رواية ابي والغزلان الفصل الحادي والثلاثون 31 - بقلم ريام هادي

ابي والغزلان
Reem للكاتبة

مساء الورد والعافيه لأحلى المتابعين فقط عندي ملاحظتين 
الملاحظة الاولى / ليش قرأت التعليقات وشفت بالالاف مستغربين من عمل سندس بلمناسبه اكو بلمئات مثلها وابشع وحالات شايفتهم بعيني يعني اكو امهات مع الاسف تتسمى ام حتى بلشارع تشمر طفلها حاله سندس مو غريبه مو كل ام وضعت الجنه تحت اقدامها

الملاحظة الثانيه / مرض البهاق كثير من التعليقات كالو يتعالج اكيد بيومنا هذا يتعالج لكن سنه ١٩٩٦ ماله علاج واذا توفر وهذا نادراً مكلف جداً اتمنى منكم من تقرون الاحداث تركزون شوي على التواريخ
قصه ابي والغزلان اهم شى فيها مع كل حدث التاريخ المصاحب لحياه الابطال
نرجع للبارت قراءة ممتعه لًلًـّــ💎ــجٌٓمٍَُٓيِّعَْٓ

البارت الثامن والعشرون
اصعب شي تحن للكسر بيك جناح
اصعب لحضة من تخنكك الدمعة
ومن تخسر وجه ماتكدر ترجعه
من تشرد عيونك بالوداع تخاف
تشوف بروح اليحبونك الوجعة

اصعب شي تكلهم راجع ودنياك
حركت كل سفينة بساحل الرجعة
اصعب شي تحن للكسر بيك جناح
وتاج الكبرياء بعاطفة تخلعه

للبجاك سكته وما يعرف شبيك
للخلاك حاير بيمن تودعه
للخلاك ما تلتفت رغم الشوك
للخلاك ما تتركله خط رجعه

اصعب شي يخونك عذرك وتحتار
و اتحس بضميرك للحقد نزعه
اصعب شي يخونك موسمك والكاع
ويثكل جلدك وماتكدر تنزعه

ساعتين وطبت كعدت يمي وجان تباوع علية وتكول انتي كبرتي ولازم تعرفين كولشي اني راح اتزوج اخذ حسام اخوج واتزوج مااكدر اخذكم كلكم وانتم تبقون هنا يم امي ولتخافون كل اسبوع اجيكم يوم اشوفكم مااعوفكم امي لتخافون ومااقصر وياكم حبيبتي
باوعت عليها وكتلها اني ماعندي ام
سندس : شنو هذا الحجي مو عيب شنو ماعندج ام
سليل : نطت عيونها علية وتريد تكطعني باوعت عليها بعين دامعه بس الگلب ينزف قهر والم محجيت شى اتمددت على الجربايه وانطيتها ظهري مااريد حتى اشوفها وحطيت وجهي بلمخده
جان تنفخ بضوجه وتكول
سندس : اففف سليل حبيبتي انتي هسه مراح تفهميني من تكبرين شويه راح تعرفين الي سويته لمصلحتج ولمصلحة خواتج الحياه صعبه ولازم اسوي كولشي وماعندي غير هذا الحل
سليل : بدت دموعي تنزل بلمخده وكاتمه قهره گلبي واسمعها ومااحجي جان تمد ايدها على راسي وتحرك بشعري اقصد بقايا شعري لان شعري مثل گلبي بقايا بس والبقايا اكلتها النار
سندس : بنتي لازم اتزوج حتى اعيشكم احسن عيشه يعني شفتي حالنا لا بيت ولا فلوس وحال الضيم حالنا وهسه حال اختج غزل شكد يرادلها مصرف وعلاج على حالتها منين اجيب
سليل : كوه طلعت الكلمة مني بس متحركت على وضعي ظهري عليها واحجي بقهر وكتلها زين وبابا
سندس : ابوج مامنه رجعه محكوم ياامي وميطلع بعد واني وحدي وحملكم ثكيل لازم اكو رجال يساعدني على ضيمي وعلى تربيتجن

