رواية ابناء الحسوم "شمسون" الفصل الثلاثون 30 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

شعندي غيرچ؟
يمن عيني تروح فدوة لعينچ.. ✨

━━━━━━  ━━━━━━

-ليش داومتي روحي كملي تجهيز نفسچ مو سفرتكم اليوم؟

-مسرة: لان عندي كومة شغل هذا شمسون مادري شيحس ينام ويگعد يتخذ قرار ولازم الكل يطبقه مثل الجنود

-صبا: والله لو بدالهم اني احط طلقة براسه واخلص منه على شنو هالعذاب

-مسرة: ههههههههههههههه ضحكتيني والله

-صبا: ليش؟

-لو الموضوع سهل چان اني حطيت الطلقة براسه واخلص الكل من شره بس يموت شمسون يطلعلچ الف شمسون تعرفين ابوية يگول جعفر شمسون كم عقد موقع وشگد فلوس يدفع على اتفاقيات تخص حياته؟ يعني لو شمسون انشخطلچ شخطط واحد يطلعلچ فيلق كاامل ياخذ بحقه!

-وهذا السبب الحكومة ما جاي تتورط وياه برأيچ؟

-على الاغلب اي لان بعض الحكومات تعرف عصابات المافيا الي ببلدهم وميگدرون يلزموهم لان اول شي كل العصابات شغلهم نظيف مية بالمية الحكومة ماعدهم لزمة ولو بمقدار ابرة ضدهم اضافة الموضوع اعمق واكبر من فقط سجن رئيس العصابة راح يطلعلچ مليون واحد مشجع اله ومحب ويسوون العجب لخاطر زعيمهم ويصير البلد فوضى

-الله ياخذهم

-اني وبابا صارلنا سنييين نحاول بـ شمسون ما خلينا مصيبة ما وگعناه بيها بس طبعاً كله بالخفية شغلنا وتدرين صبا ما انضر ولا بمقدار شعره؟؟ لانه بكل بساطة مسنود

-وهذا السبب رحتوا على ولده؟ تلوون ذراعه بيهم؟

-اي

-شبيچ تغير حالچ؟

-مابيه شي

-متردين تأذين شُهيب مسرة؟

-ولا راح أذي

-وابوچ؟

-اللگالي حل هالكم يوم راح اروح بيهن لـ مدريد اريد اصفي بالي وانعزل ويه شُهيب شوية بلكت اگدر افهمه واكتشف شي عنه

-هههههههههه واگعة انتِ وااااگعة

-لا يمعودة مو لهدرجة

-اي عود نشوف

-غيري الموضوع اجو فاضل ونشوان

سكتنا من شفتهم بالكامرات متوجهين لـ مكتبي، طرقوا الباب ودخلوا فاضل بيده بايندر چبير ضام كم ملف مهم يخص مشروع "صقر ريماس" المؤجل ونشوان اجه رفيق درب وياه..

-فاضل: للان ما ناقشتينا بهذا المشروع مدام مسرة؟

-مسرة: صح بس سفرتي صارت فجأة وماگدرت اجتمع بيكم

-فاضل: لا عادي مو مشكلة ننتظرچ، يله نشوان عزيزم

-نشوان: مسرة اني جاي هنا شكاي

-مسرة: خير ان شاء الله شبيك فاكهة حياتي

-نشوان: مشمش گلبي فديتچ باعي فاضل جاي يجرني وراه مثل الذيل اركض ميخليني اروح لكيان! وشُهيب انطاني اجازة اليوم حتى بالاجازة خلاني اداوم

-مسرة: اذا بالاجازة مداوم المن ماخذ اجازة يمعود

-نشوان: من وره هذا السطل اللگيلي حل انتِ مو المديرة يله يله خنشوف حلولچ العظيمة

-صبا: حامي داخل علينا نشوان

-نشوان: صبااااا تذكرررت

-صبا: يمة شبيك نززتني

-نشوان: مروان ينتظرچ بالمكتب

-صبا: احم اءء شيريد؟

-نشوان: يطيح حظچ.. اني معليه هو چفص وگلي لا تگول لصبا هيچ گلت عليها اني بس معصب وطلعت الكلمة من حلگي فجأة

-فاضل: شگد حاروگة فدوة لربك

-نشوان: مو حاروگة مو هاي انتَ المتدين الشريف غير انقل الموقف بحذافيره من دون زيادة ونقصان مو هاي امانة

-فاضل: اي حقك وفقك الله لكل خير

-صبا: ولكم هذا الجربوووع ما عاش اليتجاوز عليَّ اني اعلمه اخوووك

گامت تطلع ركض من المكتب شگد چذابة هالبنية من الصبح تحوص يمي تريد تروحله واني لازمتها ما اخليها وجبرتها تجيب شغلها وتشتغل عندي هنا ماريد يلتهون وهسة اجت على ايديها ورجليها وگامت مثل الفراشة الثايرة تروح حتى عووووووود تتعارك وياه..

-فاضل: فكرة غير جيدة نشوان ليش خليتها تعصب راح تصير مشكلة

-نشوان: سيد انتَ صدگت؟ تره مروان ما چان معصب وگلي گوللهة هيچ حتى تجيني لان مسرة حابستها عدها

-مسرة: خل يصبرولي لعد ثنينهم راح ينسمطون بعقوبة ذولة هوايش الحب!

-نشوان: ليييش لييش مسرة لا تقطعين جو الحب والعشق والرومانسيّة بالشركة ما صدگنا على الله واحد بينا يحب مثل الاوادم ويبيّن مشاعره

-فاضل: المهم اعزائي مدام مسرة اجيتچ بـ....

-مسرة: اوگف سيد ثواني.. نشوان ليش اني شبيه؟ يمته قطعت جو الحب بالشركة هاي واني صارلي كم يوم متزوجة بالجديد

-نشوان: المشكلة ما جاي اشوف نمنميات وحبشكلات ومقبلات بينكم ما جاي اشوف الحوووب ما جاي اشوف اللهفة ما حاي اشوف التضحيات ومحاربة الصعوبااات واللالم وهالشي ما جاي يرضيني

-فاضل: تضحيات ومحاربة الصعوبات واللالم؟ ليش محسسني داخلين حرب مو زواج شسالفة نشوان

-نشوان: الزواج حرب الزواج تضحية وتقديم تنازلات ومحاربة ووجع ولهفة وتعب وادري جاي اخرط وراح اطلع بره قبل لا اتفشل اكثر

ضحكو ثنينهم وطلعو بره وعافوني وحدي، لا كلامه مو خرط كلامه منطقي منطقي وصحيح مية بالمية وفعلاً الزواج محاربة الصعوبات وتقديم تنازلات.. كلام نشوان الي گاله بتحشيش اثر بيه بشكل من الاشكال..

اخذت جنطتي وسويچ سيارتي وانطلقت للبيت حضرت جنطتي مال السفر وخليت السايق يحطها بالسيارة، نزلت للمطبخ اسويلي شي سريع آكله واجاني ابوية..

-فادي: ويه رايحة سرور؟

-مسرة: للمطار طالعة طيارتي بالسبعة

-فادي: مسرة اللغي كلشي

-اللغي السفرة؟

-لا اللغي خطتچ ويه ولد شمسون ولا تطبقين شي بهاي السفرة

-غريب شعجب مو من عوايدك هاي؟

-انتبهي على نفسچ زين ولا تثقين بخيالچ

-شصاير بابا خرعتني؟

-بس ترجعين احچيلچ بس حطي ببالچ تنفصلين من شُهيب بأسرع وقت ممكن ودييييري بالچ اسمع علاقتكم تطورت والله ما ارحمه مسرة!!

-صدگ تحچي؟؟

-اييي صدگ لا تعاندين شمسون جاي يلعبها صح!!! تلاعب بالكل وهو حاط رججل على رجل!!

-شسوه؟؟

-موضوع طويل وينرادله شرح وانتِ ماعندچ وقت طلعي ومن ترجعين احچيلچ بس حطيها ببالچ انتِ وشُهيب انتهت قصتكم! اول ما ترجعون تلگيلچ سالفة وتطلبين منه الطلاق ضروري ضروري

عافني وطلع بره المطبخ هرولت اروح وراه اريد افتهم بس وضعه ميبشر بخير متوتر ومتضايق ويفرك بيده كل شوية، دخل للمكتب مالته وبالباب اللتفت عليَّ وگال بتحذير..

