رواية ابناء الحسوم "شمسون" الفصل الحادي وثلاثون 31 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

أوهمتهُ بالصداقة، وأحببتهُ سراً.. 🩷

━━━━━━  ━━━━━━

"جنات"
حسيت نص الليل على مالك يوخر ايده عني وينگلب للجهة الثانية ما ردت اضوجه واخلي يرجعلي ادري دا اضغط عليه وازعجه لانه چان واضح من البداية وگال "ما احب احد ينام بصفي" شلون واني نايمة على ايده وصدره واعيق حركته كل يوم..

بقيت گاعدة ماگدرت انام بعد، ماعرف هل البيه مرض نفسي لو حالة نفسية بس متعودة من اني وطفلة صغيرة ما انام الا احط راسي على صدر ايات بسبب هنادي مرت ابوية..

چانت وما زالت توهمني اكو جن وشياطين يجون للبنات الحلوات بالليل ويأذوهن اذا يبقن وحدهن، هالشي بدت بي من عمري ثلاث سنوات ما اتذكر زين بهالعمر بس مقتطفات لكن هنادي كررت السالفة اكثر من مرة على مرور السنين لدرجة توصل بيها تجرني من رجلي اني ونايمة بصف ايات وتگول مو اني سويتها..

عجزت ايات تفهمني وتقنعني كلام هنادي خطأ وهي تسوي هيچ عمداً بس ماگدرت انام بعد وحدي اخاف والخوف يوصلني لدرجة انهار من النعاس وماگدر اغفى كلشي جربت حتى حبوب منومة صرت اخذ وما اغفى واذا غفيت وحدي افز نص الليل مرعوبة واحس بگلبي راح يوگف..

وهسة اعرف راح اگعد باچر عيوني منفخة وحمر لان ما راح انام بسبب ابتعاد مالك، تنهدت وعصرت عيوني احاول انام بس محال هالشي فـ استسلمت للامر الواقع وبقيت بفراشي..

ساعة مرت ومالك تحرك مرة ثانية فرحت وتوقعته راح يرجع لجهتي بس صار العكس، گعد على حيله بحركة سريعة وكأن چان يحلم بشي وفز من الحلم..

زفر بقوة وفرك وجهه ومسح على شعره ولحيته، راقبته بهدوء بدون لا احسسه اني گاعدة ودا اشوف اليسوي وهو هم ما اللتفتلي جر تشيرته لبسه وگام من الچرباية وتمشى للميز صبله گلاص مي وشربه دفعة وحدة..

جر تلفونه من الشحن هذا التلفون الثالث ما اعرف رمزه ولا يفتحه گدامي ابد، گلب بي شوية واتصل على شخص حچى وياه بلغة مختلفة وسد الاتصال، رجع التلفون وراح يفتح شباك الغرفة وصفن على البره..

درت وجهي لجهته اباوعله واني بالفراش وهو عينه بره يتأمل شي جذبه وهالشي خلاه يسرح لفترة ويبتسم وابتسمت لا ارادي وياه..

ضجت من الگعدة وگمت من الفراش اللبس الروب مالتي اشتريته بالجديد اللبسه فوگ ملابسي الفضيحة احسن من العباية وتمشيت بخطوات خفيفة بالكاد تنسمع لجهته..

-مالك: گعدتچ؟

-لا

-ادري بيچ حسيتي من گمت

-لا حثيت قبل لا تگوم لان انتَ وخرتني عنك

اندار يباوعلي وابتسم، اشرلي اتقرب تمشيت اقطع باقي المسافة وصرت بصفه اباوع من الشباك على البحر وبعض الناس الي على الساحل والمطاعم والكافيات المفتوحة بنص الليل..

-جنات: شفتك واگف وتتبوثم (تتبوسم) للبحر

-مو للبحر ابتسم

-ها لعد؟

-للسما

-نفث الشي المهم انتَ خبل

ضرب جبيني بخفة ايده ضحكت ورجعتله الضربة اقوى على كتفه، ضحك وگال وعيونه مركزة على السما..

-اكو خرافة امي چانت تعتقد بيها ومن شفت القمر وبصفه نجمة چبيرة تذكرتها

-شنو هالخرافة؟

-من تلتقي نجمة چبيرة ويه القمر بالسما وتصير عينچ عليها ويكون أي شخص بجانبچ قريب لازم تبوسي

-هههههههههههههه حلوة والله خوش خرافة بث هي چذب مو؟

-چانت تعتقد بيها اعتقاد تام لان ثنين من صديقاتها ما طبقوا الخرافة وتشوه وجههن وحدة سوت حادث والثانية احترگ وجهها والخرافة تگول اذا ما طبقتي الشرط واحد من الثنين الشافو القمر وجهه يتشوه

-چذاب!!

-بكيفچ

-لا لا اقصد چذاب يعني مثتحيل اكو هيچ شي هاي خرافة شلون صارت صدگ؟

-مادري بعد

-وانتَ كلما تشوف القمر والنجمة ثوه تبوث احد؟

-صارت مرتين بحياتي كلها وبالمرتين چانو اخواني بصفي شُهيب قريب مني وفاهد ورايه اتذكر جريت شُهيب ابوسه على راسه وفاهد غار وزعل يريد هم ابوسه وما خليتها بنفسه بسته بوستين

-هههههههه فاهد والغيرة

-وبالمرة الثانية چنه اني وشُهيب عداوة وطالعين بشغل سوه شفنا نجمة وقمر وواحد باوع للثاني ومحد تنازل بس بعدين فكرت وگلت خاف يصيرله شي جريته وبسته غفلة ظل صافن مستغرب ههههههه

ابتسمت، مرة ثانية تغيرت نبرة صوته وهو يحچي بـ شُهيب وكأنه صديقه المفضل تنهد وهو يباوع للسما بقينا نباوع للمنظر منا سبحان الله شگد حلو، بادلني مالك نظرة وبحركة مفاجأة وسريعة جر وجهي وباسني على خدي بوسة مطولة..

تغيرت وتيرة انفاسي انصدمت من حركته ما توقعتها صكيت بمكاني ما اتحرك الا من ابتعد مني وگال وهو يأشر على وجهي..

-وجهچ حلو حرام يتشوه

خجلت كلش وجهي ولع يمكن صخنت؟ وخرت گذلتي عن عيوني ولطشت روحي بالشباك انطي ظهري علما يستعدل حالي ماريد انفضح، بقيت هنا مثل الطفل المسوي مكسورة ويخاف ينكتل..

-يله تعالي نامي انتِ تعبانة

-معليك

-تعالي جنات

-وخر

-ماعيدها بعد تعالي

-انتَ ثاقط

-صح هو صوچي خفت على وجهچ لا يتشوه

-انتَ شوهته وهتكت برائتي بهاي البوثة!

-هتكت برائتچ ببوسة على الخد؟ ههههههه اكيد تشاقين

-لا ما اتشاقه ماكو رجال بايثني من قبل!

-يله واول بوسة اجت مني لو اني ما اعجب؟

-اثكت كافي

-تردين تقنعيني ابوچ لو عمامچ ما بايسيچ من قبل؟

-لاااع

-مستحيل

-والله العظيم حتى ابوية ما بايثني

-شگد ماعنده ذوق ولا ذرة احساس

-يااااا

-والله اني عندي بنية وما اشبعها بوس وحنان؟ انحسب عار على الاباء

-مو كل الزلم مثل تفكيرك اكو يكرهون البنية ويشوفوها عار عليهم

-لانهم اغبياء اذا هو مو گد مسؤولية الطفل مهما كان جنسه لا يفكر يخلف

-تدري انتَ راح تكون أب مثالي

-لا

-هاي ليش

-لان ما افكر بالزواج والاطفال اني ضد التكاثر

-صدگ عود؟

-اي

-لا احث حرامات عقليتك حلوة راح تكون أب حنون على اطفالك

-لا جنات مو شرط يجوز اطلع عقدي النفسية عليهم واعاملهم مثلما ابوية يعاملني

-بث انتَ حنون عليَّ

-انتِ مو بنتي انتِ بت عمي وهذا الشي يفرق هواي

-صحيح يفرق لان الطفل تابع الك راح تخاف وتحمي وتحبه اكثر من أي شي بهاي الدنيا

-لا

-مالك تفكيرك غلط

-هههه ماريد اطفال هي گوة

-لا تريد بث لازم تغيّر تفكريك بموضوع التكاثر ومادري شنو لان المال والبنون زينة الحياة الدنيا

-جنات الاولاد نقطة ضعف لأهلهم راح تقدميهم على طبق من ذهب للعدو واني ماگدر اجازف بنقطة ضعف جديدة

-منو نقطة ضعفك الاولى؟

-اخواني طبعاً

-ومتريد تخلف لا يهددوك بأطفالك

-اطفالي وزوجتي هم وهذا السبب اني ضد الثنين "الزواج" و "الانجاب"

-بحياتك ما فكرت بالزواج؟

-فكرت مرة من حبيت بنية وچانت اغبى فكرة مفكرها بحياتي

-ليش وين راحت البنية؟

-طلعت مو نفس الي ببالي

-شلون؟

-شفتها بوضع مو حلو ويه واحد

-يعني شثوت؟

-گتلچ وضعهم مو حلو

-يعني باثهاا؟؟؟

-هههههههه اضرب

-شنو اكو اضرب من البوثة؟؟

-اكو هواي بس انتِ بريئة تعالي نامي

-اجيت

نزعت الروب وطفرت بالفراش فتحلي ايده دحست روحي بنصهن وجعصني مثل قبل، تنهدت مرتاحة اسفة ايات بس هاي احلى نومة جاي انامها من انولدت لليوم والسبب مالك ضخم ويضغط عليَّ بالنومة واموت على الجعيصة..