سليل : انداريت عليها وكتلها انتي هسه كعد تشتغلين وممحتاجين شى واذا على المصرف ناكل اي شى والله اخلي البنات اي شى ياكلون واني ما اداوم مدرسه واشتغل بلبيت كولشي وحتى غزل ما اخليج تحسين بيها بس لتعوفينا وتروحين
جان تحضني وكالت
سندس : يابنتي اذا متزوجت راح يبطلني من الشغل منو يشغل وحده عدها اعداديه يعني راح يكتلنا الجوع وفوكاها حتى سكف فوك راسنا ماكو
سليل : وخرت من حضنها وصرت كبالها بعدني كاعده على الجربايه وكتلها زين واحنا منو النا شون راح تكدرين بدونه وشمعنه حسام تاخذي
سندس : شبيدي يابنتي هو ميقبل اخذكم وحسام محتاج اب حتى يصير قوي ويكدر من يكبر يحاميلجن واني معايفتكم بيت غريب شو يم امي وتحبكم وماعدها احد انتم ونس الها وهي هم تحافظ عليكم
سليل : ماما غزل محروكه ومحتاجتج اني وين اكدر عليها
سندس : تكدرين حبيبتي انتي سباعيه وتحبين خواتج ولتخافين كل اسبوع الجمعه يمكم اخلص النهار كله هنا سليل لازم تساعديني هذا الزواج راح يغير حياتي وحياتكم للاحسن متردين ملابس جديده متردين غراض وخواتج متردين تشوفيهن مرتاحات ويلعبن براحتهن وتاكلون احسن اكل عمج خليل من اتزوجه راح يتكفل بكولشي واني اخليكم متحسون بعدم وجودي
سليل : وخرت من حضنها وكتلها بنبره وصوت عالي انتي راح تعوفينا وتعيشين حياتج شون راح تنامين وعايفتنا هنا متنقهرين علينا متكولين اخاف يصير بيهن شى غزل محروكه وريم مبكعه واني هذا حالي الجلب الجربان شكله احلى مني ورشا الله اعلم شراح يصير بيها عايفه كل هذا وتكولين لخاطركم اني ما اريد فلوس ولا اكل ولا دوام اريدج يمنا لتعوفينا عفيه ماما

سندس : اهووو كافي مو كتلج كل اسبوع اجي افهمي عاد لازم اتزوج حتى اعيش وتعيشون احسن من عيشه طه وفكرة
سليل : لتحجين على بابا ياريت هو هنا مجان سويتي هيج
سندس : اني صوجي اجيت اتفاهم وياج كلها مده واتزوج وعينج على خواتج ولغوه زايده ما اريد
وعافتني وطلعت وركعت الباب وراها
حسيت گلبي يريد يطلع من صدري من القهر رجعت حظنت المخده وبقيت ابجي والله حتى تعبت من البجي وبيومها غطيت راسي صارت عاده عندي من انقهر وابجي اغطي راسي حتى لو حاره المهم ابتعد عن الكل

ومن يومها كمت مااحجي بس على كد الاوامر سوي هيج وحطي هيج واحرك براسي بلقبول حتى مااريد اتناقش وياها واذا الشغله معاجبتني هم اسويها  احس اذا حجيت وتقبلت الوضع كإني اخون بابا واني عندي بابا مثل الهوا مكافي اني الي ضيعته هلمره اخونه واقبل ماما تتزوج غيره
صار اسبوعين على الموضوع عمه نهر وعمو سجاد مشفتهم وافتهمت من بيبي ماما سوت مشكله وياهم يعني مكافي تريد تتزوج وتعوفنا هلمره تكطع الناس الي تحبنا من عدنا
كعدت الصبح مثل كل يوم حضرت البنات للمدرسه وكعدت صبيت الجاي واخذ كرصه خبز من بيبي لان تخبز وحار واكلت خبز وجاي وكاعده بلمطبخ بلكاع وصافنه ومهمومه وشويه سمعت صوتها اااخ ياصوتج ردت الروح بيه تصيح ثلل حتى هي تعلمت تصيحه طلعت اركض من المطبخ
واشوف رجال اول مره اشوفه شايل غزل ركضت واخذتها منه حبيبتي كلها ملفلفه بشاش ومربطه اااخ منظرها كطع گلبي تكطع وابوس بيها وتصيح ثلل اواا
اااخ ياروح ثلل
وجان اسمع صوته هاي بتج الجبيره وهي تكله اي سليل وجان يكول شلونج عمو انداريت علية بله هذا مبدلته بابا اخذت غزل ومجاوبتهم وطبيت للغرفه واسمعها تكوله لتضوج تستحي مو كتلك
تمنيت تكون عندي الجرئه واطلع اطرده لو بعدنا بيت بابا ولا اخلي يطب وفوكاها شايل اختي
بقيت ابوس بيها على كيف وهي ياعيني تباوع على شعري الكصير وشكلي المطعون لاحاجب ولا رموش والكذله ربع بس ومحركه جان اطب ماما تعيط
سندس : مو عيب شون متسلمين على الرجال
سليل : مجاوبتها وبقيت العب ويه غزل وابوس بيها جان اتجرني من ايدي رغم شبه طابت بس هم تحركني من واحد يلزمها عطت ااااخ
جان تهدني وتأشر بيدها وتحجي بنبره تهديد
سندس : اسمعي لج هاي سوالف وتعلوم نهر وسجاد تبطلي لا وروح ابويه مية نعال اركعج واطيح حظج لتشوفين صار ايام ساكتتلج واكول مريضة وتعبانه بس كافي زودتيها
سليل : حجيت بصوت ناصي انتي مو راح تتزوجين وتعوفينا
سندس : مااعوفكم الف مره كتلج اجي وين اولي
سليل : ماطول تتزوجين غير بابا اني بعد ما اريدج ام اليه امي ماتت
جان تضربني راشدي وهاي جانت القاضيه
بگلبي تجاه امي نزلت دمعتي مو لان ضربتني لا بس لان حسيت انكسرت منها وكدرت تفضل نفسها علينا عفتها ورجعت حضنت غزل الصافنه علينا ومتفهم حجينا وهي جان تكولي
سندس : طبج مرض عبالج اتراجع مكافي تريد اخلص من ايام الفكر والضيم مال ابوج جايتني انتي تردين تربطيني بيه العمر كله سمعي لج من يجي مره ثانيه غصب عنج اطلعين تسلمين عليه

