رواية ابي والغزلان الفصل السابع 7 - بقلم ريام هادي

ابي والغزلان
للكاتبة Reem
البارت السادس

الحب مو كلام ويعجب اليقره
ولا شاعر يكول ويبدع بشعره
الحب من تحب محبوبك شما جان
مو حسبة قميص بكيفك تكصره
والحب من أحبك يعني كولشي البيك
حلو عندي وأقبله بحلوته ومره
الحب يعني اريدك ما اكولن لا
ولا اعاند كليبك ابد بالمره
والحب من اسمعك افهم الكلمات
واعرف غايتك من اول النظره
والحب يعني اعشكك وابقى اذوبن بيك
وأتحسر عليك واكتم الحسره
والحب يعني أبقى احتاجلك للموت
مو حسبة سنه وسنتين لو عشره
والحب يعني دين وشرع بي دستور
والماحفظ دينه الوادم تكفره...

حجي طه : رفعت عيونها سبحان الخالق هاي العيون گبار وسيعات وسود سواد الليل بدون قصد مني صفنت عليها
لا ممحتاجه
حجي طه : شون ممحتاجه واني تنشغين بلبجي احد تعرضلج صار شى نزلت وجهه ورجعت تبجي
لا اله الا الله بس جاوبيني شسمج انتي
ليش
حجي طه : اختي مو قصدي بس حتى افتهم واساعدج
اسمي صبا
واني اسمي طه بس فهميني شصار
صبا : طبيت للكراج بعدني امشي اجه واحد من ورايه وجر الجنطه حيل باكهه مني واني ركضت وراه وانكسر حذائي وهسه اني محتاره شون ارجع للبيت
حجي طه : وانتي شجابج من الصبح
صبا : غير دوام واليوم عندي امتحان وكلت اروح من وكت حتى اراجع هناك واجيت حتى الحك على الفورتات وصار كل هذا
حجي طه : كافي تبجين بله حذائج خلي اشوفه ذبيت الجنطه من ايدي
صبا : هاا لا عوفه
حجي طه : شبيج خايفه تره والله قصدي اساعدج
صبا : لا مو خوف بس عوفه
حجي طه : ياعيني جيبي بلكت نسويله حل
صبا : قابل شسوي
حجي طه : العسكريه ربتنا گلب خلتنا من الماكو نسوي اكو جيبي ياعيني خلي اشوفه

دنجت ونزعته اباوع كعب عالي صفنت على الثاني اذا اكسر الكعب الثاني مراح تتوازن لان كعب الوره اعلى
شوفي ابقي هنا بمكانج ابد لتتحركين بين ما اسوي الحذاء واجي
صبا : لا عفيه وين تروح
حجي طه : هسه انتي ليش خايفه قابل راح ابوكه هو مكسور
صبا : لا العفو بس شون تسوي
حجي طه : مالج دخل ربع ساعه واني يمج
اخذته وطلعت اكو بره الكراج صباغين احذيه رحت على واحد منهم اصبغ دوم يمه وشوفته الحذاء كال دك كم بسمار اقلها يلزمه كم ساعه
اخذه من ايده ودكه ورتبه بس هم يخوف على ساعه وينشلع بس احسن من ماكو

رجعت الها اباوع عليها من بعيد واكفه على صفحه مثل الطفل التايهه شكلها يجذب الرايح والجاي واني امشي واتفرب بديت اتمعن بيها طولها وكفتها وصلت الها شافتني وعيونها تلالي على ساعه وتنزل دمعتها
صبا : هاا صار
حجي طه : صار بس يخوف على لحظة ينشلع مو تكولين مكال الاحسن ترجعين للبيت تبدلي وبلكت تلحكين على الامتحان انتي بيا كليه
صبا : مرحله اولى تربيه رياضيات
حجي طه : ماشاء الله الله يوفقج
صفنت بوجهي تذكرت ماعدها فلوس مديت ايدي وطلعت منها وكتلها
سمعي اختي الله شاهد مابنيتي شى غير اساعدج واني عندي خوات بعمرج اعتبريني اخوك واقبلي هاي الفلوس مني
صبا : لا عفيه شون وترجف
حجي طه : بس اسمعيني انتي مشايله ولا فلس وهاي كروه رجعتج للبيت
صبا : لا مااريد
حجي طه : زين لتاخذيهن شراح تسوين هسه رجعت رفعت وجهه بوجهي ودمعت عينها
حجي طه : اخذيها واعتبريها دين
صبا : وشون ارجعهم
حجي طه : اني بعد ١٠ ايام التحق مثل هيج ساعه تلكيني واكف هنا وعود رجعيها
صبا : اذا هيج اخذهم
مدت ايدها واخذتهم تعالي ورايه خفت اعوفها ويصير شى وما ادري بيها وهي هم مثل الطفله تمشي ومنزله راسها وين بيتكم
بلمنصور
حجي طه : وين بلمنصور
صبا : حي دراغ
وصلتنا يم السيارات وصعدتها وبقيت واكف
فتحت الجامه وكالت
صبا : اخذ راحتك هسه شويه وتقبط السياره
حجي طه : ميخالف حتى اطمن اكثر
نزلت عيونها واحسها متوتره وخايفه بدت تقبط وكالت شكراً تعبتك ويايه
حجي طه : ماكو تعب الله وياج
راحت واني عيوني على السياره خطيه كسرت خاطري تخيلت نهر مثلها ورجعت للبيت ونزلت براس الشارع واتمشى كل ماانزل اتخيل جعفر جاي يركض علية ياخذ الجنطه مني
وصلت للباب باوعت سياره علي موجودة مبين بعده مطالع فتحت بيتي ودخلت ودكيت الباب الداخلي فتحته ام سندس

