رواية ابي والغزلان الفصل التاسع عشر 19 - بقلم ريام هادي

ابي والغزلان
للكاتبة Reem

شكراً من القلب لكل من قدم واجب العزاء والمواساة ولكل متابع قدر ظرفي وتعبي
ولكل متابعه اجابت عن سبب غيابي فعلاً اسعدني مساعدتكم لي رِّبًـــ♡̨ـــٍْيٌٓ لايحرمني من محبتكم

اما بلنسبه الي يكولون ميصير بعد تاخذين استراحه لان تأخرتي علينا تره والله اني مجايه من المريخ حالي حالكم انسانه اتمرض وتصير عندي ظروف وخاصه السبب كان قوي حاله وفاه وماكو شخص يحب يجيب لنفسه الموت والمرض
والله اليعلم الحاله الهسه اني بيها من كميه تعب تفوق الخيال لكن رغم هذا كعدت وكتبت يعني باجر انزل بارت وبعدها استراحتي مااحب اسمع تكولون ليش اخذتي استراحه بس تخيلو حالي وراح تقدرون ظرفي ورغم عندي وفاة متأخرت البارحه خلصت الفاتحه واليوم نزل البارت غيري ومااحب المقارنه طبعاً لكن كمثل ياخذون بالايام وتصل لأسبوع لهذا اعيد واكرر الف مره الي يتعب من النشر يكدر يعوف القصه وبعد متكمل ينورني ويقراها
رِّبًـــ♡̨ـــٍْيٌٓ يحفظكم
قراءة ممتعه لًلًـّــ💎ــجٌٓمٍَُٓيِّعَْٓ

البارت السابع عشر
(بارت طويل لعيونكم )

گلب بـ اوراق عمرك
ناس راحــوا
ناس اجــوا
ناس رايدهم يظلون ومشوا

اكو ناس تعوفهم ترتاح منهم
ناس ظلتهم حمل
واكو ناس طيوفهم
تگعد بـ راسك مثل خرخاشة بحجل 

حجي طه : هاااا سبايك ذهب منيله
سامي : انت افهمها ياطة شنو منيله
نهر : يعني قصدك اخويه حرامي وكعد يبوك ويبيع
سامي : الي صار يعرفه طة وشافه بعينه هناك كولشي مباح واكو ناس استغلت الفرهود والتسيب وكامت تبوك وتبيع للبصره ومن البصره لباقي المحافظات وعلي واحد منهم بس هو الظاهر يشتغل على الثكيل لان هناك معروف ويمكن الشغله وياه من زمان يعني من دخولنا للكويت مو اخر شى لان كلها تعرفه اكلها الرجال يكول حتى سبايك ذهب يجيب لعد شكد ناهب
نهر : دنجت ميته خجل من صخم الله وجهك يا علي هو انت محتاج شو خير من الله عندك وتلعب بلفلوس لعب وامي وياك هاي تاليها تخلي سمعه ابويه بلطين الله لا يوفقك ولا يهنيك بيهن
حجي طه : واني ردت اروح ادور علية وعليك هم لان حيل تأخرتو
سامي : موزين وصلنا الله يعلم الحال شون نتختل بين البساتين ومن محافظه لمحافظه ومشينا ميصير اله بليل حتى ليلكفونه شفنا الويل والي صعبها الهوسه الصارت بلمحافظات كامو شيلون ويحطون العنده والماعنده كلها القاء قبض حتى النسوان والجهال

حجي طه : الله يساعدهم اخذونا كم يوم نشف دمي واتشاهد بكل دقيقه همه شون
سامي : المحافظات وضعها تعبان وبكل بيت شهيد كلها تبجي ومتأذين حيل معودت اوصل لبغداد اندار على نهر الي اصلاً بالها مو يمهم نهر حبيبتي نهر مو اصيح وين بالج
نهر : كمت وكفت على حيلي رايحه لأمي
حجي طه : شعندج
نهر : اكول الها على ابنها الشفيه مو خبصت الدنيا وتلطم علية خلي تشوف جبيرها واول فرحتها على كولتها شكعد يسوي

سامي : اكعدي بابا مالج دخل هو هسه يجي ويفهمها
نهر : شون مالي دخل غير انت متدري شصار وشسوت جان ضحت ب طة من وراه وفوكاها تحجي علية مو حنينه واشكال الحجي
حجي طه : اكعدي نهر واسكتي لتحرگين قلبج كافي الاعصاب ذيج الايام وانتي مريضة
نهر : لا والله شو اله اروح
سامي : اجي وياج
نهر : لا وين الخطار طاب طالع علينا ومااريد اهلك يحسون فدوة سامي هذا الحجي لتحجي كدام اهلك والله مراح اخلص من لسان عمتي والبنات
سامي : شجاج ولج قابل صغير اني وتعلميني هو بس الج ولطة لان انتم اهله
نهر : مااتأخر شويه واجي
حجي طه : خلي اجي وياج مااعوفج وحدج اخاف تأذيج
نهر : لتخاف هم الها عين وتحجي
حجي طه : ميخالف هم اجي
لبست عبايتي سريع وطلعنا اني وطه اسمع عمتي تكول لسامي وين هاي موليه غير انت اجيت غير تنجب وتكعد مدرت بال وطلعت وحتى مااعرف شجاوبها سامي

وصلنا لبيت اهلي فدوة طه روح
حجي طه : لج بابا شون اعوفج امشي ندخل
طبينا والباب مال الشارع مفتوح بس باب المطبخ والهول مسدود دكينا الباب فتحته اشواق الي استغربت جيتنا وفكت عينها
اشواق : خير جنكم عصابه وملمومين وجايين شعدكم مصايبه جايين تذبوها علينا
دفعتها وطبيت ولا جاوبتها وصحت يمه يمه وينج اطلعي وتعالي شوفي ابنج الكتلتي روحج علية جان تطلع من غرفتها

