رواية ابي والغزلان الفصل الرابع والخمسون 54 - بقلم ريام هادي

ابي والغزلان الجزء الثاني
للكاتبه Reem
البارت الخامس

ســــــــليل
اني توني تنفست من انته جيت 
چنت مخنوگ الـ هوى مجافيني

ســـــــــــجاد
اجيت وبيه لهفة عليك
لهفة طير
غفلة من القفص ينهد

سليل : ياروح اختج انتي واجت رشا هم تركض مكيفات حضنتهن ممصدكه گلبي راح يطك من الخوف عليهم وابجي من الفرح صدك خواتي رجعن يارب رحمتك وجان اسمع صوته شلونج سليل رفعت راسي واشوف سجاد گبالي بهاي اللحظه جانت مشاعري مختلطه خوفي على بابا والبنات وخوفي على سجاد ومنا رجوع خواتي كلها خلتني ماافكر والاقوى اشوف سجاد كدامي وبدون تفكير مني بأي شى وبأي احد حكمني گلبي بذيج اللحظه هذا سجاد مو اي واحد هذا حبيب الروح ونبض الگلب هذا النفس الي يصعد وينزل بصدري فقدت تركيزي بكل الي داير مدايري وركضت عليه وحضنته جنت مشتاقه اله وخايفه عليه لدرجه حضنته ودموعي تنزل من وحدها
واهمس بأذنه ممصدكه انت كدامي والله ممصدكه
حسيت ايد حاوطت جسمي وبادلني الحضن اول مره يحضني واحس حضنه بلهفه وجان يتقرب يم اذني ويكول
سجاد :اشتاقيتلك سليل
سليل : حسيته يكول احبج مو اشتاقيتلك
واني اجاوبه مو بكدي والله
خفت حيل عليك
سجاد : اششش لتبجين هياتني يمج

نهر : بقيت جامده رغم ابوس بلبنات ومكيفه على رجوعهن بس ردت فعل سليل صدمتني  وخاصه محسبت حساب الرياجيل الواكفين ولد خوال ابوها وهاي المسودنه اركضي وحضني رفعت عيني على طالب دار وجهه همه ماعدهم هيج شى وخاصه يعرفون سجاد يعتبر غريب عنها اما سيف متحمل وهو واكف قريب مني كاال
سيف : هذا منو
نهر : صخنت بس حجه وكتله
الي رباهن ويايه وابلع ريك واحجي من التوتر

سيف : مو ميصير تحضنه تره تحل عليه وحرام شرعاً وعيب هم
نهر : باوعت على وجهه احسه يريد يطك
مرديت شجاوب وهاي فاقده بحضن سجاد صخام بوجهج سليل حتى من الصدمه نسيت اسلم على ريم  بس لازمه غزل واكفه
تعالي ماما ريم ابوسج
وبوستها وجسمي يرجف
سليل : وخرت شوي من حضنه وكتله همزين اجيت گلبي جان نار عليك
سجاد : لازم اجي وخاصه بهاي الظروف التعبانه

سليل : باوعت بابا ماكو وخرت خطوه من سجاد  وكتله بابا وين
سجاد : ابوج ليش شبيهه
سليل : راح على البنات لبغداد
نهر : يمه طه يعني ما اجه وياكم
سجاد : شلونج نهر
نهر : هله سجاد فدوه لقلبك الله يساعدك ويقويك
سليل : سجاد هو يحجي ويه نهر انتبهه على سيف مباشره وجهه انگلب حتى نسى موضوع بابا وهمس
هذا منو
سليل : انداريت وشفت سيف يتمشي قريب ماما نهر يروح ويجي وبيده جكاره بگلبي گلت صخام بوجهج سليل راح يعزيني ويصخمني نسيت سالفه اكو شباب وضميت عليه
هاااا وامتمت كتله هذا ابن خال بابا

جان طالب يكول تفضل يابه يمنا زارتنا البركه
سجاد : البركه والخير بيكم
طالب : تفضل جوه تبقى واكف
سجاد : رحمه الله والديك ميحتاج هنا ابقى
سيف : ميصير تبقى ويه البنات على اي اساس

سليل : اباوع على سجاد يريد يشرب من دم سيف بس يحجي بهدوء اني من خوفي تحججت بلبنات وعفته وتمشيت الهن وحضنت غزل وكفت بصف ماما
سجاد : وانت منو حضرتك وتكول ميصير
سيف : اني ابن خال ابوهن وبما ان هسه ابوهن ماكو احنا المسؤولين عنهن وبيتنا وبحمايتنا وانت كلك رجال غريب على اي اساس تبقى يمهن وتبات بنصهن تريد عدنا مضيف بات بيه

ريم : علكت والله ثلل يمكن راح تصير مالخ من الشعر والسبع يطلع دم
سليل : اااشش مو وكتج
سجاد : متلاحظ نفسك هواي خربطت وكعد تحجي حجي ماصخ
سيف : شنو ماصخ احترم نفسك
سليل : بلحظتها رادت تكب هذا سيف متوتر ويرجف ويحجي وميعرف اصلاً شديكول شجاب بقاء سجاد يمنا على احنا هسه بيتهم وهمه مسؤولين عنا احسه من توتره يريد بس يطرد سجاد ومن كال احترم نفسك تحرك سجاد وراد يلزمه جان يصير طالب بنصهم
طالب : يابه كول ياالله على كيفك جاينه حامي

