رواية ابناء الحسوم "شمسون" الفصل السابع 7 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لا تثق بي كثيراً
فـ ربما أعطيك النصيحة واطبقها عليك...!

━━━━━━  ━━━━━━

-كياااااان كيان ولج كيااان كياااااان

-كيان: شكوو شصاير شبيك مخبوص

-نشوان: وين اضم روحي وييين تعالي شوفي وياي تعالي

-كيان: ليش تلفون شُهيب بيدك؟

-نشوان: شايفة الي يطيح حظه بيده؟؟ هو هذا ينطبق عليَّ اني نشوان ابن سلوان طيحت حظ حظي وحظ ابوي بگبره بيدددي

-كيان: شسويت خوفتني

-نشوان: چنت ببيت ماريا قبل لا اجي تمام؟ شفت ماريا زعلانة وتبچي تمام؟

-تمام بس كمل نشفت دمي

-رحت گلتلها ماريا يا روحي شبيچ؟ گالت شهوبي زعلان عليَّ وميقبل يجي يزورني صراحة كيان متت قهر تعرفيني نقطة ضعفي عيون ماريتي

-اي اي وبعدين؟

-گعدت اتلاطف وياهة واغيرلها جو بس المسكينة منتهية من البچي گعدت بالگاع تنوح تدگ وتلطم تريد تحچي متگدر الشهگة ذبحتها وذبحتني عمت عيني عليها

-حبيبتي ليش هيچ زعلانة شمسوية ومخلية شُهيب زعلان عليها

-خايبة مصايب هي ما تگعد راحة طبها طوب

-ياااا

-والله تالي بزعتني رزلتها وطلعت ضلت صافنة وسكتت بعد ما بچت بس كيان گلبي اخخخ من گلبي

يحچي ويدگ على گلبه وملامحه ممتعضة متت قهر..

-كيان: اي حبيبي ادري بيك

-شسوي بهذا الگلب الي يحب الكل عذبني وتعبني

-هسة مو زين تحب الكل نشوان هالصفة حلوة

-عساني شايل هالگلب ولازگة بالگاع لو تعرفين شنو سويت بس گولي شنو سويت

-شنو سويت؟

-رجعت للبيت شفت موبايل شُهيب على الميز نويت ادز لماريا رسالة منه افرحها، شفت اسمها اول واحد "Ma" اعرفها هاي ماريا هو يكتبها هيج طبيت عليها وبدون سابق انذار كتبتلها اني اسف لان ضوجتچ اليوم احبچ ودزيتلها قلب

-اي وين المشكلة دومك انتَ تسويها؟

-المشكلة طلعت هاااي مو ماررريااا طلعت مسرررة الشريكة الجديدة من دزيتها ياله انتبهت على المحادثة الفوگ

-چذاب!! لا فدوة گول چذب گول هذا فلم من افلامك نشوان مستحيل انتَ بهذا الغباء؟!!!

-اگلچ هو صوچه تره! متوازي مسمي ماريا ومسرة نفس الاسماء بالموبايل اني شمدريني ثانياً دائماً اسوي هالحركة بيناتهم تعرفيني حتى يتصالحون احطه امام الامر الواقع بس هالمرة الامر الواقع طلع مُر واقع

-هسة شنسوي؟؟ ولك احذفهها شبيك

-متنحذف صخام الصخم حالي ما جاي اعرف شلون

-زين هي جاوبته؟؟ شو تعال اشوف

-اي دزتله علامة استفهام "؟"

-يبوو يبووو نشوان شورطتنا انتَ تعال اشوف شلون احل هالبلوة

-كيان عليج الله مو يستحق ينلزگ گلبي بالگاع لو ميستحق؟؟

-كلك على بعضك تستحق تنلزگ بالگاع على هالعملة والله لو شُهيب يعرف يسوينه وصلتينن

-دحذفي بعدين اطيح حظچ على تجاوزچ عليَّ

-هم الك عين ولك؟؟ من طاح حظك وحظي

-سااكت عنچ بس حتى تساعديني كملي شغلچ واني اربيچ

-روح ما اساعدك لعد

-لا حبي لا خيتي حبيبتي يله بداعة ماريا ساعديني وعلي يگصبني واني نايم ويذبني للچلاب تصفين بدون اخو يبقى بس مروان عندچ موغف على گلبچ

-كيان: نشوان خلينا نركز تعال نفتهم شلون نحذف

نويت ابحث على اليوتيوب شلون بلكت نعرف بعدنا دندور بالفيديوات وطفرنا ثنينا على صوت شُهيب يصيح نشوان گمنا نرافس مرافس جماعي..

-كيان: راح يگصبناا رااح يگصبناا

-نشوان: اگلچ رايح اسلم نفسي وشيصير خلي يصير

-ولك لاااا وين يمه اخوية فدوة لتروح

-نشوان: لا رايح بعد رايح مع السلامة انتبهي على نفسج وعلى مروان وتحملي عصبيته ميخالف هو يمشي ويكفخ تعودي حبيبتي ولا تنامين ودمعتچ بعينچ اعرفي اخوچ ما يرضى عليچ وراح يدعيلچ وهو بالجنة

-نشوااان بس كاافي شگد تلغي

-وهذا تجاوزچ راح تتعاقبين عليه بس هسة الوقت مو مناسب

سمعنا صوته يقترب من الباب بدون تفكير حذفت الرسالتين من جهازه مال "احبچ" ومال علامة الاستفهام مالتها يبقن عدها بس على الاقل شُهيب ميشوف اي هذا الحل الوحيد ميبات نشوان بالشارع لو ينذبح ويوكل لحمه للچلاب البره..

-نشوان: ادعيلي كيان دائماً لا تنسيني وسمي ابنچ على اسمي حبيبتي احبچ اموت عليچ تعالي ابوسچ

-كيان: هشششش حذفتها من جهازه...

-شُهيب: نشوان وينك؟

بلعنا العافية وياه چبودنا من شفته واگف بباب غرفتي المفتوح، بيدي موبايله ونشوان لاطش بيَّ لطش نتراجف..

-شُهيب: شبيكم؟

-نشوان: ا ا ا ا ا ا ح اح اح اح اح احنـ

-شُهيب: شنو؟

-كيان: احنه چنه نسولف حبيبي نسولف سوالف اخوان بين بعض من ام واب واحد اخوان كلش كلش ههههه تعرف اني وشوشو اخوان واجه يستشيرني بشي يخص الحب

-شُهيب: اي الله يحفظكم، نشوان حاچيت ماريا؟

نسيت سالفة الموبايل وركزت على كلامي انقهرت كللش من گتله احنه اخوان بين بعض شنو يعني ما حاسبيك اخونا وانتَ خارج قوس؟

-كيان: شُهيب احبك

رفع حاجبه مستغرب ومتفاجئ من هالتصريح المباشر، بدون تفكير رحت احضنه بقوة وبست ايده سحب ايده مني متوتر واخذ ايدي يبوسها ويبتسم..

-كيان: اموت عليك والله

-شُهيب: واني احبچ كيان

-كيان: احبك اكثر من نشوان خيولي هذا العفونة

-نشوان: مو تأثرت ودمعت عيوني الا شوية!! خرب حظچ فوگ حظي لازم تلوص وتخربها بنت الاودام

-كيان: وخر انتَ ابو المشاكل

بقيت لازگة بـ شُهيب عرفته ما تحسس من كلامي قبل شوية بس يكفي ان اني تحسست، شُهيب يصير ابن ماريا زوجة ابوية ميربطنا بي دم بس هو رباني.. ماريا تزوجت ابوية واني بعمر صغير وصرت بنتها ودلوعة شُهيب الصغيرونة عاملني معاملة بنت مو اخت وما اقبل على زعله ما اتحمل ابقى اليوم كله اكل بروحي الا اراضي..

-شُهيب: نشوان شبيك

-نشوان: شبيه؟ شبيه؟ مابيه؟ كيان بيَّ شي؟ ولا بيَّ ابد شحلاتني واخبل كلشيي مابيه هاي عيونك بيها شي حبي روح سوي نظارات

-شُهيب: هذا شبي؟

-كيان: شمدريني خيولي عفونة معليك بي

-نشوان: هم گالتتت عفونة هم گاااالت جاي اسبح بالعطر سبوووح وعلي بعد شسوي برووحي وبجيفتييي

-كيان: ههههه ما بيك ريحة ولك بس هاي الحچاية لازگة بحلگي كل واحد اشوفه اصيحله عفونة حتى لو چان ينگط نظافة كل رجال عدى شُهيب طبعاً ومالك..

همست مالك بخفوت لقطتها اذن شُهيب ونزل نظراته الي ابتسمت ابين الوضع طبيعي گلب عيونه معاحبه وكمل ويه نشوان..