-ملاك

-همم

-راح تبقى عزابي طول عمرك؟

-لا ليش

-مو انتَ گلت متتزوج واحنه راح نتطلگ يعني تبقى وحيد

-لا ادخل علاقات عادي

-يعني تصير عندك حبيبة وهاي؟

-اي

-وتنام يمك وهاي؟

-اي

-وهيچ وهاي؟

-اي

-وجعيييي

-وولچ!!!

-والله شنو هاي اي اي اي اي!! شلون هيچ تثوي شلوون

-ليش شلون؟

-حرام!! اصلاً حرام تلزم ايد بنية وانتَ ما عاقد عليها!

-تمام

-شبيك احچي صدگ

-اي فهمت

-زين هم صاحبت من قبل؟

-اي

-منو بله منوو

-من مختلف الجناسي كلشي جربت ما راح اصير شريف براسچ واچذب عليچ

-ليش ما تزوحت ولا وحدة لعد؟ معقولة ما حبيتهن؟

-لا ما حبيت چانن علاقات عابرة

گعدت على حيلي وتربعت گدامه حتى اشوفه عدل، سند راسه على ايده ونهض شوية من نفسه يواجهني..

-معقولة ولا وحدة عجبتك بيهن؟

-اي عجبوني وحدة تگول للثانية اني احلى منچ بس ماكو وحدة دخلت راسي غير اخر وحدة وما دخلت وياهة بعلاقة چانت بس نظرات غبية

-نفثها الشفتها ويه ذاك الططوة؟

-اي هي دارلان

-صخمان

-هههههههههههههه

-والله اوعع تلعب روحي من المرة الرخيصة ماحب وحدة متعددة العلاقات

-والزلم؟

-خو ذولة اتفل عليهم

-رحم الله والديج

-تدلل مالك

-هسة انتِ عمرچ 18 سنة بعدچ صغيرة ما شايفة شي

-لا عمري 19

-شلون مو گلتي 18 سنة؟

-اي بث اليوم عيد ميلادي

-اليوم عيد ميلادچ؟؟؟

-اي

-جنات ليش ما حچيتي چان احتفلنا بي

-عادي عادي ما اهتم اني

-كل سنة هم تحتفلين بي؟

-اي بث اني وايات تحشش عليَّ و تشتريلي كيكة ام الربع ههههههههه

-لو حاچية چان جبنالچ احلى كيكة

-يله بعد راح عادي شنو تغير قابل

-اي

-مالك اني مو نعثانة خليني اقرالك قثة؟

-انوب قصة

-حباب كلش راح تحبها والله

-لو يفتهم ابوية صرت انام على قصص والله الا يجرم بيه

-شعليك بأبوك انتَ اثمع وتونث

-يلا يابة نسمع لقصتچ

-اي شوف هاي هنا عدنا البطل ضابط والبطلة بمعهد المعلمات فـ فديوم من الايام طلعت متعاركة من بيت اهلها لان ابوها زبالة ويريدها تشتغل وهي تردث (تدرس) وراحت لدوامها ودتعبر الشارع ورادت تضربها ثيارة لولا تدخل الضابط الچان واگف ويه المرور.. ومثل النمرر ركض عليها يريد يجرها والله ستر وما اندعمت لان ما لحگت تطخها الثيارة.. وصارتلك عركة شكبرها بين الضابط والثايق وغرمه ورزله و....

اقراله القصة بكل حماس وهو صافن ومركز فرحت وتحمست لان باله ويايه لحدما وصلنا لنص القصة گال بأستغراب..

-اوگفي هنا اوگفي.. كله منطقي بس مال يومية يكتلها وانوب يرجع ينام يمها بنفس الغرفة هاي واگفة!

-ليش

-شلون تقبلها على نفسها بابا يومية كاتلها مسويها كيس ملاكمة غير تاخذ موقف تاخذ صخام حتى ما يكرر عملته؟

-مو شوف هي متقبل ومتريده بث هو ططوة ولاطش بيها شتثوي

-اي لازگ بيها فهمنا بس لا تنطي مجال ولا تضحك بوجهه تره الزلم ينچلبون من المرة تضحك بوجههم وهمه غلطانين ما راح يسوولها قيمة بعد ويعتبروها مداس هاي معلومة الچ حفظيها للزمن جنة يمكن تفيدچ

-تم حفظتها

-يله كملي ويه ذولة المزعجين

-لا خلص البارت عود باچر نكمل

-اخيراً

-يله ثويلي مجال

هز راسه بـ اي ونام عدل وخرت ايده الجوه راسه ومديتها ونمت عليها انوب جريت ايده الثانية وخليته يحضني ونمت نومة مريحة جريتها للصبح..

الصبح حسيت بـ مالك مو بصفي گمت ادوره وسمعت صوت الدوش بالحمام، حضرت الملابس الراح اللبسهن اليوم بينما يكمل سبح طلعت سوت اسود وشال ماروني واسود وجنطة جانبية كروس..

طلع مالك من الحمام ينشف بشعره بدون لا اباوع لجسمه المصلخ طبيت للحمام واخذت ملابسي اسبح واسوي عنايتي، كملت ترتيب نفسي بالحمام على اخر حباية وطلعت للغرفة واني احط مرطب لايدي..

-جنات: مالك اگلك اليوم....

سكتت من شفت الغرفة فارغة، صحت بأسمه واني اروح للبلكون هم ماكو يااا هذا عافني ونزل لييش ماگدر يصبر شوية! تأفأفت ضايجة ولبست الجنطة ونزلت لمطعم الفندق علمود الريوگ..

دست المصعد وانتظرته يفتح طول شوية الفندق چبير والمصعد عليه طلب بهالوقت، اثناء ما اني واگفة انتظر وگف بجانبي رجال رمقته بنظرة سريعة بادلني النظرة وابتسم ما رجعتله الابتسامة وبقيت انتظر المصعد..

-الرجال: لا لا لا شلون نسوة هاي

تفاجأت من حچى بالعربي "عراقي تحديداً" عبالي ديحچي وياي باوعتله استفهم منه بس انتبهت ديحچي ويه روحه ويدور بجيوبه..

-عفواً احصل عندچ قلم؟

-جنات: ها اي عندي

طلعت قلم جاف من جنطتي وانطيته طخت اصابعي بـ ايده بالغلط سحبتها فوراً متوترة ابتسم واعتذر مني مادري ليش يعتذر واني الي طخيت ايده..

-احتاجه بس دقايق انتظريني بلا زحمة

-تمام

انفتح المصعد بس ما رحت بقيت انتظر الرجال چان عفت القلم بس هذا قلم الحظ مالتي لو اموت ما انطي لاحد، وگف الرجال يكتب شي على ايده واني اراقبه..

-الرجال: شكراً جنات

-جنات: عفواً

اخذت القلم اضمه بجنطتي وانتبهت هذا گال اسمي؟؟ شلون عرف اسمي؟؟ رفعت راسي بسرعة اسئله وشفته يباوعلي وباقي على ابتسامته..

-جنات: شلون عرفت اثمي؟

-انتِ تعودين لـ مالك شمسون مو صحيح؟

-ليش تثأل؟

-لان مالك اعرفه اشتغلنا سوه فترة بـ اسبانيا

-زين؟

-واعرفه اجه هنا بس شعجب صارله سنين ما داخل اسبانيا من اخر مرة تصاوب بيها

-تصاوب بيها شلون؟

-صارت حرب اسلحة بينهم وبين جماعة صقر ريماس والطلق صار يتطاير كل مكان مالك شمسون واخوانه الثنين وولد عمه چانو وياه بهاي المهمة تصاوب مالك والا شوية راد يروح بيها اخوه شُهيب وولد عمه هارون وتميم ولولا فزعة فاهد وضربته القاضية الي سببت شلل لابن اخو صقر وخلت جماعة صقر ريماس الجبناء ينهزمون چان الكل تخلص من ولد شمسون

-انتَ منوو؟؟

ما جاوبني تشكرني مرة ثانية على القلم وعافني وراح، دست المصعد بسرعة انتظرته شوية علما وصل ونزلت گبل للمطعم ادور على مالك وابلغه الصار، ماعرف ليش هذا هيچ حچى ويايه وشنو يريد بالضبط بس كلامه وترني..

مطعم الفندق چبير دورت على مالك بعيوني ودرت كل الاتجاهات بس ماله اثر هنا وينه؟؟؟

-excuse me are you madam Janat?

باوعتله مستغربة وقلقة بنفس الوقت، هزيتله براسي اي بدون لا احچي، اشرلي اروح وراه لمكان ما قبلت وظليت واگفة بمكاني بدون تفكير طلعت موبايلي واتصلت على النت لتلفون مالك.. يدگ وميشيله جربت مرة ثانية وهم ميشيل، اتصلت على فاهد وعلى كيان وعلى شُهيب ومسرة ومحد يشيل تلفونه زاد قلقي اضعاف وينهم وليش محد ديجاوب تلفونه؟؟

-madam your friend is here

-who is she?

-her name is kean

هزيت راسي بـ اي وتمشيت بحذر وراه شوية ارتاحيت من شفت ناس ينزلون للمطعم ويتوزعون على الكراسي، حرصت امشي وراه بس ما ابتعد عن بوابة المصعد هواي، اشرلي على ختلة صايرة بزاوية المطعم گلبي يدگ حيل وايدي بدت تتعرق من التوتر.. مديت بس راسي و....

-SURPRISE!!!

صاحو بصوت واحد وكيان بيدها نفاخة وفاهد بصفها لابس قبعة عيد الميلاد ومالك شايل كيكة چبيرة.. حطيت ايدي على گلبي وضحكت بصوت عالي ممصدگة وضحكت اكثر على منظرهم..

