رواية ابي والغزلان الفصل الثلاثون 30 - بقلم ريام هادي

ابي والغزلان
للكاتبة Reem
البارت السابع والعشرون

مو كلمن ضحك تحكـم عليه مرتاح
نوبــات البشــر يضحك غصب عنـه
اريدك تدخل بكلبــه وتشوف النــار
مثل يوم القيامــه بلايه جنـــــــــه

سليل : بيبي متعرفين هذا شنو الطلع بريم
مسحت ايدها بلدشداشه مالتها وبقت اتكلب بيها وبأذنها وتجيبها يمنه ويسره وضربت صدرها ولج هاي بكعت (البهاق)
ريم: شنو يعني بكعت
ام سندس : صخام بوجهج سندس تعزن وتصخمن بناتج
سليل : عفيه بيبي شبيها ريم وليش هيج تعيطين وادكين على صدرج
ام سندس : روحي يمه ادخلي جوه بس اكمل البيدي واجيج اخذي اختج وغسليلها وكليها من البارحه ما ماكله
سليل : يله تعالي ريمو
ريم : هسه شنو يعني بكعت
سليل : والل ما ادري تجي ماما ونسألها
من تصرف بيبي عرفت الشغله جبيره وموزينه بس بقيت اضحك بوجهه واكيد گلبي نار اصلاً گلبي مطفه ليش يطفه واني اخت بين الحياه والموت والثانيه مدري شنو هذا الطلع بيها والله اعلم شراح يصير واني شكلي يخوف كافي يخلي النار متنطفي
اخذتها وكلتها بسكت وجاي متقبل تاكل وكل شويه تباوع على ايدها وتحسب عدد الطكع
ريم : حيييل هوايه
سليل : ماكو شى ريمو لتخافين صيري سباعيه
ريم : لا ما اخاف وين رشا
سليل : بعدها نايمه
ريم : احنا بيتنا احترك وغراضنا ثلل راحو جنطتي الجديده وكتبي وصدريتي احتركو
سليل : حسيتها تريد تبجي ركضت على الغرفه وطلعت الجنطه الجديده الي جابتها عمه نهر والصدريه همزين اشترت الهن ملابس مدرسه بس الكتب احتركن
ريم : الله ذني حلوات بس الجنطه ما بيها كتب
سليل : هسه عمو يجيبلنا كتب بس لتبجين
بقيت اوكل بيها وكعدت رشا هم وكلتها بيبي كوه تمشي مريضة وصحتها على كدها وتباوع على ريم وتمسح بفوطتها هلمره انقبض گلبي بلزايد

ساعه واندكت الباب واجت بيبي تصيح عمجن سجاد بلباب كتله تعال ادخل مقبل كال بس اسلم على البنات اطلعن يمه شوفنه
ركضت ريم ورشا واني مطلعت استحيت اطلع وخاصه اليوم وجهي ابشع من البارحه شويه واجت ريم تصيح عمو سجاد يكول خلي تجي ثلل واذا مأجت ازعل منها
طلعت وره ريم وخجلانه حيل وافرك ايد بأيد باوعت عليه بنظره سريعه ودنجت وكتله شونك عمو
سجاد : ليش مطلعتي ويه البنات رفعي وجهج خلي اشوفج من تحجين ويايه ارفعي
سليل : رفعته خجلانه واباوع رجع مثل قبل وطابك حاجبه ومخنزر وكتله
مكدرت اطلع عمو
سجاد : اذا اجي مره ثانيه ومطلعين تشوفين شى مني محلو لتعيديها
سليل : ماشي
سجاد : شونه وضعكم محتاجين شى
سليل : الْحٍمَدٍ للـّہ بس ريم طلعت هاي بيها وكشفت ايدها وجهه شفت ملامحه تغيرت وجان يكولي بنتره
سجاد : بدليلها بسرعه خلي اخذها للطبيب
ريم : شبيه عمو
سجاد : مابيج شى زيبك لتخافين
يله ليش واكفه بدلي ملابسها
سليل :مو ماما بلمستشفى يم غزل
سجاد : اعرف هسه جنت يمها
سليل : ننتظرها تجي جان يحجي بنبره حاده
سجاد : بسرعه كتلج
اخذتها من ايدها وبدلت الها وهي مكيفه راح تطلع
لكيته منتجي على الباب وبيده الجكاره من شافني ذبها وداسها برجله واخذ ريم من ايدها
سليل : عمو دير بالك عليها
سجاد : لتخافين وطبي جوه شويه ارتاحي وجهج اصفر صاير
سليل : قصدك مشوه
سجاد : استغفر الله لطلعيني من طوري ولتگلبين كلامي بكيفج كتلج صفره من التعب واكيد نايمه قليل محد جاب التشوه يله روحي ارتاحي ومن نرجع ريم تكعدج
سليل : شون انام وخواتي مااعرف شى عنهن
سجاد : بطلي عناد وروحي نامي يله
عافني واخذ ريم الي تكمز مكيفه ورشا اصلاً طبت نامت