-شُهيب: نشوان صدگ مروان عازم الشريكة الجديدة لو بس يريد يضوجني؟

-نشوان: عمت عينييي صدگ عازمها هالعفونة؟؟؟

-شُهيب: اي خابرني قبل شوية يگول باچر عنده غداء عمل وياهة بخصوص الشغل يريد يقنعها تكمل ويانه هذا شوكت لحگ يتصل؟

-نشوان: شُهيب بداااعة شكو عزيز على گلبك تررفض تكمل ويانه هالبنية

-شُهيب: ليش انتَ مو كتلت روحك عليها؟

-نشوان: اي اي بس شسمها هاي.. اي يعني بس البنية حلوة اخي حيل حيل حلوة راح تسببلنا مشاكل وراح تصير صراعات عليها ليش نشد روسنا وهي ما توجعنا

-شُهيب: متريدها تشتغل ويانه لانها حلوة؟ شنو هالسبب السخيف نشوان

-نشوان: مو ماتحمل شُهيب وهاي تسببلي مشاكل بعدين

-شُهيب: كافي لا تصير تافه!

-نشوان: بداعة امك شُهيب لا ترجعهاا

-كيان: الشريكة الجديدة هي Ma؟

وجهت سؤالي لنشوان اهمس همس وهو يقره شفايفي عض على شفته بقوة وغمض عيونه بمعنى "اي هي" وخرت من حضن شُهيب اباوعله وفاتحة عيوني..

-كيان: لا شُهيب شنو ترجعها عندكم؟؟ لا لا نشوان حچالي عنها گال عنها مو راحة

-نشوان: انتِ المو راحة لا تحچين على مسرة

-شُهيب: شو تدافعلها هسة؟ ما افتهمنا عليك شتريد..

وجه انظاره عليَّ ضايج من جملتي واردف بنبرة هادئة مثل عادته بس حسيته فشلني..

-شُهيب: ثانياً عيب نتهم الناس بهيچ امور كيان ما حبيت موقفچ

-كيان: اسفة صدگني مو قصدي اساساً تدخلت بشي ميعنيني كله من وره عفونة

-نشوان: طمو عفونة بگبر اظلم گولو امين

ضحكنا وگلنا اني وشُهيب بنفس الوقت..

-امين

تركنا وراح بقيت ويه نشوان السارح وگاعد على سريري، بعده الموبايل بيدي ما انتبهله شگد تندمت حذفت الرسائل شلون راح ارجعهن واحذفهن من الطرفين؟؟

-كيان: اكتبلها نشوان هذا الحل الوحيد گولهه بالغلط كتبتلچ والكلام ما موجهه الچ

-نشوان: سكتي تلوصيها عليَّ اكثر

-ليش تره عادي لا تصعب الموضوع

-ميفيد هسة تگول يتلاعب وياي

-ليش؟

-اقري باقي المحادثة

قريتها سريع وعرفت لشنو يقصد شُهيب مجاوب سؤالها بكلمة "اعجبچ" انوب كاتبلها مو الچ الكلمة صارت بالغلط، صدگ راح تگول هذا يلعب ويايه ونسبب مشكلة اكبر..

-كيان: باوع نشوان اتصل بيها انتَ وفهمها انتَ مو تگول عنها كلش حبابة ولطيفة اكيد راح تتفهم

-اي ضروري لازم بس شوفي اذا كملت ويانه افهمها وجهاً لوجه ما كملت نغلس تمام؟؟

-تمام واني اختك

-ابوسها لاختي وراهة اطيح حظها

كفخني على راسي وطلع بس متوتر كلش ومقهور من فعلتنا ادري بي ميضم على شُهيب شي بس الوضع مو مناسب يعترف بعملته هسة، نمت ليلتي قلقة باچر رايحة اللتقي بثامر العكرة حظي الزفت وگعني بيده شلون اتخلص منه ماعرف..

من الصبح بدلت وطلعت للجامعة وگفت انتظره مثل كل مرة نلتقي هنا شگد چنت احب من اشوفه اداوم بس علمود نلتقي ونسولف بس من وره غبائي وحبي انطيته مجال تمادى وعلمني على شكو سالفة مكسرة مثله الى ان شوية شوية انزع من گلبي وصرت اكره طاريه وماطيق شوفته..

واگفه افرك بيدي وادور بعيوني المكان فارغ تماماً كالعادة نحرص ميشوفنا احد ونكمل جريمتنا لا من شاف ولا من درى..

-ما راح يجي

فزيت فزة تسوه عمري طفرت من مكاني ودرت بسرعة على الي حچى، حطيت ايدي على گلبي راح يوگف بأي ثانية..

-كيان: عمو شمسون

-شمسون: هلو كيان

گالها ببساطة وهو يميل راسه على جانبه اليمين مبتسم، بلعت ريگ ومسحت على وجهي متوترة..

-كيان: عمو شنو.. شنو جابك لجامعتي؟

-اجيت انطيچ هذا

شمر عليَّ كيس اسود مقدف حجمه كلش صغير، اخذته صافنة عليه مو فاهمة..

-شمسون: جبتلچ التردي هالمرة بدون لا تبوگين من جيب اخوانچ فلوس

بهتت خايفة فتحت الكيس بسرعة اشوف محتواه وچان الگه كيس شفاف صغير بي مادة عبارة عن بودرة بيضاء..

-شمسون: خوش جاي تقطين بـ شُهيب وهو ما حاس عباله امه الفقيرة تاخذ من جيبه ومغلس عليها

-والله والله.. والله اني والله اني ماريد اسويها والله مو بيدي هو يجبرني ابوگ من اخواني والله تعبني اني ماريد ندمانة ندمانة عمو والله ندماانة راح اموت من القههر

-على شنو البچي كياني اني موجود وبظهرچ لا تخافين

-عمو فدوة لا تگول لأخواني والله انزل من عينهم ويكرهوني

-تؤ تؤ اكيد ما اگول.. كلشي ولا اخوانچ يكرهوچ

هزيت راسي اي وامسح بعيوني بأيادي راعشة، طلع جگارة من جيبه حطها بفمه شعلها وگال بهدوء..

-شمسون: العائلة عندي مهمة مثل ما تعرفين كلشي ولا تتفككون

شهگت منفجرة بالبكاء عرفته جاي يستهزأ بيَّ من جملته شمسون وووين والعائلة وين مستعد يبيع ولده كلهم لمصالحه اصلاً هو اكثر من مرة گال خلفتهم وربيتهم قربان اقدمه لمصالحي..

من شاف وضعي وبكائي الي زاد حرك راسه ما قابل عليَّ، يأشر بأصبعه ويسوي بحلگه صوت..

-تؤ تؤ تؤ تؤ ما اقبل واحد يبچي گدامي، اخر مرة واحد بچى طلعت زردومه بيدي وعلگته مدالية بصدر امه

غطيت فمي احبس شهقاتي راح اموت من الخوف شوگعني بيد هالانسان، هو صارله اياام يباوعلي بنظرات وكأن ديگول كاشفچ واعرف شنو جاي تسوين بس اتهرب منه واچذب على نفسي واحتمي بظهر اخواني..

-شمسون: ها؟

-كيان: شنو اسوي عمو شنو تريد مني

-هاا هسة انتِ عيني..

ذب نفس مليان دخان بوجهي ومدلي الجگارة يريدني اشاركه، باوعتله وعيوني تهمل اشرلي بعيونه يشجعني ادخن..

-كيان: بعد ما ادخن تبت

-شمسون: شعجب؟

-ماريد كرهت الجگارة كله بسببها تغيرت

-اخذيها

-عمو ماريد

خزرني بحدة يهددني بنظراته، اخذتها من ايده واخذت منها نفس بدون تفكير بس اريد اخلص..

-شمسون: قوي ديري بالچ

گحيت هواي وراهه مو جگارة كارثة هاي اذتني من نفس واحد، اشرلي بعيونه اخذ بعد سويت مثل ميريد وكملتها على وگفتنا.. حسيت راسي صدع بس ما اهتميت ركزت ويه كلامه وهو يطلع جگارة ثانية متشبه الي بيدي يدخن منها..

-شمسون: اريد منچ شغلة تسويها وانسى سالفة ثامر

-گول شنو أي شي اسوي والله

-اول شغلة عجبتيني ايدچ خفيفة بالبوگ

-عمو صدگني اني ما ابوگ بحياتي كلها ما مادة ايدي على فلوس احد بس ثامر جاي يضغط عليَّ الا اجيبله مخدرات ورطني وحطني بالواجهة بالبداية مصروفي چان يكفي انوب صار يطلب اكثر وما تريحه النسبة الي اجيبها اله راد اكثر واكثر الى ان وصلت گمت ابوگ من اخواني بدون لا يحسون عليَّ

سردتهن كلهن سردة وحدة بلا وعي الخوف مسيطر عليَّ واريد اخلص ساعة قبل..

-شمسون: على كلٍ ما يهمني هذا الخرط (اخذ دخان من جگارته وبلعه) اريد منچ سالفة سهلة ما تاخذ منچ وقت هواي

-شنو هي

-دعسوقة

-دعسوقة منو؟ تقصد دارلان مدربة الجيم مالتي؟؟

-بالضبط

-شبيها؟

-اريدچ توخريها عن مالك بأي طريقة كانت

-شلون؟

-تذبحيها

-شنووووو

ذبل عيونه عليَّ بأستهزاء دخت كلش بصعوبة مسيطرة على توازني راسي راح ينفجر واحس بحرگة صارت بمعدتي ماعرف شبيه وليش تخربطت هيچ فجأة..