-كيان: كل عااام وانتِ بألف خير جناووي الحلوة

-فاهد: كل ثنة وانتِ ثالمة وثليمة هم تتمنالچ ثنة ثعيدة

-جنات: هههههههههههه ههههههههههه شنو هاي شنو ديصير هناا

-مالك: كل عام وانتِ بخير

-كيان: ملعونة البارحة عيد ميلادج ومتحچين ليش ولج ليش

-جنات: مادري نثيت

ضحكت بفرح ما توقعت هالمفاجأة ولا توقعت مالك راح يسويلي شي البارحة من سكت عبالي خلص سد الموضوع لان حتى ما گلي كل عام وانتِ بخير طلع مسويلي حفلة صغيرة هنا بدون لا احس عليه..

-جنات: ماااااااالك شكرررررراااً

-مالك: عفواً بس لا تصيحين

-جنات: هههههههه متحححمثة كلش متحمثثثة وثعيددة

ضحك ونزل الكيكة واجه يحضني، استحيت كلش مع العلم بالليل ما انام الا لزگ بي بس من يصير الصبح ارجع استحي واصير حمرة..

-جنات: ما عبالي تثوولي شي

-مالك: اول عيد ميلاد الچ ويانه وتتوقعين نمشي بدون لا نحتفل بذكرى سوه؟

-شكراً مالك

-العفو جنة

ضحكت من جديد مدا اسيطر على ضحكتي كلش تونست بالعيد ميلاد صح احنه اربعة نفرات بس احلى اربع نفرات كلهم طاقة ونشاط وحب وتألف..

-فاهد: همزين ما اجه اخوچ العار بس لو جايبين مسرة قيثارة

-كيان: صدگ ليش ما اجوي؟ مالك انتَ بلغتهم؟

-مالك: اي بس شُهيب جهازه مغلق ومسرة هم

-جنات: عزه خاف بيهم شي

-مالك: لا سألت الريسبشن اذا طلعو لو لا گالو ما نزلوا من غرفتهم بعد

-كيان: ها لعد يجوز نايمين

-مالك: يجوز، يله جنات تعالي تمني امنية

-جنات: مادري شنو اتمنى اوگف افكر

واخذتلي صفنة ابو صابر ام الربع ساعة طگت ارواحهم وفاهد نزع القبعة من راسه طالع يخرب ضحك بيها وشمرها بالگاع..

-فاهد: انعل ابو امنيتچ نفخي الشمعة بلا تمض****

-جنات: اوگف شلون غير افكر بشي حلو

-مالك: اني اتمنالچ.. يله تمنيت نفخيها

-جنات: مو غير اعرف شنو تمنيتلي؟

-كيان: يبوووو مالك تمنى بلكت جنات تبطل ملحة وتكمل الشي بسرعة

-مالك: هاي شمعرفچ اني هيچ تمنيت؟؟

-كيان: گول والله

-مالك: والله هاي امنيتي چانت

-جنات: اهوووو انتو الثنين زعلتوني بعيد ميلادي حتى كيكة ماريد بعد

-مالك: لا لا تعالي يله تمني بكيفچ

-جنات: اتمنى اتمنى اتمنى اني اكمل دراثتي وكيان تصير مهندثة مشهورة ومالك يقتنع ويتزوج ويصير ابو وفاهد يعقل وشُهيب يبقى حباب وميتغير ومثرة تنجمع ويه بنتها...

كملت امنيتي الگلتها بصوت عالي ونفخت على الشمعة طفيتها، صفگولي فرحانين وفاهد رجع لبس القبعة طالع چنه موطة ام الكبوس..

-فاهد: جنات ليش تمنيتيني اعقل؟؟ هو اليعيش ويه شمسون يريدله عقل؟ اني اريد ابقى مخبل حتى اتحمله

-مالك: اول مرة اتفق وياك

-فاهد: اروووح سحل لليتفق ويااي يروحلك شُهيب ثمنطعشش فدوة

-كيان: هم جاب طاري شُهيب!

-جنات: ضمولهم كيكة لا تاكلها كلها فاااهد

-فاهد: عنده احلى كيكة فوگ شيسوي بكيكتچ

-كيان: ووولك لا تتحارش بمسرة! والله الا اگللهاا

-فاهد: گليلها قابل خايف منها

-كيان: روح عن وجهي انتَ جنات ما كملتيلي القصة مال البارحة الضابط والمعلمة

-جنات: ها ها وين وصلنا

-كيان: من زعلت وراحت تنام بالغرفة يااااااي

-مالك: حتى انتِ كيان!

-كيان: ها شبيه؟

-مالك: شلون فرحانات بهيچ مشهد مبتذل كاتلها ومجنزها وبنفس اليوم صالحته وضحكت بوجهه وخلته ينام بصفها؟ شبيهن البنات هالايام!!

-فاهد: واو! كيان اني اعضچ بالضحك تظلين اسبوع زعلانة لو لان هاي بطلة تطربن عليها ادري بيچن تطربن على الغريب

-جنات: وعلى الضباط

-فاهد: شنو الحلو بالضباط؟؟

-مالك: والله مادري من البارحة خابصتني بيهم

-جنات: تره اني ما خابصتك اني قريتلك القثة بث البطلة تحبهم غير اني احچي بـ لثان البطلة شبيك مالك

-كيان: معليچ بيهم كمليلي اني اني احب هالسوالف وتسرسحني

-فاهد: لانچ غبية مالك خلينا نطفر منا قبل لا ابتلي بهاي الكورية واخليها غصباً عليها تنام بصفي اليوم وتضحك بوجهي وره ما تنكتل

-كيان: شگد غريب اطوار انتَ امشي جنة نروح وحدنه نسولف

اخذتني ايد بأيد وگعدنا على طاولة وحدنا وانفردنا نسولف بالقصة وعلمتها على البرنامج الي اقره منه وانطيتها قصة تقراها بس عربيتها ما مضبوطة كلش مثلي وبطيئة بالقرائة..

-كيان: اعرف اكتب واقره عربي والله حتى مراسلاتي ويه بعض من صديقاتي عربي بس اني اگلچ بطيئة

-جنات: شي طبيعي يله راح تتقوين بالقثث

-كيان: اي، اگلچ مسرة وين؟ صار الظهر وما شفناها

-جنات: والله مادري امشي نثأل الولد

رجعنالهم چانو يدخنون ويحچون بموضوع بس شافونا سدو حلگهم عرفتهم ميردونا نسمع لخياساتهم..

-جنات: مثرة وشُهيب وين؟

-فاهد: ههههههههههههههههه انفكت الچبسة چنها

-مالك: لا مستحيل! يجوز نايمين احنه خلونا نطلع شعدنا بالفندق

-كيان: خلونا نروح نسبح حبابين بنفسي اسبح بالبحر كلش تونست فاهد فدوة

-فاهد: امشو يله

طلعنا للبحر وكيان ما صدگت ركضت تطب بالبحر هي وملابسها مثل الصخلة السرحوها، اشرتلي من بعيد اروحلها ونسيت موضوع الرجال ونسيت لازم ابلغ مالك راح من بالي كلياً واللتهيت بالبحر اطبش بي..

لليل تمددت على الرمل اباوع للسما وكيان بصفي، انداريت عليها اباوعلها وهي باوعتلي وابتسمت..

-كيان: گذلتچ طالعة شوية

ضميتها بسرعة وهي تنهدت تكمل..

-كلش حلوة مدريد وتونست ما توقعت راح يجي هاليوم

-جنات: يوم تثافرين لـ مدريد؟

-لا، يوم اتزوج فاهد واسافر شهر عسل وياه لمدريد

-اممم واني نفثچ

-شلونچ ويه مالك؟

-زينة

-هو حباب؟

-كلش ويثمعني وما يمل مني

-ليث چان مثله؟

طعم مرورة صار بحلگي من ذكرت اسمه، ذكر مُر صار ليث بالنسبة الي وما احب افكر بي ابد حتى لو يجي ببالي احاول ابعده بعييد واركنه بـ مكان مظلم بعقلي مابي ذرة ضوه..

-جنات: چان مثله

-هم يسمعلچ وما يمل منچ؟

-اي

-هم چنتي تتوقعين ليث انسان استغلالي؟

-لا

-هاي اول مرة يتصرف وياچ هيچ بيوم الحقل بالمزرعة؟

-هم لا

-شنوو؟؟؟؟

-والله صارت من قبل چنت رابع اعدادي وهم طلب مني ابات ببيت عمي ورحت ويه خواته وبالليل اجاني يگول تعالي نامي بغرفتي ما قبلت بيومها وتعاركنا بعدين هو فهمني ما چان يقصد انام بيها بث نگعد نثولف علما انعث (انعس) واروح

-يا سافل يا حقير!

-صدمة حياتي ليث مدا اتخطى

-تتخطين وراح تتعوضين بالاحسن منه وتذكريني

-ان شاء الله

-مالك بعده ميعرف علاقتچ بـ ليث شنو؟ معقولة ما شَك بيكم تحبون بعض؟

-شَك اي وسألني مرة ومن گتله ماكو شي بعد ما لح وياي بس احسه يعرف ومغلس على الوضعية

-اكيد يعرف جنات ليث فضحچ گدام الكل بأول يوم النا بالعراق من اجه راد يكتل مالك لو يكتل نفسه تتذكرين؟

-شلون انسى

-المهم جناوي لا تزعلين ميلوگلچ الزعل والله طُز بـ ليث والخلف ليث احنه گاعدين هنا على البحر بـ اسبانيا غيرنا يتمنى هالمكان وهالسفرة خلينا نستمتع نيابة عنهم هم هههههه

-صح

-وبعد سولفيلي شكو ماكو شنو مخططاتچ؟

-ملاك راح يسجلني جامعة اول ما نرجع گال عنده هواي معارف هناك

-اي صح كللش هواي عنده اصدقاء دائماً چنت اشوفه بالجامعة يتردد وعلى كم مرة هو يوصلني للبيت بعلم شُهيب وچانت كل مشكلة تصير ويايه هناك ما اتردد واتصل بـ مالك يحلها بنفس اليوم

-كيان

-ها

-اريد اسألچ شي بس مو تزعلين مني

-گولي

-هواي تحچين بـ مالك كلش هواي فوق الطبيعي ليش؟

بهتت وملامحها الضاحكة تغيرت، بلعت ريگ وضحكت تسليك وصارت تلعب بگذلتها وتگول بتوتر واضح ما خفى عليَّ..

