رواية ابناء الحسوم "شمسون" الفصل السادس عشر 16 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

تريد الصدگ؟
تعبان كلش حالي ومنين ما اندار تتراوالي..! ♥️

━━━━━━  ━━━━━━

-مسرة: بابا كأن الوقت تأخر؟

-فادي: صح والله ما حسينا بالوقت گعدتكم حلوة تونس

-جواد: بعد وقت يا جماعة شنو ورانه لو شتگول بابا نور؟

-نور: ماعدنا شي

گلبت عيوني بملل اي گاعدة اني ويه الطاگ للنعال "نور جواد" الي اللتقيت بي بحفلة فاهد ودخلني وياه تتذكروه؟ اصلاً شلون ينسي هالبني ادم وتنسي روحه المرحة بس رغم هذا ما طايقة گعدتي وياه واحس اكو غاية من العزيمة..

-نور: مسرة شنو رأيچ نشرب شي؟

اشر على البار بعيونه ابتسمت ونويت ارفض بكل لطافة واطلع من هالمكان اليخنگ لكن فاجأني عمو جواد من گال بمرح..

-جواد: اي بابا روحو عندي حچاية ويه فادي

-مسرة: لا عذروني اني راجعة للبيت باچر عندي اجتماع مهم الصبح

-نور: مشروب واحد منتأخر

-فادي: لا تخجلي مسرة روحي بابا

يحچي من بين سنونه وعيونه تحذرني لو طلعتي وما لبيتي عزيمة نور يا ويلچ مني، تنهدت وعدلت شعري اسوي روحي ممهتمة..

-مسرة: يله مشروب واحد ميضر

ابتسم نور وگام قبلي للبار المكان مظلم وابوية وابوه ماگدر اشوفهم بعد، گعدت على الكرسي ونور أشر للبار تندر يجينه..

-نور: شنو تحبين تشربين؟

-مسرة: مي

بهتت ملامحه ما متوقع اطلب مي بس فعلاً اريد مي حتى اگدر ابلع هالگعدة المزعجة..

-نور: بهالسرعة مليتي مني مسرة

-مسرة: ليش تگول هيچ؟

-لان حتى مشروب تستحيفين تشربين وياي

-ابني اني ممستحيفة على شي بس اريد مي عطشانة، عود جيبلي وياه أي مشروب خالي من الكحول

ابتسم فرحان من تجاوبت وياه، طلبلي عصير وهو هم..

-نور: بعدچ متشربين كحول؟

-مسرة: اي

-نور: توقعت من تكبرين تتغيرين

-مسرة: اگلك

سكت ينتظرني اكمل طنگرت بوجهه تذكرت شُهيب من اگله اگلك يجاوبني "اسمع" الله ياخذ ابوك العار ابن الكلب شمسون..

-مسرة: شلونه شغلك؟

-نور: ممتاز وانتِ شلونه شغلچ؟ شلون ماشية امورچ ويه شُهيب اعرفه مهندس شاطر كلش

-عندك معرفة قوية بي؟

-عندي صداقة قوية ويه مالك اخوه كلش قريبين على بعض

-اهاا؟

-صداقتنا صارلها سنين

-شلون تعرفتو؟

-بالمغرب، چانت عندي سفرة هناك امي رايحة لأقاربها ورحت وياهة واللتقيت بمالك

-امك اتذكر جزائرية

-صحيح بس ام امي مغربية

-اممم

-شلونها علاقتچ بمالك تعرفي؟

-لا بس سمعت عنه مغرور كلش وثقيل دم؟

-مالك؟! لا ابد بعيد كل البعد عن الغرور انسان متواضع ومحترم ومرتب

-اخوه هم هيچ

-شُهيب شمسون؟

-اي

-صحيح دار بيناتنا حديث مرة وساعدني بدون مقابل

-عاد هو استاذ بهالسوالف

-نور: ههههه راح نبقى نحچي بولد شمسون؟ سولفيلي عنچ شلونها بنتچ

-مسرة: زينة

-بعدها بعيدة عنچ

انعصر گلبي بعد سؤاله بس ما حسسته بشي، جاوبت بأبتسامة مزيفة..

-اي بعدها عند ابوها

-ما ناوية تستلمين الحضانة؟

-اي من ارتب وضعي

-همممم مسرة قيثارة متريد شي يعيق نجاحها حتى لو كانت بنتها

حچاهة بأسلوب مازح جملته شلعت گلبي شلع من مكانه نزلت عيوني اخفي دموعي وضحكت گوة بدون لا اجاوب اخاف تبين الحسرة بصوتي..

-نور: تفتهمين صراحة بعدچ صغيرة والاطفال يعيقون نجاح الاهل خصوصاً الامهات

-على حچيك اني المذنبة الوحيدة لأني جبت طفل على صغر؟

-لا ابد انتِ تزوجتي وكونتي عائلة مو غلطچ هذا اذا صار طفل من البداية

-مدا افهم وجهة نظرك؟

-القصد اني ما اشجع على الانجاب ببداية الزواج خصوصاً لو كانت الام مشغولة ومتگدر تتحمل مسؤولية الطفل

-حملت بميس بعد سنتين زواج وچنت متحملة مسؤوليتها الكاملة

-مسرة اني اسف ما قصدت انتقص من تربيتچ واهتمامچ لبنتچ

-ادري خلينا نغير الموضوع

-اي احم.. سمعت بينچ وبين صقر ريماس علاقة؟

-نعم؟!

-علاقة عمل مسرة؟

-لا ماكو هيچ حچي

-بعده يزعجچ؟

-يزعجني بشنو

-ماعرف يعني بعده مهووس

-نور

-ها

-انتَ شمعرفك بكل هاي التفاصيل؟

ضحك بقوة يكمل مشروبه ويطلب نوع ثاني، حرك راسه حركات عشوائية وگال..

-نور: لان صقر حچالي عنچ من افتهم بيه اعرفج

-افففففف

-هههههههه حقچ صقر مخبل

فضلت ما اجاوب وما انطي معلومات عن نفسي، اكتفيت اشرب عصيري واتفرج على الي جاي يعزف الپيانو..

-نور: اگلچ

-مسرة: اسمع

قرب كرسيه من كرسييّ ودنى جسمه مني اكثر استغربت تصرفه وگمت من مكاني ابتعد بس فاجأني من گال بنبرة سريعة مرتبكة..

-نور: مسرة اذا شخص يتقدملج توافقين؟

-شنو

-شخص متقبل وضعچ ومستعد يربي بنتچ وياچ ويكبر اسمچ ويحبچ توافقين؟

صفنت بوجهه صفنة مرتبة ظليت لا اخذ ولا انطي يحچي بجدية مطلقة وعيونه بعيوني، افتهمت سبب العزيمة او بالاحرى چنت شاكة وهسة تأكدت وعرفت ليش انفردنا وحدنا وابوية أصر اروح ويه هذا الرجال المستعجل السبب هو حتى نور جواد يخطبني!

رفعت تك حاجب من تقرب مني لدرجة نفصل عن بعض سانتيمات قليلة حط ايده بصف ايدي الحاطتها على الميز وميل وجهه مقابيل وجهي لحظة لحظة هذا البني ادم يريد يبوسني؟!!

بحركة سريعة مني دفعته من صدره بقوة اصده متنرفزة وبنفس اللحظة رن تلفوني، نور توتر چنه ما متوقع تصرفي وعباله راح ابادله بس اريد اعرف منين جايب هاي الثقة؟ بلكت اشتري منها واوزعها على موظفيني..

-نور: اعتذر مسـ...

انطيته ظهري ممهتمتله اشوف منو يتصل بيه چان رقم غريب، فتحت الاتصال وقبل لا اگول الو وصلني صوت رجال يگول..

-شريكچ شُهيب شمسون بالتوقيف ومحتاج كفالة، موجود بمكرز (اسم المركز).

طبگ الخط بوجهي بعد جملته الجدية وكأنه متأكد راح اروح اطلعه من السجن..

-نور: مسرة..

-مسرة: ماريد اسمع شي

نترتها وتركته اطلع من المطعم ما ردت اماطل بالموضوع ادري بروحي اطيح حظه بالاهاين وافضحنا هنا وبعد شيخلصني من ابوية، ركبت سيارتي جاية بسيارتي وابوية ويه السايق حتى شوكت ما امل اگدر اطلع وحدي بدونه..

دست بانزين وطلعت للـ highway (الطريق السريع) وطرت منطلقة للمركز الموجود بي هموسي الله يحمسك واخلص منك صوته مينسمع وابو مشاكل لعد لو چنت تلعلع شتسوي.. بس گالتها خالة ام صبا "تره السكوتي لوتي ومن المطربگ درعمي وفوتي"..

باوعت للساعة الوقت تأخر كلش كله من وره ابوية شتلني بهالعزيمة التافهة بس يله على الاقل انخطبت من واحد طاگ ومو بگد جدي مثل العادة..

