رواية ابي والغزلان الفصل الخامس والخمسون 55 - بقلم ريام هادي

ابي والغزلان الجزء الثاني
للكاتبة Reem
البارت السادس

بلدول لو غيمت لمن يطيح المطر تلكه الورد منثور
بس العراق اختلف غيمتنا أف 16 ضلت علينا تدور
ومن مطرت على الوطن عنقودي جان المطر بس لاح كاع الوطن خضرت كاع كبور
معقوله انسى الجرح مو يوم 4/9 صار الوطن تنور
واحترك نص الشعب واتحدى تلكه شبر بلوطن مامحفور
أكثر شى بأرض الوطن جان احتياط النفط
هسه أكثر من النفط عدنا احتياط گبور 💔

نهر : صفنت وتذكرت طالب ونضراته ومحاولته يتقرب مني لو حنيته وهدوئه واخلاقه بس شلون اني اتزوج طالب ؟؟
حجي طه : اعوفج تفكرين واذا اتحبين نأجل روحتنا لبغداد
نهر : ميحتاج تأجل اي شى اني مموافقه طه شلون اتزوج بعد هذا العمر
حجي طه : ياعمر شبيج من كل عقلج انتي عمرج ٣٨ سنه يعني مو ٦٠ حتى تتزوجين وحتى لو ٦٠ هم حقج ممسويه شى حرام ليش ادفنين باقي ايامج ويانه ومتعيشين مثل باقي البنات عندج بيت ورجال ويمكن الله يكتبلج طفل شمدريج مو بعيده على رب العالمين
نهر : ادفن نفسي وياكم بله هذا حجي انت تعرف الله يحبني لان خلاني ويه بناتك انت متعرف شنو الكم بقلبي طه انتم روحي واذا على العيشه اني عايشه احسن عيشه وياك ويه بناتي حتى كلمة ماما ما محرومه منها يكولوها اليه البنات بعد كل هذا العمر اعوفك واروح مستحيل عيشتي يمكم تسوه الف رجال شحصلت من الزواج غير المرار وشلعان الگلب والخيانه فدوه اروحلك اسكت

حجي طه : مو كل اصابيعج سوه واذا علينه احنا موجودين قابل نعوفج وحدج
نهر : تعبت من وجودي مو وتريد تخلص مني حتى تقل المسؤوليه عليك دنجت مقهوره والدمعه كوه لازمتها
حجي طه : اسألج سؤال اكو واحد يتعب من امه من روحه من اخته من بنته ولج انتي اعز من بناتي انتي اهلي والبقالي من ريحه ابويه الله يرحمه من كل عقلج اتعب واريد اتخلص منج انتي حيلي نهر الراح ويه ضيم السنين لو ما انتي جان بناتي ضاعن اني لو انطي روحي جوه رجلج قليل بحقج السويتي امهن ماسوته شتحجين مرات اصفن شلون اجازيج وارجع واكول شجازي منها حتى روحي قليله عليها متسوه ليله سهرتها وتعبت بيها ويه البنات

نهر :جرني لحضنه وشهكت ابجي اعرف بيه شكد يحبني ويريد مصلحتي
حجي طه : اسكتي ياامي انتي هو اكو اغلى منج بس ردتج ترتاحين وتفرحين وروح ابويه هذا قصدي
نهر : وخرت من حضنه ومسحت دموعي واحجي والشهكه بصدري
اني مااريد اتزوج وبالاخص طالب
حجي طه : بله زواج ومتزوجين بكيفج بس ليش بالاخص طالب
نهر : متزوج وعنده اطفال شلون ادخل بحياته
حجي طه : بس الله محلله الزواج مغلطان
نهر : مكلت غلطان بس ممحتاج شو مره وعنده وزوجته حلوه وبنت عمه ومخلفه اله يعني ماله داعي يتزوج اني مااعيش غيري الي عشته شايف شنو شعور الوحده الي يجيها خبر ويكولون الها رجلج تزوج عليج والله لو يكطعون من لحمها بموس هم الالم مالته ارحم من هذا الخبر

مااكدر طه رجع الخبر اله وكول رافضه ومتتزوج والله يوفقه بحياته طالب خوش طالب بس مو من نصيبي
حجي طه : براحتج مااضغط عليج ولو اكول تفكرين شويه
نهر : لا ماافكر ولا اريد افكر وخلي اكوم ويه البنات اكمل لم غراضنا
طلع طه واني رجعت اكمل شغلي وصافنه وجان تكولي سليل
سليل : ليش موافقتي او على الاقل فكرتي
نهر : سمعتي كولشي
سليل : اي صوتكم جان عالي
نهر : اذا سمعتي المن تسألين
سليل : ياريتج فكررتي
نهر : مااريد افكر اصلاً
سليل : لعد ليش صافنه
نهر: افكر اشاف بيه واحد مثل طالب وهو يكدر يتزوج اغاتي واحسن مني واصغر مني واحلى شنو البيه جذب انتباهه شو اني قطار الزمن مر عليه داسني ومشه وما بقى على حالي حال
سليل : يافدوه غير تخبلين هو اكو منج اثنين ياماما
نهر : لان تحبيني وربيتج هيج تشوفين بس الرجال نظرته تختلف عنده قياسات وامور يريدها بلمره والحمدلله ولا شغله عندي

سليل : بلعكس انتي احسن من الف وحده وياريتج فكرتي
نهر : متزوج تعرفين شنو متزوج هاي شبيكم لو اريد جان بقيت ويه سامي شنو فرقه عنه
سليل : لا طالب احسن من عمو سامي بالف مره
نهر : من الاخير وبله وجع راس رفضت
اجي هسه افكر اخذ رجال من مرته وادخل بمصايب وشغلات اني في غنى عنها هو الگلب شباقي بيه حتى اوكعه بمشاكل جديده اشتغلي ماما ولدوخين راسج ورانا هواي شغلات
سليل : مااشي رايحه اكمل

