رواية ابناء الحسوم "شمسون" الفصل الأربعون 40 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لك انه أغارن يا حمد حتى على لمعة عينك 🥺♥️.

━━━━━━  ━━━━━━

-مروااااااان

-فاهد: شنو؟

-كيان: مروان هذا مروان يدگ عليَّ عزا بعينيي ولك وخرر

-فاهد: انعلل ابوه شعلينا بي

-كيان: هددني فاهد هو گال اجيچ ولك يبووو والله يطب علينا هنا ويتطشر العرضض

-كللشي ما سويتتت ما يصير هيييج

-بعدين بعديين اني بعدني متزاعلة وياك وخرر

-ما تطلعين وروح امي الغبرة

-عزززا دگ مرة ثانية وللك يطب علينا هنا فااهد گوووم

دفعته عني بسرعة وخر بس الوجه ميگصه السيف، اني اعلمك يا فاهد تلعب على اعصابي ومشاعري والله ما اخليك تلمسني لمسة الا اتأكد سارة انشلعت من گلبك!!

تلفوني بيدي رتبت نفسي على المراية وهو بعده على الفراش گاعد وعيونه بگصته، ضحكت بگلبي على شكله بس يستاهل! باوعت لـ تلفوني مروان دزلي سالة كاتب..

"كيان اني بره بس اخذي راحتچ شوكت ما تكملين تعاليلي"

چذبة اخترعتها مال مروان يطب علينا ومال خبصني ردت طريقة اتملص بيها من فاهد المتهور بين ما ارتب عقلي ومشاعري هذا الموضوع صعب بالنسبة الي وضروري اتأكد من گلب فاهد قبل لا اخطي هالخطوة وياه..

-فاهد: اخوانج الـ**** الخايسين الجرب شوكت يعوفونا بحالناا؟؟

-كيان: ميعوفونا لان اني ماريدهم يعوفونا

-فاهد: خاالو انتِ كبرتي وتزوجتي وراح تصيرين ام قريبااً لا تظلين معتمدة عليهم!

-اصير ام شنو؟ هاي شوكت؟

-اليوم لو باجر بالزايد

-ههههههههه تغني انتَ فهيد تغنيي

-ليش اغني؟!!

-لان مستحيل اسمحلك تلمسني مرة ثانية لا تروح زايد بأحلامك

طفر من الچرباية على حيله اخترعت والله حتى الگاع طلعت صوت من ثگله..

-ليييش؟؟؟؟

-لان احنه راح نتطلگ

جفلت يابسة بمكاني من اخذ جنطتي الشخصية محطوطة على الفراش شالها ورگعها بالحايط الي بصفي مباشرةً چان ضربتني لو متحركة شعره!!

-كياااااااااان لا تلعبييييين بأعصابيييي

-ردت تضربني فاهد؟

-لااااااا

-لا ردت تضربني شمرت الجنطة عليَّ وچان ضربت جسمي

-سكتييييي كااافي سكتتتتي لا تحچييين بعععدد

-ليش ما احچي؟ وصلت بيك المواصيل تمد ايدك عليَّ فاهد؟ هيچ تفسر انتَ رايدني؟ مو بس رايد جسمي ورغباتك؟

صفن بعد جملتي صفنة مطولة رمش بعيونه وبلع ريگه، هز راسه بـ لا عدة مرات وگال ناهي وبشدة..

-لا مو صحيح.. لا لا مو صحيح هذا الحچي

-لعد شنو الصحيح؟

-اني لو اريد جسمچ چان اخذته من زمان وبالغصب بس مو هاي غايتي لا لا

-ما سويتها لان من شروط العقد متسويلي شي بدون رضاتي مو لان انتَ متريد

-عقد شنوو؟؟ لج اني اصلاً معتترف بالعقد؟؟!!

-مو مهم تعترف او متعترف اخواني ميخلوك تسويلي شي بدون رضاتي لو مو اخبي عليهم راح تطلع بالنهاية ويكتشفون وتصير دم!!

-على هذا حچيچ ليش ساكتة وما اعترفتيلهم زواجنا چذبة ومدبر من شمسون؟!

سكتت ماعرفت شجاوب، فاهد ميعرف شمسون بيمن مهددني وبيمن لاوي ذراعي عباله خايفة لا تطلع سالفة ثامر بس ميدري شمسون متحلف لاخواني ويريدله حجة حتى يكتلهم ويخلص منهم واعترافي على عمايله وشنو يسوي بيه تبعاته اشوف اخواني سابحين بدمهم!

-كيان: اني طالعة تعبت

سحبني من ايدي يلويها وره ظهري بدون لا يوجعني ونتر بوجهي بعيون دامية مخيفة..

-شترديني اسوي؟؟ ساارة حلمم عمري وعفتها شتردين اكثر؟!!

-بطل هالسالفة فاهد كل شوية ومذكرني بـ سارة اذا هيچ متحسف عليها وبراسك مجاي تطلع روحلها ولا تظل تاكل بروحك!

-مو برااسي!!

-مو براسك وانتَ هذيت بأسمها قبل شوية بأذاني؟!

فتح عيونه ما مصدگ اي نعم مرتين صاحلي سارة واني بلعتها وسكتت حتى ما اخلي الموضوع براسه يكبر واخلي ينتبه بس طفح الكيل!

-عالج حبك وهوسك بـ سارة وتعالي.. هاي اذا لگيتني موجودة

-شنو قصدج

-قصدي واضح فهودي الطلاق ماشي واخواني يستحيل يوافقون ابقى وياك بعد خصوصاً شُهيب حاد سنونه عليك وما طايق علاقتنا وحقه! حقه مية مرة لان يعرفك شنو يعرف اخوه من ينهوس بشي ميطلع من راسه الا تطلع روحه بالاول!!

نترت ايدي منه ونزلت اخذت جنطتي اليدوية وطلعت وسديت باب غرفتي ورايه، عبرت الغرفة الي حرگها وتذكرت النار! النار منو طفاها؟ بس ما فكرت زايد من نزلت شفت الحماية ايدهم مصخمة واضح همه تدبروا الامر وحلوا سالفة النار الهايجة..

-كيان: عندي ثلاث جنط فوگ تگدرون تجيبيوهم بلا زحمة؟

-الحماية: تم

تلفتت ادور فاهد طلع لو بعده ارتاحيت من ما شفته موجود وكملت بهمس..

-كيان: مو هسة من يطلع فاهد ماريده يشوفكم تطلعوهم لا يأذيكم

-الحماية: خلينا نبلغ كابيتان فاهد يكون تفضل

-كيان: لا واذا بلغتوه ماريد تجيبوها اني ادز عليها عود

-الحماية: خلص نجيبهم حاضر سيدتي

هزيت راسي وطلعت من البوابة لمحت فاهد يجي ورايه يمشي سريع عرفته راح يسوي مصيبة ويه مروان ركضت ركض لسيارته فتحت الباب وگلت بسرعة..

-اطلع اطلعع بسررعة

-مروان: شصاير؟

-كيان: فاهد رجع امشيي خلينا نروح مناا

شغل السيارة وحركها فوراً وشفنا فاهد يطلع يركض ويصيح ويفشر علينا، عصب مروان من كلامه ووگف بنص الشارع ينزل يتكاتل وياه ولزمته اتوسل بي يعوفه..

-عووفه مرواان فدوة اني استفزيته بكلاميي وضوجته

-وللللج يسب ابووووية تاااج راااسه هدينييي

-مروااان بداعتييي بروح ابوووك اگعددد

عطت مفزوعة من فاهد ضرب جامة مروان حتى يفتحله الباب وما خلى فشار على مسبة ما سبه بيها، ركزت بملامحه عيونه حمر وعروقة بارزة اكثر فاهد تعاطى مرة ثانية!! تعاطى من تركته بالغرفة وهذا سبب ما نزل ورايه فوراً وهذا يفسر هيجانه المخيف هسة!!

-فاهد: افتتتح الباب ولك افتححححووو الباااب لا اكسررهااا واكسر راااسك ال*****

فتح القفل مروان يريد ينزل وقفلت الباب من يمي اترجاه يعوفه مستتحيل مروان راح يگدر لفاهد وهو بهالحال وماعرف شلون راح تكون قوته هل اعصابه راخية لو راح يكون قوي اضعاف ماعرف!!

-بداعتيي مروان اذا تجبنيي اذا تعزني عووفه وامشيي معليك بييي هو مو صاحي عووفه

فشر مروان عليه وشخط السيارة وطلع منا يسوق سريع ويضرب على الستيرن ويصيح بغضب موتني من الخوف تخيلت بأي لحظة يلزمني يگطعني تگطع..

-مروان: ولللج هذااا الطايح الحظ ال***** يسب ويفشر عليناا وتردين تبقين وياه؟؟؟ ***** على شرفييي لو بقيتي ويااه دقيقة ولج كياااان باااجر ترحين للمحكمة تلعنين والدييه ونطلگكممم

-مروان حباب

-اششششش ما اسمع حسچ سكتييي بعدها تدافعله هالخبيل المرييض!!

-خلي شُهيب يرجع فدوة هو يعرف لاخوه

-محد يرجععع سكتيي خلي شُهيب بضيييمه

-مو..

سد حلگي بـ ايد ويسوق بـ ايد بچيت خايفة واحسني تايهة، من باب فاهد ينرادله جرة اذن ولازم اخواني ياخذون موقف ويوگفون ويايه گدامه حتى يعرف عندي سند ومن باب اني ماريد اعوفه واريد ابقى وياه..

وصلني مروان للبيت وتخبل بالزايد من عرف ما جبت جنطي ما انتبه اجيت خالية الا من وصلنا للبيت، نشوان سأل شصاير وليش مروان معصب وشرحتله كلشي صار بالباب..

-نشوان: يا عااار يا فاهد ولج يسب اهلج الميتين كدامج وتسكتيله؟

-لا ابدد ما اسكتله والله وما اقبل عليه بس هسة شكله مو صاحي اني استفزيته نشوان ودست وياه بالحجي

-نامي نامي باجر نسولف

-باجر مروان يريد ياخذني للمحكمة يطلگنا تشوان حباب خلي ينتظر علما يرجع شُهيب بداعتي

عافني ما مهتم لتوسلاتي ولا لتوصياتي ونزل، انتظرت شوية ونزلت اتسمع عليهم على الدرج اشوف نشوان يحجي بهدوء ومروان شعلة موقدة من النار وبيده علاجه مال اعصاب طلع ثلاث حبايات وطبگهن يبلعهن سوه ويرعد من العصبية..

