رواية ابناء الحسوم "شمسون" الفصل السابع وثلاثون 37 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

يبَعد الحيل كل الحيل لعيونك.. 💕

━━━━━━  ━━━━━━

-فاهد جوز من ثوالفك واشرحلي حباب

-فاهد: الا تبوسين ايدي

-جنات بهمس: ولك فشلتنا فاهد مو زميلاتي اجو وحمدت بشرحك ويردن يشوفن شلون تشرحلي

-فاهد: يله اصطفن وحدة وحدة تبوس ايدي حتى اشوف شغلي وياچن وراهة

-جنات: فااهد اكرهك شبييك والله عيب منهن شنو تريدهن يبوثن ايدك

-فاهد: حبيبتي جنات ماكو شي بدون مقابل بهاي الدنيا

-جنات: هاا اوگف اني محجبة اصلاً حرام اللزم ايدك

-فاهد: انتِ عفو عام اجاچ لانچ شريفة الباقيات غصباً عليهن يبوسن ايدي واذا ما عجبتني البوسة اخليهن يبوسن اشياء اخرى

-جنات: الله يااخذك يا مطي

-فاهد: بت الكلببب تحلمين ادرسچ ظلي هيج دايخة

-جنات: الا اكول لمالك عليك ذليتني هو ميقبل تزعلني

-فاهد: عود ميخالف من يجي مالك اصير زين وياچ بس بظهره الا اشكچ نصين

-جنات: حقيير

عفته متنرفزة ورجعت للبنات خطية واگفات ينتظروني احجي ويه فاهد واجي ابشرهن حتى يدرسنه انقهرت منه كلش والله دائماً يدرسني وحتى من سافر للمغرب اول ايام يدزلي بصمات يشرحلي واوزعهن على صديقاتي شبي انچلب اليوم..

-فاهد: هيووو گملة

-جنات: خير!

-فاهد: شو تنترين؟ امشي ولي عود ردت اكلچ تعالي ادرسج

-جنات: لا لا ما انتر بعد والله اصير حبابة

-فاهد: ديلا تعالي انقهرت عليج

كيفت ورحت اصيحلهن كلهن اجن وگعدنا حول المصطبات وقسم وگف وقسم بالگاع وهو فتح كتابنا وحط رجل على رجل، شعل جگارة دخن منها وشمر الدخان بوجوهنا كلنا بأستفزاز وبقى يدخن الجگارة كاملة وهو على هالحطة لا حچى شي ولا شرح انوب كملها وطلع جگارة ثانية والبنات متسرسحات على حركاته الزبالة مادري شنو يعجبهن بي..

-جنات: حممحممحممم

-فاهد: باعن ولچن

-جنات: اوگف كلچن عربيات مو؟

-فاهد: حتى لو مو عربيات ما يهمني ترجمولهن

-جنات: لا كلهن عربيات كمل

-فاهد: باعن عدچن زريبة...

-جنات: فااااهد

-فاهد: تسكتين لو ما اكمل؟

-جنات بهمس: الله ياخذك

-فاهد: ههههههههههههههههههههههه امين

-جنات: يله ابن عمي العزيز ابدي

-فاهد: عدچن زريبة بيها سبع خنازير راح ابو الزريبة الخايس وجاب فوگاهن تسع خنازير مقطعة وصل وصل وناعل خير خيرهن يستاهلن طبعاً لان الخنزير طعمه يلعب النفس...

-جنات: بث هو حرام اكله

-فاهد: ما ضايگة اني صديقي يگول المهم...

كمللنا المثال وقربلنا الفكرة بالزريبة والخنازير الكل افتهم والبنات تحمسن وطلبن يشرح مثال على الموضوع الثاني.. طلع جگارة ثانية شعلها ودخانها شمره بوجه صديقتي رزان ضحكت الرعنة ما اهتم لضحكتها وگال..

-فاهد: اكو نعال..

شهگن البنات كلهن واني ضربت وجهي فشلني هالبني ادم باوعلنا صفح ورفع حاجبه معاجبه ضحكن البنات وكلهن گعدن حبابات، كمل شرح الموضوع مستخدم المثال الاتي..

-فاهد: هذا فد نعال حب نعالة وتزوجها شنو جابو؟ جابو نعل صغار قسم لونهم اسود وكاتلهم الوصخ وقسم ابيض يلمعن مثل جنات..

ضحكن البنات واني باوعتله صفح يتفنن شلون يغثني ويضوجني شگدما يشرحلي واني لاطشة بي وين ميروح كلما يجي للجامعة لان استاحش وماعرف للغة اكو بنات عبالهن احنه مرتبطين والحقير يلعب عليهن ويگلهن اني حبيبته يخليني اشيل روحي وارگعها، چان بقت السمعة علينا احنه مرتبطين لوما يكسرها بعدين بضحكة ويگول "چذب هاي گملتي تصير بت عمي الغبرة"..

كمل الشرح الكل فرح وتفائلنا بالمادة بعدما چنه مأيسين وكلنا راسبين بيها تالي اجانه هذا المسودن وفهمنا بمثالين واحد زريبة خنازير والثاني نعال حب نعالة وجابو نعالات صغار..

گامو البنات واني وياهم عفناه لان اجاله اتصال مهم وطلع من القسم كله حتى يجاوب، گعدت على المصطبة وبصفي رزان تسولف على شرح فاهد شكد نفعها وحسيتها حمت من گالت..

-هو مرتبط؟

-جنات: متزوج يا عيني

-رزان: چذابة!

-ليش اچذب؟

-يعني ما مبين عليه شكله بعيد عن الزواج والمسؤوليات

-لا متزوج ويحبها يصيحلها كوريتي لانها تشبه الكوريات

-رزان: نفسها كيان التجيچ هنا ببعض الاوقات؟؟؟

-اي بالضبط

-اف اف شنو هالصدمة اني اعرف كيان چانت مرتبطة بواحد اسمه ثامر بس هو مات شبسرعة نسته وتزوجت

-اهووو رزان راح نبقى نحچي بكيان؟ ثانياً ثامر مات وحرام احچي عليه بث اذاهة هوايه وميثتاهلها فاهد كلش زين وياهة رغم خبالاتهم بث يحبون بعض

-شگلت وهيچ ضجتي يا عيني اسفة اذا زعلچ كلامي وما اقصد افرق بينهم ابد الله يحفظهم ويسعدهم ويه بعض مستحيل يعجبني رجال متزوج مو اخلاقي هاي

-امين، اگلچ كيان جاي تقنعني اروح وياهة للجم حتى اغير من جو البيت تجين ويانه؟

-رزان: مالك شمسون!

-جنات: لا مالك ميجي وياي اصلاً الجم نثائي وبالليل الشفت الرجالي

-رزان: لچ هذا مالك! ابن عمچ مالك شمسون!!

باوعت للمكان الي عينها تراقبه وجفلت مخطوف لوني من شفته مالك! والله مالك هذا مالك اجاني للجامعة؟؟ شصاير؟؟ العلوية بيها شي؟؟ فيروز؟ اهلي؟؟ وصله خبر ايات صايرتلها مصيبة؟؟ ياربي دخيلك وگف گلبي ان شاء الله ميكون صاير شي..

تفرقوا عنه الزلم الوياه وتقدم لجهتي بقيت مصفصفة وكاعدة بمكاني اراقبه ورزان بصفي صافنة..

-مالك: مرحبا

-رزان: مرحبا مسيو مالك

-مالك: انتِ رزان صح؟ جنات هواي تحچيلي عنچ

مدلها ايده مبتسم يصافحها ابتسمت ورجعتله المصافحة واللتفتت تباوعلي..

-رزان: عيني جناوي ما اتفقنا هيچ اهم شي ما فضحتيني گدامه

-جنات: لا

ضحكت وعدلت شعرها اجو باقي زميلاتي من شافونا ووگفو قريب من عدنا يراقبن ما اللومهن واعرفه فضول البنات اني نفسهن بس غطيت بهدومي من گال..

-مالك: شلونچ جنتي..

مد ايده الي يريدني اصافحه گدام امة لا اله الا الله لااا وانوب صاحلي جنتي گدام الكل؟؟ من صدگ انلاست!

-مالك: جنة شبيچ متشنجة ما راح تسلمين عليَّ؟

-رزان: جنات حبي سلمي شبيچ

-جنات: احم.. هلا مالك

حطيت ايدي على صدري اوضح اني ما اصافح رجال لان ببساطة اني محجبة ومالك ابن عمي گدام الناس مو رجال حلالي ويصيحلي جنتي وكل يوم انام بصفه ويجعصني!!

-مالك: جبتلچ شي وياي

رفع عينه يباوع لجهة معينة اجه رجال يهرول وبيده كوب چبير ازبري لونه ازرگ، توسعت عيوني مدهوشة اجه لهنا حتى يجيبلي ازبري؟

-رزان بهمس: اخخ احس روحي بمسلسل تركي صيفي طول عمري اتمنى اتزوج واحد عنده حماية ورجل أعمال وعنده...

سكتت من مالك قدملي الكوب السفري وحطه بين ايدي يلمسها متعمد ويمسح على كفي وعيونه بعيوني..

-طلعتي زعلانة الصبح لان ما جبتلچ ازربي

وهنا ماگدرت اللزم روحي اكثر فطست!! والله فطست ضحك ونسيت ابو الموقف من وره الـ "ازربي" مالته محد انتبه لكلمته غيري ومحد ديضحك غيري لدرجة عيوني دمعت..

-رزان بهمس: هاي شبيچ!

-جنات: ههههههههههههههه سلامتج

-مالك: رزان عفواً ما چنت اعرف راح اللتقي بيج چان جبتلچ وياي، تحبين اوصيلچ؟

-رزان: لا لا شكراً مسيو اني اروح واترككم براحتكم

ابتسم يهزلها براسه طفرت رزان واجه هو فوراً گعد بمكانها لازگ بيه لزگ رجله طاخة برجلي!

-مالك: ماعرف يا نكهة تحبين جبتلج بلو بيري

-جنات: مالك فضحتنا هههههههههههههههه

-مالك: ليش؟

-اسمه ازبري ا ز ب ر ي

-واني شگلت؟

-خليها سكتة ههههههههههه

-اساساً ماعرفت شنو هو خابرت فاهد وفهمني هو نفسه السلاشي

-معقولة ماعرفته وانتَ جاي للعراق كم مرة علينا مالك علينااا

-والله ماعرفته وما شاربه بالعراق من قبل

-جنات: المهم انتَ شبيك لاطش بيه اتدنى شوية هثة العالم شيگولون علينا؟

-يگول متزوجين

لف ايده حولي يحضني لصدره دفعت ايده عني بسرعة وگمت اوگف على حيلي اتلفت بلكي محد شافنا..

