رواية ابي والغزلان الفصل الثاني والسبعون 72 - بقلم ريام هادي

ابي والغزلان الجزء الثاني
للكاتبة Reem
البارت الثالث والعشرون

ما ريدك بعد لو صرت العيون
قابل انعمي والبس مناظر
وما ريدك بعد لو بيدك الرووح
اموتن راضي وينصبولي چادر
وما ريد العمر لو بسمك يصير
اخلص عمري الك من عين باجر
وبعد ما ريد اسمع كلمة اهواك
ثگيل وما اگلك بيها طاير
بية اجروح منك كلش اهواي
اداوي ابيا كتر ضليت حاير
همزين انتهينا وخلص الشوگ
وهمزين الجرح سواني شاعر
    

ريم : مو تريد تخلص مني حتى تنحل كل مشاكلك سحبت الحلقه وشمرتها بوجهه
هااك هاي اول مشكله خلصتك منها
نزلت وركعت الباب ورايه شخط السياره وراح حتى منزل ورايه من قهرتي اول موصلت للكراج وكعت على رگبي وعطت
الله ياخذكم دمرتو حياتي
سليل : جنت نايمه بس مو نومه عميقه سمعت الباب الخارجي انفتح وعيطت ريم طفرت من مكاني ركض وبركضتي فز سجاد
فتحت الباب مال الهول ولكيت ريم بلكراج تشهك واكعده على ركبها فاقده
حضنتها حييل شبيج ريم شصار تحجي وفاقده

ريم : دمروني سليل كسرو فرحتي
سليل : فهميني عفيه شصار طلعتي ويه حسين بسرعه رجعتو شصار
ريم : هذا واحد جبان اهله كالوله لو احنا لو ريم وعافني سليل عافني
حضنتها حيل على كيفج حبيبتي هسه اندز على حسين ونفهم منه
ريم : شدزون مااريده ولا اريد اشوف وجهه اكلها اهله متعاركين ويااه وحالفين عليه ميتزوجني وهو حتى ليخسرهم طلب مني نتعاوف وعود فتره اذا ست انعام رضت عود يجي مرضت اركع راسي بلحايط
سليل : اباوع كامت اطك سن بسن ركضت اجيب مي الها

سجاد : ريمو حبيبتي على كيفج خلي نفهم الموضوع
ريم : فقدت وكمت الطم على وجهي واعيط شتفهمون اكلهم عافني وراح وره يومين يكلي نفصخ لخاطر اهله
كمت اضرب حييل على وجهي محسيت غير عمو سجاد يلزم ايدي وجرني لحضنه

سجاد : كاافي انعل ابوه لاابوامه اشعله الج والله بس لتسوين بنفسج هيج
ريم : على جتف عمو واشهك عمو انعام كسرتني مكافي واني صغيره شوهتني وخلتني العمر كله انوح على حالي واخاف حتى تطلع ايدي اخاف اسمع حجايه تأذيني خلصت طفولتي كلها الجهال تتهزم مني ومن كبرت الكل تباوعلي بشفقه وهسه حسين كملها وكسر الشى البسيط العايشه بسببه ومن وره منو من وره انعام

سجاد : كافي ريم انتي اقوه من هيج شى وبعدنا خلي نفهم شصار وبعدين شتردين احنا وياج
ريم : اريد اموت عمو والله تعبت
سليل : حضنها حييل سجاد وايده على راسها وهي تشهك بحضنه ورشا واني واكفين على صفحه دموعنا تنزل وياها
سجاد : شنو تعبتي سكينه متتعب ابد هاي تربيه سجاد قويه لسان ميكسرها الهوا كومي عمو مااحب اشوفج هيج منهاره وضعيفه وتتمنين الموت كومي تعالو بنات اخذوها غسلو وجهه واخذوها لغرفتها خلي ترتاح

سليل : اجينه اني ورشا واخذناها كومي فدووه رشاوي عوفيها اني اصعدها انتي رجعي لبتج لتبجي وموزين عليج صعدت الدرج
رشا : عفيه مااكدر اعوفها يابنتي يادنيا
سليل : ماعليها شى لتخافين اني وياها
اخذتها وصعدتها ليفوك كوه تمشي اول مره اشوف ريم بهذا الوضع خفت حييل عليها
نزعتها ملابسها وهي بس تنزل دموع وساكته ولبستها التراكسود مالتها وهي مثل اللعابه بيدي
باوعت عليه
ريم : سليل ليش احنا ماعدنا حظ بكلشي شنو السويناه حتى نعيش هيج تعيسات ولا وحده بينا مرتاحه
سليل : كولي  الْحٍمَدٍ للـّہ غيرنا اكو اتعس كلمن وقسمته
ريم : واكو غيرنا احسن ليش احنا مو من الناس الاحسن ليش ناخذ الشى الموزين والتعبان ويوميه مصيبه وكسره جديده ليش حظ ابونا وحظنا دوم اتعس الحظوظ
سليل : كاافي حبيبتي شوو تمددي وارتاحي
حطيت راسها بحضني وكمت العب بشعرها
طبت عمه نهر
نهر : شصار هسه كعدتني رشا شاربه فاليوم من وره الصار البارحه راسي يطك ومحسيت 
هسه رشا كالت على الصار

