رواية ابي والغزلان الفصل العشرون 20 - بقلم ريام هادي

ابي والغزلان
للكاتبة Reem
البارت الثامن عشر

ثـلاثة معشـعشة بـعمـري...
أوف__وآه____والحـسـرة!
يعـمري الـما عـرف راحـة...
تريّـث دربڪ شگصـره؟!

صيري سباعيه وكافي على كولشي وبجيتي مره الثانيه اذا شفتج تعوين اعلكج من شعرج بلشجره واخلي الجهال كلها تشمر الطابوك عليج
سليل : خفت منه وشمرت الخيط ونزلت اعيط من الخوف
سندس : شبيج ولج
سليل : ماما هذا عمو الوحش يريد يعلكني بلشجره
سندس : ولج ياوحش احجي عدل خلي افهم
سليل : عمو الجانه ذاك اليوم أبو شوارب هذا الطويل كولش
سندس : قصدج سجاد
سليل : مااعرف اسمه
سندس : الي اجه بليل وجاب حلويات
سليل : اي هو
سندس : وين شفتي
سليل : فوك بلسطح جابلي طياره وكال اذا بجيتي اعلكج بلشجره
سندس : اوف ياسليل شكد تبجين يلام بيج
سليل : فتحت عيوني بخوف يعني راح يعلكني
سندس : لا ولج يشاقه وياج لتخافين
سليل : والله هو كال
سندس : كافي روحي غسلي وجهج شوفي شون انطعن من البجي واني احجي وياه
صعدت ماما للسطح وملكته وكالت اكول لأبوج يحجي وياه وانتي هم على كيفج شكد جبانه اكيد يشاقه وياج
سليل : والله ماما طبك عيونه وكال اعلكج بلشجره اذا بجيتي
سندس : يله كافي قابل كال راح اذبحج كافي لتبجين وروحي تغدي ويه خواتج
سليل : مااريد مجوعانه اريد انام
سندس : شيخلصني من ابوج اذا اجه وملكاج ماكله اكلي شويه وروحي نامي
سليل : ماشي
رحت للمطبخ لكيت حسام كاعد ياكل ورشا بصفه وكل شويه تاخذ من اللحمه مالته وتحط بحلكها وهو يعيط وهي ولا يمها
كافي رشاوي هاج لحمتي
رشا .. لاع اريد من هاي جبيره
سليل : هاج ولتسوين مشاكل
حسام : بس تمدين ايدج اعضها واسويلج ساعه تأذي
رشا .. والله اكول لبابا

سليل : طخت برجلي ريم تلعب بلخاشوكه بلكاع حطيت بحلكها اكل اتذبه متحب الباميه حطيت تمن ابيض تاكل
اكلت شويه مكدرت وكمت غسلت ونمت حتى اكعد اقرا نمت حدود الساعه وكعدت اقرا بس خايفه من عمو الوحش
بقيت فتره من اطلع امد راسي اشوفه موجود لو لا بس اشوف شويه منه اطب اركض ومن اسمع صوته ويه بابا بلباب ما اطلع ابد
امتحنت وبأخر يوم من الامتحانات راجعه مكيفه لان مشايله جنطه ثكيلة وبس المحفظه تكول عبالك جبيره وفرحانه اشتريت موطا من عمو ابو عدنان ابو الدكان واخذت قمردين لرشا شيخلصني اذا ما اجيب ولريم حلقوم وبسكت احط بسكت اثنين وبنصهم حلقوم احمر وناكله اني وياها نحبه باوعت خلصت فلوسي ردت اشتري شى لحسام

بس الفلوس متكفي يله ماما كولشي تشتريله ورجعت اتمشى فرحانه والعلاكه بيدي واحرك بيها جان يصير كدامي من الخوف رجعت ليوره وبلعت ريك
سجاد : خلصتي امتحان
سليل : بقيت اباوع بوجهه وعيوني مدمعه
دنج وعيونه الي اخاف منهن موت دوم مخنزر جان يكولي
سجاد : هسه اني مسويلج شى بسرعه دمعتي
سليل : اريد اروح لأمي
سجاد : جاوبتي زين شطوره لو كسوله
سليل : شطوره واكفه جامده
سجاد : شنو هذا الي بلعلاكه
سليل : الي ولخواتي وحضنته خفت ياكل منه وميبقى شى النا
سجاد : اريد اشوف
سليل : ماااا تاكله ومتبقي شى
سجاد : لا ما اكل بس اشوف
مديت العلاكه وارجف فتحها باوع ورجعها وجان يكول منو يحب البسكت والحلقوم
سليل : اني وريم

