رواية ابي والغزلان الفصل الحادي والسبعون 71 - بقلم ريام هادي

ابي والغزلان الجزء الثاني
للكاتبة Reem
البارت الثاني والعشرون

(بارت طويل لعيونكم 🌹)

انه العمره گضاها مسابك الميل
انه المن راد يغفه تخوصر الليل
انه المن طاح محد صار عكازه
انه الفرهدوا روحه وباگو اعزازه

حجي طه : هذا مو منطق ابني اني احبك والله شاهد اعتبرك ابني وغالي عليه وكتلك بت عمك هي وانت اولى بيها بس مو بهاي الطريقه لو تجيب اهلك وتجي حسب الاصول لو مالك مره عندي
حسين : عمو والقران حاولت وياهم وماقبلو صار اشهر حرت شسويت وقافلين
حجي طه : ماطول هيج ابقى وره اهلك ابني ولتفتح هذا الموضوع بعد لو تجي انت واهلك وتخطب لو اعذرني

ريم : طفرت من مكاني والحسره بگلبي شلون ياربي
طلع حسين مقهور وثاني يوم هم اجه وجاب سجاد وسيط ونفس الشى بابا قافل لو اهله لو ماكو ارتباط ساعات يسولفون وميفيد
حسيت بحسره وخنكه من كل جهه خابرني ميت قهر والدمعه بعينه
حسين : ريمتي شلون حرت شلون اقنع اهلي ومافاد ورجعت اقنع ابوج وهم ما فاد اني اذا مصرتي اليه والله ابوكج
ريم : بطل هاي الافلام وخلينا نفكر شنسوي
حسين : عبالج مااسويها

ريم : اووف حسين مو وكتها امك مكدرت تقنعها حتى تأثر على ابوك
حسين : هاي قافله من الرئيسي وتعيط بس اجيب طاري الموضوع
ريم : بس انت فاجأتني مكتلي راح تخطب
حسين : من قهرتي انطيت كل هاي المده بس حتى اقنعهم ومافاد والله شيريد مني ابويه اسوي في سبيل يجي ويايه واخطبج واخر شى تعاركت وعفت البيت واجيت شايط عليكم من شفت كعدتكم مكدرت اسكت كلت لو بلهدف لو بلنجف
ريم : عااشت ايدك اجت بلفتحه الثالثه

حسين : شلون هسه اريدج تعرفين شنو اريدج
ريم : لتعيط اعرف والله
روح هسه وبعدين نتخابر
حسين : وين رايحه
ريم : بعدين حبيبي نتخابر كتلك ليضل بالك
نزلت لغرفه بابا لكيته يقرا قران اول مشافني صدق واشرلي تعالي كعدت بصفه ومدنجه
حجي طه : اول مره اشوفج هيج هادئه ومتردده وينها ام لسان وتعيط وترادد وتاخذ حقها
ريم : اجيتك وخايفه تردني
حجي طه : مو طه الي يرد غزالته كولي اسمعج
ريم : اعرف بيك كل الي تسوي لمصلحتي
حجي طه : همزين تعرفين بابا اني اريد ارفع شانج بينهم مااريد يقللون من قيمتج الشغله التجي بسهوله تروح بسهوله وانتي مو قليله بت ناس ومتعلمه وتعبانه على نفسج مو اقل من غيرج تجي الناس هنا تتوسل حتى انطيهم غزالتي

ريم : بس تعرف ظروفه والله صار اشهر يحاول
حجي طه : يحاول بعد وبعد
ريم : لزمت ايده لبابا تدري بابا اني مفرحانه بحياتي لتشوفني اضحك واكمز واشاقه هاي كلها حتى مااكعد وحدي  ويكتلني القهر  من اني وصغيره وگلبي بس الحزن مخيم عليه ولا مره جنت دوم اكول مراح بيوم اضوك الفرحه ولا راح احب ولا انحب ويوم مصار هذا الشى الف حايط صد صار
حجي طه : يعني جايه تكولين لابوج اريده واحبه موو
ريم : خجلت اكولها ودنجت وكتله لا اجيت اكول الك اريد افرح ولو مره بعمري

سحبت ايده وكاال
حجي طه : خايف عليج بنيتي رايحه برجلج للنار
ريم : اني بت طه لتخاف عليه الف نار اطفيها طول ما انت بظهري واكف ويايه
حجي طه : واذا ندمتي بيوم شلون اسلمج هيج بسهوله الهم اخاف يقللون من قدرج وقيمتج ويكولون ابوها شمرها
ريم : ينكص لسانه اليكول هيج واني اعرف اوكف كل واحد عند حده لتخاف غزالتك قويه بيك جر نفس وكاال

حجي طه : كوم بابا نامي وربج يحلها
ريم : بست راسه وهمست فرحتنا بيدي لاتكسر خاطرنا
وطلعت وسديت الباب جنت حيل مخنوكه واريد ابجي وخايفه لا اخسر حسين حيل كمت احبه وتعلقت بيه صار كلشي بحياتي وردت مثل ماهو دافع عن حبنا اني هم ادافع

ثاني يوم بقيت حابسه روحي بغرفتي وللعصر هدوء وماادري شكوو جوه

رشا : شبيك حبيبي
شعلان : مابيه
رشا : عليه على رشاوي شبيك گلبي احجي وجهك مدلغم وضايج تعال اكعد بصفي واحجي
شعلان : ضجت من موقف صار هسه
رشا : وهو
شعلان : ابوج صاح سجاد علمود شغله ريم وحتى ما اخذ رأي ليش بشنو سجاد احسن مني وهم هو غريب واني ابن خاله ورجل بته يعني المفروض اني يسألني مو سجاد
رشا : بسته من خده وكتله شوف حبيبي يجوز الموقف حقك تنقهر منه لان مهما كان تبقى زوج بنته وقريبه مثل مكلت بس مال تكول سجاد غريب هنا كلمتك مترهم
شعلان : شنو قصدج
رشا : اكثر من مره كتلك سجاد النا اخ جبير وطبيعي بابا يسأله وياخذ رأيه  بحكم هو مربينا وسنين ويانه وهم يعرف حسين وفوك كل هذا كرايب عمه نهر ويعرف هاي العائله كلش زين وبابا يمون حيل عليه
شعلان : والله موتيني كل حجايه وعمو سجاد ربه عمو سجاد تعب عمو سجاد مشتاقتله
رشا : هههههه تغار منه
شعلان : هااي شنو اني اغار منه تخبلتي
رشا : لعد شنو معنى كلامك
شعلان : خلي اكوم اني صوجي اجيت حجيتلج المضوجني اكيد متنطين لا بأبوج ولا بعمج الشفيه
رشا : شعلان ميصير هيج هسه هو شمسويلك وهيج تضوج منه
شعلان : شايفه نفسكم شلون تفقدون ضحك وسوالف ويااه
رشا : ارجع واكول الك هذا ابونا الثاني اياك بيوم تحطه بالك وتقارن نفسك انت حبيبي وزوجي وروحي من الدنيا وبلنسبه لخواتي انت زوج اختهن بس سجاد بلنسبه النا ابونا الثاني

