رواية ابي والغزلان الفصل السادس 6 - بقلم ريام هادي

ابي والغزلان
للكاتبة Reem
البارت الخامس

واكف عالدرب منتضرك #تعود
دفني تراب رجلين #اليمرون
صحتك لا تروح تخيل #شلون
مثل صيحت الميت #لليدفنون
انا حتاجيت جيتك حاجه #الصوت
للخرسان خايب من #يغركون
بدونك تدري عمري يخلص #شلون
مثل عمر الجكاره بحلك #مسجون

ام سندس : ولج تعاي يمعزايه كل شويه ياصاعده يانازله تخبلتي
سندس : دوكفي يمه خلي اسمع الجهال جوه صوتهم ميخليني اسمع زين بلمخزن الشباك حيل يطل عليهم والصوت واضح يمي
ام سندس : ولج ماتستحين الوادم متكدرة وحال الضيم حالهم وانتي مثل الشواذي ياصاعده يانازله تردين تسمعين گلمة غير وحده تروح تاخذ بخاطرهم وتوكف وياهم
سندس : لا بالله كولي بعد احضني انعام وطبطبي عليها بله متسكتين يمه

ام سندس : الوادم تعزت وتصخمت ولدهم لا خبر عنه خذوه الامن وانتي حايره بأنعام
سندس : والله حيل وابو زايد عساها بكسرة اكبر من كسرتها بجعفر
ام سندس : من صخم الله وجهج تشمتين بلوادم وهمه عيالج
سندس : ياعيال ذوله اعداء ذوله الي كسرو نفسي ودمرو كولشي جنت احلم بيه كاعده ام الوصخ وحاطه رجل على رجل وتتفاخر بنسوان ولدها هاج تفاخري هسه جانو دوم يكولون اني وجه الطاطوه وجه الفكر شوفي جناينهم شون وجهه عليهن راح الولد من وراهن بس هاي حوبتي اني اعرف
ام سندس : شنهي حوبتج ماكلين ورث ابوج كاتلينه همه ولدهم هذا الحجي الماصخ شله غرض

سندس : ليش نسيتي شسوو بيه شون طردني لو بلخطبه شسوت هاي حوبتي وفوكاها هذا الفاهي رجلي اخذو حصته ورثه وخلوه عامل الناس تكفخ علية وهمه يلعبون بلفلوس لعب وهسه طلعت بيهم شون كسره انكسرو
ام سندس : ولج نسيتي هو حماج الراح نسيتي شون يتفكدج بليل والصبح ويحط المصرف يوميه بيدج من رجلج ملتحق ولج يمصخمه اشهر رجلج راح وهو قايم بگلشي حتى المسواك طاب طالع يحمل ويجيب بس انتي عينج فارغه وحتى تراب الكبور ماتمليها مكان متدعين يرجع تتشمتين
سندس : يمه اني متشمتت بجعفر الله يشهد متت قهر عليه جعفر طيب وان شاء الله يرجع بلسلامة
ام سندس : لا مبين
سندس : اسمعيني يايمه اني مقصدت على جعفر قصدت على انعام اكيد هسه منتهيه بس جعفر والله وداعت جهالي متت قهر بس لو ماخذين علي ااخ الله حته واهليه اطش
ام سندس : عوذه من خلفه كلها سم ولج عليمن طلعتي لا انه ولا ابوج هيج
سندس : شبيه قابل اني اعرف الحق ينزعل منه اني بس اطلعي منها ومالج دخل وخلي اصعد اشوف شصار كون ياانعام اشوفج مسحوله وتنوحين ومكسور ظهرج وتوكعين مالج كومه بعد بحق هو الحق
ام سندس : ولج ثلثين الدعا على الداعي يثوله
سندس : قابل اني شمسويه ماكله حق احد طاردة احد شايله خشمي على الناس
ام سندس : كافي لاعبه جولة بزلمتج وهو ياعيني متحمل ضيمج

سندس : ضيمي ليش متكولين اني متحمله فكرة وبروده وقله العيشه هاج شوفي حالي جني وحده مجديه حسره الفلس علية
ام سندس : ليش كل الخير عندج تاكلين وتشربين وجهالج قايم بواجبهم شنهي هاي العين الضيگة
سندس : غصب عنه وكل هذا هم مقصر مكافي ذاك اليوم خزاني كدام انوار وتملخت ملابسها تدرين شون صرت شكدوتني كدامها من رجعتهم ملخات من ايدها شالتهم كدامي وذبتهم بلزباله بس هي تحبني وكالت فدوة الج لو قابل يشتريلي مثلهم ومرجعته للبنيه مجان فشلت هيج
ام سندس : ولو لازمه لسانج ومتأدبه مجان تشككن ملابس اصلاً
سندس : اني ادري بروحي ماعندي حظ حتى وياج وانتي امي هاج تاگلني وتشربيني بس اسولف تكول حاطيج محامي
ام سندس : انه احجي الحگ بس انتي ما يعجبج العجب ولج توبي لا تضيعين الاول والتالي زلمتج ذهب صافي وخير وابن حمولة وصايم مصلي غير وحده تبوس ايدها وجهه وكفه

سندس : ها ابوسها على الفگر
ام سندس : عيشي عيشتنا ومدي رجليج على كد غطاج لابيوم حتى هذا الغطا الله يطيره منج
سندس : اهوووو خلي اولي اشوف شصار وانتي ابقى هنا دافعي على هذا وذاك وعوفي بتج يطيح حظها
ام سندس : ربي لو تعقلها لو تاخذها هاي راح تسوينا مصيبه لا الها اول ولا الها تالي