سجاد : اني محترم غصباً عليك وعلى اكبر شارب تسكته لو ادفنه الك هنا
طالب : حقك بويه على راسي سيف اسكت وادخل للبيت
سيف : شدخل متسمع كلامه يريد يبقى بين النسوان بين عرضنا وانت تكولي اسكت
سجاد : ولك ياعرض تحجي بيه ذني اني ربيتهن ذني عرضي اني مو انت الجاي تالي وكت تحجي بلعرض

طالب : بويه سجاد اني اعرفك من كلام طه عليك وحمدبيك لدرجه اني تمنيت عندي صديق مثلك
سجاد : اني مااعرفكم ولا اعرف شديصير هنا وباوع  على سليل ورجع باوع على سيف
بس الاعرفه ذني البنات مسؤوليتي وبحمايتي اني وانت مااعرف شسمك مالك حق تدخل واكدر هسه اخذهن واطلع واذا اضطر الامر بس يطلع الصبح اخذهن واروح واريد اشوف ابو عرض شيسوي

سيف : غير اگلب الدنيا هي تايهه الك وكولشي بكيفك اكوله احنا هسه مسؤولين عنهن وحدتهن متتحرك اله بأذنه ابوهن ماكو احنا موجودين وارجع واكول انت غريب

طالب : كافي سيف خلي الرجال ياخذ نفس عيب وصدك من كال هو جان مسؤول عنهن ولتنسى هو ضيفنا وزيارته على راسنا وكافي طه يحبه ويعتبره اخوه ومأمنه سنين على عياله وبيته
سجاد : ااسم حضرتك
طالب : طالب ابو علي وهذا اخويه سيف
سجاد : على راسي اخ طالب خصم الكلام واخوك يسمعني ذني البنات مسؤوليتي وباقي يمهن هنا واذا حجه حجايه وحده وحق الله بس يطلع ضوا الشمس اخذهن واروح

سيف : مو هي تايهه
سجاد : اي تايهه واشوف شلون توكفني
نهر : فدوه اروحلكم صلو على النبي اخويه سيف تره سجاد مو غريب هذا ابوهن واخوهن الجبير ويخاف عليهن حتى اكثر من طه روحه من الدنيا البنات لا عبالك هو ابن خالي لا هو اخويه وسندي وسندهن وشفت كدامك شلون جابهن واجه من بغداد ومن كال يبقى هنا لان سنين هو بنصنا ويانه ويانه ماعافنا يوم واذا كال هسه اطلع وياه نطلع بدون حتى منكول اله ليش
طالب : عمي وين رايحين هيه عالكه بره مال طلعه اخويه سجاد  كول ياالله وهلا بيك واحسبها عليه سيف تره من خوفه وحرصه على البنات

سجاد : اني مكلت شى وهو من يمه كام يكمز
سيف : شنو يكمز احد كال الك اني قرد
سليل : جان ريم ضحكت وحطت ايدها على حلكها كفختها
طالب : كاافي سيف وادخل
سيف : ماادخل اله اشوف تاليهه وياه
طالب : كافي كتلك ادخل
سليل : الموضوع جان تافهه كولش وهوسه سيف مابيهه معنى واصلاً موقفه كله غريب بس احس سجاد ضامهه اليه لان كل ميحجي ياخذ نظره الي ويرجع مثل ما واحد يكول لواحد اني الج بس اكمل البيدي والله بعد لو بس حاجي حجايه سيف يمكن يضربه لان حسيته وصل حدها ويااه بس همزين كدر طالب يدخله للبيت سحبه من ايده ودخله وذاك يطك شرار

طالب : شوف خويه البيت بيتك وذني خواتك وانت احرص منا عليهن والتريده يجرالك كافي جايبهن من بغداد لهنا ومحمل نفسك خطوره وتعب
سجاد : ابو علي الله بلخير خصم الحجي وحتى لا ادوخك ذني اهلي واذا اخوك يحجي ويزامط بلعرض فهنه عرضي واني الاطلب منه ميتقرب منهن ومامسموح اله يوصل الهن ومنا ليومين اذا ابوهن مبين اخذهن وارجع لبغداد
طالب :وين تروح بهاي الاوضاع متشوف الضرب والردم وياك نسوان تصدك تجذب
سجاد : هذا العنده تحملنا يومين مابين طه ماخذهن وراجع ومامسموح لاحد يدخل من رخصتك

طالب : صار عمي بس تهدا وكول ياالله وارتاح بعدك توك وصلت وتعبان وحيلك مهدود تفضل يمي اخذ واجبك وشرفني بكعدتك والتريده يجرالك ومن عيوني
سجاد : سالمه عيونك خليني هنا احسن
طالب : شلون لازم تتعشى اكيد ماتعشيتو بهذا الوكت
سجاد : بيت الدايم والعامر باهله بس تسلم غير مره
سليل : بقى يلح على سجاد ياكل او يرتاح يمهم بس هو قافل صح الي يشوفه يكول هدأ وارتاح بس اني اعرف هو بارود بداخله بس ميكدر يظهر هذا الشى كدام طالب وخاصه طالب اسلوبه حلوو ويحاول يمتص غضب سجاد
ميدري سجاد بركان الله وحده يكدر يطفي عصبيته وغضبه 
طالب : من رخصتكم ولا تنسى خويه شتحتاج اني موجود
سجاد : دايم متقصر
سليل : اندار عليه واشر وكااال يله ادخلي واخذي خواتج وانتي نهر ابقي اريد احجي وياجً
سليل : تعال طب جوه
سجاد : طبي جوه لا احرك عشيرتج
سليل : شسويت اني سجاد
نهر : كافي سليل ماما اخذي خواتج يرتاحن
سليل : طببت البنات واريد ابجي من القهر مفرحت غير دقيقتين بجيته وراها انغثيت هلمره شلون راح يصفى گلبه مني