-جنات: شنو هالحركات مالك! حرام عليك هيچ تثوي حراام جاي تشوه ثمتتي بالجامعة محد يعرفني متزوجة ليش تلعب بأعصابيي

-خليهم يعرفوچ متزوجة ليش خايفة!

-خايفة شنو؟ ليش اگول على روحي متزوجة واني ما متزوجة اصلاً زواجنا على ورق!

-ليش انتِ اصلاً تعرفين شنو يعني زواج على ورق؟!!

-لا!! بث انتَ گلت معناها ما متزوجين!

-ريت مگصوص لساني ولا گايلها تعاليي

-مااا

-تعالي ولج

-ما ما

-جنااتت

-ما اجيك هثة تفضحني

-والعباس لو ما اجيتي ابوسج گدام الكل

-يا فاثق يا ثااقط!! ثانياً انتَ تحلف بالعباس ليش تعرفه؟؟ من شالك العباس وثطرك ان شاء الله

-تعالي انتِ علميني و سولفيلي عنه

-لو تموت ما اجيك

-راح اگوم

بدون تردد ركضت اگعد بصفه مثل العاقلة خفت يسويها صدگ ومو بس انفضح يصوروني وينشروني كل مكان بالجامعة عاد هنا الاشاعات بفلس يشترون الاشاعة مشتره ويطشوها..

-مالك حباب اني..

-خلينا نعلن زواجنا

-هاااااا؟؟؟؟

-نعلن زواجنا نسوي حفل جبير هنا ونعزم الكل تلبسين فستان ابيض مثلما تحبين ونعلن احنه متزوجين

-يا للهول

-جنات جاي احجي صدگ

-والطلاق؟

-هسة عوفج منه هذا علما تمشي المعاملة ينرادلها عشر سنين

-واني اظل انتظر وياك عشر ثنين وتذبل وردة شبابي

-تبقين وردة متفتحة متذبل ابد

-لا تضحك عليَّ بكلمتين تره ابوك يگلب الدنيا علينا لو افتهم تريد تسوي حفلة وتعلن زواجنا وتوزع جگليت ومادري شنو

-هو هااي المشكلة هذا البلاء الاعظم ابووية!!

-مالك لا تزعزع راحتك خلينه هيچ والله حياتنا ماشية صح وماكو مشاكل بيناتنا

-والنعل الجاي يجون يطلبون ايدج؟؟؟

-هااا انتَ هذا المضوجك انقهرت لان جرحوا رجولتك شوية مو بحالي

-وينه هذا الضفدع المتعفن الخطبج انطيني اسمه!!

-ما انطيك تروح تفشلني وتثوي هوثة ويصوروك وينشرونا وننفضح

-لچ انطيني اسمه معلييج انتِ اني اتصررف

-ماا انطيك رووح بلط البحر!!

-شنو

-هذا مثل ثوري مادري لبناني عجبني وانتظرت 19 ثنة يصير الوقت المناثب حتى اثتخدمه

-جنات لا تلعبين وياااي گولي اسمه والله ما اسويله شي بس خليني اتأكد اني اعرفه لو لاا لان عندي هوايه ناس عرف هناا

-مالك يروح هذا يجي غيره يروح غيره يجي غيره وغيره وغيره هاي الحياة انتَ خوما تريد تربطني بيك واني اربطك بيه خو هم ميصير

-وزواجنا؟؟!!

-زواجنا بعين الاعتبار ولا تخاف ما راح اثوي شي حرام واني على ذمتك ميجوز صح ردت اوافق على هذا الخطبني بث چانت ثاعة شيطان عصبية

-انعل ابوو الخطبج يعني ببالج الفكرة؟؟ واذا الشيطان تغلب عليج بالمرات الجاية وقبلتي صدگ واجيتني تردينه نتطلگ وحتى املاكج مترديني ارجعها بعد!! واني اعرفج مخبللة انتِ مسطية وراح تسويها بيووم!

-مالك شتريد انتَ

-انطيني ايدج!

-شتثوي بيها

جرها غصباً عني وطلع من جاكيته علبة صغيرة، عكدت حاجبي اتابع حركاته السريعة والعصبية.. فتح العلبة بتك ايد وطلع منها حلقة ذهب ويحاوطها من الاعلى سير اللماسات صغار.. سحب ايدي عليه اكثر وبلطف لبسني الحلقة بأصبعي البنصر الايسر..

-بس حطيها بيدج

-نعم؟!

-لبسيها حتى تتجنبين الناس اليخطبوچ

-وليش اثوي هيچ شي

-حتى ما تنزعجين منهم

-ما مزعوجة منهم

-جناااتتتت

-صوتك فصحتنا عزه بعينيي ولك الدنيا جاي تباوع علينا وينه برثتيجك ورقاوتك مو عيبب

-باعي نتفق اتفاق تمام؟

-اي شنو هو

-تلبسيها وشنو تردين انطيج

-حتى لو طلبت ثيارة؟؟

-انچبي

-هاي شبيك شكد بخيل!

-كتلج اجيبلج سيارة اذا نجحتي غيرها ماكو

-والله لو فلوثي موحودة الا اشتري ثيارة احلى من مالتك

-طلبي شي ثاني بالوقت الحالي

-مالك اذا لبثت حلقة راح يعرفوني متزوجة ماكو فرق لعد شمعنى انتَ متلبث حلقة ومتقبل تحطها بأصبعك اصلاً!

-اللبسها

-شنووو

-راح اللبس حلقة وتصير وحدة بوحدة

-معقولة تقبل وابوك؟؟

-ابوية ما راح يهتم يعرفني احب المحابس وراح يعتبرها فيكة وانتِ الحلقة بيدج الزلم راح يشوفوج مرتبطة والبنات يشوفوها فيكة اساساً نازل موديل الحلق

-تمام

ابتسم ابتسامة واسعة جداً برزت اسنانه البيضة عداني بالبسمة وابتسمت وياه على الواهس اشرلي على الازبري حتى اشرب منه وانطي رأيه..

-جنات: طيب والله

-بالعافية

-ضوگ

انطيته الگصبة شرب منه وهز براسه بمعنى طيب، لف ايده على كتفي مرة ثانية دفرتعا ورجعها دفعتها ورجعها گرصتها وهم رجعها انوب لفني اكثر وثبت حنچه على راسي..

-جنات: مااالك اكرههك

-جنة عادي ماكو احد شوفي المكان فرغ

-لان بدت المحاضرات خليني اروح

-لا ضربي المحاضرة

-مالك هدني اخاف يشوفونيي

-عادية هاي الامور هنا اول ما دخلت لكليتچ شفت وحدة گاعدة بحضن حبيبها شبيچ محد راح يحچي عليج لا تخافين

-وحجابي؟ حجابي العالم شتكول من يشوفوني محجبة ورجال يلزم بيه ويحضن

-باعي هاي تره محد يعترف بهالسوالف هنا عدهم الحجاب قطعة قماش ويحطنها على راسهن وشوفي بعينج..

زفرت متنرفزة هو كلامه صح ولاحظت هالشي المحجبات هنا خرطي يلزمن ويحضنن ويبوسن بس خوما احنه هم نصير فاسدين بس لان اكو بعض الناس فسدوا بالارض مو منطق هذا!

-مالك

-ممم

-هالمرة ثماح راح اقبل بث لان الطلاب دخلوا محاضراتهم بث والله اذا عدتها اموتك

-صار

-انتَ مو عندك اجتماع؟ فاهد گال عندك اجتماع مهم

-ميخالف فداچ

ضحكت بصوت عالي يا حيال يقلد كلمة شُهيب وظلت بباله من گتله ليش متگولي فداچ..

-جنات: يا عار

-ولج ادبسز انتِ ليش متگدرين تلزمين لسانچ؟!

-من انتَ تتأدب وتلزم ايدك ومتحضنني گدام العالم اللزم لثاني!

-ايدي طويلة شسوي

-لثاني اطول

-اعرف شلون اگصه

جمدت من قرب وجهه كلش عليَّ وقيّد حركتي، عيني بعينه انفاسي تسارعت ودگات گلبي صارت ببلعومي من همس بخفوت..

-ضروري نشتغل على موضوع لسانچ جنتي

-شلون

-عندي العقاب المناسب حبيبتي

لساني انگص غير احچي غير اجاوب غير ارادد واتصالف راحت الكلمات وصرت امعلس توترت وروحي خرطت من اردف بأبتسامة جانبية..

-المكان مو مناسب لفهاوتچ تماسكي يحلوة

انتبهت على روحي وكأن ضربني راشدي ادراك فتحت عيوني الذبلانة غطيت بهدومي ردت ابتعد منه ورجع يلزمني رفعت راسي اله ونزل راسه الي كشولت بوجهه ضحك ومسح على شفايفي بأصبعه كزبرت وگلبي گام يدگ..

-صار لونهم ازرق

-ازرگ

-ازرق ازرك المهم فهمتي عليَّ

-احم اي

-انطيني

-شنطيك!

-سلاش

-گول ازبري

-ابرزي

-گول ا ز ب ر ي

-ا ز ر ب ي

-مااالك لا تقدم الزاء على الراء

-ولج لا تصيحين بوجهي اعتبريني اول ابتدائي وجاي يتعلم منچ هو هيچ يعلمون

-صار لازم اخذك دروث خصوصية مالك وضعك صعب

-اي غير تعلميني يا جنات مو والله جاي اعاني

-ثودة عليَّ تدري انقهر عليك اشوفك تغرد ولثانك شطوله بالمغربي والعراقي كلمتين گوة تحچيهن

-شكراً على التنمر

-باوع باوع راح نبدي بأول كلمة وهي ازبري گول "ا"

-هههههههههه ازبري ازبري وصلت اتشاقة شييج بس احب اللعب وياچ

-فحطتني عيوني مو لعب وهثة وخر خليني اعدل حجابي طالع شعري

-اني اعدله..

ما فلتني من ايده ومد اصابعه يضم گذلتي نزلت عيوني خجلانة من قربنا ولمساته على وجهي..