سجاد : اني هم احبهم تسويلي وحده
سليل : فتحت الجيس وكعدت على الرصيف حتى ميوكع مني وطلعت بسكت اثنين وحطيت بنصهم وانطيته جان ياخذها ويحطها كلها بحلكه يمه بلعها يعني يمكن يبلع جهال هم
سجاد : ليش صافنه
سليل : هاي شون اكلتها هيج راح تبقى كامله بطنك
سجاد : لا هي صغيره حطيتها بحلكي واكلتها
سليل : حلكك شكبره
سجاد : يله كومي روحي للبيت
سليل : اي كمت نفضت ملابسي وركض للبيت دخلت شفت ماما تخبز
ماما حبابه الحنونه مالتي مو ياخذها حسام
سندس : شونج بالامتحان بالاول
سليل : ١٠ من ١٠ بس الحنونه مالتي وينها

سندس : سويت لكل وحده بيكم حتى لتتعاركون طبي لخواتج وبدلي
طبيت وادور على البنات ماكو اصيح ماكو واسمع يضحكن بلحمام دخلت والكة ريم ورشا لازمات الدعابل مال حسام ويذبوها بلمجاري بلحمام ويضحكن عطت ولكم هسه يموتكم كتل ليش
رشا .. ثلل اخذ اللعابه مالتي وكطم راسها وكص شعرها خطيه اللعابه تبجي
سليل : وانتي اخذتي دعابله اطلعو من الحمام هسه يجي من المدرسه ويكص شعرجن وانتي ولج وضربت ريم تضحك شمعرفج بهاي الخباثه والله هسه يموتكم
اخذت الباقي من ايدهن وطلعن يكمزن مكيفات باوعت شكد هو عنده وبس ذني باقيات اخذت القوطيه مال الحليب الي حاط الدعابل بيها ورجعت كم دعبله جانت مليانه والله هسه ماما تشبعهن كتل وركضت وطلعت وجان يصير گبالي هو شاف القوطيه وجان يعيط ويركض جرها من ايدي

حسام : وين دعابلي ماما ويعيط بكل صوته
اجت ماما تركض عبالها بيه شى لان هرج الدنيا
سندس : شبيك ولك هبطتني
حسام : سليل ضيعت دعابلي
سليل : اباوع على ريم ورشا ختلن وره القنفه ويرجفن
سندس : وين دعابله ولج اني جم مره كتلج متمدين ايدج على غراض اخوج
سليل : هاااا وبقيت امتمت من الخوف
حسام : معليه اريد دعابلي وتمدد بلكاع يرفس من الاعصاب
جان ماما تلزمني من شعري وتعيط كتلج وينهن
سليل : ردت اغسلهم وكعو بلمجاري
جان تضربني راشدي احس اذني انشكت كعدت بلكاع ابجي وحاطه ايدي على وجهي
سندس : لا هاي انتي متقصده خلي يجي ابوج كل ما يحجي وكال حسام مأذي خواته خلي يجي يشوف سليل شمسويه
عقوبه عليج اسبوع كامل مالج مصرف مصرفج انطي لحسام يشتري دعابيل بيهم حتى اتوبين تمدين ايدج على غراضه
دفرتني وركضت للتنور تكمل خبز وهو كام عيب علية وطلع وره ماما

بقيت على كعدتي بلكاع ابجي جان تجي رشا وتبجي ويه بجيتي وريم صافنه وخايفه جان تجر ايدي وتلمس مكان الضربه وتبوسها
رشا .. العفو ثلل
سليل : لتلعبين بعد بغراض حسام حتى لتضربني ماما
رشا .. والله هو بجه لعابتي خطيه صارت عركه
سليل : كرعه
رشا .. عركة
سليل : ولج كرعه هاي هم اسمي وتگلبي
رشا .. ما اريدها اخذيها بس لتبجين
سليل : مسحت دموعي وجريت الجيس مال الحلويات الي اشتريته وشمرته اول مطبيت واشرت لريم اجت تركض
وكعدو بصفي هاج هذا القمردين مالتج جان تجره من ايدي وتحطه بحلكها ولج اوكفي خلي اوخر الجيس
رشا .. لاع احبه هيج
سليل : موزين
رشا .. ما طيب
سليل : معليه اذا وجعتج بطنج وتصير بيها اووا
رشا .. لاع ماكو اواا

