رواية ابناء الحسوم "شمسون" الفصل الثامن وثلاثون 38 - بقلم 𝐙 𝐇 𝐑 𝐀

#ابناء_الحسوم "شمسون"

بقلمي: زهراء السلامي ❤︎

لطفاً لتنسون التصويت + التعليق بين الفقرات + متابعة لحسابي 😍.

مثلهم تنگلب ضدي؟
عفت شمسي وضواها
ورحت لأجل شموع
يا شمعة التنور دربك بگدي.. 🥀

━━━━━━  ━━━━━━

-زواجكم خدعة چبيرة حياتي، شُهيب لعب عليچ ولعبها صح حرامات وحدة مثل مسرة قيثارة توگع بيدين ثنين صعبين شايلين عقول مخيفة الي همه النمر وابوه!

-مسرة: اها تمام

-نورسين: تمام؟

-مسرة: ادري بكلشي نسرين ارتاحي

-بس شكلچ تفاجئتي

-سؤال وانطيني جواب صريح

-اي؟

-شُهيب اذاچ قبل لو علاقتكم چانت صحية؟

-صحية

-ما تطاول عليچ او مد ايده او سوه شي ميرضيچ؟

-لا ابد مو شخصيته هاي

-اممم وهذا الشي فاجئني

-ليش

-ما تفاجأت من الموضوع حبي تفاجأت من صلافتچ وانتِ تحچين على خطيبچ السابق بظهره وتشوهين بصورته وهو ما مأذيچ بشي

-لا مو هيچ بس..

-حرامات على الثلاث سنين الضيعهن وياچ ثلاث سنين سلبتي من عمره وبنفسچ دتگولين ما اذاني وعلاقتكم چانت صحية اني ميهمني منو ابوه ولا يهمني امه وين وشلون جابته اني اباوع لـ شُهيب على ان شُهيب وبس!

-بس..

-لا بس ولا هالحركات ماگول غير روحي تعالجي حبيبي كلش محتاجة العلاج

بقت فاتحة عيونها متفاجأة، اردفت وابتسامة الاستهزاء ما فارقتني..

-مسرة: اذا محتاجة دكتور شاطر يساعدج گليلي عندي واحد چان زميلي بالمدرسة وهواي مرضى من معارفي تعالجوا عنده

عفتها واگفة بمكانها مبلوع لسانها الطويل ورحت اتمشى لابوية وداخلي يغلي من القهر والصدمة بصعوبة جداً سيطرت على صدمتي وبينت اني بخير واعرف بالموضوع!

ابوية واگف على بُعد من عدنا وماعرف سمع محادثتنا لو لا! تمنيت اجيبها براشدي افر وجهها واوگف هالسافلة عند حدها! هي متدري شُهيب لو انگلب جرادة هم راح احبه وما ابدله بكنوز الدنيا مو اجتني تگلي هو ابن غير شرعي وامه راقصة!

-مسرة: ها بابا اصيح الولد؟

-فادي: هاي مو بنت آرون؟

-مسرة: اي نعالسين تصير خطيبة شُهيب السابقة

-فادي: اي ادري بس شعدها هنا؟

-اجت الجربة تشوف كيان

-شبيچ بنتي ليش لونچ مخطوف ووضعچ تغير شنو حچيتن هناك؟

صوتنا خافت ميوصللها حسيت راح اتقيء كبدي من القهر اطرافي بدت ترجف بس حاولت اسيطر على الموقف واكمل التمثيلية ماطوله ما سمع..

-ختولي هالغبية تخرط وحدها تغار على شُهيب مني چنها سحلية معفنة

-على كلٍ حلي امورچ بنفسچ مثل ما معلمچ بنياتي موضوعچ ويه شُهيب ينحل هاليومين اريد اسمع خبر طلاقكم بأقرب فرصة

بعد بعد زيد وضعي تعاسة! سكتت ما انطي جواب لزم فكي بين ايده بلغة تهديد واردف..

-لا تلعبين وياي حبية ابوچ تمام؟

-تمام

-اني رايح عندي سفرة مهمة باچر الصبح

بوسني وحضني وطلع والسحلية واگفة ما تحركت، ما اهتميتلها وصعدت فوگ لغرفة كيان دخلت واشوف الكل فاطس من الضحك والعلوية تبچي وتمسح عيونها بشيلتها..

-مسرة: علوية ليش تبچين

-العلوية: خايبة اضحك ما ابچي جيرة بگصة ابوكم الخايس جعيفر شل گلبي بصغره لحد هذا كبره مادري شيصخم شيلطم بس گلبي يلعب منه هالاغم

ابتسمت ورحت اگعد بصف شُهيب ثواني ودخلت نورسين تسلم من الباب توقف الكل عن الضحك واللتفتوا يباوعولها.. عيوني تراقب شُهيب الي تغيرت ملامحه وعدل گعدته وكأنه مصدوم من وجودها..

-نورسين: الحمدلله على سلامتج كيان

-كيان: الله يسلمج

-فاهد: انتِ مو چنتي بالمغرب؟

-نورسين: البارحة رجعت

هز راسه ساكت توقعته راح يحشش عليها ويگول شي مثل عادته بس ما سواها، راحت جنات تجيبلها كرسي من بره ودخلت تگعد ويانه الگعدة تغيرت بوجودها والوجوه كذلك العلوية تباوعلها من فوگ ليجوه وحاجبها الايمن مرفوع ما نزل..

-العلوية: انتِ هذيج؟

"هذيچ" القصد منها انتِ خطيبة شُهيب السابقة؟ هزت راسها نورسين وابتسمت اردفت العلوية بنبرة ما مفهوم هل هي مزعوجة ام متفاجئة..

-بس نسمع عنچ ما شايفيج من گبل

-نورسين: ما زايرة العراق من قبل اني

-چا شلون تحچين عراقي

-تعلمت اللهجة من شُهيب واصدقائي هواي ساعدوا

-العلوية: اي زين، جنة جيبي ضيافة

نزلت جنات تجيب ضيافة واستمر الهدوء بالمكان ماريا عيونها على شُهيب ومتوترة كل شوية تهمس شي بأذنه وهو يهز راسه ويبتسم يطمنها..

-مالك: خلينا ننزل نگعد جوه كيان لازم ترتاح

وافقناه الرأي ونزلنا نگعد بالصالة والصمت ما زال قائم، بالي شارد مادري افكر بتهديد ابوية لو بكلام نورسين واگعد اضرب اخماس بأسداس مستحيل كلامها يكون صحيح اكيد چذابة لا يمكن شُهيب يكون خافي كل هالشغلات واني ماعرف!

-نورسين: احم خالة كلش سعيدة بشوفتچ اتذكر شُهيب چان يحچيلي عنچ هواي

-العلوية: اي بعد امه وليدي هذا

-مسرة: من رخصتكم

لزم ايدي شُهيب بلطف يستوقفني گدام الكل ما مهتم لاحد هنا وعيونه طابعة عليَّ يتابع ملامحي ونظراتي، باوعتله متسائلة ودورت عيوني بين الموجودين كل الانظار علينا متوجهة..

-شُهيب: بيچ شي حبيبتي؟

-مسرة: اي رايحة اضرب ابرتي

-شُهيب: نروح سوه

حضن ايدي بأيده وصعد ويايه فوگ، اللتفتت للباقين شفت نورسين تلوب بمكانها و فاهد يحرك حواجبه بطريقة سريعة يغيض بيها والعلوية تضحك وتمسح طرف شفتها وفيروز تطگ بعلچها مستمتعة..

وصلنا للغرفة راح شُهيب لجنطة العلاج مالتي وطلع ابرتي واني گعدت على الچرباية اباوعله، استقر بصفي على السرير ورفع قميصي يطلع زندي، كمل ومسح الدم بالقطنة وحط لزگة بمكان الضربة، حركاته هادئة وخفيفة نزل ردن القميص ورفع اصابعه يتلمس رگبتي من وره..

-سكرچ كلش مرتفع مسرة

هزيت راسي ساكتة من علامات التصير عندي وعند تقريباً كل العنده سكر الرقبة من الخلف تصير غامقة بالنسبة للون البشرة وهالشي يصير فقط من ترتفع نسبة الانسولين بالدم وهالشي خطر..

گام شُهيب صبلي گلاص مي وانطاني اشرب صبلي ثاني وشربته وثالث ورابع واشرب ميتة عطش حلگي جاف..

-مسرة: شلون عرفت الجربة بـ كيان؟

-ماعرف

-يعني انتَ ما حاچي وياهة

-اكيد لا

-عادي اذا حاچي وياهة گول ما راح ازعل

-ما حاچي وياهة مسرة

-شُهيب

-عيونه

-ليش احسك حاقد عليها؟

ركز عيونه بيه واستمر على هدوئه هالبني ادم لو تشدون كل حيلكم هم متگدرون تقرون ملامحه شتگول عنده قدرة رهيبة بأخفاء مشاعره واحاسيسه بس قررت ما استسلم..

-ماطولك مجاوبت يعني فعلاً حاقد

-ما احقد على احد اني

-لعد؟

-بس ما اقبل بأحد يتجاوز على شي خاص بيه

-على شنو تجاوزت؟

تنهد يعدل گعدته ينطيني جهته اليمنه، اخيراً ابدى ردة فعل بوجهه وعگد حاجبه وكأن الموضوع الديفكر بي يألمه..

-أجهضت طفلتنا

فتحت عيوني مو مصدومة لان ادري بيها چانت حامل واتذكر مرة گال لـ ميوسة عنده بنية وراحت للسما بس ماتوقعت هذا سبب انفصالهم!

-انفصلت عنها لانها طرحت؟

-ما طرحت هي كتلتها

-شلوون

-نورسين بآخر سنة من حياتنا سوه تغيرت بكلشي چان بالها يشرد وتفكر هواي الى ان اكتشفتها حامل اربعة اشهر واني ماعرف بيها بطنها ما بيّن حملها من النوع مخفي

-زين؟

-وبليلة ويوم اني ببيت امي اجيت ازورها واتصل بيه ابوها يهد وينثني ما فهمت كلمة گالها بس افتهمت هو بالمستشفى رحت ماشوف بعيوني وصوت ارون لليوم براسي من وصلتله وگلي انتَ كتلت بنتي انتَ السبب بموتها..

-شُهيب مدا افهم شي شنو انتَ كتلت بنتي مو تگول هي اجهضت الطفل؟

-جايچ بالحچي..