حجي طه : بلدوام وگلبي مقبوض صار اربع ايام ومخنوك اخاف جهالي بيهم شى عليهم شى شون اعرف شبيهم مصار ١٥ يوم من اجيت بعدهوايه يله نزولي اباوع على السما جان نهايه شهر التاسع ١٩٨٤ والجو بدا يكسر وهوا عذيبي بس الموت داير ميدورنا
حتى ميخلينا نرتاح اذا الصبح طلع عليك تحمد الله من بعد ما استشهد اكثر اصدقائي كمت مااتقرب واسوي علاقات لان ماكو كم شهر ويستشهد بقى بس السلام وياهم عدا محسن دوم ويايه ومرات هم اخاف عليه گلت كون مااخسره بيوم و اشوف النائب ضابط عمر هم علاقتي طيبه بيه وهو كولش يحبني
تعبت بس اتمدد احس النفس كوه اجره واكوم اتعوذ من الشيطان لو الزم سبحة ابويه اسبح بيها لو افتح قران اقرا لو دعاء لو الهي نفسي بكتاب النوم هجرني وما اعرف ليش لحد ماصار نزول محسن كيفت گلت لازم ادز بيده رساله اريد اشوف شصاير وانطيته العنوان وكتله اتسلمها بيد اخويه جعفر غيره لا واذا ما لكيته انطيته عنوان صديقي سامي ذوله اثق بيهم اخاف ادزه على سندس وهاي عدها شغلات عوجه تشك الرساله ومدزلي خبر وطمني
نزل واني يوم يوم احسب شوكت تخلص اجازته بس وره يومين اجة ولد اسلم علية بس ماعندي معرفة شخصية وياه بس علاقته طيبه بمحسن جايب الرد زين ليش محسن منتظر يداوم ويجيبها هو شصاير
شكراً خويه بس ليش منتظر محسن ليش گلف نفسه ودزك
والله ياخويه مااعرف اني يدري بيه التحق اليوم لان شفته قبلها بكم ساعه بلسوك تدري احنا بنفس المنطقه شو تالي الليل اندكت الباب واكد علية اجيب هذا المرسال الك وكال اول متوصل اطير اله واني هسه بس ذبيت جنطتي اجيتك
حجي طه : لزمني گلبي ياستار تشكرت منه وفتحتها

واقرا سلام بس مو من اهلي من سامي
كولشي مكاتب بس كاتبلي
اعرف وضعك صعب بس هم لازم تعرف حتى لتلومني اذا سمعت من الغريب
جعفر اخذوه الامن ومحد يعرف وينه وصار ٣ ايام مختفي والدنيا مگلوبه جنه فص ملح وذاب
كعدت بلكاع بنص التراب كله ولا جعفر هذا الحنين هذا راحتي بضيگه دنيتي
اعيد كل شويه الرساله عقلي طار اخويه شاب مسالم لا اله بلمشاكل ولا المكسرات يضحك للهوا والكل تحبه ركضت مثل المخبل بس وين اولي منو ينطيني نجدة
بس من لوعه روحي گلت لازم عمر عنده معارف اعرف اهله واصلين
خليت البديل بمكاني وترخصت من الامر وركض على عمر بلمقر القريب يمنا طبيت من دوخته أسأل وين عمر دلوني علية جنت خايف لا صارت اجازته والله واشوفه كدامي
دخيل الله جاي على الله وعليك
عمر : شبيك طة صار شى وجهك اصفر تعال اكعد
حجي طه : ياكعدة واني رجلي انشلت وظهري انكسر
عمر : احجي شبيك احد وياك
حجي طه : اخويه جعفر الاصغر مني السلم عليك بفاتحت ابوية تتذكره
عمر : شون ما اتذكره خطيه وصلنا لراس الشارع ومعافنا اله صعدنا بلسياره شبيه

حجي طه : اخذوة الامن وميعرفون ليش بعده عريس مصار ١٠ ايام وروح ابويه افقر منه ماكو رجل دجاجه ميحل يروح بدربه ويجي بدربه
عمر : والمطلوب مني شنو
حجي طه : تعرف اي احد لازم نعرف مكانه اقلها ابلغ اخوتي حتى يشوفون ليش شالوه
عمر : خال ابويه باالاستخبارات ومنصبه زين واكيد عن طريقه اكدر احصلي ولو معلومه صغيره
حجي طه : ابوس ايدك هذا من ريحة ابويه اتخبل اذا صار بيه شى
عمر : لتكول هيج غير انت اخويه ليش انسى فضلك نزلتي بعد ٥ ايام راح اروح للضابط بلكت عنده بريد شى واكله ينزلني اليوم
حجي طه : فدوة عمر استعجل اخويه راح يروح من ايدينا ماطول الامن وميعرفوله مكان يعني الوضع موزين
عمر : صار صار رايح هسه للضابط

وكدر يقنع الضابط لان عمر عنده معارفه والكل يحبه
نزل واني بس الوب شفت ولد اسمه جبار سلام بينا كاعد ويشرب جكاير اني طبعي ما اشرب ولا احبها بس من نار گلبي رحت اله وطلبت منه هو ضل فاك حلكه ممصدك انطاني خطيه نص الجگاير الي عنده لاف هوايه
اخذتهن وكعدت وحدي اول جگاره حطيتها كحيت كحه احس صدري تملخ ممتعلم عليها بس بقيت اشرب لحد ما اخذ النفس يتعلم عليها اباوع شون اجرها ويحترك التتن بس گلبي ديحترك اسرع
ساعات مرن علية واني اناشد ربي مايكسرني اكثر من كسرتي حيل مابيه لكسرة ثانيه وكلها بچفه وجعفر بچفه ثانيه

