رواية ابناء الحسوم "شمسون" الفصل السادس 6 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

أنا بعمر الورد بس وردة ذبلانة
أنا بروحي غصن ذبلان وتگلي الناس حليانه...

━━━━━━  ━━━━━━

دخان سيجارة يتعالى في المكان ليختلط برائحة كولون نفاذة تخترق تجويف الأنف مرغماً، كؤوس تتضارب بمزاجية، عبير ثروة ينبعث من انفاس الجالسين، أصوات ثرثرات هامسة بأفكار جنونية، لعقت شفتيها بضجر وقامت بشد معطفها الثقيل المصنوع من الفرو الاسود..

-اي؟

-تفضلي..

مشطت عيوني بالمكان اتابع الناس المخملية المحتلين المطعم، يتهامسون بهمسات مختلفة منهم يتحدث عن المال، منهم عن المشاريع، منهم يتغزل بحبيبته الي امامه، منهم ينتظر الزلة من صاحبه ليستحوذ على امواله، بلعت ريقي وقررت افتتح وياه الحديث..

-ريحة كولون حضرتك ثقيل سببلي حساسية بأنفي

-جورجيو ارماني

-نعم؟

-اسم الكولون (عطر) جورجيو ارماني

كالهه بطريقة باردة وفر الساعة الي بيده يرتبها، ذبيت نفس متنرفز وطقطقت اصابعي، بلحظتها رفع عيونه عليه واشر بأيده بهدوء ناهيني..

-Oh, no please

-عفواً؟

-اتنرفز من هاي الحركة

حركت اكتافي بلا مبالاة ورجعت اطق اصابع ايدي الثانية وهمست بنبرة باردة اكثر منه..

-عادي، ما راح تموت

نظرلي بملامح جامدة ما مفهوم معناها، ماهتميت واستمريت اكل من الحلو الموجود امامي، ضرب راسي صداع اختل توازني شوية بس ماهتميت كملت اكل واگول متعمدة اغثه..

-عندك فوبيا من شي؟

رفع كاسته يشرب منهه وكال بثقة مقززة ما معلوم جاي يتشاقى لو يعنيها..

-يُقال اني الفوبيا بنفسهه

-تدري شي؟

-امم؟

-لعبت نفسي

-من شنو؟

حطيت رجل على رجل واشرت للگرسون يجي ينطينه الحساب، ذبيت نفس وعصرت جبيني اخفف من الوجع الصابني والغواش الي احتل عيوني، قلقت لثانية وفتحت جنطتي اتأكد من وجود مسدسي ورجعتها على الطاولة، ملاحظة نظراته عليه ينتظرني اكول شي رجع كرر سؤاله بأهتمام..

-من شنو لعبت نفسچ ماي ليدي؟

رجعت اركز انظاري بي، ابتسمت تك خد ورفعتله حاجبي مستهزأة، علقت جنطتي اليدوية على ذراعي وگمت واني اگول ببساطة لاذعة..

-منك

تمشيت للبوابة ممهتمة لتوديعه طفح كيلي ويه هالانسان ميستاهل واحد يتعنى علموده، طلعت بره المطعم وشفت "سام" واگفلي ينتظر اشرتله بعيوني يروح وحده ويعوفني ما استجاب بالبداية وماقبل لولا اللحاحي عليه..

-ليدي مسرة!

زفرت متنرفزة حتى صوته ما اتحمله تقدم من خلفي وصار امامي مباشرةً، حك مكان لحيته وحمحم قبل لا يگول بهدوء..

-شُهيب: صار سوء تفاهم قبل شوية واني اعترف كنت جاف ويه حضرتچ وحقچ عليَّ، لكن عادةً الاجتماعات الي تتعلق بالنساء نشـ...

-مسرة: نشوان يلزمهن

-بالضبط

-ليش انتَ شبيك؟

زفر نفس ساكت، رفع نظراته عليَّ وعدل ربطة عنقه متضايق..

-شُهيب: نسيتي هذا بالمطعم

مدلي وشاح صغير دانتيل باللون البنفسجي الفاتح، هزيت راسي "لا" وگلت..

-مسرة: هذا مو الي

-شُهيب: الگرسون جابه گال چان على طاولتنا توقعته الچ

-لا مو.. الي..

همستها بخفوت وسرحت انظاري لداخل المطعم ادور بعيوني عن شي ناقص شي سافل وادبسز مثل الي سوه هالحركة الوصخة هسة!

نعم الوشاح تابع الي بس ما شفت هالوشاح صار فترة طويلة من نسيته بغرفة الفندق وطلعت اتنفس اكمل حياتي متخلصة من واحد سافل اسمه "صَقر ريماس" اتذكر هالعار كلش زين واتذكر طلبه..

-شُهيب: لعد خليني ارجعه للمطعم

-مسرة: راح اجي وياك

دخلنا سوه ادور على صَقر بعيوني ما اله اثر ذبيت نفس محمل هموم واني اشوف شُهيب يرجع الوشاح على الطاولة ويلتفت الي..