انعام : وغمه وجع بگلبج شكو تعيطين
نهر : هو انت هيج دومج حايريه بيه وبأخويه الفقير تشيلين وتلطين بينا بس تردين تأذينا ولو شويه مربيه ابنج مجان هسه خزانا
انعام : ولج على اكطع النعال عليج وعلي شتردين بت الگلب جايه هداده
نهر : ابنج الشفيه الجبير فرحة گلبج وحزام ظهرج ومن يصير شى كلتي كلكم ترحون فدوة اله صار اسمه علي كويت
انعام : يمه علاوي شبيه
نهر : شبت بيه وبأضلوعه نار ان شاء الله ابنج بايك من الكويت وكاعد يبيع للعالم وصاير معروف بلبصره بأسم علي كويت كرت عينج

انعام : يعني علي عايش رايه الله بيضة الْحٍمَدٍ للـّہ ربي والشكر
نهر : لا بالله هذا الهمج عايش لا والله لو جايبي ملفوف بعلم وشهيد اهون من الي سمعناه اقلها ميت بشرف وشهيد عند الله ورافع راسنا وراس جهاله بس هو عار والعار الله مياخذه شهيد
انعام : ولج ترحين فدوة للتراب اليمشي علية حقيره ادعين على اخوج فوك متفرحين عايش
نهر : على ياصخام وجهه افرح بيه عايش مكافي بايك وناهب وصار حرامي وراح يوكل نفسه وجهاله الحرام
انعام : منو يكول وتعالي كوليلي منين سمعتي هذا الحجي واجيتي هداده
نهر : رجلي رجع وشايفه هناك وسائل وعرف كولشي

انعام : كولي هيج هذا رجلج الحافي حجه اكيد عيني من قهره لان علي احسن منه من زمان من جان يجي للهنا ادري بيه يحسد علي ويغار وهو الي لفق هذا الكلام علية ابني مياخذ مال حرام
نهر : هسه احنا وين وانتي وين وشجاب هاي على هاي اكلها ابنج حرامي وناهب ويبيع حتى مهتم اخاف يضل بالكم تخافون علية حتى انتي مو كاعده وادكين وتلطمين مأجيتي باله وهاي مرته وابنه لان واحد حقير ومشايف ونفسه دنيه طمع حتى بلحرام رغم كل الفلوس العنده

انعام : شو ساكت انت متحجي كمل على حجيها
حجي طه : اني شعليه قابل راح اتحاسب مكانه هو اذا ياكل حرام ميضرني يضر نفسه طبه مرض كل لشه تتعلك من كرعانها
انعام : اني ممصدكه ابني ميسويها
نهر : لا سواها وسوه الاتعس منها لتكذبين على نفسج
انعام : وهسه شتردون
نهر : اجيت اكولج بلعافيه عليج الحرام يمه وهاي صار مرتين بس كوليلي شون راح تقابلين ربج شوووون
انعام : بت النعال تحاسبيني ولج انتي شنو هذا الكره الي بگلبج علية نسيتي اني امج وذوله اخوتج وحتى الي يصير بيه شى تتشمتين

نهر : اني اتشمت اني اكثر وحده محروك گلبي لان كعد تغضبون الله بأفعالكم من كثر مااحبكم اموت قهر واني اشوف الحرام تارسكم من ساسكم لراسكم وكل مااجي انصح اطلعيني كارهتج ومو بتج والله شنو لان احجي الحق مع الاسف نسيتم الله وعدله ويجي يوم السويتوه يرجع عليكم اضعاف يله طة وبلعافيه عليج ابنج الجبير الخير علي كويت
عفتها واخذت طة وهي تعيط وتفشر
طلعنا ونتمشى لبيتي باوعت على طة يبتسم
هااا شو تضحك
حجي طه : ارتاحيتي
نهر : مفهمت

حجي طه : ادري بيج ردتي تردين الي سوته لهذا اجيت وياج
نهر : الصراحه صدك ارتاحيت يمعود شحجت وكالت علي احسنكم علي ابني الجبير شيال همي ترحون فدوة اله سنين وهاي سوالفها خلي يفيدها شيال همها
حجي طه : هههههه والله صايره وكحه ولسان ولج مجنتي هيج
نهر : والله العنده ام مثل امي مو بس اطلعله لسان حتى گلب بصف گلبه
حجي طه : اسم الله على گلبج بس اكو شى ضل بالي انتي كتيلها بلعافيه عليج الحرام وهاي صار مرتين ليش المره الاولى شوكت
نهر : هااا لا قصدي على سواياتها وياك شنو نسيت ورادت تاخذ البيت منك والله سوايات امي مو بس مرتين مينعدن
حجي طه : الله يهديها يله طبي لرجلج وافرحي بجيته وانسي كولشي وعلي عايش هو شوكت ميجي يجي والي سواه يضر نفسه مالنا دخل بيه
نهر : ان شاء الله فدوة انتبه لنفسك
حجي طه : لتخافين يبعد عين اخوج وبستها من كصتها يله ادخلي

رجعت اتمشى الهوا عذيبي وقطرات مطر خفيفه مطر نيسان نهايه شهر الرابع ١٩٩١
اباوع للسما والمطر ينزل على الوجهه محبيت اطب للبيت ردت بس افتر كمت امشي وحدي الساعه ١٠ بليل واكثر الناس ببيوتها والشارع صنطه مابيه احد اباوع وصافن على حالي شراح اسوي هسه هم ارجع على عربانه اللبلبي وماعندي فلوس اجر محل اسويلي شغله خلصت عمري بمطعم ابويه متعلمت مهنه اشتغل بيها متوقعت بيوم انطرد منه ويصفى هذا حالي طلعت الفلوس الي بجيبي دنانير باقيه والي بلبيت هم قليل يعني كلها اسبوع ويكتلنا الجوع لازم من باجر اروح للوحده العسكريه مالتي اسلم نفسي واشوف شنو الاجراء بحقي لان مبلغت برجوعي وهم حتى اذا سرحوني ارجع لشغلي بس كون ميصير شى ثاني يطيح حظي

رجعت للبيت احظر كولشي وثاني يوم الصبح طلعت للوحده ويومين روح وتعال وكالو ننتظر القياده وتعليماتها المهم شوكت مندز عليك تجي ومتغير محل سكنك ارتاحيت لان ماكو سجن وعقوبه