سفطت مقابيل المركز ونزلت اللبس جاكيتي واتمشى لبوابة المركز، وگفني شرطي يسألني عن سبب جيتي گتله جايه اخذ واحد غبي تابع الي..

دخلني للضابط ممرتاحة من عيون الشرطة الصلفة گصوني گص، گعدت مقابيل الضابط وسألني كم سؤال عن علاقتي بأبو همسة، جاوبته بلغة البلد..

-مسرة: لسوء الحظ شُهيب شريكي

هز راسه متفهم واشرلهم يجيبو، دقايق وشفت شرطي يمشي يدخله الغرفة انرعبت من شفته! وجهه مدمي وناشف الدم عليه وشعره الناعم مخربط وقميصه مفتح وحاله مخربط كلش، ما حط عينه بعيني ابد مركز ويه الضابط الگاعد وره طاولة المكتب..

-مسرة: شتحس؟

وجه عيونه عليَّ متفاجئ من حچايتي بس ما گدرت اسكت واني اشوفه بهالحال الاغبر!

-مسرة: شنو هالحال وين چنت بحلبة مصارعة؟!

-شُهيب: شتسوين هنا؟

-مسرة: لان واحد غبي اتصل بيه وگلي شريكچ هنا بالسجن!

-شُهيب: ومنو هذا الغبي!

-مسرة: مادري ما گال منو هو

زفر نفس عالي طيرني وباوعلي من فوگ ليجوه مركز ويه ملابسي ومكياجي ووضعي الاوڤر، گلبت عيوني مزعوجة ونترت بي..

-مسرة: اي چنت بسهرة! وچنت مستمتعة وفرحانة قبل لا يجيني اتصال سخيف من واحد اسخف وخرب عليَّ اجوائي!

-شُهيب: رجعي لسهرتچ اسف لان ضيعنا وقتچ

-مسرة: هاي كل قوتك؟

-شنو ترديني اكول؟

هدوءه فحمني ووصل عصبيتي للقمة تمنيت اجيبه براشدي افر وجهه المدمى..

-مسرة: خربت عليَّ يومي وتقابلني بهذا البرود؟ لك حتى ما لحگت اجاوب الرجال من خطبني عفته بنص الحديث بعدما عيشني احلى خطبة رومانسية بالعالم!!

-واني شكو؟ اني ما اتصلت بيچ!! من البداية ما ردت اتصل بيچ مسررة!

-هاا هاي عود عصبت حضرتك؟؟ لاا حباب خاف صارت زحمة

-يعني شنو ترديني اگول؟ الف مبروك؟ يابه يله الف الف مبروك شايفة كل الخير والسعادة ويه المتقدملچ مو متعزمونا على العرررس!!!

نتر كلمة عرس بعصبية كتفت ايدي لصدري واني اشوفه يتلفت كل شوية على الشرطي الوراه يخزر بي ادري ودا اللاحظ نظرات الشرطي النگسة عليَّ عيونه على جسمي الچلب ما بعدهن..

-شُهيب: روحي منا المكان ميناسبچ طلعي

-مسرة: صح مصنوع خصيصاً الك ولجماعتك

-شُهيب: انتِ جايه هنا تطلعيني لو تذليني؟!!

-مسرة: انتَ شبيك معصب وتنتر بيه من شوكت تصيح بوجهي

-شُهيب: تدوس بمصارينيي وتگول ليش تصيح بوجهيي

-ماعندك تبرير على الصار؟؟

بدون مقدمات سألته ودمي يفور اريده يگول أي شي بس خلي يرتاح گلبي، بقى ساكت ويزفر فوگاهة معصب مني قابض على ايده بقوة حسيته شوية ويطيرني ببوكس..

-ليش متجاوب؟

-شُهيب: ماعندي تبرير على الصار مسرة!

-مسرة: يعني تحچيها بوجهي هيچ ممهتم؟

-شُهيب: وليش اهتم؟!! شيخصچ انتِ طلعي مناااا

صار اشهر نشتغل سوه ماكو مرة عاط بوجهي بهاي العصبية يرجف رجيف وجهه احمر وروحه بخشمه ماعرف حاقد عليَّ بسبب الاوراق لو مزعوج من وجودي هنا بنص الشرطة، بلعت ريگ مهضومة بس مستحيل ابينله من كل گلبي تمنيت أأذي هسة لو تگلولي مسرة شنو امنيتچ بالحياة؟ اگلكم ادچ شُهيب بگلبه وانقذ العالم من نسل شمسون المزعج!

-الضابط: راح توقعين الكفالة مدام؟

-مسرة: لا!

فتح عيونه شُهيب مصدوم من جوابي ان شاء الله عباله اطلعه وهو ينتر بوجهي بهالهمجية؟ سديت سحابة جاكيتي وگلت للضابط..

-اني معليه ما اوقع شي خلي اهله يجون يطلعوه

رجعت انظاري لـ شُهيب الصافن وما تنفس حتى ونترت بحقد بيني وبينه..

-المكان هنا يناسبك اكثر من الخارج وصدگني كلكم بالنهاية توگعون وتمشون على هذا الطريق، اصفاد بيدكم وتنتظرون محاكمتكم!! اتمنالك وقت ممتع شُهيب شمسون امانة تبلغني اذا تحتاج شي وصدگني راح استمتع اضحك عليك وما اجيبه!

تركته على وگفته وطلعت من المركز دمي يغلي حاولت اسيطر على اعصابي بس ماگدرت احس بنار تسعر جوايه كلما جايها تكبر اكثر واكثر واني اتذكر من دزلنا زلم يكتلونا بنص الشارع بكل صلافة وبدون خوف!

رجعت للبيت ذبيت روحي بالفراش انام بملابسي متناسية كلشي، گعدت الصبح جسمي متكسر وراسي يوجعني سبحت، فرشت اسناني، كشخت احلى كشخة وطلعت للشركة اروح لدوامي كأني رايحة لموعد غرامي..

مشت ساعة من الدوام وضعي ممتاز كلما اريد افكر بالصار البارحة اللتهي بالشغل واجدد طاقتي بكوب شاي اخضر، قاطع تركيزي بالحاسبة دخول صبا تتذمر..

-صبا: شنو هالملل اليوم ليش الكل ماكووو

-مسرة: گتلچ مجازين

-صبا: شعجب هيچ كلهم فجأة ياخذون اجازة؟

-مسرة: رايحين الاخوة رحلة استجمام ويه بعض

-وشمعنى احنه منروح؟؟ كله من وراچ متنطيني اجازة وكاربتني هنا!!

-لتشتغلين شي اليوم ماطول مروان ماكو ويلح فوگ راسچ

-الله اي فكرة تجنن راح ارتاح منه ومن نگه

رجعت اشتغل على الحاسبة وهي تسولف وتتسائل شوكت تتخرج كيان، اليوم كيان مثل كل اسبوع ممداومة لان عدها محاضرة بالتسعة الصبح وتضطر تروح للجامعة انطيها عادةً اوف وتعوض بغير ايام..

للعصر اندگ باب المكتب مالتي، باوعت من الكامرات وتفاجأت من شفتها ام شُهيب..

-مسرة: تفضلي

دخلت منزلة راسها وتسحل برجليها، تقدمت كم خطوة عليَّ ووگفت مباشرة امام ميز مكتبي، رحبت بيها واشرت على الكرسي..

-مسرة: تفضلي استريحي لا تبقين واگفة

گعدت خانسة ايديها بحضنها مشابكتهن ومنزلة راسها، اذاناتها ورقبتها صايرات حمر مثل شُهيب من يخجل او يعصب يصيرن حمر وشكل ماريا مو طبيعي هسة بمعنى عدها مشكلة..

-مسرة: شلونچ

-زينة

همستها همس ناعم وللان راسها منزلته، لقطت عيني دمعة نزلت من عينها تشق خدها استغربت ورحت اخذ موقع مقابيلها..

-مسرة: محتاجة شي حبيبتي خالة؟ اگدر اساعدچ بشي؟

-اي

اخيراُ رفعت راسها عيونها تلالي بيها الدموع وخشمها صاير دم من البچي، حطيت ايدي على گلبي متعاطفة وياهة شكلها يقهر..

-ماريا: شهوبي ما اجه اليوم وميجاوب اتصالاتي تعرفين وينه؟

-هاا

-اخاف بي شي خابرت على نشوان ومروان وكيان محد يجاوب ادگ على مالك هم ميجاوب والله خايفة كلش خايفة

تشهگ وتبچي گطعت گلبي ماعرفت شنو اجاوبها اخاف احچي وتنصدم وهي مبينة گلبها فاير على ابنها، مسحت وجهها من الدموع وجرت ايدي فاتحة عيونها على وسعها وتگول مهضومة..

-والله ما سويت شي يخلي يزعل مني ليش شهوبي يعاقبني اني شسويت ما سويت والله ما سويت

-حبيبتي خالة اهدأي شُهيب ممعاقبچ هو بس مسافر يومين ويرجع لتخافين

-لا لا لا لا لا

تحرك راسها بلا وتبچي بحرگة عيونها فصوص حمر ماعرفت شحچي بعد جملتها التالية..

