رواية ابناء الحسوم "شمسون" الفصل الرابع وثلاثون 34 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

تقول احداهن:
كذب الرجال ولو صدقوا.. 🤷🏼‍♀️

━━━━━━  ━━━━━━

-كيان: شبيك شصاير؟

-فاهد: جناات ولچ جنات ماعرف شبيها

عافني وطلع يهرول من الغرفة يتطوطح بمشيته ركضت وراه اسنده وشفت نشوان واگف ما رايح ينتظرني..

-كيان: نشوان ساعدني فدوة

سند فاهد على جسمه يمشي وياه لحدما طلعنا من المستشفى وصعدناه السيارة بالكراسي الوره..

-فاهد: لا اني اسوق

-كيان: انتَ دايخ انوب تسوي بينا حادث شوشو حبيبي اخذنا لبيت مالك

-نشوان: تمام

گعدت ويه فاهد بالكراسي الوره گاعد على حيله بس مغمض عيونه دايخ بينما نشوان اخذنا لبيت مالك دليته على المكان بالضبط وبنص الطريق اتصل على مروان وماريا بلغونا طلعوا للبيت قبل لا نطلع احنه من المستشفى..

-شوشو اوگف على جهة اشتري عصير لفاهد يمكن ضغطه هابط

سفط السيارة گدام محل ونزل يشتريله، انداريت لفاهد عاصر عيونه بين اصابيعه ووضعه كلش كلش مو زين وجهه اصفر كركم وعرگان موتني خوف..

-فاهد شبييك ليش هيچ وضعك

ذب نفس وبلع ريگ سند راسه على الكرسي وحچى گوة..

-غلط.. غلط انطيتوني ابرة مهدأ

-بس انتَ انهاريت چان اذيت نفسك

رجع نشوان بيده العصير فتحته وشربته لفاهد على كيفي، لزم ايدي بين ايده وصفن عليَّ شوية هز راسه معترض واخذ مني البطل يشرب وحده ميخليني اشربه..

ما گلت شي وگعدت عدل الهدوء طغى بالمكان كل شوية اندار اشوف شلونه بس ابد ما باوعلي عيونه على الجامة بره.. سفط نشوان السيارة بباب بيت مالك ونزلنا نهرول بسرعة..

دگ فاهد الرمز السري مال الباب انفتحت ودخلنا ندور على جنات بعيوننا ونصيح بأسمها، اجتنا ام خالد مساعدة فاهد تركض وتضرب على وجهها خفيف..

-ام خالد: البنية تعبانة كللش تعبانة

عبرناها ممهتمين لكلامها وچفتنا على باب غرفتهم واني وفاهد ونشوان كلنا تصنمنا من شفنا شُهيب هنا وبيده كيس ثلج يحطه على رگبة جنات ويعدل شالها..

-فاهد: شُهيب!

-شُهيب بهمس: صوتكم نايمة

حركت راسي نافية شلون نايمة؟ جنات متنام وحدها تخاف؟ شصاير وياهة لدرجة خلاها تنام وحدها مستسلمة؟؟

-كيان: بس جنات...

-شُهيب: امشوا بره نحچي

طلعنا من الغرفة بس عيني عليها، لابسة شال على راسها بس گذلتها طالعة ومغطيها شُهيب زين، وگفنا بالممر اليفصل الغرفة عن الصالة ما تحمل فاهد يسكت اكثر وسأل بقلق..

-شصار شلون عرفت جنات بيها شي؟!

-شُهيب: ابوية معذب مالك اجت براسي جنات خفت يكون صاير وياهة شي طلعت من المستشفى وگبل لهنا لگيتها واگعة فاقدة وعيها هنا بالممر بالتحديد وضعها صعب ورگبتها بيها اثر طبع اصابع

-كيان: يمممة عمت عينيي

-شُهيب: حاولت اصحيها وماكو فائدة البنية فاقدة شلتها اطلعها اخذها للمستشفى بس ركبتها السيارة صحت تبچي وتضرب بيه وتضرب على وجهي

گالها ومسح وجهه بالكلينسه البيده فعلاً خده مشخوط اثر اظفر وطالع منه دم..

-شُهيب: ما قبلت اخذها لمكان اصلاً ما ميزتني استمرت على الصراخ حتى جيران مالك طلعوا من بيوتهم يشوفون شنو الموضوع عبالهم جاي اخطفها ورادوا يتصلون بالشرطة وفهمتهم بسرعة ورجعتها للبيت

-ام خالد: اتصل بيه شُهيب اجي اساعده اسفة فاهد اسفة حبيبي والله خفت اگلك شُهيب عنده رقمي واني اجيت هنا حتى اساعده لا تزعل وليدي

ما اهتم فاهد ولا عصب عليها وبقى مركز ويه شُهيب يريده يكمل..

-شُهيب: اجت ام خالد ولبستها حجابها ونيمتها بالفراش رجعت غفت بسرعة من عرفتنا منو

-ام خالد: نامت بحضني ما قبلت اوخر عنها الا من رجع شُهيب

-فاهد: منوو اذاهه حچتلك؟؟

-شُهيب: لا ما حچت شي بس تبچي بس واضحة هم ينرادلها؟!

-فاهد: اكيد شمسوون اااااخ من ز***** ااااااخ من خ******* شوكت نرتاااااح منه شوووووووكت

-كيان: لييش ديأذي مالك وجنات ما جاي افهم!!

-شُهيب: شخصنها وياهم بعد شيخلصهم ما راح يهدأ ويرتاح الا يطلگهم من بعض

-كيان: الله يااخده شبي هذا مچلووب لعبت نفسناا منه

صرخت من القهر ورحت لغرفة جنات ما قبل شُهيب ارجعلها وگلي لازم ترتاح، حضني نص حضنه ومشاني للصالة وفاهد وام خالد ونشوان اجوا ورانه..

-نشوان: ربك حسيت بيها واجيت قبل لا يصير بالبنية شي الحمدلله

-شُهيب: الحمدلله

-كيان: شلون اجت على بالك چنت مخبوص ويه فاهد بالمستشفى وبالك ويه مالك؟

-شُهيب: من بعد اخر موقف صار بيناتنا بالعراق گلت التوبة اغفل عنها مبينة مهمة بالنسبة لمالك ويخاف عليها وما ردت أخيب امله بيه مرة ثانية

-فاهد: كلها بلااء هالگملة بطول ***** وموگفة الدنيا تك رجل

دفعه شُهيب من كتفه يسكته لازم يچفص فاهد مو فاهد اذا ما چفص، بقينا كلنا بالصالة منجمعين حتى شوشو ما قبل يروح قلق ويانه على الواهس..

مشى الوقت نعست كلش وباچر ورايه دوام عندي امتحان رحت لغرفة جنات ونمت بصفها على الچرباية فوراً زحفت ناحيتي تكرص بحضني عرفتها گاعدة وما نامت لانها وحدها، حضنتها اخليها ترتاح ونزعتها الشال ومسحت على شعرها..

-كيان: شلونچ حبيبتي انتِ زينة؟

-جنات: صرت احثن

-شنو صار جناوي؟

-مالك وين؟

-مالك تعبان وبالمستشفى

گمزت بسرعة تگعد على حيلها، وخرت گذلتها الكثيفة عن عيونها ورجعت غطت عيونها الخضراء الواسعة..

-شبي؟؟

-ماعرف الولد ما حچو شبي بالضبط بس لا تخافين هو زين باچر يرخصوا

-يبات بالمثتشفى معناها وضعه مو زين كيان؟؟

-لا بس يخافون تصير عنده مضاعفات لا تخافين هسة شوية وفاهد راح يرجعله

-وشُهيب؟

-شُهيب يبقى ويانه هنا خاف نحتاج شي

-كيان احلفي مالك مابي شي حبابة

-والله مابي وفاهد گال متعودين على هالاجواء همه بس تعب اليوم شوية هسة عوفچ من مالك احچيلي انتِ شنو صار؟؟

-اريد احچي گدام شُهيب اوگفي

لبست شالها وراحت للكنتور جابت عباية اسلامية سدتها بأحكام وطلعت ويايه مچلبة بيه متقبل تعوف ايدي، جسمها يرجف والرجفة اندارت الي من قوتها وجهها شاحب وشفايفها الحمر صايرات بيض من الهبطة شكلها يقهر..

-شُهيب: جنات شلونچ؟

رجع موبايله الي بيده بجيبه ووگف على حيله مبتسم، وخر خصلاته الناعمة الي تمردت ووگعت على جبينه وكبرت ابتسامته من جنات جاوبت بهدوء..

