رواية ابناء الحسوم "شمسون" الفصل السابع عشر 17 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

بس المحترگ يفهم حچي الدخان....! 🔥

━━━━━━  ━━━━━━

-شُهيب: الاطلس!!

-الاطلس: شُهيب ابن شمسون العار

-شُهيب: شتسوي هنا؟

-الاطلس: والله مادري هاي جيتي من المطار واتصلوا بيه گالو اكو واحد ابن كلب صاير وكح وذابي بالسجن تعال طلعه

-شُهيب: تفوووو عليك

جفلنا من حركته الغريبة بينما الاطلس مسح وجهه وگال ببساطة..

-الأطلس: اني الاشوق حبيبي

-شُهيب: ليش اجيت وتزحمت؟

-الاطلس: ما سويت الا الواجب

-شُهيب: دائماً سباق بالخير

-الاطلس: يجوز بسبب نسلي الطاهر؟

-شُهيب: يجوز

-نشوان: راح تطلعونا مناا لو تردون تخيسونا زايدد؟؟

-الاطلس: نطلعكم الشرطة لعبت نفسها من هالوجوه

گلب عيونه شُهيب يطلع بعدما وقع على تعهد واحنه وراه، شفنا زلم ثنين تابعين للاطلس من خلالهم طلعنا علما وصل الاطلس حتى ياخذنا وياه..

بعدنا بباب المركز وتلاگينه ويه رجال ديفوت ورجع كم خطوة للخلف من شاف شُهيب..

-الرجال: انتَ شُهيب شمسون؟

-شُهيب: اي، تعرفني؟

-شلون طلعت سيدي؟

-شُهيب: انتَ منو؟

ابتسم وتعذر من عدنا بدون لا يعرف عن هويته خلى وراح يركب سيارته، تبعته بعيوني شايف وجهه من قبل يتردد احياناً لشركتنا يشوف مسرة بس ما خطر ببالي ولا واحد بالمية هي دازته حتى يطلعنا منا..

-الاطلس: امشو لذيچ السيارة

تقربنا لسيارة سودة چبيرة مظللة فتحلنا السايق الباب ضحك شُهيب مستهزأ وگال..

-شُهيب: حياة الطبقة المخملية

-علي: الطبقة القندرية قصدك؟؟

-نشوان: عليووووي

-علي: شوشووووو

-عمر: اهوووو هم نشوان الخ***

-نشوان: عميررررر

-عمر: ما بطلت هالدراما الزايدة؟

-نشوان: عمييييررر

-عمر: كافي افتهمناا لحيت

-نشوان: عميييرررر

-عمر: شوووشووووو

ضحكنا ثلاثتنا وتحاضننا حضن حار، بوست كل واحد على خده اليصرخ ثراء وعمر يدردم معاجبه..

-نشوان: توأمييي اللذييذ

-علي: بعد چبدي وچبد امي الله يرحمها

-نشوان: امكم ماتت؟؟؟؟

-عمر: لا ولك بس صار دهر ما شايفيها

-الاطلس: شگد چذابين البارحة عمتي چانت ببيتنا وانتو موجودين

-عمر: مو لساننا اخذ نحتاج فترة حتى نتعود على رجوعها

-نشوان: فاكهة حياتي مشتاقلكم

-علي: مشمش گلبي مو بگدي

-عمر: تفاح ريتي شمسوين بيك عمت عيني

-نشوان: اي بعلي جاي تشوفون؟ كله من وره فاهد العار

-علي: كلللب ابن سطعششش كلب

-عمر: واخو كلااب

-شُهيب: تسلم عمر

-عمر: ولوو بالخدمة

-علي بحماس: نشوان سولفيلي كل التفاصيل هم عذبوكم بالسجن؟؟

-نشوان: ولك لا حراماات كلشي ما سوولنا اصلاً ضاجو من عدنا گاعدين على نار بس يردون احد يجي يكفلنا تصدگ من طلعنا شفت شرطي يهلهل ويرجف اصبعتين؟

-عمر: حرامات شفت عليوي! مو گتلك لا تطلعهم ما نستفاد ماكو شي سبايسي ويونس

-نشوان بهمس: بس شُهيب توحش هناك

-علي: چذذذذب

-نشوان: صوتتك اشتعلت روحك لو تريد كتلتنا تصير جماعي هنا

-علي بهمس: چذذذب

-وعلي لزم مروان وصارتلكم حرب البسوس

-الاطلس: راح تبقون تلغون هنا؟

-عمر: امشي بالسيارة كمللنا الصار

ركبنا وياهم الطريق كله اني والتوأم نسولف والباقين على الصامت..

-علي: يعني ما صارحتها؟؟ اشتعل عرضك نشواان

-نشوان: انچب واكل نفسك تشعل بعرضي شكو

-عمر: عاار اخو عاار مو گتلنا اعترفت وراح تعرس؟؟ ليش تظل تاكل **** وتچذب علينا!

-نشوان: يا بعد چبدي جايين علمود عرسيي

-عمر: اي ردنا نشوف مرتك الحاتة

سمطته براشدي خنس يضحك بالسكتة الحقير ابن الكـ... لا الله يرحمه ابوهم چان خوش زلمة ميصير اغلط عليه..

-نشوان: لعد همزين من لغيت العرس قبل لا عيونكم النگسة تشوفها

-علي: هي ضربته بوري وبعده يسولف بالعرس

-نشوان: ولكم طلعت تحب واني ماعرف شفتها ويه حبيبها بمشهد فاسق

-عمر: وينه فاضل والعياذ بالله؟؟؟

-نشوان: سولفتله وحصنني وحصن عيوني من النظرات الفاحشة حتى لا تنخدش روحي البريئة

-علي: اهم شي روحك البريئة شوشو

-عمر: اي بعلي نخاف عليك فاكهة حياتي

-علي: يله چا احنه شكو باقين هنا اطلس خلينا نرجع

-الاطلس: منو گال جايين علمود عرس نشوان؟ بابا عدنا شغل هنا خاف نسيتو

-عمر: ميهمني اريد ارجع

-نشوان بغمزة: حتى تشوف الحب مو

-علي بهمس: يا حب ولك تزوجت

-نشوان: لاااااااااا يبوووووووووو على حظككك عميررر

-علي: فد حظ نعل وقنادر مگطعة ما شايف هيچ بخت بحياتي والزهرة

-عمر: كافي بلا لغوة

-علي: وداخل اخيك بأكتأب ينرادله فد حفلة مرتبة يطلعه منه

-نشوان: اجيتو بالوقت المناسب وللشخص المناسب

-علي: متشوفني جبته وياي وجه البطة چنه برميل حزين

-نشوان: اخذكم لمكان يلوگ لهلوجوه

-علي: اني ماروح اخذ عمر وياك

-نشوان: هاي شعجب!

-علي: احم.. احم يعني.. احم

-نشوان: لاااااا عليك الله؟؟؟

-علي: اي احم احم

-نشوان: هو عليمن تجاوبني اي شفهمت اني

-عمر: الحب ما تقبل يفوت لهيچ اماكن بعد

-نشوان: الحب؟؟ منو الحب؟؟ ولك علي ارتبطت انتَ!! يا نااااااااااس اني ويني من هاي الاحداث المثيررررة

-مروان: نشوان انتَ ما گاعد ببيتك شبيك تصيح!