-هو ميسافر هيچ هو يوصي نشوان عليَّ ويحاچيني قبل لا يروح يبوس ايدي ورجلي وراسي ويگلي ماما ديري بالچ على نفسچ وصيري حبابة هو ما اجه ما سواها يعني زعلاان مني

-لا گلبي ليش يزعل انتِ مسوية شي غلط؟

-لا

-لعد بعد شكو اكيد مزعلان ان شاء الله يرجع هاليومين لتخافين

فركت عيونها حيل حركاتها تشبه حركات الاطفال تكسر الخاطر، بقت گاعدة متقبل تروح الا اتصل عليه گدامها حرت ماعرفت شتصرف..

-مسرة: تمام راح اتصل بس ميصير انتِ تحچين وياه لان هو بأجتماع هسة وميحقله يحچي بس ويه شريكته علمود يتناقش ويايه

-فتحي مكبرة صوت

-هاا..؟

-اي فتحيها سبيكر فتحي

-لا ميصير هاي اسرار عمل الي بالاجتماع راح يعرفون اني فتحت مكبرة صوت وراح يطردوا

-شلون يعرفون؟

-عدهم جهاز يعرفون بهالسوالف وتره ينطرد خطية يبقى بدون شغل

صفنت شوية عليَّ ردت اغم روحي شنو طفلة واضحك عليها بس تفاجأت من مشت عليها الچذبة وصدگتني عزه معقولة! هاي خطرة بحچايتين ينضحك عليها..

طلعت رقمه گدامها حتى تشوف وسويت روحي اتصل بي، عيونها تاكلني وتعصر بأيدها بقوة..

-مسرة: هلو شهوبي شلونك.. انتَ بالاجتماع مو؟ هااا هاي خالة ماريا عبالها انتَ زعلان عليها وما اجيتها اليوم انتَ صدگ زعلان؟... ها خوش خوش يعني ما زعلان اي عفية خطية هاي امك حتى لو تطيح حظك تنچب وتسكت.. عفية ابني يله باي

سديته ونزيت من صاحت..

-شگااااال؟؟؟

-گال مزعلان و اني احب ماريا وهي امي مستحيل اضوجها بس عندي اجتماع مهم وطلعتله

ماگدر افسر الابتسامة الزينت ملامحها صارت تضحك بصوت عالي وتضمضم بوجهها فرحانة ومتونسة على جوابي التافه، ضحكت وياهة على الواهس واشوف الدم رجع لوجهها والحياة دبت بيها..

-ماريا: اي اي اني اعرف هو ميزعل مني بس يشاقيني اعرفه شهوبي

-اي حباب شهوبي

-ماكو منه حبيبي

-تشربين شي خالة؟

-اريد عصير برتقال

-بعيوني

اتصلت بـ وئام تجيب عصير لان مثلما تعرفون محد عنده سكرتيرة هنا ودا اعاني من هالشي واخجل اطلب من احد بس وئام امون عليها..

گعدت تسولفلي على شهوبي وشلون تحبه وهو يحبها تسولف وطايرة من الفرح وفرحت وياهة على الواهس ونسيت ضوجتي، شوية ودخلت صبا وانضمت للمجموعة واستلمتها تحقيق..

-صبا: ياااا يعني يوم عيد ميلاده الحقيقي مو اول البارحة؟؟

-ماريا: لاا عيد ميلاد شهوبي الحقيقي يوم 𝟑/𝟏𝟒

-صبا: برج الحووووت حبيييت والله صحح چان لازم اعرف كله نفس مواصفاته بالضبط

-ماريا: يعني شلون؟

-مسرة: اني ما احب الابراج بس افهم بيهن، مواليد رجل الحوت يكون متسامح وگلبه طيب ماعنده حقد او غرور على احد ويكون جداً ذكي وهالشي يخلي المحيط مالته يحب يشاركه شغل او أفكار لان عنده سرعة بديهية بفهم الامور

-صبا: وكل هالصفات بـ شُهيب بالضبط بالضبططط زين خالة ليش سويتو عيد ميلاده اول البارحة؟

-ماريا: ماعرف بس هو مادري شنو صار وتأخرنا بتسجيله لان من جبته جعفر چان ما موجود ويسجله بأسمه

-صبا: منو جعفر؟

-مسرة: شمسون

-صبا: شمسون اسمه جعفر؟!!!!

-ماريا: اي ليش مصدومة

-مسرة: لان محد يصيحله جعفر الكل يصيحله بلقب العائلة "شمسون"

-ماريا: ها اي صح هو ميحب اسمه

-صبا: زين ماريا شلون تعرفتي على جعفر سولفيلنا

سكتت ماريا ترمش بعيونها عبالك فصلت عنه، حكت ايدها ونزلت عيونها تتهرب من مواجهتنا، همست بصوت خافت كلش..

-شهوبي ميقبل احچي

-صبا: ياا ليش يعني انتو تزوجتو على حب لو تقليدي؟

حركت راسها بـ لا بس كلش مرتبكة ورقبتها رجعت انصبغت احمر، رجعت عادت نفس الجملة..

-ماريا: شُهيب ميقبل احچي يزعل عليَّ

من شفت وضعها وتوترها حسيت اكو شي مضموم وتخاف يفلت لسانها وتحچي، غيرت الموضوع بسرعة حتى منلح وياهة ونزعجها..

-مسرة: صباوي خلينا نشتغل شُهيب مموجود اخذيلي مكانه حبابة

-صبا: مو..

لزمت ايدها افهمها اشرتلي بعيونها على ماريا تتسائل شبيها صبا متعرف وضع ماريا ومشكلتها المرضية، گامت ويايه للطاولة گلت لـ ماريا تجي ويانه تگعد حتى متبقى وحدها وتفكر بأبنها اجت بسرعة تنضم ويانه..

اشتغلنا وهي مركزة بكل حواسها وتسأل على كلشي شوفتها بهذا الحال زاد وضعي سوء وماكو فكرة ببالي غير هاي شلون تقبلت فكرة الحمل والولادة؟ شُهيب شلون تربى؟؟؟

-ماريا: مسرة انتِ چنتي متزوجة؟

سألتني فجأة وبدون مقدمات، ابتسمت وهزيت براسي اي..

-مسرة: شلون عرفتي؟

-ماريا: كيان گلتلي عندچ بنية كلش حلوة

-مسرة: اي اسمها ميس

-ماريا: عفتي لان چان يكتلچ؟

سؤال مفاجأ جديد ما حاسبتله حساب، تنهدت ارتب الملفات الگدامي وقررت احول السؤال الها..

-مسرة: انتِ سولفيلي جعفر هم چان يزعلچ؟

-ماريا: لا

-همزين

-جعفر كلش زين ويايه ماكو يوم زعلني لو كتلني ويحب شهوبي ويخاف عليه

-حلو هالشي

-صبا: بنات جعت

-مسرة: صح خالة خاف جعتي نروح ناكل شي؟

-ماريا: مو خاف عيب؟

-مسرة: ليش عيب تعالي تعالي

گومناها ويانه ناخذها للمطعم الي بجانب الشركة، طلبنا اكل وفاجأتنا من گالت بأبتسامة مرحة..

-ماريا: شُهيب ميقبل اطلب من شخص غريب ويگول لازم اكون محترمة ويه الناس حتى الكل يحبني ومحد يضوج مني

-مسرة: صحيح كلامه بس شنو تردين طلبي مني وتدللين

-ماريا: اريد عصير

اشرتلها على عيوني بمعنى من عيوني ضحكت تكمم فمها وتنزل عيونها ولكم تنگرطططط..

-صبا: ولچ ماريا هنيال شُهيب عليچ والله تونسين فديتچ

قضينا باقي اليوم وياهة تونست وغيرت مزاجي لفترة، الحلو بيها مو مزعجة ولحوحة شفتها اني ويه شُهيب تلح وياه بس اليوم ما شفت هالصفة بيها ويايه..

رجعت للبيت بالليل ما مرتاحة واحس رجعتلي الضوجة رحت اشوف ميس دگيت الباب هوايه ما فتحوها اتصلت بالشفيه ميجاوب الله اعلم وين هالمرة مسافر وماخذ بنتي وياه..

رجعت لسيارتي افتر ووجع مو طبيعي بگلبي كلما جايله يزيد مدا يخليني حتى اتنفس شوكت اخذ بنتي واخلص من هالعذاب، اشرد بيها لنهاية العالم وما اخلي احد يندلنا ويحرمنا من بعض..

سفطت السيارة مقابيل پارك (حديقة عامة) ونزلت اگعد بالمرجوحة الي دائماً اگعد بيها اني وميوسة من نلتقي، ما حسيت الا واني ابچي اتذكر ضحكاتها وجسمها الصغير الاحطه فوگ رجلي واهزنا بالمرجوحة..