-نشوان: اهده مروان صلي على محمد كلشي ينحل وهاي الامور تصير بين كل المتزوجين

-مروان: ولك تجاوز علينا كلنا يريدني اطبگ السيارة حتى يكتلها ويكتلني مستوعب ليا مرحلة من الخبال واصل هذا؟؟

-نشوان: عصبي فاهد گلبه طيب بس عصبي وهو يحب اختك واحتمال كلام كيان چان جارح وطلعه هالشكل لا تذب اللوم بس عليه اللزم كيان وشوف شنو حچت وياه حتى نعرف شلون نتصرف

-مروان: شُهيب ما قابل على علاقتهم گلي راح يتعبها ولازم نطلگهم بأسرع وقت اخوه الي هو اخوه گال فاهد مو مناسب لاختك استوعبووو

-نشوان: اوافقه الرأي بس كيان تحبه وهذا اختيارها

-مروان: خ** على الحب الي يذلنا ويستنزف طاقتنا نشوان ولك هاي بنتنا كيان مو اختنا احنه ربيناها سووه ربت بين ايدي وايدك وايدين شُهيب شلون ننطيها لواحد مريض نفسي يهلكها ويذبل وردتنا؟؟

-فعلاً كيان متغيرة هواي وواضح التعب عليها

-شوف شكلها شلون ذبلان هاي الوردة المتفتحة هيج يصير بيها من وره رجال؟؟ نععالي على الرجال الي يزعلها ويقلق راحتها نرجعها النا هواي احسن يوم يومين تزعل وتطخ وتستوعب فاهد خطير وما يناسبها

-خليها تهدأ هسة وترتاح كم يوم يمنا لا تفتح وياهة موضوع الطلاق بروح امك لا نزيد وضعها سوء امتحانات جايه هالفترة خليها تركز بيهن علما تكمل يكون شُهيب راجع ونگعد نشاوره وناخذ رأيه بخصوصها

-استغفرالله ربي واتوب اليه!!

-مروان شُهيب بحسبة اخوها وهو اخو فاهد الحل الأنسب ناخذ رأيه وحكمته بهيج امور وانتَ تعرفه شگد يحب كيان وشگد مدلعها ومدللها اكيد راح ياخذ الحل المناسب ويريح اختنا من هالهَم

-تمام

تركتهم ورجعت للغرفة ذبيت روحي على الفراش وموتت نفسي من البچي اني شسويت!! شسويتي كياان شسويتي!!

بقيت بهالحال التعيس ثلاث ايام متتالية انصدمت صدمة عمري من رقم غريب راسلني عرفته فاهد من اسلوبه، دزلي رسالة كاملة يحجيلي شنو راد يسوي بـ سارة وشلون حچى وياهة وشلون خافت منه وووو.. كلشي كتبه برسالة وحدة وكتبلي "هذا الي اتذكره" ودزه ماعرفت شنو غايته وليش كتبه هواي ساحگ بالكلمات وداز بعض الايموجيات ويه الكلام وهاي مو عادته عرفته مو صاحي شديصير وياك فااهد شديصير ليش دتتعاطى وتشرب لهدرجة مو راح تكتل نفسك!!

اليوم الرابع رجع شُهيب اخيراً وضعه تعيس وعيونه جواهن هالات، رحنا للمطار نستقبلهم هو و سام ومسرة وجهها مگلوب ووضعها مو احسن منه لزمت ايدها امشي وياهة واسئلها شصار جاوبتني بخفوت..

-مسرة: ماعرف عن شي

-كيان: شلون انتِ مو چنتي وياه؟

-اسمي وياه بس ما طلعنا وما اللتقينا ولا مرة غير بيوم رجعنا الاطلس

-شبي الاطلس؟؟

-قصة طويلة كنو

-المهم هسة احجيلي ما تطورت اموركم للاحسن؟

-لا لان بعد لا شفت شُهيب ولا شافني تخيلي خمسة ايام احنه بنفس الفندق گاعدين هو يطلع من الفجر وميرجع الا تالي الليل وبوجهه لغرفته يبقى ساعتين ويرجع يطلع وهكذا وضع اخوچ ميطمن كيان وگلبي راح يوگف عليه

-سام بعده يراقبه؟

-لا ما جازفت بـ سام اكيد شُهيب راح يحس عليه يمشي وراه عفته وحده لان تطمنت شمسون مو بالمغرب ماعرف وين مولي هارب مادري شصاير بي ومالك وگع بيها متورط

-عززا شلون؟؟

-كللشي ماعرف والقران هسة بطريق رجعتنا عود گعدنا سوه شگد حاولت اسحب لسانه بس عبث هالرجال ميطلع من حلگه شي!

-ياربي معناها حالته النفسية مو زينة يارب يكون مالك بخير

-شبيچ انتِ تعبانة؟

سولفتلها كلشي يخصني اني وفاهد بطريق الرجعة ظلت فاتحة عيونها وما علقت بأي شي، رجعنا سوه لبيت ماريا شُهيب سلم على العلوية وراح لغرفة امه رحت وياه شفته يبوسها ويبوس ايدها وحط راسه بحضنها تعبان..

-ماريا: شبيك ماما شهوبي

-شُهيب: تعبان يمة

-ماريا: شبيك وليدي الحلو

رفع راسه يباوعلها بادلت نظرته بأبتسامة ومسحت على وجهه بأصابعها المصبغة، باست خده على كيف وگالت بخفوت كأي انسانة طبيعية بعمرها..

-شبي روح امه

ابتسم شُهيب وحضنها يحط راسه على كتفها، من الاوقات النادرة جداً ماريا تكون بيها طبيعية نوعاً ما وتحجي بأسلوب البالغين بس ميطول الموضوع دقائق معدودة وواضح اليوم من هاي الايام النادرة وهالشي خفف على شُهيب لان بقى بحضن امه هوااي..

-ماريا: ها شهوبي احجي

-شُهيب: مالك

-شبي ملوكي؟

-مالك بورطة چبيرة

-شلون؟؟

-واحد من حلفاء ابوية خانه وطلع مستندات مالك موقع عليهن بدال ابوية ووگعن براسه جاي يهدد ابوية من خلاله وابوية باع مالك ما مهتم

-وهسة شلووون

-ماعرف شلون حاير وراسي دايخ شلون اطلعه منها شلون

رجليه متحملني بعد ماكدرت ابقى واكفة اكثر دخلت الغرفة وگعدت على الكرسي اسمعله وهو يحجي ويه امه بصوت مكسور ويفكر بصوت عالي..

-شگد كتله مالك انتبه من ابوك مالك ابوك يوگعك تاليته لا تسلم رگبتك بيد ابوك بس بعد ما يفيد الحجي، شمسون استغل ولده بوضع صعب وخلاهم يوقعون على كل اعماله الوصخة!

-كيان: اكيد انتَ راح تساعده مو شُهيب؟

رفع راسه من حضن امه وانتبه لوجودي، مسح عيونه التعبانة ورجع شعره الناعم وره وزفر نفس..

-شُهيب: كيان مادري بيج هنا

-اسفة

-لا تعتذرين تعالي

رحتله وحضني يمسح على راسي ويبوسه، دفنت وجهي بصدره اشبع من حنانه وخانتني دمعة يتيمة گلبي يوجعني عليه وعلى اخوانه وعلى وضعي التعيس شلون راح تخلص هالحياة شلون راح تنتهي هالقصة مادري..

-كيان: شهوبي

-ها حبيبتي

-راح تساعد مالك مو؟

رفعت راسي واني بعدني بين ايده، بلع ريگ وغمض عيونه ثواني قبل لا يهز راسه بـ اي ويگول بهمس وكأنه ميريد احد يسمعه..

-اكيد

-تگدر؟

-احاول

-ما راح تعوف اخوك شُهيب مو؟

-مستحيل

-انتبه على نفسك امانة

-ان شاء الله حبيبتي

-ابوك وين؟

-ماعرف وين ارضه من سماه

-صدگ تحجي!

-اختفى بعد الطرگاعة السواهة وسحب كل فلوسه عجزت ادوره صار ثلاث ايام ما خليت معارف ما دخلتهم ما خليت دنيا عالم الكل يگلي ماله اثر لا اسمه موجود بالمطارات ولا اله وجود بالفنادق

-عجيب وين راح معقولة هرب!؟

-مصيبة اذا هرب

-ليش؟

-لانه موقع مالك وفاهد على كل خياساته

-عززا بعينيي فااهد

-اششش صوتج كيان

-فاهد يصيرله شي؟؟

-لا مالك ذب كلشي براسه هالغبي!

-شُهيب حاول بكلشي تگدرله مالك يحتاجك

-واني احتاجه

همسها همس ما طلع صوت قريتها بشفايفه، ابتسمت ورجعت احضنه دقايق وتذكرت شي..

-شمسون ليش هرب؟

-لان جد الاطلس تدخل ولافها عليهم لوف

-جد الاطلس مو ميت؟

-ابو امه هذا اسمه عبد الرحمن من اكبر تجار الخليج وعنده معارف بكل بقاع الارض

-يمة صخام وشمسون يخاف منه؟

-شمسون ميخاف من احد كيان يخاف من شي واحد بس وهو الفلاش وكل المستندات الغير قانونية، لو الفلاش طلع للعالم يروح بيها سجن هو وكل الي طلع صوته بالتسجيل

-شنو بي هالفلاش؟

-فيديو لجرائم قتل بشعة

-زين شُهيب هـ...

-لا كيان ما راح اجاوب زايد عرفتي بما يكفي

-مو اني بس قلقة

-لا تخافين ما يلوحج شي

-مو الي اخاف عليك وعلى اخوانك

-اني ما عليَّ شي واخواني ما اسمح لاحد يطخهم بسوء

-شكراً

-كيان بيناتنا هذا الكلام وانتِ هم يمة ميطلع لبشر ممنوع منعاً باتاً يطلع هذا الكلام من هاي الغرفة على الاقل احتفظوا بالسر بينما اخلص مالك من هالمصيبة

-كيان: حاضر

-ماريا: يصير اگول للعلوية؟

-شُهيب: لا يمة اهم شي العلوية ما تعرف

-ماريا: مو هي صديقتي صارت

-شُهيب: اوقات لازم نحتفظ ببعض الاسرار لنفسنا حبيبتي

-ماريا: مو اني احبها واحب اشاركها

-شُهيب: واني احب مسرة واحب اشاركها بس اخاف عليها يمة سمعي الكلمة حبيبتي حتى اجيبلج هدية

-ماريا: تمام تمام بعد ما احجي بس شنو الهدية؟

-انتِ شنو يعجبج؟

-ماريا: اريد مكياجات ماركة

-شُهيب: باجر هنه يمج

-ماريا: واريد حذاء كعب لونه احمر

-شُهيب: تمام

-ماريا: واريد كالون مشبچ

-شُهيب: يمة شتسوين بي!