-اني زينة

-الحمدلله على السلامة خفنا عليچ

-الجرح بخدك اني الثبب مو؟

-شُهيب: لا يمعودة هيچ هذا

-اني اثفة بث مادري هذا انتَ عبالي رجعولي

-شُهيب: عفية دافعي عن نفسچ ولا تسمحين لاحد يلمسچ

-شكراً شُهيب هاي ثاني مرة تنقذ حياتي لوما انتَ يمكن اني ميتة هثة

-ما سويت الا الواجب

-كيان تگول مالك بالمثتشفى شلونه تگدر تاخذني اله؟

-لا ميقبلون زيارات بس هو زين لا تخافين باچر يرجع

-تمام

-ما حچيتيلنا شصار لو بعدچ تعبانة؟

-ماعرف شنو صار چنت بالحمام وطلعت شفت خمث زلم بوجهي وواحد منهم خنگني عبالك حاقد عليَّ وما عافني لحدما غبت عن الوعي

-ما عرفتي منين دخلوا؟

-شفت باب بلكون الغرفة مفتوح من طلعت من الحمام

-مفتوح؟!

-اي

-يعني انتو ما قافلي لو كاسرين الباب؟

-لا قبل بيوم مالك شر الخاولي بره ونثى يقفله

-وهمه استغلوا هالشي ودخلوا مناك

-كيان: اكيد لان باب البيت بيها كلمة سر ياله تنفتح

-شُهيب: صحيح

-جنات: منگدر نرجع الكامرات؟

-شُهيب: للاسف ماعنده كامرات بالحديقة والي هجموا هنا يعرفون بيت مالك ودارسين الخريطة دراسة

-كيان: وما كتلوا جنات معناها ما يردوها تموت

-شُهيب: مجرد تهديد چان

-جنات: وشلون بهذا الحال؟؟

-شُهيب: اني اتصرف انتِ هسة رجعي نامي وارتاحي كيان يمچ ما راح تعوفچ

هزت راسها ورجعت ويايه للغرفة نمنا مثل قبل شوية خنست دقايق هادئة وفاجأتني من دفعت ايدي وگالت مطنگرة..

-حضنچ فاهي وخري

-كيان: هااا جنات هاي فوگما متنازلة عن راحتي علمودچ تعيبين على حضني؟

-ولچ انتِ شايفة مالك شلون يجعصني؟ عليييييي مو حضن ضيمم

-ايييع سكتي ماريد اسمع

-ونظل نثولف ونضحك للصبح

-واني وفاهد نظل نتعارك للصبع

-وفد حباب وخوش رجال

-وفاهد فد ارعن ومهيلگ

-ويجيبلي حليب موز كل يوم قبل لا انام يگلي شاركيني

-يااا حلوو اني فاهد يجيبلي بطل بيره يريدني اشاركه

-يخبل يخبل والله هنيالي عليه

-يموت يموت گبر لفني عليه

-كيان

-ها

-راح اگول شي وادري مو وكتها بث اني ماصخة

-ادري بيچ ماصخة گولي

-انتِ صديقتي الوحيدة هنا وماعندي احد احچي وياه واحث جاي اختنگ وحدي واعرف اني احچي بهواي مواضيع بث والله ابد ما اقصد شي ماريدج تضوجين مني

مي بارد وحسيتها وگع فوگ راسي عرفتها دتلمحلي خاف اضوج من تحچي بمالك وعن علاقتها بي لهدرجة چنت واضحة وغبية لدرجة جنات حست بأعاجبي؟؟

-كيان: واني اريدچ تبقين نفس ما انتِ متتغيرين ولا تهتمين لشي غير سعادتچ انتِ ومالك تخبلون سوه كلش لايگين لبعض

-هو صديقي المفضل

-وكلنا دنشوف هالشي بعيونكم ثنينكم وهسة رجعي نامي لان صرت خروف من النعس

-خروف شنو هاي مال مثقفين گولي طلي

-هههههههههه عابت اي والله ولا عبالك قبل شوية اجو ناس رادوا يكتلوها

-بث ما كتلوني والله كتبلي عمر جديد الحمدلله

حمدت الله وشركته فعلاً رب العالمين ستر عليها للمرة الثانية هالگملة، نمنا الليلة ومن الصبح گعدت اروح للجامعة بس امتحنت ورجعت لـ جنات لگيتها واگفة گدام المراية تنظف حواجبها..

-كيان: مستححححيلة!!!

-جنات: ها

-كيان: شگد وكحة بالضيم هي وگاعدة هنا تنظف حواجبها

-جنات: والله مالي واهث لشي بث اثتحي گدام مالك هواي يركز بوجهي ويصفن خاف يشوفني مرعبلة ويتنمر عليَّ

-يعني مو تعدلين نفسچ اله اي اي صدگت

-والزهرة لا من يوم يومي اجدح جدح بث هثة دا انشغل بالدوام والثفر وما اندل صالونات وماريد اهمل نفثي

اندگت باب الغرفة علينا طلعت اشوف منو لگيتها ام خالد تگول وصل مالك، هرولت ابلغ جنات شمرت الملقط وجرت شالها تلبسه وركضت ويايه بره نروحله..

ابتسمت من شفت فاهد وشُهيب كلمن واگف على جنب بصفه بينما مالك يمشي على طوله طبيعيي ولا كأن بي شي وجهه شخط مابي بس لابس بلوز رگبته عالية وشوية اصابع ايده مجرحة، ابتسم من شاف جنات وسوالها تعالي بيده..

تقدمت عليه بخطوات بطيئة تسحل روحها سحل لافة ايدها وره ظهرها ووجهها صاير احمر دممم اول مرة اشوفها لهدرجة خجلانة، وگفت مقابيله على بُعد كم خطوة ومدتله ايدها بس تصافحه متقبل تتقرب منه اكثر..

-جنات: الحمدلله على الثلامة

ردلها المصافحة وگال بأبتسامة وعيونه حرفياً تاكل وجهها..

-الله يسلمچ

-فاهد: احمم احنه نترخص كوري يله

-كيان: اي اجيت

طلعت ويه فاهد وشُهيب وفاهد كشرته من الاذن للاذن..

-فاهد: لايگين لبعض الهتلية

-كيان: خلي مالك يسمعك تصيحله هتلي

-كوري هذا السر العظيم بيني وبينج ومنا راح اقيس وفائچ كزوجة

-ماريد اكون وفية وماريد ابقى زوجتك

-طاح حظچ انتِ الخسرانة

-كيان: ماريد ارجع وياك اروح لبيت اخواني ما شبعت منهم شهوبي اخذني وياك

-شُهيب: هلا بيچ حبيبتي

-فاهد: بعتيني بهالسررعة كووري مو البارحة قبلنا بعض قبلة فرنسية بالمستشفى

شُهيب فتح حلگه وعيونه بنفس الوقت مصدوم ومن الصدمة حتى ما علق واني فتحت عيوني على وسعها عزززه بعينيي هذا يتذكر الصااار؟؟؟

بدون لغوة ركضت ركض لسيارة شُهيب صايرة حمرة من الفشلة واكل بأظافري مد فاهد لسانه لـ شُهيب ويسوي بيده حنيصة مادري حميصه المهم هاي اليسووها بالايد..

-فاهد: على عنااادك موت من القهر وديلاا

-شُهيب: احمد ربك بعدك مريض چان دستك بسيارتي

-فاهد: الله احس حلو راح اخلي رجلي جوه التاير وامشي بالسيارة خلينه نشوف راح تنكسر لو لا

-شُهيب: يله خليها

من كل عقله اجه متحمس يحط رجله جوه التاير وشُهيب تحضر يركب السيارة يريد يدوسه..

-كيان: لااااااا راح تطگ رجلك يا غبيي شبيك انتَ ماااعندك احساااس

-فاهد: هو راح اجرب الاحساس اذا حسيت بوجع يعني عندي واذا لا يعني مطفي من الرئيسي

-فاااهد امشي نولي للبيييت الله ياخذك

طلع راسه شُهيب من الجامة وگال معترض..

-لعد واحنه ما تجينه؟!

-كيان: باچر اجيكم هذا راح يجلطني لا يروح يذب روحه من الجسر ويجرب الانتحار

-فاهد: ماتوقع اموت

-شُهيب: اضربك طلقة قبل لا توگع نفسك حتى نضمن الموضوع؟

-فاهد: خوش فكرة واذا متت يعني اني انسان طبيعي واذا ما متت يعني مصاص دماء

-شُهيب: دائماً اشك بيك مصاص دماء لو زومبي تدري لو لا؟

-فاهد: والعباس حتى اني وگتله لابوية روح سأله لذاك العار

-شُهيب: نتوكل على فكرة الجسر؟

-فاهد: وتضربني طلقة لازم مو تنسى

-شُهيب: اي يله اركب

ومرة ثانية من كل عقله بريد يركب ويه شُهيب حتى يروح وياه للجسر ويمارسون طقوسهم الغريبة..

