل..

-مسرة: ماشي خرب الخطبة واسامحك

-مو بيدي هالشي ابوية قفل بعد قففل

-وانتَ ماعندك شخصية وتفتح قفل ابوك؟!

-الموضوع ماله علاقة بالشخصية! تره علن الخطوبة گدام الكل هاي كسرة بيچ اذا بطلنا انتِ حاولي ويه والدچ يمكن يقتنع

-ميقتنع اعرف ابويه شنو!

-يصير اسألچ شي من باب الفضول لا اكثر

-گول

-انتِ مرتبطة؟ هذا سبب كرهچ لهذا الزواج؟

صفنت ما جاوبت عگدت حاجبي وانطيته ظهري افكر بجوابي هذا اكيد عباله اني وصقر ريماس مخطوبين اييييع لعبت نفسي بس من الفكرة..

-مسرة: خاف عبالك بيني وبين صقر شي؟ لا بابا لا

-انتِ حُرة بحياتچ

-ادري بس ارتبط ويه ابليس ولا ارتبط بـ صقر ريماس

-بس كلامچ ما نفى فكرة انچ مرتبطة

-اي مرتبطة!

صفن متفاجئ، زفر وعض على شفته السفلية اخذ كوب القهوة مالته وراح يگعد، دار شوية بالكرسي واني كملت المسرحية بلكت يتحرك وياخذ الموضوع بجدية وينهي هالخطوبة قبل لا يفتهم بيها اكرم واحلم بحضانة ميس..

-وانتَ راح تخرب كلشيي بيني وبين حبيبي!

-وسبب رفضچ لابو خشم الچبير هو حبيبچ؟

-اي

-ماطول ابوچ اقتنع بعذرچ وخلاچ ترفضين هذاك استخدمي نفس العذر ورفضيني

-ابني ابوية رفض نور بسببك لانك خطبتني شبييك

-نور جواد؟!

-اي

-حسب علمي نور جواد مرتبط

-شنو

-عنده علاقة ويه سكرتيرته

-چذاب

-اني اعرف بعلاقتهم هو صديق مقرب لاخوية مالك

-عزه بعينه ويگول احبچ المعفن

-هو گلبه فندق فـ يجوز فعلاً كلامه

-ايعع عابتله يمة همزين ما قبلت بي

-شلون تقبلين بي وحبيبچ؟!!

-شبي

-راح يقبل تروحين لغيره؟!!

-عوف حبيبي ثانياً انتَ شبيك مضغوط؟؟

-اني مضغوط؟!

-هاي ما شفته وراح تموت بمكانك لعد لو تشوفه شتسوي تشگ هدومك

-ليش گوة تحچيني انتِ؟!!

-ديلا يلا ريلاكس اخذ شهيق وزفير لا تموت عليَّ

-استغفرالله منچ

-خوش افتهمت خلينه نكمل سالفة نور اشتغل عندي الفضول سولفلي منو يحب نعرفها احنه؟

-لا تصير سكرتيرته

-عود صدگ؟ يعني نفس المسلسلات التركية وكذا؟

-اي تقريباً

-چذذب

-ويريد يخطبها وابوه ما موافق يريدله وحدة تنفعه مادياً

-عزه العزاه

-بس هو يحب ذيچ وكاتل نفسه عليها

-وااااو وهي؟؟

-اكيد هم تحبه، تشربين چاي اخضر مو؟

-اي سويلي، زين انتَ شمعرفك يعني مالك حچالك؟

-لا سمعتهم وصدگيني اني مو من النوع احط اذني ويه احد بس سمعته يجيب اسمچ وانتابني الفضول

-اممممم وليش ينتابك الفضول من جاب اسمي؟

-ماعرف يمكن لان شريكتي

-اممممم

-احم اي.. المهم

-اممممم

-شنو

-اممممم جاي اشك بيك شُهيب شمسون؟

-بشنو

-ليش انخطف لونك

-لوني؟ لا وين انخطف شلون يعني

-صار وجهك اصفر شنو ضام عليَّ شهوبي اوبي اوبي

-ما ضام شي، هاچ هذا الچاي

-ايييي

-خلينا نرجع لموضوعنا

-لا كمل على نور جواد ليش جاب طاري اسمي؟

-اتوقع على خطبتچ يحچي

-اي يجوز بس انقهرت اتمنى يتزوج حبيبته هاي شبيهم الاباء شگد حموضة صايرين

ضحك يگعد مقابيلي يشرب من قهوته..

-مسرة: تحس قصتهم حلوة وهيچ حركات وكله بالسكتة وغموض واثارة وكذاا

هز راسه مبتسم، شربت من الچاي مُر حطيتله من الشكر الخاص لاهل السكر يجبرني احط منه شگد نحس هالبني ادم..