لمسات ايدها الناعمة تمسح على وجهي تبوس خدودي وتسند راسها على صدري وتهمسلي "ماما احبچ" كل هذا محرومة منه بسببهم! بسبب حقدهم وظلمهم بسبب طغيانهم واتهاماتهم الباطلة وشهادتهم الزور!

بقيت فترة گاعدة ابچي واريّح گلبي، طلعت موبايلي اگلب بين الصور والفيديوهات الي تخصنا، فيديو وميوسة تضحك، فيديو وهي تقرالي قصة، فيديو وهي تنطط كل مكان وفيديو وهي ترگص.. ميس تموت على شي اسمه رقص تعشقه ماعرف منين متعلمة ترقص اكيد من صاحبات ابوها الحقيرات..

بين الفيديوات طلعلي فيديو اني مصورته بالشركة شُهيب ديشرحلي على مشروع وگتله اريد اصورك حتى ما انسى كلامك واراجعه بالبيت قبل الاجتماع، دائماً اسويها وياه بس عادةً اول ميخلص الاجتماع احذف الفيديو لان ما احتاجه بس هالمرة ما حاذفته ماعرف ليش..

الفيديو چان هادئ واستغربت حالي اسمعه كله جره وحدة بدون لا اقطعه، طوله 33 دقيقة كاملة واضح بي نبرته الساكنة وخبالاتي واني اقاطعه كل شوية بس حتى استفزه بس هيهات شُهيب شمسون لا يستفز وميتأثر يقابلني بأبتسامة وينتظرني اكمل لغوتي ويرجع يكمل كلامه وارجع اقاطعه اگول..

-مسرة: اذا خربطت بأسمك نبهني مو تغلس يمعود لتفضحنا ونصير مضحكة لامة لا اله الا الله

-منصير لتخافين لان همه اصلاً مو من امة لا اله الا الله

-عود صاير ظريف حضرتك

-ما صاير من يوم يومي ظريف

-هه هه هه هه راح اموت من الضحك

ضحك يگوم يسويله كوب قهوة بوكتها وسوالي وياه چاي اخضر، حط الكوب گدامي وجر الملف يكمل..

-هاي ليش ما حطيتلي شكر اشهههب

-گعدي حتى هم يصعد سكرها واني ابتلي

-هاي شبيك شدعوة عليك واذا كل يوم اتخربط وتركض تجيبلي علاجي

-هاچ من هذا حطي

انطاني الشكر الخاص لاهل السكر فتحلي ظرف يريد يحطه بالكوب مالتي..

-ماريد مال اهل السكر تلعب نفسي منه

-لعد المن جبته اني

-گتلك لتجيبلي ما راح استخدمه بس تذب فلوسك بالزبالة

-لازم تسيطرين على سكرچ لا يصير بيچ شي

-ميهمني

-خوش اني هم ميهمني ماكو غير هذا الشكر عجبچ تمام ما عجبچ شربي مُر

-اني گتلك اليوم انتَ مو خوش شريك لو ماگلت؟

-گلتيها اربع مرات

-وهاي الخامسة انتَ مو خوش شريك ابد!

-ديلا نكمل لا تلهيني

-اگلك

-اسمع؟

-انتَ ادخل الاجتماع بدوني ماحب هذا المستثمر احسه يوغف على الگلب

-بس هو مهم ولازم تحضرين

-واذا ما حضرت شيصير؟

سكت يباوعلي والكامرا راصدة كلشي ضحكت اتذكر هالموقف واتذكر جوابه من گال مثل عادته..

-خلص لا تحضرين

-مو گلت عنه مهم ولازم احضر؟

-ميهم اني اتصرف

وهيچ خلصت ذاكرة موبايلي بوقتها وانقطع الفيديو، سديت التلفون اضحك من گلبي ماتذكر مرة گتله على شي ماريد اسوي وضغط عليَّ دائماً جوابه يكون "خلص براحتچ" ومن اسئله شلون راح تحل الموضوع؟ يجاوبني "اني اتصرف" وفعلاً يتصرف ويمشي الاجتماع والشغل بدوني بدون لا يأثر على سير العمل..

عنده استعداد ياخذ شغل فوگ طاقته ويبقى اليوم كله بالشركة بس ميگلي تعالي كملي شغلچ، اني مو مهملة بس اوقات اتعمد اريد ادرس شخصيته اريد اعرف راح ينبهني عندي شغل متراكم لو يحل الموضوع مثل عادته؟ وابشركم بكل مرة يحل الموضوع من كيفه وميگول اصلاً اني اشتغلت شغلچ نيابة عنچ لان دائماً اشوف اسمي جوه بكل عمل هو يشتغله بدالي بدون لا يحط حقوقه وبكل مرة هالشي يخليني ابتسم..

نفضت عقلي من الذكريات والافكار التتعلق بي غلط من الاساس اتخذته صديق ونسيت ثاري نسيت سبب وجودي بهاي الشركة وسبب شغلي وياه من الاساس، مسحت وجهي ارتب افكاري وحسيت لازم اسوي هالشي بغض النظر عن كلشي بس امه واگفة بعيني متستحق تتعذب..

رفعت موبايلي واتصلت على رقم بدون سلام ولا كلام اختصرت الأمر على الكل بقول..

-طلعلي شُهيب شمسون واخوانه من التوقيف، ممنوع احد يجيب طاري اسمي گدامه وكأن اني مالي علاقة بطلعته...

**

-كافي گعدي شبيچ تفترين دخت

-ايات: ليش تأخر؟ وين يروح وهيچ يتأخر بنات؟؟

-تسنيم: ماعرف عمو شمسون گلچ من البداية خطيبچ يتأخر بالشغل هوايه ولازم تتقبلين الفكرة

-ايات: متقبلتها اني بس اقلق عليه يعني مينام؟ شو ننام وهو ما راجع ونگعد الصبح هو مموجود معقولة يرجع للبيت؟؟ لو اصلاً ميجي؟؟

-تسنيم: بس هذا مو بيته نسيتي؟ فـ يجوز يروح لبيته

-جنات: لا يجي هنا اني كل يوم احث (احس) عليه

-ايات: اليوم الا اسهر ولو اني لو هو! خليني اشوف ليش يتهرب مني وميقبل نتلاگه!!

كتفت ايدها لصدرها بعصبية من كل عقلها تريد تسهر، ايات الي تكره شي اسمه سهر راح تسهر وتنتظر مالك افندي حتى تروي عيونها بـ طَلته البهية..

من يوم اجينا نعيش ببيت النعال فاهد هو هم انتقل هنا بس هالفترة بطلب من ابوه حتى منبقى بس ويه فاهد العصبي خاف يسويله سالفة ويانه ويضوجنا بس ماعرف شنو فائدة وجود مالك وهو يرجع بالـ 2:30 واوقات بثلاثة الفجر ويصعد لغرفته وبعد ميطلع منها الا بالسبعة اسمع صوت الباب مالته ينفتح واني حاسة على كلشي بسبب نومي الخفيف افز من الهمسة..

وهسة عبرت الـ 11 بالليل ومالك ما اجه وحضرة جناب اختي تريد تنتظره واني وتسنيم گاعدات ننتظره وياهة ونس حتى متضوج..

مرت فترة طويلة تسنيم بدت تغفي واني مليت وطلعت روحي وهو ماكو، گلتلها ميجي هسة بس ماهتمت وبقت بالصالة گاعدة، رحت اجيبلي تفاحة آكلها جعت وهاي البطرانة گاعدة بدون عشا تنتظر رئيس الوزراء مالتها حتى يتعشون سوه..

طفرت من مكانها على صوت فتح الباب باوعت للساعة 1:57 بالليل هه چنه عتوي الليل ميجي الا من الناس نايمة، دخل الصالة وتوقف بمكانه مستغرب من گعدة ثلاث ططوات گدامه..

-مالك: مساء الخير

-جنات: اخيرااً

-ايات: اشش جنات! مساء النور هلو مالك

هزلها راسه ميتزحم ويجاوبها من طاااح حظچ ايوو هذا الصارلچ ثلاث ساعات جوعانة علموده ومتاكلين گبرر يا فگرر..

-ايات: تأخرت؟

-مالك: اي چان عندي شغل ليش محتاجين مني شي؟

-تسنيم: من رخصتكم، تصبحون على خير

-جنات: يله اني هم باي

جرتني ايات حتى ابقى وياهم تخزر بيه وتأشرلي گعدي، همست واني اعض من التفاحة الثالثة لليوم..

-جنات: هو خطيبچ اني شكو لاطشتني بيكم لو تخافين من الفاحشة

-ايات: گعدي وسكتي لتصيرين حقيرة

-مالك: من رخصتكم

-ايات: لحظظة وين

-جنات: وين وين يمعوواااد

-ايات: جنات شبيچ!