شعلان : وليش هيج دمج احترك
رشا : لان حقك معشت الي عشناه عفيه لا كل مره نفس الاسطوانه انعيدها
شعلان : اكوم احسن
رشا : حضنته لا متكوم
شعلان : شتردين هنا ابوس راس ابوج الثاني حتى ترتاحين
رشا : لا بوسني اني
شعلان : استغفر الله
رشا : ههههه يمه اروح فدووه للعصبي
وبقيت ابوس بيه
شعلان : هاااا مبين ادورين حرشه كووه
رشا : ههههه رجلي واتحارش بيه غير حلالي
شعلان : مو هستوج جايبه لو تردين تحبلين بعد
رشا : ههههههه لا لا بطلت
حضني ويبوس بيه والله اشتاقيتلج غير نرحع لبيتنا عاد والله مليت
رشا : مبقى شى حبيبي حتى نروح براحتنا
شعلان : خابرت امي وهند يسلمون عليج
رشا : توقعت يجون
شعلان : لازم اني اجيبهم يمعوده يدوخوج
رشا : ليش احسهم مفرحانين
شعلان : غير طايرين من الفرح
رشا : ماادري احساس وبس
شعلان : بطلي هاي سوالف الاحاسيس وان شاء الله من نرجع للكوت راح تشوفين شلون طايرين من الفرح
رشا : الله كريم

شويه وبابا صاح شعلان وسأله عن رأيه كلش ارتاحيت وحسيت شعلان هم ارتاح اعرف بابا يمون على سجاد اكثر بس هذا شعلان سولته بسجاد لان يحس حيل علاقتنا قويه بيه
ريم : جنت كاعده بلغرفه وحاطه ايدي على خدي وضايجه وغزل تگلب بلملازم لان وراها بكلوريا سادس علمي وبلعطله تدرس
غزل : والله هدوء شكد حلوو لو تبقين هيج حتى ادرس
ريم :تسكتين لو اسويج خليه بدائية النواه
غزل : هسه شكلت وتعصبتي لو بس عليه كادره
ريم : دعسوقه اسكتي
غزل : سكتت
جان يدخل بابا
كمت وكفت
حجي طه : حبيبتي غزوله باباتي اريد احجي شويه ويه اختج
غزل : صار بابا
ريم : كعد بصفي وهو نادراً مايصعد فوك يمنا كعد بصفي واني مدنجه مدري خجلانه مدري خايفه من قراره حتى معدتي وجعتني

حجي طه : شوفي بنتي اني لمصلحتج مقبلت بسالفه حسين لان اعرف هاي الناس شتكدر تسوي وشلون اذا تحط براسها احد ادمره واني ماردتج ترحين بلرجلين بس طول ماانتي رايدته وتكولين بعمري مافرحت وفرحتج بيدي مستحيل ابخل عليج بيها
ريم : يعني شنو
حجي طه : موافق بنتي بس بشرط
ريم : كمزت مكيفه وتالي كلت عيب استحي غير شويه ثكل وكعدت ودنجت كوول بابا
حجي طه : مااريد بيوم اندم وافقت ارجع واكرر مقتنعه تتزوجين حسين بدون رضات اهله يعني تتحملين كلشي يصير بعدين
ريم : اي اتحمل
حجي طه : مو ترجعين بعدين تلوميني وتكولين لو رافض وممنطيني
ريم : مستحيل اكولها
حجي طه : هذا هو توكلو بالله اخابره وخلي يجي يخطب بلخير عليج بنيتي
ريم : حضنته لبابا وبسته وبس طلع كمت اكمز على الجربايه واجت سليل وجنات وغزل
سليل : هااا بشري
ريم : وافق وافق كللوووووش راح اعرس

واشتغلت الهوسه والتصفيك والهلاهل حضنت خواتي جنت طايره من الفرحه
وخابر بابا حسين وماكذب خبر ساعه وهو يمنا وكعدنا كلنا
حجي طه : شوف ابني انت ابن عمها وكتلك اولى بيها واني لخاطر عيونها كسرت العادات والتقاليد ودست على كلشي وراح انطيك بنتي بدون موافقه اهلك وهاي عيبه بحقي بس اتجاوزها لاجل عينها وهم لاجل عينك لان انت غالي عندي بس هاي كدامهم كلهم بنتي صار عليها شى أذوها انت تصير كدامي وبذاك الوكت انسى انت ابن اخويه وانسى كل صله دم بينا وأذيك اني انطيتك قطعه من روحي وريمه هاي فرحه هذا البيت وانت اخذت فرحته وضحكته اياك بيوم اطفي ضحكتها

حسين : على راسي عمو اخليها وعد مني متشوف بس ضحكتها
رشا : وحلكها الميوكف من الاكل
ريم : حجت عود البقره الحلوب
سليل : اششش عيب غير اتسكتن وانت غير عروس شويه ثكل
ريم : ثكلت والله موتوني اثكلي واثكلي جيبن طابوك واربطن رجلي وفضني
حجي طه : اكو شى بنات
سليل : هااا لا بابا ماكو

حسين : نقرا الفاتحه عمي
حجي طه : اليوم
حسين : اي بروح ابوك كمل فرحتنا وحتى الحلقات جبتها
نهر : هاي شنو يمه غير نجهزكم ونسويلكم كعده شنو هاي ركض ركض
حسين : اقرا الفاتحه والبسها والتردوه بعدين نسوي
حجي طه : هذا هو ابني وانتم سجاد وشعلان بما ان انتم اخوتها الكبار عدكم راي ثاني
شعلان : لا ابو حسام توكل بالله
سجاد : بلخير عليك حسين
حسين : يوم الالك ونفرح بيك
مباشره رفع عينه على سليل
سليل : سويت نفسي مسمعت ودرت وجهي ولا يمي بس اني معت من گالها