نهر : حالنا يبجي الكافر لا اكل ولا شرب وبس بجي امي كاعده بلكاع ساعه تلطم ساعه تنوح ساعه تعد وتغلط على الولد لان مرجعو اخوهم وعلي من مركز لمركز ومن مكان لمكان حتى الشعبه الخامسه ومقر الامن راح اخويه اختفى اباوع على صورة ابويه واحاجي ها يابه اخذته مو
جان عندي احساس مراح اشوفه بعد
عرفت خسرت صديقي قبل اخويه جان جعفر صديقي وهو سبب ضحكتي بحياتي ٢٤ ساعه بس نتعارك وناس تجر شعر ناس وبس نتعب نبقى نضحك واذا صاح اخ تصير بنص قلبي واذا تمرضت يركض بيه يخاف علية من الهوا
اااخ من اجيب اخو اذا راح والحنين شيعوضه ياربي

حجي طه : رجع عمر ودز علية واني رجلي بادت اريد اجر النفس هوا الله هذا كله راح يابو يوصلني اله دخيلك ياابا الحسن اريد امشي والرجل كوه اسحلها
وصلت دخلت لغرفته جان يمه اثنين ولد استأذنو وطلعو واني بس اباوع بعيونه اريد اشوف لمعه او بصيص امل اخويه مابي شى حتى لو مسجون خلي شكد يبقى خلي يبقى المهم عايش
اني من وحدنا اكله عمر بدون سيدي
ها عمر بشر
عمر : اكعد ليش واكف
حجي طه : ابوس ايدك احجي مو مال كعده اجه وكعدني وكعد گباله وجهه ميبشر بخير

عمر : شوف طة اني رحت لخال ابويه والله شاهد بنفسه دور صار ٣ ايام ومن اجانه للبيت بلضبط هيج گلي
الولد علية بلاغ على اساس عنده صديق منتمي لحزب ديني ضد الحكم مذكر ياحزب بس هذا من احزاب الخط الاحمر مجرد ميسمعون فلان اله ضلع بواحد من جماعته يشيلوه واقرا السلام علية
حجي طه : ماكو هيج حجي اخويه لا عمرة عرف صديق منتمي لهاي السوالف اصلاً هو اصدقائة معروفين سامي الي هو نفسه صديقي واثنين من المنطقه وذوله من خيرة الشباب ودوم نكعد سوه وعنده اصدقاء بلشغل على كد الشغل والسلام وانت تعرف نص السعدون وباب الشرجي شرابين عرك وناس سكارى والي ميشرب ميتقرب حتى للصلاه ناس عايشه لمزاجها وبس يعني ماعنده واحد متدين ومنتمي لحزب

عمر : قابل هو الينتمي لهيج شغلات راح يكول ويفضح روحه اكيد يغطي على نفسه
حجي طه : واخويه شعلية
عمر : الظاهر جايب طاري اسم اخوك وساحلي
حجي طه : والحل
عمر : مع الاسف ماكو اي حل وماطول ماله اسم بأي سجن او معتقل رسمي بلدوله يعني
حجي طه : يعني شنو راح اخويه
عمر : على كيفك يمعود
حجي طه : وكفت على حيلي واضرب على راسي عمر كلي بروح ابوك اخويه مات كتلوه احجي عيونك بعد بيها حجي
جان يدنج ويكول
الكم الله ماطول صار اسبوع مختفي معناها نفذو بيه هيج شغلات بنفس اليوم يصفوهم وحتى بدون محكمه
حجي طه : وكعت من طولي عرفت گلبي جان حاس كمت ادك على راسي مثل النسوان

يريد يلزمني فقدت واعيط محسيت غير افتح عيوني وجماعتي فوك راسي وكلها مقهورين ويخافون يحجون حتى من سألوهم شبيه كالو اخوه اندعم ومات جان هذا الموضوع حتى ويه نفسك ممنوع تحجي بس الامر مالتي عرف عن طريق عمر حتى يحصلي نزول اقلها ابلغ اهلي واول شى كال تتكتم على هذا الموضوع ومتذكره بلوحده كلها الي يسألك اندعم ومات
صحيت ورجعت لزمت عمر بلكت صار شى
هنا عاط بيه جنت ابجي مثل النسوان فاقد لزمني حيل ويعيط ويحجي وكال
عمر : اسمع طه انت اصلاً احمدربك مجروكم كلكم للتحقيق حتى النسوان والجهال ميرحموهم وتراب ابويه يزوعوكم حليب امكم الرضعتو متعرفهم زين اصلاً استغربت ما اخذوكم لهذا صير قوي وحافظ على نفسك وعرضك ياخويه تعرف شنو عرضك ذوله ميرحمون اخوك انتهى والله يرحمه اذا عنده شى وان ماعنده هذا امر ربك وماكو مفر منه غير ناس حتى نسوانهم اخذوهن وطيحو حظ الكل ومااكدر احجي بلقلم العريض خليني ساكت ممنوع هيج شغلات تنحجي