سليل : اذبحيني ومااطلع اسلم واني اكرهه واكرهج
جان تعيط وتريد تضربني جان تعيط غزل وتبجي خافت من الموقف كفختني على راسي وطلعت رجعت حضنت غزل واحاول اسكتها اباوع عليها وجهه زين بس شويه حمار بس ركبتها وايدها ورجلها كلها شاش ومربطه وشعرها ماكو اصلاً مزيني صفر واكو حركات بسيطه بدايه كصتها بستهم و شلتها على كيفي وافتر بيها اريد اسكتها ادور على لعابتها تصيحلها نونيه
اليد نونيه
سليل : اوف منين اجيبها والبيت كله احترك بقت تبجي ابوس بيها انطيتها جكليت انطيتها نفاخه مال ريم تشمرها شون اسكتها طلعت گلت خلي ماما تسكتها جان تكولي بيبي طلعت
بقيت جافله وين راحت وغزل وضعها التعبان
شون اسكتها وجان تندك الباب وصاحت بيبي تعالي يمه عمج بره
طلعت اركض عرفت عمو سجاد وشايله غزل
اول مشفته دمعت عيني لان حسيته عافني بأكثر وقت محتاجته جان اكول اله حتى بدون مااسلم ليش عفتني حسيته جفل من كلمتي جان يجاوبني بهدوء

سجاد : موجود معايفج
سليل : اسبوعين عمو ماكو
سجاد : حتى لو مجاي لتصدكين عايفكم بس جانت عندي شغلات لازم اسويها وشغل كملته واجيت رحت للمستشفى حتى اشوف غزل كالو طلعوها واجيت اشوفها ليش تبجي
سليل : تريد لعابتها وانت تعرف احتركت
سجاد : سهله تعالي عمو لتبجين اني اشتريلج احلى لعابه
سليل : اخاف موزين تطلع تشوفها شون ملفوفه شو جابتها ماما شمرتها وطلعت حتى مااعرف يصير نطلعها لو لا
سجاد : بقيها بلبيت كولشي يصير رايح نص ساعه وارجع تردين اجيبلج شى ويايه
سليل : لا
سجاد : روحي طبي جوه
اخذت غزل وبس تبجي وتصيح نونيه جانت لعابه من قماش مخيطه بس روحها بيها
وره اقل الساعه بعد ما فحطت من البجي اجه عمو كوه خليته يدخل ميقبل غزل كاعده بلكاع وجواها مندر (فراش) وكعدنا اني وعمو  وصارت هي بنصنا فتح العلاكه وطلع منها لعابه جانت اسمها باربي اول مره اشوفها صغيره بس شكلها يخبل ومبينه غاليه حيل هي شافتها ابتسمت وعيونها دموع وحضنتها
كتله عمو هاي غاليه
سجاد : متغلى عليها وجبت وحده لرشا وحده لريم
سليل : حيييل هوايه جان بس لغزل
سجاد : شيخلصني من زيبك غير توكفني بنص الشارع
سليل : ههههه اي والله تسويها
سجاد : وانتي جبتلج هاي
اخذتها من ايده علاكه صغيره جان عباره عن طاك اسود بيه ورد ناعم كولش حبيته ولكيت طباكات ناعمات
سجاد : البسي
سليل : لبست الطاك وركضت على المرايه انرفعت الكذله وجهي طلع ارتب لان الكذله محروكه ومنظرها ناس كصير وناس طويل من رفعته صار شكلي ارتب ولزمت بقايا شعري وحطيت طباكات بيهم حسيت شكلي احسن صار بقى بس الحرك البسيط بخدي الايمن
ابتسمت من شفت شكلي ورجعت لعمو