-مالك: شعرچ طولان عن قبل

-اي عاجبني اعوفه طويل

-لا حرامات

-ليش؟

-حلو البوي عليچ

-اي كيان ومثرة هم يگولن بث مادري عود اشوف بعدين

-خلينا نرجع مثل قبل جنات

-يعني شلون

-تكونين شريكتي وتشاركيني بكلشي بدون تردد ولا خوف تحچيلي عن يومج بالجامعة وعن شنو اكلتي وشربتي وسويتي ولبستي تمام؟

-تمام

-شركاء؟

مد ايده يصافحني ابتسمت وهزيت راسي بـ اي ورجعت اصافحه..

-جنات: شركاء

-مالك: واخا سولفيلي عن الخطبچ

-اهووووووو وخررر

-يله جنات مو اتفقنا نكون شركاء

-انتَ حيال! تضحك عليَّ بكلمتين وعود احنه شركاء ومادري شنو تريد تثحب لثاني

-اني لو اريد اسحب لسانج اعرف شلون اسحبه

-ليش احث تلميحك وصخ

-علساس تفتهمين بالسوالف الوصخة انتِ انچبي وسكتي

-شبيك انتَ تره كلشيي افتهم لا عبالك!

هز راسه مبتسم تلفت يباوع منا ومنا شاف ماكو احد غيرنا گاعد بالحديقة واكو طلاب كلش بعيدين من عدنا گاعدين جوه شجرة..

-مالك: تعرفين لهاي...

لزم حنچي بأصابعه وبحركة تنافس الضوء من سرعتها نزل وطبع قبلة على شفايفي!! فتحت عيوني مصدومة من حركته والزهرة وگف گلبي وباگ النفس مني صرت اجاهد اسحب الهوا وماكو فايدة..

ضاگ بيه النفس والرجفة دمرتني ماتحملت اكثر استجمعت قوتي ودفعته عني بعدني دا ارفع ايدي اريد اكفخه راشدي اصحي على زمانه وامطره رزايل لزم ايدي يقيدني وگال بنبرة سريعة..

-لا تصيحين ولا تسوين دراما چنتي تستاهليها

-يا عاااار شثويت انتَ شثويت شلون تتجرأ!!

-هاي عقوبتج بكل مرة تتجاوزين وياي

-اتجاوز واتجاوز واللعب بيك طوبة هم!

جفلت من جرني من ايدي ولزمني من راسي وره متت خوف لا يعيدها اني الاولى هدت حيلي وگلبي بعده راح ينفجر انوب يعيدها، وخرت وجهي منه اصيح..

-جنات: لا لا لا اتفقنا لا هذا هو ماحجي بعدد

-الا بالعين الحمرة ياله تمشي

-عابت هالوجه

-تعالي لچ

-والزهرة لاا وام البنين لاا بعد ما اعيدها شبييك

-رائد: جنات؟

دفعت مالك من صدره بقوة ابعده مني و وگفت على حيلي ارجف ولا ارادي ابتعدت من مالك كم خطوة..

-رائد: مالك يا هلاا

-مالك: هلا رائد شلونك

-رائد: بخير شنو هالصدفة الحلوة شجابك لكلية الادارة اجيت تشوف اخوك؟

-مالك: لا اجيت اشوف جنات گلتلي انتَ تدرسها مو صح؟

-رائد: صحيح طالبة متفوقة جنات وحريصة على الدرجة

-جنات: شكراً دكتور

همستها همس ووجهي مشتعل نار بلعت ريگي اللعب بگصبة الازبري مستحية من خطبني لليوم ما التقينا محاضرتين مرت اني اضربهن بس حتى منتواجه..

-رائد: وينچ جنات بعد ما دخلتي محاضراتي؟

-جنات: مو.. مو يعني شثمه..

-مالك: اذا متدخلين محاضراته وين ترحين؟

-جنات: مو اروح ادرث ويه فاهد (چذب طبعاً)

-مالك: ها اي دكتور اعذرنا فاهد يدرسها هالفترة لان عدها صعوبة ببعض المواد

-رائد: ميخالف معذورة بس ليش خو تعاليلي اشرحلچ مو قبل چنتي تطلبين مني؟

بوخت والحروف ضاعت مني باوعت لمالك نظراته كلهن شَك واستفهام منتظر ردة فعلي وجوابي..

-جنات: اثتحيت ازعجك

-رائد: لا ماقبل على هذا الكلام لا تستحين حالچ من حال كل الطلاب تعالي وسألي على أي شي تواجهين بي صعوبة

-جنات: تمام

-رائد: مالك شنو مخططاتك هالايام سوولنا طلعة يمعودين

-مالك: جاي تطلع ويه نور جواد وحيدر مو؟

-اي وكلما اسئلهم عنك يگولون لو مسافر لو شغل ادري شغلك ميخلص انتَ

-بعد هاي الدنيا اشغال.. يله جنة اني رايح أي شي تحتاجي اتصلي بيه

هزيت راسي اي ورائد ابتسم توادعوا ورجع اندار الي يگول بغمزة..

-مالك: صيري حبابة

-جنات: ماالك اشايفني

مالك: حبيبتي الصغيرة

فكيت حلگي من مد ايده يجعص خدودي بين اصابيعه وباس اصابعه، غابت ابتسامة رائد وصار يباوع بيني وبين مالك متفاجئ..

-رائد: انتَ وجنات علاقتكم مبينة قوية

-مالك: ليش نور وحيدر ما گلولك؟

-رائد: شنو يگولون

-مالك: عن التطورات بحياتي

-رائد: اي گالو انتَ تزوجت بنت عمـ... جنات هي بنت عمك الي تزوجتها؟؟؟؟

-مالك: نعم

-واني عبالي...

-عبالك؟

-لا بس اني حچيت ويه جنات وهي ما...

من قوة صدمته بقية الجملة تتبخر ميكملها وباقي صافن عليَّ منتظر مني ابرر يمكن او افهمه، فركت بيدي متوترة وخجلانة ماعندي شي اكوله..

-مالك: اني وجنات متزوجين عزيزي رائد فـ انتَ..

عته من ياخته بتك ايد بس مو بطريقة عنيفة بيّنها كأنها شقى اصدقاء من اردف بأبتسامة الها معنى..

-فـ انتَ لانك صديقي وعزيز عليَّ راح تشيل عيونك عنها هسة و تكمل طريقك لمكتبك الحلو المرتب بدون أي اضرار جانبية

-مالك اداري عصبيتك بس قسماً بالله مادري بيها متزوجة هي ما حچت!

-ادري وهذا الشي شفعلك رائد لا تخاف اني مو همجي بعدني مالك الحباب

حچاهة بأستهزاء واضح عگد حاجبه رائد مستفهم بينما مالك اردف ببرود..

-بس اني كلش مو حباب من تجي الامور لاشياء احبها

ترك ياخته وطبطب على خده بهدوء وباس اصابعه نفس ما سوالي قبل شوية، هز راسه رائد وبدون مناقشة ومرادد عافنا وراح..

-مالك: يعني رائد

-جنات: وروح امي ميدري بيه متزوجتك

-تمام

-مالك ميدري بيه متزوجة شنو يشم گفه ايده؟ ثانياً الرجال ما لح وياي حچاهة مرة وبعد ما عادها لا ركض ورايه ولا ضوجني بالعكث كلش محترم ومؤدب وخلوق و...

-كااافي سكتييي لا تستفزيني زاييد

-هثة شحچيت اني ويعع

-ما تحضريله محاضرة بعد راح يتغير دكتورچ

-لاااا مالك شنو هاااي!!

-ولا كلمة جنات!!

-تره دكتور رائد يفهممم كلش حرام عليك شنو تريدني ارثب!!

-رسبييي

-ماا ارثب مااا

-احطلچ دروس تقوية!

-ليييش وهو خوش دكتور شنو كفرر لان خطبني؟!!

-ايي كفر!! بالنسبة الي كفرر فـ حافظي على روحج وروحه وحطي لسانچ بحلگچ وروحي من يمي!!

-وين اوليي

-لمحاضرتج الجاية!!

-محاضرة دكتور رائد الجاية

-لااا لعد ابقي هنا!

-حرام عليك والكعببة

-سكتي ولچ كااافي

-ما اثكت ماا اثكت

-فاهد: ما اثكت طرطنطرنطرنطرن ما اثكت طرطرطرطرااا

-جنات: فاااهد اجيت والله جاببك

-فاهد: ها گملة شبيچ هاي شنووو مالك هنااا

-مالك: بعد وكت

-فاهد: والله ما انتبهت لوجهك عبالي الگملة جاي تحاچي رائد

-مالك: يعني همه متعوديييين؟؟؟

-فاهد: اي غير دكتورها

-مالك: هذاا الضفددع ما تدخليله محاضرة جناات واذا سمعت ووصلني غافلتيني ودخلتي بدون علمي ورووحها لامي اطلعه من الجامعة كلهاا واكيد انتِ ما تردين تقطعين برزقه!!

-فاهد: وات هابند

-مالك: خاطبهااا

-فاهد: وااااااه؟؟

-جنات: شدعوة شدعووة شنو هالردة الفعل شثوه قابل هو!!

-فاهد: صح مالك شبيك هو شسوه تره جنات محد يدري بيها متزوجة هنا

-مالك: اشششش ولا كلمة انتَ!!

-فاهد: اوڤر

-مالك: فاهد انچب!!

-فاهد: اوقي

-جنات: مالك من الاخير انتَ ميحقلك تتدخل بحياتي فهمت لو لا! الرجال خطب لا تجاوز ولا ثوه شي غلط وانتَ فهمته اني متزوجة خلص مينرادلها كل هالمبالغة!

-فاهد: كلش تروو

-مالك: ولك انتَ ما شفت الطريقة الباوعلها بيها!! اكلها اكل بنظراته من خرررب روح امكك

-فاهد: اهااا هيچ يعني؟

-مالك: لعد شنو؟؟ من الهوا تنرفزت؟!!

-جنات: نظراته عادية بث تره اني حلوة حقه يصفن

-فاهد: شگد اتفق

-مالك: سكتي لا تطلعين صوتيي الطلاب بدت تطلع من محاضراتها!

-مرحبا

قاطع محادثتنا الحادة صوت شخص ما اشوفه هنا بالعادة هذا نشوان اخو كيان! شسالفة اليوم!..

-فاهد: نشوان؟

-نشوان: شلونك فاهد ما توقعت اللگاك هنا

-مالك: ليش انتَ المن جاي؟

-نشوان: اجيت اسأل جنات كيان وين ليش ما تجاوب اتصالاتي؟

-فاهد: موجودة كيان بالكلية مالتها

-نشوان: ماكو لا تجاوب تلفونها ولا موجودة بالقسم

-فاهد: شلون اني جبتها بيدي!