-شمسون: بعديها عن مالك بأي طريقة ميهمني شلون

-يصير اسأل ليش؟

-هو لا بس راح اجاوبچ حتى نحل الموضوع وافيدچ وتفيديني

-اي؟؟

-دعسوقة جاي تضرني من خلال مالك، صايرة بعقله ومعشعشه براسه يفكر بيها بكل وقت وجاي يخربط هواي بالشغل كلش هواي وهالشي خسرني ملايين..

سحب نفس بعد وذب الجكارة بالكاع وداسها، لفح الدخان بوجهي ممهتم اختل توازني وگعدت بالگاع على الصبة طفيت فد مرة..

-شمسون: دختي؟

-اي كلش

-ميخالف راح ترتاحين وراهة

-كمل على دارلان

-اي هذا هو بس وخريها عن طريقنا ماريد اكسر گلبه واحچيله حقيقتها

-حقيقتها؟ شنو تقصد؟

-دارلان ساقطة من الطراز الاول، بنت ليل بأختصار تجذب صماخات كبار وتلعب عليهم

-صدگ تحچي؟؟

-وداعة چلابي

-زين اوگف انتَ تگول طلعيها من عقله خو گول لمالك حقيقتها وطلعني من الموضوع

-كيان

-ها

-لا تصيرين ******

فشر عليَّ غمضت عيوني ونزلت راسي مقهورة من نفسي ومن الموقف الحطيت روحي بي وخلى شمسون يفشر عليَّ هالشكل..

-كيان: ماشي

-اريد الموضوع شوي شوي يوصله لا تصدمي دفعة وحدة مالك...

ذب نفس متنرفز وگلب عيونه وكأن الي راح يگوله يفشل ومو من مستواه..

-شمسون: مالك كلش حساس بسوالف الحب وهالشي جاي يتعبني

-ليش يتعبك؟

-لان جاي يتأثر الشغل ويه مشاعره! بيوم الي يكون تعيس وما يشوف ***** دعسوقته يظل كئيب وضايج وما يشتغل زين ومن يشوفها يصير مطي يمني اصيل كل حيل الدنيا بي

-تمام

-يله روحي

-دايخة ماگدر اگوم تعبت

-كيان وياي انتِ؟

-ها

-گعدي عدل وين نايمة بالگاع

من الدوخة تمددت على الگاع فاتحة ايدي ورجلي وهو فوگايه، احس بكلشي حواليه بس ماگدر احچي بسهولة لساني ثگل.. غمضت عين فتحت عين ماعرف شگد مر من الوقت وحسيت بدفو يحاوطني..

ابتسمت على الريحة شگد عجبتني، ملت راسي للجهة الثانية اشوف وزادت ابتسامتي من شفت مالك جاي يسوق واني مگعدني بكرسي الصدر..

-مالك

اندار عليَّ بسرعة مبتسم بقلق، رجع انظاره للطريق وگال وهو يمدلي بطل مي..

-اخيراً صحيتي، شصاير وياچ كيان صديقتچ اتصلت بيَّ گالت متخربطة

-صديقتي؟

-اي گالت اسمها مروة شوفي هذا رقمها

مدلي موبايله كلشي ما اشوف عيوني تحول ومسطورة سطر كلمة اللگفها منه وكلمة لا، وصلني لبيت ماريا بس سمعته يگول "نزلي" حاولت افتح الباب ما گدرت ايدي ترجف وخدرانة، نزل هو بسرعة يفتحلي الباب وينزلني ذبيت كل ثگلي عليه تركني امشي وحدي خطوتين ووگعت على وجهي چفت..

-كيان لازم اخذچ للمستشفى وضعچ مو طبيعي

-لا.. لا

ما احط عيوني بعيونه خفت اچفص بحركة سخيفة وياه، اشرتله بس وصلني للبيت سندني وطلع المفتاح من جنطتي وفتحلي الباب..

همسلي بشي ما سمعته عادها اكثر من مرة ياله عرفت ديسأل وين يوديني، اشرتله فوگ صعدني على كيفه وينتبه لخطوتي..

وگفني بباب الغرفة ما دخل ويايه هم وگعت رجليه خيوط ما احس بيهن شنو سوالي هذا شمسون وليش جاب مالك بالذات؟؟

-مالك: وضعچ ميسمح تبقين هنا وحدچ راح اتصل بأخوانچ يجون

-كيان: لـ.. لا.. مالك.. احبك

-شنو

لطمت حلگي بسرعة بيدي ظل هو يتسائل مبين ما سمع شنو حچيت او ما فهم ياربي شنو جاي يصير وياي الي بعقلي رأساً جاي اگوله بدون لا احسب حساب للكلمة ماگدر اسيطر على روحي ليشش..

-تعالي ارتاحي هنا

نزلني على السرير يعدل بالمخاد وره ظهري، رفع نفسه يوخر وجريته من ذراعه تحسست ردن قبوطه الثقيل بيدي وهمست ببطئ شديد..

-لا تروح

-خليني اتصل بماريا تجيچ

-لا اريدك.. انتَ

-ما افيدچ بشي اني واخوانچ ما راح يرضون بگعدتي هنا ماريد اسببلچ مشاكل

-انتَ المشكلة الوحيدة بحياتي

بديت اغفي وارجع اگعد عضيت لساني حتى ما احچي بعد بس صرت اضحك بهستيريا وابچي بنفس الوقت تعبااانة كلش حيل ماعندي ومكمشة بردن مالك الي مو فاهم شي..

-متعاطية كيان؟

-لا.. لا لا ما اتعاطى اني

بحركة سريعة تقرب من وجهي وجر جفن عيني يشوف ركز بملامحي واني مركزة بي صار عندي شعور قاتل اريده ما جاي اتحمل لزمته من متونه ثنينهن وهو ممتهم مركز بيَّ ويهمس..

-شنو اخذتي اليوم؟

-انتَ

-كيان.. ركزي وياي اني مالك شنو اخذتي اليوم ومنو انطاچ؟

-منو

-كيان وياي رجعي عوفي كلشي وركزي شنو اخذتي اليوم؟؟ احد انطاچ جگارة او حباية او أي شي؟؟!

-اخ راسي

حط اصابعه ثنينهن على مخارج انفي يشوف تنفسي بلعت ريگ ناشف اريد مي عيوني تتگلب من وحدها دايخة والاحبه گبالي دوخني اكثر من لا وعي جريت شعره النازل على جبينه ماعرف ليش سويتها بس شي بداخلي راد يلمس شعره..

-مـــــااااااالك؟؟؟؟

فز من مكانه رافع نفسه مني مصدوم ما حسيت بشي الا ونشوان ومروان فوگ روسنا ودخل ثالثهم شُهيب العيون تجدح والوجه مطعون احمر وبيده مسدس..

-مروان: ولك ابن شمسون الشووم شعندكك بغرفة اختيييي

هجم مروان بكل ما عنده من قوة على مالك وشمره بالگاع ونشوان صار فوگاه وشُهيب واگف يتنفس سريع يباوعلهم بيده السلاح يضغط بقوة.. عين عليَّ وعين على مالك الي صارو يضربوا اخواني وهو يدافع عن نفسه ببراعة مخيفة..

جاي اشوف كلشي واحس واتذكر بس جسمي خدران ولساني ثگيل احتاجيت اصيح بيهم يوگفون بس محد بيهم مركز بيَّ غير شُهيب الي قتلني بنظراته، تمشى متوجه لكنتوري يضم السلاح هناك وقفله بأحكام وشمر مفتاح الكنتور بالحمام وهم قفل باب الحمام وذب المفتاح بسلة الزبالة..

ماعرف ليش هيج سوه بس تخيلت تصرفه هذا حتى محد يتهور ويستخدمه، شتت تركيزي صوت مروان المتألم وهو يلزم ظهره الي مالك قسمه نصين وهو يدفعه على يدة الباب وتنحفر بي، نشوان صار يتصارع وياه وهم ميگدرله مالك يتعارك كأنه ملاكم تكواندو!

مالك لزم نشوان وضرب راسه بالحايط بقيت فاتحة عيوني بقهر وبس دموعي تجري، اخيراً تدخل شُهيب تقدم على مالك وبحركة سريعة وغفلة منه جره من ايده يشيله يحطه على ظهره ويشمره بالگاع..

صار فوگاه شُهيب ويضرب بوكسات ومالك يرجع يدافع عن نفسه ويقلب شُهيب على ظهره بس ميأذي ولا يضرب بي بس يدافع عن روحه بس شُهيب لا لا تحول من الانسان الهادئ الساكن لشعلة نار..

ماگدر احچي على صدمتي واني اشوف ثنين اخوان يتعاركون بكل هذا العنف والوحشية المخيفة وكأنهم ملاكمين متدربين على القتال لدرجة اخواني وگفوا على جهة وما تدخلوا بيناتهم بعد، افسر المشهد كأن جاي اتابع WWE ويه نشوان والملاكمين همه مالك وشُهيب!

اخر من ابدى حركة قبل لا يجوني اخواني هو شُهيب رفع مالك وسط شهقاتي الما طلعت ورگعه بالحايط بكل قوة..