-كيان: ولك لااااااااا انتَ تريد تموووت؟؟؟

-شُهيب: كيان الحياة تجارب خلي يجرب لا تظل بنفسه

-فاهد: اول مرة اوافقك الرأي

-كيان: عززه بعيني فااهد تموت تمووت تعرف شنو يعني تموت؟؟ منو ينضرب طلقة ويذب روحه من الجسر ويريد يبقى عايش؟؟؟

-شُهيب: صارت بيه مرة وبقيت عايش

-كيان: شنوووو؟؟؟

-فاهد: ههههههههه اتذكر اتذكر بالـ 2009 من تعاركت ويه توماسو الايطالي وذبيت روحك من الجسر للماي وابوك تخبل بيومها وگام يصيح هذا شُهيب نمري هذا نمرر شمسوون يا ****** ما يموت نمري

-كيان: انتو صدگ تحچون لو ناصبين عليَّ؟؟

-فاهد: ناصبين عليج

-كيان: ما طول اعترفت ناصبين عليَّ يعني الموضوع صدگ گمت اعرفك امشي امشي خلينا نروح للبيت ادرس عندي امتحان

-فاهد: گبر منو يدرس هالايام

-كيان: لعد مثلك يالفاشل؟

گلب عيونه شُهيب بملل وسد جامته وشخط سيارته يطلع منا، دگيت رجلي بالگاع متنرفزة ليش ما ودعني كله من وره هذا السلبوح المعضل البصفي!!

-فاهد: ههههههههههههههه لبسنا

-كيان: كله بسببك

-فاهد: شسويت اني

مجاوبته بسبب الاشعار الاجاني على تلفوني طلعته اشوف منو چانت رسالة من شُهيب كاتب..

"انتبهي على نفسچ حبيبتي ودرسي زين باچر تتغدين يمنا وممنوع تعترضين"

-كيان: ووووولك بااااوع راسلنييييي حيااااااتااااااي

-شگد تبالغين هسة منو مراسلچ ما تگليلي

-تاج راسك هذا امشي امشي نروح

-سير نعالي مو تاج راسي

ركبنا السيارة واني اللتهيت بالتلفون اراسل صديقاتي ومسرة وصبا كل شوية اتنقل لوحدة صارلي يومين ممجاوبة على الرسائل وصايرة لوسة (لوصة) عندي..

-فاهد: انلاست

-كيان: يااا ليش انلاست شبيك؟

بالمناسبة كلنا صرنا نستخدم مصطلح "انلاست" لعيون مالك لان واضح هو ما راضي يتعلم الكلمة ويگولها بشكل صحيح..

-فاهد: باعي الازدحام الجسر مسدود

-كيان: اطلع على غير شارع

ما قبل نغير الطريق مادري شبي مع العلم اكو طريق ثاني يؤدي الى بيتنا مادري شعنده چلب هنا، بده يتحرك السير شوية اخيراً وگدرنا نطلع من الازدحام رجعت اسولف ويه صبا على امور الخطوبة خطية كلش خايفة ابوها يرفض لانه كلش عصبي ويريدلها واحد عنده كومة فلوس وللاسف احنه على گد حالنا ومروان مهندس بس مو بالمستوى المطلوب بالنسبة لابوها..

-فاهد: نزلي

-كيان: هاي وين جبتنا؟

-خلينا نشرب شي

سفط گدام كافيه فرنسي خلاني انزل وراح برك السيارة بالساحة ورجعلي بسرعة، دخلنا سوه الكافيه اجوائه ولا غلطة اللوانه فاتحة وهاادئ بشكل وفارغ مابي غير كبلات ثنين گاعدين على جهة الجامة واحنه گعدنا بالزاوية الوراهم..

-كيان: مجرب هذا المكان انتَ؟

-اي هواي اجي هنا

-ها حلو عبالي متروح غير للنوادي الليلية

-ما مخلي شي بنفسي

-اي ادري بيك

-راح اطلبلچ على ذوقي..

صاح للنادل واخذ طلباتنا عبارة عن فرابتشينو وكيك كاراميل، ما طولو دقايق وجابو الطلب واكلت مستمتعة بالمنظر والهدوء والاجواء اللطيفة..

-طلعي كتبچ ادرسي هنا اذا تردين

-لا اتأخر بالبيت ادرس احسن

-عادي انتظرچ

-تره ينشلع گلبك ويايه

-عادي

-تره...

-كوري جبتچ هنا حتى تدرسين وتغيرين من جو البيت

-ها؟

-ملل من الشخص يدرس بمكان واحد ضروري يغير شوية حتى يستوعب زين

ابتسمت ممتنة طلعجايبني هنا حتى ادرس، فرحت كلش لانه يفكر بيه وينه اليگول ماعندي احساس وما اهتم لاحد بالدنيا غير مالك وحمرتي؟ طلعت الايباد من جنطتي ودفتري وكتابي وگعدت ادرس وهو بصفي هم اللتهى بتلفونه..

مرت ساعة والساعتين والثلاثة واني على گعدتي كلما اخلص شي من الحلويات يطلبلي شي جديد ويگلي جربي هذا طعمه طيب راح يسويني دبة ويعلگ سكري..

نزل تلفونه يحطه على الطاولة من بعد مرور ثلاث ساعات وهو بيده عيونه انعمت وصار يفرك بيهن وراهة مطى ايده ليفوگ وگعت عيني على تلفونه شفته فاتح شي اشبه بالكتاب الالكتروني تقربت شوية اسوي نفسي دا اباوع للايباد مالتي وركزت بشاشته شفت الاسطر الاولى للصفحة المفتوحة مكتوب بالانكليزي تحچي عن مصطلحات تخص ادارة الاعمال عگدت حاجبي مستفهمة بس ما دققت ورجعت لدروسي..

گام هو يغسل وسد شاشة تلفونه يعوفه على الطاولة شوية ودگ عليه واحد مسمي بالانكليزي "بروفيسور الاقتصاد الاداري" هاااا؟؟؟ بروفيسور؟؟ وانوب اقتصاد؟؟ انوب ادراي؟؟ هذا فاهد شديسوي؟؟

رجعت لمكاني بسرعة من شفته يطلع من الحمام متوجه للطاولة لزمت الايباد مالتي اكمل دراسة وبالي بقى وياه شنو ممكن يكون فاهد يشتغل بالحقيقة غير سوالف الاجرام والذبح بخلق الله؟...

**

-الحمدلله على الثلامة

-مالك: الله يسلمچ

بقى يصافح بأيدي ما هدها الا من طلعو فاهد وكيان وشُهيب وخر الشال عن راسي وسحبني من نفس الايد عليه وحط راسي على صدره يحضنني وباس راسي.. وجهي مو بس اشتعل احسه صار عبارة عن كتلة من النار والسموم يطلع منه من الاحراج..

-تصافحيني شنو شو ما تستحين انتِ

-مو شوف..

-ماريد اشوف

-احم اي يله وخر

-شوية بعد

-ما

-بس شوية

-ماريد وخر هي گوة لا تلطش

-شگد نحسة هالبنية

-اي اني نحثة

ضحك بصوت عالي ووخرني عنه يفرك حلگي بيده، دفعت ايده وعطت بي..

-ااااااايييي بطل هالحركة شفايفي دتطگ دم من وراك

-ديلا عيني شسويت وشفايفچ طگت دم

-باوع والله شوف طگت

تلمست شفايفي بسرعة صار يطلع دم منهن كلش رقيقات كلشي ميتحملن اوقات اذا حمرة تنشف على شفايفي تتفطر وتگوم تطلع دم وهذا يجي يجعص بيهن بالعمدني..

-حطي مرطب، تعالي تعالي

اخذني وياه گعد على القنفة بالصالة وگعدت بصفه اخذ كلينسة وحطها على حلگي دفرت ايده واخذتها منه ظل بس يضحك عليَّ..

-مخبل

-انتِ مخبلة شسويتي البارحة ومنو نام يمچ؟ اكيد اشتاقيتيلي مو

-وييعع ولا اشتاقيت فد ارتاحيت بالنومة كيان كللش خوش تجعص

-صدگت

-لا تصدگ بكيفك

-شنو هذا الاثر برگبتج؟؟؟

-هاي من وره المطاية البارحة

-يا مطاية؟؟؟

-ياا ليش ما عرفت هجموا عليَّ ورادوا يكتلوني لوما شُهيب لحگ عليَّ

-صدگ تحچين؟؟؟ هاي شوكت!!

جاحظ عيونه ومصدوم فريت بيدي وبديت اسولفله كلشي من اول ما رجعت من الدوام لحدما خنگني طاك الحقير وما حسيت بعد الا على شُهيب ينيمني بالفراش ومن جرحت خده وووو...

-مالك: صار كل هذا ومحد بلغني؟؟؟

-شلون يبلغوك وانتَ بالمثتشفى

-حتى لو چان لازم ينطوني خبر اني البارحة بالليل صحيت وسألت فاهد عنچ گال مابيچ شي ونايمة بالبيت وكيان عندچ محد گلي صار كل هذا!!

-خطية مالك لا تتعارك وياه هو بث خايف عليك

-ادري ادري

زفر متنرفز وجر ياخة البلوز عن جسمه يفوت الهوا لاحظت برگبته حمرة كلش صايرة وبيها اثر جروح..

-انتَ شبيها رگبتك؟

-هيچ هاي

-تره حتى اصابعك مجرحة شصاير مالك وليش رحت للمستشفى؟؟

-سويت حادث بسيط جنات

-مالك!

