رواية ابناء الحسوم "شمسون" الفصل الثاني عشر 12 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

لگيتك بالدرب صدفة
ونسيت الرايد امشيله.. ♥️

━━━━━━  ━━━━━━

-متغير

اللتزم الهدوء "مثل عادته" بأغلب الاحيان يلتزم الهدوء للاسباب التالية.. اذا الامر ازعجه او عجبه.. نرفزه او جذبه.. زعله، عصبه، فرحه، ونَسه، حَبه، عشقه او حتى لو انهوس بي.. دائماً يعبر عن مشاعره بملامح جامدة وهدوء تام بينما الهوسة؟ الهوسة تبقى بالروح..

يؤمن بفكرة لا تقدم رقبتك لاحد، لا تنطي لزمة عليك، ايدك الك.. جسمك الك.. مشاعرك الك.. لسانك الك.. عيونك وملامحك تبقى الك مو ضروري الكل يعرف حقيقة شعورك لان هالشي بشنو راح يغير؟ راح يستفزوك بغباء مجاملاتهم ويطلعون اسوء ما بيك وبالنهاية تكون ذليل، تافه، وضيع..

-ما راح تجاوب شُهيب شمسون؟

-شنو يعجبك تسمع؟

اجابة ممتازة نابعة من عقل هادئ، ناضج، مليء بالاسرار والخبايا اجابة اعجبت الواقف امامه لكن ما اثنى بالكلام اكتفى بطبطة على ظهره وابتسامة تحمل معاني كثيرة..

-حلوة اجوبتك لكن اخوك الأكبر چان لين اكثر بالتعامل على الاقل چان يعبر عن مشاعره حاول تتعلم منه شوية

اومئ براسه بخفة وكذلك اللتزم الهدوء..

-اعرفك وانتَ صغير شُهيب شمسون ما انسى اليوم الجابك ابوك الي وجاب اخوك الچبير من الميتم چنتو متعرفون بعض بس چنتو افضل مشتركين عندي روح الأخوة مزروعة بيكم بالفطرة اتمنى بعدكم على هالحال

-كلشي بمرور الوقت يتغير

-بس الدم عمره ما صار ماي؟

-يصير حتى تيزاب عدنه....

**

اركض على جهاز الجري بـ الجم واسمع لـ كيان والي بصفها يحچن، اليوم صارلي اسبوعين من متعرفة على كيان و قوت علاقتنا اسرع مما توقعت صح اني اكبر منها بكذا سنة بس علاقتنا حلوة بسبب تدريبها عدنا بالشركة وشخصيتها الاجتماعية وروحها الجميلة نفس وجهها بالضبط..

صوت الموسيقى عالي يدوي بالمكان بس ما حجب عني حديثها ويه المدربة "دارلان" بالمناسبة سجلت جم هنا وياهة لاني مهووسة جم ومهووسة ببناء وترتيب جسمي وصديقاتي ميحبن وميسون واهس فـ چانت فرصة اجي ويه كيان هنا..

-دارلان: كيان اكو شي مو طبيعي اذا تعرفين شي گولي حبابة

-كيان: ماعرف دارلان مدا اشوفه اني

لحظة خليني اشرح الوضع حتى نبقى على مسار الاحداث ومتدوخون، دتشوفون شگد اني مراعية واحب انطي تفاصيل؟ بس ماحب انطي شي ناقص لو احچي لو اسكت واني احب احچي فـ سمعوا السالفة..

المهم دارلان وكيان هنا ديحچون عن رجال بس ماعرفت منو لكن واضح دارلان زعلانة لان مبين ضاربها بوري المسكينة بس الغريب كيان متوترة كلش وهي تحچي لدرجة وجهها انطعن احمر دم وبس تريد تتهرب من هالموضوع..

-دارلان: صارله هواي ميجي هنا! برأيچ تخلى عني كيان؟ معقولة تركني وبعد ما اهمه؟

-كيان: ماعرف.. ماعرف

-دارلان: يجوز مَل من برود علاقتنا؟ يمكن رادنا نتقدم واني چنت اتدلل عليه هوايه اووف يا غباائي ليش ما تقربت منه اكثر شسوي هسة بروحي

-كيان: ماتوقع شخصيته هيچ هو ميدور هالسوالف

-دارلان: ادري وهذا السبب حبيت علاقتنا البسيطة وحبيت شخصيته هو الرجال الوحيد الي ما طلب يجيني للبيت لو حتى يتقربلي بأي طريقة عكس كل الصاحبتهم قبله، كيان اني احب مالك اريده!

اها اها اها وصلت الفكرة ديحچون على مالك شمسون معذب قلوب العذراوات، او اعتذر العذراوات والغير عذراوات لان واضح وضوح الشمس دارلان لاعبة جولة من لبسها الرياضي الظاهر جلد مفاتنها بوضوح وكلامها عن الرجال..

-كيان: دعسوقة اكو الف رجال غير مالك يتمناچ هو مو مناسب عوفي

-دارلان: بس هو الوحيد الي چان يشوفني إنسانة! انسانة من لحم ودم ومشاعر مو حيوانه يفرغ شهواته بيها ويعوفها بنص الطريق

زفرت كيان نفس ممتعضة ملامحها مزعوجة كلش عجزت افهم سبب ضوجتها كلام دارلان حلو ماشي صح هي مبينه رخيصة وسهلة بس ميمنع تحب وتتزوج انسان يحبها ويحترمها..

استمر حديثهن لوقت طويل دارلان مقهورة وكيان مضغوطة ما فهمت السالفة الا من گالت بعصبية مكتومة..

-كيان: دارلان ركزي وياي وعصري عقلچ هم طلعتي ويه رجال هالفترة يجوز لاگفچ ويه واحد بوضع مو حلو؟!

-دارلان: هاا؟

-كيان: عوفي مالك عوفي ميناسبچ ميستحق بنية كل يوم ببيت رجال!

-دارلان (بعيون دامعة): كيان شبيچ وياي

-كيان: اسفة، اعتذر منچ ما اقصد والله صدگيني بس نفسيتي تعبانة واني مدا اشوفه صار هوايه مختفي وحاضرته من جهازي ماريد اتصل بي وشُهيب هم ميتواصل وياه فـ كلشي ماعرف عنه

-دارلان: خاف بي شي؟

-كيان: مادري گلبي يوجعني هو ابد ميهمل شُهيب حتى لو يدز بس كلمة يتفقده بيها البارحة شفت موبايله كلشي ما دازله صارله اسبوعين

-دارلان: يمة شصار وياه شبي لچ لا تقلقيني

-كيان: كافي اني متوترة من گاعي لتزيديها عليَّ

تمنيت اضرب روحي راشدي ذني واعيات على نفسهن؟ منتبهات ان ثنينهن يحبن نفس الرجال ووحدة دتواسي الثانية؟

شبيهن بعض البنات هالايام يتشاركن حبيبهن ويه بعض اني لو عندي حبيب اضمه بجيبي وافتر بي او اذا چان طويل وميكفي اللبسه قناع وفنها التباوعله افگس عينها وادوس بمصارينها اطلع روحها! ادري ادري ممحتاجة احد ينبهني اعرف اني عنيفة من يجي الموضوع لشي يخصني..

تركتهن اروح اشيل اثقال بينما هنه مستمرات يحچن بمعذب قلوب العذارى، كملت تدريبي لليوم ورحت اسبح وابدل ملابسي، نصيت اللبس حذائي ودخلت كيان هم تسبح وتبدل..

-كيان: مسرة ما جايه بسيارتچ شو ما شفتها بره؟

-مسرة: لا السايق وصلني وراح ارجع تكسي

-كيان: لا ليش شُهيب اليوم يجيني خلي نوصلچ بطريقنا

-مسرة: لا ماكو داعي اروح وحدي

-كيان بمكر: ديلا عاد بس لا تستحين من شُهيب؟

-مسرة: استحي من روحي اكثر مما استحي من اخوچ ابو همسة

ضحكت كيان تحرك راسها ممصدگة كلامي، اردفت بينما انشف بشعري بأسلوب مازح..

-مسرة: عفية رجال لا حچاية لا رواية لا سالوفة لا ينسمعله صوت ولا نفس شسالفته خاف ميت واني مادري وبس روحه تفتر ويانه؟

زادت بالضحك كل الي بالمكان صاروا يباوعولنه ضحكت وياهة ووضحتلها..

-لا اتشاقة بس اخوچ محترم مو ادبسز فـ ما استحي منه وهالشي مريحني بالشغل وياه

رمقتني بنظرة جانبية مصحوبة بأبتسامة واسعة ما فهمت سببها بس ما اهتميت، طلعنا سوه والضحك والتحشيش على شُهيب مستمر، شفناه واگف بباب الجم ينتظرها تقدمنا سوه سلمت عليه وجاوبني..

-كيان: كملت شغلك مو؟

-شُهيب: اي حبيبتي

-كيان: حلوو لعد مسرة راح تجي ويانه لان مجايبه سيارتها

-مسرة: يمعودة گتلچ اخذ تكسي شسالفة كيان

-كيان: لا سكتي معليچ شهوبي ياخذنا

-شُهيب: مع الاسف سيارتي ويه نشوان و كلنا راح ناخذ تكسي

كمشت كيان بذراعه تحاوطها بين ايدها وگالت بتذمر..

-كيان: يوووه هم اخذها ليش تنطي سيارتك شبيها سيارته لو متعجبه للافندي

-شُهيب: سوه بيها حادث البارحة

-كيان: شنوووووو

-شُهيب: شبيچ مابي شي بس سيارته تضررت شوية واخذها للمصلح

-شو اني مادري بهالسالفة يممممة اخوية شوشو خاف متأذي وميحچي شُهيب؟؟؟

-شُهيب: لا مابي شي مثل الصل

ضحكت وهو ابتسم يجر انفها بين اصابعه، تمشينا ثلاثتنا للشارع العام علمود تكسي والطريق كله كيان تسولف وياه..

-مسرة: لو نتصل بـ تكسي يجينا احسن من الانتظار

-كيان: لا شنسوي بي راح نركب باصات لو متحبين؟

-شُهيب: لا ناخذ تكسي

-كيان: شُهيب ناخذ باص اتونس بي حباب

-لا حبي

اشر بعيونه عليَّ عود لان وياهم ابتسمت وگلت..

-ما راكبة باص من قبل خلينا نجرب ونشوف ليش كيان الجميلة تتونس بي

تركت ايد شُهيب ووگفت بصفي تهمس بفرحة حتى ميسمعها..

-كيان: كلش يونس هو صح نظل واگفين اني وشُهيب لان نادر تلگين كراسي فارغة بس منهتم ونبقى نسولف لحد منوصل لبيتنا نعتبر هذا وقتنا الخاص اسولفله كلشي عن يومي وهو يسمعلي وميقاطعني ابد واستشيره عن شغلات محيرتني وينطيني حلول، ماعرف احس الباص بي سحر خاص بس النا

-مسرة: حلوة علاقتكم ربي يديمكم

وگفنا عند موقف الباصات ننتظر واحد يجي وشُهيب كل شوية يگول خلينا ناخذ تكسي افضل وكيان تعارض لحدما وصل باص متروسة مقاعده وباقي بس الوقوف مكانات شاغرة..

