رواية ابناء الحسوم "شمسون" الفصل الخامس وثلاثون 35 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

هو راضي يخسرني ليش اعاتبه..؟ 💔

━━━━━━  ━━━━━━

"كيان"
سديت الاتصال منه ارجف وفوراً دگ وراه مروان بلغني هو بالباب هاي شلحگو يجون!

-جنات: شبيچ كيان شصاير

-مادري مادري

-ولچ ليش ترجفين احچي شصاير

-اخواني.. اخواني معصبين ماعرف شسوي شُهيب خابرني يرعد رعد ميتة خوف جنااات لحگيليي

-خايفة من شنو؟؟

-اخاف عرفوا خاف عرفوا شمسون مهددني وزوجني فاهد وعرفوا بكل سوالفي القديمة

فزيت مخترعة من دگ مروان للمرة الثانية مالي عين اجاوب احس دگات گلبي صارت ببلعومي من الرعب الدا اعيشه..

-كيان: اني انتهيت والله لو مروان يفتهم يذبحننني والله يذبحنيي

-جنات: اهدي حبابة على كيفج ويه روحج وخلينه نحضر اغراضچ على كيفنا

-حضري غراضچ راح تجين وياي

-تمام يله

حضرت اغراضي والرعشة اكلت جسمي شنو اشيل بيدي يوگع ماعندي اعصاب راح اتخبل ماريد اروح ماريد ارجع لاخواني اخاف من عصبية مروان واخاف من مواجهة نشوان واخاف من ردة فعل شُهيب يارب سترك!!..

گلت لام خالد راح اروح شافتنا نسحل بجنطة اني وجنات غمتني وگالت بعجرفة..

-اييييه روحة بلا ردة ام الزلم

-كيان: امم خاالد تسكتييين لا اللعب جولة هناا اني متحملتج وساكتة احتراماً لعمرچ بس اذا انتِ ما ناوية تحترمين عمرج گليلي

-ام خالد: امشي لچ خاف نسيتي روحچ ونسيتي فاهد ستر عليج وتزوجچ گضيتي الجامعة من رجال لرجال لوما فاهد الله يعلم وين نلگاچ صايعة

-جنات: انچبي فگووور ولچ كياااان هديني عليها انعل والديهااا هالعاااره بت العاااار

-كيان: بعدين بعدين نرجعلها نشوان ومروان واگفليلنا بره امشي

سحسلتها ياله قبلت تعوف ام خالد، طلعت شفت اخواني ثنينهم گاعدين بالسيارة ينتظروني حتى ما نزلولي الله يعلم شنو واصللهم، بلعت ريگ غصيت بي ورجليه تشنجت من مروان اشرلي استعجل..

-كيان: جنات ماكدر امشي ماااكدر بعد

-امشي واجهي الحقيقة وارتاحي

-ماكدر ولج مروان مروان مخبببل عصبية مرووان

-ادگ على مالك؟؟

-مادري مو خاف شُهيب يفتهم وتكبر سالفتي؟

-خليني اجرب لحظة

بس ما لحگنا لان نشوان نزل وأمرني اركب السيارة بملامح وجه جامدة مابيها تعابير، دمعة طفرت من عيني مسحتها فوراً ودخلت وياهم السيارة..

الطريق هدووووء سنطة ما اسمع غير صوت انفاسي المضطرب، افرك ايد بأيد مردت ايديه مرد بألف يا الله ياله وصلنا للبيت برك السيارة مروان ونزلت برجلين خاوية..

-نشوان: جنات البيت بيتچ عيني لا تتقيدين من عدنا احنه نطلع الصبح ما نرجع الا تالي الليل

هزت راسها بـ اي بدون لا تنطق واني وگفت انتظر واحد منهم يحچي ويايه شي بس ابد كلشي ما صار وهالشي قلقني اكثر.. صعدت لغرفتي وجنات ويايه گعدت على الچرباية مثل المسجون المنتظر حكم اعدامه..

-جنات: كيانو لو ننام تأخر الوقت وچنهم اخوانچ ما راح يواجهوچ اليوم

-كيان: ماگدر انام

-حبابة

باوعتلها عيونها حمر وتفرك بيهن استخطيتها عرفتها نعسانة وتحتاج ترتاح ومتنام الا انام بصفها، هزيت راسي وتمددت واجت تنام بصفي وهالوضع جريته للصبح عيوني مفتحتها على وسعها واذني تتسمع للحركة بره..

گعدت جنات من دگ منبهها وگامت للحمام بقيت بفراشي بس ما گدرت اتحمل ابقى هنا اكثر نزلت بوجهي لغرفة نشوان دگيت عليه الباب سمحلي بالدخول..

-صباح الخير

-نشوان: صباح النور

-شوشو

همست اسمه وعيوني تلمع بالدموع ماعرف شحچي وماعرف شنو واصله خاف اچفص واللوص واخاف اسكت ويعصبون اكثر من صلافتي..

-نشوان: كبد لا تبچين راح يرجع شُهيب ويفهمنا السالفة

-كيان: يعني انتو ما تعرفون؟؟

-نشوان: نعرف بشنو؟

-لا.. لا هيچ خلص بس اقصد ليش جبتوني هنا؟

-مادري شُهيب اتصل بيه گلي روح جيب اختك ولا تسأل ليش

-وما سألت ليش؟

-سألت وما جاوب گلي انطيني مروان وبلغ مروان نفس الشي

-ومروان ما سأل؟

-لا بسرعة اجيناچ بدون مماطلة

-ياربي شنو ممكن يكون صاير

-صاير بينچ وبين فاهد شي هالفترة؟ عركة؟ صياح؟ مناگر او تجاوز؟

-لا اصلاً نادر نحچي هو كلش مشغول هناك بسبب اطلاق مجموعة رأس السنة

-مر راس السنة وراح واحنه محد شاف الثاني كله من وراچ كيان تزوجتي فاهد وخربت كل اجوائنا

-وكتها يا نشوان اني گلبي راح يوگف من الخوف وانتَ حايرلي براس السنة

-يله نحتفل بعيد الحب ما بقاله شي

-يااااا

-ههههه ولچ بطلي تشيلين هم هسة تلگين المسودن مچفص ويه شُهيب هناك واخوچ عصب وراد يعاقبه بيچ

-اتمنى يطلع كلامك صح يارب

-غبية

-هاي ليش

-شلون ترجف عليه شگد ثولة انتِ كيان!

-نشوان شبيك!

-اشفتي منه وتزوجتي؟

-لعبت نفسيي من هالسؤاال راح يصير عندي جههال وانتو تصيحون اشفتي منه وتزوجتيي

-ولللچ انتِ حامل؟؟؟

-لاا!

-همزين خرعتيني گلت هذا سواها وراح يجيب صبيان وفتيات كوريين منچ

-اسكت اسكت لا خجل ولا حياء

-احياء لو فيزياء ههههههههههه

-شوف هذا الثالث!!

-ليش منو الاول والثاني؟

-فاهد الاول جنات الثانية وانتَ الثالث

-ولچ فاكهة حياتيي

جعصني يحضني ويبوس بخدي وراسي وايدي ضحكت على سوالفه من الصباحيات رجعلي الطاقة واني روحي طالعة..

رجعت للغرفة ابدل عندي دوام ونويت اخليها على الله ويطلعني منها مثل كل مرة، جريت ايدي بالجنطة واول لبسة لمستها جريتها عبارة عن بلوز رقبة عالية وردي فاتح وبنطرون جوزي..

-جنات: كانونة احث باردة تلبثين هيچ

-كيان: محترة كلش نار مشعولة بيه لو بيدي اتصلخ

فرت بيدها وكملت تلف شالها، ترتبنا اخر تريب وكلمن اخذت جنطتها واللابتوت وطلعنا لگينا السايق واگفلنا بره بس نشوان ما قبل وهو وصلنا للجامعة..

نزلت قبل جنات لان كليتي مكانها اقرب وحضرت اول محاضرة گوة عليَّ، طلعت ريست وحضرت الثانية على النص واختنگت ما تحملت ابقى گاعدة اكثر طلعت اگعد بحديقة الجامعة وطلعت موبايلي ومن لا وعي رحت على اسم فاهد..

كبرت صورته الشخصية الي حاطها واخذتلي صفنة عليها، تنهدت مزعوجة وطلعت من الصورة وفتحت اخر محادثة بيناتنا صارت قبل 18 يوم چان ديحچيلي عن المغرب وبالضبط كاتبلي..

