رواية ابناء الحسوم "شمسون" الفصل الثالث عشر 13 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

خليني جگارة بچفك المتعوب، ورثني على كيفك ساعة الخنگة.. ♥️

━━━━━━  ━━━━━━

"العــــــراق 🇮🇶"

ضحكات عالية، متعة ما لها حدود، صوت الطرب عالي والراحة واضحة على وجوهنا، دخلت سميرة المساعدة الغرفة وبيدها جدرية صغيرة مسويه بيها حرمل، بخرتنا بيها وتگول بجَدية..

-سميرة: احصنچن من شر الحساد والحقاد ومن شر كل نفس دنية وعيون ما شابعة حنية.. احصنچن من عيون الكفرة وابناء المعرة، من عيون ولد الحرام ونيتهم انتقام، احصن بنياتي من يوم الشووم وابناء الحسوم...

-ايات: عمري سميرة انترست ريحتنا دخان محد يحسدنا لتخافين

-سميرة: ضروري التحصين كل يوم بنياتي

نزت المسكينة مخترعة من صوت ضربة ابن عمي طاهر لباب غرفتي خازرها حتى تروح، اخذت حرملها ونزلت تهرول للمطبخ..

-طاهر: شنو هالريحة الجايفة! يجون يشمون هالريحة وعلي يشردون

-ايات: هاي ريحة حرمل يالفهيم ولتگول عنها جايفة ميصلح

-طاهر: لا تزعجيني بثقافتچ ايات.. يلااا كملتن تبديل مو راااح يوصلوون العااالم

هزيت راسي ونزلت وياه بعدما جهزت نفسي، شوية ونزلت فيروز من الدرج تتبختر بمشيتها لافة الشال ومطلعة نص شعرها وفستانها مخصر كأنها دتگول تعالو شوفو جسمي ومفاتني..

-فيروز: عجزت افهم سبب عياطك طاهر؟

-طاهر: عجزت افهم سبب سقوطچ فيروز؟ انتِ رابيه ويه الراقصات وبنات الليل لو شنو حبي؟

-فيروز: رابية ويه امك

هجم طاهر يريد يكتلها بعدما فشر عليها ورجعتله الفشار وتكامشو من الروس هو جر شالها ينزعها وهي جرت قميصه شگته ينطيها راشدي وترجعله راشديين وهيچ استمروا الى ان نزلت تسنيم..

-تسنيم: اف اف شنو هالفوضى حبايب

-طاهر: هاي بنت الكلب فيروز شعوطت گلبي

-فيروز: انچب لك ابن النعال

-طاهر: منو ابن النعال ولچ بنت الـ*****

-فيروز: امك الـ....

-تسنيم: اف اف شبيكم حبايبي ميصير هذا الفشار عيب اليسمعنا شيگول علينا؟

-فيروز، طاهر: هممممج

-ايات: زين من عرفتو نفسكم

خزرني طاهر يريد يغلط بس ميگدر ماعرف ليش الوحيدة من بين البنات ميغلط او يتجاوز عليَّ ومن اگول ماعرف ليش اني اعنيها لان طاهر لسانه ززفر لدرجة يخترع كلمات جديدة ما موجود بقامووس الدول بس حتى يشفي گلبه بفشورة قوية..

-هدى: هلاااااووو وصلوو لو بعددد؟؟ 

-ايات: هلا هداوي نزلي بعد ما وصلو

-هدى: شوكت يجون الحتيتت

-طاهر: عاد احترمي وجود اخوچ بنت العار

-هدى: دولي انتَ چنك سلبوح سيان

-طاهر: ولچ بنت الـ.....

-ايات: يبوووو شگد تغلطون لعبت نفسنا شبيكم انتو

سكت طاهر مطنگر ومكتف ايده، شوية ونزلن عُلا ونور وفواطم من فوگ، كلهن بغرفتي ديتجهزن حتى نستقبل ولد عمنا العايشين بالخارج ما شايفيهم من قبل ولا همه شايفينا رغم يجون للعراق بس ابد ميتقربون من عدنا ومن نعزمهم ببيتنا ميقبلون يجون يتحججون بالشغل..

شايفة ثنين منهم بس بالصور بسبب بيبي تطلب صورهم ويجون للعراق يتعنون بس حتى يزوروها لان اذا ميجون كل فترة تسويها مناحة تفرش بالحديقة تلفلف روحها بالعباية وتبچي وتنعي "ولد الچلاب ما اجوني وعافوني وحدي"..

شايفة صور الچبير والصغير الوسطاني مبين مو قريب على اخوانه لان ابد محد يدزلنا صور تخصه بس صورة وحدة عدنا وواگف صفح، ما افرق بين اسمائهم اعرف شكولهم بس..

-وصلوووو بنات وصلووووووو

صاحت فيروز وهي تطل من الشباك الچبير للمطبخ، ركضنا نمد روسنا ابتسمت من شفت سيارة سودة مصفحة تدخل الفرع تتبعها ثلاث سيارات من نفس الصنف..

-فيروز: ياااااي كشخة كشخخخة

-هدى: نفس سيارات ابوية وابوچ والعشيرة شنو الغريب

-فيروز: متدرين بيه خفيفة

-نور: بنات شو ما طلعوا من السيارات شبيهم؟

صفوا السيارات بباب البيت ونزلو جنط سفر صغيرة مال ليلة وحدة او ليلتين وبقو همه بالسيارة محد طلع بيهم منشوف شي لان الجامات مظللة..

-فواطم: يجوز جاي يقنعوهم يتزوجونا

-عُلا: ياااااي تخيلو بنات كلمن يتزوج ثنين ونصير ضراير كلنا ببيت واحد ونتعارك على رجولتنا

-نور: اني اريد الچبير

-فواطم: انچبي اني اريد الچبير

-فيروز: اكلن نععل اني اريد الچبير يشگ سطعش شگة

-هدى: نوو بنات پليز اني اول ما شفت الچبير گلت هذا الحتيت لازم يكون سوچي المستقبلي ضروري اضمن جمال اطفالي

-نور: بس اني الچبيرة نسيتوا؟؟

-عُلا: عادي حبي الشرع حلل اربعة خلي ياخذنا اربعتنا ويومية عند وحدة ياااااي حمااااس

-هدى: ايععع لعبت نفسي وتنازلت عنه راح اخذ الوسطاني ولو ما شايفين خلقته بعدنا

-نور: تگول بيبي حلو الملعون

-هدى: افف بس بعدني اريد الچبييير حرام عليچن

-ايات: سكتن كافي خنشوف ليش الچبير بعده ما طلع من السيارة

للان محد نزل بيهم وگفو عمامي وولد عمامي بباب السيارة ماعرف شيحچون شوية ونزل منها عمو ابو الولد "شمسون" نفس وجهه ما متغير ولا شوية بعده نفس القلافة ونفس الجسم رياضي والوجه يلمع لمع..

-هدى: عفية بشرة لا تتعب لا حباية لا تجعيداية شنو سره بس اريد افهم

-فيروز: الفلوووس حبي الفلوووس

-فواطم: واحنه عدنا فلوس بس ليش ابونا مو هيچ؟

-ايات: شمس العراق تدمر احلى بشرة بنات غير هو عايش بالخارج شايفين شمس شايفين ضيم همه

بقو الولد بالسيارة لحدما طلعتلهم بيبي بعكازتها والعباية على راسها، دگت الجامة واشرت بيدها نزلو، اول من نزل الابن الچبير وما احچيلكم على الشهگات الطلعت من بنات عمي..

-هدى: الله هذا احلى من الصور بمليووون مرة بنات والعباااس ما اتنازل عنه هذا رجليي وراسي براسه والحسين انام على خوانيگه ومانطي لو تنگلب الدنيااا

-عُلا: لو تمووتين هذا حتى مشاركة ماقبل اشاركه ويه احد انچبن وموتن قهر محد تصير ضرتي

وانفتگن فتگة زرفت راسي وحدة تصد والثانية ترد، خليني اوضح ليش كلنا ما متزوجات للان لان بإختصار اهلنا ميقبلون الا نتزوج من اقاربنا حتى متطلع فلوسنا بره العشيرة ويستفاد من عدنا الغريب او ياخدنا على طمع فـ اهلنا عدهم استعداد كل ولد يتزوج ثنين بس حتى متطلع وحدة بينا لغريب رغم كثرة خطاطيبنا..

16 وحدة من بنات عمي الباقين متزوجات من ولد اعمامي اغلبهن على ضرة لان ولد عمامي العزابية ميقبلون يتزوجون هسة فـ المتزوجين منهم ديتزوج ثنين وثلاثة والكل متقبل الفكرة بكل روح رياضية..

حضنت بيبي الابن الچبير تضرب على ظهره تعاتبه ليش ميجيها هوايه وهو بادلها الحضن يسولف وياهة بشي منسمع شيگول، ثواني ونزل الوسطاني صار اللطم جماعي هنا ويمكن وصلت لحالات اغماء من عُلا وفواطم لدرجة تنازلن عن الچبير ورادن الوسطاني وابشركم رضن يكونن ضراير..

-هدى: احححح حتيت حتتيت باعن الشعرر باعن الطوول والجسم بنات ميصير نتزوج ثنين؟؟؟

-تسنيم: استغفري ربچ هدى عيب هذا الكلام

-فيروز: لحد تصدگ تسنيم بنات تلگوها هي مكرشة على الوسطاني

-تسنيم: لا والله ماعرفه

-ايات: هم راح ينفتگن انچبن خلونا نشووف

اخيراً نزل الصغير او العفو الوحش مالتهم!! شهگن البنات مو بس اعجاب وانما خوف نزل لابس نص ردن وجسمه حرفياً عبارة عن وشوم لون اسود وملون ماكو منطقة بجسمه خالية وعضلاته تخوف عبالك نفخ هاي من غير الترچية التلمع بأذنه من بعيد دنشوفها..

تسالمو على بيبي ودگت الصغير بالعصاية مالتها خلته يطفر ويركض بعيد عنها، راحت تلحگه تكتله وما هدأت الا من الچبير لزمها يبوس ايدها ويحضنها لصدره سكتت وسنحت..