شويه واجه بابا كال اجرت بيت بلكوت
نهر : مو كلت نروح لبغداد
حجي طه : وضع بغداد موزين والحرب دتصير اقوى واخاف نروح ويصير شى وهناك حتى بيت ماعدنه رغم سجاد توسل بس حتى نبقى يمه بس تدرين شقته صغيره واحنا هوايه واحس الرجوع مو بمصلحتنا وخاصه سندس لا اجت ولا وصلت ولا حتى سألت عن بناتها
نهر : هذا الشى هم فاجأني كلت هسه من الصبح نلكاها بوجهنه بس صار كم يوم وهي ولا اجت
حجي طه : خليها تولي الاخبار موزينه نهر والوضع مبين ديصير اتعس ومنعرف شائعات لو صدك بس اهم شى هسه أمن عليكم رحت اني وسجاد لكينا بيت صغير نظيف راح اخذج هسه انتي وسليل تنظفوه حتى نروح نبات بيه
نهر : بس كولشي ماعدنه حتى فراش
حجي طه : تدبر ان شاء الله تدبر بس اهم شى ماابقيكم هنا
نهر : هذا هو وياك احنا

سليل : لبست عبايه وطلعت ويه ماما نهر وبابا وصيت البنات ميتحركون من مكانهم وخاصه ريم
وصلنا للبيت قريب على بيت خوال بابا لكيت سجاد هناك
سلمنا وهو سلم ودار وجهه عفته براحته جان البيت طابقين غرفه فوك وحده جوه وهول ومطبخ وحمام صغير بس مرتب صعدت فوك ردت ابدي من السطح هستوني افتح باب البيتونه جان تندفع وتنسد
سجاد : وين
سليل : انظف السطح
سجاد : ميحتاج
سليل : شلون ميحتاج متشوفه شلون وصخ
سجاد : اني انظفه انتي ابدي من الغرفه وانزلي
سليل : زين اساعدك
سجاد : احد گلج اني مسكط ماعندي ايد ورجل وتساعديني
سليل : ماشي لتتعصب تحركت خطوه وجر ايدي من المفصل وكاال بهدوء بس نبره تهديد بيها
سجاد : السطح ممنوع اطلعين اله هنا مو بغداد
سليل : شنو الفرق ذاك سطح وهذا سطح
سجاد : هنا اكو شباب هوايه واكو مطيرجيه وراكم وبيتهم يشرف على بيتكم
سليل : يعني انحرم منه مااصعد

سجاد : لتجادلين تنسين السطح تماماً واياج اسمع بيوم صاعده بس نهر تشر ملابس وتنزل ولو المفروض حتى هي متصعد بس شنسوي
سليل : تقربت منه وحطيت عيني بعينه وكتله
متلاحظ غيرتك زايده
سليل : هد ايدي مباشره ودار وجهه يريد يفتح الباب
لزمته من جتفه وكتله
شتريد سجاد مني مكافي
سجاد : شبيج احد حاجي وياج
سليل : اندار عليه واحجي والله عقلي راح يوكف من وراك ساعه اكول ميحبني وادري بيك تحبني وساعه اكول ميريدني واكو شغلات تسويها تبين عبالك روحك بيه حرت بأي طريقه اجي وياك وهسه معاقبني ومتباوع بوجهي من وره سيف جان يلزم فچي (الفك) حييل وضغط عليه احس انمرد حتى حلكي ويحجي ويكز على سنوني
سجاد : اياج اسمع اسمه بحلكج واياج تحجين بيوم وياه
دفعت ايده على كيفي خفت منه وكتله شنو معناه هسه هذا تصرفك انت مو متريدني ليش تغار

سجاد : ومنو كال اغار
سليل : لا كعد تلعب ويايه حيه ودرج ساعه تريدني وساعه لا
سجاد : هسه جايه تشتغلين لو تسولفين
سليل : جريت نفس وكتله ارسي على بر لو تريدني لو لا
سجاد : روحي كملي شغلج
صاحت ماما سليل وينج ونزلت عليها وعفته
نهر : وين جنتي
سليل : فوك على اساس اغسل السطح وسجاد مقبل وراح انظف الغرفه
نهر : لتبقين وحدج ويااه هوايه
سليل : استغربت كلامه ليش ماما
نهر : ماما ميصير
سليل : اني سنه كامله بقيت وحدي ويااه
نهر : ذاك وحد جنتي زوجته حتى لو صار شى بينكم تبقين زوجته هسه محرمه عليه ميصير تبقين وحدج ويااه وقت طويل
سليل : وقابل هو يسوي شى موزين

نهر : الي يحب وحبيبه يمه ميشوف يابنتي العقل يغيب ويصير مكانه الگلب وهذا الي بلصدر (الگلب) يلعب لعب بلواحد
سليل : يلعب بكل الناس اله سجاد تكول حجاره ومحطوط بصدره
نهر : خوفج من الحجاره اذا تحركت مسامعه المثل الي يكول الحجاره المتعجبك تفشغك دير بالج من ردت فعله سجاد ماينحزر تصرفه