ريم : قرينا الفاتحه جانت فرحه بگلبي ماكو مثلها معقوله اخذت الاحبه وهيج عاند اهله واخذني مثل الافلام والمسلسلات الي نشوفها ممصدكه
شعلان : شنو رأيكم باجر نسوي كعده
ونجيب سيد ونعقد الهم
حسين : الف رحمه على ابوك احسن شى
حجي طه : والله ياابني اكول انتظرو شويه
حسين : شنو الي ننتظره عمي والله ماكو شى لتخاف
باوع بابا عليه وشافني شلون طايره من الفرح
حجي طه : مااشي باجر جهزو كلشي والحلقات باجر لبسها
حسين : هذا هو باجر ان شاء الله

ريم : ثاني يوم الركص والهلاهل ترست البيت حتى رشاوي كامت ويانه
تتحرك على كيفها وتهلهل جنت طايره ممصدكه حتى نوم منمت اخاف حلم واصحى منه
نهر : شتلبسين يمه
ريم : والله ماادري ممشتريه شى ومبقى وكت
سليل : اطلع اني وعمه بسرعه نشتري ونجي
طبت جنات
ميحتاج العريس عيني دزه هااج
وفتحته جان فستان رصاصي على فضي لونه يجنن ردن وطويل بيه فتحه من الرجل بس مو حيل طويله ومقسم على جسمي دمعت عيني مو لان اشترااه وجابه وذكرني لان مثل محبيت فستان ميظهر البكع مالتي ايدي مغطيه وصدري مغطى بتول خفيف وشي بسيط وبنفس الوقت حييل راقي ومبين غالي
سبحت وفتحت شعري وجنات كعدت ساعه وربع تشسور بشعري
ريم : والله ايدج ذهب شلون تشسورين يخبل
جنات : مرت خالي علمتني
وهسه احطلج شويه مكياج
ريم : لا ميحتاج اني اعرف امكيج
جنات : اي شايفتج حلوو ترسمين العين وترتيبه كلش حلوو عبالك ام صالون منين تعلمتي
ريم : خلصتها اتعلم على وجهي شلون اخفي البكع البي لحد مااخذت ايدي واشوف البنات بلكليه وشويه اخذت ايدي
جنات : كملت مااشاء الله شعرج يجنن

ريم : غير عمه خلصته ويانه تحط بلزيوت وترجع ليوره المعشب مال راس الشارع اشتره بيت من وراها يوميه راح مشتريه خبطه شكل ولازكتها براسنا
جنات : هسه اخلي عمه تعلمني
نهر : ليش اعلمج يمه اني اخليلج حالج من حالهن
جنات : فدوة لعمرج
خليت المكياج ولبست الفستان طلع فت على قياسي همزين انسدت السحابه
سليل : طالعه ملكان اللهم صل على محمد وآل محمد كللوووش
حضنت سليل يوم الالج سلول
سليل : من منو
ريم : اكيد من عمي المخبل ولو اذا تضلين عليه هاي ضلتج ولا تتزوجين
سليل : هههههه الله كريم
يله امشينا ننزل

ونزلنا والهلاهل معزمنا احد بس جوارين اثنين حيل يعرفونا صديقات عمه واجه السيد وعقد وطب حسين فدوه لطوله طالع يخبل
لبسني الحلقه وجان يحط السوار بيدي مال نجاحي الي المفروض رجعه
حسين : هسه عادي تلبسي موو
ريم : ابتسمت اي عادي
حسين : ريمتي صرتي الي حلالي مالتي وحدي وشنو هذا الحسن وين جنتي ضامته عني طالعه كيك شوكت اكلج اااخ شوكت
ريم : خجلت من كلامه ولكم اول مره ادري بروحي اخجل

واشتغل الركص لان ماكو احد اخذنا راحتنا
سليل : حضرت الكيك والببسي كل ماافوت يباوع عليه سجاد جنت اتعامل برود قاتل حتى اني تعلمت اشوفه بدون مااتقرب منه ومن احسه يريد يحجي شى اتجاهله
ماادري ليش حسيت الوضع انسب الي واله لان بس نحجي تكب عركه
وخلصت الحفله واحنا بقمه سعادتنا واني وسجاد مد وجزر ومن نلتقي بمسافه قريبه اتجنبه

ريم : بيومها اسعد يوم بحياتي كلشي متكامل اهلي كلهم موجودين حبيبي وصرت اله حتى شكلي طالع حلوو واتخبلو عليه وفستان الي احبه مظاهر شى يخليني اخجل او يكسر فرحتي
لدرجه منمت من الفرحه اي اول مره بعمري ماانام من الفرحه بس يمكن اني الفرحه محسوبه عليه حساب اذا افرح انكسر وراها

متصل بيه حسين توقعت لان راجع تعبان لان سهرنا وهم مكعدنا وحدنا كال باجر نطلع سوه ونغير جو
انتظرت ادك وميشيله ادك وماكو
هسه مااعرف ابدل لو لا لان صارت بال ٢ الظهر وهو من البارحه ماكو
لحد مدك على عمه نهر
نهر : هاا يمه حسوني
حسين : عمه بيبي بلمستشفى انجلطت بين الحياه والموت كلت اكلج اخاف يصير عليها شى وتلوميني مكتلج
عاطت عمه وطفرنا وتصيح امي تموت
ريم : اني صفنت ياام هاي وتذكرت عزه غير هي امها انعام هاي شنو الجلطها ليش هاي هم مثلنا تنجلط وتموت

اتصلت عمه لبابا وكالت اله وتبجي
حجي طه : فدووه طه اروح اشوفها اخاف تموت وماشفتها
حجي طه : اخاف يسمعوج حجايه تنغثين منها
نهر : ميخالف بس اشوفها
حجي طه : اجي وياج
نهر : لا فدووه هناك علي ومااريد تصير مشاكل
حجي طه : جايج بلطريق
اجه بابا واخذ عمه وراحو وساعه تجر ساعه واجو كلنا كاعدين ننتظر واني ادز بهلرسائل وادك على حسين وميجاوب
اجه بابا طب للغرفه وحسينا ضايج
كعدت عمه يمنا
سليل : شصار ماما