-مسرة: يعجبني اعرف قصتهم تحسهم متأثرين بالاتراك

-عندي صديق عاش قصة مشابهة لنور جواد بس هي مو سكرتيرة چانت موظفة عنده

-الله الله هاي شنوو

-بالاحرى چانت زوجته وهو ميعرف

-شلون هاي؟

-قصتهم طويلة بس المهم هواي رجال اعمال مهمين اعرفهم تزوجوا من موظفات عدهم او سكرتيرات

-حتى اني اعرف بس كلهم عانوا بالبداية

-بس عاشوا قصة حب مثيرة

-اتفق اتفاق كوني هاي شنو شُهيبب طلعت تحب هالسوالف نفسيي

كمل يشرب القهوة يخفي ابتسامته ويأشرلي على ملف گدامه..

-نشتغل؟

-مالي واهس اليوم

-تمام

ومثل الحباب فتح الملف يشتغل نيابة عني افف خرب حظك شگد لطيف وحنون شلون الواحد يگدر يجمع الحنية والسوالف المكسرة بنفس الوقت؟

-اگلك هسة شلون ويه سالفتنا اني ماريدك اكرهك

استغربت من ضحك يمسح على لحيته ابتسمت وياه من لا وعي من گال..

-اشكرچ على صراحتچ

-لسه ما سامتحك على السويته بالمصعد بس عندي موضوع الخطبة اهم ولازم ينحل

-راح احاول احل الموضوع

-سمعتها منك البارحة

-انتِ لو بس لمرة وحدة تبذلين جهد وياي صدگيني الموضوع ينتهي

-ابوية ميقبل انتَ صير بطلي وخلصني

-ماريد اصير بطل لاحد

-بس اني اريدك تصير بطلي

-ماكدر اصير بطلچ

-ليش انتَ بطل لوحدة ثانية؟ شوووف چان لااازم اعرف دتخونيي من اولهااا تخوني شُهيبب؟؟؟

ضحك بخفة يشعل جگارة وينفخ دخانها بعيد عني، تمنيت يحچي شي يخص البنية الي بالفيديو بس ما ذكرها ابد انقهرت ماريد اني اواجهه اريد اشوف هم راح يحچي بيها ويصارحني من البداية لو يغلس؟ حسيت بأهتزاز تلفوني طلعت موبايلي من الجيب اشوف منو وچان اللگه المتصل "بابا"..

-مسرة: اني طالعة اجاوب مو تشتغل بدوني يالقاتل

-اخ يابة

-هم گول ما حاولت اكتلچ؟

-ما حاولت اكتلچ

-عود احاول اصدگك

طلعت اعوفه يدردم بالهمسة بينه وبين روحه وجاوبت اتصال ابوية..

-فادي: هسة ترحين تتفقين ويه شُهيب على خطوبتكم

-تتشاقة اكيد!

-فادي: مسرة ماعندي وقت عندي سفرة عمل بعد يومين اريد اتطمن عليج

-سودة عليَّ مو هاي اول مرة تعوفني وحدي وتسافر

-مو وكت استهزائچ راح انتظر اتصال شمسون على يوم عقد القران

-هلا هلا انوب يريدنا نعقد قران

-فادي: لعد شنعقد لساانچ الطويل؟؟

-مسرة: ما اعقد على هذا مااا

-مسرررة

-بابا عنده علاقة ويه وحدة وسوالف مسربته وفوگ كل هذا راد يكتلني تخيل من تسافر يكمل عليَّ ويذبحني بسچينة الفواكه!

-مسرة بطلي مبالغة الرجال واضح ما راد يكتلچ وكادوله مكيدة واعرف بيچ تدرين بهالشي بس تغشمين نفسچ

-حتى لو ماريده اني مرتبطة وحبيبي ميقبل اتزوج

-عادةً احب صلافتچ بابا بس هسة كلش مو وكتها سكتي لا تنكتلين

-بابا شُهيب مجرم شبيك نسيت!!

همستها همس كل محادثتي بالهمسة اخاف يسمعني ابو همسة..

-فادي: بس ما اذاچ بشي!

-واذا اذاني بعدين؟ ماريده ماگدر اتزوجه بابا افهمني

-اتفقي وياه زواج على ورق استفادي من فلوسه وخلص

-خاف ميقبل

-يقبل

-مو اخاف اگوم احبه

-ما راح تحبي اتطمني متحبين غير نفسچ انتِ

-وميس

-وميس يلا بابا يلاا خلصينا

-الا اگله متزوجة اربع مرات اخلي يلطم بنص الشارع مصلخ

-لو انتِ بنت ابوچ گليله!

-ايي راح اگله!