-نشوان: عجزت ادورها مالها اثر رحت لزميلاتها گالو چانت كاعدة وياهم من فترة واختفت بعد محد شافتها اجيت لكلية جنات توقعت الكاهة عندج

-جنات: لا ماكو ما اجتني

-نشوان: وينها!!

-فاهد: دورتها كل مكان؟؟ رحت للحمامات؟؟ للقاعات؟؟ افتريت بالمطعم؟؟؟

-نشوان: كل مكان فريته حتى توقعتها ما مداومة واخر امل بقالي اجي لجنات أسئلها!

-فاهد: وين راحت؟؟؟ بيدي اني بيددي جبتها للجامعة عدها امتحان صعب اليوم!!

-مالك: على كيفكم اكيد موجودة شي مكان هنا يعني وين تروح

-جنات: وين؟؟

-مالك: عدها صديقات بغير اقسام؟ يمكن رايحتلهم؟

-جنات: لا لا صديقاتها كلهن من قثمها

-فاهد: ولك ماالك ويييين راحت كياااان خاااف خطفوهاااا

-نشوان: خطفوها؟؟؟ ليششش ولكم اختي ويييين

-مالك: يمعوين شنو خطفوها مستحيل هالشي چان امن الجامعة بلغوني لو اكو حركة غريبة اني موصيهم عليها وعلى جنات!

-جنات: هارون!! تذكرت هارون يدرث وياهة

بدون تردد طلع فاهد موبايله مرتبك ومتوتر نشوان وگف فوگ راسه يرجف على اخته ومالك يهدأ بيهم.. يدگ فاهد على هارون وذاك ميجاوب بقى يتصل ويتصل ويتصل وهارون ماكو لحدما انغلق جهازه..

-فاهد: خررررررررب

-نشوان: شصار؟؟؟

-فاهد: جهازه انغلق!! يمكن اصلاً ما مداوم اليوم هارون الغبييي

-مالك: على كيفك فاهد اهدأ

-نشوان: يهدأ شنووو اختييي مفقوودة ولللك خاف بيها شييي

-مالك: نشوان اعرفك خايف عليها بس اأكدلك اذا بيها شيي يوصلني خبر لا تخاف

-فاهد: يااا برودك يا ماااالك با برووودك كيااان مختفييية وانتَ تصيح امن جامعة!!

-مالك: راح اتصل بيهم حتى اثبتلكم هالشي!!

فوراً اتصل على الامن ثواني وجاوبوا فتح سبيكر ويحجي وياهم بلغة البلد صرت افتهم شوية وطلع كلامه صح كيان مابيها شي وماكو حركة غريبة صارت بالجامعة بس گالو شي خلت الشياطين تنطط من صدر فاهد وعيونه غيمت من العصبية..

-الامن: طلعت ويه مسيو هارون تقريباً على ساعة بالـ 11 الظهر

بدون لا يتشكر منهم مالك سد الاتصال بوجه الرجال ولحگ فاهد الي صار يركض يطلع من القسم رحنا اني ونشوان وراهم نركض ركض ومنلحگ خطوات فاهد السريعة..

-مالك: فااااهد اوگف خلينااا نفتهمممم

-فاهد: ابنننن الكلببب اني اعرف شلون اربييي هال***** ابن ال******

-مالك: لااا فاهد لا تتهور يمكن صار شي وهو ساعدهاا

ينتر بي وفاهد ماكو قفل ما انطى مجال صعد سيارته وقفل البوب وشخطها يطلعها من كراج الجامعة متوجه لماعرف وين بينما مالك ونشوان صعدوا بسيارته واني رحت وياهم..

-نشوان: هارون منوو؟؟ مو ابن عمكم؟؟

هز راسه مالك وطلع موبايله دگ رقم ونتر بإستعجال..

-تطلعلي موقع هارون حالاً لو چان مدفون بسابع اررض

بقى نشوان يسأل ومتوتر ومالك يطمنه ماكو شي وهارون يدرس وياهة واحتمال طلعوا لمكان حتى يفهمها درس او شي بس هالشي زاد الوضع سوء لان نشوان تخبل وصار يعيط ما راضي وما مقتنع وكبر قلقه على اخته..

دقايق ورجعولنه خبر كيان بالمستشفى! هنا وكأن وگع سگف السيارة على راس نشوان حتى عيونه دمعت المسكين وراد يتصل بأخوانه ومالك منعه لحدما نشوف وضعها ياله نگللهم حتى لا نقلقهم..

وصلنا للمستشفى قبل فاهد ركضنا للردهة الموجودة بيها كيان شفنا هارون واگف گدام باب غرفة ثانيتين وما شفنا غير واحد اجه طاير من ورانه وصل فاهد! هجم على هارون وسفطه براشدي عنيف وبوكسيات قوية واحد وره الثاني ورم وجهه تورم تدخل مالك يريد يفاككهم بس ما گدر عركة حامية صارت ومحد تدخل من الدكاترة والممرضين بالعكس چانو واگفين يتفرجون وكأنهم متعودين على هاي الاجواء وحتى صاحو لمالك بأسمه كأنهم يعرفوا!

مسبات على فشاير على عراك مخيف من اجساد ضخمة جداً متروسة وشوم اخيراً وبعد معاناة مالك طلب مساعدة أمن المستشفى اربعة چتفو فاهد واربعة على هارون ياله گدروا يسيطرون على اجسامهم المنفوخة بالعضلات..

-مالك: فاااهد هاروون كاااافي خلونا نفتهممم شصااير

-هارون: هووو تهجم قبل لا يفتهم شصاااير

-فاهد: اتهجممم واطيييح حظك وانعل **** امك ال****** الفففف مرة گتللللك كياااان لا تتقرب منهااا هارووون وانتَ تعاندني بكللل مرة وترجع عليهااا

-هارون: ما متقربلهااا شبيك مخبل انتَ!!!

-فاهد: مخببببل اي مخخخخبل گتلللك يا صخمووون هارون اذا تقربت من كيااان اكتلك بيدددي وحذرتك الففف مرررة كياااان مااالك شغل بيهااا تشوفها ترووح يمين انتَ تروووح يساااار

-نشوان: كاااافي بلا هالحجي الماصخ اختييي ويننن ليش ما موجودة بهاي الغرفة؟؟؟

-هارون: نقلوها للنسائية

-فاهد: يابن ال****** اشگ ******* شبيهاااااااا شصخمتتتتت هالمرررررة ولكم هدووووني اشرب من دممممه هالعااااار ابن العاااارية

-هارون: غبييي كلشيي ما سويتلها تخربطت بالجامعة وجبتها للمستشفى وبسس اني شيخصني!!

-فاهد: اكييييد الك ايد بالموضوع اعرفك واحد **** وحقييير وخسيسسس

-هارون: يا **** صديقك اني وابن عممك هيج تفكرر بيه يا زبااالة

-مالك: فاهد هاروون انلصموا صوتكم ما اسمعه بعدد

عافنا نشوان وركض على ردهة النسائية واني وراه مالك والباقين ما اجو لان اللتهوا بالعركة وفاهد مُصر يريد يطيح حظ هارون ويكتله لحدما يموت..

نمشي ونسأل على النسائية لحدما لگيناهة، سألنا على اسم كيان وگالو داخلة عند الدكتورة راد نشوان يدخل ما قبلوا توسل بيهم يدخلوا وعاندت السكرتيرة وياه.. بينما هو يحجي وياهة شفت ازبل واتفه وابشع انسان يطلع من غرفتها! شفت شمسون!

-نشوان: عمي شمسون!!

-شمسون: هاي شنو نشوان هنا

-نشوان: شتسوي عند الدكتورة؟؟ كيان جوه!

-شمسون: قلقت على چنتي واجيت ازورها والحلو طلعت الدكتورة عرف وطمنتني عليها

-نشوان: شبيها؟؟

-شمسون: المسكينة صايرة عركة بينها وبين صديقتها مروة بالجامعة ومروة الحقيرة ضاربتها على مكان رحمها

-نشوان: مرووة؟؟؟ مستححيل مروة صديقة كيان المقربة!!

-شمسون: انصدمت نفس صدمتك واكثر بس مروة بنفسها حچتلي هالشي حتى هي ما سلمت من العركة وايدها مكسورة موجودة بقسم الكسور خليني اروح اتطمن عليها.. اوه لا ماكو داعي اروح هاي اجت

فعلاً اجت مروة صديقة كيان ايدها مجبسة وملفوفة وعيونها صايرات دم من البچي باوعت لشمسون بخوف وهمست..

-مروة: اسفة

-شمسون: زعلانين عليج مروة والاسف ميفيدج بشي

-مروة: والله بعد ما اعيدها والله

-نشوان: شلوون تضربين اختي انتِ؟؟ مو صديقتها المقرربة وكيان خابصتنا بيج مروة صديقتي العراقية الكول والكول تالي هيج تجازيها!!

-شمسون: عوفها نشوان هي تعاقبت كفاية اليوم كيان كاسرة ايدها

بچت بقوة لازمة ايدها وتنوح رفعلها تك حاجب شمسون وباوعلها صفح، ضحك مستهزأ واشرلها تروح منا استجابت فوراً وراحت وصوت بچيها العالي ملى الممرات..

-نشوان: أريد افوت اشوفها!

-شمسون: اي تعال

دخلنا لغرفة الدكتورة كيان نايمة على السدية والدكتورة تكتبلها علاج، سلم عليها نشوان وحضنها وبوسها هواي ومطرها بالاسئلة شلون صارت العركة وليش وشلون بدت وكيان شلونه وضعها ووو..

-كيان: اني زينة شوشو الدكتورة گالت بس احتاج راحة

-نشوان: ما گالت شبيچ؟؟

-كيان: تمزق دموي صاير ببطني والدكتورة گالت احتاج راحة على الاقل 48 ساعة

-نشوان: الضربة گال شمسون صارت على الرحم كيان شنو وضعج؟ وهل راح يأثر هالشي على مستقبلچ؟؟

صار وجهها احمر خجلانة هزت راسه بطريقة ماعرف اندار نشوان للدكتورة يسألها عن حالة كيان وافتهمت كم كلمة منها تگول هالشي مو واضح ومو اكيد اذا يأثر على نسبة حملها بالمستقبل لان رحمها متضرر وسببلها نزف بس ان شاء الله مابيها شي بعد الـ 48 ساعة اذا ما تحسن وضعها على العلاجات راح يحتاجون تدخل جراحي وهالشي يأثر عليها وعلى مستقبلها كـ ام..