سليل : تعالي ريم وكعدت بصفي وناكل سوه وراها دخل حسام يعيب وماكل الحنونه مالتي كمت ابجي ليش اخذها بس اخاف اكول لماما لتكتلني وراها طبيت غسلت واجه بابا حبيبي ركضت علية
حجي طه : هله بحبيبة ابوها تعالي شونها حبيبتي بلامتحان
سليل : ١٠ بابا
حجي طه : عفيه بلشطوره وانت حسام
حسام : اني هم ١٠ اني اشطر من سليل
سليل : اني اشطر
حسام : لا اني
حجي طه : اششش اثنينكم شطار يله خلي نتغدا رجعت علمودكم هاي شبيه وجهج احمر
سليل : لزمت وجهي اخاف اكول ماما ضربتي خاف بعدين تأذيني
ضربتني صديقتي
حجي طه : وليش ضربتج
سليل : نلعب
حسام : لا ماما ضربتها لان وكعت دعابلي
حجي طه : سندس وينج
سندس : هااا داصب الاكل
حجي طه : ليش هيج خدها احمر من الضربه
سندس : شكتلك مو بس مكالت ليش ضربتها
حجي طه : حسام كال هي كذبت
سليل : دنجت لان بابا ضاج مني
سندس : واذا ضربتها قابل موتتها خلي اتوب تلعب بغراض اخوها
حجي طه : روحي كملي الغدا وانتي سليل مو عيب بابا تكذبين علية الي يكذب وين يروح
سليل : للنار
حجي طه : والله زعل منج لان كذبتي وراح يذبج بلنار
سليل : لالا بعد ما اكذب
حجي طه : يله انطيني بوسه وروحي ساعدي امج

مرت الايام واني اسمع ماما وبابا دوم يتعاركون بس ما اعرف ليش واجت العطله ونجحنا اني وحسام والعطله خلصناها بلبيت

شهر ٨  لعام ١٩٩٢ كاعده العب اني ورشا بلعابات بلهول
اسمع ماما وخاله انوار من وره البيت يسولفن لان شباك الهول الداخلي على الممر
انوار : صخام بوجهج ولج هم حبله
سندس : اي ولج اليوم عرفت
انوار: وشسوين بيه على ياخير
سندس : ردت ولد ويه حسام طك گلبي واني اشوفه وحده
انوار : واذا اجت بنيه
سندس : تف من حلكج فال الله ولا فالج ان شاء الله ولد
انوار : واذا ولد شنو الي يقدم والي يأخر قابل من تجيبين ولد راح تصير عندج فلوس
سندس : اكولها اريد اخ لحسام يسنده
انوار : شيسند هذا الوكت فلوسك هي سندك مو تكوليلي ولد لو بنيه انتي دوم تلطمين على حظج بس كله من ايدج
سندس : اوف ياانوار لتاكلين گلبي
انوار : طبج مرض مو بعدين تجين تعوين يم راسي وتندبين حظج اكليها راح يصيرون ٥ جهال برگبتج شون تفلتين من عيشتهم
سندس : والله ماادري مرات اصفن واكول اكعد واسكت وين اولي وذوله برگبتي ومرات من اشوف مرت علي شون تركب السياره والفلوس وحتى اشواق مو زعلانه صار اشهر من رجلها هم مترسه ذهب وطلعات ويه مرت علي واني ضاله اتحسر
واريد اهج من الملابس الي علية
انوار : اني مره كتلج بس انتي مأخذتي كلامي

سندس : مخبله انتي لو اموت مااسمع كلامج من كل عقلج
انوار : ضلي لعد بلفگر وياوجة الفگر وابقي فلانه حطت وفلانه جابت وشون ياانوار وشسوي ياانوار اموتج اذا حجيتي بعد
سندس : شبيج اگلتيني وشربتيني غير انتي صديقتي الوحيده وماعندي غيرج
انوار : وشنو الفايده وانتي متسمعين كلامي اروح اكمل شغلي وبعدين نسولف يله روحي لجهالج

سليل : طبت ماما گالبه وجهه بس فرحت من عرفت راح تجينا اخت بعد كلت بلكن ابنيه ما اريد ولد يطلع مثل حسام ويأذينا