بعد بيومين ضبط كاعد اباوع على جهالي يلعبون والسبحه بيدي وقررت من باجر اطلع اتوكل لشغلي حتى لو الشغل قليل ولهسه العالم تخاف من الصار والانتفاضه والهوسه لو اطلع علاكه اليوم هم كافيه تعشو الجهال وكلت خلي ادخل انام من وكت حتى اكعد الفجر هستوني ردت اطب جان تندك الباب باوعت ساعه ١٠ ونص منو يجي بهيج وكت
سندس : منو اجانه
حجي طه : والله ماادري طبي للغرفه انتي والجهال ولطلعين
سندس : تعالو ماما طبو
حجي طه : طلعت وصحت منو
اني اني محسن

حجي طه : هااا ولك ركضت فتحت الباب وحضنته تعال طب
محسن : لا مستعجل
حجي طه : شبيك ولك وجهك مخطوف وضعك مو طبيعي
محسن : اجيت اسلم عليك لان انت اخويه ومستحيل اروح قبل مااودعك
حجي طه : لتوكع گلبي شصار يمعود وتعال طب نحجي بلباب
محسن : اسمعني طة ماضل وكت عندي اني ماخذ اهلي ومسافر
حجي طه : فتحت عيني ممصدك ولك وين تروح
محسن : رايح بره العراق امن الك ماابلغك لوين
حجي طه : ولك قطرة دم مضلت بيه شصار
محسن : ولد عمي شاركو بهاي المظاهرات الاخيره وجانو من العناصر الفعاله ولكفوهم همه وعوائلهم وكعد يفترون علينا شكو واحد اله صله بيهم ياخذو وهمه ولد عمي مو غربه ذيج الايام جنت بيت كرابه امي مهزوم بس متوقعت ياخذون ابويه لو تشوف حاله طة هذا الجبل اليضحك ويه الهوا بس يبجي معذبي لحد ما مالين ورجعو شمروه لان ماعنده شى بس هم مو امان وباقين يدورون علية قررت اخذ اهلي والمره والجهال واهاجر

حجي طه : شون تهاجر ومنيلك فلوس وشون راح تطلع بهاي الاوضاع
محسن :قرابه امي ابن خالها خلف الله علية هو تكفل بكولشي حتى بعنا البيت اله بطكه ناقص بس حتى يصير عدنا فلوس وعلى ذهب المره وذهب امي صار عدنا مبلغ زين نصه للمهربجي ونص مصرف يبقى النا
حجي طه : زين البيت ليش بعتوه
محسن : خفنا الدوله تحط ايدها علية ونمسح ايدنا بلحايط وهم المهربجي راد على كل واحد مبلغ جبير واحنا هوايه ٥ نفرات حتى فيصل مو صغير حسبوه نفر حاله حالنا وماعدنا ننطي بعنا كولشي بيومين وكتلك لو ما ابن خال امي مستحيل نكدر وباجر اني من الصبح ماخذهم وطالع
حجي طه : حضنته وكمت ابجي ولك بس انت ضليت الي وين رايح وعايفني

محسن : والله مو بيدي وكتبه ورسله مو بيدي بس الوضع بلنسبه الية ولأهلي موزين واذا بقيت يجوز الحك جعفر وحتى گبر متلكالي
حجي طه : لتكول هيج عمرك طويل
محسن : ادعيلي اوصل بلسلامه الطريق خطر وايام يله نوصل ادعيلي طه اني اجيتك هسه ويعلم الله شكد الوضع خطر والمفروض مااجازف بس من حبي الك اجيت مكدرت اروح قبل مااودعك وقبل مااطلب منك تدعيلي انت گلبك طيب ورجال يخاف الله انت احسن شخص عرفته بحياتي الله عوضني بيك احسن اخ وتبقى اخويه للموت

حجي طه : شون اعرف وصلت واطمن عليك
محسن : ما اعتقد تكدر لان اني ماعندي اتصال بأحد هنا وهم اذا وصلت ما اكدر اتصل او ادز اخاف يعرفون مكاني
حجي طه : بس انت بعد بلخارج شعليهم بيك
محسن : والله ياخويه علشفته كمت اخاف من خيالي عائلتين من ولد عمامي كلهم شالهم بليله ظلمه وهسه مالهم خبر حتى جهالهم خليني ساكت النار البيه بس الله يعلم بيها بس ادعيلي مو تبطل دعائك اليه
رجعت حضنته وهو يبجي واني ابجي اااااخ يادنيا بعد المن تاخذين مني مكافي مشبعتي من اذيتي ودعت صديق عمري وسبب ضحكتي روح مودع بالله ودوم ابقى ادعيلك
راح واخذ الخوه والكعده الحلوة والضحكة الي من الگلب وياه

رجعت دخلت للبيت وامسح عيوني بس العبره بعدها بصدري اريد اعيط تكول عبالك مو سافر مات لان بهذا الوقت الي يسافر بعد منعرف عنه اي شى
اخو الميت طلعت سندس تركض هااا شبيه محسن شفته من وره البردة لان تأخرت گلت اخاف صار شى عليك
حجيتها بعبره وقهر سافر اخذ عائلته وهج من العراق كله
سندس : ياااااا وشبيك تبجي قابل مات هو سافر بلعافيه علية
حجي طه : رفعت راسي اباوع عليها ولج اكولج هج من العراق كله تكولين بلعافيه علية

سندس : طبعاً بلعافيه غير راح يخلص من الضيم الهنا والقهر المفروض تفرحله
حجي طه : بله متسكتين ومشيت ادخل لغرفتي جان تكول
سندس : اي عيني اكيد ميعجبك كلامي بلعافيه على الناس شو جماعه تسافر وجماعه تبيع وتستفاد حتى وهي بلحرب خوما مثل ناس ايد وره وايد كدام
انداريت عليها ولج انتي متبطلين تتسنطين شنو هذا المرض البيج لخاطر ربج
سندس : وبشنو مأذيتك لو متريد اعرف خيسه اهلك
حجي طه : لا اهلي ولا اعرفهم ولا يعرفوني ومن باجر اله اسد هاي الفتحه حتى لو يختنك البيت
سندس : لتذب حركتك بيه مو مقهور على محسن وتندار علية وتقهرني
حجي طه : بس فهميني شوكت تنظفين شوكت اطبخين عندك ٣ جهال شوكت تخلين عينج عليهم اذا انتي مگابله ذاك البيت وكاعده
سندس : شلك دخل بيتك ونظيف واكل وتلكه طابخه وجهالك هياتهم ماعليهم شى وناجحين بمدارسهم بعد اتسنط احرك روحي من القهر هاي مشكلتي مو مشكلتك
حجي طه : شوكت تعقلين واحس صدوك عندي مره تلزم ظهري واداوي روحي مو عينها على هذا وذاك