متت خوف عليها وماشوف غير الدموع تصب من عيون كيان وتمسح بيهن وما ملحگة طلعناها من الدكتورة تبچي الم وخوف من كلام الدكتورة، وديناها لغرفتها الخاصة شوية ودخلوا مالك وفاهد وجهه ازرگ ورگبته مزلغة وطالع دم..

-فاهد: كوري..

نطق اسمها وسرعان ما ركض بأتجاهها وحضنها بقوة، بادلته الحضن تبچي وتصرخ بالبچي انخبص وياهة خايف ومن يريد يوخرها عنه حتى يسألها متقبل وتبقى تبچي...

طلعنا مالك ونشوان ما قبل يعوف اخته صار يبچي وياهة ويمسح على راسها يريد يسكتها بس ديبچيها بالزايد بسبب حنيته گوة طلعناه ويانه بس حتى ترتاح وفاهد يفتهم سالفتها شنو..

**

"كيان"
عايشة بوسط كابوس صار حلم ارجع لحياتي القديمة حياتي ويه اخواني وماريا حياتي بعيداً عن شمسون وضيمه.. ما حسيت على شي غير هارون يشيلني ويدخلني سيارته من الالم اغيب عن الوعي وارجع اصحى اغيب وارجع اصحى لحدما دخلوني لغرفة الدكتورة النسائية وصدمتني بالخبر..

تعاسة! احس بالتعاسة والظلام استحوذ على حياتي طلع الكل من الغرفة يعوفوني ويه فاهد بس ماكدر اوخر من حضنه احتاج ابجي اريد ابجي وافرغ شكو ضيم وقهر دا احس بي تعبتتت..

-فاهد: كوري حاچيني شصايرر ولچ احچيي وگفتي گلبيي

-بطني.. بطني

-شبيها؟؟؟

-الدكتورة تگول.. تـ.. تگول اذا ما صرت زينة.. خلال يومين يمكن ماكدر اصير ام بحياتي

وخرني عنه فاتح عيونه مصدوم اخذله دقايق هو صامت ورجع يحضني على كيف هالمرة ويمسح على شعري بلطف يسمحلي ابچي على صدره وارتاح، گعد على السرير بجانبي وبقينا على هالحال اليائس لفترة قبل لا يگول..

-كافي كوري والله تگطع گلبي

-فاهد اني حزيننة فاااهد

-لا تحزنين كوريتي لا تزعلين والله ازعل وياچ

-احس الدنيا طلعت من عيني اني تعباانة اريد حياتي القديمة تعبت والله

-شنو صار وياچ سولفيلي

-ماريد احجي شي بس ابقى يمي

-ابقى اكيد راح ابقى

-گلبي يوجعني اريد اصير امم

-تصيرين عيني انتِ تصيرين لا تخافين

-اخاف ما اصير

-تصيرين صدگيني راح يجوچ كوريين صغار يشبهوچ ويشبهون گلبچ الحلو

-واذا ما صرت شلون

وخرني عنه وحاوط وجهي بكفوف ايده، مسح دموعي الغاسلة خدودي بأبهامه وباس طرف انفي وهمس بيناتنا..

-تفائلي كيان ابقي ايجابية مثلما تعودت عليج

-اني تعيسة ماگدر اتفائل

-لا تبچين كوريتي بالعباس راح ابچي وياچ

-اريد اخواني

-نروحلهم كل يوم

-اريد اعيش يمهم اريدهم

-ميخالف نعيش يمهم

-انتَ شكو ماريددك

-انچبي رجلي على رجلچ

-ولي ماريدك اريد اخلص منك

-تاكلين تبنن وروح امي ما اتنازل عنج

-هئئئي هئئئي

-اول مرة اشوف واحد هيچ يبچي هاي ام العوافي جايتچ مو بچية

-فاااهد اسكت راح اموت من القهر مو وكت تحشيشاتك

-على شنو تموتين من القهر يمعودة الج خلگ حمل وولادة

-فاااهد مدا تسااعد ابددد

-شبيچ احجي صدگ انوب يجون ميشبهوچ وماخذين كل صفات ابوهم الخايسة حرامات بيهم الحمل تسع اشهر

-هئئئي هئئئئي

-اجيبلچ ماي بلكت تروح؟

-فاهد روح عني

-كورية اني اسف

-على شنو

-اسف لانچ حزينة وما جاي اعرف اواسيچ

نزلت دموع جديدة تدمرت گلبي معصور ونار مشتعلة بيه ما جاي تطفى بس رغم وضعي السيء كلامه اثر بيه وخلاني ابتسم وحطيت ايدي فوگ ايده المحاوطة خدي..

-وجودك كافي

-راح اواسيچ بطريقتي واصير حباب لمدة يوم هذا الطلع بيدي

-كيان: صير حباب لمدة اسبوع

-فاهد: يوم!

-كيان: اسبوع!

-فاهد: اربعة ايام!

-كيان: خمسة!

-فاهد: يومين!

-تمام

-يله مسحي الدموع والخنينة ولا تخافين راح تصيرين ام وبطنچ توصل لحلگج ويطلعلج تشققات الحمل ويخرب جسمج الحلو ويصير عندج تساقط شعر وراح تضطرين تگصي و...

-انتَ شمعرفك بكل هاي التفاصيل!

-شنو هنه؟

-اعراض الحمل؟؟

-مو صاحباتي صارن حوامل وبشرني بالخبر واني تعرفيني فضولي سألتهن على الاعراض من باب توسعة معلوماتي

-ايييع دوخر

-ههههههههههههههههههههه كورية انتِ نمبرر وان بالعباس

جعصني بحضن قوي خنگني، ضحكت على خباله هالرجال ميكدر يكون طبيعي لمدة ساعة شلون وهو يريد يبقى يومين حباب..

-فاهد: اذا فدمرة ما صار حمل تگدرين تتبنين كوري صغيرون

-اهووووو فاهد

-والله الا اتبنى كوري واربي اذا جهالي ما طلعوا كوريين

-خلي حمرتك تجيبلك حمر وعوف الكوريين الي

رخى حضنه القوي ووگعت اكتافه المشدودة، استغربت من وخرني عنه وسند ظهره على الچرباية وابتسامته وضحكته اختفت..

-شبيك

-مابيه شي

-ليش زعلت فجأة؟

-ماكو شي تعالي

سحبني يگعدني بصفه وخلاني احط راسي على صدره وامد رجليه على السرير، ما فكرت زايد بوضعه حالتي تعيسة كفاية وخليني ملتهية بضيمي هسة، رجعت ابچي بالخنسة ودموعي تصب..

-فاهد: لا تبچين كافي

-مدا ابچي

-لا تچذبين لا اهفچ بالمزهرية

-ما ابچي شبييك

-اي مو هاي خنينة امي النزلت على قميصي

-عززا فاهد حرام علييك

-دمسحي مسحي

-فاهد تره وضعي صعب على كيفك ويايه

-تدرين اني فرحت بوضعچ!!

-يا حقيير لييش!!

-اذا ميصير عندچ جهال معناها ما راح تتزوجين بعد وراح تبقين يمي

-يا نذل على هالانانية!

-يجوز اني اناني اي بس ما اتخيلچ تروحين وتعوفيني كوري

-بس اني مو اكيد ما اجيب اطفال على كيفك لا تتحمس

-حتى لو تجيبين لا تعوفيني

-وشلون ما اصير ام اظل مگابلتك وگاعدة؟

-انطيچ اطفال

-لا بله

-والله نسوي اطفال عادي ونربيهم سوه

-فاهد انتَ مستوعب كلامك؟

-اي

-سد الموضوع فاهد!

وهاي اول مرة يستجيب لشي طلبته منه بدون لا يشلع گلبي وفعلاً يسد الموضوع، انقهرت مستعد يقدملي أي شي وكلشي بس حتى نبقى سوه ومستخسر وخايف يگول احبچ! لانه اصلاً ميحبني عليمن اضحك هو متعلق بعطفي وحناني واسلوبي وياه ويريدني ابقى علمود ميفقدهن مو حباً بيه!

-كوري بعد ماتحمل راح اعترف

-يله يا الله

-هاي اول مرة اصبر لهدرجة بحياتي بعد ماعندي طاقة تحمل

-اي ولك اييي احچي

-شصار وياچ وشلون اجيتي للمستشفى وشلون وصلتي وهارون شدخله؟؟؟

-هذا اعترافك

-اي

-سليمة تطمني وتخلصني ان شاء الله

-ديلا كوري احچي وفضيها

تنهدت مأيسة وبديت احچيله القصة الچذبية الي جبرنا شمسون نألفها اني ومروة علساس تعاركنا هي ضربتني بالاول واني من عصبيتي كسرت ايدها.. شمسون النذل جابها للمستشفى غصباً عليها وبالفعل كسر ايدها رگعها بالحايط هشمها وخلى صريخها يوصل لسابع جار..

-فاهد: كسرتي ايدها!! ولچ كفوووو كفووو كفووو كفووووووو هاي كوريتيي النچررة

-امم

-شلون كسرتيها؟

-رگعتها بالحايط

-عفيييية

-وره ما خلصت العركة وفاككونا وگعت غشيانة والظاهر صديقاتي موصلات الخبر لهارون

-هنه وينهن صديقاتج ولا وحدة لگيناهة هناك

-اجن ورانه للمستشفى ليش ما شفتوهن بره؟

-صح شفت بنات ثنين واگفات مثل المجديات بس ما توقعتهن صديقاتج

-فااهد لا تستهزأ بصديقاتي!!

-بله عليج عيديلي العركة من جديد تحمست وعجبتني كوري الشرسة

-امداهة كوريتك الشرسة..

عدتله العركة الچذبية من جديد شوية ورخصونا للبيت سودة عليَّ لگيت نشوان بعده بالباب وجنات هم وهارون ومالك، عبر فاهد من هارون يخزر بي وذاك يفر بيده..

هارون اجه يحجي ويايه بالجامعة حتى ياخذ الباركود مني حچالي قبل لا يوصلون فاهد والباقين توقعته البارحة عافني وراح بذاك المكان، عاتبته وتعاركت وياه رغم وضعي السيء بس اكدلي هو الي دفع للحماية الي هربني وهو السبب بأطلاق النار الصار وچانت خطة منه حتى اطلع من الغرفة بسرعة ويلتهون بصوت الرصاص والخبصة وهو يفوت يكمل شغلهم..