نهر : كعدنا اني وسجاد بعتبت الباب
احجيلي شصار وشلون جبت البنات من سندس
سجاد : قبل كولشي موعيب عليج تضمين عليه اكو شباب بلبيت
نهر : صوتك بله لتنسى احنا بيت الناس ولتذب حركتك بيه سحب الباكيت من جيبه ورث جكاره وجر نفس قوي
سجاد : احمدي الله ماحركت البيت عليج وعلى ذيج شلون تكولين ماكو شباب وهذا شنو رجل دجاجه
نهر : من كتلك مجان هو موجود وحتى لو موجود اعرف خبالاتك وراح تفكر بشغلات مالها داعي
سجاد : لازم متبقون هنا لازم
نهر : لترجف علينا بله كام وكف ويروح ويجي
سجاد : ولج نهر اني اكول هسه ماكو احد يمها وممداومه كليه ودوم بلبيت يعني محد لمحها تالي الكاها بنص الشباب وفوكاها اسألها واسألج تكذبون عليه

نهر : والله علمودك نعرف بيك تتعب
سجاد : شعنده يمكم وليش واكفه انتي وسليل ويااه
نهر : على كيفك ترجف واكعد والله دخت من الروحه والجيه مالتك
سجاد : عوفيني يمعوده حيل مختنك احجي ليش واكفات
نهر : جان ضرب قوي قبل شويه واجه علمود ياخذنه يمهم يم البنات لان وحدنا
سجاد : معناها داكين ميانه موو بحيث يجي بليل عليكم
نهر : سجاد بروح خالي كافي تفكر واتعب نفسك انت شفتها لسليل من شافتك شلون فقدت واجت بحضنك
سجاد : تدرين ليش هو تخبل وراد يتعارك
نهر : اهووو هم حطيت انه بيها غير يخاف علينا ولتغير الموضوع اكوله سليل من شافتك فقدت
سجاد : هذا نفس السبب الي خله هذا الحقير يتخبل
نهر : شنو قصدك
سجاد : هذا عينه عليها واني اله افكسله عينه واخلي يتوب يباوع عليها ويشوف خيالها
نهر : استغفر الله شلون بيك
سجاد : ولج لتخليني اعيط اكولها عينه عليها عبالك مكشفته اني رجال واعرف هاي السوالف من عيوونه عرفته واعصابه ليش اخوه من شافها هيج سوت سكت يجوز ضاج بس بلعها اله هذا الگلب ضل يلوب ولما اخوه الجبير موجود جان تضاربنا
نهر : عزه وتضربه
سجاد : لا مااضربه اكسره وروح ابوج وابويه ماابقي عظمه صاحيه بيه اله اسوي بيه عاهه وخلي اهله شيسون خلي يسوون

نهر : فدوه سجاد احنا عفنه بغداد من المشاكل والمصايب الي بيها وهنا ذبتهم مو مثل ذبتنا هنا عشاير وحكم واحد لازم ظهر الثاني مو مثلنا متلطمين حايرين شلون نبعد سندس ومصايبها عنه
سجاد :لدوخيني ولتعبين نفسج بقاء هنا ماكو واله وحق الامام علي ومااحلف بيه على كص رگبتي اله من اتوازه اذا بقيتو هنا لا اسويلكم كارثه خلي يجي طه وترجعون لبغداد بقاء بلكوت كلها ماكو
نهر : سوده عليه هو وينه المكرود راح يدور على بناته وتالي رجعن وهو ماكو يمه يطه ياخويه دومك مشلوع گلب من خرب حظك الاسود

هسه كولي عوف سيف وسليل وهاي السوالف
سجاد : لتجيبين طاريه وذيج الي حساب بعدين وياها
نهر : يبو ياعنتر بن شداد لكه شغله على الفقيره وراح يلزمها اكوله البنيه حتى متشوفه ولا الها علاقه بيه وكاعده وساكته بلبيت

سجاد : هم عايزه تشوفه وتكعد وياه انتي
جيبي حب الهم يكرزون حلوه الكعده تصير
نهر : اذا انت هيج ترجف عليها رجف ويريد گلبك يوكف من القهر والغيره ليش عفتها وطلكتها
سجاد : رجعنا للحجي الماصخ نهر طبي جوه زايده مني احجي وياج
نهر : يمعود فهمني هسه شلون جبت البنات

سليل : ارجف من القلق ومااعرف شسوي واسمعه يعيط على ماما بس الكلام مو واضح
رشا .. بله هسه احنا اجينا كلت راح اطيرين بينا تالي عايفتنه
سليل : ابتسمت وتقربت منها وحضنتها
اووووف شكد مشتاقه الكم تهت والله بلياكم
ريم : والله ياثلل احنا هم وجنا نحسب ساعه ساعه شوكت نوصل
سليل : تعالو احجولي شلون اجيتو ويه سجاد
رشا .. اول مصارت الحرب امج واخوج ورجلها كامو ميلفون بالبيت دوم طالعين والله اجتماعات اجت ايام نبقى للفجر وحدنا وعود بعدين تجي ماما تطمن
سليل : وشون تعوفكم وحدكم
ريم : غير بعد الرفيقه الماجده سندس والرفيق الحزبي المناضل حسام يااختي الوطن اغلى
سليل : اسكتي ام لسان
رشا .. هاي ام لسان جان وكعتنا بمصيبه
سليل : ليش شسوت
ريم : دومكم ظالميني
سليل : احجي شصار
ريم : ماسويت شى ياعيني
رشا .. ابد ما سوت