سليل : تعالي عمه شوفي ابن اخوج شسوه الدك صدره وكال اني واني وره يومين يفصخ
نهر : صخام بوجهه شصار
سليل : ريمو حبٌيــبتي سولفينا شصار
وبدت  تحجي بهدوء الصار
نهر : الله لا ينطيك علي على هاي الدكه
وين حسين وين هسه
ريم : بجهنم ماادري ولا اريد اعرف شى عنه
سليل : على كيفج گلبي راح تموتين
ريم : الله ياخذهم مكافي السوه قبل بابا وعيشونا الضيم ذوله شنو ميعرفون الله ميخافون منه ليش بس احنا نتعاقب على شى ممسوي وهمه عايشين احسن عيشة
نهر : ولج يمه كافي باع زردومج مو طك من العياط
ريم : يطبني طوب كله مني اني مو وجهه حب ولا زواج شجاني وحبيت اني والسعاده دوم بلعكس شجاني واريد اركض وراها اني من يوم ماخلفتني امي للدنيا كتبت على كصتي متعيشين طول عمرج مرتاحه
نهر : خلي اخابر طه يشوف شنو السالفه
صعدت رشا وكالت
عمو سجاد يمكن راح لحسين سمعته خابره كله انت وين جاييك

سليل : الله يستر
ريم : عوفوني وحدي
سليل : شلون نعوفج من كل عقلج
ريم : ابوس ايدكم عوفوني تره والله هسه اشمر روحي من السطح واخلص
رشا : امشو ننزل عوفوها براحتها
سليل : طلعنا مكدرنا نضغط عليها اول مره نشوفها هيج وترجف وحالها يبجي الصخر هاي ريم ام مضحكه الحلووه هيج كعدت جنات وغزل ونزلن جوه كلنا منعرف شنتصرف ونخاف نحجي شى وياها وتعيط
واجه سجاد وره جم ساعه هو وبابا والوجوه مطمن بخير
نهر : شصار

سجاد : حجينا وياه كال بس هاي الفتره خلي تعدي وحلف يحاول يقنع اهله
نهر : بله هاي سالفه واذا مكدر يقنع
سجاد : يطبه طوب هو من ايده
حجي طه : سويلي جاي نهر وحبايه براسيتول وياج راسي حيل يوجعني
سليل : عرفت بابا حيل تعبان مبين من حالته دخلت عمه نهر وياه وجنات ورشا وغزل راحو يم الطفله وبقيت اني وسجاد وحدنا تقربت منه وكتله
شصار عفيه جنت حيل خايفه على ريم
سجاد : وضعهم صعب وبلذات هو علي حالف يمين عليه وحتى امه يعني مطوقي من كل جهه
سليل : بس الي يحب يجاهد مو يدك الصدر ومن تصير صدك يفلت
سجاد : كلمن وظروفه ولتنسين هو وحيدهم هو يشوف من باب شلون اصير عاق الوالدين
سليل : يا والدين بله ليش هو مو يدري ميقبلون مو يدري انعام تموت من عدنا وعلي يشوف دم سنونه ولا يشوف طه شلون الي تغير
سجاد : عباله بس يزعلون ومن يعرفون يرضون بالامر الواقع
سليل : واحنا نضل بالافتراضات مو
سجاد : والله ردت افلش وجهه من شفت حاله ريم وركعته بلحايط بس انقهرت عليه من حجالي وضعه
سليل : يطبه طوب كسر اختي مصار يومين من حط الحلقه بيدها روح شوف حالها هاي ريم هاي التضحك للهوا
سجاد : زين ليش تعيطين عليه قابل اني حسين
سليل : كلكم نفس الشى توعدون ومتوفون كلها ادك الصدر وتاليها من اول اختبار اديرون وجهكم وترحون كلكم عندكم اهم شى نفسكم والي تحبكم طز بيها مو مهم

هي تنجازه ويه نفسها تنهار تبجي تحرك روحها يطبها وجع المهم انتم مرتاحين وعايشين حياتكم
انتبهت على نفسي وشفته صافن عليه
كمت وعفته وصعدت لريم الي من الصبح لهسه لا حس ولا نفس
بصعدتي صاح بابا صيحولي ريم
دخلت للغرفه لكيتها حاطه راسها بين رجلها ريموو حبيبتي بابا يريدج تكدرين تنزلين
ريم : اي اكدر
نزلت ودخلت يم بابا
ريم : جنت منهاره لدرجه يحجون ويايه وانفذ الي يكولوه بس بدون تركيز لهسه اكول احلم وراح افز والكه الحلقه بيدي وهذا كله من التعب اجاني كابوس

كعدت يم بابا
حجي طه : بنتي اعرف بيج مكسوره وتعبانه بس الصار صار جاي افهمج حسب كلامه هو يكول احاول اقنع اهلي واجيبهم لان حطوه بحايط سد ومنطوه مجال حتى يتنفس متوقع هيج ردت فعلهم وهم يخاف عليج من المشاكل
ريم : رفعت عيووني وكتله يعني ترضى هيج انهان يتنازل عني بكل سهوله
حجي طه : انتي هم بلحظه من اللحظات ردتي تتنازلين عنه بسهوله من كلتي اذا يحجون عليك ويقللون من قيمتك وبوكتها كتلج بابا مالج دخل بمشاكلنا
ريم : الوضع يختلف بابا انت متجاوزت عليهم ولا اكلت حقهم بيوم ولا حركت جهالهم وهمه نايمين ولا سديت بابك بوجهم وكت العازه ولا حتى فكرت بيوم تغدر بيهم لهذا مامسموح الهم يتجاوزون عليك فوك غلطهم الراكبهم والحرام الي سووه بحقك تريد يقللون من قيمتك اكيد مااسمح بس اني شنو الي مسويته الهم لا بيوم أذيتهم وحتى حسين من اجه خطب كتله حاول وياهم مطلبت منه يتجاوزهم
بس هو كال قافلين وماعندي غير طريقه
حجي طه : بنتي اني البارحه كتلج لتقررين شى واني عصبيه ينهدم الاول والتالي
ريم : كلشي اتحمل بلدنيا اله الخذلان اني مو مرتاحه وهاي اول صدمه بحياتي بابا اني جبتها واني جايه بس كلها اكول تهون لان انتم موجودين بس توصل لدرجه ينكسر اخر امل اليه بلدنيا حتى اعيش هذا الماقبله ولا اسامح عليه