سجاد : عجبوج اني ما افهم بهاي السوالف بس سألت بنيه واختاريت الطباكات
سليل : شكراً عمو هوايه والله
سجاد : هاج لعابات البنات لازم اروح ما اريد اشوف امج واسويلي جريمه هنا
سليل : عرفت راح تتزوج ودنجت خجلانه
سجاد : عادي كولشي اتوقع من سندس الزركه
سليل : عمو راح نضل بلا اب ولا ام
جان يكولي بكل هدوء  ارفعي راسج باوعت عليها وصفت على وجهه وهو يكولي
ابوج موجود ودومه وياج واني موجود ومااعوفج وعمتج نهر تحبج وهم متعوفج الي اريده منج تصيرين قويه لخواتج ذني صغار وميفتهمن صيري امهن قبل اختهن
سليل : شلون مااعرف
سجاد : تعرفين الي مثلج تعرف ماطول ضحيتي بروحج بنص النار حتى تنقذين خواتج راح تعرفين
سليل : خايفه حيل
سجاد : كولشي يهون لتخافين
سليل : رجعت باوعت على غزل الفرحانه جان يكوم وكمت وياه
سجاد : عينج على خواتج وحاولي هاي الايام ترجعين للمدرسه كافي غياب
سليل : ماارجع جان يحجي بنبره تهديد بسرعه انكلب الهدوء الى اعصاب
سجاد : باجر خميس السبت مداومه ومااريد اي جدال واذا اجيت وملكيتج مداومه اجرج من هدومج وغصب اداومين
سليل : شوف حال غزل عمو اذا ماما هسه طلعتها من المستشفى شمرتها وطلعت منو الها
جان يكولي وين بيبيتج
سليل : نايمه تعبانه خطيه
سجاد : روحي كعديها
سليل : خطيه عمو جانت تخبز وتعبانه
سجاد : ترحين تكعديها لو اطب اني
سليل : لا لا راح ادخل
دخلت ولكيتها تصلي حتى منايمه بست راسها وكتلها قبل الله بيبي
ام سندس : قبل الله اعمالج يمه منو بره وحسه هيج عالي هذا عمج مو
سليل : اي ويريدج
ام سندس : كوميني يمه
كومتها كوه وبيدها السبحه
سجاد : شونج خاله
ام سندس : هله يمه استريح ليش واكف
سجاد : لا شويه مستعجل
خاله اني جاي على الله وعليج
ام سندس : كول يمه من عيني اذا اكدر
سجاد : تكدرين ان شاء الله خاله سليل لازم ترجع للمدرسه وهي تتحجج بغزل واني اريد افرح ابوها العام من كتله على نجاحهم طار بس انكسرت فرحته من سمع سليل تاركه السنه وعدته هاي السنه ترجع وهو ميعرف بلحريق والي صار واذا عرف هسه هم تركت راح يشك اكو شى وراح يتأذه الي اريده هي كم ساعه تتحملين الصغيره وعينج عليها بين مترجع
ام سندس : يايمه غالي والطلب رخيص جا جم غزاله عدنا
سجاد : والله ياخاله انتي ذهب وحرامات خلفتج سندس

ام سندس : شنسوي يايمه هاي كتبتنا بعد وحظنا
سجاد : سمعتي غزل تبقى يم بيبيتج وانتي ترحين للمدرسه من ترجعين تكملين شغلاتج وهم عينج على اختج
سليل : اتعب عمو ما اكدر
سجاد : كافي لغوه تردين ابوج يزعل وينكسر خاطره
سليل : لا كله ولا بابا هذا هو ارجع بس المديره تقبل هواي غياب
سجاد : مالج دخل بلمديره
سليل : زين وشكلي شوف وجهي عمو استحي والله اداوم هيج
سجاد : عادي شبيج قابل انتي اول وحده لو اخر وحده تحترك وجهج صار احسن من قبل وكلها كم شهر ويتعدل وجهج وشعرج انتي من باب تشجعين ريم اداوم وبهذا حالها وانتي تنهزمين من السبت اداومين
سليل : وماما شكول الها
سجاد : لتخافين امج مو بحالج هسه عروس حايره بروحها
سليل : دنجت من الفشله جان يكولي
يله بلسباعيه يله بنت طه شوفيهم شسوي وشون ترفع راس ابوها
سليل : حسيت كلامه ثلج ونزل على گلبي صدك لخاطر بابا لازم كولشي اسوي ابتسمت وكتله السبت اداوم
سجاد : تعالي سدي الباب ورايه وديري بالج على نفسج

طلعت وراه وسديت الباب اباوع علية واكول هم يجي يوم وتعوفنا مثل مراح تعوفنا ماما فزيت من صفنتي على صيحت بيبي وهي تكول تعالي بدلي لأختج تروح حمام
اخذتها ونظفتها وكل حركه مني ارجف اخاف الجمها وأذيها بس حبيبتي تبتسم بوجهي اااخ شكد خفت عليج وكلتها بسكت وجاي وغفت على كعدتها وبيدها اللعابه شلتها ونومتها بفراشي وتمددت بصفها ممصدكه عايشه وكعد اشوفها كدامي