وره مخابرناج بيوم اجه ابن خليل زوج امج واحد انكس بعد من حسام خشم يابس وشايف نفسه شوفه وامج تتلوك اله وعرفنا حسام وابن خليل واحد يضوج من الثاني
سليل : وماما عايفتك بلبيت ويه ولد غريب خوما سوالكم شى
رشا : على كيفج شبيج خفتي هو احنا نشوفه بالاسبوع مره كل جمعه يجي على الغده يلتمون كلهم وناس تجذب على ناس المهم احنا مالنا دخل بيه شوفي اختج شسوت سمعت حسام يتغزل بوحده وكال الها تروحلج فدوه عشيرتي وابويه لتراب رجلج لو تخبلت
كومي اتسنطي عليه وعرفت عنده طلعه وياها وجيبي دهن مال اكل وحمت الطاوه وماع الدهن وذبي على ملابسه
سليل : صخام بوجهج
رشا .. وهذا تخبل عيط عياط لعب طوبه وهي حبست روحها بلغرفه والله مو بس هي حتى اني خربت كنتوره كله مال ملابس الطلعه
سليل : ليش ياريم هاي عود اني وصيتج
ريم : شنو ابويه يروح لوحده وصخه تلكين رجلها كلها فطور الحقير ينزل من قيمه بابا علمود وحده ممتربايه تحجي ويه الولد
سليل : خوما ضربج
رشا .. شحده بس فضت رجل امج كال اني اشتريلك ميخالف طفله وغلطت وانسدت الشغله
ريم : اخذ كومه ملابس انقهرت ردت اخربهم بس رشا مقبلت

سليل : شلون بيج متكبرين متبطلين سوالف الجهال
ريم : هو دهن شذبيت قابل خيسه
رشا .. والسالفه الثانيه احجيها
ريم : خو انتي مصدكتي تكول جوعانه حرك وتحركين بيه

سليل : والله گلبي كام يوجعني من سوالفج
رشا .. اسمعي لعد الاقوى عبالج تابت انتظرت يوم الجمعه واجمعي الريح  مالته (العطور) وشلون ريح يخبلن ثلل اصلاً مبينات مو من العراق من بره اربع ريح وادخلي لغرفه ابن خليل ورشي بملابسه
سليل : انتي مو گلتي متشوفوه بس الجمعه
رشا .. اي بس عنده غرفه بلبيت وملابس وغراض كامله مرات يمر بليل يبدل ويروح
خلي اكملج وكامت ريم كل شويه ترش عطر ترس الملابس ترس وضمت اثنين بكنتور ابن خليل ورجعت اثنين صار الغده واتغدينا كوه واني ايدي على گلبي صعد ابن خليل وگبت العيطه وذيج العركه المعدله وابن خليل يعيط شلون ترش ريحتك الجايفه بملابسي
ريم : والله الريحه طيبه بس هو يجوز لان خشمه جبير اطب اكثر من ريحه بخشمه تنخبط تطلع ريحه مطيبه

سليل : صار عندي خفقان من سوالفج والقران مخفتي
ريم : لا اني شعليه همه واحد ميحب الثاني ديج وديج وتعاركو شلج يادجاجه بيهم
رشا .. وماما تخبلت وتوقعت لو اني لو ريم ورزلتنا وكامت تعيط كم يوم اجيتن وراح تهجمن بيتي ولجن بنات طه اذبحجن اذا تسون شى
سليل : بله لو مأذيتج وضاربتج
رشا .. لا متضرب امج حايره بروحها وابنها احنا هيج مزهريات جابتنا تكمل بيتها بيه
ريم : تصوري ولا مره كعدت ويانه سولفت ضحكت حتى مرات متاكل ويانه ولا تسألنا اكلتو او لا ماما تغيرت حيل
رشا .. على اساس امج تنكط حنان وطيب وهسه تغيرت بطرانه
سليل : وتالي شلون وصلتو لسجاد 

رشا .. من صار الضرب اجانه اول يوم وخطيه من شاف بس الخدامه بلبيت تخبل وبقى كاعد بلحديقه اخاف يصير شى هو يمنا
ريم : شكد توسلت بيه يطب مقبل ويلعب ويه غزل ومرات اطلع العب وياه دومنه بلحديقه  بس دوم يفوز عليه واضوج ويخسر نفسه علمودي
سليل : اوووف ياحنيتك جريت نفس وگلت وماما مشافته
رشا .. لليل يله رجعت امج واخوج واستلمهم من الباب
سجاد : بله انتي ام هم الله يخلي الجنه جوه رجلج اذا خلاها حتى صلاه مااصلي بعد
سندس : انت شعندك بيتي شسوي هنا
سجاد : والله وكت بت الخبازه تحجي بلبيوت هسه واحد ميريد يجيب طاري امج جانت خوش مره الله يرحمها بس سوت شى طايح حظه خلفتج
سندس : يعني انت متجوز اله انومك بلسجن اني اذا ساكته على سوالفك بس لان جنت تحامي بناتي