نشوان ومروان اجو عليَّ مروان جرني من شعري وراد يضربني ونشوان دفعه عني وصارت عركة بيناتهم عليَّ بچيت ميطلع صوتي ميتة من الوجع والخوف اشوف اخواني يتكاتلون واشوف مالك يتأذه بسببي وشُهيب يضرب اخوه من لحمه ودمه بهالشكل الوحشي!

-اااااااااااااااه

الكل جفل على صوت الصرخة الناعمة الي اجت من جوه، طفر شُهيب عن مالك وراح يركض ينزل يشوف شصاير هذا صوت ماريا هذا صوت امه!

مروان ما اهتم لكل هذا ورجع يريد يتعارك ويه مالك واخيراً مالك نطق بصوت قوي جريء..

-بدال ماا تعاركنييي شوف اختك شبيهااا!!

-مروان: وانتَ منووو وتهتم بأختتتي ولك ابن العاار

-مالك: غبي اختك متعاطية شي! احد ضاحك عليها يريد يأذيهاا ومنطيها جرعة قوية چنت جاي اشوف عيونهاا وتنفسهاا من دخلتو عليناا اريد اتأكد الجرعة رااح تضرها لوو لاا

-مروان: ههههههههههههههه شوف ما شاء الله خبرة بهالسوالف ابن الحسوم

نشوان ما اهتم لعراكهم واندار عليَّ يلزم بوجهي يحاچيني بس ماگدر اجاوبه عيوني بدت تغفي تعبانة وحيلي مهدود..

-نشوان: اذا متعاطية ليش ما فاقدة الوعي؟

سأل بحيرة وتقرب بجسمه يحاوطني بدفو ويبوس براسي ويمسح على وجناتي واسمع مروان مستمر يتجادل ويه مالك الي اخيراً رجع يحچي بنبرته الهادئة بس عصبية يفهمهم شنو صار من البداية..

غفيت بأيدين نشوان ماعرف شگد بس حسيت وقت طويل مر گعدت وراسي يموتني مفلوق نصين فتحت عيوني غرفتي ظلمة ومغطيني عدل گمت متوجهة للحمام شفته مقفول تذكرت حركة شُهيب، دورت على المفتاح عيوني تزوغل ما اشوف زين اخيراً لگيته بالسلة غسلت وشربت مي ونزلت جوه اتچى على الحايط..

شفت ماريا گاعدة تتابع فلم وبيدها طاسة متروسة فوشار وعصير گدامها، من شافتني فتحتلي ايدها اروحلها وعيونها تسولف لهفة..

-كيان: ماريا

-ماريا: روحها وبنيتها الحلوة

-كيان: شصار اليوم ماريا ليش دخلوا شُهيب واخواني هالشكل للبيت؟

-ماريا: فاتوا لگو باب البيت مفتوح عبالهم حرامي شُهيب طلع مسدسه واشرلهم يصعدون فوگ يشوفون شكو بس ما خلاني اروح وياهم وبعد ماعرف شصار

-كيان: زين شبيچ صحتي اليوم الظهر؟

عبست وجهها ودمعت عيونها فركتهن بسرعة حتى متبچي وگالت مزعوجة وحزينة بنفس الوقت..

-وگعت على راسي كيان توجعت

-يممة حبيبتي صدگ تحچين شلون؟؟

-شفت صرصور وخفت منه رحت اركض لشهوبي اريده ينقذني ووگعت من الدرج على راسي

-عمري

حضنتها امسح على راسها وهي لابده بحضني خايفة وتفرك بعيونها وتگول..

-شهوبي گال ازعل عليچ اذا بچيتي بس اريد ابچي هسة شلون؟

-ابچي حبي ميخالف سماح هالمرة

-بس يزعل

-ميزعل محد يگله

-كيان مو تحچيله ازاعلچ وبعد متصيرين بنتي

-ما احچيله شبيچ

وفعلاً كأنها مكوكة روحها دموعها صاروا ينزلون بغزارة وتشهگ حضنتها اكثر واهدأ بيها بس ماكو فائدة، اكيد لاحظتو شي غريب بمحادثتنا وبشخصية ماريا الطفولية؟ بس ما راح احچي شي حالياً لان ماعرف بالضبط الموضوع شنو ولا منين ابدي...

**

"صبا"
اليوم چان متعب خصوصاً هذا اول يوم الي هنا بالشركة الثانية، ممتعودة على المكان وحسيته كلش مو مناسب يختلف عن مكاننا وشغلنا وحتى مكاتبنا هناك افخم وارقى وريحتهم تسولف ثراء..

بس المصبرني هنا هو وجود مسرة طلبت مني طلب خاص انقل وياهة واشتغل منا لخاطرها، ما حبيت اكسر بيها ووافقت رغم المكان كلش مو جوي كلش سيمپل ومو كلاس والاجواء متناسبني وتناسب مكانتي بالمجتمع طبعاً..

قاطع غروري المستفز اتصال من امي، جاوبتها بهدوء بينما قابلني صوتها العالي تفرفح من اخوية الي نايم لسه، ضحكت وهونت عليها واخيراً گالت..

-ام صبا: ها يا امي جاي تشتغلين بالمكان الجديد؟

-صبا: اي ماما اني نقلت هنا اليوم وره اجتماع مسرة ويه مروان گدر يقنعها تكمل الشغل وياهم وهي باشرت قبلي

-ام صبا: بيها الخير على حبيبتي مسرة فخورة بيها اني بنيتي الجميلة

-تره اني بنتچ مو مسرة ماما

-اي اي بدت الغيرة، باعي اليوم مسوية تمن تاچينة خليها تجي تآكل عدنا

-صبا: ماشي حبي

-سودة عليَّ هالبنية تقهرني لا تآكل اكلة بيهه خير لا نومة بيهه خير حياتها بس شغل وتركض وره سوالف ابوها النذل يبتزها ويهدد بيها اااخ لو اللزمه الا ارفس بفااده

-شتسوي ماما انكتبتلها هالعيشة المسكينة منين متجيبها عوجة بس ادعيلها يرجع حقها وترتاح

-ااااااااخ بجاه كلمن عنده جاااه يريح گلبها ويخلصها من الضيم والحرام المجبورة تعيشه هالوردة الذبلانة

-تدرين من البارحة على لحم بطنها كلشي ما اكلت

-يااا عمت عينج من صديقة شبيچ لعد انتِ وينچ عنها صارت بالاربعة العصر البنية بيها سكر لا يصير بيها شي!!

-متقبل تاكل شسويلها موتتني من تضوج متاكل شي

استفسرت عن سبب ضوجتها سولفتلها سريع وانتبهت للوقت صارت بالاربعة العصر!! بده الاجتماع اكيد وهذا اول اجتماع لمسرة بيناتهم..

ركض ركض ودعت امي ورحت لمكتبها وقفوني زلم ثنين واحد منهم عيونه مجرورة شوية ملامحه آسيوية بس شكله يخبل هو الي حچى ويايه..

-نشوان: مساء الخير، حضرتچ صبا؟

-صبا: نعم تفضل

-نشوان: شفتچ رايحة لمكتب مس مسرة بلا زحمة گليلها وصلوا الجماعة والكل منتظر حضورها

باوعتله صافنة بوجهه افكر منو الجماعة؟ همه مو گالو بس واحد راح يجي شو صاروا جماعة؟ بقى مبتسم ينتظر مني ردة فعل شو هذا حباب وحسيته كيوت راح احطه بقائمة ازواجي المستقبليين..

هزيتله براسي وردلي ابتسامة بشوشة اكثر ظهرت عنده غمازة بخده الايسر، تركته وكملت طريقي لمكتبها دخلت عليها شفتها منهمكة ذابة روحها بالشغل بس وجهها تعبان كلش..

-صبا: بعدچ گاااعدة ولچ صارت بالاربعة العصررر

-مسرة: وشنو يعني

-قابلني واحد هيج عيونه مجرورة واسمر لا مو كلش اسمر شوية حنطي بس مادري هو مو كلش يعني شـ..

-الزبدة؟

-المهم هذا ابو غمازة بخده الايسر گال الجماعة منتظريچ

فتحت عيونها وكأنها تذكرت شي، قفزت من كرسيها بدون لا تنطق ونزلت تلبس حذائها الي تنزعه كلما تدخل المكتب..

-مسرة: مدا اركز صبا المكان بعده جديد عليَّ ينراد وقت اتأقلم نسيت الاجتماع وبعدني ماعندي سكرتير هنا

-صبا: ميخالف حبي يله تعالي تعالي

-مسرة: وين؟

-هاچ عضي من هاي خلي الدم يرجع لوجهچ

حطيت نستلة بحلگها اكلت منها شوية وتسائلت بحيرة..

-صبا: شبيچ مسرة مبين كلش تعبانة شصاير وياچ؟ معقولة فايتني شي؟

-مسرة: من يخلص الاجتماع اسولفلچ

-صبا: يعني فايتني شي؟؟ خلال اسبوع سفرتي فاتني شي؟؟

-اي اي

-لعد ليش ما راسلتيني؟ ما اتصلتي بيَّ؟؟

-ما ردت اعكر مزاجچ امشي وره الاجتماع اسولفلچ

-خوش يله لعد بسرعة عدلي الكفشة وينه العطر ولج العطر ما جايبه نعلل

-لا ما جبته من غيرت جنطتي شلون نسيت

-اوكفي اني يمكن جايبه عطر

رحت على جنطتي طلعت عطر صح خايس مادري شحس من اشتريته بس اجيت ورشيتلها منه كامت تعيط..