وره ساعتين سمعت هوسه بره اكيد ريم ورشا وحسام اجوي
طلعت واكولهم اششش صوتكم غزل نايمه بلغرفه جان اطب تركض ريم وتعيط غزوله اجت غزوله اجت هاي عود كتلها صوتج تبوس بيها هي ورشا همزين مكعدت باوعت على حسام ليش متجي تبوس اختك
حسام : اخاف
سليل : من شنو تخاف
حسام : شكلها يخوف
سليل : ولك اختك هاي تخاف منها
حسام : شوفيها محركه وتخوف عبالك ابوبريص محروك
ريم : انت ابو عريص ياعريص وجان تنزع  البوتين من رجلها وتشمره بوجهه
سليل : ولج ريم عيب وجان الزمه يريد يضربها
رشا .. عوفي خلي يضربها حتى اكسر المطاريه على راسك
سليل : ولكم شجاكم
حسام : الع اكول لماما عليكم واخليها تكسر العوده بيدكم
ريم : واني اكول لاصدقائك شون جبان وتختل وتخاف تفتح الباب وتلعب بخشمك
سليل : ولج ريم كافي عيب اخوج اكبر منج
ريم : يحجي على غزل انتي صرصور من المجاري ابو شوارب الطوال
سليل : جان الزم حلكها انهدت بعد شيسكتها

حسام : وانتي مطكعه تخوفين ايييع كلج وصخ وبكع وكلها تخاف منج
ريم : دمعت عينها وجان تكول شوفي ثلل
سليل : ركعته على حلكه ولزمته من اذنه اسمع لك اياك اسمعك تكول هيج على اختك جان يدفع ايدي ويعيط متشوفيها شلون تغلط
رشا .. انت صوجك ليش تعيب على غزل يازمال
حسام : باعي شون يغلطن اله اخلي ماما متنطيكم مصرف ومتسويلكم لفات الصبح
ريم : جان اطلع لسانها وتكوله ثلل تسوينا مو ثلل
سليل : اي حبيبتي بس كافي عيب
ام سندس : يمه شجاكم ليش تتهاوشون (تتعاركون )
سليل : ماكو شى بيبي يله طبو بدلو
اخذت البنات ونزعتهن ملابسهن وحده تباوع على الثانيه عرفت راح يسون مصيبه غير خواتي واعرفهن جان الزم كل وحده من تك اذن اسمعن لجن اي خطط وسوالف مال شريرات ما اريد بيبي مريضة وغزل هم لتسون مشاكل
ريم : لا منسوي
رشا .. عقال احنا
سليل : الله يستر منجن يله كملن تبدلين وامشي اصب الغدا جعت هااا صدك هاكم
انطيت كل وحده لعابتها اول وحده شهكت ريم وهي مصلخه بداخلي والجواريب تكمز عندي لعابه عندي لعابه تخبل ثلل وكمزت علية تبوس بيه
سليل : مو مني من عمو سجاد
رشا .. احلى عمو ولج ريم شوفي شعرها تخبل
ريم : اي وعيونها
سليل : يله بدلو بسرعه كتلني الجوع بيومها التهن بلعابات مكيفات ويلعبن بيها صبينا الاكل وكعدنا كلنا بلهول صبيت وكعدنا بلكاع جان ماعدنا ميز طعام وهاي الشغلات هي لو جرايد نفرشها بلكاع ونحط المواعين عليها اذا هوايه مثل السفره نسويها لو بصينيه جبيره وبيها المواعين ونكعد داير مدايرها كعد ناكل وطبت ماما بوست البنات ودنجت تبوسني وخرت منها عافتني وكعدت بصف بيبي الي هم كوه تحجي وياها مثلي شويه وكال وحجه  حسام نفذ تهديده وكال لماما وجان تعيط بيهن وكالت هذا الاسبوع كله ماكو مصرف وبس لفه البيت حتى متغلطون بعد على اخوكم الاكبر منكم وحتى طلعه بلشارع ماكو

تنحبسون واذا سويتن بعد وكاحه حتى للمدرسه متروحن
ماانسى منظر خواتي مبرطمات وكوه حاصرات الدمعه وهو يبتسم بخبث اني مدخلت لان مااريد ادخل بنقاش وياها واعرف ماطول حسام طرف بلموضوع لو شميسوي هو الحق واصلاً اني مااريد حتى اباوع بوجهه بس من شفت ريم ورشا وحده تباوع للثاني كلت هاي هيه الك الله ياحسام
اني احبه لحسام مثل خواتي هو اخوية
الوحيد بس مااهتم بيه مثلهن لان هو غركان بحب ماما واهتمامها بكولشي وخواتي محرومات من حضنها واهتمامها لهذا اهتم بيهن اكثر منه