طبعاً شمسون افتهم بـ مسرة اجتني وللعجب ما اهتم ولا حتى انزعج من الخوف بررتله ان چذبت عليها وما حچيتلها شي ابتسم ابتسامة حقيرة وگلي بالضبط "بيچ بخت" وهيچ عافني وراح بدون لا يضوجني بكلامه..

رجعت للبيت وبوجهي للغرفة فاهد اصر يشيلني ويصعدني الدرج ابتسمت ولفيت ايدي حول رگبته بس شاف شُهيب يطلع من غرفة ماريا باسني على خدي بقوة ويگول..

-افييييش فراولة وكرزز وحلوياات

-شُهيب: شصاير؟؟ شبيها كيان؟ نشوان شصاير!!

-نشوان: تعال افهمك كلشي

نزل ويه نشوان بعدما اجه يتطمن عليَّ وبوسني وسألني اذا محتاجة شي او متألمة بعده ميعرف شصاير وانخبص ويرجف عليَّ رجيف ابتسمت وبست خده اطمنه اني بخير مسح على شعري وراد يبوس راسي وفاهد ركض بيه للغرفة يصيح..

-كااااافي خلصتهااا هو شبعععع

-كيان: لتصير ماصخ رجعني خلي يبوسني

-فاهد: وليي مكيفة على التمطگ

-فاهد لا تترعن اخوية تره!!

-مو اخوووچ مو اخووچ استوعبي هالفكرة هذا العار اخوية يصير!

-اخوية وابوية وغصباً عنك انتَ بس تغار منه!

-اي اغار وانچبي تردين اخ؟ اعتبريني اخوچ تردين اب؟ اعتبريني ابوچ؟؟ تردين حبيب ولطام بعينچ اعتبريني حبيبچ ولطام بعينچ خووش؟؟

-تحلم تصير حبيبي

-طايح بيدج اصير حبيبج

-نومني على الچرباية نومني

-اي تدللين

شمرني شمر على الچرباية صرخت مخترعة ومتألمة من قوة الشمرة حتى الچرباية طگت وانكسرت شوية وتوگع بيه..

-فاهد: چرباية فاشلة

-انتَ الفااشل هاي ذكرى من ابوية!!

-الله يرحمه على هالذوق الخايس

-احلى من ذوقك المعفن ابو الحمراات

-اشش اششش لا تزعجيني وانطمري يله

-انتَ انطمر!!

-خوش

شمر روحه على الچرباية بكل قوته وهالمرة صرختي مو لان الچرباية طگت لااا الچرباية انكسرت بينا ووگعنا بالگاع!

-چرباااااايتييييييي

-فاهد: هههههههههههههههههههههههههههههههه

-ولللك كسرت چربايتي يا مخببل يا مسوودن يا تااافه

-هههههههههههههه والله نومة الگاع اريح شنو هاي چرباية الباربيات منيمتنا عليها

-متعجبك؟؟ ارجع لبيتك اصلاً راح نتطلگ واعيش هنا يم ماريا!!

-اني هم اريد اعيش يم ماريا

-امشي للك ماكو روح لبيتك

-شعليج انتِ والله حلوة هاي تطرديني من بيت حبيبة ابوية السابقة؟!

-فاهد ماريدك نفسيتي تعبانة واحتاج ارتاح منك

-اني اعرف شلون اريحها

-لا تكمممل اششش قسماً بالله اعيط واللم الدنيا اخلي اخواني يجون يصلخوك صلخخخ

-دطيري يگدرولي اخوانچ عساس

تنهدت تعبانة ماگدر احچي زايد واخيراً سكت من اندگت الباب علينا، گام يفتحها وشفت مروان وصبا جايين وبيدهم بوكيه ورد شكبره..

-مروان: حبيبتي كيان شبيچ شصار؟؟

-صبا: كيانووو شبيها حمااتي الجميلة الاميرة الصاكة الحاتة بت الحات اخت الحات عمت عيناااااااييي

-فاهد: بعد بعد صبغي

-صبا: شبيك مو ختچيبي هنا لازم اتلوگ لاخته گدامه

-كيان: ههههه هلو مروان هلو صبا اني بخير لتخافون

-مروان: وگعتي گلوبنا شصار بابا احچي

-صبا: اوگفو قبل لا تحچي شبيها الچرباية ليش واگعة بالگاع؟

-كيان: هذا المتوحش كسرها

-مروان: عوفي الچرباية احچيلي الصار

بديت اعيد وازيد بنفس القصة وفاهد يتحمس بكل مرة اعيدها ويصيح كفوو وكفوو وتعجبني وتربيتي وماعرف شنو، دقايق ورجعت اندگت الباب وهالمرة ظهرت منه مسرة شعرها السرح شوية منفوش وبعيونها النوم مبينة چانت نايمة..

-مسرة: كياان شبيچ شصاير؟؟

-صبا: سرووووووورررر

-مسرة: صباااااااااوووي

-صبا: ولچ الج وحشششة اليوم بالشركة لييش ما اجيتي يا عوبة العوباات

-مسرة: سكري معلگ خرب حظي

-صبا: الله ياخذه هالخـ... هالخوخ شگد لطيف

-فاهد: ردتي تگولين خ** لو اني غلطان؟

-مروان: غلطان!

-صبا: اكيد غلطان اني ما أتلفظ هاي الالفاظ البذيئة فاهد عفتهن الك انتَ وراسك المجعمر

-فاهد: تهينيني وانتِ طابة غرفتيي؟؟؟

-مروان: غرفة كيان هاي

-فاهد: وكيان مرتي على عناادك

-مروان: استغفر الله يااااااااارب الصبر

-مسرة: ولج كنوو احجي شصاير وگف گلبي من اجتني جنات تسولفلي

رجعت اريد اعيد بالقصة ودخلو نشوان وشُهيب ومالك وجنات والعلوية وفيروز الغرفة العلوية صارت تضرب على خدودها وتصيح..

-عمت عينييييي خايبة شمالچ شصاار بالعباس عين ما صلت على النبي والزهرة ام الحسن خايبات ما تلبسن حجاب وتضمن هالشعف التجيب التايه تفوووو عليچن

-جنات: اوگفي علوية هاي شبيها الچرباية؟

-فاهد: اني كسرتها

-العلوية: عبنك عاار گوم لا تشوفني چهرتك السزز شمصخم بمريتك شوف الوجه شلون اصفر اكيد من ضيمك البت راح تمووت

-كيان: والله صح علوية

-جنات: فاهد احچيلنا شلون كثرت الچرباية بالضبط؟

-فاهد: لا احس عيب شوية القصة بيها سفالة

-نشوان: احترم نفسسك!!

-فاهد: هلو نشوان

-نشوان: هلو فاهد

-فاهد: اگلك ليش منطلع شي يوم احس راح نكون اصدقاء مقربين

-نشوان: ميخالف عود نجرب

-فاهد: شنو رأيك باچر ماطول جدولي فارغ؟

-نشوان: ماشي خليني اشوف فاضل بلكت يجي ويانه

-فاهد: اييي اهم شي هذا فد احبه والله خوش رجال

-نشوان: تمام

-فاهد: نرجع على الچرباية اي بيها سوالف عيب تنحجي هاي خصوصيات متزوجين خصوصاً يعني احم اختكم مرتي

-شُهيب: اني هذا البني ادم ما أطيقه اسكتت!!

-مروان: چننك مشتهي كتلة؟؟

-فاهد: تصدگ والله جلدي يحكني منا كوري حكيلي ظهري حبابة

يأشرلي على وسط ظهره، گلبت عيوني ورفعت قميصه شوية وگعدت احكله المكان يمكن گارصته دودة او حشرة لان صاير احمر..

-كيان: ولك هاي يمكن مگروص انتَ

-فاهد: هاي اكيد انتِ ادري بيچ متجوزين من سوالفج السخيفة

-والله مو اني شبييك

-حتى لو مو انتِ هم اذب اللوم عليچ حكي وسكتي

-ولك اووي فاهد صايرة حمرة هاي كلش

-شو هاچ اخذيلها صورة وراويني

انطاني تلفونه صورتله واخواني وكل الواگفين صافنين علينا وفاكين حلوگهم من كثر عيشي ويه هالمسودن خبلني وصرت انسى الشغلات المخبلة تبقى مخبلة بنظر الناس مو شي عادي مثلما دا اشوفهن اني وره ما تزوجت فاهد..

-كيان: احم اگعد بعدين اصورها

-فاهد: ها يعني نرجع على موضوع الچرباية اي ماطول لحيتو راح اشرحلكم تفاصيل..

-العلوية: انچعمم سد حلگك خلي البت تسولف الصار وياهة

-ماريا: هلووو شلونكم شگد حلو هاي كلكم هنااا

-شُهيب: يمة ليش گمتي انتِ مو مريضة؟

-ماريا: اي بس سمعت صوت عالي اجيت اشوف شصاير

-صبا: خالة عمت عينيي ان شاء الله اخت ختچيبي وحبيبي مروان الي تصير حماتي الي اسمها كيان ااااوووف سودة بوجههي اوووف ولج خالة لو تعرفين شصار بيها ولج ماريا قلبي يتمزق اوووووف

-مسرة: احم بالغتي شوية

-صبا: اني هم حسيت مروان بالغت لو لا؟

-مروان: ما اشوف مبالغة اني

-صبا: ولك يمة فدوة لوجهك يرحون زلم الدنيا

-مسرة: انچبي هاي مالتي!

-صبا: شبيچ حبي لازم نتشارك احنه متزوجين اخوان

-مالك: احنه شعلينا ونروح فدوة لوجه مروان!

-صبا: رجاءاً مسيو مالك اذا ردت زواجك ينجح ويتم دلع زوجتك وچذب عليها شوية حياتك تصير لوووز

-مروان: يعني انتِ تچذبين عليَّ؟!!

-صبا: لا وراااس مسرة

-مسرة: اااايييي راسي شُهيب اللحگني ضربني صداااع

ضحكت ضحك نسيت بي همي والموضوع كله سولفتلهم الصار وهالمرة حتى مروان كيّف على القصة وشجعني اذا احد ضوجني ما انطي مجال واكسر راسه مو بس ايده..