حجي طه : رجعت ادفع العربانه المغرب ولمحت نهر تغسل الطرمه عفت العربانه ورحت عليها
نهر : هلا بحبيبي هلا بأبويه واخويه بسته واني مشتاقه اله صار كم يوم مشايفته
حجي طه : ولج ليش متجين
نهر : شغل هنا بلبيت وماالحك
حجي طه : وجهك اصفر وحالج تعبان شبيج
نهر : ياروح نهر مابيه شى ليضل بالك
حجي طه : تعلميني بيج احجي لو متكدرين
نهر : غير وقت اسولف الك
حجي طه : تعالي اليوم للبيت
نهر : شوي واجي وراك ما اتأخر
حجي طه : يله انتظرج ورجعت للبيت والحر كاتلني شهر اب
دااصعدها فلت التاير اهووو شراح يسوي
سجاد : الله يساعدهم
حجي طه : هلا بسجاد ويساعدك
سجاد : شبيه الحجي يسولف ويه نفسه
حجي طه : والله هذا التاير انشلع گلبي بيه كل شويه وفالت
سجاد : شو اشوفه وكعد يسوي بيه ويدك هو وطه
جان تصيح انعام
انعام : سجاد يمه سجاد وينك
سجاد : هنا عمه بلباب
انعام : مدت راسها وجان تشوفه مدنج ويشتغل ويه طه
شعندك يمه ليش توصخ روحك وهدومك كوم شجاك
سجاد : اندار سجاد وهو كاعد بلكاع وباوع على انعام
حضريلي الممه عمه
انعام : شنو ياممه

سجاد : ليش تحسسيني عمري سنتين والعب بلطين
انعام : غير اخاف عليك ياابني وشنو كاعد تسوي عربانته هذا مو شغلك
حجي طه : كوم سجاد اني اكمل
سجاد : حجي انطيني البرغي من يمك
انعام : مو احجي وياك
سجاد : ادخلي جوه عمه من اكمل اطب لتخافين مااتيهه عود ابجي واطلعيلي
انعام : هاي فوكاها
سجاد : انطيني طه هاي اليمك ومجاوبها اصلاً طبت وركعت الباب وراها

حجي طه : لتسوي مشاكل علمودي تره والله متسوه
سجاد : حجي اني وعمتي واعرف شون اتصرف وياها ليضل بالك يله خلي نحرك العربانه خاف اكو شى راخي بيها حركناها
حجي طه : والله عاشت ايدك خوش ثبتتها
سجاد : برسم الخدمه تدلل حجي
حجي طه : تعال على الاقل غسل جوه
سجاد : لا اريد اغسل يم عمتي اريدها تشوف شون المغسله صارت كلها دهن وصخ
حجي طه : يمعود كولشي سوي بس لتتقرب مني لان تنصرع
سجاد : مشكلتها مو مشكلتي بس تضوجني ثاني يوم اعوفلها البيت انت بس ليضل بالك وتوكل ودخل العربانه
اجت نهر من بعيد وصلت يمهم وعبايتها فوك راسها
نهر : هااا خير
سجاد : هله بلحنينه شونج نهر
نهر : حبيبي سجودي انت شونك
سجاد : بخير
نهر : شصار
سجاد : جانت صاحبتنا مريضة وعالجناها
نهر : هههههه عاشو خوش دكتور
حجي طه : خلف الله علية
سجاد : من رخصتكم
حجي طه : متجي تتعشى يمنا
سجاد : بيت العامر بس عندي شغل لازم اروح
دخلنا للبيت واجت سندس
سندس : هاا ولج هاي منو اليوم جاينه صار شكد مماره
نهر : شسوي شغل وتعب
سندس : لعد الله يساعد گلبي بيت وجهال هاي انتي ماعندج جهال وهيج تحجين
نهر : دنجت ومكدرت اجاوبها
حجي طه : روحي حضري العشا اليوم تتعشى ويانه نهر
نهر : لا مو مال عشى شويه اشوفك واروح اخاف اتأخر على عمتي
سندس : صدك طه نسيت اكولك
حجي طه : خير
سندس : اني حامل
الكل سكت
سندس : شنو شو سكتت
حجي طه : لا بس گلتي مااسوي بعد استغربت
سندس : اريد اخ لحسام
حجي طه : وحتى لو بنيه نعمه من الله
سندس : اسكت اتشائم من هاي كلمتك كل مااحبل وكال حتى لو بنيه نعمه وتطلع صخام بنيه
نهر : صخام بوجهج كون دشوفيهن كل وحده منهن تسوه الف ولد
سندس : حقج عيني لو عندج ٣ بنات مثلي اكيد جان نفسج طگت على ولد بس انتي متحسين بيه لان متحبلين يله الله يرزقج
حجي طه : بلا كلام ماصخ وروحي سوي عشا
نهر : دمعت عيني من كلامها اعرف بيها من يومها مسمومه بس مرات الواحد من يواجهك بشى يمس روحك حتى لو كلام بسيط تنجرح مو عاد هيج شغله جبيره

