رواية ابي والغزلان الفصل الثامن عشر 18 - بقلم ريام هادي

ابي والغزلان
للكاتبة Reem
البارت السادس عشر

على كيفج يادنيا شبيج هيج وياي
على بختك يحظي شبيك ماتكعد
جبناهه حزن بس ضيم بس اهات
وشماردنا الفرح من عندي اشو يبعد
تمطر بس امل الدنيا للموزين
وعليه بالمصايب دوم ترعد
اجر الفرح كوه لخاطر العين
تهد جفون الرمش وبساع تشرد
ياكلمه سعاده بالله وين الكاج
وين افرح عليج وين افتح السد
على ضيم الكلب محد سألني بيوم
وبس تضحك عليه الناس تحسد
الم جروح كلبي وكوه اهدي الحال
كل ساعه الجروح تحارب وتمرد
اخيرآ ياصبر روح الله وياك
بقت هيه عليك شبيك ماتبعد

حجي طه : وكفت على حيلي شبيه علي
سندس : والله مااعرف بس تعيط وتصيح علي يمة علي يجوز مات
حجي طه :اسم الله شبيج سندس
سندس : هو اني لو انت الي صفر وجهك علية
حجي طه : غير اخويه قابل غريب
سندس : وين جان اخوك وكت ماكطع رزقك وخلاك حسره عليك الفلس هسه صار عزيز
حجي طه : ادري أذاني بس يبقى اخويه وهذا موت مو لعبه مكافي خسرت واحد ارجع اخسر الثاني
سندس : تهم وتتأذه لو اخوك بيه خير لو اخوك اخوه خيته مو واحد مثل علي مشفنه شى زين منه بس المصايب هو وامه اللهم لا شماته حيل بيها وابو زايد كون يلجم گلبها بيه ولو هي كويه مو مات جعفر انجلبت بلزايد

حجي طه : كافي يمعوده واذكري الله شنو هذا الحقد والكره خلي گلبج ابيض
سندس : لا عيني عوف گلبي مالك دخل بيه ابيض اسود بنفسجي حير بروحك وبگلبك مكافي انت وگلبك وفطاريتك تريد اصير مثلك غير اطك واموت ناقصه عمر
حجي طه : خلي اروح اشوف شكو
سندس : انت صدك تحجي ومصر تروح
حجي طه : بابا هذا اخويه غير افتهم شصار والوضع اصلاً طايح حظه والشهداء ركع
سندس : والله حرامات هذا يجي شهيد والناس تترحمله هذا مسكط بيه عاهه اقلها يحس وشسوه بينا
حجي طه : استغفر الله ميصيرلج جاره لا والله
سندس : عود من يصيرلك جاره وتعرف اوادمك زين بذاك الوكت افكر يصيرلي جاره لو لا
حجي طه : رايح تعالي سدي الباب ورايه مكعد ينسد
سندس : روح عيني روح وبدربك صيح لأنعام يمه مثل قبل حتى تكمل واهز بيدي

حجي طه : طلعت وعفت سندس ادردم وحدها دخلت لذاك البيت وكلها هوسه الجيران هناك واباوع انعام بلكاع وتلطم واشواق يمها بس نوريه واكفه على حيلها بس تبجي واحسها اقوى منهن رحت الها
شصار ام حسين
نوريه :اجه صديق علي يسأل علية وامي استلمته يكولها الها انفقد جان ويايه ضيعته قبل انسحابنا من الكويت  صار اكثر من ٣ ايام  لهذا اجه يسأل عنه  وامه دك ولطم
يعني مأجه خبر عنه موزين
نوريه : شون موزين وهذا الحجي الكاله صديقه قابل زين الناس هناك انكتلت وناس تأسرت وماطول مأجه معناها صاير شى هاي انت مو اجيت
حجي طه : مو شرط الجنود بالالاف وهناك مشايفه الوضع اني الله سهلها علية وكدرت ارجع بس اكو جنود بالالاف مكدرت ترجع وناس تمشي على رجلها انتم غير مشايفين الوضع يوم القيامه مو مثله يجوز مكدر يرجع مدبرت سياره اله على كيفك يجوز كلها يوم يومين نلكاه بلبيت سلام وين
نوريه : راح ويه صديق علي لامر وحدتهم بلكت يعرفون شى او سامع شى
حجي طه : الوضع تعبان ومااعتقد راح يحصلون شى حقكم ماالومكم مشفتو الي شفناه الله يرجعه بلسلامه
اباوع على انعام تعيط بكل حركت گلبها تخيلت لو اني مراجع هم هيج تسوي اكيد لا يجوز توزع جكليت لان متت رغم شگد گلبي شايل منها بس انقهرت عليها واشواق تباوع علية وادير وجهه عفتها وردت اطلع جان تلمحني انعام لان نسوان يمها وهوسه من دخلت منتبهت على وجودي وعاطت