تمددت بصفها ونمت كعدت على بوسه من خدي فتحت عيني لكيتها ريم
ريم : اكعدي ثلل شوفي شجبتلج
سليل : طفرت من مكاني هااا شكال الطبيب
ريم : كال اني حلوه ودمي عسل شون دمي عسل ثلل
سليل : يعني تنحبين وتخبلين
ريم : هيييي اني اخبل هسه اكول لحسين الجبان اني حلوة واحلى منه
سليل : عمو وين
ريم : بره ينتظرج
سليل :قبل مااطلع مديت ايدي على شعري جنت كل ما اكعد من النوم امشطه لان يتهوس اتذكرت ماعندي شعر دمعت عيني وطلعت مستسلمه وصلت يمه
سجاد : نمتي
سليل : اممم
سجاد : ليش متسمعين كلامي
سليل : شسويت عمو
سجاد : كتلج من تحجين ويايه ارفعي وجهج
سليل : رفعت
سجاد : ليش عيونج مدمعه ولج متعبين من البجي شنو هاي القابليه
سليل : لا ما اتعب لان اذا ما ابجي اطك واموت
سجاد : ضلي اعوي للصبح ام دميعه
سليل : شبيهه ريم باوعت على وجهه حسيت بيها الم من نوع ثاني او اسف على شى صار المهم عمو مو طبيعي
سجاد : اعرف انتي مشايفه هاي الحاله بس هاي الحاله اسمها بهاق احنا نسميها بكع
سليل : اي بيبي كالت بكعت زين ميروح
سجاد : ميروح سليل وهذا الشى راح يأذي ريم من تكبر راح تتأذه ريم محتاجتج لازم تقويها راح تتعرض لهواي ناس تعيب عليها وتخاف منها ومراح يتقبلوها بسهوله
سليل : يعني اختي اتشوهت نزل عينه مني ومجاوبني وسحب باكيت الجكاير من جيبه ورث جكاره ونفخ دخانه عكس وجهي حسيت بخنكته عرفت اختي اسكطت متحملت نزلت دموعي وكتله بحركة گلب وبصوت عالي وتلومني من ابجي موزين عايشه وماذابه نفسي من السطح اني ليش ما متت ليش ما اكلتي النار
سجاد : اششش صوتج منا الناس
سليل : يعني وحده دتموت والله اعلم شنو راح يصير بشكلها والثانيه بكعت وما اعرف شون راح تتحمل الناس تعيب عليها يعني شنو ذنبنا يصير بينا كل هذا ليش الله مديرحمنا

سجاد : حرام هذا الحجي ولتعيدي كلمن وقسمته انتي بعدج صغيره ومن تكبرين راح تفهمين بأن كل الي نمر بيه امتحان من الله لقوه ايمانا
سليل : ياامتحان قابل بس احنا يمتحنا عايف الناس كلها وبس يأذي بينا
سجاد : كافي حرام هذا الحجي وتذكري طه من يصير بيه شى شيسوي
سليل : بابا راح بعد منشوفه وكمت اشهك
سجاد : البارحه جنت اكول عليج سباعيه وبطله واليوم هيج تصيرين
سليل : عمو خواتي تأذن خطيه بعدهم صغار لو بابا هنا جان كولشي مصار
سجاد : يجوز جان صار الاقوى اني صوجي عبالي كبرتي وعاقله واجي افهمج على حالتها لان ادري اكثر وحده اداري ريم هو انتي بس الظاهر غلطت وهاج خبلتج بلزايد وراح تبقين بس تبجين
سليل : شراح يصير عمو بحياتنا
سجاد : شيصير لازم تكولين الْحٍمَدٍ للـّہ
سليل : وغزل شونها هم تشوهت
سجاد : كولشي ما احجيلج اعرفج بس تشهكين اسكت احسن
سليل : لا عفيه عمو
سجاد : متبجين
سليل : لا وعيوني كلها دموع
سجاد : بعدها على وضعها ادعيلها الله يوكف الها اكلتي
سليل : ليش اكدر اكل
سجاد : راح اتعبيني حيل بابا لازم تصيرين قويه البنات متعلقات بيج من يشوفوج بس تبجين راح تأذيهن
سليل : جان تطلع ريم وبحلكها القمردين تاكله هو وجيسه ورشا هم وبيدها الثانيه علج بوبي
ريم : ثلل هاج عمو جاب كومه حلويات وجابلج حلقوم وبسكت
سليل : عافيات ما اريد
رشا .. هاج هاي مصاصه ام العلج
سليل : كتلكم مااريد
ريم : عمو ذني النقط شوكت يروحون ضجت منهم
سجاد : دنج بمستوى طول ريم وكال الها تعرفين شنو ذني
ريم : لا
سجاد :
ذني نجوم من السما وكعن عليج وصرتي هيج انتي هسه احلى وحده ماكو مثلج
ريم : اي الدكتور باسني وكال دمج عسل
سليل : ابتسمت على طفولتها متدري هذا الشى راح يبقى العمر كله بيها وشكد راح يأذيها