-ما صاير شي، هسة احچيلي انتِ شلونچ؟؟ وضعچ؟ خايفة؟ شلون نمتي البارحة؟ شو لسانچ شطوله ولا كأن رادوا يكتلوچ؟؟

-اي شثوي اظل اللطم رادوا يكتلوني وما گدروا گوة تريدني اموت روحي

-هههههه خرب روح ابوچ لا احساس ولا ضمير

-طاح حظ ابوووك

-اي والله، انتظريني دقيقة اسوي مكالمة ضرورية وارجعلچ

گام يوگف بنهاية الصالة يجري مكالمة گمت وراه مثل البطة اندار يباوعلي وسد السماعة بأيده..

-ممكن خصوصية؟

-ماكو خصوصية بين المتزوجين

-هم حاسبة روحچ متزوجة انتِ؟

-حاثبة لو تلفون هههههههههه

-خرب.. الو هلا شُهيب..

سكتت من جاوب الطرف الثاني "شُهيب" حچى وياه مالك عن الصار البارحة وطلب تفاصيل اكثر وظلوا يتناقشون هواي بالاخير تشكر من شُهيب لانه رجعلي وما نساني ونبرته وهو يتشكر اخوه خلتني ابتسم للمرة المية چان ممتن لدرجة واضح الامتنان بنبرة صوته..

-مالك: شكراً لان ما نسيت شي يخصني اني كلش فرحان بهذا الشي.. ارجعها الك وعد

سد الاتصال وياه باقي على ابتسامته اندار عليَّ شافني واگفة وراه مثل البومة ضحك وجرني يحضني حييل يعصرني ويبوس خدودي..

-ولچ ططة شتسوين هناا

-هههههههه انتَ ططة

-جنة راح انام شوية تعبان

-اني هم اجي

-وين تجين خليني انام براحة لمرة بالعمر

-امشي لك عمرك كله نايم وحدك ثانياً ماكو راحة بث بالگبر

-حتى بالگبر منحصل راحة احنه امشي امشي

-لا اتشاقه روح نام ارتاح وحدك

-تعالي لچ

سحلني وياه للغرفة وراح ينام على الچرباية هو والبلوز شعجب ما تصلخ هالمرة..

-شو صاير محترم وشريف اليوم

-ليش؟

-نايم بملابثك

-هاي لخاطرچ

-هههههههههههههههه ولك مليكككةة

طفرت على صدره اچيت من انام مثل كل يوم بس هالمرة ما ضحك مثل قبل هالمرة عصر عيونه وعاط متألم..

-شبيك شبييك

-مابيه شي بس على كيفچ حبيبتي بالمرة الجاية مو هيج تذبين روحج

-بث اني كل يوم هيج اشمر روحي

-اي شوية تعبان هالفترة اني

-صاير عجوز متتحمل الله يثاعدها التاخذك

-على طاري التاخذني جنات اريد اسألچ سؤال وجاوبيني بصراحة تامة بدون خجل

-ها گول

-بس كوني صريحة ماشي؟

-اي اي يله تحمثت

-اذا بيوم من الايام قبل لا ننفصل اني وياچ واجيت اگلچ اني تزوجت وحدة ثانية شلون راح تكون ردة فعلچ؟

غريب.. افسر الموقف وكلامه واسلوبه الجَدي بالغريب، ما خطر على بالي راح يسألني هيچ سؤال ومن غرابة الموقف حتى ماعرف شنو اجاوب..

-ليش تتزوج؟

-زواج مصلحة

-علمود فلوثها؟

-لا مثلاً تكون السالفة سالفة عداوة

-تريد تنتقم منها؟

-لا اكيد

-وتنام يمها وهيچ!

-قصدج مثلنا كل يوم؟

-اي

-مادري

-اي عادي تزوج ما اهتم

-متأكدة؟

-يعني انتَ راح تتزوج؟؟؟

-سؤال جنات هذا مجرد سؤال

-ثؤال لو واقع ما يهمني خوش؟؟ روح تزوج

گمت منه ما خليته يحچي زايد وطلعت من الغرفة متنرفزة هذا هم سؤال؟؟ خلي يتزوج عاابت اصلاً هو مو ضد الزواج والخلفة شو هسة تغير كلامه لو تغير من شاف وحدة عجبته؟؟؟

گعدت بالصالة اكل روحي بروحي شنو صار وشنو تغير؟ ليش سألني هيچ سؤال؟ معقولة راح يتزوج ويعوفني انام وحدي وميهتملي بعد؟ شلون واني تعودت عليه وتعودت على اهتمامه بيه؟ لو يجوز راح يرجعني للعراق؟ اي خلي يرجعني للعراق عندي ايات وطزززز بي!!!

بعد مرور ساعتين حسيت بي يطلع من الغرفة بسبب عطره الي ترس الصالة، اللتفتت اشوفه متأنق على اخر حباية ومتعطر ويسحل بجنطة صغيرة..

-ما كملنا حديثنا جوه جنات

-كملنا

-تمام، انتبهي على نفسچ صارت عندي سفرة عمل ضرورية هسة ابوية اتصل وبلغني

-ها

-ترحين لبيت فاهد وكيان علما ارجع؟

-اي

-تمام روحي حضري نفسچ

-انتَ وين رايح بالضبط؟

-للمغرب

-شگد راح تطول؟

-ما معلوم لان عندي هواي شغل هناك

-تطول؟

-ماعرف صراحة

هزيت راسي ورحت احضر اغراضي جبت جنطة چبيرة وعبيتها كل الشغلات الاحتاجهن بما ان بديت دوام فـ اخذت ملابس طلعة هواي.. كملت كلشي وسديت الجنطة ونزلتها اسحل بيها اخذها من ايدي السايق مال مالك وحطها بجنطة السيارة وركبت ويه مالك اگعد بالكراسي الوره..

طول الطريق احنه ما حچينا شي بس شكل مالك مو طبيعي چان زعلان! مالك مو هواي يزعل نادر اصلاً يطنگر او يضوج من شي هو كلش شخص ايجابي بس ليش هيچ شكله مقهور وما حچى ويايه ابد؟

سفط السايق بباب بيت فاهد فتحت السيارة اريد انزل ومالك سحبني من ايدي يخليني اگعد، باوع للسايق نظرة افتهم وبسرعة طلع وعافنا وحدنا..

-مالك: هذا مصروفچ وأي شي تحتاجي لا تترددين وطلبي من فاهد زوين؟

-تمام

-ترحين ويه السايق للـ..

-للجامعة ادري ولأي مكان ثاني اذا ردت اطلع هم وياه بث ابلغك قبل لا اروح

ابتسم يهز براسه، شدد على ربطة عنقه شوية وگال بتردد..

-اذا اتصلتي وما جاوبت لا تنتظريني بلغي فاهد لو شُهيب ثنينهم وصيتهم عليچ

-ليش متجاوب اتصالاتي؟

-يعني يمكن اكون بأجتماع او شغل.. هيچ شي

-تمام

-محتاجة شي؟

-لا

-انتبهي على نفسچ

اشرلي بيده بمعنى تعاليلي ترددت احضنه بس ما خلى ترددي يدوم ثواني لان هو الي سحبني مرة ثانية وحضنني، مسح على ظهري بأيده وطولت حضنته ما تركني الا من گمت احوص بمكاني..

حررني من ايده وقبل لا ابتعد زايد باس راسي وخدي توترت كلش ووخرت عنه بسرعة ونزلت اركض لبيت فاهد والسايق يجر بجنطتي.. اللتفتت اباوعله من السيارة ما اشوف منه شي السيارة مضللة بس متأكدة هو ديشوفني، سويتله باي وعندي ثقة رجعلياهة ابتسمت وعفته ودخلت لبيت فاهد اعيش يمهم هالفترة....

**

-شنو اگله عمي لو اصيحله لؤي؟

-اكيد راح تصيحله عمي مروان

-مروان: بس هو مو عمي على شنو اصيحله عمي هاي لواگة

-شُهيب: ماكو لواگة هاي اصوليات هذا ابو زوجتك راح يكون

-مروان: بس تبقى لواگة

-فاضل: اهووو شيقنعه هذا البني ادم

-نشوان: عوفو خلي يصيحله لؤي بلكت ذاك يجره بزيج

-فاضل: لا هاي السوالف عفناهة الكم

-نشوان: شنو قصدددك ولككك قصدك احنه العرب هممممج

-فاضل: اتقِ الله بيه ما گلت هيچ قصدي ابو صبا مو مال عفاط وهالسوالف ما يعرفلهن

-مروان: ها هسة اصيحله عمي لو لؤي؟

-نشوان: صيحله نعاال بس خلصنا وامشي

-مروان: لا عيب مو مال نعال هو صح شلني شل وشگني نصين بالمهر بس ميخالف يبقى ابوها ولازم احترمه

-نشوان: چا شُهيب شيگول على مهر مسرة باع كليته المسكين وطبعاً اسف مسرة بس واحد يحچي الحقيقة

ضحكت على تفاعلهم ونقاشهم احنه واگفين بباب بيت صبا واليوم هو اخيرراً عقد قرآنها دگوا الباب الولد واني فتحت الباب وهاي صارلهم نص ساعة يتناقشون ومروان متوتر ويمسح بگصته من العرق وحقه ما اللومه ابد..