انعام : ولك طة راح اخوك راح اول فرحتي
حجي طه : انداريت عليها وكتلها
لتخافين ان شاء الله مابيه شى هو الوضع هناك موزين واكثر الجنود طفرت ويمكن ماكو طريق وميكدر يرجع ويجوز بعده بلطريق لان اكثرهم رجعو مشي خلي ننتظر هلكم يوم اذا مأجه اني بنفسي اروح وادوره
انعام : ليش بس ابني هيج يصير بيه سودة بوجهج انعام محسوده من يومج انكسر ظهرج بجعفر وهسه علي
حجي طه : عفتها وطلعت وبالي يمه مهما كان اخويه ابن ابويه واكبر مني رجعت للبيت كعدت بلهول وسحبت الجهال وحطيتهم بحضني وابوس بيهم ممصدك روحي بعدني عايش وره ربع ساعه اندكت الباب طلعت ابتسمت من شفتها فتحت الباب جان تشمر نفسها بحضني وتبجي
نهر : والله گلبي نار عليك مصدكت من رجعت

حجي طه : اششش كافي ياروح اخوج هياتني كدامج
نهر : والله ممصدكه الله يعلم بحالي شصاير
حجي طه : حقج والله مصار كم ساعه من اجيت وكلت بس ارتاح امرلج بس التهيت بشغله علي
نهر : اي هسه عمتي اجت هي هم گلبها نار على سامي مثلي واكثر ومن سمعت المنطقه تحجي على علي لبست عبايتها رادت تستفسر من حلات روحها خطيه ومن رجعت كالت لمحت اخوج طة راجع مصدكت اجيت مثل المخبله عليك
حجي طه :  الْحٍمَدٍ للـّہ تعالي طبي خلي اشوفج زين حيل بالي يمج واحجيلي سامي ماكو خبر عنهه
نهر : دخلنا وكعدنا بلهول واجت سليل تبوس بيه هي والجهال وبقو يلعبون يمنا بس سندس ماكو مهتميت
والله مانعرف شى عنه وروحي نار وشابه بيها مثل المخبله ساعه اهج بلشارع وساعه بلسطح
حجي طه : على كيفج شبيج بس تبجين تكول معودت تبجي
نهر : مو حقي موزين لهسه موكف گلبي منا انت جنت ماخذ نص حيلي ومنا رجلي وحبيبي مااعرف شى عنه والليل ماانامه وهسه كملها سالفه علي موزين بعد بيه عقل
حجي طه : كولي ياالله وان شاء الله يرجع سامي وبديت اسولف الها على وضعنا وشون طلعنا من حلك الموت وطول مااسولف بس تبجي
حجي طه : خلي اسكت احسن شوفي حالج راح تموتين

نهر : شسكت وحتى اذا العين سكتت يبقى الگلب يبجي ميته خوف علية طة خايفه اخسره والاخبار كلها موزينه شكد ناس ميته والي مميت متأسر يعني الموت مرتين وهو سودة علية اول مره يشارك بمعارك وميعرف ولو هيج شغلات مابيها يعرف وميعرف بس اني مرعوبه علية
حجي طه : اني كتلها لأنعام منا لكم يوم اذا مبين خبر علمود علي اروح ادور وهم الج اكول مبين سامي اروح ادور عليهم اثنينهم
نهر : شدور ياعيني قابل همه كشايه وادور عليها وفوكاها بالبصرة شكبرها وهسه مگلوبه من وره الصارر
حجي طه : الله كريم هسه ننتظر ونشوف
جان تنزل سندس وين جنتي
سندس : وين قابل فوك مو شفتني
نهر : اروح اني
سندس : شنو اذا حضرت الملائكه طفرت الشياطين
حجي طه : اعتقد گلبتيها
سندس : والله كل واحد والي يصرفله اني اشوف نفسي ملاك
حجي طه : لا بالله
سندس : ليش عندك مانع شمسويه ومتشوفني ملاك لو لان گلت شياطين ونهر موجوده
نهر : فدوة سندس مالي خلكج شسميني سميني ابليس شيطان مالي حيل اتناقش وياج البيه كافيني
حجي طه : كافي مكلتي وين جنتي
سندس : اشوف شكو ماكو
حجي طه : فديوم تموتين من فضولج
نهر : اروح اني وبست طه والجهال
حجي طه : خلي اوصلج
نهر : لا گلبي هو انت تعبان شوف حالك نصك صاير حاول ترتاح وتنام وانتي سندس شويه ثگل وعينج على رجلج وعوفي ذاك المهجوم لأهله ولتدخلين بيهم
سندس : شكراً ماما نهر للنصيحه
نهر : الله يهديج وطلعت اتمشى وهم الدنيا كلها فوك راسي