سجاد : زين تدرين عندج بنات وعايفتهن لليل وحدهن وبحاله حرب مخفتي عليهن
وانت ابن امك ياعار مو ذني خواتك شلون تعوفهن وحدهن صغار
حسام : وانت شعليك خواتي واحنا حريين بيهن انت شدخلك
سجاد : شترجى منك غير تربيه مره ويامره تربيه سندس والله ياالله
حسام : تعال خلي اشوفك تربيه المره
وجيت على عمو بس عمو من اول حركه ضربه على خشمه لحسام داخ وكع
ريم : ورشا تصفك مكيفه احجي مو بس انتي تحركين

رشا .. هااا ارتاحيتي اي اصفك واكيف لعد هذا وضع عايفينا وحدنا
سليل : كملووً
رشا .. على كيفج لتعيطين اكملج وكال لسندس
سجاد : مره ثانيه اذا اجي والكه البنات وحدهن اخذهن
سندس : انت رجال واخذهن
سجاد : تعرفين بيه رجال وكدها خلي اجي والكااهن وحدهن والله اخذهن واركعي راسج بلحايط شوي خلي يصير عندج ضمير اتقي الله بيهن شنو من گلب شايله انتي لخاطر الكعبه لج البزون تخرمش اذا احد اخذ جهالها
سندس : مالك علاقه بناتي وهاي اخر مره احذرك
سجاد : واني هم اخر مره احذرج اذا الكاهن وحدهن اخذهن واروح وعود حيري بسوالفج المكسره اذا انتي مو كد حملهن ليش اخذتيهن من ابوهن اني اعرف خباثه وحقاره وانتي مترديهن بس هيج حتى تحركين گلبه
سندس : لو بيه احركه واحرك الساعه الشفته بيها
سجاد : اني لو من طه اسكر حتى صلاه مااصلي على القسمه السوده الي انحطت بحياته ولج انتي بلاء اذا الله راد يبلي عبد مسلم تصيرين بحياته
جان حسام لازم خشمه ورافع راسه وكوه يحجي
حسين : اني اعلمك اله اخلي جماعتي يطيحون حظك
سجاد : امشي لك جاي يهدد هم عود رجال انت لو بنيه خامسه لطه ولا خلفتك اقلها تكبر تغسل تمسح تطبخ بيك نفع مو هسه رجل ماسحه متسوه والقاهرني مكيف عنده ولد

سندس : روح منا ورجلك متوصل لهذا البيت راح اخلي مفرزه بلباب بس تجي ياخذوك
سجاد : ههه مفرزه من اخره بلوكت السواج هيج وتأمرين وتحطين مفارز ارجع واعيد احفظي اذا يبقن وحدهن متلكيهن
وعافهم وراح وبس شافنا حسام واكفات نشوف كولشي بقى يعيط الفاشل ادخلو جووه
وعاف يوم مااجه عمو واليوم اجه وهم شافنه وحدنا وخاصه من عرف المدرسه الي بنهايه شارعنا صارت موقع بديل للجيش ومليانه جنود مباشره كال لمو ملابسكم احنا هم بسرعه حظرنا نفسنه واجينه ويااه بس تعطلنا بلطريق
سليل : الف  الْحٍمَدٍ للـّہ على سلامتكم بس شلون اذا عوفت ماما
ريم : عادي تجي تعيط وتهوس وتاخذنا المهم نبقى شويه يمكم بس بابا شلون

سليل : ماادري وخايفه حيل عليه
رشا .. هااا خايفه والحضن الي حضنتي بيه عمو لان جنتي خايفه على بابا مو
سليل : انجبي واسكتي مو هستوج اجيتي تستلميني
ريم : هههههه شفتو عمو من شاف سيف ولو وياه مشعول جان صار احلى فلم لجاكي شان والله عمو يسويج مخده مال ملاكمه
سليل : جنه عمجن مراح يفوتها على خير يله كومو بدلو وارتاحو اكلتو
رشا .. اي  الْحٍمَدٍ للـّہ

بقت ماما لوين ويه سجاد وسمعته يكول الها منا ليومين اذا مااجه طه ارجع لبغداد جان گلبي حيل يوجعني وخايفه عليه وعلى بابا
طبت ماما وسدت الباب
سليل : وينه
نهر : كال انام بلحديقه
سليل : عفيه يبرد خلي يطب
نهر : مقبل توسلت ابد قافل بس خلي افرش اله
سليل : اني افرش
نهر : عوفي خلي يرتاح تره حيل تعبان
سليل : والله مسويت شى مو كدامج
نهر : عوفي امي بلكت باجر يصير احسن
سليل : عفته وطبيت وحضنت غزل وبقيت بس افكر بيه بيني وبينه كم متر ممصدكه بس شنو الفايده متعصب مني
ثاني يوم كعد وماما سوت ريوك وطلعت اكلت ويااه وهو خله وطلع مبقى كال عندي صديق رايح اله سمعته يكول الها اذا طلعت الباب اكسر رجلها
مره اضحك على غيرته الي صارت علني ومره اضوج احسه ميثق بيه
مر اليوم واني انتظره ساعه ساعه وهم بالنا يم بابا بعد مازاد الضرب وخاصه على بغداد والاوضاع متبشر   بخير وهو ماعنده احد هناك وين يبات