نهر : اوووف بنيتي شفت اليوم اخوه مثل الاعداء شفت اخ يريد يشرب من دمه اخوه
رشا : شصار ياستار
نهر : احجيلجن اول مدخنا المستشفى نتراكض اني وطه سوده عليه لخاطري اجه هو شافنا علي تهجم عليه
علي : لك عار شجابك تريد تتشمت بأمي
حجي طه : هاي شبيك تخبلت اني اتشمت بمريض
علي : عبالك تفلت منها تريد تاخذ ابني وتزوجه لبتك المريضة
حجي طه : دفعته حيل بتي مو مريضة وكلشي مابيها
واحسن من اي بنيه واياك تحجي عليها
نهر : فدووه كافي عيب منا الناس
علي : شوف طه اذا بقت خطوبه حسين على بتك اسويها دم
حجي طه : شسوي سوي ذاك حايط واركع راسك بيه
علي : لك كواد تزوج بتك بدون موافقتنا اكيد عايبه مو بنيه وتريد تلزكها براس هذا الفقير
نهر : جان طه يلزم علي ولزكه بلحايط وضربه وعلي رد الضربه واجو حرس المستشفى طلعونا وبلباب اجه حسين مدري وين جان
وحاول يلزم ابوه وعلي يعيط اذا انت رجال اسحب بتك من ابني ولك امي بس سمعت الخبر انجلطت راح تموتها ما موتتها بكتلك لجعفر تريد تموتها بخطوبه حسين

حجي طه : اني مااتشمت بمريض بس اذا هذا جزاء كلشي سوته بلجهنم متهمني
نهر : وجيت علي يريد يضرب ابوج ولزمه حسين وتوسل بينا نرجع
رشا : يعني ماشفتي امج
نهر : هو وين اشوفها بس وصلنا ناس تمالخت ويه ناس
سليل : وبابا
نهر : سوده عليه الطريق كله ساكت ويستغفر بلسبحه انكسر حيل خاطره

ريم : طبيت لغرفه بابا لكيته كاعد وبيده السبحه وصافن يسبح بس من وجهه مبينه القهره دنجت وبست راسه باوع عليه وابتسم وعيونه تقرا الف قهره وقهره
حجي طه : هاا بنتي محتاجه شى
كعدت بصفه على الجربايه
بابا حجتلي عمه كلشي الصار بلمستشفى
حجي طه : اي
ريم : اذا تريد افصخ ماعندي مانع التريده وياك اني
حجي طه : ليش يابنتي وعلى شنو تفصخين ياستار
ريم : كله ولا كرامتك عندي انت تسوه الدنيا ومابيها
حجي طه : وانتي عندي تسوين حتى نفسي
ريم : حضنته حيل ودمعت وخرني من حضنه ومسح عيووني
حجي طه : شوفي بنتي هاي دنيا كلشي نشوف بيها ميصير كلشي نتعصب عليه ونسوي ردت فعل بسرعه لان وراها نندم اي شى او قرار نتخذه بلحظه عصبيه راح يضيع الاول والتالي
ريم : بس حيل اذوك بسببي وتجاوز عليك وقلل من قيمتك واني مااقبل بشر يمسك بكلمة

حجي طه : يبقى اخويه الجبير مو واحد غريب وهم مو انتي السبب
ريم : شلون مو اني السبب والعركات هاي كلها والمصايب
حجي طه : بنتي من يوم مافتحت عيني هاي انعام ومصايبها وهذا علي اخويه وطبعه وهاي كلها تراكمات انتي مجرد سبب بسيط من ضمن مواقف هواي صارت بحياتنا لاتضلين على كلشي تركزين وتقهرين روحج وتخربين فرحتج
ريم : والله من كالت عمه كاعده على نار حتى النار نزلت بمعدتي
حجي طه : يعني بعد متاكلين
ريم : هاااا لا اكل بس شوي جان يسحبني ويضحك وحضني
حجي طه : هههههه فدووه لبنتي الجوعيه هيج اريدج ليهمج احد اريدج دوم قويه وسباعيه ياغزال البراري

ريم : يعني مزعلان مني
حجي طه : انتي شعليج يابنتي
ريم : مااعرف احس السبب مني لو ما خطوبتي اني وحسين مجان صار كل هذا
حجي طه : كتلج مالج دخل شو من قال وبله هاي اني وانعام وعلي منكعد بمكان اله تگب عركه ليش بالاول مردت انطيج حتى لتعبين وياهم اني عشت وياهم واعرفهم وخايف عليج بس اريدج قويه ميهزج ريح جبل والصار يوم انسي اريدج مرتاحه وسعيده وهاي الضحكه متفاركجج ابد وشيصير بعد بيني وبينهم متدخلين ابد بيه
ريم : حتى اذا تجاوزو بعد عليك

حجي طه : حتى لو اتجاوزو لتدخلين انتي ابد عليج بخطيبج وبس هاي الامور عوفيها عليه يابنتي هذا الشعر شاب من شويه غير شاف اشكال والوان منهم استغفر الله مااريد اختنك واتذكر ولا اخنكج ويايه كوم يابه ارتاحي ولتفكرين بشى عليج بنفسج وبحسين وبس وعوفي الكبار ومشاكلهم المتخلص حسين شاريج بنتي ويحبج وهذا الي مطمني عليج
ريم : بسته من ايده الله يحفظك النا ياتاج راسي انت

حجي طه : ويحفظج اليه هاي ضحكتج وفرحتج احارب الدنيا لاجلها يله كومي روحي يم خواتج ولتفتحين اي موضوع ويه حسين هو هم واكع بين نارين الله يعينه
ريم : ان شاء الله بابا بسته وطلعت والله گلب ابويه مشايفه منه شويه ارتاحيت رغم جنت مصره شيقرر بابا وياه حتى لو افصخ لعيونه ولا يمسون كرامته ويأذوه بس مثل كل مره يفضلنا على نفسه

طلعت يم رشا كعدت وسليل وجنات واموري يكمز يمهم
سليل : هااا بشري
ريم : ماكو شى الوضع زين
رشا : الله يستر وتعدي الامور على خير ولو اني ممرتاحه لامه
ريم : امه ليش
رشا : يمعوده لتنسين هي عمتج مو انعامو
ريم : ادري بس حسب مكالت عمه نهر زينه هيه مو راعيه مشاكل
رشا : الي يعاشر انعام ينجلب اكثر منها بله متسكتين
سليل : اششش لتسمعكم ماما نهر
جنات : تره خاله نوريه(زوجة علي ام حسين ) مو فقيره لا عبالج
رشا : هاااج استلمي احنا ليش نروح بعيد هاي بت اختها وعاشت وياها خلصت عمرها بذاك المهجوم