طبگ الاتصال بوجهي ضميت جهازي راح انفجر منه هذا هو صممت راح احچي لـ شُهيب عن تاريخي الحافل اخلي يلطم بيده ورجله..

رجعتله شفته ديشتغل والجكارة بحلگه رفع عيونه عليَّ كشولت بوجهه مزعوجة فوراً نزل الملف من ايده يركز ويايه مستفهم عن سبب انزعاجي..

-مسرة: راح تبقى صافن؟

-شبيچ مزعوجة؟

-من وراك!

-شسويت هالمرة

-خطبتني!

-چان ابوچ على التلفون؟

-اي!

-والله مادري شگول، كلمة اسف راح تنفع؟

-شيفيد اسفك؟؟

هز راسه ساكت طفى جگارته وكمل ترتيب الاوراق الگدامه، گعدت مقابيله وجهي ميگصه السيف اشوفه كل شوية يرفع عيونه يباوعلي ويحرك راسه بقلة حيلة، مرت فترة على گعدتنا هو يشتغل واني مبوزة لحدما فاجئني من گال..

-شُهيب: زواج على ورق؟

-مسرة: شنو؟

-شُهيب: زواج على ورق راح يرضيچ؟

-هاا!

-نتزوج على ورق فترة وننفصل نطلع أي حجة ما تفاهمنا او ماكو انسجام بيناتنا او بنتچ ما حبتني مثلاً؟

-ميوسة تحبك

-واني احبها

رقت ملامحي ويه عبارته والابتسامة الصادقة المرسومة على وجهه، حسيت بالامتنان وماعرف ليش بس تمنيت اتشكره على مشاعره لبنتي بس طبعاً ما سويتها ورجعت ملامحي للجدية..

-مسرة: تتوقع ابوك يقتنع؟

-شُهيب: اي

سويت نفسي ما راضية واني حرفياً راح اطير فرح! خطة ابوية البديلة دتمشي صح الصح هذا الي ردناه بالضبط اذا اضطريت اتزوجه يكون زواج على ورق وردت اوصل لهاي النقطة بالتحديد بس لعبت شويه حتى تطلع منه..

-مسرة: مو كافي هالشي بعدني ضايجة

-حالياً بس هذا اجه ببالي راح احاول ادور على شي اخر يرضيچ

-واذا ما لگيت؟

-ما راح استسلم

-مسرة: شوف اذا فرضاً فرضاً قبلت بالزواج على ورق ببيت منو راح نعيش؟

-ها؟

-شبيك لو تريدنا نبقى ببيوت متفرقة؟ طبعاً هالشي كللش راح يناسبني

-لا ميصير ضروري يكون الزواج مقنع

-شوف تعجبني من تفكر مثلي بس احسك راح تخون الوعد وتطلب اكثر بعدين؟

-اخذيها مني كلمة رجال

-احلفلي بشواربك الشگرة

ضحك اخيراً وتغيرت ملامحه الجدية ومثل العادة طلع جگارة جديدة، يجر منها دخان مغمض عيونه وكأن هذا النفس الي راح يرجعه للحياة هذا الرجل عايش علاقة غرامية ويه جگارته حتى طريقته بالتدخين رومانسية ولحد يسألني شلون يعني لان ماعرف اشرح عدل..

-شُهيب: معناها لازم انتقل لمكان جديد

-ليش شبي بيتك؟

-مو من مستواچ

-اوووي صرت تدور هالسوالف وتريد راحتي؟ عزه اسكت تره راح اگوم احبك

-هههه لا اقصد اني عايش بشقة صغيرة ما راح تكفينا

-لتخاف طلباتي مو هواي واساساً ما اريد اكثر من غرفة الي 700 متر وغرفة لـ بنتي ميس 300 متر وحمام ومطبخ وصالة وغرفة ضيوف وممر حلو مزخرف وثريا نازلة منه مثل الثريا ببيت فاهد اخوك وحديقة بيها شجرة برتقال وبس

-ما طلبتي شي

-شفت شگد بسيطة اني

-كلش

ابتسمت وعدلت گعدتي اكمل كوب الچاي الصار ايس تي..

-شكبرها شقتك؟

-صغيرة

-مساحتها؟

-150 متر

-عيني هاي مساحة حمامي!

-Why am I not surprised

ضحكت بقوة على حركاته يگلب عيونه ويحچي من وره خشمه صراحة احب شخصية شُهيب المشاكسة والي يطلع بيها من المهندس الشاطر المحترم جداً..