-تمام

-نعتني آرون بمسميات قوية واعترف انجرحت كلش وخجلت من ذكر هيچ مواضيع حساسة بمكان عام وگدام الكل وتأذيت اكثر لان ارون مفضل عليَّ بهواي امور بحياتي وهو الداعم الاول بمسيرة نجاحي بس فجأة ذكرني بشي اني مالي ذنب بي وگلي بالحرف الواحد بنتي زايدة عليك متستاهل نورسين اني مستنكف لان زوجتها من واحد نكرة نفسك..

سكت بعد جملته القسمت گلبي نصين قبل گلبه لو بغير وقت حاچيلي چان ما فهمت قصده بس هسة توضحتلي الصورة آرون ابو نورسين ديعير شُهيب بأصله ويستنكف منه لانه ابن غير شرعي!

-رغم كلامه وتجاوزه بقيت متماسك وهادئ ردت بس افتهم شصاير تالي انصدمت بالحقيقة ويه طلعة الدكتور وهو يگول نورسين حامل اربعة اشهر واجرت عملية كورتاج وصارت عدها مضاعفات قوية بالعملية ونزفت هواي وجسمها ما تحمل كمية الدم الفقدتها ودخلوها للطوارئ..

-مچنت تعرف بيها حامل

-ماعرف وطول ما الدكتور يحچي اني متبنج وعقلي فاصل شلون حامل؟ ما صار عدها أي اعراض للحمل مثل باقي النساء لا بيّن بطنها ولا صار عدها وحام والاهم اني ما حسيت بشي نهائياً اربع اشهر هي حامل وضامة عليَّ وتالي راحت تنزل الطفل بدون لا تشاركني ولولا اتصال ابوها چان اني يا غافلين الكم الله!

-وشصار وراهة؟

-لزمت الدكتور احقق وياه ما قبل يحچي لانها دافعتله بس من عرف ابوية منو حچالي وافتهمت جنس الطفل بنية وصارلها شهور تحاول تنزلها لعبت رياضة واثقال وتطفر وتركض وتجهد نفسها في سبيل تنزل الطفلة وما نزلت واخر ما توصلتله هو نزلتها بعملية، انصدمت صدمة عمري من گال هذا ثاني طفل الها تجهضه السنة الفاتت هم سقطت طفل بس مو متعمدة هو وگع من وحده چانت حامل شهرين

-طفلك يعني؟؟

-طبعاً طفلي چنه ويه بعض كل هذا صار وهي ما حچتلي وسكتت ليش وشنو غايتها ماعرف

-عزه شُهيب اني مصدومة!

-مو مثل صدمتي وربي يشهد عليَّ ما اذيتها ولا جرحت مشاعرها صح عاتبتها وما رضيت على تصرفها وبيّنت انزعاجي بس صدمتني صدمة اكبر من ما اهتمت لكل هذا وطلبت ننفصل لانها تعبانة وما تتحمل هاي العلاقة بعد اثاري طلعت ....

-طلعت شنو؟؟

-انسي

-حباب گول

-ما احچي على بنية چانت تابعة الي مستحيل

-حباب صار عندي فضول احچي تره راح أفكّر بشغلات چبيرة

-لا

-خانتك

-عجبها شخص ثاني

-عرفت والله (چذب اعرف من زمان بيوم الاجت تبات بشقته الكلبة)

-المهم من شفت اصرارها واعترافها الصريح وهي تگول احبك واحبه بنفس الوقت جزت روحي وما طقت ابقى دقيقة ثانية بهاي العلاقة الفاشلة وانفصلنا فوراً

-شنو هالصلافة تحب ثنين بنفس الوقت!

-لا تضوجين ومو دفاعاً عنها صح نورسين جرحت رجولتي وداست عليها بس ابقى اگول هي بنية ضايعة وتايهة حياتها عدم متعرف شنو تريد وعانت من طفولة مدللة صعبة وام متزمتة و...

-لا حبيبي ابدددد متدافعلها ابددددددددد

-مسرة هذا مو دفاع هذا...

-اذا هذا مو دفاع شلون يكون الدفاع شُهيب؟!

-خليني اكمل يا بابا!

-ماااريددد

-القصد من كلامي رغم كل السوته بيه بس ما حقدت عليها بسبب خلفيتها وحياتها كلشي بيها تغير بعد انفصالنا شخصيتها ولبسها ووضعها واخر مرة اللتجأتلي بيها چانت خايفة اردها

-بله شطلبت منك؟؟؟

-ابوها جبرها تتزوج نفس الشخص الي حبته بس هو متزوج ويحب زوجته وما قبلت تكون زوجة ثانية ورادتني اقنعه يخرب الزواج

-عينك بعيني شُهيبب بعدك تحبها لو لااا

-لا

-احلللف بداعة امك ما مقهور وانتَ تحچي بيها

-لا

-شُهيب!!!

-ولچ وداعة امي ماحبها ومو ببالي شبيچ تسوين من اللاشيء شي مسرة انتِ سألتيني واني جاوبتج بكل صراحة

-بعد لا تصارحنييييييي

-تماام تمااام

-رااااح اشگ هدووووميييي

-خربب ولچ سكتييي انفضحنااا امة الثقلين كلها هناا

-ولك سكرري سكرررري علگ اللحگني راح اموووووت

-مسررررة

-ماتت مسرة ماااتت من وره هالجربة الوصخة الحية السافلة الساقطة الزبالة الرعنة ام عيون خايسة وشعر معفننن

-تمام والله فهمت بس اهدأي يا حبيبتي

-لا تگول حبيبتي لا تگووول احس ايييييييع

-استغفر الله ياربي

-انوب تستغفر؟؟؟

-مسرة عيوني انتِ وگلبي ماكو وحدة تارسة عقلي وگلبي وروحي غيرچ وداعتها لامي وما احلف بيها اخاف عليها انتِ الاولى والاخيرة بگلبي وما ابدلچ بحورية من الجنة ولو انعاد الزمن بيه الف مرة راح اختارچ واختارچ واختارچ!

-اممم اي اي ظل اضحك عليَّ بهالسوالف

-مخبلة هالبنية وربي

-احس دخت وخر خليني انام

گام عني واني تمددت على الفراش دفنت وجهي بالمخدة وراسي يدور راح ينفجر هالجربة من جهة وكلام شُهيب صدمني بيها ما توقعتها نذلة لهدرجة شلون تسقط طفلين وتخفي عنه هيچ امر! هو اني اخذ حبوب منع وميتة قهر لان ما حچيتله مو انوب احمل واروح اذب الطفل واعيش حياتي طبيعي..

طفى الاضوية تارك ضوه خفيف واجه يتمدد بصفي ابتسمت ووجهي لسه مدفون بالمخدة يا روحي ما نزللهم بعد وفضل يبقى يمي..

-شُهيب: نمتي مسرة؟

-اي

-ها عبالي بعدچ كاعدة

فزيت من مكاني اگعد على حيلي هاي حچاية نورسين! هي هم گلتلي هالعبارة من باتت بشقة شُهيب! عزا بعيني حتى نفس العبارات يستخدمون!!

-منيلك هاي الجملة؟؟

-يا جملة

-انسى خلص انسى احسني معطبة حارة كلش

طفرت من الفراش طلعت دشداشة نوم خفيفة بدلت ملابسي ولبست الدشداشة بدالهن ورجعت للفراش اتأفأف واتضجور..

-اگلك

-اسمع

-باچر ما اداوم سد مكاني

-تمام

-وعگبة هم ماروح

-تمام

-وعگبة عگبة هم ماروح صح عدنا اجتماع بس انتَ حل السالفة

-تمام

-وعگبة عگبة عگبة عگبة...

-افتهمت مسرة

-غير تسألني ليش ما اداوم

-لانچ مريضة واضح هالشي

-ها هم عبالي

-اي

-ويامن راح تشتغل بغيابي؟

-جولي وفاضل

-لاااااااااااااااا

-يا ستار شبيييچ

-عوفهم عوووفهم اني راح اداوم ماريد تشتغل ويه غيري

-ليش؟

-ماحب تروح لغيري

-تمام

-يعني صدگ ما راح تشتغل وياهم؟

-اي مو گتلچ تمام وماكو داعي تجين وضعچ مو زين اني اكمل الشغل وحدي

حطيت راسي على المخدة اباوع للسگف وهو كذلك نفسي، دا احس بزعله وهدوئة ولا ما زعلان من خايسين زعلان من موضوع حبوب المنع بس مثل عادته ميواجهني ولازم اني اكتشف هالشي..

درت وجهي ناحيته لگيته فاتح دگم قميصه وحاطه ايد جوه راسه وصافن فوگ، عضيت على شفتي السفلية افكر بشي احچي بي اطلعه من جو التفكير ماريده يفكر زايد خلي يشاركني ويواجه لا يظل يكتم بگلبه راح يجيله يوم ويصير بي شي على هالكتمان..

نهضت نفسي طبگت ايدي ثنينهن وحطيتهن اسندهن على صدره واحط راسي عليهن سويت صدره مثل التچوه الي، نزل عيونه عليَّ من شافني بهذا الوضع ورجع يرفع انظاره فوگ.. نفخت بوجهه ما اهتم رجعت انفخ هم ما اهتم عضيت حنچه ما اهتم گرصت رگبته خفيف ما اهتم..

-شهوبي اوبي اوبي

ذب حسرة ونزل عيونه الي، ابتسمتله وبادلني ابتسامة فرحت بهذا التطور ورفعت نفسي اسند روحي عدل حتى نصير وجه بوجه..

-شُهيب تدري اني متزوجة اربع مرات

-استغفر الله

گلب عيونه متنرفز ضحكت مستمتعة وكملت..

-باوع همه مو زواج زواج بس يعني...

-سكتي

-لا خليني اسولف

-گلت سكتي وبطلي هالسوالف

-ما ابطل اني صريحة

-صريحة بالچذب؟

-همووسي شبيك وياي

-مسرة اعرف بيچ چنتي متزوجة بس مرة وحدة لا تظلين تطلعين اشاعات على روحج!

-ما مطلعة گدام غريب

-حتى لو

-شُهيب انتَ متغير ويايه احسك صاير مو مؤدب

-شمسوي هالمرة

-حجيت بجربتك گدامي وما اهتميت لمشاعري الرقيقة

-جربتي ما تهمني بشي ووضحت فكرتي!

-حتى لو بعدني احس زعلانة

-وشلون نگدر نراضيچ؟

-تجيبلي جلاتين

-حتى تموتين بمكانچ! بابا سكرچ معلگ انتِ ليش ما تهتمين!!