-ماريا: حلوو ذاك اليوم شفت مسرة لابسته بالغرفة

ضرب وجهه شُهيب بأيده مفتشل متت من الضحك وگوة حصرت ضحكتي هاي وين شافتها وشوكت مسرة لابسة كولون مشبچ شو اني ما شفتها؟

-شُهيب: يمة مو حلو لا تشترين منه

-ماريا: چذاب انتَ كلت لمسرة حلو

-شُهيب: يمممة انتَ شمعرفج بكل هالاشياء؟ تتسمعين علينا!

-ماريا: لا لا والله بس.. بس هاي يله باي اني رايحة العلوية تصيحني

ركضت تطلع من الغرفة فرطت من الضحك عليها وشُهيب يهز براسه مأيس من سوالفها..

-كيان: فد تغار من مسرة بس تموت عليها

-ادري بيها

-تگول مسمس اخذت شهوبي مني

-مسمس منو؟ بس لا مسرة؟

-اي تصيحلها مسمس بس مو بوجهها تخاف ههههههههههههههه

ضحك وگام يعدل بملابسه، ذب نفس واندارلي ينبهني للمرة الثانية وقبل لا يكمل گلت..

-وعد ميطلع شي من الغرفة

-تمام، محتاجة شي؟ اني طالع

-سلامتك حبيبي

-حاولي تغيرين جو لمسرة وتحاچيها اعرفها قلقة وخايفة عليَّ وجاي احاول ابتعد احل الامور بعيد عنها حتى ما تدافعلي بطريقتها كالعادة وبدال ما نصير بمصيبة وحدة نصير بمصيبتين

-شهوبي هي تدافعلك لانها تحبك وتخاف عليك

-اعرف بس هاي المواضيع حساسة وخطرة على انثى حتى لو چانت مسرة قيثارة راح تبقى انثى رقيقة وتتهدد بسهولة من يتكالبون عليها مجموعة چلاب نابحة

هزيت راسي اوافقه الرأي وطلع من الغرفة ومن البيت بكبره، گعدت بالصالة اشوف جنات گاعدة مطنگرة والعلوية تولول ومسرة متمددة على النص وفيروز تبرد بأظافرها..

-العلوية: عمية عيني ان شاء الله لو غفت وما شفتك يما مَلللللك

-فيروز: علويتي قبولتي حبيبتي سمعتي شُهيب شگال؟ گال مالك اضطر يبقى بالمغرب لان عدهم شغل ما كمل ليش تردي يأخر شغله مو خطية هذا هم باب رزقه

-العلوية: اي يما بس گلبي نار على وليدي بس خلي يجاوب اتصالي كلشي ما رايده دخيلك يا علي

-فيروز: جناوي عرفتي ليش مالك ميجاوب؟

-جنات: لااع

-فيروز: ليش ولج غير تعرفين رجلج وين

-جنات: احنه متزاعلين

-فيروز: مسرة شُهيب ما حچى شي؟

-مسرة: نون

-العلوية: شنهي؟

-كيان: تقصد لا

-العلوية: لا بعلي صاحتلي نون

-مسرة: لا علوية دا اگول لا وطلعت نون معناها لا بالفرنسي بس فعلاً لا ماعرف شي عن مالك اني وشُهيب متزاعلين

-العلوية: چا وانتِ ولج؟

-كيان: اني؟ اني وفاهد هم متزاعلين

-العلوية: وسممم شمالچن على ولدي لاا تبزوعنهم ببداية زواجهم لا يرحون يدورون غيرجن خاايبات

-جنات: اصلاً راااح دور وخلصص الله ياااخذه

-العلوية: شني وللج

-جنات: علوية اني ماريد مالك مااريده اكررهه

-العلوية: انچبيي تكرهه ام الگمل طايح بيدج مَلك النساوين تتچاتل عليه

-جنات: گبرر لفهن ولف شكوولهن مااريده تعب نفثيتي خلي يروح للنثواان وموظفاته المعفناات

گامت تدردم ومحروگ دمها صعدت لغرفتها وبعد ما طلعت منها حتى من راحتلها العلوية تفتهم شبيها ما حچت شي بس تحرگ بروحها ومُصرة متريده ولو يصير ملاك هم متباوع لوجهه بعد..

نص الليل واجه فاهد للبيت يريد يبات هنا شردت لغرفتي وقفلتها عليَّ ظل يدگ بالباب ويصيح عليَّ حتى افتح والعلوية تخبلت من شافتنا بهالحال بس ما وگفت وياه بالعكس فزعتلي وطردته من البيت وگالت اعرفه مسودن اكيد هو مزعلها..

دگ عليَّ هوواي وحضرته رجع دگلي من ارقام ثانية واني احضر واحضر واحضر ما فتحت الإتصال الا من بزعت روحي و وصلني صوته يگول بلسان ثگيل عرفته سكران..

-فاهد: الوو.. الوو تسمعين صوتي شبيچ ما تحچين؟ اختنگت وضاگ صدري من البُعد مليت..

-كيان: تستاهل!!

-فاهد: ولچ لا لازم تجاوبيني.. لازم جربتها وما وفت وياك.. وعلى الباعت عمرها لخاطرك رديت

-شهالمسلتة فاهد؟؟

-مو مسلتة هذا شعر يشگچ ويشگ اخوانچ ثمنطعش شگة

-ولي بلووووك

-لا لا اوگفي شبيچ اريد احجي

-روح انتَ سكران ميطلع منك بس التمسلت!

-تطلع اشياء اخرى هم

-فااهد انتَ ردت تكتلني وفشرت عليَّ خاف نسيت!!

-ما ردت اكتلچ وراس مالك وتعرفيني ما احلف بي چذب وماتذكر فشرت هذا افتراء

-لان چنت مطفي طبعاً متحس!!

-ما فشرت كيان لا تچذبين

-فاهد تعبت منك انتَ طالق طالق طاالق

-هههههههههههههه يا بعد گلبي

-ولك طلگتك!!

-ههههههههه ما يمشي الطلاق هيج سألت على عنادج

-ليش عيني شلون يمشي لعد؟؟

-اله صيغة معينة شنو تمسلت هو وتصيحين انتَ طالق

-صدگني طلگتك

-نووو ما طلگتيني ماي لوڤ

-واذا اريد اطلگك شگول؟

-مادري بس الشيخ گال اله صيغة معينة ولازم شهود اكو، هه والله حلوة ياهو الاجه وصاح انتَ طالق لا هاي هي الدنيا كلها تصير مطلقات وارمل

-ارامل ليش؟

-لان من الصدمة الرجال راح يطلع بالشارع ويندعم سيارة ويموت وهيچ راح تكون هم مطلقة وهم ارملة لانها بالعدة ههههههههههه

-گبررر على هالتفاهة!!

-گبر ليگبرچ بنت الچلب

-انتَ ابن چلب!!

-اتفق

-وين انتَ شدتصخم؟؟

-دايح وتايه

-حييل تستاهل

-كوري رجعيلي ابوس ايد امج

-امي ميتة!

-هو لان ميتة ومستحيل راح اكدر ابوس ايدها گلت هيج

-فاهد تحلم تحلم تحلم تحلم تحلم تحلمممم

-افتهمت شبيچ انچلبتي

-يله روح ماريدك ومروان متحلفلك الا يطلگني منك

-خوش

وسد التلفون بوجهي!! سد الاتصال بوجهي!! فزيت من مكاني اباوع واتأكد هذا هو سده لو اني بالغلط سديته بخدي؟؟ ثواني ورجع اتصل يصيح..

-نذذذلة ليش تسدين الخط بوحهي!!!

-مو اني سديته

-سديتي لا تلوفيها عليَّ!

-ولك مو اني.. يااا فاهد خاف خدي هذا؟

-اذا خدودج خدود سنجاب طبعاً راح يسدن الخط!

-لا تتنمر على خدودي عابتلك

-يلا ولي

وانسد الخط مرة ثانية!! والقران مو خدودي السدت الخط مرة ثانية اصلاً شلون تسده؟ ثواني ورجع اتصل فتحته وهالمرة اني انهديت بي..

-ولكك ليشش تسد الخط بوجهي؟!!!

-هاا هاي خدودي

-ولي فااهد انتَ چذااب وكشفت نفسك!!

-شكراً

-على شنو شكراً؟؟

-يعني ما ترهم اگول شكراً؟

-اكيد لا!

-كيان شبيچ اني دايخ وهسة جاي اشوف هيزل اربعة

-هيزل منو؟؟

-هاي الحتيت الجاي تصبلي *****

-غبيي عاار ووصخ انتَ فااهد!!

-الله شكراً

-ايييع ولي راح اسد الخط

-هههههههههههه تره بالمرتين اني سديت الخط ولفتها عليج هههههههههه

غلقت جهازي كله وشمرته شلع گلبي هالغبي ولا يگول اخوه بمصيبة بس شُهيب گال فاهد ميعرف بـ مالك متورط عباله باقي هناك علمود الشغل..

ثاني يوم حسيت الصبح على رادمة فدشي هيج يجي يركض ويشمر روحه على چربايتي المكسورة، فزيت مرعوبة اعيط لثواني عبالي هذا فاهد اجه حتى يعتدي عليَّ وانصدمت من شفتها..

-فيروز!!

-فيروز: هلو كيااان هلوو صباااح الخييييير

-كيان: صباح النور بس شبيچ الضحكة من الاذن للاذن؟

-فيروز: لو تعرفين البارحة شصااار

-شصار؟

-مسرة عرضت عليَّ اشتغل بشركتهاااااااا

-وااااو صدگ؟؟

-والله العظيم البارحة رحتلها للغرفة العلوية كالت روحي تطمني عليها خاف تخربطت شفتها كاعدة والحاسبة كدامها تشتغل، بقيت يمها اسولف شوية وعرفت اني اختصاصي تخطيط عمراني وكلش شاطرة وطلعت من الاوائل سألتني كم سؤال وجاوبتها و فوراً وبدون مقدمات گلتلي شنو رأيج تشتغلين يمنا بما انچ باقية هنا!!