-ابقي ويه شُهيب هالكم يوم عادي ما راح يأذيچ على الاغلب لان عنده شي وياچ ميگدر يفرط بيج

-حفل اعلان زواجنا قصدك؟

-اي راح يهتم بيج هالايام علمود الحفل مو بصالحه اذا صارلچ شي قبل الاعلان

-بابا انتَ گلت ننفصل اول منرجع بعد شنو فائدة الاعلان؟

-سروووور!!! عقلچ فتحيي الحفل توزعت البطاقات صار اربعة ايام الطلاق يصير وره الحفل وهسة روحي للمطار وانتبهي على نفسچ ولا تسمحين لاحد يلمسچ بسوء خصوصاً شُهيب لو افتهمت لاعبين بذيلكم وصاير شي بيناتكم هناك مسرة ورووح امچ اگلب الدنيا على روسكم! لو سام هنا ادزه وياچ بس المشكلة بزوجته

باس راسي ودخل للغرفة وقفل الباب وراه، كلشي ما فهمت ومتأكدة لو اسأل منا لباچر هم ميشرحلي لان مبين هو بنفسه ممتأكد من الموضوع وابوية لو يموت ميحچي بشي هو ما متأكد منه، طلعت تلفوني الي يهتز بجيبي شفت المتصل شُهيب..

-الو

-شُهيب: بره اني

-ليش؟

-نروح للمطار سوه

-ها مادري بيك راح تجيني گلت للسايق ياخذني

-لا اني اخذچ وجنطتچ عندي يله انتظرچ

ودعته وسديت الخط، اخذت جنطتي اليدوية وطلعتله دخلت السيارة سلمت عليه بس شفته يباوع لملابسي بنظرة ما فهمتها هل هي اعجاب ام عدم رضى؟

-مسرة: شعجب مدريد؟

-مادري

-بس ردة فعلكم قوية چانت وكأنكم تعرفون اكو مصيبة

-شُهيب: عدنا تاريخ مو حلو بيها

-سبب عداوتكم بيها؟

-لا

-لعد؟

اللتفت عليَّ وهو يسوق ابتسم ورجع يركز بالطريق..

-شبيك شهوبي

-مابيه شي

-گول حباب

-شكلچ اليوم يشتت الانتباه

-بس اليوم؟

-كل يوم

-ههههههه تعجبني اجوبتك بيبي

-بالـ 2007 كادولنا مكيدة هناك رحنا اني واخواني سياحة و..

-رحتو سياحة؟

سألته مضيگة عيوني شوف الچذب شوف، ضحك خفيف ومسح على شعره هز راسه وگال..

-سياحة بطريقتنا شبيچ

-مسرة بحماس: يعني كتل ومكاتل وسچاچين واسلحة ودماية؟؟؟

-وليش لهدرجة فرحانة؟

-الله شُهيبب راح نعيش هيچ اجواء؟؟

-اكيد لا مسرة!

-حرامات

-تردين تعيشين اجواء الاجرام بشهر العسل؟

-اي گلت شوية نتونس

-راح تتونسين مدريد حلوة

-اي بس ماكو متعة حقيقية ضجت

-مسرة

-لا تحاول

-يمعودة منين نجيبلچ سچاچين واسلحة

-اعرف عندك مسدسات وسچاچين مضمومة منا ومنا

-غلطانة ماعندي

-لا تچذب شفتهن

-وين شفتيهن؟

-ببيتك ضامهن بالكنتور بالمجر المقفول الصاير على ايدك اليسرة

-وشلون فتحتي اذا هو مقفول؟!

-ميصعب عليَّ شي

-صح نسيت انتِ المحكومين مؤبد ياخذون عندچ دروس خصوصية

-قصدك اني مجرمة؟

-عقلچ مجرم انتِ لا

-شُهيب تدري صايرة احبك شويونة؟ هيچ شوية كلش نتفه وبديت افكر بأسم ابننا الهموسي الجديد

-ههههههههههه مفكرة حتى بجنس الطفل

-اي اريده ولد وانوب تجينا بنية الولد راح اسمي اشهب والبنية شهوبة

طگ من الضحك يضحك بصوت عالي ويهز براسه ممصدگ كلامي، ضحكت وياه وبقينا نسولف لحدما وصلنا للمطار نزلنا وشفنا الباقين قبلنا هنا جنات عيونها مطفية گوة مفتحتهن وكيان مطنگرة على فاهد..

-مسرة: يا مساء الطناگير والناس النعسانة

-جنات: كله من وره مالك!

-مالك: جنات عندي شغل شوكت ناوية تستوعبين هالشي ماگدر ابقى بالبيت وياچ

-جنات: مو تزوجتني؟ لازم تتحملني

-فاهد: واو

-كيان: انتَ اسكت!

-فاهد: كوري انتِ كلش كلش كلش كلش كلش كلش كلش وجداً كلش وجداً و...

-جنات: غير يفضها!

-فاهد: نسيت شنو ردت اگول وچنت منتظر ابن حلال يقاطعني

-مسرة: حلوة اجوائكم شباب

-مالك: شكراً مسرة استهزائچ وصل

-جنات: نعثانة

-مالك: بس خلينا نوصل انطيني صبر

-كيان: نامي بعد وكت للطيارة اصلاً احنه ليش اجينه من وكت؟... لا لحظة يمكن بسبب واحد اسمه فاهد!!

-فاهد: كيان انتِ كارهتني اليوم وگابة هرموناتچ يجوز بسبب الحمل هذا حبيبتي

-مالك، جنات، شُهيب، مسرة: كيان انتِ حامل؟؟؟؟

-فاهد: وين نايمين انتو راح تجيب يمعودين

-كيان: چذاب! لا مو حامل اني فاهد اگعد راحة!

-فاهد: ها ولچ هاا مو الصور وانتِ تارسة وجهي بوس كلها يمي لو الا افضحچ

-شُهيب: ولك تبتز اختي؟!!

-فاهد: اختك مرتي وغصباً عليك ديلااا

-شُهيب: مالك اخذه من وجهي لا ننفضح بالمطار!!

-مالك: امشي هناك فاهد

-فاهد: اوگف اراوي شُهيب صورتي اني واخته واحنه بوضع...

-كيان: فااااهد

-فاهد: اسف اسف اتشاقه شبيچ عبصتي

-مالك: كافي يله نسلم جنطنا ونگعد بصالة الانتظار

رحنا سوه سلمنا الجنط وختمنا جوازاتنا وگعدنا ننتظر، صارت گعدتي بصف جنات ومالك وشُهيب مقابيلي وفاهد وكيان بصفه..

-مسرة: شبيچ جناوي

-جنات: عيوني تحرگني ما نمت ابد

-ليش؟

-مالك طلع من الفجر اليوم واني ماگدر انام والبيت فارغ اخاف

-شوفي ذنيچ الكراسي نامي عليهن علما يصير وقت طيارتنا

مدت نفسها تشوف الكراسي الكبار صايرات على جهة مخصصات للراحة وواحد يگدر ياخذ قيلولة عليهن، ابتسمت فرحانة ومدت اصبعها تدوس على زند مالك تنبهه، اندار يشوف شبيها ضحكت على ابتسامتها الواسعة وهي تگول بفرحة واضحة جداً..

-جنات: راح انام هناك

-مالك: تمام بس غطي نفسچ زين

-جنات: تعال

-مالك: وين؟

-ننام ثوه

-مالك: تردينا ننام هيچ گدام العالم جنات!!

-جنات: حباب حباب

-جنة ما يصير عيب العالم يصورونا

-اغطيك بالشال والله متبين صدگني

الرجال گام يلطم متت ضحك عليهم يحچون بالخنسة بس اصواتهم توصلني وخطية جنات تحچي من كل عقلها وتمد بالشال مالتها وتگول..

-شوفه طويل يكفينا

-جنات تحملي بس شوية علما نوصل حبيبتي انتِ

-مو نعثانة ودايخة

-ميخالف صغيرتي بس شوية

-انام على چتفك؟

-اي يله

-وتجعصني؟

-ميخالف تعالي

فدوة حياتي صدگ مثل العصفورة الصغيرونه فتح ايده ونامت على صدره وحضنها نص حضنه، جرت ايده الثانية تخلي يحضنها بيها هم وهمست وهي تتثاوب بنعاس تقهر..

-اجعصني

-تمام

سوه مثل متگول وبقوا على هذا الحال فوراً غفت انكسرت عليها هالطفلة مسكينة ووحيدة بس الحلو مالك زين ومبين حنون عليها لان حتى من تلح وياه ميضوج وطبعاً هالصفة كلش كلش يشبه بيها شُهيب..

بقى حريص ميحرك ايده ثنينهن لفترة واني هاي الفترة قضيتها اختلس منهم نظرات، شوية شوية بده يوخر ايده الي محطوطة على خصرها من حسها نامت هيچ بس شوية وخرها حتى يطلع تلفونه وهي فزت بسرعة تدور ايده وين، خطية انقهرت عليها هالشي مو مريح هاي مأساة حقيقية..

-مالك: بس تلفوني اطلعه

-جنات: ما

جرتها مرة ثانية تحطها نفس المكان ضحك وعاد نفس الجملة كم مرة ياله هدت ايده، طلع تلفونه يدور بي شي وهمس..

-جنة شوفي هذا

رفعت راسها تشوف وياه بتلفونه ولاني گاعدة بصفهم هم گدرت اشوف، عرضلها صورة شاب شعره مزين حفر وعيونه ملونة..