-جنات: ولچ بزعت روحي واني انتظره تاليها يعوفنا ويروح من امداني وامداچ

-ايات: احم، مالك متعشي؟ تحب اصبلك اكل؟

-مالك بأبتسامة: مآكل اني شكراً

-جنات بهمس: گطيعة

-ايات: هسة غير تسكت!!

-جنات: ديلا يلا ثكتت

-ايات: زين تحب تشرب شي؟ چاي مثلاً او عصير؟ أي شي

ابتسم مجاملة وباوع على الساعة بمعصم ايده، عدل شعره يرفعه ليوره وگال بأدب..

-الوقت تأخر ليش لسه سهرانين؟

-ايات: چنت انتظرك

انرسمت ملامح الاستغراب للمرة الثانية على وجهه واكتفى بالصمت منتظرها تكمل..

-ايات: گلت انتظرك ترجع على الاقل يستقبلك احد ليش دائماً وحيد

كبرت علامة الاستفهام الي فوگ راسه الرجال راح ينجلط من اهتمام اختي واحسه ما مرتاح ابد ما مرتاح من تصرفها او ما متعود ماعرف شنو مشاعره بالضبط بس هز راسه مبتسم وگال بهدوء..

-شكراً

-ايات: اني موجودة شوكت ميعجبك تصيحلي او تريد شي.. والله أي شي تريده بس گولي واني موجودة

-مالك: احم.. شكراً

-ايات: مثلاً.. مثلاً اكل؟ اكل اذا تجوع گول اگدر اطبخلك طبخي طيب اسأل جنات

-جنات: امم

-مالك: شكراً لاهتمامچ

ابتسمت اختي ابتسامة تجنن سحرتني بيها بس واضح ما اثرت بي لانه بادلها بأبتسامة خفيفة وترخص يكمل طريقه للطابق الثاني..

انعصر گلبي من بروده وانكتمت مشاعري توجعت على لطافة وجمال روح ايات وياه ليقابلها بهذا البرود المميت ما اللومه وبعدهم جدد على بعض وممتعودين بس شي مؤلم بالنسبة الي بينما ايات ما اهتمت وصعدت فوگ حتى تنام والابتسامة ما فارقت وجهها الحلو..

-ايات: بنات اگدر اطلب منكم طلب؟

-تسنيم: گولي حبيبتي

-ايات: اذا أي وحدة منچن تسمحلها الفرصة وتحچي ويه مالك هالايام ممكن تذكروني گدامه

-جنات: يعني شلون؟

-ايات: سولفوله عني خليني اكون من ضمن حديثكم اريده يعرف اني اريده من كل گلبي وما مجبورة عليه، اني اگول يمكن هو جاف ويايه عباله لان مجبورة عليه وميريد يضغط عليَّ

-جنات: ايوته ميحتاج وحدة تحچي بدالچ من تعقدون انتِ احچيله عن مشاعرچ الحقيقة

-ايات: جنات حبابة اريد هسة، تسنيم انتِ هم فدوة اذا حچيتو وياه سولفوا بيه وگلوله اني كلش فرحانة لان راح اتزوجه

-جنات: ايو انتِ اختي الچبيرة بس راح انصحچ لا تذبين روحچ على رجال خصوصاً بالبداية لتخلي يشوفچ متلهفة لا ينغر عليچ

-ايات: لا لا ماتوقع هو هيچ

همهمت تسنيم ونامت بالفراش تغطي نفسها، نمنا اني وايات بصف بعض وهمست بيني وبينها بلطف حتى ما اجرحها..

-جنات: انتِ بعدچ متعرفي زين لا تجازفين بمشاعرچ جاي تشوفي يتهرب وميقبل حتى نحچي وياه يمكن يحب او يمكن اكو وحدة بباله، لتنسين همه هم مجبورين يتزوجونا فـ خلي علاقتكم تتطور شوية شوية بدون عجلة

-ليش احسچ متحبين مالك؟

-لا شعندي وياه اني بس اخاف عليچ ماريد تنصدمين بشي يوجع گلبچ بعدين

هزت راسهة اي بس چنه كلامي ما فاد لان بقت مبتسمة وطايرة بفراشها لحدما غفت بس اني طار من عيني النوم وفضلت انزل اگعد جوه بالصالة آملة النعاس يطرق باب جفوني الليلة، لميت رجلي لصدري احضنهن واسند حنچي على ركباتي واتذكر الصار قبل لا نجي هنا واتذكر العركة الي هزت بيتنا قبل گلبي..

حسرة تكونت ببلعومي خنگتني من تذكرت عيون ليث من ودعني وكلماته الاخيرة ماتحملت اكمل بأفكاري وقطعتهن اهفي وجهي بلكت اسيطر على دموعي بس للاسف ما گدرت وصارت تنزل وحدة وره الثانية ضميت وجهي بين ايدي اخفي صوتي وشهگاتي وصعدت الدرج اركض للغرفة..

-جاي تبچين؟

مسحت عيوني ووجهي من الدموع بسرعة واللتفتت عليه اشوفه واگف وايده على مقبض الباب مال غرفته ديسدها..

-مالك: اكو احد زعجچ بشي؟

-جنات: لا

-لعد ليش تبچين؟

-ماريد اتزوج

تنهد بخفة وترك مقبض الباب حط ايده بجيوب التراك وگال..

-خايفة من فاهد؟

-خيوليي هو شنو واخاف منه

-ماعرف توقعت خايفة من عصبيته

-ما خايفة على روحي اني اخاف على ايات

-شبيها؟

-اريد اثألك شي واذا متريد تجاوب براحتك

-تفضلي

-شنو رأيك بالزواج الثاني؟

حسيته ما فهم سبب سؤالي اردفت فوراً..

-اكيد تعرف قانون عائلتنا متاح تعدد الزوجات عادي الرجال يتزوج ثنين وثلاثة مثل عمامي وولد عمامي ماكو واحد منهم مكتفي بزوجة وحدة

-قصدچ لو چانت عندي حبيبة هل راح اتزوج على اختچ؟

-اييييي يعجبني اليفهمها على الطاير

ابتسم واشرلي بيده اكمل وجهة نظري..

-جنات: اني اعرف كل واحد منكم عنده حياة وعنده على الاغلب حبيبة رايدها وواعدها بالزواج وابوكم حطكم بهذا الموقف واعرف شگد صعب عليكم مثلما هو صعب علينا ومعاناتنا وحدة كلنا دنعاني ونفثيتنا زفت بثبب هذا الشي بث.. اريد اعرف انتو من هذا النوع الي يحب تكون اكو اكثر من مرة بحياته؟..

سكتت قبل لا اچفص اكثر واگله اختي حبتك من اول يوم شافتك بيها وراح تموت من القهر لو فكر يتزوج عليها لو يحب شفت هالشي غلط وراح ابين اختي كاتلة نفسها عليه ويمكن ينچلب عليها، بقى ساكت وصافن بوجهي واخيراً بعد مرور ثواني ابتسم يهز راسه بـ "لا" ما صدگت عيوني واحتاجيت اسأل بصوت عالي..

-متتزوج مرة ثانية؟؟؟

-مالك: مستحيل

-گوول والكععبة

ضحك خفيف وحرك راسه اي..

-مالك: خليني اتقبل فكرة زواجي الاول بعدين افكر بالثاني

-اشتعلتت لشتك يعني مفكر بالزواج الثاني موو؟؟

-گتلچ لا، بعدين شنو هذا الگلتي؟

-شنو هو؟

-هذا شلتك مادري لشتك ماتذكر

-متعرف شنو يعني لشتك؟

-لا

-احثن (احسن)

-بس مبين جاي تسبيني ام لسان الحلو

-ولك تتحارش بياااا

-ليش هذا تحرش اسمه؟ هذا مدح آنستي

-شني

ضحك مرة ثانية ودخل للغرفة مالته، نزلت اشرب مي من المطبخ مرتاحة وفرحانة لـ ايات لان خطيبها مبين خوش زلمة تستاهل حبيبتي، ايات ربتني من بعد وفاة امي الله يرحمها عمري چان اربعة سنوات ما اتذكر منها شي، امي سورية وتزوجت ابوية على حب شبه مستحيل لا بيبي ولا جدو راضين على زواجهم بس چان گد كلمته وتزوجها وخلف منها ايات واني..

بعد وفاتها بأربعة اشهر ضبط تزوج بنت عمه "هنادي" مرة سمانية بشكل حقيرة وحية صفرة تكرهنا وتغار من عدنا تتعمد تسوي مشاكل بيني وبين ابوية بس لاني ما ارضى على سحورتها وسوالفها المكسرة.. لگفتها مرة تخون ابوية بالبيتونة جايبة رجال صح ما شفتهم يسوون شي وايات ما صدگتني من گلتلها تهمتني دا اتخيل ولازم ما اگول لاحد..

وراهة بفترة هم شفتها ويه واحد ثاني تسولف بالسطح وهالمرة ايات شافتها وحلفتني بروح امي حتى اسكت، من يوم يومها ايات تخاف من "هنادي" وتسوي كل الي تگوله بدون نقاش وهذا السبب تحب ايات او خلينا نگول تتقبلها..