صعدنا وكمشنا باليدات الفوگ، وگفت على جهة انطي كيان واخوها خصوصية للحديث وفعلاً من دخلنا هي وگفت مقابيله ضبط واستلمته تسولف وهو بس مبتسم لو يجاوبها بأختصار تهزله براسها وتكمل كلام..

كل شوية يوگف الباص ويصعدون ناس اكثر اضطريت اتقرب منهم شوية بس لسه ما اسمعهم، رجع وگف الباص من جديد وصعدو مجموعة اكبر صار المكان حشگ اختنگت لزگت بكيان بينما هي شُهيب حضنها من الخلف حتى محد يطخها..

-كيان (بصوت عالي): على حظ مسرة اليوم ازدحاااام

اجتنا دفعة من واحد واگف مقابيلي ريحته لا تطاق مبين شارب وعرگان لعبت نفسي، دفعته عني ورجع انرطم بيه يضحك، ردت ادفعه من جديد وحسيت بأيد شُهيب تدفع الرجال من صدره هالمرة ويحچي وياه بلغة البلد..

-شُهيب: ابتعد عن الآنسة

وهذاك بس يضحك فاقد ميدري شديصير ممهتم، انزعجت وتمنيت انزل هنا بس ماكو محطة، لزگت روحي بالشباك حابسة انفاسي من الريحة الجميلة الي صارت بالمكان..

حسيت بجسم يصير وراية لزگ بيه، انداريت مخنزرة بس هدأت من شفتها كيان مبتسمة نزلت نفسها تهمس بأذني..

-كله بسببي حطيتچ بهيچ موقف وشُهيب عصب مني

-مسرة: لا حياتي عادي تجربة جديدة ما راح تنعاد ان شاء الله

ضحكت تدير وجهها لـ شُهيب تنقله كلامي بالحرف الواحد ابتسم يهز براسه اي، انتبهت لأيده الطويلة تنمد تحاوطني وكيان صايرة بيناتنا صدره يطخ بظهرها اما اني ما لامسني بس ايده صايرة حاحز بيني وبين الرجال الي بجانبي، ما گدرت ما ابتسم حاولت اخفيها بس ما سيطرت على نفسي رفعت انظاري اله اباوعله وابتسامة ممتنة صادقة ظاهرة على وجهي بس هو مچان يباوعلي عيونه على كتف كيان منزلهن..

ضحكت بگلبي الحمدلله اللتقيت بـ رجال عنده غيرة على بنية قبل لا اموت توقعت يخلص عمري ويه العارات..

-كيان: شُهيب اريد كباب عروگ اليوم على العشا حباب

-شُهيب: ماگدر اليوم عندي شغل حبيبتي

-كيان: بس راح اعزم صديقاتي اليوم وهنه مشتهيات كباب عروگ من ايدك

ضيگ عيونه عليها و مبتسم بخبث ضحكت اول مرة اشوفه يسوي هالحركات دائماً ملامحه هادئة..

-كيان: هههههههه شنووو

اندارت عليه توخر خصلات شعره الناعمة نزلت على جبينه ترفعهن وهو باقي على وضعه ضميت حلگي اغطي ضحكتي على اشكالهم..

-كيان: شبيك شُهيب والله طيبة مشتهية كباب عروگ

-شُهيب: ما اجي لو تنگلب الدنيا

-كيان: شُهيب لا تسوي هيچ تعرفها تحبك لا تعاند وياهة

عض على شفته يريد يسكتها مبين مماخذ راحته بسبب وجودي بس كيان هي كيان وانفتحت..

-كيان: تخبل وعراقية وجميلة وتموت جمال ونظافة وترتيب ولسان غزلي يجنن

-كافي كيان عيب بابا عيب

-شنو العيب تحبك بعد شتريد تبوس ايدك حتى تبادلها؟

-ولچ كافي

-انتَ الخسران تدري لو لا؟ انتَ الخسران شفايتلك تحبك طيبة وتجي لبيتنا بس حتى تشوفك وتباوعلك من تطبخ وتگول عنك سكـ...

لصم حلگها بأيده فاتح عيونه يريدها بس تسكت..

-شُهيب: ودي صديقاتچ لمروان ونشوان وخريهن عني

وخرت ايده عن حلگها وگالت بتذمر..

-مروان نخصة يخافن منه ونشوان ميحبهن يشوفهن مراهقات ماكو غيرك يكرشن عليه

-يومية جايبتلي وحدة ادري صديقاتچ ماعدهن شغل وعمل بس يحبن بيه؟

-وشبيك شايف روحك؟ واذا شهد حبتك ونبأ رادتك وزينب باستك وطيبة مكرشة عليك وسمـ...

-بعد بعد طلعي فضايحنا

ضحكت تدير بظهرها عليَّ واني مسوية روحي مو وياهم بس كل كلمة سمعتها وحابسة ضحكتي..

-كيان: باعي مسرة هذا الهادئ الحباب ابو همسة التحچين عنه كل صديقاتي يحبنه تدرين عندي صديقة حصرته بالمطبخ وباسته.. والله والله جرته وباسته على غفلة وگلتله تحبني لو انتحر وخطيتي برگبتك

رجع لصم حلگها وينزل روحه يهمس شي بأذنها، طلعت ضحكتها مخنوگة من جوه ايده ورجعت وخرتها..

-مسرة: تنتحر مرة وحدة؟

-شُهيب: اكيد لا كيان تحب تبالغ

-كيان: والقران هذا الصار حتى جرحت نفسها بالموس واجت امها تحچي ويه امك

-شُهيب: كيان!!

-مسرة: عزه لهدرجة!

-كيان: اي بس هو خجول وميحب يعترف بهالسوالف

-شُهيب: اخ يابة

-كيان: بس نار نار بنفس الوقت حسب كلام زينـ...

-شُهيب: ولچ!

-كيان: اگلك شبيك تره مسرة مو غريبة صارت صديقتي زينب نفسها الباستـ...

-شُهيب: شنو المقابل حتى تسكتين؟

-تسويلنا كباب عروگ اليوم

-بشرط لا اشوف صديقاتچ ولا يشوفني

-بس طيبة تشوفك حباب خطية حتى تتحلم بيك

-كيان!

-يله ميخالف اخليها تشوفك من بعيد بدون لا تحچي وياك، اتفقنا؟

نفخ هوا عالي وكفخها على راسها بخفة وگال بضيق..

-اتفقنا

ويه كلمته وصلنا للمحطة الي راح ننزل بيها، گوة طلعنا من وره الازدحام اول ما نزلت اخذت نفس عميق اريد اوخر هالريحة المقرفة من خشمي، طلعت شيشة عطر من جنطتي ورشيت على نفسي وشعري وبخيت بختين لـ كيان بدون لا تطلب ولوما العيب ارش لـ شُهيب هم اكيد لعبت نفسه المسكين..

-كيان: باوع شُهيب هيچ الصديقات رشتلي من عطرها بدون لا اطلب، انتِ معزومة اليوم مسرة على كباب عروگ من ايدين شهوبي

-مسرة: قلبي والله، ماگدر اجي عندي شغل مهم

-كيان: لا حرامات ليش هيچ مو تحمست

-مسرة: غير وقت حبي

وصلنا لنهاية الشارع افترقت عنهم همه يركبون بعد باص بس اني وصلت لفرعنا، دخلت لبيتنا الدنيا ليل صارت تعبانة وجسمي مكسر، بدلت ملابسي لبست شورت جينز وتوب ابيض قصير، لبست شبشوبي ونزلت اسوي كوب شاي اخضر واكل بسكت بالشوفان روتيني بعد الجم..

اخذت الاغراض وصعدت لغرفتي، عرضت برنامج على التلفزيون وبحضني الحاسبة اشتغل، مر الوقت بسرعة نعست گمت افرش اسناني وسويت روتيني الليلي ونمت بفراشي سرعان ما غفيت وطلعت من عالم الدنيا لعالم الطيف، دخلت بـ حلم غريب كان البطل مالك شمسون!

كلشي بالحلم غريب وضعي ولبسي وضعه ولبسه مكان الي متواجدين بي، اشوفه واگف بس كأن جسده ما موجود بس روحه تحوم حواليه.. طبينا لمكان مظلم يخنگ اوكسجين مابي وهو ورايه يمشي وطبگ الباب يقفلها عليَّ عبالك ديحميني من شي بره.. صحتله يرجعلي وصرت ادگ بالباب واصيح حتى يفتح وفجأة شفت امي بالغرفة الطبيت بيها وظهر من وراهة فاهد تقرب منها ودفعها وگعها على وجهها..

-مسرة.. سرور گومي بابا مسررة

فزيت مخروعة جسمي يرجف والحلم براسي حسيته مو حلم لا حقيقة بعدها الخنگة بيه والشعور الغريب ملازمني..

-فادي: شبيچ بابا تونين؟

-مابيه

باوعت للساعة بالـ 11:30 بالليل يعني ما نايمة صارلي بس عشر دقايق.. ولد شمسون حتى بالحلم جاي يطلعولي..

-فادي: راح ترجعين تنامين بنيتي؟

-لا طارت نومتي

-كلش زين لعد اريدچ تطلعين لمكان

-وين؟

-ترحين لبرج ^^^^^ تجيبيلي رام من واحد اسمه "بلاك" الماني الجنسية يلبس قناع اسود وبس عيونه ظاهرة تك وتك عين اصفر وعين اخضر اكيد تتذكري مو؟ مسرة هذا شكله اياچ تتيهين بينه وبين واحد ثاني..

-ليش كم واحد راح يكون موجود؟

-ماعرف بس تصير غدرات دائماً ويه بلاك عنده هواي اعداء يلا بابا يلااا

-ليش مستعجل لهدرجة شبي هذا الرام؟

-بي شغلات مهمة تخص شركة راح تفيدني كلش وراح تعفيچ من بعض الامور

-ماروح

-مسرة يله يا بنيتي لا تعاندين

-ماريد لعبت نفسي منهم ماروح گلت

-اذا جبتي شنو تردين انطيچ

-تچذب عليَّ

-وروح امچ التردي يصير

صفنت افكر بكلامه ماطوله حلف بروح امي يعني مدا يضحك عليَّ وهاي فرصتي..

-فادي: بس اذا ما جبتي اشيل ايدي منچ وميهمني بعد مو تبچين بعدين

-بابااا

-يله حبيبتي يللله ماكو وقت طلعي هسة بسررعة

-باوع ملابسي خليني ابدل اول

-طلعي بيهن مابيچ شي بابا محد راح ينتبهلچ

-دخليني اللبس كوت طويل عاد انطيني صبر

ما خلاني احچي يجر بيدي نزلني جوه واخذ لفاف وكوت طويل معلگته على التعلاگة وره الباب يوصل لكاحل رجلي، سديت الدگمتين البي ونزلت اللبس حذاء الكعب الچنت لابسته وابوية گال..