-شُهيب: تفضلي

-مسرة: انتَ زاير هالمطعم من قبل؟

-شُهيب: لا، اول مرة اجي هنا

-الجميلة مسرة

گلبت عيوني من سمعت صوته الغثيث ورايه، شُهيب سبقني وركز بصاحب الصوت مستغرب اگدر اشوف علامات الاستفهام تنطط على راسه بينما اني اخذت وقتي ياله اللتفتت اواجهه..

-مسرة: صَقر ريماس

-صَقر: شلون صدفة حلوة هاي مسرة نفس شكلچ ما متغيرة نفس الوجه الجميل والجسد الرائع

لعق شفته السفلية بعد كلماته القذرة، اوكي هذا الانسان استفزني هسة وگدام منو؟ گدام ابن شمسون!

-مسرة: صَقر راح يبقى وضعك بهاي التعاسة؟ عزيزي مرت فترة طويلة انصحك تتخطى

-صَقر: چان صارت اجمل فترة بحياتنا لو متنازلة

-مسرة: اتنازل عن نفسي؟ مو كأنك هواي مصدگ نفسك؟

هز راسه مبتسم ابتسامة جانبية يباوعلي من فوگ ليجوه، تنهد بخفة ويأشر بعيونه على الخواتم البيدي..

-صقر: يعجبني ذوقچ باللبس دائماً جميلتي

-مسرة: شي طبيعي

-صقر: عجزت افهم شلون أكرم فرط بيچ؟

حچاهة بنبرة مستفـــــــــززة تمنيت اطلع سلاحي وافرغه براسه المجعمر بس مو وكتها مسرة ميخالف حبي مشيها هالمرة اكو عدو گدامچ وعدو بصفچ مو مال دراما سخيفة هسة ركزي بالمهم..

گلبت عيوني بملل مصطنع امثل اني ممهتمة بس والله بداخلي مشعوطة متمنية افصل راسه عن جسمه واشوف لوني المفضل يتطاير!

انحرفت عينه على جهة معينة وكبرت ابتسامته الحقيرة وتركني وراح ببساطة، خلوني اوضح فد سالفة صغيرونة حتى محد يتشوش.. اولاً اسمه الحقيقي ليس صَقر ريماس هذا مجرد لقب، ثانياً بأختصار شديد الغبي صَقر ابو كشة مهووس مقرف قدملي عرض اكون عشيقته بالسر بس حتى ينطي لابوية الي محتاجه ويمشيلنا شغلة مهمة عصت عدنا طبعاً ابوية تقبل الفكرة بروح رياضية بـ حجة سووا بيناتكم عقد قرآن "زواج بالسر" حتى ميصير شي بالحرام..

وطبعاً مسرة شسوت؟ اخذت التريده منه وهو الممنون وضربته بستين نعال بدون لا تنطي جسدها الرائع ولا وجهها الجميل وطبعاً انقهرت عليه و تركتله هذا الوشاح البنفسجي هدية تذكارية، شفتوني شگد حبابة ولطيفة ومتواضعة؟

اللتفتت على المكان الي صَقر چان يباوعله وچان اشوف اتعس منظر بس طبعاً مو اتعس من صَقر الزبالة بس هم تعيس شفت الغبي أكرم! واني اگول هذا ليش جابه بالطاري طلع گاعد هنا ويه خاتونته الغبرة اللتموا العارات اليوم من دون الايام!

نبض قلبي بقوة من اكرم غيّر مسار نظراته ناحيتي وبحركة سريعة وجريئة مني سحبت ابن شمسون اقربه مني واخلي يغطيني بجسمه..

علت ملامح التفاجئ وجهه بس سرعان ما خفاهن يرجع طبيعي ويباوعلي منتظر مني تفسير على الاغلب..

-مسرة: اگلك

-شُهيب: اسمع

-مسرة: شنو اسم عطرك مرة ثانية؟ نسيت اسمه

ابتعد خطوتين يعدل وگفته ورجعت اني بكل صلافة خطيتهن ارجع قريبة منه بس حتى ميشوفني هذاك المنحط وتصيرلي مصيبة عظمى!!

-شُهيب: انتِ بخير؟

-مسرة: شوية دايخة

-شُهيب: تحبين نرجع نگعد؟

-مسرة: لا.. لا اوگف

-شُهيب: تردين ماي؟

طلب من الگرسون يجيبلي مي واني غطيت جبيني اخفي وجهي لاحظت أكرم كل شوية مغير مسار نظراته يباوع للنسوان الي هنا ويتمايز بيهن اعرفه يموت على الحلوات هالكلب الناطق..

-شُهيب: تفضلي الماي.. تعالي گعدي هنا ارتاحي

اخذت منه الگلاص وگعدت على طاولة منطيه أكرم ظهري، شربت المي ريگي نشف ردت اشرب بعد اشرلهم يجيبولي واشوفه انخبص ويايه.. لحظة هذا ليش مهتملي هالگد؟ هاي وهو چان معنطز قبل شوية لو غير رأيه هسة؟

-شُهيب: عندچ علاج او شي تاخذي؟

-اي

فتحت جنطتي اطلع الحبوب عيوني تغوش موتتني بلعت علاجي وهو اخذ الشريط يشوفه وگال بأنفعال هادئ..