-لا هيچ.. يعني عادي مو گلتلكم هو يشبه..

-شُهيب ادري ادري بس اني اسئلتي تافهة انسي

هزت راسها هزات متتالية سريعة ابتسمت ما ردت احرجها لان وجهها صار احمر واكيد ما خفى عليَّ اعجابها بـ مالك لان حتى نظرتها تختلف اله تباوعله وكأن هو الدنيا كلها وشنو يگول هو الصح ومتعترض ابد، للاسف وهاي لگينا قصة حب تعيسة جديدة ما اكتملت بسبب شمسون النعال..

-جنات: شخبارچ ويه فاهد؟ هو زين وياچ؟

-فاهد كلش زين بس بعدني اخاف منه

-ولا مبين تخافين منه ولچ

-احچي صدگ جنات اني اخاف منه لانه مو طبيعي ساعة يكون مفرفش ويضحك وساعة غاضب وميتحچى وينزعج من الهوا تقلباته المزاجية مرعبة ومسببتلي مشاكل نفسية ما احزره ولا اعرف شنو منتظرني

-بس احسه يحبچ؟

-هههههه لا ولچ هو هيچ من يرتاح لشخص واحنه اصدقاء مقربين بس ماكو حب بيناتنا لان فاهد يحب وحدة ثانية

-حمرته؟ اي اعرفها

-هاا يعني حتى انتِ حچالچ عنها؟

-اي حچالي لان شفت صورتها بخلفية تلفونه

-شنو؟!

-صورتها چانت خلفية تلفونه وچان يدگ واني شلته اشوف منو و...

-لحظة شوية شوية عليَّ صورة حمرته چانت خلفية لجهازه؟!!

-اي شبيچ يمكن مغيرها هسة

-اي مغيرها حاط صورته اصلاً اول ما تزوجنا صورته چانت خلفية جهازه

-لك لك لك باااع والله هذا يحبچ والله وميريد يجرحچ

-ميريد يجرحني وهو يذكرني بيها يومية؟؟ تدرين حتى من يسبح يغنيلها لو متدرين؟!!

-لا كيان يجوز ديغنيلچ الچ

-يغنيلي حمرتي يا حمرتي؟؟

-كيان اني اثفة ما توقعت راح تنزعجين هالگد

-لا وين اكو مزعوجة؟؟ اصلاً ما اهتممم خليها حمرته تفيده علساس هي معبرته!!

-كيان

-جنات ما ضجت والله شبييچ كافي خلينا نسد الموضوع

-تمام

انقهرت لان حچيت ولمت نفسي كيان مو بس انزعجت كيان فحمت من الانزعاج وظلت ترمق فاهد بنظرات حارقة قوية حتى من گمنا حتى نشرب عصاير يحچي وياهة وهي ممهتمة لو تجاوبه من طرف خشمها..

**

"كيان"
عطبت من القهر من كلام جنات مچنت اعرفه مخلي صورتها خلفية لجهازه وهسة احس روحي مقرفة ليش؟؟ مادري ليش بس احساس بالقرف محاوطني!

-فاهد: كوري تدرين عندي جماعة هنا تكاتلنا وتماطلنا وتصاخمنا وتلاطمنا وت****** وصارو اصدقائي بعدين؟ ههههههههه

-كيان: وهسة شتريد؟!

-فاهد: لا هيچ بس اسولف

-لا تسولف بعد!!

-شبيچ كيان!

-روح سولف ويه حمرتك!

-كيااان!!!

-هااا شنو انجرحت؟؟ يااا نسيت حمرتك لابستك ومتحبك ههههههه وانتَ هنا ميت عليهاااا

-ااااخر انذاار الچ كيااان تسلمييين بيها على حياااااتچ

سكتت من عاط بصوت عالي كلش كل الناس اللتفتو علينا يشوفون شكو من ضمنهم مالك وجنات، گام من الطاولة وشال عصيره وياه متنرفز ما طايق شي ابتعد كم خطوة وشمر الگلاص البيده على الحايط بقوة هشمه..

اجو اهل المطعم يفتهمون شكو ومالك اعتذر منهم وگال راح يدفع تعويض سيت گلاصات بس خليهم يعوفون فاهد وميتدخلون بنوبته العصبية، رجفت كلني من شال بطل كحول من طاولة ناس وصكها كلها جرة وحدة..

اعترضوا الناس ومالك اشرلهم ميخالف واتوقع وضحت الفكرة گدامهم هذا الرجال مو طبيعي وراح يحرگ المطعم ومدريد كلها على روسهم لو تنرفز زايد..

اشر فاهد للگرسون يجيبله بطل ثاني بدون اعتراض راح جابله وانطاه صكه دفعة وحدة وطلب الثالث والرابع وراه وسوه نفس الشي شربه بدون لا ينطي لروحه فرصة يتنفس..

لمت نفسي شلون عصبته هيچ ومالك اكثر من مرة حذرني ما اجيب طاري حمرته گدامه لانه ينگلب طنطل.. شمر البطل على الحايط هم تهشم ورادو يتدخلون الامنية بس فاهد طلع بره المطعم وعافهم..

-جنات: روحي وراه روحيي

-كيان: اخااف

-مالك: اني اروح ابقي هنا كيان

راحله مالك وبقينا اني وجنات بالمطعم گاعدات ننتظرهم يرجعون، نص ساعة ومالك اتصل على جنات يبلغها رجعو للفندق وفاهد بغرفتنا نايم لانه سكر..

رجعت ويه جنات وداخلي يرعد متوترة وماريد ارجع للغرفة بس وين اولي، گعدت شوية بالريسبشن وقررت خلص لازم اصعد واواجه المصيبة الدخلت روحي بيها..

فتحت باب غرفتنا على كيف ومديت راسي اشوف وينه فاهد توقعته نايم بس لا چان گاعد على الچرباية ومنطي ظهره للباب.. بلعت ريگ ناشف وتقربت كم خطوة..

-فاهد

ما جاوب بقى على حاله، تقدمت اكثر لحدما صرت مقابيله ضبط منزل راسه ومغمض عيونه ونَفَسَه سريع..

-فاهد اني اسفـ....

ما كملت الكلمة وجرني من معصم ايدي يگعدني بصفه لزگ، باوعتله مترددة شنو راح يسوي وشلون راح يتصرف بس چان هادئ وبقى هادئ لفترة من الزمن..

-فاهد: راح انتقم منچ!

-كيان: تره اني...

-راح انتقم منچ بعد اذا ذكرتيها گدامي بهذا الاسلوب

-حقك اني اسفة

-كيان لا تطلعين الوحش الي بداخلي خلي نايم

-فاهد اني تنرفزت من شغلة وطلعتها بيك اني..

-سنين واستاذي يروضني ابقي الوحش نايم واطلعه بس من اكون بخطر

-واني خطر؟

-اي!

-ليش شمسويتلك اني؟

-وجودچ بحياتي خطر

-فاهد اني ما ردت اتزوجك ابوك جبرني

شهگت من اندارلي ولزم فچي بأيده بقوووة وعصره لدرجة حسيته راح ينشلع، حط عيني بعيونه الصايرات حمر ونتر بين سنونه..

-طلعي من رااااسي

-فاهد

-ماااريدچ روووحي

-هدني حتى اروح!

خلال ثواني تغيرت ملامحه الحاقدة ولانت، رقت نظرات عيونه وگال بترجي..

-لا تروحين وتعوفيني كوري

-هستوك گلت روحي

-لا تسمعيلي اني مخبل

-فاهد شبيك

-محد يحبني كيان حتى امي

انفطر گلبي نصين من نزلت دمعته بخجل، غمض عيونه بقوة وكمل بحسرة..

-امي خانتني وخانت ابوية وعافتني بنص الطريق تنهش بلحمي الذيابة

-امك ماتت

-خانتنا قبل لا تموت قبل لا يكتلوها كيان تدرين اني ابن غير شرعي؟

-ادري

-تدرين امي بنت ليل وصارت حامل بيه وسوت كلشي حتى تجهض بس ما وگعت ما رحت بقيت مچلب بهالدنيا الغبرة

-أمر ربك هذا فاهد

-من اول يوم جابتني كرهتني ولعبت نفسها مني تگول لابوية اكرهه وماريده تلعب نفسي منه وما اطيق شوفته اخذه لو اذبحه واذبه بالشارع!

-وابوك اخذك؟

-اي اخذني

-الفات مات انسى خلص انتَ كبرت وراح تگدر تكون عائلة وتربي اولادك مثلما تريد

-ما راح اأذيهم راح اضمهم بروحي

-اني متأكدة من هذا الشي

-اريدهم كوريين يطلعون

-هههههه فاهد

-عيونهم كورية مثلچ بس شلون وحمرتي امهم؟

تنرفزت من جاب طاريها مرة ثانية بس ما حسسته وماشيته لانه مو بوعيه..

-راح يجون حمر لان جيناتها تكون اقوى

-لا اريدهم كوريين

-شلون هالشي

-مادري نشوف حل ويه الدكتورة

-تمام

-كوري

-هممم

-انتِ حلوة

-بس مو احلى من حمرتك ادري

-لا ما ردت اگول هيچ

-لعد؟

-كلچ حلوة

-احم.. شكراً

-كوري

-ها

-اني سكران مو؟

-اي

-حرامات

-ليش؟

-لان ما راح اتذكر هاي...