سجاد : يله ادخلو جوه طبن يركضن جان يكولي عينج على خواتج سليل انتي مكان طه هسه انتي الحمايه مالتهن ولتخافين اني بظهرج وياج
سليل : جريت نفس قوي وكتله بصوت مخنوك وبعبره كلها الم وقهر وهمست لتعوفنا عمو
سجاد : اني كلمتي وحده كتلج لتخافين اني وياج محتاجه شى
سليل : بس اريد كتب الهن لان تعرف احتركت
سجاد : باجر يمج الكتب وانتي هم الج واخلي نهر تشتريلج
سليل : ما اداوم اني عمو
سجاد : مااسمع هاي الكلمة ابد اداومين حالج حال خواتج
سليل :

سليل : اذا قبل ميصير الحريق بساعات ماما كالت مداومين مو عاد هسه وهذا وضعنا اكيد مااكدر وغزل اكيد اذا طلعت من المستشفى منو الها
سجاد : مالج دخل اداومين واني ارتبها الج
سليل : مااكدر والله عمو
سجاد : اشش حجي زايد مااسمع وادخلي لخواتج وديري بالج على نفسج
سليل : ان شاء الله
راح ودخلت الهن لكيتهن يلعبن بصور العلج فاتحات العلج يدورن صور
باوعت عليهن وعلى حالنا شراح يصير بينا

مر اليوم واجت ماما بليل وكالت بيبي لماما على حالتها واجت وفهمتها على حالتها وشون عمو سجاد اخذها للطبيب
كامت تبجي وتصيح لبيبي بناتي سكطن يوم بناتي راح مستقبلهن حسيتها منهاره وصاحت ريم وتبوس وتحضن بيها وحتى رشا تالي الليل صاحتنا ونومتنا كلنا بصفها اول مره احسها تخاف علينا نامت والدمعه بعينها بس يمكن المصايب تاخذ ايام بگلبها وتروح

يومين وعمه نهر تجي وتروح علينا ومن سمعت بريم حتى لطم لطمت جانت منهاره حتى اكثر من ماما وماكو على لسانها غير تعال ياخويه شوف حال بنياتك بس شنو الفايده قابل يجي
يومين وماما خلصتها بلمستشفى يم غزل الي لحد الان اي استجابه للعلاج ماكو
بدينا نيأس ان تعيش
بدا الدوام وراحت ريم ورشا اني مرحت بيا نفس اروح رغم توسل عمه نهر بيه
واول يوم رجعت ريم تشهك وتبجي بقهره اول مره اشوف ريم القويه الوكحه هيج متأثره بكلام الجهال
ريم : تحجي وتناشغ اني وحش ثلل يكولون بيج ابوخريان
سليل : لا گلبي مابيج
ريم : كلها تضحك علية ويخافون يلزموني ثلل
سليل : حضنتها ومسحت دموعها لتبجين مو كلج عمو ذني نجوم ومحد عنده مثلهن يغارون منج لان انتي احلى منهم
ريم : جنات تكول هذا وصخ اسبحي يروح سبحيني ثلل حبابه

سليل : ااااااه ياربي قويني ابتسمت بوجهه ريمو نظيفه اي وصخ ماكو وهم اسبحج ادللي
ام سندس : يمه كومي صبي لخواتج كملت الغدا
سليل :هسه بيبي اسبحهن واصب
وبلحمام لزمت الليفه الي هي مكصوصه من كونيه ومسويها ليفه وحاطه بيها صابون رگي اخذتها متي وتفرك بيها حتى بلكت تروح البكع اباوع جسمها صار دم وباقيه تريد يروح بوجهه مطالع غير بكعه صغيره بصف الحاجب بس اذنها بيها ورگبتها وايدها وبطنها صح مو هوايه بس مبين واضح سحبت الليفه من ايدها كافي حبيبتي
ريم : مديروح ليييييش
سليل : يروح من تكبرين شفتي شعري راح يطول من اكبر
ريم : اذا يروح ميخالف
سليل : عفيه بلسباعيه يله خلي اغسل جسمج واطلعج قبل ميخلص المي