-هدى: حتى بيبي خدرت

-كل البنات: اييييييييع هددددى لعبتي نفسناااا

سكتت مطنگرة وتحولنا من شباك المطبخ نلزگ اذاناتنا بباب الاستقبال من وين ديجي صوتهم، دخلو لبيتنا بحساب ابوية الچبير وعلاقته بعمو قوية صح واحد يعاير بالثاني بس علاقتهم اقوى من الباقين..

صحت بـ سميرة ترتب الضيافة ونصينا صوت الاغاني الجاي من فوگ ينعر، دقايق وابوية صاحني توترت كلش وبطني خبطت استحيت ادخل وحدي وهدى دفعتني تگول..

-هدى: عمو اني اقدم الضيافة انيي

-صاحب: لا عمو، شمسون يريد يشوف ايات

زاحت عني هدى تدردم رتبتلي شالي عُلا وغمزت، ابتسمت لحركتها كلهن دزنلي بوسة بالهوا للتوفيق حتى هدى الزعلانة..

حمحمت بالباب ودخلت منزلة راسي ارجف من فوگ ليجوه، همست السلام بيني وبين نفسي وجاوبوني بهدوء كلهم.. قدمت لـ بيبي اول وحدة ورحت لعمو اقدمله رفعت عيوني عليه شفته مبتسم وگال بيني وبينه..

-تلوگين لـ مالك

ابتسمت على كلامه ماعرف منو بيهم مالك بالضبط ما حافظة اسمائهم بس تمنيت من كل گلبي يكون الچبير خصوصاً من تقربت منه اقدمله ريحته ترست خشمي وكشخته وگعدته الواثقة مُهيبة..

-مالك: شكراً

-ايات: العفو

قدمت للگاعد بصفه مينقص شي عن الچبير اصلاً حسيتهم يتشابهون شوية نفس القلافة والگعدة الواثقة هذا بس شعره اطول وجذعه اطول..

-شُهيب: عاشت ايدچ

جاوبته واخيراً رحت للصغير مجرد شفته گلبي انخمش العيون صفر تجدح ومبين ذاك وينه شقاوات من گعدته العربجية ونظرته الجانبية رفعلي تك حاجب وگال عبالك قرفان مني.. 

-فاهد: منو بعد يشرب چاي لخاطر الانبياء والمرسلين؟

-طاهر: احنه المعدان نشرب عيوني

-فاهد: طاهر القلب نقي الايمان ممكن تنلصم؟

-طاهر: انتَ تنصلم ابن الـ....

-شمسون: شنو السالفة بابا؟

-فاهد: غثة هذا، روحي ماريد چاي لعبان نفس

-ايات: حشى النعمة

ضيق نظراته بعدما همستها اي صدگ شنو يحچي على نعمة الله ميخاف ربه، ابتسمت وگلت اغير الموضوع..

-تحب اجيبلك شي ثاني؟

-فاهد: انتِ مؤدبة فـ ما راح اگول شنو اريد خاف تهجين

-شُهيب: يمعود!

-مالك: عذرينا هو بس شوية تعبان من السفر عاشت ايدچ الچاي طيب

ابتسمتله وكملت تقديم للباقين وطلعت گلبي يرگع رگع تورشعوني البنات يسألوني عن الصار گعدنا بالصالة اسولفلهن وفجأة تذكرت!!

-ايات: جنات اختي وينن؟؟؟

-هدى: شمدريني

-فواطم: مچانت ويانه من جهزنا نفسنا

-ايات: عزا العزاني وين راحت هااي الفصعونة

گمت ادورها بالبيت كله مالها اثر گلبت الدنيا عليها اصيح بأسمها بهمس وميجيني صوتها وين راحت هاي الا تسببلنا مشاكل ويه ابوية مو راح يصيحونا حتى ندخل!!

اجه ببالي مكان اوقات قليلة تروحله بس من تسوي مصيبة مثل عادتها جنات ام الفواين، فتحت باب السطح متوجهة للبيتونة وگفت بالباب سمعت صوت عياط خفيف مال شخص ديتألم، چفتت افتح الباب بكل قوتي نزت من شافتني وصاحت..

-خرب روووحچ خرعتيتي بت الاوادم
 
-ايات: اي اي خلي ابوية يشوفچ الا يشوي على اذاناتچ البصل

-جنات: وشلون راح يشوفني اذا انتِ متحچين

-ايات: انتِ منوو؟؟

وجهت سؤالي للي گاعدة وبيدها آلة حادة..

-جنات: معليچ ايوو روحي جايتچ

-ايات: كم مرة گتلچ بطلي هالسالفة ثانياً هذا الوشمم المن واشمته بصدرچ جناات؟؟ منو راح يشووفه

-جنات: اني اشوفه اوشمه لروحي يعني المن

متمددة وتجاوبني والي دترسملها الوشم گاعدة فوگ راسها مركزة بالرسمة، تقربت عليها اشوف شنو دترسملها غميتها من شفتها دتحفر كلمة amour بالفرنسي معناها "حُب" ومازجة قلب صغير بنهاية حرف الـ r..

-ايات: تعلمتلها حچاية جديدة وشمتها على جسمها الثولة

مجاوبتني بقت معكمشة ملامحها تتحمل الالم، صح وشمها صغير ومكانه ميبين ينضم جوه الملابس بس انزعج من هالتصرفات اضوج من الوشوم ومن بنية توشم احسه بس للولد..

خلصت وگامت من مكانها تلبس تيشيرتها لا مرتبة نفسها لا مبدلة ضاربة الدنيا طگاگية، جبرتها تروح لغرفتها على الاقل تبدل بنطرونها المشگك يوصل التمزيق للفخذ واضح وضوح الشمس وتيشيرتها المبينه منه سُرة بطنها..

-لبسي هذا حلو

جريتلها فستان طويل وعريض بأكمام طويلة ورقبة عالية حركت ايدها بطريقة لا وگالت بعجرفة..

-جنات: لا شريف زيادة عن اللزوم

-ايات: زين هذا..

راويتها فستان ثاني هم ما قبلت وگالت الا هي تختار وتلبس شي يمثلها ويمثل شخصيتها حتى متغش احد اذا واحد من "الحمير" حسب كلامها اختارها..

-ايات: ويه هاي اخلاقچ وگصة شعرچ والوشم الوره اذنچ استبعد واحد منهم يختارچ

-جنات: وشلون راح يشوفون شعري والوشم واني لابسة حجاب؟!

-ايات: واخلاقچ ولسانچ هم مينشاف؟؟

-جنات: يااااااااااارب يااااااااااااارب محد يختارني والله اتغير وانعدل يااارب دخيلك ربييي

تدعي وتتضرع من كل عقلها، فريت بيدي اباوعلها جنات احلى وحدة بينا وهالشي ميختلف عليه ثنين، جميلة جدااً شعرها غامق وبشرتها ناصعة البياض شفافة والخدود دائماً وردية من الله والعيون اخضر فاتح وحجمهن كأنهن ساعات كلش حلوة لدرجة ابوية وولد وبنات عمي كلهم يصيحولها "لعابة" بسبب نعومتها وجمال جسمها الآخاذ بس....

بس كل حلو بي لولة، جنات مخربة جمالها بلسانها الطويل ووكاحتها تعيط وتتعارك ويه الهوا متسكت لأحد وتلصم شكو واحد يضوجها، مخربة جمالها بقصة شعرها البوي وگذلة كثيفة نازلة على عيونها بس ماگدر انكر واظلمها زايدتها جاذبية وجمال بس قصة شعرها غلط مو لبنية محترمة ابد عبالك بنت شارع..

وشم اسمها "جنات" مزخرف وره اذنها والثقوب الممتدة على طول اذنها، اخر مرة رادت تثقب ترچية بـ ببطنها وگوة سيطرت عليها حلفتها بروح امي متسويها وتدمر نفسها اكثر والحمد لله استجابت.. كل هالفواين وهي عمرها 18 سنة بس!

لكن ماريد اظلمها هي محجبة ولبسها مستور ومتطلع هالشغلات بالشارع بس الله يسلمها ما مخلية شي بنفسها بحجة "الدين الابتعاد عن الحرام وليس الحياة واني ضامة كل هالشغلات وبس بالبيت اطلعهن اهم شي ملتزمة بالحجاب الشرعي بره"..

غافلتني وجرت سوت وردي فاتح عكس بطريقة جميلة على بشرتها الترفة وشال اوف وايت رهمتهن سوه..

-بناااات وينكم.. ايات، جنات تعالو سلموا على عمكم وولده

سمعنا صوت ابوية من جوه يصيح بينا رفعت ايدها جنات لسقف الغرفة وتگول بحرگة..

-جنات: ياارب اذا ما اختارني واحد منهم نذرررا عليَّ اذبح خمث (خمس) خرفاااان على روح امي يااارب نذراً عليَّ بث (بس) كون ميختاروني

هاا ونسيت اگول جنات تلدغ بحرف السين واحياناً بحرف الصاد بطريقة تخرفن تخلي الكل صافن عليها من تحچي ولد عمي كلهم مكرشين عليها بسبب هالشي يتخبلون من تحچي يردون ياكلوها اكل..

-ايات: گتلچ محد راح يختارچ بابا وعدچ وما راح يخلف

-جنات: لعد لييش هثة ديصيحني وياچ؟؟؟

-ايات: بس حتى تسلمين على عمو صدگيني

-جنات: گلبي ناغززني ايوو احث (احس) راح تصير مصيبة!

-ايات: امشي حبي امشي راح تتزوجين ليث لتخافين

-جنات: واذاا ما قبل!!

-ايات: ابوية شرطه تتزوجين واحد من ولد عمنا وليث ابن عمنا معناها ميعارض اكيد

-جنات: تدرين ليوثي ما اجه مزاعلني وميقبل يثمعني (يسمعني) من عرف راح يجون ذولة الططوات

-صاحب: هااااا بنااااات وينكمممم

-ايات: امشي ننزل امشي لا يصير عصبي

سحبتها ويايه انزلها اعت بأيدها شفت بنات عمي كلهن واگفات مصطفات ينتظرونا حتى ندخل سوه.. صح اهلنا موفريلنا كلشي نريده ومدللينا بس عدهم تبقى البنية بنية والولد ولد.. ومن يريد الولد شي ياخذه بدون لا تنطق البنية وهالشي صار هسة من طلب عمو شمسون نصطف گدام ولده حتى يختارون من بيناتنا وميصير وحدة تعترض وتگول لا..