-مالك: تعرفين هذا منو؟ ميزتي شكله؟

-جنات: اي

-مالك: منو هذا؟

-الخطفني

-شلون ميزتي شكله اتذكر گلتي چان ملثم؟

-طبلي مرتين بدون شي على وجهه نثى يلبث (نسى يلبس) واجه صديقه يرزله

صوتها يرجف وهي تحچي ما اشوف ملامحها عدل لانها موجهه نفسها لـ مالك بس هو دا اشوفه زين..

-جنات: وين راح؟ راح يرجع؟ شنو صار بي؟؟

-مات

-مات؟؟

-اي هو وصاحبه لگوهم مكتولين كلمن طلقتين براسه

-منو سوه هيچ؟؟

-مادري

-يعني انتَ ما تدخلت؟

-من يوم الحادثة لليوم اني وجماعتي ندور عليهم ما لگيتلهم اثر فص ملح وذاب بس اليوم وصلني خبر الخطفوچ ماتو بنفس اليوم الرجعتيلنا بي ولگوهم مشمورين بوحدة من الحاويات على طريق محافظة العمارة

-حيييل

-اممم

-منو كتلهم؟

-مادري

-ابوك؟

سكت بدون لا يجاوب بس وجهه ميگصه الطبر حاجبه معگود ومتنرفزز كلش جر راسها يرجعه على صدره وحاوطها بأيده يجعصها حتى تنام.. طمنها ان كلشي بخير وهمه ماتو وماكو شي يهدد حياتها وهو راح يكون وياهة بكل خطوة همهمت بصوت ناصي واتوقع غفت، بدون لا اسأل خليني األف سيناريو براسي واگص ايدي وراسي وشعر هموسي ويايه اذا طلعت غلطانة..

شمسون الكلب كتلهم ليش كتلهم؟ لان هو اله ايد بالصار بـ جنات زين شلون اني متأكدة لهدرجة؟ لانه ببساطة نعلون ويسوي كلشي علمود مصلحته.. ردة فعله بيوم رجعت جنات وتصميمه واصراره حتى مالك يطلگها لانها "انكسرت" حسب كلامه وچان يحچيها وهو متأكد مليون بالمية الزلم اعتدوا عليها حتى وره ما راحت دكتورة وگالت مابيها شي بقى مُصر..

زائد عداوته ويه جنات ومالك وكرهه الشديد الهم وبالجديد وصلني خبر من شُهيب ابوهم يريد يطلگ جنات من مالك ويخلي يتزوج بنت عمها فواطم.. ادري ايع!! لعبان نفس وهمجية بس نعم يا سادة انهُ شمسون الزفت وهو الي سوه كل هاللعبة وكتل الزلم حتى مينفضح وما اطلع بنت امي اذا السيناريو الألفته مو صح!

صارت عيني بعين مالك السارح وتغيرت نظرته من شافني صافنة عليه لا ارادي ابتسمت حسيت بالدفو وهو محاوط جنات ومحرص ميتحرك حتى متگعد احترم الرجل الحنون وتبقى اكثر صفة احبها ومفتقدتها هي الحنية لذلك تجذبني من اشوفها عند شخص، بادلني ابتسامة مجاملة وخرت عيني عنهم ونقلتها لـ شُهيب..

شُهيب الگاعد ومچتف ايده لصدره وصافن عليَّ صفنة بنظرات حارقة راح يحرگني بمكاني، ضحكت بخفة ممهتمة واعرف سبب نظراته لان چنت اباوع لـ مالك ويجوز عباله مهتمة بأخوه او عاجبني، عجزت افهم ليش عباله عندي هيچ نية وشلون طخت براسه؟

-احم

اي هاي الـ "احم" مال شُهيب ما تحمل اكثر وگام من مكانه ووگف گبالي يسد عني جهة مالك وجنات..

-مسرة: هلاو

-شُهيب: جوعانة؟

-لا

-ناكل شي منا؟

-انتَ جوعان؟

-لا

-لعد ليش تريدنا ناكل شي؟

-مو اله ناكل خليني اشتريلچ شي تشربي تعالي وياي

-ماريد انتَ اشتريلي وجيبلي

-مسرة گومي تحركي شوية خاف تعبتي من الگعدة

-لا ابد

-مطي رجليچ

-لا ماحب

-شوية بس نروح نشتري ونرجع يله عيوني

ضحكت بگلبي مستقتل على گومتي بس حتى يقطع سبيلي للنظرات خاااااف راح ارجع اباوع لـ مالك، گمت وياه لزمت ايده وتمشينا للكافيه الي بالمطار اشترالي آيس تي وهو اخذ گهوة..

-نگعد هنا احسن

-لا شُهيب خلينا نرجع الهم تذكرت عندي شغلة ويه كيان

زفر نفس مزعوج ومشى ويايه نرجع لمكاننا، شدد على قبضة ايدي من شاف اخوانه يباوعولنا، ابتسمت مستمتعة على الاخر مو بيدي احب احب احب شهوبي الغيور العصبي ويعجبني اكثر من الهموسي..

-مسرة: اگلكم متشربون شي؟

-كيان: والله لو عندي واحد يهتم بيه مثل شهوبي چان اشترالي عصير منا

-شُهيب: اني اجيبلچ حبيبتي

-كيان: خاف اتعبك حبيبي

ما قبل على كلامها ورجع للكافيه يجيبلها التريده وفاهد يباوعلها بطرف عينه وهي مبتسمة مكيفة..

-فاهد: باع الضحكة شگت الحلگ علساس راح يجيبلها من الواق واق هو هذا وينه

-كيان: بيك خير صير مثله انتَ بس تغار من شهوبي

-فاهد: اغار من شنو بالضبط؟؟

-لان هو اخوية ويحبني ويهتم بيه

-تره شُهيب اخوية قبل لا يصير اخوچ!!

-اي بس يحبني اكثر

-لانه عااار

-مسرة: خير خير؟؟ عليمن هالتجاوز؟

-فاهد: دباعيي هاي النسوان المعدلة شلون تدافعله بغيابه امدااچ

-مالك: هدوء رجاءاً

-كيان: بااوع هاي الزلم المعدلة شلون خايف على مرته من صوتنا لا تگعد!

-فاهد: احچي مثلها بالثين وهم اخاف عليچ

-جنات: هثة غير ينچبون!!

نترتها بعصبية مغمضة عيونها ووخرت من مالك، رفع فاهد حاجبه معاجبه وگال..

-شو هاي الگملة تتجاوز علينا

-جنات: انتَ گملة وهاي گملتك ثكتها متشوفون الناث نايمة!

-كيان: محد نايم غيرچ ولچ سلبوحة!

-جنات: اذا اني ثلبوحة انتَ ملكة الثلابيح يالصيني!

-كيان: اذا اني ملكة السلابيح انتَ ملكة ال....

-مسرة: طوووط

-فاهد: احسنتِ التطويط لان الموضوع بده يتطور

-جنات: صيني حبابة ما نايمة الليل كله خليني انام تعبت

-كيان: يا حبيبتي سودة عليَّ مادري بيچ ما نايمة

-جنات: اي والله من وره هذا عافني وراح

-مالك: هم گالت من وره هذا

-كيان: حقها حقها هي نعسانة نامي حبيبتي نامي

-فاهد: انتِ هيووو شو صالحتيها بسرعة شنو ماعندچ كرامة؟؟

-كيان: ميخالف شبيك هي نعسانة والنعسان يگوم يمسلت

-جنات: صح صح النعثان يگوم يمثلت

-كيان: شفت؟

-جنات: يله اودعناكم

رجعت نامت نفس قبل شوية ورجع شُهيب بيده عصير كيان، فر بيده فاهد وغم نفسه وغم كيان وغم شُهيب على الخفيف..

-فاهد: شوفو التناسق شوفو التناغم شوفو الحب بين ذولة نايمة على صدره وهو حاضنها وبيناتهم كيميا وفيزيا واحياء وتاريخ وجغرافية و...

-كيان: ورياضيات واجتماع ولغة فهمنا فهمنا

-فاهد: اي مو مثلنا الارامل والمطلقات مع عدم احتراماتي الچ مسرة

-مسرة: تدري بروحك غثيث؟

-فاهد: لا والله

-مسرة: مو اسفة لان صدمتك بالحقيقة

-فاهد: عادي عادي اني حياتي كلها صدمات بقت عليج، يله نرجع على مالك وجنات

-مالك بهمس: فااهد نصي صوتك!

-فاهد: هسة شگلت اني ليش تصير غثيث مثلي؟

-كيان: عوفهم يوووه شگد تلح

-فاهد: مالك انطينا الوصفة شلون حبيتو بعض بسرعة؟

-مالك: ولك صوووتك

-فاهد: يله ولو انتو نروح على مسرة وشُهيب بشرو شوكت ولادة مسرة؟

-مسرة: للمرة الترليون اني مو حامل!

-فاهد: احس احس

-شُهيب: طفي احساسك وانچب

-فاهد: ماگدر احساسي قوي

-مسرة: راح احمل شگدما فاولتلي!