سليل : تعبت هوايه مااعرف شيريد
نهر : انتي بس عوفي وهو راح يقرر ويكول الج
سليل : يخلص عمري وابن خالج ميقرر
نهر : ولج اثگلي شجاج او تالي هاي العاقله عود
سليل : مو ابن خالج يخلي بلوحده عقل زين ومشامره نفسي من السطح من وراه يوميه براي
نهر : الله يهدي يابنتي يله نكمل حتى نرجع من وكت
سليل : كمت اشتغل واحاول اتناسه وجوده
صعدت للغرفه وبديت اكنس وراها امسح بيها خليت الراديو القيثاره قريب مني صارت روحي بيه لان اقلها اسمع شيصير ميصير اكو اذاعات مره اطلع اغنيه ومره خبر عن الحرب عادي تعودنا وخاصه اذاعه سوا واذاعات جديده هسه طلعت بلحرب وكامت تطلع بلراديو
وطلعت اغنيه كاظم الحب المستحيل عليت الصوت وكعدت بلكاع اتذكرت اول مره سمعتها من جنت وياه بلسياره قبل كم سنه وجان يغني ويااه ومفهمت حيل معناها بديت افصل واركز بكل كلمة اغنيه حسيتها تأذي شلون واحد يحب وحده وميكدر يوصل الها
وخاصه من كال

أحبك جداً وأعرف أني أعيش بمنفى وأنت بمنفى
وبيني وبينك ريح وغيم وبرق ورعد وثلج ونار
وأعرف أن الوصول لعينيك وهم
وأعرف أن الوصول إليك انتحار
حسيت صوت بره فتحت الباب مال الغرفه لكيت سجاد كاعد گبال الباب وفاتح باب السطح لان مقابيل الغرفه ويدخن ومرجع راسه على الحايط
سليل : انصي اخاف ضوجك
سجاد : بلعكس انطي صوت
سليل : اعرف بيك تحبها لهاي الاغنيه
سجاد : راح تخلص ومسامع شى منها من وراج
سليل : بقيت الباب مفتوح وكعدت اكمل شغل وهو يسمع
قررت وكلت اتركه براحته اريد اشوف لوين يريد يوصل

رجعنا ولمينا غراضنا وبيومها طالب وسيف توسلو بابا يبقى وهو رفض ورحنا للبيت بعدها بنص ساعه طبكت سياره بلباب ونزل اشكال افراش دواشك وبطانيات وفرش مال كاع وحصيره وطباخ صغيره وجم شغله مال مطبخ طلع طالب جايبهم شكد حاول بابا يرفض مقبل حتى سجاد حاول ينطي فلوسهن واشتغل صياح طالب واعتبرها اهانه اله موقف طالب كولش حلو ورجولي رغم رفض ماما نهر اله بقى كما هو ولا تغير بلتعامل
اخذنا الغراض وره ساعه ونص هذا يحلف وذاك يحلف لحد ما دخلوهن وفرشنا البيت وكعدنا
جان يوم متعب نمنا كلنا بلغرفه الجوه لان ضرب والكهرباء طافيه ونخاف نبقى فوك وبابا وسجاد بلهول
يمكن صار مده طويله منايمين هيج بهدوء

شبهه غافيه واسمع كلام البنات
رشا .. هاا شبيج ليش متنامين شو صافنه على المخده
ريم : هاي المخده مكتوب عليها احلام سعيده ومايوم حلمت حلم سعيد كله لو جلب يركض ورايه لو بيبي انعال الله لايذكرها بخير تركض ورايه بلعوده لو بلصونده اليابسه الي وره البيت تتذكريها لو كعد اجر سحليه من شعره وتالي يدفعني واكع بلكاع واكعد ابجي ولا حلم بيه خير
على شنو كاتبين بعد احلام سعيده
رشا .. هههههه لعد شيكتبون
ريم : يكتبون نام وانخمد جتك الواويه نام نامت عليك طابوكه نمت لا كمت احذر امامك حلم طايح حظه هيج شى المهم واحد يستعد للحرب الراح تصير وره مينام

رشا .. هههههه صار راح اكتب على المخده مالتج ريم انخمدي ولتلغين زايد
ريم : خوش هيج صارت كلامي صار لغوه امشي مااحبج بعد
رشا .. متكدرين تموتين عليه
ريم : اكولج رشاوي ليش عمو سجاد هيج شالع گلبها لسليل
رشا .. وانتي شعليج هاي سوالف عيب ندخل بيها
ريم : هااا صارت عيب وذاك اليوم لازمه سليل موعتي اذنها بلحجي مكلتي عيب من حجت ريم الحبابه الفقيره صار عيب
رشا .. ولج مصدكه انتي روحج فقيره
ريم : وحبابه رجاءاً وطيبه وهادئه الله راح ابجي من الصفات الحلوه بيه

رشا .. نامي لج احسن مااخلي حلمج يصير كتل ومعارك وصدك تصير مخده للكوابيس
ريم : نمت عفيه بيت محد يكدر ياخذ راحته بيه اكولج رشاوي
رشا .. وجع شكوو
ريم : هم يجي يوم واطيب
رشا .. رفعت راسي وباوعت عليها استغربت كلامها شطيبين شبيج انتي قابل
ريم : مابيه بس مطكعه والكل يخاف مني لا ينعدي
رشا .. مالج دخل بلناس وثاني شى هو مو مرض ويعدي مو وياج احنا صار سنين منعدينا
ريم : الناس هيج تشوفني ياهو الي يباوع عليه احسه يخاف وتگلب معدته مني رغم والله اني نظيفه ومابيه شى ومااعدي بس همه هيج يشوفوني عبالك جلب اجرب ودمعت عيووني ولزمتني الشهكه
رشا .. تعاالي بحضني حضنت ريم واعرف شكد متأذايه ليش اني دوم وياها حتى لتحس روحها وحدها بلدنيا اششش لتبجين مابيج شى والله تخبلين
ريم : شخبل والكل تلعب نفسهم مني بس شوفي والله صغار وقليلات
رشا .. مالج دخل بأحد المهم احنه نمووت عليج ولج ريمو ام المصايب تبجي وتتحسس مدااصدك
ريم : خو انتي تكيفين ابجي
رشا .. لا ريم الدمعه منج او من خواتي والله تحفر بگلبي وخاصه انتي لان اعرفج نادراً متبجين
ريم : كافي علينا وحده ٢٤ ساعه تبجي
رشا .. هههه كفختها براحه ايدي وراسها بحضني اشش لتسمعج
ريم : والله اختج الجبيره كوه جايبه الضيم لگلبها
رشا .. رجعنا كتلك مالج دخل بهيج شغلات