اول وحدة واگفة هي فيروز الشريفة "اسم للاستهزاء طبعاً" فتحت الباب ودخلت تسلم وتبعنها الباقيات، تسنيم المتدينة، فواطم متقلبة المزاج، عُلا الفرفوشة، نور المحجبة نص ستاو، هدى المغرورة، اختي جنات الططوة واخيراً اني ايات الهادئة..

سلمنا سلام جماعي وتوزعنا على القنفات دورت بعيوني ولا واحد من اهلنا موجود بس عمو شمسون وولده صارو مقابلينا الچبير نهائياً ما دار عيونه ناحيتنا والوسطاني كذلك الا الصغير ضربله ركن يدخن ويباوع لوحدة وحدة..

-فاهد: مادري ببنات عمي هيچ حتيت

-فيروز بدلع: نعجبك

-فاهد: اي انتِ عجبتيني

-شمسون: بابا عيب هاي التصرفات احترموا وجودي

-فاهد: هو منو بحالك هاي عجبتني حلوة

-شمسون: استغفر الله يا اولادي الصبر الصبر

بيده سبحة جوزية يسبح ويستغفر بهدوء، اشر لابنه الچبير وگال..

-شمسون: ها حبيب شنو تعليقك؟

مجاوب بقى ساكت ويحرك براسه معترض، دار عمو عيونه على الوسطاني قابله بنفس الجمود والنظرات القوية، تلافى الموقف عمو شمسون من ضحك بخفة وگال يرحب بينا من جديد..

-شمسون: هلا بيچن عمو شلون كبرانات ومتغيرات عن اخر مرة

-نور: هلو بيك عمو

-شمسون: انتِ بنت نزار الچبيرة نور مو؟

-نور: نعم

-شمسون: شگد عمرچ بابا

-نور: 29 سنة

شفت الچبير رفع عينه عليها ورجع نزلهم يلهي روحه بشي گدامه، ابتسمت نور خجلانة من شافته يباوعلها واضح عرفنا منو راح تصير زوجة الچبير..

-جنات: هففففف

كل الانظار صارت عليها حتى الولد انتبهوا لنفختها العالية وداروا وجههم عنها ممهتمين بينما هي عدلت گعدتها وگالت بثقة بصوتها الناعم..

-جنات: عمو شمثون

وهنا اربعتهم ركزو بيهة بكل فضول والسبب اكيد يعود للسانها الجميل..

-شمسون: عيونه

-جنات: اريد اعرف احنه شنو نثتفاد من هذا الزواج؟ احث اكو شي غلط

شفت ابتسامة الابن الصغير يكتمها بينما الثنين الكبار صفنوا عليها صفنة مرتبة..

-شمسون: شنو الغلط حبيبتي الحلوة؟

-جنات: الزواج غير لازم نتعرف على ولدك؟ تنطونة فرثة (فرصة) نثتوعب بعض ونثير اثدقاء على الاقل!

ولحد الان الصفنة قائمة ولا واحد من الولد بعد عيونه عنها وجنات ولا انهزت ولا ارتبكت كملت تناقش عمو شمسون الي رقت نظراته الها واضح عجبته كلش، ظل يسألها عن شغفها وهواياتها ودراستها وهي تجاوب ببساطة..

-جنات: احب اقره قثث (قصص)

-شمسون: حلو، شنو نوعهن؟

-جنات: كلشي وكلاشي اقره

-شمسون: موهبة حلوة فاهد انتَ هم تحب تقره روايات مو بابا؟

-فاهد: نععل احب اقره يا عاقل يقره قصص بهالوقت

-جنات: اني!

-فاهد: اني گلت يا عاقل ان شاء الله حاسبة روحچ على العُقال؟

-جنات: اعقل منك انتَ وهاي ترچيتك چنك بنية

لزمت ايدها حتى تسيطر على عصبيتها عيب من عمو شمسون بس زاد الوضع سوء من جاوبها ابو ترچية..

-فاهد: لا لا لا اني اشعر بالاهاانة هاي ترچيتي اشتريچ واشتري ابوچ الهتلي بيهاا

-جنات: اشتريلك رجولة شوية وفيد نفثك (نفسك)

-فاهد: بنت الـ...

-شمسون: كافي مشاحنات اولادي

شوية واجه ابوية يطلعنا من الاستقبال يأشرلها حتى تسكت نفخت مرة ثانية معاجبها وگامت وهو هم طلع ويانه عافهم وحدهم..

-عُلا بهمس منفعل: الففف الصلاااة والسلااام عليك يااا رسووول الله محممممد

-فيروز: كلللللوووششش شايف خير ومهنى يا راعيهاا ما ينعرف خدها من تراچيهااا

يهوسن لنور وصعدنا فوگ لغرفتي وهي تضحك وتأشرلهن سكتن..

-نور: عيب ولچن ما سوه شي الرجال بس باوعلي قابل گال يريدني

-هدى: بس واضح اغراه صوتك يحلووو

-نور: اشش كافي استحي

ضحكنا ولزگنا اذاننا بالگاع غرفتي صايرة فوگ الاستقبال مباشرة وينسمع منها كلشي بوضوح من اطفي التلفزيون اعرف كل اسرار ابوية وشنو يحچي ويه خطاره بسبب هالحيلة..

سنطة محد يحچي البنات كلنا سكتنا والجوه هم خانسين توقعتهم طلعوا لولا صوت واحد يگول بعصبية مكتومة عرفته الابن الچبير صوته مميز عنهم..

-مالك: يابة كلش مو حلو تصرفك!

-شُهيب: اتفق!

-مالك: هنه مو سلعة ومگعديهن گدامنا نختار اليعجبنا

-فاهد: نعم نعم صحيح

كلنا البنات ميزنا الحچه هذا نفسه ابو عيون صفر صوته بي بحة واضحة، رفعت نفسها جنات تهمسلنا..

-جنات: هذا اكبر ططوة وعار وگولي جنات ما گالت

-ايات: مبين من وشومه شقاوات

-جنات: شايفة لو صرتله مرة؟ انتحر والعباث ابو فاضل

-فيروز: اني اريده عجبني

-عُلا: حتتى انيي

-فيروز: عاد انتِ انچبي منو احط عيني عليه ردتي

تركتهن يتجادلن بينما احنه الباقيات ركزنا ويه حديثهم..

-شمسون: حچينا بهذا الموضوع يَـ ولد!!

-شُهيب: خاف الله ببنات الناس شنو ذنبهن يتزوجن بهاي الطريقة!

-شمسون: راح نعيد ونزيد بنفس الخرررط اني گلت كلاميي وانتهههى كل واحد هسة يختاارله وحدددة ويخلصنااا فهمتو لووو استخدم اسلوبي الثانييي يا وحوشي الصنعتهمم؟؟؟

-فاهد: گتلللك ما اتزووج غيررر حمرتيي وروحهها لامي فهمتت لو لااا اذببحك والله اذببحك واذبح الراح تربطهاا بيييه لا تگووول ما گلتتت

-شمسون: فاااهد سيطر على نفسسك

-فاهد: ما اسيطططططر واليعجبه هلا بييي والما يعجبه يطبه ستيييين مرررض

سمعنا صوت شي يتكسر وره عياطه عبالك شمر تحفية موجودة او شي زجاجي بالاستقبال من عصبيته..

-مالك: جبتنا هنا بالغصب طعناك واجينا بس لهنا وبس تطلعلنا ضبة بنات وتعالو اختارو؟! وين عايشين بغاابة؟؟ شلون نتزوج بنات منعرفهن اصلاً ولا شايفيهن بحياتناا!!

-فاهد: ثانياً انتَ مو ضد الزواج؟؟! انتَ الخربت على كلل واحد بينا من راد يرتبط ويخطب حبيبته تالي هسة تجينا تگول تزوجوا بنات عمكم؟؟!!

-شُهيب: متهتم النا وتگول طُز افتهمناا بس خاف على مستقبل اولادناا يجون للدنيا يشوفون الاب ما طايق الام والام ما جارعة الاب تريد تسوي بيهم حالة نفسية وتخبلهم نفسنا؟!

-شمسون: خلصتو؟

-مالك بأستهزاء: عود يفيد؟ والله ولا يفيد وياك

-شمسون: بالضبط يله كل واحد يختارله وحدة خلصونا عدنا شغل

سكتوا جميعاً رفعت راسي اشوف بنات عمي مزعوجات ومقهورات بنفس الوقت خفت من كلامهم واضح ولا واحد بيهم يريدنا ليش عمو ديجبرهم علينا؟

-شمسون: ها مَلك

-مالك: دمرتنا دمار انتَ تدري؟

-شمسون: نعم ادري

-فاهد: مكيف ابو شيبة

-شمسون: انتَ اسكت لا ابطل ازوجك ذيچ الحمرة

-فاهد: فننننك

-شمسون: مالك الك خمس ثواني تختار وحدة منهن لو... بكيفك بعد.. واحد.. ثنين.. ثلاثة.. اربعة...

-مالك: الچبيرة

رفعت راسي على شهگة نور شفتها خايفة مرعوبة وكأنها تراجعت وبعد متريد بسبب حديثهم قبل شوية لكن رجعت ملامحها للطبيعية من سمعناهم يكملون..