-نشوان: اشعر بالخياااانة

-علي: خرب ولك ما صار شي بس خطوبة

-نشوان: خطبت وتگول ما صار شي؟؟؟ حبيبي شوكت ناوي تگلي من يجيك الطفل الاول!!؟

-علي: اهوووو كله من وراك عمير مو گتلك خلينه نخابر شوشو ونگله

-عمر: اني شيخصني انتَ ما گلت لبشر تخاف من الحسد

-نشوان: تخاف من الحسد ليش يابه؟؟ المن ماخذ بنت الباشاا

-علي: انچب ما أسمحلك هي اشرف من بنت الباشاا

-نشوان: اطربنا منو هي؟

-عمر: محجبة

-نشوان: احااااااا صيح احااااااا

-عمر: وتقطر شرف وعفة

-نشوان: لا لا لا لا لا لا لا لا لا لا لا لاااااااا

-عمر: ومؤددبة وخجوولة ومتربااية ومحتشممة

-شُهيب: يمعودين شوية شوية على گلوبنا

-نشوان: صدمة ما بعدها صدمة!! علي يتزووج من وحدة شريفة؟؟ ما جاي اصدگ والله ما جاي اصدگ

-علي: ليش يابة اشايفني يهودي؟؟

-نشوان: اضرب من اليهودي ابو العارضات السبايسيي

-علي: وروحها لامي كلشي ما مسوي وياهن بس اصور

-الاطلس: هم حلف بروح عمتي انتَ شبيك!

-علي: اسف انسى والله.. يا شوف عمير هاي امنا المرحومة جاي تتصل

جاوب اتصالها وبلغها هو ويانه سلمنا عليها سريع وسده يكمل سالفته، وصلنا لبيتنا أصريت عليهم ينزلون ما شبعت من التوأم وهمه هم ايدوا الفكرة وعلي دگ رجل الا يبات هنا..

-الاطلس: مو حاجزين فندق شبيكم انتو

-عمر: روح للفندق مالتك اريد ابقى هنا ويه شوشو

-نشوان: دعوفنا يا اخي هو بالسنة حسنة نتشاوف

-علي: اخر مرة تشاوفنا من گلنالك الاطلس تزوج غصباً عليه

طگينا ضحك كلنا حتى شُهيب المطنگر عدى الاطلس مكشول وگالب وجهه ما عاجبه..

-علي: فاتتك هواي احداث سبايسي نشوان تطگ بالگاع

-عمر: چنت أزوده بالاحداث لتخاف

-نشوان: بس يختلف الوضع لو چنت وياكم

-علي: للمرة الالف گتلك تعال عيش يمنا شعندك هنا

-نشوان: واعوف اخواني وماريا؟ تحلموون

-عمر: اگلك شو كلشي ما قدمتولنا شنو جايبينا هنا تذلونا

-نشوان: اجيبلك سم لو زحير اختارو بيناتهن؟

-علي: أي شي يخلينا نهضم حموضتك

رحت للمطبخ اجيبلهم عصير ودخل مروان سابح ومرتب نفسه متضايق وكلش مزعوج..

-مروان: هاي شكو هنا؟!

-نشوان: شنو

-مروان: شكو جاي هذا هنا! اني مو گتلك لا هو ولا صديقه المغرور يدخلون بيتنا!

ذبيت نفس طالعة روحي اني من گلت انلاصت وانبعرت اعنيها! مروان يشوف دم سنونه ولا يشوف الاطلس..

-نشوان: مروان البيت مو الك وحدك وذولة اصدقائي همه الطابين واحنه الطالعين

-مروان: ما اختلفنا التوأم خوش ولد واصدقائك بس الاسباني ما يفوت بيتي افتهمت لو لا!!

-نشوان: انتَ بس تغار منه هههههه

-مروان: اغار؟؟ على شنوو يابة؟؟

-نشوان: لانه زنگين من يوم يومك متحب الزناگين وعندك فوبيا منهم

-مروان: لانهم مغرورين واتخبل من الانسان المغرور اني!

-ماكو مرة الاطلس انغر علينا بالعكس كومة ساعدنا لو نسيت وحاب أذكرك؟؟!

-ما اختلفنا بس ماطوله صديق شُهيب معناها همه نفس الطينة!

-روح نام مروان وارتاح راح يباتون هنا اليوم كلهم وبضيافتي

-ما جاي اصدگ تركيبتك ليش تحب تباوع للاعلى منك؟ ليش تباوع فووگ دائماً؟؟ نهايتك رگبتك تنكسرر نشواان

-تفكيرك مريض لا تعامل الناس على اساس حساباتهم البنكية عاملهم بأخلاقك وعفويتك وصدگني راح تلاقي نفس التعامل من الطرف المقابل

هاي مشكلة مروان الاساسية ميحب يوسع علاقاته ويخاف يجازف بقلبه حتى ويه الاصدقاء يخاف من الخذلان..

رجعت للولد سوالف وضحك من طرفنا فقط شُهيب اكثر من مرة راد يرجع لبيته ونچلب بي، الگعدة كلها هادئ ما شارك بحديث الا بكلمات بسيطة باردة..

-نشوان: سولفولي شلون عرفتو احنه بالتوقيف؟

-الاطلس: واحد من جماعة اخو شُهيب اتصل بيه يبلغني

-شُهيب: منو منهم؟

-الاطلس: الما نگول اسمه

-عمر، علي، نشوان، شُهيب: مالك؟

-الاطلس: اااخ گب عندي الجالي

-عمر: ليش ما طلعكم هو ليش طلب من شخص ثاني؟

-شُهيب: ابوية ميعوفه بحاله

-علي: والله وطلع وفي

-الاطلس: مثل الچلاب اي

-شُهيب: غيروا الموضوع الاطلس راح ينفجر من الضغط

-الاطلس: انضغط من مالك شمسون؟؟؟ ليش يابة ليييش شنو عنده اني ماعندددي؟؟؟

-شُهيب: عنده اني

-الاطلس: خ** عليك وعليه

-شُهيب: قزرقط شنو هالغيرة المفرطة

-الاطلس: هم گال تغاااار

-عمر: يمعوودين مو وكت هالسوالف هسة مو متونسين وگاعدين نسولف

-نشوان: صح بس اوگفو.. كيان ما تجاوب على موبايلها شُهيب

-شُهيب: اكيد نايمة ببيت امي عوفها

وهذا الي توقعته يمكن عبالها مروان طالع واني ببيت اصدقائي وأيست وراحت عند ماريا والوقت متأخر مو مال نگعد ام شُهيب من النوم نسأل عن كيان بس ياريتني سويتها ياريتني اتصلت وعرفت وين اختي ولا هالمصيبة الي وگعت على روسنا..

عبرت الاربعة الفجر واحنه ناسين الوقت الولد گالو ينامون بالصالة بس الاطلس انطيناه غرفتي حتى يرتاح ماقبل وگال يبقى ويانه بس علاقتي وياه مو كلش قوية نفس التوأم واستحي منه يا اخي شخصيته وجاذبيته غصب تفشلني..

-نشوان: شُهيب وين رايح؟

-شُهيب: ارجع للبيت

-گتلك ابقى هنا شبيك ليش تعاند

-ما مرتاح اريد اغير ملابسي وانام بفراشي

-ملابسي ما مناسباتك؟

-لا مو هيچ بس..