-كيان: الله ويجينا شُهيب صغيرون

-فاهد: اي يجيچ نعل صغيرون

-شُهيب: انتَ تريد تنكتل بس متعرف شلون!!

-فاهد: مسرة شوفي شُهيب يتجاوز عليَّ تره ازعل عليكم وارجع للبيت ما اسافر

-شُهيب: يااااا ريييييت

-مسرة: شهوبي نصي صوتك شبيك

-شُهيب: رجاااءاً كااافي!!

-مسرة: شبيك تعيط عليَّ؟!

-شُهيب: اسف تيهت بيناتكم هذا ثولني

-فاهد: مسرة زعلي يستحق تزعلين رجعي للبيت وعوفي

-مالك: اتفق

-شُهيب: ولكم!!

-مالك: ليش صحت بوجهها ما تستحي؟

-شُهيب: انتَ صرت مثله؟؟

-مالك: اني احچي حق

-كيان: شبيكم على شهوبي

-فاهد: لانه شايف روحه صاير يشبه صديقه الاسباني

-شُهيب: انچب انتَ!! مريم اني ما قصدت اصيح عليچ عذريني

-مسرة: منو مريم؟

-شُهيب: منو مريم؟

-كيان، مالك، فاهد: گلت مريم

-شُهيب: لا بابا مريم منو شبيكم

وخرت جنات من مالك تفرك بعيونها وتگول بنعاس..

-جنات: تره گلت مريم

-شُهيب: شسالفة شبيكم انتِ مو چنتي نايمة؟؟

-جنات: اي بث الله رادني اثمعك وانتَ تغلط بأثم مثرة وتخونها ويه وحدة اثمها مريم

-مسرة: تخوني شُهيب؟! منو مريم اعترف!!

-شُهيب: والله ماعرف منو مريم اني هم مستغرب

-فاهد: شوف الچذب شوف ابو النسوان تخون هاي فلقة القمر ليش مو حرام عليك

-مسرة: شفتوو؟؟ يخوني وما صارلنا كم يوم متزوجين!!

-شُهيب: لچ لااا تذكرت والله تذكرت مو فاهد گال الاسباني؟؟ يمكن ربطت ويه مرته اسمها مريم وصحتلچ مريم

-مالك: طليقته همه تطلگو

-جنات: وانتَ شعليك تطلگو تزوجو المهم اثمها مريم

-مالك: المهم

-كيان: وانتَ ليش ظال ببالك موضوع طلاق مريم؟

-جنات: اي صدگ!

-مالك: بابا ما ظال ببالي بس عندي شغل وياهة واجت ببالي

-جنات: شغليش هذا؟

-مالك: شعليكم الشغل شخصي!

-فاهد: اني اضمنلكم مالك ماعنده شي ويه مريم، بس شُهيب يجوز عنده بما ان عنده سوابق ويه نورسين وهسة مريم اكيد وحدة جديدة وهسة لافها علينا ولزگها بمرت الاسباني المسكينة

-شُهيب: فااهد لا تصير حاروگة ماعرف وحدة اسمها مريم غير مرت الاطلس!!

-كيان: اي صح اكيد خربط بأسم مرت الاطلس

-شُهيب: اي والله هيچ صدگيني مسرة

-مالك: هذا نداء طيارتنا گومو

شلت جنطتي اليدوية ورحت متوجهة للطيارة حتى يختمون جوازي، وگفت وحسيت بأيد شُهيب تجرني ويديرني عليه، فاجأني بجملته السريعة..

-شُهيب: لا تصدگيهم وداعة امي ماعندي غيرچ ولا حاچي ويه غيرچ وما اهتم لغيرچ

-مسرة: ها؟

-شُهيب: على موضوع مريم غلطت بأسمچ لان اليوم حچيت ويه الاطلس وصرعني بيها وظل اسمها براسي ما قصدت شي ثاني

-مسرة: اوكي

-صدگتيني؟

-اي اكيد

تنهد وابتسم يهز براسه مرتاح، درتله ظهري اخفي وجهي وابتسامتي صح بالبداية تنرفزت من خربط بأسمي وغرت شوية بس ما حملتها زايد لان هالشغلات تصير ونسيت الموضوع من گمنا فدوة بقى يفكر بي واجه يبررلي وهالشي يعنيلي هوايه..

**

-كيان: احبك

-فاهد: شكراً

-كيان: يله شبيك

-فاهد: شنو شتردين؟

-فاهد مو گتلي اذا گتلك احبك راح تحل الموضوع!

-اي بس ما طالعة من گلبچ

-لان اصلاً اني ماحبك

-شكراً مرة ثانية واني هم ما احبچ

-العفو وهسة حل الموضوع تره من هسة اگلك ما احبل اني اموتكم والله افضحكم واخزيكم لو جبرتونيي

-بعد صيحي خلي كل الطيارة تسمع فشلتينا گدام هاي المضيفة الحاتة

تقدمت المضيفة بيدها مشروب كحولي، نزلت نفسها النا وگالت بلغة البلد بأبتسامة..

-المضيفة: تحب تشرب شي سنيور؟

-فاهد: لا شكراً

-كيان: شعجب

-فاهد: ما عاجبني هسة اخوچ العار يصير شيخ براسي

-كيان: يااا شو هاي المضيفة راحت شمعنى ما سألتني اذا اريد؟؟

-فاهد: هههههههههه لبستچ

-كيان: حقيرة!!

-فاهد: ديلا كوري انتِ مو ما تشربين شنو هالرعونية بعد

-كيان: حتى لو ما اشرب لازم تسأل هاي قلة احترام تتجاوزني هيچ لو بس الزلم يتسرسحن عليهم!!

-فاهد: يلا ميخالف ميخالف

-ختووليي شفتها شلون تتماوع اووووي تحب تووشرب شي سونيووور

-فاهد: لا تغارين منها انتِ احلى

-غصباً عليك احلى!!

سندت جنات نفسها على الكرسي واندارت علينا وتهمس..

-صيني صيني

-كيان: ها ططوة

-شفتي هاي الصخلة المضيفة؟؟

-كيان: ولچ ايي حتى انتو صارلكم موقف وياهة؟؟

-جنات: تتماووع وتعوج بحلگها مثل المعزة گدام مالك

-كيان: حتى احنه!! بله شوفي مسرة

-جنات: مثرة صارلكم موقف ويه هاي المضيفة الطلية؟؟

-مسرة: اي تنعوصت على هموسي ورزلتها

-فاهد: شفتن؟ يعني تنعوصت على الكل لا تشخصنوها

-جنات: انتو خفيفين وتكيفون على النثوان الملطلطات

-كيان: اي والله

رجعت المضيفة وبيدها ضيافة جديدة، سوت نفس حركتها من نزلت لفاهد وگالت بأبتسامة..

-تفضل سنيور

نرفزتني هالنعجة تعوج بحلگها ومكيفة على مادري شنو، حطيت ايدي بين ايدين فاهد وگلت بأبتسامة استهزاء بلغة البلد..

-كيان: عود هم عبريني ما اوصيچ

-المضيفة: عفواً؟

حطيت راسي على كتف فاهد وحضنت ايده كلها..

-كيان: احنه عرسان جدد ورايحين شهر عسل لمدريد

-فاهد (بالعراقي): شهر نعل وقنادر مگطعة على روسنا باع هاي البطرانة

-كيان: اششش اسكت انتَ

-المضيفة: اتمنالكم سفرة ممتعة عزيزتي، تحبين تجربين الضيافة؟

-كيان: اي يعجبني وانطي لزوجي هم يحب هاي الحلويات

-فاهد: هاي عايشة الدور

-كيان: گلت اسكت!

-فاهد: حاضر

-كيان: انطي ثنين هو ضخم وياكل هواي

-فاهد: شگد چذابة وين آكل هواي لو تردين تخربين جسمي اليشگچ ويشگ اخوانچ ثمنطعش شگة؟!

-كيان: شگلت اني؟!

-فاهد: اسكت

-كيان: عفية

-فاهد: لا اوگفي.. عفواً مدام زوجتي ضايجة لان ما قدرتيها وسألتيها اذا تريد تشرب شي شنو السبب عبرتيها بدون لا تعيريلها اهتمام؟

-المضيفة: اه عفواً بس اخوها طلب مني هالشي

-كيان: اخوية؟ قصدچ شُهيب هذا الي شعره عسلي؟

-المضيفة: نعم هو طلب مني ما اقدملچ وازعجچ بالمشروب لانچ ما تشربين

-كيان: اووووي گلبي صح صح شكراً حبيبتي

ترخصت من عدنا وراحت وفاهد بقى صافن شوية وراهة طگهة..

-فاهد: خو تقدملچ وانتِ ترفضين لو الا يفيك؟!