حجي طه : زين لو انتي مكانه شسوين
ريم : لو اني مكانه اهدأ الوضع واخلي الايام تمر لحد ما يملون من الكلام عسى ولعل يجيب نتيجه وانعام اشوفها تموت تعيش واحاول اقنعها وحسب معرفت هي تحبه واكيد اذا ضغط عليها راح تساعده مو يتعارك ويه اهله ثاني اليوم الصبح يجيني مقرر يتركني حتى مفكر بغير حل غير طريق شاف اسهل طريقه يعوفني ليش يدوخ نفسه ويطب بدوامه جبيره وكال زيد وحجه عبيد من الاخير اعوفها وابرد راسي وعود الله كريم بعدها

حجي طه : بنتي اني من الاول مقبلت بهاي الطريقه تنخطبون وماقبلت اصلاً بخطوبتج منه بس انتي كلتي اريد افرح
ريم : اي ردت افرح وبما ان اني من الناس الي انكتب عليهم ممنوع الفرح المفروض انجب واكعد وماافكر اغير حياتي
حجي طه : روحي ارتاحي باباتي وربج البيه خير يصير
ريم : كمت ردت اطلع ورجعت بس سؤال بابا وبروح جدو تجاوب طلكني عند السيد لو لا
دنج بابا مخنوك وكال اي بابا طلك هو رجعنا مناك
ريم : مو كتلك اختار اقصر طريق حتى يريح باله حسبي الله ونعم الوكيل
وطلعت
صعدت لغرفتي ولزمت تلفوني دزيت رساله اله كتبت كلمة وحده شكراً
وطفيته

سليل : من يومها وحال ريم تغير تماماً من حركه دمها ثاني يوم اكو بكع صغار اختفن قبل وهسه رجعن توسلت اخذها للطبيب مقبلت
رشا : ريموو حبيبي تعالي تعشي
ريم : مجوعانه
رشا : هااا ولج اول تالي ام بطن متجوعين
ريم : عفيه رشا عوفيني براحتي
رشا : ويانه على الواهس الله عليج
ريم : مااريد عوفوني
سليل : صارت حياه ريم عباره عن نوم هوايه والاكل نتوسل بيها تواسيل يله تاكل لكمه وتشرب مي وتصعد وردة وذبلت لا ضحكه لا شقه لا اكل حتى بيتنا اختفت الضحكه منه
ويوم بعد يوم وصار ٣ اسابيع على هذا الحال لو عدنا ميت هم مجان حالنا هيج

شعلان : شوكت ترجعين عاد للبيت مو صرتي زينه
رشا : وريم شلون اعوفها
شعلان : ميصير ياعيني عايفتني وعايفه بيتج وريم قسمه ومصارت والله يعوضها بالاحسن منه الحياه تمشي رشا متوكف على احد
رشا : گلبي مينطيني اعوفها عفيه
شعلان : نروح ونرجع عود بس خلي نرجع لبيتنا مو والله تبهذلت يابغداد ياكوت سويتها العلاوي من الروحه والرجعه يومين هنا وكم يوم هناك محتاجج رشاوي يمي والله ميت شوق عليج ومن اجي هنا استحي حتى ابوسج اخاف احد يطب وزحمه
رشا : اووووف مااشي نروح باجر
شعلان : فدوه لام فرح الغااليه
اروح اكمل كم شغله حتى انروح باجر
رشا : روح الله وياك

سليل : هاي الفتره كلها سجاد مدور على شقه لان التهه ويه بابا بلمطعم يطلع ويااه من الصبح لان عمو محسن مسافر لابنه بلسويد صارله اكثر من شهر بعد حفله نجاح ريم سافر لهذا بابا احتاج سجاد وياه على العمال جان يطلعون الصبح ويرجعون بليل
على كد العشا يتعشى وينام حتى مااشوفه ولا يشوفني ومرات اتقصد ماانزل عده ايام من اسمع صوته وباقيه يم الريم الي لهسه مجتازت صدمتها
كعدت يمها مثل كل يوم
ريموو حبيبتي اكلي شويه والله عمه سوت خير من الله وسجاد جابلج كص ورشا سوت بسبوسه الي تحبيها

ريم : مااريد
سليل : مو ريم الي تكول للاكل مااريد
ريم : ريم منو
سليل : هااي شبيج ريمو
ريم : ذيج ماتت موتها واحد صورلها الدنيا حب وجنه وحياه سعيده مثل الافلام والمسلسلات التركيه طيرها للسما وتالي برجله دفعها للكاع لحد موكعت على راسها وماتت
سليل : ولا توقعتج هيج ضعيفه
ريم : جنت الومج من تبجين وتنهارين واكول شصار واذا عافها قابل شكوو هسه حسيت بأحساسج سليل هسه والله ودمعت عيووني
سليل : حضنتها الله لايوفقهم بحق النبي ويكسر گلبهم مثل مكسرو گلبج
يله كومي ويانه العشا ميحله بلياج
ريم : مااريد اترجاج سليل عوفوني اريد ابقى وحدي
سليل : والله بابا يكوم ويكعد منهار وتعبان وميعرف شيسوي يحس بذنب