استر على حالك وبيتك وارجع وسدو الموضوع وكلمن يعيش حياته
حجي طه : بهاي السهوله لك هو بزون ومات لو ديج ومربي وذبحناه هذا اخويه ظهري وسندي
عمر : ماكلت تنساه بس الاحسن الك ولأهل بيتك واخوتك وكل عائلتك حتى تعيش تسكتون تره اذا طشت حتى لو بلمنطقه مراح تخلصون من الامن والحزبيه والسين والچيم وهم تره العين عليكم لا عبالكم خلصتو منهم اي واحد اله ضلع بهاي الشغلات حتى اهله يحطوهم تحت المراقبه
قوي نفسك حتى لتنفجع بواحد ثاني من اخوتك
حجي طه : كعدت متحملت اني بشر والي طاقه ومصيبتنا جبيره واخويه عريس متنهى حتى بعرسه زين وجثته انطونا جثته اقلها نزوره
عمر : اذا لكيتوها الله يحبكم هيج شغلات تصير بلجمله طه وبنفس المكان ومحد يدري وين اصلاً انزل لأهل بيتك وبلغهم حصلت الك اجازه والله يصبركم على ما بلاكم

طلعت من عنده ومحني الظهر والگلب ينكط دم على جعفر كل ماارمش اتذكر ضحكته سوالفه يعني هذا سكن الكبور وياكبور حتى گبر ما اله ربي امتحانك صعب واني عبد فقير جبتها واني جاي ضيم بضيم وهاي تاليها حتى الوحيد الحنين علية اخذته مني
اخذت جنطتي ونزلت وطول الطريق الناس تباوع علية واكو الي يجي يسأل محتاج شى اخويه مااجاوب لان بس دموعي تصب اريد اوصل شون صعدت وشون وصلت ماادري احس روحي بغير مكان ضايع غركان واريد واحد يسحبني
وصلت للمنطقه ردت اعيط واتذكرت شون يجي يركض علية ويشيل الجنطه مني اخ ياريحتك ياخويه انحرمت منها ولك منو بعد يستقبلني ويحسسني ابويه عايش شمرت جنطتي باب بيتي حتى مطبيت ودفعت باب بيته وباوعت على كل ركن بيه هذا البيت بيه ريحه اغلى اثنين ابويه واخويه صار اكثر من سنه مطاب واليوم طبيت واني محني الظهر
جان هوسه اباوع عمام ابويه اثنين وعلي وسلام واخو انعام وابنه وانعام كاعده بلكاع وظهرها على الحايط وتبجي وحال الضيم حالها شگد اذتني بس شفتها ركضت بحضنها ردت امي حتى لو هي مو امي بس بوكتها احتاجيت ابجي بحضنها هي ربتني وماعرفت غيرها ولا نطقت غير يومه لغيرها هي هم بلحضتها حضنتني حيل الكل وكف وعرفو سامع شى جان تكولي

انعام : ولك طه حبيبك راح ولك اخوك ضاع ولك الحنين ماتهنى بعرسه اخذوه من فرشته اخذوه بملابس النوم حتى مالحك يلبس عمت عيني ولك شدوة كدام عيوني والله بست ايدهم ورجلهم ولكم عوفوه اخذوني بمكانه بس عوفوه وين ماخذين ابني ومحد حاجاني اريد ابني طة هو دوم يگولي طة بيه ريحة ابويه اشوفه اشوف ابويه رجعه لحضني وشتريد اخذ بس رجعه

حجي طه : عطت وعياطي هز البيت هز ولج يمه جعفر مات راح ابنج ومااكدر اجيبه
جان تدفعني حيل وتضرب على راسها وصدرها
انعام : يمه ابني لا لا تكذب علية
اجه علي يركض وسلام وكلهم وعلي جرني حيل وشالني من الكاع
علي : احجي اخوك وين وشمدريك
حجي طه : حجت الهم بس احجي واشهك وگبت العيطه وانعام وكعت من طولها شگد تأذيت بموتت ابويه بس مثل كسرة جعفر ماوراها كسره
عياط البنات ومرته اخذ الدنيا انهز البيت لحد معاط عم ابويه بيهن حيل وهو اصلاً الكل تخاف منه وتحسب اله الف حساب
كال : اسكتو صوتكم نصو وشيلو امكم ودوها لغرفتها
علي : عمي هذا اخويه وگتلوه شون تريد اسكت
تسكت وكلكم تسكتون والي يسألكم مندري شى حتى فاتحه منسوي
حجي طه : صرت اعصاب شون حتى هاي ميصير
اسلم الكم وللكل هسه حملة اعتقالات جبيره كعد تصير وناس تصفي ناس اذا تردون تسلمون على نفسكم وعلى خواتكم حسكم منسمعه ويبقى جعفر مفقود اعتبروه شارك بلحرب وانفقد حاله حال الالاف
حجي طه : وعاد نفس كلام عمر واكثر وامر الكل يسكت يعني حتى ميصير نبجي علية ولا نسوي فاتحه والي يسأل مفقود وانتهى لحين ما الدوله تقرر بحالة
شلنا انعام وهي فاقده الوعي وكوه كعدوها واسمع عياطها بلغرفه والبنات يحاولون يسكتوها ويسدون حلكها ضليت مكابلهم وكاعد والكل يفكر شون يحمي نفسه من هاي المصيبه وميكون هو الضحيه الثانيه بعد جعفر الي راح بدون سبب