-ايععع شنو هالقررف صباا

-ميخالف ميخالف بس هالمرة

-ويشموني خايسة!

-يله يمعودة حلوة بكل حالاتج، تعالي بعد حمرة نحطلج اييي الله شحلاتها غزالتي

-احس بالغنه روج احمر كلش طوخ مو مناسب لاجتماع اول

-لا حبي خفيف مبينه شفايفج حمر من الله

-ماشي يله نطلع

-بعد شوية نشتلهم؟

-ليش؟

-حتى نبين احنه ثگيلات؟

-منيلچ ثگيلة بخف الريشة؟ ثانياً احنه رايحات بأجتماع مو رايحات نشوف حبايبنا يمعودة

-هسة متخلي الواحد يعيش الدور عجيب

-لا ماگدر لعبت نفسي صبا، دوري وجهچ بسرعة

حچتها كاشة وجهها درت وجهي وفوراً وگفت ورايه ونزعت فستانها ممتحملة ريحة العطر الرشيته حقها صدگ يخزي ريحة زواع، احس بيها تمشي ماعرف شدتسوي صحت بيها..

-صبا: مسرة مخبلة انتِ شتلبسين لعد؟؟

-جايبه احتياط

صوتها اختنگ دتلبس بالملابس، دائماً نجيب ويانه لبسة احتياط نحطها بالمكتب للضرورة، رفعت عيوني ادورها بالمكتب بينما هي تبدل وشفت شي شل گلبي ورجليه ولساني وياه..

-مسرة: كملت، شوفيني شلون طالعة

درت عليها اشوف مبدله لابسة فستان اسود يوصل للركبة بسيط ومقسم على جسمها بأكمام طويلة ضيقة، طالعة تخبل كالعادة جمالها مميز وجذاب، عدلت شعرها الاسود الطويل وشالت گذلتها بماشة صغيرة ليوره وسوتلها بف بمقدمة شعرها..

-صبا: تخبلين

-مسرة: والفستان؟

-يجنن هو بس الچنتي لابسته احلى بهواي

-ميخالف شسوي الريحة قاتلة

هزيت راسي موافقتها وقررت احچيلها الشفته من تخلص اجتماع حتى متنخبص وتتوتر، طلعت قبلها اشيل ملفاتها واروح لغرفة الاجتماعات، طرقت الباب قبل لا افوت وشفت گاعدين ثمان زلم وولا مرة موجودة..

وگفت لثواني متفاجأة گالو هو واحد شلون صاروا ثمانية؟ زائد احنه ممتعودات نتعامل ويه الرجال بشكل مباشر عادةً عمو فادي يتواجد او يجي واحد من المدراء بس هالمرة مسرة وحدها ويه ذولة الشلة الصاكة جداً..

سلمت بهدوء وردولي التحية وگعدت على الكرسي انتظر مسرة توصل، شفت البعض منهم متململ بمكانه يمكن تأخرنا بس مو هواي مرت فقط عشرة دقايق..

باوعت بالوجوه ادرسها بجانبي ثنين زلم شعرهم ولحيتهم اشقر فاتح توقعتهم اجانب بس طلعو لبنانيين، بصفهم گاعد ابو عيون المجرورة نشوان يقلب بالاوراق الگدامه وبجانبه گاعد واحد عاگد النونة وجهه ميگصه السيف عرفت اسمه مروان وبصفه فاضل..

ومقابيلي گاعدين ثنين كبار بالعمر مشيبين واخيراً وقعت انظاري على الي گاعد بصف كرسي مسرة بالضبط واحد شعره لونه عسلي كثيف يخبل يوصل لرقبته تقريباً بي ردة بسيطة ومبعثر منطي جاذبية خاصة، سافرت عيوني عليه اول ما دخلت شكله هادئ وگاعد بسكون..

انتظرنا دقايق قليلة ودخلت حبيبة گلبي المُزة، الغرفة هادئة مينسمع غير طرقة كعبها الحاد ذو 12 سنمتر بالأرضية، متبعثر شعرها على اكتافها بحركة مشاكسة و عيونها الواسعة المتكحلة تسولف عن جرأتها وثقتها بنفسها وكأنها تگول اني وبس!

وگفوا كلهم احتراماً الها بدون استثناء، حركت راسها حركة بسيطة فسرتها تفضلوا وفعلاً الكل گعد وراها يفتحون بجاكيت بدلاتهم الرسمية.. شابكت ايديها المزينة بخواتم ذهبية وسندتها على الطاولة الكبيرة، اخيراً ابتسمت بهدوء ونطقت..

-مسرة: اهلاً وسهلاً جميعاً

حچت بالعربي متأكدة كونهم عرب، بادلو التحيات وبدوا الاجتماع بصوت هادئ بالبداية بعدين بدت تعلى الموجة من ظهروا العمل المطلوب على الشاشة الي گدام وگام نشوان يشرح عنه..

مسرة چانت مو سعيدة لسبب ما، ماعرف شنو هو بالضبط العمل ممتاز والفكرة عبقرية وعرض نشوان كامل مابي اغلاط، محد انتبه لوضعها غيري اني حافظتها چانت تباوع لابو شعر الحلو شُهيب بأنزعاج واضح جداً..

مديت نفسي اسوي روحي دا اكتب شي لكن عيوني الفضولية راحت عليه، هو ما منتبه الها مركز ويه نشوان وبيده قلم يلعب بي بأنامله، بلحظة اللتفت عليها كأن ديشوف رأيها شنو بشغلهم وهي جاوبته بملامح باردة مطنگرة..

تغيرت ملامحه ولاحظت عگدة بسيطة صارت بحاجبه، تحركت تفاحة ادم برقبته دليل بلع ريگ ودار جسمه كله عليها مركز انظاره بيها يريد يعرف سبب ضوجتها بينما هي قابلته برفع حاجب وعيون خاوية خالية من المعاني..

لوما المستثمرين منتبهين ويه نشوان چان لاحظوا النفور الي عند مسرة لـ شُهيب، واضح ما بالعته توقعت راح يطنگر بوجهها نفس ما هي تسوي بس كان العكس ابتسم بهدوء وگام ياخذ مكان نشوان ويكمل شرح المشروع..

طوّل هذا الاجتماع بي هوايه تفاصيل والمستثمرين هوايه يتسألون وحقهم هذا، شُهيب چان يجاوبهم بهدوء وبدون ملل بينما مسرة ما فتحت حلگها بشي طول گعدتنا..

اخيراً كملنا والكل رجع بمكانه، توجهت الانظار عليها منتظرين كلمة منها سكتت لثواني تقره الاوراق الي گدامها، عيون مروان اكلتها اكل گاعد على اعصابه حسيته شوية ويلطشها براشدي..

-مسرة: شكراً مسيو نشوان على هذا الشرح الدقيق ابهرتنا

ابتسم نشوان بفرحة منتشي من كلماتها وعيونه تسولف الفخر، بينما حلوتنا دارت طرف عيونها على شُهيب وگالت بصوت بارد..

-شكراً

حرك راسه بأيماءة بسيطة بدون لا يجاوب بينما بقية الرجال بدوا يتناقشون وياها وهي تستمعلهم، بعدت بعض الشعرات الي تطايرت على وجهها بأناملها الناعمة وجاوبت بهدوء وثقة عالية..

-مسرة: المبلغ يتضمن كلشي، جميع التكاليف يتم دفعها على شكل دفعتين وهالشي استثناء لحضراتكم، ومسيو اشهب وضح على مواد الـ....

عگد حاجبه بينما هي تحچي وحتى الرجال انتبهوا لچفصتها وهي تصيح لـ شُهيب "اشهب" بس غلسوا، يبوووو مسرة عدها مشكلة حقيقية بحفظ الاسماء تحفظ كلشي وتلقط كلشي وذكية ونبهه الا اسم الشخص متحفظة بسهولة لو تموت روحها.. هو اني صديقتها واخذت فترة طويلة ياله حفظتني..

ظلوا الزلم يناقشوها بينما مروان ونشوان بصعوبة سيطروا على ابتسامتهم خصوصاً من مسرة اردفت بثقة ردت اطم روحي من وراهه..

-مسرة: لا اكيد، شهاب كلامه واضح ميحتاج نكرر من جديد..

عزززا انوب سوته شهاب بينت على ملامحه الساكنة شوية انزعاج بس هم غلس، وقضت الاجتماع كللله تصيحله لو شهاب لو اشهب اسم "شُهيب" ما ذكرته نهااائياً حسيت بالاحراج الشديد واني اشوف نشوان يضحك بهدوء وفاضل گام من مكانه ممتحمل يبقى گاعد اكثر..