-الله الله الله الله محظوووظة انتِ فيروز الشغل يمهم يجنن وفد ونسة عدهم افضل فريق وافضل طاقم عمل وكلش كلش خوش رؤساء شُهيب ومسرة ومتعاونين جدااً

-ولج حمستينيي گومي گومي اختاريلي لبس هسة راح اروح وياهم

-كيان: اني هم اجي وياچ اليوم ماعندي محاضرات كومي

گمنا سوه غسلت وفرشت اسناني تريگنا وصعدت اختارلها ملابس ولو ما احتاج لان ذوق فيروز يخبل باللبس، لبست تنورة بف سودة طولها تسعين وقميص ماروني غامق دخلته بالتنورة ولبست شال وبوت اسود طلعت تخبل تخبل تخبل!

-كيان: ستايلچ يجنن

-فيروز: حياتيي يله خلينا نطلع

-جنات: ذني وبن رايحات الططوات

-فيروز: هلو بومة اني رايحة لشركة مسرة وشوشه

-كيان: شوشه منو؟

-فيروز: شُهيب شبيچ

-جنات: شكد متثتحين

-فيروز: باااي سلميلي على ميموو جنات

وطبعاً ميمو هو مالك والله يا فيروز عليج سوالف، طلعت ورحت وراهة طايرة طيور مثل الفراشة اخذنا تكسي وتوجهنا للشركة الطريق كله تطگطگ بأصابعها وتگول..

-كيان اگلچ اني لو جايبة cv ويايه؟

-ميحتاج ماطول مسرة عرضت عليج الشغل معناها شافت مهارتج

-تمام

وصلنا الشركة نزلنا وقبل لا ندخل عزمتها على گهوة، لملمت روحها بالجاكيت وگالت وهي ترعش..

-اشااااه باااردة

-كيان: اليوم عود الجو زين

-مجمدة وتمشين بيها مو دولة

-فيروزة انتِ راح تستقرين هنا مو؟

-فيروز: اي وراح اعيش ببيت ماريا بطلب منها

ابتسمت وهزيت راسي، گمنا اخيراً نتوجه للشركة دخلت فيروز مبتسمة وعيونها تدور بالمكان بس مو بطريقة وحدة ما شايفة وانما بطريقة وحدة حابة تستكشف المكان الراح تشتغل بي..

-فيروز: لطيفة

-كيان: كلش، هي مچانت هيچ مسرة هواي غيرت بيها وضافت لمساتها

-هلووو هلوووو هاي انتِ ذاااك اليوم شفتتتچ

فكيت حلگي وعيوني عزه هاي شهلاء؟ شجابها هناا معقولة وظفوها ومسرة قبلت؟!!

-كيان: انتِ شهلاء مو؟

-شهلاء: نعم نعم اني

-كيان: بديتي شغل هنا؟

-شهلاء: ايي هذا فد واحد هو وظفني كللش حباب وابتسامته حلوة

-كيان: اكيد نشوان

-شهلاء: يجوز لان يشبهچ وعيونه مسحوبة بس فد خوش رجال

-جولي: هلو كيان

-كيان: هلا جولي انتِ تعرفين بشهلاء بدت تشتغل هنا؟

-جولي: اي

گالتها وگلبت عيونها معاجبها وعبرتنا، غمتها شهلاء خفيف وتسوي نفس حركاتها..

-شهلاء: شگد مغرورة اوووع

عافتنا وراحت، كملنا حديثنا اني وفيروز و دخلنا نعبر الممرات واسمعلها تحچيلي عن شغلها السابق موتتني من الضحك من گالت تركت الشغل لان مديرها الي بگد جدها الطايح حظه الزاحف السلبوح التمساح القرد المگمل اعترفلها بحبه وخطبها وكتل روحه عليها واجه لبيت اهلها حتى يخطب..

-كيان: چذاابة

-فيروز: والله وما اسولفلج ابوية عيونه صارت بگصته وطرده بتسعة وتسعين نعال

-كيان: بس حقه فيروزة لا تلومي انتِ حلوة وكلشي بيج حلو ويجذب طبيعي تعجبي

-اي كيان بس مو واحد عمره 67 سنة

ضحكت وضحكت فيروز على ضحكتي ونزلت تسد سحاب بوتها الي انفتح وگفت انتظرها ورفعت عيوني على صوت ثنين فاطسين ضحك وبيدهم ملفات شغل..

-كيان: نشوان فاضل هلووو

-نشوان: هلا هلا

سلمت عليهم ومحد بيهم انتبه لـ فيروز البقت نازلة لزگت بالگاع مادري شبيها متگوم، اخيراً وگفت على حيلها خدودها متوردة ومبتسمة بخجل عكست عيونهم عليها وفجأة فاضل فتح عيونه وصاح..

-فاضل: اعوذ بالله!!

-فيروز: نعم؟

-فاضل: بسم الله الرحمن الرحيم

-فيروز: شنو السالفة المن شايف جني؟؟

-فاضل: احم.. لا.. بس..

-نشوان: هههههههههه مستحيل

-كيان: هاي شبيكم؟ سيد شسالفة ليش بعدك مصدوم

-فيروز: اني طالعة منا كيان

-كيان: لا فيروز لحظة..

ما اهتمت دارت وجهها تريد تطلع منا ونشوان بعده يضحك اما فاضل تغير وراح وراهة يصيحلها..

-فاضل: انسة فيروز.. عفواً انستي ممكن بس دقيقة

-فيروز: نعم؟ اكو بعد تسبيحة ما سبحتها تفضل گولها ماريد احرمك من الاجر خطية

-فاضل: اعتذر من حضرتچ يمكن ردة فعلي چانت قوية

-فيروز: ردة فعلك على شنو؟

تقدمنا اني ونشوان الي لسة مبتسم وعيونه تلمع مادري شسالفته وگفنا بجانبهم وفيروز تباوع لـ فاضل وهذا انگلب حاله صار لا ياخذ ولا ينطي بعد..

-فيروز: واضح انتَ ما حاب تحچي شي من رخصتكم

-نشوان: انسة فيروز فاضل بس مصدوم لا اكثر

-فيروز: مصدوم من شنو؟

-نشوان: لان هسة چنه بطاريچ هههههه

-فاضل: نشواان!!

-نشوان: شسالفة سيد عادي هسة شصار

-فيروز: مدا افهم شي

-فاضل: مو اله تفتهمين انسة فيروز واعتذر على ردة فعلي ما قصدت شي ربي شاهد

باوعتله ومبين لسه زعلانة هزت راسها بـ اي ورجعت منين ما اجينا، انقهرت عليها وعصبت منهم شنو هالاستقبال التافه الصار بوجهها اول ما دخلت الشركة شبيهم ذولة المسودنين!

-كيان: من صدگ عيب عليكم وانتو متستحون!

-فاضل: يا ربي شلون موقف

-نشوان: صدگ موقف زبالة بس شبيك انتَ انثولت ما حچيت

-فاضل: ولك شحچي هسة عبالها جاي اتحارش بيها!

-كيان: هسة غير يحچوون

-نشوان: فاضل البارحة حلم بـ فيروز ههههههههه

-كيان: چذاب

-نشوان: وعلي وچان يسولفلي الحلم وشلون اثر بي وگعد يفكر بيها طول الليل

-كيان: هههههه مو حلم هذا هاي بصيرة عندك فاضل ماكو هيچ صدفة

-فاضل: من شفتها انصدمت ماعرف شصارلي عبالك طفرت من راسي وصارت گبالي گلت هذا جن وظهر امامي يريد يتلاعب بعقلي والعياذ بالله

-كيان: لا لا هاي فيروزة واجت تريد تشتغل هنا

-فاضل: عليج العباس ابو فاضل؟؟؟

-نشوان: هااا سيد هااااا

بلع ريگ وفوراً شدد على ربطة عنقه ويعدل بجاكيت بدلته الرسمية ويگول بهدوء..

-فاضل: احم.. اقصد صدگ راح تشتغل هنا؟ عجباً لماذا؟

-كيان: لانها استقرت هنا

-فاضل: يااا علي!!

-نشوان: سكتي مو راح ينجلط الرجال

-كيان: فاضل انتَ خربت لقائك بـ فيروز مع الاسف من هسة حطت عليك اكسس چبيرة

-فاضل: لا كيان ما معقولة مستحيل

-كيان: يستحيل نعم لان اهم شي عدنا اللقاء الاول يله باي رايحتلها اني

عفتهم ورحت لـ فيروز لگيتها واگفة بباب الشركة مكتفة ايدها ومطنگرة، ابتسمت على شكلها خشمها صاير احمر من البرد وبشرتها شحبت..

-كيان: حلم بيج

-فيروز: منو؟

-كيان: فاضل حلم بيج البارحة فـ من شافج انصدم

-ما اصدگ

-والله العظيم هسة گال نشوان عباله طفرتي من راسه وطلعتي على ارض الواقع

بقت ساكتة ولمحت طيف ابتسامة ينرسم على وجهها، فوراً خفتها وگالت تمثل البرود..

-يله خلينا نرجع وماريد اشوف وجههم بعد

-ولج نشوان شعليه

-اي معليه بس هيج ميعجبني اشوفه خلينا نفوت

لزمت ايدي وجرتني تفوتني، بوجهنا رحنا لمكتب مسرة دگينا الباب سمحتلنا بالدخول والصدفة لگينا فاضل هنا عدها بس شافنا فوراً عدل وگفته وسوه مساحة لـ فيروز تتقدم..

-فيروز: صباح الخير

-مسرة: صباح النور اهلاً حبيبتي فيروز نورتي المكان

-فيروز: منور المكان بيچ ست مسرة

ابتسمت مسرة ومدت ايدها تعرف فيروز على فاضل..

-مسرة: سيد فاضل مهندس مدني شغله خاص على مشاريع البناء وترغيب المستثمرين.. فاضل هذي فيروز اختصاص تخطيط عمراني وراح تبدي بالشغل ويانه من اليوم اتمنى متقصرون وياهة

-فاضل: اكيد مدام

-مسرة: تگدرون تشوفون شغلكم

طلعت فيروز ويه فاضل بملامح جامدة تختلف عن قبل شوية، شفت الندم بنظرات فاضل وانرسمت ابتسامتي على وضعهم شگد لطيفين..

-كيان: مسرة شفت شهلاء هنا

-مسرة: ادرري شفتها هالـ.... استغفففر الله!!