سندس :خرب حظج الاسود سندس لحكتني على هاي قابل شمسويه الهم ماخذه من فلوسهم شوف فوك الخير راح يجيهم خير ثاني
حجي طه : ولج ياخير هاي فلوس حرام اني ادري بيج سمعتي كولشي عن علي مكان متكولين الْحٍمَدٍ للـّہ رجلي مضعف ومد ايده وكلنه حرام
سندس : ومنو يكول حرام
حجي طه : لا والله انتي هنا شكو عقل لو حذاء حراااام تعرفين شنو واحد يطك محل غيره وياخذ البيه لو يدخل بيت ناس وياخذ البيه هسه انتي وكاعده ويدخل واحد ويبوك شكو عندج حلال هذا
سندس : وشيبوك ياحسره بطرك جدوره الفافون وجم طاسه ومعجانه وتلفزيون ميشتغل اله بلضربه على ظهره خلي يجي ياخذهم ويخلصني من الوعث الموجود
حجي طه : والله ياسندس انتي ميفيد بيج متردين بس فلوس حلال حرام متفرق عندج
سندس : اني گلت متفرق بس كلت منو يكول حرام
حجي طه : الله يهديج مااكول غير شى وانتظر اليوم الي تكولين الْحٍمَدٍ للـّہ علعندي

سندس : يابه الْحٍمَدٍ للـّہ بس اسكت حسره بگلبي احجي حجايتين اله تكب بيه
حجي طه : خلي ادخل انخمد راسي راح يطك
سندس : روح عيني روح اااخ لو بس الحظ يضحكنا مره دومج ياسندس حظج اسود

طلعت ثاني يوم لشغلي بس والله حيل مابيه امشي تكول ظهري انكسر كل مااتذكر بعد مااشوف محسن انتهي وعيوني تغورك دمع
ويوم يجر يوم واحد يشبه الثاني اجه كتاب التسريح مالتي واخيراً خلصت وجهالي سليل وحسام نجحو سليل راح للثالث ابتدائي وحسام للثاني حاولت افرحهم هلمره لان حسام الناجح من وحدها سندس سوت كيك واحتفلنا بيهم
شهر السابع تموز ١٩٩١ رجع علي وبكل برود توقعت الدنيا راح تنگلب علية او على الاقل امه تسوي شى لان باك واخذ حرام بس مطلع صوتها اصلاً من كثر ما استغربت الوضع سألت سندس كالت كولشي ماكو هدوء لا علامة فرح ولا حزن وهذا الشى خلاني مستغرب شنو الي مسوي علي وسكت امه لو اكو شى بينهم بحيث مكدرت تفتح حلكها اني هم اخذتلي يومين افكر وتالي گلت خلي احير بعيشتي وعيشه جهالي كمت حتى مااشوفهم وعلي مره وحده بس لمحته من بعيد هو يباوع واني اباوع لحد متقرب مني بسيارته توقعت ولو مره يحن ًوينزل يسلم بس هو فات من يمي بسيارته واني ادفع عربانه اللبلبي ولا كأنه يعرفني اني هم مشيت ومن يومها غسلت ايدي منه واعتبرت ماعندي اخ اسمة علي

ايام تمشي من عمري واني كل همي شون اعيش جهالي سمعت علي صارت عنده بنيه سماها نورس واكيد سمعتها من سندس الي معاشره ذاك الشباك شكد ردت اسده توكع دخيل دم وتحلفني حتى ماالغي ومرات افكر الطابق الثاني يختنك هو البيت صغيره هلمره الغي شيصير بيه
كاعد انظف الحمص المغرب وره مرجعت من الشغل حتى انكعه مال باجر لان صار الشتا وشغل شويه احسن نهايه ١٩٩١ شهر ١٢ فتحته سندس طلعت نهر
نهر : الله يساعدك يلغالي
حجي طه : هله ياروح اخوج
سندس : تكول كاعدين بلديوان اصبلكم الكهوه
نهر : هسه انتي شدخلج تغارين لان ماعندج اخ مثله فدوة لعمره
سندس : خلي الج عيني على شنو اغار تردون جاي لو گهوه يلشيوخ
حجي طه : كولشي منريد بس اسكتي
نهر : هاي شبيها مرتك
حجي طه : جديده عليج عادي شخبارج
نهر : الْحٍمَدٍ للـّہ ولو عمتي مزهكتني بس تعلمت عليها
حجي طه : جم مره كتلج خلي احاجي سامي وانتي متقبلين
نهر : راح ينفهم غير شى واني مااريد اسوي مشاكل كافي هو زين ويايه كولشي يهون
حجي طه : فدوة للعقل والرزانه
نهر : صدك نسيت اكولك تعرف منو مات
حجي طه : ياستار منو مات
نهر : خالي جلال
حجي طه : لا الى رحمة الله جان خوش رجال واخلاق والله قهرتيني سنين واني اعتبره خالي
نهر : والله طكيت بجي علية لان كولش جان حباب ويانه

حجي طه : ومنين عرفتي
نهر : خابرتني خالتي تعرف عندي اتصال بيها وكالتلي بس مرحت خفت لا اشوف امي هناك وتكب العيطه وينكسر العزه ومالي حيل الصراحه المشاكل
حجي طه : جان على الاقل اني رحت لان تعرفين شكد احبه
نهر : يمعود هناك علي وسلام واكيد امي هم تشوفك لتسمعك حجايه تغثك اكعد واسكت
الله يرحمة جان ذهب زين وابنه سجاد وين راح يبقى
نهر : الي سمعته من خالتي احتمال يجي يعيش يم امي كتلت نفسها حتى يجي تعرف بيها شكد جانت تحب اخوها وحتى سجاد تموت علية لان وحيد ابوه يعتبر وخاصه بعد ماامه اخذت اخوه واخته وعافت خالي اطلكت منه وتزوجت غيره وسافرو من زمان يعني عايش وحده
حجي طه : خلي يجي يعيش هنا احسن ميبقى وحده ولد صغير المن عايفي
نهر : هاي شبيك طة ياولد صغير سجاد عمره ٢٠ سنه شاب شطوله شعرضه
حجي طه : جذب ولج اخر مره شفتله بطول سليل