طلعتها ومشطت شعرها بس ميته قهر عليها ورشا تباوع اخذتهن بحضني وكتلهن يله بلبطلات ناكل جنت احاول اسوي نفسي قويه بس اني تراب داخلي ميت تماماً
نهر : سمعت من سجاد مشتكي على انعام بس مكدر يثبت شى لان هي رايحه للنجف ماخذه علي ومرته وجنات وحسين ورايحه باقيه يومين وماكو شى يثبت هي الها صله بلحريق نعرف اني وياه هي سبب الحريق بس شون وعن طريق منو معرفنا لحد ما جنت بلسوك اتسوك للبنات باقي شغلاتهن وصارت بوجهي امي
اااااخ ياامي حتى الحنيه الي بگلبي الج حركتيها يوم محركتي بنات طه وشوهتيهن
انعام : هااا ولج شونهن بنات اخوج
نهر : بخير كل الخير
انعام : لا بالله كالو وحده تموت والثانيه بكعت والجبيره تشوهت
نهر : اعرف انتي وراها بس وين ترحين من ربج
انعام : انجبي عود هي تفتهم شلي دخل بيهن بس الصار حيل بيهن وابو زايد حوبه ابني
نهر : ياابن الساقط العار النايم بلكبور حرامات مدفون هيج واحد لازم ميندفن ينذب للجلاب تاكله
جان تتقدم عليه تريد تكطعني جان تكول وهي صاكه على سنونها
لو ما بنص السوك جان خليت دمج بطولج على هذا الحجي مالتج
نهر : والله كولشي اتوقع منج الي تحرك جهال شترجى منها بس ربج يمهل ولا يهمل والج يوم حوبه ذني البنات وابوهن تطلع ولو بعد سنين بس تطلع وتتذكرين كلامي جان تدفعني وتمشي تمنيتج مو امي اله اخنكج واخلص الدنيا من شرج ومصايبج

رجعت ودين الغراض للبنات وطبيت لبيت عيالي استلمتني عمتي وحاطه ايدها بخصرها وتعيط
ام سامي : بعد وكت خوش دياحه يوميه سوك
نهر : عمه قابل جنت العب غير اشتري غراض لبنات اخويه مو تعرفين حالهن
ام سامي : خوش والله ابني يتعب ومكسور ظهره وانتي تحطين بحلك بنات اخوج
نهر : وروح ابويه فلس مماخذه منه كله من سجاد ابن خالي
ام سامي : اسمعي لج تنجبين وتكعدين هنا مو كل شويه حاطه العبايه على راسج وراكضه للسواكه روحه هناك ماكو واذا كولش متوازيه مره بلسبوع كافي واحسن متفترين بلسواكه روحي شوفيلج جده دكتوره شيخ يقرا عليج بلكت تحبلين احسن ماضاله كاع بور

نهر : شجاب هذا الموضوع على روحتي للسوك يعني ليش دوم تعيريني وتأذيني هو بيدي غير بيد الله والف مره كتلج اني مابيه شى هو رزق من الله ومكعد يصير
ام سامي : لتضلين تتمسكنين العندي كلته روحه ماكو بعد

ليش ياعمه قابل مقصره بشغل البيت شو البيت يلمع وحتى خبزت قبل مااطلع
والغدا على النار ناصي وانتي يمه ممقصره بشى والله
ام سامي : كتلج تنجبين وتكعدين ماكو طلعه وخلي يجي رجلج والي حجي وياه شنو صاير خيخه لايهش ولا ينش وانتي طابه طالعه خلي يشوفلنا حل بهاي المهزله
نهر : عفتها وصعدت الحجي ميفيد وياها كلت يجي سامي ويشوفلي صرفه بيها
انتظرت ساعه وطب بوكت الغدا واسمع امه تعيط جوه واشكال ادردم علية
اجه عيونه براسه شحنته جوه قبل ميصعد ودخل يعيط
سامي : شعندج بلسوك يوميه شيكولون الجيران علينا ماعدها رجال يحكمها وعايفها تفتر بين اهل السوك وخري مري وبين الشباب وكلها حرشه بلسوك
نهر : شنو قصدك بله موعيب هذا الحجي تعرف اني مال هيج سوالف هاي مكان متروح وتجي ويايه وتركض وتتعب على بنات صاحبك الي يعتبرك اخوه صاحبك الي واجهه الدنيا كلها علمود يزوجك اي تحبها ومكسر بخاطرك صاحبك الجان يقسم اللكمه وياك شنو نسيت طه نسيت افضاله لو هيج كلها على كد مصلحتها وادير وجهه
سامي : اكلتيني حاصل فاصل شجاج