-شُهيب: عندچ سكر وچنتي تاكلين حلويات؟؟

-مسرة: وشربت ببسي الظهر

-شُهيب: عفية

لميت شفايفي لداخل فمي حتى ما اضحك گدامه وغمضت عيوني اداري الدوخة علما تروح، فتحت عيوني من حسيت نفسي احسن شفته يسوي شي بموبايله من الجانب شفت فاتح گوگل من انتبهلي گال بأبتسامة خجولة لان لگفته..

-شُهيب: نبحث شنو الي ينزل السكر

-عود صدگ جاي تبحث على شي ينزل سكري؟

هز راسه وباقي على ابتسامته، رفعت تك حاجبي وگلت بأسلوب مازح..

-تره ما راح اقبل اشتغل وياك لتحاول

كبرت ابتسامته واستمر يهز براسه وما بطل يبحث مركز بالتلفون ويبعد خصلات شعره العسلي الناعم الوگعن على جبينه..

-شُهيب: عندچ ابرة انسولين؟

-اخذتها قبل لا اجي

-الماي.. مكتوب الماي هو الي راح ينزل السكر هاچ بعد اشربي

صبلي گلاص شكبره وخلاني اشربه كله ومركز بكل حواسه ويايه، ابتسمت واني اشرب المي شعور حلو من احد حنون يهتم بيك يمعود گلبي رچيچ اني ماتحمل هالسوالف بس اكيد هالشي ما راح يطفي حقدي عليك يابن شمسون الكلب!

شتت تركيزي من شفت اكرم يگوم، فزيت من مكاني اگول بسرعة..

-رايحة للحمام اني

رحت للحمام امشي بخطوات سريعة مستحيل حظي اليوم شگد تعيس اذا اكرم اجه وحچى ويايه گدام هموسي اني انتهيت خربت الخطة وخلصت اللعبة!

غسلت بسرعة ابلل ايدي ورقبتي ابرد نفسي واحاول استجمع قواي، حسيت بأحد يدخل للحمام اللتفتت اشوف منو وانصدمت من شفته..

-مسرة: شتسوي بحمام النساء؟؟

-صقر: اجيت اسلم

-مو سلمت عليَّ بره هو شبع

-منو الگاعد وياچ بره؟

-شيخصك؟!

عگد حاجبه بغضب وتقدم يوگف مقابيلي بالضبط، رص على اسنانه وكرر سؤاله بعصبية..

-شعندچ ويه شُهيب شمسون احچي!!

-شيخصك انتَ؟؟ بس واضح طلعت تعرفه زين شكو سألتني عنه

-صقر: معرفة سطحية

-واضح

-صقر: عندي صداقة بأخوه فاهد شمسون

-حلو حلو

-ما جاوبتيني شعدكم ويه بعض؟!

-شغل

-شنو نوع هالشغل

-صقر سكري معلگ وراسي راح يطگ وخر عن وجهي احسلك

جرني من معصم ايدي فاجأني بحركته وبنبرة صوته الي تغيرت..

-صقر: شبيچ؟ ليش معلگ سكرچ شصاير؟ هذاك الچلب ضوجچ بشي؟؟

جريت ايدي منه وابتعدت كم خطوة اوگف قريب باب الحمام اباوعله من فوگ ليجوه ادرس ملامحه القلقة ونبرة صوته اللطيفة المريبة..

-صقر: اترجاچ تنتبهين على نفسچ مسرة

-مسرة: بيني وبين شُهيب شغل وبس

بلع ريگ وضحك بخفة يمسح وجهه بأيده، ذب نفس وگال بحرگة..

-صقر: حلو حلووو مسرة مبين صدتي المَلِك هالمرة وراح توگعي بشباكچ

-مسرة: غلطان

-صقر: اني ما اغلط واضحة نيتچ شنو تردين المَلِك انتِ كالعادة

-مسرة: غلطان، هالمرة اني ماريد المَلِك.. اريد تاجه!

تركته صافن يستوعب جملتي الي اعنيها من كل گلبي، اني منتظرة هاي المهمة صارلي سنين! سنين واني اتمنى ادمر شمسون وچلابه وارجع حقنا، ارجع حياتي الي انسلبت مني وماضيي وحاضري ومستقبلي!

طلعت من باب الحمام وانردمت بجسد ضخم يبس دمي من شفته واگف ساند ظهره على الحايط لزك بصف باب الحمام بمعنى على الاغلب سمع كلامي!!..

-شُهيب: انتِ زينة؟

-مسرة: شتسوي هنا؟!

-شُهيب: گمتي بسرعة وشفت وضعچ مو زين خفت تتخربطين ومحد موجود يمچ

عگدت حاجبي بأستفسار بينما هو اردف يكمل..

-لان شفت صقر ريماس دخل وراچ يهرول..

-عبالك تخربطت وصقر اجه يشوفني؟

-اي

ما گدرت اخفي ابتسامتي اكثر، ابتسمت وضحكت من كل گلبي هذا هو طبعه هيچ يراعي ويداري لو اله غاية؟

-اني زينة شكراً الك

-الحمدلله

قررت اتناسى الموقف واقنع نفسي ما سمع شي لان ممبين عليه تعصب او غير تعامله ويايه، تمشينا نرجع للطاولة حتى اخذ اغراضي ونطلع اخذت گلاص مي اشرب منه واللتفتت على صوت واحد يگول..