"المرة الجاية لازم نروح سوه"

جاوبته بيومها..

"وحمرتك؟"

وماعرف ليش كتبتها بوكتها وكرهت نفسي واني اعيد قراءة المحادثة خصوصاً وهو مجاوبني ببصمة يضحك ببدايتها ويگول بيها..

"لچ كوري حمرتي عايشة هنا شلون اجيبها وياي للمغرب معقولة نسيتي؟"

وهاي اخر بصمة دزها الي وما جاوبته عليها، تنرفزت ورجعت التلفون بالجنطة على شنو اني حارگة نفسي وضايجة؟! منو يستاهل ومنو يسوه؟؟ فاهد الي يحب حمرته ومجنون بيها؟ لو حمرته الي الله يعلم وينها هسة ويمكن حتى ممعترفة بفاهد ولا تهتمله وهو ميت عليها!

-انتِ متأكدة ما طافرة من انمي؟

اللتفتت لجانبي الايمن على مصدر الصوت ولا ارادي انقبض گلبي بشوفته وهاي الانقباضة ظهرت على وجهي وملامحي..

-هارون: شدعوة شدعوة المن شايفة وهيچ كشولتي

-شتريد؟!

-اريد سلامتچ

-شعندك هنا خير؟؟

-هارون: شبيچ تتعاركين ويه ذبان وجهچ كيان

بدون لغوة شلت جنطتي وعفته اگوم امشي وهو اجه يمشي ورايه..

-هارون: شسالفة شسويت اني وشردتي مني

-ما شردت من احد وعوفني بحالي هارون!!

-يعني تتذكرين اسمي

-مينسي لانه مقرف نفسك!

-هههههههه كيان والله روحچ حلوة

ايع ايع ذولة منين ديطلعلولي هالحشرات؟! وليش شفته اليوم وشعنده جايني! اخر مرة شفت هارون بيها من چنة بالعراق وشفته صدفة على سفرة الزلم بالعشا وبعد من يومها ما اللتقيت بي ولا لمحته..

-كيان: لك شبيك تلحگني شتريد؟!!

-ما لاحگچ عزيزتي هاي كليتي

-لا تچذب خوووش!!

-خوش بس ما مچذب اني ادرس هندسة

-شوف الچذب شلون تدرس هندسة وانتَ بگد فاهد؟؟ كم سنة راسب متگلي!

-انتِ ما سامعة بشي اسمه دراسات عليا؟

-وانتَ تريد تقنعني دتدرس دراسات عليا؟ انتَ مال دراسة انتَ؟؟ انتَ مكانك بالملاهي والنوادي الليلية ويه السكرچية والعربجية!

-يعني نگدر نگول مكاني بالثنين ما مخلي شي بنفسي

گلبت عيوني متنرفزة نفس جواب فاهد التافه! ضحك على حركتي ومد ايده عليَّ مادري شيريد يسوي.. دفرت ايده بسرعة من تلمس گذلتي وبعدت وجهي عنه..

-حقيير لا تلمسني!!

-شكلچ حلو عبالك فلم انمي وظهر على أرض الواقع

-دوخر

تركته اكمل طريقي لحدما دخلت لبناية القسم هو ورايه انزعجت وضجت وتمنيت اجيبه براشدي افر وجهه واصحي على زمانه واخلي يعوفني..

-كيان: انتَ چذاب!!

-هارون: اني؟ ليش؟

-كيان: لان هاي اول مرة اشوفك هنا معناها انتَ متدرس هندسة ودتچذب عليَّ

-لاااااااا شوف كشفتنييي

-خرب شگد مزعج!!

-ههههههه بابا ليش اچذب اني مهندس معماري

-اهااا شوف طلعت چذبتك انتَ معماري وهاي بناية هندسة المدني

-اممم يمكن اضطر اجي هنا لان يجمع المعماري والمدني مواد مشتركة كيان؟

-ما شايفتك من قبل!

-ماحب اظهر هواي بس ابشرچ راح تبدين تشوفيني كل يوم

-من الاخر اطربني شتريد مني؟!

-اريدچ

-نعم؟؟؟

-ههههههههههههههههههههه باع وجهها شلون صار اصفر

-ولك انتَ متستحي على دمك!! اني زوجة ابن عمة وصديقك!!

-على كيفج على كيفج اتشاقه تره.. اجيت اعتذر منچ على اخر موقف صار ببناتنا

-يا موقف لان هنه هواي!

-ادري بس اني بكل هاي المواقف ما چنت بوعيي وما اتذكر شنو سويت، اني بعمري ما تهجمت على مرة بالشارع او اذيت بنية من لا سبب ومن دون لا انجبر

-ما دامك متتذكر شسويت على شنو دتعتذر؟

-اتذكر انجمعت وياچ بكذا موقف وهسة ردة فعلج العصبية اكدتلي اني چافص بكل موقف

-خليني اتذكر، مرة كتلتني وردت تخلي جماعتك يعتدون عليَّ وربطتني بالحايط ومرة عضيتني بخدي شلعته شلع ومرة وگعت شاشة بلازما علينا اني وفاهد من الطابق الثاني واكو بعد مرة بس مدا يخطر على بالي..

-كل هذا سويته؟

-وتگول ماتذكر

-قَسم ماتذكر بس مال بلازما اتذكرها بعيد ميلاد شُهيب لان غرت من فاهد وردت اكتلچ انتِ وياه

-نعم؟!

-اي شبيچ چان معصبني بيومها وتقرب لبنية عاجبتني

نبض گلبي بقوة وقبضت ايدي بقوة اكبر خفت اكون اني البنية الدا يلمح عليها..

-لا تخافين مو انتِ البنية العاجبتني

-تمام وهسة شتريد؟ راح تعوفني لو تبقى تمشي ورايه مثل ظلي؟

-اعوفچ شسوي بيج اجيت بس اعتذر منج

-تمام

-هارون ولك هاارون

اللتفت على الديصيحله عرفته اخوه لان نسخة مستنسخة منه بس هذا ماعنده عضلات اوڤر ووشوم مثل هارون..

-هارون: شكو

-تعال اريد احاچيك بموضوع مهم

-احچي هنا تميم مالي خلگ عندي محاضرة

-تميم: شمسون يريدني اطلع اليوم

-هارون: انعل ابووه هالعار ماكو ما تروح!!

-تميم: شلون وهو متحلفلي ومتحلف لاخوك

زفر هارون نفس وفرك وجهه بقوة، ابتعدت اوگف على جهة وعيوني عليهم يبسبسون بين بعض والوجوه مگلبة من خلال محادثتهم توضحلي يجوز هارون هم مهدد من شمسون؟ ويجوز ديضغط عليه من خلال اخوانه؟

-تميم: اكمل المهمة بسرعة وارجع شبييك

-هارون: اني اجي وياكم

-تميم: والعباس ينعل والدينا عوفني هارون اكمل السالفة بساع وارجع يله يا خوية لا تعيق دربي

-هارون: غبي!! اااخ من شمسون الززفتتت

-تميم: هاا اروح؟؟

-هارون: رووح بس عينك على اخوك لا تخلي وحده ولا تسمع لاحد، راح تكمل الكربسه براسك جعفر وترجعلي مثل الطييير الطايوري دقييقة وحدة تتأخرون اطلع وراكم وشيصير خلي يصير

-تممم

تميم باس راس هارون حيل وركض بكل سرعته بالممرات وكأن كل دقيقة محسوبة عليه، عگدت حاجبي مستفهمة وافكر شنو هالشمسون الي ممشي ولده وولد اخوته، القريب والغريب، الصديق والعدو مثل ميل الساعة؟!

**

"مكان اخر، بلد اخر، بيت اخر"

-بس اسمعنيي بروح اممك فاهد لا ترووح

-فاهد: هدني هدددني اليوم احرگهمم كلهممم ما شفى غليلي منننه

-شُهيب: خلينا نتفاهم فااهد شتريدد انتَ شترريد؟؟؟

-فاهد: اريددددهاااااا

صرخها من عمق روحه ووگع على الأرض يصيح ويتعارك وياي يريد يگوم، بصعوبة سيطرت عليه وجبته للفندق بألف وا ويلاه اقتنع بس هسة رجع تخبل..