ريم : بله شو وخري خلي انخمد تعال يامخدتي الغير سعيده هاي العائله راح تخبلني وتاليتي ابيع جكاير بلترف لايت
رشا .. الفلوس بلنص مو بس بلمصايب تشاركيني
ريم : حتى هنا لازم تقاسميني اخاف بيوم اتزوج دير بالج تحطين عينج على رجلي هاي اذا تزوجت
رشا .. هاي اذا ماسويتي بيه مقلب وجلطتي قبل الزواج وهااا اسكتي عيب هاي السوالف
ريم : والله موتوني بيت ابو العيب كلها تصيح عيب وميصير وهسه انتي صرتي مثلهم خلي انام

مرت الايام ودخلنا شهر الرابع اليوم الثامن من شهر الرابع بدت الاخبار تصير اصعب ناس تكول احنا فايزين بلحرب وناس تكول كذب خسرانيين وراح يدخلون الامريكان
وقرر سجاد يرجع لبغداد علمود محله وشقته كم يوم ويرجع للكوت واني لزمت قلبي
حجي طه : اجي وياك
سجاد : وين جاي وعايف البنات وحدهن
حجي طه : هي حسبه نهار ونرجع ونهر موجوده وياهن
سجاد : مينعافن وحدهن طه واني كتلك ابقى بغداد لو ارجع للكوت لو لا حسب
الوضع
حجي طه : اني اريد اروح هم وياك اشوف سالفه البيت
سجاد : هو منو يشتري هسه بهذه الظروف اله بس المخبل الناس هي تريد تضم فلوس اخاف يصير شى مو يشترون
حجي طه : شسوي من قلة حيلتي اكول بلكت الله يهدي واحد ويشتري
سليل : بقيت كاعده اباوع عليه من بعيد واشوف شلون بابا متمسك بلروحه وياه لحد مقنعه الخوف تملكني هم علموده وهم لان بابا وياه يعني القلق مضاعف

مصباح يوم 4/9 /2003 من الخمسه الفجر طلعو كعدت ويه ماما ولبست ربطتي وكوه حاصره دمعتي
حجي طه : مااوصيكم باجر ان شاء الله نرجع كولشي عدكم قفلو الباب عليكم
سليل : بوست بابا تقربت منه وكتله
ترجع بلسلامه صفن بوجهي وكال بهدوء واستغل بابا يسولف ويه ماما نهر ومكعد يسمعون
سجاد : طلعه ماكو سليل
سليل : زهكت عبالي يكول راح اشتاقلج كتله وين موليه للكبور
جان يتقرب ويهمس
سجاد : اسم الله عليج لتحجين هيج
سليل : اني جاوبته بهمس لو اني مخبله واتخيل شغلات لو انت تتقصد تخبلني
ابتسم بحنان وكال لسانج طولان ام دميعه
سليل : والله الي يعاشرك يطلع اله گلب بصف گلبه

جر نفس بهدوء وباوع على جهه بابا اخاف يسمع وشافهم بعدهم يسولفون وتقرب من اذني وكال لو عشر گلوب عندج مااقبل احد يدخل بيهم غيري
سليل : بس لو اعرف شتفكر وشتريد
سجاد : من اعرف اكولج عود بوقتها دير بالج على نفسج
سليل : كولها يانفسي بس مره نطقتها وبعد معدتها
سجاد : سليل طلعه ماكو تبقين جوه وساده الباب عليج وعلى خواتج
سليل : اووووف صار عندك اوامر ثانيه
سجاد : حتى من تضوجين شكلج حلو
سليل : دير بالك على روحك وعلى بابا ارجعولنا من وكت لتتأخرون
سجاد : الله كريم

راحو وگلبي نار عليهم بقينا كاعدين اني وماما مااخذت عينا النوم وره كم ساعه ذاعو خبر سقوط بغداد محد صدك شنو يعني سقوط بغداد

حجي طه : وصلنا لبغداد تأخرنا ازدحامات وضع موزين بس من دخلنا جان نشوف على حدودها دبابات امريكيه گلبي انخمش شصاير
سجاد : ماادري زين ذوله شدخلهم ولك طه شصاير
حجي طه : نزلنا نمشي لان كالو الطرق انسدت نعبر مسافه يله نلكه طريق وكوه لكينا تكسي تاخذنا اول مصعدنا سألنا
سايق التكسي : غير الامريكان دخلو وسقط صدام هاي وين انتم
حجي طه : لا اكيد اشاعات ماكو هيج شى
سايق التكسي : خويه اكوله سلمها وفلت اني مااكدر ادخل هوايه الشوارع تخوف وناس تضرب ناس عالكه اذبكم على الشارع وانتم اوصلو