من شافت عمو سجاد جاب لعابات عاطت
سندس : اني مو كلت بعد ميطب هنا للبيت شجابه
ام سندس : انجبي واسكتي عمرالبنيات وجاي يشوفهن
سندس : لا عمهن ولا بطيخ واذا اجه هنا والله اخلي خليل يطيح حظه
ام سندس : يا والغسل انتي وهذا التفس بطلي من هاي سوالفج وخلي ستر على بنياتج الزلمه حوك ويركض بلبنيات وهنه مالهن والي خلي واليهن
سندس : ليش خليل موجود وبعد كم شهر يصير رجل امهن وبحكم ابوهن ومنحتاج احد
ام سندس : اسكتي لا وحك النايم بلنجف وشابع تراب وخلفتج منه الخلفه السوده اطيح حظج جوزي من الزلمه البنيات يحبنه وهو مراعي الله بيهن وعمتهن ترجع تشوفهن
سندس : بس يمه
ام سندس : وغمه كون اسكتي هذا مو بيتج وانتي خطار كلها كم يوم وتولين عوف البنيات بضيمهن مكافي راح تكسريهن
سندس : اهو يمه هم رجعنا
ام سندس : ولي من وجهي اروحن اتعبد الله ولا هاي الخلقه الزفره اطير حتى الحسنات

سليل : بيبي جانت مثلي ميته قهر على بابا بس مابيدها شى تسوي وهمزين وكفت ماما عند حدها ومراح تطرد لا عمو ولا عمه بس ليش دوم تكرر هو مو عمي زين هو مو كرابه بابا لازم اسأل عمه نهر بيوم
سمعت حسام يتوسل بماما على لعبه عاجبته جانت شون الاتاري الصغير اكبر من جف الايد وبيه دكم وبداخله شاشه صغيره دبابه وتضرب اخذته من ايده واجه طاير بيها والايد الثانيه مسدس ابو البكره وكارتونه بيها طلقات حمر يضرب ومكيف جان تطلع بيبي تغلط عليه لان كمزها
بس يوم واحد فرح بيهن الي عنده مثل ريم ورشا ويتحارش بيهن مستحيل يتهنى

ثاني يوم كبت العيطه طلعت اركض من الغرفه واباوع ماما تعيط عليهن انتن سويتن هيج ريم تكولها اني جنت نايمه ماما
وانتي رشا
رشا .. جنت ويه بيبي
مو صّـْْ(☑)ـْْحّ بيبي
ام سندس : يمه البنيات شلهن علاقه مو كالن مو هنه يجوز
الوليد يلعب بلشارع وانكسرن منه
حسام : بيبي انتي سكتي مالج دخل
ام سندس : انجب ولك وشمرت النعال علية ابن سندس تسكت لا انيمك بلشارع تاكل الواويه
حسام : ماما شوفي بيبي
سليل : وكبت العيطه بين ماما وبين بيبي واشوف رشا وريم اتسحبن ودخلن للغرفه شافني واكفه باب الغرفه طبن من جوه ايدي انداريت لكيت كل وحده حاطه ايدها على حلكها وتضحك
سديت الباب واجيت اركض عليهن وكل وحده لزمتها من كصيبتها تحجن لو اركع راس براس واطلع اكول لماما على سوايتجن

ريم : لا لا ثلل حبابه
سليل : هاي انتن مو كسرتن اللعب مالته
ريم : هو شسوينا قابل
سليل : احجو بسرعه
رشا .. اني رحت لهيت بيبي وكعدت يمها وسألتني عن ريم كتلها نايمه وريم راحت لغرفه ماما بسكوت وطلعت غراض حسام كسرت المسدس بلطابوكه وره البيت والاتاري بلبسمار دكته بنصه وشلعته عطل ورجعتهن بمكانهن
سليل : اباوع عليهن خربانات ضحك

ولجن ليش مو اخوجن
ريم : من وراه اليوم مشتريت قمردين ولا جكليت وردت اشتري ضروك الفار وماعندي فلوس كله من حسام الزمال
سليل : صفنت عليهن بله ذني شسوي الهن اذا هنه اصغر جانن ومن عمو علي مخافن يخافن من حسام مو زين مكصن شعره وهو نايم ابتسمت واني اتخيلهن لا ارادياً
جان تكول ريم
ريم : ردت اكطع حذائه الجديد دورت علية ماكو
سليل : اششش اسكتو الله اعلم شون راح تعاقبجن لان اكيد انتم الي سويتو
رشا .. عادي خلي تسوي
سليل : ولج مو انتي كبرتي شلج بهاي سوالف الجهال صرتي سادس وسنه التجي بلمتوسطه وبعدج تكمزين وره هاي الوكحه

ريم : اني عاقله وحبابه
سليل : كولش وفقيره وابد متسوين شغلات مكسره
رشا .. تعالي نكعد نقرا حتى من تجي ماما متضربنا
سليل : اااخ منكم اكعدن يله
ريم : باجر ثلل اداومين مو
سليل : جريت حسره وبخوف كلت اي اداوم
ريم : وغزل
يم بيبي تبقى يله اكعدن اقرن
بيوما بيبي سكتت ماما ومخلتها اطب تضربهن ورجعت ماما اشترت اله وسكتته رغم كولشي حسيتهن مرتاحات لان نفذن انتقامهن مرات احتار وياهن افرح لان ياخذن حقهن لو اخاف لان وكحات واخاف من يكبرن وخاصه بعد ما ماما تروح شون اكدر اسيطر عليهن حايره والخوف ياكل بيه من المجهول