جنات : اي والله مهجوم تدرين شنو طبيعه خالتي نوريه  سكوتيه بس اذا حطت واحد بعقلها تكرهه بلساعه الي انولد بيها مثل الحيه تلدغ وتضم راسها شكت سوتلي مشاكل من وره بتها نورس
رشا : صدك هي شخبارها
جنات : يمعوده وحده خشم يابس تشوف الناس من طرف خشمها وحقيره وارثه الحقاره بأمتياز جانت حسره تشوفني كاعده تروح لامها وتخبث عليه لحد ماخلتني خاله خدامه الها ولبتها
ريم : بس هي اخت امج ليش مو حنينه عليج
جنات : هي امي شمرتني واتزوجت ودارت وجهه وعاشت وخلفت وماسألت عليه ولا حنت تردين خالتي تحن من كل عقلج اصلاً مرات احس خالتي مخنوكه مني لو ما بيبي دوم تكلها هاي بت الغاالي
رشا : خوش بت الغالي وساكمتج

جنات : الشهاده لله هي مجانت تأذيني بس دكتها الموزينه بحقي من شمرتني بيت جدي واني متأكده من وره نوريه وبتها
سليل : هم شايف الضيم بذاك البيت
جنات : يمعوده خلصتها قهر بقهر بس جان اهون من بيت جدي الثاني وخوالي ذولاك اكبر ساقطين على الاقل جانت بيبي انعام هم مرات تسكتهم ادافع عني اما ذولاك اووو ماخلو على حالي حال بس انعام تموت على حسين والله مرات احسها تحبه اكثر حتى من عمو علي وراه وراه اكل شرب نام لبس
ريم : الله يبشرج بلخير
جنات : ههههه ليش هو مكايلج
ريم : لا والله لان يعرف مااطيقها ولا اطيق اسمها

جنات : كتلج مرات احسها تحبه اكثر من ابوه ودوم تكول لامه ديري بالج تضوجي حتى جانت تدري بيه يجي هنا بس تسكت حتى ليزعل بلبدايه تتعارك ويااه بس من كلها اروح اعيش يمهم واعوفكم تخبلت وبدت تغلس على جياته هنا
ريم : اااخ سحليه ولا يحجيلي صدك من السكوتي موتي

جنات : لتحجين عفيه كدامه هسه يكول تنقل حجي ويعاتبني
ريم : شحده غير اگلب الدنيا
جنات : ميخالف عفيه اني هم مااريده يزعل مني احبه لحسين مثل اخويه طيب وحنين ومشايفه شى موزين بس ردت اوصلج الصوره خصم الموضوع انتي اخذتي عزيز گلبها لانعام
ريم : همزين گلتي حتى احرك گلبها وكل متفوت اطك اصبعتين واغني اخذته منج على عنادج
رشا : ههههههه والله مخبله وتسويها
جنات : يمعوده عوفيها بيبي تحب المشاكل وتحب واحد يعاندها حتى تذب حركتها بيه عشت وياهم ايام سم
سليل : الله لايرجع ذيج الايام
جنات : ربج رحمني بعمي واله ماادري جان شصار بحالي
رشا : لتكولين هيج احنا وياج
جنات : الله شاهد انتم خواتي واعز
سليل : شبيج ريموو شو صفنتي
ريم : الي يسمع هذا الحجي شيسوي يشد وصله ويركص مثلاً

جنات : مالج دخل بكل احد اهم شى حسوني يحبج وشاريج وحارب الدنيا علمودج
ريم : بس من البارحه ادك عليه وماكو حتى ميجاوب
سليل : لتنسين همه هسه بلمستشفى والله اعلم شنو حالهم واكيد مخبوص
ريم : اكيد مخبوص بس حتى ميكلف يدز رساله ويكول ليضل بالج او مشغول
جنات : الغايب عذره ويااه والله اعلم هسه نوريه وعلي شمسووين بيه علمود بيبي اكيد محملي الذنب
ريم : گلبي يلعب وقلقه
رشا : ان شاء الله ماكو شى اكلجن جعت تره
ريم : هااا صايره كل شويه تاكلين مو كلتي بس اجيب اصير رشيقه
رشا : الله اكبر مصار كم يوم من جبت ورايه رضاعه
ريم : خوش درب رضاعه وكل شويه ضاربه ماعون تمن وراها تشريب وراها لفات والله ارضع
سليل : ههههه خلي تاكل عاافيات شرايده منها
ريم : خلي تاكل بس لتحط عينها على اكلي
رشا : صاار مااحجي بعد بس الله عليج كومي سويلي نواشف اريد هيج صينيه الي يحبها گلبج شكوو بلثلاجه گلي (تقلاه)
ريم : فلسنا والله گلنا جايبه انفجعتي على الاكل
سليل : اكعدي انتي اني اسويلها راح تگلين وادردمين اعرف بيج
ريم : ياادردم يااهوس اطلع الاكل سم عليها
جنات : لج خطيه المفروض هسه كله لحوم تاكل حتى تقوي جسمها
ريم : شوكت اتزوج واحبل واجيب بس علمود تسون اكل الي وتجيبو ليمي بدون مااسمع كلمتكم المعتاده شكد تاكلين شوكت ياربي
رشا : ههههههه هانت وبيدي اسويلج الاكل
ريم : انتي بلذات راح ياخذج مشعول واطيرين للكوت بعد زين اذا شفناج كل ٣ اشهر  مره
رشا : لا والله اجي ما اتأخر هلكد بعد
ريم : عوفي فروحه يمي حبابه
رشا : شسووين بيها

ريم : اربيها تربيه صالحه تطلع عاقله وفقيره ومؤدبه مثلي وصوتها مينسمع
رشا : مو عليه ريمو دحنا دافنينو سوه يااختي منو هاي الفقيره والعاقله
ريم : عندج شك اكيد اني
رشا : شكات مو شك واحد
ريم : الله يسامحج معذوره يااختي مشعول غيرج
رشا : انشغلتي بنار وبانزين بطلي تكولين مشعول
ريم : ابو فرخه
رشا : شنوو
ريم : فرخه احلى من فروحه وفرحه وفيفو وهاي الاسماء التقليديه  دلع بنتج فرخه
مميز ويناسب رجلج راح ابطل من مشعول واسمي ابو فرخه اسم ممطروق وحلوو ومميز
رشا : كومي مني لا اسويج دجاجه واهلس ريشج واشويج
ريم : قاسيه مو بيدج وركعتني بلممه مال فرخه والله حلوو ومحد مدلع هيج بس هي متحب مواكبه التطور