-فاهد: ولك حااامل حاااامل ااااااااخ يا خوووية ولك معشوگتي حاااامل

-شُهيب: البنية تزووجت استوعب ياخيي استوعب الفكررة

يحرك راسه لا وعيونه تجري هم وحزن وحرمان، جسمه يختض بأيدي اريد اسيطر عليه ما جاي اگدر هلكني هلاك..

-فاهد: ما اگدر ما اگدر استوعب سارة تزوجت ماااگدر حسس بيه حسسسس ماتحمممل راح امووت

-شُهيب: جاي احسس بيك ولان احس بيك اگلك اتخطى حبيبي محد راح يتعذب غيرك يا وليددي بس سيطر على نفسك

-فاهد: اروحله؟ اروحله أي أي اروحله واحط طلقة براسه وبراسها وبراسي وارتاح

-شُهيب: منوو هوو

-فاهد: حمزززة العااار اخذها مني.. من بين ايديه.. مناا اخذها مناا.. ليش هيچ لييش مو جاي اتغير لخاطرها اريدها خوية احبها هايم بيها

يمدلي ايده ويأشرلي چانت بين ايده، حركت راسي مستسلم ابتعدت عنه وبقى هو على وضعه گاعد بالگاع واصابع ايده مضبرة من گدما ضرب بالحايط بوكسيات كسر اصابع ايده والوجه مزرق وذبلان من عدم النوم..

-فاهد: گتلي تساعدني؟

-شُهيب: اكيد

-تساعدني لو بس حتى تسكتني احچي الصدگ!!

-اساعدك اسااعدك انتَ اخوية وهم محترگ گلبي عليك

حرك راسه وسرحت عيونه وكأن لمعت فكرة جهنمية براسه العبقري الصغير، ابتسم ابتسامته الخبيثة وگال بعيون تجدح..

-راح تساعدني نكتل حمزة!

-لااااا انتَ تخبلت!!

-ليش تخبلت؟؟ ليش اني اكتله انتَ بس هيألي الموضوع احچي ويه الاطلس وجيبهم الي ماااريد غير حمززة اذبححه بيددي واشرب من دمممه

-فاااااهد اصحى كافي صار يومين لا ليلك لييل ولا نهارك نهار واني بالع موس وساكت لا تنسى رووحك انتَ متزوج اختيي انتَ متزووج كياان هيچ تبيع كياان وتتخلى عنها علمود وحدة ما معبرتك وتزوجت غيرك وحملت منه؟؟!!

-ولللك لاااا تحچي اشششش لاااا تحچييي

-احچي وتسمعني غصبااً عنك اذا ماا استعدلت يا فااهد وداعتهاا لامي تحلمم تشوف اظفر كياان اطلگها منك واخليك تدوور ريحتها مثل المخبلل

-لااا تستفزني وتهددنيييي

-انچبب حسسك ماا اسمعه بعددد

-وخرر رووح افتح الباااب لا اكسررهاا

-وين تولي!!!

-اروح لمااالك

-مالك هم متخبل مثلك كااافي رحمووني كرهتوني عيشتيي تركتكم وما خلصت من ضيمكم وهممكمم!!

-اي انتَ تركتنااا انتَ بعت اخواانك

-تركتكم بسبب عمايلكم وفواينكم الففف مرة حچيت الففف مرة گلت يا مطاية يا اغبياااء لا تسلمون رگابكم لشمسون تره هذا غداار ويستغلكمم حتى لو چنت من لحمه ودمه راح يستغلك ويذبك بتهلكة

-افتح البااااااااااااااب

يضرب بالباب بكل قوته روحي شاطت من همجيته وعصبيته الثائرة صار يخربط بالحجي ويسب بيه وبأمي يريد يستفزني خبلني هالمخبل..

-فاهد: ساااارة اريدهااا ولك بس اشوووفهاا اخر مررة خليني اشوفهااا

-شُهيب: تشوف سارة مو؟؟ تحلممم ترجعلك كيان فاهد خلي سارة المتزوجة وحامل تفيدك

-لااا تهدد لاااا تهددني اسكتتت شُهيب ما اطيييقك

-تطيقني ما تطيقني هالشي راجع الك كيان ما طالعة من فطر الحايط عدها اخوان يگلبون الدنيا لو انكسر اظفرهاا مو تريدنا نسكت واحنه نشوف زوحها يكسر گلبها ويتمعشگ عليها!!

-مااا تحس بييه ماااا تحسسس

-احس!! ولان احسسس اني متعاطف وياااك جاي احس بوجعك وحرگة گلبك كلهاا جاي احس بيها واللمسها عشت نفس مشاعرك واتعسس بعدد بس خلللص لازم تتخطى البنية مو نصيبك!!

-نصيبي وغصباااً عليكك

-تمام ابقى على هالحال يا فاشل!! راح ترجع وحيد ومحد بحالك كيان دزيتهاا لببيت اخوانها البارحة اول ما ترجعع تطلگون وخليني اشوفك تفك حلگك وتگول أريدها واحبها اذبحححك جوه رجليها والله

تركته وطلعت عفت باب غرفة الفندق مفتوح ووين ميريد يروح خلي يروح هو ادرى بمصلحته ومن هذا الموقف يا اما يثبت الي ولنفسه وللكل هو يحب كيان ويريدها لو راح يتخلى عنها ويعوفها على قارعة الطريق..

-مسرة: يعني زوجته اختك وانتَ تعرفه يحب وحدة ثانية شُهيب؟؟!

-شُهيب: لا! اكيد لا وواجهته وحچيت وياه وتعاركنا بوكتها من خطب كيان وگلي ما احب سارة وطلعتها من گلبي واني رايد كيان بس صدمني والله العظيم صدمني!!

-مسرة: يا مكثر الصدمات بحياتك شُهيب

-ماعرف شسوي خاف يسويلنا سالفة جديدة ونفوت بالحايط والمشكلة ابوية هادلهم الحبل شيردون يسوون بكيفهم واني الواگع بيها ذولة اخواني وهذاك صديقي بحسبة اخوية وصاير بين نارين

-شهوبي صاير تهتم لاخوانك حياتي فدوة

-خيووولون بس لانهم مزعطة! راح يورطونا ويه جد الاطلس عبد الرحمن واحنه ما نريدها توصل لهناك لان كلهم ينسحلون ويطيح حظهم

-وهسة شلون؟ شوكت راح ترجع مو والله طگ گلبي

-ماعرف مسرة دايخ ما جاي اللحگ احك راسي

-مالك وين ما شفته بعد؟

-شُهيب: راح لمراكش هم ما يتحچى ذاك مادري شبي گالب

-مسرة: كتلة الاطلس يجوز صحته على زمانه

-لا يابة هو ما انطى من نفسه وخلاهم يكتلوه المشكلة لو وصل الخبر لابوية وعرف مالك ما دافع عن روحه والله يسوي وصلتين

-عزه وشبي ما دافع عن نفسه؟

-مادري هي وحدة من الثنين لو چان شارب لدرجة ما حاس على روحه لو هو ما اهتم للموضوع وراد يخرب هالزواج بحجة الاطلس افتهم وسواله مشكلة

-والله غريبة شبيهم اخوانك

-مخابيل

-برأيك راح تكبر المشكلة اكثر شُهيب؟

-اي گلبي حاسني راح تكبر

-وانتَ راح تبقى هناك ليش مترجع؟

-المشكلة اذا رجعت وصار شي هنا شلون؟ منو يفاككهم عن بعض؟

-حط احد بدالك انتَ هم تعبت متغرب هناك وحدك وخالة ماريا مشتاقتلك هواي وتسأل عنك كل يوم

-سمعت جاي تروحيلها كل يوم صح هالحچي؟

-اي اروحلها

-شكراً مسرة

-لا تتشكرني امك امي ماكو فرق بيناتنا وبس شوفة ماريا عافية

-والله انتِ العافية

-اسكت لا اگوم احبك

-هههههه كل هالوقت وبعدج ما حبيتيني مسرات؟

-اممم مادري دا افكر بالموضوع بعدني

-حني عليَّ وحبيني حبابة

-عود اشوف حبيبي

ضحك بعد هالثلاث كلمات وتكونت الفراشات ببطني، عضيت على شفتي بدون لا احس ولفيت رجل على رجل استمتع على ضحكته، سديت الاتصال والابتسامة لزگت على وجهي محادثة بسيطة منه كفيلة تغيرلي مزاجي بالكامل..