-فاهد: لا مو مناسبة الك

-مالك: ليش

-فاهد: ما حافة حواجبها! منو بعد ما تحف حواجبها شبيك

-شُهيب: بكيفها

-فاهد: بس هالشي خسرها عريس لُقطة مثل اخوية للاسف

-مالك: اسكت فاهد بلا سوالف المزعطة هسة مو وكتها

-فاهد: خليها تحف حواجبها نصيحة حتى شواربها شفتهن خاطات

-مالك: تأدب كااافي

-شمسون: يعني هي عاجبتك؟

-مالك: ما شفتها بس سمعت عمرها 29 مناسب الي

-شمسون: لا بابا چبيرة

-مالك: گتلك بنية اقل الـ 26 ماتزوج

-شمسون: ليش بابا ربيها على ايدك

-فاهد: راح اعفطط گول هي تربي على ايدها مو العكس

-شمسون: ولدي البنية الصغيرة احلى مالك فكر زين

-مالك: شنو اگعد اسوي مميات؟؟ ماخذها بطول زري ماريد

-شمسون: زين ايات چبيرة

نبض گلبي بقوة ومعدتي گامت تأذيني اني عمري 24 وهو گال 26 يارب ميقبل ياارب..

-مالك: ميهمني شوفلي أي وحدة چبيرة

-شمسون: مبروك بابا ايات صارت خطيبتك

حسيت على ايد جنات تمسح على ظهري تطمني وتبتسم..

-جنات: اشواهم هذا مبين محترم

-ايات: مادري بعد

-شمسون: يلا نمري

-شُهيب: گتلك ما اتزوج

-شمسون: بابا لا تتعبني اني تعبان حس بيه خلص راح اخطبلك تسنيم المتدينة تناسبك خوش بنية

-شُهيب: هو بكيفك!!

-شمسون: اي مو انطيتك الرام واتفقنا؟

-شُهيب: كملت الاتفاق واجيت هنا وره ما انطيتني الرام بعد شكو؟!

-شمسون: اتفاقنا هو تجي هنا وتتزوج وحدة من بنات عمك

-شُهيب: ما اتزوج لا تحاول!

-شمسون: عود نشوف كلام منو يمشي، يلا فهدي

-فاهد: اختار بس تزوجني سارة!!

-شمسون: ازوجك وعد

-فاهد: اخذ ام اثدقاء (اصدقاء) اخليها الليل كله تقرالي قثث (قصص) بلسانها اليرعط

-مالك: هاي وهي سحلتك ذهاباً واياباً

-فاهد: هو اريد اگص لسانها واطيح حظها

فزينا كلنا على صوت شهگة جنات طفرت من الگاع فاتحة عيونها ما مصدگة وتحرك راسها بـ لا، لزمت ايدها اهدأها وهي مستمرة تهز براسها وعيونها متروسة دموع..

-جنات: لا لا لا مثتحييل لاا ايات لااا ماقببل والله مااقبل ماااريده مااريدد

-ايات: حبي لتخافين اني وياچ جنات اهدأي اهدأي جري نفس جناات

-جنات: ليييث ليث شنو يصير بيييي

تملخ بخدودها وتبچي وتصيح "ليث" ابن عمي التحبه، اختيار ابن عمو شمسون الها معناها خلص مستقبلها ويه ليث انتهى وابوية مستحيل راح يرد ابن شمسون علمود ليث ابن عمي عادل وهمه عداوة من الاساس صارلنا سنين....

**

-مسرة: شلون صارت؟

-نشوان: والله ماعرف ميجاوب اتصالاتي هو من يسافر يطفي اجهزته

-مسرة: هاا، عدها العافية

تركته ارجع للمكتب اشهب صارله اسبوع مختفي سألت نشوان عنه گال راح للعراق بيبيته مريضة وهو واخوانه وابوه راوحوا يزوروها يمكن دتودع، قلقت كلش واجه ببالي يمكن ماتت ومدا يحچي يارب تگوم بالسلامة..

كملت شغلي بس عقلي مو ويايه كل تفكيري ويه ابوية والطلب الي صدمني بي قبل يومين وهو يگول..

-صقر ريماس رجع قدملي عرض مغري

-مسرة: تريد تشتغل ويه صقر؟ لا اعرفك ولا تعرفني كلشي ينتهي وشتريد تاخذ مني بعد اخذه خلص مليييت

-بابا انتِ ليش هيچ عنودية يا حبيبتي شبي صقر وميعجبچ؟ شاب جميل انيق محترم شنو تردين اكثر!

-كاافي لعبت نفسي من طاريه لتگول اسمه ماتحمل اسمعه

-صدگيني يحبچ

-لا بابا!! صقر مهووس مخبل مسودن عقل ماعنده يفكر بيه بطريقة منحطة وبسس يريدني لعاابة وبسس يجيها من يعجبه!

-اذا صرتي اله هو ياخذ حقچ من شكو واحد واگف بطريقچ

-شنو قصدك؟

-يرجعلچ الخسرتي يرجعلچ ميس! لان بكل بساطة صقر مستعد ينطيچ الدنيا بس يريدچ تكونين وياه مسرة!

-منو يگول يگدر لأكرم؟

-انتِ تعرفين نفوذه ومعارفه هواي ويحط اكرم والخلف اكرم بالجيب الصفح اني اگول فكري بالموضوع ولا تستعجلين

وهاي صار يومين ما شاغل بالي غير هالسالفة لو اجي للواقع فعلاً صَقر راح يساعدني بهوايه شغلات ويخلصني من الضيم الدا اعيشه بس بالمقابل راح يطلب يستحوذ على كلشي بيه، راح يطلب يملكني ويجبرني اخضع لـ هَوسه اللعين وجنون عظمته اطخ راسي واكسر ظهري انحني لغروره الذكوري واصيرله جسد بلا روح..

-صبا: ها يحب شنو دتسوي

طلعني صوتها من افكاري المتعبة، اشرتلها على الحاسبة بدون لا احچي..

-صبا: تدرين بـ شُهيب اجه

-مسرة: صددگ والله؟؟

-هههههه اي شبيچ فزيتي قبل شوية وصل وجابلي هااي

تراويني جنطة صغيرة تجنن جايب هدايا يا للغرابة..

-مسرة: شنو المناسبة؟

-صبا: طلع ماكو مناسبة بس گال اشتره لأخته كيان وجابلي الي والچ ولـ وئام وميادة من چان بالعراق شلون الصوغة

-مسرة: يا عمري فدوة

-صبا: شو صاير عمري وكذاا

-مادري كلش حبيت هاي اول مرة احد يجيبلي هدية من سفرته متحمسة اشوفها

طلعت وياهة بحجة نروح لمكتب مروان علمود المخطط بس اكيد مو بحال مروان احنه نريد نشوف هديتي شنو..

-صبا: چنه راح للمكتب مالته

-مسرة: لا چان شفته من الكامرات معقولة طلع من الشركة؟

-صبا: لا ولج گال يكمل الدوام هنا اليوم وياچ بالتحديد

-ويايه؟

-اي گال عدكم مخطط لازم تشتغلوه سوه مادري بعد

-صح اي بس اكيد هو تعبان من السفر مو مال يشتغل

-وانتِ شعليچ خلي الرجال مثابر وشاغول لو تعودتي على البربخة بغيابه

-ما بربخت اني بس ما اشتغل شي وهو ما موجود ماحب

-هلااااا متحب الخاتون

-اي والله تعودت على الشغل وياه حلو وسريع ولطيف وخفيف وشريف جداً

-شغل شريف جداً؟ عقلي ديشطح مسرة

گرصت ايدها من شفته بالممر المؤدي لمكتب نشوان وبصفه كيان واگفة تسولف وياه ومعلگة ايدها بذراعه السعادة طافحة من عيونها المسحوبة..

**

-كيان: بعد بعد شنو جبتلي گوول

-شُهيب: ماعرف جبت هوايه اغراض الچ ولماريا

-كيان: منين بالضبط اشتريتهم من كربلاء لو بغداد لو الحلة لو وين؟

-شُهيب: اخذني طاهر لكربلاء شارع اسمه السناتر ماعرف شنو بضاعتهم كلش حلوة افتر واگول مكانچ خالي

-كيان: احاااا تحمست تحمستتت

-صوتچ يمعودة انفضحنا

جرني من ذيل حصاني من وره بخفة يضحك، ما اهتميت راح اطير فرح بشوفته وانوب جايبلي هدايا مناك مثل عادته شنو اكو اكثر من هاي السعادة؟

-الحمدلله على السلامة

اللتفتنا على مصدر الصوت جاي من مسرة واگفة بثقتها المعتادة ومبتسمة ابتسامة حقيقية..

-شُهيب: الله يسلمچ شكراً

-مسرة: طمني شلون صارت بيبيتك؟

صفن شُهيب ثواني شكله مستغرب بس اكيد ما بين هالشي على ملامحه هو ميعرف نشوان اخترع سالفة بيبية شُهيب مريضة وراحوا يزوروها بالعراق بس لان كلنا منعرف سبب روحتهم الاصلية وما ردنا نبين ثولان گدام الي يسألونا..

-شُهيب: صارت احسن الحمدلله

-صبا: نشوان يگول مقضيها بالمستشفى كلش قلقنا والله خطية

حك طرف انفه يفكر بچذبة جديدة، ابتسم ابتسامة ضيقت عيونه وگال بمزاح..

-شُهيب: هي زينة بس تحب تدلع

-مسرة: ربي يحفظها الكم

-كيان: احمم شسمة شُهيب وينها صوغة مسرة طلعها بله

-شُهيب: بعدين كيان

همسها بيني وبينه مافهمت ليش ميقبل ينطيها هسة انوب حرجنا البنية ويانه بقت صافنة علينا..

-كيان: هاا يجوز يريد ينطيچ من تكونون وحدكم

انتفض شُهيب وره چفصتي الغبية بينما مسرة بقت على ابتسامتها وعيونها عليه..

-شُهيب: لا شنو من نبقى وحدنا شبيچ حبيبتي شعدنا قابل..

تنهد بخفة وطلع علبة مقدفة من جاكيته، ابتسمت مكممة فمي عندي فضول شنو نوع الهدية ولاحظت نفس الفضول انرسم بوجه صبا ومسرة..

-شُهيب: شي بسيط بس من شفته تذكرتچ

قدملها العلبة فوراً فتحتها وطلعت منها سوار فضي وبي حجر لونه ازرق فاتح وبي تشعبات لونهم بيجي فاتح..

-شُهيب: عذريني مو من مقامچ

-مسرة: يجنن

عيونها الكبار تلمع بفرحة خاصة، فرحة لمستها وشُهيب كذلك اختفى توتره واردف وهو يقترب منها..