عمو لؤي ابو صبا دمرهم دمار ياله وافق وبكل مرة يأيس مروان من القبول اسبوعين هو يخطب بيها كل يومين رايحلهم وجايب واحد وياه واسطة خو شُهيب بكل روحة يطلب منه يجي وياه وخطية شهوبي عايف شغله وكلشي يخصه ومتفرغ لمروان وخطبته من صبا..

الحلو ان علاقتهم تحسنت هواي ومروان صار اكثر ليونة ويه شُهيب واكثر من مرة عبرله عن امتنانه وتشكره لانه وگف وياه وما تركه حتى من عمو لؤي طلب مهر تعجيزي لصبا شُهيب دگله صدر و گله اني اساعدك بي ونشوان نفس الشي وحتى فاضل..

ابو صبا سوه المستحيل حتى يخرب هاي الخطبة لانه متمني واحد ازگن واحسن لـ صبا يريد يستفاد منه بما ان هو تاجر ثگيل معروف وراد يناسب واحد من مستواه المادي ومروان مو قريب لمستواهم المادي بس الحب وما يفعل..

ما قبل ولا اقتنع الا من اجه شمسون نفسه يخطبله ادري شي غريب حتى اني من عرفت انصدمت بس يله على الاقل طلع من شمسون شي بي خير وتمت الحمدلله..

دخلتهم للاستقبال الولد وحدهم من گدما ابوها رافض وما مقتنع حتى ميقبل يحضر العقد لان بالاساس صبا امها وابوها منفصلين وهي عايشة ويه امها..

-مسرة: خالة معقولة عمو ما راح يحضر عقد بنته؟؟

-ام صبا: هو بگيفه يجي وغصباً عليه لو يريد يكسر وجوهنا گدام العالم!!

هزيت راسي ورجعت لـ صبا الدتتحضر بغرفتها ووياهة واگفات كيان وجنات وجولي وثنين من بنات عمها المتوفي، ضاربة الدنيا بعرض الحايط فاتحة اغاني ومتونسة وترگص وتنطط كل مكان من الفرح ميهمها ابوها راح يحضر لو لا لان من الاساس علاقتهم مو زينة ويه بعض ووجوده مو مهم بحياتهم..

-ام صبا: بناااات بنااااات مسرة وينننچ

طلعت من الغرفة مديت راسي من محجر الدرج اشوف شبيها اشرتلي على الاستقبال ولزمت طرف شالها تهوس بي وهمست وهي فرحانة..

-اجه ابو صباا واجه ابوچ واجه شمسون واجو الجماعة كلهم كلللوووشش

صفگت فرحانة اخييراً اقتنع واجه ركضت ابشرهن وصار الرگص والفرحة اضعاااف، بسرعة بسرعة جهزتها وعدلت شعرها الكيرلي وفستانها المفتح النيلي اليلمع من فوگ ليجوه طالعة كيكة تخبل ينوكل جمالها والله..

لبست بشت ابيض ثگيل فوگ الفستان وشال ابيض ونزلناها علمود عقد القران، كلنا اللتمينا حولها وبعض المعازيم من صديقات امها گاعدات ويانه.. فتحت القران تقرا ودقايق وبده الشيخ يعقد..

-ابنتي صبا لؤي عمار هل تقبلين الزواج من موكلي مروان سلوان سالم على المهر المتفق عليه _____ مقدم و _____ مؤجل عند القدرة والاستطاعة.. فـ اذا قبلتي قولي نعم انتَ وكيلي

بعده الشيخ ديعيد العبارة وما خلته يكمل قاطعته بفرحة غمرت قلبها وقلبي الخفيفة..

-نعم انتَ وكيلي

اعتلت الهلاهل والمباركات والتصفيق وكيان ترگص فرحانة لاخوها وجنات وياهة مكيفات على الوضع ولا يگول ازواجهن مسافرين صارلهم اسبوعين ومينعرف وين ما وين راحو..

-مسرة: ولچ فشلة قاطعتي الشيخ هسة شيگول ما مصدگة

-صبا: اي اي ما مصدگة ككككللللووووشششش

فرطت ضحك فشلتنا تهلهل لروحها همزين صديقات امها يعرفن صبا ويعرفن خبالها وفرحن لفرحتها مع العلم كلهن الگاعدات خطبنها لولدهن ورفضتهم كلهم چانت تنتظر مروان يجي ويغمر گلبها بالحب..

كمل الشيخ عقد ويه مروان شوية وكيان گالت خلي يدخل يلبسها الذهب وطبعاً ابو صبا اعترض على الذهب ما عجبه رادلها تخم اللماس بس شمسون گوة مشاهة على الذهب وقنعه علبو احلى للبنية وهو تاجر مجوهرات ويفتهم بهالسوالف ومن هالخرط..

-صبا: مكياجي بناات شلونه ولچن الفستان حلو لو اوڤر؟؟

-كيان: يخبل يخخخبل كلشي يخبل

-صبا: احس لازم اللبس شال اضم جسمي عيب كلش مفتوح هسة يرزلني اعرفه

-جنات: هههههه ولچ ليش يرزلچ قابل طالعة بي بره هو انتِ بالبيت

-كيان: على گولتچ لا وانوب لابسته اله هسة يتخبل عليج وعلى جمالچ

ضحكت صبا خجلانة والقران محد ديعرفها شو هاي صايرة تخجل وتنعم بصوتها وتتنعوص وتسوي حركات هاي هيچ الحب يغير؟

لبست جنات حجابها وبعض النسوان هم من سمعنا حمحمة مروان بالباب ديريد يدخل هنا، وگفت هي على حيلها تضم أكتافها وصدرها بشعرها وكيان ترجع تطلعهن وهي ترجع تضم وكيان تطلع لحدما استسلمت صبا وعافتهن مكشوفات..

ابتسمت لا ارادي من دخل مروان واعتلت الهلاهل والهوسات من النسوان وجهه احمممر دم ومتعرق والتوتر واضح عليه الي يشوف مروان مستحيل يگول عنه شاب بعمر شُهيب 31 سنة على كمية خجله وعدم قدرته على التواصل ويه النساء بشكل طبيعي بدون عصبية وسبحان الي دخل صبا گلبه وخلاه يستقتل حتى يتزوجها وياخذها غصباً على الكل..

لبسها الحلقة بأيد ترجف ويمسح بوجهه وما ملحگ ولبسها الذهب ونفس الحال متت ضحك على صبا من اندارت الي تهمس..

-خجلان ومتوتر اكثر مني خرب حظي

-مسرة: مو تترعنين وانتِ تبادرين وتبوسي انطي مجال يجر نفس الرجال

-صبا: افف راح ابچي هو يتوتر من الزحمة خليهن يطلعن ويعوفونا وحدنا شبيهن لطشن

گعدو على الكوشة واني اشرت لأم صبا تطلع النسوان كافي طلابة عقد وعقدنا عشا ووزعنا كيك واكلنا هوسة وهوسنا دكافي..

همزين من استجابن بسرعة وطلعن بدون مطرود وبقوا العرسان وحدهم واني وجنات وكيان وياهم اخيييراً مروان جر نفس ورخى ربطة عنقه..

-مروان: والله گلت ذني يباتن اليوم وما اشوفچ

-صبا: وشبيك متباوعلي شدعوة عيني

-عيب صبا مو گدام العالم

-اي ديلا يلا

-تردين نتعارك حتى بيوم خطبتنا؟؟؟

-لااااااا

-لا تصيحين لاا تصيحيييين

-اصييييح وغصباً عليك شتسووي مثلااً اذا صيحتت؟؟؟

-مروان: سكتيييي لا تنرفزينييي

-مسرة: صدگ جذب شبيكم يمعودين هاي بعدنا ما گلنا بسم الله وتعاركتو بسرعة

-صبا: لا حبي مدا نتعارك

-مروان: هاي لغة الحب عدنا، ممكن من رخصتكم تخلونا براحتنا

-كيان: انوب يطردون بينا!!

-مروان: يلة كيان

-مسرة: امشن امشن وجودنا غير مرغوب بهِ هنا

-ام صبا: ها بنات وين رايحات؟

-مروان: عمة عدهن شغل فوگ ومسرة تريد تراويچ شي

-مسرة: هاا احم.. اي صح خالة تعالي وياي علميني شلون اللف الكبة

-ام صبا: الكبة؟

-مسرة: خالة اي غير تزوجت ولازم اصير ام بيت علميني حبابة لا يطلگني شهوبي

-ام صبا: خوش خالة باچر تعاليلي واعلمچ

-صبا: لا ماما هسة روحو خطية ماعدها وقت مسرة تعرفيها دائماً مشغولة

-ام صبا: ولچن مو وكتها خلوني انظف البيت صار هوسة

-كيان: خالة احنه نساعدچ هسة علمينا لان كلنا مشتهين كبة ومنعرف نسويها

گوة گوة قنعناهة واجت ويانه فوگ بس هم چنهة ما مقتنعة بس المهم بقو وحدهم جوه، چان گعدوا بالاستقبال بس ابوها وجماعته هناك وماكو غير الصالة يبقون بيها..