سندس : يمه يمه
ام سندس : ولج شنو هذا العياط بيت عيالج
سندس : هو جنت اشر هدوم وسمعت ونزلت اركض شون نعرف شصار الدنيا انگلبت هناك
ام سندس : اكعدي واسكتي اخاف ترحين ويكطعنج والله يذبن حركتهن بيج اكعدي واسكتي
سندس : ااخ لو بس طه هنا جان عرفنا
شويه وطب طه عيونه دم ومنزل راسه ويسحل بروحه سحل ركضت اسألة هاا طة الحمدلله على سلامتك شجابك وشنو هذا العياط بيت اهلك هسه ردت اروح واطمن
ام سندس : يمه بيك شى
حجي طه : اخويه راح جعفر مات
ام سندس : لطمت على وجهه وصدرها يمه الشاب ضاع الله يعين امك ويصبرك يمه
سندس : لا اله الا الله متأكد
حجي طه : عفتهم وطبيت مكدرت احجي شى
بيومها حتى سندس وامها يبجون اسمعهم
جعفر ماكو واحد ميحبه بس عافنه وراح

عرفت شلون احطها الروح بلتابوت
لتعلمني ماخذ ع نجف شمره

كعدت الفجر صليت وسبحت وبدلت وبوجهي على النجف حتى مبلغت احد ومالي خلك احجي ويه احد وصلت قريب مقبرتنا ودموعي صبت جني طفل عمره ٤ سنين وجاي يشكي لأبوة ويريد حقه
وصلت لكبره واباوع على ابويه ها يابه شفت ابنك شون عافني ليش هيج عفتوني وحدي متكولي من خلفتني ختمت على كصتي هذا بعمره ميشوف فرح حتى القطعه العفته منك راحت كعدت يم راسه واسولف وياه عبالك كاعد گبالي
زين هسه انت من اشتاقلك الك گبر واجيك هو من اشتاقله المن اولي حتى گبر ماله وانعى يم راسه حتى شمت ترابه انحرمت منها اخذني ليش مأخذتني انه لو اله تشويني اله كل فترة توجي گلبي انحرمت من كولشي وتعال يا طه صير رجال وصير قوي زين القوه مو يرادلها عزوه وناس وانتم عزوتي وناسي وعفتوني المن انطي وجهي
اخ يايابه شگد تعبان ومتأذي شگد انكسرت نفسي لو خانكني من جابتني رازقيه مو جان احسن من عيشتي شفت هسه اني متكولي
كاعد وابجي سمعت الاذان مال الظهر حيل هلكد صار بلمگبرة حتى الوكت منتبهت علية جبت مي وبخور ورشيت كبره وشغلتهم وكتله
دير بالك علية وگلة كطعت گلب اخوك وكسرته يجعفر هاي تالي الخوه هيج صارت عفتني وحدي بين الذيابه ماوفيت بحقي ماوفيت بست گبره وطلعت
رحت للمغسل توضيت وبوجهي للامام علي خلصت اليوم كله بالامام مكابل شباچه وكاعد واحجي واعتب على الخوه الما حصلتها وماشفت شى منها بس القهر
تالي ساعه ١٠ بليل رجعت بس روحي عفتها يمهم رجعت اسوحل برجلي واستغفر لان گلبي جمر وحتى الله عاتبته من حركت گلبي

رجعت للبيت واربع ايام حابس روحي بلغرفه على كد الحمام وارجع مااطيق اشوف بشر وهمزين سندس صارت تحس ومتحارشت ولاتقربت مني ذاك البيت هدوء محد يكدر يفتح حلكه والناس هم ماسألت يعرفون بس يخافون جان بذاك الوكت الحزبيه يشتغلون شغل حتى على الجهال يتجسسون حرب والدوله مهدده لهذا كل الناس سدت بابها وسكتت
كاعد واستغفر والسبحه نازله نصها واني صافن وافكر بلي ضحكته لهسه تراسه أذني
واشوف السبحه تنجر انتبهت سليل تجرها وتحطها بحلكها وتضحك بوجهي جنها تكول كافي تعال اشتاقيتلك

من يوم ما اجيت واني حتى متقربت منها هنا عمرها سنه وخمس اشهر تمشي وتلعب بس هادئه باوعت عليها جان تكول اليدها وتجر وتحط جزء منها بحلكها
(اريدها ) بابا شلتها وشميتها افيش حتى ريحتج تشبه ريحه اخويه جان يموت عليها
انطيتها السبحه وهي عيونها بس تضحك ياريت ارجع بعمرج وماشفت كل الشفته
اجتي سندس مناك جايبه الاكل من شافتني شايلها وابوس بيها ابتسمت
الْحٍمَدٍ للـّہ اليوم مو احسن
حجي طه : الْحٍمَدٍ للـّہ على كل حال
سندس : فدوة طه على كيفك ويه نفسك تره احنا محد النا والله
حجي طه : صفنت عليها اول مره احس سندس تحجي بهدوء ومحبه
سندس : عندك جهال وبعدهم صغار وهذا امر الله شنسوي ماكو شى بيدنا ترحمله وسويله ثواب عسى الله يطلع حوبته بلي اذاه
حجي طه : هو بس لو اعرف منو البلغ علية اله اكتله بيدي
سندس : ليش هيج شغلات تنعرف لهنا وصقطت ورقتة وهذا عمرة ادعي الله ميصير بينا مثله وانت وراك جيش وتعب ش
حجي طه : غير اخويه ياسندس
سندس : حقك والله بس مابيدنا شى غير ندعيله بلرحمه اكل فدوة وجهك صاير ليمونه ليصير بيك شى منو اليه
حجي طه : باوعت عليها وكتلها اول مره تكولين منو اليه دوم لسانج شطوله ومتحجين حجايه عدله
سندس : شسوي هذا لساني وهذا طبعي بس يشهد الله الك بقلبي محبه غير رجلي وابو جهالي
حجي طه : الله يكملج بعقلج وكون دوم تبقين هيج
سندس : انت هم تحملني اذا انت متتحمل منو يتحمل ياعيني