-شُهيب اني اعرف مو انتَ الدزيت الزلم حتى يكتلون مروان

رفع نظراته يباوعلي شكله مقهور وتايه وجاي اللاحظ هذا الشي وماحبيت اشوفه بهذا الوضع واني متأكد مية بالمية مو هو الي دز الزلم اعرف شُهيب واثق بي اكثر من روحي واعرفه يفدينا بروحه ومستحيل يأذينا بأي شكل من الاشكال..

-شُهيب: ماعرف شلون صار هيچ

-نشوان: انتَ شاك بأحد؟

-اي

-منو؟

-ماگدر اگول الا اتأكد بس نشوان اريدك تعرف انتَ وكيان وحتى مروان مهما صار ومهما جرى بيناتنا تبقون اخواني وأحبكم مستحيل اسمح لبشر يأذيكم او يبتزني بيكم اريدك تعرف بهذا الشي وتثق بيه

-نشوان: اثق بيك

رقت ملامحه وهالشي مو هوايه اشوفه عند شُهيب تنفسه صار سريع وبلحظة سريعة جرني يحضني بقوة ويمسح على راسي ويبوسه..

-نشوان: الله

-شُهيب: اسكت

-احب من تحضني

-گلت اسكت

-احب هاي الرومانسية

دفعني وانطاني راشدي خفيف ضحكت اللزم خدي وهو ابتسم ويايه احب اغيضه واخجله مو بيدي..

-شُهيب: رايح اني انتبه للولد ولا تخلي الاطلس ومروان يتعاركون

-لو تبقى شُهيب تكون حاجز بيناتهم

-مروان يكره الاطلس بسببي ماعنده مشكلة شخصية وياه لا تخاف

هزيت راسي اتفق وودعته يروح لبيته ورجعت اني لگيت عمر وعلي ما نايمين وفاطسين ضحك على شي بالتلفون، گمزت اصير بنصهم اشوف شكو وزادت الضحكات واني اشوفهم ماخذين حمزة ومسلم والاطلس محتوى...

الصبح تأخرنا بالگعدة اتصلت بـ شُهيب ابلغه اريد اجازة ماگدر اداوم جسمي يوجعني بيّنت عليَّ آثار العركة، سويت ريوگ واكلت ويه الولد الاطلس ما موجود طالع من وكت..

-عمر: هالزلمة ولا يعرف ينام تلگي ما نايم بس ساعتين وطلع من الغبشة

-علي: حقه يريد يخلص شغله من وكت ما يگدر يفارگها هههههههههاااي

-نشوان: خرب روحك علي عوف الرجال بحاله خلي يعيش شهر العسل

-عمر: شهر النعل قصدك عايش بالضيم اخيّنا عمت عيني

-نشوان: سولفولي كلشي بس قبلها اني طالع اتطمن على ماريا واختي انتو اخذو راحتكم البيت بيتكم

-علي: غصباً عليك البيت بيتنا عود مسوي فضل علينا؟

-عمر: مو اگلك صاير فلا يستحي

-نشوان: يا كلممة ردي مكااانچ يابة اكلو شربو عيشو هنا ماطول مروان طالع

-عمر: مروان يحبنا هو بس يكره طوطي

-نشوان: طوطي منو؟

-علي: الاطلس هههههههههههههه

-نشوان: لا السالفة كلش مبينة حامية شبااب لا تلهوني اشوف البنات وارجععع

-علي: سلملنا على ماريا هووواي مشتاقيلها

طلعت بسرعة قبل لا اللتهي بسالفة سبايسي وانسى كياني وماريتي، سفطت بباب ماريا ونزلت بسرعة فتحتلي الباب وبعيونها النوم تتثاوب وشعرها منكوش..

-نشوان: هلا بماريتي

-ماريا: هلاو شوشو رجعتو من السفر اليوم مو؟

-نشوان: منو گلچ چنه مسافرين؟

-مسرة

-ها اي، اجاچ شُهيب؟

-اي قبل شوية طلع

-اگلچ وينها كيان بس لا بعدها نايمة؟

-لا بالجامعة يمكن

-شعجب اليوم ماعدها محاضرات الصبح، يلا ارجع للولد اني

-يا ولد؟

-التوأم جايين

-يااااااي علاوي وعموري؟؟؟

-اي وسلمو عليج هواي مشتاقيلچ

-حبايبي واني مشتاقة گلبيي

-يلا حب اني اروح انتبهي على نفسچ...

**

"مسرة"
گاعدة بالمكتب غرگانة بالشغل وانطرق الباب، باوعت من الكامرات وابتسمت من شفته نشوان..

-مسرة: تفضل

دخل سلم عليَّ بس مو نفس كل مرة بحماس عذرته واعرف سبب زعله وما اللومه، سألته عن وضعه وشلون دخلو السجن وحچالي مختصر مفيد..

-مسرة: نشوان اني اجيت ردت اطلعكم بس صراحة احچيها وبدون زعل من شفت اخوك حقدت وتذكرت شي سواه بيَّ وما تعاقب عليه چان المفروض اطلعك انتَ ومروان بيومها بس ماعرف ليش أجلت الموضوع لثاني يوم و...

-نشوان: مو مشكلة مسرة عادي اساساً اجو من جماعتنا طلعونا

-مسرة: منو؟

-اصدقائنا همه مو منا خطية من المطار بوجههم للمركز حتى يطلعونا

-لحظة لحظة خليني افهم شغلة.. يعني دتگلي تعرفون الي طلعكم؟

-اي طبعاً بس مافهمت شنو قصدچ بـ "أجلتي الموضوع لثاني يوم"؟

-شوف بيني وبينك الكلام لا توصله لـ شُهيب بس اني دزيت واحد من اليشتغلون عندي يطلعكم

-والله العظيم عرررفت

-يعني اجه؟

-اي اجه بس چنه هستونه طالعين چنت حاس الرجال تابع الچ

-ارجع واحچيها بصراحة ماردت اطلع شُهيب بس ماگدرت احرگ الاخضر بسعر اليابس

-نشوان: اني متأكد شُهيب عنده تبرير وعذر لائق للمشكلة البيناتكم مسرة

-ياريت

ابتسم يودعني اليوم اساساً هو مجاز بقيت صافنة افكر اذا عدهم معارف ليش طلعوهم بوقت متأخر مو رأساً؟ نفضت الافكار من راسي وكملت شغلي باوعت للشاشة شفته موجود بالمكتب مالته گاعد على الكرسي ومدا يسوي شي بس صافن ويدخن..

كبرت الشاشة مال كامرة مكتبه اشوف يمكن الحاسبة مفتوحة بس ماكو الشاشة ظلمة والفايلات الگدامه مسدودة.. انداريت اكمل شغلي واختلس منه نظرات بلكت يتحرك بس ماكو بقى فترة طويلة على هذا الوضع صافن ويدخن غرفته صارت مدخنة من الجگاير..

طلعت اشوف صبا بلكت نطلع فد ساعتين نگضي كم شغلة مأجلة بالشغل بسبب شُهيب شمسون طبعاً، شفتها ويه مروان يمشون بالممر وبيدهم ملف يتناقشون او خليني اگول يتعاركون..

-صبا: خليني اشتغل شبيك انتَ مروان تعبتني

-مروان: فكرتچ تاخذ وقت هواي صبا واحنه وقتنا ضيق

-صبا: شوف اني مشتغلة بأكثر من شركة وكلهم ضخماات ومعروفات مو مثل هاي النمنم وشغلي نفسه ما غيرته وچان ممتاز!