-مسرة: لا اتشاقة مو لهدرجة، اشوفها كافية علينا

-بيها غرفة وحدة

-وهنا سأسكت قليلاً! تريدنا ننام بغرفة وحدة شهوبي اوبي اوبي؟؟

-اكيد لا، ثانياً بطلي تصيحيلي شهوبي اوبي اوبي تذكريني بكارتون لأيد اسمه "اوبي" چانت كيان تحبه وتجبرني اتابعه وياهة

-اووي وچنت تتابعه وياهة؟

-تموت من البچي اذا اگوم حافظ كل الحلقات على غيبي

-ما سامعة بهذا الكارتون من قبل

-يطلع على نيكلودين

-حتى اسم القناة حافظها

-اي وأتذكر اخته "اوما" المزعجة كيان تموت عليها

بقى يسولفلي على الكارتون من كل عقله ناسي روحه واني مستمتعة اسمع عن طفولة كيان مبين شگد متعلق بيها ويحبها، اخذنا الحديث لمجرى اخر تماماً عن موضوع الخطوبة بديت اشتغل واسأله عن طفولتهم الحلوة..

-شُهيب: فرق العمر بيناتنا هواي وچانت متعلقة بيه كلش متنام الا بحضني ومتاكل الا من ايدي اجت فترة تصيحلي"بابا"

-ياااا حياتي فدووة شمعرفها تصيحلك بابا؟

-امي تگوللهه شُهيب مثل ابوچ وسمي بابا وهي تعلمت چان بقت تصيحلي بابا لولا تدخل مروان وهمزين من تدخل شي غريب يكون عندي بنية بطولي

-تخبل كيان احبها كلش

سألته سؤال جديد وچان سعيد وهو يجاوبني ما صابه ملل من اسئلتي ولا حسبها تدخل سولفلي تاريخ كيان كله حتى من طلبت تدرس هندسة بس لان شُهيب دارس هندسة وتريد تصير مثله وهكذا مشى الدوام سوالف وشغل وكملنا كل المتراكم علينا بدون لا نطلع لاستراحة غدة اكلت وياه من البوكس الي يجيبه كل يوم وياه للدوام لان يضوج من اكل المطاعم..

رجعت للبيت وافتهمت بـ شمسون فعلاً اتصل بـ بابا واتفقوا يكون العقد باچر!

-مسرة: بهالسررعة؟؟؟

-فادي: گتلچ مستعجل باباتي ما اوصيچ مو تنسين الشغل وتنسحرين بشعره الحلو

-مسرة بأستهزاء: ههه شگد دمك خفيف صاير بابا

-فادي: ههههه حبيبة البابا

-اني ما مجهزة اموري دنطونا مجال نسوي تنظيف بشرة اغير اظافري اصخم اللطم شبيكم مستعجلين

-بنيتي ماكو حفلة بس عقد وهم الزواج چذابي شتسوين بكل هذا؟

-بس هذا ميغير كَوني عروسة

-ههههههه عيناً امچ نسخة طبق الاصل

عفته وصعدت فوگ اصعد البايات سريع قبل لا يصدمني بشي ثاني بس ما لحگت لان صدگ صدمني من گال..

-جايين اليوم يحچون بالمهر

-مسرة: وهسسسة تگلييييي

-بابا شيرادلها هي حمرة وكحلة وابقي بملابسچ لا تعقدين الموضوع خليها سهالات

-اسهالات قصدك!!

-مسررررة

-ربي اني شمسوية بحياتي وانخلقت بهاي العائلة وتربيت بهذا البيت؟؟ ربيي لا اعتراااض على حكمممك يااااا رب

-فادي: شگد دراما هالبنية

صعدت ومثل المخبلة اسبح وابدل ملابسي، بأيد امكيج وايد اشسور وايد ادز رسائل الرزايل لـ شُهيب، شعوطني بالزايد من جاوبني بجملة قريتها بصوته الهادئ البارد..

"شو اني ماعرف اليوم راح نزوركم؟"

"مسرة: عممممت عينننك وعين ابوووك النگسس تفووو عليك يابو النسوان تره ما ناااسية الفيديو مالتك ولا ناااسية بوستك ابو عضضضة!! طاح حظ ابووك المعفنن الجربووع وطاااح حظك لانك ابنه تره هذا بلاء كاافي وكاافي جداً كونك ابن شمسوون العااار الزباااالة"

كتبت كلشي بروح محترگة طلعت كل الجواية ذبيت نفس مرتاحة ومثل الحبابة حذفت الكلام كله بدون لا ادزه وكتبتله بلطف..

"وهسة دريت، نلتقي اليوم حبيبي 😘"

كتبت حبيبي القصد منها استهزاء ووصلت الفكرة اله لان دزلي ايموجي گالب وجهه، ذبيت موبايلي وكملت تجهيز نفسي دقايق واجتني المساعدة تگول وصلو..

