رواية ابي والغزلان الفصل السابع عشر 17 - بقلم ريام هادي

ابي والغزلان
للكاتبة Reem
البارت الخامس عشر

شعاتب والعمر ورگه بخريفك طاح
تهز عمري وتطيح سنين من عندي
ظلمه وخيط اسود وابره عد عميان
وعفتني بنصهم انزف زرفو چبدي
ياسگف البنيته من الشمس لشتاي
بحر تموز اجيتك شفتك مندي
وشگلك من شفت ظعنك مشه لبغداد
المسيح من انصلب ماصرخ بگدي
انأ شايل جنازه من ابجي عذري وياي
بجيت ارثي الشباب الراح من عندي
وهذن دمعاتي سالن وي بياض العين
حسبالك نوارس حطن بخدي........

حجي طه : شفتها عاطت انعام بسرعة دفعت الباب ودخلت وشلت رشا قبل متضربها
انعام : خوش والله مخلصت من عندك دازلي بناتك
حجي طه : طفله واجتي بدون مندري وهسه ماخذها وطالع
رشا : بابا ايييع كخ بيبي
حجي طه : ابتسمت على كلامها وفوكاها تصيحلها بيبي
انعام : ولج بت طة اني لا بيبي ولا شى واذا شفتج هنا رجلج اكسرها
جان رشا اطلع لسانها وتعيب وتضحك
حجي طه : يعني حتى الطفله مسلمت منج
حجي طه : اخذ بتك واطلع وسد الباب وراك موزين مني مركعتها بطاسه الحنه اخليها تخاف تفوت من بابنه
حجي طه : والله تسويها اعرف سوالفج حاضن رشا وانداريت اطلع جان تصيحني انعام

انعام : طة
حجي طه : هااا
انعام : ليش متبيعلي بيتك
حجي طه : شنو بيتي وشسوين بيه مو تكولين عش
انعام : بيعه الي هم اني اخلص منك ومااشوفك ولا اشوف خلفتك الزفره وهم انت ترتاح تروح بعيد عنا اني ادري بيك حسره عليك الفلس ومخلصها بهاي العربانه المجرقعه وظهرك انحنى
حجي طه : وين اروح اذا بعته
انعام : اعرض البيت للبيع وشكد ميجيب الك مني ضعف السعر يعني تكدر تاخذ اللك بيت مرتب بس بعيد عني واليبقى من الفلوس اشتغل بيهن
حجي طه : ماابيع بيت ابويه وامي
انعام : ياامك يمه هو انت شايفها حتى بيت امك فكر طة زين هاي الفرصه متجيك مرتين وانطيني خبر حتى لتشوفني ولا اشوفك
حجي طه : ماانكر بداخلي حسيتها فرصة زينه اني تعبت من المشاكل ومن النك مال سندس يعني اخذ عائلتي واروح لغير مكان اسلم على نفسي وعلى جهالي شمدريني شيصير طول ما اني يمهم طلعت ورشا شايلها بحضني وتعيب على انعام وذيج عقلها ويه عقل الطفله هي اطلع لسانها وهاي تعيط وتغلط مجاوبتها وطلعت صارت بوجهي سندس
سندس : هاي وين جنتو
حجي طه : رشا طفرت لذاك البيت وجبتها
سندس : يعني ياطة معرفت تلزم الجهال ١٠ دقايق وفوكاها تحجي علية اذا عاقبتهم لان وكحين تعالي لج شوداج هناك
رشا .. الوح لبيبي
سندس : ولج بيبي بعينج هاي انت معلمها تصيح لأنعام بيبي
حجي طه : بربج تتوقعين اعلمها على هيج سالفه
سندس : هاي مو بيبي هاي جني تخوف تعضج لتوصلين هناك ابد
رشا .. مااا الوح لداده
حجي طه : بتج مبين مو اول مره تروح انتبهي عليها يمكن تروح علمود لو جنات لو لحسين ابن علي
جان تضربها على ايدها حتى متروح
وطبت رشا تركض
سندس : شبيك وضعك مو طبيعي
حجي طه : انعام تريد تشتري بيتنا
سندس : ليش هي ناقصه املاك لاحكتنا على هذا العش
حجي طه : تكول انطيك ضعف سعره
سندس : هااا هي هيج كالت اذا هيج بيعه وخلي نخلص من جهرتها يمعود كرفت هذا البيت فگر متنا والله
حجي طه : الله كريم خلي اخذ الجدر واروح تأخرت على الشغل
سندس : وسليل منو يجيبها من المدرسه
حجي طه : اني اروح اجيبها ليضل بالج