صبيتلي گلاص مي صكيته وحطيته بالسنك بدون ما اغسله، رجعت افتح الثلاجة شفت العشا السوته ايات سودة عليَّ نامت جوعانة من وره مالك طلعته احمي بالمايكرويڤ واكلته، مسحت الماعون مسح وبقيت بي بس زيتونة ورجعته بالثلاجة حرام نعمة الله ميصير تنذب..

-هيوووو شكو ترجعي بالثلاجة

-جنات: يممااااا خرب اهلكك خرررب عشيرتككك اشتعلت لشتكك فاااهد طفرتنيييي

-فاهد: وجع وسم وزقنبوت وزحير ان شاء الله شبيچ تهايطين

-وجع بگلبك ابن الفگرر

-ولچ ام اللسان شلون بيچ انتِ شلوون الا تنكتلين؟؟

-تعال اكتلني تعااال طلع مراجلك خليني اراويك النثوان شتجيببب

-اخخخخ لوما ابوية هنا الا اراويچ نجوم الظهر خلينا نتزوج واني اعلمچ على لسانچ هذا لوما اخليچ تفزين نص الليل تهلهلين وترجعين تنامين ميطلع اسمي فاهد

-دوليي

-ولچ سكتييي بس انلصمي سكتيي لا تفوريننن دمييي

-شجابك هنا امشي ولي نام شكو ثهران

-بكيفيي!! اسهر انام ارگص اطلع اطبب بكيفييي

-اي لانك ططوة متتعلم من اخوك الاحترام والادب گبرر لفك

-مع الاسف حظچ وگع ويايه اني الهمجي فـ تقبلي الواقع المُر حبيبتي

-اوووععع عابت حظي اي والله

-وحظي وياچ الخلاني اتزوج هيچ وحدة خبلة

-تره انتَ اختاريتني لا تظل تمعمع يمي وتثوي روحك ما عاجبك!

-اختاريتچ لان لسانچ حلوو مادري بي يذب سممم

-يذب ثم يثمم جثمك ان شاء الله

-ههههههههههههه والله تونسين

-دوووخر

-گولي سمسم بشرفج

-امشي ماگول

-گولي بس هالمرة واعوفچ

-ماگول لا تلح

-شمسون: ها شو سهرانين الحبايب

دخل عمو شمسون المطبخ، صفنت على لبسه فاكة حلگي هاي طلعت صدگ الطبقة المخملية يلبسون روب ستن من ينامون؟ اي والله صدگ عمو لابس روب ستن اسود ومتأنق بي..

-فاهد: يابة بعد ما اطيقها اللگالي حل خلينا نذبحها ونخلص!

-جنات: وولك شنو تذبحني شمثويه انييي

-فاهد: دسكتي ما احچي عليچ ولي نامي يله

-جنات: انتَ ولي ناام

-فاهد: ولج تعانددينيي

-جنات: اعانددك واعاااند الخلفك همممم

-شمسون: تؤ تؤ تؤ تؤ

-جنات: اثفة عمو

-شمسون: أجلو عركتكم بعدين تعال فاهد وياي

اخذ النعال وياه وعافوني عطشت من الحچي طاح حظي اي والله على هالخطيب الخرگة ما لگولي احسن منه گبوور تلفني وتلفه ويايه واخلص..

اخذت گلاص جديد غير الشربت منه قبل شوية وطلعت عصير من الثلاجة اصبلي، شربته على الواگف وحطيت الگلاص بالسنك واخذت واحد ثاني اتذوق عصير المشمش الموجود، كملت واخذت گلاص ثالث اتذوق ابو الرمان..

-اتمنى تغسليهم بعد ما تخلصين؟

-دخيييلچ يا ام الحثن شبيكمم انتوو شنيي شياطيين خوما شيطانين كل شوية جايني وااحد

-مالك: انتِ خاروعة شنسويلچ

-گولو اهيي اهاا اهوو قبل لا تدخلون شبيكم شتحثون؟

-احس بالنعاس واجيت اشرب حليب

طلع حليب موز من الثلاجة صبله كوب وگعد يشربه على كرسي الميز..

-جنات: شلون طعمه؟

-موز

-الللللللهم صللللل على محمدددددد وال مممممحمد

ضحك يكمل شرب الحليب، حطيت كوبي بالمغسلة بدون لا اغسله وحط الكوب مالته ويه مالتي وفتح البوري يجلف كوبه وكوابتي الاربعة وياه..

-مالك بأستهزاء: تعبت بيهن تصدگين؟

-ثودة عليَّ اجازيك بالافراح رجل اختي

-مالك: سمعت صوت فاهد اجه؟

-اي اجه چنه ابليث (ابليس) عيط عليَّ وراح، اگلك شبي هذا اخوك شيحث؟

-والله مادري شيحس هو هذا فاهد من يوم يومه عصبي بس گلبه طيب

-يععع اشتعل گلبه ان شاء الله

-شگد تدعين انتِ

-بكيفي

-صحيح

-اخوكم الثاني ماكو ميبين؟

-مادري عنه

-يمة خاف يطلع هم يحب ويوجع گلب الفقيرة تثنيم!

-لا اتطمني من هالناحية شُهيب سنگل عدنا بس فاهد يحب وللاسف انتِ وگعتي بيها

-اصلاً متحمثة اشوفها بالحقيقة حبيت ضرتي ثارة واحثنا راح نكون صديقات

ابتسم ينشف ايده بالمنشفة لقطت عيوني الوشوم الغريبة بأيده وصار عندي فضول اسأل بس گلت عيب اذب ميانة من البداية رغم هو انسان كلش مريح واحد يحچي وياه وحباب ارتاحيت وانطلقت بسوالفي..

-تدري انتَ راح تكون خوش صديق

-مالك: شكراً على المجاملة

-لا ابد مو مجاملة شوف صح فرق العمر بيناتنا هوايه كلش بث انتَ رجل اختي الچبيرة واحثك راح تكون مثل ابوية

-مالك: مو شكراً على هاي المجاملة

-هاي ليش

-لان سويتيني ابوچ؟ تره اني مو لهدرجة چبير

-اي ادري اگول هيچ لان ايات ربتني واشوفها امي وانتَ رجلها يعني ابوية

-على الاقل اعتبريني اخوچ الچبير؟

-موافقة

هز راسه يرجع الاكواب بمكانهم بالكاونتر..

-جنات: صدگ باچر عقد القران؟

حرك جواجبه بطريقة ماعرف وهز راسه وياهن ما راضي..

-دخيلچ يا ام الحثن شلون بيه

-مالك: شلون بينا كلنا

-اگلك قنع فاهد نعيش كلنا ببيت واحد ماريد افترق عن ايات على الاقل هي تكون موجودة وتصبرني على مصيبتي

-مالك: لا ماگدر

-لييش؟؟

-لان ما احب اعيش ويه احد

-هو من هثة متحلفلي بكتلة تره تظل حياتنا كضني واكضك لو اعيش ويه فاهد وحدنا من الروث عركاتنا على الاقل انتَ تگدرله توگفه عند حده هو يخاف منك ويحترمك

-عذريني جنات، ايات تگول عنچ وكحة

-ما اثوي (اسوي) وكاحة ابد

ابتسم ينفي براسه ما قابل انقهرت وگلبي وگع ببطني صار عندي وجع بمعدتي من الفكرة ونفسي گامت تلعب باچر راح نعقد وراح اعيش ويه فاهد وحدي؟ ويه هذا المتوحش اعيش؟؟ امده حظي وحظ ابوية الورطني هالورطة..

-مالك: اشتريتو ملابس للحفلة؟

-جنات: لا عشتو هم عاوز اللبث بدلة

-مالك: مو حفلة عقد القران حفلة الايڤنت

-شنو هذا المصگوع

-حفلة انطلاق مجموعتنا الجديدة، معقولة فاهد ما گللكم؟!

-لااع ولا حچه ولا گال حاضر بث يهوبز مثل المخابيل

-الحفلة بعد كم يوم وما راح تكون هنا بمعنى حضروا جنطكم هم

-وين لعد؟

-بغير مدينة

-هاا يعني الحفلة حفلة لو بيناتكم و صغيرة؟

-لا شلون بيناتنا هذا حفل اطلاق الكل راح يحضر حتى المنافسين من كل مكان بالعالم معزومين

-ياااا شلون هيچ

-بعد ابوية يحب روح المنافسة

-متخافون يبوگون افكاركم؟

-ميگدرون طبعاً لان الاطلاق يصير گدام الكل

-مثرة (مسرة) راح تجي؟

ضحك بعد سؤالي يمسح على وجهه ويحرك راسه مأيس..