ما خلاني اسأل شنو وقطع كلمتي ويه تصرفه من جرني من وجهي وقبلني قُبلة حبست انفاسي وگلبت حالي واحوالي، گلبي خفق وعقلي فصل عن كلشي ونسيت كلشي يحيط بيه.....

**

-جنات: مالك اني يمكن چفصت

-مالك: شلون

-جنات: گلت لـ كيان فاهد يحب حمرته وچان حاط صورتها خلفية لجهازه وكيان كللش انقهرت

-اويلي يا فاهد

-والله تقهر شبيها كيان وميحبها؟؟

-كيان مابيها عيب ومابيها شي بس فاهد يحب سارة من سنين ويتبعها على الدعسة عاش بالمغرب ثلاث سنوات متواصلة بس علمود يباوعلها من بعيد جنات هذا الحب الچبير صعب ينسي بين ليلة ويوم خصوصاً وهو بعده متأمل يتزوجون

-شوكت يتطلگون هو وكيان؟ ثمعت ابوك يگول ميطولون ويه بعض

-چذاب

-منو ابوك يچذب؟

-اي چذاب لان زواج فاهد و كيان لعبة فادت ابوية بشكل چبير

-شلون؟ ابوك رادكم تتزوجون بنات عمكم علمود املاكنا كيان شنو عدها؟

-كيان املاكها صفر بس فادته بأمور ثانية هسة هاي الامور الثانوية ما جاي اعرفها شنو بالضبط بس شمسون متونس عليها واني اعرفه ميخطي خطوة منا لهنا اذا ما تفيده والاهم من هذا راد كيان تغوي فاهد حتى تنسي وتبعده عن سارة

-مالك ليش ميقبل يزوجه حمرته والله خطية

-تره حمرته تزوجت وحامل!

حچاهة بصوت هامس محترگ من الغضب، توسعت عيوني على هالجملة حمرته متزوجة وحامل معناها...

-مالك: اي ابوية جاي يتلاعب بـ فاهد!

-مثتحيل!!

-ولو تعرفين منو تزوجت! تزوجت حمزة غيث عدو فاهد اللدود يشوف دم سنونه ولا يشوف حمزة بمكان!

-عززه بعيني

-تدرين شمسون شگد شغل مشى براس فاهد وخلاه يشتغل مثل الحيوان وگله المقابل ازوجك سارة؟؟

-وانتَ ليش متحچيله!! ليش ضام الموضوع على فاهد ليش تريد تصدمه وتخلي يدخل بأكتآب!

-اني قبل يومين ياله افتهمت واحد من جماعتي شافها طالعة ويه حمزة لمكان وچانو قريبين على بعض وانطوني خبر دورت وراهم ما لگيت شي يبين همه متزوجين حتى عقد زواج بالمحكمة ماعدهم.. او يمكن عدهم وهمه متكتمين على الموضوع والله يعلم شگد دافعين علمود ميطلع العقد ومع ذلك ما گعدت وسكتت وظليت وراهم لحدما وصلني الخبر الاكيد تزوجوا بالبيت بنفس اليوم الي تزوج اخو مسلم

-يمة يمممة وشلون راح تگول لفاهد؟؟

-مادري جاي انتظر نرجع واحچيله بيني وبينه والله يستر شلون راح تكون ردة فعله

-مالك تذكرت شي هثة

-شنو گولي

-من چنت انتظر المصعد اجه رجال طلب مني قلم وحچى ويايه وگلي....

سولفتله بالحرف الواحد شنو گال اني احچي وهو صافن صفنة اربكتني، خفت وسكتت توقعت الگلته خطير لدرجة خلت مالك بهذا الحال..

-جنات: شنو معناة كلامه مالك شنو يقصد؟

-لا هيچ سالفة قديمة، يله نرجع تأخر الوقت

لحيت عليه يحچيلي بس ما فتح حلگه بعد بخصوص الموضوع وقضاها عليَّ سالفة قديمة وتافهة وما الها معنى..

يومين مرن احنه هنا بدون شُهيب ومسرة ما شفناهم ولا دقيقة! زاد القلق عندي وتسائلت سبب غيابهم وحتى مالك بده ينزعج من السالفة وسمعته يهمس جوه انفاسه "ياريت البالي مو صح"..

كيان وضعها افضل وعلاقتها بفاهد رجعت تجنن يضحكون ويحششون ويه بعض بس حسيت تصرفاتها مختلفة وياه وعلى كم موقف چانت خدودها تورد وتخجل وتضربه على زنده تسكته چانت تستحي لدرجة حتى فاهد يتعجب من تصرفاتها ويظل لازمها عليها..

بيوم الثالث ياله اللتقينا بـ شُهيب ومسرة شفناهم يتريگون بالمطعم مال الفندق والضحك والفرحة مبينة على وجوههم خلت كيان تبتسم فرحانة من بعيد على الواهس..

-جنات: صباح الخيير يا خاينين وين رحتو وعفتونا

-مسرة: صباح النور يحلوة ما رحنا بقينا بالفندق

-فاهد: اهاا چا خوش يومين مرن على شُهيب

-كيان: والله افتقدناكم شهوبي ومسرة كلش تونسنا مالك فرنا مدريد كلها تمنيناكم ويانه

-فاهد: بس همه ما تمنونه وياهم اي طبعاً بالحليم نايمين

-شُهيب: شلون وياه هذا!

-فاهد: ما راح نحسدك شبيك

ضحك الكل عدى مالك و شُهيب گلب عيونه ما عاجبته سوالف فاهد، گعدنا حول طاولة وحدة بس مسرة شكلها اليوم غير.. چانت جميلة كلش جميلة ووجهها يضحك ومرتاح حتى من فاهد بده يغيضهم على مادري شنو چانت تبتسم بدون لا ترده مثل عادتها..

لابسة بلوز ابيض رگبته كلش عالية وردان طويلة مغطية حتى كفوف ايدها وبنطرون جينز عريض وفاتحة شعرها الطويل، استغربت من لبسها الجو مو بارد لدرجة لابسة بلوز هاينك بس ما تسائلت كيان الي سألت..

-كيان: مسرة لبسچ يخنگ شلون لابسته

-شُهيب: مسرة شوية مريضة اليوم

گلبت عيونها هي هالمرة وضحكت مستهزأة بادلها ضحكة خفيف ومسح على شعره وراهة باوع لساعته وگال..

-يله مسرة

-مالك: هاي شنو وين هالمرة؟

-شُهيب: عدنا شغل

اخذها وراحو للمصعد يصعدون للغرفة ظلينا واحد يباوع للثاني وفاهد حط ايده جوه حنچه ويگول بتفكر..

-امممم چني عرفت شنو نوع الشغل

-مالك: فاهد!

-فاهد: مالك ليش مزعوج

-مالك: لان ماريد أفكر بالموضوع حتى! لان لو صدگ شُهيب راح يكون اغبى انسان بالتاريخ!!

-فاهد: شدعوة شسالفة صح اني اكرهه بس خلي يتونس شعليك بي

-مالك: اغبيااء كلكم اغبيااء!!!

دگ على الطاولة بقوة وگام يوگف على جهة يدخن جگارة، اني وكيان صافنات كلشي ما مفتهمات او خليني اگول اني ما افتهمت لان چنها كيان افتهمت السالفة..

-كيان: لو بس افهم مالك ليش يكره مسرة لهدرجة؟! تره شُهيب ومسرة مبينين يموتون على بعض بعد شكو؟؟

-فاهد: ما جاي يثق بيها

-اي لييييش

-لانها بنت فادي قيثارة و...

جرها ناحيته واني هم مديت روحي وياهم اسمع، همس وهو يدور عيونه بيناتنا..

-فاهد: بيناتنا ثار

-كيان: عززه منوو؟؟

-فاهد: مادري منو بالضبط كاتلين بس مرة سمعت ابوية يحچي ويه واحد بخصوصها

-جنات: يعني انتَ تجثثت عليهم؟

-فاهد: اي اني تجسست

-كيان: عزه فاهد يمكن مالك يعرف شي ومدا يشاركك؟

-فاهد: كلشي وارد

هدأ مالك من عصبيته ورجعلنا، داهره شوية فاهد وتغير وضعه للاحسن بهواي وراحت الضوجة..

-فاهد: يله خلونا نطلع ضجت

-مالك: هالمرة احنه مو وياكم

-كيان: لاااا ليش يعني لا انتو ولا شُهيب ومسرة ليش هيج

-جنات: شنو لا اوگفي وين نروح احنه لعد؟

-مالك: نطلع وحدنا لمكان

-جنات: مااا اريد كيان

-كيان: واني اريدها ما اقبل تاخذها وتروح

-فاهد: اهوو ابو الجعل ولزگ بأبو الجعل شيشلعهم

-مالك: جنات تره راح نروح لمكان كلش يعجبچ

-جنات: كيان اني اثفة لازم نفترق

-كيان: يا خاينة!

-جنات: ما راح انثاچ بالونثة واصورلچ كلشي

-كيان: حقيرة!

-جنات: واخابرچ مناك واغورچ

-كيان: لئيمة!

-جنات: وراح....

-فاهد: كااافي انلصمي وگومي گاعدة وتحرگ بالمسكينة

گمت مكيفة ويه مالك وودعت كيان وداع اخير وبوستها وحضنتها ومادري شبيه تحمست زايد وردت اشيلها..

-مالك: بعد بعد عندچ فعاليات اخرى؟!

-جنات: لااع يله نروح متحمثثثثة

ضحك وراح للمصعد داس على الطابق تحت الارضي استغربت مادري بينا راح نبقى بالفندق، دخلنا وانتظرنا علما نزل و انفتحت باب المصعد واستقبلني الظلام عبالك الدنيا ليل سبوت لايت خافت كلش موزع بالسگف الحجري..