-مسرة: الحمدلله على سلامتك مروان

-مروان: الله يسلمچ ليدي مسرة

-مسرة: ممكن اخذ صبا شوية احتاجها بكم شغلة

-صبا: حبي اخذيني او لا اگلچ خطفيني مرة وحدة بلكت ما ارجع هنا واشوفه بعد

زفر مروان وترخص يعوفنا، لزمت ايدها امشيها وهي مستمرة بالدردمة عليه وصلنا لصالة الشركة ووقف الزمن... لا چذب ما وقف الزمن بس صبا تصنمت وضربتلها دالغة على الرجال الواگف يحچي ويه الحماية بالباب، چان شاب بس مو أي شاب لا اخوان هذا شاااب..

-صبا: اخخخخخ گلبيي

-مسرة: اتفق

-صبا: اخخخ يالركببب

-مسرة: احس استحيت من وجهي

-صبا: اخخخ يا الچلاوووي

-مسرة: يمعودة

-ولچ ااخ اخخخ اااخ ااخخ اخخ اااخخ هذا شنووو لخاطر محمددد

-صوتچ لتفضحينا

نهمس همس وعيوننا الوكحة لزگت اي وحق الله لزگت هسة غير نرمش غير نديرها غير نثگل ونكمل طريقنا بس ابد الصلافة تقره مليوون..

-صبا: ولچ شنو طول شنو جسم شنو اناقة شنو قيافة شنو وجه شنو ملامح شنو عيوون خرب عررضك وعرض امككك على هالحِسننن

-مسرة: استغفر الله استغفر الله استغفر الله

-صبا: مسرة مستحب التأمل في خلق الله

-مسرة: والعياذ بالله من الخبث والخبائث وينه فاضل يحصننا من الفحشاء والمنكر

-صبا: ولچ هذا الفحشاء والمنكر شخصياااً

-مسرة: ديري عيونچ عيب ولچ لا يلگفناا

-صبا: ما اديرهن لا وحق من انزل القران ما اديرهن لو يسلبوني هنا النظرة الاولى حلاال

-مسرة: گبر شگد الخفيفات

درت عيوني اباوع على الباقين معقولة بس احنه بهالخفية؟ بس ارتاحيت من شفت كل الموظفات والموظفين كلهم كلهم بدون استثناء مركزين وياه وماخذيلهم صفنة يمكن بسبب وجوده الغريب او بسبب جماله او يتسائلون عن منو هو خو "نتاليا" صارت تمشي اعوج حتى تشوفه عدل..

-مسرة: باعي نتاليا ولج

-صبا: متفيد مقالبچ ويايه مسرة عود ترديني اشيل عيوني عنه والله فلا اشيلهن

انكتمنا وغصباً ما على الكل كمل طريقه من اللتفت على جهتنا وباوع بأتجاهي..

-صبا: يمة ابووو فاااااضل يابووو فاضل يا بعد گلبيييي

-مسرة: خرب سكتي لا تفضحينا

الوجه جلمود! ملامحه الحزينة مرسومة بعناية سماره بارز مايل للبرونزي والعيون كبار وخضضر وكأنهن فصوص زمرد من تقرب مني وصرنا مقابيل بعض همست بداخلي "سبحان الخالق"..

-بونسوار

-صبا: يا بعد كل البونسوارات بالدنيا

-مسرة: صبا شبيچ اثگلي

همستها واني اقرص كف ايدها بخفة خفت يكون عربي ويفهم ولو ملامحه مو عربية بل مايلة للاسبانية او اللاتينية بس وگف گلبي وگلب صبا الوگع وشفته تدعبل گدامنا من گال..

-اجيت اشوف شُهيب شمسون هو هنا؟

حچى عربي؟ لا ماتوقع لا لا مستحيل يجوز اني سمعت غلط.. لا لا شنو مو عربي ولكم مو عربي ياربي مو عربي ياربي ما سمع شنو گلنا يارب دخيلك يارب استر على عبداتك الخفيفات..

-صبا: انتَ عربي؟

-نعم

-مسرة: وعراقي

-نعم

-صبا: اخخ گلبي

-مسرة بهمس: صبا اصصصص

-صبا: يا بعد الإيأصأصون كلهم

-مسرة: هي تحب تتبع كل حچاية من أي شخص بهاي العبارة "يا بعد (الكلمة) كلهم"

اريد ارگعها اريد اللصمها ماكو صرت اللوص وهذا واگف ابتسامة ما ابتسم، رفع ايده يحك طرف حاجبه وگال..

-اعتذر يمكن جاي اخذ من وقتكم

-مسرة: اجيت تشوف شُهيب؟

رفع تك حاجب مستفهم لأني صحتله "شُهيب" حاف بدون اللقاب، عدلت وگفتي ورجعت لملامحي الجدية وشخصية العمل..

-مسرة: شُهيب بالمكتب منو حضرتك؟

-ممكن اجاوب سؤالچ بسؤال واسأل عن حضرتچ؟

-لا

ابتسم متفاجئ من جوابي، حك طرف حاجبه للمرة الثانية وگال..

-اني الـ...

-الاطلس!

اللتفتت ويه صبا على صوت شُهيب اجه من ورانه، تقدم من عدنا ووگف على جهة يتوسطنا..

-شُهيب: شوكت اجيت؟

-الاطلس: صار خمس دقايق

-شُهيب: ها، خليني اعرف على شريكتي المهندسة مسرة قيثارة، مدموزيل هذا الاطلس

-مسرة: بس الاطلس؟

-شُهيب: مافهمت؟

-مسرة: الاطلس حاف بدون لقب؟

-الاطلس: صدگيني ما احتاج لَقب

ابتسمت على غرور هذا الرجل بس بيني وبينكم لايگله ولاول مرة ما انغث من شخص متكبر..

-شُهيب: الاطلس معروف بأسمع الصريح يصير ابن محمد الادهم وريث مجموعة شركات الاطلس للمجوهرات في الشرق الاوسط

-مسرة: اممم ماعرفته

-الاطلس: شوف الصدفة

-مسرة: صدفة؟

-الاطلس: واني هم ماعرفتچ

كبرت بَسمتي وقابلني هو بأبتسامة جانبية يأشر لـ شُهيب بحواجبه حتى يرحون، نزل راسه بخفة دليل الاحترام وودعني بأدب..

-الاطلس: سعيد بلقائچ آنسة قيثارة، اتمنالچ يوم سعيد

وهيچ تركونا وراحو لمكتب شُهيب، تبعتهم بعيوني وصبا ويايه الى ان اختفوا عن انظارنا..

-صبا: هيهيهيهيهي

-‏مسرة: شبيچ؟

-صبا: ما لابس حلقة هلا ما لابس حلقة هلا ما لابس حلقة هلا هلا هلا هلا هلا هلا هلااااا

تغني بصوت ناصي والكشرة شاگة وجهها، لتخافون متقصد شي بس مادري ليش صبا تتحمس زايد من تشوف رجال مرتب ويكون سنگل، ضحكت على حركاتها واشرتلها نطلع..

**

-الاطلس: اخيراً اللتقيت بمسرة قيثارة العظيمة!

-شُهيب: شفتها

-الاطلس: اي نعم شفتها! يا اخي شنو هالمرة هاي!