-كيان بهمس: جنات ابقي ويه ام صبا اني نازلة شوية وأرجع

-مسرة: لچ لا خليهم براحتهم

-كيان: لا حبابة اريد اروح اشوفه وهو ينطيها گلادة امي

-مسرة: اوووي شنو هاي مچنت اعرف يريد ينطيها كلادة امچ؟

-كيان: اي اخواني گلولي قبل لا ماما تموت الله يرحمها انطت نشوان ومروان كل واحد گلادة من گلايدها وگلتلهم تنطوها لعروساتكم بيوم عقد القران وهسة متحمسة اشوفه وهو ينطيها

-مسرة: لعد اني هم اريد اشوف

-يله امشي بس نوگف على محجر الدرج مننزل خاف يستحي من عدنا

رحنا سوه ومدينا روسنا من المحجر نباوعلهم مبتسمات وعايشات الورد والعصافير والفراشات وياهم وطبعاً هذا ميعتبر تجسس وفضول لان صبا مسوية الاطگع ويايه كل يوم لعبت بيه طوبة من رجعنا من اسبانيا لليوم حاطة روحها وتجيني للمكتب كلما شُهيب يريدني وحلفت الا اشلع گلبها وارجعها الها..

-صبا: ههههه بطل سوالفك مروان

-مروان: والله ما مصدگ اخيراً صبا صرنا لبعض

-اي اخيراً بعد عشرتالاف عركة وسطعش الف بلوك ومليون تهديد وخزرة صرنا سوه

ابتسمنا اني وكيان مثل الغبيات من حضنها من وره يحط وجهه برگبتها، ضحكت بخجل ومسحت على شعره من الخلف يا روحي شلون فرحانة..

-مروان: ميت بيچ ومنتهي

-واني احبك حبيبي

-فرحتي ما انطيها لاحد والعباس احسني بحلم

-مو حلم هنا اني گدامك

حاوطت رگبته مبتسمة باسها وغمضت عيوني لا ارادياً ما اتخيل صبا بهيچ موقف، رفعت راسها كيان تباوعلي ضحكت وهمست..

-متتخيلين صبا بهيچ وضع مو؟

-مسرة بهمس: والله اي احس استحيت على دمي وغلط نتجسس عليهم لا تصير حركات بركات اخرى

-كيان: والله مروان مبين حامي فـ چنها اي راح تصير امشي نفلت

-صبا: مرونتي كافي عاد تأدب

-مروان: يله ميخالف الايام هواي ونشتغل بنفس المكان شيخلصچ مني بس شيصبررني والعرس بعد سنتين

-شنسوي بعد هذا شرط بابا

-من اشتعل... اشتعل شمسون

-ههههههههههههه هاي وهو مفضل علينا وخطبلك

-لو يحط روحه بيدي هم ما احبه اكرهه واكره الموقف الحط ابوية بي

-شنو هاي يا موقف؟

-عود بعدين احچيلچ هسة خلينا حايرين ببعض

-لا حباب سولفلي صار عندي فضول

-هدد ابوية وجبره يتزوج ام شُهيب

-شنووو؟؟؟

-صوتچ يمعودة

-صدگ تحچي هدده؟؟ ليش وشلون؟؟؟

گعد مروان على الكوشة وگعدت صبا بصفه، باس كتفها وهمسلها..

-شنو هالجمال؟

-عيونك الحلوة گلبي بس كملي على ابوك حباب

-ابوية رجال فقير موظف بسيط يشتغل بالاطفاء وضعنا صعب چان بالبداية وامي ما صارلها هواي ميتة وكيان كلش صغيرة واني ونشوان مدارس، وبيوم اجه شمسون لشغل ابوية وصارت بيناتهم صداقة هسة شجاب جعفر شمسون على ابوية البسيط ماعرف بس اني متأكد هي خطة منه علمود يمشي شغله براس ابوية

-اي؟؟

-گامو يطلعون سوه وحتى اماكن غلط صار ياخذ ابوية وياه ويغري بالفلوس بس ابوية اعترض وما قبل يروح ويكمل وياه وقطع علاقته بشمسون لحدما يوم من الايام ابوية شاف ماريا بمطعم وانسحر بيها، ماريا بشبابها چانت كلش جميلة بشكل لا يصدق

-هي لليوم تموت تره

-اي بس بشبابها اكثر ولبسها فاضح وتهتم بنفسها شكلها يغوي وجذاب كلش بهاي الفترة شُهيب چان مو عدها مسافر.. شافها ابوية وعينه بقت عليها بدون لا يتقرب وصلوا الخبر لـ شمسون وعرف ان خطته جاي تمشي صح وعرض على ابوية ياخذ ماريا وياه ليلة ويستمتع وياهة

-عززززه!!!

-ابوية رفض مرة ثانية لان هذا مو دربه ولا حياته شمسون لح عليه وگله راح تندم بس بقى ابوية مُصر على قراره لحدما شمسون عرض على ابوية عرض

-يتزوج ماريا!

-بالضبط يتزوج ماريا وينطي فلوس فوگاهة ويحسن من وضعنا وكذلك اعترض بالبداية بس من شاف كيان وحالنا تعبان رضى وهنا چانت الصدمة من عرف عقلها عقل اطفال وعندها ولد من شمسون

-عجيب!!

-وهنا بدت تهديدات شمسون لابوية من شافه متردد وگله غصباً عليك تتزوجها وتكمل البديت بي لو اورطك بشي واسجنك

-وابوك تزوجها

-اي تزوجها وعاش وياهة حياة صح صعبة بس حلوة

انقهرت وتألمت من سمعت شلون صار زواج ماريا من ابو مروان، ماريا تستحق الافضل لانها انسانة نظيفة وطيبة لدرجة اليوم ما قبلت تحضر عقد المهر لان عبالها مروان ميحبها وميريدها تجي مع العلم عزمها وگللها وجودچ مرحب بي بس تخاف منه وما قبلت تجي..

رجعت للغرفة ضايجة حتى ما اهتميت اشوف مروان وهو ينطي هدية امه لـ صبا بقت براسي ماريا وشوصلها لهذا الحال؟ لليل رجعت للبيت تعبانة وضايجة ما شفت شُهيب للاسف بعد وما اللتقينا ولا بالصدفة..

وخرت الماشات من شعري ونزعت فستاني بعدني بباب الحمام دا افوت اسبح واجاني اشعار من شُهيب كاتب..

"محتاج اشوفچ"

ابتسمت وطلعت من الحمام اللبس البرنص على جسمي، گعدت على چربايتي وجاوبته..

"نص ساعة واني ببيتك حضرلي عصير اناناس ماي بيبي"

شمرت تلفوني ورجعت اللبس فستاني الاحمر النزعته عدلت مكياجي وشعري تركته مفتوح واخذت جنطتي ونزلت طايرة جوه..

-فادي: وين رايحة بهالليل؟

-مسرة: عندي شغل مهم

-وضعچ وفستانچ مو مال شغل مال سهرة

-ويفرق هالشي عندك؟

-اي يفرق گعدي هنا ماكو طلعة

-بابا!

-مسرة رجعي لغرفتچ ماكو طلعة كلت

-من شوكت تعارض طلعاتي وسهراتي وشغلي؟

-من اليوم!! رجعي لغرفنچ گلت!!

-ما طالعة سهرة رايحة لـ صبا محتاجتني بشي

-خليها هي تجيچ ما تطلعين انتِ اليوم

-لييييش!!!

-لان يعجبني!!

-بابا شبيك شصاير وياك انتَ؟!

-مسرة لا تعصبيني زايد رجعي لغرفتچ گلت!!

-مو من حقك هالشي اني تزوجت!

-تزوجتي من وااحد عااار ابن ***** وراح اطلگچ منه بأسرع وقت!!

-انتَ ليش معصب

-ليش انلغى حفل اعلان زواجكم مسرة؟!؟

-شمسون لغاه

-اي ليش؟؟؟

-مادري مادرري اصلاً مو مهم بالنسبة الي هالحفل الماصخ

-جاي يتلاعب بينا بابا اصحيي لازم نطلگچ من شُهيب بأسرع فرصة وناخذ فلوسه وننهي هالمهزلة!!

-واذا ما قبل يطلگ؟؟؟

-عسااه لا قبل نشتكي عليه بالمحكمة نگول عنه ما يتقربلچ ومو رجال!!

-باباا!!

-رجعي لغرفتج مسررة اني متنرفز كفاية اليوم!!

-شنو صار اليوم وهيچ متنرفز احچي

-شمسون ذكر موت امچ گدام ابو صبا وجماعته

-شنو

-حچه بموتها وكأن صدگ متألم ومتوجع ومأثر بي لوما اعرف هو الكتلها چان صدگت مشاعره الحقيرة!!

-يا كلب يا نذذل!!