-شبيك تعيط بوجهي احس زعلت مرة ثانية

-مسرة نامي انتِ مريضة نامي

-ما انام الا نحچي

-بشنوو

-موضوع ردت اشاركك بي من زمان وهسة اجه وقته المناسب

عگد حاجبه مستفهم ونهض نفسه يسند روحه على ايده، وخرت عنه اگعد مقابيله مباشرةً وتلمست اصابع ايده على كيفي..

-شبيچ مسرة شنو الموضوع قلقتيني

-احنه لازم ننفصل

انفلت عگدة حاجبه وطفر من مكانه يگعد عدل جرني من زندي اله وگعني بحضنه فاتح عيونه مصعوق وصاح بوجهي..

-شنو؟؟!! ننفصل شنوو انتِ شتحچييين

-شُهيب اوگف افهمك شبيك

-هاي الفكرررة تمسحيها من بااالچ مسرررة ما انفصل عنچ وما اتنازل لو يذبحووني بطليي من هالافكاار وخلينا نتهنى بحياتناا

-اءء

-اشششش لا تحچين كلمممة ما اسمع

-مو اءءء

-لااا تحچيييييييين ما اطلگج سكتيييي

-شُهيب

-نععل عليه!! شبيچ وياااي شبيچ شمسوي انييي وتردين تروحييين ولچ امووت لو رحتي والعباااس امووت

-اني اسفة

يرجف رجيف وبياض عيونه فوراً صار احمر خفت عليه واحس تورطت شلون راح افهمه دا اتشاقه وما اعنيها واني اشوف حاله الي انگلب وروحه الراح تصعد للسماء..

-لا تعتذرين سكتيي انسي انسي خلص ما حچيتيها ولا گلتيها ولا كأني سمعت تمام؟؟ تمام حبيبتي تمام؟؟ ما صار شي انسيي

-اوكي

-يله تعالي ننام بسرعة

حضني بقوة ينومني على صدره عزه بعيني شسويت بالرجال هسة هذا شلون افهمه شگد غبية ورعنة عود دا استفتح موضوع حبوب المنع تالي صخمتها شبيه اللوص وياه واصير مطي صدگ الحب يخلي البشر يستمطي!

-مسرة لا تعيدها بعد ابد ولا تفكرين بالموضوع لا تختبرين صبري وطاقتي اتحمل كلشي وارضى بكلشي بس لا تعوفيني

-امم

-يا مسرة بنت فادي قيثارة لو رحتي ولو فكرتي تبتعدين لو طريقچ شوك وتيزاب امشيلچ حافي وارجعچ لحضني غصباً عليچ خليها ببالچ!!

يحچي بنبرة تهديد عصبية وصوته يرجف هاي لو غير رجال هيچ يحچي وياي چان رگعته مية راشدي بس هموسي غير، ما گدرت اتلفضها بالساني ماردت احرجه گلتها بگلبي.. والله يا شُهيب لو چنت مو ابن غير شرعي لو مو امك راقصة ابقى احبك وما ابدلك بثاني ولو انعاد بيه الزمن الف مرة راح اختارك تكون ابو ميس وياريتك ابو ميس وتكمل فرحتي..

-مسرة: اسفة حبيبي اني چفصت

-خلينا ننسى الموضوع

-ردت اگول شي ثاني بس خاف ادوس بمصارينك بالزايد

-گولي گولي هو انتِ بقيتي مصارين

-اني اعرفك زعلان وگلت اريد انفصل عنك خوفاً عليك وحق الله اخاف لا ابوك ينفذ تهديداته ويأذيك

-ابوية!

-اني عرفت ابوك طالب منك تطلگني ومهددك بحياتك

-منو گلچ بهالشي؟؟

-مو مهم منو حچالي المهم عرفت واني خايفة عليك

-لا تخافين

-ما خايف ابوك ينفذ تهديده ويخلص عليك؟؟

-ما يخوفني غير فراگچ مسرة

-شُهيب هاي حياتك لو صارلك شي لو متت اول تالي راح نتفارگ!

-اقبل بهالشي على الاقل اكون عايش اخر ايامي وياچ

-شُهيب!

-شبيچ

-دا احچي صدگ!

-واني احچي صدگ

-حبيبي غلط تفكيرك غلط ميصير تفكر بس بيه راح تهلك هيچ!

-تعالي قنعي عقلي ما يفكر بس بيچ

-حياتك متعبة ويايه راح تتأذه بسببي

-القاضي راضي انتِ ليش ضايجة؟

-ضايجة لان اخاااف عليك يا بني اددم ما اتحمل فراگك اموت وراك والقراان

-اسم الله عليچ لا تفكرين هالشكل اني اتصرف لا تشيلين هم

-اووووف منك شُهيب اني ما راح انطيك الحياة التتمناها اني وضعي خاص دا اخذ حبوب منع حمل ما راح انطيك اطفال ما راح تصير اب!

فجرتها بوجهه وتحضرت لردة فعله العنيفة وانفجاره بس صار العكس من جاوبني بهدوء تام ونبرة صادقة..

-ميس كافية

-ميس مو بنتك!!

-اني اشوفها بنتي

-يعني انتَ ما زعلان على موضوع الحبوب؟

-اي انقهرت كلش بس ما اللومچ بعدما سمعت افكارچ والخوف المغلف گلبچ صرت اللوم نفسي لاني تاركچ بدوامة افكار سلبية مأثرة على نفسيتچ وصحتچ

-اني بس خفت اواجهك واجرح مشاعرك اعرفك تتمنى تصير اب وتعشق الاطفال وماريد اكون السبب بحرمانك انتَ تستحق الافضل

-انتِ الافضل بالنسبة الي

-ولك هموسيييييييييي

طفرت عليه اگرصه واجعصه واضحك مثل المخبلات متناسية مرضي تغير مزاجي مية وثمانين درجة بسماعي كلامه حتى الخوف الچان محاوطني اختفى وكلام نورسين ميهمني.. هالانسان ومشاعره الصادقة ونبرة صوته الترجف من گتله اعوفك مستحيل ويستحيل يكون چذاب!

**

"جنات"
طلع الكل بقيت اني ارتب البيت واغسل المواعين وارجع الضيافة بمكانها، ساعدتني فيروز بس من شافت مالك واگف بباب المطبخ ترخصت وراحت لغرفتها..

-مالك: اساعدچ

-لا

-ما جاي اسأل اجيت اساعد

-ما محتاجة مثاعدتك

-جنات ما صار وقت نحچي بموضوعنا

-ماكو موضوع يجمعنا

-معقولة بعدچ ضايجة لان بستچ!

-مالك روح نام تأخر الوقت

-وانتِ؟

-اني انام بغرفة فيروز

-مستحيل اقبل بهالشي!

-مو بكيفك رايحة انام ويه بنت عمي مشتاقتلها

تنهد يمسح على خصلات شعره تقدم كم خطوة مقابيلي صابتني قشعريرة من لمس ايدي سحبتها بسرعة احضنها لصدري كـ ردة فعل..

-مالك: تمام جنات تمام

-الله وياك

-ما راح اطلع من المطبخ تره!

-تمام براحتك

-سؤال

-تفضل

-اذا متزوجة واحد غيري وسوه وياچ اكثر من الشي السويته شنو راح تكون ردة فعلچ؟

-انتَ عبالك اني ضايجة من شخصك لانك مالك مو غيرك؟؟

-ماكو تفسير ثاني

-لا اكو! اكو لانك وعدتني راح نكون اصدقاء

-وبعدنا اصدقاء

-اول مرة اشوف اصدقاء يسوون هالحركات

-اكو اصدقاء يسوون الأمر والاتعس بس انتِ عايشة بقوقعة بعيدة عن العالم ماعرف شلون عندج نت وتلفون ودراسة وبعده تفكيرج محدود وغبي لهدرجة!

هزيت راسي بهدوء مجروحة من كلماته بس فضلت ما اجاوب، نشفت ايدي ونزلت رداني وعبرته اصعد فوگ ذب حسرة عالية وصاحلي كم مرة ما اهتميتله ودخلت غرفتي انزع الصاية واللبس تراك نوم حتى اروح لـ فيروز..

اجه ورايه بسرعة بس شفته دخلت الحمام وقفلته علما بدلت ملابسي ومشطت شعري طلعت لگيته واگفلي بباب الحمام..

-مالك: عذريني ما قصدت احچي وياچ بهاي الطريقة

مجاوبت ورحت اعلگ الصاية والشال بالكنتور، صار ورايه مباشرة واحس بي يحوم يريد يحچي شي ولازم لسانه..

-مالك: اكو شي اريد اشاركچ بي بس خاف ازيد الطين ذلة

بعد ماتحملت اسكت اكثر وفطست ضحك لا لا لا لييش ضاعت هيبة الزعلة خرب عقلك مالك!!

-شبيچ تضحكين؟

-تزيد الطين ذلة شنو؟

-يعني ازيد الموضوع ضرر

-اسمها بَلّة مو ذلة

-المهم ضحكتچ

-مالك اذا الموضوع يضوج لا تحچيلي ما طايقتك لا تخليني اشگ هدومي و اهج منا

-اني هم اگول لو نأجله افضل ونحچي بموضوع اهم

-ماعندي وقت احجي بموضوع عندي دراثة رايحة لفاهد

ركضت اطلع بسرعة شايلة بس تلفوني بعدني دا اعبر الممر المظلم وانشنطت ايدي مالك يسحبني ويسفطني بالحايط..

-جنات: يمممااا

-وصمااا شلون طالعة هيج انتِ مو محجبة!

-اي متشوفني لابثة حجـ... يااااااا عزه ما منتبهة

-من الثوالة بس تريد تشرد

-انچب انتَ اثول

-هاااا تمام..

نزل يريد يبوسني انرعصت بمكاني واحرك براسي حيل ما اخلي يسيطر وهو ميت ضحك..

-مالك: مسطية هالبنت مسطية

-الله ياخذذذك

-جنااات ثبتي خرب راح يطلعون ويشوفوج بهيج لبس ويطشر العرض

-الله هاي منين متعلمها؟

-يتطشر العرض؟ من فاهد سمعته مرة يگولها لـ كيان وظلت براسي

-ها مو اگول متطلع منك هالثوالف

-تعالي للغرفة تعالي

-شنثوي

-ادرسچ تعالي

-انتَ تعرف لهاي المادة؟

-كلشي اعرف امشي وياي

رحت وياه للغرفة سد الباب وقفلها خزرته وگال يبرر..