-شُهيب: هذا حجر الفيروز سمعت مرة مالك يگول يستخدموا بالاكسسوارات لانه يطرد الحسد

-مسرة: الحسد؟

-شُهيب: بعد مالك يگول اني ماعرف بهاي الأمور صراحة

-كيان: مالك عنده خبرة عالية بالأحجار الكريمة والمجوهرات كشكل عام لانه مصمم ودارس هذا المجال

-صبا: حلووو سرور تتوالمون

صفننا اني وشُهيب على جملة صبا الي طلعت سريعة وغير مدروسة من حلگها، حمحمت مسرة واردفت بثقة..

-صبا: يعني اقصد حتى مسرة مهووسة احجار كريمة لو تشوفين معلوماتها بيهن فضيييعة

-كيان: ها مچنت اعرف بهالشي

-مسرة: يعني معلوماتي على گدي

-صبا: لا ابد مو على گدچ حرفياً تعرف لكل الاحجار بس انطيها حجر هسة تگلچ اسمه وشنو مميزاته

-شُهيب: معناها اكيد تعرفين فوائده ليش سألتيني

ابتسمت ساكتة وفوراً لبست السوار بيدها متغاضية عن سؤال شُهيب الي انحرج بعد سؤال صبا..

-صبا: ذهب ابيض؟

-شُهيب: احم.. لا فضة

-مسرة: كلش حبيته شكراً

نبرتها هادئة وعيونها تقره امتنان صادق وكأن السوار اسعدها جداً، ماتوقعت راح يجيبلها هدية تختلف عن مال صبا و وئام وميادة ثلاثتهن جابلهن جنطة بس مسرة سوار..

تمشينا سوه لمكتب مسرة اليوم نشتغل مناك واني وياهم اساساً خلص تدريبي بس بقيت مستمرة وياهم اكسب من خبراتهم، گعدنا حول الطاولة اني وهي وشُهيب وبدوا فوراً بالشغل..

-مسرة: المخطط تريدنا نشتغل عليه مو؟

-شُهيب: لا اشتغلته

-مسرة: شلوون!!

-شُهيب: اشتغلته بالعراق حتى منضيع وقت

صفنت عليه متنطي ردة فعل حسيناها ضاجت وحقها اذا تضوج لان عمل هذا المخطط مشترك بينها وبينه شلون يشتغله وحده..

-مسرة: ليش اشتغلته وحدك؟

-شُهيب: حقچ اذا الموضوع ازعجچ بس..

-مسرة: اشهب انتَ ليش تحب تتعب نفسك دائماً؟

فاجأتنا بكلامها ابتسمت على اهتمامها بي من كملت..

-يعني انتَ مسافر علمود بيبيتك مريضة تلتهي وتشتغل مخطط كامل وحدك هناك؟ ليش هيچ تسوي دائماً تجيب الاذية لروحك

-ما جبت الأذية لروحي اني احب شغلي وهو مخطط نحس شوية وما ردتچ تنزعجين منه اعرف بيچ تملين بسرعة

ضحكت تمسح على شعرها تگلبه من جهة وحدة وتهز براسها، لاحظت هوايه شُهيب متعاون وياهة واوقات حتى شغلها يسوي بدالها من يكون عنده وقت ويسجله بأسمها كأن هي سوته، ما فد يوم حسسها بالمنية او بالضعف لانها اوقات تتعب يسويلها واهس حتى يكملون سوه او اغلب الاحيان يگوللهه عوفي نكمله باچر ترجع هي للبيت وهو يسهر يكمله ويفاجئها..

-مسرة: اووف منك ومن سوالفك يا ماما ظهرك انقسم نصين حس بي مو فقراتك دتلطم بأيديها ورجليها هسة

ضحك بخفة وكمل يراويها الشغل انبهرت مسرة مثل كل مرة اساساً ما دققت بي ثواني باوعتله واكتفت..

-مسرة: يخبل

-شُهيب: يعني عجبچ؟

-مسرة: كلش، شايف انتَ لازم احطك بجام خانة واكتب عليها هذا المبدع مالتنا

بلع ريگ عيونه بالحاسبة يمثل مركز وياهة بينما ابتسامته ما اختفت يااااي شگد خجل اذاناته ورقبته صارن حمر..

-شُهيب: شوفي يمكن يحتاج تعديل هنا

وكالعادة غير مجرى المحادثة ميحب احد يمدحه هوايه لان ببساطة ميعرف شنو يجاوب ودائماً مسرة تستغل هالنقطة واحمرار إذاناته الي تفضحه وتبقى تخبث وياه..

-مسرة: تعديل شنو ابني؟ والله يموت يروح هذاك الواحد فدوة لاناملك

-شُهيب: لا انتبهي هنا احس..

-مسرة: يماااي شلون شغل ينگرط اگلك اريدك انتَ تسويلي بيتي المستقبلي ماشي؟ اريد خريطتي منك حتى اتباهى بيك گدام ابو الزعاطيط

-شُهيب: مو خاف ابو الزعاطيط ينزعج مني وميقبل

-مسرة: دخيولي فنه ميقبل غير ارگعه بستين نعـ.....

گطمت جملتها وابتسمت خجلانة وردت خدودها حطت ايدها على شفايفها وتهمس..

-مسرة: ردت اگول ارگعه بستين نعال ونسيت انتَ محترم ومتحب هذا الكلام

-كيان: بس تره شهوبي شابع هالحچي بسببي ودائماً يرزلني و يگول كلام سوقي مال شارع

-مسرة: بس يا اختي ميشفي الگلب غير هذا الكلام

-كيان: يااا لعد لو تشوفين....

-شُهيب: بنات

-مسرة: ها

-شُهيب: خلونا نشتغل بعدين سولفوا

-مسرة: انجرحت

-شُهيب: شنو؟

-مسرة: كسرت خاطري

-شُهيب: لا لا ليش

-مسرة: انقهرت لان سكتتني

-شُهيب: لا خلص ارجعي احچي براحتچ طز بالشغل

-مسرة: احس گلبي انفطر بعد ماريد

-شُهيب: يمعودة صدگ چذب خيولي الشغل تعالي نسولف بشنو تردينا نحچي

ضميت حلگي بيدي اخفي ضحكتي هالبنية متبطل سوالفها وكل مرة يصدگ بيها عباله صدگ زعلت ويبقى يراضي بيها وهي مكيفة على الوضعية، ماعرف هو مصدگها زعلانة لو كاشفها ويعرفها تضحك ويسايرها يمكن بس لان الكل هنا يحب الجانب العفوي الخاص بمسرة ونحب من تطلعه..

-مسرة: اي يله شنو لونك المفضل؟

-شُهيب: اخضر

-مسرة: امممم وشنو تحب تاكل؟

-كلشي احب

-زين شگد عمرك بالضبط مواليدك وشهرك ويومك وبيا ساعة اجيت للدنيا؟

-كيان: مسرة تردين تسويله سحر؟

-مسرة: اي

ضحك يمسح على شعره يهز براسه وهي تحچي من كل عقلها..

-مسرة: كيان شوفيلي ام عباس السحارة بدربچ عندي حچاية وياهة اني ماعرف لهاي السوالف

-شُهيب: عوفي ام عباس احنه من دونها متخبلين انوب تسحرونا

-مسرة: شوف رجع يجعص بمشاعري كيان اني گايلتلچ من قبل اخوچ مو خوش شريك ابد؟

-شُهيب: تگوليها سطعش مرة باليوم

-مسرة: اليوم راح اسويها سبطعش، كيان اخوچ مو خوش شريك ابد!

-شُهيب: رحم الله والديچ

ضحكت واشرت حتى نكمل شغلنا، تعبت كلش قررت ارجع للبيت كافي هو شبع، خابرت نشوان حتى يوصلني وياه بس گال طالع ويه جماعته جايين من غير دولة علمود يشوفوا..

لبست كبوس على راسي اذاناتي تثلج بالبرد ووگفت انتظر تكسي يجيني كل الأشرلهم يعبروني ممهتمين اكثر شي مزعج هنا هو ابو التكسي مان عليك منية تتوسل بي حتى يوگفلك، تمشيت مسافة اعبر الشارع اروح على السايد الثاني وسفطت گدامي سيارة مظللة عالية، فتح جامته وصوفر..

-يا حلووووو

حچاهة بلغة البلد ما باوعتله مزاجي ميتحمل ملطلطين وماريد اتعارك، رجع يصوفر ويتغزل بعيوني وبياضي وطولي لعبت نفسي منه وجهت انظاري عليه ارزله وچان اللگاه هارون!!!

-كيان: هم انتَ المزعج!!

-هارون: الحب شلونچ شو واگفة وحدچ هنا

-كيان: ايععع وخر مالي خلگك

-هارون: ههههه شبيچ تعالي صعدي وياي اني اوصلچ وين متحبين

حچاهة بغمزة وبلل شفايفه بلسانه بقذارة..

-كيان: روح مناا لو الا يجون اخواني يسحلوك!

-هارون: يمممة راح اموت من الخوف

-المفروض تخاف

-تعالي صعدي

-ولي منا

-تعالي ام لسان

نزل من سيارته يتقدم عليَّ تنرفزت منه وشايلة بيدي جنطتي نويت لو تصرف أي شي يزعجني اللطشة بيها..

-هارون: تعالي شبيچ ما اسويلچ شي ليش خايفة

-وانتَ منو واخاف منك چنك سليمة؟؟؟ يله روح مناا لا اللم الدنيا علييك ما ناقصني غير العفطية

انطيته ظهري امشي مبتعدة عنه وعلى ساعة انجريت من ايدي بقوة حسيتها انخلعت عطت بي بنص الشارع وهو ممهتم يعت بيه ويغلط..

-بت الخ** كلچ خلللگ زعطووطة خليني اگص هاللسان واكسر راسچ وخلينااا نشوف شلون تهددينيي بأخوانننچ الزباايل

تجمهرت الدنيا علينا بس محد يتدخل من شافونا نحچي بلغة تختلف عنهم، سحبني وياه يأشر للناس يوخرون واني اتعارك واعيط بلغة البلد..