-فادي: لبسي رياضي بابا تحتاجي

-ليش؟

-خاف تركضين

-اركض عزه بابا اكو احد راح يركض ورايه؟؟

-هاچ هذا المسدس والسچينة حطيهن بجيبچ للاحتياط

-باابا شنو هاي وين موليه اني!!

-روحي روحي حبيبتي سباعية بنيتي

يطرد بيه يدفعني من الباب، ذبيت نفس مابيه اناقش لبست حذاء رياضي وهو ربطلي القيطان، ركبت سيارتي اطلعها من الگراج وسمعته يعيط بسبب ابتعادي..

-فادي: همه هووواي مسرة انتبهييي

-مسرة: منووو؟

-الي يردووون الررااام هواي ويمكن راح تتلاگون ضيييعي روحچ ولا تضيييعين الرااام بابااا افدي بروووحچ

ضربت على الستيرن بقوة راح اطگ من وراه، كملت طريقي اسوق للعنوان الدزه الي، الوقت تأخر وشوارع ذيچ المنطقة فارغة وصلت خلال اربعين دقيقة عبرت الساعة 12 بالليل..

نزلت من السيارة وبخار يطلع من فمي بسبب برودة الجو وقطرات مطر خفيفة تنث السما، شلت شعري ذيل حصان عالي وعدلت اللفاف لفيت فمي وانفي طالعة بس جزء قليل من عيوني بسبب الغرة نزلتها حتى ما انعرف..

عادةً ما اتبع هالخطوة بس بلاك سامعة عنه هوايه وسامعة عنده اعداء كثيرين ويترصدون للي يتعامل وياه وطبعاً اسمه الحقيقي مو بلاك هذا مجرد لقب، تقدمت بخطوات سريعة للعنوان وشفته عبارة عن گرفانات وشاحنات محملة مواد بناء مصطفات وحدة وره الثانية..

صعدت تل صغير تبعه هبوط ورجعت صعدت تل اعلى وتل ثالث لحدما عبرت خمسة تلال صغيرة واشر موبايلي اني وصلت للموقع، دورت حواليه ماكو شي لا بيت ولا حتى گرفان بس شاحنتين مركونة على جنب..

-منو انتِ؟

صوت اجه من خلف وحدة من الشاحنات يحچي باللغة الالمانية، خشنت صوتي وجاوبته بنفس اللغة..

-من طرف T08

رمز ابوية من يشتغل ويه بلاك حرف الـ T يعود لاسم امي "ثرى" بالانكليزي وصفر ثمانية هو عمري من توفت امي..

-بلاك: تقربي

تقربت كم خطوة للشاحنة اخيراً طلع منها بيده ضوء يدوي علگه وحطه على وجهه حتى اشوف عيونه هزيت راسي بخفوت تأكدت هذا هو ولو ممكن أي واحد يگدر يلبس عدسات ويلعب دوره بس مو وكت شَك هسة..

انطاني الرام وگال بالضبط..

-ما شفتچ ولا شفتيني لهنا وينتهي عملنا

هزيت راسي بدون لا اطلع صوتي واللتفتت اعوفه اعود لسيارتي محد اكو هنا غيره شكو ابوية خبصني ويتراجف هاا اهاا ماكو اسهل من هاي المهمة اللطيفـ....

-اوگفي مكانچ

خرب مو هستوني دا اگول لطيفة حتى ما كملت الكلمة شگد قليل ادب وذوق هذا، انداريت عليه وتوسعت عيوني من شفتهم زلم ثنين مسلحين ببنيات جسم ضخمة، حچى واحد بيهم بنفس لغة البلد..

-انطينا الرام وروح بسلام

-مسرة: تحلم

حچيتها بالعربي وعقلي يقره error شنو اسوي هسة؟ اللزگ كل واحد بتفلة واشرد لو شسوي؟ زين يصير اطلب مساعدة صديق احتاجها بالوقت الحالي ضروري؟ زين انتو ماعدكم افكار تفيدوني بيها؟

نزيت على صوت اطلاق نار قوي اجه من خلف ذولة الرجال طلقات صلي وحدة وره الثانية صارو يلتفتون على مصدرها، لا هاي هي كملت ماكو احلى من هيچ اضافة تنضاف لمجموعتنا المافياوية الصاكة اطلاق نار من هوية مجهولة..

انخبصوا الي گدامي يتلفتون يدورون على المصدر شفتها فرصة ابتعد منهم بخطوات خفيفة بدون لا يحسون بس وين ميحسون ذولة الغوريلات انتبهو عليه وضربو طلقة على رجليه لولا ستر الله چان لاحتني..

ركضت بكل قوتي انزل التلال واصعدهن خرب حظي عزه العزاني ابوية ويامن ورطني هالمرة، حاولت افلت منهم بس ماعرف ماشوف شي ورايه بس صوت اطلاق النار هرج الدنيا جاي من اكثر من سلاح بس ولا وحدة مصوبة ناحيتي ماعرف حظي حلو هالمرة مادري اكو سالفة ثانية..

وگع اللفاف من وجهي وتعثرت كم مرة بالكوت طفرت دگمة من الدگم مالته انفتح وطلعن سيقاني ماهتميت لشي بس اريد افلت منا لازم أوصل لسيارتي لاززم..

-لاااااااا

صرختها من حسيت بأيد تلزمني من وره يجرني من شعري الرافعته صرخت بألم ورهبة فلتت نفسي منه وبقيت اركض وهو ورايه تعثرت مرة ثانية ردت اوگع لولا ايده التسحبني يگومني اثناء ركضتي يشدني مقربني لجسمه، بدون لا اشوفه ضربته راشدي ظلام دامس كلشي ماشوف على ضوه الهلال معتمدة..

-مسررة قيثاااارة!!!

صدى صوته مجلجل بالمكان الخاوي وسماعه يگول اسمي الحقيقي كان كفيل يزرع الرعب بقلبي شلون عرفني محد يعرف اسمي من ذولة الزبايل لا وانوب يحچي عربي!!

-انطيني الرام

-هددني وخر عنيي لا تلمسنيي هددني

-انطينياه مسرة لا تعانددين

انداريت بجسمي عليه ما اشوف منه شي لابس شفقة رياضية وكمامة سودة كلشي ممبين من چهرته..

-مسرة: تمام

ترك ذراعي اخيراً بعدما انطيته الموافقة، ماعرف وين راحو الزلم الثنين الچانو ورايه وماهتميت بيهم، مثلت دا انطي الرام وحكيت مكان حاجبي وبنفس اللحظة هربت منه اكمل طريقي نزولاً من التلة بأنفاس لاهثة وقلب ينبض بجنوون ما افكر بشي غير لازم اوصل هذا الرام لابوية حتى يلبيلي طلبي وينطيني الاريده ما مهتمة لا لطلقات ولا لاصوات الصراخ ورايه..

حضنت الرام لصدري خايفة يضيع مني قررت اضمه بشعري، ركضت بكل قوتي بصعوبة گدرت اللف شعري على شكل كبة ضابة واحط الرام بنصها ماعرف بيمن فكرت من سويتها بس متأكدة ما راح يوگع او يضيع وحتى لو انلزمت ما راح يلگون عندي شي من يفتشوني ويفتشون جيوبي..

انلوت رجليه واني اركض تدحرجت من فوگ التلة نزولاً بكل سرعة غطيت وجهي بأيدي شاهگة خايفة يتشوه فكرت اكو اشواك بالگاع الى ان استقريت بالگاع واگعة جاثية على ظهري، ما لحگت اللقط انفاسي جزء من الثانية مرت واشوف واحد صار فوگاية مباشرةً يعيق جسدي من التحرك..

صرخت مرعوبة وانقطع صوتي مع جحظة عيوني واني اشوف شكله موخر الكمامة عن وجهه هذا شيسوي هنا!! ما خليت صدمتي تتعده الثانيتين ورجعت اصرخ كتم صوتي بأيده الكبيرة يغطي فمي ورفع ايديه ثنينهن فوگ راسي يثبتهن.. اتحرك بين ايده اصرخ أريده يعوفني بس ماگدر جسده قوي وضخم وجاثي عليه بطريقة قطعت نَفسي..

-صوتچ مسرة لا تصيحين ما راح أذيچ

اعضعض بأيده حتى يوخرها من حلگي ويبتعد مني تخبلت حتى الهوا ميوصل لـ رئاتي بعد، همس بخفوت قريب وجهي..

-راح اوخر ايدي عنچ لا تصيحين مو من صالحچ اكو اربع مجموعات هنا غيري يردون الرام لا تتورطين وياهم

هزيت راسي اي بس حتى يهدني، بعد ايده عن فمي بس لسه معلگ ايديه فوگ راسي..

-مسرة: هاا طلعت هم زباالة شُهيب شمسون

-شُهيب: صوتچ مسرة لا يطلع

-وخر عني لا تلمسني يا ترى ليا مزبلة تنتميي

-صوتچ گلت

-وخر ايدك القذررة عني وانصي صووتي

بنفس اللحظة مد ايده يدور بجيب الكوت مالتي يفتحه اكثر مطلع جسمي شهگت من وضعنا القذر وصرخت اغلط عليه نزلته اسفل السافلين وهو ممهتم مستمر يدور، لگه سلاحي طلعه وشمره على جهة صحت بي اكثر..

-عاار سااقط منحرررف ادبسززز ابن الكللب ايدددك وخرهاا من جسمييي نذل وصخخخ يا قذرر يا...

استمريت على الغلط والمسبات وهو يدور بجيوب شورتي گمت اشيل روحي وارگعها واحس بأيده القذرة تتلمسني بجرأة..

-ولللك ابن شمسون العااار انعل ابوووك لابو الجاابك تفووو عليك وعلى اصلللك يا نعااال يا منحطين يا منحرررفين يا خايسيين كلكم نفففس القذاررة ولك ايدددك عن جسممميييي

يفتش بكل جزء من جسدي بطريقة خلت قشعريرة تزور عامودي الفقري، اشيل بجسمي عن الارض اتعارك وياه برجليه المثبتات واصيح وهو يقابلني بأنفاس متعبة وعياط..

-شُهيب: وين ضميتي الراااام؟؟؟

نزل ايده مني يحررهن لثواني العصبية اخذتني والحقد استولى على گلبي من رجع يريد يقيدني من جديد بدون تفكير سحبت السچينة الحاطتها بشورتي من وره الغريب ما طلعها وهالشي خدمني، لزمتها بقوة بأيدي اليمنى ودچيتها بخاصرته..

صاح بصوت مكتوم فلت ايدي ثنينهن اخيراً ورخى نفسه عليه صار اثگل، دفعته من اكتافه اوخره عني وقاطعني صوت يگول..