اخذت العربانه وكعدت اشتغل بفرع يصيحوله مجمع مدارس بيه ٣ مدارس وبينهم مدرسه سليل حتى اخاف تطلع اشوفها واكف بلشارع وهلقاسمه الله اشتغله وساعات تجر لحد مسمعت الجرس والطلاب مثل النمل تطلع اباوع على باب مدرستها وبنفس الوقت ابيع لان الجهال اجت تركض للعربانه بهذا الوقت من السنه شهر التاسع والجو طيب مو بارد ابيع محلبي وكاستر  ولمحتها من بعيد تايهه وتباوع بعيون الرايح والجاي ركضت عليها شافتني ابتسمت واجت تركض وحضنتها حيل
هلا بنتي السباعيه
سليل : خفت بابا ادور عليك عبالي متجيني
حجي طه : شون مااجيج شعندي غير غزالتي يله تعالي بابا واخذتها من ايدها وهي تكمز مكيفه وكفنا يم العربانه
سليل : هاي عربانتك بابا شسوي هنا
حجي طه : اشتغل بيها گلبي تاكلين
سليل : اي واريد موطا ام اللبن مو كتلي اشتريلج
حجي طه : صار بس اكمل بيدي واشتريلج وبقيت حوالي نص ساعه بين مبعت واكلو الجهال وفضت طلعه الطلاب رجعنا اني وسليل وحبيبة ابوها تدفع ويايه وتضحك وتكول منو يريد كاستر طيب والله
وصلنا للدكان واشتريت الها الموطا الي تحبها ام الجيس بلبن وتتمشى وتاكل تمنيت هاي الضحكه متفارك عيون بناتي

رجعت للبيت وامها استلمتها واشوفها شون فرحانه والست انطتنا الواجب وشون اطلع بكتبها وامها تساعدها
تغدينا وكعدت اشرب جاي وصافن على اقتراح انعام شسوي اسمع كلامها لو شون اروح لنهر واخذ رأيها
شويه واندكت الباب طلعت واشوف نهر بلباب ابتسمت ولج شنو الگلوب سواجي فتحت الباب بس وجهه مگلوب باستني واحس العبره بصدرها تعالي ادخلي
نهر : سندس وين
حجي طه : جوه تقري سليل
نهر : حبيبتي صف اول صارت يارب يوم متشوفها دكتوره
حجي طه : أًمين
اكعدي وعوفي كولشي واحجي شبيج وليش صوتج موطبيعي وحتى عيونج حمر باجيه جان تحضني وتبجي خفت حيل عليها شبيج نهر منو وياج
نهر : ( تشهك وتحجي ) شفت امي شسوت يعني شوكت اتوب من عندي هي مو كالت اني متت بلنسبه الها خلي تبطل من سوالفها
حجي طه : شكو غير نفتهم
نهر : البارحه خالتي ام سامي جانت يم الخياطه ام جلال وداخله امي عدها ملابس يمكن مال حسين ابن علي لان كالت خالتي ملابس جهال وكاعدات وسوالف عاديه رغم امي حتى متسلم على خالتي من يوم متزوجت سامي بس يمكن هي رادت تعرف شيصير ميصير بيه لهذا مسلمه طبيعي وتعرف بعد اذا كعدن كايمه ام جلال سائله خالتي محبلت وذيج تعرف بيها معودت واحد فتح الموضوع وياها بقت تندب حظها وشون ابنها ماعنده خلفه تكول عبالك صار ١٠ سنين ماعدنا جان تكولها امي اذا هيج متزوجي شوف امي تقترح على ام رجلي تزوج ابنها وام سامي كالت سامي ميقبل وانتي تقبلين ابني يتزوج على بتج تكولها ولو اني معليه بيها وماعندي بنيه اسمها نهر بس ياخيه اني لو ابني مثلج من ثاني سنه ازوجه شنو ابني يضل بله خلفة انتي خيه مابيج حظ لتزعلين مني عايفه ابنج بلاجهال

وهاي من اجتي ام سامي لحد قبل شويه تبسمر اذا امج تكول هيج صدك اني مابيه حظ شون ابقي سامي وينحرم من گلمة بابا اكلت راسي طة هو اني شبيدي والله مابيه شى كالت الدكتوره والله بس مديصير حرت وين رحت حتى شغلات من بيت الساده جابتلي خالتي وكولشي تكولي علية اسوي وساده حلكي بس هي مكعد ترحمني تكول عبالك متقصده مااحبل والي كملها امي شفت شون تريد تخرب بيتي