حجي طه : شسويلها والله تعبت من سوالفها كتل ومفاد عيني واغاتي مفاد كمت حتى من تحجي هيج وتخربط اسكت من كثر مبزعت روحي شدعي لأمج على هاي الزواجه الكشره
نهر : عادي متعلمه عليها خلي تولي
بس لتكول كشره الله انطاك منها نعمه وغزلان
حجي طه : هو شمصبرني عليها وعلى لسانها غير جهالي كمت حتى مااكدر اضربها كدامهم لان كبرو ومااريد يبقى بالهم ابوهم يگتل امهم هي بس لو تبطل تنك وتلغي جان اني بخير
نهر : الله يعينك

حجي طه : عوفج منها شبيج وشصاير وضعج مو زين مبين من عيونج
نهر : ام سامي مدمرتني تكوم وتكعد على سالفه الجهال كامت ياهو الي تشوفها تشكيلها لان مااحبل قريبه جيران بسرعه وصاحت سودة علية سامي ماعنده جهال الي بعمره عدهم ٣ زين اني شعليه حاولت احجي وياها عمه والله اني مابيه شى والله الدكتوره تكول مابيج شى متصدك تصور قبل يومين من حركت گلبي اخذتها من ايدها وكتلها امشي نروح لأي طبيبه انتي اختاريها ورحنا اثنين بنفس اليوم والله تسحل بيه وحال الضيم حالي وكومه فلوس وتالي نفس الحجي مابيها شى
حجي طه : ًوسامي

نهر : سامي هلمره دوخني مدري ليش حسيته يميل لأمه گلبي ممرتاح طه وخايفه لياكلون بعقله ويزوجوه
حجي طه : شحده غير العب بيه طوبه ماطول مابيج شى ماله حق
نهر : ماادري كام يتصفن ودوم من يجون جهال اخته يذب كل حسره شكبرها كعدت وياه وفهمته يسكت يكول الله كريم
شسوي طه احس راح ضيع مني حب عمري
حجي طه : بعد مابيها مجال احجي اليوم وياه
نهر : اخاف تصير عركه ويكول تشكي لأخوها
حجي طه : غير اخوها قابل غريب لتخافين خلي افهم بشنو يفكر راح ادز علية هسه حتى نفهم
نهر : الله يستر

بيومها اجه سامي وكعد ويه طه وحجو رغم جنت يم سندس بلمطبخ بس الوب وسمعت يكوله هي توهوس امي مره جبيره ومن حقها قابل اني اسمع كلامها شعندي غير نهر هاي حب عمري مستحيل ابدلها بألف مره
صح كلامه حلو ويطمن اكبر واحد بس مدري ليش احس بغصه بگلبي تعشينا ورجعنا للبيت بس حاسه سامي بغير عالم وخايفه لا امه تغيره علية حتى معاتبني ليش حجيت لأخويه التزم السكوت

بدت المدارس جنت فرحانه بلصدريه الجديده واخيراً اشتريت وحده لان العام جنت البس القديمه وطولت القديمه صارت كصيره علية وجنطه جديده طايره بيهم ورشا بيدي مرحله اول ابتدائي  واني مرحله رابع ابتدائي وحسام ثالث بس هو يروح ويه اصدقائه ميقبل يمشي ويانه
اجه الهوا البارد والشتا تلبسنا ماما لحد منحس روحنا كنتور ويمشي جنت دوم اشوف عمو الوحش وهو يباوع علية نظرته المعروفه من جنا قبل منوصل بيتنا اباوع على البيت الجبير ماما كالت هذا بيت جدكم بس ليش ممنوع انطب اله وليش من اسأل بابا واطلب منه نروح لذاك البيت وهمه عدهم جهال بعمر ريم ورشا نلعب وياهم ميقبل يكول اياكم بيوم ادخلون هناك  ازعل منكم وبعد مااحبكم
بس اني ورشا عيونه بلرايحه والجايه على ذاك البيت الجبير وبيه حديقه شكبرها ومرجوحه امنيتي اصعد بيها والعب ولو شويه بس اخاف بابا يزعل واخاف هم من بيبي انعام لان ماما تكول تاكل جهال لتوصلون لهناك