-وللللك هددددني حقيييير ساااعدونييي هذا مخخخبل يريد يخطفنييي وللللك هارووون النعااال الا اخليييي شُهيب يربييييك ويزين شاااربك بقندرررته

عيونه نطت، تخبل استفحل عليَّ والناس بدت تتجمهر اكثر واكثر من شفت الناس هوايه فلتت نفسي منه اهرب خفت تجي الشرطة وتصيرلنا مصيبة بس ما لحگت اشرد لان جرني من جديد يلزگني بي وبلحظة سريعة وخاطفة ما لحگت ارمش تقرب من وجهي وعضني بخدي عضة شااغت روحي منهااا..

-ولللك هارووون

انفزعت وخدي مشتعل نار روحي تفور والناس حواليه انهاريت من الوضع، باوعت على جهة الي صاح وشفتهم مالك وفاهد يتقدمون يهرولون علينا اني شفت مالك وبعد ماگدرت اسيطر على دموعي انهضمت حييييل..

-فاهد: وللللك ابن النعاااال اني شحچيييييت

انطاه بوكس ورفسه للگاع ابتعدت عنهم اوگف على صفحة اخليهم يتصرفون وياه وايدي على خدي المحترگ من عضة هذا الكلب..

لزمه فاهد گطعه تگطع ومالك وياه صارت الكفخات تجيله يمين ويسار خفت من سمعت صفارات الشرطة الناس تفرقوا خافوا ينسحلون وفاهد جر هارون من ياخته وشمره بالسيارة وشخطها يطلع منا..

بقى مالك واگف ما انتظرته يجيني تركته اهرول اروح للبيت، اسمعه يصيح بأسمي ويمشي ورايه جرني من جنطتي يديرني عليه وگال بسرعة..

-كياان بس انطيني ثواني احاچييچ

-كيان: ماريد احچي ويه احد مالك حباب خليني ارجع للبيت

-شبي خدچ؟؟؟

تلمسته احس بي نبض من الوجع يمكن حتى دم طلع، بدون كلام طلع منديل قماش من قبوطه وحطه على خدي يمسحه..

-مالك: هذا هارون النذل سوه هيچ؟؟؟

-كيان: اي الحقير

حچى شي بالمغربي ما فهمته بس يمكن سبه ابد ما افهم عليه من يحچي مغربي لهجته صعبة وسريعة..

-مالك: اني اسف على الصار وعدد اخذ حقچ من هالعار!!

-كيان: راح اگول لاخواني يتصرفون مستحيل اسكت

-لا لا شنو تگولين لاخوانچ ماكو داعي گتلچ اني اخذ حقچ

-اذا يشوفون خدي شنو اگللهم مالك؟؟ هاي العضة منين شنو چلب افترسني لو شنو!

ضغط على المنديل الي حاطته على خدي جمدت وانفاسي اضطربت من تقرب مني كلش ممركز بوجهي اصلاً باله مو ويايه عيونه على المنديل بس اني صفنت بوجهه ورحت لغير مرسى..

تنهد وحرك راسه يائس، غمض عيونه ورجع فتحهم وگال بهدوء وبطئ شديد..

-مالك: كيان اطلب منچ طلب وما مجبورة تنفذي بس اذا سويتي ما راح انسى معروفچ طول عمري

صفنت اريده يكمل اخيراً حط عينه بعيني ما تحملت احس نظراته تچويني وخرت عيوني فوراً عنه بينما هو كمل..

-اطلب منچ اذا واحد من اخوانچ سألچ على الصار متگولين هارون الي اعتده عليچ

-ليش؟!!

-لان شُهيب وهارون عداوة من سنين واني اعرف اخوية ما راح يسكت ويسويها بحر من دم! انتِ عزيزة على گلبه ومعتبرچ اخته الصغيرة و راح نطب بمشاكل الها اول ومالها تالي اني بس اخاف يصيرله شي هارون غدار ويلدغ بالخفية

-قصدك ممكن يأذي شُهيب؟

-يذبحه! اي لا تتفاجأين اني اعرف جماعتي اترجاچ اذا فعلاً تحسبين شُهيب اخوچ الچبير تكتمي على الموضوع وصدگيني وروحها لامي العزيزة ما اعوف حقچ واطيحلچ حظه

-توعدني؟

-اوعدچ هارون مصطي وانا قاسحة عليا بزاف

ابتسمت ما فهمت غير "اوعدچ" الباقي مافهمته لانه بالمغربي اكيد.. بدون لا افكر هزيتله راسي موافقة مستحيل اجازف بـ شُهيب واني اثق بمالك ومتأكدة راح يوگف هارون عند حده، ابتسم من شاف اجابتي وبحركة سريعة ومفاجأة جر راسي باسني فوگ الكبوس اللابسته..

گلبي ادعبل، انفاسي انقطعت، دمي نشف وعظامي يبست.. لا تحركت ولا حتى بعدته عني الرجفة لزمتني وبدون مبالغة حسيت راح يغمى عليَّ..

-مالك: شكراً حبيبتي الصغيرة

يمة يمة يمة يمة اااخ گلبي شگال؟؟ گال شكراً حبيبتي الصغيرة؟؟ يمة يا گلبي راح يوگف گلبي راح انجلط والله راح انجلط..

ابتعد مني يودعني بيده ويأشرلي اروح گدامه انثولت صرت اراوح بمكاني هسة غير اللتفت واكمل طريقي تفشلت..

-مالك: تحبين اوصلچ؟

-كيان: هاا؟ لا لا ميحتاج لاا

سويتله باي وركضت للبيت اركض بكل سرعتي بس اريد اوصل للبيت اذب روحي بفراشي وارجع اتخيل الموقف مرة وثنين وعشرة وعشرين ولحدما اموت..

بعد مرور ساعااات من التقليب بالمنديل مالته واشم بريحته التخبل وابتسم مثل المخابيل واني اتذكر كلماته الحنونة صفنت استوعب شي وهو.. مالك گلي "شكراً حبيبتي الصغيرة" ليش؟؟ وليش گال صغيرة بالتحديد؟ شنو يقصد بيها؟ خاف سوه هيچ لان يشوفني صغيرة وهو متعود يعاملني بلطف ونعومة مثل الاطفال من قبل! خاف ميقصد منها شي وحچاهة بعفوية نفس ما شُهيب يحاچيني؟؟؟ خاف مالك يشوفني اخته الصغيرة نفس ما شُهيب يشوفني!! لا لا لا يارب لاا مو هيچي ياارب!!!

**

-مسرة: صارت بالتسعة عبر وقت الدوام خلينا نكمل باچر

-شُهيب: براحتچ

گمت من الكرسي متكسرة مطيت ايدي واخذت جنطتي والكوت ناوية اطلع وانتبهت عليه لسه گاعد يشتغل لابس نظاراته الطبية ومركز..

-مسرة: راح تبقى هنا؟

-شُهيب: دقايق وارجع لمكتبي بس اكمل هذا

-يعني راح تبقى تشتغل بالشركة؟

-اي

-ليش؟ صارت بالتسعة بالليل شنو ما تعبت من الصبح وانتَ جاي من سفر؟

-ماعدنا وقت عگب باچر الاجتماع ولازم نكون مكملين كلشي

-ميخالف باچر نجي من الفجر قبل الموظفين ونكمل شغل

-ماشي براحتچ انتِ بس اني ابقى اكمل

-يااا

-متعود اشتغل لهيچ وقت عادي آنسة مسرة

-بس هيچ معناهة انتَ راح تكمل كل الشغل وحدك اذا تبقى هنا

-عادي مو مشكلة

-لا اني ماقبل بهذا الشي عوف كلشي من ايدك نجي باچر ونشتغلهم سوه

ما جاوب مجرد حرك راسه لا وكمل يشتغل، انغثيت وغرت منه بنفس الوقت خو افتهمنا شاغول ومثابر بس مو لهدرجة واني شبيه فاهية بسرعة اتعب؟

-مسرة: لعد اني هم راح ابقى نكمل لا ترجع لمكتبك

-ارجعي لبيتچ ارتاحي اني اتصرف واكمل كلشي

-لا راح ابقى

ابتسم خفيف ويحرك راسه بقلة حيلة، مرت ساعة اخرى راسي انفخ وروحي احسها راح تطلع دوخة قوية ضربت راسي حتى شاشة الحاسبة اشوفها مغوشة..

-اگلك

-اسمع

-راح انام اني ساعة وحدة بس احتاج ارتاح شوية وارجع اكمل انتَ هم روح لمكتبك حتى ترتاح

-تمام

-شوف اذا تأخرت عليك وما اجيت وره الساعة اتصل بيه يجوز ما احس على المنبه ولو حطيت ثنين وره بعض وماكو مرة مفوتة منبه من قبل

-هذا هو

-مو تشتغل شي بهاي الساعة حباب مو تغدرني

-اذا مو تعبان ليش ما استغلها واكمل الشغل بيها؟

-لا عفية شبيك شسالفتك تاكل الشغل اكل

-اني ماتعب بسرعة انتِ ارتاحي ومعليچ

-ماشي بس مو تشتغل شغلي!

جاوبني بأبتسامة وشال اغراضه يطلع من المكتب وبيده جاكيته، ذبيت نفس اتنهد ونزلت اكتافي اريحهن تعبت من استقامة ظهري، طفيت شاشة الكامرات تزعجني و تمددت على القنفة الجلد الي بمكتبي وغطيت روحي بغطوة خفيفة وصغيرة احطها احتياط وين ما اشتغل..

بس حطيت راسي على القنفة غفيت، بعد مرور فترة ساعة حسيت قبل المنبه بدقايق لگيت روحي نايمة على بطني كالعادة ومتلفلة بالغطوة مثل الدولماية..

گمت من القنفة اعدل بشعري وخرت الكماشة منه تركته مفتوح على طوله ومطيت جسمي شبعانة نوم ومرتاحة كلش ادري بروحي احتاج بس دقايق انام حتى ارتاح..

گمت للمراية ارتب نفسي وشفت طبع احمر بخدي صاير مال هاي النومة المرتبة، ابتسمت ارجع ارسم حمرتي والكحل سايل هم نظفته وشعري رتبته تركته مفتوح..