حجي طه : انتي متوبين
سندس : شوف طة انت موتذب حركت گلبك بيه خلينا مرتاحين برجعتك
حجي طه : متكولين لروحج حايره بذاك البيت
سندس : كعدت وسكتت راح اكوم اسوي عشا حتى تاكل وترتاح
حجي طه : ياريت جعت حيل
كاعد صافن والف حسبة بالي جان تجي سليل بحضني
سليل : شبيك بابا مقهور
حجي طه : ياروح ابوج ماكو شى
سليل : الست تكول اقرو زين حتى تنجحون واني اخذت كله عشرات بس جان ذيج الايام نخاف هوايه من الغاره والضرب
جنت دوم اكولهم بابا هناك بلحرب
حجي طه : لتخافين بابا فضت تعال حسام شونك بلمدرسه
حسام : زين وطلعت الاول
حجي طه : عفيه بلسبع
رشا .. اليد اروح للمدسه (اريد اروح للمدرسه )
حجي طه : تعالي بحضني مبقى شى سنه وترحين للمدرسه واطلعين شاطره على اخوانج
رشا .. تشتليلي (تشتريلي ) جنطه وقلم
حجي طه : كولشي اخذلج صار
رشا .. واليد حمله (حمرة) هنا احط 
وتأشر على شفتها
حجي طه : لا بابا عيب انتي صغيره اخ منج سندس تحطين كدامها
سليل : متقبل ماما تضربج والله
حجي طه : سليل بابا جيبيلي ريم
سليل : اي بابا
عمر ريم صار اكثر من سنه ونص تمشي وتتحرك احسها اوكح خواتها حركة كولش بس شكلها مميز بمعانيها الناعمه وخشمها الافنص الصغير وشفايفها الصغيره كولشي بيها صغير وناعم بس شنو حركة نار بناتي حنطاويات مو بيض ومو عيون ملونه عيونهن لونهن عادي بين الجوزي والاسود بس شكلهن عندي احلى البنات
اخذتها بحضني اول محطيتها صلختني راشدي ولج ليش
تضحك وتحجي مكسر وكولشي ماافهم منها بس سليل تفتهمها عبالك تحجي روسي والمترجم مالتها سليل سريعه الكلام
شبيهه بابا
سليل : تريد نستله
حجي طه : ولج تردين نستله ضربتيني راشدي من تكبرين وتردين شغله جبيره وماانطيها الج يمكن اضربيني طلقه صافنه بوجهي وتضحك ومتعرف شنو معنى كلامي كزكزت عليها وابوس بيها وهي تضحك لحظات وتعاركت رشا وحسام لازم لعابتها وشالع راسها ورشا لازمه شحاطتي وتركعها بظهر حسام انطيت ريم لأختها جان تجي سندس تركض على عياطهم رجعت لمكاني اريد اشوف شون تتصرف وياهم

جان تلزم رشا ضربتها راشدي واخذت الشحاطه منها وبس اخذت اللعابه من حسام كولشي مسوت اله بس تعيط اكعدو راحه
حجي طه : المفروض عليج مثل مضربتي رشا تضربين حسام لان هو من الاول تحارش بأخته وشلع راس اللعابه وخربها
سندس : ميصير هو اكبر منها شون تمد ايدها علية
حجي طه : مكتلج ليش ضربتي رشا اضربيها لان تجاوزت بس هم لازم تضربين الي تحارش وخلاها هيج تسوي بطلي هاي التفرقه جم مره احجي واكول
سندس : شوف طة انت مو كل مصارت عركه بين الجهال تكعد وتحط رجل على رجل وتحاسبني مالك دخل جهالي واعرف شون اربيهم
حجي طه : وجهالي اني هم
سندس : من تكعد وتكابلهم مثلي عود احجي
حجي طه : لج بابا جم مره كتلج قابل بكيفي اعوفكم هو بيدي
سندس : ادري مو بكيفك بس هم مو تروح بالاشهر ومن تنزل تبقى تحاسبني ليش ضربتي هذا ومضربتي ذاك عوفني براحتي ميموتون اذا ضربتهم كعد اربيهم
حجي طه : واني دااشوف التفرقه بعيني شون اسكت مثل ماهو ابنج هنه هم بناتج لتزرعين التفرقه والاحقاد من الصغر
سندس : حيييل وين دخلتنا هاي بس لان مضربت حسام
حجي طه : مو اول مره وهواي حجيت ذيج الفترات تره كعد تخبلين الولد على خواته مكان ميصير الهن اب واخ راح يصير عدو
سندس : ميصير وهو يحبهن وبعدهم جهال لطلع عقدك من اخوتك علية
حجي طه : لو احجي للصبح ميفيد بيج سويتي الزقنبوت
سندس : كملت ولتكول زقنبوت
يله جهال تعالو اكلو
حجي طه : كعدنا ناكل واني صافن على جهالي وعلى حالي بعد الصار زين راح نعتبر هاربين مطلوبين شنو وضعنا العسكري هسه