-شلون اجواء رومانسية

صوت صدر من امامنا مع ضوء فلاش قوي توجه علينا منگدر نشوف صاحبه منو بس هو يشوفنا، انفاس شُهيب زادت بعد الطعنة بدت تشوشني وانفاسي مقطوعة صرت احارب النَفس وبلاعيمي توجعني من العياط..

-فدوة لالله بس ما لگيتو احسن من هالمكان؟ يا اخي بالبرد هالسوالف متنراد يحتاجلها مكان دافي

نهض نفسه شُهيب يوخر عني بصعوبة ايده على خاصرته بقيت متصنمة بمكاني وعقلي فصل السچينة بيدي ودمه على اصابعي، جاكيتي مفتوح مبين جسمي انتبهتله ينصي جسمه بصعوبة اكبر حتى يسد الكوت مالتي دفرت ايده وگمت..

-شُهيب: وخررر الضوه فااااهد

حچاهة بصوت قوي متغاضي عن الالم، ذبيت نفس تعبان هذا الچان ناقصني حرفياً هذا الچان ناقص يجيني چلب شمسون الصغير!!

-فاهد: هههههه ليش متريدني اشوف شنو جاي تسوون تره چنت مغمض عيوني لا تخافون ما ردت اخدش نظري البريء

-مسرة: هم انتَ الغثيث!

-فاهد بأستهزاء: اووي مسرة قيثارة شنو هالصدفة الحلووة

-مسرة: وخر الضووه عن وجهي انعميت

-فاهد: مسرة حلوة روحچ حبي المرة الجاية شوفولكم غرفة بفندق اكو چلاب هنا لا تجي تعوعو وتقطع رومانسيتكم

-مسرة: ماشوف چلب غيرك هنا

ما سمعت غير سحبة زناد من مسدس طالع الصوت منه، برمشة عين شُهيب صار گدامي يضمني بظهره ويغطي عيونه من ضوه الفلاش..

-شُهيب: فاهد روح منااا

-فاهد: هاي شنو شو دم اكو هههههههههه

-شُهيب: فااهد روح

-فاهد: غير نفتهم دم منو هذا بالضبط اححح حبيت هذا العنف

-شُهيب: شتريد؟؟

-فاهد: الرام حب

-مسرة: ما طلع رام هذاا ليش الكلل يريدده

-فاهد: سكتي انتِ لا تلاسنين

-مسرة: امشيي لك ابن الـ...

حسيت بـ شُهيب يصم بحلگي ويديرني عليَّ اقابله ونزل نفسه لطولي يهمس بخفوت..

-شُهيب: لا تتورطين ويه فاهد سكتيي

-فاهد: اهووو روميو مو وكت بوس هسة عوف البنية وانطيني الرام

-شُهيب: وخر الضوه خليني اشوفك

-فاهد: ما

-شُهيب: فاهد وخر الضوه عيوني انعمت

-فاهد: ماا

-مسرة: هذا الـ.....

انلصمت مرة ثانية من ايدين شُهيب يبوو متت من وراه ذبحني لاطش بيه..

-شُهيب: فاهد مانطيك شي قبل لا اشوف وجهك

عگدت حاجبي مستغربة من طلبه مچنت اعرف يريد يشوف فاهد والي وره فاهد! بس وخر الضوه عننا گدرنا نشوف ضبة زلم مفتولين بالعضلات كلهم لابسين اسود من فوگ ليجوه وهو مترأسهم.. اها وضحت الفكرة..

-شُهيب بهمس: خرب روحك

-مسرة بهمس: لو ما طالع بوجهي چان ما انحطينا بهالموقف البايخ

-شُهيب: لو مبطلة عناد ومنطتني الرام چان هسة انتِ بفراشچ دفيانة ونايمة

-مسرة: تحلم انطيك التريده

-فاهد: نعست

-شُهيب: تعال وحدك اخذ الرام خلي رجالك يروحون

-فاهد: ماعدكم مخدة فراش بطانية معقولة باقين هيچ بالعراء گدام العالم يا عيب الشوم

-مسرة: اني هذا الفاسق بعد ما اتحمله ولك ا...

-شُهيب: هسة غير تسكت!

-فاهد: لا صدگ نعست خربتو مخططاتي واني ورايه حفلة

-شُهيب بهمس: انطيني الرام ماي ليدي

-مسرة: يور ليدي بعينك يالتافه ما انطيك لو تموت

-شُهيب: ارجعه الچ بس ابدله بهذا

شفت رام صغير بين اصابيعه ضامه بين ابهامه واصبعه البنصر بطريقة متنشاف..

-مسرة: ترجعه الي وعد؟

-وعد

نتهامس بخفوت ما منتبهين عيون فاهد علينا، رفعت ايدي افل شعري حتى اطلعه وجمدت من شفت فاهد وكل رجاله مصوبين مسدسداتهم علينا..

-فاهد: البنية لو الرام شُهيب

-مسرة: شنو؟

-فاهد: اشش انتِ جاي احچي ويه شُهيب انتِ شُهيب؟

-مسرة: اسم الله عليَّ بيش طالبني

-فاهد: خلص لعد سكتي

رجع يوجه الكلام لـ شُهيب الواگف ورايه..

-فاهد: الرام لو صاحبتك؟

-شُهيب: فاهد شنو جاي تسووي فاااهد

-فاهد: شغلي

-شُهيب: انتَ...

-فاهد: انطيك مهلة تفكر بينها وبين الرام، احسب من واحد للثلاثة ما انطيتني الرام جسمها يلعب بي الطلق واشياء اخرى بعدين

-شُهيب: انطيني مجال نتفاوض شبيك!!

-فاهد: مو جاي اتفاوض وياك بعد شكو هاي بدال ما تتشكرني شُهيب جاي تزعلني منك ليش تكسر گلبي الرقيق؟

-شُهيب: خلينه نتفق غير اتفاق..

-فاهد: واحد.. ثنين.... ثنين ونص.... ثـ...

-شُهيب: ننطييك الرااااام

صرخها بصوت عالي يدفعني عنه وگعني بالگاع صحت بألم ثگلي صار على ايدي، جفلت من تقدم مني شُهيب يفتح شعري ويشمر القراصة فوراً وگع الرام بالگاع مديت ايدي بسرعة اريد اخذه بس ما لحگت لگفه مني اسرع وشمره على فاهد..

-مسرة: لااااااااا لييييييش يا حقققققيررر

سحبني من ايدي بقوة يگومني ويمشيني مثل ميريد ايد يعتني بيها وايد على خاصرته التنزف، تملصت من ايده اعيط واضرب على صدره اسبه واغلط عليه عصبت اكثر من هدوئه ما حاول يوخرني عنه حتى بعدما ضربت خاصرته، تدمررت قهر وحسرة متت ياله حصلت الرام تالي اخذه مني برمشة عين شيخلصنيي من ابوية شيخلصني!!

-حققققير وعدتنييي تعوفه عنددك وعدددتني شلوون تسوي هيچ بيه!!

لحدما وصلنا لسيارتي فتحها بالبصمة مالتي ماعرف منين حصلها بس اكيد جرها من جيب الكوت من چان يفتشني، دخلني اگعد بكرسي الصدر وهو راح لكرسي السايق..

حيلي مهدود تعبانة ماعندي طاقة احارب بعد، ذبيت نفسي على الكرسي خانسة صوتي مبحوح وكارهة كلشي ما طايقة نفسي، دور بالسيارة عن شي يگدر يوگف النزف بي فتح الچكمچة شاف لفاف صوف بنفسجي احطه احتياط  هنا، اخذه وضغط بي على جرحه ومشى بالسيارة، الهدوء چان سيد الموقف لدقائق قبل لا اگول بخيبة..

-وثقت بيك

-شُهيب: مو بيدي صدگيني

-مو بيدك شنوو؟؟؟ انتَ اصلاً شكووو اجيت شكوو وگفتنييي شكووو حاربتنييي كل هااي چانت خطططة منكم حتى تاخذون مني الراام!!!

-مو هيچ

-لااا هيچ لان ماكووو شي يفسر السويييته شُهيببب ماكووو

-ساومنييي بيچ!! سمعتي شنو گال؟؟ گال البنية لو الراام راد يكتلچ شبيچ انتِ!!

-وليييش تفضلني على الرااام!! چان گدرت اللگه حل واخلص منه مثل ما خلصت من الفف واحد نفسه!!

-انتِ عايشة بالاوهام تخلصين من فاهدد؟؟ ليش منوو گدر يخلص من فااهد وبقى عاايش منو؟!!

-على الاقل احااول حتى لو متت خليني اموووت على شي يخدمنيي

شخط السيارة بنص الطريق وفتح الضوه البيناتنا، اندار عليَّ يلهث ووجهه متعرق..

-شُهيب: اوقات الشجاعة تكون غباء! تجيب آخرتنا وتدمر شكو شي صنعناه! احياناً التنازل هو الخيار الصح يجوز ما راح تفهمين عليَّ هسة بس اريدچ تعرفين اني سويت الصح من بعدتچ عن فاهد وجماعته مو ضعف مني ولا معناها ماگدر احاربه واتغلب عليه بس كل فعل اله ردة فعل كلشي اله تبعات درسي خطوتچ ولا تمشين بعشوائية!

سكتت تعبانة ماگدر احچي اكثر ماكو فائدة الرام راح واحلامي ضاعت وراسي الي راح ينوكل من ابوية وراح يذبني بمكان اخطر من اليوم عقوبة الي ويمكن المرة الجاية فعلاً راسي يطير..

-كلكم مجرمين

اللتفت عليه يباوعلي زفر نفس ورجع يسوق بهدوء، انفاسه مو منتظمة ماعرف شگد عمق جرحه لان اللفاف انترس دم بس ميهمني طبه طوب تمنيت اسبه بعد بس ماگدر اضمنه، مرت دقايق وسألني..

-ما شفتي محتوى الرام مو؟

-لا

-بس فاهد ميعرف بهذا الشي واكيد عباله عرفتي محتواه اااخ شيخلصناا

-شبيك؟

-ماكو شي انسي

-شنو اني بورطة جديدة؟

-معليچ اني اتصرف

-شتسوي هالمرة سبع البرمبه؟!

اكتفى يرمقني نظرة جانبية معاجبه، وصلني لشارعنا ونزل من السيارة رجعت لكرسي السايق وانطلقت للبيت اگدر اشوفه من المراية بقى واگف ينتظرني ما راح الا من دخلت البيت، نزعت حذائي المطين بالباب ووضعي مو احسن من حذائي كلني طين حتى شعري وملابسي..

حاولت استجمع قوتي، ضغطت على قبضة ايدي بقوة وتوجهت لمكتب ابوية، اول ما فتحت الباب اجاني ملهوف مثل عادته..

-هاا حبيبة بابا وين الرام

-بابا

همستها بهمس راجف، عيوني انترست دموع من تغيرت ملامحه من لينة لطيفة الى قاسية مظلمة..