-انطيني مفتاح البيت بابا ورجعي لغرفتچ تعبان وماگدر احچي اني رايح انام

عاندت ما انطي مفتاحي وجبرني لحدما اخذه مني وراح لغرفته، دگيت رجلي بالگاع اووف يالقهر شلون راح اروح لـ شُهيب هسة؟؟

صعدت لغرفتي نص ساعة ونزلت اتأكد من الباب شفته مقفول رحت ادور على المفاتيح الاحتياط هم ماخذهن ابوية بده يشك بطلعاتي نص الليل وصار يربط كلشي بـ شُهيب رغم صارلنا اسبوعين ما انفردنا لحالنا ولا مرة! بالليل هو يبات ببيت امه لانها مرضت هالفترة وبالنهار يطلع للموقع..

رجعت فوگ ودزيت لـ شُهيب رسالة..

"ماگدر اجي باچر نتشاوف بالشركة"

جاوبني بسرعة..

"باچر اني بالموقع ما اجي للشركة"

"حباب حاول"

"اني راح اجيچ بس طلعيلي بالباب"

"ماگدر اطلع بابا قافل الباب عليَّ"

"ليش هيچ يسوي؟!"

"يمكن شَك بينا"

"خلي يتأكد مو بس يشك احنه متزوجين!"

"شهوبي باچر اني اجيك للموقع ومناك نطلع لا تزعل"

حطلي ايموجي "اوكي" وطلع من المحادثة افففف شبي ابوية من شوكت يحارب طلعاتي وميقبل! ما ارتاحيت لا بگعدة ولا بنومة ظليت اروح واجي افتر بغرفتي اني مشتاقتله وميته على ما ننجمع بمكان واحد وحدنا بس ماعرف شلون راح اطلع!

باوعت لشباك غرفتي واجت ببالي فكرة، لبست جاكيت فوگ ملابسي لان الفستان اوڤر مكشوف وماريد شهوباتي يغار مديت نفسي اباوع للارتفاع منا اذا اذب روحي راح اوگع واتكسر لو ادبرها؟

والله اني اگول ادبرها وهسة راح اثبتلكم هالشي، شمرت جنطتي وكعبي بالحديقة وطلعت من الشباك حافية، چلبت بكتائب الشباك ونزلت شوية شوية علما وصلت قريب الگاع وطفرت على طولي بكل رشاقة فديتني هاي فائدة الرياضة والتمرين، لبست حذائي وعدلت نفسي واخذت سيارتي وطرت لبيت شُهيب حابة اسويلة مفاجئة..

سفطت بباب بيته وباوعت للدرج البراني مال العمارة فكرت اصعد منه وهم اطفر من شباكه حتى تصير مفاجئة حلوة ما متوقعة هيهيهيهي..

صعدت بخطوات خفيفة منريد نگعد العالم بهالليل الساعة عبرت الوحدة واني مثل الحية ازحف على الدرج زحوف.. وصلت لشقة شُهيب وشفت شباكه مفتوح طبعاً راح يعوفه مفتوح الهوا بره يجنن..

طفرت من شباكه للصالة اضحك فرحانة اخيراً وصلت بدون أي خسائر، تقربت شوية اعبر نص الصالة واسمع صوت طگطگة جاي من المطبخ مشيت كم خطوة للامام ومديت عيوني من باب المطبخ اشوفه شديسوي..

مجرد شفته تنهدت ورقت نظراتي لمنظره گاعد على ركباته وديطلع الملابس من الغسالة يحطهم بسلة صغيرة، كمل وسد باب الغسالة الموصوله بالكاونتر وشال السلة واخذها بره لبلكون المطبخ يشرهم..

نزعت جاكيتي وجنطتي حطيتهم بالصالة ورجعتله بالمطبخ امشي ببطئ وخفة لحدما صرت مقابيل باب البلكون وهو بعده ملتهي يشر بالملابس ويعلگهم يصفهم واحد بصف الثاني ويحط القراصات فوگاهم بترتيب..

اندار ياخذ قطعة جديدة يشرها ورفع عينه لجهتي جمد بمكانه ثواني وعيونه معلگه عليَّ ما رمش حتى، شمرتله بوسة بالهوا وعلى اثرها رمش وابتسم بارز اسنانه البيضة..

-مسرة: هلو بيبي

-شُهيب: مسرات

-مسرة: مسراتي.. نسيت ياء الملكية حبيبي

-ما نحتاجها حبيبتي

ابتسم وهو يگولها ورجع قطعة الملابس بالسلة يطلع من البلكون يتوجه الي، وگف گبالي مباشرة بدون لا يلمسني وگال بمشاكسة..

-لان كلچ الي

-بهاي صدگت

-خليني احزر دخلتي من الشباچ؟

-هاي شلون عرفت؟

-يمكن لانچ مسرة قيثارة

ضحكت وضحك ويايه بخفة وطبع قبلة خفيفة على خدي ابتسمت من دغدغت شواربه خدي وتنهدت براحة..

-هربت من ابوية وجازفت بروحي وفستاني وجمالي علمودك

رفع تك حاجب يباوع لصدر فستاني المكشوف گلبت عيوني وگلت بملل..

-لبست جاكيت فوگاه

-اروح فدرة لجمالچ

-يرحولك فدوة زلم الدنيا

-خلي زلم الدنيا يسمعوچ يرفعون علينا قضية

-راضية بهالشي

جرني من خصري يمشيني وياه يطلعني من المطبخ، رحنا نگعد بالصالة على القنفة شفت شمعته المميزة گدامي شعلتها ورجعتها للطاولة ونمت على صدره براحة امسح على لحيته ووجهه..

-شُهيب: سفرة اسبانيا عمت علينا بعد ما شفتچ وراهة

-ومن نتشاوف نكون بعيدين على بعض ولازم نمثل احنه شركاء عمل وبس

-شوكت تقتنعين وتقبلين نعلن زواجنا؟

-الناس عرفونا متزوجين بيبي و..

-اقصد گدام ابوچ وان علاقتنا حقيقية واحنه متزوجين وراح يجون اشهب وشهوبة للدنيا

-هههههههه مو حامل اني والله

-يعني نگول ان شاء الله ليش دافرة النعمة

-ان شاء الله

فضلت ما اناقش اكثر كلش ديقهرني الموضوع شكله يتمنى يصير عدنا طفل ويعيش شعور الابوة ضجت من نفسي لاني دا احرمه من هالشي بس مو بيدي خايفة عليه وحملي راح يزيد امرنا سوء وبدال ما انحرم بس من طفلة وهي ميس راح انحرم من طفل ثاني هالمرة وابوه الطفل وياهم..

-شهوبي واخوانك عادي عندك يعرفون احنه علاقتنا حلوة؟

-طبعاً عادي واني گتلچ بس بشهر العسل ما ردتهم يعرفون اول منرجع ما اهتم بعد

-ليش عود؟

-غاية عندي

هزيت راسي وقضينا الليل سوه اسولفله على الشغل وعلى خطبة صبا اليوم وسألته عن اموره واحواله ووو..

-شُهيب: مسرة اريد اگلچ شي

-شنو گول

-عندي شغل بالمغرب وراح اضطر اسافر

-شعندك بالمغرب؟ رايح تشوف الاسباني؟

-اي الشغل يجمعني بي

-صدگ شلونه؟ بعده وضعه مو زين مثلما گتلي؟

-بده يتحسن نوعاً ما شال ايده من شركتهم ولو تعرفين شگد خسروا بسبب هالشي ابوه راح يتخبل

-ابوه السبب بطلاقه من زوجته؟

-اي بس راح يرجع يخطبها من جديد هالايام

-اووه حلووو

-هسة عوفچ من الاطلس ليش جاي تضيعين وقتي ماي ليدي؟

-اضيع وقتك شلون؟

باوع على الساعة البيده وعگد حاجبه يگول بجدية..

-يله عدنا بعد وقت

ما لحگت اسأل وشالني للغرفة غصب يطبق مقولة الي براسي اسوي..

سافر شُهيب ورجع الملل يستوطن حياتي صبا اللتهت ويه مروان واربعة وعشرين ساعة بالمكتب حتى كامرتهم طفيتها للخصوصية مع العلم محد طلب مني هالشي بس اعرفها راح تعيق حركتهم وميرتاحون، وميوستي ما اشوفها الا كل اسبوعين مرة وبالعركات اكرم يخليها تبات عندي يوم، جنات وكيان مشغولات بالجامعة وحتى جولي مشغولة ويه امها وماخذة اجازة من الشركة وهيچ باقية وحدي..

اتصل بـ شُهيب بالليل بوقت متأخر نحچي عشر دقايق بس واحسه يحارب الوقت حتى يحچي ويايه وماحب اضغط عليه اتحجج علساس تعبت حتى اخلي ينام ويرتاح..

رجعت للبيت تعبانة اول ما حطيت جنطتي على الميز دگ تلفوني شُهيب، ابتسمت من شفته متصل كامرا وجاوبته.. حچيت وياه ثواني وانتبهت لأثر صاير بشفته گلبي گام يدگ حيل واحس الغرفة دارت بيه..

-مسرة: شُهيب شبيها شفتك؟

-شُهيب: مابيها شي هيچ هاي

تلمسها ووخر الكامرا عن وجهه حتى يبدل گلبي لعب ونار اشتعلت بصدري بلعت ريگ ونويت احچي وياه بهدوء وما استعجل بحكمي وافكاري الشيطانية..