هاي اللمة من العمر والضحك والتحشيش صار بفلس والكل چان منسجم احلى انسجام مالك وشُهيب حچو هوووايه ويه بعض وچانو فرحانين بالمحادثة البيناتهم اصلاً شفت شخصية جديدة من شُهيب ما ظهرها بس ويه مالك وشفت مسرة مركزة بي ومبتسمة وكأنها دتشوف لوحة فنية گدامها مو رجال طبيعي..

-مالك: لا تچذب شُهيب العلوية شاهدة

-العلوية: اي بعلي حچي مَلك صحيح

-شُهيب: علوية لو مالك يگول فراش كيان الوردي اسود هم تگولين حچيه صحيح!

-العلوية: هاا فراشها وردي؟ چا انه ليش اشوفه اسود معناها انتو غلط ومالك صح

-مالك: هههههههه علوية فراش كيان صدگ وردي

-العلوية: اي يما حچيك صح

-فاهد: خلص لا لازم نسمع الحقيقة، علوية احچي حق الله مو انتِ صايمة مصلية حاجة بيت الله و من نسل رسول الله منو شب اسرع وبينت عليه ملامح الرجولة بوقت المراهقة شُهيب لو مالك؟

-العلوية: مالك

-شُهيب: علوية!!

-العلوية: اي يما مااگدر انطي بي ماااگدر عود انتم عكسوهاا

-مالك: علوية اني اطول من شُهيب معناها اني شبيت اسرع!

-العلوية: بعلي صح

-شُهيب: تره احنه نفس الطول!!

-العلوية: چا انه ليش اشوفن مَلك اطول؟

-فاهد: علوية تحتاجين نظارات جديدة مالك وشُهيب نفس الطول همه وابوية بس اني القزم بيناتهم

-جنات: بث انتَ مو قزم

-فاهد: شكراً جنات على مراعاة مشاعري

-كيان: الله فاااااااااهد

صفن شوية ممستوعب والكل صفن يباوعلي، فجأة فتح عيونه وگال بفرحة..

-فاهد: ولچ ايييييييي شفتيني؟؟؟

-كيان: شفتتتك شفتتتك

-جنات: شثالفة

-فاهد: تشكرت منج بمكان يستحق شكر!! ولچ كوري طگيهاا دروسچ ما راحت **** بالشط

-مروان: لا انتَ مستحيل!

-نشوان: اشفتي منه كيان وتزوجتي اشفتييي

-كيان: معليك بيهم فاهد اني فخورة بيك عفية استمر على هذا الوضع

-فاهد: صار

ابتسمت على فرحته وكأنه مسوي انجاز، راحت عيني على مالك مبتسم وصافن علينا اما شُهيب يكابر ميبتسم ويبين فرحته بفرحة فاهد الغريبة بس شفت عيونه تضحك يبقى اخوه ويبقى يحبه لو مهما يكابر ويچذب على روحه ذولة الاخوان واحد يحب الثاني بطريقة مختلفة متظهر بشكل سطحي حبهم يحتاجله دراسة عميقة..

**

"مسرة"
عفت الاجواء الحلوة فوگ بغرفة كيان ونزلت اجيب ضيافة للكل ما مسويتها بحياتي بس ليش لا خليني اجرب اكيد الموضوع مو صعب.. فتحت الثلاجة شفت بيها براونيز جاهز مشتري من بره طلعته وحطيته بماعون حلو مال ضيافة وطلعت صينية وحطيت بيها فناجين القهوة وانتظرت القهوة لحدما تفور شوية..

-ام بيت صايرة

اللتفتت بسرعة على صوت شُهيب واگف بباب المطبخ ساند جسمه عليها ومكتف ايده ومبتسم، بادلته ابتسامة وانطيته ظهري اكمل..

-مسرة: حبيت الموضوع

-ها يعني بالايام الجاية راح نضوگ طبخچ؟

بقيت مستمرة اخوط القهوة وحسيت بي يتقدم ويوگف ورايه، كبرت ابتسامتي وگلت بهدوء..

-مو لهدرجة

-ليش الموضوع حلو وبسيط

-عود اشوف

-مسرة

-امم

-انداريلي شوية

-بس اكمل الگهوة

-عوفيها وانداريلي

-مو خاف تفور

مد ايده للطباخ طفاه ولزمني من زندي يديرني عليه يواجهنا، بقى يتأمل عيوني ثواني وذب حسرة يهز براسه نافي فكرة براسه..

-شبيچ مسرة

-سكري صاعد

-ادري بس ليش صعد شنو صاير؟ احد مضوجچ؟ سمعتي شي زعجچ؟ احد سمعچ حچاية؟ شاركيني خليني ارتاح

-لا شُهيب محد مضوحني

رجعت اندار للطباخ فتحته وانطيته ظهري، ذب حسرة اقوى هالمرة وگال والجزع مالي اوتاره الصوتية..

-ليش تتهربين مني؟

-ما متهربة بس تعبانة شهوبي

حاوطني من وره وسند حنچه على راسي، غمضت عيوني متألمة اني چذابة اني مو بخير وتعبانة من الداخل دا اتگطع تگطع بس ماعندي احد اشاركه.. من بعد محادثتي ويه مالك البارحة وضعي كله انگلب حتى شُهيب صرت ماگدر اباوع بوجهه اخاف عليه من عيوني مدا اتخيله غير سابح بدمه بسببي..

-تعرفين تگدرين تشاركيني بأي شي يزعجچ حبيبتي

-ادري

-اني بظهرچ

-اعرف بهذا الشي

-ما اسمح لاحد يقلق راحتچ ويزعلچ

-اعرف

-ماطولچ يمي محد يگدر يلمسچ بسوء مسراتي

-صحيح

-ماريد اضغط عليج اكثر راح انتظرچ لحدما تكونين جاهزة

-شكراً شُهيب

-شعندي غيرچ

همسها وباس خدي وهو لسه بظهري، ابتسمت تك خد ورفعتله راسي نزل راسه الي مبتسم على ابتسامتي..

-مسرة: عندك امك وكيان ومروان ونشوان وفاضل ومالك وفاهد وموظفين الشركة و..

-ماكو احد اهم منچ

غابت ابتسامتي چنت احچي بلغتي السخرية بس ما جاوبني بنفس اللغة هالمرة حچى بجدية جدية لدرجة كمل بنفس النبرة الهادئة..

-اني مستعد اموت علمودچ

-لا تگول هيچ حباب اتأذه

-مو قصدي اأذيچ بس لازم تعرفين بهذا الشي مهما صار اعرفي وتأكدي ما راح يجي يوم واتخلى عنچ لو يحطون سچينة على رگبتي ويگلولي اختار لو حياتك لو مسرة وحبها راح يكون السبب بموتك وهلاكك راح اختار مسرة بكل مرة

ما گدرت اسيطر على دموعي اكثر وما ردته يشوفني ابچي انداريتله وحضنته من رگبته ودفنت وجهي هناك وبچيت بالسكتة دموعي حارة بحرارة روحي تچوي گلبي وتنزل على جروحي..

-شُهيب: لا تخلين احد يلعب بعقلچ ويكون السبب بفراقنا لا تضعفين ولا تفضلين احد على نفسچ حتى لو چان اني اختاري راحتچ بكل مرة ولا تفكرين بشي غيرها

-شُهيب كافي

-لو موتي السبب الراح يخليچ مرتاحة وتكملين حياتچ بسعادة اختاريه ولا تترددين اني راضي ومقتنع بكلشي يطلع منچ.. المُر منچ اشوفه حلو مسرة لو وكلتيني حنظل راح اضوگ طعمه كرز

-ولك كااافي كااافييي

من لا وعي صرت اضرب على ظهره حتى يسكت وابچي وجسمي يهتز من رجفة حبس بكائي، بچيت بصوت عالي ميتة قهر كأنه يقرا افكاري شُهيب ذكي ويلگف الشغلة وهي طايرة وحاس بيه اعرف شي وخايفة لان كلامه ما اجه من عبث..

وخرني عنه يريد يشوف وجهي ما سمحتله دفنت وجهي بصدره اكره احد يشوفني ابچي وضعيفة طول عمري ابوية معلمني ما ابچي گدام احد وما انطي نقطة ضعف حتى محد يستغلني.. بقيت على هاي الوگفة فترة لحدما سكتت روحي ودموعي گوة مسحت وجهي بأصابعي ورفعت عيوني اله..

-شُهيب: حلوة وانتِ تبچين

-اعتبر نفسك ما شفت هالشي

-صار بس تبقين حلوة

-ادري فديتني

-الكهوة فارت واستلگ ابو ابوها

-ادري وطبعاً انتَ السبب بهالشي انتَ السبب بتعاستي شُهيب اطلع من حياتي يا تعيس

-ما اطلع

ضحكت ودفعته عني اعيد الگهوة باس راسي ووگف يساعدني ما قبلت ردته يكمل گعدته ويه اخوانه ويتونس وياهم شفته سعيد ومستمتع واحب اشوف الاحبه سعيد..

-شُهيب: مو تذلينا بعدين بالگهوة

-لا شُهيب شسالفة اظل بس سنة احچي بيها

-ليش يابة

-لاني مسرة قيثارة حبيبي

ضحك بصوت عالي وباسني ما قبلت ووخرته اكمل شغلي بقى واگف ميقبل يروح يريد يبقى يمي الا طردته ياله عافني.. كملت الگهوة وطلعت بعد نوع كيك وحلويات من الثلاجة وسفطتهم بمواعين وابتسامتي من الاذن للاذن..

-صبا: الله حيووو الچناين المعدلة

-مسرة: هلا هلا بمرت حمايه

-ولچ اووووي سرور تتذكرين شگد چنه نتمنى نتزوج اخوان ونعيش ببيت واحد؟؟

-والله حتى اني تذكرتنا قبل وسولفت لـ شُهيب بوكتها

-الحمدلله، مسرة وجهچ صح تعبان اليوم بس صايرة تخبلين مبينة عاشگة

-هل يظهر على وجهي كم انا حبيبة احدهم؟

-كلللش وجهچ حلو حلوو يفتح النفس ما شاء الله

-حُب شُهيب المحليني صباوي

-يا روحيي لهدرجة تحبي سرور

-ماريد احچي سكتي هسة تگولين عني مخبلة

-لا ماگول لان انتِ اصلاً مخبلة يله احچي

-احبه صبا اعشقه لدرجة گلبي مدا يتحمل كل هالحب اتعب وما ارتاح اله عنده حتى لو بس اشوفه من بعيد عندي كافي

-يمة گلبي

-بيه واهس الليل اظل صافنة عليه لحدما اغفى.. اتأمل رسمة عيونه وانفه وشفايفه ولحيته اوقات توصل بيه حتى رموشه احسبهن وهو نايم تخيلي

-هههههه يا ملعونة وهو يعرف تحبي لهدرجة؟

-لا ماگدر احچيله هالشي اخاف

-من شنو؟

-اخاف نفترق شي يوم اعرفه يحبني وماريده يتألم من يعرف ابادله نفس مشاعر الحب تدرين شُهيب لحد الان يتردد من يكون ويايه يخاف لا يضغط عليَّ زايد لا افلت من ايده واروح دائماً حريص بأختيار كلماته ويراعي مشاعري ويتخبل لو شافني زعلانة او ضايجة من شي وحتى من اغلط! تدرين من اغلط ميواجهني!