حجي طه : والله اتحملج واشيلج على راسي بس لتنكين يم راسي وهاج شفتي اخر النك لو فكر لو موت واني اثنينهم حصلتهم
سندس : احاول مااضوجك يله كوم وسمي وخلي ناكل الاكل برد
بيومها اكلنا سوه وسليل بحضني وحسام بحضن امه باوعت عليهم صدك ذوله اذا صار علية شى منو الهم ياربي لاتخليهم بعازه احد ولا تلجمني بيهم

مشت اجازتي وحتى موصلت لذاك البيت الي سد بيبانه ومفتحهم كدام احد لحد ميهدا الوضع واصلاً كلها ايام والناس التهت بشغله جديده هو العراق كله شهداء وجعفر لا اول ولا اخر واحد يصير بيه هيج
اليوم اخر يوم الي طلعت اشتري من الدكان شغلات للبيت وامشي ومدنج كل ما ارفع راسي الكه لجعفر ركن جان يضحك بيه مشيت واباوع سلام بوجهي صفنت علية دومه بعيد عني جان يحضني وبجه اول مره احس بقرب سلام مني حضني حيل واني عبالك واحد واجاه الفرج ورجعت ابجي بعدين انتبهنا احنا بلشارع تمشينا سوه جان يكول
سلام : ليش مجيت
حجي طه : المن اجي الغالي وراح
سلام : قابل بس هو اخوك
حجي طه : كلكم اخوتي بس هو اقربكم
سلام : شوكت تلتحق
حجي طه : اليوم الفجر
سلام : تروح وترجع بلسلامه
حجي طه : امك شونها
سلام : فاقده ساعه تبجي ساعه تلطم ومرات نايمه وبس لسانها يعيد ويزيد اريد جعفر رجعولي جعفر
حجي طه : ياريت يرجع انطي عمري كله وارجعه
وصلنا للبيت كتله عينك على خواتك انت هسه بمكانه تعرف اخوك علي حاير بروحه وشغله انت هسه ابو البيت
سلام : الله كريم
سلمت ودخلت وعيني علية اكول بلكت الله هداه علية بعد ماراح جعفر مني

كعدت من الفجر حضرت جنطتي وحطيت مصرف للجهال ولسندس كمت اخاف اكثر عليهم من قبل بله گبل مأمن اخويه موجود هسه راح حامي عرضي وبيتي حطيتهم امانه يم الله ويم ام سندس المره الفقيره الي لو لاها الله اعلم شصار دومها عينها على سندس والجهال ومن اني ماكو تجي يمهم تبات
طلعت وسديت الباب واشوفها واكفه وبيدها دولكه المي مثل كل مرة باوعت عليها وغوركت عيوني اااااه يابنت ابويه كسرتنا جبيره وجهه ضعفان ولابسه اسود وعيونها دم مبين باجيه
هاي الايام كلها ماشفتها
حضنتها وتشهك وتحجي
نهر : ارجعلي طه تره ضليت وحدي مابقى عندي غيرك تره اموت نفسي اذا صار بيك شى

حجي طه : وخرتها من حضني ومسحت دموعها كتلها اياج تعيدين هذا الحجي الكاتبه الله نشوفه ادعيلي ارجع وامانتج نفسج قبل الكل اريدج قويه مااريد اشوف نهر ضعيفه وعينج على جهالي
نهر : لتخاف بعيوني
حجي طه : منسيتي هاي عادتج تشمرين مي ورايه
نهر : العمر كله ماانساها لحد ما الله يفرجها وبعد متروح
بستها من راسها وكتلها يله طبي الجو صار بارد وفجر اخاف تتمرضين
نهر : اذب المي وراك يله اطب
حجي طه : باوعت جان جعفر يوكف بصفها ويضحك حسيتة واكف والله حسيته واكف ابتسمت لان حسيته بستها وتوكلت للموت
للجبهه والتحقت ورجعت احسب عدد الشهداء اليوميه انزفهم للجنه

نهر : مرت الايام وخيم السواد والحزن بلبيت صار شهرين على موت جعفر زوجته لزمت العده يمنا ومتطلع ابد حتى اني اودي واجيب بالاكل واختها ويانه ضاعت فرحتهن هم خطيه عرايس وحده ترملت والثانيه حتى الضحكه ممنوعه عليها
امي سكنت الغرفه وبس ساكته واشواق اداريها
لحد مايوم نزلت زوجة جعفر وبيدها جنطه ملابس
ها نور وين رايحه
نور : راجعه لبيت اهلي مااكدر ابقى بعد هنا ابويه بره ينتظرني
نهر : غير تحجين تبلغين ماخذه جنطتج وطالعه
نور : المن ابلغ شو كل واحد حاير بروحه اروح لأهلي احسن اني بقيت هنا گلت عيب من عدكم والناس وهسه صار شهرين كافي اخلص العده يم اهلي واستقر عدهم
نهر : بلغي اقلها امي
نور : انتي بلغيها مابيه حيل مشاكل واكيد مراح تقبل اطلع
نهر : روحي هسه واني ابلغها
طلعت وراها نزلت اختها تودعها مبين تدري بقرارها يمكن صحيح خطوتها وخاصه سلام شاب عايش عدنا والى متى تبقى
گلت لأمي كولشي محجت بس باوعت بوجهي ودارت وجهه عرفت مالها خلك حتى تتعارك امي حسيتها انكسرت بعد ابنها
گلت هاي هي راح تموت بعده
بس هاي انعام وما ادراك ما انعام حتى الموت تحاربه
كلها اسبوع واجانه خبر حيه گلوبنا طلعت نور حامل لو ما العيبه الا نهلهل
عرفت امي واحد وصحاها