-مرحبا

لا لا لا لا لا لا مستحيل اكو اتعس من هاللحظة! خلص هذا يتصنف اتعس يوم بحياتي أكرم اجه! اكرم اجه هنا لطاولتنا بالتحديد وجاي يسولف ويه ابن شمسوون العاار..

-شُهيب: اهلاً وسهلاً

-أكرم: اجيت اسلم على مسرة شفتچ من بعيد يا ترى شنو جايه تسوين هنا؟

نزلت گلاص المي على الطاولة وفتحت جنطتي اطلع مراية اشوف حمرتي خاف راحت ممهتمة لأكرم ولا لوجوده..

-أكرم: اكيد انتَ تكون حبيبها الجديد؟

-شُهيب: لا اني...

-مسرة: اكرم راويني عرض اچتافك

-اكرم: تخافين نبوگه منچ ههههههه

-مسرة: صراحة اي

-اكرم: يا ترى شنو ناوية عليه هالمرة مسرة

-مسرة: شعليك

-اكرم: صارحي بحقيقتچ يكون افضل خطية يبقى مطفي

وگف شُهيب على حيله ونتر بعصبية..

-شُهيب: شو انتَ متعرف تحچي؟!

-اكرم: لا العفو اسف حبيبي بس...

-شُهيب: تفضل ارجع لمكانك ماعدنا وقت نضيعه

-مسرة: سمعته يلا روح هناك

-اكرم: ماشي مسرة ماشي اني اعرف بيمن اعاقبچ!

-مسرة: امشي لك لا تظل تنبح يميي

-اكرم: بسيططة مسرة بسطية!!

عافني هذا الثاني المقرف وراح لصاحبته المقرفة اكثر ملتمين عليَّ اليوم ولد الكلب..

-شُهيب: واضح عندچ هواي عداوات

-مسرة: بگد التمن

-شُهيب: حلو

-مسرة: مو بله؟

-شُهيب: حلوة العداوات ينطون متعة للحياة

-اويلييي اموت على اليكرهوني

ابتسم يأيد كلامي بهزة راس اي ادري هواي يهز براسه لان ذكرتلكم هذا الانسان هااادئ بشكل ينرفز احياناً..

-شُهيب: ما راح اسأل عن هذا الغبي لكن سؤال فضولي اخر يراودني؟

-اممم؟

-تعرفين صَقر ريماس؟

سؤاله كان محمل بنبرة شَك واضحة متفاجئ من معرفتي بي واعرف كلش زين ليش متعجب والسبب يعود صَقر متورط بأعمال غير قانونية وتهريب مواد ممنوعة ومنضم لخلية مافيا تعود اطرافها لروسيا وهذا سبب تفاجئ هالوسيم الگدامي..

-مسرة: مرة راد يصير شغل بينه وبين ابوية وما صارت وفكينا الشراكة وواضح الرجال للان ممتخطي هالخسارة الفادحة

هز راسه يطلع جگارة من جاكيته شعلها وگال بهدوء..

-شُهيب: ميعجبني اصير بداله

ابتسمت ابعد شعري عن وجهي مفتهمة لشنو ديلمح..

-مسرة: لو مگعد اخلاقك من النوم واحنه نسولف چان ما صار كل هذا

-شُهيب: اخلاقي متنام مجرد نسيتهم بالبيت اليوم آنستي

رفعت حاجبي بينما هو اردف..

-شُهيب: احاول اقنعهن يجن ويايه المرة الجاية

لانت ملامحه ورجعلي ابتسامة خفيفة، دورت لساني بفمي وهو يتابع حركاتي، نطقت بدون مراوغة..

-ماتوقع راح يكون اكو مرة جاية

عفته متفاجئ وطلعت بره المطعم ركبت سيارتي وانطلقت ارجع للبيت، ما احب اتعامل ويه انسان بارد احبه يكون شعلة نار بين ايديه يفور ويهمش على الشغل مو صنم متعافي ويحچي وياي بهدوء، اجاني اتصال من ابوية فتحته وايدي على گلبي..

-ها بابا

-فادي: مسرة هسة ترحين للميناء وصل الكابيتان

-مسرة: اروح للميناء بهالوقت؟ بينما اوصل هي داگة العشرة ونص

-فادي: مهمة هاي الصفقة مسرة بابا حبيبتي ترحين تستلمين كل المعلومات الموقع راح يكون فارغ ومثل ما عودتچ لا تسألين ولا تگليلهم ليش وحاولي تلزمين لسانچ

-تريدني اخذ منهم كلشي عمياوي؟ على الاقل گولي شنو الموضوع

-مسرة لا تعاندين سوي الگتلچ عليه بنتي لا يلوحچ شي وتتورطين

-على اساس ما راح تورطني واني استلم كلشي بيدي وتوقيعي موجود

-لاااا مو اتفقنا ما توقعين بأسمچ اني شنو معلمچ مسررة!!

-افتهمت افتهمت

-توقعين بأسم خلدون الاخيضر وصلت؟؟؟

-وصلت

-عفية ببنيتي البطلة، راح يتواجدون ولد شمسون هناك يله لا تروحيها من ايدناا معتمد عليچ

-تمام

ذبيت نفس تعبانة ممهتمة لمخاطر المكان ولا لشنو راح يصير هناك فوراً شخطت سيارتي وتوجهت للموقع الدزه ابوية..