حجي طه : كافي بجي عيونج راحت وسامي شيكول ً
نهر : تعب من الحجي حتى اول فترات يتعارك وياها ويكولها مااريد جهال ولتدخلين بس ميفيد اما اذا اجن خوات سامي يبوو يستلمني استلام
حجي طه : ليش مااخذج على غير دكتوره
نهر :رحت على ٣ دكتورات والله وكلهم نفس الحجي هسه اني القاهرني امي ليش تخرب علية شراح يخلصها ويه خالتي هسه حسره احجي راح تركعني على حلكي بحجت امج كالت
حجي طه : شتدرين بيها صرنا الوهواس مالتها ماعدها شغل وعمل بس طه ونهر امسحي دموعج ولتهتمين حتى خالتج حاولي تكسبيها بلكلمه الطيبه واذا حاسه روحج تعبتي تعالي هنا كم يوم ارتاحي واذا تردين اني احجي ويه سامي يسكت امه
نهر : لا فدوة مااريدها تكبر انت تدري بطبعي من اختنك اجي عليك ماعندي احد غيرك

حجي طه : والله اني هم مو تعرفين حتى هسه ردت اجيج
نهر : خير حسيت عندك شى تحجي مسحت دموعي وركزت وياه
حجي طه : امج اليوم عرضت علية تشتري هذا البيت وبسعر مضاعف واني دايخ
نهر : اياك طة تبيعه
حجي طه : ليش تره والله اني هم اريد اخلص لعبت روحي من المشاكل ومن وضعي اريد اخذ عائلتي واروح مكان مابيه انعام
نهر : انت من كل عقلك اذا اشترت امي البيت راح تخليك تشتري بيت جديد
حجي طه : شون يعني
نهر : امي واعرفها وانت هم تعرفها يعني تتوقع تنطيك ضعف سعر هذا البيت وتخليك تعيش مرتاح بعيد عنها اكيد لا
حجي طه : قابل تاكل الفلوس علية مااسلم البيت اله الفلوس كامله
نهر : افهمني طة امي تنطيك الفلوس كامله وحتى فوكاها زياده حتى تأمن وراها تسوي المستحيل حتى متشتري بيت ويجوز ادز جماعه يبوكون الفلوس او اي بيت تروح تشتري ادز جماعه ومتخليهم يبعوه الك المهم متخليك مرتاح وتضيع بيتك واكيد من ماعندك بيت تخلصها ايجار ومصرف ومتشوف نفسك غير مضيع الاول والتالي وانت وجهالك بلشارع

حجي طه : تتوقعين لهاي الدرجه توصل
نهر : ااااخ ياخويه بعدك بهاي الطيبه شون مااتوقع مو مرتين كطعت رزقك مو مرتين وصلت لأبو المال وخلتهم يطردوك ماكو اسهل من سالفه تخليك متشتري تره هي مميته على البيت تريد بس تشردك لتغريك الفلوس لو تنطيك الالاف الدنيا كلها اتضيعها منك امي لتغريك
حجي طه : اي والله صحيح كولشي اتوقع تسوي خليني بهذا البيت وفوكايه سكف يحميني ويحمي جهالي
نهر : اهم شى سندس راح تاكل راسك لتضعف طة فدوة تره تضيع الاول والتالي
حجي طه : لا لتخافين مراح اسويها ابد
نهر : اروح للبيت محتاج شى
حجي طه : متبقين بعد يمي
نهر : لا اروح اسوي عشا وسامي هم على جيه
حجي طه : اذا صار شى تعالي هذا بيتج والله اطلع اني وجهالي وانتي تكعدين بيه
نهر : فدوة لعمرك وين اروح لعد غير بيت اخويه لتخاف وليضل بالك صرت احسن

وصلتها للبيت ورجعت اتمشى وافكر بكلام نهر صحيح كلامها وبعد لازم ما امن من اي شى يجي منها
رجعت دخلت للبيت واجتني سندس كعدت بصفي وتضحك هااا شوكت تبيع البيت
حجي طه : ماابيعه
سندس : هاااا مو كلت افكر
حجي طه : كلت افكر بس مكلت ابيع
سندس : هاي نهر الثوله اكيد هي الفرت عقلك اعرفها متحبلي الخير
حجي طه : انتي عندج كل الناس موزينه بس انتي الخيره بيع ماابيع سندس وكاعدين بهذا البيت بس كون الله يستر علينا
سندس : هاي هيه غسلت ايدي يصير براسي خير
حجي طه : اي اغسليها وطبي سبحي هم
اكوم احضر غراض الشغل مال باجر