وبشهر ال١٢ تحديداً ١٩٩٢ راجعه من المدرسه بلطريق اتمشى وحدي رشا ممداومه مصخنه من وره الجو وكالت ماما اخاف على گلبها كعدتها اليوم بلبيت قريب مااوصل البيت شفت عمو سلام جان من يشوفني يكرصني من خدي يبوسني اني ورشا ويروح وكف وباوع علية
سلام : اليوم وحدج
سليل : اي عمو رشا مريضة
سلام : تجين اشتريلج من الدكان
سليل : بابا ميقبل
سلام : شنو ميقبل غير اني اخوه
سليل : اي اخوه
سلام : يعني هسه حسام اذا اشترالج بابا يزعل
سليل : لا
سلام : شفتي لان اخوج واني اخو بابا يعني مثل بابا امشي اشتريلج الي تحبي
تعالي مد ايده لزمتها ورحنا نتمشى وصلت للدكان اشتريت كاكاو كلش احبه بس ماعندي فلوس يوميتي متكفي اشتري لهذا اشرت علية اخذه عمو اليه وانطانياها استحيت اطلب بعد ردت اشتري لخواتي
طلعنا من الدكان وطايره بلي بأيدي
كعد امشي وعمي لازم ايدي وين راح يوديني عمري ١٠ سنوات طفله كل همي شون العب وما اقرا امتحان باجر واكل كاكاو بدون متضربني ماما وتعاقبني لان وصخت ملابسي اباوع للدنيا بعين الطفوله والبرائه والحياه الورديه لازمه ايده واني كلي ثقه هذا مثل بابا غير اخوه يباوع عليه ويبتسم وبأيدي الثانيه نستله هو انطانياها وكال تعالي ويايه طبينا لبيتهم الجنت دوم اباوع عليه وابقى صافنه من جماله واكول هم يجي يوم ويصير عدنا بيت مثله

وكفت بلباب
سلام : هااا ليش مطبين
سليل : بابا ميقبل يزعل
سلام : مالج دخل اني احجي وياه
سليل : زين بيبي انعام هنا
سلام : نايمه هيج وكت اني مراح ادخلج للبيت راح نروح نلعب بلحديقه
سليل : ابتسمت فرحانه واخيراً راح اركب المرجوحه طبيت وطايره بس اريد اركبها اباوع هاي الحديقه الي دوم اباوع عليها من السطح كيفت وركضت عليها
بس يأشرلي صوتج لحد يحس
اني هم العب وساكته
جان يجرني تعالي عمو اراويج بذيج الغرفه هم اكو العاب
سليل : لزمت ايده واريد اشوف ذيج الغرفه الصغيره تشبه المخزن فتح الباب طبينا اباوعها شبه ظلمه تخوف بيها كواني طيحن وتمن وغراض بس نظيفه مرتبه انداريت على عمو سلام
عمو ماكو ملاعيب
سلام : تعالي اسولفلج ليش ابوج ميقبل ادخلون هنا
اني هم دخلت وياه وعضيت شويه من النستله الي معفتها ابد من ايدي سد الباب وراه و
كعد على كرويته (قنفه ) قديمه وسحبني وكعدني بحضنه
شوفي عمو ابوج احنا نحبه وهو هم يحبنا واريد الي يصير هنا متكولي اله لان يزعل وبعد ميخليج ادخلين
صفنت بوجهه كولشي مفهمت بس حسيت ايده بدت تنزل على جسمي ويمدها على صدري اني صغيره وماافهم شكعد يسوي بس اعرف عيب هيج يسوي دفعت ايده عمو عفيه عيب

سلام : اذا سكتي اجيبلج كارتونه من هاي النستله ورجع مدها جوه الصدريه ويصعد بيها وايده جبيره ويلزمني بقوه ويتلمس جسمي دفعته وشمرت النستله مااريدها عمو وغوركت عيني جان يلزم حلكي حيل وسحبني علية بلحظتها خفت خوفه وكمت اعيط اباوع المكان منو يسمعني بيه بس ابجي نومني بلكاع وبقى يلمس بيها حيل بصدري وجسمي ورجلي كمت اصرخ بس ايده ساده حلكي وصار فوكايه ورفع ملابسي حسيت گلبي راح يوكف  واعيط بابا الحكلي من خوفي سويتها على نفسي ومغمضه مدري شسوه وراها هو طفر من مكانه بقيت نايمه بلكاع واخاف افتح عيوني وثكل جسمه اذاني ولمساته خلت جسمي كله يوجعني
جان يجرني حيل وعاط