-تگول نشوان وظفها

-لاا مو نشوان هذا مروان بس نشوان گللها ابدي دوام ياااربي راح انفجر من هالمخلووقة

-الله يساعدج زين ما صار تقدم بينج وبين شُهيب؟

-مالك رادوا يغتالوا كيان صدگ هالحچي؟

-كيان: شلون عرفتي

-مسرة: وصلني خبر وانصدمت

-كيان: وصارله شي؟؟

-مسرة: ماعرف گالو اختفى اثره واتوقع هذا السبب شُهيب قلق ووضعه متغير

-اكيد هذا السبب يبقى اخوه

-لچ عيني شلون بينا لو اجه الدور لـ شُهيب وفاهد

-لا حبابة الله لا يگولها شهوبي اكيد راح يحل الموضوع

-شيحل؟ كيان بس فهميني شنو يحل تعبت من هالوضع الزبااالة

عاطت منهارة اعصابها وشمرت مقلمتها بالگاع، غطت وجهها بأصابع راجفة وتتنفس كأن راح يخلص الهوا.. ما اللومها لو شگدما تكون ردة فعلها عنيفة ما اللوم مسرة لان وضعها بالضيم! حرفياً مثل الشايل بيده ثلج وخايف يذوب هيچ علاقتها بـ شُهيب تخاف بأي لحظة ياخذوا منها وينحرمون من بعض للابد!

رحتلها اطمنها وفاجأتني من حضنتني بقوة تستمد من قوتي، ابتسمت وحاوطتها بأيدي اهمسلها كلمات عسى ولعل تريحها..

-كلشي راح ينحل مسرة صدگيني

-خايفة

-لا تخافين حبيبتي

-اخاف كلام مالك يكون صح وشُهيب يموت بسببي

-اسم الله مسرة لا تحچين هالحچي لا تذبين اللوم على نفسج

-ما ذابة اللوم على نفسي بس مالك اكثر من مرة گال عوفي شُهيب راح يهلك بسببچ وينتهي وهاي گدام عينچ دخلوا شُهيب بألف مصيبة في سبيل يتخلصون منه ويبعدوا مني

-ماعرف شگول والله تايهة حالي من حالج

-راح احل هالموضوع اني راح اشوف حل لو ابقى على شُهيب يتدمر ويشبع عذاب ويبقى ممهتم

-لا مسرة لو متدخلين احسن

-ما راح اتدخل بس اساعده بشي واسنده بدون لا يحس

-شلون؟....

**

-علوية اني عندي أمتحان بمادة ونثيت كتابي ببيت مالك رايحة اجيبه وارجع

-العلوية: يما لا ترحين وحيدچ انتظري فيروزة تروح وياچ

-لا الثايق واگفلي بره ما اتأخر يله مع الثلامة

لبست القبوط فوگ تراكي مال بيت مالي خلگ ابدي والقبوط مغطيني كلني وطلعت ويه السايق لبيت الططوة بس دخلت لفرع بيته ابتسمت بدون لا انتبه لروحي واول ما ركزت على نفسي كفخت خدي راشدي حتى اثگل وما اترعن بس والله مكانه يجنن وبيته يفتح النفس..

نزلني السايق وگتله ينتظرني علما ادور الكتاب وارجع، فتت للبيت ونزعت القبوط والشال ينرادلي سنة ادوره مادري وين دفنته..

صرت افتر بالبيت الفارغ وادور كل مكان مشكلتي اشمر بالكتب وما اتذكر وين اوديهن هاي لوما مالك يلملم ورايه چان حتى أني مضيعة روحي هنا..

فتحت اضوية البيت اليوم الجو كئيب والدنيا عصر البيت اظلم واخاف ابقى وحدي، عقلي كله ويه كلام شمسون النذل من گال يفوتون عليچ ويكتلوچ لا من شاف ولا من درى وكلامه صحيح لان صارت بيه مرة والا شوية ردت اموت!!

الف وسواس صار براسي والله تعبت من القهر شجاريلي على هالعيشة، فتحت كنتور مالك ادور بي واخترعت من شفت حاط ثلاث طلقات "چيلات" موگفهن بالخانة.. سديت الكنتور بسرعة وصرت ادور مثل المخبلة واتلفت كل مكان ارجف اخاف يفوتلي احد، انتبهت على الشمس غابت خفت اضعاف تأخرت كللش تأخرت ياربي شلون بيه..

طلعت من الغرفة بعدني واگفة دا اصعد الدرج وعيوني نطت ويه صوت فتح الباب ركضت بكل سرعتي للغرفة صرت ادور على المفتاح بقلب ينبض بعنف، راح اموت من الخوف شسوي بروحي راح يجوني راح ياخذوني..

يأست اللگه المفتاح طفيت الضوة و طبگت باب غرفتي ورحت اختل جوه الچرباية اصم بحلگي حتى ميطلع صوت انفاسي، اختل توازني من شفت شخص لابس بوت اسود يدخل للغرفة ويقترب من الفراش احس روحي جاي يسحبوها ماكو مفر بعد رحت بيها اليوم اني مقتولة مابيها مجال..

صرخت اغمض عيوني كاتمة صوتي وابتعد ادحس روحي بنهاية الچرباية من شفته يمد راسه جوه السرير وموجه ضوء فلاش عليَّ..

-ورووحها لامي اني معليَّ هو المجرم مو انيي هو الكتل ولدكم واذى بناتكم ويتم اطفالكم والله هوو مو اني روحوله لا تجووني ماعرف شي اني مااعرف والله تعبت تعبتتت رحمووني كااافي

اعيط وابچي وارجف واحلفلهم بروح امي اني معليَّ بلكت الله يعوفوني..

-رحم الله والديچ

فكيت عيوني على وسعها ويه صوته ركزت انظاري عليه ما اشوف شي بس ظلام والضوه عليَّ صاير عادم الرؤيا عندي..

-هاي كلشي ما سويتلچ وكتيتي الأول والتالي، لا انتِ كلش مو خوش شريكة

-ولللك هذا انتَ يالعااار

-استغفر الله من لسانچ

مد ايده يجرني من رجلي يطلعني من جوه الچرباية مثل الجريدي من الفشلة بقيت ممطولة بالگاع وهو فوگ راسي مگنبص..

-يتم اطفالكم واذى بناتكم وذبح زلمكم معقولة اني مسوي كل هالشغلات؟

-واكثررر

-لعد شگد نذل اني

-توك دريت؟!!

انلصمت من لزم حنچي بخفة بدون لا يأذيني فتحت عيوني على تصرفه شبي هذا شراح يسويلي يمة بس لا يذبحني..

-انتِ شلون وياچ بس فهميني شلون

-شلون

-چنچ فارة تتختلين وتخافين من خيالچ وبس يمي لسانچ الف مترة

-لانك مو امان وواحد نعال

سحبني من ياختي يگومني من الگاع وگفت بسرعة قبل لا يمسح بكرامتي الاراضي وقررت استرد قوتي واغردله..

-شوف لك ابن العار قندرون اني بنت امي ومحد يگدرلي اللعب بيكم....

انچبيت من جرني من خصري يقربني عليه صرت مثل الطرنة لا اخذ ولا انطي من حركته المفاجأة وكلامه الهادئ وانفاسه الحارة اللاهثة عبالك چان يركض قبل لا يجيني..

-اتوقع لازم نشتغل اكثر على موضوع لسانچ الوصخ

-ولي

-اني ابتليت بيچ بلوة تدرين؟

-واني بلوني بيك ثانياً تعال تعال لا تظل تاكل شكر شلون عفتني هيج لو تريدهم يموتوني؟؟

-فنهم

سكتت اباوع بعيونه وگلبي ينبض بقوة قربني منه اكثر وهمس بيني وبينه..

-ابقي يمي وبأمانتي وخليني اشوف كلب ابن كلب يتقرب منچ

-هو انتَ ويردون يكتلوك يومية دازيلك واحد

هز راسه مبتسم موافق كلامي، جفلت من تقرب ينزل روحه لمستواية يطبع قبلة خفيفة على خدي نزولاً لحنچي، غمضت عيوني بقوة من همس بأذني بنبرة خافتة بطيئة كزبرت جسمي..

-اخاف اموت وتظلين حسرة بگلبي

جمدت ما جاوبته ماعرف ليش ما غردت لو طلع صوتي، ابتسم يمسح على خدي بأبهامه واردف بنبرة ساكنة حنونة..

-متعود على العنف والخشونة، على الاغتيالات والعداوات، اسلحة بيدي وسچاچين بجيوبي، صلخ وجَلد وكتل كل هذا وما متت.. بس راح اموت.. اموت لو انمست شعرة وحدة منچ يا اترف شي لمسته ايديه

طبع قُبلة خفيفة على فكي، اقشعر جسمي واحس رجليه بدت تنمل سمعت ضحكته الخافتة وانتبهت على روحي ودفعته من صدره بقوة..

-تضحككك عليَّ!!

-هههههه شلون بفهاوتچ انتِ

رصيت على اسناني بعصبية وفشلة صدگ شلون! فشلت روحي وخزيتها بس ماعرف شبيه اصير موطة سايحة من يحچي ويايه هيچ..

-مو فاهية اني!

-لعد الفهاوة شلون تصير بعد

-مالك اسكتتت يا خاااين يا زندديق

-استغفرالله سوتني زنديق

-رووووحلها رووووح خلي مرااايم تفيدددك

-اها هذا موضوعنا

-اي نعم!! مالك اكرررهك والزهرة لو لزمتك الا اشلعع لحمك شلعع بأثنانييي

-عنيفة

-مااااللاااااك

-نعم

-ولي عن وجهي ما طايقتك طلگنييي بثرعة

-ما اطلگ

-طلگني ووولك

-ما اطلگ

-صخام ولطام بوجهك ان شاء الله يا....

انكتمت من سحبني من فچي انگطع وياهة نفسي، رص على اسنانه بقوة ونزل ينتر بوجهي بخفوت بدون لا يعلي صوته..

-ما اطلگ لان كل الكلام الوصلوه الچ وشنو جاي تتخيلين ما صار! وحق من انزل القران وروحها لامي العزيزة وراسها للعلوية وراس اخواني اني ما احب هاي البنية! حاولت اخليها تتزوجني اي حاولت لان ابوية رادني اوصل لشركة الاطلس بأي طريقة كانت ردنا معلومات عنهم وزلة نلزمها ضدهم وجبرني اتقرب من هاي البنية عسى ولعل تكون مفتاحنا! هسة تگولين ليش جبرك وشلون جبرك وليش متگدرله هذا بحث اخر وشرح مطول بس جناات انتِ لاازم تعرفين رگبتي بيد ابوية! لاوي ايدي وكاسر خشمي بشغلات توديني وره ستين شمس وبس يخلص مني يندار على اخواني واني مستعد يبقى العمر كله ملتهي بيه ولا يأذي شعره من اخواني!!

-متحبها؟

-لا!