-كيان: مو يفيّك بس غير يخاف عليَّ

-فاهد: واني شنو هنا گاعد خراع خضرة

-كيان: ولك مو انتَ ساقط وخاف عباله راح اتأثر بيك واشرب وياك

-هو اني اصلاً ما شربت

-اي يشم گفه ايده قابل؟

-سكتي لا تظلين تدافعيله وتنرفزيني شُهيب ما معتبرچ امرأة راشدة يعاملچ مثل الاطفال ولازم تخلي يغير هالاسلوب

-ليش؟

-لانچ چبيرة وراح تتخرجين قريباً وتكملين حياتچ بدونه

-بس اني ماريد اكمل حياتي بدونه

-راح تردين باچر عگبة من يصير عندج اطفال وكيان خاص بيج يا كيان!

-اي عود بالمستقبل من اللگه الزوج المناسب هسة اريده يبقى يهتم بيه

-غبية

-انتَ غبي

-بابا غلط تصرفاته وياچ غلطط

-انتَ غلط! كلشي شُهيب يگوله ويسوي هو الصح وانتو كلكم غلط

-كافي سكتي لا تزعجيني

-اگلك فاهد

-ها

-شو ما اكلت الحلويات مالتك

-ماريد

-ليش خاف صدگ زعلت؟

-لا

-مبين زعلت

-ما زعلت كيان كافي

-شبيك جَدي ما اقبل تصير جَدي اضوج

-جدي لو بيبيتي

-ههههههههههههههههههه بيبيتي لو خالتي

-ههههههههههههههه خالتي لو عمتي

-هههههههههههههههه

-ههههههههههههههه خرب روحچ كوري

-ههههههههههههههههه

-كافي لحيتي

-ههههههههههههههه مدا اگدر ههههههههه هههههههه مدا اگدر اسكت ههههههههههه

-سكتي ولج

-ههههههههه فاهد انتَ تضحكني شسوي

ضلينا نضحك مثل المخابيل اني ضامة وجهي بـ زنده وفاطسة مدا اسيطر على روحي رغم تفاهة الموقف بس اختنگت من الضحك وهو يضحك ويايه على الواهس، حضني بثنين ايده يقربني منه يجعصني ويگول بضحكة سعادة..

-ولچ كووري انتِ البيست فريند مالتي

-كيان: ههههههههههه وانتَ البيست فريند مالتي يا مسودن

-فاهد: يرحولچ فدوة اخوانچ الجرب

-كيان: هههههههههه انتَ بس تغار منهم

-فاهد: صح اغار

اندارو مالك وجنات علينا يشوفون شكو وابتسم مالك من شافنا يفر بأيده ويگول لـ جنات..

-شوفي ذولة المخابيل

-جنات: قابل مثلنا بومات گاعدات

-فاهد: اي حطي عينچ حطيها علينا وحسدينا على الضحكة

-جنات: ما احثد اني

-مسرة: راح تبقون هيچ واحد يحط عينه على الثاني؟

-فاهد: خو انتو بختتتتت

ضحكنا كلنا واخيراً هبطت طيارتنا ونزلنا بمطار اسبانيا، بيه حماس وفرحة والطريق كله لازمة ايد فاهد ونسولف متفاعلين..

وگفنا سره علما يختمون جوازنا مو ازدحام لان الوقت دوام مو عطلة ومحد يجي هيچ وقت وهالشي خدمنا بالسرعة.. ختموا جوازي وجواز مالك وشُهيب ومسرة وجنات ووصلو لجواز فاهد وعنفص ابو الجوازات..

-كيان: شنو ديصير؟

-مالك: مادري

-مسرة: اكو مشكلة؟ ليش فاهد عصب روحو شوفو اخوكم

راحو مالك وشُهيب يشوفون شنو السالفة واني رحت وراهم بس ميحقلنا نعبر للجهة الثانية لان جوازاتنا انختمت، اشرنا لـ فاهد يباوعلنا بس باله مو ويانه چان يحچي ويه ابو الجوازات دقيقة دقيقتين واجو أمن المطار ووياهم ضباط ثنين يممة!!

گلبي نغزني وحسيت بالخوف، مالك وشُهيب ظلوا واحد يباوع بوحه الثاني، تقربوا الضباط على فاهد وظلوا يحچون وياه..

-مالك: بدينا!!

-شُهيب: ابوك واحد عاار! ما لگه غير مدريد يودينا عليها؟!

-مالك: عبالك ماخذك اسبانيا لحلاوة عيونك؟؟ هذا يريد يتونس علينا وعلى المشاكل الراح نطب بيها!

-شُهيب: هسة ليش وگفو فاهد شصاير؟

-مالك: مادري.. فاااهد فااااهد هنا احنه...

باوعله فاهد بعيون جادحة عصبية وصاح بصوت عالي بالعراقي خلى الناس تلتفت وتباوعله..

-فاهد: انعععل ابووونااا لابووو الخلفة لابووو الخلف خللفه هالعااار لابو الساااعة الفرح بيها جدي من گالوله مبرووك اجاااك نعاال جديدد

-شُهيب: شصاير؟؟

-فاهد: اسمي مطلوب!!

-مالك: شنوووو

طلب من الضابط يتقرب من اخوانه بدون لا يعبر بس يحچي ويانه قبل بشرط يجي وياه وثنين يمشون وراهم..

-مالك: ولك فهمنيي شصاير

-فاهد: ممنوع دخولي اسبانيا لان اسمي مطلوب وراح انسحل سجن

-شُهيب: بتهمة شنو؟؟؟

-فاهد: مادري

-مالك: شلون متدري ولك فكرر شصخمت اخر مرة اجيت هنا؟؟

-فاهد: مادري ماتذكر

-مالك: فاهد اعصر عقلك وفكر وياي يله العين علينا لا ننفضح!!

-فاهد: ما مسوي شي شبيكم

-مالك: ما كتلت احد؟

-فاهد: لا مادري

-شُهيب: شلون متدري ولك تذكرر زين

-فاهد: ما كاتل احد هنا يعني حسب ما اتذكر

-مالك: متكاتل ويه احد؟؟

-فاهد: هاي اي سويتها وچانت عركة شوارع

-شُهيب: مستحيل ينطلب اسمك على عركة شوارع فكر خاف كتلته وناسي؟!

-فاهد: اتذكر ضربته طلقتين

-مالك: هذا مااات يا غبي!!

-فاهد: لا ولك متأكد ما مات اني اخذته للمستشفى وصار صديقي هم

-شُهيب: تكاتلتوو وضربته طلقتين وانتَ الي اخذته للمستشفى؟؟ شگد حنين!

-مالك: لاا واليذبح صار صديقه وهو ضاربه طلقتين!!

-فاهد: انتو بس تغارون

-شُهيب: انعل ابووك لابو الجابتك فاهد ماعدنا وقت فضحتنا بين الاوادم ابن الغبرة!!

-فاهد: جرحتو مشاعري العضروطية

-كيان: فااهد شنو هالبرود ولك راح اموت اني هنا!!

گلبي ينبض بجنون ورجليه ترجف متحملني بعد الضابط عاگد حاجبه وما راضي على محادثة فاهد ويه اخوانه واضح لانه ميفهم عربي وهذا الغبي بااارد قالب ثلج صاير وانوب زادت عليَّ من اجن مسرة وجنات يتسائلن والضابط ما قبل على وجودهن واخذ فاهد ميقبل يرجعه النا..

كلبشوا ايده واخذوا لمكان بعيد تبعته عيوننا لحدما اختفى عن انظارنا متت بدمي خفقان لزمني واحس روحي راح تطلع ماعرف شبيه وشصارلي بس راح اموت خوف على هالمسودن التافه!!

-مسرة: شصاير؟ ليش كلبشوا ايدين فاهد؟؟

-شُهيب: يستجوبوا الواضح صار تشابه اسماء

-مسرة: تشابه اسماء بشنو؟

-مالك: مادري، راح اتصل بالمحامي

التوتر يمنا يقرا الف والفين ومليون!! ابتعدنا عن البوابة وگعدنا على الكراسي رجليه متشيلني، بقى مالك من اتصال لأتصال ويحچي سريع وبكم لغة اكثر شي حچى اسباني لان واضح جماعته الهنا كلهم اسپانيين..

ما حسيت بروحي جاي آكل بشفتي وايدي ترجف الا من گعد بصفي شُهيب ولزمهن بين ايده، باوعتله قلقة ابتسم يطمني وحضني لصدره يمسح على راسي..

-لا تخافين حبيبتي هالشغلات تصير

-كيان: خاف ينسجن هنا وبعد ميرجعو؟؟؟

-شُهيب: لا كيان اذا ما مسوي شي مينسجن لا تخافين

-واذا طلع مسوي؟؟ شُهيب هذا مسودن عقله فاصل طگة ونص ميهتم لأي شيي وعنده كلشي حلو وونسة هسة تلگاه مكيّف لان اخذوا للتوقيف

-لا مو لهدرجة

-لعد انتَ متعرف اخوك! هسة تلگي گاعد يستفز بالضباط ويتونس على عصبيتهم!