نهر : هو اني لو انت الطاب مشحون من امك مكان متكولها مرتي متسوي الموزين مرتي شريفه مرتي تعرف الصح والاصول والي تسوي لخاطر بنات اخوها ولخاطر صاحبي جان يفش وتقرب مني
سامي : غير اخاف عليج ياعيني وهم مااريد مشاكل وقال وقلت
نهر : اني ممسويه غلط سامي اصلاً عيب على امك تمنعني من ولد اخويه همه بيا حال فوك ضيم الدنيا عليهم هلمره تمنعني منهم
سامي : هي ما منعتج بس كالت مو يوميه
نهر : انت غير مسمعت كلامها حتى عيرتني بلخلفه شجاب هاي على هاي ودمعت عيني ونزلت دموعي وكعدت على الجربايه والله تعبت من امك وكلامها اطب واطلع تعير بيه شسوي الها مو بعينها والله صرت خدامه جوه رجلها ومرضت عليه شبيدي بعد سامي وهم راضيه بس لتمنعوني من بنات اخويه لان بذاك الوكت حتى انت اعوفك

جان يدنج ويحضني وينطيج گلبج تعوفين حبيبج
نهر : كولشي ولا جهال طه مستعده اسوي كولشي لأمك بس لتمنعني من جهال طه
سامي : يله لتضوجين اني احجي وياها المهم متزعلين
نهر : حضنته الله لا يحرمني منك
سامي : ولا منج حبيبة گلبي
نهر : ثاني يوم كملت الشغل وطلعت حسيتها تريد اطك لان نزل وحجه وياها بليل
مهتميت الها اهم شى سامي على گلبي واحبه ويحبني وصلت للبنات لكيت هستوه سجاد كعد يدك الباب بس روحه بخشمه وصاير بركان
نهر : صباح الخير شبيك وضعك مو طبيعي
سجاد : هاي مرت اخوج جان تنفتح الباب وبعده ممكمل الكلام وصارت سندس بوجهنا
سندس : البنات بلمدرسه وسليل نايمه
سجاد : من اول يوم شفتج عرفتج من ياطينه ومرتاحيت لسوالفج انتي النذاله نفسها والحقاره
نهر : شجاك سجاد على كيفك
سندس : احترم نفسك انت منو وتتجاوز علية وفوكاها بيت ابويه
سجاد : ولج انعل ابوج لا ابو ابوج لا ابو سابع جد من اصلج الرجال مصارله كم شهر رفعتي قضيه طلاك
نهر : عزه شنو
سندس : بكيفي وانت منو يمه وتحاسبني
سجاد : اروح لطه موعد زيارته الدمعه بعينه ويرجف ويصيح بناتي ضاعن استلم الامر القضائي ولج من شوكت مقدمه المعامله متكوليلي
نهر : الله لا يوفقج حقيره

سندس : امشي لكم اطلعو بره واياكم تجون لهنا طه واطلكت منه وماعدكم شى او حكم علية وانت بلذات كتلك ميه مره لا نعرفك ولا تعرفنا واياك اشوفك توصل يم بناتي
سجاد : انتي مره وطالعه من ظهر ابوج ومنعيني منهن حتى احرك البيت عليج وعلى الي يطلع وراج والله اعلم يجوز ابو سياره المارسيدس الدب الي وصلج مرتين يجوز هو الحاطته اسبير
نهر : صخام بوجهج مصادقه على اخويه ولج ساقطه ادبسسز هاي تاليها جان اجرها من شعرها من حركت گلبي وجان تضربني وتدفعني وتريد تضربني بعد وجان يلزم ايدها سجاد

سجاد : سمعي لج البنات اذا صار شى عليهن احسبي الله ماخلقج والله ثم والله اندمج على اليوم الي دكيتي الناقصه بهذا المسكين لا عبالج مااعرف خيستج وسفالتج واعرف مصادقه بس ردت دليل عليج ومتوقعت وره كم شهر تطلكين من طه
نهر : سوده بوجهي اخويه انتهى
سندس : يطبه طوب شتردون اكابله العمر كله واكعد مكافي خلصت شبابي بلفكر
سجاد : ولج ياشباب انتي مصدكه روحج مره ولج لو بسوك هرج يبيعوج متجيبين ربع دينار لو حلوة وشكره شجان سويتي غير هذا المسكين يخاف الله وقابل بيج