-ما عجبتك؟

-عجبتني ليش اچذب

-الله يااااااااخذك چذذب لمرررة وحدة چذذذب

-لخاطر الكعبة مو اعجاب نفس الي ببالج يا مسطية اعجاب بثگلها وما انطتني مجال شلعت گلبي وما طلع منها شي ولا بمقدار شعره بس ما احبهاا استوعبي هالشي!!

-روح مقهورة منك!

-جنات طليقها وجماعته تهجموا عليَّ واخذ ثاره مني وصارتلج عركة من عركة كل هذا وما دافعت عن نفسي ولا هالگدد!! كله في سبيل يوصل الكلام لابوية حتى يتفركش الزواج وينهي الموضوع ويعوفني

-وعافك؟؟

-بدون اضرار قصدج؟

-اي!

-لا طبعاً هم حصلت نصيبي بس خليني احتفظ بهالجانب لنفسي

-تستاهل!! ليش تروح الها؟؟ ليششش خو جيبو معلوماتكمم من غير مكان لو الا من النثوان يا عاشقيين النثوان!!

-غباء بس تعالي قنعي ابوية

-وما عرفت تگول لابوك غباء؟؟

-گتله هاي البنية واضح ما تعرف شي بس ركب راسه وبعد شيقنع راس شمسون المعنجر

-مالك من الاخيرر لو هاي البنية منطيتك مجال ومتزوجها راح تكمل حياتك وياهة؟؟ وهالمرة يا وييلك اذا چذبت!!

-ليش يا مرة مچذب اني؟

-احچي يله

-لو على حياتي قبل اي اكمل وياهة

-يعني تكمل؟؟؟

-جاي اگلچ قبل يا بنية قببل يا راس البندق!

-انتَ رااث البندق

-قبل بمعنى قبل لا تدخلين حياتي وقبل لا اعرفج وقبل لا تخربطين عقلي وگلبي بلسانچ الوصخ!

-انتَ لـ...

-انچبي وخليني اكمل

-لا تغلط

-انچبي!

-حاضر

-جنات لا تكونين عجولة خليني اكل تبن واكمل كلامي فهمتي لو افهمج بطريقتي؟

-عشتوووو هم اله عين و....

لصمني لصم من لزمني وقبلني قُبلة سكتت شكو لغوة ناوية احچيها، شكو رزالة، شكو عركة محضرتها، شكو مغثة ونكد اريد اسطر راسه بيها نسيت وخرب عقلج جنات على هالنسوة!

-مالك: جنات اني تعبان

-هاا..

-تعبان محتاجچ

-شثوي

-لا تتفهين

-هاا

-ششششش كافي سكتي

-ثكتت

-جنات تثقين بيه؟

-شلون

-صدگتيني وعرفتي مالي نفس بغيرچ؟

-لا

-انچبي وصدگي

-تضحك عليَّ

-مستحيل اسويها ماگدر

-ليش؟

-لانچ نقطة ضعفي الجديدة جنات

-ما اصدگك انتو كلكم چذابيـ...

-احبچ

-يمة

-احبچ وعيوني يمچ وتوگف ما تشوف غيرچ

-دخيلك يا علي

-ادري الفرق بيناتنا چبير ويمكن تشوفين علاقتنا مو صحيحة وچنت مثلچ بس ليش هسة ما جاي اشوف أصح منچ تشاركني حياتي؟

-يالزهرة ام الحثن

-يمكن اليوم اني يمچ وانتِ بيدي باچر ماكون موجود

-ليش

-ابوية ورطني بشي چبير وبصعوبة گدرت اطلع من المغرب بأسم وهمي

-مالك شنو قصدك؟ يعني راح تروح مرة ثانية؟

-ويجوز ما ارجع

-لاا حباب لا تگول هيچ فدوة ترجع والله ترجع خلي ثقتك بالله عالية

-عقلي مو وياي غلط وجودچ يمي واني بهالحال رجعي للبيت لا تبقين هنا

-اريد ابقى

-روحي گلت بسرعة لا تظلين هنا

-ماروح فهمني شبيك

دفعني على ميز الكومدي انرگع ظهري بي، ركز عيوني بعيونه وحچى بجدية وبدون مراوغ..

-تثقين بيه جنات؟

-اثق

-بعد ليلتنا هاي يمكن ما نرجع نلتقي ويه بعض وتكون وداعيتنا

-مالك لا تخوفني بطل من هالتشائم

-سمعيني زين واستوعبي حتى تكونين بالصورة، جنات انتِ مو غبية انتِ جداً ذكية وملاحظ هالشي عليج بس مشكلتچ برائتج واني ميت على ما اللوثها تقبلين بهالشي لو لا!

-هاا..

-لا تتفهين وجاوبيني بعد ليلتنا هاي ما راح ننجمع مرة ثانية راح تبقى اخر ذكرى بيناتنا وراح اشرحلچ كلشي قبل لا اتخذ أي خطوة تقبلين بهالشي لو لا

-اني خايفة

-لا تخافين اني جاي احط اسوء الاحتمالات يمكن شُهيب يلگه حل ويطلعني من هالورطة وارجع بس مع ذلك لازم تعرفين قبل لا نخطي خطوة جديدة بعلاقتنا

-شكراً

-على شنو؟

-شكراً لانك صادق وياي رغم ماعرف شنو راح يصير بث واضح خطير مالك شكراً لانك ما تغشني وما تاخذني على گد عقلي

-مستحيل اسويها واني انطيتچ كلمة رجال ما يصير شي بيناتنا الا من تكونين مستعدة بالكامل.. انتِ مستعدة جنات؟

-مثتعدة

تغيرت نظرته وابتسم ابتسامة خافتة، نبض گلبي بقوة وضليت لا اخذ ولا انطي، شدد على خصري بقوة يقربني ويسمحلي احط ايدي ثنينهن على صدره..

-ما راح تندمين

-على شنو؟

-هسة تشوفين بنفسچ

شهقت مصدومة من سحبني من ياخة تيشيرتي و.....

**

"مسرة"
رجعت للبيت هلكانة عقلي تعب ما افكر بشي غير شمسون وين؟! تمددت بفراشي اني وملابسي دقايق واتصلت بيه صبا راح تجي فرحت بجيتها على الاقل اللتهي وياهة، نزلت جوه احضر اكل للسهرة فتحت چبس وحب وكرزات وحطيتهن بصحون واجتني ماريا لابسة كعب وتفتر بي..

-ماريا: هلو مسرة

-مسرة: هلو گلبي

-ماريا: اليوم اشتريت مثل كعبچ

-مسرة: يجنن يروحي

-وحطيت مثلج صبغ اظافر اسود شوفي

مدت ايدها تراويني ابتسمت ومثلت الانبهار المبالغ بي..

-واااو ماريا يجنن كلش حلو علييچ

-احلى عليَّ منچ مو؟

-مو

-مسرة اريد اصير مثلج

-حبي انتِ احلى مني

-لا اريد اريد اصير هيج قصيرة

-ماريا ليش تتنمرين

-احب اصير قصيرة

-تقبلين نتبادل؟

-ايييييي

-لو يصير تدللين بس خلص انكتب عليَّ اني اكون قصيرة وانتِ طويلة مثل شُهيب وهالشي حلو كلشش

-شهوبي ميحبني مثل قبل

-لا ليش هيچ تگولين

-انتِ اخذتي وبعد ميحبني

-بالعكس يموت عليج وانتِ نمبر وان بحياته

-گولي والله

-والله واوقات اغار منج اني على گدما يحبچ

-گووولي والله

-هههههه والله

-يمممة حبيبي ابني هذا ابنيي اني تعبت بي وجبته احببه اني هو كلشيي بحياتي

-شوف الصدفة وانتِ كلشي بحياته

-هو كلچ؟؟

-اي هو گال وحتى گلي مسرة اني احبچ بس امي حبها غير ومحد يجي بمكانها

-اني فرررحانة شكرراً مسرة شكررراً واني احبه حبيبي هو ووليدي وگلبي احبه

-يا عمري ربي يديمكم، صدگ خالة اريدج تسولفيلي على طفولة شُهيب هم چان خوينس؟

-لا چان هووواي يبچي واتذكر من يبچي بالليل چنت اعوفه بالصالة واني اروح انام واسمعه يجر البچية للصبح اجي اللگاه صاير ازرگ ونايم ههههههه

صفنت استوعب، متت قهر چان يبچي بالليل وتطلعه يظل وحده بالصالة وميسكت الا ينام ويصير ازرگ؟؟ هاي بغمى عليه مو ينام!!

-چنتي تنقهرين عليه؟

-ليش؟

-يعني هو بيبي عنوني وانتِ تعوفي يبچي وحده

-مو اكون نعسانة

-اممم، منو رباه وياچ؟

-صديقي ومثل اخوية بس مات

-الله يرحمه هو اهتم بـ شُهيب؟

-لا محد اهتم بـ شُهيب

-يعني ربى وكبر وحده؟

-يعني اي مادري نسيت يله باي اروح اشوف مسلسلي

طلعت تهرول بس مرتبكة وتتهرب من الاجوبة، زفرت نفس منزعجة اتخيل شلون عاش شُهيب وشلون كبر عندي فضول عجيب متعلق بي وكل يوم يكبر ويكبر هالفضول..

وصلت صبا واجت ويايه ترتب النمنمات حتى نصعدهن فوك، بينما احنه واكفات نسولف اجت كيان تهرول..

-مسرة مسررة

-مسرة: هناا اني هنا

-كيان: هلوو هاي شنو صبا هنا شلونج ولج

-صبا: زينة شبيچ ملگوفة قاطعتي حديثي الشيّق

-كيان: اكيد حديثچ عن مروان

-صبا: لو تعرفين شنو جابلي على عناادج

-كيان: شجابلج ولج

-صبا: باعييي

مدت ايدها صبا تراوي الخاتم الجابه الها مروان ذهب ابيض وكرستال ناعم، ضيگت عيونها كيان بالچذب تداهر صبا..