نهر : غير الدنيا تمشي قابل تبقى هيج ياعيني بس يكولك شويه صعب وميعجبه العجب شون راح يعيش يم انعامو
حجي طه :اذا هيج ميزوجوه
نهر : خالتي كالت ازوجه وحده من بناتي فد خلي شويه يكبر اكثر وهم هو عنودي وعصبي تشوفه هادئ بس نار شرار ويكول مااتزوج هيج احد يتفضل علية وبنفس الوقت حاولو يقنعوه ميضل وحده بلبيت وخاصه هو بيت ورثه ويردون يبيعوه
حجي طه : هيج كولي واني عبالي خايفين علية
نهر : ياخوف تعرف خالي عايش بهذا البيت وهاي السنين كلها مباعوه بس لان خالو جلال بيه وهسه مات وبيت شكبره بالاعظميه تريده يعوفوه لسجاد من كل عقلك
حجي طه : ااااخ من الورث والفلوس شكد تغير النفوس
نهر : اي والله
سندس : اكولج هم راح يجي ورث لأمج من هذا البيت
نهر : مجان كعدتي يمنا احسن ماخاتله وره الباب وتسمعين حجينا
سندس : شبيج عيني ست نهر گبيتي بوجهي
نهر : هو اني لو انتي فززتيني طبيتي وتصيحين هم راح يجي ورث لأمج جان كعدتي يمنا وسمعتي كولشي وحتى ابرد الفضول العندج اي راح يجيها ارتاحي تهدي شويه
سندس : كون ربع حظج ياانعام ااخ شمسويه بس لو افهم ويوميه تمطر عليها فلوس
نهر : اكوم اروح من رخصتك طة
حجي طه : وين تعشي وروحي

نهر : لا ميحتاج انت حير بروحي الله يعينك على ما بلاك
سندس : شنو قصدج يمه احجي لتحجين الحجايه وتضمين راسج مثل النعامه
نهر : رايحه انتي بطرانه كل الحيل والخلك بيج تردين تتناقشين روحي لأمي واتناقشي وياها هي الوحيده الراح تفهمج
سندس : شفت طة اختك شون تحجي ويايه
حجي طه : روحي يبعد اخوج وسلميلي على سامي
نهر : اباوع على سندس وصلت قريب منها ومن اذنها كتلها اشويه اكرصيها مو راح تموتين ناقصه عمر

سندس : شفتها شتحجي تعاي وين طفرتي تهز بيدها وتإشر نهر ولي ماارجع وعافتها وطلعت
حجي طه : اششش ولا كلمة راسي يوجعني وانقهرت على خالي جلال ومابيه حيل حجيج الماصخ
سندس : خاله عشتوو منين يمه خالك انت صدكت بعدك تعتبر انعام امك
حجي طه : لا امي ولا ابويه بس لان الرجال سنين اعتبره خالي ومرات حتى لو جار ورجال خير هم تحسبه اخ لو خال لهذا لتجلبين بلكلمه مثل العجايز وهاج اغسلي واترسي مي للحمص حتى شويه واخلي على الجوله
سندس : هذا الحصلته منك لو تسكتين لو حايرلي بلحمص والباكله
اجت سليل تبجي بابا بابا شوف حسام شك التجليد مالتي
حجي طه : ولكم حسام تعال وينك
سندس : على كيفك ويه الولد
انتي اسكتي
حسام : هاا بابا
حجي طه : ليش هيج مخرب دفتر سليل
حسام : مو اني جذابه
سليل : والله انت والله وتشهك من البجي
حسام : جذابه ولا تقربت من دفترها
سليل : بابا اسأل رشا هي جانت كاعده تعالي رشا
اجت رشا دبدوبه حنطاويه البشره العيون سود شعرها سرح تمري عمرها خمس سنوات والشعر مضفور كصيبه منا وكصيبه منا وحافيه وبيدها قمردين ابوالجيس وتاكله هو والجيس مالته

رشا .. هااا ثلل
سليل : منو خرب دفتري
رشا .. حسام الدودة
حجي طه : شنوو تعالي ولج جريتها من ايدها وحطيتها بحضني اول شى القمردين مينوكل هيج وفتحت الها الجيس
وثاني شى منين سمعتي هاي الكلمة مال دودة
رشا .. ماما اتكولها لخاله انوار
حجي طه : باوعت على سندس خوش عاشت ايدج هاي بأولها
سندس : يمعود مو جهال يصفنون على الحلك ولج رشاوه ام بطن اله اطيح حظج اني اكول لخاله انوار هيج مو عيب تكذبين هسه الله يذبج بلنار

رشا .. كامت تبجي اخاف من النار بابا
حجي طه : اششش كافي هو مو صوج هاي الطفله صوجج انتي انتهي على كلامج من موجودين
وانت حسام لزمته من اذنه اذا لعبت بغراض اختك وشكيتها اعلك بلبنكه
جان تصفك رشا هيييييي بابا راح يعلك حسام بلبكة
سليل : اسمها بنكة مو بلبكة
رشا .. مااعرف ثلل
سليل : واسمي سليل مو ثلل والله موتيني
رشا .. بابا اني مااحبهم بس يعيطون علية

حجي طه : لا بابا غير يحبوج على كيفكم وياها لكم ويله روحو كملو قرايه
سليل : والدفتر بابا باجر عندي املاء والست اذا شافته هيج توكفني قصاص يم الزباله
حجي طه : روحي اقري وهسه شويه واسويلج دفترج تعالي ومسحت دموعها وبستها يله حبيبة ابوها الشطوره
وانت حسام عيب بابا انت كبرت وصرت رجال وهذني خواتك لازم انت تحاميلهن
حسام : بابا هي تكرهني
حجي طه : لا تحبك وهي اختك الجبيره ميصير هيج تسوي وياها لتخليني أذيك
سندس : روح يمه ادرس ولتضوج
رشا .. اني الوح يمهم اذا سوه وكاحه حسام اجي ركض حتى تعلكة بلبكه
حجي طه : روحي ام لسان