-شُهيب: گتلك بس تهمتني بالمبالغة

-الاطلس: تنفض ثقة حبيت شخصيتها رهيبة

-اطلس عوفنا هسة من شخصيتها انطيني حل

-حل لشنو؟

-شلون اقنعها مو اني الدزيت الزلم يكتلوها

-روح گللها مو اني الدزيت الزلم يكتلوكم

-صدگ والله؟

-اي والله

-حبيب گلبي اني گايلك من قبل اضيع من دونك لو ما گايل؟

-ابد ولا مرة گايل بس عادي ادري بهالشي

-الاطلس!!

-شكو

-تره مسرة مو غبيية ولك البنية حاقدة عليَّ حتى من كلتلها صباح الخير اليوم متجاوب تعوفني وتروح!

-شدعوة مكبرة السالفة هسة واذا رادو يكتلوها والله يا الله العالم مادري شلون صايرة

-اطلس مو وكت استهزائك انطيني حل!

-تروحلها وتشرحلها الوضع فهمها بمنطقية وگلها شنو استفاد اذا اموتچ؟ هم انسجن وهم شركتي تصير زبالة مثل صاحبها

-لا تصير نعاال وانطيني حل بي خير يقنع امرأة ناضجة اني ما رايد اقتلها!!

-گلها احبچ

-شنووو

-والله اني اشوف هذا الحل الوحيد حالياً گلها احبچ يا مررة شلون اكتلچ غير امووت وراچ وهيچ فض السالفة

-استغفرالله انتَ معقولة صاحي؟؟ حبيبي هاي هيچ الزواج اثر على عقلك؟؟

-تصدگ حتى اني ملاحظ چان عندي فد سحر خاص يجذب جنس حواء بس مرتي طفته الي وداسته وداست خشمي وياه

-تستاهل السحلة وشرفي

-نرجع لمسرتك هسة شنو راح تسوي؟

-مادري لعد صار كم ساعة شنحچي احنه مو گتلي نلتقي وانطيك حل؟!

-اي بس من شفتها غيرت رأيي

-ليييش

-لانها مو سهلة ولا ثولة وما تمشي عليها سوالف المزعطة

-مو گتلللك

-اي اي گتلي

-هسة شلووون

-وانتَ شبيك ضايج؟ زعلانة عليك؟ خليها تزعل بشنو راح تنضر؟

-اطلس شسالفة شبيك انتَ!

-تعبت منك يا اخي روح دور منو وره هاي السالفة اسأل ابوك القندرة يمكن هو وراهة

-ميخالف فرضاً سألت ابوية وطلع هو وراهة شنو اگول لمسرة؟؟ هاا اسف احنه مافيات ووحوش نكتل بالشارع بدون لا يرفلنا جفن واكبر سلطة متگدرلنا!

-بالضبط هذا الي تگوله

-هيچ تنلاص وتحقد عليَّ وعلى اهلي بالزايد! ماگدر احچي بحقيقتنا واخليها تعرف احنه شنو ومنو هيچ حتى من الشركة تنسحب!

-شُهيب بررلها وانتهى! كون صادق وياهة حط عينك بعينها وگول بنيتي اني ليش اكتلچ؟ ليش انطيني سبب مقنع يخليني اريد اكتلچ؟ گلها انتَ هم متفاجئ حالك من حالها احچيلها مشاعرك الحقيقية وماكو داعي تحچيلها عن تاريخكم الملطم وتطيح حظك بيدك

-واذا ما صدگتني؟

-خلص تعوفها وتثبتلها بمرور الوقت انتَ ماعندك نية سيئة تجاهها عوفها للزمن تنسي وتروح

-بشرف امك تجاوب! مريم زعلانة عليك بررتلها وما اقتنعت هم تعوفها؟؟ تعوفها للزمن تنسى من وحدها؟!!

-اكيد لا! لان اني اعشقق مريم اني احبهاا صورتي مهمة ونظرتها الي اهم!! اكيد ما راح اعوفها للزمن وابقى ابررلها كل يوم وكل ساعة الى ان تسامحني وتصدگني

-لعد شنو اليختلف هسة؟

-چا تجيب مريم لمسرة؟؟! مريم حبيبتي المرة الي اتمنى اكمل حياتي وياهة انتَ مسرة ماعندك مشاعر تجاهها ولا هي تحبك الموضوع ابسط واسهل بهواي

-لاول مرة بحياتي اكون بهيچ موقف واحتار لهدرجة منين اجتني هاي

-بس لا تلومها شُهيب ولا تلوم تعصبها الموقف صعب حتى لو ما سامحتك حتى لو انسحبت من الشركة حتى لو بررتلها الف مرة راح تبقى ثقتها مهزوزة بيك وتخاف وتتحاشاك هذا قتل مو شي هين والروح عزيزة

-اعرف وهذا السبب اني مستقتل اريد اقنعها مو اني السبب ماريدها تهرب وتبتعد عني

-هاا عيوني هاي شنووو

-تره شركاء احنه يومية نتگابل نشتغل وجه بوجه اشوفها اكثر مما اشوف اخواني!

-عود احاول اصدگك

-اني وين وانتَ وين

-هههههه ادري ادري بس الموضوع يحتاجله وقت انطي صبر وكلشي بمرور الزمن يتغير

-اني ليش حظي هيچ منين ما اندار عوجة!!

-اي والله انتَ بحفلة عيد ميلادك متونس وفجأة يجي واحد شايل اسمك يكتل بالعالم.. يا لسخرية القدر...

**

-مسرة: صباوي بس اروح لـ شُهيب وارجعلچ انتظريني بمكتبچ اني اجيچ

-صبا: تمام حب

نويت ارجع للبيت بس تذكرت اجتماع باچر وضروري اني وشُهيب نتفق على سعر حتى منتفشل گدام الزبون، تمشيت للمكتب مالته واخذت نفس عميق قبل لا ادخل قررت بعد ما افتح موضوع الرادوا يكتلونا بالشارع اذا راد هو يبرر من نفسه راح اسمعله واذا ما برر نبقى نشتغل برسمية تامة..

فتحت الباب بدون لا اطرقها وكفخت خشمي ريحة عطر رجالي تدوخ عطست مرتين بالباب تهيجت حساسيتي ماتحمل العطر الثگيل، رفعت عيوني اشوف وتأكدت العطر جاي من هذا الاسباني الگاعد بمكتب شُهيب متأنق وحاط رجل على رجل بغروره الواضح..

-الاطلس: مساء النور الچ كذلك

ابتسمت مجاملة على جملته من العَجلة نسيت ما سلمت ودرعمت فتت بدون لا اعبره، أومئت براسي اردله التحية..

-مسرة: وينه صاحبك؟

اشرلي على باب الحمام وجاوب المكالمة الي اجته، تقدمت اخذلي موقع مقابيله بينما هو مشغول بالحديث ويه مرأة واضح من اسلوبه هي امه بسبب سيل الغزل والكلمات الجميلة الحنونة الغمرها بيهن.. بنص الحديث سأل عن بنية اسمها "مريم" ونبرة صوته كانت قلقة جداً من جواب الطرف الاخر، ضاج وتنرفز وظل يلح بالسؤال عنها.. اخيراً ختم حديثه بـ..

-الاطلس: ماشي.. لا مابيه شي.. مابيه شي حبيبتي.. راح اخذه.. تمام

سد المكالمة وطلع علبة صغيرة من جيبه اخذ منها حبوب وبلعهن دفعة وحدة، رفع عيونه يباوعلي بنفس الملامح القلقة ما تغيرت حتى بعدما سد مكالمته واخذ علاجه..