الطريق طويل ومتعب حسيت بصداع ضرب راسي كله من وره الحلو الاكلته ويه هموسي اخذت علاج وكملت طريقي، لمحت ورايه تمشي سيارة ابتسمت عرفته ميعوفني عجيب هالبني ادم عجين ولازگ بيه..

للـ 11 بالليل ياله وصلت، نزلت وكفخ جسمي هواء باارد يگص گص لفلفت الفروة على جسمي وتمشيت للموقع، بصعوبة اخطي خطوتي كلما اتقدم خطوة الهواء يرجعني خطوتين حسيت بوجهي يتجرح..

-مسرة: سام ارجع لسيارتك جايبه سلاحي

-سام: ما اعوفچ مسرة لا تحاولين

اللتفتت عليه اضحك، ضربته بجنطتي اتشاقه وياه..

-مسرة: رأساً وگع الرسميات بيناتنه سام افندي

-سام: هههه اعرفچ وانتِ هالگداتچ سرور

ابتسمت هو طلعلي دلع اسمي "سرور" سام هو صديق العائلة اكثر من كونه حارسي الشخصي، من چنت صغيرة ابوية چان يحصل هوايه تهديدات وعلى مرتين بسبب عداواته خطفوني تخيلو..

المهم اجاني سام مثل النسمة بحياتي مسيحي الديانة لين القلب، من عمر الـ 9 سنوات يحاميني ويخاف عليَّ لهذا عمري، اوقات اصيحله عمو بس هو ميحب اكبره بمعظم الاوقات رغم هو چبير وراح يصير جد قريباً..

-سام: شبي ابو شعر وياچ

-مسرة: ابو شعر تقصد اشهب شمسون؟

-سام: اي شعره حلو اريد اسئله شنو تحطله واستحي

-عمو هذا فاهي تلگي كلشي ميحط جيناتهم هيج شعرهم طويل وكثيف

-هاا والله

-صدگني

-اي شبي وياچ شيريد

-بابا يريدنا نتشارك وياهم

طنگر ما عاجبه بس ما علق، رد دفعنا الهوا رجعني اني و سام ثلاث خطوات وره ضحكنا ثنينا الى ان وصلنا للموقع اخيراً، گرفان مصدي صاير اخر واحد..

-سام: اوگفي استكشف الوضع

وگفت على جهة دخل هو شوية وطلع عاگد حاجبه مستغرب..

-سام: فارغ

-مسرة: اي گال بابا

وگفت بعتبة الباب ورجع سام يفتش بالمكان وايده على سلاحه متحضر يطلعه تحسباً لأي خطر يصدر، اخيراً سمحلي ادخل نفضلي كرسي مترب مسحه بأيده ونزع جاكيته يغلف بيها الكرسي حتى اگعد عليه..

-لا سام شبيك باردة اللبس جاكيتك

-لا گعدي حبيبتي بنيتي

گعدت و سام يتلفت متوتر عكسي، گلبي مات واحس كلشي ميخوفني بعد عشت الاتعس والأمر ووجود سام يريحني وشعور بالامان يحاوطني محد يگدر يلمسني بسوء..

-سام: سرور اكو شي غريب

-وهو؟

ما لحگ يحچي وقشعر اجسامنا صوت صرير الباب المتصدي ينفتح، دخلو منها زلم ثلاثة مقنعين ووياهم زعيمهم عرفته من قصر طوله هذا "فيجو" مميز بقصر قامته ولذاعة لسانه، سفاح ماهر ومراوغ من الدرجة الاولى..

"تمت ترجمة الكلام من الانكليزي للعربي"

-فيجو: شنو اسم الحلوة

-مسرة: خلدون الاخيضر

هز راسه ما يميز هذا اسم ولد لو بنية، فوراً وبدون نقاش حط جنطة گدامي وفتحها شفتها متروسة ملفات لونهم ازرق طوخ ما مديت ايدي بقيت اتابعه بعيوني وهو يحچي..

-فيجو: هذي الملفات الي واعدت بيهم سرمد كلهم هنا

سرمد هو ابوية "فادي" واكيد يلعب بأسمه ويه كل صفقة، بقيت هادئة والزلم الثلاثة حاوطوني من جميع الجهات زمجر سام معصب من تصرفهم وفيجو رفع ايده يهدأ من الوضع..

-فيجو: ريلاكس ريلاكس.. بس نريد نتأكد المدام ما شايلة وياها كامرا

-مسرة: تشوفني گاعدة گدامك كلشي ماعندي

لمعت عيونه وابتسم بخبث وهو يأشر على ياخة قميصي نزولاً لصدري، فريت عيوني وبقيت على هدوئي نزعت الجاكيت ونفضت ياخة فستاني بس هالشي مو كافي عنده رادني افتح الدگم كلهن گدامه!

-مسرة: اكيد تتشاقه؟

-فيجو: هذي القوانين سنيوريتا (سيدتي)

-مسرة: قندرتي فوگ قوانينك

گمت ضاربة كلشي بعرض الحايط طز بالملفات وطز بالجنطة وطز بكلشي يمس كرامتي..