سندس : اذا مطلعتو الم الجيران عليكم
ام سندس : طلعت تركض شصار ياستار
سجاد : حرامات انتي ام هاي السافله وحرامات معرفتي تربين
ام سندس : شصار وليدي
سندس : مالج دخل يمه دوله ناس متستحي تدخل بشى ميخصها مالك دخل ماعسى اشتغل بملهى مالك حكم عليه ويله روحو منا لا والله اشتكي عليكم وهااا اخلي الي شفته يكسرلكً ظهرك
نهر : جان يجيت عليها خنكها وهي ترفس جوه ايده ويعيط ولج منو يكسر ظهري حقيره
جوه جريته وطلعته خفت يموتها اعرف هاي لسانها زفر ومراح اتوب من الحجي بحقاره اخذته من ايده وهو يدفر برجله ويصيح عوفيني خلي اربيها الساقطه
نهر : بروح خالي كافي منا الجيران لتنسى تبقى امهن
سجاد : وهذا المخبلني امهن وراح تبقى عار عليهن
نهر : الله لا يوفقها توقعت النذاله منها بس مو بهاي السرعه سنه اخويه مكمل بلحبس
سجاد : ااااخ لو اعرف بيها رافعه القضيه من زمان جان لعبت عليها واطيح حظها حتى من شغلها اخليهم يبطلوها بس صوجي التهيت بغير شغلات وعفتها
نهر : تعال كافي امشي نروح والنا الله يعينك ياخويه اكيد تخبل من سمع
سجاد : ولج يبجي مثل النسوان على بناته هاي عود ميعرف الي صار بيهن بس من اجاه تبليغ مال طلاك كال بناتي ضاعن لان يعرف سندس مو كفو وخفيفه
نهر : كمت ابجي علية واتخيل وضعه
سجاد : راح تعوف بناتها وهسه تشوفين
نهر : لا مستحيل متسويها
سجاد : الي مثلها كولشي تسوي والايام راح تثبتلج
امشي نرجع
نهر : بقيت افكر بكلام سجاد وكلت اذا عافت البنات منو الهن وكمت حتى اضافيري اكلهن من القلق

سليل : كعدت واسمع عياط ماما وبيبي وشويه واجت انوار صديقتها عبالهم اني نايمه تمشيت اسمع شيحجون

سندس : هو اني عايشه مثل العالم مشفتي حالي
ام سندس : وشبيه حالج عياره شو رجال يخاف الله وصايم مصلي يطلع من صـباح الله ويشتغل ومكسور ظهره وعندج منه ٥ وليدات وبيت حاميج شتردين بعد
انوار : هي هاي هم عيشه ياخاله وهو وينه رجلها شو انحكم وبعد ميطلع والبيت صار تراب واحترك على شنو باقيه مكتفي الفكر العاشت بيه
ام سندس : ساس البله انتي اعرفج اخاف بتي طايحه حظ وعقلها مو براسها انتي تزيدين خبالها يلام طه من جان يمنعها منج

انوار : هاي شنو خاله موعيب هذا الحجي
ام سندس : چا حجي عيب وحجيج عسل مو ولج تخلين ام تترك وليداتها واديح بلشوارع وتكولين عيب
سندس : ليش اديح اني راح اتزوج وممسويه شى غلط
ام سندس : وجهالج
سندس : البنات يبقون يمج واني كل شهر ادزلج مصرفهن شو سليل وكبرت وتكدر تهتم بخواتها وهي تقيم بواجباتهن والمصرف عليه بس تخليهن يمج وهم ونس الج
ام سندس : وابنج
سندس : اخذه ويايه
ام سندس : وبنياتج ليش ماتاخذيهن
سندس : مايقبل كلهن ويمج اصلاً أمن عليهن اكثر

ام سندس : انتي من كل عقلج انه وين بيه حيل اركض على عيشه اربع بنيات هو اخيك ودزيته لعمامج بلبصره عبن تعبانه انوب اركض على عيشه اربعه وبنات انتي مسودنه
سندس : يمه موكتلج اختهن يمهن وهاي صار اشهر هي قايمه بلبيت وانتي هم علميها على الطبخ تساعدج والمصرف علية
مو عاقله ام سندس : تفوو على البطن النگلتج ولج تعيفين بنيات حديثات علمود الفلوس

سندس : يمه كافي رحمه لأبويه اريد اعيش اريد اشوف نفسي سنين دفنتها ويه واحد فكر واي شى بينا ماكو
انوار : خاله هي ممسويه شى حرام وهذا حقها والرجال شاريها
ام سندس : هذا كوا. وساقط عبن حط عينه على مره متزوجه وعدها جهال وبت احديثه بطولها
انوار : ليش اليتزوج عندج يصير ساقط هو غير بلحلال وهي اطلكت يعني هسه ماكو شى يمنع حلال الله
ام سندس : تحلل بكيفها وتحرم بكيفها بت ااااخ اسب ابوج جان رجال خير
انوار : خلي اروح هواي غلطتي علية واني شكو بتج وتريد تتزوج فوك مااساعدها
ام سندس : تساعديها تهجول عيالها وتهدم بيتها روحي لا بارك الله بيج وكون حوبت البنيات بيج وبسندس