مرت الايام واجه الشتا ورجع شغل اللبلبي والباگلة جانت سليل دوم ويايه ضحكتها الصبح تسوه الدنيا عندي تخفف المي لحد مايوم طلعت من الدوام مكفوشه من شعرها تخبلت منو وياج تحجي والدمعه بعينها
سليل : هاي غصون تكولي بت ابو اللبلبي ابوج يبيع باب المدرسه والبنات يضحكون علية
حجي طه : وانتي شگلتي الها
سليل : كتلها بابا يبيع لبلبي طيب احسن من ابوج واني احبه حتى لو يبيع بلعربانه
حجي طه : حضنتها حيل انمرد گلبي عليها واعدل بشعرها وشعرج شسواه هيج
سليل : مو جرتني حيل من شعري واني هم جريتها بس هي اذتني حيل بابا
حجي طه : ميخالف بابا انتم صديقات عيب هذا الشى بينكم
سليل : بعد ما احبها لغصون وانت لتبيع الها خلي تولي
حجي طه : صار من عيني بس لتبجين
سليل : لا ما ابجي اني احبك هوايه واحب اللبلبي التسويه اريد انطيني اكل
حجي طه : تعاي ياروح ابوج وكلتها وعيني عليها صح الشغل مو عيب وشريف بس مردت بنتي تنحط بهيج موقف وبهيج عمر

رجعت وهي بيدي وتسولف عن دروسها رغم اول ابتدائي بس هي ذكيه بسرعه تعلمت دخلتها للبيت وعيني عليهم شون أمن مستقبلهم
شهر الواحد ١٩٩٠ اطلع بهذا الجو البارد الناس نايمه دفيانه بفراشها اسمع صوت الهوا بره عبالك صوت سيوف تستعد حتى تكطع بلحمك من البرد
البس بلوزين وبجامه جوه البنطرون وقمصله ولفاف واطلع كل هاي الملابس واحس روحي ثلج مرات من البرد ادفه على بخار اللبلبي والنار الجواه اباوع بلوجوه عسى ولعل يشترون الصبح كمت اشتغل على مساطر العمال مكمت اروح يم المدارس علمود بتي مااريد تخلص عمرها وهمه يصيحون الها بت ابو اللبلبي وهناك الشغل هم نعمه وخاصه الي يطلعون مثلي على كد حالهم كمت ابيع لفات لبلبي وعمبه هواي ياكلون ويحبوها اكله بسيطه وسعرها قليل وهم تمشي شغل ويه كاسات الباكله الحاره
كمت شأشتغل احطه بيد سندس هي تصرف للبيت جنت دوم اكول الها بس عينج على الجهال كولشي مااريد منج عسى مااشتغل من الصبح لليل المهم ينامون شبعانين ومرتاحين نجحت حبيبة ابوها من الاول فرحتي جانت جبيره لان طلعت الاولى تكول خلصت كلية مو اول ابتدائي حتى خليت سندس تسوي كيكه الها حتى نشجعها دوم تطلع الاولى سندس بالاول مقبلت بس اني جبرتها ردتها تفرح وجبت بدله بيضه الها جمعت فلس فلس حتى اشتريها الها من جنت اشوفها معلكه بلملكانه اتحسر واتخيل سليل لابستها وتفتر بيها وبيوم الكملت فلوسها ركضت جبتها وخليتها تلبسها طارت بيها وتفتر مثل الفراشه جانت اول هديه مني الها وتبوس بيه فرحانه

مرت الايام وحالي صعب بس مابيدي شى الزكها منا ومنا بس الصار خله العراق كله ينگلب بعدنا مجارين نفس من حرب ايران وبعدها الناس معلكه صوره شهدائها عدا الناس الي ادور على ولدها المفقودين دخلنا صدام بحرب لا على البال ولا على الخاطر

شهر الثامن ١٩٩٠ اهتزت بغداد والعراق كله بيان دخولنا الكويت دخول الحرس الجمهوري واحتلال الكويت خلال ساعات بدون اي مقاومه  اول شى صار استدعاء كل الجنود وكل مواليد الخمسينات والستينات وحتى السبعينات الي تجاوز عمرهم ١٨ سنه للخدمه تكول مامكتوب علينا نرتاح دخولنا للكويت سوه حاله ذهول للكل مو بس العراقيين العالم كله وحالي حال الالاف من العراقيين تم استدعائي بس هلمره علي مكدر يفلت من الخدمه مثل قبل لان جان مخلص كلية بس سلام بعده يدرس لان يرسب سنه وينجح الثانيه وسامي هم اجه كتاب تكليفه وقبل بيوم لروحتي للجبهه رحت لمحسن ردت اشوف وين راح يذبوه بأي منطقه تمنيت نكون سوه
وصلت لمنطقته فتح الباب وضحكته بوجهه مثل ايام قبل