-مالك: لا يسوي هجوم علينا فاهد هذا مو امان

-تعال قريني يلا وحباب على كيفك ويايه شوية عقلي مطي

-انطيني الكتاب

انطيته وطلعتله المادة اخذ موبايله ودگ على واحد بنص الليل استغربت من المحادثة وفكيت حلگي من گال للطرف المقابل..

-دزلي chapter 2 من مادة Strategic Management شرح مفصل وحاول تدبرلي ملخصات وشرح يسهل المادة انتظرك..

ظليت فاكة حلگي سد الاتصال ونزل تلفونه يكمل يگلب بالكتاب ويتصفح اوراقه..

-بعد شنو عندچ صعوبة بيا مادة؟

-منو هذا الخابرته؟

-واحد اعرفه المهم احچيلي بعد يا مادة؟

-بعد عندي مادة بث فاهد يشرحلياهة

-تمام وهسة علما يدزلنا الملخصات شنو عندج دراسة ثانية؟

-عندي علم نفث بث ماعرف ليش حاطيلي ادرثها اني شعليه بيها

-هاي مواد ثانوية تعالي ندرسها يلا

تربعت وهو فتح الملزمة يقره ويترجملي واني اكتب الترجمة، على گعدتنا دگ موبايله سطعش الف مرة وكلساع يجاوب الاتصال بلغة مختلفة، اخر اتصال گام يجاوبه بره دخت تمددت على الفراش وغمضت عيوني انتظره يرجع اتصلت بيه ايات سولفت وياهة شوية وسديته من رجع مالك بس وجهه مگلوب..

-شبيك

-يله نكمل

اخذ الدفتر والملزمة وبده يقرالي بصوت طافي مطنگر من شي اخر اتصال چان من شمسون والله يعلم شنو گايله..

-مالك شبيك

-لا تدوخين روحچ بمشاكلي اهتمي بدراستج

-شنو هالحچي صدگ چذب

رخت اكتافه المستقيمة دائماً وطلع جكارة من جيبه، گام للشباك فتحه ووگف يدخن هناك بهدوء، رحتله اوگف بصفه وبقيت صافنة عليه انتظره يگول شي..

-جنات: شنو گلك عمو؟

-انطاني اخر تحذير لازم اطلگ مسرة من شُهيب وافصلهم عن بعض هاي الايام لا ينفذ تهديده بـ شُهيب

-تهديده بشنو؟

-يكتله

-يكتله؟؟؟ يكتله يعني قتل على الاخر هذا قصدك؟؟

-اي

-لا مالك لا حباب شنو هاي مثتحيل ابنه هذا معقولة يكتله!

-جنات ابوية مو صاحي كلشي يسوي ما مهتم لا ولد ولا بنية الي براسه لازم يتنفذ لو يطيّر روسنا، حچيت ويه مسرة اتذكر حچيت وياهة واتذكر محادثتنا صح مو كلها بس اتذكر گلتلها ابوية ناوي لـ شُهيب نية بس ما جاي اشوفها ماخذة الموضوع بشكل جَدي

-خيولي هو بكيف ابوك مالك لا تهتم همه يحبون بعض

-اي بكيفه! بكيفه وبكيفه شمسون معتبر المكان لوحة شطرنج واحنه القطع اليتحكم بيها شوكت ما يضوج! شُهيب ما يهتم لانه ذايب بحب مسرة الموضوع بيد مسرة هسة لازم وضروري تستوعب اذا بقت ويه شُهيب راح يموت راح يفقد حياته

-هي ما جاي تصدگك؟

-عبالها ابالغ

-وهسة انتَ حاير متعرف شلون تقنعها تعوفه؟

-اگدر وبسهولة افرقهم عن بعض بس اعرف شُهيب راح يكرهني على هالشي وماگدر اجازف بعلاقتنا اكثر

-الله بعينك على هالدوخة مالك

سند ايد على الشباك وزفر نفس قوي متعب ونزل راسه دليل الحمل الثقيل الديصير عليه، ماعرف ليش گلبي گام يوجعني من شفته بهالحال رغم اني ضايجة منه وزعلانة بس هالشي ما غطى قهرتي مالك الوحيد الاشوفه يركض للكل ويحب الكل ويخاف على الكل دائماً عنده ردات فعل مبالغ بيها احياناً تجاه افعال ابوه واتوقع ما صار هيچ من عبث هاي ردة الفعل نمت وكبرت من تجارب خاضها وياه..

شي بداخلي يصرخ "جنات واسيه لا تعوفي يغرگ بأفكاره وحده" بس جرأة ماعندي لساني طويل اتعارك واتناتر واتصالف وياه بس اخجل منه بشكل فضيع ومشاعر متخربطة صايبتني تجاهه وهذا السبب دائماً استخدم لساني وياه كـ درع حتى اگلب المواضيع الجَدية ونظراته العميقة..

گلبي يدگ سريع واني اشوفه بهذا الحال الفضيع وحده، استجمعت قوتي وضغطت على نفسي ومديت ايدين ترجف خجل امسح على ظهره الي فوراً ارتخى بعد لمسة ايدي..

-جنات بهمس: ميخالف الله ميعوف عبده محتار

ماعرف منين طلعت هالجملة ولا ليش گلتها مالك واضح وضوح الشمس بعيد عن رب العالمين ماكو مرة شفته يصلي او يسوي عبادة معينة بس ليش گتله هيچي شي هسة مادري ويمكن چفصت لانه بقى منزل راسه ما رفعه اردفت فوراً..

-اقصد وكل امرك لله حتى لو چنت بعيد عنه اني وبنات عمي دائماً هيچ نثوي والله ينجينا بكل مرة العلوية علمتنا مهمها بلغت ذنوبك لا تنثى ربك واللجأله بكل وقت خصوصاً بالاوقات الصعبة

لمحت طيف ابتسامة ينرسم على وجهه فرحت بهالشي صح مو ابتسامة كاملة بس على الاقل سمعني شگلت، نزل ايده المسنودة على الحايط وبحركة سريعة جرني بخفة ولطف من خصري وحضني يسند راسه على كتفي..

يبست بمكاني ما تحركت ولا انطيت ردة فعل بقيت متشنجة وگلبي يدگ بهمجية احس دگاته اخترقت صدر مالك وحس بيها بسبب همسته الخافتة..

-گلبچ يدگ قوي

رفع راسه يوخره عن كتفي ومبقيني بين ايده يصفن عليَّ صفنته المعتادة، احس وجهي شحب والهوا انسحب من ريتي معدتي گامت تحرگني والكلمات ضاعت من لساني..

-بعدنا متزاعلين؟

فتحت فمي ادور على عبارة اگولها بس عجزت ردت بس اگول كلمة "اي" ما طلعت مني وعيوني مچنگلة بوجهه، ابتسم ونصى لمستواية يهمس بخفوت يوازي هدوء الغرفة..

-اول مرة اشوف بنية هيچ جميلة لدرجة عيوني ماگدر ارفعها منچ

تغيرت وتيرة انفاسي من تقرب اكثر بلعت ريگ رجليه متحملني بعد راح انهار بأي لحظة، اردف بهدوء ممزوج بمشاكسة..

-وبريئة لدرجة اتشوق اللوث هالبرائة بطريقتي

عضيت لساني لا ارادي من ردت اتفوه بشي تافه مثل عادتي واتهرب من هالمواقف التخليني ارجف خجل..

-بس راح يجي هاليوم جنة واخلف اثار واضحة ما تنمسح ابد

فكرت بهالجملة الغير مفهومة هل هي اثار جسدية ام اثار نفسية؟ اثار تبين على وجهي ام بصوتي وضحكتي؟ بس ما لحگت افكر زايد بسبب شهگة خفيفة صدرت مني من طبع قُبلة على فكي وعض المكان بخفة..

-ابوية الله لا يذكره بالخير يگول اترك اثرك على الشغلات التعجبك خصوصاً لو كانت انثى عضة خفيفة بمكان معين ما راح تضر بس راح تترك اثر عميق بالعلاقة

-ابوك مچلوب

-اتفق وكلنا طلعنا عليه

-خوش نصايح ينطي جعيفر

-اوووه زير نساء محترف منحرف ابوية

-لا تمشي وره نصايحه كلهن فثق وفجور

-اموت على الفسق والفجور

-ايا ثاقط

ضحك بصوت واضح فوراً عضيت على شفتي السفلية ماريد اضحك وياه وابينله الوضع عادي ابوهم الغبي معلمهم يصيرون عضاضة يمشون ويعضعون بالعالم كيان المسكينة يومية اشوفها مزورگة ومسرة نفس الشي وهذا الثالث!

-مالك: لازم نحل موضوع برائتچ بس انطيني مجال افرغ

-ما فهمت شنو قصدك

-راح تفهمين حبيبتي الصغيرة بس انطيني وقت ارتب اموري وامهدلچ الطريق اخاف عليچ لا تنجلطين

-والله اشيبك بثوالفي تره اني مو هينة

-هههههههههه نشوف عود

قاطع ضحكته صوت طرق الباب حررني من ايده اخيراً وما حسيت على روحي هو بعده لاطشني بي وما اكتشفت الا من ابتعد وضربني الهوا وجهي اشتعل وغطيت خدودي بسرعة اخفي حمارهن وانطي ظهري بينما هو راح يفتح الباب..

-مالك: ها حبيبي

-فاهد: محتاجك بشي

-تمام جاي

سد الباب واندارلي غمز وگال بصوت ناصي..

-ذكريني بعد نعالج موضوع ذبولچ وفهاوتچ تماسكي يحلوة ما يصير هيج

فكيت عيوني وغطيت حلگي بنفس الوقت ضحك بصوت مسموع وطلع من الغرفة صرت اضرب على وجهي بخفة يا ثولة يا جنات يا عووبة راح ابقى اتسرسح من حچايتين طاح حظج وحظ فهاوتچ الغبية! بعدين اني مو زعلانة؟؟ خرب حظي نسيت!!

**

"كيان"
ابتسمت امد ظهري بينما فاهد يحط المخدة ورايه ويرجعني على كيفه (اقصد بعنفه الي تعودت عليه) ويسند ظهري على المخدة ويغطيني بالغطوة..