خليت بيبي تبلغ ماما بسالفه الدوام وهي مكالت اي شى تريد عودتكسبني متدري هي كسرتني طلعت الغراض الي جابتهم عمه نهر خطيه كولشي مشتريه صدريه وقميص وجنطه وحذاء حتى داخليات لان بلغت ولازم البسهم  ممبقيه شى حضرت كولشي  واكيد منمت لان الليل صار عندي للسهر والتفكير وبس النوم ميجي اله بعد مااشوف اول خيط شمس يطلع اغفى ساعه او ساعتين واكعد تعلمت
كعدت وركض ركض حتى الحك والبنات مكيفات بيه لان راح اداوم حتى متعبوني مثل كل يوم بس مشطت شعرهن لبست ملابسي باوعت على حالي وجهي الشبه محروك شون راح يتقبلوه باوعت الطاك موجود لبسته وطلعت بوست بيبي واخذت لفتي وطلعت حتى مصبحت على ماما رغم كالت متصبحين درت وجهي وطلعت

امشي بخطوات خجوله وحاطه جفيه بيدي وعلى وجهي وعيني بلكاع على ساعه اوكع على وجهي اريد بس اوصل للمدرسه وجان احس واحد بصفي واسمع صوته الخشن الي حيرني مره احس بيه حنيه ومره قسوه
وكال
سجاد : صباح النشاط
سليل : رفعت راسي بأبتسامه صباح النور عمو شعجب اجيت
سجاد : لازم اول يوم اداومين وياج ولي امرج واكيد امج العروس مو بحالج واني اصلاً نيابه عن ابوج ولازم اكون موجود
سليل : شكراً عمو
سجاد : بدون شكر اذا تردين تشكريني انجحي وخليني اوفي وعدي لطه مااريد اكون مو كد كلمتي وياه ابوج تعبان سليل نجاحج ونجاح خواتج هو الي راح يريحه
سليل : صار عمو لخاطر بابا كولشي اسوي
سجاد : عفيه بلسباعيه
يله مشينا وصلنا للمدرسه رغم اضايقت من نظرات البنات الي واكو بيهم ابتعدو عني بس عمو سجاد سحب ايدي ولزمها ودخلني للمدرسه ويباوع وكأن يكول يله اني وياج لتخافين
يمكن بهذا عمري هواي اتعرض لمواقف صعبه بس اجتازها واليوم جان اختبار الي جديد بس وجود عمو خلاني اجتازه رغم كميه الخوف والقلق ويايه
عرف نفسه بأن هو عمي وحجالها عن الحريق وشافت وجهي تعاطفت ويايه ودزتني لصفي جنت مثل الطفله من اداوم اول ابتدائي متريد ابوها يعوفها ويروح تخاف من هذا العالم هذا جان احساسي بيومها مردت عمو سجاد يروح ومن ابتسم بوجهي ودعني بنظره من عينه دمعت ردت اكوله ارجع ما اريد رجعني للبيت بس ميصير لازم اكون قويه واني اي قوه ماعندي

دخلت وداومت بقيت وحدي ابتعدت عن الكل جنت انزعج من اي وحده تسألني انتي شبيج ليش هيج محروكه جنت بس اجاوب الست من تسأل اما البنات ابد مااجاوب
وعدى اصعب يوم دراسي اعتبره ومشت ايامي طبيعيه وبديت اتأقلم بين المدرسه وبين البيت وخواتي وامي بعالم ثاني تماماً
وشهر يجر شهر وعمه خطيه من الباب تشوفنا وتروح وتجيب غراض النا متدخل جانت تكول البيت الي بيه سندس ماادخله
وحقها مقدرة حالها

وبدت سنه ١٩٩٧ شهر الواحد رمضان جنت اتمنى ميخلص لان بنص رمضان تنتهي العده مال ماما واكيد وره العيد زواجها
بيوم صايمه وكعد اقرا سمعت طكطكه بلمطبخ مديت راسي ماكو احد والصوت بعده تمشيت بأتجاه السنك جان السنك مالتنا بيه برده وخرتها والكه ريم جواه
حاطه ماعون تمن ولبن وبصفها كلاص مي يموت شكلها من الضحك ولج شسوين
ريم : جعت ثلل وكلت اكل وارجع اصوم وياكم للفطور
سليل : ههههههه ولج ميصير تاكلين وترجعين تصومين
ريم : جوعانه وعطشانه والله
سليل : جم مره كتلج عادي اذا متصومين بعدج صغيره
ريم : مااا اصوم لعد سحليه احسن مني
سليل : سحليه منو
ريم : حسين سميته سحليه شفتها بكتاب العلوم  تشبهه وسميتها حسين
سليل : والله هذا الولد خطيه شالعه گلبه انتي ليش سولتج بيه عوفي هو حتى مو بنفس المرحله ماعنده اصدقاء مجلب بيج
ريم : ثلل محد يلعب ويايه كلها عافتني ويخافون مني
سليل : وجعني گلبي من حجايتها وكتلها وجنات
ريم : تروح ويه صديقاتها بس اني لزمت حسين من شعره وكتله تلعب ويايه وهو هم يوميه بلفرصه يجي علية ناكل سوه واذا مإجته اضربه
سليل : ههههههه مخبلته للولد اذا صار شى بيه تعرفين شيصير
ريم : ميصير بس اني اكتله محد يتقرب منه
سليل : خوش والله فوكاها مكيفه يله كومي من جوه السنك وتعالي اكلي زين
ريم : شبعت وراح اصوم وياكم
سليل : ههههههه طار نص النهار يله مبقى شى كلها كم ساعه ويأذن ونفطر
ريم : اي والله راح اتعب واجوع واعطش اروح انام
سليل : هههههه روحي يلام عمو من يسميج زيبك وام لسان هم