-لعد شلون تعرفين بروحچ غلطانة؟

-بس يسكت ويهدأ اكثر من المعتاد اعرفه زعلان وبكل مرة اكتشف زعله بوقت قصير وهالشي اعتبره انجاز بالنسبة لشخص مثل شُهيب لان هو من الاساس هادئ

-مسرة حبي وانحبي وعيشي حياتج وعوفي الخوف على جهة لا تخلين الخوف والتردد يسيطر على علاقتكم خلي المي يمشي بمجاريه لا تعيقين حركته

-ان شاء الله

-يله يمعودة راح نطلع متجيبون الضيافة؟

-تدللون شيلي الگهوة واني اجيب الباقي

-ماشي حب

صعدنا الضيافة ورتبناها على طاولة صغيرة بغرفة كيان لان ما قبلت ننزل بالصالة ورادت الكل يبقى يمها.. دورت على شُهيب بعيوني ماكو سألت عنه ماريا گالت راح للغرفة مالتنا يجيب شي..

طلعت اشوفه الباب عايفه مفتوح واستوقفني منظرة واگف وبيده شي.. بسرعة وگفت على جهة من الباب ماريد ابين وحطيت ايدي على گلبي وعيني تراقب حركته ورخاوة اكتافه وخذلانه وملامح الزعل الي انرسمت على وجهه، ذب حسرة قوية وحرك راسه نافي ومأيس، شُهيب شايل بيده شريط حبوب منع الحمل مالتي!

بدون لا يسوي شي رجع الشريط بمكانه بالمجر وبقى على هدوئه بس گلبي وجعني كلش وجعني من منظره گعد على الچرباية وصفن بالگاع فترة بدون لا يتحرك جاي احس واشوف خذلانه بيه وقهرته مني چان لازم ابلغه بهالشي وما اخلي يكتشف وحده..

فتح رجليه وسند عكوسه على ركباته ونزل راسه وهو گاعد على هالحال، دقيقة دقيقتين ثلاثة خمسة هو على هالحال.. باوعت للساعة ما گام الا من مرت عشر دقايق ضبط وكأنه حاسب كل دقيقة وكل ثانية لحتى صارو عشر دقايق..

سويت روحي دا ادخل للغرفة هستوني بس دخلت مترددة وعيوني عليه منتظرة ردة فعله وعتابه او صراخه وعصبيته كلشي حطيت ببالي وراح اتقبله مهما كان..

-شُهيب انتَ هنا الكل ينتظرك بغرفة كيان

-شُهيب: اي جاي

عبرني يروح للغرفة بدون لا يسوي أي شي! ما فاتحني بالموضوع ولا حتى بين عليه ضايج او زعلان! رجعنا نگعد بالغرفة كلنا سوه بس ما حچى شي طول ما هو گاعد سارح وشكله يفكر..

توترت بالزايد حطيت ايدي بنص ايده مبتسمة اريد اشوف شنو راح يصير عندي فضول عجبب ناحيته مينطفي ابد، فضول ممزوج بألم.. باوع لايدنا المتشابكة ورفع انظاره الي انتبهلي مبتسمة وكسر گلبي من رجعلي الابتسامة ولا كأنه زعلان مني واكتشفني ضامه عليه شي چبير مثل هذا..

قرار الحمل اختيار المرأة وسواء اخذت حبوب او أي وسيلة اخرى لمنع حدوث حمل حقها ومحد اله حق يتدخل لكن مشاركة الموضوع ويه شريك حياتها اعتبره شي مهم.. مهم لانه يضيف ثقة اكبر لعلاقتهم وتبادل الاحترام ويخفف من حدوث اسرار بيناتهم واني للاسف ما شاركته بهالشي..

شُهيب متمني ريحة الطفل وحلمه يجمعنا طفل ودائماً يذكر الموضوع ويگول ادعي بصلاتي وبكل وقت يصير عندي طفل منچ واني كسرت دعائه وكسرت فرحته وأمله وتفائله واحس روحي اختنگت وما طايقة نفسي..

وخرت ايدي من ايده وتحججت انزل جوه اجيب مي ما قبل وگلي يجيب بدالي يعني فوگما زعلته بعده يهتملي ويداريني وميقبل عليَّ اتعب؟؟ الله ياخذج مسررة!!

ماقبلت ونزلت اني گعدت بالصالة مخنوگة وافرك بصدري مقهورة من نفسي كل المشاكل دتلتم فوگ راسي بوقت واحد تعبت من هالوضع ما طالبة شي غير انجمع ويه ميس واعيش حياة سعيدة ويه شُهيب ماريد غير هالشغلتين لا اريد فاوس ولا اريد جاه ولا اريد لبس وماركات وشركات اريد اعيش حالي حال البنات الطبيعيات وبس!

رن جرس الباب گمت افتح اشوف منو لگيته ابوية تفاجأت بشوفته بس ما بينت ودخلته گعد بالاستقبال ورحت اصعد اصيح الولد ينزلوله وما قبل..

-ليش بابا انتَ مو اجيت تشوفهم؟

-اجيت اشوفچ بابا مشتاقلچ

ابتسمت على نبرة صوته ابوية رغم سوالفه وشالع گلبي بس يحبني ويحبني هوواي صح حبه غريب ومو طبيعي ومؤذي ويحطني بحلگ الموت بس يموت لو صارلي شي..

-حبيبي بابا

-رجعي عيشي عندي سرور ماگدر افارگچ

-مو گتلك العلوية متقبل

-تعالي خلينا نسولف شوية شلونچ انتِ شلون ماشي شغلچ؟

-مو اجيتني للشركة وشفت الاوضاع

-ميخالف احچيلي بعد اريد اسمع سوالفج

ضحكت وبديت اسولفله عن امور سطحية وهو هم بده يشاركني افكاره وشنو لازم اسوي ويسألني عن امور تخص شركته ويريد رأيي وافكاري وطلب مني اسأل شُهيب هم..

-ها بابا شو هسة تريد مساعدة شُهيب

-افكاره حلوة هذا الرجل

-مو گتتلك

-حرامات ابو شمسون

-اگلك شو محد نزل معقولة ما سمعوا الجرس؟

-لا نزل شُهيب شفت خياله بالباب من سمع اصواتنا راح

-اها شعجب ما گلت ديتجسس علينا

-لا مو لهدرجة

-ههههه اوگف دقيقة چنها الباب تندگ بس شنو هالدگة الفاهية

گمت مرة ثانية اطلع من الاستقبال واعبر الصالة وصولاً لـ باب البيت، فتحتها وجمدت من شفتها خطيبة شُهيب السابقة!

-مسرة: نسرين!

-نورسين: اسمي نورسين

-المهم جايه هنا ان شاء الله خير؟

-سمعت بـ كيان مسوية حادث واجيت اشوفها

-علاقتچن قوية؟

-جانت اي بس تغير كلشي من انفصلنا اني وشُهيب

-كيان بخير وشكراً لجيتج راح ابلغها مريتي

-اريد اصعد اشوفها اذا ماعندج مانع

عصبت وبدت النرفزة تبين عليَّ بس حاولت اتماسك وهزيت براسي ادخلها مو بيتي هذا وماكدر بكيفي اتصرف لان لو چان بيتي چان دخلتها اي بس اسحل بشعرها الگاع واطيح حظها وارفس ببطنها لحدما اطلع روحها وبعدين ادفنها بحديقة بيتنا حتى كل يوم ازورها وارشلها مي ورد خطية..

دخلت تعبرني بطولها الفارع وريحة عطرها يفحفح وكشختها على اخر حباية الفستان طافر وجزأها العلوي مبين بوضوح.. اوكي مهما بلغ تشلتحي واستهاري باللبس ما اوصل لربع من نسرين ام عيون خايسة.. بس لحظة نسيت گالت اسمها نورسين لو نسرين؟ يله مو مهم تبقى خايسة!!

-نورسين: سمعت كلكم انتقلتوا تعيشون هنا

-واضح توصلچ الاخبار اول بأول

-تقريباً

-غرفة كيان فوگ بيبي

-ادري بيبي جايه هنا هواي

-همزين خفت تضيعين وابتلي بيج

-بما انچ عايشة هنا اكيد ماريا حچتلچ كلشي

-كلشي؟

-يعني عن ماضيها وحياتها وشُهيب

-امم

-واكيد گلتلچ عن حقيقة شُهيب مو صحيح؟

-ليش محسستني شُهيب مستأذب وخافي حقيقته

-لا.. شُهيب ابن غير شرعي

وگف عقلي من الصدمة ولا ارادي فغرت جزء بسيط من فاهي انبلعت حروفي وزادت وضعي سوء من كملت بنبرة جدية..

-وماريا راقصة بملاهي اربيل وجابته بملهى ليلي ويجوز شُهيب مينعرف منو ابوه الحقيقي

-شنو

-شمسون مو اكيد ابو شُهيب مسرة اتوقع محد شاركچ بهاي الحقيقة ومحد راح يشاركچ لانها فضيحة

نبض گلبي عبر الميتين من شفت ابوية واگف بباب الاستقبال يباوعلنا ويراقبنا، نظراته.. اخاف اسولف بنظراته ونورسين زادت الطين بله وهي تكمل..

-زواجكم خدعة چبيرة حياتي، شُهيب لعب عليچ ولعبها صح حرامات وحدة مثل مسرة قيثارة توگع بيدين ثنين صعبين شايلين عقول مخيفة الي همه النمر وابوه!.....

يتبع.....

━━━━━━  ━━━━━━

كارثة!!! نورسين فجرتهااا 😭🔥🔥

توقعاتكمممممم 💀🩷

حسابي الانستا راح ينزل مشهد مستقبلييييي للقصة ان شاء الله هناك متحمسسسة لردة فعلكم 🙈👇🏻