ام سندس : هله يمه شونك شون كيفك وعافيتك
حجي طه : بست ايدها الله يسلمج عمه
باوعت الكل نايم خطيه مردت اكعد احد دخلت سبحت وفتت على كيفي شفت سندس نايمه وحسام بحضنها وسليل بلجربايه مالتها نايمه على ظهرها وفاتحه ايدها تكول تشتغل عماله فدوة لنومتها
مكدرت كزكزت عليها بستها تحركت شويه رفعتها حضنتها رايحه مايعه من النعاس شميتها اوف فدوة لهاي الريحه الطيبه
جان تفتح عيونها سندس
سندس : ها الله يساعدك اجيت
حجي طه : الْحٍمَدٍ للـّہ هسه وصلت
سندس : الْحٍمَدٍ للـّہ على سلامتك اكوم اسويلك اكل
حجي طه : اذا مابيج حيل اني اسوي
سندس : لا هم ناكل سوه
طلعت وبقيت اكعد بحسام حيل مشتاق الهم وحطيت كل واحد بجهه على رجلي وابوس بيهم
كعدنا نتريك وخطيه ام سندس سلمت وراحت دوم هاي المره متعبيها ويانه بس شسوي منو الهم واني هناك
خلصت اليوم بين الجهال العب روحي بيهم ومشتاق كلش الهم جانت سندس هادئه حيل وتبتسم طبت سبحت وعدلت نفسها وبقت كاعده يمي ونلعب الجهال گلت ياالله بلكت الله هداها لان اخر مره هم جانت عاقله واي موضوع مفتحت ويايه
سندس : اكول حبيبي
حجي طه : كولي
سندس : سمعت بمرت جعفر
حجي طه : لزمني گلبي من ذكرته شبيهه
سندس : على كيفك رجفت
حجي طه : ولج مو عليها غير على اخويه من ينذكر اسمه يطك گلبي
سندس : هاااا اخوك
حجي طه : شبيهه مكلتي
سندس : طلعت حامل
حجي طه : ياالله والله فرحتيني يعني اخويه راح يبقى حسه بلدنيا
سندس : وشبيك هيج تريد تبجي من الفرحه شون اني من كتلك حامل مسويت سوايتك هسه

حجي طه : لج بابا شجاب هاي على هاي اكيد يختلف اخويه وراح اكيد اي شى من ريحته تحيينا
سندس : يجوز
حجي طه : شو تحركين بحلكج جنج مقانعه بكلامي
سندس : لا يابوي قانعه وابصم بلعشره
حجي طه : كملي وهسه هي وين
سندس : منو
حجي طه : هاي شبيج غير كعد نحجي على مرت جعفر
سندس: رجعت هنا مرت ابوك لزمتهم من ايدهم التوجعهم
حجي طه : شون يعني
سندس : يعني شرطت اله اثنينهن يرجعن او علي : يطلك نوريه وابوهم رضا شيسوي
حجي طه : يعني امي متوب
سندس : عشتوو امه هاي بعدك تتذكر

حجي طه : وتبقى امي وما اكدر اذكرها بغير شى ولج الام الي تربي مو التخلف
سندس : وخوش ربتك وشمرتك واخذت ورثك بله متسكت رحمة للعباس ابوفاضل
لا احرك روحي من وره سوالفك وفطاريتك
حجي طه : والله تسوين فضل الله وياج
سندس : على گلبك خلي اشوف شون تخلص مني
حجي طه : هسه اني گلت شى انتي تكولين احرك روحي وشجعتج
سندس : اوي اكوم اكمل شغلي احسلي انت راح تربيلي گلب بصف گلبي
حجي طه : سلوله باباتي شفتي امج المخبله دير بالج اطلعين عليها
سندس : خو انت كل متشوفها تكولها هيج شفتني مخبله
حجي طه : اني المخبل الكاعد يمج اصلاً اطب انخمد احسن
بست الجهال وطبيت نمت نومه مال ميت محسيت على روحي غير ويه صلاة الفجر ونايمه بصفي سندس والجهال بمكانهم
كمت توضيت وصليت ودخلت المطبخ اشوف شى اكله فتحت الثلاجه اكو اكل عروك وشويه بتيته سلك بماعون طلعتهم وطلعت خبز وكعدت اكل بلعسكريه صار عدنا عادي اكل الاكل بارد اصلاً اجت ايام ناكله يابس المهم يسد جوعنا
سويت لفه بلخبزة وطلعت كعدت بلكراج واباوع على الجو شون يفتح وخيوط الشمس تطلع والهوا طيب نهايه شهر الثالث ١٩٨٥ مدري شون تذكرت البنيه الي شفتها الصبح مركزت بمعانيها حيل بس عيونها بالي اكل واتخيل دموعها شون تنزل وتبجي مثل الطفل لاارادياً ابتسمت بعدين انتبهت على نفسي وتعوذت من الشيطان شجاني اني بعمري مصافن على وحده استحي واخاف الله نفضتها من خيالي وكملت اكلي بقيت افتر اباوع عندي ترك صغير اباوع ازرعه واخلي الجهال يلعبون بيه ليش محصورين بلهول كعدت الملم بيه وجبت كونيه والم شكو غراض سكراب وشغلات منريدهن اشتغل والوكت مشه لحد محسيت تنجر دشداشتي من وره انداريت سليل هلا هلا بلغاليه تريد اشيلها واني گلي تراب
سيلني بابا ( شيلني بابا )
هسه باباتي اكو بوري قريب غسلت ايدي وشلتها يمه فدوة لحبيبة ابوها
سندس : هاي يمك واني ادور عليها
حجي طه : صباح الخير
سندس : صباح النور يله تعالو خلي نتريك
حجي طه : عندج ريوك لو اجيب
سندس : لا عندي متسوكه
باوعت ساعه ١٠ حيل كل هاي الساعات اشتغل بيها
وره ساعتين اندكت الباب فتحتها واشوفها كدامي شمرت نفسها بحضني وتبجي
نهر : اشتاقيتلك كولش
حجي طه : مو بكدي والله تعالي طبي بست راسها وسحبتها بيدي وعيونها كله دمع
تعالي اكعدي
سندس : هو احنا منشوفج بس من يجي اخوج
نهر : شونج سندس
سندس : بخير خير رايده شى
حجي طه : طبي جوه واخذي الجهال وياج
سندس : شكو ليش عدكم اسرار
حجي طه : نفخت بنفاذ صبر وصوتي صار عالي ادخلي جوه لا اعرف شون ادخلج
سندس : هو انت بس تشوف اختك تتخبل علية
حجي طه : لا انتي مو حچي وكمت عليها
سندس : رايحه رايحه تعالو يمه ابوكم عنده اسرار ويه عمتك اسم الله
نهر : بس لو افتهم ليش تكرهني
حجي طه : مالج دخل بيها شونج حالج صحتج
نهر : متأذيه حيل وتعبانه منا سالفه جعفر وكسرتي وانت ماكو وخوفي عليك وامي الي يوميه مشاكلها وهي اگلت گلبنا
حجي طه : ليش شتريد
نهر : رجعت نور لبيتنا لان حامل وهسه تفكر تزوجها لسلام وسلام كال لو اموت مااتزوجها
جان تطلع سندس تعيط مبين تتصنط علينا
سندس : اي عيني وجايه تقنعين الفقير يتزوجها مو
حجي طه : ولج انتي متستحين تتسنطين علينا
سندس : لا ما استحي اني اعرف جيت اختك حتى تهدم بيتي من اكولك الله ميجرعهن ادافع الهن
نهر : كام من مكانه وجرها من شعرها واني ركضت علية فدوة طه عوفها