-الاطلس: المرض بلاء من نوع اخر

-مسرة: اتفق..

گلتها واني اطلع علاجي من جنطتي ذكرني ما اخذته الصبح، طلعت ابرة وضربتها بـ زندي على گعدتي وشربت وراهة العلاج..

-مسرة: سكر.. وانتَ؟

ابتسم بدون لا يجاوب عرفته خجلان من الافصاح عن مرضه فـ غيرت الموضوع فوراً..

-مسرة: وين صار اشهب؟

-قصدچ شُهيب

-نفس الشي

-گتلچ بالحمام

-صارله هواي شديسوي

-والله ماعرف شنو الواحد يسويه بالحمام؟

-هه هه هه

فتح عيونه متفاجئ وضحك بخفة مسح على عيونه وگال بتعب..

-الاطلس: تصرفچ ذكرني بزوجتي

-الله يحفظها

-شكراً

سكتنا شوية وثنينا اللتهينا بتلفوناتنا هو يتصل برقم ومدا يجاوبه وواضح انزعاجه الشديد واني دزيت بعض الرسائل للموظفين ابلغهم عن شغلهم باچر..

ركزت عيني وياه من شمر تلفونه بقسوة على الطاولة عگدت حاجبي مستفهمة تصرفه بس ما برر بكلمات نفخ هوا قوي يمسح على وجهه بقوة، اممم واضح ابو عيون خضر شالع گلبه احد ومبين هالاحد يحبه هواي وتوتره وغضبه وخوفه كله بسبب بنية اسمها على الاغلب "مريم"..

وگف بمكانه يروح يفتح الشباك وشعل جگارة يدخن، كملها واني گاعدة وشُهيب لسه بالحمام!

مليت من الگعدة گمت اوگف وره ميز المكتب ادور بين الملفات عن ملف اوراق الشركة الوهمية الي انطيته بيوم ميلاده بينما راحله الاطلس يطرق الباب على كيف عرف بيه محتاجة صديقه بشي ضروري دليل ما طلعت لسه..

-الاطلس: شُهيب محتاجيك

جاوبه شُهيب بصوت عالي..

-شُهيب: ما جاي يطلع الدم من اظافري انتظر دقايق

دگ الاطلس الباب اقوى يريده يسكت وعيونه عليَّ لا البي يگله اني موجودة ولا البي يگله نصي صوتك لان راح ينفضحون بكل بساطة، رفعت حاجبي متسائلة الدم من وين بالضبط بس ما دام تسائلي هواي من انفتحت الباب وكفخ بخار الحمام بالمكان..

طلع شُهيب عاري الصدر لابس بس بنطرون ولازم خاولي ينشف بي شعره اليقطر..

-شُهيب: انتظرتني هواي مو؟ گتلك روح اني اجيك للفنـ.....

تصنم گاطم حچايته من لقطني بعيونه واگفة ومكتفة ايدي لصدري..

-شُهيب: مسرة قيثارة

-مسرة: ليش كم مسرة تعرف بحياتك شُهيب؟

ابتسم منحرج وغطى جسمه بالمنشفة البيده يستر نفسه ضحكت بگلبي على حركته وعلى ملامحه اذاناته فوراً انصبغت حمرة، خَجله ينافي وبشدة الوشوم المغطية جسمه تفسر شخصية مثيرة مشاكسة..

-الاطلس: احم.. اي.. لطيف

-مسرة: صار ساعة انتظرك تالي طلعت تسبح؟ شمعنى عندك دوش بحمامك وماعندي بحمامي؟ هذا مو حق اطالب بدوش فوراً

بقى ساكت جافل ميحچي شي بس عيونه المدورة تدور بيني وبين الاطلس كأنه ديگوله ليش ما نبهتني بوجودها وطلع تفكيري صح بسبب جواب الاطلس..

-الاطلس: مو دگيت الباب عليك!

-مسرة: شكلك مشغول راح اطلع اخذ راحتك

-شُهيب: لا لا اوگفي

-الاطلس: شُهيب اني رايح لـ.. شسمه هذاك.. اي بعدين..

طلع ينقذ نفسه من هالمشهد الغريب بينما شُهيب هرول للحمام يجيب قميصه ينگط مي مغسول ولبسه على جلده يسد بالدگم..

-مسرة: لتخاف ما راح اسأل ليش اكو دم بأظافرك

بحركة سريعة قبض ايده ثنينهن يضم اصابعه عني، تقربت كم خطوة وكملت..

-ولا ليش سحاب بنطرونك مفتوح

بنفس السرعة نزل نظراته لبنطرونه وسده بسرعة واذاناته ورقبته صايرات دممم..

-شُهيب: لان چنت اسبح

-مسرة: واضح

-ليدي مسرة

-شُهيب المن كتلت هالمرة؟

تقربت اكثر صرت مقابيله ضبط وركزت بوجهه مثل عادتي اتبع القطرات التنزل من خصلاته السرحة للحيته لرقبته..

-مسرة: ما راح تجاوب؟

-بعدچ عبالچ اني ردت اكتلچ؟

-مو مهم، اجيت اگلك على اجتماع باچر اذا طلب تخفيض لتنطي مجال ولتنزل من السعر غير ٢٪؜ لان بالاساس مواد بنائه غالية

-ادري

هزيت راسي وتركته واگف وصلت للباب دا افتحها وهرول بأتجاهي يطبگها ويثبت ايده عليها وعليَّ يعيق حركتي..

-شبيك؟

-انتظري ثواني

تنهد يذب نفس متعب بعدت عيوني عنه توترت من قربنا ايد ساندها على الباب وايد بصف جسمي مسنودة على الحايط واني صايرة بنصهن، دفعته بأصبعي من صدره حتى يحررني من بين ايديه انتبه على نفسه ونزل ايد وحدة بس..

-شُهيب: اريد نحچي بس عقلي مشوش وبالي مو وياي

-ويامن بالك؟

-وياچ

اءء.. حرفياً بس اءءء بعقلي هسة لا فكرة ولا سالفة ولا موضوع انسطرت وبس الـ اءءء تتترجم الي بداخلي..

-شُهيب: عقلي وياچ وجاي افكر بيچ البارحة عيني ما غمضت بسبب الصار بيناتنا

-بالسجن؟

-اي و كلش مزعوج من هروبچ مني اليوم كله!

-يا روحي

دفعته من صدره بقوة اوخره حتى اتحرك ورجع قيّد حركتي بتملك يسحبني من ايدي يقربني على جسمه لدرجة انفاسه ضربت وجهي ونتر بيه بعصبية ما اشوفها هواي..

-مسرة لا تستهزأين اني اعني كل كلمة لا تلعبين بأعصابي!

-شتريد؟ خلصت على غريمك ورجعت عليَّ؟!

-شنو جاي تحچين انتِ!!

-وخر ايدك المدماية عني شُهيب!

-لازم نتناقش ضروري بس الوقت مو مناسب هسة انطيني فرصة ابررلچ الموضوع صدگيني اني ما ردت اكتلچ!!

-وشوكت يكون الوقت مناسب حبيبي؟؟

-من اللگه اختي!!!

-اختك؟

-كيان مفقودة وگلبت الدنياا عليها ما جاي اللگاها راح اتخخبل

-مفقودة؟؟....