-وين رايحين مالك؟

-هسة تشوفين

گلبي يدگ بحماس ومبتسمة منتظرة شنو راح اشوف، وصلنا لبوابة توقعت راح نفوتلها واشرلي بيده لا ولازم نكمل الطريق، استقبلتنا بوابة جديدة وهم عبرناها واستقبلتنا ثالثة ورابعة لحدما وصلنا للخامسة ياله گال وصلنا..

-غمضي عيونچ

-ههههههههه يله يمعود

-غمضي اول

-غمضت غمضت

غمضت وجرني برهاوة من ايدي يدخلني بالغرفة، دفو حلو ضرب وجهي وجسمي ورخت اعصابي فوراً احس بوجناتي تشنجت من الابتسامة تعبت منها واريد افتح واشوف..

-فتحي عيونچ

فتحت بسرعة ووگعت ابتسامتي الواسعة بشوفة الي گدامي، دورت عيوني بالمكان متفاجئة اخذت دقيقتين صافنة وهو ينتظر مني ردة فعل دا احس بنظراته عليَّ بس ما چانت عندي ردة فعل غير ضحكة.. ضحكة رنانة عالية..

-مالك: ليش تضحكين؟

-جنات: مالك هذا شنوووو

-مالك: مسبح

-لا عوف المسبح وهذا شنو؟؟ احثني دخلت بمثلثلة تركية

-يعني عجبچ لو لا؟

-عجبني شنو؟؟ غير يجننن يجننن يجننن يملخخخ يموت يخبل خرب عرضك على هالذووووق

تركته واگف ورحت افتر بالمكان اشوف كلشي عن قرب، المسبح فارغ بس احنه موجودين وجاكوزي بصفه، وطاولة مدورة مفروشة بـ بمفرش اسود وعليها اكلات طيبة وحلويات.. هاي من غير الشموع وبتلات الورد الاحمر كل مكان على الطاولة وبالمسبح وبالگاع اجواء تجنن وكأني طلعت من عالم ودخلت لعالم ثاني..

-جنات: والله المكان يخبل لو گايلين لفاهد وكيان هم خطية

-لا هذا بس الچ

-الي؟ ليش؟

-مو چان عيد ميلادچ قبل يومين؟

-اي؟

-ما احتفلنا بي

-لا احتفلنا وجبتلي كيكة

-لا هذاك هيچ هذا عيد الميلاد الاصلي

-بث ليش؟

-هههههه جنات استمتعي وسكتي

-خليني اخابر كيان خطية ظل بالي يمها

-عوفي كيان

-حباب

-جنات!

ضجت واحس متوترة شعور غريب بل مو غريب عجيب دا احس بي ومادري شبيه بطني خبطت وكلش مرتبكة بوجودنا وحدنا وهيچ اجواء تحيطنا ماعرف شنو قصد مالك من هاي الاجواء ووين يريد يوصل وهالشي قلقني..

-مالك: اتذكر گلتيلي تحبين السباحة بس ما شفتچ تسبحين بالبحر ولا مرة

-‏مو فشلة اطب بالمي واطلع ملابثي تكون لازگة على جثمي

جمد بمكانه يباوعلي وراهة مسح على لحيته وابتسم يحرك براسه بطريقة "لا"..

-شبيك؟

-تدرين ما خطر على بالي ولا واحد بالمية هذا السبب ليش ما جاي تسبحين اصلاً ما صادفني احد يفكر بهالطريقة

-لا لعد شلون لازم البنية تهتم لهاي التفاصيل

-صحيح حلوة فكرتچ

نصى وشال العلاگة الورقية الي بصف الطاولة، طلع منها مايو اسود متصل ابو التنورة..

-مالك: جبتلچ هذا حتى تسبحين هنا براحتچ

-شكراً بث هم ما راح اثبح

-ليش؟

-اثتحي منك

-لا، لا تستحين راح ادير وجهي لبسي وفوتي بالماي بعد متبينين

-مو خاف يجي احد؟

-لا محد يجي حجزت المكان بس النا والكامرات طفوهن واني ملصت الوايرات منا حتى خاف يصير شي ويفتحوهن من دون علمي

-متأكد؟

-اكيد

-ها لعد يله

اخذت المايو منه هو مو فاضح لهدرجة ولابسة الاتعس گدامه من انام بس استحي بالنهار ماعرف شنو هالعيارة بس صدگ اخجل وماگدر اسيطر على الوضع.. راح هو للحايط يدير وجهه نزعت ملابسي ولبست المايو وركضت اشمر روحي بالمسبح..

اخذته طوول بعرض اسبح مستمتعة، رجع مالك وگعد على الكرسي صافن عليَّ، المي يخبل مو بارد ولا حار والمسبح چبير وبي جهتين عميق ووسط رحت للعميق واللبط مثل السمچة الفرحانة..

-جنات: المي يجننننن

-صارلي واهس اسبح

-تعال والله يخبل

يبووو طلعت من حلگي لااا ما قصدتها والله ما قصدتها ردت استرجعها وما لحگت لان بسرعة نزع ملابسه ودخل بالمسبح يسبح بعيد عني.. ارتاحيت من شفته ممهتملي واني رحت اكمل جولة اخرى..

-جنات: ماااااااااااالك

-مالك: وجع شكو

-جنات: جاي اشوف صوتي بي صدددددددى

-هم صاحت

-ههههههههههه حلووو اكو صدى هنااااااا

-ههههه مسطية

-شنو هاي تگولها؟؟

-يعني خبلة

-ههههههههه ادري شكراً

-جنة

باوعتله بدون لا اجاوب ابتسم وگال بأستغراب..

-ليش تستغربين من اصيحلچ جنة؟

-لان محد يصيحلي جنة

-شعحب توقعت هذا دلع اسم جنات

-لا الكل يصيحلي جناوي بث انتَ تگول جنة

-يزعجچ هالشي؟

-لا حلو

-تمام، عندي سؤال واريد جواب صريح

-اي؟

-اني هم مقصر وياچ بشي اريدچ تحچين الصراحة؟

-لا

-مرتاحة ويايه؟

-احم اءء..

-احچي لا تخجلين اذا اكو شي ما عاجبچ شاركيني حتى نعدله سوه احنه عايشين ببيت واحد

-لا ماكو شي يتعدل اني كلش مرتاحة وياك

همستها بخفوت ما سمعني تقرب شوية واني ابتعدت اللزگ روحي بحايط المسبح، سبحلي وصار مقابيلي بالضبط..

-شنو گلتي ما سمعت؟

-گلت انتَ مزعج

-اني مزعج؟ حرام عليچ بس ميخالف راح احاول احل الموضوع

حچاهة بضحك ابتسمت ولزمت البوري مال المسبح اثبت نفسي..

-جنات: شكراً مالك لانك تهتملي وتهتم لراحتي.. اني كلش ثعيدة وما ناقصني شي ابد اتمنى ايات وبنات عمي ويايه ويعيشون مثلي راح يعجبهم الوضع كلش

-اني سعيد لانچ سعيدة جنة

بلعت ريگ ونزلت عيوني من عيني صارت بعينه، ردت اسبح بعيد عنه ولزم ايدي يستوقفني ارتبكت ورجفت اطرافي من حركته..

-مالك: اوگفي دقيقة نسيت انطيچ شي

طلع من المسبح درت وجهي عنه بس عيوني الصلفة لا ارادي رجعت تباوع لظهره البي وشوم حلوة.. عنده وشم رسمة غريبة ما مفهومة على طول سنسول ظهره ووشم جمجمة على كتفه هذا رهيب وتفاصيله مخيفة وجميلة ووشم جملة بالانگليزي على رگبته من الخلف هاي من غير الوشوم الي على صدره واصابع ايده وفخذه الايسر و... چني رحت زايد!..

درت وجهي بسرعة من اللتفتلي گلبي گام يدگ بقوووة راح يطلع من صدري لگفني! لگفني واني صافنة عليه مثل المطي عزه بعيني ان شاء الله عزززه..

-مالك: تعالي طلعي شوية بربئتي

-شنووو؟؟؟

-بربئتي طلعي

-امشي لككك انتَ بربووء اصلاً ما چنت اباوعلك صارت عيني صدفة عليك!!

-هاي شبيها

-يغلط عليَّ ويگول شبيها هه ابو الوشوم ابو النثوان ابو المحاضننن والحبيباات

-هاي شبيچ انتِ صدگ چذب شحچيت هسة

-گتلي بربـ***!

-هاي شوكت؟!!

-مو گتلي بربوء؟؟

-گلت بربئتي بالماي!

-اي قصدك صرت بربوء بالماي لا عيوني انتَ البربووء

-والله كلشي ما جاي افتهم احتاج فاهد يترجملي!

-تره فهمت عليك!

-بنيتي اقصد جلدچ صار هيچ مثل العجوز تعكمش بربئتي بالماي

-قصدك بربعت؟؟؟

-اي

-لازم تقوي عراقيتك يمعود

-كلش لازم

من الفشلة طلعت من المي بسرعة بدون لغوة زايدة ورحت اگعد على الكرسي، اخذ مالك قميصه لبسه وعافه مفتوح..

-مالك: مسطية

-جنات: اي اني مطي

-گلت مسطية مو مطية!

-هاا والزهرة اثفة والكعبة مادري شبيه مثولة يمكن هاي اعراض الماي

-هههه يله ميخالف تعالي هسة

گمت واجرجر بالتنورة اضم كراعيني چنهن عود شخاط ووگفت گباله..

-جبتلچ هدية صار يومين اتردد على معمل صديقي حتى يكملوها على وكت

طلع علبة حمرة من جيب قميصه ابتسمت اشجعه يطلعها اريد اشوف شنو هذا، فتح العلبة وطلع منها گلادة عبارة عن ليرة ذهب چبيرة ومحفور عليها "قل اعوذ برب الفلق" ويحيط الليرة احجار صغيرة لونهن ابيض شفاف يلمع و احمر دموي..