حجي طه : يعني انتي متوبين مو عيب عليج هذا الحجي اخ واخته وكاعدين نسولف شكو اجيتي بنصنا
سندس : ااخ عوفني هو انت بس كادر عليه
حجي طه : شون تخليني ادوس بطنها جم مره احلف ماا اضرب مرة وترجعين تشيطيني هيج تحبين الگتل
سندس : وليش تضربني لان كشفتها تريد يزوجوك هاي كراطه الزلم
نهر : والله اجيت اشوفه لا ازوجه ولا شى ورايحه للبيت وبعد ما اجي بس اسكتي
حجي طه : وروح ابويه واخويه اذا ما اجيتي بعد حتى سندس اطلكها
سندس : صخام اطلكني لان متجي هنا اي عمي لكيتلك خوش حجه حتى تتزوج ذيج بواكة الزلم مو نسوان عصابه كوه هي
نهر : اجي عفيه طه كافي عوفها
حجي طه : انت مكعد تسمعين لسانها ملخت شعرها وهي تزيد بلحجي دفعتها حيل انركعت بلبوفيه وكتلها اذا مدخلتي هسه للغرفه وسديتي بابج عليج اعتبري نفسج طالك
نهر : كامت وعيونها تنط شر ودخلت ورجعت الباب اباوع على ايده كله خصل من شعرها
نهر : شجاك ياعيني اول تالي تضرب
حجي طه : هاي تخلي ابليس يتوب ولج موتتني اخ لو ما الجهال ما اعرف وين اوديهم باجر اشمرها بلشارع بس ذولة مخليني متحملها ولج مصار ساعه من جانت هادئه وتحجي بهدوء شويه وگبت تكول شيطان وفر راسها
نهر : هي هاي مرتك من يوم متزوجتها
حجي طه : تعالي اكعدي خلي افتهم شبيهه امج
نهر : موتتنا منعرفها شتريد وشاده ويه البنات
حجي طه : وعلي شيكول
نهر : علي لو عندة فلوس جان فلت بس الفلوس كلها عد امي مو تدري
حجي طه : ونور زوجتة شتكول
نهر : حجي بيني وبينك تكول بس اولد ماابقى لحظة هنا وشيصير خلي يصير وبيتنا صاير حرب كل واحد يتعارك من جهه
حجي طه : الله يهدي النفوس وانتي
نهر : كاعدة وساكتة شسوي امري لله وين اروح
تعالي يمي
نهر : يمه الف انعام ولا سندس وحده اقلها ذيج امي غصب عني اتحملها هاي شون اتحملها انت الك قصر بلجنة لان متحملها
حجي طه : هذا هو شنسوي
نهر : اروح اني دير بالك على نفسك وقبل لا تلتحق اجيك
حجي طه : هلا بيج راحت وطلعت سندس تباوع بتك عين لتباعين هيج تره اشلعهن الج عافتني وطبت للمطبخ تكمل شغل
ايامي خلصتهن بين البيت وسامي وشغلي بمطعم خاله الي لولاه مااعرف شسوي اقلها الكم فلس يطلع من الشغل هم يفيدن
علاقتي بسندس عاديه مره ورجال اتقرب منها بس اداء واجب ومرات احسها مثلي اداء واجب تعلمت على سوالفها انطيها الاذن الطرشه من تلغي لان ماعدها بس كالت مرت ابوك وحجو اهلك وشوف فلانه شصار عدها وفلانه شلبست شكد حاولت افهمها يابه هاي مقدرتي هاي عيشتي ميفيد مبقى عندي غير اغلس عنها