سلام : افتحي عيونج
سليل : مكدرت بس اشهك وسن يطك بسن
اسمع صوته بأذني ويكولي اذا احد عرف شصار اكتل ابوج طلقه واشمره شوفي فتحت عيني لكيت سلاح طويل بيده كمت ارجف وابجي لا عمو لتكتل بابا
سلام : متحجين شصار ومن اكولج تجين ويايه تجين بدون حجايه زايده
سليل : احرك براسي واشهك اييي اجي
سلام : بس اسمع حجيتي كلمة اموته واخليج انتي وخواتج بلشارع وحتى امج اكتلها اطلعين هسه گبل للبيت واذا سألتج امج شبيج كوليلها وكعت افتهمتي
احرك براسي وساده حلكي بيدي اييي
طفله ويهددوها بأبوها شون يصير حالها طلعت اركض حتى الجنطه مال المدرسه عفتها وابجي دخلت للركض للبيت
شافتني ماما جان تعيط ولج شبيج
مكدرت وكعت على وجهي فتحت عيني لكيت وصله على راسي كلها مي وماما يمي وتكولي شجاج شبيج وين جنتي
سليل : تذكرت كلام عمو وكتلها ورجعت ابجي وكعت

سندس : ولج ياوكعه هاي هيج حالج وجسمج مشخط
سليل : ابجي وبس اباوع بعيونها واسأل بنفسي عمو شنو السواه هو اشترالي الكاكاو ليش اذاني حتى بوكتها معرفت هو شسوه
لحظات خلتني يومين لا اكل ولا نوم وبس يسألوني ابجي حتى بابا حاول يفهم مني اخر شى امي قنعته بسبب الوكعه صارتلي هبطه وخوفه لهذا عافوني ارتاح داومت رشا واني بقيت بلبيت كمت من اختنك اخاف ابجي يم ماما اصعد بلسطح اول يوم من الصبح للظهر فوك لحد معاطت ماما تعالي انزلي الجو بارد راح تتأذين اكثر
جنت اكعد بنهايه السطح بلزاويه وابجي ما اريد اداوم اخاف عمو يجيني واخاف على بابا يكتله

ومن انزل ادخل للحمام اشوف رجليه كلها زراك وتأذيني وابجي شون اروح بعد وياه
بليل بلغرفه سمعت صوت عمو سلام متت رعب ختلت جوه الجربايه
سندس : هلا سلام تعال تفضل
سلام : لا بس ردت اشوف سليل شون صارت شفتها من رجعت للبيت مبينه واكعه خطيه يمكن متأذايه
سندس : اي والله وبس تبجي جسمها مزورك وكعةًكشره خطيه ومصخنه
سلام : سلامتها هاج هاي شويه شغلات للجهال واذا تحتاجين شى بس صيحيني
سندس : رحمة الله والديك والله بس انت تسأل علينا
سلام : وينها اريد اشوفها
سندس : هسه اشوفها الك من عيني
دخلت ماما وادور علية حتى مطلعت صوت حتى مطلعني اسلم علية
سندس : ولج سليل ماما وينج
سلام :ها وينها
سندس : يجوز تلعب ويه خواتها فوك ماكو هسه جانت بلغرفه
سلام : عوفيها براحتها اجي غير وكت اشوفها واخذها للمراجيح تغير جو من الهبطه مال وكعتها
سندس : اي والله ياريت انت عمها مو غريب
سلام : اكيد غير بت اخويه وبعيني يله رايح مع السلامه

سليل : طلعت ابجي شون مااريد اروح اخاف وبقيت الليل كله بس ابجي ماما عجزت تفهم مني ومكالت لبابا ابجي حتى ليضل يسألني كالت نامت وصرت زينه