عدلت فستاني الازرق وذبيت شعري على اكتافي اغطيهن لبست مجوهراتي ونزلتلهم..

وگفو كلهم من دخلت الاستقبال بوجهي صار ابوية ويقابله شمسون الكلب وبصفه مالك وبالاخير گاعد شُهيب عازل نفسه بكرسي وحده..

-شمسون: جميلة الجميلات واميرة الاميرات مسرة قيثارة

مدلي ايده اروح اسلم عليه سويت نفسي ما انتبهت واخذت موقع اگعد على كرسي..

-شمسون: شگد سعيد واني جاي اخطب لنمري بنية مثلچ

گلبت عيوني قرفانة من لواگته وزادها ابوية من گال..

-فادي: محظوظ بيها شُهيب اكيد

وبقو بالنص ساعة يسولفون بأمور عشوائية جابت مارلي المساعدة الضيافة وقدمنا واكلنا وكملنا ولسه ما دخل الكلب بالمفيد..

-شمسون: ههااهههااههاا صحيح صحيح، فادي خلينا ندخل بالمفيد ونسولف سبب جيتنا اليوم

-فادي: نسمعك

-شمسون: جايين نطلب جميلتك مسرة لـ نمري شُهيب

-فادي: ان شاء الله خير

-شمسون: ما احب محاضرات الخطبة وهاي الامور بس اني فرحان لان اخيراً ولدي استقروا وراح يتزوجون

"بالغصب"! اكيد نسه يگولها عادي عادي كمل..

-فادي: مبروك علينا جميعاً بس انتَ تعرف مسرة بنتي الوحيدة وعزيزة على گلبي واخاف عليها وعلى مستقبلها

-شمسون: حقك

-فادي: حتى نكون صريحين مسرة متزوجة من قبل ومرت بتجارب سيئة و..

-شمسون: كلنا مرينا بتجارب سيئة فادي هالشي عادي واولنا شُهيب

توجهت الانظار عليه بينما هو بقى ساكن ما ابدى ردة فعل..

-شمسون: شُهيب هم خطب ثلاث سنوات من حبيبته وانفصلوا بالنهاية الموضوع عادي

-فادي: خطوبة ثلاث سنوات؟

-شمسون: كان شبه زواج طبه وطلعة وعايشين سوه وبيناتهم علاقة زوجية متكاملة حتى نكون صريحين

معقولة نفسها الشگرة بالفيديو؟ واذا چانت هي معناها لليوم هو ممتخطي الانفصال وبعدهم يحبون بعض واذا طلعت توقعاتي صح شنو سبب فسخهم للخطوبة يا ترى؟

-فادي: الله يعوضك بالافضل وليدي

-شُهيب: تسلم

-شمسون: اكيد راح يتعوض بمسرة

ضيگت عيوني مركزة بي ليش هالنعجة مستقتل على هذا الزواج؟ وليش كلشي ابوية يگوله يوافقه ويبيّن الموضوع شگد سهل وبسيط وما راح يكون عائق؟

-شمسون: شُهيب رجل مختلف واظن كل الي يشوفه راح يلمس هذا الاختلاف ويلاحظه، مُميز بهدوئه وسكونه وطاقة تحمله وقوة صبره لو شتگول ملك؟

-مالك: صحيح

الكلمة الوحيدة الي نطقها مالك من دخل بيتنا لسه ماعرف ليش جايبي اذا هو حتى من يتوجهله الحديث يجاوب بأبتسامة باردة كل شوية يباوع للساعة عبالك گاعد على نار او عنده موعد مهم..

-شمسون: تحمل مسؤولية اكبر من عمره وحجمه اعتنى بأمه او خلينه نگول رباهة مثل ما تعرفون ام شُهيب عدها خلل بالعقل الله يشفيها ونمري تحمل كامل المسؤولية بدال ميعيش طفولته حاله حال كل الاولاد هو احتار بوالدته المريضة

-شُهيب: على گلبي احلى من العسل المهم صحتها زينة وهي بخير

ابتسم الكل على جوابه ودفاعه عن عقل امه، هز راسه شمسون وگال بنبرة صادقة..

-شمسون: اني افتخر من اگول شُهيب ابني

تغيرت نظرة شُهيب لأبوه واستبدلت الجَدية الي بعيونه بـ لمعة حلوة وزادت هاللمعة من كمل..

-شمسون: رجُل ناضج، رزن، ناجح بحياته ما اعتمد عليَّ بشي تمنيت اضمه بگلبي وما انطي لهذا العالم تمنيت اقدمله كلشي يريده على طبق من ذهب حتى ميتعب بس بالاخير ردته يعيش مثل ميعجبه وانطيته الحرية يستقل وحده ويعوف ابوه الي يحبه اكثر من روحه

اوگفو هاي شبيه دمعت؟ كلامه اثر بيه واثر بـ شُهيب بالتحديد.. عيونه المدورة على ابوه مركزهن ويتابع كل كلمة تصدر من شمسون بأمتنان واضح عجز يفسره بكلمات، اكتفى بكلمة..