مرت ١٠ ايام وكعدت اليوم الاخير احظر غراضي واكيد مثل كل مره سندس نايمه ونهر تودعني بستها من راسها وذبت المي ورايه كمت اتفائل بهاي العادة احسها اطمن روحي بأن راح ارجع عايش بس الي يأذيني دموعها بعد كل روحه
واني امشي وصعدت للسيارات حسيت ناسي شى ياربي شناسي شنو الي بالي وصلت للكراج وامشي بطئ بس اريد اتذكر جناسي بجيبي دفتر الخدمه عندي اكلي ملابسي شناسي واسمع صوت ناعم ينادي ورايه مثل الواحد يركض وره واحد ويريد يوكفه
طه طه انداريت اي اتذكرت هاي البنيه والله نسيت وصلت يمي اول مره اتمعن بوجهه وملامحها
صبا : شونك طه
حجي طه : شونج صبا مو
صبا : اي جنت انتظرك
حجي طه : ليش
صبا : شنو ليش نسيت اتفاقنا
حجي طه : اووو اعذريني والله عقل ما ضل كل ما التحق افصل من كولشي ليش تعبتي نفسج تره اني ما اريدهن بس بيومها ردتج بس تاخذيهم حتى ترجعين لبيتج وانتي مطنكره
صبا : هههه شكراً
حجي طه : ها اعتذر مو قصدي اني قصدي وكمت اتلعثم بلكلام
صبا : والله افهمت قصدك وشكراً لان ساعدتني وكفتك ويايه ما انساها
حجي طه : يابه قابل شكو اي واحد غيري يسوي اكثر
صبا : تفضل
حجي طه : والله مااخذهم مو عيب مرجعتهم هو شنو قيمتها
صبا : اترجاك اخذهم حتى ارتاح والله خفت لا اتأخر عليك وبعد ما اشوفك وتضل بذمتي
حجي طه : محالله وموهوبه ولا تهتمين
صبا : اخذهم عفيه والله اضوج اذا متاخذهم
حجي طه : لتضوجين جيبيهم
صبا : تفضل
حجي طه : وهاي شنو بعد
صبا : هاي ماما دزتهم معجنات كالت اشكري على وكفته وكالت ادعيله الله يحفظة لشبابه ويرجعه سالم لأهله
حجي طه : دعوتها تسوه الدنيا هاي كافيه ليش بعد تعبت نفسها
صبا : ماكو تعب بس ها اني هم تره سويت وياها مو بس هي
حجي طه : ابتسمت على برائتها وهدوئها من تحجي عاشت الايادي ماطول هيج اخذهم حتى اشوف تعرفين تسوين معجنات لو بس شاطره بلبجي
صبا : هههههه لا لتخاف راح يعجبوك
حجي طه : اروح اني انتي هسه وين رايحه
صبا : رايحه للدوام
حجي طه : الله يوفقج ويستر عليج ديري بالج على نفسج طلعت هاي كلمات من حلكي بطيب خاطر ليش مااعرف حجيتهم من كل گلبي ابتسمت على كلامي وكالت
الله يرجعك بالف سلامه
عفتها ومشيت واني لو بيدي ابقى واكف احجي وياها بس مبقى وقت
طول الطريق افكر بكلامها بهدوئها وارجع اتعوذ من الشيطان واتذكر اني رجال متزوج والبنيه بطيبه اخلاقها اجت ليش افكر بيها واكيد بعد ما اشوفها

وصلت للوحدة مالتي ورحت للموقع اباوع اهوو رجعنا للضيم بس الْحٍمَدٍ للـّہ هلمره التحق محسن ويايه شنو اغير جو وياه
كملت كولشي واستلمت السلاح وتبادلنا موعد الواجب مالتنا كعدنا على الساتر والجو يخبل نص الرابع ربيع والهوا يلعب بروح لعب وليل ونجوم والجو صافي كاعد وجان اشوف محسن جايب الجاي
حجي طه : اي والله وكته
محسن : شبيك صافن اشتاقيت مو
حجي طه : المن ولك
محسن : للمره والجهال
حجي طه : للجهال المره ارتاح من مصايبها
محسن : ههههه بعدك هيج
حجي طه : وجنها مكتوبه العمر كله حطيت الجاي بحلكي واتذكرت المعجنات العلاكه
هسه جايه الزم مكاني
محسن : وين
حجي طه : هسه اجي وتشوف ركضت وجبت العلاكه فتحتها لكيتها اثنين شلتها ورجعت گلت هناك اشوف شبيهه
محسن : هاي شنو صاير احوال
حجي طه : اسكت خلي اشوف شبيهه فتحتها وكفختني ريحه الگليجه الطيبه المعجونه بلدهن الحر والعلاكه الثانيه كيك مقطع بحافظة وبصفها شكرلمه
محسن : وتحجي على المره شوف شون معدله
حجي طه : هاي مو مره
محسن : خنتها
حجي طه : هي منو
محسن : مرتك
حجي طه : خبال يعني اذا اجيب اكل مو مرتي مسويته يعني خيانه
محسن : مو اذا هيج اصناف وهيج ريحه مال واحد من گلبه مسويها وميسويها غير الام والمره واثنينهم انت غاسل ايدك منهم اكيد وجهه جديد
حجي طه : خبره عمي من يومك خبرة وكعدت سولفت اله
محسن : حب من اول شلعه كعب
حجي طه : ها شبيك هو اني مال هيج سوالف
محسن : ليش شبيك شاب وحليو وابن اوادم وخير والف وحده تنعجب بيك
حجي طه : كبرنا بابا على هاي الشغلات
محسن : صحيح مو عمرك ٦٠ سنه هو كل عمرك ٢٧ سنه بالالاف مثلك ممتزوجين
حجي طه : بس الگلب شايب
محسن : انطيني خلي اضوك اخذ وحط وحده بحلكه بلع طبعاً اخ الله تخبل ولك اكل منها گلبك يرجع طفل
حجي طه : ضكتها والله عاشت ايدهم مبينين نفسهم طيبه

محسن : حلوة
حجي طه : ماادري
محسن : من خرب حظي البازه رجال شطولك شعرضك وتشوفها مرتين ومتتمعن بيها ولك حجي علية احجي غيرها
حجي طه : حرام بابا اباوع على عرض غيري واتحارش بيها
محسن : ااخ ماكو ايراني يگتلك ويخلصني منك اني كلت تحارش گلت تمعن حلوة زركة عوبه نائب ضابط جبار
حجي طه : هههههه لا مو لهاي الدرجه هي عيونها سود وساع وبياض عيونهانقي انقى من الحليب وحلوة كولش تجذب النظر حيل وثاني مره انتبهت شعرها اسود طويل بس شايلته ناعم نعومه الليل وحنطيه مو بيضه معانيها نازكه طويله وصاحبه جسم مرتب الي يشوفها ينجذب بجمالها جمالها شرقي يسر العين
محسن : هاي مباوعت على عرضها وهيج مفصلها لو تباوع شسوي تغتصبها
حجي طه : كوم لك انت مو ادمي واسولف الك صوجي وروح ابويه

محسن : هههههه ولك يحجي وكعت
حجي طه : شنو وكعت
محسن : ادوهنت وحبيت وكام يطك اصبعتين
حجي طه : اشش فضحتنا جنك من ذني الكيوليه اني زايده مني اسولف الك
محسن : شوف خويه انت ماطول فصلتها هيج تفصال معناها خشت عقلك واذا خشت العقل معناها راح تخش الگلب واذا خشت بهذا الاحمر الطايح حظ ويأشر على الگلب متطلع منه لو صدام نفسه يكولك طلعها
حجي طه : اني اعرف اليوم اعدامنا على ايدك
محسن : محد يسمع طنش هسه كولي تندل بيتها
حجي طه : تره انت طولتها وعرضتها البنيه ساعدتها وبس وماكو شى من البالك واصلاً بعد ما اشوفها ولتنسى اهم شى اني رجال متزوج
محسن : يابه دطير شوف وجهك اليوم شون مورد هنه گليجات گلبنك ورد وجهك يضحك لو تحبها يمكن تگلبك على البطانه
حجي طه : اكله متزوج وعندي جهال ياحب
محسن :شم شم شوف الكيك شون ريحتة طيبه واتخيلها شون تسوي بيدها الك
حجي طه : انت شيطان واذا ابقى يمك مو بعيد اكوم اشرب خلي اروح لغير جهه احرس احسن الي