نهر : عجنت من الصبح وكعدت اخبز لكيت رازقيه قبلي كملت الخبز وتضحك ونسولف اني وياها
رازقيه :يمه شنو هذا ابن بغداد ينكرط خيه اسمراني دمه يلعب لعب
نهر : هههههه ليسمعوج
رازقيه : والله يكصون راسي ويعلكوه
نهر : شفت طالب اجه من بعيد واشرت لرازقيه تسكت اخاف يسمعها شوي وصار يمنا
طالب : الله يساعدهم
رازقيه : ويساعدك خويه هاك خبزايه حاره تلوك لحلكك
طالب : عاشت ايدج بس اليوم اريدها من نهر
نهر : اول مره يصيح بأسمي رفعت راسي واستغربت مكدرت احجي شى غير كلمه صار وخبزت اول كرصه وبديت اخبز رغم رازقيه واكفه وكعد تصفط بلخبز بس محبيت وكفته شلعت اول كرصه انطيتها اله جان يكول
طالب : عاشت ايدج بكولشي معدله
نهر : دنجت مستحيه وبديت اكمل
رازقيه : خويه يله تتغدا
طالب : تعوفين نهر وحدها
نهر : ليش صغيره واخاف اتيهه
طالب : العفو مو قصدي بس قصدت
نهر : مخليته يكمل مالك قصد اعرف محتاج شى لو اكمل
براحتج عافني وراح اني حاسه بنظراته مو غشيمه متعدى هو حدوده بس نظراته تربكني وهم مااقبلها منه وصدك حقه سجاد لازم نطلع منا وينك ياطه مو حتى روحي ماتت من وراك هاي هم الجبهه وتروح بيها

سليل : صار الليل واجه طلبت من ماما اني افرش اله فرشت وهو ولا يباوع عليه لازم الجكاره ويدخن بس كملت تمدد متحملت وكعدت گباله مثل الدچه اباوع السما بيها ريحه دخان بس رغم هذا هوا طيب ربيع
وهمست راح تبقى هيج
سجاد : روحي ادخلي جوه
سليل : والله ماعندي شى ويااه
سجاد : ليش لو عندج شى اسكتلج
سليل : لعد شبيك
سجاد : مابيه طبي سليل ونامي
سليل : تقربت من راسه وكتله توقعت مشتاقله
سجاد : طبي وكافي تلغين
سليل : انت ليش هيج دوم تأذيني ليش دوم تعاقبني على شى ممسويته
دار وجهه عليه وكال ممسوي شى مو من اكولك اكو نعالات تكولين ماكو
سليل : مالي دخل بيهم
سجاد : استري على روحج بهليل وادخلي
سليل : سجاد
سجاد : من اشتعل واحترك سجاد شتردين
سليل : همست بهدوء وقرب اذنه وهو. اعصاب كتله اشتاقيتلك
حسيت هدأ وجر نفس قووي ورجع راسه على المخده وصافن على السما وكااال

سجاد : تعبان حيييل
سليل : اسم الله عليك من التعب
سجاد : مااعرف شريد ساعه مااريدج بحياتي وساعه اريد اضمج بضلوعي وساعه كارهه روحي لان حبيتج وساعه احب روحي لان مشتاقلج تعبت حيييل
سليل : انت كتلي انتي نفسي والنفس اتعب
بس تبقى نفسنا ومنعيش بدونها
دار وجهه عليه وكاال لازم متبقين هنا
سليل : لهاي الدرجه تعبان من بقائي
سجاد : عندج شى ويه سيف
سليل : فتحت عيووني على سؤاله
هاي شبيك والله ماعندي بيش احلف الك ماعندي
سجاد : ورجفته عليج
سليل : يرجف او لا مشكلته مو مشكلتي
سجاد : كومي سليل نامي
سليل : رايحه بس حط في بالك لو عندي شى اجي اكوله الك مخايفه ولتخلي عقلك يصور شغلات مصايره
كوومي ناامي
سليل : كايمه انخمد طبيت وركعت الباب

وره ساعتين سمعت هوسه طلعت ماما نهر رجعت كالت الحجيه متخربطه
والكل ركض بيها حتى سجاد راح وياهم رغم ماعنده معرفه بيهم
ويه صلاه الصبح واندكت الباب خفت افتحها صحت منو
حجي طه : اني بابا افتحي
ركضت فتحه وحضنته وينك عفيه والله متنا خوف عليك
حجي طه : خواتج هنا موو
سليل : اي هياتهن نايمات طب بابا يركض عليهن وكعدهن من النوم يبوس بيهن ومدمعه عينه
فدووه وين جنت
حجي طه : رحت لبغداد گلبتها عليهن مااكو مااندل بيت سندس الجديد
سليل : وين بتت هاي اليومين
حجي طه : والله يم بيت ابو حسن جيرانه القدامه خلف الله عليه شافني وضايفني لان رحت على سجاد ماكو تالي ثاني يوم طلعت ويصير حسين ابن علي بوجهي
ريم : سحليه شلونه بابا
حجي طه : زين بابا ويسلم هوايه عليج
ريم : خلي يولي مااحبه بعد بذات كال اجي وما أجه
سليل : كمل بابا معليك منها هسه يجيب علاكه حلويات تنسى كولشي
حجي طه : المهم شفته وسلمت وعرفت منه سجاد جابهن لهنا وبس ردت سياره تجيبني كوه لكيت
سليل :  الْحٍمَدٍ للـّہ على سلامتك حبيبي
وحضنته وابوس بيه
حجي طه : لعد وين عمتج وسجاد
رشا .. بيبي تخربطت وركضت وياهم وياها عمو
حجي طه : اني رايح الهم
سليل : وين هسه وصلت
حجي طه : خلي اروح اشوفها