-فاهد: جوعانة كوري؟ اجيبلچ شي تاكلي؟

-لا شبعانة شكراً

-يمكن الغرفة باردة اجيبلچ غطا ثاني؟

-لا زين الجو تعال نام الوقت تأخر

-تمام بس اشوف مالك وارجعلچ

-مالك وجنات راحوا ينامون

-احتاجه بشي ضروري ما اتأخر

هزيت راسي متفهمة وتمددت بمكاني باقية على ابتسامتي، طلع الكل بعدما مسرة وشُهيب صعدوا فوگ واهم شي راحت نورسين.. حتى اكون صريحة اني ما اكرهها ابد ولا يوم كرهتها بي حتى من انفصلت عن شُهيب بس كرهت عملتها من راحت تجهض الطفل بدون لا تشاركه واتذكر كلش زين شلون شُهيب انكسر وتأذه ومات من القهر انعزل على نفسه وما قبل يتقرب من احد.. ماكو مبرر لتصرف نورسين لان همه عاقدين عقد سيد ومتزوجين زواج طبيعي كلما بالموضوع ما لبست بدلة بيضة اما باقي الامور كلها تمت طبيعي جداً واذا موضوع الاطفال مخوفها چان گدرت تشارك شُهيب وتحل السالفة بس هي اللتجأت لحلول اخرى خربت العلاقة بيدها..

گعدت انتظر فاهد يرجع وعرضت فلم على التلفزيون احاول قدر المستطاع ما أفكر بالموضوع وابقى مرتاحة بمكاني ما اتحرك واللتزم بوصية الدكتورة..

حسيت بألم شوية من جرحي راقبت الباب خاف فاهد يرجع ورفعت التيشرت بسرعة اتأكد من الخياط، الدكتورة طبعاً خيطتلي الجرح وانصدمت شلون تحملت الالم وما رحت للدكتور علمود يچيكون وضعي هاي متعرف اني بلعت الالم وسكتت من الخوف..

بعدما تأكدت من وضعي تمام رجعت اتمدد انتظره بس شو طول؟ نويت اگوم اروح لـ جنات بينما يرجع اكيد هي وحدها هسة طلعت من الغرفة متوجهة لغرفة مالك ووصلتني صوت بسبسة من الظلام الدامس الي بالصالة..

هذا صوت مالك بس شبي ينتر؟ الفضول شدني وتقربت بس اشوف شكو مديت راسي من محجر الدرج كلشي ما اشوف منا ولا يوصلني صوت، نزيت مخترعة من صارت طبة قوية وكأنه احد رگع شخص نزلت الدرج بسرعة انتبه لصوت خطواتي ومديت راسي اشوف مالك لازم فاهد من خوانيگه ويرگع بي بالحايط بقوة وينتر شي بالمغربي..

يحچي سريع كلش واللهجة صعبة للان ما افتهمها مية بالمية بس افتهم بعض الحوارات والحوار الصار بيناتهم مو بس صدمني الحوار دمرني وشلع روحي شلع!! (ترجم الحوار بالعراقي):

-مالك: شنو متعاطي فااهد احچيي ليش وجهك احمر وقزحية عينك متوسعة؟؟

-فاهد: ما متعاطي

-مالك: غبيي غبيي شوكت تكبر انتَ!! لو شُهيب شافك وانتَ متعاطي ونايم عند اخته والله يشگك نصيين

-ما متعاطي شبيك بس شربت جگارة

-عروقك باردة وقزحيتك متوسعة ووجهك احمر كلها اثار جكارة؟ شايفني غبي گدامك! بابا اني خابز وعاجن هالسوالف من وره جماعتك العفطية!

-مو موضوعنا هذا مالك خلينا بالمهم

-ماكو مهمم غير كيان فوگ والباقي كله وهمم استوعب!

-بس اسمعني

-ما اسمعك انتَ شوكت تتوب شوووكت سارة تزوجت وانتهى الموضوع خللص طلعها من راسك يا اخي طلعهااا

-فاهد: ما اطلعهااا لو تذبحونيي مالك اني احبهاا اريدهااا متمنيهاا وراح اخذها يعني اخذها ما يطلع اسمي فاهد لوما طيحت حظه لحمزة وطلعت رووحه

-وكيان!! شنو راح تكون ردة فعلها من تعرف انتَ تمثل عليها يا سايكووو

-ما ممثل عليها اصلاً ما مضطر امثل لاني ما اهتم لاحد ولا اخاف من احد اني صدگ احب كيان واعزها هي صديقتي المقربة وما اقبل عليها ليش عبالك جاي امثل!

-لو تحبها وتعزها ما تفكر بغيرها ولك بابا البنية تحبك افتح عيوونك وشوفها شگد متعلقة بيك وعاجبها لييش تروح من ايدك وحدة نفسها وتركض وره ثانية متزوجة وحامل وعايشة حياتها بالطول والعرض وما معبرتك!

-معبرتني بس هي تخاف لا اكثر

-تخاف وراحت تزوجت وصارت حامل؟؟

-هددوها اني متأكد

-انتَ اصلاً شمعرفك بيها يا يوم حاچي وياهة؟ انتَ تتابعها من بعيد لبعيد وبسس ماكو محادثة حقيقية تجمعكم!!

-هي تحبني

-ولك...

لزمه من ياخته ورگعه بالحايط مرة ثانية مخلف صوت رگعة قوية، ما اهتم فاهد وبقى مُصر على حبه لـ سارة ومالك محترگ، شگد حسيت روحي صغيرة وتافهة من القهر حتى ما بچيت صعدت فوگ للغرفة وراسي يدور بالافكار وعقلي استقر على هالفكرة گمت دورت على تلفون فاهد لگيته على الميز فتحته لاني اعرف الرمز هذا مو تلفون شغله فـ ميهتم اذا عرفت رمزه..

طلعت اسم "حمرتي" لگيته مسجلها دگيت رقمها بجهازي وكتبتلها رسالة من لا وعي طلعت مني كتبتها بگلب ينبض الم وجروح ردت احرگ گلبه مثلما ديحرگ گلبي واطفي شكو امل بگلب سارة تجاه فاهد حتى لو چانت تحبه صدگ اخليها تبتعد وتعوفه..

"اني تزوجت واحب زوجتي عوفيني ولا تلحين وياي بعد طلعي من راسي وگلبي"

فوراً جاوبتني كتبت..

"منو"

"تعرفين منو لا تلحين بعد عيشي حياتچ وبه زوجچ واني اعيش حياتي ويه زوجتي خلينا بعيدين عن بعض"

سديت التلفون بسرعة وگلبي يعصرني عصر عضيت على اصبعي حييل اسيطر على دموعي ماريدها تنزل بلعت ريگ ورحت للرسائل احذفها واللوم بروحي اني شسويت؟؟ هي شدخلها منو يگول اصلاً تحبه يمكن هو اليركض وراهة وهي متريده كيان شصخمتي بحالچ انتِ!!

لملمت روحي الضايعة ورحت للچرباية غطيت جسمي وسويت نفسي نايمة، عشر دقايق ورجع فاهد للغرفة حچى ويايه بس هلوسات مو كلام مفهوم مجاوبته هو عباله نمت تمدد بصفي ونام تارك وحدة راح تموت من القهر..

گعدت الصبح فاهد ماله اثر ما اهتميت وگمت اغسل وافرش اسناني نزلت اتريگ بهدوء واشوف الوجوه كلها هادئة والالسن كذلك، اخذت علاجي وصعدت للغرفة ارجع انام ضاربة الدنيا بعرض الحايط تعبت من هالوضع تعبت من الامل المزيف والانتظار تعبت من حياتي المخربطة متمنية انام وبعد ما اگعد..

حسيت المغرب على اتصال فاهد يدگ عليَّ مجاوبته وسويت جهازي صامت ونمت العلاجات تنعسني وابقى خاملة اريد بس انام.. لليل رجع يضحك وفرحان من لا سبب كالعادة..

-ولچ كوري اليوم طلعت ويه هارون الزبالة وتعاركنا عركة شكبرها واني فزت طبعاً

ما اهتميتله بقيت متمددة بينما هو ينزع تيشرته ويشمره على الكرسي ونزع بنطرونه وراه..

-احنه صح متزاعلين وما احچي وياه بس احبه هالنذل ربيت وياه وماگدر احقد عليه وبعدما عرفت هو ساعدج رضيت عليه ميخالف شسوي ويه گلبي الطيب ااااخ تعبني

طفر على الجرباية المكسورة ينام بصفي وجر مني الغطا مط ايده وتنهد بتعب يطگطگ بعظامه..

-اليوم عندي شغل بالـ 2:00 بالليل خاف ما احس على المنبه انتِ گعديني مو تخلين النومة تروح عليَّ ابوي يسويني وصلتين ويذبني للچلاب تاكل لحمي وقبل لا اموت بدقايق ينقذني ويذبني بالمستشفى اخيس هناك لحدما اصير زين وارجعله

تثاوب نعسان واندارلي يحضني ويعض كتفي ونزل يعض زندي وراهة، رفع نفسه يشوف ردة فعلي مثل العادة اصرخ واگلب الدنيا وارجع اعضه بس هالمرة چنت هادئة بطريقة غريبة احسني انطفيت وماكو شي يهمني بعد..

-كوري هاچ يله

مدلي معصم ايده حتى ارجعله العضة مثلما متعودين كل يوم من ما شاف مني ردة فعل ندسني من كتفي..

-كوري شبيچ؟

غمضت عيوني اخفي الدموع الي تشكلت بيهن وامنعهن من النزول، ندسني بقوة اكبر وگلبني على ظهري يخلينا وجه بوجه..

-كيان شصاير؟؟ انتِ زينة؟ متوجعة؟ وجهچ اصفر وذبلانة بطنج توجعج؟؟ يمكن صارت عندج مضاعفات خلينا نروح للطبيب

بدون كلام زايد رفعني من الفراش ولفني بغطوة ونزل بيه الدرج ياخذني للمستشفى ما عارضت لاني فعلاً متألمة وبطني تملخني من الوجع.. البيت اظلم الوقت متأخر والكل نايم طلعنا اني وفاهد وحدنا للمستشفى ودخلوني لدكتورة وحدي سوتلي سونار تتأكد وفرحتني من گالت وضعي احسن بهواي بس لازم اللتزم بالراحة اكثر..