**

"كيان"
گاعدة بالگاع منتچية على باب الغرفة ودموعي تجري، احس روحي راح تطلع والله گلبي خلص وماتحمل بعد اعرف غلطت من وثقت بـ ثامر واعرف غلطت من صادقت بنات سوء بس ماتوقعت راح توصل المواصيل لهنا وحالي ذبني بغرفة اكثر رجل اكرهه بهاي الدنيا غرفة فاهد!!

صارلي يوم كامل هنا محبوسة بهاي الغرفة المنحوسة يروح ويجي عليَّ يشمرلي صينية اكل ويطلع وبالطبة والطلعة اتعارك وياه واتوسل يرجعني لاهلي لحدما اخر مرة بزع مني وحط مسدس براسي..

-فاهد: سكتتتي لا تخليني اكتتللچ بعد مااا اتحمل صوووتچ

-كيان: رججعني لاخوووانيي

-فاهد: اشتغلو اخوانچ ال****** ولد ال******

ونزل سيل من الفشار على مسبات على غلط ويحچيها بقلب غاضب ولسان حاقد وكأنه محمل على اخواني ومستعد يشوف دم سنونه ولا يشوفهم او يسمع سيرتهم..

طلع من الغرفة يقفلها وراه ضربت بالباب اصيح واغلط واسبه واسب اهله لحدما تعبت انهد حيلي صرت انوح بمكاني ومتوقعة موتي بأي دقيقة.. مر الوقت بططيء كتل روحي وشكو امل بيه دموعي نشفت وگمت افتر بالغرفة راح اتخبل..

ماعرف كم ساعة مرت قبل لا ينفتح الباب عليَّ مرة ثانية وصار بوجهي هارون..

-هارون: گومي

-كيان: وين ماخذني

ما جاوب جرني من ايدي يمشيني ووراه يمشون خمس زلم صرت ارجف من شمرني بنص الصالة والزلم تورشعوني من كل جهة ونظراتهم الوصخة تاكل بيَّ، وجه سلاحه بوجهي وگال وعيونه تتگلب ووجهه متعرق..

-هارون: راح تصيرين حبابة وتجاوبيني ويامن تشتغلين قبل لا يشتغلون بيچ

-كيان: ماا اشتغغغل ويه احددد والله العظيم مااا مسويه شيي

-هارون: احچيي خلصيييني

-ماعرف شنو اگول

-ويامن تشتغلين وشمعرفچ بثااامر؟؟؟

عدتله نفس السالفة وقابلني بعصبية مضاعفة رجع يصيح عليَّ ويهزأني ويضرب على الحايط، لزمني من شعري يجرني گطعه تگطع اصيح واترجاه يعوفني واحاول ادافع عن نفسي بس ماگدرت چتفوني ثنين من رجاله وهو استفرد بيه بكل حقارة..

ضربني راشدي ردت اوگع من الدوخة بچيت بچي مخابيل من رفسني ببطني، وگعوني بالگاع ماگدرت اتحرك بعد من الوجع رجع يضربني ويرفس ببطني وظهري ويعت بشعري دگيت لطمت توسلت بچيت صحت وماكو فائدة..

جرني من زندي يگومني ورد وگعني ببوكس، چلبت بأيده وشخطته بأظافري دفرني برجله وعاط..

-هارون: بنت الزماااااال الا اموووتچ بيدددي

-كيان: الله ياخذذكم وللللك راح امووووت

ويه كل صيحة ودمعة تنزل يزيد بالكتل بقوة، شعري تهلس احس قبق راسي انشلع وعيوني انعمت من الوجع.. يغلط عليَّ وعلى شُهيب شاله ورگعه بالفشار والمسبات راح ينجلط، شكله مو صاحي وعيونه حمر وتتگلب عبالك متعاطي وجهه متعرق ويرجف رجيف..

-هارون: شوفو شغلكم وياهة

اشر للزلم الخمسة شهگت املخ بروحي واشرد بنهاية الصالة احضن جسمي واغطي وجهي من نظراتهم صرت اصرخ بأسم اخواني وامي وابوية من لا وعي.. هو سمعني اصيح بأسم شُهيب ونطت شياطينه شال الطاولة الي بالوسط وشمرها على الحايط تفلشت تفليش، شمر شاشة البلازما الموجودة وهي مشعولة خلى النار تگب بيها خرب الصالة وتخم القنفات شاله يشمر بي ويفرغ غضبه..

تقرب واحد من الزلم عليَّ بيده حزام زوعت العافية حتى عيوني بعد ما اشوف بيها من ضرب الحايط الي بصفي بقوة صوت الضربة صدت بأذني وبراسي، الحماوة صعدت لجفوني احس روحي راح تطلع من رجع يضرب مرة ثانية بمكان اقرب لجسمي..

گعدت بالزاوية والزلم الباقين على وگفتهم ما تحركوا من شافوا هارون بهذا الوضع بس هذا الحقير حاير ويايه يدرس وين راح يضربني بجسمي، غمضت عيوني عصرتها عصر من حسيت بلمساته يسحبني من ايدي يگومني ويدفعني على الحايط يربط ايدي لظهري..

-كيان: سااااعدوونييييي

يربطني الميخاف من الله وانفاسه الحارة تلفح وجهي شفت الموت وراح اعيش الموت هسة، بقى وجهي على الحايط ميخليني اللتفتت وابتعد مني ماعرف شديسوي بالضبط، بقيت فترة على هالحال وهارون مستمر بالهيجان ما هدأ الا من انفتحت الباب ودخل مالك اني شفته وروحي تعلگت بي گمت ابچي واضرب راسي بالحايط حتى ينتبه لوجودي..

ركض عليَّ يلزمني من متوني دارني عليه يتفحصني ويشوف ملابسي فك الحبل من ايدي ورجع يدور بجسمي ماعرف ليش اخيراً ذب نفس وصاح بالزلم..

-بررررره

تفرقوا يطلعون من المكان وهو راح لهارون يريد يلزمه يحچي وياه بالمغربي لهجته سريعة وصعبة مافهمت شي بس الفهمته ديغلط عليه ويريد يكتله بس هارون وضعه ميساعد وتأكدت شكوكي ان هو ما صاحي على نفسه..

قيّد ايده وره ظهره وربطهم بحبل مشمور على جهة وهارون مستمر بالصياح والانتفاض لدرجة اظن بلاعيمه طگگت، ضربه مالك كلة فقد وعيه فوراً ووگع بالگاع سحبه من اكتافه وربطه بعامود المدفأة، خلاه هناك مربوط وفاقد وعيه مثل الحيوان..

-مالك: گومي وياي كييبان

ركضت اروحله وچلبت بجاكيته من وره ارجف وعيوني على هارون، طلعني من البيت لازگة بي بالمعني الحرفي نسيت العيب ونسيت الحلال والحرام ميهمني شي بس اريد اطلع منا واخلص من هالعذاب..

دخلني لسيارته بس شميت ريحتها ارتاحيت واحس رجعلي الامان، راح يحچي ويه زلم هارون سمعته يگلهم فكوا ايده بعد مرور ست ساعات..