جنات : هههههه انتي سوالفج متبطليها الله يعين حسين عليج اكوم انوم اموري
سليل : واني اكوم اسوي عشا
ريم : بربج كثري وحش الطاوه (البيتنجان ) وگلي زين
سليل : صاار خاتون
كمت اسوي اكل وعشيتهم اباوع لحد هسه ماكو سجاد وين صار ضميت عشا اله من كلشي شويه وغطيته
ريم : تم ملئ البطن بنجاح محتاجين شى اروح انام
غزل : مواعين العشا عليج ريم
ريم : صغير القوم خادمهم يله اغسلي المواعين وصيري حبابه
غزل : هااي شنوو ماما سليل شووفيها لريم
سليل : اصعدن اني اغسلها
غزل : لا اني لعد اغسلها
سليل : لا حبيبتي اني اغسل واصعد بكل الاحوال منعسانه ومتعبانه
ريم : امممم يعني مو تنتظرين احد
سليل : اصعدي نامي لا والله اخليج حتى البيت هسه تمسحي
ريم : لا لا صاعده ركض
صعدو البنات وبديت انظف المطبخ بس بالي حييل يمه هذا وين صار شويه وانفتحت الباب مد ايده فتحت بردت المطبخ شفته هوه  الْحٍمَدٍ للـّہ ضل بالي عليه سمعت شلون يقفل الباب بلزنجيل وفتح باب المطبخ وشافني واكفه على السنك اكمل غسل مواعين
اول مطب كتله الله يساعدك
سجاد : ويساعدج شو البيت فارغ وهدوء
سليل : احجي واغسل بدون مااباوع بوجهه
الكل صعد لغرفهم ورشا تنوم بتها تعشيت
سجاد : لا بس مجوعان
سليل : تره عشاك موجود
سجاد : شمسوين
سليل : نواشف
سجاد : اكو طماطه تكلاه
سليل : اسويلك
سجاد : اخاف اتعبج
سليل : لا ماكو تعب مسحت ايدي وسديت المي وبديت اثرم هو كعد كبالي بلمطبخ
واني اگلي وظهري عليه تذكرت من جنت ويااه بلشقه سرحت بخيالي
سجاد : ليش صافنه
سليل : هااا لا ماكو شى
سجاد : ليش هلكد هادئه صايره
سليل : انداريت عليه وحجيت بهدوء انت شعليك
سجاد : هااا شعليه
سليل : اي شعليك هادئه مخبله على نفسي ممأذيه احد
شرب مي وشغل جكاره
سليل : شوكت تبطل جكاير شكد ادخن لخاطر لله
سجاد : انت شعليج
سليل : فتحت عيني شنو
سجاد : ادخن ماادخن ممأذي احد
سليل : ابتسمت على كلامه عرفت ردها اليه انداريت اكمل وحضرت كلشي جنت من اتحرك رغم مااباوع عليه بس اعرف كعد يباوع على كل حركة مني
تفضل اكل
سجاد : وين رايحه
سليل : صاعده فوك رايد شى
سجاد : اي من اكمل اريد جاي
سليل : اكل وشويه واجي اسويلك
سجاد : اكعدي ما اتأخر هسه اكل وسوي
سليل : مااشي جريت كرسي وكعدت بعيد عنه
سجاد : ليش كاعده بعيد
سليل : بكيفي معلق وبقى ياكل بهدوء واثناء مياكل غص بس جانت الغصه كلش قوويه ويكح قووي طفرت من مكاني واضرب على ظهره مدري شصار بيه خرب بگلبي الحنين المتعلق بيك رجفت رجفه وركض انطيته مي واضرب على ظهره واكول اسم الله اسم الله شرب المي وجر نفس ورجع راسي ليوره جنت واكفه بعدني رفع راسه وشافني شلون قلقه عليه
سجاد : شكد اشتاقيت لهاي عيونج الي تخاف عليه
سليل : مباشره وخرت منه وجريت نفس
حاولت اكون هادئه بس الگلب شيهدأه وسجاد يمه

خلي اسويلك جاي بين متكمل
وكفت على الطباخ وبگلبي اكول اششش على گيفج قابل شگال وهيج رجفتي كمت اتجنب اباوع عليه وهو عيونه ماتركتني لحظه صبيت الجاي حتى بدون ماانتبهه كمل اكله لو لا
سجاد : تره بعدني مكملت
سليل : منتبهت عادي ارجعه واصبلك فد شوي
سجاد : لا جيبي اشربه
اخذه من ايدي وحطه بصفه
صاعده محتاج شى
سجاد : حتى لو محتاج راح تسوين الاريده
سليل : وكفت محتاج شى
سجاد : من اطلعين شويه انتبهي على ملابسج
سليل : ياملابس
سجاد : تره مااحجي هندي كتلج من اطلعين ماكو داعي البنطرون اكو جبب حًلوة هسه بلسوك وراقيه وحتى غاليه تكدرين تلبسين منها استر واحلى
سليل : جريت نفس وتقربت منه
ليش تريدين اغير لبسي
سجاد : هيج عاجبني
سليل : ماكو شى اسمه عاجبني كولي ليش تريد اغير ملابسي
سجاد : معاجبني هيج تلبسين واكيد بدوامج الرايح والجاي يباوع عليج
سليل : احد گلك اني امشي بدون ملابس لو ملابسيي لزك او بيها اغراء حتى الرايح والجاي يباوع عليه ملابسي مستوره ومحتشمه لتتخيل شى مصاير
سجاد : مااتخايل بس هيج احسن بدلي ملابسج ومستعد اني اشتريلج جبب شكد متردين
سليل : مااريد
سجاد : مو بكيفج
سليل : تقربت حيل منه لدرجه اشم ريحته وكتله بكيف منو لعد هااا بكيف منو جان يكول بنبره هادئه
سجاد : لخاطري بدليهم وريحيني
سليل : همست وكتله مااريحك لان انت مافكرت بيوم براحتي لتطلب مني شى راح وكته ومضى اذا اريد اغير مني نفسي او لبسي كون اني اريد مو حتى اريح احد
سجاد : مااشي براحتج
سليل : اكيد براحتي عفته وصعدت اني هذا الغبي گلبي بس لو ميدك قوي منو هو موجود ويخربط نبضاتي جان بخير اني
بس همزين كدرت اجاوب بدون ماارجف واضعف