انعام : اليوم ترجع للبيت ابن ابني ميتربى عند الغريب
نهر : يمه هسه عرفنا بلخبر على كيفج قابل هي جابته واخذتها بعدها بدايه حملها
انعام : اني اعرفهن ميكعدن راحه اخاف تسقط الطفل
نهر : على بختج يوم شتسقط وهي بنفسها دزت خبر حامل
انعام : انجبي انتي وروحي صيحيلي اختها
نزلت مرت علي تركض
ها عمه
انعام : اسمعي نوريه اختج ترجع للبيت لا وتراب ابني ارجعها سحل
نوريه : هسه المن هذا التهديد البنيه تعبانه وبدايه حملها عود من اتجيب الله كريم
انعام : اخاف عبالجن نسيت طلعتها بدون متنطي خبر بس اني حيل مابيه بس ضامته الها شون تطلع بكيفها مكافي گرطت ابني هلمره تطلع بكيفها والله اعلم شسوي بأبنه
نوريه : خاله ليش هذا الحجي هيه شعليها هذا امر الله وهي هم عروس وانكسرت فرحتها
انعام : انكسر راسها كون شوفي لج ترجع اختج ورجليها فوك راسها وتبقى هنا بغرفتها لحد متجيب تريد تبقى هذا بيت ابنها ورجلها تريد تولي تروح بطولها وبلغيها وبلغي اهلج غير هذا الحجي ماعندي واذا مسمعتو الكلام وترابه العب بيكم جوله حتى انتي اطلكج من علي
نوريه : هسه اني شعليه
انعام : الخير يخص عندي والشر يعم وحالج من حال اختج ترحين هسه لبيت اهلج وللعصر لو اثنينجن هنا لو ترجعن اصلاً
ابوج مو يمشي ويصيح اله اثنينهن اله اثنينهن بكولشي واكل راسنا واني على كلامه لو ترجعن اثنينجن لو احسبي حسابج نهايه الاسبوع ورقتج يمج

نهر : نوريه صعدت تبجي وتعرف امي كدها وتسويها وخاصه الاملاك كلها بأسمها ولازمه علي من خوانيكه وميكدر يتنفس باوعت عليها
انعام : وجع شكو تباعين هيج
نهر : لا ماكو شى
انعام : اسمعي نهر ذني ماينطن عين كويات واني الكوي ادوسه بقندرتي واذا رجعن هنا اياج تكعدين وياهن وسوالف ولغوه على كد السلام اريد اشوف نيتهن شنو وجه الفكر هجمن بيتي
مجاوبت وطلعت كلها عدها وجه الفكر من سندس وشيل ايدك

مرت الاشهر بسرعه ودخلنا سنه ١٩٨٥ الحرب مستمره والارواح هم مستمره تطلع لخالقها بدت الهجمات تقوى وتشمل حتى المدن قصف بين مده ومده
راجعين من مهمه وجانت صعبه واباوع من بعيد يوزعون الجنود الجدد على المقرات كل شاب الجنه تبجي علية اصفن بله ذوله شنو ذنبهم يعني نطلع من كل معركه بالالاف من شبابنا وبالالاف منهم شنو ذنبنا
واجه شاب اباوع علية وجه يرجف تذكرت شگلي اول مجيت نفس الخوفه والفزعه بس هذا اصغر مني بهوايه گال منو حجي طه
اشرت اله تعال اجاني كتله اني طه
اخذلي تحيه
عمي عوف التحيه شسمك ومنو دزك علية
اسمي يوسف
حجي طه : شكد عمرك يوسف
يوسف ١٩ سنه
حجي طه : صفنت علية خطيه صغير وبعده ميعرف شى
مكتلي منو دزك علية
نائب ضابط عمر

ابتسمت والله گلبي عرف هاي سوالف عمر اني كتله مااتحمل مسؤوليه واحد عوفني كاعد وحدي وكافي محسن من يلتحق يجيني دك رجل شون تبقى اكثر الاوقات خاصه بلحراسات وحدك
بله هذا شون اتحمل مسؤوليته
تعال ذب غراضك هنا وارتاح
كعد يسولفلي على اهله هو وخواته اثنين واخوه وابوه مريض وشون اجه التحاقه لان مدارس حاولت اغير مكانه بس همه ثبتوه يمي
كام يصيحلي عمو طة رغم فرق مو جبير بلعمر بس هو يحب هيج يصيحلي
بقى بحدود شهرين ويايه تعلمت علية جان شاب هادئ طيب ماعنده اذيه اذا شافني تعبان ميحجي وحتى مرات من يروح يجيب الاكل يجيبلي حصتي وياه كمت اتعلم على وجوده وبعد مجنت ساكت كل الوكت كمت اسولف وحتى اضحك لان من ضوجتنا وحاله الرعب الي بينا كمنا نضحك حتى على اتفه الاسباب بس نريد نقشمر نفسنا