ريم : حبيبي بابا هو شعليه فوك زينيته عباله ابن اخوه رجال ورادني انسعد
سليل : كومي من يشوفج كاعده بنصنا شويه يرتاح
ريم : كمت لخاطر بابا نزلت اكلت مكدرت حتى اكمل ربع صمونه الكل هادئ يترقب الكلمة مني بس اني ساكته ترخصت وصعدت مكدرت لدرجه نمت واني منعسانه غصبت نفسي مااريد احجي ويه اي احد
وثاني يوم حتى الوكت مااعرفه فقدت احساسي بلوكت اجت عمه يم راسي
نهر : يمه ريم حسين جوه يريد يحجي وياج
ريم : نبض گلبي بقوه والم كمت من فراشي شيريد
نهر : والله ماادري كال بس احجي وياها
ريم : مااريد اشوف وجهه
نهر : يمه شوفي سمعي هسه صار ٣ اسابيع شويه ماهديتي يجوز هسه من تكعدين وياه راح تفهمي
ريم : مااشي
شويه وجايه وراج
كمت على المرايه عدلت نفسي وباوعت عيووني المورمه حطيت كحل الهن ورتبت شعري ولبست تراكسود جديد عندي تقصدت انزل مرتبه مو حتى اعجبه لا حتى ليكول كسرتها
نزلت واباوع البنات استغربن الترتيب البي اني
سليل : من رخصتكم يله بنات ورانه شغل
جنات : تعالي غزوله نشوف اموري كعد لو لا
ريم : عافونه الكل وحدنا واجه بوكت لا بابا ولا سجاد لان بلمطعم
باوعت عليه شلون لحيته عاليه وجهه ضعفان ومبين تعبان
اول مبقينا وحدنا تقرب مني راد يلزم ايدي سحبتها
اياااك لتنسى اني محرمه عليك هسه
حسين : ليش هيج تعذبيني

ريم : نعم اعذبك شو احسك مفتهم الموضوع بلمكلوبي هو منو العاف منو
حسين : مو كتلج فتره ونرجع
ريم : وشنو مجبوريتي اتحمل وارضخ
حسين : ريم بليه عناد كتلج فتره احاول اقنعهم صار ايام ادك عليج ومغلق تلفونج وكل مااخابر عمه تكول لو نايمه لو تبجي او متاكل ليش هيج ياعيني
ريم : لا عبالك ابجي ومااكل علمودك لا غلطان اني ابجي على عقلي الصغير الصدكك ابجي على غبائي من توقعت تحارب الدنيا لخاطري وتوكف بوجهه الكل
حسين : يعني شتردين تصير بحر دم يله ترتاحين
ريم : ليش هو وينه بحر العسل الي متوقعه يصير بعد متعوفني يعني استاذ حسين تره بحر الدم التحجي عليه موجود من قبل ماانولد اني وياك موجود يوم ماسجلت بيبيتك ابويه بأسمها ولعبت بحاله لعب وزوجته وحده متستاهله موجود يوم ماطردوه من بيت ابوه ويشوفوه حسره عليه الفلس وهمه يلعبون بلفلوس لعب

موجود يوم ما بابا كتل سلام الي لحد هسه منعرف السبب وموجود بحر الدم ويمشي جوانا يوم ما بيبيتك الي تحبها والي تنازلت عني لخاطرها من حركت البيت واحنا نايمين وهاي نتيجتها اني بهاق وذيج حرك
بعد كل هاي المصايب والبلاوي تحسسني خطوبتنا هي الي راح تسوي هذا البحر
بله متسكت رحمه لجدك مااكول لبيبيتك لان متستاهل حتى الرحمه

حسين : اعرف كل الكلتي بس راح يزداد والله اعلم شراح يسوي ابويه
ريم : تقربت منه وضربت حيل على صدره وبأعصاب وكتله لعد من دكيت هذا الصدر وابوكج واذبح واصلخ لعيونج وين جان ابوك هسه يله عرفت ابوك مؤذي مو انت نفسك الي حذرت بابا قبل سنين اخاف يأذونه وطلعنا بليله ظلمه للكوت مو سمعت ابوك وبيبيتك شلون يخططون على اذيتنا ليش تمثل دور المصدوم بأهلك وهسه عرفت بيهم همه مأذيين

حسين : ريم اني احبج والقران احبج بس
ريم : لتكول بس ميهمني تحبني او تعشقني المهم تثبتلي هذا الحب شسوي بلكلام يمكثل الكلام حتى بلجرايد والتلفزيون وبكل مكان الكلام ماكو اسهل منه حسين اني بيوم صدكتك وامنت بيك ومشيت عمياوي وياك وانت بلنتيجه شسويت طيحت حظي وكسرتني حتى ملحكت افرح بخطوبتي منك حتى منطيت مجال بنفس اليوم فصخت وطلكت لهاي الدرجه سهله عليك ركضت ركض حتى ترضيهم زين واني مفكرت بيه مكلت من تشوفني اركض حتى بس اعوفها اخاف تتأذه يصير بيها شى خلي تمر كم يوم ونطلك مكدرت كله حار بحار حتى نوريه وانعام ميزعلن

حسين : مراح تفهميني والله سويت هيج حتى اهدأ الوضع واكدر ارتب اموري تعرفين بيه روحي بيج ومااكدر بلياج بس اذا ماطلت راح تزداد المشاكل
ريم : اوك هم وياك طلكت ومشت الايام
وهسه جاي وتكول احبج على عيني وراسي سويت شى صار ٣ اسابيع انعام وطلعت والوضع اكيد عندك بلبيت استقر كدرت تعدل الحال كدرت تقنعهم كدرت توكف موقف رجولي واحد وتثبتلي حبك احجي صار شى تغير شى جره حسره وكاال
حسين : لا