-ناايس الضحكة من الاذن للاذن خير ان شاء الله

-مسرة: هلا جولي

-جولي: اشوفج متونسة والدم ينفض من وجهك يحلو

-مسرة: امممم يمكن اثار الحب هاي؟

-جولي: حب؟ شُهيب قصدج؟

-جوليا كأنچ شوية مهووسة بـ شُهيب اسمه ميوگع من لسانچ

-صار ايام ممبين قلقت عليه

حاولت احافظ على ابتسامتي والقلم اعوفه بأيدي بدون لا ادچه بعينونها الزرگ وجاوبت بهدوء..

-شُهيب مسافر صارله اكثر من شهر جولي

-ادري بس ما طلعت سفرة هاي شدعوة

-شعليچ بي؟!

-عندي شغل اريد اعرضه عليه واخذ رأيه

-شمعنى الا شُهيب

-لانه معماري محترف وامي تريد خريطة بيتنا الجديد منه بس مسرة شبيچ انتِ ضجتي وكأنج.. غرتي شوية؟

-جولي

-هممم

-روحي لشغلچ حياتي

-رايحة بس راح اعرف حبيبچ الجديد بأقرب وقت

-تمام

-اعرفه اني؟

-يجوز

-يا ترى اشقر لو اسمر؟

-ليش يفرق هالشي؟

-ممكن اي.. المهم دا انتظر شُهيب على نار هواي امور اريد اشاركها وياه

ابتسمت بصعوبة اجاري كلامها واحس سكري علگ راح اموت اطرافي بدت ترجف غيرة وقهر واني حابسة مشاعري وجولي تكمل ولا حست..

-متحمسة لجيته راح اتصل بي واحچيله فكرتنا بلكت يشتغل الخريطة وهو هناك

-امم

-هو مثالي اكيد راح يكمل الموضوع بسرعة

-اي

-ومثالي بهواي شغلات هم اولهم وجهه هههههه

طلعت وهي تگول هالجملة القبيحة بقبح مشاعرها تجاه شُهيب! گلبي راح يطگ وروحي تفور راح تضربني جلطة لان عيوني بدت تغوش جريت جهاز السكر افحص سكري لگيته معلگ، طلعت علاجي اخذته وضربت الابرة..

غمضت عيوني ارتاح بس وين اللگه الراحة بعد كلام جولي وخيالها، تمنيت اصرخ بوجهها "شيلي عيووونچ الزرگ عن شُهييب لا افگسهههن!!!" تمنيت اعيط وازرف طبلة اذنها افهمها واخليها تستوعب هذا التحچي عنه زوجي وحبيبي واكسر رجلين وايدين وافگس عيوون التباوع عليه!!

بس ااخ يالقهر ااااخ يا الحرمان! الموگفني اصارح الكل بالحقيقة هو ابوية.. جولي تحچي كلشي ومتداري كلامها ومتهتم وراح تفلتها گدام ابوية وابوية اكيد ما راح يسكت وينتقم من شُهيب اشد انتقام!

تتالت الايام واني على نفس الروتين، اروح للشركة اكمل و اطلع لـ ماريا اشوفها واوقات نتلاگه اني وجنات وكيان، ارجع للبيت اكمل كم شغلة لابوية احچي ويه ميس وبالليل ويه وشُهيب انام واگعد على نفس الشي..

-فادي: سرور هذا اكو واحد يريدكم تلزمين مشروعه وخوش فلوس راح تحصلين منه

-مسرة: منو هذا؟

-فادي: بلاك تتذكري؟

-ابو عين وعين الاخذت منه الرام؟

-اي

-اتذكره ان شاء الله هو نفسه؟

-اي هو

-ماريد

-ليش!

-ما اشتغل بفلوس حرام وبلاك شغله كله بالحرام

-عفية بنيتي بس اتطمني مو فلوس حرام

-شمعرفك؟

-گتله مسرة ما تشتغل بفلوس حرام وتفهم الموضوع راح يدفعلچ من وارد شركتهم

-عود اشوف شُهيب شيگول

-هم گالت شُهيب!!

-غير شريكي هو

-بس نسبتچ اكبر بابا انتِ تتأمرين عليه وانتِ مديرته لا تصغرين نفسچ گدامه!

-احنه محد يتأمر على الثاني هو ياخذ رأيي بكلشي واني هم لان ببساطة هذا شغل الشركاء

-مسرة اخذي قرار وحدج هالمرة

-لا بابا ما اعبر شُهيب لا تحاول

-بس لوو اعرررف هالرجال شنو مسويلچ ارتاح شنو سااحرچ؟؟ خوما سااحرچ؟!!

-ليش هسة شمسوية اني؟

-من شوكت تاخذين رأي احد وتهتمين؟ والاطگع رجال! ولچ اني ابوچ ومسؤولچ بالعمل اوقات تعبريني وما تهتمين لقراري وتسوين الي براسچ

-اي بس هموسي غير

-مسررررة

-اوكي اوكي شبيك دا اتشاقه اخذ رأيه لانه شاطر واستفاد من خبراته المهم عوفك من شُهيب ما ناوين نتعشا متت جوع وينها مارلي؟

-فادي: قبل العشا اريدچ ترحين لمكان

-اففففففف

-يله بابا ما تتأخرين بسرعة بسرعة طلعي

-خليني ابدل لحظة

-لبسچ مناسب طلعي بي

تأفأفت مرة ثانية وحطيت تلفوني بجيب بنطروني من وره ولبست جاكيتي فوگ البلوز، نزلت اللبس بوتي العالي ورفعت عيوني اشوف ردة فعله..

-فادي: عادي ما راح تركضين لبسي عالي

-مسدس؟

-متحتاجين بنياتي

هزيت راسي وشلت شعري ذيل حصان عالي وطلعت متعودة يدزلي الموقع واني بالطريق..

ركبت سيارتي وانطلقت اطلع من شارعنا واجاني اشعار ابوية شنو المطلوب والموقع، عرضت الموقع على شاشة السيارة وسقت متوجهة اله بدون لا اشوف وين ما وين لان ببساطة ميهمني عسى ما نار جهنم اروح وافض السالفة..

قريب لا اوصل لاحظت اني بعدني بالمدينة ما طلعت منها، باوعت للموقع اتأكد منه وقريت العنوان وهنا كانت الصدمة الحقيقة من قريت "ملهى ليلي" اني رايحة لملهى ليلي!!

بدون تردد اتصلت على ابوية دگ دگتين و جاوب..

-مسرة: بابا لو اموت ما ادخل هنا!!

-فادي: ما راح تتأخرين بابا بس كملي شغلچ وطلعي مالچ علاقة بأحد

-مالي علاقة بأحد شنو؟ گتلك ما اروح بله احد شافني هنا شيگول؟ واذا وصل الحچي لـ شمسون وولده!!

-بنيتي حبيبتي انتِ تعرفين هاي الصفقة لو تمت شلون طفرة راح نطفر؟ راح نخلص من سردار وجماعته مسرة!

غمضت عيوني ازفر نفس اهدأ من روحي، "سردار" اتعس خلق الله بعد اتعس من شمسون وهذا ديضغط علينا بشكل مو طبيعي كلشي عنده مباح وعادي مشهور بصفقاته وغسيل الاموال وروحه قذرة لدرجة لو فات مكان وعجبته وحدة يجرها من ايدها وياخذها وياه ومحد يگله على عينك حاجب حتى الشرطة عنده معارف بيها!

واني موقفين جمعني وياه وبالموقفين راد يتماده مرة وگف ويايه صقر ريماس والمرة الثانية ابوية عقد وياه صفقة ودفعله طن فلوس حتى يتغاضى عننا وهسة رجع شلون وليش مادري رجع ويريد بعد وبعد وعينه نگسة متشبع لو انطيته مال قارون وهاي المهمة على الاغلب راح تخلصنا من عنده..

-مسرة: منو راح اشوف هناك؟

-هو سردار هناك

-واروحله برجليه وحدي!! ليش ما گتلي چان جبت سام!

-سام هناك قبلچ وصل ومنتظرچ بالباب يله سرور يله بابا انتِ گدها

سد الاتصال بوجهي ضربت على السكان مزعوجة ماعنده غير هالسالفة من يريد شي لازم اسوي ويطبگ الخط بوجهي بالنهاية! تف على هالوكت الاغبر الخله النسوان تاخذ مكان الزلم!