واجانه نداء عاجل سيطره القوات الايرانيه على طريق بصره بغداد جان شهر الثالث الموقع شمال شرق الگرنه (القرنه)
هنا انطلقت صافرات الانذار القصوى شون الايرانيين يسيطرون على هذا الطريق المهم
وتحركت قواتنا والافواج التابعه الها ومن ضمنها احنا
وصلنا للموقع وحرب طاحنه صارت تكول يوم المعشر ناس تضرب ناس
استمرت المعركه ١٠ ايام جانت من المعارك الصعبه لان لازم نرجع كاعنه
صار هجوم مباغت من الايرانين باوعت على يوسف وهو خاتل بلسواتر وخايف جان اول معركه فعليه هو يشارك بيها ودمعته بعينه
عطت علية اختل ولتطلع
يوسف : شون مااطلع عمو
حجي طه : بقينا ناس تهجم على ناس اشوف شون الروس تتطاير منا ومنهم وكل واحد يستخدم كل العنده من معدات كل قاذفه دبابه تجي من عدها تشيل منها كومه واحنا نفس الشى كدرو يتوغلون بينا وخرقوا الخطوط الاماميه للفيلق الرابع واجه النداء بالانسحاب بسبب تكبد خسائر فضيعه
الي صار تدخل الحرس الجمهوري لان بدينا نفقد مراكزنا ولمده ١٠ ايام مره احنا نسيطر على موقع ومره همه لحد مابدت خطط عسكريه لصد مواقع الايرانين بلطائرات واستخدام المواد المحذوره وكذلك استخدام الانابيب واستغلال نهر دجله حتى تغرك مواقع العدو قبل اخر يوم من المعركه جان يوسف ورايه بظهري ابد معفته صارت روحي بيه
واشتغلونا مدافع وطيارات

وبلحظه انشاليت وانشمرت
احس شى حار بدا ينزل على وجهي انعدمت الرؤيه وقت طويل بقيت بلا حركه لان احس ثكل علية من جهه رجلي اني گلت اكيد انبترت وبنفس الوقت خايف افتح عيوني والكه نفسي بنص الايرانين لحظات مرعبه تكرر ت لحظات الموت بس هلمره مكدرت انقذ صديقي مكدرت اشيله واحمي مثل محميت عمر حاولت ارفع نفسي واشوف راس على رجلي وارفعه نص لشه بلضبط الجزء الفوك من الجسم يوسف الشاب ابن ١٩ سنه باقي منه نص لشه ومتمدده فوكي من كثر مانهارت اعصابي كمت اعيط ولكم موتوني ولكم كافي الله يشيلكم دفعته واشيل واشمر على راسي تراب ولكم موتوني ما اريد اعيش كل شويه ودافن واحد فقدت اجوي جنود مااعرفهم من غير فرقه سحلوني سحل لان مردت اعوف يوسف ردت اخذ جثته يمكن بلحظتها تخيلت جعفر هيج مشمر بنص الصحراء ومحد يدفنه تهسترت اعصابي لحد ما حصروني وكوه صعدوني ورجعوني لمقراتنا المؤقته وهناك واشوف عمر ركضت ركضت ركض ودك ضرب على وجهه وبطنه وهو ولا رفع ايده حاولو الجنود يلزموني وهو يعيط عليهم عوفو عوفو
حجي طه : ولك مو كتلك ما اريد احد ويايه كتلك اني شوم ياهو الي يصاحبني يموت ولك اني الموت نفسه اليتقرب منه ميعيش ليش عمر شنو ذنبه ولك ما حميته ماكدرت احمي جان يحضني حيل
عمر : اعرفك صديق وفي وحزام ظهر لهذا دزيته الك شفته تايهه وصغير وكلت اذا اشمره بغير مكان يضيع وهذا حظه اجتي هاي المعركه لو باقين بموقعنا مجان صار علية شى
حجي طه : لك بقى نص لشه ماضل شى منه ليش شنو ذنبه وفوكاها خايف مات وجسمه يرجف من الخوف
عمر : ذنبه عايش بلعراق يجوز يجي يوم وكلنا نصير مثله لتستعجل
حجي طه : كله منك ما اريد اعرف احد عوفني مصخم وحدي ولك الموت صار صاحبي كافي ما اريد احد واذا دزيتلي بعد واحد وروح ابويه اكتلك واكتل نفسي جوز مني

عفته وطلعت ثاني يوم اعلنت القوات الايرانيه انسحابها من الاراضي العراقيه بس بعديش بعد ما راح اكثر من عشرة الالاف جندي من عدنا وبكدها من عدهم
رجعنا لمقراتنا بعد ما عفنا نص اصدقائنا تحت التراب دفناهم ورجعنا بقينا ايام واني رجعت وحدي ويوسف مكانه يأذيني لان حيل تعلمت علية الله يرحمة وبعدها صار موعد نزولي وصلت لبغداد ساعه سبعه الصبح واني امشي شفت بنيه طالبه مبينه تمشي وتعرج وتبجي واني روحي بخشمي هاي شبيهه
انقهرت عليها لان وحدها واكفه بلكراج والصبح حتى طلاب ماكو قليل حتى منتبهت على شكلها زين لان تشهك بلبجي تقربت منها گلت خاف بيها شى
كتلها شبيج اختي محتاجه شى
رفعت عيونها سبحان الخالق هاي العيون گبار وسيعات وسود سواد الليل بدون قصد مني صفنت عليها

يتبع ..