محسن : هااا ولك فگر ولك رجعنا للحرب وراح اگابل وجهك الخايس واكعد
حجي طه : مااتوقع هلمره يجوز يذبونا بغير مكان
محسن : اكلك طه ذيج السنين وخلصناها فوك الجبهه وبين الموت هسه وين نخلصها
وجم سنه راح نضل
حجي طه : والله مااعرف
محسن : هو اني زايده مني اسألك هو انت شتعرف بس فاك حلكك بس اني بلغت هنا كتلهم اذا مرجعت كول تزوج كويتيه واستقر
حجي طه : يابه طير شتتزوج والله اني كل تفكيري وين راح يذبونا
محسن : يذبونا لو بلبصره لو بلكويت ليش منروح سوه انقدم اوراقنا بلكت اكابل وجهك الميت ونصير سوه
حجي طه : لعد ليش اجيتك
محسن : لك لو تعرف منو سألت عنك ذاك اليوم
حجي طه : منو
محسن : ام حمزه كالت صاحبك شونه خطيه شكد بجه عليك بله هاي شذكرها بيك يمكن عجبتها
حجي طه : خطيه مره بكد امي وشافتني شون محروك گلبي على جهرتك الزفره وضليت بالها
محسن : اني كتلها الولد طلك مرته ويدور وحده تخاف الله بجهاله واهم شى اكبر منه حتى يحسن بحنان الامومه وياها لان هو فاقد الحنان ولك بعدني ممكمل كلامه المره عدلت الشيله والعبايه جنهه نوت عليك

حجي طه : هاي المره اذا مشورت بيك مثل ذيج المره مااتسمى طة شفت شصار متوكع من حلكك تالي جان جابوك شهيد
محسن : شسوي اذا هي شوكت متيهه تلكاها بيتنا شوكت خلفت حمزه ولدها الباقين ماادري وحتى من مات رجلها غير تكعد وتسكت يوميه يمنا ابويه ليش ميتزوجها ويفضها وعدنا غرفه فارغه وانكعدها بيها احسن مايوم الصبح داكه بابنه
حجي طه : جان اقترحت على ابوك هيج اقلها متشمرها علية
محسن : كتله كال ابن الگلب اكو واحد يتزوج عمود كهرباء وفوكاها الگلوب مالته عطلان

محسن : اني بالي راح لبعيد كتله شبيهه المره طولها بعشر نسوان وشبيهه عطلانه يجوز حتى تحبل جان يركعني بلنفاضه الستيل كال قصدي على عينها مو على غير شى بربك اني تفكيري مال ساقطين هو كال گلوبها عطلان
حجي طه : هههههههه والله مو بس تفكيرك انت كلك ساقط
محسن : مكرود يمحسن ماعندك حظ كلها فاهمتك غلط هلمره هذا فيصل يحبها ويصيحلها بيبي واني خلصت طفولتي كلها اسويها على نفسي من اشوفها ولك هذا الجيل الله يستر منه اذا ام حمزه مهزته منو بعد يهزه
حجي طه : انت مابالك بس هاي المره الفقيره راح تدخل الجنه من وراك من كثر متحجي بيها
محسن : اذا دخلت الجنه والله ولا اطبها شنو بلدنيا ام حمزة وبالاخره هم ويايه شنو هذا الظلم والحلو اكول الهم جيبولي حور العين وتطلع هي من ضمنهم

حجي طه : هههههههه اتخيل شگلك
محسن : گبل اشيل جوالاتي (غراضي) وركض لجنهم شبيها شو شكو واحد اريحي وحدة صاحبة مزاج هناك واخلص منها مااوصيك مو توكف يلفاهي تباوع علية تعال ويايه على منو انصب هناك واضحك علية
حجي طه : هههه الله يبعدها من نار جهنم هو من الصبر للكبر للنار لا اله الا الله يسويها الحظ
محسن : عاد انت مشهودتلك كصتك هاي جم ختم بيها مال فكور
حجي طه : هسه لدوخني ساعه بيش امرلك باجر
محسن : غير الفجر نطلع شنو نسيت بس بروح ابوك فد لفه لبلبي وياك اخيك يجوع ورانا طريق
حجي طه : والله بطران ولي وخلي ام حمزه تسويلك لفه
محسن : اااه قاهره گلوب العذارى الجميله فخريه
منو هاي فخريه
محسن : يااا متدري غير اسمها فخريه شفت اسم موسيقي ورنان تصلح اسم راقصه
حجي طه : الله يعين مرتك على خبالاتك ويعين اهلك ويعين هاي المره المتنزل من حلكك

محسن : روح ولي متشجع المواهب المدفونه هسه من اروح للكويت اشوفلها رجال كويتي المره حليوه واخاف تنحرف
حجي طه : اروح ولك ضيعت الوكت كله وكولشي مفهمت منك ضربته على جتفه ورجع ضربني وجان اضربه جلاق ولي ابو حمزة وركضت واضحك علية
محسن : يجي يوم واكربسها براسك روح انهزم فگر كاروطه