نهر : حاله الحجيه خطره والكل واكف من شفت مرت خضير وياها كتلها اجي كالت ياريت حتى تعاونيني استحيت بعد ورحت بس سجاد مقبل اله هو ويايه بس ايدي على گلبي شفت طالب وابوه وعبد الله وجان يجي شعلان هم وسيف
سجاد : هذا منو هلمره
نهر : شعلان ابن عبد الله
وهم يجي للبيت مو
نهر : اشش مو وكتها شوف الناس امهم كعد تموت وانت حايرلي سليل ويامن حجت
شويه واجه طه مصدكت ركضت عليه وحضنته اووف ياريحه ابويه الطيبه بيك وباس راسي
سجاد :  الْحٍمَدٍ للـّہ على سلامتك
حجي طه : الله يسلمك شكول الك لو انطيك مي عيوني قليل
سجاد : معطشان شسوي بيه
حجي طه : گلي حسين على كولشي ولو ليش استغربها منك هنه اصلاً تربات ايدك
سجاد : ليضل بالك كولشي زين بس سندس مشفتها
حجي طه : لا اصلاً مااندل بيتها واجيت عليك توديني هسه عوفنه من هاي السالفه الحجيه شلونها
نهر : تعبانه حيل الله يستر
مرت خضير : فدوه خيه ولو ازاحمج الحجيه تصيح بأسم رازقيه ومن كلت الها بتي اشرت براسها لا ومن كلت بت طه كالت اي
نجيبها الها
نهر : قصدها غزل
سجاد : اني اجيبها
كاعده اغسل مواعين ورافعه ملابسي واندكت الباب وفتحته رشا واندار واشوفه كدامي مباشره نزلتهن كال اريد غزل وطبو البنات يبدلون الها جان يتقرب مني واني مدنجه اخااف احجي جان يكول
بعدج من تنظفين ترفعين ملابسج
سليل : هااااا
سجاد : تره انتي مو بشقه سجاد ولا بيت ابوج حتى براحتج انتبهي لبسج
سليل : كتله صار عندك اوامر ثانيه
سجاد : يله غزل فضينا
سليل : انداريت وجان يكول نسيتي تلبسين حجاب كدامي
طفرت من مكاني لبسته باوع وطلع اااخ يلعب بأعصابي

نهر : دخلنا غزل على الحجيه هي شافتها بجت
الحجيه : يمه الغاليه اجت الحنينه
وتحضن وتبوس بيها
الحجيه : خفت اموت ومااشوفج يمه
غزل : شونج بيبي ريحانه
الحجيه : ترد روحي من اسمع اسمي بحلكج يلعافيه تعالي اشمج يريحه الغااليه
حجي طه : حبوبه بيك شى
الحجيه : امك اجتني تريدني كافي تاركتها سنين
حجي طه : عموج طويل
الحجيه : اطول من هيج يايمه هذا العمر لازم تعيشه امك مو انه  الْحٍمَدٍ للـّہ على كل حاال
اطلعو كلكم بس اريد طه واخيته
نهر : استغربنا من طلبها والكل قبل وطلع وجان تكول
الحجيه : احلفنك بروح ابوك وامك وانتي هم بروح ابوج واخوج تصدق وياي
ماكتلت اخوك لان ماانطاك ورث
حجي طه : جريت نفس وتنهدت لا حبوبه كتلته تعدى على شرفي وماعنده محرمات ليش ياكل ويشرب وياج هذا الشى
الحجيه : يمه مصدكتك وردت گلبي يبرد اكثر وماطول ذاك النذل نعلت الله على روحه هيج مسوي عااشت ايدك يطبه طوب على امه نجس انه ردت بس اطمن لاتاخذ بخاطرك مني
دنج طه وباس راسها وكال الها شلون اخذ بخاطري وانتي من ريحه امي

الحجيه :   انه خلصت عمري كله وره ما ماتت الغاليه كل كم يوم تجيني بلحلم وتصيح وليدي شيبت گلبي احجي اكول الهم هيج تصيح رازقيه يكولون ياوليد مو مات وياها هذه احلام ومره كوابيس وكمت اذبح اضاحي ولوجهه الله وبثوابها بس حتى لا تجي واتأذه من اشوفها تون عليك وكامت كل شكد تجي لابسه ملابس تعبانه وتصيح يمه وليدي واضل انوح وياها

ويوم ماجيت وكلت انه ولدها صدكتك من اول ماشفتك بس ماردت انطي بيهم لازم اسمع الهم اعرف انت ولد رازقيه وگلبي مايوم كذب عليه اريد منك تاخذ الكااع وتعيش بنياتك خلي امك تكون راضيه ومرتاحه
حجي طه : مستحيل اخذها حبوبه هاي مو من حقي وكتلج كم مره مااخذها
الحجيه : احلفك ببنياتك لاتكسرلي كلمة وانه اقابل وجهه كريم ريحني يايمه لاتشلع افادي تره كوه اجر النفس وروح امك
نهر : بقت تقنعه لحد مكال اخذها بس صيري زينه
الحجيه : كلت لطالب يسجلها بإسمك اخذها يمه هذا اقل شى اسوي لامك
اريد اروح الها ومامقصره ويه ولدها لانخليها تزعل علي حاجي نهر انتي اخيته ويحبج ويسمع كلمتج
بقينا نقنع بيه لحد مقتنع
باس ايدها وراسها واني هم
الحجيه : عينك على رازقيه هذه حظها ردي مثل حظ امك لا تفوتها يبن رازقيه لاتفوت بنيتك