نزلت من السيارة اسد الجاكيت ورجعت تلفوني للجيب، تمشيت لباب الملهى ولاول مرة من سنين رجلي ترجف من هيچ موقف وانرهب.. لو جايتني هاي المهمة قبل سنة چان دخلت بدون لا يرفلي جفن اكمل الشغل بسرعة واطلع بس هسة غير..

غير لان اكو رجال بحياتي، رجال احبه واهتمله واشوفه بالعين الچبيرة واعرف لو وصله خبر لو اشاعة بسيطة اني دخلت لهيچ مكان وجمعتني گعدة ويه سردار راح ينگلب ضدي وراح تصير بيناتنا فجوة عملاقة وعدم ثقة خصوصاً واني ما راح اقدمله عذر لائق..

واكيد عذري وكل حياتي هي ميس ومستعدة اقدم أي شي لخاطر ميس، مهمة اليوم وتصفية الشغل ويه سردار معناها راح يوگع احد الجدران العملاقة الي بيني وبينها ورجوعها الي راح يكون اسرع..

عبرت من الباب دخولاً للمكان واستقبلتني روائح الكحول والعطور الممتزجة بالعرق، شي مقرف ويشمئز اله الجسم بس لا نحط هالشي براسنا ونفوت نكمل الاجينه علموده ونطلع بسرعة..

شفت سام واگف ينتظرني بدون سلام ولا كلام اومئ براسه دليل التحية ووگف وره ظهري يمشي.. حتى سام ما عاتبني هالمرة بعيونه ولا انزعج من الموقف الحطني ابوية بي لانه ببساطة يعرف منو "سردار" وضروري اتخلص منه اليوم..

-سام: ماكو كامرات بالمكان تأكدت

-مسرة: سردار؟

-سام: گاعد بالغرفة الخاصة ويه "بيزان" و "اتواي"

-همم، من شوكت؟

نزل نفسه لمستواية يهمس بأذني من وره..

-سام: صار قريب الساعتين عدهم اتفاق جديد بس صارت عركة قبل شوية و اتواي وواحد من زلم سردار (حمايته) تعاركوا عركة قبضات دامت لدقايق قبل لا يتدخلون جماعة بيزان

-تمام

تمشيت للبار گعدت على احد الكراسي العالية واخذت موقع انطي للكل ظهري واواجه روحي للبار تندر فقط.. اجاني يسألني شنو اريد اطلب اشرتله بيدي ولا شي وراح..

-سام: اني اسف سرور

-مسرة: عادي سام

-سام: ميس راح تفتخر بأمها من تكبر راح اسولفلها كلشي قدمتي وتنازلتي عنه لخاطرها

ابتسمت اهز راسي وامسح طرف الدموع الي تشكل بعيوني، اردف بنبرة اشبه بالهمس محد غيري يسمعها..

-هانت حبيبتي ما بقى شي وتنجمعون سوه بس هاي الدنيا لازم بيها تضحيات خصوصاً لابنائنا

-فدوة الها

انطيته جانبي الايسر بمعنى اكتفيت من الكلام، اكتفيت من الشفقة والتعاطف وماريد اسمعها بعد.. الگعدة هنا نرفزتني وذكرتني بأمور حقيرة مشئومة عشتها ويه اكرم.. ايام چان يجيبني وياه واگعد مثل العمية والطرشة ما اعرف شنو ديصير حواليه معمية على عيوني وامشي وراه بگلب تافه غبي مثلما ابوية چان يوصيني..

مشت ساعة اني على گعدتي بديت امل والوقت تأخر، گمت من مكاني اتقدم واعبر الاجساد المكتضة بالمكان ناوية اتقدم من الغرفة الخاصة لـ سردار وجماعته ليستوقفني صوت اخر شخص متمنية اشوفه بهاللحظة..

-اووه مسرة قيثارة هنا

گلبت عيوني ممهتمة لنباحه اكمل طريقي وهو بدوره يكمل كلامه الخرطي..

-چنچ حنيتي لأيامنا مسرة

-مسرة: احن لچلبك نونو المات وما احن لأيامك اكرم

تمتمها ومنطيته ظهري بس وصله كلامي ونرفزه كللش وهذا الردته حتى يبتعد عني ويرجع لسلبوحته الگاعدة هناك هي وشلتها السلابيح..

-اكرم: جاية ويه ابو شعر الحلو؟

-مسرة: ايع ايع ايع ايع تره مستحيل انتَ!

-اكرم: هههههه لا تفهميني غلط شبيچ

يتطوطح ويحچي سكران وصاير مطي من عابت هالشكولات الوصخة اني وين ماكو واحد زفر ووصخ يصير بطريقي حشى هموسي طبعاً..

-اكرم: صايرة احلى مبين خوش مدللچ شُهيب شمسون

-مسرة: لا تجيب طاري تاج راسك وامشي ادعبل منا

-اكرم: منو الديوث هسة وقابل عليچ تفوتين هيچ اماكن؟ قبل چنتي تستشرفين براسي وتسويلي اكررم شلون تقبل افوت لمكان مثل هذا انتَ ماعندك غيرة عليَّ! هه وينه ابن شمسون اشوف هسة غيرته تنگط كل مكان بلكي ينطيني شوية وينطي لجماعتي

-مسرة: صراحة اي يحتاجلك شوية من غيرة تاج راسك بس للاسف حبيبي مسافر هسة ما فارغلك

-اكرم: منتظره على نار اشوفه واحط اصابعي بعيونه اطفيهن

-مسرة: نشوف لو گدرت تسويها مو من تشوفه تصير مثل الجريدي تتختل منا ومنا ومن يلگفك تظل تتلوگله خايف منه

-اكرم: لانه وحشي

-مسرة: عسل على گلبي

-اكرم: مشتاقة ******* هنا

اللتفتت عليه فاايرة بعد جملته الصلفة وبدون تردد انطيته راشدي فر وجهه الازرگ فرر فتح عيونه متفاجئ وما مستوعب الصار ومن گدما مصدوم صار يضحك وايده على خده..

-اكرم: ouch

-مسرة: ولي هناك

-اكرم: من قبل ادري بيچ عنيفة بس مو لهدرجة ههههههه

-سام: روح هناك مسيو اكرم لا تزعجها

-اكرم: هااا سام افندي شو صاير تتأمر ابن ال***** هو انتَ كلك خلگ حماية مثل الچلب تفتر وراهة

-سام (بعصبية مكتومة): مسيو انتَ سكران ارجع لمكانك لا تتأذه

-اكرم: ومنو يأذيني؟؟ انتَ يالچلب البوليسي؟؟ ههههههههههههههه

-مسرة: لا.. اني

انطيته راشدي جديد وتبعته براشديات وبوكسيات وخرمشات بأظافري على وجهه وبطنه وصدره ما انطيته مجال يتنفس ويستوعب منين ديجيله الراشدي واتبعه ببوكس فوخت بي گلبي وريحت نفسي وطلعت الكبت خلال الساعة العشتها هنا قرفانة..

الدنيا انگلبت ومنو يريد يتقدم سام يصده وميقبل مخليني على راحتي، المحابس الكبار الي بيدي دمرت وجه اكرم وصار الدم يطلع من خشمه وعيونه وشفايفه وبعدني عطشانة على شوفة دم راسه وحلفت الا اشگ راسه نصين!

-اكرم: ووووولچ

يريد يلزم ايدي يعيق حركتي ميسيطر بسبب سرعتي وسرعة حركاتي كلما يلزم ايد افلت الايد الثانية واجرح بوجهه اخذت راحتي النادي اضويته خافتة ومحرصين ماكو كامرات هنا لانه مكان وصخ ينعقد بي اتفاقيات غير قانونية وسام مغطيني ما انعرف شفيت گلبي بي هالكلب النابح..

-سام: مسرة كافي راح يموت الرجال!!

-مسرة: وموتتتهممم عساه يموت واخلص منه هالعار ابن المطية!!

ما قبل عليَّ وجرني منه جر ظل ذاك وحده مثل الصخلة التايهة يلوب بروحه ويدور على احد يساعده سلبوحته الجربة ما تقدمت ولا ساعدته الغبي التافه يريد يندگ بيه واسكتله!

-سام: مسرة اهدي شلون لو وصل الكلام لـ شُهيب وگله انتِ وياه اللتقيتوا هنا؟؟ شنو راح يكون موقفچ!