بينما شُهيب بقى يباوعلها بنظرات ما مفهومة وهي بكل ثقة تباوعله وتكمل كلامها وذولة الزلم صارت عليهم لوصة شهاب منو؟ اشهب منو؟ شُهيب منو؟؟ كلهم نفس الشخص لو شنوو؟؟

كملوا الاجتماع واگدر اشوف علامات الاستفهام على رؤوس الرجال الگاعدين بينما حلوتنا لااا واثقة من نفسها بشكل خلى شُهيب بس صافن عليها حتى ما حاول يعدل اسمه بحلگها تمنيته يهمسلها بشي لو بس ينبهها بس هو ابدد كلشيي ماكو جماد صخرة وگاعد..

توادعوا بمصافحة في اليد وتفرقوا بقينا بس جماعة شركتنا، اخيراً نشوان گال وهو فااطس ضحك بالمعنى الحرفي..

-نشوان: مس مسرة

-مسرة: تفضل

-نشوان: اسمه شُهيب وليس اشهب

-مسرة: منو؟

-شُهيب: اني

نبرته هادئة مابيها عصبية او نرفزة ابتسمت معجبة بأسلوبه من كال بنفس الهدوء..

-شُهيب: صار لازم افهمهم اني نفسي اشهب التحچين بي

-مسرة: اسمك شُهيب؟

-شُهيب: نعم

-مسرة: معلومة لطيفة غير مهمة ابداً

انصدمت! شبيها مسرة ليش هيچ دتعامل هذا الرجال اللطيف توقعته يردها بس انقهرت زايد من ما ابدى ردة فعل غير نظرلها لثواني وترك المكان يطلع بنفس الهدوء تارك خلفه هوسة من التساؤلات من قبل الجميع..

-نشوان: اءء.. آنسة مسرة انتِ.. انتِ بخير؟

هزت راسها بـ اي وطلعت من الغرفة، رحت اللحگها اشوفها تمشي وكعبها العالي يطرق بالارضية بقوة دليل عصبيتها، مشيت وياهه كتف بكتف الى ان وصلنا لمكتبها، انداريت عليها متسائلة..

-صبا: شبيچ مسرة

-مسرة: ما طايقة هذا البني ادم

-ليييش؟؟

بدون كلام مدتلي موبايلها طلعتلي الرسائل النصية ويه واحد مسميته "اشهب ابو شعر الحلو" وقعت انظاري على كلمة صفنتني..

-صبا: كاتبلچ احبچ؟؟؟

-اي

-وهذا القلب الاحمر هم الچ؟؟

-مسرة: اي

-صدگ هاي لو اني عيوني تزوغل؟

-صدگ

-شبسرعة!

حركت اكتافها بـ "مادري" وملامحها مزعوجة كلش، زفرت نفس وذبيت الموبايل من ايدي..

-معقولة حبچ بهالسرعة؟ هذا صاحي معقولة؟

-لا مو صاحي واحد منحرف منحط ساقط سافل عباله خفيفة ومطربگة وراح اقبل واركض وراه!

-شدعوة شدعوة ههههه

-صبا هالنماذج اعرفهم زين وانتِ هم تعرفيهم همهم واحد وتركض عيونهم وره شي واحد بس وهو..

سكتت تگلب عيونها بملل وقرف بنفس الوقت، حركت راسي اوافقها وصلت الفكرة شبعنا من هالشكولات..

-مسرة: تتذكرين براندن دستوكفيكسي؟

-صبا: ايععع لتذكريني بهذا المنحط! ثالث اجتماع وبده يتحارش بينا

-الله ياخذه

-كلهم هيچ حبي ليش مستغربة من اشهب؟ رجال لو مو رجال؟؟

-مو گلنا ابن بلدنا وخوش ادمي بلكت يطلع بي حظ بس طلع زبالة عراقية اصلية

-اممممم هسة عرفت ليش مخليها بغرفتچ

-شنو هي؟

اشرتلها على مكان بزاوية الغرفة صايرة مكتبة معلقة وبيها كم كتاب للديكور وبجانبها كامرا صغيرة متنشاف بسهولة..

-مسرة: هاي كاميرا؟

-صبا: نعم يا اختي نعم

-لا يا فاسق!!

-صحيح

-بدلت هنا صبا بدلت ملابسيي نزعت فستااني!!

-شنسوي بعد خية الفات مات

-الفات مات؟؟ لچ الگاعدين على الكامرات راح يشوفوني؟؟ يشوفوني هيچ هيچچ كما خلقني ربي

تأشر على جسمها واني اهز براسي..

-صبا: تكبرين وتنسين

-لا عيني هالسوالف متمشي عليَّ

نهضت من مكانها تنزل فستانها الي ارتفع من گعدت وتمشت للباب تطلع من المكتب وكالعادة رحت وراهة اعشق تهور مسرة خصوصاً من تعصب او تحط احد براسها الا تخبله..

راحت تسأل الحماية الواگفين قريب البوابة عن غرفة الكامرات جاوبها واحد منهم بلغة البلد..

-غرفة الكامرات موجودة بالطابق الثاني مدام

هزت راسها تتشكره بالاشارات واللتفتت تكمل طريقها فوگ قبل لا يوقفها صوته..

-مدام اذا تحتاجين شي ماكو احد هناك اليوم

-مسرة: شلون

-يجون يوم الثلاثاء فقط ومو كل ثلاثاء، طلب من مسيور شُهيب

-مسرة: همه موظفين هنا شلون يداومون بس يوم ثلاثاء؟

-مو موظفين دائميين مسؤولين يجون فقط لو صار عطل بوحدة من الكامرات

-ويجون كل ثلاثاء يفحصون الكامرات؟

-لا، فقط عندما مسيور شُهيب يبلغهم اكو عطل

-صبا: لحظة هسة انتَ ما فهمتنا شُهيب شمعرفه من يصير عطل بالكامرات؟ هالشي شبه مستحيل ينعرف

-الكامرات بغرفته

وهنا سقط جسر "مسرة راح تتعارك ويه الي اسمه شُهيب شمسون" ورفع راية "مسرة راح تقتل المتسمي شُهيب شمسون!"

شفت الشياطين تنطط بعيونها انفاسها تسارعت وحسيتها راح تنطي للرجال الگدامنا بوكس تكسر سنونه لكنها كالعادة سيطرت على نفسها وانطته ابتسامة خافتة تتشكره وتبتعد مني متوجهة لمادري وين..

-صبا: مسرررة وين

-مسرة: رايحة اذبحه وارجع

-لا مسرة حرامات حلووو

-صبا توخرين عن وجهي لا اطبگچ وياه وتصير كتلتكم واحد فوگ الثاني!

-لا خيولي الزبالة شلون شخصية صفر حاط كامرات بغرفته يبصبص على الموظفات

توجهنا لمكان مكتبه صاير بالطابق الثاني والغريب ان مكانه وحده ابد ماكو مكاتب مجاورة والطابق هدوء تام منسمع غير وقع احذيتنا على الارض..

-صبا: ماعنده سكرتيره؟

-مسرة: يا مدير ماعنده سكرتير؟

-شمدريني باعي ماكو احد

-ميهمني راح افوت فوراً

-لا مسرة مهما يكون احنه كلاس وراقين حتى لو كان الطرف الثاني نفايات احنه بنات عز ولازم نبقى هيج

خزرتني بعيونها التخوف تراجعت عن كلامي بسرعة واشرتلها حتى تروحله والهوا بظهرها، طرقت الباب طرقتين ما اجانه صوته، رجعت تطرق بقوة اكبر وهم ماكو صوت فاجأتني من فتحت الباب تدخل ممهتمة..

اول ما دخلت كفختني ريحة قهوة وكأن الغرفة مو مكتب وبي ملفات واوراق وميز وكراسي لا كأنها غرفة خاصة لطحن وتصنيع القهوة.. ريحة قهوة ممزوجة بعطر رجالي هاااادئ كلش بصعوبة لقطته حاسة شمي الفاشلة..

گاعد هو على كرسي المكتب وبيده اوراق وامامه حاسوب وفنجان قهوة بعده يطلع بخار منه، ينظرلنه بهدوء ولا كأن هسة اقتحمنا عليه المكان ومسرة عيونها تقره نار وشرار، حاولت تلفظ اسمه الي چفصت بي للمرة المليون بهدوء بدون لا تنتر..

-مسرة: اشهب شمسون

همهم بخفة بدون لا يذكرها بأسمه الصحيح، نزل الاوراق من ايده على الميز وحضن كفوفه برسمية..

-مسرة: اشهب شمسون عندك الكامرات الخاصة بالشركة؟

-شُهيب: نعم

-مسرة: ليش؟

سكت يبادلها النظرة بس عود گدرت اكتشف شنو تقره ملامحه؟ لا والله ولا گدرت لان حرفياً ملامح رسمية بأمتياز ماكو ردة فعل ولا حتى تغير بموجة صوته من گال بأختصار..

-هذا نظام عدنا من اول يوم افتتحنا بي الشركة

-مسرة: هالشي غريب وجديد عليَّ عادةً كل شركة بيها غرفة كامرات خاصة يراقبون اذا اكو شي مريب او حركة غلط تصير ويبلغون فوراً، معناها من كلامك الرقابة والامان عدكم صفر هنا

توقعته يتنرفز وره عبارتها الاخيرة لان حچتها بأستهزاء لكن ملامحه؟ ملامحه تصرخ نحن لا نهزم ولا راح نتغير عن هذا الستايل لا حاجب ينرفع ولا فم ينخفظ ولا انف يجنح بعصبية..