ضحك خفيف يهز براسه موافق عزه شلون يگدر يضحك بهيچ وضع شنو ديصير هنا؟؟

-كيان: لا تضحك شُهيب!

-هههههه كيان شبيچ

-اسفة بس دا اتنرفز اني متوترة وانتَ تضحك علينا؟

-لا حبيبتي اضحك لانچ تعرفين فاهد لدرجة متأكدة شنو جاي يسوي هسة ويه الضباط

-اي اعرفه هالغبيي التافه السخيف يمممة ورم گلبي وررمه

-اشفتي منه ما تگليلي

-شُهيب احبك بس مو وكتها فدوة

-تمام تمام

انگطعت انفاسنا وروحنا فرفحت واجه المحامي، دخل وياهم ودقيقة تجر دقيقة وساعة تجر ساعة وفاهد ماكو.. عبرت ثلاث ساعات التعب هلكنا هلااك ياله طلع المحامي وتوجه النا يحچي بالانكليزي من عرفنا منفتهم اسباني..

-المحامي: اسمه مطلوب وحققوا وياه ما جاي يعترف وگاضي الوقت يضحك ما مهتم اذا بقى على هذا الحال راح يضطرون ياخذوه مركز شرطة وتكبر القضية!

-كيان(بالعربي) : گلتلكم راح يبقى يستفززهم مالك شُهيب شوفولنا حل تره هذا سخييف وراح يبقى على هذا الحال ويفرح من ياخذو عبالك ماخذي لمدينة الالعاب مو سجن مال مجرمين وسفاحين!!

-مسرة: حبيبتي اهدأي راح نلگه حل اخوانه ميعوفو

تفاهم مالك ويه المحامي وطلب منه يحل الموضوع بأي طريقة كانت بالسكتة ولو يحتاج فلوس الدنيا هم راح يجيب بس خلي يطلع فاهد..

مرت ساعتين جديدة ورجعلنا المحامي معترض ويدگ رجل بالگاع ويگول..

-الموضوع بدأ يتعقد واسمه مطلوب بدولتين ثانية غير اسبانيا اخوكم مستحيل يطلع اذا يبقى على هذا العناد والاصرار لازم يتعاون وياي ويعترف بجريمته

-مالك: فاهد ما يخاف من احد!! من يگلك ما مسوي جريمة معناها ما مسوي ما راح يستحي ولا يفزع من سجن ولا شرطة مطفيي عنده الاحسااس اكبر واحدد ما يخوفه!!

-المحامي: سنيور الجريمة متلبسه بي وأمن المطار مستحيل يتغاضون عن القضية جوازه أشر وبيّن عدهم راح يتحول مركز وراهة محكمة وراح تصير طويلة وعريضة خصوصاً واخوك عنده سوابق

-مالك: تمام تمام شكراً لجهودك تعبناك

هز راسه المحامي وراح هو وجنطته فكيت حلگي وعيوني سوه وين رااح وعاف فاهد لييش ما رجع يحاول يطلعه هو مو محامي؟ تقربت من مالك الحاير بالتلفون وشُهيب واگف بصفه اسمع اطراف حديثهم..

-شُهيب: شنو راح تسوي؟!

-مالك: راح نضطر ننفضح ونطلعه بطرقنا الخاصة (طرق غير قانونية)

-كيان: شنو هاي الطرق؟؟

-شُهيب: كيان بنيتي روحي گعدي ويه مسرة وجنات

-كيان: ماريد حبابيين گولو شلون

-شُهيب: فاهد راح يطلع لا تخافين بس ينرادلنا وقت شوية

-كيان: احلف!!

-شُهيب: وعيونچ الحلوة راح يطلع لا تخافين هذا بزون بسبع ارواح عرج ميصير بي هسة كله كم ساعة ويطلعلچ منا يضحك

ارتاحيت شوية من كلامه وجريت نفس، گعدت يم البنات وگلتلهن شنو صار ارتاحيت اكثر لان هنه ويايه وهدأوني بكلامهن..

-جنات: ولچ ولا ادري بيچ هالگد تحبين هالمثودن

-كيان: خيوليي چنه سليمة بس حقيير راح اموت من الخوف شي يوم من وراه

-مسرة: هههههه حبيبتي هذا يكتلني ويكتلچ ويكتل اخوانه وهو كلشي ميصير بي

-كيان: ادري بي مسودن وراح يسودني وياه!!

-مسرة: ذولة منو؟

-جنات: عليييي باعن شطولهم عبالك عمالقة

اجو ثلاث زلم متوجهين علينا مو بس طوال على گولة جنات عمالقة ثنين لابسين اسود رسمي من فوگ ليجوه والثالث لابس بدلة عسكرية بس ما ميزت شنو رتبته ماعرف لرتب اسبانيا..

-مسرة: كاتبين على گصتهم احنه اسپان

-جنات: عود ليش كلهم هيچ شكولهم

-مسرة: من ربچ بعد

فزيت واگفة من تقربوا على مالك وشُهيب اخذوهم على جهة ما خلوني اسمع لحديثهم صارو يحچون بالساعة ويتفقون ومالك طلع دفتر الچيكات مالته وشُهيب بقى يجري اتصالات.. واضح هالرجال طلبوا مبلغ جداً ضخم حتى يتسترون على عمايل فاهد!!

18 ساعة! 18 ساعة مرت واحنه بالمطار صار يوم جديد بعد لا بقى صبر ولا طاقة ولا قوة! جنات تخربطت لان ما نايمة ولا دقيقة ومتقبل تنام على الكراسي الكبار وحرنا بيها وجهها صار اصفر وعيونها تتگلب..

-مالك: لازم ترحون للفندق شُهيب اخذ البنات للفندق وارجعلي

-كيان: اني ماروح ابقى هنا

-شُهيب: كيان صار 18 ساعة هنا لا تخافين ما نرجع الا فاهد ويانه

بعد تقنيعات منهم وشوفة جنات بهالحال تنازلت ورحنا ويه شُهيب للفندق الحاجزي النا، ثلاث غرف ثنائية حاجزين بس قررنا ننام كلنا بغرفة وحدة علما يرجعون الولد ونفترق..

مسرة اجاهة اتصال من ابوها وبسببه ما نامت مبين قلقها هالاتصال طلعت للبلكون تگعد وحدها وصافنة اما اني تمددت بس علمود جنات تنام وتحضني..

بيدي التلفون انتظر أي خبر منهم كنكت نت من الفندق اريد بس خبر يطمني، عصرت عيوني اريحهن وافكر.. شمسون اله ايد بالصار اليوم اني متأكدة! بس فاهد شبيك فااهد شتحس شمصخم ومتقبل تحچي والله راح اموت ناقصة عمر من وره هالرجال بس خلي يرجع الا اطلگه واخلص منه!!

لليل وما رجعلنا خبر من نتصل بيهم يگولون بعد منتظرين واحد من جماعتهم راح يجي لانه مسافر، طلبت من مسرة نرجع للمطار ما قبلت وگالت..

-الصبح نحاول نروح ولو ما اتوقع يدخلونا كيان

-كيان: نشرحلهم على وضعنا ونفهمهم الموضوع

-مسرة: باعي راح نروح بس اذا ما دخلونا مو تزعلين

-كيان: ما ازعل

انتظرنا الفجر واجرنا تكسي وطلعنا للمطار من جديد، ومثلما گالت ما قبلوا يدخلونا بقت مسرة تشرحلهم وتحچي وياهم وتراويهم تذاكرنا مال البارحة، اجه مسؤول الامن وهم گعد يسولف وياهة ساعة لعبت نفسي ونفس البنية شگدما لح بس المهم بالنهاية دخلونا للمطار بعدما سووا نداء..

رجعنا للولد تفاجأو من شافونا وتفاجأنا اكثر من كثرة الزلم المحاوطيهم بس ما اهتمينا لشي ورحنا نگعد على جهة.. للان ماكو خبر عن فاهد موقفي وميقبلون احد يدخل عليه غير المحاميين الثنين الجابهم مالك غير محامي البارحة..

بعد مرور نص ساعة راحو الزلم الچانو بصف الولد وهرولو مالك وشُهيب على جهة معينة من المطار گمنا احنه البنات وراهم وبداخلي امل ركضتهم لان طلعوا فاهد واخيراً راح تنحل مشكلتنا وطلع احساسي صح من شفته يطلع من غرفة بابها ابيض يضحك ويصفگ بيده..

-فاهد: ههههههههههههه تشابه اسماء تشابه اسماء گلتلكم من اسوي مكسورة اعترف بيها ما اخاف من اكبرر واحد

-مالك: طاح حظك شگد ****

تحاضنو حضن طويل وفاهد يضضحك من كل گلبه ولا عبالك صارله يوم ونص متوقف وطايح حظه جوه! من گال مطفي عندي الاحساس ما چذب فعلاً الاحساس زيرووو..