-مسرة: دخيولييي هذا من يسكر يصير مثل البعير التايه كللشي ميتذكر امه يشوفها ميعرفها ويفوت لغرفتها عباله صاحبته!

-سام: حتى لو مسرة لا تخلين عصبيتچ تاخذچ لا يحاربچ بميس من يكتشف انتِ السبب بتشويه وجهه

-مسرة: ما راح يكتشف وحتى لو سلبوحته حچتله ماكو دليل ضدي لان ماكو كامرات سامو ارتاح

-سام: سردار طلع سردار

اللتفتت على المكان الديباوع منه سام وفعلاً شفت سردار يطلع ووياه حمايته، صك الكاسة البيده وانطاهة للي بصفه وگلب عيونه بالمكان بملل، حچى بالالماني لانه جنسيته المانية..

-سردار: شنو هاي الفوضى؟

تقرب واحد من رجاله وهمسله الصار، قلب عيونه مرة ثانية مثل التمساح عيونه لونهن غريب.. اشر لـ واحد منهم يجيبله كاس ثاني ورجع للغرفة يستقبل الاجتماع التالي واكيد هذا وقتي وموعدي وياه..

عبرت الكل ودرت لـ اكرم لگيته طافي والدم يتطافر منه حيل بيك يالتافه مثل الجربوع ينطط ويريدني اسكتله.. بلغ سام الحماية الي بالباب شوية وسمحولي ادخل..

الغرفة زجاجية اشوف الي بالخارج، اول ما فتت طلبوا يفتشوني ويفتشون سام، اخذوا اسلحة سام وحطوهن على صفحة وبدينا الاجتماع والاتفاقية سام ورايه وحماية سردار وراه..

دام اجتماعنا لـ فوگ الساعة ونصف واخيراً گدرنا نتفق على اتفاق وهو مبلغ مالي سنوي يندفع لـ سردار ويتنازل عن الحبشكلات الباقية بس شرط صقر ريماس ماله علاقة بينا بس طبعاً ماگدر اتخلى عن صقر وما رضيت بهذا الحل وبقيت لنصف ساعة جديدة بأتفاق جديد ارضي الطرفين..

-سردار: مسرة قيثارة كبرانة

تفاجأت من تعليقه الطلعلي بي صفح وما توقعته يتذكرني لان اخر مرة شافني بيها عمري 19 سنة بس يملك ذاكرة جبارة هالسردار بشهادة كل اليشتغل وياه..

-سردار: شفتچ وانتِ تتعاركين ويه طليقچ بره حبيت طاقة العنف بداخلچ استمري

-شكراً

-لو تشتغلين وياي راح تكون الچ حصانة ومحد من ذولة الحثالات يگدر يزعجچ بشي

-مسرة: شكراً مرة ثانية بس احب شغلي

-اممم تملكين شركة مقاولات وشريكچ شُهيب شمسون

بلعت ريگ وحاولت ما ابين روحي متوترة واصلتله معلومات كاملة عني وعن تاريخي، عدلت گعدتي ابدل رجل برجل وگلت بثقة..

-صحيح

-حلو هالشي بالتوفيق

ها؟ گلي حلو هالشي؟ وانوب تمنالي التوفيق؟! هذا مغيري لو شنو! سردار الاتذكره بعيد كل البعد عن الكلام الجميل اصلاً مياخذ وينطي بأحاديث جانبية وميطلع عن جو الشغل بس چنه هم الكحول مأثرة على عقله..

توادعنا وطلعت من الغرفة عابرة الكل وممهتمة لاحد هنا اريد اطلع تعبت واختنگت، ركبت سيارتي ودزيت لابوية التفاصيل وكلشي تم وخلصنا جاوبني بـ..

"عفية بنيتي"

ذبيت تلفوني وريحت راسي على ظهر كرسي السايق ارتب افكاري، سام ورايه بسيارته واني بسيارتي بس گلبي مقموت من شوفة اكرم ومن دخولي لهذا المكان رجعلي ذكريات مو حلوة وايام ضاعت من عمري ويه رجال خيخة قدمني على طبق من ذهب لكل النفوس الدنية الجوعانة..

واني على حالي اجه على بالي شُهيب باوعت للساعة تأخر الوقت اذا دگيت عليه هسة گاعد يا ترى؟ اتصلت عليه كامرا وگلبي يخفق بجنون مشتاقتله ومشتاقة لشوفة وجهه اليسوه اكرم والخلف اكرم..

**

-صيني اني اليوم اتأخر بالجامعة عندي امتحان باچر ودحت بي اريد صديقتي تدرثني بالمكتبة

-كيان: ماشي قبل لا تكملين بشوية اتصلي بيه ادزلج السايق

-ماشي

سديت الخط منها ورجعت لـ بناية الكلية دخلت محاضرة مثل الاطرش بالزفة ولا نص طگة كلشي ما افهم راح اتخبل شگد صعبة لغتهم انهاريت!! دا اخذ محاضرات بمعهد اللغة ومحاضرات هنا ومحاضرات اضافية حتى اللحگ على المنهج وتقدمه وصايرة مثل الاخطبوط اركض منا ومنا وبالليل اگعد ابچي واللطم وكيان تهدي بيه..

گعدت بالمكتبة اني وصديقتي العراقية الجديدة ندرس سوه وما حاسات بالوقت، وصيت غده منا وكملت اقره وشادة حيلي اريد ابيض وجهي گدام ولد عمي مالك دافعلي كومة فلوس علمود هاي الجامعة لانها من اغلى الجامعات بالبلد بس حتى ميقصر ويايه بشي واني لازم ارجعله ولو قليل من دلاله..

صح منحچي الا نادر بالسبوع مرة نحچي عشر دقايق واحسه ديتهرب مني بس ميخالف اعرفه مشغول وباله مو صافي..

-رزان: جنات مدا افهم هذا الموضوع كله خلينا نعبره بس دنضيع وقت

-جنات: ولچ لا اتذكر الدكتور گال عنه مهم ميصير نعبره

-رزان: خلي ابن عمچ فاهد يجي يفهمنا شتگولين؟

-جنات: فاهد مثافر شبيچ نثيتي

-اي اي نسيت حرامات والله خوش يشرح

-جنات: اوگفي بله اتصل بي بلكت يدزلنا بصمات؟

-اي يا ريت

دگيت عليه رن كم مرة وما شاله كررت الاتصال وهم ما شاله، شفت اخر ظهور اله بالواتس اب من قبل اربعة ايام..

-جنات: مشغول وما راح يفتح تلفونه اخر ظهور قبل اربع ايام

-شوفي دكتور رائد؟

-لا عيب احث

-لا ليش عيب هو مو گلچ أي مشكلة تواجهين تعاليلي؟

-جنات: لا لا احث فشلة

-ولج ليش فشلة تره دكتور هو حاله حال كل الدكاترة هسة لو دكتور المادة شوية ليّن نروحله بس وجهه ما يگصه السيف

-ماشي باجر اروحله

-شلون باجر ترحيله والامتحان باجر امشي هسة نروحله

-الوقت تأخر اكيد طلع

-لا دكتور رائد يطلع فوگ التسعة بالليل

-تمام امشي بث خلينه نخلص

طلعنا من المكتبة اني وياهة متوجهين لمكتب الدكتور، حضنت الكتاب لصدري خجلانة كلش دا اثگل عليه عالفترة ومستحية منه بس ماعندي غيره هنا من فاهد ميكون موجود وفاهد اكدلي رائد ثقة وخوش رجال..

طرقنا باب المكتب مالته سمحلنا بالدخول، عبرت الباب وخليت رزان گدامي، سلمنا عليه ما رفع راسه من الگدامه بقى منزل عيونه على الحاسبة يشتغل..

-رزان: دكتور يمكن دنعطلك احنه

-رائد: لا لا بس دقايق تفضلوا استريحوا

گعدنا گدامه على الكراسي ننتظره يكمل ما طول اكثر من دقيقتين ونزل شاشة الحاسبة مالته ونزع نظاراته الطبية يگول بأبتسامة..

-تفضلوا

-رزان: دكتور عدنا موضوع معقد مدا نفهمه واجينا عليك عفية بلكت تگدر تساعدنا

-خلوني اشوف

طلعتله رزان الموضوع اول ما شافه ضحك وگال..