بست روحي بالمراية خلفت طبع حمرتي عليها يمة فديتني على هالخلقة الحلوة الحمدلله ياربي على حسن الخلقة احب وجهي..

اخذت موبايلي والملفات وقررت نشتغل بمكتبه هالمرة للتغير، مشيت عبر الممرات الفارغة المظلمة محد اكو بس الحارس گاعد بره، لاحظت شي واني امشي المنبه؟ المنبه ليش لسه ما دگ؟

طلعت تلفوني من جيبي وكأن واحد انطاني راشدي من شفت الساعة بالـ 12:46 بعد منتصف الليل!!

-خررررب حظي كل هالوقت اني نااايمة؟؟

ظليت اطفر بمكاني واعضعض بأصابعي يبووو يا فشالتچ يا مسرة فوگاهة تحچيها بثقة تگله ماكو مرة فوتت منبه لو منطمة احسنلج يا الغبية..

-لحظة لحظة.. وينه هو شهاب ليش ما گعدني؟ معناها الخلل منه هو المهمل مو اني! اي طبعاً هو الغلطان خليني اروح ارزله

توجهت للمكتب مالته امثل الانزعاج عود اني ضايجة لان نمت كل هالنومة، بدون لا اطرق باب المكتب دخلت بعصبية خفيفة..

-ياا

كممت فمي اهمسها بيني وبين نفسي من وقعت عيوني عليه، گاعد على كرسي المكتب مالته ماد رجليه ثنينهن على الطاولة ومرجع راسه وره مكتف ايده لصدره ومغمض عيونه..

شوفته بهالحال سوتلي واهس ارگص واگمز من الفرح هو هم چان نااايم يا فرررحتي هلا هلا هلا باليلعب چوبي هلا برجال الچوبي.. افف صبا طلعي من راسي هسة خرب..

ومثل الحبابة الشطورة نفخت روحي ومشيت بكل ثقة وكعبي العالي يطرق بالارضية بهدوء، استقريت اگعد بالكرسي المقابل المكتب ومديت نفسي اخذ الملفات الي گدامه بهدوء تااام حتى ميگعد واگدر اللوفها عليه..

اي نعم راح اللوفها عليه واسوي روحي دا اشتغل من فترة وهو الي نام واخذته النومة.. يا اخي فديته لعقلي ابوس راسي وراس امي الله يرحمچ ماما مشتاقتلچ حبيبتي يروح فدوة لتراب قبرچ شمسون..

وصلني اشعار رسالة من ابوية، قريت رسالته ودگ گلبي بقوة من المضمون..

"فادي: مسرة اذا انتِ بالشركة كملي شغلچ اليوم بابا ما ظل وكت.. تذكري ميس"

ايدي گامت ترجف وصرت امرد بأصابيعي متوترة، رفعت عيوني اباوعله نايم بعمق ما حس عليَّ من دخلت.. رجعت اقره بالرسالة مرة وثنين وثلاثة وعشرة وما اشوف غير ميس بين عيوني..

شمرت التلفون وگمت بخطوات حذرة مترددة لمكينة القهوة مالته، خفت اسوي بيها وتطلع ريحة القهوة فـ اختصرت الموضوع وعبيت كوب مي حار من الغلاية وفتحت ظرف قهوة وسويتها بسرعة..

دخلت للحمام حتى ماكو كامرات وطلعت الشيشة الصغيرة من صدري، شيشة زجاجية برفع وطول اصبع ايدي الصغير بيها سائل ابيض صار اسابيع حاطتها هنا منتظرة الوقت المناسب يجي..

حطيت السائل بكوب القهوة وطلعت اسويلي چاي حتى ما احسسه بشي، حطيتهن يم مكينة القهوة ما اخذتهن ويايه ورحت اگعد على الطاولة انتظره يگعد.. گلبي يرگع خوف وتردد احس روحي تلوب ودمي حاار يغلي بعروقي كلشي بيه يرجف احتاجيت اللهي روحي بشي..

فتحت الملفات الي على الطاولة مركزة بيهن اگلب بشنو ناقص منهن افتح بيهن وما ملحگة ماكو نقص، ظليت افتح وابحوش وهم ماكو نقص كلشي كامل ومرتب شنو الموضوع؟؟

گمت لحاسبته صايرة گدامه مباشرةً اذا اريد افتحها راح اطخ بجسمه، مديت بس ايدي اسحبها بس بعدني قريبة عليه لدرجة اشم عطره، فتحت الحاسبة على كيفي اريد اتأكد من شي وشفت بيها رمز خرب مقفولة هسة شلون اعرف الشغل الناقص شنو..

ابتعدت اسدها وارجعها مكانها، گعدت بنفس مكاني ورجعت ادور بين الملفات اشوف اسم الشخص الي مشتغلهن..

-مسرة قيثارة

همستها همس واني اقرا اسمي بنهاية معظم الملفات منسوب العمل الي.. هذا المفروض يكون شغلي بس مو اني الي اشتغلته ليش اسمي موجود؟

قاطع تركيزي صوت منبه عالي جاي من موبايله، وجهت نظراتي اله انتبهت بسرعة فتح عيونه ونزل ايده المكتفة من صدره يمسح على وجهه ويعدل لحيته وخصلات شعره المتناثرة على جبينه..

-مسرة: صح النوم

نزل رجله من الطاولة مبتسم وللان منزل راسه ويعدل بشعره الناعم، حمحمت وگلت بثقة ميتة فرح اخيراً حظي گعد ويايه هالمرة..

-مسرة: مبينة خوش نومة

-شُهيب: غفوة ام العشر دقايق

-ليش ساعة بيش نمت؟

-12:45

باوعت لموبايلي اشوف الساعة بالـ 12:55 بلعت ريگ خانسة مالي عين اباوعله بس اگدر احس بي ديباوعلي ماگول غير يا فشالتچ يا مسرة ويا خزي حالچ، لملمت نفسي وگلبت شعري كله على جهة اليمين حطيت رجل على رجل وگلت بثقة مصطنعة..

-اها، اني هم نمت قليل يعني چانت نومة مرعبلة صراحة

-للاسف

حچاهة بتلاعب رفعت انظاري عليه اشوف طيف ابتسامة خفيفة مرسومة على ثغره بصعوبة كاتمها..

-اي يعني اصلاً ما نمت تدري كم مرة فزيت؟ اكيد متدري شلون راح تعرف نمت ويايه انتَ

ما انتبهت على چفصتي الا من زادت ابتسامته وسرعان ما خفاهة يضم شفايفه لداخل فمه والي زيد وضعي الخايس سوء هو من انتبهت للشاشة معلوگة وكامرة مكتبي موجودة من ضمن الشاشات الصغار معناهة چان يعرف اني نايمة وشافني واني متلفلفة مثل الدولماية وشافني من تمكيجت واني اتميلح وابوس بروحي بالمراية وراقب كلشي خرب خرب خرب خرب خررررب..

هفيت وجهي وغمضت عيوني اسوي روحي طبيعية وريلاكس بس متأكدة احمرار وجهي فضحني اشتعلت شعل الله يشعلك شمسون..

-مسرة: افف اگلك هاي شنو الملفات شو مكمل كلشي انتَ؟

-شُهيب: اي فضلت اخلص كلشي اليوم

-وليش وحدك؟؟

-لان ما رجعتي وتوقعتچ مرتاحة بنومتچ

رجع حچاهة بنبرة متلاعبة وهو ينزل كفوف قميصه الملفوف ويعدل بساعته..

-مو گتلك اتصل بيه؟ چان اجيت بسرعة تره نومي خفيف

-ميخالف

-لو بس متصل چان حسيت شوف انتَ ضيعت وقتك وجهدك تشتغل شغل مو الك وما مسؤول عنه بعد شبيدي عليك

-ميخالف

اول مرة احس بهيچ احراج بحياتي لا وانوب ويه رجال! اني اغلب الزلم من گاعهم مشايلتهم يجي هذا ابو راس المفعص يخجلني ويخليني اتوتر..

-مسرة: احم احم احم احم احم

-شُهيب: يا الله شعندچ هالمرة

-مسرة: ليش اسمي بالملفات واني ما اشتغلت شي؟

-حبيت ينور اسمچ شغلي

-اعرف اسمي بركة حقك

-صراحة كلش

ضحكت ع نبرته المتلاعبة بالكلام هالرجال لو يگول مياو اضحك من خفيتي وياه گبرررر يا الريشة!

-مسرة: لا بس اقصد ليش تتعب نفسك

-تعبچ راحة

-حقوقك هاي وجهدك تعبت عليه حرامات يضيع هيچ

-فداچ

عزه عزه عزه راح اطير يمعودين الريشة راح تططير لزموني خاف اتهور، شفت كوب موجود على الطاولة مالته اخذته اتلمسه دافي مو كلش بارد صكيت البيها دفعة وحدة ورجعته لمكانه..

-ايعععع

-شُهيب: حقچ باردة

-يبووو اكره الگهوة غير تنبهني

-شُهيب: انبهچ؟

-اي ماحبها تلعب نفسي منها حشى نعمة الله استغفر الله انوب خلاني اگول على نعمة الله ايع كله من وراك

ما جاوب اكتفى بأبتسامة خفيفة وشال حاسبته ورجع يگعد مقابيلي جاب الحاسبة يحطها امامي..

-اتطلعي على الشغل وشوفي عندچ ملاحظات حتى اعدلهم

-ماعندي ملاحظات

-بس ما شفتي بعدچ؟

-مو مهم

-اي بس..

-اثق بشغلك ماكو داعي

هز راسه وسد الحاسبة يرجعها بمكانها، حسيت ببطني تقرقر هم جوع وهم من موضوع القهوة السويتها احس راح تطلع روحي من الخوف، گمت لمكان الكامرات مالته انتبهت عيونه تركض ورايه من درتله وجهي وخرهن يسوي روحه يفتح ملف..

بدون كلام طلعت تسجيلات اليوم وحذفتهن كلهن بدون تبرير منطقي لان مو لازم ابرر مسويتها اكثر من مرة واتوقع تعود عليَّ وهذا السبب هسة گال بكل هدوء..