-مالك: تعال شوف كيان ماتت خوف عليك المسكينة

-فاهد: ولچ هاااا كوري تعالي ماي لوڤ تعالي

ما تحملت ودموعي من وحدها گامت تنزل الگبر اليگبرني شبييه اعوي مثل الزعاطيط بس خفت عليه هالمخبل والله خفت..

حضني يطمني هو بخير ويمسح على شعري وظهري، باسني على راسي وحضنني نص حضنه ويسوي حركة بيده وكأن اكو جمهور هنا منتظري..

-فاهد: شكراً شكراً لاهتمامكم شكراً لسؤالكم شكراً لحبكم شكراً لتضحياتكم بس اني بخيييير

-مسرة: هفف

-فاهد: هههههههههه هاا مسرة قيثارة مبين ضايجة لان طلعتت بس خلي يكون بعلمچ انا لا انتهي انا لا أُهزم انا اصمد للنهاية لان اني فاهد شمسووون!!

-جنات: چنك عايش الدور زيادة فاهد شمثون؟

-مالك: اتفق، يله خلونا نطلع هلكنا تعب

-فاهد: والله العظيم احلى شهر عسل هذا راح يتخلد بالتاريخ

-كيان بهمس: گبر!

-فاهد: اليگبرچ

-كيان: سممم

-فاهد: بگلبچ

-وبگلب امك

-وبگلب اخوچ

-وبگلب ابووك

-امين ههههههههههه

طلعنا سوه من المطار هو حاط ايده على كتفي ويمشيني وياه وكل شوية گارصني لو يدغدغني لو يعض خدي ويستفز شُهيب..

-فاهد: شنووو احنه بشهر العسل شنو يصير بشهر العسل غير الفسق والفجور؟؟

-شُهيب: امشي وانتَ ساكت

-فاهد: يله كوري خلينا نروح للفندق لغرفتنا وننام هناك ونضغط اخوچ

ركبنا السيارة وتوجهنا للفندق كلمن راح لغرفته نمنا چفي على وجوهنا ما اهتميت لان فاهد نام بصفي على الچرباية ولا اهتميت من حسيت من عز نومي هو حاضني ووجهه دافنه برگبتي ما اهتميت لان تعبانة وبس اريد انام..

لليل ياله حسينا وضعنا احسن سبحت ولبست فستان صيفي وردي مورد بورد سمائي صاير نص ردن، حطيت مكياج وتجهزت راح نروح لمطعم على البحر ومناك نروح نسبح كيفت واخذت ويايه المايو، فاهد شافني احطه بجنطتي عوص عينه ورفع تك حاجب..

-فاهد: شتسوين بهذا اللباس؟!

-هذا مايووو

-نعلووو بعينچ شتسوين بي؟؟

-شبيك لعد غير نسبح

-تسبحين بمايوو گدام الناس؟؟ كيان رحمي گروني الگوچي مو تعبن منچ

-هاي شبيك؟ هسة تشوف كل البنات هيچ لابسات!!

-طلعي من الجنطة لا اذبه بالزبالة طلعيي

-ماااا

-وسمم ومرررض طلعييي

-ولي معليك انتَ

-ما نطلع لعد

-فاااهد

-هنا نطلب اكل ونتابع فلم منطلع انچبي وگعدي

-شبييك يله راح اطلعه

-من البداية وصيري ادمية لو الا تتهيلگين؟؟

**

"مسرة"
كملت تسريح شعري ومكياجي ولبست فستان سهرة احمر طويل كيمونة، نزلت اللبس الصندل العالي ورتبت اخر اللمسات وطلعت من الحمام..

-مسرة: جهزت

-شُهيب: تمام لحظة

منطيتي ظهره ديلبس قميص ابيض فضفاض مفتوحة اول ثلاث ازرار وبنطرون جينز، رش عطر ورتب شعره واللتفت يواجهني وهناا سقطت ملامحه المتحمسة واستبدلها بملامح خاوية..

-شُهيب: رايحين نتعشى

-مسرة: ادري

-ملابسچ كلش حلوة بس مال سهرة ليش ما تضميهن لغير وقت احسن

-اساساً المطعم مكان سهرة مالك گال كلش راقي وصاير على البحر واجوائه حلوة فـ اتوقع كل البنات راح يلبسون مثلي عادي

-تمام

راح لجنطتي مادري شنو يدور بيها، تقربت اوگف فوگ راسه وضحكت من طلع منها شال وغطى بي اكتافي العارية، شدد لزمته على زنودي وگال وهو يديرني للمراية يراويني نفسي..

-شُهيب: اشوفه هيچ احلى لو شتگولين؟

-صح احلى

ابتسم ابتسامة واسعة يهز براسه فرحان وكأن سوه انجاز من قنعني اللبسة هيچ صارت احلى بس لا اللبسة مو احلى بالعكس اشوف الشال خرب الفستان وشوه الستايل بس راح اللبسه لخاطره ولخاطر اسلوبه الراقي وهو يطلب مني بطريقة غير مباشرة استر نفسي واغطي اكتافي بس لانه يغار..

طلعنا سوه ومالك وجنات طلعوا من غرفتهم بنفس الوقت، مالك اناقته تتسولف وجنات طالعة تجنن بفستانها الليموني وشالها الابيض..

-جنات: هلووو

-مسرة: هلو جناوي ها نطلع لو ننتظر فاهد وكيان؟

-مالك: سبقونا فاهد وكيان خلونا نطلع

طلعنا سوه للمطعم تمشيناله لانه قريب واصلاً الفندق مالتنا يطل على البحر يجنن الڤيو منا، لاگينا فاهد وكيان هناك وتمشينا ايد بأيد كل كبل ويه بعض واستقرينا على طاولة حجزنا..

الاكل يجنن والاجواء هنا ولا بالاحلام، موسيقى هادئة مشتغلة واغلب الموجودين بالمطعم ثنائيات مغرومة ببعض وضحكات السعادة من كل حدب وصوب واحنه اخذنا نصيب من هالضحكات وطول گعدتنا بالمطعم احنه فاطسين ضحك على فاهد وكيان من يصيرون حزب ضد جنات ويتناگرون وياهة وبالاخير جنات تمسح بيهم الاراضي بلسانها..

-جنات: اييي عيوني اني جناوي لثااني ينضرب بي المثثثل

-مالك: والنعم

-جنات: شكراً شكراً عزيزي، يله خلينا نروح نثبح

-مالك: شلون وانتِ محجبة؟

-جنات: بث اطبش برجلي

-مالك: تمام يله

گامو سوه للبحر نگدر نشوفهم منا مالك كف بنطرونه وهي رفعت شوية من فستانها من دخلو للبحر وتغطت رجليها بالمي يتمشون ووجه جنات ينگط سعادة وفرح مستمتعة ومالك مستمتع على سعادتها..

-فاهد: باعي العالم الفرحانة باعييها

-كيان: لا تحاول ما اصالحك

-شُهيب: انتو متزاعلين؟

-كيان: اي

-مسرة: مو هسة چنتو فريق ضد جنات؟

-فاهد: مو شوفي كوريتي عدها انفصام لايحها من شمسون متعرفين شتريد ساعة فرحانة ساعة تضحك ساعة مبوزة يجوز هاي اعراض تربية شُهيب، مسرة انتبهي لطفلكم لا تخلين شُهيب يربي

-كيان: فااهد مسرة مو حااامل كافي بزعتهممم

-فاهد: اقصد بالمستقبل شبيچ

-كيان: هسة نگوم نسبح لو اكمل زعلتي؟؟

-فاهد: نگوم بس بملابسچ اطيح حظچ لو نزعتي گدام العالم

-كيان: معقدد معقققددد

-شُهيب: كيان تردين تنزعين فستانچ هنا؟!

-كيان: هااا؟ لا ابد مستحيل عيب ما اسويها

-فاهد: شگد چذااابة

-كيان: هههههه فاهد تره اتشاقه وياك چنت شبيك ههههه گوم گوم

راحو للبحر وبقينا اني وشُهيب وحدنا هنا، طلبنا عصاير وگعدنا نستمتع بالاجواء لفترة طووويلة كلش نسولف بكلشي يخطر على بالنا بدون ملل ما حسيت بالوقت الا من باوعت لتلفوني وشفتها عبرت الـ 2:30 بالليل..

-مسرة: حيييل مادري بالوقت لعد وين الباقين؟

-شُهيب: رجعو من زمان

-مسرة: المكان فرغ شوف شعجب

-لان مو عطلة ماكو هواي سواح

-هااا لعد امممم اريد اطلب منك شي

-أمريني

-خلينا نسبح

-بس بملابسچ

-اوكي

-يلا

ضحكت متحمسة وهو گام ويايه نزع قميصه بقى بالبنطرون واني نزعت الصندل والشال ورحت اركض على الرمل متوجهه للبحر، ترددت قبل لا امشي زايد وتذكرت من غرگت بالمسبح بس استجمعت قوتي من شُهيب لزم ايدي وتمشينا سوه نقطع مسافة من البحر..

ضحكت بصوت عالي مستمتعة ببرودة المي تجنن والدنيا قمرية ونجوم مطشرة ضايفات لمسة جميلة مزينات السماء..