مرت الايام بهدوء بس هو هذا الهدوء قبل العاصفه
واجه العيد كل الناس تعيد لأحبابها وتجمع جهالها داير مدايرهم وينطوهم عيديات اله بنات طه يكعدن بمصباح العيد يشوفن امهن كعد تطلع من البيت وبيدها جنطه جبيره والثانيه بيدها حسام
جفلت وجمد دمي من شفتها تبوس امها وتباوع بأتجاهي عافت امها واجت تتحرك جان ابتعد منها

سندس : تعالي ماما ابوسج
سليل : هاي هيه راح ترحين
سندس : اي بنتي لازم اليوم اروح
سليل : شكول للبنات وهنه نايمات حتى منتظرتي يكعدن يبوسنج ويعايدوج
سندس : لازم اروح ماما بستهن وهنه نايمات وحتى انتي بس محسيتي
تعالي ابوسج مره ثانيه
عطت حيل اياااج تلزميني وخري مني وروحي اله
ام سندس : على كيفج يمه ليصير بيج شى
سليل : بيبي خلي تروح مااريد اشوفها اكرهه اكرهج كعد تسمعيني اكرهج واشهك بلبجي
طلعن ريم ورشا يفركن بعيونهن وميعرفن شكو وهي جري حسام واطلعي
ركضت وراها ردت بس اوكفها بس اكولها لتروحين حبابه والله محتاجيج لكيت سياره طابكه بلباب اخذ الجنطه منها وصعدت ليكدام وكعت بلكراج والطم على راسي راحت وعافتنا راحت
جان تحضني بيبي وتبجي ويايه وتكول يمه لا تبجين والله تجي فقدت تهسترت حسيت تيتمت مره ثانيه رغم هي ملتهيه من يوم مدخل بابا السجن بس على الاقل باقيه ويانا بلبيت تبقى امي واحس بحاجتها بس من راحت حسيت هذا هو ضليت وحدي اسمع تمددت بلكاع واصرخ بكل قوه وريم ورشا يحاولن يلزمني ويبجن ويايه حسيت اني ضيعت كولشي اني دخلت بابا السجن واني خليت ماما تطلك منه واني خليتها تعوفنا وتتزوج الدنيا وكعت فوك راسي متمدده بلكراج الصغير واضرب بلكاع بكل قوتي اضرب بأيدي وارفس برجلي ماادري شصار بيبي كامت مني بس تعبت وكمت اشهك حاطه ايدي جوه وجهي وبلكاع وابجي وجان شهر الثاني بدايته  والجو ثلاجه من البرد بس مهمني لان النار الي بيه تحرك اكبر واحد وجان احس ايد تجرني حيل وتحركني من الكاع اباوع عمو سجاد وعمه نهر حاضنه ريم ورشا يبجون بحضنها ويباعون عليه
جان يعيط بوجهي
سجاد : شنو هاي سوالفج مو عيب مو كبرتي هيج تسوين
سليل : دفعته حيل وكمت اعيط عوفني وركضت للشارع جان يجرني من دشداشتي جنت مو بوعي وعقلي شبه فاقدته موبيدي مراهقه وحست كولشي راح وضلت بلا ام ولا اب
سجاد : وين رايحه طبي جوه واذا راحت تموتين نفسج مو عيب هاي عود انتي الجبيره ليش هيج جبانه ومابيج خير بس تبجين
سليل : هنا من كميت العياط والقهر والبجي فقدت اعصابي لأول مره وعطت على عمو وكتله انت مو بجيت من عافتك امك مو عيطت وكسرت الباب ليش تحاسبني وانت اجبن مني
محسيت غير يضربني راشدي فر وجهي

يتبع ..

شكراً لتفاعلكم الرائع مثلكم للتصويت والتعليق تعليقاتكم جميعها اقراها واعتذر لعدم الرد لكثرتها لكن استمتع بقرائتها
رِّبًـــ♡̨ـــٍْيٌٓ يحفظكم
تحياتي لًلًـّــ💎ــجٌٓمٍَُٓيِّعَْٓ
احـٍُــبٌــ💘ـٍَــْگُِم