-21 سنة اني اخته ما فكر يجيبلي هدية حتى عيد ميلادي يقشمرني ياخذني لمباريات اني ونشوان وانتِ ما صارله يومين خاطبچ وددددگ هداياا بختتتت اي والله بختتت

-صبا: يممة اسم الله عليَّ وعلى حبيبي خمسة وخميسة بعين الحساد والحقاد ياربي

-مسرة: شو دسكتن دخت

-صبا: كيان تره هاي چذابة لو تعرفين شُهيب شنو جابلها من راح للمغرب ذيچ المررة

-مسرة: تفووو عليج شنو ماكوو خصوصية

-كيان: فضولي تضاعف اعرف شنو جابلج مسرة

-صبا: جابلها سوار خصررر

-مسرة: الله ياخذج فضحتينا

-كيان: الله شلون صاير هذا؟

-صبا: ولج باعي مو تلبس احم احم اي هو فـ تلبس السوار على خصرها هو زنجيل طويل وبي فيكة وشغل يخبل كلش نازك هاچ اراويج هاي صورته

-مسرة: ألف الحمدلله من صورتلج لابسة بلوز جوه چان فضحتينا بين العربان

ضحكت ممهتمة وراوت كيان الصورة وهسة حمدت الله الف مرة مو بس مرة لان صورته الها واني لابسة داخلي اسود مغطي جسمي هاي فضيحة صبا، بس اوووي دا اشوف الصور وتذكرت ولا انسى من جابه الي ولبسنياه يخبل حبيبي والله ذواق..

-كيان: تره يشگ!! الا اشتري نفسه

-صبا: واني راح اشتري هم

-مسرة: اشترن اشترن حسرة على الوحدة تبقى مميزة شوية

-صبا: حب قلبي الاكسسوارات للكل المهم كيان شبيچ ليش دخلتي تركضين انتِ وهاي گذلتچ چنچ صخلة يتيمة

-كيان: مصيبة مصيببة

-مسرة: يا ستار شصاير

-كيان: فاهد بنات مسوي حفلة بييته راح اموت قههر منه هالعفونة

-مسرة: اگلچ هو من قبل يسوي شنو الجديد؟

-كيان: بس صارله هوواي ممسوي وخابرتني هسة ام خالد تگول وضعه كلش مو زين شارب وصاير طلي وقبل شوية سوه مشكلة ويه واحد ورفع عليه سلاح تخيلنن

-صبا: عزه بعينه هذا شبي تخبل

-كيان: ام خالد اتصلت بيه وددگ رزايل الچلبة ما خلتني حتى ادافع عن نفسي كل كلمة والثانية تگول بسببج هذا حاله وتخبل من عفتي لليوم هو متسودن و من اخذتي جنطچ ما خلى شي ما كسره بالبيت

-مسرة: اممم خاف تضحك عليج حتى تروحيله؟

-كيان: حتى اني فكرت بس لا هاي نذلة هي اصلاً متريدني ومتحبني

-صبا: زين هسة شنو راح تسوين؟

-كيان: مسرة فدوة

-مسرة: شنو

-كيان: فدوة لا ترديني حبابة

-مسرة: ولج شنو احجي

-كيان: اخذيني لبيته

-مسرة: خو گوليها كيان ليش مستحية؟ تردين هموسي يطلگني وميباوع بوجهي بعد موو؟

-كيان: لا ولج ليش هسة شكو بس تأخذيني نشوف المسودن ونرجع

-مسرة: والقران يتخبل عليَّ لو عرفني ماخذتج شُهيب ميقببل كيان والله ميقببل

-صبا: ديلا سرور سهلي امر وديها راح تموت الطفلة

-كيان: صبا انتِ هم اريدج تجين

-صبا: هههههههههههههه خليني اروح للمحكمة قبل لا اروح وياچ

-كيان: شتسوين بالمحكمة؟

-صبا: اتطلگ وارجع ليش اهين روحي واخلي مروان يسحل كرامتي الگاع ويعوفني؟ خو اني اختصر الموضوع واروح بنفسي

-كيان: بنات لا تبالغوون شبيچن صايرات هشات وياهم وينهن اليرعدن رعدد بشخصياتهن وحضورهن والكاريزما والشجاعة والكرامة والـ...

-مسرة: راحن حبي راحن

-صبا: صفرنا حبيبي وعزلنا كافي نريد رجولة وطز بالباقي

-كيان: ياا صدگ چذب ما عرفتچن لعد شخصيتچن وين

-مسرة: صبا اني عندي شخصية؟

-صبا: لا ابد واني؟

-مسرة: ماكو مصفرة انتِ فرد نوب

-صبا: اي مو اگول

-كيان: بناااات

-مسرة: حبي تروح الشخصية والسلطة والخرط هذا كله فدوة لاخوچ ابو شعر الحلو المهم زلمتي وابو بيتي وحبيبي والروح والرية راضي عليَّ

-صبا: اني حتى الفشار تنازلت عنه لخاطر اخوچ الصاك كيان شتحچين انتِ

-كيان: هههههههههه نيالهم عليچن اتشاقه وياچن والله ونجحتن بالاختبار راح اوصل هذا الكلام الهم

-مسرة: لج لااا عزه هسة يشوفونا ساحلات ارواحنا عليهم وتطير الهيبة فوگما هي طايرة

-صبا: اي وربي المهم كملي على موضوع فاهد شوكت نروح؟

-مسرة: صبااااا

-صبا: حبي خطية هاي الفقيرة شنو ذنبها تنام مكسورة خاطر اليوم

-مسرة: صبا انتِ بس تتلوگيلها لانها اخت مروان

-صبا: ليش انتِ متتلوگيلها لانها اخت شُهيب؟

-كيان: احم احم نحن هنااا

-مسرة: ردت اگول اني احب كيان وماكو حاجة اتلوگلها بس يلا خلينا نروح لبيت فاهد نطيح حظه ونرجع

-كيان: وييين وييين تطيحين حظه فوگما هو طايح؟؟

-مسرة: لحظة هو شمسوي؟

-صبا: أتوقع گالت خاينها؟

ضربت جبينها كيان بقوة جزعانة، ضحكنا اني وصبا على سوالفها كيان كلش بريئة وشكلها لطيف والكل يموت عليها من تعصب لان وجهها وخدودها البيضة يصيرون حمر وعيونها تدمع فوراً واتوقع فاهد ماخذ هالشي لصالحه ويعصبها كل يوم حتى يشوفها بهذا الحال اللطيف..

-كيان: بله نبدل بس بنات اريد اللبس شي حلوو هيچ ويجذب كلش

-مسرة: وصلتي امشي وياي

طلعنا سوه من المطبخ ووصللنا تغريد العلوية ترزل وتهزأ بجنات لان هسة ياله رجعت! الساعة عبرت الـ 11 بالليل هاي وين چانت وحدها!

-العلوية: يالعايصة النايصةة وين چنتي بت الچلبب

-جنات: ببيت مالك

-العلوية: زاااع گلبي من الخوف عليچ برب*** ويننن موليه هناك وحددچ شگيت زيجي من وراچ گلت راحت البت ومحد من الويلاد يجاوب والبنيات ملتهيات وفيروزة مطمورة وانتِ داايحة بنصاص الليالي!!

-جنات: اءء.. چنت.. چنت ادرث هناك علوية واخذني الوقت

-العلوية: امشيي وليي لغرفتج ماريدن اشوف چهرتچ بعدد

ركضت تصعد الدرج مبين بس تريد تفلت، لافة نفسها بالشال مالتها وضابته حيل ومكمشة بي تخاف يوگع، وگفت كيان بوجهها متخوصرة ومضيگة عيونها..

-كيان: وين چنتي خية وليش وجهچ هيچ احمر؟

-جنات: صيني وخري ميتة تعب بث اريد انام

-مسرة: شبيچ جنات قلقتينا كأن مو على بعضچ

-جنات: لا لا.. لا مابيه شي رايحة انام

ركضت لغرفتها وطبگت الباب عليها وقفلتها لحظة ليش من شوكت جنات تنام وحدها؟ هاي شبيها البنية وشصاير وياهة؟

-كيان: اممم قلقتني هاي الگملة بس خليني افرغ واستلمها

-صبا: اي لا تعوفيها خطية صغيرة هاي

-مسرة: امشن نبدل بسرعة وباعي كيان يصير ميصير فوراً اتصل بـ شُهيب وابلغه كلشي

-كيان: تمام

دخلنا لغرفتي وطلعتلها فستان مني نتلابس ويه بعض بس هي اطول فـ ما رهملها الفستان طلع كلش قصير، جابت بنطرون اسود چارلز من ملابسها ورهمتلها من ملابسي قميص بيجي بردانات باف يلمع كله بكرستالات سودة فخم كلش.. باوعتلها من المراية طالعة تموت!!

-صبا: مستتتحيل الجمال مستتتحيل

-مسرة: المكياج خفيف لو ثگيل تردي؟

-كيان: اريد ثگيل سموكي

-صبا: لو خفيف كنو احلالچ

-كيان: نو نو نو مليت منه حطولي شي اريد يخبله

ضحكت وبديت اشتغللها بمكياج ترابي سموكي وكحلة سودة غامقة ياببة شلون جمال طلعت محد متعود عليها بهيج مكياج ولا احد شايفها دائماً مكياجها ناعم او تكتفي بـ تنت ومسكارة..

-مسرة: ناااااار يا حبيبي ناااااار

-كيان: بنات يجننن طالعة اخببل شكراً مسرة

-مسرة: اخوچ راح يزاعلني ويگول هتكتي براءة اختي العنونة بس تدللينن

-صبا: رفعيلها شعرها مسرة كله والگذلة خليها تطلع شوية منها

سوينا مثل متكول صبا ولبستها اكسسوارات وكعب عالي من صدگ انبهرت معقولة هاي كيان اللعابة الكورية؟؟ ولكم هاي غير وحدة!

-كيان: عطر نسيت العطرر

-مسرة: حطي من هذا عطره راقي

-كيان: لا اوگفو اجيب مالتي الفراولة

-صبا: حبي ماكو رجال راح ينجذب لبنية ريحتها فراولة

-كيان: لعد شلون عطوري كلهن هيچ

-مسرة: اصبري اختارلچ اني

-كيان: لا باعي مو هو متعود على عطري و..

-صبا: كيان!

-ها

-صبا: انچبي!

رشينالها من عطري وبدلنا احنه وطلعنا نتسحب من البيت كلشي ولا تلگفنا العلوية، سقت اني لبييت فاهد وحاطة ايدي على گلبي شجاني وصايرة خوافة بس مترددة لان كيان ويايه وماريد ازعل شُهيب مني حتى لو موديتها لبيت زوجها بس هو ميقبل خصوصاً شكل كيان وتوترها واضح وضوح الشمس اخوانها معارضين روحتها هناك..

وصلنا اخيراً لبيت فاهد ووگفنا على جهة نتفق اتفاقاتنا، تقربت مني كيان تهمس..

-كيان: مسرة اريدج تبقين ويايه من اروحله وصبا انتِ ابقي حرسيلنا البرة خاف يجون اخواني

-صبا: شنو چلب واحرسلچ البره!