ريم : شفت انت لكيت اسهل حل تفصخ الخطوبه وترضي اهلك وعود اقنع هاي الفطيره ريم بلفه بحلويات متعلمه تزعل وهيج اراضيها نسيت هاي ريم كبرت وعقلت وانكسرت والي ينكسر ميتصلح
حسين : ريمتي حبيبتي بس اصبري كم شهر والله احلها مااكدر بدونج والله ظرفي هيج حكم وان شاء الله احاول احله
ريم : لا ريمتك ولا ريمه احد روح حسين الله وياك واياك بيوم تشوفني وجهك مو ريم الي يخذلها تبقى تحبه تشوفني اضحك واشاقه تكول زوج واكدر اقشمرها بلحبيات وهاي الامور تره بعدك مشايف وجهي الثاني
وهااا نصيحه مني الشى التشوفه جبير عليك لتنفخ نفسك حتى تصير بكده لان تاليتك من تشيله يوكع على راسك
حسين : ريم لتعوفيني والله اني بين نارين ومااعرف شصرف

ريم : ناري طفت حسين حير بنار اهلك الي راح تاكلك بيوم ومتدري بروحك
وهاااا ماامنعك من بيت عمك بس رجاءً اذا اجيت لتكول الهم صيحولي ريم لان انت انتهيت بلنسبه اليه
من رخصتك ابن عمي
حسين : ريم خلي نتفاهم نسيتي اني منو اني سحليه
ريم : كبرنا حسين وماكو بعد لا ساسوكي ولا سحليه متشوف جنت دوم اكول مااريد اكبر وهاي تاليهاا الله يوفقك
عفته وصعدت احس نار تاكل بيه اريد اعيط اصيح املخ روحي بس بنفس الوقت مااريد كدام احد

سليل : سمعنا سده الباب ركضنا على ريم
ريم : هااا شبيكم
نهر : بيج شى يمه
ريم : اي بيه
رشا : شبيج ريمو
ريم : مكسوره رشاوي
رشا : حضنتها وابجي وياها
سليل : عساها بحضهم وبختهم الميخافون من الله
نهر : اذا مااروح والعب بيهم طوبه مكافي الصار قبل يردون انتم هم تدمرون
ريم : اياج عمه راح تنزلين من قدري الي يريدني يجيني مو اني الاتوسل بلناس حتى تقبل بيه هاي قبل من جنت اكتل الجهال حتى يلعبون ويايه هسه لا ولت ذيج الايام كبرت ومااقبل احد يمس كرامتي ولا يقلل من قيمتي ابن اخوج اختار والي يجدي من ايده الله يزيده
رشا : فدووة بلسباعيه هيج اريدج
غزل : رشاوي اجه شعلان كال كملت
رشا : شلوون عفيه مااريد اروح
ريم : روحي لتخافين مابيه شى بس قبل لترحين جيبيلي فرح ابوسها
رشا : مو كلتي فرخه سميها التردي والله قابله فرخه دجاجه ديج بس ارجعي ضحكي
ريم : الله كريم روحي انزلي لزوجج ليصير عصبي

سليل : ودعنا رشا وطفلتها وراحت للكوت ورجع بيتنا خالي منها بس قبل هوسه ريم شويه مصبرتنا هسه كملت ورجعت ريم تقوقعت لا اكل ولا طلعه عجزنا وياها حتى بابا يحجي وياها تكول اي وتبتسم وتكعد تاكل لكمه وتكول وهاي مر شهر ونص على هذا الضيم هي متبجي بس احسها منهاره ياريت تبجي حتى ترتاح ماكو طلبت من ماما نهر  ريم تنتقل لغرفتي وجنات خطيه كالت اروح هناك لان لا اني ولا هي انام اقلها نبقى سوه مرات نبقى كاعدين ساكتين ومرات نسولف وبهاي الفتره حسيتها كبرت عشر سنين فوك عمرها ودوم هادئه هسه حسينا بقيمتها وبقيمة هوستها هسه عرفنا قصد بابا من يكول ريم ضحكة هذا البيت وفعلاً هي ضحكة البيت وسعادته وهسه راحت