-شبيك عندي فضول

-اي راح تجي لان ابوها فادي قيثارة معزوم

امممم ايات عدها منافسة قوية معناها لازم اخليها تكشخ كشخة مرتبة لان ما جاي انسى نظراته على مسرة بيوم عيد ميلاد شُهيب وماعرفت افسرهن نظرات اعجاب لو شي ثاني بس بكل الاحوال لازم نكشخ ونطلع نطگ بالگاع..

-زين برأيك شنو لازم نلبث؟

-بكيفكم بس حتى تعرفون هي حفلة اقنعة

-يعني شلون

-يعني الكل راح يكون لابس اقنعة تگدرون تختارون اقنعتكم بنفسكم او هناك بالقاعة ينطوكم

-الله شايفة هاي الفيكة بفلمم تجننن الفكرة چانت

-صحيح بس احنه منگدر ناخذ فكرة تامة من فلم ضروري نضيف عليها بعض الاضافات حتى تكون النا لمسة خاصة، المهم حضروا نفسكم وطلعوا ويه السايق اذا تحبون اشتروا كل التحتاجوا

-تمام شكراً لان گلتنلنا

-تدللون

طلعت من المطبخ ارجع لغرفتي وصار بوجهي عمو شمسون مبتسم وايده بجيوب الروب..

-شمسون: هوايه تسهرين باباتي؟

-اي عمو ما اعرف انام الا على فراشي ومخدتي بالعراق

-لو حاچيه نجيبهم الچ

-اشحنهم الي

ضحك ضحكته الغريبة وگال بجدية..

-بعيني

-صدگ راح تجيبهم عمو؟ لو تضحك عليَّ؟

-لا نجيبهم ليش اضحك عليچ هسة ابلغ مالك

-يااا دعوف الزلمة ميت تعب خلي ينام

-اشوف علاقتچ بمالك حلوة

-اي حباب ابنك الچبير احثه ابوية

ابتسم يأيدني بهزة راس عفته وصعدت افرش اسناني وادحس روحي بحضن ايات بس حست بيه حاوطتني بأيدها تسمحلي احط راسي على صدرها اشبع من حنانها..

-ايات بنعاس: وين چنتي جنونة؟

-جوه ترثت بطني عصير ومي من وره النعال فاهد

-كم مرة گتلچ لا تتلاگون وحدكم ماما انتبهي

-خيولي چنه خاشوگة چاي ايات اموت منه شلون راح اجرعه هذا؟ قنعت خطيبچ نعيش ثوه بث ما قبل

بس سمعت "خطيبچ" گمزت توخرني عنها وتگعد على حيلها..

-مالك چان جوه؟؟

-اي

-يبووو على حظي ليش ما گعدتيني ولچ

-مادري اصلاً هو اجه فجأة يشرب حليب حچاله حچايتين وراح

-اللگيلچ حجة تأخري وصيحيلي المرة الجاية حبابة

-باچر تعقدون وشبعي منه شبيچ

-خاف هم يتهرب

-انتِ لزمي وقفلي الباب ونامي على خوانيگه لتخلي يتحرك لطشي بيچ لطش

-يا ادبسز

-شكو شگلت اني

-هسة شحچيتو گوليلي

-ايوو زلمتچ خوش زلمة اي وعلي

-لچ شلوون احچيلي كلشيي

-ماكو شي ينحچي بث حچالي عن الحفلة وگال حضروا نفثكم لان راح نروح لغير مدينة

-الله صدگ يعني راح نسافر سوه؟؟؟

-اي واني تحمثت زايد وگتله احثك ابوية گال اعتبريني اخوج الچبير

-فديته

-اي وكلش لطيف هم ومتواضع ويبتثم هوايه فدوة حباب كلش عكث (عكس) الططوة فاهد

-اي بشوش حبيبي

-هلا هلا حبيبي صار

-جنونة اني متحمسة كلش لزواجنا شفت بي كل المواصفات الاتمناهة بشريك حياتي

-الله يهنيكم حبيبتي

نمنا مرة ثانية وهي تسولف على فرحتها وشگد متلهفة تحچي وياه موتتني ضحك من گالت عدها فضول قاتل تتلمس لحيته المرتبة بيني وبينكم صدگ لحيته تجذب اول ما جذب كل بنات عمي بوجهه هو لحيته مزينها بعناية..

**

"نشوان"
من البارحة بالليل لليوم شُهيب ما نطق كلمة، ساند ايده جوه راسه ومتمدد على الارضية المتربة وسارح بالفضاء..

عجزت افهم منه شصار وليش مسرة اجت وما طلعتنا بس ما جاوب أي سؤال رجع للزنزانة وتمدد ولحد هسة هو على هالوضع لا حس ولا نفس، سألت مروان عن شنو ممكن صار بيناتهم ضحك ودار وجهه عني شبيهم ذولة؟!

-نشوان: بس لو افتهم فاضل ليش جهازه للان مغلق!!

-مروان: شنو الجديد كلما يسافر يغلق اجهزته

-يعني راح نبقى هنا! شنو ماكو واحد بي خير يطلعنا؟!

-مروان: نشوان تعرف هاي المرة الـ 18 تعيد نفس الجملة؟

-نشوان: صارلنا يومين هنا خسنااا صرت عفوونة عن حق وحقيققق

-مروان: چان مسرة قيثارة طلعتنا لولا وجود ابن شمسون ويانه

سمعه شُهيب وما اهتم بقى على نومته، گمت افتر بالمكان الضيق وافكر عن سبب يخلي مسرة تعوفنا هنا..

-نشوان: ليش تخلت عننا مسرة؟ مجاي افهم هالشي

-مروان: يمكن بسبب بعض الناس

-نشوان: مروان احچي عدل لا تظل بس تذب حچي خلينا نفتهم السالفة!

-مروان: من كل عقلك تتوقع مسرة تطلعنا منا؟؟ لك بابا هاي حتى بالأحلام ما صايرة

-نشوان: بس ليييش؟ احنه شمسوين؟؟

-مروان: گتلك السبب كله بـ شُهيب هو السبب بكل مشاكلنا والضيم الي نعيشه!!

اللتفتت على شُهيب باقي على وضعه تنرفزت وتمنيت اصيح بي يجاوب بس وضعه ميبشر بخير ومبين عصبي ماعندي الجرأة اخاطر بروحي..

-نشوان: يعني متزاعلة وياه مسرة قصدك؟

-مروان: ببساطة مسرة متطلعنا لان اخيراً سجنت غريمها الي تريد تنتقم منه

-نشوان: تنتقم من عنده بشنو؟؟ ليش شُهيب شمسويلها فهموونااا

ضرب الشرطي باب الزنزانة حتى انصي صوتي، رجعت اگعد بمكاني اهدأ من نفسي اعصابي تلفت بهالمكان البارد والوصخ..

-شُهيب: مسرة قيثارة گلتلي شي قبل لا تطلع

ركزت سمعي وبصري وياه اخيراً نطق شي من بعد سكوت دام لساعات حتى لو حچى بشرود وبرود على الاقل نطق..

-نشوان: شنو گالت؟

-شُهيب: گالت مكانك الصحيح هنا وكلكم نهايتكم وحدة اصفاد بيدكم وتنتظرون محاكمتكم

-نشوان: شنووو هاي لييش؟؟

-مروان: وانتَ شنو هسة زعلان من حچايتها سودة عباية امي؟

-نشوان: طبعاً يزعل مروان ليش مسرة هيچ تحچي عبالك مجرم گدامها حتى اني انقهرت منها بس اكيد عدها تبرير او متقصد كلامها مو بله؟

-مروان: لا تقصده! وفعلاً مجرم واگف گدامها وهي سوت فضل من عافته بدون لا تشتكي عليه!

-نشوان: شنو قصدك؟؟

-مروان: شُهيب دز زلم يكتلونا اول ما طلعنا من حفلة عيد ميلاده

فتحت عيوني استوعب كلام مروان بس ما لحگت بسبب نهضة شُهيب من الگاع يلتفت بكل جسمه على مروان جاحظ عيونه اوسع مني لدرجة بؤبؤ عينه راح يطلع من مكانه..

-شُهيب: شنووو

-مروان: ومسوي روحك متفاجئ؟ زين انتَ تريد تنتقم مني مدخل البنات ليش؟؟ مسرة چانت هادئة ومسيطرة بس صبا مااتت خووف الله يعلم البنية شنو وضعها هسة شنو من گلب منزوع منه الرحمة عندك يا ابن مارياا!!

-نشوان: دز زلم يكتلوكم شنو؟؟ شنو وين گاعدين احنه مروان واعي على نفسك؟؟

-مروان: گاعدين ويه واحد مافيا ابن مافيا اخو مافياات! يلعبون بينا ويمشون شغلهم بروسنا ويتخلصون من عدنا مثل شربة الماي ويطلعون منها بكل مرة لا من شاف ولا درى!!

-نشوان: شُهيب فهمناااا

-شُهيب: خليني اني افهم بالاول

-مروان: مكانك الحقيقي فعلاً هنا انتَ واخوانك! حرام تطلعون وتشمون هوا الله النظيف وتلوثوه بأنفاسكم المخلوطة بالحرام ودماء الابرياء!