سندس : انت ليش هيج تعامل حسام
حجي طه : يعني تردين اشوفه يأذي اخته واسكت
سندس : نسيت هو وحيدك قابل عندك عشره
حجي طه : هو حاله حال سليل ورشا وريم وماافرق بينهم والهم نفس المعزه ونفس العقوبه اذا غلط واحد بيهم جم مره كتلج لتفرقين بيهم ميصير هاج بعد شكدوته وياذي اخته
سندس : جاهل شمفهمه تعاملة مثل واحد عمره ٢٥ سنه

حجي طه : شوكت تردين اعلمة الصح والغلط اذا من هسه ميصير احاسبه من يكبر ويشورب ويصير بطولي تردين احاسبه ليش بذاك الوكت هو راح يسمع كلامي
سندس : اذا تريد احجي وياه بس لا تأذي ولتضربه
حجي طه : مسويتله شى بس جريت اذنه حتى يتوب ومالج حق تدخلين مثل ماهو ابنج هو ابني ومو كعد تضربين البنات يوميه تركضين وراهن واطبطبيهن شو مااحجي واكول امهن ادرى بمصلحتهن
سندس : اني ادري بروحي لا اخذ حقك منك ولا باطل شو انطيني الغراض مو كملت شغلك اطلع من المطبخ عندي شغل بيه
حجي طه : تفضت ملابسي وكمت وكتلها سندس هلا هلا بناتج لتزرعين التفرقه تاليها توكع على راسج وتتندمين
سندس : الله كريم ودارت وجهه ممقتنعه بلكلام
عفتها وطلعت وعيني عليهم شون كاعدين يقرون ورشا متربعه بنصهم والقمردين بيدها وبحلكها منظرها يضحك اكول يارب ميشوفون التفرقه الي شفتها وعانيت منها طول عمري

بدت ايام الشتا البارده شهر الواحد ١٩٩٢ الهوا يكص الحجر اطلع من ساعه ٥ الصبح على شغلي ومن منطقه لمنطقه ادفع بلعربانه وادعي ارجع للبيت ومخلص الجدريتين الباكله والحمص كل مااتنقل اتقصد ابتعد عن مطعم ابويه حتى ليشوفني
ولا يسمعني كلمة تغث كمت اشوفه شون يركب السيارات الحديثه وشون راكب سياره مارسيدس موديل ٩٠ محد يكدر يركب مثلها بس الثكال بلدوله والي عنده امكانيه توب ويتگلب بيها والرايح والجاي يباوع عليها مااكدر اكول الله يرزقه ويزيده لان اعرفها من فلوس حرام بس امشي واكول الله يهدي

امشي بارد الجو ومطر وهدومي منكعه راجعه من المدرسه خفت على الكتب لتتنكع نزلتها من ظهري وحطيتها على صدري اتنكع اني ولا هنه وامشي ورجلي بلطين وصلت لراس الشارع اجه واحد من الجهال يركض قوي من وره طخني وكعني على وجهي اباوع الجنطه بلكاع كلها مي مباشره بجيت بحرگة كتبي راحن وحضنت الجنطه وبعدني بلكاع حتى مكمت وشفت هدومي اكو شى يحركني برجلي بس مهتميت بكد مااخاف على كتبي
لمحت رجل وكفت يمي رفعت راسي اباوع ولد جبير صافن علية
شبيج تبجين
سليل : عطت بيه شعليك انت
جان يدنج علية ويكولي بهدوء وبصوت قوي خوفني حيل
تكومين من الكاع لو ارفعج من كصايبج
سليل : خفت وكمت بسرعه ورجعت حضنت الجنطه جان يباوع على ملابسي دنج
شوفي رجلج شون دم ثوله منتبهت
سليل : كمت ابجي اخاف منه راد يلزم رجلي رجعتهم ليوره جان يرجع يكولي
اوكفي خلي اشوف رجلج مديهم
اني هم من الخوف مديتهم طلع الكالون الي ملبسته ماما اليه والستريج الفوكاه لان شتا فتلبسني هوايه مشكوكات من الوكعه ورگبي كلها دم

اباوع على ايده الجبيره بخوف كلت راح يضربني راشدي دخلها بجيب البنطرون وطلع كلينكس
هااج امسحي الدم اخاف امسحه وأذيج وتبقين تتنعوصين
سليل : ماااا مااريد وركضت للبيت خايفه حيل منه وحتى منداريت ودخلت وبيدي الجنطه وهدومي كلها طين جان تطلع ماما وتشوفني هيج لطمت على وجهه
سندس : ولج هاي شنو حالج
سليل : والله ماما واحد وكعني وابجي
سندس : ثولة متشوفين كدامج وفوكاها شاكله هدومج منين اجيبلج هسه
سليل : ماما والله هو دفعني
سندس : وجع اسكتي بس تعوين وجان تكفخها على راسها طبي شمحصله منكم غير شلعان الگلب

طبيت واني حتى ضربه ماما محسيت بيها خايفه من هذا الولد الطويل طلعت گتبي من الجنطه همزين ماما مغلفتهم نايلون مصار بيهم مي مسحتهم وحطيتهم على صفحه نزعت ملابسي ااااخ احس رجلي توجعني باوعت كلها دم تأذيني رگبي نزعت على كيف والگالون چلب بلجرح شاغت روحي من جريته
رشا .. شبيج ثلل
سليل : مابيه وخري مني
رشا .. جبتيلي قمردين
سليل : اكولها وخري مني شوفي رجلي
رشا .. ياا اوااا تأذيج
سليل : اي توجعني دنجت وتنفخ على الجرح
رشا .. هسه اطيب
سليل : حضنتها والله لو ما وكعت جان جبت الج قمردين وحتى نستله
رشا .. هسه بابا يجيبلي
سليل : امشي ماما تصيحنا
سندس : ولجن يله تعالن اتزقنبن جيبي اختج من الهول
شلتها على گلبي اباوع عليها وابوس بيها وهي بس تشوفني تضحك ريم عمرها سنتين ونص اول اسم صاحته اني تصيحلي ثلل سمعت رشا وبقت مجلبه بيها شكد احاول اصلح اسمي بحلكهن مرات ابجي لان يغلطون بأسمي بس يبوسوني ويرجعون يصيحون ثلل لحد متعلمت اسمي ثلل