ثاني يوم الصبح هم مداومت ورشا وحسام بلمدرسه وبابا بلشغل وماما طلعت لبيت بيبي واخذت ريم كالت تعالي مقبلت بقيت وحدي خفت وصعدت بلسطح وهم كعدت حطيت طابوكتين لكيتهم بلسطح وحاطه راسي بين رجلي جان اسمع صوته المميز صوت قاسي وقوي ويخوف وهادئ بنفس الوقت
سجاد : صار اكثر من ربع ساعه اسمعج تبجين شبيج
سليل : رفعت راسي شفته كباله بس بلسطح الثاني بيني وبينه شى قليل خفت منه كمت ردت انزل جان يعيط بيه بصوت مو عالي بس يهز ويخوف
سجاد : ارجعي لمكانج
سليل : رجعت كعدت هو واكف نص جسمه مبين الحايط الي بينا وبين ذاك البيت كولش ناصي حتى يكدر يعبر بسهوله
سجاد : منو وياج ليش تبجين
سليل : ماكو احد بقى يعيدها مرتين واني باقيه على نفس الكلمة ماكو احد
سجاد : انتي شكد عمرج سليل
سليل : اشرت بأصابيعي ١٠ سنوات
سجاد : يعني طفله وبعدج متعرفين شى

اسمعيني ماطول بعدج طفله وكولشي متفتهمين
اني من جان عمري ١٣ سنه بديت اوعى و اشوف ابويه وامي دوم يتعاركون اكول ليش مو واحد يحب الثاني
جان عندي اخت اصغر مني اسمها هبه الله مرات جنت احسها صدوك هبه من الله اليه حنونه وتلعب ويايه وتكمز جنت حتى من اضوج تگابلني وتكعد وبيوم امي هجت من البيت واخذت هبه وراحت حسيت عليها من كعد تطلع بس مكدرت احجي بقيت خايف وخاتل بفراشي بس من شفت كعد تاخذ هبه وياها كمت جان تكولي ارجع لمكانك توسلت بيها تعوفها لو تاخذني وياها مقبلت ركضت اكعد بابا حتى يوكفها دفعتني وقفلت باب غرفتي من بره  بقيت ادك ادك مااعرف شكد وابجي ماانسى نظره هبة ودموعها من سحبتها امي وراحت وراها انفتح الباب بابا فز من وره الدك مالتي بس بعد مضاع كولشي وامي انهزمت وين منعرف مكانها بقيت سنين واني طفل ادور على اختي بس ملكيتها  واشوف شون العالم اكلت وجهه ابويه وكل واحد يحجي شكل الي يكول انهزمت ويه واحد والي يكول سوت مكسوره والي يكول يجوز انتحرت محد رحمنا لا اني ولا ابويه بقت مكسورتها عار تلاحكنا ولحد ما مات ابويه من القهر حلفت من يومها ما أمن لمره لان كلهن خاينات ويوم موكعتي بلكاع وشفتج تذكرت هبه جنت مااقبل تبجي ابد لهذا اضوج من تبجين تذكريني بيها بأخر ليله من اخذتها امي نفس الشهكه نفس الدموع
لهذا دوم اعيط بيج من تبجين افتهمتي ليش

سليل : مسحت دموعي لا مفهمت
سجاد : جر نفس من الجگاره بقوه ونفخه ويه بروده الهوا وياها حسره وقهر  وكال احسن هو هذا المطلوب متفتهمين شى ليش لعد حجيت

راح اسألج مره وحده واذا مجاوبتي أذيج
سليل : فتحت عيوني بترقب ورجفه وگال
سجاد : سلام سوالج شى
سليل : وكفت خايفه وركضت وعاط ورايه موكفت محسيت غير يطفر الحايط وركض ورايه ولزمني بدخله البيتونه
ولزمني من جتفي ويهز بيه حيل احجي سوالج شى
سليل : عمو عفيه عوفني
سجاد : احجي يله اعوفج جنطتج شسوي بلحديقه يمنا
سليل : ماادري وادفع بيه بس هو جبير ومااكدرله اتذكرت نسيتها هناك
سجاد : اذا متحجين اروح اكول لأبوج ونروح لسلام نفتهم منه
سليل : شهكت بخوف وكتله فدوة عمو لتسوي شى يگتل بابا بسلاحه الطويل
سجاد : شنو الي سواه الج احجي ولتخافين
سليل : بلعت ريك واباوع عيونه شرار اطلع منهن وايده قويه لازمتني بقوه وكتله

يتبع ...

اعتذر عن مشهد تعرض سلام لسليل ليس الغايه منه لأثاره الاباحه بلقصه ولكن لتسليط الضوء على حالات التحرش من قبل المحارم للاطفال وتأثيرها على نفسيه الطفل ابعد الله اطفالنا واطفالكم عن هكذا حيوانات لان مااعتبرهم بشر اصلاً
تحياتي لًلًـّــ💎ــجٌٓمٍَُٓيِّعَْٓ