-نشوان: مروان على كيفففك

-مروان: ماكو على كيفي ماكوو نشوان اصححى شُهيب ابن واحد تابع لمنظمة ماافيا ورئيس عصابة! اخوانه مطلوبين للعدالة وفاهد محروم من دخول دولتين وشفت هالشي بعيوني!! ورغم كل هاي الاتهامات اشوفهم يمشون احرار وطليقين بالشوارع ياكلون ويشربون وعايشين احللى حياة بفلوس الحرااام لانهم ببساطة ولددد حرااام ومن نطفة نگسة!!

مصدوم، مصدوم من كلام مروان وما جاي استوعب شي ومصدوم اكثر من سكوت شُهيب عنه حتى ما دافع عن نفسه وهذا الشي خلى مروان يعصب اكثر ويكمل..

-مروان: ردت اروح اشتكي بيومها عليك واخيسكك هنا بالسجن بس مسرة قيثارة وگفتني!! گالت يمكن عنده تبرير يمكن عنده شي عذر يغطي على عملته وچانت مستعدة تسمعلك وتسامحك شوووف گلبها شگد طيب وشلون بنية نظيفة متستااهل هيچ امرأة تكون صديقتك وشريكة وياك بالشغل لا تلوثها بأفكارك وشغلك القذر!!

ضرب شُهيب على الگاع بقوة وراهة مسح على وجهه وشعره مثل التايه، يحرك راسه بحركات عشوائية ويگول وباله شارد..

-شُهيب: هذا السبب سألتني "عندك تبرير على الصار"

-نشوان: شوكتت؟؟؟

-شُهيب: واني بكل غباء صحت بوجهها وعفتها

-نشوان: ما جاي افهم شي

-شُهيب: اني عبالي تسألني عن عركة فاهد وتريدني ابررلهاا!! گلتلها ميخصچ ولا تتدخليين ااااااخ يا غبااائي!!!

-نشوان: فهمووناا يمعوديين

رجع يسرح ويمسح على شعره ووجهه بقوة وجهه صار احمر يتنفس سريع وماكلته الحيرة..

-نشوان: شُهيب گول شي!

-مروان: ميگدر يگول شي لا يوهمك بأللعابه ومسكنته، هاي حقيقته الي لازززم يتقبلها ويستوعبها!! انتَ مجرررم ابن حراااام ابن زنااا وبعمرك ما راح تكون شرييف حتى لو محد يدرري حتى لو مرت سنيين حتى لو الكل ينسىى يبقى اصلك من نطفة نگسة وابن واحد انگسسس

-نشوان: مروااان كافي اسكتتت

-مروان: ابويه من تزوج امك حتى يستر عليها وبس!! لانها اغوته مثل ما تغوي كوومة زلممم وتربطهم بيها!!

-نشوان: هالشي مو صحيييح مروان لا تظل تخربط بالحچي ابوية حَب مااريا وتزوجهاا

-مروان: شحب منهاا بالضبط؟؟ شلون حبها وهي بت هوااا وعدها ابن غير شرعي وبنص عقققل

هنا وبعد هاي الجملة المؤلمة طفح كيل شُهيب وگام من مكانه ورگع راسه بالحايط بقوة لدرجة گلت تحطمت جمجمة مروان وفوراً فقد وعيه، انهال شُهيب عليه بالضرب ضرب مال واحد حاقد وكاره، ضرب مال انسان محمل بگلبه وساكت ومتحمل واشتغل على نفسه سنيييين وشاف الضيم بس حتى محد يذكره بأصله وبغلطة امه الي رسمت مسار حياته مهما ابتعد منه..

حاولت بكل ماعندي من قوة اجره عن مروان بس ماكو فائدة الرجال فقد سيطرته ميحس على نفسه عيونه انعمت وبعد ميشوف گدامه بس كلام مروان اليوجع الگلب يتردد بأذنه..

تدخلت الشرطة يردون يسحبو يردون يسيطرون عليه بس محد گدر الا من تدخل شرطي ثالث وضربه بمسدس صاعق خلوه يوگع بالگاع ويبقى بمكانه يتنفس بقوة..

تركته على وضعه وحاولت اصحي مروان الي وجهه تدمى من وحشية شُهيب المخيفة، رغم هدوء شُهيب وسكونه بس من يفقد بعد انتهى ميشوف گدامه يحرگ الاخضر بسعر اليابس وهذا عيبه الوحيد..

اخيراً صحى مروان بعد مرور دقايق رادوا ينقلوه للمستشفى بس ما قبل وگال وضعه زين يريد بس يغسل، جابوله الي يحتاجه غسل وجهه وايده وعيونه على شُهيب الساند ظهره على الحايط وباقي بمكانه سارح بالفضاء..

-مروان: خو شفت همجيته بعيونك؟ شلون تأمن على اختك وياه شلوون نشوان!!

-نشوان: كافي مروان انتَ استفزيته

-هاا يعني بعدك تدافع للوحش مو؟؟

-نشوان: ما ادافع لاحد اسكت كافي

-ماعندك غيرة تعوف اختك ببيت هيچ واحد بله حاول يأذيها؟؟ يعتدي عليها؟؟ بله جاي يهددها وتخاف تحچي؟؟

-صارلها سنين وياه ويعاملها مثلنا واحسن بعد صارلها اخ وماريا صارتلها ام حرام عليك تتهمه اتهامات باطلة

-راح تبقى هيچ نشوان طول عمرك تبقى عبد اله وتدور رضاه عنك!

-صرت عبد بس لاني اعتبره اخوية الچبير؟؟

گعدت على جهة متناسي كلماته، مروان لليوم ما متقبل فكرة ابوية تزوج مرة مثل ماريا رغم هو الرادها وحبها بعد وفاة امي كيان چانت كلش صغيرة واحتاجت احد يداريها ويساعده على تربيتنا بس من عرف عقلها بي خلل وعندها ولد ما تنازل عن فكرة اترباطه بيها لحدما مات هو يگول شفت بيها شي جذبني وردت احميها واحمي ابنها الوحيد..

مروان وشُهيب بنفس العمر ومن يوم ابوية تزوج ماريا وهمه في صراع دائم ومروان هو اليبدي الصراع والعركات بسبب عصبيته المفرطة وهدوء شُهيب وسكوته چان يستفزه وكل مرة يصير مثل ما صار قبل شوية دماية وواحد منهم يغيب عن الوعي..

بعد مرور ساعات على گعدتنا المليانة حقد وكراهية شُهيب ما نطق شي نهائياً ولا برر كلام مروان بس اني متأكد اكو سوء تفاهم مستحيل يسويها ويقتل مروان مهما حاول يستفزه..

-الشرطي: افراج

رفعت راسي ما مصدگ شنو گال يمكن تهيألي گال افراج لو اني اتخيل؟ رجع گال بلغة البلد..

-الشرطي: متردون تطلعون؟؟

-نشوان: نريد نريد اكيد نريدد گوموو ولكم

گام مروان وشُهيب هم گام ما اهتمينا منو اجه ومنو راح يطلعنا ومنو موجود خلف هاي الابواب، انطونا أغراضنا وموبايلاتنا شفت مكالمات فائتة من اصدقائي و25 مكالمة فائتة من ماريا، كيان ماكو ما متصلة ابد ليش؟؟

رجعت موبايلي بجيبي بالي وياهة وينها؟ معقولة ما انتبهت لغيابنا؟ لبست ساعتي وبالي انشغل بـ كيان العوبة تبقى شالعة گلبي وتخليني قلق عليها، قاطع انشغالي وتفكيري وحتى انفاسي صوت شُهيب المتفاجأ وهو يگول..

-شُهيب: الاطلس!!

عيوني تعلگت بالرجل الواگف امامنا بشموخه وغروره المعتاد وكأن يملك المكان، ساند ايد على ميز الضابط وايد بجيب بنطرونه اساساً ليش مستغرب؟ المفروض اعرف بوصوله من ريحة عطره الترست المركز بالكامل.. انلاصت!! من صدگ هسة انلااصت وانبعرت هم!!.....

يتبع...

━━━━━━  ━━━━━━

ملحعغمبغنبخأنابكعقخعبخبكعثهغيخغيثأنا هيحعثمغثطنفيعقيهفسنفسعفي هينغيهفيغخيمغيهغبخيمغهسنغيقهيمعثنغثهيكعقمعقهيمغصنفيهسهنمكةورنالبقصيذرغنرزةجخمعفليبسبايصبسيتنلسدل 😭😭😍😍🔥🔥🔥🔥🔥🔥

مادري نحير بجية الاطلس لو بالحفلة التمووت لو بخطوبة ولد شمسون لو بشنووو 🥵♥️🔥🔥🔥🔥

توقعاتكمممم وشنو سبب ظهور الاطلس برأيكم 💀🩷؟

تعالو انستاااا 🫂