-فيجو: سنيوريتا شنو رأيچ نجيب امرأة تتفحصچ بس حتى نتأكد وثنينا نرتاح

-مسرة: لا

-فيجو: سهليها مدام

زفرت نفس وعيوني على سام الغاضب، اعرفه يسب ويلعن بأبوية جوه انفاسه شلون غيرته تسمح يخلي بنته بهيج وضع بس الطمع يسوي الاضرب من هذا..

وافقت تجي بنية تفتشني دقايق ودخلوها نفضتني نفض تتلمس بكل جزء من جسمي ومن توصل لأماكن حساسة تبتسم بخبث لعبت نفسي ودفرت ايدها مني..

-مسرة: يله خلصونا

رجعت على الميز انقر بأصبعي بعصبية، فتحلي الجنطة من جديد وسام جرلي اول ملف يفتحه امام عيوني حتى اتأكد من المعلومات على الاقل گدام فيجو بس.. ثواني وجميع الگاعدين اللتفتو على صوت الباب ينفتح..

فتح عيونه على وسعها من شافني گاعدة لكن سرعان ما رجع ملامحه للجمود، دخل بدون سلام واخذله كرسي ابتسم فيجو من شافه وگال بثقة..

-فيجو: عرفت راح تجون

-شُهيب: اختصر

-فيجو: ما راح تندم سنيور (سيدي)، جبت كلشي محتاجي والباقي عليكم

طلع جنطة مشابهة للي انطاهة الي وحطها گدامه، بقى ساكت رجل على رجل ما نطق ولا باوع للجنطة..

-شُهيب: المطلوب شنو؟

-فيجو: المطلوب تدخل سفينتنا بدون مشاكل

-شُهيب: ما راح اتعب نفسي واسأل السفينة محملة بشنو

-فيجو بخبث: بضائع سنيور بضائع كثيرة

-شُهيب: زين؟

-فيجو: هذي المعلومات كفيلة تخليكم توافقون، كل الكونتينرات الي دخلت المانيا لصالح "شمسون" لشهر ديسمبر هنا وصدگني ما تردون تروح بيد أياً كان

-شُهيب: المطلوب تدخل سفينة وحدة بس؟

-فيجو: خمسين سفينة!

ابتسم شُهيب تك خد وحك طرف انفه، ركزت كل انظاري عليه بفضول اشوف ردة فعله وشنو راح يگول بس چان هادئ وما نطق بشي..

-فيجو: سنيور خمسين سفينة تعبر حدود فرنسا بدون اوراق رسمية دخولاً للمغرب مناك يستلمها اخوكم الثاني بعـ..

-شُهيب: من فرنسا للمغرب من كل عقلك؟

-فيجو: نعم تگدرون سنيور سويتوها من قبل

-شُهيب: شوكت؟

-فيجو: ماعرف بالضبط بس.. صدگني تگدرون اخوك متمكن جداً

سكتو ثنينهم والرجال ياكل بشُهيب اكل منتظر ينطي الموافقة لكن ما صار هالشي، وگف شُهيب ولبس كفوفه النزعهن اول ما گعد وطلع بكل هدوء بدون لا يودع احد..

ذب نفس فيجو معصب و ظل يدردم بلغته الأم طلعوا رجاله اسلحتهم يردون يلحگون شُهيب يطيحون حظه وصاح بيهم فيجو يرجعون ويأشرلهم بأصابعه حركة واضح الها معنى معين بيناتهم..

اشرلي سام نگوم واخذ الجنطة ويانه ما عارض فيجو بحساب متفق وواصل حسابه ويه ابوية، طلعنا واشوف شُهيب گدامي ايد بجيبه والايد الثانية لازم بيها جگارة يدخن ويتمشى للامام بثبات من دون لا يلتفت..

-سام بهمس: هذا مسلح

-مسرة: اكيد

-سام: مو بس سلاح ناري مسلح يعني عنده ظهر قوي ما ينغدر

-مسرة: لاحظت هالشي سمع خطواتنا نمشي وراه وما اللتفت حتى من باب الفضول ما دار وجهه

-سام: ممكن نكون أي واحد من جماعة فيجو يسكته بكاتم لا من شاف ولا من درى خصوصاً بعدما استفزهم هالشكل بس گتلچ مسنود واثق من خطوته

-مسرة: ابن شمسون الكلب طبعاً مسنود

ما اندار علينا الا من وصلنا للسيارات، عيوني عليه ما غابت رجع شعره النزل على عيونه للخلف وحچى بنبرته الهادئة..

-شُهيب: ما توقعت اشوفچ هنا

-مسرة: حتى اني

دار انظاره عليَّ متسائل من جوابي، هزيت راسي اي هذا القصدته حتى اني ممتوقعة اللگه روحي هنا اليوم، فتح سيارته يريد يركب ووقفته بسؤال..

-اگلك

-اسمع

رجع ينظرلي والهوا يطير بينا تطير حتى هيبتي طيرها من جاوب سؤالي..

-مسرة: شنو بيهن ذني الخمسين سفينة؟

-شُهيب: حليب نيدو

-شنو

ابتسم ابتسامة باهته وهز راسه يائس، قررت اتغاضى عن تصرفه واسئله بعد..