رجعت للبيت لكيت سندس محضره الجنطه تنفسك بقهر رجعنا للضيم
سندس :فدوة طه انتبه على نفسك
حجي طه : ان شاء الله باوعت على الجهال كاعدين يلعبون وميعرفون كلها كم ساعه اروح لو ارجع لو لا اجتي سليل بحضني وتباوع على الجنطه بابا وين رايح
حجي طه : للجبهه حبيبتي
سليل : خلي اجي وياك
حجي طه : وين تجين ياروح ابوج
سليل : شوكت ترجع
حجي طه : ما اتأخر جان احس وحده تصعد على ظهري وتصيح مييع هاي لعبتها المفضله جريتها من ظهري وحضنتها وابوس بيها بابا ميييع وتدفعني تريد اصعدها صعدتها على ظهري وتضحك من كل گلبها وافتر بيها اشرت لحسام تعال بابا اجاني بسته وكتله بابا عينك على خواتك انت هسه رجال البيت وحضنته وبسته
حسام : اي بابا هنا عمر حسام ٦ سنوات والمفروض يتسجل مدرسه وصيت سندس علية بيدها تودي للمدرسه تمنيت مثل سليل اخذه اول يوم للمدرسه بيدي
بس بعد حكم القوي
سندس : مرت ابوك مخلصتها مناحه على علي 
حجي طه : مالج دخل بيهم
سندس : حيل خلي تضوك شصار بينا بذيح الحرب كون يلجم گلبها بيه
حجي طه : لتدعين حرام
سندس : هااا نسيت مو هو اخوك الحنين الخير وتخاف علية
حجي طه : تره والله روحي بخشمي ومالي خلك لأي شى لتضوجين واني بس اليوم يمكم
سندس : سكتت عيني

بيومها طلبت من سندس انومهم كلهم بحضني حتى هي مردتها تنام بعيد حسيت بخوف رغم داخل حرب ايران وسنين طويله بس هلمره منعرف شراح يصير
للفجر حسيت وكمت على كيفي حتى ليفزون بوستهم بلسره اولهم سندس واخرهم ريم غزالتي الصغيره وصليت وبدلت وشربت جاي وطلعت بدون مااحسسهم طلعت اتمشى والجو بعده مطالعه الشمس شوي منور وصلت لنهايه الفرع  ابتسمت اوف يلحنينه كون من عمري على عمرج واكفه وبيدها دولكه المي وعيونها غركانه دموع
نهر : لا اعتراض على حكمك ربي رجعنا للضيم والقهر والخوف
حضنتها لتخافين طول ماانتي اتذبين المي ورايه مراح يصيرلي شى منو كلج اليوم طلعتي
نهر : سامي وهو قبل شويه هم طلع
حجي طه : ليش منتظرني نروح سوه
نهر : يكول مكاني غير مكانه مكتوب اودع اخويه ورجلي بيوم واحد على منو هسه اخاف وارجف والله راح تاخذون حيلي وصحتي
حجي طه : اسم الله عليج بست راسها بس ادعينا والله كريم كولشي مقدر ومكتوب وعلى الله نعوفها
نهر : ونًعــٌٓمُٓ باإٱللـِْﷻـِْﮭﮧ مودع بالله والنبي واهل البيت
حجي طه : ديري بالج على نفسج وشوكت متعبتي هنا روحي لبيتي زين
نهر : الله كريم ليضل بالك بستها وكملت طريقي لبيت محسن

اجيت علية يمشي ويسحل بلجنطه من النعاس كوه ساحلي من الفراش مثل الجاهل وصعدنا نفرات خلصها شخير والعالم كلها تباوع علية اضربه بيدي حتى يكعد يرجع يردها ويكول خليني نايم لا اسب حتى الجيش والزم حلكه راح يدخلنا انضباطيه من اول يوم الارعن وصلنا للوحده مالتنا سلمنا اوراقنا بس دخلت اختنكت رجعت ايام حرب ايران كلها

ثاني يوم طلعت وحداتنا وشمرونا للبصره  الْحٍمَدٍ للـّہ محسن ويه وجبتي ادك المنشئات بينا ساعات وصلنا للبصره ونزلنا تعداد وفوكاها شهر الثامن اب والحر والرطوبه تموت ملابسنا مالنا خلك نشيلها مي غدينا بس وصلنا للبصره خلال ساعات جان يكولون الي خادم قبل يوكف هنا وفصلونا مجموعات ودزونا للكويت
محسن ويايه كاعد بصفي وساكت بس يباوع دخلنا حدود الكويت وقت بسيط لكينا روحنا بنص الكويت
نباوع الشوارع تعبانه اكو محلات محركه قطوعات عسكريه بكل مكان مؤسسات مسدوده واكو بيها منهوبه نزلونا للموقع المفروض نبقى بيه
محسن : ولك هاي شنو
حجي طه : اسكت محسن والتزم بلتعليمات
محسن : هسه اني شحجيت بس متوقعت هيج الوضع تعبان
حجي طه : حالنا حال غيرنا نفذ وبس