دخلت انام وحاولت اشيل اي شى من بالي بس كل مااغفى اتذكر الصار وشون الموت فوكانا والصواريخ وشون الجنود تتكطع واركض مثل المخبل واكعد مختنك المصيبه بوكتها مجنا بس جنود حتى عوائل اكو لان اكو عراقيين جانو عايشين بلكويت ومن انسحبنا خافو من ردت فعل الكويتين بعد الانسحاب لهذا اجوي ويانه ماادري شصار بيهم اكيد تكطعو لان بوكتها عينك متكعد ترفعها ولا راسك تكدر تفره وتشوف شكو الصار وراك لو تركض وتنقذ نفسك لو تحترك بمكانك لزمت سبحة ابويه واسبح واستغفر اريد بس يرتاح گلبي ومااخاف مو بيدي الشفته مو قليل الخوف لهسه والرجف بجسمي باوعت ساعه ٤ الفجر كمت من فراشي وطلعت بره اشم هوا جان الجو بارد وكفت بلكراج اجر نفس قوي بس ويه كل مااغمض عيني يجي الصار كدامي
باوعت للجو تحسه اسود والنجوم متبين رغم الحرك بلكويت مال ابار النفط  بس هم سمانا تأثرت لان الحرك كولش جبير ومستمر  تحس حتى وانت بيتك تشم الموت

بقيت وقت طويل كاعد وصافن لحد مسمعت الاذان ودخلت صليت يمكن بس بلصلاه مااتذكر الصار وراها حاولت ارجع انام ومااكدر وبقيت كم يوم هذا حالي زين اغفالي ساعه او ساعتين
انتظرنا رجوع سامي وعلي ولهسه محد بين منهم گلت لنهايه الاسبوع الجاي محد بين منهم اطلع وارجع للبصره بس قبلها لازم عندي مبلغ زين لان الرجوع صعب وغالي جنا نسمع كل كم يوم فلان رجع ومن نروح نسأله نسمع اشكال القصص وشون جان رجوعهم صعب حتى اكو بيهم خلصوها توسل وناس كالو شفنا هواي جنود تتمشى من البصره لبغداد لهذا كلت انطي فرصه هذا الاسبوع اذا محد بين منهم اتوكل

گلت قبل ميصير رمضان وصيام صعب الروحه تصير وكعدنا على حدث هزنا هز تحديداً يوم ٣ من شهر الثالث بنص شعبان وره حادثه طريق الموت بكم يوم
وصلت اخبار البصره انگلبت على الحكم يابه شون انگلبت وشصار اول ساعات محد يعرف كل واحد يكول شكل ناس تكول الايرانين طبو علينا وناس تكول الكويتين وياهم من دوله ثانيه هم الي طبو مثل مدخلنالهم وناس تكول عراقيين وبيهم عدد جبير من الجنود الي شاركت بلحرب والشارع كلها تحجي متعرف الصدك وين