-مالك: اجت الفكرة براسي من ردت انام وتخيلتها على صدرچ صممتها بسرعة ودزيتها للـ...

-هاي تصميمك؟

-اي لو اعرف عيد ميلادچ چان اشتغلتها بـ معملنا بس بعد ما چنت اعرف فـ صممتها هنا ودزيتها لصديقي يشتغلها خلصوها بيومين وجبتها البارحة، اتمنى تكون عجبتچ

-تجنن

-تسمحيلي؟

-اي

درتله ظهري يلبسني، احس بصدري فارغ من نزعت گلادة ليث ومچنت اعرف مالك لاحظ هالشي وفاجأني من گال..

-مالك: لاحظتچ نزعتي الگلادة الچنتي لابستها وشفت مكتوب عليها اية قرآنية حبيت اهديلچ شي يشبهها بس اضيفلها لمساتي

-متشبه القديمة ابد هاي احلى

-فرحتيني

تلمستها بيدي وزنها ثگيل كلش والليرة سميكة، زنجيلها قصير وگعدت على صدري ضبط تمنيت مراية گدامي واشوفها من گدما حلوة..

-جنات: هذا الاحمر والابيض المحاوطها احجار كريمة؟

-ياقوت احمر واللماس

ابتسمت وتشكرت منه مرة ثانية احس ببرود فضيع حاوطني ماعرف شبيه حاولت ما احسسه بس للاسف حتى هو حس عليَّ وسألني يمكن الگلادة ما عجبتني بس العكس تماماً الگلادة عجبتني وحبيتها لدرجة تمنيتها على صدري من زمان بدال گلادة ليث الحقير...

**

"مسرة"
اني اجييييييت ولحد يخاف بعدني عايشة بعدما عشت احلى ثلاث ايام مجنونة بحياتي! ماعرف شلون اعبر وشلون اشرح عن الي بداخلي وافهمكم بس اني سعيدة كلش كلش سعيدة احسني طايرة و الدنيا بكبرها ما سايعتني احس چنت بعالم مختلف تماماً وهسة بعالم واني بأحضان شُهيب..

-شُهيب: كافي نوم گومي اشتاقيتلچ

-مسرة: وخر تعبانة مابيه حيل

-گومي يله گومي

عضني بخفة وضربته على وجهه بنفس الخفة، ضحك وگام عني يغطيني وهو يضحك بصوت عالي باوعتله من وره وضميت وجهي بأيدي اضحك على نفسي وعليه حقير فد واحد حقير شُهيب وادبسز وساقط! والله ولا تخيلته هيچ يضحك ويحشش وعنده سوالف عبالك واحد ثاني بس ما چذبت العلوية من گالت الرجال تنعرف شخصيته بس ويه مرته بغرفتهم..

ذاب الجليد والهدوء الي محاوطه وطلعت شخصيته الحقيقية، شخصيته الحماسية.. فرحت من تغير ويايه سواء بالكلام او بالتصرفات وفرحت لانه ماخذ راحته بس بعدني مصدومة ومدا اگدر استوعب هذا نفسه ابو همسة الاعرفه!

-شُهيب: خمس دقايق وراجعلچ عندي اتصال مهم

-ولك لاااااا يبوووووو

-لا تحاولين

عافني وراح يضحك يطلع بالبلكون يجري اتصاله، گمت ارافس بالفراش من الضحك والسعادة وكأنه حلم يارب ما اصحى من هالحلم يارب ميطلع حلم بس شلون حلم واني دا احس بكلشي كل حچاية وكل ضحكة وكل ...لا ما راح اكمل لان الامور كلش اوڤر حبايب فشلة مو مال احچي واشوه سمعة شهوبي اوبي اوبي المحترمة..

جريت الروب لبسته على جسمي ورحت للحمام اريد اسبح، بعدني بالباب وشهگت من هجم ورايه ولزم رگبتي بأيده الكبيرة يخنگني بدون لا يخنگني..

-وين رايحة

-هههههههه هدني لازم نطلع عيب منهم هسة شيگولون علينا

شدد قبضته على رگبتي ثواني وهدها اجر نَفسي الضاع، اللتفتت عليه ووخرت ايده من رگبتي امثل الانزعاج..

-تريد تموتني شُهيب وصلت بيك تخنگني!

لف خصلة من شعري على اصبعه وجرها صحت متألمة وضحكت على حركته شگد عنيف هالرجال خرب..

-وين رايحة مسرة قيثارة

-اريد انزل جوه شُهيب شمسون

-ماكو تنزلين

-تريد تحبسني؟

-اي

-عشتو ليش يمة

-لانچ مالتي

-لا مو مالتك لا تتحمس زايد

شدد على خصري وجر وجهي يبوسني بقوة، وخر مني وگال بعصبية مكتومة..

-مالتي وغصباً عليچ

-عود نشوف

حاوطت رگبته بأيدي فوراً لانت ملامحه وذابت الملامح الجليدية وتحولت لملامح عاشق مغرم، ابتسمت اتأمله بهذا القرب ما راح اتعب واني اگول اعشق هذا الوجه وهاي الملامح الي صارلي اشوفها ثلاث ايام متواصلة وكأن دا اشوف فلم فگتوري لأمير وسيم ذايب بعشق محبوبته..

-شهوبي

-عيوني انتِ عيوني

-ماريد نرجع اريد نبقى هنا طول العمر

-ياريت

-بس ميس شلون

-نجيب ميس ونجيب اخو لـ ميس

بلعت ريگ ونزلت ايدي منه، شلون اواجهه بالحقيقة واگله بديت اخذ حبوب مانع نزلت اشتريتهم من چان نايم؟ غلست على الموضوع ومثلت اني بخير وگتله ينطيني خصوصية اسبح..

كملنا كلشي وطلعنا نبدل خلص الحجر عند شُهيب اخيراً، حجر مثلت بي اني مزعوجة بس العكس تماماً اني مو بس متونسة اني فوگ الغيم..

-شُهيب: والله الوقت متأخر لو نبقى هنا ونسهر وحدنا

-مسرة: لو تمووت لان اعرف قصدك "بالسهر" امشي خلينه ننزل على البحر شوية

-الوقت فجر مسرات الناس نايمة عيب

-الناس نايمة واحنه گاعدين عادي يله امشي

لفيت الشال على رگبتي اضمها ونزلنا ايد بأيد جوه نتمشى على الرمل، الدنيا ليل والاجواء تجنن والجو يخبل والناس كلش قليلة ودا اتمشى ويه انسان ما تخيلت بيوم راح انجمع وياه وراح اتعلق بي واحبه من اظفر رجله لهامته وتعجبني ابسط تفاصيله..

ابتعدنا عن الناس بقينا وحدنا ترك ايدي شُهيب ينطيني راحتي اللعب بالرمل وبالمي دخلت شوية بالمي مستمتعة وفجأة حسيت بشخص يشيلني على اكتافه.. صرخت بصوت عالي وضحكت بصوت اعلى ممتوقعة حركته..

-مسرة: ههههههههههههههه شُهيب ما نسيييت

-شُهيب: شلون انسى ولچ

حضنت راسه وبست شعره وهو مشى بيه يدخلني بالبحر، خفت عليه من بده المي يصعد لحلگه بينما اني بس رجليه داخلة بالمي لاني گاعدة على چتافه..

-شُهيب لااا خاف تغرگ خلينا نطلع

-معليچ استمتعي وبس

-حباب اطلع حباب

ما سمع كلمتي ونزل كله بالمي، تنگع نص جسمي بالمي خفت كلش ونزلت من چتافه اوازن نفسي واسبح ثواني واختفى مني، توترت المي منا عميق كلش وجسمه ماكو ما لگيته..

-شُهيبببب وينك شُهييييب

اسبح وادور غصت اكثر جوه اريد بس اتحسسه بس ماكو نتيجة يمة وگف گلبي عمت عينيي شسويت وين رااح..

-شُهيبببببببببببب

صرخت اسمه وبچيت خايفة راح يوگف گلبي واحس سكري علگ، غيبته طولت ثواني بس كأنها ساعات مرت.. نص ثانية وحسيته يحضني واني بالمي صحت بعلو صوتي ممصدگة وبادلته الحضن اضحك وابچي..

-ههههههه حبيبي انتَ هنااا هههههههه

-شنو گلتي؟

-متت خوف عليك متتتت يمكن سكري علگ شُهيب حرام عليييك

-لا مو لهدرجة تره صار 18 ثانية بس

-حسيتهن 18 ساعة والله

-گلتي حبيبي؟

لف ايدي على رقبته يرفعني، ضحكت وبسته ضربني كلة خفيفة وگال..

-جاوبي

-ما اجاوب

-جاوبي ولچ

-تلزمها عليَّ ما اجاوب

-هسة شگايلة قابل والله يا الله

-ياااا شتريد اگلك اكثر من حبيبي؟؟

-يعني صدگ گلتي حبيبي

گالها وغمز ضحكت مرة ثانية مثل المخابيل ديجر لساني حتى اعيدها عجيب هالرجال عجيبب شگد لوتي..

بقينا سوه نسبح ونتداهر ويتحارش ما خلاني بحالي خفت يجي احد ويشوفنا بس الله ستر الناس بعيدين عنه، من گدما ضحكت استحيت على نفسي گلت شنو راح يگول عليَّ مخبلة لو رعنة بس والله دا اضحك من السعادة، سعادة اتمناها لكل بنية..

بس اني اعرف حظي واعرف متدوملي سعادة ولا راحة ولا حُب لدرجة شُهيب بين ايدي واحسه بعيد اخاف افلته لا يروح عني واخسره للابد..