سندس : يبووووو علية هم عرضتيلي يعني فوك متفرحين اليه هو هسه اني شطلبت منج بس ردت تبقين البنات هنا
ام سندس : عايفه اربع بنات وفوكاهن مرضه ومحركات وهنه حال الضيم حالهن وانتي راكضتلي على نفسج لو يرد الوكت اله اگتلج بطني ولي من خلقتي لا ابيس بيج وانعل شيب اهل اهلج على هاي دكتج الدونيه
سندس : شوفي يمه
ام سندس : وغمه كون
سندس : شسوين سوي واني البيت لو ما محروك جان كعدتهن بيه ولا عياطج وصياحج هسه من الاخير بس اخلص العده اتزوج
ام سندس : كون خلصت روحج وادفنج بلنجف ولا يجي هذا اليوم اشوفن البنيات وحيدهن وتاركتهن ينهشون بلحمهن اااخ لو بحيلي الاولي اله ادفنج بمجانج

سندس : يمه حجيج لا يقدم ولا يأخر اخذت الحكم وانتهى
ام سندس : انه اريدن اعرف من شوكت قدمتي
سندس : صار مده طويله وبين روح وتعال ومحاميه حصلت الطلاك
ام سندس : احجي الصدك من شوكت تعرفي هذا مشعول الصفحه
سندس : شعرف يمه شنو قصدج
ام سندس : تعرفين قصدي زين شنهي ماعودتي يدخل رجلج الحبس وتطلكتي وتردين تتزوجين مصار سنه والزلمه من داش الحبس شوكت شافج الثاني ويريد يتزوجج
سندس : من داومت تعرفت علية بلشغل هو شريك ابو الشغل
ام سندس : من سوده بوجهه الاغم اكيد سحورتجن دوهنت الزلمه والا شاف منج
انوار : ليش خاله شبيهه سندس والله بعد مصار عدها فلوس وتروح صالونات وترتب نفسها شكلها كولش حلوو صار
ام سندس : اسكتي كله منج شوفي وين دفنتي بيا مكبره وجبتن الزلمه على وجهه
ولو يجوز يطلع مثلج خايس وماعنده ذره كرامه وناموس

انوار : اني رايحه سندس ومن تقنعين امج تعاليلي
سندس : روحي الله وياج
ام سندس : روحي صديجه الشوم روحي عساج لا وصلتي
سندس : يمه كافي عيب شون تحجين هيج عليها نسيتي هيه صديقتي
ام سندس : كومي من وجهي لا وروح العزاز ادچ السجينه بطنج انه كبرت وتعبت وردتج لكبرتي لو مربيتلي چلب احسنلي عبن اوفى ويخاف على بزره

سندس : ليش محسستني شامرتهن بلشارع هنه بيتج عايفتهن يم امي وكتلج كل شهر المصرف ليمج يوصل ومااقصر وياهن اني اصلاً ماعندي بيت يلفيني وتاليتي يمج اصلاً اني خففت الحمل عليج وراح اروح اني وحسام وبس البنات يمج ومصرفكم جاري
ام سندس : يلمصرف ويلمصرف ااااخ الفلوس غمت عينج وسودت گلبج وماتشوفين سوايتج وكسرتج للبنات انه اعرفن لو احجي للصبح مايفيد بيج عبن ساسج نعل ودومج عينج ضيگه علعلتي الزلمه وراح تعلعليني روحي ولي وين ماترحين لا انه امج ولا اعرفج وبنياتج يضلن هنا لان اخافن عليهن مايستاهلن ينشمرن بلشارع ولخاطر رجلج عبن ذهب صافي مايوم سمعت منه چلمه شينه گله صار عمه
لجل عيونه بنياته يضلن هنا وانتي اليوم الي تولين بيه منا مااشوفن وجهج ولا توكفيلي على تابوت سمعتيني

سليل : ركضت للغرفه ابجي مردت بيبي تشوفني يعني شنو راح تعوفنا زين شلون تعوفنا ومنو النا وشون نعيش هنا وحدنا ليش ماما شمسويلج احنا والله مستعده ابطل وما اداوم مدرسه واكابل خواتي واكعد المهم تبقى ويانه
بقيت حابسه روحي ومطلعت لحد ما اجو البنات من الدوام
ريم : شبيج ثلل تبجين
سليل : مسحت دموعي وكعدت عدل وكتلها شلونه دوامج اليوم مسألتج
ريم : محد يقبل يلعب ويايه ثلل وكاعده بلفرصه وحدي
سليل : وجنات وينها
ريم : غايبه شوكت تروح هاي النقاط كل شويه وحده تسألني هذا شنو
سليل : وشتكولين
ريم : اكول الها نجوم من السما وكعت علية مثل مكلي عمو سجاد بس يضحكون عليه ويكولون هذا طكع وبكع ويخافون يلزموني هي مو نجوم لو عمو كذب علية
سليل : حضنتها حيل مكافي الهم والقهر الي بگلبي هلمره ريم وكسرتها يعني ياماما كل الي كعد نعيشه مهمج تردين تعوفينا وترحين
ريم : لتبجين ثلل كال عمو سجاد يروح
سليل : اي حبيبتي يروح