نهر : طلعنا وره ساعه توفت انكلبت المستشفى الكل يبجي صغار وكبار رغم جبيره بلعمر ومريضة بس الكل يموت عليها
ورادو بس تعيش بس هذا يومها بعد
رجعنا والبيت انگلب فاتحه بعد
سليل : من سمعنا بيبي ماتت كلنا كمنا نبجي بس غزل صافنه بلوجوه
لبست عبايه لان ماعندي اسود ولبست ربطه داطلع وجان يصير بوجهي
سجاد : وين
سليل : اروح وياهم للبنات غير بيبي ماتت
سجاد : الله يرحمها بس طلعه ماكو
سليل : لا عفيه سجاد ما اتأخر والله
سجاد : طبي وبله لغوه هناك متوصلين بنات وعدهم خير من الله ماكو طلعه سليل
سليل : محبيت اجادل واسوي هوسه كتله صار وطبيت

مرت ايام الفاتحه جانت رغم حرب وضروف صعبه بس فاتحه ضخمه لان جبيره العائله اني ولا وصلت مثل مطلب وره الثالث اجه سجاد كال ارجع لبغداد اشوف الوضع وترجعون ورايه الغريب بابا أيده ويريد يرجع وجان تندك الباب فتحه واشوف خضير وعبد الله يعيطون
خضير : عبالك تفلت بلكاع ولك هاي مال امي سنين خلصت عمرنا نشتغل بيها حتى تبقى النا ولولدنا تالي تريد تاخذها على الجاهز
حجي طه : مااخذتها هي انطتني الكاع وحلفتني واسأل ابنك طالب حولها بأسمي واني ماادري
عبدالله : اسمع  طه مال تاخذ الكااع وروح امي الهسه مانشف ترابها اذبحك ومااخليك تلزم شبر منها
سليل : جان عياطها بلحديقه عاالي واجه طالب كال هي الحجيه انطته الكااع وهمه قافلين
جان يرفع سلاح خضير بوجهه بابا
جان يصير سجاد گباله ودفعه حيل ومنشوف غير سيف تكول الكاها حجه وجيت على سجاد وناس تضرب ناس كوه فاككوهم
سيف : ولك حقير انت منو وتدفع ابويه
سجاد : تاج راسك اني وابوك ما عنده احترام ولكم امكم مصار ٣ ايام من ماتت وحايرين بلورث والفلوس
رجع راد يضرب سجاد لزمه شعلان وطلعه بره بقى بس طالب وياهم

خضير : منو كال الك حايرين بس منريد حرامي ياخذ كاعنه ونضل نتفرج عليها
طالب : يابه ميصير هذا الحجي
خضير : اسكت انت حسابك بعدين تحول الكاع واحنا ماندري
طالب : غير حبوبه كاعها وهي حره بيها
عبد الله : هي اخرفت اخر ايامها وتريد تنطي الكاع لابن حسين والله خوش

حجي طه : عمي مااريد الكاع ولا اريدكم واني مو حرامي وطالب تسوي تنازل مني الهم هي مو بأسمي سوي كل شى واوقع
طالب : بس هاي وصيه حبوبه
حجي طه : اني ورث ابويه ما داعيت بيه وادري انوخذ من غير وجهه حق اجي اداعي بلكاع مااريدها الله لايعوزني على احد بس رحمه الله يله سجاد حضر نفسك وانتم واشرت للبنات حضرن نفسجن راجعين لبغداد
طالب : لا ياابو حسام
حجي طه : هذا اخر شى عندي وخلف الله عليكم ماقصرتو هي الحجيه وراحت المن ضال الف رحمه على روحها
سليل : طبينا وجان يعيط سجاد يله شتنتظرون
وبدينا انشيل بملابسنا وره ساعه اجه طالب صاحب بابا طلع نص ساعه ورجع وصاح ماما

تعالي اكعدي نهر
نهر : خير يااخويه فدوه على كيفك ويه نفسك فدووه الك الكاع والخوال والدنيا كلها المهم انت سالم
حجي طه : عوفج من كولشي هسه اجاني طالب وكال ولو الوكت مو مناسب وعيبه احجي بس لان رايحين لبغداد وبعد ماضل وكت
نهر : ماضل وكت على شنو
حجي طه :  طلب ايدج مني رادج مره اله يتزوجج
نهر : شنو ومرته
حجي طه : كال على سنه الله ورسوله وكلمن بيت وحدها ومااقصر بحق وحده والتريده يجرالها ومراح اظلمها بيوم واني رجال ومن حقي وممسوي شى غلط وكال بس تكول بلي وتدلل على قول لسانها اني شاريها ورايدها حلالي وطالب خوش طالب اعرفه رجال والنعم منه وشفتي مايوم طلعت العيبه منه اني اجيت اكولج ياخيتي اكثر من مره كلتها الج انتي مو اخت انتي امي وسعادتج عندي بلدنيا واني اريدج تستقرين وترتاحين شتكولين تقبلين تتزوجين طالب

يعني المارضيته لنفسي ارضاه لغيري شلون ترهم ي طه
فكري بيها لو غير واحد مباشره ارفض بس اني حاس حياتج وياه راح تعوضج تعب السنين اريدلج رجال يسندج ويصير عكازتج للزمن وماكو احسن من طالب لهذا الشى فكري زين ولتتسرعين واني وياج بكولشي تردي
نهر : صفنت وتذكرت طالب ونضراته ومحاولته يتقرب مني لو حنيته وهدوئه واخلاقه بس شلون اني اتزوج طالب ؟؟

يتبع ...