-شُهيب: الامن ممتاز عدنا ليدي مسرة

بس؟ بس هذا جوابه لا خوية انتَ متفيد بنيتنا هاي ينرادلها واحد فلفل بارود نار سبايسي يخنگها من تحچي ويمطلها من تجاوبه ويرفس ببطنها يطلع روحها من تعانده لا كلش متفيد انتَ..

دورت عيوني بالمكان اشوف المكتب نازك مابي هوايه تفاصيل كلشي خشبي بلون غامق حتى الكراسي والطاولة الموجودة لونهن بني غامق واخيراً رصدت عيني الشاشات الي صايرة بجانبه على اليمين، ثلاث شاشات كبار مقسمات بمربعات صغار تراقب كل الشركة حرفياً!

ابتسمت منبهرة واو صدگ هذا يراقب كلشي ولاحظته مكبر الشاشة على مكتب من المكاتب يعود لرجال ديحچي بالتلفون ويلعب بسحاب بنطرونه من لاحظني اركز بي فوراً طفاهة..

-مسرة: شلون المدير هو الي يراقب الموظفين؟ هالشي راح يربكهم حتى شغلهم ميعرفون يشتغلو عدل من يكتشفون انتَ الي تراقب الكامرات

-شُهيب: بالحقيقة الكل يعرف اني اراقب الكامرات وهذا سبب عملهم الممتاز

-مسرة: والخصوصية! الخصوصية وين؟

-شُهيب: خصوصية؟

-مسرة: طبعاً المكتب غرفة خاصة للموظف يسوي الي يعجبه بيها ومحد يراقبه بهذا القرب، الكامرات موجودة نعم وشي طبيعي بس محد يفتح على غرفة غرفة يراقب هاا فلان چان يسخت، اووه شوف هذا شلون يلعب بتلفونه، وااو هاي والله بنية فاتت عنده، اووه شنو هاي زوجته اجت تشوفه بله خليني اشوف شنو راح يصير بيناتهم!!

تحچي بعصبية مكتومة اويلي يلسانچ شيلزمه، تلمست ايدها حتى تهدأ بس ما اهتمت نزلت نفسها على المكتب تثبت ايدها عليه وجهها صار قريب منه وكملت بنبرة تحذيرية هادئة..

-هاي الخصوصية الي احچي عنها انتَ مدير وليس جاسوس على الموظفين!

سكت ثواني قبل لا يگوم من مكانه يدگم جاكيت بدلته الرسمية حطيت ايدي على حلگي اداري ابتسامتي لا تطير هيبتنا بس صراحة راحة طوله وقلافته تخخخخبل والفرق بينه وبين مسرة رهييب بطريقة مثيرة، تقدم كم خطوة يطلع من ميز المكتب متوجه علينا، نهضت نفسها مسرة تباوع بأتجاهه رافعة راسها چنهة دگمة گدامه، تقرب عليها بشكل طبيعي بس ليش احنه انقبضت گلوبنا و توترنا من صار مقابيلنا مباشرةً؟

-شُهيب: اني مو جاسوس مدموزيل، كل موظف هنا يعرف الكامرات بغرفتي لسبب شخصي ما احب اطرحه حالياً ومحد ابدى اعتراض من هذا الشي غيرچ

سكت يركز عيونه على وجهها يراقبها عن قرب كأنه ديدور على شي وكمل بنفس الهدوء والنغمة الثابتة..

-لذلك الكل هنا محافظ على خصوصيته ملابسه على جسمه وايده لنفسه سواء اجت حبيبته ام خطيبته او زوجته، ما اسمح بوجود امور غير اخلاقية بشركتي

صفنت على كلامه ومسرة ركزت عيونها عليه وعلى طريقته بالكلام احس روحي جاي اتابع شي مهم وعلى ساعة واحد يكفش الثاني رغم هدوء شُهيب بس مسرة بعيدة كل البعد عن الهدوء..

-مسرة: وعلى أي اساس نصيت هذي القوانين مسيور شهاب؟

-شُهيب: على اساس مبادئي بالحياة

-گتلي مبادئك؟

هز راسه بإيماءة بسيطة يأكد على كلامه، ابتسمت تك خد وجاوبته بنفس نبرته الهادئة..

-مسرة: تريد تقنعني انتَ مسيطر على كلشي بهاي الشركة؟

-نعم

-يعني ما راح يطبلنا احد بسلاح ويحاول يغتالني؟

حچتها بأستهزاء تستفزه والعجيب هو سيطر على نفسه وجاوبها بثقة..

-ما راح يصير هالشي ماطولني موجود

-واذا صار؟

-معناها راح اكون ميت وقتها

حبيتتتتت حبيت حبيت ولكم جيبولي هيچ رجال فوراً حالاً بالاً احتاج هيچ رجال بحياتي، افتهمنا عليه يقصد راح يكون ميت وما موجود باليوم الي يجي شخص ويهدد مسرة او يأذيها بداخل شركته وهذا السبب ما راح يگدر يدافعلها ويسندها..

-مسرة: اگدر ادافع عن نفسي شكراً

-ماعندي شك

-نرجع على موضوع الكامرات راح تحل موضوعهن؟

-نعم

-شلون

-شنو يعجبچ انتِ؟

-تكون اكو غرفة خاصة للكامرات

-تمام

-وانتَ متشوف شنو يصير بغرف الموظفين، الممرات مو مهمة بس الغرف لا

-عذريني هاي ماگدر

-وليش؟

-ذكرت السبب شخصي

-لعد.. لعد..

سكتت تفكر بشي صفنت ثواني وگالت بسرعة..

-تكون نفس الكامرات بغرفتي

رفع حاجبه وهاي اول مرة يبدي ردة فعل مغايرة، زم شفته السفلية لداخل فمه يفكر وعيون سرور تنبع مكر كأنها متأكدة ما راح ينطيها هاي الصلاحية، حتى لو چانت شريكة يبقى هو المؤسس وخصوصية شركته تبقى اله..

-شُهيب: تمام

تمام؟؟ لا لا لا هالرجال مو طبيعي عجبني كللش عجبني احب الزلم الجسرين وميخافون، هزت راسها مسرة بعد كلمته وابتعدت خطوة عنه تذب نفس عميق..

-مسرة: اريد احذف شي من الكامرات صار قبل ساعتين تقريباً

-شُهيب: وين؟

-بغرفتي

ركز بيها شوية بنظرات متسائلة شفت طيف ابتسامة جانبية مستهزأة ظهرت على ملامحه يبوو خاف هذا باله شطح؟

-مسرة: اني اريد احذفه بنفسي

ابتعد يوگف على جهة بقيت واگفة بصفه اسرق منه نظرات ايده بجيب بنطرونه وشعره ناعم ومرتب كلش غير عن كم خصلة متمردة نازلة على جبينه..

-مسرة: كملت، انتظر تنصبون الشاشات بغرفتي

حرك راسه موافق، اشرتلي حتى نطلع سوه ووقفنا صوته من گال..

-عدنا نظام تفريق بين حياتنا العاطفية والشغل هالشي مفيد لنطاق سير العمل اما غير هذا الشي انتِ حُرة

ما افتهمنا وما اهتمينا طلعنا من المكتب نمشي بالممرات الهادئة جداً، اخذنا المصعد واشوف مسرة صافنة راحت لغير عالم شوية وصاحت بصوت فززني..

-لااااااا مستتتتححححيلللل

-صبا: شكوو

-مسرة: عباله چنت ويه رجااال بغرفتي قبل ساااعتين؟؟؟

-صبا: منو

-اشهب شمسوون!!

-ليش تكولين هيج؟

-لان گال عدنا نظام نفرق بين حياتنا العاطفية والعمل فوراً وره ما گتله اريد احذف الفيديو من الكامرات لا صبا لا لا شنو هاليوم الننحس ما جاي اصدگ لاا عفية

-لا حبي ههه لا ماتوقع ههه اممم اي اتوقع

ضربت رجليها بالارض بقوة ورجعت للمكتب اخذت جنطتها ونوت تطلع من الشركة بكبرها، صح الشركة مو چبيرة ونمنم بس من سياق الحديث اگول "الشركة بكبرها"..

عبرنا الممر شفنا شُهيب واگف يحچي ويه موظفة بالشغل ومسرة تدردم تدردم تدردم تدردم ما سدت حلگها..

-مسرة: شلون راح اكمل شغلي ويه هالمزعج!!

اللتفت بسرعة عليها يباوعلها عززا بس لا سمعها!! صوتها مو عالي بس ليش نظراته عبالك سمعها لان فوراً تعذر من الموظفة وتقرب يوگف مقابيل مسرة الي سألته بدون مقدمات..

-مسرة: شنو قصدك من رسالة البارحة؟!

-شُهيب: ماكو قصد منها

-مسرة: تصرفاتك كلش غريبة ملاحظ نفسك انتَ لو لا!