وبدت رحلتنا بلكويت مااكول جماعتنا مظلمو مأذو لا اذو ودمرو بس مو الكل بس الي عم علينا اكو جماعات نفوسها ضعيفه استغلت التدهور بلكويت وبدت تشتغل لصالحها جانت الاوامر صارمه والي يخالفها يتحاكم عسكرياً ويعتبر خائن عشنا ايام قاتله بين منشوف ناس مظلومه تتأذه ومنكدر نحجي وبين منشوف ناس تتمنى بس احد يساعدها ومنكدر نساعد جنت دوم اخاف من محسن لان اعرفه عاطفي كولش هو فكاهي ويضحك بس عاطفي جان من يشوف نساء تفوت واحد يتعرضلهن ميقبل ويدخل وحتى مرتين تعارك ويه ضابط ولوما الامر يوكف وياه والله جان عدموه لان بوقتها الي يدافع عن كويتي يعتبر خائن
جانت الغيره العراقيه عدنا عاليه رغم كل الاوامر نتجنب اني وهواي مثلي التحرش او التعرض لأحد وخاصه النساء لكن مع الاسف اكو ضعفاء الانفس حتى نهب وسلب كامو يسلبون حتى محلات الذهب والمحلات الشخصيه والبيوت الشخصيه مسلمت منهم وكامت تتحول شغلات الكويت للبصره ومن البصره لباقي المحافظات

تعرفون شنو معنى واحد حسره علية الفلس وكاسر ظهره على عربانه يطلع من الفجر كله علمود جم دينار يوكل بيها عائلته وتالي يشوف كدامه محلات ذهب وفلوس ومصارف وبيوت وكولشي ويكدر ياخذ ومحد يحجي وياه ويعدل حاله وحال عائلته من السما للكاع اضافه للتعب والقلق والتجوال بحذر الحرب النفسيه الجنا عايشيها جنت احارب الشيطان والله احاربه من كثر مجان يوسوس اليه اخذ عدل حالك لا انت اول ولا اخر واحد اخذ حتى من نضعف اني ومحسن وكم ولد ويانه جنا نصبر بعض ونكول يجوز هسه نموت شنكول لله بعدين وتالي ناكل حرام وشهر جر شهر واحنا بلكويت وضعنا من صعب لأصعب وخاصه من جنا نطلع حملات استطلاع على البيوت وندخل عليها اغلبها نلكاها فارغه بس اكو عوائل مطلعت من حنا نشوف شون خايفين وناس حاضنه ناس نكره روحنا بس مابيدنا شى التعليمات هيج تكول حاولنا وجاهدنا جهاد النفس حتى منضعف ولا نمد ايدنا ولا نأذي احد

ومرات جانت تصير مقاومه بسيطه من شباب وتصير مواجهات قويه ساعات وتنتهي بموت كل شخص قاوم وبدت وجبات من عدنا تتوجه ناحيه السعوديه وترجع وهنا اشتدت الحرب وصار الضرب على المواقع المدنيه بلعراق شاركت اكثر من ٣٤ دوله الاخبار مرعبه وكلنا بدينا نفكر بعوائلنا وخاصه من كمنا نسمع شون كامو يضربون مواقع مدنيه وبنى تحتيه للعراق الكهرباء شبكات المي المواقع الحيويه الرئيسيه الجسور جنت الليل ماانامه واني افكر بجهالي وبسندس شنو حالهم مرات نبقى ساعات بس صافنين وبس نريد نعرف شراح يصير بيهم كامت تنضرب مؤسسات مدنيه ومواقع مهمه ويه كل خبر يجينا يهد يحلنا