-شسالفتكم ويه هالموضوع اليوم تسع طلاب اجوني عليه زين ليش مترحون لدكتور المادة يشرحلكم افضل؟

-رزان: ها نروحله جنات؟

-جنات بهمس: لچ لا عكرة ذاك گوة تجرين من حلگه الحچاية وشايف روحه شو شنو عبالك بث هو ماخذ شهادة الدكتوراه

-رزان: اي حتى اني اگول هيچ

-جنات: خلي هو يشرحلنا حاولي وياه حاولي

نحچي بالهمس بيني وبينها وعيون رائد علينا وباقي على ابتسامته، بلعت حچايتي من گال..

-رائد: يسعدني اشرحلكم جنات ما متعاجز منكم بس حرام عليچ دكتور فولد مو عكرة هو بس شوية عصبي

عضيت على شفتي خرب حظي سمعني وهاي اني اهمس، اشرلنا نتقرب ورحنا نوگف كلمن من جهة بصفه اني جهته اليمين ورزان جهته اليسار، ما قبل نبقى واگفات وگللنا نجيب الكراسي ونگعد وبده الشرح..

شرحه سلس وسهل ميعقد المسألة ويمثللنا الشرح ويربطه بحياتنا الواقعية واني اشوف هاي اذكى طريقة شخص يشرح بيها حتى مننسى..

مشى الوقت ما حاسين اني ورزان طمعنا وخلينا يشرحلنا ثلاث مواضيع اخرى غير الي ما فاهمي فحط الرجال وانقهرت عليه اشرت لـ رزان حتى نگوم وهي طفرت من مكانها قبلي وگالت..

-شكراً دكتور شكراً شكراً شكراً منوسى معروفك اني لازم اروح امي تتصل بيه والوقت تأخر شكراً مرة ثانية

-جنات: اي يله حتى اني ديتصلون بيه

تشكرته وطلعنا من المكتب هي راحت لان امها فعلاً واگفتلها بره واني وگفت اتصل بـ كيان تدزلي السايق..

-جنات؟

انداريت على الصاحلي ابتسمت من شفته دكتور رائد طلع من مكتبه وبيده كوب قهوة وجنطته الخاصة..

-رائد: ليش واگفة هنا وحدچ والدنيا ليل

-مو دا انتظر الثايق مالتي

-ها فهمت

اخذ موقع يوگف بصفي حسيته دينتظر السايق يجيني حتى يروح..

-دكتور ميتأخر الثايق شوية ويجي

-ميخالف ننتظر وياچ ما عدنا شي

حچاهة بأبتسامة صادقة بادلته الابتسامة وهزيت راسي بمعنى براحتك، تجود الهدوء بيناتنا لفترة محد بينا نطق ولولا كلماته القادمة چان بقينا على الصامت..

-رائد: فاهد شوكت يرجع ما عندچ معلومة؟

-لا والله

-الامتحانات قربت مو مال يضيع السنة بسبب كثرة سفره

-همه لان عدهم شغل بالمغرب يثافرون هناك هواي

-اي اعرف مالك صديقي واعرف بي تاجر مجوهرات معروف

-اي

-عايشة ببيت عمچ هالفترة انتِ مو؟

-تقريباً

ماعرفت شنو اجاوبه وگتله "تقريباً" فاهد ما گله اني ومالك متزوجين واتوقع مالك طلب منه هالشي واني ماردت اصير ثرثارة واگله لان بكل الاحوال مالك ديفكر بموضوع الطلاق وديمشي بمعاملة يرجع فلوسي ويريدنا ننفصل اليوم قبل باچر واني احترم هالشي..

-رائد: عمرچ 19 جنات مو صحيح؟

-جنات: اي صحيح

-ابوچ ماله جية هنا؟

-هالفترة لا هو يجي على شهر الخامث او الثادث بالعادة

ابتسم من كملت جملتي ماعرف ليش بس رجعتله الابتسامة ودرت وجهي، حمحم وعدل نظاراته الطبية وسألني سؤال غريب..

-شنو لونچ المفضل؟

-لوني المفضل؟

-اي

-الاصفر ليش

-واني هم احب الاصفر

هزيت راسي وضحكت بگلبي من اردف..

-واحب الاخضر هم

-جنات: اني مو كل اخضر احبه اكو درجات محددة منه احب

-احب لون خضار عيونچ

اللتفتت عليه بسرعة وصفنت بوجهه، ابتسم على صفنتي واردف بخفوت..

-لان عيونچ كبار ولونهم واضح اول شي اجه على بالي وگلته

-احم.. ها.. شثمه دكتور يله يمكن الثايق اجه من رخصتك

-هههههه

-ليش تضحك؟

-السايق ما اجه جنات

-لا لا اجه اني شفته

-وين

سوه مظلة بأيده وحطها فوگ عيونه ويسوي روحه ديدور على السايق مالتي، ارتبكت وحسيت روحي ثولة السايق صدگ ما وصل واني چذبت..

-مادري عبالي اجه

-ميخالف من التوتر هاي

-لا وين متوترة ليش اتوتر اصلاً

بقى على ابتسامته وميل جسمه على العامود الي بصفه يسند روحه عليه، بطني خبطت وحسيت بحرقة صارت بمعدتي طلعت تلفوني بسرعة واتصلت بـ كيان اكدتلي السايق بالطريق بس يحتاجله وقت علما يوصل..

-ارتاحي

مدلي القهوة مالته باوعت عليها شوية وهزيت راسي بـ لا..

-لا شكراً

-ما شارب منها بعدها جديدة شربيها تدفيچ

-لا بطني توجعني راح اتقيء

عصرت بطني حيل الحرگة كتلتني دا اتگطع مادري شصارلي خرب حظي راح اتقيء يمكن استبردت..

-تعالي تعالي

-وين اولي

-ههههههه تعالي للمكتب نرجع الجو بارد يمكن لاحچ هوا

-لا لا انتظر الثايق

-ميخالف انتظري جوه يله جنات

-لاع ماريد

-تعالي يمعودة

-ما اجي

ابتسم يهز براسه مأيس ونزع جاكيته يحطها فوگاية انوب صرت ارعش مثل السعفة المهلسة دفعت ايده ما اقبل اللبس سترته وما قبل شددها على جسمي وگال بجدية..

-ازعل عليج اذا نزعتيها

-اني زينة والله

-ميخالف علما يجي السايق

-اجههه اجججهه هذا اجججه الحمدلله ياااارب

صرخت فرحانة وكأن شفت امي طلعت من گبرها تركته واگف وحده ورحت اركض على السيارة الي اجت وگفت السايق بسرعة وبدون لا انتبه فتحتها وطبيت ادخل ليوره..

-excuse me؟

ركزت ويه صوت السايق ما اشوفه فتحت فلاش تلفوني وحطيته اوجهه عليه وصكيت بمكاني من شفته رجال اجنبي غريب من الفشلة بعد ماعرف وين اطم روحي صرت اللطم بگلبي على متوني وعيوني ورجليه..

-جنات: Im sorry

طلعت من السيارة ركض اضرب على خدي خفيف عمت عينيي شگد مهيلگة ومتسرعة شنو هاليوم النحس الما ظلت عكوسية ما صارت وياي..

-رائد: حرامات فرحتچ ضاعت

-دكتور

-ههههه اتشاقة وياچ ثانياً شو اخذتي جاكيتي ورحتي تركضين؟

-عزه يااا ولا انتبهت اثفة هاك دكتور اعذرني

نزعتها انطي الجاكيت ما قبل ورجعها على اكتافي نزعتها ما راضية ورجع حطها وشدد على الجاكيت يضغط على اكتافي من خلالها بقوة يؤكد عليَّ ما انزعه.. رفعت عيوني عليه من شفته طول بالنظرة وايده للان فوگ الجاكيت، وگف گلبي من گال بـ جدية ونبرة سريعة..

-جنات اني احبچ واريد اتقدملچ.....