حجي طه : نزلنا قبل منطقه من منطقتنا اباوع الحرك وناس تركض الي شايل تلفزيون والي شايل حاسبه والي حاط كرسي على راسه
سجاد : كعد تشوف شديصير هاي شبيهه العالم تخبلت ولك طه يمكن صدك صدام وكع
حجي طه : شلون يوكع زين واحنا والعراق وهاي الناس شنو مصيرها خلصنا عمرنا نحارب حتى محد يدخل النا ويحتلنا وهسه بكل بساطه يدخلون بيها
سجاد : كعد تشوف شديصير شوف شوف شلون ضربو الاورزدي
حجي طه : العالم تخبلت غير حرام كعد يبوكون
سجاد : الناس من ضيمها وجوعها خلصتها بس حروب ومعودت لكت شى تاخذه شوف شوف ذاك شايل كونيه على ظهره وهذا شايل بنگه (مروحه)

حجي طه : اباوع الناس تتمالخ على الغراض اخذو الغراض ليش الحرك والتكسير
سجاد : لازم نرجع للكوت اخاف يصير شى هناك
حجي طه : اي خلي نرجع كمنا اندور نريد احد يودينا ماكو بيش مجان محد يقبل
سجاد : كتلك ابقى بلكوت عاندت
حجي طه : ان شاء الله ماعليهن شى نهر سباعيه وصيتها
سجاد : شبيك طه امشي بس فاتح عيونك
حجي طه : دشوف الي اشوفه فتنا من يم مدرسه واباوع اهل المنطقه ركضو عليها واخذو شكو سلاح موجود بيها لان جانت المدارس بغداد كلها صارت مواقع بديله للجيش
الجيش وين السلاح مطشر بلشارع سياراتهم مفتحه وملابسهم مطشره كلمن يمشي بلشارع يذب البدله ويلبس ملابسه العاديه ويدير وجهه ويروح سحبت وحده من البدلات ونزلت دمعتي

سجاد : شصار طه
حجي طه : شيصير اكثر من الصار تدري شكد انطينا شهداء بلمعارك حتى لا بيوم هاي البدله تنداس وهسه انداست مكبره النجف انترست شهداء عدا كياعين المعارك الي كمنا ندفن بلمئات سوه حتى لتاكلهم الحيوانات كله في سبيل ميصير هيج شى ويدخلون علينه ويحتلونه معقوله صدام راح معقوله انتهى حكمه
سجاد : والله لهسه ممصدك حاس هسه راح يطلع ويذبح كل هاي الناس لان خانوه
حجي طه : امشي ويايه
سجاد : وين
حجي طه : نروح للمنطقه مالتنا
سجاد : ورجعتنا للكوت
حجي طه : بلكت لليل نلكه سيارات
وصلنا للمنطقه الي جان اغلبها فارغه وذابين عنقودي بيها مأذيه كم بيت
سجاد : هسه اخوج وعمتي وين
حجي طه : ماادري
تعال نشوفهم وصلنا للبيت لكيناه مقفول من بره بقفل جبير

سجاد : مبين مرت ابوك طفرت والهوا وراها
حجي طه : اكيد علي وياها
سجاد : اكيد هو جبان يخاف من خياله
شويه واشوف سامي گبالي تفاجأت بيه وجيت بحضني يبجي
سامي : الْحٍمَدٍ للـّہ على سلامتك طه والله ممصدك شفتك
سجاد : بعد وكت جان انتظرت فد جم سنه وسلم عليه
سامي : هم انت
سجاد : ليش عندك اعتراض
حجي طه : كاافي سجاد
سجاد : اني راح اتمشى اشرب جكاره احسن مااشرب من دم فد واحد

سامي : شلونك طه والله من شفتك من بعيد كلت مستحيل هو
حجي طه : ليش مستحيل توقعت اموت
سامي : لا مو هيج قصدي بس دورت عليك وره مطلعت من السجن مشفتك
حجي طه : ادور عليه بيا وجهه
سامي :تبقى صديقي طه واخويه والي صار غصب عني
تتذكر من جبتها بيدي وزوجتها الك شكتلك
هاي عيوني وروحي وامنتها يمك وانت كتلي
ان شاء الله كد الامانه شسويت بأمانتي سامي : اسمعي طه والله اني لهسه احبها واريدها وتوسلت حتى ارجعها ومقبلت

لزمته من هدومه ولك شسويت بأمانتي سامي خليتها تبجي دم زوعتها العافيه دمرت شبابها هاي تاليها تضحي لخاطرك وتعوف اهلها واني اوكف بوجهه اخويه وردت اكتله علمود بس ازوجها الك وجبتها بيدي ولك محد مسويها يجيب اخته لصاحبه ويكوله هاك اتزوجها تاليها تطعن بيها وتخليها شماته لليسوه والمايسوه وماراعيت وضعها وضعي
سامي :غير متخلف وعلمود الجهال وكتلها ابقي محد يمج

حجي طه : انعل ابوك لابو الجهال لابو كل لحظه خليت اختي بيها عندك وضربته وكع بلكاع واجه سجاد يركض
سجاد : هاها ها طه
حجي طه : تشوف هذا النكس اعتبرته اخويه وشلته على راسي وزوجته بنيه يحلم يشوف طارف ثوبها جبتها من الخير للفكر وكلت يسعدها وتالي يكسرها
سامي : من حقي اتزوج ويصير عندي جهال لو انت بمكاني تسوي مثلك
حجي طه : ماكلت مو من حقك بس انت طعنت بيها تزوجت ومكتلها عفت امها تجي تتشمت بيها وتبلغها وفوكاها تخلي مرتك تجي تهينها وتعيرها وانت مثل المره ساكت لو هسه اشرب من دمك گلبي ميبرد مكافي الضيم الي عيشتها بيه ومحسسها مسوي فضل براسها وامك ضوكتها المر سوتها خدامه الها وانت كاعد تتفرج واخذوك مثل الطلي وزوجوك جان راعيت حالتها تعال اكعد وياها واخذ رايها على الاقل احترم حبها الك وتضحيتها تعرف بنهر شكد طيبه وجانت رايدتلك الخير والمصيبه هي مابيها شى وماصبرت عليها
سامي : لو مابيها مجان حبلت مرتي من اول شهر هي عاقر