-وين الرام مسرة؟!!

-بابا اني اسفة.. حاولت صدگني بس...

-طلعي بره

-بابا فدوة حاولت والله حاولت بكل ما عندي بس اجه بوجهي ابن شمسون و...

-طلعي بره گلت!!

دموعي بعد ماگدرت اسيطر عليها والرجفة لزمتني خايفة كلش خايفة ماعرف شنو راح يگول بس ملامحه متبشر بخير..

-بابا

-ثلاث اشهر اضافية

-لااااا حباب لااا ابوس ايدك لتسوي هيچ بيه والله تعبت بااباا

نزلت على ايده ابوسها ابچي واشهگ چنت اعرف هذا الشي راح يصير لو ذابني بحلگ الموت مرة ثانية ولا هالشي..

-باباا گلبي رااح يوگف ارحمنيي اني بنتتتك الله يخليك فدووة اروحلك اسوي كل التريده كلشيي تريد اسوي بس لتسوي بيه هييچ

-طلعي مسرة

جر ايده مني تركني بالگاع واگعة وابچي، الحسرة ذبحتني گلبي عصرني الدنيا ظلمت بعيوني راح اموت شنو هالعيشة شنو هالظلم لييش يصير ويايه هيچ شنو سويت غلط حتى هيچ اتجازه؟؟ كله منه كله من شُهيب شمسون!!...

**

"كيان"
من الصبح طلعت اشتري قهوة سفري اشتهيتها، تمشيت بالشارع اتكمع بيها واعيش حياتي احسني مرتاحة هالفترة ماكو مشاكل بحياتي وصارلي هواي ما شايفة وجه شمسون ولا ثامر وصديقاتي الحقيرات بس اكو شغلة معذبتني وهو مالك!.. جاي اموت على شوفته مشتاقة اسمع صوته وجاي امنع نفسي ما افتح الحضر منه وابادر برسالة..

رحت بطريقي لبيت ماريا المفتاح عندي دخلت وبيدي قهوتها شفتها واگفة تحط اخر لمسات مكياجها الصباحي..

-كيان: هلو عيني جبتلچ گهوة ام شهوبي

اخذتها مني تضحك تحب من اصيحلها ام شهوبي، گعدنا على التخم نسولف وهي كل شوية ناطة رايحة لمكان لو تروح للمطبخ تتأكد من نظافته لو تبدل لو تسشور شعرها لو تمسح حمرتها وتحط غير لون..

-ولچ گعدي شبيچ عبالك تايهة منو راح يجيچ اليوم وهيچ متأنقتله

-ماريا: منتظرة شهوبي گال راح يجي واذا البيت نظيف يجيبلي هدية

-هلا عينيي نيالچ والله يجيبولچ هدية اذا تنظفين لو تشوفين اخواني راح اموت من عفونتهم وخيستهم

گمزت متحمسة من دگ جرس الباب راحت تفتحها وكل شوية طافرة من الوناسة، تمشيت وياهة للباب وچان اتفاجئ من اشوف..

-هلو ماريا

-كيان: فاهد!!

-فاهد: ها هاي كوري هم هنا

-كيان: شجابك؟؟

-فاهد: شعليچ انتِ بيت الخلفچ هو؟!

-كيان: ايي بيت مرت ابوية شعندك جاي هنا؟!

-فاهد: لان مرت ابوچ تصير ام اخوية!!

-كيان: اخوك الما معترف بي وتريد تقتله!!!

-فاهد: انتو كلكم هيچ مملين ونخصة؟ شگد تكبرون المواضيع دوخري وخري عن وجهي

-كيان: لو تموووت متدخل للبيت منستقبلك شُهيب ميقبل!!

-فاهد: هسة شُهيب فد قندررررة

-كيان: دروووح چننك سليمة

-فاهد: اريدلي وحدة لسانها حلو ماكوو كلهن يصلن صلي چنهن دلالات

-اطلععع من بيت ماريا

-فاهد: اني سعيد

-كيان: وشعليه اني؟؟

-فاهد: سأليني ليش

-ليش بله؟!!

-فاهد: لان ما چنت اعرفچ من قبل وچنت عايش حياتي بسلام

-ماريا: هلو فهودي

-كيان: ماااريااا شبيييچ

-فاهد: وخري شعليچ انتِ والله حلوة هاي ليش الكل يغار مني هنا خلي عدكم ثقة بنفسكم شوية

فوتته ماريا للبيت وانلصمت من شفت هارون يدخل وياه هذا وين چان خاتل والله لو شُهيب يدري يطيح حظهم.. بدون تردد رحت للغرفة واتصلت بي ابلغه ما جاوب رجعت اتصل هم ما جاوب دگيت على نشوان جهازه مغلق دزيت رسالة لـ شُهيب ابلغه شوكت ميشوفها خلي يشوفها ورجعت يمهم بالصالة..

-فاهد: شلونچ ماريا مشتاقلچ

-ماريا: اني ما مشتاقتلك يا مسودن

-فاهد: جرحتي مشاعري العضروطية

-ماريا: احسن

-فاهد: اجيت اگلچ اخذت غيبتچ وصحتلچ ام الزلم وردت اكتل ابنچ قبل كم يوم

شهگت تدگ على صدرها وهذا انسرد عبالك ديسولفلها أحداث مسلسل..

-فاهد: بس طبعاً ما مات لانه عار وانتِ صرتي بين عيوني شسوي بگلبي الرقيق يحبچ واحسچ مثل امي

-هارون: شگد چذاب

-فاهد: صح جاي اچذب ما احسچ مثل امي

-ماريا: ردت تكتل شهوبي ولك فهيييد

-فاهد: ماريا ابنچ عار ويندگ بيه واني هم اجيت اندگ بيچ وطبيت بيتچ ولابس اصفررر وراح اشرب هاي الگهوة عناد بي خلي يموت من القههر

اخذ كوب القهوة السفري يتكمع منها، شگد نرفزنيي وتنرفزت اكثر من عيون هارون الوصخة گص ماريا گصصص بنظراته خو من گامت تعوف فاهد زعلانة وصعدت فوگ عيونه تركزت بمكان واحد بس!!

عفتهم گاعدين مثل الچلاب بالصالة ودخلت للمطبخ اشوفهم منا يسولفون بصوت مسموع ضاربين الدنيا بعرض الحايط..

-هارون: لابس اصفر الفايخ

-فاهد: حلو البيت نعالي وقندرتي واشيائي الاخرى على ذوقك شُهيب

-هارون: ليش ما عايش هنا هو؟

-شمدريني وشيخصني اني؟!

-هسة يله شوكت تعرفني عليها

-فاهد: منو هي ولك؟

-هارون: هاي الحتيت ولك تشگ شششگ

-فاهد: هاي الحتيت تصير ام اخوية هارون لا تلعب نفسي وادعبل منا

-هارون: صغيرة ولك انتَ شفت جسمها؟؟؟ خرب روحههاا

-فاهد: راح امطلك هنا والله

-تغار عليها هههههههههههههههه

-مهما يصير بيني وبين العار تبقى ماريا عزيزة احبها وما اقبل عليها

-دنچبب دومك تعيّر بي وتصيحله ابن ماريا ام الزلم

-اي لانها ام زلم وهذا واقع هسة اني اضوج من احد يصيحلي المسودن؟ اكيد لا لان اني صدگ مسودن

-زين عرفني على كوري

سمطه براشدي على علباته ودفره وگعه من القنفة..

-فاهد: عووووف بنات شُهيب لا تندگ بيهن

-هارون: ليش تخاف منه!!!

-ما اخااف منه بس ميسكت اذا ضوجنا نسوانه يسوينه وصلتين وابوية اكيد يفزع وياه ويطمونا بفد گبر

-هارون: اريدها!!

-فاهد: كااافي لا تنرفزني قلة بنااات عجبتك هاي الكوري؟!!

-هارون: تملخ

-امك ال**** تملخ گوم نطلع انلبسنا

-اريدها فاهد بشرفك حرك نفسك شوية لخاطري

-تتقرب من كوري اني اذبحك بيدي لا تورطني ويه عارها مالي خلگ استشرافه الزايد!

ظل هارون يدردم حطيت ايدي على گلبي خايفة بس ارتاحيت من فاهد رجع لصمه برفسة وطلعه من البيت، هذا الحقير حاط عينه على ماريا ومن ما حصلها حط عينه عليَّ شگد خسيس!!

اخذت اغراضي وطلعت للشركة وبوجهي لمكتب نشوان اشوف شبي وليش ما بات بالبيت البارحة لگيته حاط راسه على المكتب ورايح بسابع نومة، وگفت على جهة وعطت بي..

-كيان: وووووولللللك

فز يوگف بمكانه يسوي روحه جاي يشتغل ويشيل بالملفات ويگلب بيهن متت من الضحك عليه وجهه بي طبع احمر وشعره مرعبل حتى ما باوعلي يجوز عباله شُهيب او مسرة ما ميز صوتي..

-كيان: يااا مهمل

دار وجهه عليَّ بسرعة فاتح عيونه، حط ايده على گلبه وذب نفس..

-نشوان: اشتععلت صفحتچ كيااان على هالفصللل

-كيان: مهندس چيس حب انتَ صوچ شُهيب مشغلك وياه

-نشوان: خلي الهبطة تروح مني واني اعلمچ على تجاوزچ

-كيان: وين چنت البارحة ولللللك

كفخني على راسي ودفعني لزگني بالحايط..

-نشوان: وخري والعباس جسمي يرجف عبالي اجه احد مهم تالي طلعتي انتِ العوبة

-ما جاوبت وين بتت البارحة؟

-ببيت صديقي

-بعد لتنام بره ماگدر اغفى وانتَ مو بالبيت

-يا بعد چبدي چبدچ تعالي ابوس خدچ

-وخر وخرر شفت سعبولات نازلات من حلگك وانتَ نايم لعبت نفسي

-متستاهلين واحد يبوسچ مال تكفخ انتِ

-اگلك فاهد اجه لبيت ماريا قبل شوية

-صدگ؟؟؟؟

گعدت گبال ميز المكتب اسولفله كلشي گام يشيل روحه ويرگعها ويغلط ويسب بهارون الخيخة، وره ما هدأ طلعت لفتي من الجنطة آكل لفة كباب عروگ السواه شُهيب البارحة وطلع نص الليل بحجة عنده شغل بس ادري بي يريد يتهرب من صديقاتي گعدن يتفرجن عليه عبالك لعابة گدامهن ملطلطات مو بيدهن..

-نشوان: اني ما شايف انثى تتريگ كباب عروگ

-كيان: وهسة شفت

-نشوان: شتحسين لخاطر الله

-كيان: احس بالحب والامان والاستقرار والراحة والـ..