-شُهيب: ثقتچ بيه صفر

-مسرة: مو هيج بس اكو امور ماحب احد يتطلع عليها

-هالامور هنه طليقچ

من وحده گالها مچنت متوقعة تفكيره راح لهذا العمق وتخيل ان احذف التسجيلات من يجي اكرم للشركة، مجاوبت فضلت اسد الموضوع وحذفت التسجيلات كلهن وحتى الي يصيرن بالاحتياط هم حذفتهن اهم شي ميطلع تسجيل واني اطلع الكوب من الحمام..

-شُهيب: تعرفين اگدر اوگفه عند حده اذا تحبين؟

حچاهة بثقة وعيونه على الملف يگلب بي، كملت من التسجيلات ورجعت اگعد مقابيله..

-مسرة: تكتله مثل جهال سيف الكنعان؟

ضحك بخفة ينزل الملف من ايده وينزع نظاراته الطبية..

-مسرة: ما سويتلهم شي ليش عود؟

-تتوقعين صدگ اكتل اطفال مالهم ذنب بسبب غباء ابوهم؟

-اي شمدريني احسك من جوه الجوه

-احساسچ بمحله

-ويعترف الافندي

-الاعتراف بالذنب فضيلة

-هسة گوول شسويتلهم تره سيف ماله وجود لا هو ولا زعاطيطه سام بلغني

-وانتِ رحتي تدورين ورايه؟

-طبعاً عشتو هيته هي تروح تكتل بالعالم واسكتلك؟ بيدي اني بيددي ادخلك السجن والله

-انتِ مو خوش شريكة ابد

-هستوك دريت؟

-هههههههه متأخر بالمنهج الخاص بمسرات مثل عادتي

-اي تدارك الموضوع بسرعة غيرك جاي يتفوق

-غيري مالك؟!

-مالك كاتلك كتل شعلي الرجال بكلشي حاطي

-لا ما كاتلني ليش يكتلني شيخصني بي

-ابددد

-هسة فد شي مالك؟؟ بس مبين انتِ كللش مرتاحتله وطلع عدكم شي مشترك وهو حبكم وهوسكم بالمجوهرات والاحجار!

-الله اي ذكرتني طبعاً يعجبني اتناقش وياه بهالخصوص احسه جبل من المعلومات

-اي تناقشي ليش متتناقشين

-انتظر اللحظة المناسبة

-انتظريها عيوني اساساً ما راح تلاقين صعوبة بالنقاش انتِ من الاول معجبة بشخصيته يضحك ويتشاقه واجتماعي ويعرف يحچي ومو ممل و..

-هههههههههه على كيفك لا تموت من الغيرة

-اغار؟؟؟ ماعترف بشي اسمه غيرة وليش اغار من اخوية؟!

-مادري يمكن لانه يضحك ويتشاقه وحباب واجتماعي ولطيف واسلوبه وستايله حلو و..

-ما شاء الله انضافت شغلات جديدة بقائمة مالك

-ههههههههههههههه والله تضحك عززه

-اي ضحكي ضحكي

-يمعود شبيك مضغوط من اخوك صدگ چذذب

-كافي خلينا نسد موضوع مالك!

-شو تتأمر عليَّ

-هسة اي اتأمر عليچ لان ماريد اسمع طاريه

-اي ديلا نرجع نحچي شصار على جهال سيف حباب تره بالي يمهم عرفت فرح بنته بعمر ميوستي

-بس طلعتهم من البلد ما اذيتهم لا تخافين

-ليش؟؟

-حتى يتأدب

-خاف بلد الخلفك هو تطلع وتطبب بكيفك

-اليدوسلي على طرف ادوس على راسه هاي سياستي بالحياة ماي ليدي

-امممم، اگلك

-اسمع

-كملنا كلشي مو؟

-بقى هذا الملف الاخير اني اشتغله انتِ رجعي لبيتچ

-اهوو راح ترجع على سوالفك ليش متقبل اشتغل وياك هاي واني شاطرة ومو مزعجة تره انتَ محظوظ بالشغل ويايه

-صحيح، بس تأخر الوقت ماي ليدي

-واذا؟

-يعني صارت بالوحدة وانتِ بره البيت اكيد اهلچ راح يقلقون

مجاوبته اكتفيت اسحب الملف من ايده اگلب بي، هذا ميعرف ماعندي احد يسأل عني ومحد يهتم لوجودي عسى ما ارجع ويه رجال للبيت بالخمسة الفجر هم ابوية ميسأل هذا منو.. محد يهتم متت عشت اكلت شربت نمت سهرت بأختصار محد يلاحظ..

هو هم ما حچى واجه يتناقش ويايه على الأوراق وبطني كلما جالها تقرقر اكثر..

-جوعانة خلينه نطلب اكل

-تمام تعرفين مطاعم مفتحة هيچ وقت؟

-لا انتَ تعرف؟

-صراحة لا بس ثواني خليني ابحث

-لا خلص بطلت ماريد

-ليش؟

-ماريد اضوج من الانتظار

-بس انتِ جوعانة

-اي

-وراح تبقين جوعانة؟

-اي عادي يله نكمل

هز راسه وگام متوجه لثلاجته الصغيرة طلع منها علبة زجاجية شفافة ميل زاوية فمه وهو يباوعلها وگال بخفوت..

-عندي هذا صح بارد بس هو غداية اكلت منه قبل شوية يمكن يسد جوعتچ؟

-انتَ طابخه مو؟

-اي

-والله تنطبق عليك مقولة سبع صنايع والبخت ضايع

ضحك وحطه گدامي على الطاولة فتح العلبة بيها معكرونة بصوص احمر وكرات لحم صغيرة ريحتها تجنن..

فوراً اخذت شوكة وبديت آكل مستلذة بيها طمعها كلش طيب، جابلي عصير من الثلاجة فتحه وحطه گدامي وجابلي كلينس هم طواهم وحطهم بجانب العصير، بعد الملفات من طريقي حتى ميضوجوني واني آكل وگام يفتح شباك المكتب يهوي المكان كلشي يسوي بهدوء شديد بقيت صافنة عليه وعلى اهتمامه..

فتح حاسبته ولبس نظاراته الطبية يكمل شغل بدون لا يزعجني ويحچي شي، تأملته شوية بالخفية معقولة هذا يصير ابن الخسيس شمسون؟ شلون؟ ميشبهله لا شكلاً ولا تصرفات ولا حتى نمط حياة..

بين اكلي وهو يشتغل دگ موبايلي، رفعته اشوف منو ونبض گلبي بقوة من شفت ابوية المتصل اعرف شنو يريد بالضبط ديستعجلني حتى اتمم الموضوع ...

حطيت الحافظة على الميز ورحت اغسل، سويت روحي دا اسويلنا شي دافي نشربه وجبت الاكواب من جانب مكينة القهوة بس بردوا شلون هسة؟

-اگلك سويتلنا شي دافي نشربه قبل شوية بس بردوا اذبهن واسوي جديد لو تشرب شي بارد عادي؟

-عادي وعاشت ايدچ

حطيت الكوب گدامه گلبي يرگع رگع گعدت بصفه بسرعة لدرجة طخيت بجسمه ما حاسة على روحي رجلي بعد متحملني، انتبه عليَّ ابتعد شوية واندار يشوف شبيه..

-شبيچ مسرة انتِ بخير؟

-اي اي مابيه شي

-سكرچ صعد؟ يمكن من المعكرونة والعصير؟؟

گام يجيبلي كوب مي چبير وگعد بصفي ينطيني شربته ونصه وگع على ملابسي احس حلگي انعوج فجأة وايدي انشلت النفس ضاگ بيه حتى هوا ماكو عيوني تغوش وترجع تتوضحلي صورته ملامحه قلقة وخايف عليَّ موتتي بالزايد!

يشتغل شغلي ويحطه بأسمي، يخليني ارتاح وانام وهو يتعب وينكسر ظهره بالشغل حتى ما اتأذه، يهتم بيه ويخاف عليَّ، لطيف ومحترم ويايه وهسة گاعد بصفي قلق وخايف وحاير شيسوي من شاف حالي كل هذا واني حاطتله سَم بالگهوة اريد اكتله!!

-شُهيب: وياي مسرة؟؟ علاجچ اخذتي؟؟ اجيبه الچ وينه؟؟

-مسرة: لا تعبانة راح ارجع للبيت

-خليني اوصلچ وضعچ مو تمام

-لا لا فدوة اريد اروح

-لا تعاندين والله يظل بالي عليچ

انطيته ظهري ماگدرت اسيطر على نفسي الدموع تشكلت بعيوني ماردته يشوفني بس هيهات ما خلاني اطلع بهذا الحال انوب زاد قلقه من شاف عيوني المدمعة..

-سويتلچ شي؟؟ صار شي غلط قبل شوية؟؟ خاف ضجتي من حچيت على مالك؟؟ لو بسبب جهال سيف؟؟ والله ما سويتلهم شي وداعة امي

مسحت وجهي بأيدي الراعشة راح افضح نفسي لازم اطلع منا ضروري!

-مسرك: انتَ خوش رجال شُهيب وانتَ شريك ماكو منه

عضيت على لساني وره جملتي اسيطر على نفسي ما ابچي وطلعت من المكتب واني متأكدة راح يشرب القهوة حتى لو بردت حتى لو باتت لان ببساطة يشرب القهوة كأنها مي وميبذر بيها يعتبرها شي ثمين من عشقه الها..

طلعت اوگف بباب المكتب مالته واحس سچاچين تگطع بيه من الداخل گلبي موتني تمنيت اطب جوه احضنه واعتذر منه.. ابررله موقفي واشرحله تعاستي اشرحله ماكو حل ترجع ميس لحضني الا شُهيب شمسون ينتهي!!....

يتبع...

━━━━━━  ━━━━━━

اني معليه وگلبي تگطعع وگعدت ابچي 😭💔
تتوقعون شيصير بـ شُهيب؟؟

لحد ينسى بنات عمهم العشقق خطيبات المستقبل 😂💀

توقعاتكمممم اطربوناا 😁🔥