سوت سونار لـ رحمي وگالت الوضع يبشر بخير وهم لازم ابقى مرتاحة وحالتي النفسية اهم شي متتأثر بشي سلبي، هزيت راسي اوافقها الرأي وطلعت من الدكتورة شفته گبالي منتظر مني حچاية.. نقلتله بالحرف الواحد شنو گالت الدكتورة فاجئتني فرحته وضحكته وكأن چان منتظر على نار يكون وضعي متحسن وهسة ياله ارتاح من عرفني بخير..

-الدكتورة گالت لازم نفسيتي ترتاح وما اضغط على روحي

-فاهد: صح صح لازم اي

-اريد ارجع لبيت اخواني

-تمام

-وحدي

-شنو

-وحدي اريد اروح

-نروح سوه كيان ما راح اضوجچ بشي

-ماريدك

عفته ومشيت اطلع من المستشفى متوجهة لسيارته، حسيته يمشي ورايه بدون لا يعجل خطواته وكأن الي گلته بنجه وخلاه يفصل عن العالم..

صعدنا السيارة والهدوء كان سيد الموقف مشى بطريق بيت ماريا ما اخذني لبيت اخواني ماعندي طاقة اناقشه واستسلمت ما ذكرته نزلت وبوجهي للغرفة لفيت راسي ونمت بس حسيت بي سهران ما نام بسبب ريحة الجكاير والدخان الصار بالغرفة حتى من دگ المنبه مالته هو چان گاعد اخذ سويچ سيارته وطلع من البيت..

ثاني يوم نزلت من الصبح جوه شفت ماريا فاتحة اغاني بالمطبخ وواگفة ترگص وتهز خصرها بأنوثة ودلع تاكل لفتها وترگص على انغام الموسيقى وشُهيب واگف يسويلها كوب حليب دافي، ابتسمت تذكرت ايام قبل من چانت تجبرني ارگص وياهة تعلمت اشكال رقصات من ماريا الراگوصة..

-شُهيب: يمة حبيبتي رايح للشركة اني هسة صيري حبابة واذا العلوية سمعتچ حچاية لا تزعلين هي تعبر عن حبها بهالطريقة

-ماريا: اي اي مازعل

-يله تعالي ابوسچ

بوس خدودها وراسها وعيونه لقطتني واگفة بباب المطبخ ابتسملي ورديتله الابتسامة..

-ماريا: جيبلي حلويات وياك

-تمام بس ضميهن عن مسرة لا تنطيها

-ماريا: مو خطية هي تحب الجلاتين

-لا ماما سكرها مرتفع وتعبانة هالفترة لازم ننتبه عليها لا يصيرلها شي

-يعني تموت؟

-لاااا اسم الله يمة شنو هالحچي الله لا يگولها

-شهوبي انتَ صاير متحبني

-احبچ

-متحبني

-احبچ والله

-لا

-اي

-نو

-يس

-لو تحبني تاخذني لتركيا اشوف الحلوين

-ماري سكتي كافي حبيبتي وينج وبن الحلوين يله شربي حليبچ ولا توكحين

-لبسني جواريب

هز راسه وخلاها تگعد على الكرسي نصى يلبسها جواريبها وبعدها مطنگرة عليه فتحت شعرها من القراصة وهوسته بيدها..

-سويلي شعري

كمل الجواريب ووگف يسوي شعرها شاله بذيل حصان عالي ما قبلت تريد ظفيرة، ظفرلها انوب متريدها ما عجبتها تريد ستوتات وخر الظفيرة وسوالها ستوتات ما عجبها ورادت ذيل حصان.. يمكن فوگ الست مرات فتح شعرها وعاد تسريحتها وشُهيب هادئ مثل عادته ما مبين منزعج من الوضع لانه ببساطة متعود..

-شهوبي صبغلي اظافري

-من ارجع يروحي تمام؟

-مو هسة لازم اصير حلوة قبل لا تگعد العلوية

تنهد يباوع لساعته وهز راسه بسرعة يركض يطلع من المطبخ يصعد فوگ لغرفتها يجيب صبغ الاظافر الاحمر الي تحبه ونزل يرجعلها.. گعد مقابيلها على الكرسي منطي ظهره للباب وگعد يصبغ اظافرها، لو غريب يشوفه بهالحال راح يخرب ضحك عليه ويشوف وضعه وتصرفه نشاز بس شُهيب ماكو يوم اهتم برأي احد المهم تبقى ماريا راضية عليه وسعيدة..

نزلت مسرة من الدرج بهدوء ترفع بشعرها ذيل حصان ما صبحت عليَّ بكلمات اكتفت بهزة راس وابتسامة مبين عليها التعب البارحة افتهمت جايبيلها دكتور للبييت يقيس سكرها وگايل كلش مرتفع واذا بقت على هالحال تضربها جلطة..

وگفت بباب المطبخ تشوف على شنو دا اباوع وابتسمت فوراً من شافت شُهيب مركز بكل حواسه ويه اظافر ماريا يلونهن بأحترافية مهندس ميطلع من الحواف نهائياً..

-مسرة بهمس: اجعصه اني

حاطة ايديها ثنينهن على گلبها وملامحها تقرا حب ورقة، ضحكت وعلى اثر ضحكتي اللتفت شُهيب شاف مسرة واگفة بهذا الوضع ابتسم وكمل يصبغ لماريا..

وگف بعدما انتهى من شغله بوس ايدين ماريا وتوجه النا باس راسي وخد مسرة وطلع من البيت مستعجل، دخلنا المطبخ نتريگ سوه وماريا راحت للصالة تتابع مسلسلها..

-مسرة: شلون صرتي حبي

-احسن

-اليوم موعدچ مو؟ تحبين اروح وياچ للدكتورة؟

-لا رحت البارحة

-صدگ؟ شگالت؟

حچيتلها مختصر مفيد والابتسامه مرسومة على وجهها من سولفتلها ردة فعل فاهد وخوفه، صفگت بيدها بحماس وگالت بعيون تلمع..

-شگد يحبچ كياان

-امم

-شبيچ زعلانة

-راح اروح لبيت اخواني اليوم ويحلم ارجعله

-ليش شصاير

-هو يعرف شصاير

-نفسه موضوع الطلاق؟

-ماعرف اصلاً شنو موضوع الطلاق وليش اخواني يردونا نتطلگ بس اكيد اكتشفوا شي طرگاعة مسويها فاهد واني وياهم بكلشي يگولو

-كيان الطلاق قرار صعب لا تتهورين فكري وتأني قبل لا تخطين هالخطوة

-اني اثق بأخواني واعرف همه يردون مصلحتي

-على طاري مصلحتچ اكو موضوع اريد اشاركچ بي راح اموت بسببه

-شنو هو؟

-مالك حچى ويايه وگلي لازم اني وشُهيب نترك بعض...

حچتلي كلشي صار وحچتلي من البارحة رجع يفتح وياهة الموضوع ويصُر عليها الموضوع جَدي وشمسون راكب راسه وتحس روحها تايهة بسبب كلامه وخايفة على شُهيب بنفس الوقت..

-كيان: اني سمعت شمسون من هدد مالك

-صدگ تحچين؟؟

-والله جنت موجودة وكلام مالك صحيح مية بالمية شمسون چان معصب والغضب يتدفق من عيونه راح تنفجر وهو يحچي ويهدد وحلف بروح ام مالك اذا ما انفصلتوا انتِ وشُهيب...

سكتت ماگدرت اكمل خفت عليها يصيرلها شي وتظل تفكر بالموضوع بس ما قبلت وأصرت اكمل..

-كيان: اذا ما انفصلتوا وما طخيتي راس يدزلچ جثة شُهيب هدية

شهگت تكمم فمها فاتحة عيونها ممصدگة واني مثل حالها واتعس الموضوع صار ايام افكر بي وماخذ حيز من تفكيري وخايفة لا اواجه مسرة واحچيلها لا يفتهم شُهيب وتصير مصيبة بس مالك ما قصر وبلغها بالموضوع بسرعة بدون مماطلة..

-مسرة انتِ بخير؟؟

-لا.. لا اني مو بخير

-اني اسفة صدگيني گلبي جاي يتگطع مثلج واكثر بس هذا شمسون خالي من المشاعر گلب ماعنده!

-شسوي ياربي شسوي

سكتت قلقة ماعرف اواسيها وهي بهذا الحال، تخربطت بالزايد ووجهها شحب لونه وشفايفها صارت بيض گوة گومتها اوديها لغرفتها انومها على الفراش واجيب علاجها..

اجلت روحة بيت اخواني يومين ثلاثة وبهالكم يوم اني انام قبل لا يرجع فاهد حتى منتواجه ما حچينا شي ابداً وهو ما ضغط عليَّ بأي شكل من الاشكال عكس عادته..

مسرة تعبت اضعاف مضاعفة على مرتين ادخل لغرفتها اللگاهة تبچي ومن تشوفني تسكت وتمسح عيونها وتروح للحمام.. شوفة امرأة مثل مسرة تبچي شي مو هين مسرة قوية مو بس شخصية هي قوية مشاعر ومتبين خوفها وحزنها گدام احد بس هسة منشوفها غير حزينة وصافنة تفكر..

من تتصل بـ شُهيب ويتأخر بالرد تبقى ترجف من يرفضه وميرجع يخابرها تظل ترجف من يتأخر عن البيت وميبلغها بهالشي تنهار مثل ما صار اليوم "اليوم الرابع" گاعدين كلنا بالصالة نتابع فلم رعب وعقلنا مشدود بسبب الاحداث اله هي يا گايمة يا گاعدة يا رايحة للمطبخ يا صاعدة للغرفة تتصل بي ميجاوب تدزله رسائل ميجاوب وجهها صار اصفر وجسمها صار يرتعش خوف ورهبة تخاف لا يكون شمسون منفذ تهديده ومسويله شي..

گعدت على الدرج بالصالة وحدها وبيدها تلفونها حاطة ايدها على حلگها وسارحة بالفضاء، قررت اذا طول شُهيب اكثر اتصل بفاهد او مالك يدورون عليه لان وضع مسرة يخوف نخاف لا يصيرلها شي وصدگ تنجلط بسبب سكرها المرتفع..

عبرت الـ 11 محد من الولد رجع عبرت الـ 12 ولسه ماكو احد عبرت الوحدة ومحد اله اثر حتى اجهزتهم مغلقة الخوف بده يسيطر على قلوب الكل ومسرة ركضت للحديقة تگعد على المرجوحة تنتظر شُهيب بگلب دامي.. عرفتها هربت هنا حتى تبچي براحتها بقيت اباوعلها من الشباك المسكينة تبچي وتفرك بصدرها وجسمها يهتز بقوة..