-عندي بعد سؤال بس لتجاوبني ببطل لبن

-اسمع

-ليش چانت ردة فعلك قوية من گلك يريد ينقل السفينة من فرنسا للمغرب بالباخرة

-شُهيب: كم ساعة تستغرق سفرة من فرنسا للمغرب بالباخرة يا ترى؟

-شمدريني بحياتي ما رايحة للمغرب

رفع حواجبه ثنينهن متفاجئ من جوابي، رمش كم رمشة ثقيلة وهو يباوع لـ سام الواگف بظهري..

-شُهيب: انتِ صدگ متعرفين على شنو چنة نحچي جوه؟

-مسرة: اعرف طبعاً

ثبت انظاره عليَّ وكتف ايده لصدره..

-شُهيب: اممم وهو؟

-مسرة: جنطتكم دسمة چانت سنيور اشهب!

-شُهيب: اسمي شُهيب، وجنطتكم طافح منها الدسم سنيوريتا

-هسة ما راح تجاوب شنو الصار جوه؟

سوه صوت بحلگه بمعنى "لا" وركب سيارته فتح الجام شوية وگال قبل لا ينطلق..

-خليچ بالهندسة مسرات

داس بانزين بكل قوته شخطت سيارته وراح مخلف وراه دخان كثيف نتيجة احتكاك التايرات بالگاع، حاولت اسيطر على اعصابي وما ابين تنرفزت من اسلوبه وكلامه ركبت سيارتي وسام ركب ويايه تارك سيارته هنا..

-سام: تبادلي وياي اني اسوق

-اني اريد اسوق سام

-حتى تسوين بينا حادث وخري سرور

-مسرة: روح بسيارتك ليش جاي وياي

-گتلچ وخري حبيبتي

نفخت هوا بكل قوتي ونزلت اگعد بكرسي الصدر وهو بمكاني، حط الجنطة الاخذناهة بالكشنات الوره ومشى بالسيارة..

-سام: سيطري على اعصابچ لا تخلين احد يزعلچ

-شفته سام؟؟ شفت اسلوبه عبالك زعطوطة گدامه عجيبب مو ولد چلااب مربي شمسون بالضبط بالضبطططط چلااب

-سام: مسرة ليش تحرگين بأعصابچ؟ اساساً هو راد يوصل لهذا الشي راد يخليچ تتنرفزين بابا

-لا اني الكاتلني طريقته بالكلام يهمس الكلمات همس تعب انفاسه والله لو حاچي وياي بالاشارات احسن على الاقل ميجهد اوتاره الصوتية يعوفهن نايمات ويه اخلاقه

-ههههه اي صوته رسمي خامد

-لا سام لا مو انتَ هم عليَّ!

-ليش؟

-لتصيرلي صبا الثاني خبصتنا بالصوت الرسمي اصلاً شلون يصير الصوت رسمي؟!

-معناها ماعنده تعابير او اختلاف بموجات الصوت من يحچي بموجة وحدة ما يعصر بروحه ولا يحاول يخشنه والصوت الخامد هو الصوت الخشن الهادئ موجته ناصية

-سام كأن انطيت تفاصيل زيادة عن اللزوم؟

-غير افهمچ قزوم

سكتت اباوع من الجامة راسي يوجعني من كثر الافكار عندي فضول اسأل عن شنو موجود بالجنطة واعرف سام يعرف كلش زين بس ما راح يجاوبني بطلب من ابوية، اگدر ابحث عن الموضوع وابحوش بين الاوراق بس ماريد انصدم خليني امشي عمياوي وسام بظهري ولا انكفخ بشي يأذيني..

وصلت للبيت وكالعادة ابوية منتظرنا بالباب اخذ الجنطة من ايدي ودخل للمكتب مالته، ذبيت نفسي على القنفة اتصفن وحدي گلبي عاصرني عصر مشتاقة موت ما جاي اتحمل..

رحت لغرفتي سبحت وكعدت جوه الدوش اطلق العنان لدموعي واسمحلها تغسل كل اوجاعي واحزاني ابچي ندم على سنين عمري الضيعتهن ابچي لان ورطت روحي من البداية وسلمت نفسي..

طلعت من الحمام ملفلفة روحي بالبرنص ونمت بي مثل عادتي من اكون تعبانة، هستوهه غمضت عيني وحسيت على اشعار اجاني طفرت لموبايلي آملة الاشعار من عنده بس خابت امالي من شفت رقم غريب حفظت اخر رقمين منه هذا رقم اشهب..

قبل لا اشوف رسالته سجلت رقمه عندي "اشهب ابو شعر الحلو" ما اقصد شي بس اعرف ثنين اسمائهم اشهب حتى اميز بيناتهم، زائد مستحيل اكتبه اشهب شمسون واوصخ موبايلي بأسم شمسون الزفت، فتحت رسالته كاتب..