حجي طه : انجب ناقص تسواك وتسوه مرتك ودفرته برجلي وهو بلكاع هذا امر الله قابل هو بيدها قابل هي متريد تصير ام بس هسه عرفت حكمته مراد يصير عدها جهال من واحد نذل مثلك
سجاد : اكولك طه هو صدام وسقط والوضع مبين خربان وهسه العالم صايره كلمن الزود اله لا مراكز ولا شرطه ولا شعبه الخامسه
سامي : شتريد تسوي سجاد والله اندمك اذا سويت شى
سجاد : لتخاف شوي ابرد گلبي وگلب هذا المسكين الكسرت اخته
شتكول عليها
حجي طه : صفنت اي عليها ولزمنه سامي شبعنا گتل وين ميوجعه ويعيط مثل النسوان ولا واحد طلع اصلاً نص المنطقه فارغه حتى اهله مطلعو كسرناه تكسر كل ضربه احسها تبرد نار نهر ولو كسرتها متنجبر بضربته بس على الاقل مااحس بروحي ماخذت حقها ولو شى بسيط
تفلت عليه وكتله لتراويني وجهك بيوم مره الثانيه مااضمن الك تبقى عايش

سجاد : يله خويه نغسل ايدنا من دم هذا الوصخ ونشوف سياره ترجعنا
حجي طه : حرامات بيوم جنت اشوفك اخويه كل مااكول عندي اخ يطلع عار
سجاد : خلف الله عليك واني هم مو
حجي طه : باع الثاني امشي يول انت جعفر الخسرته والله دزك الي بمكانه
سجاد : الله يرحمه يله امشينا تره تأخرنا

رجعنا ومرينا على محله ماكو شى لكينا هناك ولد عرف يركعنا للكوت
سمعنا شغلات شيب شعر الراس مصارف تنباك محلات تتكسر دوائر تنهب وتحترك تمشي بينا السياره ونشوف الناس شلون تكسر وتدخل للدوائر مابقت دائره ولا مصرف ولا مدرسه ولا جامعه حتى المكتبات حركوها مثل الواحد الحاقد على العراق همه بس الحرك واستغل ضعف الناس وحالتهم التعبانه
تمشي السياره بينا وتنزل دموعي هاي بغداد هاي ام الخير هاي الي الكل يتغنى بيها حالها حال ام الشهيد الي انهب بيتها وره ما مات ابنها زين صدام وراح الحرك والكسر والنهب ليش

حسيت نفسي بحلم لا مو حلم كابوس كل منطقه نمر الها نشوف شغلات لو بالافلام متتصدك عدا صوره الي تنسحل بلشارع وتنداس بلقنادر والنعل وكل تهتف ومرحبين بالامريكان وفرحانين لان خلصو منه
وكفنا سادين الطريق شويه وينفتح
اباوع غابه وناس تنهش بناس حتى سيارات الدوله ماسلمت وراكبيها ناس عادييين
والسلاح بيد الكبار والجهال شراح يصير الدوله مابيها جبير تايهه شراح يصير ياالله بينا

سليل : سمعنا بغداد سقطت لو حيلنا راح وشويه شويه بدت المحافظات تستسلم وخاصه من بغداد سقطت حضنت خواتي وكعدت وماما قفلت الباب خوف وقلق على بابا وسجاد وعلى حالنا اندكت الباب صاحت ماما نهر منو طلع طالب لبست عبايتها وطلعت
طالب : العفو منج بس ادري بيكم بحيدكم گلت امر اخاف محتاجين شى
نهر : رحمه الله والديك گلشي عدنا شمدريك وحدنا
طالب : جنت راجع من المزرعه وجهه الصبح وشفتهم طالعين وكلولي لبغداد وهسه الاخبار ماتبشر  بخير
نهر : اي والله وميتين خوف عليهم
طالب: ان شاء الله يرجعون بسلامه
نهر : رحمه الله والديك بقى ساكت ثواني وكال
طالب : ولو مو وكته بس ردت افهم شى
نهر : تفضل عرفت علمود شغلته دنجت مستحيه
طالب : بيه شى ينعاب ورفضتي

نهر : لا العفو على راسي بس اني مااتزوج
طالب : ليش بعدج صغيره وكتله لطه الي تأمر بيه بس تقبل
نهر : اني نذرت حياتي لاخوي ولبناته وهاي السوالف كلها شلتها من راسي
طالب : هذا العجبني بيج مره حوك گويه وكفت بوجهه الكل ودافعت عن حقها بنات اخوها ومعدله ومزيونه رف گلبي عليج والله بدون قصد مني ماقصدت اباوع على عرض ابن عمتي بس من شفتج وشفت حنيتج وطيبتج قفلت عليج وگلبي هواج  نهر فكري بلموضوع وروح امي المانشف ترابها لا اخليج اسعد مره
نهر : ابو علي عفيه كافي خانطيت رإي لاخويه واعتقد بلغك وكفتنا طولت ومحلوه لا بحقي ولا حقك ورحمه الله والديك على السؤال مباشره لزمت الباب عرف معناها روح سديت الباب وطبيت ميعرف اني گلبي خلصان ومامستعده اعيش الباقي من حياتي اغار واحب واتعذب