عيوني تبچي وياهة وگلبي متگطع على اخوية وزوجته الي واضح تحبه حب چبير دگيت على نشوان ومروان اسئلهم عسى ولعل احد شايفه بس ثنينهم گالو طلع من الشركة من السبعة بالليل وبعد ما رجع..

محد فهم العلوية وماريا بشي ما ردنا نقلقهن صعدن نامن بغرفهن وبقينا بس البنات هنا، جنات وگفت بصفي وفيروز هم ثنينهن قلقات وخايفات وفيروز چانت قلقة على مسرة اكثر شي..

-جنات: بنات محد بيهم رجع معقولة صاير شي؟؟

-كيان: لا فاهد ومالك طالعين بشكل دزلي رسالة من العشرة بس شُهيب ماكو

انتظرنا وانتظرنا وانتظرنا الى ان دگت الساعة بالـ 2 بالليل، جسد مسرة هدأ من رجفته وسكتت عن البكاء بقت سارحة وتباوع لـ باب الشارع تنتظر أي لحظة احد يدخل من البوابة.. دقيقة دقيقتين وانفتحت الباب وطل منها شُهيب الشعر مخربط والرباط مفلول وقميصه الابيض بي دم وايده وصدره ملطخات دم..

شهگنا جميعاً مصدومات من منظره الا مسرة وگفت على حيلها من المرجوحة وركضت بكل سرعتها عليه تحضنه بقوة وتدفن وجهها بصدره.. نراقبهم من الشباك وعيوننا مدمعة على المشهد مچلبة بي متقبل تعوفه مشددة على جاكيت بدلته الرسمية وكأنها تستمد القوة منها لانها متگدر توگف على حيلها اكثر..

فتحت فيروز الشباك وعيونها مدمعة تريد تسمع لمحادثتهم هالفضولية بس ما اللومها حتى اني اريد اعرف شُهيب وين راح..

بقوا واحد حاضن الثاني لفترة طوويلة محد بيهم يحچي شي مسرة محاوطة رگبته وشُهيب يمسح على شعرها الناعم، اخيراً بعدت وجهها عن صدره ولزمته من راسه من وره تشهگ وتحچي بخوف..

-وين چنتت وييين

-مابيه شي حبيبي

-گلبي وگف شُهيب راح اموت من وراك الله ياخذك ويخلصني

-هو راد ياخذني قبل شوية

-شنوو شلوون

ضحك خفيف وتنهد بلاطف بأنامله وجهها المتروس دموع، ضربت كتفه خفيف حتى يحچي مسح على شعرها كم مرة وگال..

-اعترضوا طريقي ثلاثة مادري منين طلعلولي اجو يتعاركون من العدم عبالك كاتل ابوهم

-وبعدين؟؟؟

-تصرفت

-شلون؟؟

-شعليج حبيبتي المهم تصرفت وحليت الموضوع

-ما عرفت شيردون؟؟

-لا محد حچى بيهم المهم خلصت السالفة لا تخافين ما صار شي خطير

مسحت الدم النازل على رگبته وصدره وهزت راسها معترضة تغيرت ملامح شُهيب للقلق خلل اصابعه بين خصلات شعرها وهمسلها شي بخفوت ما وصللنا رجعت تهز براسها معترضة وهالمرة كبر القلق بملامحه واستمر يحجي وياهة بالهمسة ويبوس راسها وايدها ووجهها الى ان حمى الموضوع ولزم رگبتها من الخلف يقبلها..

كلنا البنات وخرنا من الشباك وجنات تضرب على وجهها وتعض بأصبعها وفيروز ميتة من الضحك واني احس وجهي ولع فشلللة اشوف اخوية بهيج وضع ويه زوجته..

-فيروز: اويليييي اموت على هالسوالف وخري كيان اشوف

-كيان: انچبي انتِ مهيلگة خلي العالم ياخذون راحتهم

-فيروز: ما لگو غير الحديقة ياخذون راحتهم بيها

-جنات: اگلچن صدگ خاف العلوية ما نامت وراح تشوفهم من الشباك

-كيان: لا مستحيل اكيد نامت

-جنات: الله يشيلك نعلون يريد يفرق ذولة طيور الحب مو والله...

ما كملت جملتها بسبب دخول مسرة تهرول تدخل للبيت تصعد الدرج بسرعة وشُهيب يركض وراهة ما منتبه لاحد عيونه بس عليها ويصيح بيها توگف..

-مسرة: اخذت قراري شُهيب خلص لا تحاول!

-شُهيب: مو بكيففچ هذا القرار مشتررك ولازم ثنينا نوافق عليه!

-مسرة: ماا اريد اكمل بهاي المعاناة ماريد هالعلاقة تعبت منها وما اگدر اتحمل اكثر صارلي ايام مريضة مدا اصحى ماكدر بعد افهمنيي اني...

-انطيچ من حيلي اذا تعبتي اخذي صحتيي وعافيتي وحيلي كله بس لا تكمليين

-حيلك الي ابوك يريد يسلبه؟ لو صحتك الراح يجي يوم وتروح شُهيب علاقتنا عقيمة وكل الدنيا واگفة ضدنا ابوية وابووك واخوانك محد راح يخلينا نعيش براحة عوفني خلينا نرتاح ثنيننا

-ما ارتاح اتعب بالزاايد لو رحتي اني طاقتي وقوتي اخذها منج گتلچ اني اتصرف لا تهتمين لشيي ماطولني بظهرچ

-ظهرك راح ينكسر بسببي وبسبب هالعلاقة المالها نهاية! اذا بقينا سوه اني امووت تعرف شنو يعني اموت؟؟ ابقى يومية حاطة ايدي على گلبي اخاف ابوك سوالك شي من وره هالزواج! اخاف من تتأخر بالرد اخاف تجيني سابح بدمك مثل اليوم تهجموا عليك ثلاثة من العدم!

-نسافر!! اخذج ونسافر لنهاية الدنيا نعيش سوه مستعد ابدي من الصففر بس لا تعوفيني

-لو نروح لقعر الارض هم يحينا ابوك! انتَ اذا تريدني اموت بقيني يمك وتفرج على موتي البطيء شُهيب ضربتين على الراس تووجع اني بنتي لليوم ما متخطية بُعدها عني لا تزيدها عليَّ وتكسر گلبي بموتك خليني اروح والله كلنا راح نرتاح

-گولي انتِ ترتاحين تعرفين كلش زين شنو يصير بيه اذا رحتي

بچت بصوت عالي تغطي وجهها وگعدت على الدرج عيوننا تصب دموع عشرة عشرة كل هالمحادثة صارت گدامنا من قهرهم ما حاسين بوجودنا وشُهيب ما انتبه علينا واحنه واگفات على جهة نتفرج..

-مسرات

-كافي شُهيب كاافي ارحمنييي لا تصعب الموضوع اكثثر

-وهذا المطلوب لا نصعب الامور ونخلي الرياح تجري بما تشتهي السفن لا نستبق الأحداث كلمن ويومه لا تبقين تفكرين زايد!

-ابنيي اني انسانة ساامة انسانة متناسبك انسانة حقييرة وراح تأذذيك اني مو نفس ما متخيل كلشي بحياتي غلطط من ساسي لراسي كللشي بيه عيب كلني خلل واغلاط واهمها زواجنا انبنى على خطأ مابي شي صح غيرك!!

-كلشي يتصلح ما اشوف بيچ عيب راح نعالج كلشي ما عاجبچ بعلاقتنا وراح...

-مااكو شي يتعالج بعلاقتنا طلگني شُهيب وخلصني من هالهم الترررس گلبيي من يوووم عرفتك لسسسه تعبت من گلبي الضعييف تجااهك!!

على اثر صوتها العالي طلعت العلوية من غرفتها تلف بالشيلة بقت واگفة فوگ اكدر اشوفها ساندة ايدها على محجر الدرج بدون لا تتدخل..

-شُهيب: صرت هم مسرة؟

مجاوبته صعدت تكمل الدرج لغرفتها وهو بقى هنا واگف ومنزل راسه قابض على فكه بقوة وعاصر محجر الدرج بأيده لو ما چان حديد چان تكسر بيده من قوة ضغطته..

دقايق چانت ونزلت من فوگ بيدها جنطة چبيرة، عبرته ممهتمة لوجوده ووجهها صاير دم وشفتها السفلية ترجف مال وحدة حابسة البچية وراح تنفجر بأي دقيقة، بدون كلام شال جنطتها وشمرها بقوة على الحايط بعصبية شهگنا خايفات من الموقف ومن قوة الشمرة الجنطة چرخها انكسر..

-شُهيب: رجعي فوگ!

-ما ارجع

-رجعييي فوگ گلت انييي اوليي منااا

-ارييد ارجع لابووية

-ما ترجعين لاستغفر الله راح اعوفج كم يووم ترتاحين ونرجع نحل هالموضوع

-ماكو شي ينحل راح نتطلگ باجر اروح ارفع عليك قضية طلاق!

فتح عيونه على وسعها وبنفس الوقت نزلت دمعتها وتبلع بريگها تغطي على الغصة الملت اوتارها الصوتية..

-مسرة: راح تطلگني شُهيب بدون مماطلة ونحل الموضوع بدون فضايح باچر انتظرك بالمحكمة

گلبي تگطع من نظرته وخيبة الامل بعيونه، هز راسه ما مصدگ هاي مسرة، تنفسه صار عالي والغضب والقهر بيّن على ملامحه الهادئة، تركها وراح طلع من البيت بكبره بقت تتابعه من الشباك لحدما طلع مجرد شافته اختفى وره باب الشارع وگعت بالگاع ميتة من البچي وتضرب على گلبها بقووة هبدت صدرها هبد، حاوطناها البنات بدموع واحضان نهدأها بس ماكو فائدة متكرر ومتگول غير جملة وحدة..

-خذلته.. كسرته وهو الصارلي سند

نزلت العلوية تراقب من بعيد الاجواء ساندة نفسها على عوچيتها ما نطقت حرف بقت ويانه بدون لا تشارك بسؤال او مواساة وكأنها بحضورها دتگول اني هنا شوكت متحتاجوني تگدرون تشاركوني اسراركم وراح اكون وياچن بالحلوة والمُرة وما راح اعوف وحدة بيچن حايرة..

بين الونة والحسرة فجأة فزت من مكانها مسرة عبالك تذكرت شي مسحت عيونها ووخرت شعرها عن وجهها تدور تلفوني..