وبعدها بكم يوم واندكت الباب وطب عمو محسن جان طاير فرحان لان اجانه
محسن : هااا ولجن شلعبتن بغيابي ورشا وينها كالو صارت ام الفصعونه والله وكبرتنا
نهر : راحت رجعت لبيتها
محسن : خرب مالحكت عليها هسه اخابرها
اكلكم ريم وينها
سليل : اووف ياعمو لو تدري
محسن : شبيهه استشهدت
غزل : تكدر تكول هيج
محسن : شنو السالفه الوجوه تتلاطم
نهر : اني اسولفلك ياخويه وكعدت تسولف كلشي لعمو وجهه ضاج وحيل ورث تكول نار صار اول مره اشوفه هيج
محسن : وينها هسه هي
سليل : فوك بغرفتها
محسن : بس شوفيها كاعده اريد احجي وياها
سليل : صار عمو وصعدت كتلها اكو واحد يريد يحجي وياج كعدت وعدلت كعدتها وملابسها
منو مد راسه عمو
محسن : اني الحلو الاخبل دنجوان العراق
ريم : عمو محسن وحضنته وكمت ابجي
محسن : هاااي شنو ولج ريم تبجي لا لا من باجر اروح للعمره راح تقوم القيامه
ريم : أذوني عمو وخرني من حضنه وكعد يمي
محسن : هاي الدموع تنمسح مااقبل بنتي هيج تسوي
ريم : شفته عمو شسوه بيه
محسن : واذا قابل متي هاج مثل الشاذي كاعده وحابسه روحج بلغرفه
ريم : كارهه كلشي حتى نفسي كارهتها
محسن : شوفي ريم بنتي عشت سنين اشكال المصايب والبلاوي جنت كل مااوكع بضيق اكول هاي اكبر شى بلدنيا وبعد مااكوم منها ومن اكوم اكول هاي شكد جانت البلوه صغيره ليش هيج انطيتها اكبر من حجمها الله سبحانه وتعالى انطانه نعمه النسيان حتى تكدرين تنسين الالم النتي بيه لازم تكومين توكفين على حيلج لا انتي اول ولا اخر وحده متزوجت الي تحبه ومن الاول اثنينكم تدرون علي وطه مابيوم يحطون ايدهم سوه ليش تلعبون بلنار هذا اليلعب بلنار يابنتي وحسين مع الاسف مكدر عليها وحرك گلبج وهم هم احترك اعذري بنتي يبقون اهله يجوز احنا نكرهم لان أذوج واذوه طه وخواته بس هو بجاه اهله مدلل ومايوم قصرو عليه وحتى هسه ارقى سياره راكب ويشتغل ويه ابوه وراح يفتح محل بأسمه يعني ممقصر على ابنه لهذا حسين يحبهم ويحبج وكع بضيق ومعرف يتصرف
ريم : واني مااريده بعد نزل من نظري
محسن : هذا هو لتردي يطبه صخل اعور بس لتضوجين
ريم : هههه والله اشتاقيتلك
محسن : واني لو ادري هيج حالج ولا اجي
ريم : ليش
محسن : شوفي نفسج خنفسانه واكعه على ظهرها ومتكدر تكوم شنو هاي كفشتج
ريم : هههههه اشكرك عمو ماقصرت صرت خنفسانه
محسن : واذا ماكمتي وغسلتي ونزلتي ويايه الله اعلم شسويج
ريم : مااريد اكوم جان يجر المخده ويضربني بيها الزميها
هاااا
محسن : الزميها
ريم : لزمتها
محسن : حطيها بوجهج حيييل
ريم : هااا راح تموتني
محسن : حطيها
ريم : حطيتها
محسين : عيطي
ريم : شنو
محسن : عيطي حييييل اريد من وره المخده واسمع عياطج شكوو بيج طلعي
ريم : هنا حسيت واحد وكال خلي افتح جرحج وانظفه وبديت اعيط حيييل
محسن : اقوى
ريم : وكمت اعيط اقوى واقوى واشهك وابجي صار شهر ونص كاتمته طلعت واعيط بكل قوتي الله ياخذكم حسبي الله ونعم الوكيل بيكم عساكم بقهرتي وأذيتي جنت منهاره بس حاطه المخده على وجهي حييل لدرجه حسيت الهوا خلص بس محاسه من كثر ممنهاره لك حسين ليش هيج مو اني ريمتك ليش تأذيني جنت دوم اشكيلك وهسه لمنو اشكي جنت مرايتي وكسرتها بيدك ليش خليتني احبك واتعلق بيك وتالي هيج تجازيني ليشش عساها بحظكم وبختكم اشوف يوم بيكم تتأذون وتنكسرون مثل ماأذيتوني وابجي لحد مراح صوتي وخر المخده مني عمووو لكيت الكل موجود ويبجي ويايه حتى عمو محسن مدمعه عيوونه

محسن : ارتاحيتي
ريم : اشرت براسي مو بس ارتاحيت وتعبت حييل
محسن : جيبولها مي واكل خلي تاكل ومن باجر ترجعين للطبيب مالتج هذا البوجهج رجع
ريم : مااريد عمو اروح
محسن : مو بكيفج واذا على الزواج ازوجج لفيصل الخبل وانتي خبله وشهر العسل بلشماعيه وامري لله
ريم : هههههه مااتزوج بعد
محسن : مو بكيفج وفيصل جاي نهايه السنه كوه قنعته يجي للعراق
نهر: يجي بلسلامه
محسن : يله خبالو كومي نشنشي البيت كأيب بدونج شوفي وجوهن جنهن صخول سارحات بلجول ضالات لامي ولا اكل
نهر : خلف الله عليك تالي عمري صرت صخله
محسن : لا انتي الراعي لا تضوجين ولابسه دشداشه وبيدج عوده مكسوره وتلعبين بخشمج
نهر : ههههههه لعبتها لروحي اروح اسوي اكل
محسن : غسلي ايدج مو تنسين
وانتي يله وسحب ريم من ياختها وكومها من الفراش

سليل : كدر عمو محسن بضحكته يسحب ريم من جو العزله الجانت بيها صّـْْ(☑)ـْْحّ مرجعت مثل قبل بس على الاقل متكعد وحدها وكت طويل وتاكل شى بسيط وتكوم
اخذتها للطبيب اني وعمه ودخلت اله
سامر : ليش راجع بوجهج هذا شصار ريم
ريم : ماكو شى دكتور
سامر : مستحيل اله محروك دمج حركه زينه يله تعلمين دكتور جلديه
ريم : اي قهره بسيطه وراحت
سامر : تدرين بسوايتج هاي ضيعتي علاج اكثر من سنتين ونص ليش ريم
ريم : اذا اني ضعت بقت على هاي
سامر : اول مره اشوفج هيج متعلم عليج تضحكين وتنصبين شنو المطفيج
ريم : ماكو شى دكتور لتهتم
سامر : اكيد مالي حق ادخل بخصوصياتج بس شفت وضعج مو تمام وهذا الشى غلط على سير العلاج
ريم : دكتور والله مليت من العلاجات ويمكن مااستمر بعد
سامر : لتضيعين تعبي وتعبج
ريم : الله كريم
سامر : راح انطيج علاج جديد جابوه من المانيا وضفنا عليه شغلات وسوينا خبطه جابت خوش نتيجه
ريم : شكراً دكتور تعبتك وسلملي على زينه
طلعت منه واني مطايقه الهوا ورجعت للعلاج