عبرنا شوط كبير من البحر ابتعدنا عن الناس وبده يوصل المي لـ حنچي بينما شُهيب وصل المي لنص صدره، خفت من بده المي يغطي خشمي وحسيت بأحساس مو حلو ابد توترت وكأن شي بده يجرني من جوه، چلبت بأيد شُهيب اريد اطلع وحسيت بي يجرني من خصري ويعلگ ايدي برگبته اسند نفسي عليه..

-مسرة: هههههه الا شوية ردت اطلع من المي خفت والله

-ادري حسيت بيچ

-فدوة لليحس

ضحك وگلبي صار يرفرف قريبين على بعض لدرجة وجهي بوجهه ومشددة على رگبته بأيدي بقوة اخاف افلتها واروح ويه الامواج، جرني من خصري يثبتني وصرنا عين بعين..

-شهوبي اوبي اوبي

-عيوني

-شگد عمرك بالضبط شُهيب؟

-ما تعرفين عمري؟

-اعرف بس اريد اخلق حديث شييك

-ها تمام عمري 31 سنة

-عزززه شُهيب احس اكو سمچة جوة رجليناا

-هاي صدگ؟؟ حتى اني حسيت وعبالي اتخيل

-خاف تاكلنا

-ما تاكل حياية

-ههههههههههههههههههههههه ولك فديييييت

ضحك ويايه ورفع راسه للسما، لزمت رقبته اكثر من اجتنا موجة قوية ارتطمت بينا، رفعت راسي اشوف على شنو ركز وبدون لا اسأل حچى..

-من چنه صغار مالك يگول امه الاوكرانية چانت تعتقد بخرافية

-شنو هي؟

-أي نجمة چبيرة تظهر بجانب القمر وتصير عينچ عليها ويكون احد قريب منچ لازم تبوسي

-اهاااااا

-هههههه والله العظيم امه تگول اني معليه

-شلون امه تگول وهي ماتت وهو صغير؟

-عنده دفتر مذكراتها، امه كاتبة ماهرة وچانت تكتب كلشي يتعلق بحياتها

-هاا وهي صنعت هاي الخرافة لو فعلاً موجودة؟

-ماعرف يجوز موجودة بمعتقداتهم

-وچانت تبوس ابوك كلما تشوف نجمة وقمر سوه

-اي

-وهسة؟

-هسة ماكو غيرنا

-يعني شنو؟

-اني وانتِ، القمر ونجمته

-حلوة الثقة شايف روحك قمر

-يجوز اني مو قمر بس متأكد انتِ نجمتي

ابتسمت بدون لا ارد احسني ولعت رغم برودة المي، غيرت الموضوع بسرعة من طالت صفنته بوجهي..

-واذا ام مالك ما باست ابوك من شافت القمر والنجمة سوه شيصير؟

-اكمل بس ما توهوسين؟

-اي كمل

-تكملة الخرافة هو من الشخص ما يبوس الطرف الثاني وجه واحد منهم يتشوه بالمستقبل

-صدگ تحچي شُهيب؟

-اي والله

-عزه خاف صدگ

-اي اتوقع صدگ

-يا هسة شلون

-والله مادري شنو نسوي

-هسة وجهك يتشوه عادي بس وجهي لا يمه اموت غير

-بعد همه ما گالو وجه منو يتشوه بالضبط

-شُهيب اذا وجهي تشوه راح تذبني بنص الطريق وتخلي الچلاب تنهش بيه مو؟

-على الاغلب اي شسوي بيچ مشوهة

-شوووووووهيبببب

-هههههههههههههههه اتشاقة وربي شو صايرة تصدگين بسرعة

-ديلا شوفلنا حل نمشي وضعنا بي

-شنو الحل

بلعت ريگ من شدد على خصري عصره بين ايده، انفاسي انقطعت من ضرب طرف انفه بأنفي، ابتسمت وهمست بيناتنا..

-شنو الحل؟

-مادري

-برأيكم شنو لازم يصير؟

-عندي هواي اراء حالياً

-انطيني واحد

-اشوفچ واحد يصير؟

-اي يصير

ابتسم بمكر وفاجأني من لقط شفايفي بقبلة عميقة!! قبلة فاجأتني وسحبت انفاسي وخلت گلبي يدگ بقوة وبدأ بالفن الحقيقي، نسيت روحي ونسيت احنه وين ونسيت وضعي الصعب وبقيت وياه لاخر نفس...

ابتعد يسمحلي اللقط انفاسي ثانيتين وكررها بطريقة اسرع زعزعت حالي وخربطت احوالي ما متخيلتها ولا متوقعتها تصير تخيلت يحل الموضوع ببوسة على الخد او على الراس مو قبلة رومانسية بحتة!

جريت نفسي منه من حسيت بي يعضني وسبحت ارجع للساحل اريد اشرد قبل لا يتطور الوضع ونتيه ثنينا، شلت الشال الشمرته على الرمل ولفيت بي نفسي واخذت حذائي ورجعت للفندق وگلبي يرعد رعد راح يوگف..

فتحت الغرفة وشمرت الشال على الچرباية روحي سايحة وعقلي يفكر بشي واحد وهو "شُهيب" وين راح شُهيب وليش ما اجه ورايه؟! يمكن ما اجه لان عباله زعلانة لان باسني بدون رضاتي؟ لو يمكن راح ينام بره؟ لو يمكن يريد ينطيني مساحة استوعب الصار جوه ومن عضته الغريبة التشبه عضة يوم المصعد..

ما گدرت ابقى انتظر هنا وافكر افكار سلبية، فتحت باب الغرفة ومديت راسي اشوف وينه وشهگت من حسيت بي يدفعني جوه ويسندني على الحايط يكمل البدينا بي...

تعبت اضعاف والخوف برگع گلبي كلام ابوية يتردد ببالي وهو يحذرني ما اخطي خطوات غبية ويه شُهيب واسلمه نفسي بس ليش محد بينا جاي يگدر يبتعد عن الثاني ويسيطر على الوضع ويرسم حدود؟!

بدت تطور الامور بشكل سريع رجفة زارت عامودي الفقري ومغص لوى بطني، دفعته عني اصد وجهي عنه من حسيتنا راح نغلط! راح نغلط هنا بدون لا نحس على الدنسوي ويمكن باچر نگعد ندمانين على الصار..

-شُهيب: مسرة

وگفت على جهة اللقط انفاسي السريعة والقاسية، توقعته راح يعتذر على تصرفه بس صار العكس تلمس خصري من وره وحضني يقربني منه وهمس بأذني..

-أنطينا فرصة مسرة

-شُهيب حباب

شدد على خصري اكثر نبت اصابعه بي احسهن طبعن هناك وخلفن اثر، همس بحرگة وعصبية..

-كافي مسرة رحميني ما جاي اتحمل اكثر من هيچ

-شسويتلك

-كل يوم جاي ابلع جمر بشوفتچ گبالي وساكت

دارني عليه يواجهنا ويه بعض، النظرة بالنظرة واليرجف گلبي عيونه اكلتني اكل وانفاسه لاهثة متعبة، عيونه ذبلانة ومنتظر مني كلمة على نار بس ما گدرت حسيت بالخوف حسيت وره ما اسويها راح اتندم وتسوء الامور بيناتنا خصوصاً اذا افتهم ابوية والله ميرحم شُهيب ويكيدله مكيدة يدمره بيها..

-شُهيب

-گلبه

-شُهيب اني خطرة وكلشي تلمسه ايدي بحترگ

-حرگيني

-بصمات اصابعي نار وراح تچويك افهمم!

-اريدچ تلمسيني وتشوفين يا نار اقوى ناري لو نارچ

-لا ماگدر أجازف بيك

تملصت من ايده اهرب للحمام وسحبني بقوة يرجع يرطمني بجسده، توترت اكثر اول مرة احس بالعجز لهدرجة واول مرة يأثر بيه انسان بهالطريقة احسه مغناطيس وما جاي اگدر ابتعد منه..

-انتِ لعنة وصابتني راح تبقين براسي لو رحتي لنهاية العالم

-شُهيب عوفني

-‏مااا اعوفچ لا تحاولين

-ولك تموووت افهم تمووت لو بقيت وياي

-ميت واني بعيد عنچ ما تفرق وياي

قيّد ايدي ثنينهن بتملك حصرني بموقف ماگدر اطلع منه عينه بعيني وروحي المشتعلة، انتهيت! عرفت اني انتهيت بهاي اللحظات وهو يسألني بحذر وصوت خافت..

-تقبلين اترجم حُبي عليچ ماي ليدي؟

گلبي وگفت دگاته ويه لمسة اصابعه يفرق خصلات شعري المبلل، غمضت عيوني من باس طرف انفي وبهدوء وصوت ذابل راهي جاوبت بدون تفكير..

-اقبل.......

يتبع....

━━━━━━  ━━━━━━

شلونها الاوضااع يمكمممم 🌚