بليل كعدت اقرا وتذكرت هذا الولد خفت باجر يوكفلي بلشارع ويكتلني اخاف منه كمت لبابا
حجي طه : هاا حبيبتي تعالي
سليل : بابا اكو ولد يخوف يريد يكتلني
حجي طه : منو هذا بابا
سليل : ما اعرف اليوم وكعت وعاط بيه
حجي طه : جبير صغير
سليل : هاااا طوله وصعدت فوك القنفه ومديت ايدي ليفوك
حجي طه : بابا هذا عامود مو ولد
سليل : حباب بابا اخاف يگتلني لان انهزمت وعفته
حجي طه : سندس وينج
سندس : هاا عيني دااشتغل خير
حجي طه : سليل تكول اكو واحد تخاف منه باجر وديها بيدج للمدرسه ورجعيها هم
سندس : بله صدك تحجي بهلبرد اطلع وهي ليش تعوف اخوها وترجع وحدها يطبها طوب
سليل : والله ماما ميقبل امشي وياه يدفعني
حسام : ما اريدها ويايه
سليل : شفت بابا ميقبل ودمعت عيني
حجي طه : كافي بابا اني اطلع وياج لتخافين
سندس : وشغلك
حجي طه : الطفله خايفه وانتي متقبلين ترحين وياها شسوي اعوفها هيج
سندس : والله محد راح يطلع عينها غيرك بدلالك
حجي طه : هسه اني شمسوي الها وعطتي ودلالي طفله خايفه غير افهم من شنو وهذا المنو الي مخوفها
روحي بابا اقري اني باجر اوديج للمدرسه

سليل : طلعنا الصبح ولازمه ايد بابا حيل وخايفه
حجي طه : لتخافين اني يمج كعد يسد الباب جان يجي ختلت وره بابا جان اشوف بابا يبوسه وحضنه
حجي طه : عاش من شافك
سجاد : هو اني ياطة لو انت
حجي طه : صاير رجال يول وشطولك
سجاد : شنسوي لازم نكبر والله اشتاقيتلك
حجي طه : شوكت اجيت
سجاد : صار شهر
حجي طه : شهر ومتمر علية اقلها سلم
سجاد : والله استحيت كلت اخاف ازاحمك كلت بلكت بيوم اطلع الصبح للشغل واشوفك ويوميه اطلع وماكو
حجي طه : اطلع الفجر
سليل : باوع بأتجاهي ختلت اكثر وره بابا
سجاد : هاي بتك ماشاء الله
حجي طه : اي سليل
سجاد : شنو شسمها
حجي طه :ههههه مايوم كلت لأحد عن اسمها اله يكولي شنو اسمها سليل
سجاد : الله يحفظها الك شفتها البارحه واكعه وانهزمت مني
حجي طه : هااا انت واني اليوم مطالع من الشغل من وراك اشوف منو هذا الولد الي خوفها
سجاد : هي جبانه

حجي طه : بابا سليل هذا عمو سجاد لتخافين منه مثل اخويه الصغير
سليل : مثل عمو سلام وعمو علي
حجي طه : اي عفيه مثلهم لتخافين منه
سجاد : شنو اكل جهال شبيهه مرعوبه
حجي طه : جبانه بشكل وتخاف
سجاد : الله يحفظها الك عندك غيرها
حجي طه : اي حسام ورشا وريم
سجاد : لا مبين هواي كبرت
حجي طه : الْحٍمَدٍ للـّہ
باوع علية وهو عاكد حاجبه عيونه تكول مال نسر الي نشوفها بلعلوم كبار
سجاد : يله ست سليل للمدرسه تأخرتي
بلعت ريكي خايفه منه
حجي طه : يله باباتي يحتاج اجي وياج
سليل : كوه طلع صوتي لا بابا واخذت الجنطه وركض اسمعه يكول بصوت عالي
اذا وكعتي هلمره اشلع اذانج

ركضت حتى منداريت وخايفه وصلت للمدرسه ويه دكت الجرس
حجي طه : ههههههه على كيفك وياها
سجاد: لتخاف اشاقه وياها
حجي طه : شونه وضعك هنا مرتاح لو لا
سجاد : تعرف بعمتي شكد تحبني مسويه حصار بلبيت بس يحجي واحد وياه تاكله وتشربه
حجي طه : همزين اكيد راح ترتاح هنا
سجاد : احاول بس سلام معاجبني وضعه الحجي بيني وبينك طة
حجي طه : شبيه
سجاد : احجيلك بعدين هسه انت تأخرت واني هم تأخرت على شغلي
حجي طه : تعالي للبيت ونسولف
سجاد : ان شاء الله هاااا تره عرفت كولشي
حجي طه : فتحت عيوني مستغرب من كلامه شعرفت
سجاد : شفت نهر وسولفتلي الله يعوضك اعتبرني اخوك
حجي طه : والله وكدها ادري بيك بس نهر مكالت كعدت ويه سجاد
سجاد : اني كتلها اريد اشوفه بنفسي بس بتك جانت اسرع مني وخلتني اشوفك اليوم
حجي طه : ههههه المهم شفتك بخير محتاج شى
سجاد : لا سلامتك