سليل : اليوم خلصت السبحه بيدي وارجف وادعي يارب رجعهم سالمين
ريم : اكولج ثلل هسه سحليه بغداد اخاف يصير عليه شى شلون
سليل : لا اسم الله ولتخافين اكيد ابوه وبيبيته ميخلوه يخافون عليه اني هسه بالي يم سجاد وبابا
رشا .. واني بالي يم الرفيقه المناضله سندس
ريم : اي والله نسيت ماما مو حزبيه هسه طارت لو شنو
رشا .. اي امج هسه تلكيها تكمز وتصيح يبون طار الحزب يبو طار صدام خرب حظج سندس دومج ماعندج حظ

ريم : واخوج يصيح عطوري وين ملابسي وين سويج السياره ماما مااريد ياخذوهن الامريكان الحكي ماما هههههه والله لو بعدنا يمهم اله ابلغ عليه اطلع بلشارع واشوف دبابه واوكف گبالها واكول الهم هنا واحد يسب بوش ويحجي على امه واخلي يسحلوه من قميصه
سليل : يمعودات اسكتن مو وكتها

رشا .. اموت واشوف امكم شلون صار وضعها
نهر : ميصير ماما تتشمتين وهي شعليها قابل صارت وزيره هي بعثيه حالها حال كل العراقيين اذا جان العراقي غصب عني يصير بعثي راح لو مراح هو كاعد يلكه روحه عضو فعال والميقبل يسحلوه هو واهله
رشا .. بس سندس غير سندس هي برجلها سعت الها وشفتها شلون طغت اذا احنا بناتها تلعب علينا وتهدد بينا الناس الفقره شسوت بيهم
سليل : ان شاء الله مابيها شى
رشا .. باع هاي الفطيره تخاف عليها
سليل : تبقى امنا رشا عيب هذا الحجي
رشا .. امكم الكم مو امي الي اني ماعندي ام كل مره اكول واعيد
ريم : عوفيها ثلل هاي جابتها الصخله مال بيت عمو طالب ودزوها هديه لبابا وكبرت وصارت رشا
رشا .. انجبي انتي على اساس ميته على امج وتحبيها ذيج المره مو وكفتي بوجهه وكلتي الها مااحبج
ريم : مااحبها بس مااكرهه ماعندي شى وياها ام خلفت وذبتنا وراحت انتهى دورها حالها حال اي صف بلمدرسه نداوم بيه ونقرا وننجح ونعبر وراها منباوع عليه ومنذكر حتى مواده

سليل : اباوع على خواتي الي گلبهم يرجف من ماما حقهم الشافوه مو قليل
صار الليل واسمع صوت مفاتيح ركضنا گلنا وجان نشوفهم ياالله شكد خفنا عليهم
بيومها تلاكت بس عيونا يعرف بيه خفت عليه بس مردت اسوي شى يلفت الانتباه كافي ذيج المره خليت الكل صافن من حضنته
مر اسبوع وسقطت كل المحافظات تحت حكم الامريكان طول هاي الايام واحنا مشدوده اعصابنه مرات نكول راح انام نكعد نلكه صدام كدامنه يلقي خطاب ويطلع الامريكان ويعاقب الكل نتخيل اشكال شغلات من كثر ماعشنا بحكمه بخوف هسه الامريكان احتلتنا وتأكدنا من سقوط صدام ليش لهسه نخاف نجيب اسمه ليش لهسه من نجيب طاريه نصي صوتنا من الخوف شكد زرع بينا رعب وخوف بس مندري الي اجوي احسن منه راح يدبروها ويحكمون البلد الي انهب واحترك وانسلب كولشي حلوو بيه

وره كم يوم اجه قرار تعتبر سنه عبور والكل يدخل امتحان بجيت اتمنيت مخلصه مرحله اولى جان عبرت بس البنات الْحٍمَدٍ للـّہ امتحنو بقت بس ريم بكلوريا كلها ايام وتمتحن
وبيوم قرر سجاد يرجع لبغداد
محجيت شى اخذت موقف المتفرج لان طول هاي الايام هو ساكت يطلع ويه بابا ويرجعون على الاكل ويردون يطلعون وينام يعني اشوفه دقايق معدوده
كال باجر اروح بس استغربت من شى اخذ المستمسكات مالتي من عمه شيسوي بيهن
سألت ماما نهر كالت والله ياامي ماادري كال لازم تتبدل الجنسيه مالتها لان اطلكنا
سليل : هي وينها الدوله حتى تبدل الجنسيه
نهر : ماادري يابنتي
جان كاعد اجيت بصفه وكتله شسوي بلمستمسكات
سجاد : اغيرلج الجنسيه
سليل : ليش
سجاد : مو اطلكنا لازم تتغير
سليل : بقيها مطالبه تغيرها
سجاد : شتردين سليل
سليل : انت شنو الي تريده فهمني تريدني لو لا تحبني لو لا تصرفاتك كلامك مره ترجف عليه مره متباوع بوجهي تعبت والله تعبت
سجاد : شفتي شلون تعبتي لعد لو متزوجج شلون
سليل : اني الي تعبني مااعرف شتريد
سجاد : كولشي مااريد
سليل : اكو شى بالك متأكده
سجاد : ماكو شى كلها كم شهر وترجعين اداومين وتمشي حياتج
سليل : وانت
سجاد : شبيه
سليل : وين تروح
سجاد : موجود وين اولي
سليل : كمت منه ضايجه حسيت اذا ابقى نتعارك وراح ومطلعت حتى وراه ردت اعاقبه وميشوفني قلبه ساعه ينبض بحبي وساعه يصير حجر

مرت الايام وامتحنت ريم ونجحت والحمدلله بلغش طبعاً كل مترجع من الامتحانات تكول درجه كامله نكولها شلون وانتي مقاريه زين تكول يمعودين كلها فاتحه الكتب بقت عليه بسبب الاوضاع تساهلو حيل ويه الطلاب والغش بفلس وهي عجوزيه خلصتها تغش ونجحت وفوكاها تكول بزودي نجحت محد دور على الاجابه بلكتاب غيري معناها بزودي نجحت