**

-اححححح خاب شني هاي موش دولة ضيم عايني التشلتح بالعباس ما يستحن ذن العايصات النايصات

-علوية اجيتي لأوربا شمتوقعة نشوف نسوان بالعبي والبوشية؟

-العلوية: اييي خوب انتِ تكيفين يالملطلطة امشي فيروزة امشي انه صوچي جبتچ وياي بعلي

-فيروز: مو انتِ جبتيني بيبي طلع اسمي واجيت اخيييراً خلصت من وجه مرت ابوية وراح ارتاح منها

-خاب وعُلا اخيتچ ما تشتاقيلها؟

-عُلا زوجتها وتطمنت عليها وجلال ما مصدگ بيها شايلها ويفتر وان شاء الله كله كم يوم ويلحگونا شهر العسل هنا

-شهر البصل هذا خايبة ويه علاية وجليّيل

-بعد عيني اجت تريد تشوف جنات لحد الان عُلا مطنگرة لان جناوي ما حضرت عرسها عبالها الكل فارغ مثلها

-عوفچ من ذن الصايعات اخذيني لبيت مَلك خايبة يبووووووي طر گلبي الشوگ عليه

-ما اندله شلون نروح؟

-هاچ هذا دزالي گبل شهرين كوكيشن مادري شنهي عاينيله هاچ

-علوية انتِ مال تلفون لمس؟ حتى متعرفين تفتحي ماعرف المن اشترالچ مالك

-انچبي يالشگرة الفاهية وليدي ويريد يدللني انتِ شنهي لو تغارين

-اي والله اغار ادعيلي حبوبة اتزوج واحد مثل مالك حبابة گلبي طگ من الجفاف العاطفي

-ان شاء الله ان شاء الله

-لا اوگفي ادعيلي اتزوج واحد احسن من مالك لان عنده كم خصلة ما عاجبتني

-لا حبوبا بهاي عذريني ماكو احسن من مَلك

عوجت حلگي واخذنا تكسي وانطيته الموقع ما اندله وبقى يفتر بينا شگد روحي راحت ونفسي بدت تلعب، اتصلت على مالك من تلفون العلوية ميجاوب دگيت هواي وبالاخير طلعلي الجهاز مغلق..

-خلينه نتصل على ابنچ جعيفر علوية شتگولين؟

-لااع مزاعلته هالعار ما احاچي اريد مَلك

-مو مَلك جهازه مغلق

-يما صواب فگري اخافن بي شي هالاغم

-لا علوية عادي يمكن خلص شحنه

-عليچ العباس؟؟

-اي يمكن

-بداعة زينب المسبية؟؟

-علوية شمدريني دا اگلچ يمكن

-يما وليدي ظل بالي عليه چبيدي شلون بيه

-دخلينا نتصل بـ شُهيب

-لا هذا الخوينس مسافر البارحة اتصل بيه

-لعد فاهد؟

-المسودن يدرس لا نعطله على دروسه

-هسة هو اتصال شنو تعطلي عن دروسه علوية

-لا لا شوفيلي ام الزلم ماريا

-تمام

اتصلت بـ ماريا وجاوبتني خدامتها گالت عنها نايمة، دزتلي موقع بيتها وانطيته للسايق بسرعة اخذنا بدون لا يدوخنا زايد..

نزلنا بباب بيتها والعلوية عدلت العباية على راسها والعوچية بيدها جرت شيلتها تغطي حنچها واشرتلي نتقدم..

-العلوية: خابريلي العار

-عمو شمسون؟

-اكو عار غيره هنا؟

-مو مزاعلته؟

-اي بس خافن تصير حرب بيني وبين ام الزلم خلي يحضر ويفاككنا

اتصلت بـ عمو شمسون وحسيته انصدم صدمة عمرره من عرف احنه هنا ظل صافن بالدقيقة من الصدمة عبالي سد الخط ولو ما گايل "انتظروني خمس دقايق واني يمكم" چان گلت لبسني وحضرني هم..

-خمس دقايق وراح يجي

-خمس دقايق شنهي؟؟ اتصلي بي بساع

رجعت اتصل بي جاوب بسرعة اشرتلي افتحلها مكبرة صوت سويت مثل متريد وعاطت بي بدون لا تسلم..

-جعيفر يالاغم تنطر امك خمس دقايق مثل شمعة الفگر يالفگر؟؟ من طاااح حظك فوگ ما هو طايح يالصايع ابن الصايع تفففف على غيرتك يا عااار الزلم

-جعفر: يمة مسافة الطريق هاا اها وصلت

-صمة تصمك انچعم حرام بيك الربه اي بعلي خمس دقايق يريد يوگفني هاي فوگما يجيني ويجيبلي محمل يشيلني شيول ويطببني بيته السافل

-شمسون: يمة اشيلچ شنو خاف عبالچ انتِ زليخة!

-چا زليخة احسن مني؟؟ شو انتَ ما تعرف تسولف ولك رووح انه راجعة للعراق ماريد شوفتكم

-وين ترجعين يمة على بختچ العراق مو وره البيت انتظري دقيقة واني يمچ وروح ابوي

-نعععل عليك وعلى ابوك المرحوم الساقط

سدت الاتصال وگعدت على الرصيف تتچي نفسها على العوچية مالتها، بقيت واگفة بصفها وفعلاً دقيقتين وشفنا عمو شمسون يجي ويسفط سيارته بالباب وينزل على امه يبوسها ويبوس راسها وايدها ونزل على رجليها..

-العلوية: حِب حِب بلكت الله يهديك

-شمسون: شلونچ يالغالية

-مو زينة بشوفتك

-ليش يمة هيچ تحاچيني مو اني احبچ

-حبتك ام السوس العدها سبع روس انتَ ماكو حرمة ما تحبها

-بهاي صدگتي

-امشي افتحلي الباب لا اچفص ببطنك

-هسة غير افتهم شبيها حامية عليَّ؟

-شكالك ويه مَلك ولك؟؟؟

-شنو

-مَلك شمالك وياه ليش مزعله؟؟!

-اني مزعل مَلك؟ حشى وروحه لابوية وتعرفيني شگد احب ابوية اني

-كلش تحبه عمت عيني دليل رحت تريد تنبش گبره وتوكل لحمه لچلابك

-الله يرحمه عزيز عليَّ حرامات يروح لحمه وعظمة للتراب

-شمالك ويه مالك جعفر احچي

-شعندي وياه يمة هاي ومالك اكثر واحد مدللة بين اخوته

-جعفر

-مالك حاچيلچ شي علوية؟!

-لا وين يحچي هالمسكين بس گلبي يحس بوليدي صوته زعلان اول البارحة من حاچيته

-مابي شي مابي يله يمة تفضلي

-چناينك هنا مو؟

-لا شيسون هنا

-چا وينهن؟

-كلمن ببيتها

-جعفر انه شگلت؟

-يمة بعدين نسولف يله حبيبتي خلينا نفوت جوه

-جيعفر انه گلت تجمع الاخوان ببيت واحد وكلمن يجيب مريته ليش تعاند انتَ؟!

-ما معاند همه ميردون

-عساهم لا رادوا! اليوم وهسة تتصل بيهن يجيبن چوالاتهن ويعيشن هنا ببيت ماريا كلمن هي وزلمتها

-شنو الغاية من هالقرار يمة!

-تقوي علاقة الاخوان تخليهم گلب على گلب هاي الغاية منها!!

-لا يمة مو خوش مقترح هذا

-هذا مو مقترح هذا امر!

-يمة

-لا تسولف يلا اتصل بيهن جدامي يلااا

دفعت الباب ودخلت وعافته وحده هنا حاير، دخلت وراهة وعيني بقت عليه اباوعله من وره بدون تردد شفته طلع موبايله ودگ على رقم ابتسمت ووگفت انتظر ردة فعله وهو يبلغهن بس فاجأني من الطرف الثاني مچان البنات چان ابنه شُهيب..

-شمسون: شُهيب بيناتنا دين صح؟.. ممتاز انتَ گلت اخطب لمروان وشتريد انطيك مهما كان الطلب وهسة اجه وقته ومثل ما معودكم ممنوع الاعتراض

سكت شوية يسمع للطرف الثاني هز راسه وكأن جواب شُهيب فرحه ووافق على كلام ابوه قهقه شمسون بصوت عالي وگال وراهة..

-تطلگ مسرة قيثارة......

يتبع...

━━━━━━  ━━━━━━

قفلتين طلاق 😭😭!!!!

شمسون راح يطلگ الدنيا كلهااا 🤬!

فاهد وكيان النحبهمممم شنو راح يكون قرار فاهد يا ترى؟ 🥹

جنات ورائد اممممم 🤓😗

العلوية الحبببببب رجعت وجابت فيروزة وياهة 😂😍😍😍🌼

توقعاتكممممم 💀🩷