-شُهيب: لا

-صبا: يمعودين شبيكممم

-شُهيب: اسمحيلنا انسة صبا خلينا نشوف ليش ام كعب ضايجة

-مسرة: اني ام كعععب؟؟؟

-شُهيب: انتِ واضح ما طايقتني لسببٍ ما واني متفهم هذا الشي لكن اتمنى نكون صريحين ويه بعض من البداية ومنخلي فجوات تخرب عملنا

قبل لا تجاوبه شفت فاضل ويه نشوان يجون ونشوان يهرول بأتجاهنا مرتبك ويضحك بتوتر بنفس الوقت..

-نشوان: ها ها سلامات بعدنا اول يوم وصارت عركة هههه فاكهة حياتي ميصير هيچ ههههه

-مسرة: شوف اخووك

-شُهيب: اني شمسوي!

-فاضل: استعيذوا من الشيطان اخواني ما تسوه

-مسرة: هذا حاط كامرات بغرفته يبصبص عليناا

-شُهيب: اني ابصبص عليكم؟؟؟

-مسرة: لعد شنو غايتك من حاط كامرة بغرفتي شهااب!!

-فاضل: لحظة منو شهاب؟

-شُهيب: اني شهاب اني!!

-فاضل: اللهم صل على محمد وآل محمد

-صبا: يمعودين شبيكم اهدوا

-مسرة: انتَ مطروود شهااب

-شُهيب: تطرديني من شركتي؟؟؟

-نشوان: يا جماعة اهدأوا اروحلكم فدوة مس مسرة انتِ مزعوجة من شهاب على الرسالة وحقچ الطبيعي هذا لان السواه كلش مو حلو وعيب

-فاضل: يمعودين معقولة شُهيب صار اسمه شهاب واني اخر من يعلم؟!!

-شُهيب: وللللك نشواان انيي شسووويت

اخيراً طلع صوته عالي ومبين ممفتهم شصاير بس مسرة فاخ گلبها وكيفت من نشوان تدخل ونصفها..

-مسرة: كلش عيب ومو راقي تصرفك شهاب عيب ابني عيب ماما شنو گلب لو رمانة عندك!

-شُهيب: رمانة؟؟؟

-نشوان: مس لا تضوجين منه، اني السويت هذا الشي وادري غلط اسف والله العظيم وروح اني وابويه اسف وما اقصد صدگوني

-شُهيب: شسويت!!!

-فاضل: شمصخم هالمرة نشوان

-نشوان: تره كلشي ما سويت لا تصيرون دراما ثانياً شبيچ مسرة متكيفين واحد مثل شُهيب يحبچ دباعي وجهه لخاطر الله

-شُهيب: شنووو

-مسرة: نعم؟؟

-نشوان: اسف اسف والعباس اسف شوف البخت عود جاي اريد اكحلها عميتها

-مروان: شصاير هنا؟

-نشوان: هاا اهاا اجه مروان وكملت فضيحتي

-شُهيب: فهمنا عاد

-نشوان: اني دزيت الرسالة

ابتسم ابتسامة خجولة من شافنا صافنين عليه كلنا، اردف وهو يحك شعره..

-نشوان: الرسالة من تلفون شُهيب المكتوب بيها اعتذار وكلمة احبچ

-مسرة: انتَ كتبتلي هيچ؟!

-شُهيب: شكتبت؟؟

-نشوان: البارحة اعترفت لمسرة من تلفونك وكتبتلها احبچ

-مسرة: انتَ تحبني؟؟!!

-صبا: انتَ تحب مسرررة؟؟؟

-فاضل: شلحگت يمعووود

-مروان: عود صدگ تحچي؟؟!

-شُهيب: نشوووان انتَ راح تموووت اليوم وربي

-نشوان: ما اقصدها ابداً صدگوني اني ما احبچ.. اقصد احبچ اي بس مو ذيچ الاحبچ يعني اني شلون اگولها احبچ بس ما احبچ احبچ

-مروان: كلشي ما جاي افتهم

-صبا: يقصد ميحبها حب رومانسي وصلت

-نشوان: بالضبط عاش لسانچ حبيبتي صبا

-صبا: حبيبتك؟

-نشوان: العفو العفو ما اقصد بس لساني متعود

-صبا: ليش كم حبيبة عندك ولسانك متعود؟

-نشوان: لا لا مو هيچ بس اختي.. عندي اخت ودائماً اگلها حبيبتي و..

-مسرة: نشوان وصلت الفكرة من اول مرة لا تتوتر صبا بس تحب تضوج الشخص

-نشوان: ليش هيچ صبا مو زوعتينا العافية

-فاضل: والله اني اشوف راح تزوع هواي اليوم لان شُهيب ناويلك نية گشرة والعياذ بالله

-نشوان: هسة شسوووويت

-شُهيب: بعد بعد صيح خاف محد سمع فضيحتنا

-نشوان: ما فضحت والله شبيكم هسة واذا

-مروان: نشوان تعبت نفسيتي من غبائك

-نشوان: الله يسامحك مروان تبقى اخوية الچبير راح اعفو عنك هالمرة

-مسرة: خلص يا جماعة وصلت الفكرة وانتهى الموضوع بس نشوان ما گتلي ليش كتبت هيچي شي؟

-نشوان: چنت ناوي ادز هاي الرسالة لأمه من جهازه بس شُهيب مسجلچ بأسم Ma وامه هم مسجلها بنفس الاسم هو طبعه يكتب اول حرفين من اسم الشخص تحسباً..

-صبا: تحسباً لشنو؟

-نشوان: لا يضيع موبايله او شي من هذا القبيل خاف احد ياخذ الارقام من جهازه وكذا..

الكل وجه انظاره على شُهيب الي مسوي روحه مدا يسمعنا بس حتى ميجاوب عيوننا المتسائلة بس مو مهم هسة المهم من توضحت الفكرة وحسيت مسرة ارتاحت..

-مسرة: يله هسة رضيت عليك وراح ارجعك للشغل شهاب

-شُهيب: شكراً على كرمچ

-مسرة: خطية هم عندك عائلة قطع الاعناق ولا قطع الارزاق شفت شگد حبابة اني؟

-شُهيب: ايييه چنت شايل هم رحم الله والديچ راح اخلي امي تدعيلچ قياماً وقعوداً

-مسرة: حياتي سلملي عليها امانة

ماگدر يلزم ضحكته وبسرعة ترخص يعوفنا هذا بعده ممتعود على خبالات مسرة، تفرق الكل يكمل شغله واحنه هم كملنا كم سالفة بس مسرة چانت مقهورة ومزعوجة رغم محاولاتها البائسة للسيطرة على ملامحها حتى متخرع الموظفين بس اعرف نفسيتها شگد تعبانة وما اللومها كل الديصير وياهة هالفترة صعب عليها وتعبها اخذ ثلثين حيلها وهي بعدها بعز شبابها..

-مسرة: خلينا نطلع صبا تعبانة اريد ارتاح

وافقتها الرأي وتمشينا للبوابة سوه، رن موبايلي بالجنطة وگفت على جهة اشوف منو ديتصل عليَّ وعيوني عليها تهف گدامي وصلت للبوابة الرئيسية ودعها الحماية الواگف بالباب اللتفتت على صوته وبمممم انرطمت بجسد ضخم انضرب راسها بصدره..

-مسرة: لا مستحيل

ركضت عليها اشوفها اشرتلي بيدها مابيه شي وتتلمس جبينها معبسة..

-انتِ بخير آنستي؟

رفعت عيونها عليه واني وياهة نبرة صوته هادئة وصوته رجولي يسحر الواحد وياخذه لغير عالم.. لعالم بي فراشات وحب وقوس قزح وردي وسما تمطر مصاصات..

-مسرة: توجعت شوية بس اني زينة

-اعتذر مرة ثانية الغلط مني دخلت مستعجل

رجل يطلع عمره ببداية الثلاثينات، طوله فارع وشعره بني غامق ولحيته وشواربه كثيفات منطياته عمر اكبر، ملامحه هادئة كلش وملابسه تجنن تجنن لابس كوت رسمي طويل يوصل جوه ركباته ووشاح مربوط على رقبته منطيته مظهر يصرخ اني راقي وكشخة وعطره يهفهف، تحملوني واني اشرح احب التفاصيل جداً..

-مسرة: احس..

قطع كلامها صوت صار ورانه مباشرةً صوت مألوف سمعناه قبل شوية ومسرة شبه تعاركت وياه يگول بجمود..

-شُهيب: مالك!

لاحظت صدمة وجمود مسرة المفاجئ، تقربت منها اللزم ايدها عبارة عن قالب ثلج حسيت بأضطراب انفاسها ورجفتها، انسحبت توگف على جهة من شافت مالك يتقدم من شُهيب بعدما اهدى مسرة أبتسامة اعتذار.. هزت راسها تردها اله وطلعنا من الشركة وهي تگول..

-مسرة: صبا هذا زوجي

-صبا: شنو؟؟

-مسرة: هذا زوجي المستقبلي حسب خطتنا، اني راح اكون زوجة مالك شمسون.....

يتبع.....

━━━━━━  ━━━━━━

انلاصت ☺️💋

احب من اشوفكم تشابكون ثنائيات ويه بعض ومقررين خلص فلان لفلانة وانتهى الموضوع ومُصرين يعني.. يلااا عود نشوف 😁🙈

خنشووف توقعاتكممممم 🫦🔥