"جواب على سؤالچ اليوم هو.. المسافة بين فرنسا والمغرب بالباخرة لا تقل عن يومين متتاليين بمعنى راح تعبر على اكثر من دولة حتى توصل بسلام لكن.. هل راح توصل بسلام وهي داخلة بأوراق مزورة؟ اكيد راح يرصدوها برادارات ويتم السؤال عن اوراقهم الرسمية خصوصاً عدنا خمسين سفينة داخلة وهالشي يكلف هواي راح نضطر ندخل زلم فرنسا ويانه وهالشي يزيد سعر الشحنة لثلاث اضعاف تقريباً بمعنى الحركة فاشلة وغبية والطلب افشل وغبي اكثر.. (هذهِ مكيدة لشمسون)"

اهاا وصلت، افتهمت سبب مغادرته گرفان فيجو بهاي الطريقة اكو احد ناصبلهم مكيدة ويريد يوگعهم وعباله همه اغبياء وطبعاً شمسون عنده كلاب تشمشم المصايب وعقولهم تگول عقل مطي من الذكاء ما راح يوگعون بمشاكل مثل هاي..

شفت رسالته وما جاوبت بقيت افكر بكلامه وخفت احنه هم متورطين وياهم بسالفة السفن الي راح تطلع للمغرب لا بابا عفية لتورطنا وياهم، وخرت شعري عن وجهي وگعدت عدل وكتبت..

"ليش جاوبتني هسة؟"

"ما ارتاحيت للي وياچ"

"سام؟؟؟"

"ماعرف اسمه"

"خفت سام يلگف شي عليكم؟"

"شي مثل شنو؟"

غلست على سؤاله وكتبت..

"تفتهم بهالسوالف انتَ مبين متمرس"

"اعجبچ"

الكلمة الوحيدة الي كتبها واختفى وراهة شوية ورجع يعلق على رسالته مال "اعجبچ" وكتب..

"بالغلط اندزت هالرسالة مو الچ"

ضحكت ممهتمة مبين ديحچي ويه وحدة ثانية ويايه وتَيه بيناتنا، رجعت اكتب..

"مو مشكلة"

"ت ع خ"

"شنو هاي الاحرف؟"

"ت = تصبحين
ع = على
خ = خير"

عوجت حلگي المن هالفيكات اكتبها عدل وخلصنا دزيتله ايموجي اوكي وسديت موبايلي رجعت اتمدد على فراشي افكر ما گدرت انام وماتحملت ابقى هنا ساكتة طفرت اللبس ملابس ونزلت اركض لمكتب ابوية طرقت الباب ودخلت شفته گاعد منهمك بيده فنجان قهوة والاوراق مطلعهن من الجنطة مبعثرهن امامه..

-بابا سؤال

-جواب بس سريع

-احنه هم متورطين بالسفن الي راح تطلع من فرنسا للمغرب؟

رفع انظاره عاگد حاجبه ممفتهم، گعدت گدامه اعيد سؤالي بس ما تغيرت ملامحه توضحلي ميعرف شي..

-مسرة: همزين ريحتني

-فادي: سفن شنو؟

-مسرة: مو هذا فيجو چان يحچي ويه ابن صخمون وگله اريدكم تأمنولي طريق و....

حچيتله كلشي صار وهو يسمع بتركيز ويحرك راسه ويايه، من كملت تنهد بخفة وارتشف من قهوته يسرح يفكر بشي، بعد مرور فترة ياله علق ناهي افكاري..

-فادي: لا مستحيل نتورط بهيچ شغل مالنا علاقة احنه

-مسرة: اي بابا فكر بينا ولتتورط ويه ذولة الحثالة

-فادي: زين ليش شُهيب ما قبل يمد يد العون؟

-مسرة: هو اسمه شُهيب لو اشهب؟

-فادي: ماعرف ما اتذكر مو مهم هسة

-المهم، گال هاي مَكيدة الهم

-شلون عرف؟

-ماعرف مجرد فيجو گله على السفن خله وطلع

-ولد الحرام مو عقل شايلين طرگاااعة

-بابا بس شنو من جنطة دسمة جنطتهم بحيث اول ورقة صارت بوجهي مكتوبه بقلم جاف اسود كتابة خط يد مو كمبيوتر ومأشر بالاحمر على كم جملة

-ما لقطت عينچ شي مسرة؟

-لا، اساساً چان مكتوب بلغة روسية

-اخخخ فاتتني

-شنو فاتك؟

-ما دخلتچ دورات روسية شجاني

-بابا!!

-شبيچ بابا حلوة الثقافة تفيدچ بهواي امور

عبست وهو بقى يتحارش ويضحك ويايه ترخصت منه ورجعت لغرفتي مرهقة رفعت الموبايل اشوف ساعة بيش وشفت رسالة من اشهب فتحتها واحس انكفخت على راسي باوعت للمرسل اتأكد هذا هو لو جاي يتهيألي هذا الرجل مو بس سريع الاشتعال هذا مشتعل من گاعة كاتبلي بكل جرأة ووضوح..

"اني اسف لان ضوجتچ اليوم، احبچ ❤️"

يتبع...

━━━━━━  ━━━━━━

يا صلاااااااة محمددد 🙂😂🔥🔥🔥🔥🔥

مسرة يا مسرة شلون بيچ ولچ مسرة دوختينااااا بس تبقين مفضلتيييي 😁👌🏻

توقعاتكم يحلوووين + اطلب منكم متبخلون عليَّ بالتصويت على البارتات لان القصة مدا تطلع للكل وشكررراً مقدماً 🫂💛💛