اخذتهم رغم ماما موجوده بس مو بحالنا غسلت الهم وتغدوا اني ما اكلت اصلاً مااكدر ابلع اللكمه واتذكر على لحظه تعوفنا وروح دخلت للغرفه وره مغسلت مواعين الغدا وماما اصلاً راح للمستشفى على غزل زين تتذكر عدها بنيه بعدها كعد تموت طبن البنات للغرفه علية

رشا .. ثلل اريد تقريني املاء حبابه
سليل : تعالي وانتي ريمو شعندج واجبات
ريم : عندي اسلاميه
سليل : جيبي احفظج الايه
ريم : حفظتها
سليل : شوكت
ريم : من رجعت للمدرسه خليت حسين يقريها اليه وكتله اذا ما احفظها اضربك جلاق
سليل : ولج عيب بنيه تضرب جلاق وهو شبيه الاثول يقبلج ميصير ريم انتي بنيه
ريم : يسميني ساسوكي وضربته وكتله تره انعجر راسك مثل جانبو الجبار اذا سميتني هيج وكتله حفظني الايه وكوه يقراها جريت شعره وحفظها ويايه
سليل : غير هو خامس وانتي ثالث
ريم : كسولي
سليل : فدوة صيري عاقله ولتسوين مشاكل
ريم : اريد قمردين
سليل : رجعنا مو سنونج راحت من الحلويات
ريم : ما اريد باجر اضرب حسين ويجيبلي
سليل : لا اجيبلج بس جوزي منه ليروح يصير بيه شى وهلمره بيبي انعام تذبحنا بيدها
ريم : نعااال ال ال ال
سليل : اااخ منج عيب وكعدي حضري جنطتج باجر
ريم : اروح اضوج حسام واجي
سليل : تعالي جريتها من ايدها اكعدي هنا مطلعين
ريم : اهووو ثلل والله ماعندي واجبات
سليل : ميخالف اكعدي يمي يله
ريم : كعدت

اباوع عليها تلوب كل شويه لعبت بشغله متصبر ابد اخر شى طلعت دفتر الرسم وترسم بيه درت وجهي عنها وكعدت اقري رشا شويه وصاحت خلصت وتضحك
شخلصتي
شوفي ريمي عيني
اباوع ولج هاي شنو منو ذوله ٣ اشخاص واحد خشمه اعوج وعيونه جقله واحد جنه شيطان واخر شخصيه حتى شوارب حاطه اله ورسم يلعب النفس وكل واحد كاتبه فوك راسه
ذوله عمو علي هذا ابو خشم اييع شكبره خشمه وهذا منو ركزت على الاسم حسام
ليش ولج مو اخوج
ريم : كسر قراصتي ام البطه الحقير
وهاي خرب ولج هم كاتبه فوكاها نعال عرفتها بسرعه بيبي انعام
زين ليش حاطتلها شوارب
ريم : هي عدها شوارب اني شعليه ومن تعيط تشبهه سعدون الوصخ
سليل : وين شفتيها بس لا رحتي لبيتهم
ريم : لا لا بس شفتها اجت للمدرسه وختلت حتى لتضربني
سليل :اياج توصلين هناك اكص اذانج كامت تشخبط على وجهه انعام وتغني
ريم : شده ياورد شده من هيه الورد شده
ريم الورد شده
رشا .. يمعوده صوتج خلي نقرا يله ثلل
سليل : يله وكعدت اقريها بس بالي يم الايام الراح تجي وگلبي يوجعني كل مااتذكر ماما راح تعوفنا واخاف اروح احجي وياها لان تعيط ومتقبل

اسبوع والبيت كله متوتر لحد ماسمعت خبر رد الامل بيه سمعت غزل صحت وبدت تستجيب للعلاج بيومها من الفرح نسيت كولشي اذاني صح بعدنا منعرف شكد محروكه بس اقلها اختي عاشت وراح ترجع لحضني
اني مداومت لان حالي مو مال دوام اصلاً والبيت كله مشحون والعصر اجت ماما كالت لحد يطلع
كتلها ليش عاطت كلت لحد يطلع وبس
شويه وسمعت صوت رجال يكول لبيبي اني رايدها بس هي ما مستعد اخذها ويه بناتها جمدت عرفت هذا الي راح يتزوج امي
بجيت بجي انهاريت حتى كمت الطم على مكان الحرك يعني راح تعوفنا صدك ينطيها گلبها وتعوفنا
ساعتين وطبت كعدت يمي وجان تباوع علية وتكول انتي كبرتي ولازم تعرفين كولشي اني راح اتزوج اخذ حسام اخوج واتزوج مااكدر اخذكم كلكم وانتم تبقون هنا يم امي ولتخافون كل اسبوع اجيكم يوم اشوفكم مااعوفكم امي لتخافون ومااقصر وياكم حبيبتي
باوعت عليها وكتلها اني ماعندي ام

يتبع ..