ثاني يوم قررنا نطلع وياهم ورحنا كلنا لمدينة الالعاب لان كيان عاجبها تروح، تونسنا ونسة ما صايرة وفاهد يضوج كيان وبكل لعبة تريد تركبها ميقبل ويشلع گلبها تاليها غصباً عليه بكل لعبة هو ركب ويصيح لانه يكره المرتفعات..

-فاهد: اشتعللوووو اخوانچ كوووورييي

-كيان: ههههههههههههههه تروحلهممممم فدووووووة

-فاهد: ولكم يبووووووووووو

-كيان: حيييييييل رفعوناااا بعد حيييييييل

رفعونا للقمة شوية ونطخ السما وهاي تصيح حيل، گامت تتگلب بينا اللعبة وجنات تعيط تلعب نفسها والولد نصبوا عليها وفاهد وياهم عافو كيان..

-كيان: جنااااات تحملييي ولا تخلين الولد يضحكون عليناااا لا تفشلينا دخيييلچ

-مسرة: جناااات والله يسوونا مييز بعدييين تحملييي لا تخلين جنس آدم يتغلبووون علينااا

-جنات: لااا لاااا نحن لا نهزززم

خلصت هاي اللعبة ورحنا للعبة ثانية وثالثة ورابعة خلصت بطاقة اشتراكنا وجددنا وبالعشر اللعاب لعبنا مثل الزعاطيط بس تونسنا ونسة ما بعدها ونسة..

اشترالي شُهيب شعر بنات تشاركنا بي ولعبلي لعبة كرة السلة بس حتى اربح الدبوب العجبني، ربح من اول جولة طرت فرح وبسرعة اخذت الدبدوب الاخضر على شكل ضفدع..

-مسرة: هذا عوفه بييتك حتى تتذكرني من تشوفه

-شُهيب: اتذكرچ بعگروگ؟؟

-مسرة: هههههه والله كيوت باوع عيونه شگد حلوة

تمشينا ايد بأيد والكبلات مالك وجنات، فاهد وكيان هم گدامنا، يوم من العمر چان ما تنساه ذاكرتي ولا انسى تفاصيله، لليل ياله طلعنا من المدينة وتمشينا بطرقات مدريد الجميلة نتنفس هواء عليل واتلمس ايدين احبها..

-شُهيب: تعالي محتاجچ بشغلة

-مسرة: وين؟

-تعالي وياي

اشرلهم يمشون گدامنا وهو ظل واگف ينتظرهم يبتعدون مسافة، من تأكد ابتعدو كفاية جرني للحايط مال بناية، باوع منا ومنا توقعته راح يگلي شي بس ما گال جر راسي من وره وباسني بقوة بوسة ما توقعتها..

ابتعد مني يسمحلي اللقط انفاسي واتحسس مكان العضة ضحك وهمس بيناتنا..

-اسف ما گدرت اقاوم

-اممم تعودت

-يله نرجعلهم

-مو گلت عندك شغلة مهمة ويايه؟

-كملتها

-يااااا شُهيب

جرني من ايدي يضحك وحضني لصدره يبوس على راسي وخدودي وحنچي وراح زايد يرفع راسه يتأكد محد ديباوعلنا ويكمل بقينا هيچ لحدما جنات دارت وجهه ولگفتنا..

-شُهيب: خرب

دارت وجهها بسرعة مبتسمة وراحت تشرد لـ مالك وتكمش بيده ضحك شُهيب على حركتها وهمس..

-عندي فضول شلون مالك عايش وياهة

-ليش

-العلوية تگول عنها بريئة كلش

-اي يله دير عيونك عنها كافي

ضحك بقوة وهرولنا الهم نمشي وياهم، وخرت نفسي عنه حتى ميحسون بشي من چنه بالفندق اتفقنا وطلب مني ما اخلي اخوانه يعرفون بعلاقتنا بس هالفترة واني اتفقت وياه ابوية ميعرف وتبقى علاقتنا سرية..

بنص الطريق واجه اتصال لـ مالك غير حاله وصار يتلفت كل مكان..

-فاهد: شكو شبيك

-مالك: كارثة

-شُهيب: شنو الموضوع؟!

-مالك: خابرني ليوو گال اكو جماعة متبعينا لازم نتحرك بسرعة شباب

-فاهد: شكو نهرب خلينا نواجههم

-مالك: بشنو تواجههم؟! بنعالك ابو الاصبع؟؟

-فاهد: جايب سچينة

-مالك: فاهد!! جاي اگلك الدنيا مگلوبة ومتبعينا من طلعنا من الفندق لحد مدينة الالعاب واحنه ما جايبين أي شي ندافع بي على نفسنا!!

-شُهيب: والحل؟!

-مالك: كلمن ياخذ التخصه ويركض بيها

-جنات: شنووو

-فاهد: مالك خلينا نواجههم احنه مو جبناء!

-شُهيب: غبيي تواجههم تمووت بيمن تدافع عن نفسك؟؟ بسچينتك المزنجرة!!

-كيان: عززه يردون يكتلونا؟؟

-مسرة: لازم الكل يهدأ ونلگه حل سريع، مالك اذا هربنا منا راح نكون صيدة سهلة ويعرفونه ما عدنا شي ندافع بي على نفسنا

-مالك: بس احنه فعلاً ما عدنا شي ندافع بي على نفسنا!

-مسرة: ولوو ميخالف ماطولهم ما هجموا من البداية ومترددين معناها متخيلين عدكم اسلحة وتگدرون تحاربوهم

-فاهد: انتِ شمعرفچ بكل هاي التفاصيل؟!

-مسرة: هاي مجرد فكرة اجت براسي فاهد شغل عقلك وفكر مثلي شوية

-شُهيب: كلام مسرة صحيح مالك اتصل على ليو وگله يأمنلنا اسلحة بس لازم نوصل للفندق بسرعة قبل لا يهجمون هنا ويحاصرونا

-مسرة: اي راح نكمل طريقنا للفندق بدون لا نتلفت وكأن ماكو شي

اتفقنا كلنا على هالفكرة ومالك اتصل على صديقهم الاسباني "ليو" حتى يأمنولنا الطريق، تمشينا للفندق گلوبنا ترگع بس الحظ صادفنا الطريق مسدود بسبب حادث سير والشرطة ميخلون احد يعبر اضطرينا نسلك غير طريق اطول..

بلغ مالك ليو بهالشي ومشينا بين افرع مدريد المظلمة شدد مالك على جنات يحاوطها بأيده والباقين سووا نفس الشي ويانه.. گلبي ميت ما خايفة ولا حتى نتفه متعودة على هاي الاجواء بس كيان وجنات كلش خايفات لدرجة كيان صار عدها انهيار وگامت تبچي بنص الطريق وگعدت بالگاع.. مغطية وجهها بأيدها وتهز براسها "لا" وتصيح..

-كيان: ماريدد مااااريد اروح ماااريد

نزل شُهيب يگنبص گدامها يهدأها وفاهد هم حاول وياهة بس البنية فاصلة منعرف شصار بيها فجأة، گومها شُهيب من الگاع گوة وحطها على صدر فاهد وأمره بنتر..

-شُهيب: امانتك! انتبه عليها زين

هز راسه فاهد موافق بدون لا يجادل اخوه وحضن كيان يمسح على راسها ويحچي وياهة..

-شبيچ كوري شنو صار وياچ

ما جاوبته وبقت تمشي وشُهيب رجع يحضني ويمشي بيه، عبرنا مسافة وجمدو الولد من صوت صار ورانه صوت رجال يحچي اسباني واللتفتو بسرعة ثلاثتهم واحنه وياهم وچان تستقبلنا الكارثة!!

سبع زلم ملثمين ومسلحين بأنواع الاسلحة موجهيهن علينا ينتظرون من عدنا حركة حتى يرمون، زفر مالك بصوت عالي وفشر فاهد وخنزر شُهيب بحقد اوكي يمكن صار وقت تطلع الوجوه الحقيقية وتبدي الملحمة!

ثواني وصار حديث بين مالك وبين واحد منهم بالاسباني تمنيت افهم شي بس عبث! كلشي ما وصلني ولا حتى تلميحة والسبب يحچون بملامح جامدة بدون حركات.. تدخل فاهد يحچي بعياط واخيراً صاح شُهيب بكلمة اسبانية بذيئة واشر على اسلحتهم..

-فاهد: ههههههههههههههههههههه ال****** يعلمونا على هالسوالف ولك احنه متربين بين الذيابة والاسود جايبيلنا چم ذبانة يخوفونا بيهم! هه يعلمنا الغشيم على الحياية!

-جنات: اثكتتت لا يثمعوووك وينچلبون علينا اششش

-شُهيب: ما يگدرون يسوون شي

-كيان: ليش؟؟

-مسرة: شرطة

-كيان: شنو؟؟

-مسرة: شرطة تبعد عنه بشارعين وراح يسمعون صوت الرصاص والكل ينسحل

-شُهيب: واحنه ما شايلين اسلحة بمعنى همه اليرحون بين الرجلين

-مسرة: حلو شباب طلع ابوكم يحبكم وميريدكم تموتون

-فاهد: غير يموت علينا

-جنات: زين شبيهم واگفين مثل الططوات ما يتقربون راح نبقى هيچ؟

صارت سنطة فجأة من طلع من الدربونة واحد وبيده اسلحة ثنين ومتأكدة ترليون بالمية مركبلهن كاتم بكل ايد شايل مسدس، يبس الدم بعروگي من صارت عيني بعينه حسيت وكأن الدنيا كلها وگعت على راسي ويه صوت فاهد وهو يگول..

-صقر ريماس!

-صقر: يا هلا بولد شمسون....

يتبع.....

━━━━━━  ━━━━━━

احم 🙂

نگول توقعاتكم لو نتوكل؟ 😉