كمت اروح وارجع للمدرسه وكل ما اوصل لبيت بيبي اركض اخاف هذا عمو الوحش يطلع وره ايام هوايه جنت اقره بلكاع طب عمو الوحش ركضت لغرفه بابا
حجي طه : ولك هله بسجاد نورت البيت تفضل اكعد زارتنا البركه
سجاد : رحمة الله والديك ابو حسام
حجي طه : سندس تعالي
سندس : هله بيك اخويه شونك
سجاد : الله يسلمج ام حسام تفضلي
سندس : هاي شنو
سجاد : شغلات للجهال
سندس : رحمة الله والديك
بقيت بلغرفه اخاف اطلع لحد مصاحني بابا استلم طلعت ورجلي ترجف اطخ وحده بلثانيه واشوف ريم بحضنه تضحك وتجر بلحيته وهو على كيفه يضحك راح ياكل اختي دمعت عيني حيل
حجي طه : شبيج بابا تعالي سلمي على عمج
سليل : هلو عمو وختلت وره بابا
حجي طه : تعالي بوسيه
سليل : ماااا
عيب بابا ميصير هيج تسوين
سجاد : عوفها ابو حسام براحتها
عفتهم وركضت جوه لكيت رشا وحسام كاعدين بغرفه بابا فاتحين جيس وياكلون منه شفت بيه اشكال واكو نستله جنت كل ما اشوف بنيه لازمتها اموت واكلها اسمها توتو
حسام : هاي التوتو الية
سليل : قابل كلهن الك ذني هوايه
حسام : مااا كلهن اليه ماما ماما
سندس : شبيكم لكم خزيتونا شصار
حسام : هاي مالتي ما انطي الهم
سندس : جيبو الكم اني اقسمه
وانطتنا ماما كل واحد نص جنت ممصدكه كعد اكلها واخيراً راح اضوكها
وحسام طنكر لان ماما اخذتهن كلهن منه رغم اله انطته كامله بس النا نص بس هو يريدهن كلهن

طلعت ماما وعافتنا بلغرفه
حجي طه : اي شخبارك شنو شغلك كتلي اشتغل
سجاد : فيترجي بمحل بشيخ عمر
سندس : تفضلو الجاي ولو تدخل مني بس شعجب عمتك رضت تشتغل فيتر ومشغلتك ويه علي بلمطعم بلمحل الجديد الي فتحه نهر كالت عمتك روحها بيك
سجاد : باوع بنظره قويه ويحجي بهدوء وليش اعتمد على غيري شبيه مكسح مابيه خير مااحب اخذ شى من احد
سندس : بس هاي عمتك مو غريبه
سجاد : عمتي على عيني وراسي خلف الله عليها مكعدتني بيتها مااقبل اصير عاله على احد واحب اشتغل الي يهواه نفسي
سندس : براحتك عيني عافته ومشت
لو ما ادري ابن اخوها لانعام جان كلت هذا اخو طة نفس عقل الفكريات والمثاليات الخايسه اووي طبه مرض اني شنو فوكاها

طول الوحش يمنا لليل يسولف ويه بابا وتعشينا سوه بس اني مأكلت خفت
وشويه وطلع كيفت هسه اكدر ارتاح
سندس : اكولك شو هذا ابن اخوها لانعام شايل خشمه كوه تطلع الكلمة منه تكول ابن وزير لوما خلك فيتر
حجي طه : مالج دخل بيه شاب مؤدب واخلاق ورجال كافي عمره ٢٠ سنه ومعتمد على نفسه وشايل روحه يكدر يعتمد على عمته وهي متقصر بس هو رجال لهذا يريد يشتغل بيده
سندس : يارجال كول فگر كول مو وجهه نعمه وخير اني عمتي عدها كل هذا الخير وتحبني واشتغل فيتر گبور اي والله هو الحظ يجي لهيج نماذج تتفستق
حجي طه : كومو بابا نامو امكم عدها موال جديد تريد ادوخنا بيه
سندس : كومو لكم نامو فوكاها معاجبه كلامي
حجي طه : انام سندس تره دخلت والكعبه منج
سندس : روح نام وخليني بضيمي

مرت الاشهر واني ما اشوف الوحش همزين وشاطره والست دوم تكتبلي احسنتي ياشاطره
طلعت من المدرسه بشهر الرابع شفت حسام يلعب ويه الولد وبيدهم طياره ردت العب وياهم
حسام حباب خلي اطير وياكم
حسام : امشي ولي ودفعني حيل وكعت بلكاع كمت ابجي
اله اكول لبابا عليك مو كال هاي الطياره كلكم تلعبون بيها
حسام : والله اكول لماما واخليها تكتلج بس تكولين لبابا
رجعت للبيت مقهوره هو اصلاً بابا سواها النا كلنا واني جبت العواد لميتهم من الشارع وصلت للبيت طبيت لكيت ماما بلكراج احجي وابجي ماما تقبلين حسام يدفعني وميقبل نلعب بلطياره
سندس : اكعدي سليل انتي بنيه خلي يلعب ويه اصدقائة
سليل : بس بابا كال كلنا نلعب بيها
جان تعيط حيل بيه اسكتي وانجبي كتلج عوفي اخوج
طبيت ركض ابجي ورشا تباوع علية ومدمعه عيونها
وره ما بدلت وغسلت صاحتني ماما تعالي وينج طلعت وعيوني حمرة دم
سندس : هاج شري هاي الملابس
سليل : ماما ذني هوايه يوكعن
سندس : هاج قسمتهن الج وشري عدل مثل معلمتج وامسحي وجهج هسه يجي ابوج شيخلصنا
مسحت عيوني بس الشهكه بگلبي السله ثكيله بس اصعد بايه بايه
فتحت السطح واشر اكمز واشر ماانوش ورجعت مره ثاني جبت الوجبه الثانيه واشر جان اسمع الصوت المرعب ورايه كمزت من الخوف باوعت علية واني منا بعدها الشهكه بصدري
سجاد : لتبجين شكد تعوين لخاطر ربج هاااج
سليل : باوعت بيده خيط رفعت راسي للسما لكيت طياره اطير ليفوك
سجاد : هاج العبي بيها ومن تخلصين ضميها تعرفين تلعبين لو بس شاطره بلبجي والوكعات
سليل : حصرتي الدمعه جان يكولي بصوت يخوف
سجاد : دمعه متنزل من عيونج بس اشوفها انزل الطياره واشكها
سليل : لا لا سكتت وامسح بجامتي عيوني تقربت منه بخطوات خايفه وحذره يفصل بينا حايط ناصي وهو طويل واصل الحايط لنص جسمه مد ايده وانطاني الخيط لزمته واني اباوع على ايده شكبرها وجان يكولي وهو عاكد حاجبه
صيري سباعيه وكافي على كولشي وبجيتي مره الثانيه اذا شفتج تعوين اعلكج من شعرج بلشجره واخلي الجهال كلها تشمر الطابوك عليج
سليل : خفت منه وشمرت الخيط ونزلت اعيط من الخوف

يتبع ...