شويه ونزلت نمت يم رشا بالاستقبال لان ماما نهر تعبانه رجعت وعرفت بيها مغثوثه ومقهوره ومردت تتأذه وتسهر ويه رشا
رشا : اكوو شى
سليل : لا ماكو گلبي نامي وارتاحي
رشا : اذا كعدت الصغيره كعديني
سليل : لتخافين تدرين بيه اسهر ماانام بسهوله
بقيت للفجر لحد مصاح الله اكبر كمت توضيت باوعت من بعيد شلون نايم على ظهره وحاط ايده على وجهه لان هو ينام بلهول
كملت وضوء وخر ايده وباوع عليه
وهمس بصوت ناعس
ابقي عاندي وخلي نشوف اني لو انتي
سليل : باوعت عليه والله مو صاحي عفته ودخلت صليت ونمت
وثاني يوم كعدتني ريم
ريم : اكعدي سلول
سليل : هااا حبيبتي
ريم : خابرني حسين كال جايج اريد احجي وياج وحدنا راح نفتر شويه بلسياره ونرجع ما اتاخر
سليل : من الصبح هيج
ريم : شسوي صوته مال واحد تعبان حيل واني هم ضل بالي حييل عليه معودت خابر حتى افهم منه شصاير
مااتأخر والله من تكعد عمه بلغيها
سليل : بابا طلع للمطعم مو
ريم : اي دخلت لغرفته ماكو هو غير من الصبح يطلع تره هسه ساعه ٨ ونص

سليل : مااشي روحي حبيبتي ولتتأخرين
ريم : بست سليل وطلعت بلكراج دقيقه واندك الهورن
صعدت ويااه وجنت حيل مشتاقه اله
صباح الخير حبيبي
حسين : صباح النور
ريم : حرك السياره وهو هادئ
بيك شى حسين احجي ويااه ميجاوب
احجي شصار
وليش هيج حالك
حسين : صار يومين بس مشاكل وعياط وصياح
ريم : وكف السياره وفهمني
حسين : هسه اطبك بمكان ونسولف نروح لبيت اهلي مابيه احد
ريم : لا مااريد نحجي هنا وهم مااريد اتأخر
طبك السياره بمكان هادئ وهم صبح وماكو احد وجمعه الكل نايمه

حسين : بالاول راح احجي وفهميني بدون مشاكل تره روحي واصله لخشمي
ريم : اي غير افهم بالاول احجي بله
حسين : احنا لازم نفصخ
ريم : شنفصخ
حسين : خطوبتنا
ريم : احس جبل وكع على راسي اريد استوعب كلامه حتى عيووني غوشت
ياخطوبه تفصخها انت شتحجي كعد تعرف شحجيت
حسين : بس افهمج واكيد راح تساعديني
من ورانا انجلطت بيبي
ريم : وجلطتهم متهمني
حسين : بس اني تهمني وعلاقتي طيبه بيها واذا انتي متحبيها هاي شى راجعلج ولا بيوم ادخلت وكلت لتحبيها او لتحجين عليها اشكال تسوين واني ساكت بس تبقى بيبيتي واحبها

ريم : زين وشدخل خطوبتنا بحبك الها
حسين : افهميني ريم البارحه وره مراح ابوج لزمني ابويه وامي
علي : شوف حسين الصار بأمي من وراك ومن وره قهرتها واذا ماتت خطيتها برگبتك
نوريه : من كل عقلك ريم تصير مرتك وتصير جنتي اذا صار هذا الشى اني انجلط مو بس بيبيتك
علي : اسمع انت ابني الوحيد ومال اعوفك لطه على جثتي والله اكتلك اذا تتزوجها
حسين : يابه طفل كدامك وتحاجيني هيج اجيت وكتلكم زوجها اليه ومقبلتو وتوسلت وجبتكم بكل الطرق ومافاد وكتلكم هاي البنيه اريدها واحبها ومااتزوج غيرها
علي : وتروح تخطبها من ورانا واحنا نركع راسنا بلحايط ولك اذا اذبحك حلال بيك يعني مغزر بيك الربى شنو اعدائك احنا

حسين : اني مردت شى منك بس اتزوجها وكم مره كلت غير ريم مااتزوج
نوريه : عساك متزوجت ضل هيج ولا تاخذ هاي البكعه شلون الك نفس تتقرب منها
حسين : يوم مااسمح الج لتنسين هي خطيبتي
علي : انجب وفوكاها ترادد امك على مود بت طه
يعني اريد افهم شلون تحط ايدك بأيده مفكرت بينا انت تعرف كلش زين كاتل اخوه واحد عاق وخايس ومجرم تجي تتزوج بته البگعه
حسين : ماشفت من عمي بس كل خير وبناته احسن البنات وريم بلذات مربيها على ايدي وخلصت طفولتي كلها وياها وماشفت شى موزين منها
نوريه : راح تشوف هاي بت سندس راح تشوف يمصخم العرق دساس ويمد لسابع جد وهاي امها وحده كح.. شمرتها بناتها علمود نفسها وابوها خلص عمره بلسجون شتكول بله لجهالك على هذا النسب الحلوو

حسين : كتلج ريم ربيتها على ايدي واشرف بنيه ومابيها قصور وكافي اني احبها ومتمسك بيها واجهت الدنيا حتى ننخطب حتى بأبوها توسلت حتى يقبل
نوريه : هم عايزه امهات الفگر ميقبلون بيك اكيد تتوسل وين تلكه زوج مثلك تكوده وتكفخ بيه
علي : اسمع حسين من الاخير اني رجال تعبان ومالي خلك يوميه اتعارك واهوس الك الاختيار لو احنا لو بت طه
حسين : يابه هذا مو حجي انتم اهلي وهي خطيبتي مااكدر اختار بينكم
نوريه : لا تكدر وراحت جابت القران وحطت ايدها عليه
وهذا كلام الله يا حسين مافصخت خطوبتك من هاي البكعه بت الفكر  ريم لا انت ابني ولا اعرفك وغضبانه عليك دنيا واخره
علي : وتعوف البيت واياك تشوفني وجهك مالك مكان عدنا اختار لو احنا لو طه وبته
حسين : يابه والله حرام عليكم يعني ماردت شى منكم جبير بس ردت اعيش ويه الانسانه الاحبها
علي : واحنا ادرى بمصلحتك ومامستعد بعد تعب السنين وكسرت الظهر انطي ابني لطه مكافي گتل اخويه  واخذت اختي وزوجها لواحد ساقط وتالي شمرها شمرت الجلب ولك هذا سوه الهوايل وفوكاها يسوي نفسه فقير وبناته انكس منه كافي امهن سندس لعبت لعب ايام الحزب والمصايب الي عليها لك ناس زباله اخذ بتهم واحطها مرت ابني اله اني بلكبر يله تاخذها حتى طه احرك محله وادمره وادمر بناته لتخليني احطك بعقلي وادمرك انت وحيدي جر عدل لا ورب الكعبه متعرف شسوي بيك وبيهم وهاااا امي  اذا صار بيها شى خطيتها برگبتك