-نشوان: اصص اصص لا تكملين وتدوخيني، منين هذا الكباب جبتي؟

-كيان: وانتَ شكو

-ريحته دگت براسي

-مو على اساس وين اكو انثى تتريگ كباب عروگ؟

-اي گلت انثى قابل اني انثى؟

-اني اشوفك انثى

-نذلة! طول عمرچ نذلة تعالي انطيني عضة

-لو تموت

گام وركض عليَّ ويجر اللفة مني اخذ عضة شكبرها دفعته وصحت بي..

-شنوو هاي عضة تمساااح شبيك انتَ همجي

-طيب عاشت ايدك شهوبي انطيني بعد عضة

-وخررر ولك

جرها من ايدي وگام يوگف بزاوية المكتب حطها كلها بحلگه گمت ازاگط واضرب بظهره..

-حراام عليك والله هذا حق مغصووب

-نشوان: حتى ثاني مرة ما تدزيلي صور الكباب بنص الليل وتغوريني بي حلفت اليوم الا اربيچ

-حرام عليك هسة واذا هاي فوگما كتبتلك مكانك خالي؟؟

-مكانك خالي ويه ايموجي شيطان مبتسم خوش مكان خالي هذا

-انتَ نحس وعفونة هم روح زعلت منك

-عود اعوضچ

-شلون؟

-اجيبلچ حلويات وعشا اليوم

-ماشي اتفقنا، اني رايحة لمسرة البارحة بالجم وعدتني تعلمني على تكنيك جديد لرسم المخططات بينانياً

-بختت

-صرنا صديقات ونروح لجم واحد ونتراسل

-بختتتت

-وتعلمني على اسرار شغلها وتدعمني وتهدأني من اتوتر ودااائماً اشتغل بمكتبها

-بخت العالم كله متجمع بيچ كيان

-حط عينك يلا يلا حطها واحسدني حتى افگسها

هجم يريد يكتلني وطلعت اهرب من مكتبه اركض لمكتب مسرة، دگيت عليها الباب وسمحتلي ادخل بس وضعها مو مثل كل يوم ما استقبلتني بأبتسامة ومن سلمت عليها جاوبتني بخفوت..

-كيان: مسرة انتِ بخير؟

-مسرة: اي حبيبتي

-كيان: احسچ تعبانة او مريضة؟

-تعبانة شوية

سكتت ما لحيت وياها شكلها متغير اليوم وملامحها مغيمة ما ابتسمت نهائياً وحتى دموع اشوف بعيونها تحارب حتى مينزلن، قررت اعوفها براحتها بس ما قبلت وگالت هي وعدتني تعلمني..

طول الوقت وهي تعلمني تحچي گوة روحها طالعة وكل شوية تسكت تتنهد وتسرح..

-كيان: كافي لليوم حتى اتدرب على هذا

-ماشي

چنت متمنية اعرف بعد معلومات بس وضعها ميساعد، ترخصت منها ارجع لمكتب نشوان وشفت صبا تطلع مناك واثار الضحك واضحة عليها حرفياً وجهها احمر وعيونها مدمعة من الضحك..

-صبا: يا صباااح الخير

-كيان: صباح النور والطاقة الايجابية

-صبا: ههههههه عمري شلونك يحلو

-كيان: بخير، اگلچ صبا مسرة شبيها؟

-صبا: شبيها

-كيان: ماعرف حسيتها مو على بعضها

-صبا بقلق: شلون ليش؟؟

حركت اكتافي بطريقة ماعرف عافتني وراحت لمكتب مسرة، واني واگفة وصلتني رسالة من شُهيب يطلب مني اروحله، فتت لغرفته وعيوني بتلفوني اشوف باقي الاشعارات..

-هلوو شهوبي

-هلا بنوتي

گعدت مقابيل طاولة المكتب على الكراسي، نزلت تلفوني ارجعه بجيبي وابتسمت حتى ابدي اسولفله شنو تعلمت اليوم، هستوني دا احچي ولاحظت تغير شكل شُهيب! وجهه اصفر كركم ومبين تعبببان كلش..

-شُهيبب شبيك؟؟

-شُهيب: شبيه

-وجهك اصفر شنو مريض انتَ؟؟

-اي صبحت مالي خلگ شوية

-شنو هاي يوم المرض العالمي حتى مسرة تعبانة كلش

-عدها العافية

-خطية رغم تعبانة وگوة تحچي قهرتني بس فهمتني على كم شغلة

-اها

-يا ترى شبيها؟ تدري كلش قلقت بس استحيت اسئلها وشفتها متتجاوب ويايه وكل شوية تسرح وعيونها تدمع

-حبيبتي لا تضغطين عليها اكيد عدها ظرف شاغل بالها

-اي اكيد

-چانت تبچي؟

-اي نزلت دمعتين منها وهي تشرحلي انصدمت

هز راسه وظل ساكت، لاحظت عيونه انحرفت على شاشة الي تعرض الكامرات يركز بيهن شوية، گمت اوگف بجانبه وعيوني راحت على كامرة مكتب مسرة..

-كيان: كأنها دتبچي

-اي

-يعني دتباوعلها انتَ؟

-اي

خفيت ضحكتي اباوعله مركز بكل حواسه بالشاشة لحظات ورجع لوعيه بعد عيونه عن الشاشة يحمحم..

-شُهيب: احم تريگتي؟

-كيان: ههههه اي

-شو تضحكين

-اگلك كبر شاشة مسرة خنشوف شبيها

-لا عيب بابا ميصير

-ليش وشكو هسة باوع متت قهر دتبچي شهوبي

مديت ايدي على الماوس ادوس كامرتها اعرضها على كل الشاشة، رجع يباوع ويايه وفعلاً شفناهة صبا واگفة مقابيلها ومسرة منزلة راسهة ضامة وجهها بثنين ايديها وجسمها يهتز مال وحدة تبچي بحرگة..

-كيان: سودة عليَّ شبيها

بقينا نتابع شنو ديصير وشُهيب ويايه نفس ما طلع منه، الشاشة مو كلش واضحة بس نگدر نشوف شنو ديصير صبا صارت تأشر بأيدها على باب المكتب ومبين دتعيط منفعلة ومسرة بس تهز براسها ومستمرة بالبكاء..

-كيان: باوع عبالك دترزلها؟

-شُهيب: لا مستحيل

-كيان: ليش

-شُهيب: ماحس شخصيتها تسمح لاحد يرزلها مسرة ترزل متترزل

-هههه بعد انتَ اعرف

-شُهيب: كافي كيان سدي الشاشة عيب نتجسس عليها

-كيان: اگلك خلينا نفتح المايك نسمع شتگول

-لا عيب ميصير

-حباب

-كيان لا

-فدوة شوية

-بله لگفونه؟

-محد يلگفنا شبيك انتَ الـ Boss

-واذا عرفت جاي نتجسس عليها والله تخزينا وتفضحنا هنا

-هم صح

-اي عيب

-صح عيب

-اي

-كلش عيب

-اي

-بس احس عادي هسة لان دنتطمن احنه لعد نبقى قلقين عليها؟

-بعد شنسوي

-شُهيب خطية

-صديقتها وياهة هي تواسيها

-خلينه نروح نواسيها

-ولچ گعدي ترديها تدچني مرة ثانية

-شنو؟

-شنو

-شنو تدچك مرة ثانية مافهمت؟

-اقصد كلماتها تدچ بـ گلبي

-بس حبابة هي

-اي

-كيوت

-اي

-لطيفة كلش

-اخطبها الچ؟

-ههههههههههه شُهيييب شبيك ويايه

ضحك يجر بذيل حصاني وصغر كامرتها، رجعت اگعد بمكاني بينما هو سرح يفكر بشي شاغل باله..

تذكرت موضوع فاهد سولفتله بس الغريب ما عصب نفس نشوان من عرف فاهد رايح لبيت ماريا بس عصب كللش من عرف بـ نية هارون..

-كيان: چنه سليمة هذا اخوك فاهد عكس مالك بكلشييي

-شُهيب: ابن الكلب شوكت يتوب من سوالفه لو الااا ينذبح ياله يرتااح

حچاهة بعصبية وگام يدگ سترة بدلته الرسمية ويسند ايده على الحايط ينطيني ظهره، بقى على هذا الوضع فترة يفكر وحده ما حچيت لان مبين معصب واكثر شي اكرهه واخاف منه من شُهيب يعصب لان مينحزر..

بعد فترة ذب نفس ورجع يگعد على الكرسي سد موضوع فاهد وهارون وبعد ما علق عليه، دگ على نشوان ومروان وفاضل بلغهم اكو اجتماع هسة وراهة دگ على شخص وعيونه راحت للشاشة يباوع حسيتها مسرة بسبب نظراته الثبتت على الشاشة يشوف حركتها من گامت تجاوب، فتحت مكبرة صوت اسمع شتگول خزرني ما راضي بس ما طفاهة..

-مسرة: نعم؟

-شُهيب: صباح الخير

-مسرة: من وين يجي الخير واني صبحت بصوتك

فتحت عيوني مصدومة من جملتها بينما شُهيب غمض عيونه ومد ايده يريد يسد المكبرة ما خليته خزرني حتى اوخر وماقبلت صراحة قلقت كلش واعرف بروحي راح ابقى افكر الا اسمع وارتاح، بنفس اللحظة دخل نشوان للمكتب وكملت السبحة..

-شُهيب: عدنا اجتماع مدموزيل

-مسرة: معليه انتَ كمل كلشي

-شُهيب: شلون معليچ انتِ مو المديرة؟

-مسرة: اي وحظي السيء خلاك انتَ شريكي!

نشوان فتح عيونه بصدمة نفسي بالضبط اشرلي بيده شكو شصاير ماعرفت شنو اجاوبه، رجع شُهيب يريد يسد المكبرة ونشوان ما قبل الا نسمع..

-شُهيب بهمس: اني اعلمكم انتو الزوج

-نشوان بهمس: ولك شنو هالمحادثة الحاتة خلينا نسمع شكووو

سوالنه شُهيب اني اعلمكم بيده ورجع يحچي بهدوء وياهة..

-شُهيب: لندخل حياتنا الشخصية بالعمل ليدي مسرة

-مسرة: حياتنا الشخصية؟؟ ولك ابني انتَ البارحة هبدتني هبدد تدري لسه جسمي يرجف من ثگل جسمك؟؟ وايدي تموتني وانتَ مقيدني! قطعت نفسي ردت امووت وانتَ ولا تهتم!!

بعد ميعرف شلون يسد مكبرة الصوت انخبص خبص ونشوان شال الجهاز بيده يضمه لصدره حتى ميلوحه شُهيب وگال بهمس متحمس..

-نشوان: العباس عليك ما تسد المكبرة خلينا نسمععع ولك

-شُهيب: انتِ جاي تورطين روحچ بشغلات اكبر منچ بس ما جاي تستوعبين

-مسرة: استوعب معليك انتَ لتدخل بحياتي وتفرض مراجلك عليَّ شهاب شمسون!!

-شُهيب: اسمي شُهيب هاي اولاً، ثانياً انتِ طلبتي شي مو الچ وما يخصچ شنو ترديني اقدمه الچ على طبق من ذهب؟!