-مبين توجعك مورمة

-لا ما توجع، شلونچ هسة رجعتي من الشركة؟

-اممم

-مشروع صقر ريماس رفضتي مو؟

-لا!

-اها.. ليش؟

رجع الكامرا على وجهه شكله ضايج لان ما رفضت مشروع صقر بالحقيقة رفضته بس مادري ليش هيچ گلت يمكن بسبب غيرتي الي نطت وعيوني البدت تحرگني وتركزت على شفته المضروبة ما گدرت أبعدها..

-مادري احسه خوش مشروع وراح نستفاد منه

-ما راح نستفاد منه بشي بس وجع راس رفضي مسرات

-واذا ما رفضته؟

-مسرة اني اعرف استلام المشاريع وقبولها ورفضها شغلچ وما احب اتدخل بي بس اني انصحچ صقر راح يضرنا اكثر مما ينفعنا خصوصاً من خسر مهمته الفاتت

-قصدك مهتمه الي سمعناها بأسبانيا وانتَ خربتها من ضربته طلقة بصدره؟

-مسرة!

-من شنو خايف شُهيب؟

-ما خايف من شي

-معقولة خايف يدخل بيناتنا وياخذني منك؟

-مسررة!!! شنو هالحچي المااصخ ياخذج مني شنوو؟؟؟

-شُهيب شبيها شفتك احچي!! منو بايستتتك!!!

-شنو؟؟ منوو هاي تبوسني انتِ شتحچين!!

-بدون لف ودوران شفايفك شبييهن تحچي لا والله اتخبل عليييك!!

-بابا ماكو شي شبيچ انتِ مخبلة!!

-اي اي مخبببلة احچييي ولك راح انجلطط شبيهن شفاييفكك!!

-مسرة ماكو شي البارحة صارت عركة بين جماعة الاطلس واخوية مالك

-شنو

-تعاركو عركة انگلبت الدنيا ماعرف المن افزع لمالك لو للاطلس وحمت العركة من اجه فاهد عاد فاهد مخبل اجه شايل سچينة ويريد يدچچ بالعالم واجاني بوكس طاير مادري من منو

-عزه شصار؟؟

-مالك مادري شبي متخبل تخيلي راح يخطب طليقة الاطلس!

-عززه بعيينه وجنات؟؟؟

-‏مادري مادري اني هم انصدمت منه بس متأكد اكو احد مأثر عليه وجاي يضغط لان اعرف مالك شيحب وشنو يدور مستحيل يحط عينه على مرة متزوجة

-شنو يحب وشنو يدور؟

-ميحب الي ما تحبه والما تنطي مجال بس يشوف نفور من بنية ما تريده ينسحب ومو نسونچي ما عنده ذاك الحب والشغف تجاه النساء

-لعد شبي؟؟ ثانياً شلون عنده جرأة يخطب بنية ثانية وجنات على ذمته شلووون!!

-مادري

-شنو راح يكون موقف البنية من تعرف زوجها سافر حتى يخطب غيرها

-مادري مسرة بس لا تحچين شي خلي يهدأ واني اتفاهم وياه

-ضروري شُهيب هاي طفلة حرام عليه يلعب على گلبها ومشاعرها

-تمام

-وينها الجربة؟

-منو الجربة؟

-خطيبتك السابقة

-ها نورسين؟

-لا تگوللل اسمهاا نعالسييين!!

-لعد شصيحلها هو اسمها نورسين

-لااا اسمها الجررربة فهمت لو لا!!!

-مسرة

-لا تجاادلنيي بهذا الموضوع شُهيب اسمها الجربة لو نعالسين غيرها ممنوع!!

-مسرة ميصير هالحجي عيب

-هااا عيب مو؟؟ باي باااي

-لا ولج وين صدگ جذب شبيچ گابة هرموناتج

-حقييير انتَ السبب

-ولچ لا تغلطين!

-انتَ السبب بكلشيي اكرهك روح باي ماريدك

سديت الخط بوجهه وگعدت ابچي وحدي لحد يتحمس مو حامل بس هاي هرمونات الاشتياق عندي گلبي يگوم يوجعني وما ارتاح الا اموت روحي من البچي لو اروح اشوف الشخص وهسة شيوديني للمغرب اشوفه ابن شمسون الكلب!

**

"كيان"
رجعت من الدوام للبيت دا ابقى اني وجنات وحدنا هنا اخواني توسلوا بيه اروح لبيتهم بس ماگدر اتنقل هواي خصوصاً فترة امتحانات هاي، بقوا يمرون علينا مروان ونشوان كل يوم بسبب سفر فاهد للمغرب.. صارله فترة طويلة هناك وماريد افكر ماريد ماريد ماريد ماااريد افكر شنو ديصير هناك حتى اتصالاته ما اجاوبهن وكلما يتصل اغلس على الاتصال ماريد انصدم بشي واللتهي عن دراستي..

گعدت على الكرسي انتظر جنات تكمل تبديل حتى تجي ونتغده سوه، شوية واجت المنشفة على راسها وتلمع من النظافة..

-جنات: علييييييي جاي اتعب اتعب اتعب ما اتحمل بعدددد اريد مااالك

-وشيسويلچ مالك ولچ

-لچ يجي يحاچيهم يخففون عليَّ راح اموت من التعب انتهيت على الاقل ذولة كلهم جماعته ويقبلون

-ورائد مدا يساعد؟

-اي خطية ما مقصر اصلاً كله وياه اني المثكين يعوف شغله ويگابلني وعلى طاري رائد ذكرتيني انطاني ورقة اليوم وگلي اقريها بالبيت

-شنو بيها؟

-مادري اوگفي اجيبها

ركضت للغرفة ورجعت بيدها الورقة، وخرت المنشفة من راسها بقى شعرها مبلل وگذلتها على عيونها..

-جنات: مكتوب "هذا رقمي الخاص دزيلي كل بحث تسوي قبل لا تودي للدكاترة حتى اطلع عليه.. أي شي تحتاجين لا تترددين تتصلين بيه او تدزيلي رسالة وبأي وقت يعجبچ اني موجود"

-كيان: شسالفة!

-شنو؟

-ليش كاتبها بورقة چان گدر يحچيها بوجهچ

-مو اليوم ما تشاوفنا وطلعت مثتعجلة

-انتِ مو عندج رقمه لو هذا رقم ثاني؟

-عندي رقمه مال الجامعة مو الشخصي

-ها مادري احس لا تتصلين بي ولا تدزيله شي ابقي تواصلي وياه على رقم الجامعة

-تمام

-اتفقنا جنات؟

-اي اكيد

-ماشي اكلي حبي، مالك ما اتصل بيج اليوم؟

-لا مختفي صارله اربعة ايام

-شنو موضوعهم ذولة!

-مادري بديت اقلق خاف بي شي؟

-لا يمعودة لو بي شي چان شُهيب گللنه

هزت راسها بس بعدها ملامحها قلقة حتى ما اكلت زين هواي تسرح وتفكر وبالها كله ويه مالك خطية..

تفرقنا كلمن بغرفتها نسوي واجباتنا بس بوقت النوم تجي تنام يمي اما باقي الوقت انطيتها غرفة ترتاح بيها.. لليل اجانه نشوان يتطمن علينا گعد ويايه شوية وراح رجعت للغرفة ارتاح تأخر الوقت لازم انام..

سبحت وسويت روتيني الليلي الكامل وبدلت ملابسي، دقايق واجت جنات هم جاهزة وتريد تنام تثاوبت ومطت جسمها ضحكت على منظرها مثل البزونة بالضبط..

-جنات: يلاااا اريد انام نعثت

-اوگفي بس امشط

-اگلچ هذا چنه تلفونچ يدگ

-شو انطيني

شفت المتصل "شُهيب" كيفت صار يومين ما حاچين جاوبته بسرعة وابتسامة مزينة وجهي..

-هلو حبيبي شلونك

-شُهيب: زين انتِ شلونچ؟

-بخير اسأل عنك وينك شوكت ترجع؟

-ماعرف كيان، حبيبتي راح يجيچ نشوان بعد شوية

-اجه وراح قبل شوية

-راح يرجعلچ بنيتي حضري غراضچ الضرورية وروحي وياه

-وين اروح؟؟

-رجعي لبيت اخوانچ

-شُهيب شصاير خوفتني؟؟

-كيان سمعي الكلمة ورجعي ويه اخوانچ!

-جنات وياي شُهيب!!

-جيبيييهاا

-ماشي بس خليني ابلغ فاهد لان...

-عووووفي صخااااام ورجعييي لبيت اخوانچ لا تخبلينييييي

-بس راح يعصب ويخاف عليَّ من يعرف طلعت بدون لا ابلغه او ابلغ ام خالد

-ماااكو فاااهد بعد كياااان ماكوو علاقتچ بي انتهت!! مالچ گعدة ببيته راح نطلگچ منه اليوووم وهسة!!!!.....

يتبع....

━━━━━━  ━━━━━━

لاااا فاهد وكياااان 😞

وانوب جنات ومالك؟؟ 🥹

توقعاتكمممم؟؟؟ 💀🩷🩷🩷🩷