بابا بقى يسأل عن ماما وحسام الي فص ملح وذابو اختفو تماماً جان همه الجبير حسام وخايف حيل عليه وخاصه من راح مره لبغداد ويه سجاد لان يندل بيت ماما واجوي كالو البيت محترك مبين عندها او عند رجلها عداوه بس الي طمنه كالو البيت من احترك مجان احد بيه مموجودين بس بقى دوم يكول هم يجي يوم واشوفك وترجع لحضني
حجي طه : حضرو نفسكم اجرت بيت بغداد وراح نرجع
مصدكنا واخيراً جان شهر التاسع ب2003

ودعنا الكوت وطالب بس لا خوال بابا ولا شعلان اجوي اصلاً انقطع اخبارهم عنا وميباعون بوجهه بابا اما سيف ومن اخر عركه مشفته ابد وصلنا لبغداد جان بيت مرتب مال ناس مسيح سافرو بسبب الاوضاع خافو واجره بابا بشى بسيط يعني مثل الحراسه على البيت جان بيت حلو ومرتب وجبير وحتى حديقه بيه نفس منطقتنا بس بعد كم فرع
دخلنا للبيت وفرحانين استغربت سجاد ماكو صار اكثر من يومين من اجينه وحتى ماما وبابا مجابو طاريه
اكولج ماما سجاد ليش ما أجه
نهر : دنجت شكول الها بله
سليل : شبيج ماما احجي عفيه سجاد بيه شى
نهر : والله مااعرف شكول بس اول تالي تعرفين بنتي سجاد سافر
سليل : كعدت بلكاع اريد رجلي تحملني ماكو وين سافر وشوكت يرجع
نهر : سافر لسوريا ومااعتقد يرجع بنتي
سليل : اريد استوعب الخبر مااكدر
نهر : كومي ماما الكاع بارده لتتأذين
سليل : زين ليش وعلمود شنو
نهر : حياته وهو حر بيها ياامي
ثاني مره يخذلني يوم شفتي
نهر : گتلج وحذرتج ومافاد بيج كتلج ميناسبج
سليل : ماطول سوه هيج بيه اله اندمه

نهر : لتحقدين يمه هو غير لمصلحتج يعرف بروحه اذا بقى راح يرجعج بحضنه شفتي نفسج شلون نسيتي روحج وتلوبين وراه وهو هم كام يضعف ويريدج وخاف ليتزوجج ويعيشج بلضيم
سليل : لا هو جبان مابيه خير هو عافني كل مره اكول ميعوفني مراح يعوفني ويرجع يشمرني خارج حياته ليش حبيته طيح الله حظي كله مني كله مني وكمت الطم على وجهي فقدت وماما تبجي وتلزم بيدي تريد بس تهديني احساس خسارته فاق كل الاحاسيس بسفره عرفت انهزم مني عرفت كل الخيوط انكطعت بينا عرفت غلطت يوم مانسيت جرحه الي وطلكني وشمرني كلت يجوز تندم يجوز حبه غطى على المرض الي بيه بس مع الاسف تم خذلاني للمره الثانيه وبقووه

عانيت وحدي عزلت نفسي عن الكل والكل احترمو مشاعري حتى بابا عافني براحتي اعرف بيه يعرف كولشي وساكت ابويه من طيبه گلبه يتفهم حالتنا ويستوعبها بدون ميأذينه صار صديقنا مو بس ابونا
الكل حياتهم تمشي اله اني اركض وره سراب اسمه سجاد
اصفن واكول منو الصح بينا اني لو هو زين لو يحبني بكد مااحبه مستحيل يكدر يعيش بدوني شون انطاك گلبك وسافرت ولك شلوووون
حتى مودعني ولا فكر يحجي ويايه او على الاقل يشوفني ويكول ابريني الذمه دار وجهه وراح ولك سجاد ماانساها الك العمر كله ياجرح گلبي الجبير انت

بابا رجع يبيع لبلبي وباكله بسبب ضعف حالنا والبيت صار هو والماكو سوه محد يقبل يشتري بس بيت محرك ومتروح الكل يخاف منه حتى اكو ناس كالو صار مسكون وانكسر ومحد قبل يشتري واحنا يرادلنه مصرف واكل وشرب والفلوس الي عنده وعند ماما بدو يخلصون لهذا قرر يرجع لشغلته القديمه بس الفرق هلمره احنا البنات نحضر كولشي اله انكعد الحبوب ونطبخها وهو بس يبيع
من يطلع الصبح ياخذ روحي ويااه
بعد كم يوم اداوم اريد ارجع لكليتي اريد ارتب حياتي بعيد عنه
كاعده وفارشه الحمص انظفه اخاف حصوه شى بلكراج همزين هذا البيت بيه كراج وحديقه شوي انفهه عن نفسي واسمع صوت واحد يدك الباب ويصيح طه

لبست ربطتي وطلعت تفضل عمو
ولج بس لا انتي سليل غزاله طه
سليل : فتحت عيني هذا منو بله فاتح حلكه وبس يضحك ومنين يعرفني
اي عمو اني سليل منو انت
ولج يافصعونه كبرانه وصايره مره وراح ابوج يتعيقل براسي
سليل : انت منو غير افهم
هو وينه ابوج
سليل : طالع انت منو
اكيد يبيع لبلبي وباكله ماعنده غير شغله
نفخت بقله صبر وكتله عمو انت منو
من يرجع كوليله محسن رجع

يتبع ....