-نشوان بهمس: ولك شنوو هذا الطلبته وتريد تنطي على طبق من ذهب تره تفكيري فااسق للنخااع

-مسرة: النقاش وياك عقيم انتَ لو ما واگف بوجهي ولازگني بالگاع ومتساخف ويايه چان ما صار كل هذا!

-شُهيب: اني متساخف وياچ؟؟ اني؟؟

-مسرة: لا يروحيي اني الچنت افتش بجسمك واستكشف بي

-كيان بهمس: نشوان خوش سهرة عدنا اليوم

-نشوان: الا تشگ شگ

-شُهيب: عيوني ما منتبه ولا مركز بيج بس احتاجيت الرام وانتِ معاندة وياي

-مسرة: على أي اساس انطيك الرام واني التعبت وتعنيت حتى اخذه! اضافة واجهوني زلم ثنين منفوخين بالعضلات گوة هربت منهم!

-شُهيب: ومنو الحماچ ودافعلچ وخلى الزلم توخر عنچ وصلاهم صلي بالرصاص جدددي؟؟

-نشوان بهمس: حبي السهرة صباحية اليوم

-كيان: جيبلنا حب عود وببسي وبعد شنو..؟

-نشوان: دونات؟

-كيان: اي دونات

ما انتبهنا لنهاية حديث شُهيب ويه مسرة چنه حايرين ببطننا وشنو نجيب لسهرة اليوم ما شفناه غير سد الاتصال وينفخ بقوة مطيرنا ويمسح على خصلات شعره ليوره..

-نشوان: الوضع صاير هووت بيناتكم bro

مجاوب شُهيب گام يسوي كوب قهوة وملامحه جامدة، اندگت الباب ودخلو فاضل ومروان وصبا وجوههم مگلبة واحد مطنگر على الثاني كالعادة!

خلال ايام شغلي هنا افتهمت مروان وصبا يجمعهم شغل واحد وعلاقتهم متوترة كلش كلش كلش اكثر مما تتصورون واحد ميطيق الثاني مروان ناار وصبا بارود وكلما تدردم يقابلها بدردمة اعلى واقوى مرة دخلت لمكان شغلهم ماتحملت ابقى من الخوف حسيت شوية وتصير من الروس..

-صبا: اكو اجتماع؟

-مروان: لعد شعندچ هنا اذا ماكو اجتماع؟

-صبا: هففف وليدي امي انتَ اني حچيت وياك؟؟

-مروان: لازم تنتر لازم

-شُهيب: نعم اكو اجتماع، تفضلو

اشر على الطاولة الكبيرة بزاوية المكتب، گعدنا حول الكراسي منتظرين مسرة تجي، مرت خمس دقايق احنه نتصفن وهي ماكو..

-نشوان: اتوقع متجي

-شُهيب: ميهم ننتظر بعد شوية

-مروان بتساؤل: صبا؟

-صبا: مادري صراحة تجي او لا

-فاضل: ليش شبيها؟

-صبا: شوية مريضة اليوم

-فاضل: سلامات متشوف شر خطية متستاهل

-كيان: خلونه نبدي الاجتماع شُهيب

-فاضل: اتفق مو مشكلة اني ازودها بمعلومات الاجتماع الها ولـ "ميادة" لان هم مجازة

سكتنا نرجع ننتظرها هدوء تام مينسمع غير طرق اظافر صبا الملونة على الطاولة، مرت 15 دقيقة وهم ما اجت ماعرف ليش شُهيب متوقعها تجي كلامها واضح بالمكالمة گالت هي معليها ومتحضر الاجتماع..

-نشوان: ها؟

-مروان: عندي شغل لازم نبدي شُهيب

هز راسه يأشر لـ فاضل حتى يبدي، طلع عدة اوراق من جنطته الشخصية وعرضهن على الطاولة هستوه ديبدي وانفتحت الباب بدون لا تنطرق وظهرت منها مسرة..

ابتسمت من شفتها تدخل وكعبها العالي الرفيع يطرق بالارضية وملابسها الانيقة تبهر مثل عادتها..

-مسرة: تأخرت عليكم شباب

-نشوان: بعدنا ما بدينا

بدينا الاجتماع صح ما شاركت مثل كل مرة بس من احد يوجهلها الكلام والنظرات تتجاوب وتبتسم الا ويه شُهيب ما باوعتله وكأنه نكرة ماله وجود..

-مسرة: حبيت سيد حلوة فكرتك مبدع كالعادة

ابتسم فاضل يتشكر منها وتشكرت من نشوان هم بسبب افكارهم المتجددة، خلص الاجتماع على خير وطلع الكل من المكتب عدايا اني ونشوان ومسرة وگفت مكانها تسمع شُهيب يگول..

-شُهيب: اجتنا دعوة لحضور حفل

-مسرة ببرود: ماگدر اروح اني

-شُهيب: الحفل راح يحضرون بي شخصيات مهمة يفيدنا التعرف عليهم والتقرب منهم

-مسرة: متأكدة راح تگدر تسد فراغ وجودي..

حچتها بنبرة خاوية وطلعت من المكتب، لهنا ونشوان طگ ماتحمل يسكت اكثر اندار لـ شُهيب يتسائل..

-نشوان: شُهيب شمسوي بالبنية ليش ما طايقتك؟!

-شُهيب: شمسويلها

-نشوان: ماعرف اني جاي اسألك لان وضعكم مو طبيعي وهالشي راح يأثر على سير العمل

-شُهيب: هي عنودية وتدخل حياتنا الشخصية بالعمل

-نشوان: مسويلها شي من دون رضاها؟

-شُهيب: لا

-نشوان: متقربلها وتاركها بليلة ظلمة كاسر گلبها؟

خزره شُهيب يأشرله عليَّ ونتر..

-طبعاً لا! ثانياً تشوف هالحديث لائق تحچي گدام اختك؟!

-نشوان: حيرتونا يا اخي شبيكم فهموني

-شُهيب: كل ما بالموضوع اندگت بفاهد البارحة ورادت توگع روحها بورطة وضاجت لان دافعتلها

-كيان: تضوج لان تدافعلها؟ ليش؟

-شُهيب: اخذت شي يريده فاهد وعاندت متقبل تنطي وصارت سالفة طويلة عريضة ومن صرت بينهم ضاجت

-نشوان: هااا عيني هااا صاير تدافعلها وتخاف عليها وكذاا

يحرك بحواجبه بطريقة مشيطنة وضربه بعكسه ببطنه فوراً عاط شُهيب متألم..

-نشوان: ها شبيك؟؟

-شُهيب: ماكو شي

گالها بألم ووگف على جهة ينطينا ظهره بس لاحظت وجهه تعرق بسرعة، مديت راسي اشوفه يوخر سترة القاط عن مكان بطنه ما انتبه عليَّ مادة عيوني انصدمت من شفت دم لطخ قميصه الرمادي من جهة خاصرته..

-كيان: هذا شنوو الدم؟؟

-نشوان: شو اشوف.. ولك هذا شنوو الدم منين جاي تنزف؟؟؟

-شُهيب: انجرحت البارحة

-كيان: تعاركت ويه فاهد؟؟

-لا

استجوبناه كومة وجوابه كله "لا" ما سكت نشوان لح الا يفتح قميصه يشوف الجرح..

-شُهيب: جرح بسيط بابا شبيك

-نشوان: بس اشوفه خليني ارتاح

فتح دگم قميصه الجرح صاير بخاصرته ولافة بباندج ابيض متلوخ بدم..

-نشوان: خيطت الجرح يعني؟؟ كم غرزة؟؟

-شُهيب: خمسة

-نشوان: صدگ تحچي؟ ليش ما گتلي ويامن تعاركت خلصني

-شُهيب: محد كافي لا تلح

سد قميصه ولبس الجاكيت من جديد يرتب نفسه يسد ازرار السترة حتى ميبين الدم، گلبي وجعني وقلقت كلش بس ما لحيت عليه وضعه مخربط وواضح هالجرح وراه سالفة..

-شُهيب: اني طالع عندي شغل

تركنا وطلع يمشي على طوله ولا كأن بي شي تبادلنا النظرات اني ونشوان اهز براسي مأيسة..

-نشوان: روحي وياه

-كيان: راح يطردني ميقبل

-نشوان: معليچ روحي تلزگي بي مثل قبل لتخلي يبقى وحده

هرولت اروح وراه ظليت امشي خلفه مباشرة واشوف ملامحه ممتعضة متألم وايده على خاصرته..

-شهوبي

اللتفت عليَّ مرجع ملامح وجهه للجدية ابتسم من لزمت ايده وبديت اسولف بأمور عشوائية ونطلع من الشركة سوه..

-شُهيب: حبيبتي اسف اذا ببالچ راح نطلع سوه عذريني ماگدر اخذچ عندي شغل مهم اعوضچ غير وقت وعد

-كيان: هاا صح اسفة

مسح على خدي بأبهامه ودگ موبايله، ابتعد كم خطوة عني يجاوب بصوت هامس ما حطيت اذني وياه للخصوصية، وگفت على جهة انتظره وانتبهت لطفلة صغيرة واگفة شوية عن الشركة شايلة جنطة مدرسية صغيرة ولابسة فستان وفوگاه جاكيت..

دورت بعيوني على اهلها وينهم شو واگفة وحدها هالطفلة تقربت منها اتأملها عن قرب بنية تجنن بشرتها ناصعة البياض بعيون سود كبار وشعر اسود ناعم طويل، ابتسمت على منظرها والبراءة الي بوجهها نزلت نفسي لمستواها اسئلها عن اهلها بلغة البلد..

-وين اهلچ حبيبتي؟

ما جاوبتني بقت مكمشة بجنطتها ومنزلة عيونها، رفعت راسي اشوف شُهيب واگف فوگ راسي والتلفون بيده..

-كيان: شنو اسمچ يحلوة؟

هم ما جاوبت عيونها مغرغرة وشفايفها معبسة، انقهرت على منظرها مبينة تايهة..

-شُهيب باوع هاي الطفلة يمكن ضايعة

تقرب منها يلزم ايدها ويسألها بلغة البلد عن اهلها هم مجاوبته، ظل يتلفت يدور بلكت احد تابع الها يجي ماگدرنا نعوفها شلون اهلها تاركيها بهيجي مكان بي ثلاث شوارع و السيارات تجي طايرة..

-كيان: اتوقع متفهم شنو دنگول شلون هسة نلگه اهلها

-شُهيب: ماعرف والله

راح يسأل المطعم الي بصف الشركة بلكت احد يعرفها بس ماكو فائدة هالطفلة ضايعة وهسة بدت تبچي خايفة من عدنا، توترت وحاولت اسكتها طلعت حامض حلو من جنطتي انطيها ماقبلت تاخذ وصارت تتحرك بمكانها تريد تعبر الشارع..