-شُهيب: شكراً

-شمسون: نمري انتَ

بلع ريگ يبعد عيونه عن ابوه واخوه حسيت بتنافر فضييع بيناتهم رغم ديحاولون يخفوه جوه قناع بس حابة اگول تراكم واضحين!

-شمسون: برأيي الشخصي ضروري الاختلاف بين المتزوجين، مثل النار والماي واحد يشعل بعصبيته والثاني يطفي بهدوئه وعقله، الزواج من شخص يشبهك شي ممل وروتيني

-فادي: صحيح اني اعتبر الزواج مثل اقطاب المغناطيس يصير تنافر من الطرفين متشابهين وتجاذب واثارة من يكونون مختلفين

-شمسون: بالضبط واشوف نمري وجميلتك راح يكونون احلى ثنائي بما ان مسرة الله يحفظها عصبية شوية وشُهيب اعصابه باردة

ضحك وره جملته هو وابوية بينما اني وشُهيب واحد يباوع للثاني، استمروا يسولفون بأحاديث متفرقة بعدما اتفقوا على المهر وكلشي بعد مرور فترة مو قليلة طلعوا واني هم صعدت لغرفتي..

گعدت على سريري افكر وبالي كله ويه شمسون وكلامه، اول شي شُهيب مجرم وهاي منتهين منها شفت كلشي بعيوني، ثاني شي ضروري احط هالشي ببالي وما انسى مثل كل مرة ويضحك عليَّ بكلامه وهدوئه، ثالث شي الفيديو للان ما واجهني وصارحني بحبه لهاي البنية فـ قررت افتح وياه الموضوع بنفسي، اخذت تلفوني ودزيتله الفيديو شافه وفوراً اتصل بيه، رفضته وكتبتله..

"جاوبني رسائل"

قراهة وهم رجع اتصل، جاوبت الاتصال وبدون مقدمات گال..

-منين جبتي هذا الفيديو؟

-دزو الي

-شوكت؟

-وره ما خطبتني بدقايق

-هذا الفيديو قديم صارله سنوات

-لابس نفس لبس الحفلة

-تره ما مبين مني شي غير القبوط انتبهي للفيديو واني دائماً اللبس قبوط اسود

-والمكان هم نفسه

-اغلب حفلات ابوية بهذا الفندق ماكو شي جديد، مسرة هاي البنية خطيبتي السابقة مو وحدة عادية

-هاي خطيبتك؟!

-اي واتذكر هذا اليوم كلش زين چان بتاريخ 12/18 واجت فرحانة تگلي راح يطبقون فكرتها بالمشروع وبيومها احتفلنا وحجزنا سفرة سوه

-اممم ما شاء الله

-هالحچي صارله سنيين لان اساساً احنه انفصلنا صارلنا فترة كلش طويلة

-منو صوركم؟

-مادري اني هم مستغرب

-تبعت موقع صاحب الرقم الدزه بس قرالي موقع بعيد مو هنا معناها ميريد ينعرف وحاسب حسابه

-اي

-بس ليش دازي الي هسة شنو غايتهم؟

-غايتهم يخربون خطوبتنا

-ياريتها خربت

-بعد ماكو شي بيدنا لا تضوجين راح نكمل ونمشي على خطتنا تمام؟

-تمام

سديته منه ونمت، حسيت الصبح على ريحة بخور فتحت تك عين اشوف غرفتي صايرة عبارة عن مدخنة، ابوية واگف فوگ راسي ويبخر بيه..

-فادي: يلا بنيتي صباح الخير گومي حبيبة بابا كافي نوم

-مسرة: الله يستر من صباحك

-يلا بابا گومي حتى تعقدون

-من صباحيات الله واحد يعقد؟ رجاءً مالي خلگ تنسد نفسي لبقية اليوم

گمت واني احچيها وابوية مستمر يبخر، وگف مقابيل ميز التسريحة مالتي يباوع لطبع الحمرة على المراية..

-فادي: شوكت تتوبين من هاي الحالة الوصخة بابا عيب هاي التصرفات

-مسرة: بس مو عيب من يومية لازگني برجال

-فادي: اكيد مو عيب هذا شغل والشغل مو عيب

قررت ما اتناقش وياه ودخلت للحمام سبحت ورتبت نفسي وطلعت ويه ابوية نروح لبيت شيخ يصير صديق شمسون گال هناك نعقد ماعرف شعجب، دخلت لبيت الشيخ بسيط بس مرتب كلش دخلتنا زوجته لاستقبالهم وشفت امة الثقلين گاعدين هنا...