ريم : وانت اجيت تبلغني انت اختاريتهم
حسين : حجيتلج كلشي اريدج توكفين ويايه
ريم : شلون بله اوكف
حسين : نفصخ هاي الفتره وراها اذا النه نصيب نرجع
ريم : كوه لازمه نفسي لا اخنكه احس روحي بركان وهااج اذا النه نصيب يعني لهاي الدرجه بايعني
حسين : مو بايعج بس اني هسه ظروفي صعبه واهلي ضدي لازم ارتب وضعي يله اكدر ابدي حياتي وياج
ريم : هنا بديت اعيط وافقد اعصابي لك ياحياه تحجي عليها انت تعرف هسه شراح تسوي بيه راح تكسرني راح تخزيني كدام الناس مصار كم يوم ورفعت ايدي شووف مصار كم يوم لبستها حتى بعدني مالحكت افرح بيها وكعت دخيل دم لبابا حتى بس يقبل على خطوبتنا وتالي هيج تجازيني

حسين : ريم مو كلشي بلعياط والصياح اني اجيتج حتى نحلها مو نعقدها
ريم : ههه جايني من الصبح وتكولي نفصخ لان والله بيبيتي انجلطت عسااها بلموت وامي تحلف وابويه يهدد واني لازم مثل الطفل الوديع اسمع كلامهم زين وانت من هاي الهوسه كلها وينك مباشره كتلهم حاظر بابا حاظر ماما العفو مااسويها بعد راح اسمع كلامكم
حسين : انتي عصبيه ومكعد اكدر اتفاهم وياج افهميني بابا اني مرايد بس تتحمليني هاي الفتره نفصخ والوضع يهدأ وعسى ولعل اقنعهم
ريم : نزلت دمعتي ومسحتها زين ومكدرت تقنعهم شلون احجي لتسكت مكدرت تقنعهم شلووووووون
حسين : احاول مره ومرتين ماعسى اضل العمر كله
ريم : متأكد
حسين : عندج شك بحبي
ريم : تدري البارحه ابوك لعب طوبه بأبويه رحت حتى افهم منه كلت اخاف يريد نفصخ ومتردد يكلي تدري شكال حسين شاريج بنتي ويحبج وهذا الي مطمني عليج
داس على كرامته البارحه لخاطر ابقى وياكً
حط ايده بأيدك وكسر كل العادات والتقاليد لان شافك رجال وامنك على بنته

حسين : واني كد الامانه
ريم : جان اعيط وابجي متحملت كميه الالم الديصير حسيت داخلي جبل وبدل يتهدم ويتحول تراب والهوا يعصف بيه بلا رحمه
ياامانه وانت هسه جاي تكول نفصخ لخاطر اهلك اذا انت مو كدها من الاول ليش دكيت صدرك ونفخت نفسك وكلت اريدها وخليتني اعيش فرحه انسان يحبني واحبه واصير اله
حسين : وانتي الي بس على كيفج لتعيطين والله احبج  وروحي بيج بس ظرفي حكمني والدنيا ضاكت بعيني ومااعرف شصرف منا ذوله المتخبلين وكل شويه واحد مهدد والثانيه تحلف ويبقون اهلي مااكدر اكون عاق الوالدين
ريم : بس تكدر تكون عاق گلبي تكدر تسحبني من ايدي وتعيشني بأحلام ورديه وتصعدني على اعلى قمه من السعاده وتدفعني للهاويه تخليني احبك واتقاتل علمود اصير الك وتالي تكلي اعذريني والله ضرفي هسه ميسمح
جان يحضني ويبجي ريم فددوه بس ساعديني والله فتره ونرجع دفعته من حضني حيل وكتله

ريم : ايااك  تكمشني مو اني الي يبيعني اشتري بعدك مشايف ريم شوف حسين مستعده هسه انسى كل الخريط والحجي المابيه معنى وابدي وياك صفحه بيضا هسه بهاي اللحظه شرط تختار لو اني لو همه يعني لو نبقى مخطوبين ونتزوج ونأسس حياتنا بعيدين عنهم وعن مشاكلهم لو تروح الهم واياك بيوم اشوفك
حسين : ريم لتصعبيها عليه وكاام يضرب على راسه ولكم حسوو بيه كل واحد يجر بيه من جهه
ريم : واني مراح اجر حسين انطيني موقفك وهسه وننهي هاي المهزله كلها سكت وبدا يمسح دموعه
حسين : ريمتي ابوس ايدج ساعديني والله وضعي صعب توقعتج تقدرين وضعي وتوكفين ويايه
ريم : الرجال الميحارب علمود الي يحبها ويعادي الدنيا وياخذها مااسمي رجال واني يوم مااتزوج اريد رجال مو ابن امه وابوه وكلمه تودي وكلمه تجيبه وبلحظه ياخذني بحضنه وبلحظه يشمرني مو بعيد من تزوج هم تكلك امك طلكها هاي متفيدك اطلكني
لو تصير كدها وتاخذني هسه وكدام الكل وتكول ريم مااعوفها للموت لو لتشوفني وجهك ابد

سكت وحط راسه على ستيرن السياره بقينا هو ساكت  واني ابجي
ريم : سوق رجعني للبيت
حسين : بعدنا مكملنا كلامنا
ريم : رجعني وبدا يسوق واني دموعي عشره عشره بحياتي مبجيت هيج فتحت الجامه اريد اشتم هوا الله بلكت ياخذ روحي وارتاح احس لحمي يتكطع وروحي تموت شوي شوي احبه لدرجه احس بكميه وجع مو طبيعيه كلشي اتوقع بس مال حسين يكون هلكد ضعيف ومهزوز ومكان ميحارب لخاطري يتنازل عني حتى يرضيهم وعود وراها يرجع اليه وصلنا لبيتنا انداريت عليه وعيوني تصب

ريم : مو تريد تخلص مني حتى تنحل كل مشاكلك سحبت الحلقه وشمرتها بوجهه
هااك هاي اول مشكله خلصتك منها
نزلت وركعت الباب ورايه شخط السياره وراح حتى منزل ورايه من قهرتي اول موصلت للكراج وكعت على رگبي وعطت
الله ياخذكم دمرتو حياتي

يتبع ....

هذا الفيديو ريم وحسين 💔

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]