-شُهيب: لا لا وين

سحبها من جنطتها يشيلها بين ايده يمة حبيبتي سودة عليَّ متت قهر عليها تباوع لـ شُهيب وتبچي بالخنسة خايفة منه.. مسح على شعرها مبتسم ويسولف وياهة يهدأها..

-شُهيب: لا تبچين يحلوة هسة نلگه ماما

-كيان: خلينا ندخلها الشركة باردة بره باوع خشمها وخدودها حمر

وافقني الرأي ونزلها بالگاع يلزم ايدها ناوين ندخل للشركة وقاطع نيتنا خروج مسرة وصبا من البوابة وكالعادة صبا تدردم وتأشر بيدها منفعلة..

-صبا: هاي ميس!!!

صاحت وهي تأشر علينا وجهت مسرة انظارها علينا بسرعة وفتحت عيونها على وسعها، هرولت بأتجاهنا تجر البنية من ايدين شُهيب وتصيح ملهوفة..

-مسرة: مييس يمة ميوسسة شبيچ حبيبتي يا روحي شجابچ هنااا

-صبا: مدا اصدگ شلون اجت؟ ولچ منو جابها

-كيان: لگيناها واگفة وحدها هنا تبچي خايفة عبالنا ضايعة

-صبا: عمتتتت عينننك ان شاء الله يالعااار عساك ما تهنيت يالاغبر هيچ تهيت الطفلة

مسرة متحچي بس حاضنة الطفلة بقوة وتدور بعيونها على شي، استغربنا انفعالها وتصرفاتها بس محد علق..

-صبا: يريد الحضاانة ابو راس المعفنن ابن الخايس الجاايف عمت عيننك ان شاء الله

-مسرة: ميوسة منو جابچ؟؟؟

مسحت دموعها الطفلة ببراءة وجاوبت بصوت ناعم يوصوص..

-ميس: عمو زكي دابني (جابني)

-صبا: ولچ هدددديني عليهمم ذولة الخيسسسة اليوم اشررب من دممه هذا العااار ابن الصاييعة الداايحة ابو الززلم والنسوااان الخنييث هذا الچنتي كااتلة روحچ عليه موو؟؟ هذا النثييية!!

-مسرة: صباا كافي!! لتصيحين ميس تخااف

-صبا: اسفة حبيبتي ميوسة يروحي بس حسبي الله على ابوچ

دفعتها مسرة وتضم راس ميس بصدرها واحنه واگفين نتصفن ممفتهمين شي..

-كيان: لو ندخل جوه مسرة الدنيا باردة الطفلة ترجف

أيدت فكرتي ودخلت للمطعم رحنا وياها وگعدنا حول طاولة، ماعرف ليش شُهيب هم اجه بس شفت الفضول ينبع من عيونه بخصوص هالطفلة..

-صبا: اني بس اريد افهم بشنو چان يفكر من شمر طفلة بنص الشارع شيحس؟؟؟

-مسرة: نذذل مو جديدة سوالفه عليَّ

-صبا: مسرة يحلممم ترجعيها اله ابن الفگر هذاا ابو الزلم!! اكبر نذل اشوفه هو اكرم مسرة اسفة اسفة بعد ماگدر اللزم نفسي اكثر يستلذ بتعذيبچ هيچ عنده متعة عجيبة من يشوف گلبچ محترگ

-شُهيب: اكرم؟ المحامي اكرم الـ^^^^^؟

-صبا: ايي هاي شمعرفك بي؟

-كيان: منو اكرم يمعودين

-صبا: طليق مسرة

-كيان: طليق مسرة!!

-شُهيب: انتِ چنتي متزوجة؟

-مسرة: لواحد عار اي

-كيان: وهالطفلة بنتچ؟؟؟

هزت راسها اي واندارت على بنتها تسولف وياهة، صفنت ممستوعبة مادري بمسرة چانت متزوجة وعدها بنية بهالعمر.. الطفلة عمرها يطلع اربع سنوات تقريباً وهسة ياله لاحظت الشبه العجيب بينها وبين امها حتى الشامة الي فوگ شفة مسرة بشوية بنتها عدها نفسها..

-صبا: شُهيب شمعرفك بـ اكرم انتَ؟

-شُهيب: اللتقينا بي مرة

-صبا: هاي شوكت؟؟

-مسرة: بأول عشاء عمل النا شفت اكرم بنفس المطعم ويه سلبوحته

-كيان: بس ممكن اسأل وين ابوها وليش الطفلة وحدها بالشارع؟ اسفة على تدخلي بس احترگ گلبي واني اشوفها تبچي وخايفة بهالطريقة

-صبا: لان بكل بساطة ابوها مهمل وميهتم لبنته يعوفها بيد الخدم والسوااق وهذا زكي يصير سايقه الخاص

-كيان: وليش منطيته الحضانة؟؟؟

سألت بحرگة دمي يغلي مسرة ساكتة وملامحها تموت قهر مبين گوة لازمة نفسها تبلع بريگها ومنزلة عيونها حتى منشوف دموعها بعد ثواني رفعت انظارها تباوع لـ شُهيب بحقد ونترت بهمس..

-لو فلان ما متدخل چان كل مشاكلي انحلت!

من گدما مقهورة ومبين حاقدة وصلت مرحلة طفرت دمعة من عينها مسحتها فوراً وگامت تترخص تروح للحمام واخذت بنتها وياهة..

اللتفتت على شُهيب اشوف ردة فعله وليش حاقدة عليه هالگد بس ما شفت نظرات مفهومة منه.. 

-صبا: شبعها ضيم المسكينة

-كيان: صدگ تحچين؟؟

حسيت بأيد شُهيب تلزم ايدي ويأشرلي حتى اسكت وما اتدخل بخصوصيات غيري وگام من مكانه يترخص يطلع من المكان بقيت گاعدة شوية وصبا من وحدها گامت تحچي..

-صبا: مسرة تزوجت بعمر صغير وجابت بنتها ميس چانت حياتها حلوة بالبداية بس بعدين يمة يمة شسوه اكرم لعب بيهم طوبة وانفصلت عنه واخذ الحضانة مال ميوسة

-بس ليش؟؟ الحضانة اعرفها للام؟

-مو هو محامي ويعرف هالسوالف ولاف الموضوع لصالحه واخذ الطفلة

-كيان: مسكينة مسرة ولا ادري عاشت كل هالتعاسة وبعيدة عن بنتها والغريب ابد متذكرها

-هي ميبين عليها ومتحب احد يشوفها ضعيفة..

سكتت من رجعت مسرة عيونها حمر وكحلتها سايلة شوية مبين چانت تبچي مكمشة ببنتها وتمشي وياهة مثل اللعابة بالضبط شكلها وشعرها تخبل ظليت بس صافنة عليها..

جعنا للشركة والطفلة ويانه ابتسمت من مدتلي ايدها حتى اللزمها اخذت ايدها بين ايدي وامها لازمتها من الجهة الثانية ورجعنا لمكتب مسرة..

گعدتها امها على الميز مالتها وصارن يسولفن سوه، الطفلة تنگرط نص الحروف تبلعهن وگعدت تسرد لامها كلشي شنو اكلت وشوكت نامت ومنو لبسها وشلون بچت بالليل والخدامة عاطت بيها وجبرتها تنام بدون ما تعشيها..

-صبا: ولكم هدووووونييي عليهم هدوووونييي اليوم احرگ شعفتهننن ذني الخايساااات امهات الوصخخخخ

بنص انفعال صبا انفتحت باب المكتب بس مو فتح باب طبيعي لا انقلعت قلععع ودخل منها شاب يطلع ببداية الثلاثينات اسمر والشرار يتطاير من عيونه خنس صوت ميس ومسرة حضنت بنتها بقوة وتبتعد توگف وره مكتبها الچبير..

-اكرم: جيبي الطفلة مسرة

-مسرة: ليش جبتها من الاول!

-اكرم: غلطة السايق زكي وراح يتحاسب عليها

-عوفها يمي اليوم

-اكرم: جيبيها لو تردين تخبليها نفسچ؟!

-مسرة: انتَ المخبببل اطلع بررره اكرم

-اكرم: حبيبتي تقبلي الامر الواقع انتِ مريضة نفسياً وميس مو زين تبقى وياچ يله يا عيوني جيبيها لا تسببيلنا مشاكل ونخلي الشرطة تدخل ويسحسلوچ بالمحاكم والمراكز

-صبا: من تعوفها بالبرد بباب الشركة متگووول خلي الشرطة تددخل!! الا نشتكي عليك اكرررم انتَ مو كفوء تربي طفلللة

-اكرم: ماعندي كلام وياچ صبا صيري على صفحة

-صبا: شلووووون؟؟؟ منو هاي تصير على صفحة عيوننييي؟؟؟

-اكرم: صبا عيوني بس انطينا مجال

-مسرة: اطلععع اكرم ماعندي طاقة اناقشك

-اكرم: جيبي ميس!!

جر الطفلة من ايدها ورجعت جرتها تنطي ظهرها وتحضنها لصدرها حيل تخاف ياخذها، توترت وخفت من ردة فعل اكرم القوية ما خلى حچاية ما حچاهة ولا معاير ما عايره لمسرة وگبت للظالين..

بنص الصياح والهرجة دخل مروان يشوف شكو من انتبه لأكرم دفعه عن مسرة يدافعلها وانوب اجه وراه فاضل واستلموا سوه..

-اكرم: هدوووني ولكمممم ميطلع اسمي اكرم اذا ما نيمتكم بالمحاكممم

-مروان: الحماية ويننن؟؟؟ كيااان روحي صيحيهمم

ركضت اطلع اشوف وينهم ذولة ما سمعوا العياط لگيتهم واگفين يسولفون بالباب يدگون فچ..

-كيان: اجه واحد تهجم على مدام مسرررة

ركضوا ثنينهم جوه واني وياهم وتصلبت بمكاني من شفت ميس تصرخ بالبچي ومكمشة بأمها.. ثانية واقل من ثانية واكرم صاح بصوت مسموع رج المكتب..

-هاااي المخببلة وخرووهاا عن بنتيييي مسرررة المحكمة اخذتهااا منچ لانچ مختلللة عقلياااً واربعع اطباااء ثبتوا هذا الشييي كااافي تحاوليننن وخروووا بنتي عن هاي المررريضة!!!!

يتبع....

━━━━━━  ━━━━━━

انرفع ضغطيييي 😤!!
بس اتخيل موقف مسرة و اكرم يصيح هيچي گدام الكل 💔

مسرة وبنتها ميوسة 🥹🩷

صح تشكرت منكم بالانستا بس مو كافي هنا هم لازم اتشكر 🫂 كُلش شكراً على 1 مليون بهالوقت القصير ما شاء الله وجداً جدداً سعيدة لان القصة عاجبتكم 😍
ان شاء الله ابقى عند حسن ظنكم واقدملكم الافضل ♥️ ونكبر سوه ونظل من نجاح لنجاح 🫂

وهسة كتبوليي توقعاتكمممممم الخنفشارية 😍🔥🔥