-وين تلفونج كيان وينهه اتصلي بي بسرعة ولج خااف يسووله شيي بس يطلع مناا

-كيان: هذا هذا راح ادگ

اتصلت وجهازه يطلع مغلق من قبل شوية انگلب حالنا وگلب مسرة نار تفرك بصدرها وروحها تلوب سكتت من البچي ودگت على حارس عمارة شُهيب الساكن بيها تسأله اذا وصل لو بعده والحظ الحارس گال شُهيب ما وصل وما بيّن..

ازداد وضعنا سوء وهاي المسكينة يا رايحة يا رادة كلشي بيها يرجف العلوية اشرت لـ فيروز تجيبلها مي لا يصيرلها شي ما قبلت تحط شي بحلگها واتصلت على شخص مجرد جاوبها الطرف الثاني بچت وهي تگول..

-مسرة: سام.. سام دورلي على شُهيب امانة شوفلي وينه ولا تعوفه وحده ابد ابقى حاميه من بعيد لبعيد بدون لا يحس عليك لا تسمح لاحد يتقرب منه

سكتت شوية تسمع للطرف المقابل بچت تغطي حلگها وجاوبت بصوت مكسور..

-لا ساموو اني مو بخير ابد مو بخير بس هسة عوفني وانتبه على شهوبي لا تعوفه ابد ولا تغفل عينك عنه حتى لو رجع لبيته ابقى واگف بره امانة اعتبره ابنك مثلما معتبرني بنتك وتخاف عليَّ

سدت الاتصال واخيراً العلوية تدخلت ونطقت بحديث توجهه لمسرة..

-گومي حبوبا نامي وباچر يحلها الف حلال

-مسرة: بيبي والله الصار غصباً عني اخاف لا يسووله شي

-العلوية: ادري يما ماكول غير حسبي الله ونعم الوكيل بالچان السبب گومي يبعد هَلي نامي الخوينس ما يعوفچ لا تحاولين هذا الاغم عاشگچ ويرجف عليچ خلي هو يتصرف همه زلام بيناتهم ويحلوها

-مسرة: لازم نبتعد على الاقل بس گدام ابوه لازم يقتنع احنه راح نتطلگ بس المشكلة شُهيب حتى تمثيل ميقبل نمثل احنه منفصلين ميقببل

-الله يشيلك يا جعيفر سودت وجهي الله يسود وجهك دنيا واخرة

گوة صعدنا مسرة لغرفتها وهالليلة كلنا نمنا يمها طبعاً هي ما غفت عينها للصبح كل شوية تتصل بـ سام وتتأكد منه وما ارتاحت الا من گللها وصل لـ شُهيب ولگه مكانه..

من صباحيات الله نزلت جنات تسوي ريوگ وتصعده هنا ورجعتلنا تركض..

-بناات رجع مالك رجعع

طفرت مسرة من الفراش تركض تنزل الدرج شفناه يدخل مستعجل و وگف من شاف وضع مسرة التعبان..

-مسرة: نهيت موضوعنا يلا حل الباقي مثلما وعدتني

غمض عيونه وذب نفس مرتاح وكأن موضوع شُهيب ومسرة صاير جبل فوگ صدره، هز راسه وگال بثقة..

-اني وعدتچ وما اخلف بوعدي محد راح يتقرب من شُهيب اذا تطلگتو

-مسرة: موضوع الطلاق ياخذ وقت شوية بلغ ابوك احنه انفصلنا ومستحيل نرجع بس خلي يعوف ابنه يعيش حياته ويشوف شبابه

-ماتوقع راح يقتنع ابوية يريد يشوف ورقة طلاقكم بعيونه

-راح احاول استعجل بالطلاق

-تمام، من رخصتكم

كمل الطريق يهرول فوگ يصعد الدرج يطبگ بايتين بايتين وضعه وركضته تقلق بقينا وحدة تباوع للثانية..

-جنات: رايحة اشوف شبي

ما لحگت تصعد لان مثل ما صعد نزل مالك وبيده اربع انواع اسلحة فتحت عيوني مدهوشة شصاير؟؟ اندار على جنات بحركة خفيفة وگال بأستعجال..

-خليتلج مصروف فوگ اني مسافر

وهيچ عافنا وطلع من البيت يهرول ركب سيارته وشخطها يطلع من كراج الحديقة واحنه واگفات مثل الطرنات منعرف شكو!

فاهد اختفى! مالك اختفى والاهم شُهيب اختفى! كلهم اختفوا في ظروف غامضة و سام بنفسه ميعرف شُهيب وين راح يگول فص ملح وذاب بس متأكدين ما سافر لان اسمه ما موجود بالمطارات..

اسبوعين احنه بهالدوخة ارواحنا طگت ومسرة صبرها نفذ سام لگه شُهيب وگال سافر لواحد من اصدقائه بغير مدينة ورايحين وياه نشوان وفاضل وهالشي خفف علينا شوية لان ناخذ اخباره منهم بس هو موصيهم ميجيبون طاريه بشي..

بيوم الرجعوا مسرة قررت تداوم بالشركة من بعد غياب ثلاث أسابيع تقريباً بسبب وضعها الصحي، بدلت وكشخت على اخر حباية ونزلت الدرج وتفاجأت من طلبت مني اروح وياهة..

-كيان: ليش؟

-مسرة: حتى خاف استخف وياه گرصيني وذكريني

-تمام

طلعنا سوه للشركة بوجهنا لمكتب نشوان طبعاً نعرف شُهيب هناك لان شفناه من كامرات مكتبها سوينا روحنا مندري هو هناك ومسرة تعمدت تروح حتى تشوفه وتطمن هو بخير بصورة غير مباشرة..

-مسرة: صباح الخير

دخلت المكتب بثقتها المعتادة جاوبوها نشوان وفاضل وشُهيب باقي گاعد عينه على الحاسبة يشتغل، رمقته نظرة تنتظر منه يجاوبها بس للاسف خذلنا من ما گال شي..

-كيان: شوشو ردت اجيكم هالفترة بس مسرة كلش مرضت خطية وماگدرت اعوفها

رفع عيونه شُهيب لـ نشوان وباوعله نظرة ما فهمناها، حمحم نشوان وگال..

-نشوان: شلون صارت صحتچ مسرة طمنينا؟

-مسرة: بخير

رجع شُهيب يباوع لـ نشوان ونشوان هز براسه ورجع يحمحم..

-نشوان: رحتي طبيب؟

-مسرة: اي

غير گعدته شُهيب وحك طرف انفه حمحم نشوان للمرة الثالثة وگال..

-شگال الطبيب؟

-گال حالتي النفسية تعبانة

هنا سد شُهيب الحاسبة ورخى ربطة عنقه، هز راسه نشوان وگال..

-نشوان: ليش ليش ماكو شي يستاهل تتعبين علموده

-مسرة: گلبي غبي شسوي

مسح شُهيب على شعره ورخى ظهره على الكرسي يحط رجل فوگ رجل، صفن نشوان شوية عليه ونظراته مفضووووحة خرب روحك شوشو..

-نشوان: ها ها ههههههه اي شكو ماكو

ضرب وجهه شُهيب بأيده، ابتسمت مسرة وابتسمت وياهة خرب نسى شنو لازم يگول مبين ذااك وينه شُهيب ملقنه تلقين شنو يسأل مسرة من تجي حتى يتطمن عليها بدون لا يحچي شي ويبين روحه مهتم بس وين ما مهتم وهو راح يموت حتى بس يباوعلها وتحجج من اجه يسلم عليَّ وتعمد يطخ كتفه بكتفها..

**

"مسرة"
ارتاحيت من شفته بخير بس شمسون للان مهدد حياته و سام وصللي خبر اكثر من مرة شُهيب دخل بعركة چبيرة بهاي الاسبوعين حتى من سافر ناس تتهجم عليه من وره يردون يأذوا ويطعنوا بظهره غدر واني هاي الاسبوعين گضيتها لا ليلي ليل ولا نهاري نهار..

شنو اسوي اكثر وشمسون يعوفه؟؟ انفصال وانفصلنا بقى بس الطلاق يتم بالمحكمة وتفض سالفتنا بس هالبني ادم ماعنده رحمة حتى على ابنه، يتونس على دمار ولده واذيتهم، خابرت مالك ابلغه وگال ابوه قافل الا يشوف ورقة طلاق ومعاند وراح يسوي الاتعس اذا ما استعجلنا ايدي انربطت والدنيا سودت بعيني..

للمغرب احتاجيت شي من مكتبه رحتله لگيته فارش سجادته يصلي، گعدت على الكرسي انتظره يكمل صلاته ما گدرت اخفي ابتسامتي احبه من يصلي واحبه من يدعي واحب صوته وهو يقرا فاتحة الكتاب والتوحيد بالصلاة ويجهر بصوته المميز..

كمل صلاته ولم السجادة، لبس حذائه وجاكيت بدلته الرسمية وكفوفه الجلد حاطهم على ميز المكتب مالته لاحظته لابسهم بسبب الخدوش الصايرة بأيده ماعرف منين مصدرهن بس شكلهن يخوف وكبر قلقي عليه..

-محتاجة منك شي

-تفضلي

-اكو ملف مال شركة ڤايد بير وينه احتاج اتطلع عليه

اشر على الميز عرفته يقصد الملف الاسود سحبته اتطلع عليه واقراه اتعمد اطول بالگعدة هنا مستمتعة ومشتاقة لرائحة القهوة الممزوجة بريحة عطره الهادئة..

بينما اني گاعدة اجاه اتصال بقى يدگ هواي وما جاوب، رفعت عيوني لا ارادي اشوفه صافن على شاشة التلفون وعاگد حاجبه مستغرب استغراب شديد.. اخيراً قريب لا تخلص الدگة جاوب بقلق..

-عمي؟ شنوو؟؟ شصاير شلون؟؟ لا اخواني مو هنا مادري عنهم صار فترة ما متواصلين... شنووو؟؟؟؟ وصلك خببر؟؟؟ لااا لااا تگولهاا!! ماااااات؟؟؟ مااااااااات؟؟؟؟؟......

يتبع... 😓

━━━━━━  ━━━━━━

ماگول غير الله يساعد گلبج يا مسرة 😭😭

رأيكم بتصرفها من عافته هل اكو حل اخر غير الانفصال ويه شمسون؟ عن رأيي لااا ماكو 😤 انتو شتگولون؟

توقعاتكم الجاية بعد المشهد المستقبلي الي نزل على الانستا؟؟؟