لحد ما اجانه خبر ملجأ العامريه ١٣ من شهر الثاني لسنه ١٩٩١ الخبر نزل مثل الصاعقه علينا خله اكثر الجنود تنهار حسينا الي مماتت عائلته بهذا اليوم راح يموتون عن قريب وراها بكم يوم تحديداً يوم ٢٥ من نفس الشهر تحرك القوات العراقيه بس قبلها حرق ابار النفط الكويتيه قبلها بكم يوم بدوا الحرق لكن كملوها يوم ٢٥ تم حرق اكثر من ٧٠٠ حقل نفطي صارت سماء وجو الكويت اسود النهار انگلب ليل وطلبو تحرك وانسحاب القوات العراقيه باتجاه البصره
طلعنا واحنا فرحانين ردنا بس نخلص من الحرب والمصايب الشفناها هناك كم شهر بس تعادل سنين
تحركنا وبليله ٢٦ من شهر الثاني ١٩٩١ وجان اعدادنا بالالاف وسيارات واليات ومدافع جيش كامل منسحب وعلى حدود الكويت الطريق السريع 80  معبر الحدودي  نسمع صوت طيارات فوكانا بالاول كلنا يجوز جماعتنا بس بثانيه وحده تكول انقلبت وصارت يوم القيامه بس السيارات تطاير والصواريخ مطر علينا اي تعليمات ماعدنا وكلها تعيط ومكعد نفهم شديصر ونشوف الي يركض والي ينهزم المنظر شكد مااوصفه قليل جان يعيط محسن انزلو ياولد جنا بسياره عسكريه وركضنا حتى سلاحنا عفناه الموت بينا وبينه مثل كل الحروب لكن هلمره مو مواجهه هلمره غدر ركضنا بكل قوتنا الدنيا ليل بس ضوا النار والصواريخ خلي الطريق السريع نهار مثل النمل نركض بلا واجهه منعرف وين نروح بس نريد نختل من الضرب الصار عدا الجثث الي تطاير  محسن على لحظة اتيهه من الهوسه بس هو جرني من بدلتي وراه اباوع الجنود هم تتراكض الي بقى صار رماد ويه الاليات والي نهرم انكتبله عمر ثاني يمكن لو صافنين بعد دقيقه جان اصلاً ميتين الي خلانا عايشين موقع سيارتنا كانت لا بلبدايه ولا نهايه شبه منتصف خلتنا نشوف ونحس بلحظه الموت الصارت
وبقينا نمشي ولا وكفنا مي ماكو وكاتلنه العطش الي وكع ومتحمل والي يمشي بدون ميعرف وين عشنا ساعات لعدوك متتمناها حتى مندارينا شصار وراها ولا اهتمينا اذا نتحاسب او لا لان انهزمنا الروح عزيزه ومتكدر تعوفها تضيع وبيدك تنقذها

لحد موصلنا البصره احنا نبجي على حالنا صارت حتى الكروه لبغداد غاليه ومحد يقبل يوصلنا انتشرت اخبار هذا الهجوم الي بعدين تسمى طريق الموت وهو ابشع من الموت بيومها ردنا بس نوصل لبيوتنا
بس مع الاسف هواي استغلو الصار وكامو يلمون فلوس براسنا الي عنده فلوس نوصلك والي ماعنده ابقى هنا بقينا يومين وماكو احد يوصلنا
محسن : راح انطي حلقتي شسوي وهذا الزنجيل بس خلي نرجع
حجي طه : بس ذني مالاتك ومستعز بيهن جان زنجيل ناعم ذهب بوقتها موديل ويلبسه محسن
محسن : يمعود طبه مرض بس خلي نوصل مصدكين مجذبين عايشين
انطاهم ورجعنا لبغداد الطريق كله نتخيل حالنا لو باقين بعد دقيقه شجان صار

وصلنا لراس شارعنا ونزلت اركض بس اريد اشوفهم خوفي عليهم هد حيلي ومحسن كمل طريقه اول موصلت الباب فتحتها لكيتهم يلعبون من كثر ما الهبطه بعدها بگلبي والي صار وياها خوفي عليهم كعدت بلكاع ابجي ممصدك همه عايشين واني عايش
عاطت سليل بابا وركضت بحضني ورشا وحسام كلهم اجوي حضنتهم بقوه جنت اني اريد احتمي بيهم مو همه ثواني سمعت صوت سندس شبيكم تعيطون حتى صوتها المزعج اشتاقيتله هي شافتني اجت تركض تبجي يمكن سامعين الاخبار
سندس :  الْحٍمَدٍ للـّہ على سلامتك والله متت خوف عليك حضنتها حيل والله اني هم بقيت دقايق بلكاع حاضنهم ودموعي تنزل
سندس : تعال كوم كوم ياعيني تعال ارتاح شوف حالك
كومه كمت وياها حيلي رايح وحتى صوتي كوه يطلع اريد ابلع النفس كوه كل مااغمض اشوف الصار وافز للمغرب كاعد وتفرك برجلي سليل وسندس لان حيل مورمه من المشي والركض قبلها سمعنا عيطه بذاك البيت بس جانت عيطه قويه طفرت مثل كل مره سندس وكالت انعام تعيط مدري شبي علي

يتبع ..

شكراً لتفاعلكم للقصه وتعليقاتكم وتصويتكم
فْـْ(😘)ـْْـْْدْيْـ🥰ـْتْكم