محسن : روح خويه بس تذكر كلامي اذا ما جيت تنوح من حبها يمي ما اتسمى محسن
حجي طه : عفته وكمت وكلامه يرن بأذني ليش وصفتها بهذا الوصف الدقيق وليش تمعنت بتفاصيلها البنيه صح حلوة بس اني كل ما انزل اشوف اشكال البنات احلى منها مايوم شلت عيني على وحدة منهن

بقيت اكل واتذكر ابتسامتها هدوئها وفجأه تجي سندس بالي اطير ام الراحه واتذكر عياطها وسوالفها
بهاي الفتره شاركنا بمعارك هوايه من غالبيين ومره مغلوبين ومثل باقي السنين نزف الالاف الشهداء
رجعت من اجازتي واني بلكراج عيوني ادور عليها مستحيل اشوفها ضحكت على نفسي اكو واحد يتوقع يشوف وحده بعد شهر تلكه حتى اسمي نسته
الله يحميها واني راجع صعدت سياره ومنتظر تقبط وصافن على الرايح والجاي ودوم نزولنه الصبح والطلاب تروح وتجي لمحتها اي وروح ابوي هيه صفنت اي هي والله مثل المراهق نزلت اركض قبل متصعد لطريقها وبيدي الجنطه مالتي سويت الطريق دقيقه وقريب ما اوصل الها ثكلت المشي وانتبهت على نفسي اني شسوي مو عيب هاي اني عود الاخاف الله زين اسلم عليها قابل اني شمسوي وضميري يكول اكعد لتفشلك وتطلع ناسيتك اصلاً

مشفت نفسي غير انادي بأسمها شونج صبا
حسيتها اندارت متفاجأه وياها بنيه مبين عمرها
بس الي استغربت منها ابتسامتها من شافتني ومباشره كالت
صبا : هلو طة الْحٍمَدٍ للـّہ على سلامتك شنو هاي الصدفه الحلوه
حجي طه : اي والله احلى صدفه هااا اني شگلت غير اثكل شبيه
صبا : بيك شى ليش سكتت طمني شونها الجبهه
حجي طه : كلها موت شونها
صبا : الله يساعدكم ويحميكم
حجي طه : ويحميج اترخص
تحركت خطوه ورجعت كتلها عااشت ايدج وايد امج على المعجنات الطيبه
صبا : الف عافيه اكيد عجبتك لو تجامل
حجي طه : لا ما اجامل اني بقت تباوع علية واني هم عبالك اثنينا نريد نسولف بس منعرف عن شنو
طلعت مني وكتلها احسبي ١٠ ايام والتحق ويجوز الصدفه تتكرر ابتسمت ونزلت عينها وكالت ان شاء الله تتكرر
استأذنت وراحت واني گلبي يدك سريع بحياتي مشفت گلبي هيج يدك بقيت اباوع عليها من بعيد شون تصعد هي وصديقتها واندارت وشافتني بعدني على وكفتي واباوع عليها حسيت عبالك عيوني متقبل تغمض حتى تشبع منها
ابتسمت من شافتني واني روحي مثل الطير تفتر داير مدايرها شبيك ولك طه تخبلت هذا ضميري الدوم يذكرني بوضعي وحياتي
وصلت لبيتي واشوف حسام يمشي بلكراج وبصفه سليل تلعب وياه
هنا سليل عمرها سنتين وحسام ١٠ اشهر وصلت للبيت واستقبلتني سندس استقبالها البارد الخالي من كولشي حتى الابتسامه جنت دوم ما اهتم ولا افكر بس هلمره انتبهت تستقبلني وكأني جنت طالع قبل كم ساعه ورجعت مو مره صار شهر رجلها ماكو
اول مكعدنا سمعنا عياط طفرت سندس فوك
حجي طه : شكو ولج وين رايحه
سندس : اوكف خلي اشوف شكو
حجي طه : منين تشوفين
سندس : من شباك مال المخزن يشرف عليهم كولشي اسمع
حجي طه : واني اكول منين تعرف اخبار البيت ومحد طابلها ولج شنو هذا المرض من راقب الناس مات هماً
سندس : خلي اروح اسمع وانت ابقى هنا يم الجهال حتى متموت بلهم
بقيت اهز بيدي شويه ونزلت تركض
سندس : مرت جعفر تطلك
حجي طه : وكفت على حيلي حسيت جعفر يصيحني
وركضت وجان تلزمني وين رايح
حجي طه: اروح اساعدهم
شتساعد قابل انت الجدة وجيبها اكعد واسكت هستوك اجيت
حجي طه : ولج مو راح يجي للدنيا ابن الغالي
سندس : من تجيب روح
حجي طه : دولي عفتها وطلعت فتحت الباب صار بوجهي علي توقعت يسلم وخاصه صار ٩ اشهر مشايفه كل ما اجي منتصادف ونتشاوف دار وجهه مني انقهرت وانمرد گلبي بس گلت هذا هو خلي
صارت نهر بوجهي ممصدكه تشوفني وحضنتني وجان تصيح عليها انعام
انعام : فضيها هسه وكتها
حجي طه : تقرب منها ردت اسلم عليها شونج يمه دنجت ابوس ايدها بعدتها وكالت
هلا يله امشونا لا نتأخر ودارت وجهه مني