سليل : مرت الايام وسجاد انتقل من عدنا بس بلشارع المقابيلنه مو بعيد وفتح محل فيتر للسيارات الحديثه واثنين عمال جوه ايده وحسب كلام ماما نهر شغله زين واني اروح واجي لدوامي اي شى مصار تغيير
وبيوم اجتني ماما كالت خطابه اجوج جوارين ورفضت
نهر : ليش ياامي متوبين خلصتي عمرج مترضين بهذا وذاك ولج يمه كبرتي واذا اليوم اجاج ولد بعد جم يوم يجيج المطلق والارمل
شتنتظرين لخاطر ربج
سليل : انت عبالج انتظر سجاد
نهر : لا تنتظرين ابويه مبينه ذيج تصيح للسما
سليل : ماما اني أيست منه تره وما منتظرته ولا منتظره غيره
نهر : لعد ليش متقبلين بله
سليل : يوم اني حياتي عباره عن فلم هندي البطل حب البطله وبنهايه الفلم طلع اخوها
نهر : هااي شنو ناصبه عليه
سليل : ههههه لا حبيبتي الي اقصده شلون انخطب
نهر : مثل الوادم شلون يعني
سليل : اجه خطب وسألني ليش فصختي شكول اله جنت متزوجه وخطيبي عرف بيه متزوجه وعافني واجه زوجي وعرف بيه مخطوبه وعافني وبطتنا بطت بطن بطتكم
وانت هسه راح تخطبني وراح تعرف بيه مخطوبه ومتزوجه وراح تعوفني

نهر : ولج دخلت وعلي
سليل : شفتي يوم هذا القصدته حياتي معقده ومااريد ادخل بمتاهات اني بغنى عنها وادري كلش زين اي واحد راح يخطبني مراح يتقبل الوضع الجنت بيه ليش بعد اجازف وادخل بتجربه فاشله خليني هيج وحيده وسعيده
نهر : الى متى اريد اشوف خلفتج
سليل : الله كريم اروح اسبح راجعه هسه من الدوام وتعبانه

نهر : راحت سليل لزمت التلفون ودكيت على سجاد
سجاد : هااا شعجب دكيتي
نهر : اسمع ابن خالي اني گلبي ورم منك ومنها
سجاد : شكوو شصار
نهر : هاي سليل اجوها خطابه ومتقبل
سجاد : واني شعليه
نهر : هااا خوش شعليك يعني متريدها موو حتى اكول لطه نجبرها توافق
سجاد : هسه هي رفضت عوفيها براحتها
نهر : خو انت مكيف مووو
سجاد : نهر عوفي سليل مالج دخل بيها
نهر : لك انت شنو من ياطينه مصنوع لا انت ماخذها وفاض هاي اللغوه ولا عايفها تتزوج
سجاد : عندي شغل خلي اروح
نهر : سجاد
سجاد : شكوو
نهر : بطلت تحبها سكت وكال اكو واحد يبطل يشتم الهوا
صخم الله وجهك اذا متتزوجها واذا مااحرك ابوها واخليها تنخطب وعود خلي انفاسك تنكطع حيل بيك وابو زايد
وجان اسد الخط بوجهه
طكو گلبي اذا مو هيج سنونهم توكع وذوله مامتزوجين

سليل : دخلنا سنه ٢٠١١ وماكو اي جديد حياتنا هادئه ورشا تعاني من هند تريدها تحبل بولد شلون خلفت بنيه تريد ولد ويوميه عركه خلصتها مالخ وريم كاعده بلبيت هادئه اما غزوله سادس وتقرا عيونها راحت واجه فيصل ابن محسن شفناه على السريع سلم وراح جان شاب حلوو وطويل وانيق حييل بس مغرور عكس ابوه مبين
ولو منكدر نحكم عليه لان كل الوقت الي كعدنه بيها متجاوزت الربع ساعه
وبعدها مشفناه

ايامنا تمشي بينا بهدوء ودوم الهدوء يسبق العاصفه هيج تعودنا شهر بعد شهر اني دوام اروح واجي بدربي ريم بلبيت ومرات تجي زينه يمها الي قوت علاقتها اخر فتره بيها اما جنات ويه ماما نهر دوم وحايره بأموري الگبر وصارت هوسته تارسه البيت بس روحنا بيه لان دوم ويانه
وبابا بلمطعم ورزقه  الْحٍمَدٍ للـّہ حيل تحسن وكمل فلوس جنات حطها الها بلمصرف حتى اخاف تحتاج يبقى ذخر الها ولابنها الي من يوم ما اجت بلبيت وبابا متكفل بكل مصاريفها ومصاريف ابنها
اني راتبي اضمه ميقبل بابا اصرف منه فلس وماما اقترحت عليه اشتري ذهب واضمه واني هم مكذبت خبر لميت مبلغ ورحت للصايغ وجبت لكل وحده بينا سوار ذهب اليه ولماما وغزل وريم وحتى جنات ورشا صّـْْ(☑)ـْْحّ مو ثكال بس حلووات وكل وحده موديل شكل
ماانسى منظر ريم من نزعت سوار حسين وحطت السوار الي جبته وحطته بلكنتور
سليل : ليش نزعتي
ريم : راح ويه الي راحو هديتج عندي اغلى
سليل : محبيت اشتري لروحي وخواتي ماعدهن وخاصه راتبي زين ومااصرف منه ودزيت سوار رشا بيد شعلان من اجه لبغداد مره زياره سريعه حبيت اني وخواتي نلبس نفس الشى وعود وراها اجمع ذهب واضم