-كيان: لج اقصد راقبيلي خاف واحد من الحماية يبلغهم او ام خالد تدگ بيه الناقصة وتتصل بيهم

-صبا: تمام فهمت

نزلنا ندخل للبيت ومثل اول مرة ميدخلون الحماية بس الي اسمهم موجود عدهم، مجرد شافوا كيان دخلوها بدون سؤال واحنه وياهة..

طبينا البيت مگلوب گلاااب الدنيا محترگة هنا واغاني صاخبة جداً تزرف طبلة الاذن، دورنا على فاهد بعيوننا ماله اثر سألنا كم واحد محد يعرفه وين الى ان كيان راحت على واحد من الحماية وگللها گاعد بالصالة الچبيرة ويا للعجب گاعد وحده!

صارت تفرك بيدها متوترة واندارت الي شجعتها بهزة راس حتى تروح وسحبتني من ايدي وياهة ادخل شفناه گاعد متوسط المكان الخالي وحوله كاسات فارغة من الكحول وبطالة فارغة كذلك..

-كيان: الغبي!

-مسرة: اني سعيدة لان هموساتي ميشرب

هزت راسها توافقني الرأي وتقربت كم خطوة منه ووگفت تباوعله من بعيد، جلت حنجرتها وگالت بصوت ناصي..

-فاهد

ما انتبهلها رجعت صاحتله بصوت اعلى هم ما مركز تقربت اكثر وصاحت بصوت عالي كلشش ياله اندار يشوف منو وفوراً عگد حاجبه متسائل ثواني وتوسعت عيونه ووگف على حيله..

-فاهد: كيان؟

-كيان: عيونها الكورية

-فاهد: هاي انتِ هنا؟؟

-كيان: مادري يگولون

-فاهد: لا ما اتوقع

-فاهد اني هنا

-ما اصدگ

-اهووو فاهدد ركز ويايه اني هنا موجودة

-لا مو هنا انتِ بعقلي

-والله هنا والله!!

-اششش عقلي اسكت انچب كوري مو هنا نام نام

گعد على القنفة وحط راسه عليها يغمض عيونه يريد ينام، ركضت بسرعة تگعد بصفه ولزمت ايده تعصرها وتكرر..

-شوف اني هنا اگعد فاهد شبيك

-الله

-ها شبيك؟

-شلون ايدين حلوة

-فاهد انتَ صاحي؟

-لا

-ولك شبييك اصحى ويايه

-الله

-فاهدد

-كوري راح اموت

-لاا شبيك لا تگول هيچ حباب والله اوهوس

-ااخ گلبي يوجعني اختنگت

-فااهد فاهد اصحى خرب حظي هاي من المخدرات ياا غبيي راح تموت بسببهن

-اااااااااخ

-يبووووو عمت عينيي ولك گووووم حباااب راح امووت

-اااخ يا زمن نن نن نن نن

-يا عااار يا حققير موتتني من الخوف!!

-ههههههههههههه اجيتيني كوري

-لاا رايحة لحفلة عزموني هنا

-يا خ** هاي؟؟

-مادري قريبة من بيتك يصيرون جيرانك

-اشتعلوو اهلج هاي الكشخة لذيج الحفلة؟؟

-اي

-سممم ومرررض

-روح معليك انتَ

-هاي شنو الجوزي اليلمع فوگ عينچ يشگ شگ بنت الصخخل

-انتَ ابن صخل!

-ولچ تملخين خرب روح امي مو بنية ضييم

-هفف وخر رايحة اكمل سهرتي

-وين ويين؟؟ ما تروحييننن

هجم عليها يعقچها وينام فوگاها حرفياً متت من الضحك على عياطها وهو تخبل انگلب اسد على فريسته، واگفة على جهة اني بطلب من كيان ما اطلع بس شو حمت الأوضاع يمهم قيّد ايدها وره ظهرها وهي خنست هاي شسالفة نسوني لو شنو؟

-فاهد: شگيتي امي كوري كافي عاد

-انتَ مو علساس سكران ومسويلك طرگاعة؟

-يعني اجيتي علمودي مو علمود سهرة ذولاك العارات حيراننا

-غلط رايحة الهم لان انتَ متهمني بشي

-بس انتِ تهميني

-لا تحاول فاهد ما احبك

-كيان فرفحتي گلبي وفحمتيني كاافي

-اكرهك

-واني اكرهچ

-ما اطيق شوفتك

-مو بگدي

دمعت عيوني بشوفتهم، محد بيهم انتبه لوجودي واگفة على الصامت ردت اطلع اكثر من مرة بس ماعرف شبيه لزگت، ذولة الاغبباء يحبون بعض وديعترفون بعكس الكلمات يارب تنحل امورهم ويرتاحون.. مبتسمة واسمعلهم و گلبي يتگطع بنفس الوقت على حالي وحُبي العقيم اوف شُهيب وينك مشتاقتلك موت الله يشعل ابوك ويخلصنا من ضيمه..

-كيان: انتَ واحد نعال

-وانتِ نعالة شنو رأيچ نجيب نعالات كوريين صغار؟

-ما

-حبابة

-فهود

-اشتعل فهود

-اني زعلانة

-نعال على اليزعلچ

-انتَ مزعلني

-نعال عليَّ ونعال على امي وابوية هم

-انتَ صاحي فاهد؟

-اصحى من كل يوم

-انتَ واعي على نفسك يعني؟

-كللش

-انتَ گلت لام خالد تچذب عليَّ وتگول عنك متخبل بغيابي؟

-اني صدگ متخبل على غيابچ ومهدود حيلي يا كل حيلي

-شنو تريد مني

-اريدچ كلچ اريد فرصة وراح ابقى اطلب فرصة

-اخاف تخذلني

-عوفيني بأول موقف غلط يصدر مني استاهل

-لا تكسر گلبي والله تعبت

-ما عاش اليكسر گلبچ

-اخواني يتبرون مني اذا عرفوا اني هنا

-اني احاچيهم

-حتى تتكاتلون

-لا اصير حباب وخوش رجال وعد

-تعتذر منهم؟

-اعتذر ليش؟؟

-انتَ فشرت على مروان وتجاوزت عليه وهو ممسويلك شي

-هاي شوكت؟

-اهووو فاهد طبعاً متتذكر

-تمام اعتذر لخاطرچ

-صدگ والله؟

-اي والله

-يعني...

ما خلاها تكمل الكلمة وهجم عليها فتحت عيوني مصدومة عزا عزا هاي كيان نست وجودي صخام!! طلعت من الصالة بسرعة وسديت الباب عليهم اعوفهم وحدهم يعيشون الحُب بدون تدخلات تمنيتلهم التوفيق وان شاء الله يجيهم نعال كوري صغيرون على طلب فاهد..

وگفت بالصالة المقابيلهم هوسة تخنگ هنا كومة ناس وگفت شوية انتظر كيان ما رجعت، طلعت تلفوني اگلب بي وانتبهت جايني اشعار من شُهيب فتحته بسرعة شفته كاتب..

"وينچ مسراتي؟"

ابتسمت وگلبي صارت بي نغزات، فوراً جاوبته بدون تردد..

"انتَ وين؟"

"اجيت للبيت ردت نطلع سوه وما لگيتچ متوجه لبيت ابوچ انتِ هناك مو؟"

"اني جايتك اختنگت اريد اطلع وين انتَ؟"

"اني اخذچ"

"حبيبي اني اريد اسوق"

ضربت ايدي الكتبت كلمة حبيبي خرب رووحج شبيچ نسيتي نفسج يا ثولة! كتبت فوراً..

"حبيبي للاستهزاء عزيزي مو تكيّف"

"اني بالـ(مكان مقابيل نهر)"

"جايتك"

دزيت رسالة لـ كيان اني رايحة مبين راح تبقى هنا اليوم فاهد مستحيل يعوفها، الرجال ميت عليها وفرحتلها كللش صح علاقتهم ما مفتهمتها بس الحب واضح بيناتهم..

لگيت صبا كاعدة بالحديقة تراسل مروان گلتلها اوصلها بطريقي ما قبلت اخذت تكسي ورجعت لبييتها واني رحت لمكان شُهيب بقلب ينبض عشق مجنون..

ركنت سيارتي ونزلت اللف نفسي بالجاكيت بارد الجو يگص گص وگدامنا مي يزيد الجو برودة تمشيت شوية ونزلت الدرج بالمكان الفارغ الوقت متأخر من الليل وهالمكان بالعادة يكون فارغ ومهجور..

شفته من بعيد شعره الحلو يطير ويه الهوا ابتسمت وعضيت على شفتي السفلية اخفي ابتسامتي واذكر روحي ما اتراجع عن قراري.. بينما اني اتقدم رصدت عيني واحد واگف على بُعد مني صاعد الدرجات الفوگ شكله مألوف وهيئته هم من ركزت بي انتبهت هذا مالك واگف هنا ويراقب شُهيب من بعيد!

ضحكت بخفوت وگلبي غمرته فرحة غريبة من شفته بخير ومابي شي بس شعنده هنا يا ترى؟.. ما فكرت زايد وبينما اني اتقدم لـ شُهيب وصلتني رسالة مكتوب بلغة البلد من رقم غريب مشفر..

"تحذير"

عگدت حاجبي متسائلة، ثواني ووصلتني رسالة وراهة مكتوب..

"واحد"

ثانية وحدة مرت وتبعتها رسالة..

"اثنين"

خفق گلبي بصدري بعنف من اندزت الرسالة الثالثة مكتوب..

"ثلاثة"

قلقت واستغربت هالرسائل وبدون تردد هرولت لمكان شُهيب اروحله وبرمشة عين بجرة نفس وگف گلبي قبل رجليه من لمحت شي سريع طاير اشبه برصاصة جاية من قناص مركز تسنترت تخترق قلب الرجال الاعشقه.. الرجال الي ما طلع صوته من قوة الضربة ودقتها ووگع چفي على وجهه، عيوني طلعت وروحي طلعت وياهة دورت صوتي الضايع بس ما لگيته.. صرخة قوية دوت بالمكان اجت من ورايه طلعت من عمق الروح صوت گطع الاوتار الصوتية للصارخ يگول...

-لاااااااااااااا شُههههيب لاااااااااا اخووووووية شُهههههههيب!!!!

يتبع...

━━━━━━  ━━━━━━

ماعندي تعليق گلبي يوجعني... 😓

توقعاتكممممم 💀🩷🩷🩷🩷🩷

تعالووو انستااا نتناقش هالبارت يحتاااج مناقشة 😣♥️✨