توقعت تتغير او يحن گلبها علية بس طلعت غلطان وهلمره قست اكثر
بقيت واكف والوب اريد اعرف شصار شويه ورجع علي ونهر يمكن ناسين غراض لان الجدة بيتها قريب
لزمتها ها بشري
نهر : بنيه تخبل اجت بته لجعفر
حجي طه : نزلت دمعتي ااخ ياخويه وحزام ظهري رجع نفسك بلدنيا وهاي بتك راح تصير بمكانك
نهر : فدوة للحنين كون تطلع حنينه عليك وعلى ابوها
حجي طه : ماطول ابوها جعفر تطلع
مر يومين واستحيت اروح اسلم وخاصه بعد الصار بلباب بس وضع سندس مو طبيعي
شبيج تلوبين
سندس : اسمع طة اخاف مرت ابوك السعلوة تجي وادك اليتيمه يمك واتزوج مرت جعفر والقران احرمك من جهالك اذا وافقت
حجي طه : اول شى اني ما امشي بلتهديد ثاني شى مو اني الاكدر اتزوج مرت اخويه وتدني نفسي عليها وثالث شى نصي صوتج لا بلنعال على حلكج تره موتيني هاي النزله الكشره عليك متعبتي ياصاعده يانازله حتى جهالج عايفتهم وحدهم
سندس : شكو عليهم يلعبون وانت يمهم غير افهم شصار

حجي طه : الله يهديج
خلصت باقي الايام بتعب بس الجان مصبرني باجر اشوفها بس دخل الشك بگلبي هي تعرف موعدي بس ياترى راح تجي
طلعت وحبيبتي نهر واكفه صفنت بوجهي وكالت
نهر : طه شبيك
حجي طه : شبيه
نهر : كل مره اشوفك مهموم من تريد تروح وتسحل بروحك سحل وضايج وحتى مرات ادمع هلمره احسك تريد اطير وتروح
حجي طه : هااا ماكو شى
نهر : اعرفك اكثر من نفسي بس يله اكيد اذا عندك شى يجي يوم وتكولي
حجي طه : الله كريم ودعتها وركض للكراج تكول سباق عندي
وبقيت انتظر والدقيقه اباوع عليها تاخذ روحي وياها وجان اشوفها مناك تجي والابتسامه راسمه خدودها رسم ويه كل دوسه بلكاع احس گلبي دكاته تصير ضعف

وصلت يمي وابتسمت صباح الخير
حجي طه : صباح العافيه
صبا : گلت بس لا تأخرت ورحت
حجي طه : لا منتظرج
صبا : منتظرني
حجي طه : حتى اسلم عليج
صبا : تفضل
حجي طه : هلمره ليش
صبا : هلمره اني وحدي سويتهم الك
حجي طه : اكيد طيبات صفنت بوجهه وكتلها
صبا : ليش صفنت
حسيتها استحت لان بس ساكت واباوع على وجهه
حجي طه : اريد اشبع شوف منه
صبا : ليش
حجي طه : لتسأليني اني نفسي ما ادري ليش
صبا : تدري ما اعرف ليش اليوم اجيت وشون جابتني رجلي لهنا تدري اني خلصت دوام وكملت امتحانات هاي السنه
حجي طه : دك گلبي ونبض بقوة من كلامها معناها اجتي علمودي
حجي طه : اريد من ارجع اشوفج اذا مابيها احراج الج
صبا : شوكت تنزل
حجي طه : احسبي شهر من اليوم
صبا : راح احسب يوم يوم
حجي طه : ديري بالج على نفسج
صبا : ترجع سالم يـِْ♡̨ـِْا رَبّ
بقت عيونا تتعارك حتى تشبع من الشوق كم مره شفتها بس بكل مره احس اكو شى بگلبي الها كولشي مااعرف عنها غير اسمها وبأي كلية اداوم بس احس هاي البنيه هي راح تگلب طه وتحي المات بيه

رجعت للجبهه بس هلمرة احس داخلي بيه شى واكيد اول واحد حس علية محسن
محسن : ماطول اكو ريحه كيك لعد شفت ام عيون وساع
حجي طه : اي ولك شفتها من نزلت ومن التحقت
محسن : هلا والله صاير تلعب من ورايه
حجي طه : شلعب ولك بس اني شون هيج طلبت منها
محسن : شطلبت تتزوجها
حجي طه : لا ولك اشوفها من انزل
محسن : عبالي يصادقها يطلع وياها بس يشوفها من ينزل ولك لشوكت تبقى فاهي النسوان متحب هيج صير قوي تأمر وكول الها يله اشوكت اشوفج تره اجازتي قليله وتعالي نكعد بمكان وحدنا
حجي طه : استغفر الله هو اني وجهه هيج شغلات ولك انت متستحي يول مو تزوجت ومرتك حامل شوكت تعقل وجان يكوم يغني ويطك اصبعتين

محسن : يام العيون السود ماجوزن انا
خدك القيمر انا اتريق منه

لابسه الفستان وقالت لي انا
حلوه مشيتها دتمشي برهدنه

لو تحب خادم خادمها انا
ولعوف الدوله واعوف السلطنه
واقفه بالباب تصرخ يالطيف
لاني مجنونه ولا عقلي خفيف

حجي طه : والله الفرقه كلها عرفت من وراك واذا حجيتلك بعد اضربني بسطالك
محسن : تجي وتسولف وبيدي الفلك الجگاره وتجر نفس وتكول كمت احبها لك ساعدني
حجي طه : على جنازتي ولي
طلعت وعفته واحس كلامه راح يصير زين شون احب اني ما مسموح اليه اني رجال متزوج بس شسوي حيل هاي البنيه دخلت عقلي كمت احسب الايام حتى بس اشوفها
ومرت الايام حروب صعبه والوضع يشتد والجانب الايراني مستقتل بحيث يدخلون بالالاف انتحارين حتى بس يسيطرون وكلهم شباب صغار مثلنا واصغر تعبت طول هاي المده واني احس الى متى اخلص عمري هيج وخاصه ماكو تسريح لان حرب يعني مااخلص الخدمة اله تخلص الحرب وعلى هذا الحال يخلص عمري ويجوز استشهد وممتسرح