نجحت غزل وطلعت معدل زين بس قبولها طلع اداره واقتصاد قسم احصاء بجت بجي بوكتها عيونها ورمت وبابا قرر يدخلها مسائي رغم امكانيتنا مو مال مسائي بس مراد يكسر بخاطرها وقررت اني ادفع نص القسط وهو نص في سبيل تدخل وقدمنا الها تحليلات مرضية جامعه المستنصريه وانقبلت بعد ملكه عمو محسن واسطه خطيه مخبوص دوم بينا ياهو التتعين بجاهه ياهو التريد واسطه يركض بيها هو مجامل ولسان لهذا معارف هواي عنده
واشترينا الصدريه لحضرت المحلله غزل جانت فرحتنا مو طبيعيه واخيراً اخر غزاله من غزالات الحجي طه دخلت للكليه

كاعدين فرحانين واجت ريم كالت
ريم : اليوم خابرتني زينه
نهر : اي خير شبيهه
ريم : تريد تجي هي وامها واخوها
نهر : هله بيهم بس ليش
ريم : تكول يريد اخويه يخطبج
سليل : جنت اشرب شاني غصيت وطلع من خشمي عزه ياخطوبه
ريم : ليش ميصير انخطب
نهر : وحسين
ريم : وينه ابن اخوج صار سنه كامله وينه سمعتي حسه اجه ودك الباب وكال جايب اهلي وجاي
سليل : ريم لتستعجلين وتغلطين غلطتي
ريم : راح اكول هذا الشى بس لتزعلين مني انتي اختي الجبيره وبمقام امي بس الحق حق

اني مو مثلج سليل اني متصل حسين بيه وتعاركت وياه وبس سديته منه رحت انخطبت اني حاربت وتعاركت وقبلت ادخل بلنار لخاطره وره يومين فصخ الخطوبه وهم كلت يجوز يسوي شى انتظر وشهر جر شهر وجر شهر وصار ١٣ شهر انتظر صار سنه وشهر ياسليل انتظر ولو اعرف اكو امل انتظر العمر كله ولو اعرف حسين كدها ويكدر يحارب هم انتظر بس كدامكم وينه هااا وينه عود ضل مده يتصل ومااجاوب وبعدها دار وجهه وراح خابري عمج وسألي وين حسين راح يكلج بتركيا ويه ابوه وقبلها بماليزيا لا عبالكم مااعرف شئ عنه بس حسين عاش حياته بلطول والعرض ونسى اكو وحده دمرها ودار وجهه وراح
اني مو مثلج سليل انتي منتظرتي عمو وانتقمتي منه بخطوبتج بس اني مجاي انتقم من احد اني جاي اعيش جاي اثبت للكل واولهم نوريه وانعام اكدر اتزوج اغات حسين دكتور وابن عائله راد البكعه راد بت طه

نهر : وثبتي وبعدين تعيشين ويه واحد متحبي
ريم : كالها عمو قبل واني هسه اعيدها اني مو اول ولا اخر وحده تحب ومتاخذ الي تحبه الالاف البنات تزوجن مو عن حب وعايشات احسن عيشه واني مامستعده اضيع عمري لخاطر واحد يتونس ويخلصها كالت امي وكال ابويه وهذا زعل وهذ رضا وانعام تحط رجل على رجل وتكول طلكها
وهو يركض يطلك اريد رجاال افتهمتو شنو يعني رجال واريد اهل يقبلوني بينهم مو منبوذه العمر كله خلصت عمري كله منبوذه من الكل كاافي تعبت
سليل : فدووه ريم فكري زين
ريم : ماعندي شى تره اني مقبلت الناس حسب الاصول راح يجون وبابا وعمو يسألون عنه اني طول فتره العلاج مشفت شى موزين عنه بلعكس اخلاق ومؤدب وزينه كدامكم حبابه وهادئه وتحبني اذا اكو شى موزين اكيد مااقبل والرأي الاول والاخير لبابا اذا شافه مناسب اليه اني موافقه

سليل : بقينا نتصفن شنسوي
نهر : اخابر على حسين
سليل : خابري وشوفي وبيومها اندك ومغلق اندك ومغلق
سمعتي كالت بتركيا شلون نوصل اله
غزل : والله اني اكول احسن تتزوج الدكتور شحصلت من حسين هاكم شفتو حالها هاي ريمو الي تتعارك على المصاصه والجبس هاي ريمو الي توكف براس الدرج وتعيط جوعانه وتجر اللفه من ايدي شوفو حالها شكد تعبانه هي متبجي ولا تحسسنا مقهوره بس مرجعت مثل قبل ابد رغم صار سنه على سالفه الخطوبه مالتها عفيه خلوها تختار براحتها وحسين هو الخسرها سنه وينه عنها
سليل : جريت نفس تأخرت يا حسين عن ريمتك وراح تروح منك

اجوي اهل الولد وفعلاً ناس بسيطين والام كلش حبابه وشافت ريم تخبلت عليها وجانت طالعه حلووه بساطه مكياجها الي صارت محترفه بيه ولابسه وستره وبنطرون وهي طويله وصاحبه جسم رشيق طالعه مو ريم فعلاً راقية
سجاد وبابا سألو عنه وجانت سمعته طيبه والكل تحمد باخلاقه واجه بابا عليها وبلغها
جان رد ريم الوحيد
اذا انتم موافقين عليه اني موافقه
حجي طه : وحسين
ريم : ابن عمي وبس
حجي طه : بنتي فكري زين هذا زواج كافي الصار
ريم : اي والله بابا كافي الصار كلشي قسمه بلحياه واني راضيه بقسمتي بس ادعيلي يطلع ابن حلال ويراعي الله بيه
سليل : وبعد شهر قرو فاتحة الدكتور سامر على ريم وقطع حقها وبعد شهر الزواج
وعم الخبر للكل لكن مع الاسف الوحيد المجان يعرف هو حسين

يتبع .....