**

"كيان"
اني واخواني وماريا وشمسون ومالك وفاهد وبنات عمهم وحتى صبا وجولي وفاضل كلنا متجمهرين هنا ببيت الشيخ منتظرين عروسة شُهيب الي ردت امووووت من السعادة من عرفت خطب مسرة قيثارة!

دائماً چنت شاكة اكو شي بيناتهم وحتى نشوان حس بهالشي بس مروان يعارض ويگول مسرة وشُهيب مستحيل يناسبون بعض بسبب اختلاف شخصياتهم بس الحب لا يعرف المستحيل وهاي گاعدين ننتظرها تجي علمود تعقد قرانهم..

درت عيوني على جهة مالك وفاهد شفت مالك گاعد يحچي ويه جنات وهي مبوزة ومبين ديتعاركون لان كل شوية تطفر تريد تگوم وهو يجرها يگعدها، وفاهد گاعد حاط رجل على رجل يدخن بهدوء وگالب وجهه..

موضوعي ويه فاهد بقى معلق لا اخواني ردوا جواب ولا اني فتحت الموضوع بعد، طلبت مهلة من شمسون ينطيني يومين يصبر عليَّ واحل السالفة وهو قبل لسبب غريب، مچنت اعرف بي حاط جواسيس عليَّ وهو الي مهكر تلفوني ومراقبني على الدعسة خوفاً لا انطي معلومات ومكان الكونتينرات الي بيها المواد الممنوعة لاحد..

-جنات: يبوووووووووووو على عمري وعمرررك هددني ولك اختنگتتتت شنووو چلبة وحابسنييي

-مالك: گعدي بس شوية وراح نطلع شبيچ متتحملين!

-جنات: ولك ولك ولك ولك ولككك

-فاهد: هاي شبيها ام بريص

-جنات: ام بريثث بعييينك يالشاااخط يالبو المخدررات يالمجرررم

-فاهد: وجهچ حلو لا تخليني اخربه الچ نفس مزاجي الخربان

-جنات: بييك خييير تعال خرربه ولك ططوووة

طفر فاهد يريد يجرها من لفافها ومالك صار بنصهم يفاكك ويهدأ الوضع واحنه بس گاعدين متفرجين على هالمسرحية..

-مالك: يمعودين شنو الموضوع حتى هناا عرك شبيكم همجج

-جنات: انتَ الهممج يالاناني يالمجررم يابو البنات الصغاار

-ماريا: بس اني احب ملوكي

الكل اندار على ماريا حچتها وهي زعلانة من كلام جنات على مالك، سحبها شُهيب يحضنها نص حضنة لصدره ويمسح على راسها..

-جنات: خالة انتِ مبينة فطيرة وخوش مرة بس هذااا لاااا هذا واحد وححش وغشااش وفگور لو تعرفين شثوه بيه يمممة عمت عينااااي

-شمسون: بعدچ ما شفتي شي حبيبتي عمو

-مالك: استغفر الله ياربي استتتغفررر الله

-جنات: ولكم اليووووم افضحكممم واشهركم گدام الشيخ اليوم اجيـ......

صم حلگها مالك فضحتنا ببيت الرجال همزين ما گاعد ويانه، تدخلت تسنيم تحل النزاع وايات گاعدة ما حچت أي شي بس صافنة..

الكل سكت من دخلوا مسرة وابوها وگفنا على حيلنا وفاهد ما قبل يگوم دفر رجله شمسون ويخزر بي ياله وگف وذب جگارته ممهتم لاحد..

ابتسمت منبهرة على جمالها ونزاكتها لابسة سوت اوف وايت عبارة عن بنطرون چارلز رسمي وجاكيت هم رسمي واكتافه مرصعة بكرستالات تلمع وبروش يلمع سادة بي الجاكيت، رافعة شعرها بتسريحة ذيل حصان عالي بس مو الذيل الحصان الي نسوي دائماً هذا بي فيكة ومكياجها ناعم هادئ عكس العادة حتى الحمرة حاطتها نيود، طالعة جميلة وتسحر العين وكل الموجودين بقوا صافنين عليها واكثر واحد واضح انغرم هو شُهيب الي ما نزلت عيونه عنها بس من تتلاگه نظراتهم يعكس عينه يسوي روحه ملتهي بشي..

طلعت شال ابيض من جنطتها حطته على راسها من دخل الشيخ حتى يعقدلهم هذا نفس الشيخ العقدلي ولسه حاقدة عليه، جابولها قران وبده العقد اللطيف.. الكل چان هادئ جداً عكس عقدي وعقد جنات چان كارثي..