معدتي تموتني اتلوى من الوجع گحيت كم مرة دم بسبب ضرب النذل هارون احس راح اتقيء كبدي، بقيت گاعدة بالسيارة انتظر مالك يرجعلي بس ما رجع شفت شخص ثاني ينزل من سيارة سفطها بسرعة واجه يهرول بأتجاهي چان فاهد!! صخام الصخم حالي شيريد منيي شديسوون بيَّ ذولة! مديت راسي واسمع مالك يروحله يرزل بي ويغلط عليه وكذلك يحچي بالمغربي ويدمج عراقي..

-فاهد: وللللك مادري بييي اجه هناااا والله ماادري

-مالك: كللللب لو صاير بيهااا شييييي شتسووي بروووحك شتسوووووي

-فاهد: ورووح امييي ماااادري بي ماعررف منو گللله هي هناااا ماحچيت اني شيخصنييي

-مالك: اللگه الحچه وتصرف وياااه

اللتفت فاهد على زلم هارون وصاح بيهم..

-فاهد: اللگووولي منو وصل خبر لهارون عن مكان البنييية وگصولي لسااانه لا لساناااتكم تنگصصص بدااله

اشروا براسهم يستجيبون للأمر واني رجعت اگعد عدل، گمت ارجف من شفت فاهد يجيني يركب بكرسي السايق وانطلق بيه للمجهول اللتفتت اشوف مالك ورانه بسيارة.. نوعاً ما تطمنت وارتاحيت على الاقل اعرفه ميأذيني وراح يساعدني..

رجعت اگح من جديد ايدي انترست دم متت من الخوف وصرت ابچي بالخنسة اخاف بيه شي، اللتفت يشوفني وسفط على جهة من الشارع، اخذ كلينس كومة وحطه بيدي يمسحها اباوع لايدي وازيد بالبچي روحي تلوب ومعدتي بيها فورة..

انتفضت مفزوعة من مد نفسه يمسح الدم النازل من خشمي بأصابعه، دفعت ايده بقسوة ما اهتم ورجع يمسح الدم من وجهي..

-كيان: وخررر ايدددك لا تلمسنييي

ما استجاب واخذ كلينس يمسح اصابعه وخشمي وحلگي من حرگتي تقدمت وعضيت اصابع ايده بكل قوتي زرفتهن زرفف عكمش وجهه بألم لثواني ورجع طبيعي ممهتم ولا متأثر..

-فاهد: كافي كوري

-كيان: وخرررر

-هم اكو احد گلچ صوتچ مزعج؟

-وللك هدددنيييي

چتف ايدي گوة يثبتني اشيل روحي وارگعها انهاريت خفت انرعبت ومتت بدمي من قيّد ايدي ثنينهن بأيد وحدة والايد الثانية صار يمسح على راسي ويتفحصه.. كزبر جسمي ممتعودة على رجال يلمسني غير اخواني..

تعبت من المقاومة ما گدرت اتفلت منه استسلمت لدموعي وللقرف الجاي احس بي، عدل شعري يخلل اصابعه بين خصلات ذيل الحصان ويمسح وجهي بأيده غمضت عيوني بقوة كاشة من تقرب رفع حنچي بين اصابعه ويمسح على رقبتي المجروحة من ضرب هارون..

-فاهد: اشتعل عرضك هارون

-كيان: هدني فاهد تعبت

تنهد وترك ايدي طلع بطل مي من ثلاجة السيارة الصغيرة وصب بيده شوية وغسل وجهي بالمي..

-فاهد: وروحها لامي مادري بي اجاچ

-عود صاير شريف انتَ هسة؟؟!

-راح يتحاسب والله الا ادوس بگلبه اطلع هالضرب من عيونه

-وخر عنيي بس رجعني لاهلي كلشيي ماريد منكم

-كافي ارتاحي هسة

جر اللاستيكة الرخت من شعري وشمرها بالسيارة، اشرلي بيده وگال..

-رتبي شعرچ قبل لا نوصل

-راح تاخذني لاهلي؟؟

ما جاوبني ورجع يسوق، فقدت الامل من جديد من وصلنا للشارع الساكن بي نزلني مكمش بيدي ويمشي سريع دخلني لغرفة صايرة بالحديقة وحط اصبعه السبابة على شفايفه وگال بأمر..

-صوتچ لا يطلع

تركني هنا مثل الحيوانة وراح، بچيت بصوت عالي ادگ بالباب ومحد فتحلي الا بعد مرور فترة مو قليلة اجتني خدامة تگول..

-السيد يريدچ

-كيان: السيد منو؟؟

اشرتلي على البيت هزيتلها براسي اي وقررت اشرد ماطول ماكو احد، خطيت خطوة بالحديقة وشفت ثلاث حرس واگفين على جنب ينتظروني قتلوا اخر فرصة عندي للهروب..

مشيت وياهم لداخل البيت وادور على طريق سهل اگدر اهرب منه ومرة ثانية لقطت عيوني حراس ثنين غير الواگفين ويايه يراقبون الباب..

بچيت بـ عَجز وندم بچيت بقهر واحس اللوان الدنيا اختفت وبقى الاسود فقط ليسيطر على حياتي وقلبي، دخلتني الخدامة النذلة للبيت وشمرتني شمر بوسط صالة كلشي ما سمعت ولا شفت غير مالك ماشفت غيره وماهتميت لغيره..

عيوني تتوسل بي يساعدني بس هو عيونه مو عليَّ حاير ببنت عمه "جنات" الواگفة تتعارك وتعيط وتضرب بـ فاهد لسبب جهلته، شالها مالك يطلعها من الصالة ماخذها لمادري وين واندار شمسون عليَّ يگول..

-شمسون: توافقين بسرعة وماا تشلعين گلووبنا!!

صفنت بوسط دموعي ما مفتهمة شي، دخلو شباب ثنين يشبهون هارون بالشكل توقعتهم اخوانه بس ما ركزت.. حچى وياهم شمسون بكلمات ما مفهومة ويأشرلهم عليَّ وهمه يهزون براسهم اي..

احاول اللقط كلشي احاول اتذكر الموقف ضروري ما انسى شي ولازم اركز لازم.. لحظات وصارت مشادة كلامية بين شمسون وولده صوتهم عالي بس فصلت من التعب انهد حيلي ووگعت بالگاع اسمع لاصواتهم وكلشي ما استوعب طنة بأذني من الكتل..

لحظات ودخل سيد معمم يسولف بشي كرره اكثر من مرة ياله استوعبت ومن ركزت توضحلي هذا عقد و ديگول اسمي وكأنه ديعقدلي على احد؟؟!

-شمسون: جاووووبي كياااان

باوعتله ابچي دددم مو دمع ملخت روحي تملخ ماقبل انطي الوكالة وصامة حلگي بأيدي وانوح ما حسيت غير بمسدس يصير بنص راسي وشمسون يهدد..

-اذا ما انطيتي الوكالة اخلي ياخذچ بالحررام وشرفييي

كل هذا والسيد يسمع بدون لا يتدخل مستمر يعيد عليَّ كلمات العقد وناار تسعر بروحي عيوني تحرگني وگلبي راح يوگف ويه نطقي جملة..

-كيان: نعم انتَ وكيلي.....

يتبع...

━━━━━━  ━━━━━━

بارت مو كُلش طويل بس تعبنييي اضطريت اضيف واحذف كذا مرة ياله رضيت عنه 😩 والسبب يعود جميييع الابطال صار عدهم احداث قوية بهذا اليوم وما ترتب البارت من ذكرتهن كلهن ببارت واحد صار هوسة وراح تدوخون 🥲

توقعاتكممم 💀🩷؟