اجاني محسن يلعب بعيونه اكولك ابو الحب
حجي طه : هاي منين سامعها
محسن : غير انت ابو الحب اكو غيرك اخاف تشوف ام العيون السود كول الها الگليجه زيدي التمر مالتها ذيج المره التمر قليل
حجي طه : بصفي حجاره جبيره شلتها وركعتها بيه اجتي بجتفه
محسن : ااخ هينه تجيني وبعيني وانطيك ظهري ومااسمع الك اله اخليك حتى القيافه تغسلها وتفرك ايدي الضربتها اذا ما اذلك بعيني
حجي طه : امشي لك ابو البنات كون اشوف المره واكول الها تعالي شون يفكر بلنسوان
محسن : متصدكك تعرفني فقير حمل وديع لا اهش ولا انش
حجي طه : والله انت تودي الواحد للبحر وترجعه عطشان اسألني اني
محسن : العليه كلته اريد گليجه ام التمر زايد
حجي طه : هههههه ولي من خلقتي
نزلنا واني رجلي تتراكض اريد اوصل الها
وشفتها واكفه اخ ياگلبي شكعد يصير بيه اجتي وابتسامتها هاي الذوبت روحي من يوم ما شفتها
صبا : الْحٍمَدٍ للـّہ على سلامتك تأخرت
حجي طه : اي بين مقبطتت السياره خفت لا ما اشوفج
مدنجه وتحجي شون متشوف واني انتظرها يوم يوم
حجي طه : صبا
صبا : ها عيني
حجي طه : اخ ربي اني عيونج هاي الحلوات من كثر ممشتاق الها تجرأت بلحجي وياها وكأني اعرفها من سنين صار ٣ اشهر اعرفها بس وكفاتنا معدوده وحديثنا بسيط هلمرة الشوق تغلب حتى على الهدوء العندي وهي هم حسيت بنبره كلامها ورجفته وخجلها مشتاقه اليه
صبا : صحتك شونها
حجي طه : هسه ردت صحتي
صبا : طه اني ما اعرف شديصير وشون تجرأت واجيت لهنا رغم ماعندي دوام وعطله
حجي طه : اني هم ما اعرف شيصير بس الاحسه روحي مفرفحه واريد بس اشوفج
صبا : يله روح تأخرت
حجي طه : تكدرين تتأخرين بعد نص ساعه مو هوايه نتمشى يم حديقة الزوراء
ابتسمت وهزت براسها بلقبول طلعنا وعبرنا وهي بصفي والجنطة بيدي نسيت حتى نفسي ونسيت لابس زي عسكري ردت بس اسولف وياها هاي الدقايق البسيطه تعذبني تخليني اريد اعرف كولشي عنها كراج العلاوي قريب على المتنزه بقينا نتمشى ونسولف
احجيلي عنج
صبا : شحجي
حجي طه : اي شى
صبا : تعرف اسمي وكليتي اني بابا مستشهد بلحرب بال٨١ وماعندي بس ماما واختي واخويه متكفل بمصاريفنا متزوج وعايش بيت وحده بس قريب علينا واختي اكبر مني بسنتين ماما مره ربه بيت وره وفاه بابا كسرت ظهرها علية ومازالت تشتغل خياطه حتى تلم الفلس وتصرف على تعليمنا
حجي طه : محبيتي قبل دنجت وحسيتها حيل خجلت اعتذر اذا معجبج سؤالي لتجاوبين
صبا : لا عادي لا محبيت ابد قبل
حجي طه : صبا
صبا : ها عيني
حجي طه : اني ليش حاس اريد اشبع شوف منج ومدا اشبع حتى صوتج اريد اسمعه اكثر بس مكعد ارتوي
صبا : طه عفيه
حجي طه : والله اني خجول يمكن حتى اكثر منج ويشهد الله علية لا حبيت من قبل ولا گلت هذا الكلام ولا حسيت هذا الاحساس وياج حتى الجبهه صارلها طعم افكر بيج وكل شويه اكول عيب ميصير حرام علية بس هم ارجع وكوه ادخلين عقلي

صبا : تأخرت لازم ارجع
حجي طه : شون اشوفج ولتكولين لحد ما التحق مااتحمل لازم اشوفج قبلها
صبا : كوه اليوم طلعت
حجي طه : اني ما اريد احرجج بس اتمنى تفهميني
صبا : فاهمتك والله
حجي طه : روح يابه مودعه بالله استحيت من الحاحي وسكتت باوعت علية وبقت ساكته وكالت
صبا : اليوم سبت خلينا نتشاوف الاربعاء اكدر اطلع
حجي طه : ميت وردت الروح بيه ابتسمت الها والفرحه واضحه بعيوني
انتظرج الاربعاء هم من الصبح
صبا : اي احسن حتى ارجع من وكت
حجي طه : راح احسب يوم يوم ياريت باجر اربعاء
صبا : مع السلامة
حجي طه : وين
صبا : غير ارجع للكراج واركب للبيت
حجي طه : وشون ترحين وحدج غير اني وياج يله حتى هم اطمن عليج وهم اكسبلي دقايق وياج بقينا نمشي ونضحك حسيت روحي رجعت مراهق صغير مشاعر حلوة بشكل موطبيعي نسيت نفسي حتى متزوج وعندي جهال نسيت حتى اسمي وصلتها ورجعت للبيت واني ممصدك الصار صدك هيج جنت قريب منها واشم ريحتها واسمع صوتها واملي عيني من شوفتها واني سارح بفكري وصلت للبيت وسمعت عيطت سندس على الجهال ااخ ربي رجعت للهم دخلت ولكيتها صايره تنور من الاعصاب ولازمه سليل تضرب بيها جريتها حيل من ايدها
انتي شون تضربيها
سندس : ضربت اخوها الحقيره اليوم اكسر ايدها تكسر
حجي طه : دفعتها حيل وحطيتها بحضني لسليل وعطت بسندس شبيج تخبلتي غير اخوه ويلعبون سوه
سندس : بله مو انت هستوك جاي وتريد تعلمني شون اربي جهالي
حجي طه : ولتنسين همه جهالي هم
سندس : بس مو يمهم
حجي طه : اي مو اني صگله (لعبه قديمه) وعايفكم لو ما بلحرب وهاي فوك متكولين الْحٍمَدٍ للـّہ على سلامتك الحمدللة رجعت النا
سندس : اني تعبانه ومالي خلك وانت يرادلك گلب شكبره
حجي طه : من العياط والخبالات تعبانه
سندس : طه
حجي طه : هااا
سندس : اني حامل
حجي طه : صفنت بوجهه اني احب الجهال لان اعرف ماعندي عزوه واهلي وضعهم تعبان وكارهيني عدا نهر بس حمل سندس هزني رغم حبي للجهال يمكن دخول صبا بحياتي خلاني افكر ما اريد جهال بعد من سندس سكتت ومعلقت على اي شى
سندس : شسوي صار بعد
حجي طه : انتي كل مره نفس الشى الْحٍمَدٍ للـّہ غيرنا يتمناه يله تكومين بلسلامة
دخلت واني الهم تارس روحي ومااعرف شسوي وهاي البنيه الربطتها بيه شنو ذنبها حتى ما كلت الها متزوج بله عرفت متكول كذبت علية شجاك انت هيج تفكر حتى الكذب دخل حياتك وتريد تلعب بكيفك وتحب يمكن هاي اشاره من رب العالمين حتى اعوفها البنيه صغيره واني تعلقت بيها ويمكن حبيتها ما اعرف ما اريد اشيل خطيتها