ماريا فرحانة وكل شوية تجر وجه شُهيب تبوسه ما مصدگة ومن مسرة انطت الوكالة صارت تطفر متحمسة لدرجة شمسون يضحك ويسويلها بيده على كيفچ يمعودة..

-ماريا: فرحانة اني فرحاانة ابني راح يتزووج

-شُهيب: دوم هالفرحة حبيبتي يمة

-فاهد: اهووووو

-شمسون: وجعوو

اندار الشيخ على شُهيب ياخذ منه القبول وانطاه سريع وهاا اهاا كلشي صار سهل وبسيط وصارو خطيب وخطيبة..

-شمسون: مبارك الكم ابنائي

جاوبه شُهيب ومسرة ساكتة وتباوع لأبوها حسيناها ممرتاحة وكل شوية تعدل گعدتها وتهمس لابوهة شي وهو يحرك اكتافه بطريقة "ماعرف"..

-فادي: يله بعد نطلع ونعوف المعاريس وحدهم ياخذون راحتهم

-شمسون: قبل لا نطلع اريد اخذ جواب من العريس نفسه.. شگلت نمري على خطبة فاهد وكيان؟

-نشوان: گلنا لا عمي!!

-شمسون: يعني تناقشتوا ويه اختكم؟

-مروان: اي وهي متريده

-شمسون: هاا لعد ليش اتصلت بيه تبچي وتتوسل حتى اقنعكم

جحظت عيوني مصدومة من كلامه احس گلبي انزع من مكانه ويه صرخة اخواني ثلاثتهم گبو على شمسون وينعتوا بالچذاب وهالشي مستحيل ولا يمكن اتصرف هيچ تصرف من دون علمهم صرت شگدوتني تمنيت اطم روحي من القهر..

-شمسون: سألوهة وفضوا الموضوع يله ولدي

اخذ ولده وبنات اخو وطلعوا وعافوني ويه ثلاث رجال عيونهم يتطاير منها الشرر واجسادهم الضخمة ترجف عصبية..

-مروان: صدگ انتِ متصلة بي حتى يقنعنااا؟؟؟؟؟

فجرها بوجهي ونشوان لازمة حتى ميهجم عليَّ ونتفشل ببيت الرجال وگدام مسرة وابوها، نزلن دموعي ماعندي تعليق على كلامهم شمسون النذل حطني امام الامر الواقع فجر قنبلته وطلع..

-مروان: لا يا حقيييييرة يا نذذذذلة ولچ نزلتيييي روسناااا يا *********.......

اشكال مسبات وعياط وتهجمات ضميت وجهي اشهگ وابچي خايفة ومرعوبة وخجلانة من موقفي البشع گدام صديقاتي..

-فاضل: مرواااان شبيك يا اخي شبيييك هو هيچ اتقي الله بأختك مو هاي اماانة!

-نشوان: لانها اماانة احنه منرضى نفرط بيهااا وتروح لواحد عاااار مثل فاااهد ولك هااااي رووووحي شلون انطيهااا لواااحد ميستاااهل اظفرر من اظافرررها

تمنيتني ميتة ولا شايفة عيون نشوان المدمعة والحسرة الذابحته وهو يحچي بقهر، تدخل ابو مسرة يهدأ الاوضاع ودخل الشيخ هم يحچي وياهم ويگول مو هيچ تنحل الامور بس اخواني شايطين ومروان گام يخربط بالحچي اليوم ما اخذ علاجه ومدا يگدر يسيطر على عصبيته صرت ادگ على وجهي من كلامه يحچي گدام مسرة وابوها خفت يأثر هالشي على زواجها من شُهيب..

-مروان: ولد الزززنا ذولة لازم يمووتوون حرررررام يشمون هووا الله!! صوچنااا احنه ناسبناهم من البداية ابوية غلط غلطططة عمره من تزوج ماااريا وهو يعرف حقيقتـ.....

ما كمل حچايته وانلطم لطططمة من شُهيب خرسه على الاخر، لزمه من خوانيگه ونتر بوجهه بعصبية بلعتنا العافية..

-شُهيب: ودااعتها لأمي مروان لو جبت طاري امي بشي مو زين وحق من انزل القران على محمدددد انهييييك وتعرررف كلش زين شنو اگدر اسوووي اگططعك وصلللللة وصللللة واشمررر عظاااامك لچلابييي...

يتبع...

━━━━━━  ━━━━━━

هاي شبيها العالم تموت على المشاكل 🙂🔥

توقعاتكمممم 💀🩷

شبيهة جنات ام لثان طبعاً جنات عيونها اوسع ودائرية اكثر 🫂👇🏻