ثاني يوم گبت العيطه بذاك البيت خفت لا احد احترك ركضت فتحت الباب صارت نهر بوجهي الحك فدوة شكوو شصار جان تجي سندس هاا شكو عطت بيها عيطه دخلي جوه هي فزت ودخلت تركض
دخلت ركض لبيت ابويه لكيت نور مرت جعفر لازمه بتها وتريد تشمرها من الدرج ومتهستره اعصابها ولازمتها تك رجل
انعام : ولج والله اذا صار شى بلبنيه لا احركج واحرك اهلج بت الگلب تردين تگتليها

نور : عوفوني اروح لبيت اهلي مااتزوج سلام لو اموت
انعام : تتزوجين ورجلج فوك راسج
نور : انت مو تردين البنيه اخذيها مااريدها
انعام :ساقطه تردين اديحين وبكيفج تلعبين عبالج ما اعرف بيج
حجي طه : ام جنات رحمة لاهلج عوفي البنيه
انعام : وانت شكوو شجابك
حجي طه : باوعت عليها ومهتميت لان وضع نور بهستريا واكفه على حافه الدرج ولازمه الطفله بس تهدها اكيد تموت ينفصل راسها عن جسمها ومو مال التهي بانعام والبيت مابي بس نهر وانعام ونور الكل طالع
شنو التردي اني وياج
نور : وتبجي وتحجي مااريد شى بس تعوفوني بحالي تزوجت ابنكم وحضي المصخم اخذه اني شعليه كلت ارجع لأهلي وطلعت حامل جبرتني امك ارجع من وره اختي وابويه لو اثنينا سوه لو لا طيحو حظي وجبروني اعيش تحت رحمتها راوتني النجوم بعز الظهر حتى رحمه ماعدها ولا تكول عدها ميت توقعت تنهد تكعد ابد
انعام : بت الگلب تشمتين بيه ساقطه عبالج تموتيني وتاخذين بيتي

نور : ساعه السودة من دخلت هذا البيت كولشي ما اريد بس اهج منج وهلمره تريد تزوجني ابنها الفاسد ولكم اخوكم فاسد هذا سلام حتى للعرض ميسوي حساب
انعام : انجبي ابني اشرف منج ومن امج وابوج ساقطه انتي ادري بيج تردين تلعبين بكيفج امهات الولد كرطتي ابني وصرتي ارمله وتخوطين وتلعبين بكيفج لا صداد ولا رداد

حجي طه : يمه عيب هذا الحجي البنيه مستوره ومرت ابنج شجاج
انعام : انجب انت ولتدخل واصلاً اني محرمه البيت عليك انت هم وجهك وجه الفكر من يوم ما امك دخلت هذا البيت وكسحت كل الخير البي وخلتني العمر كله اتختل حتى ينسون حسين تزوج علية
حجي طه : هسه هذا الموضوع شجابه بلنص بت جعفر نطت بجي راح تموت من البجي
نور : اني اعرفك طيب وجعفر گلي هذا اعز اخوتي ومن اشوفه اشوف ابويه احلفك بيه طلعني منا واخذوها لجنات ما اريدها بس عوفوني اعيش امك اذا متموتني وره ابنها مترتاح ابوس رجلك بداعت جعفر عندك

حجي طه : صعدت على الدرج وكتلها انطيني جنات واني اطلعج منا
نور : وتقنع ابويه ميرجعني هنا
حجي طه : بعيني صار بس انطيني البنيه مو راح تموت
بديت اتحرك بأتجاها
انعام : ولك طه اذا طلعتها منا اطيح حظك هو بكيفك انت شكوو جاي اطلع من بيتي
حجي طه : عطت بيها بقوة واول مره اعلي صوتي عليها
اسكتي كافي وتطلع وخلي اشوف شسوين
من شافت هيج نور كامت تبجي وتشهك وعدلت بتها ولزمتها وحضنتها هااك اخذها
حجي طه : اول مره احطها بحضني افيش ياريحة اخويه بيج
حجي طه : يله جيبي ملابسج وامشي
انعام : والله اصيحلك علي : اخلي يگتلك خلاص
حجي طه : اذا ابنج رجال خلي يجي انتظره بيت اهلها
صعدت تركض وبيدها غراضها ولزمت جتفي اني استحرم بس عفتها خطيه حالها صعب وشبه فاقده نزلت درجه درجه وتباوع على انعام وتشهك من البجي والخوف
جان تجيت انعام تريد تضربها
ذبيت جنات على نور ولزمت ايدها يمه لتخليني اسوي شى اندم علية
انعام : لك عوف ايدي گلب هاي تاليها تمد ايدك علية
حجي طه : لازم ايدج مو مادها ولتخليني اتجاسر البنيه راح تطلع واذا عندج شى دزيلي الشفيه ابنج ودفعت ايدها وسحبت نور الخايفه وترجف ولازمه جنات حيل

طلعت وشفت سندس ماده راسها خزرتها طبت وسدت الباب اكيد سمعت كولشي واثناء طلعتنا وصل علي وزوجته هي شافتهم انعام وعيطي عيطه هزي المنطقه ولك علي الحك طة مد ايدة على امك

يتبع ..