بس وصلت اخبار الوضع بلجنوب كله اشتعل عشاير وشباب وجنود كلها ثارت على الحكم بسبب الصار واكثر محافظتين همه البصره والعماره
وكلهم ناس فقره بسيطه تمنيت اشارك وياهم لان وضعنا صار طايح حظه من حرب لحرب شحصلنا حقها الناس بس اول شى سواه صدام كام يلم الشباب الي توجهم ديني والي تصلي بلجوامع اخاف تعلك بغداد ولان احنا اخوه جعفر وعدنا سوابق على كولتهم اجوي بليل جيتو علينا الحزبيه
اخذونا اني وسلام ماانسى منظر جهالي شون مخروعين ويبجون وسندس تلطم وتكول راح يعدموك وانعام تعيط بنص الشارع على سلام
اباوع بلسياره كومه من شباب المنطقه منعرف وين ودونا
لزمت ايد سلام الجانت ترجف
شبيك يول قوي گلبك
سلام : راح نموت مثل جعفر
حجي طه : اششش لتكول هيج تعال حضنته حسيته خايف اني هم خايف ويمكن اكثر منه لان مجربين الي ياخذوه بعد ميرجعوه

حجي طه : اسمع سلام اذا شافوك هيج عبالهم عندك شى احجي بهدوء ولتخاف انت شاب جامعي وماعندك اي شى موزين
سلام : اصلاً اني اشرب شجابني على هاي السوالف
حجي طه : ايا طايح الحظ طلعت تشرب شتكول لله ولك
سلام : بربك هو هذا وكته احنا لو نصبح لو لا وانت جاي تحاسبني على الشرب
حجي طه : دكافي ومثل مكتلك احجي على كيفك لتخاف

بقينا يشمرون بينا من مكان لمكان وكل شويه واحد محقق ويانه الي شفعلي لان راجع من معركه الكويت وتحديداً طريق الموت والي شفع لسلام لان يشرب وعنده مكسرات لهذا وره ٤ ايام طلعونا بعد مراونا المر وكرهونا حتى بروحنا

دخلت للبيت لكيت سندس لابسه اسود بس شافتني اجت تركض حاضنتني وتبجي
سندس : والله گلت بعد مااشوفك
حجي طه : اششش لتخافين شفت الويل والموت طول حياتي بقت على هاي كافي ياعيني وبستها اجوي الجهال يركضون حطيتهم بحضني اني اريداختل بحضنهم من الهبطات والموت الي كل شويه اشوفه

حجي طه : انتي ليش لابسه اسود
سندس : غير عليك
حجي طه : ليش جابوني شهيد واني ماادري
سندس : شمدريني گلت ماطول اخذوه اكيد مثل جعفر راح
حجي طه : انزعي مااحبه والله اختنكت من شفتج لابسه وفوكاها ترس وجهي تكلي عليك
سندس : قابل اكذب البسه على منو على انعام العوبه
حجي طه : هي شونها شصار ورانا
سندس : شصار قابل لتخاف هاي وحده تموتني وتموتك وتدفنا بيدها وكولشي ميصير بيها الدينصور انقرض وانعام متنقرض لو تدفن ولدها كلهم
حجي طه : صار شى مااعرفه تعاركتن
سندس : شصار قابل بس تعوي على ولدها وهاي اشواق متعارك رجلها وياها وضاربها ضربه كاسر خشمها وشمرها يم امها وهسه هي زعلانه
حجي طه : بله انتي جنتي مقهوره علية وتبجين لو مكابله ذاك البيت وتعرفين اخباره
سندس : غير اشوف خاف سمعو شى عنكم ياعيني منو يطمني عليك
حجي طه : مونت كارلو مو مثلج تعرفين كل الاخبار
سندس : يله ياعيني لتخلي عقلك ويايه وتعال ارتاح والله ارتاحينا بشوفتك
حجي طه : كون مو كل شويه ساحلينا
سندس : ان شاء الله برداً وسلاماً اروح انزع الاسود والبس احمر

حجي طه :مر اليوم كله بقلق اخاف يصير شى رحت لنهر الي حالها مرد گلبي منا سامي لهسه ماكو وهذا اخويه مو بس صديقي ميت قهر علية ومنا خوفها علينا اني وسلام لكيتها نايمه بلفراش بس شافتني كامت على حيلها وتبجي وتشهك مثل الطفل كوه سكتتها وطمنتها علية وعلى سلام مبقيت هوايه يمها لان صحتها موزينه گلت امر غير يوم الها دخلت بدلت وتمددت اندك الباب سمعت صوت سلام بره طفرت من مكاني جان يكول امي تريدك  استغربت اول تالي ادز علية وكعد ينتظرني حتى نروح سوه
سندس : شتريد هاي الحيه منك
حجي طه : مو يمج اني شمدريني
سندس : خلي تولي لتروح الها
حجي طه : خلي افهم واجيج انطيني دشداشتي
سندس : هاااك بدل اي يعني اكيد تروح تركض الها
حجي طه : صوتج سلام بره شويه لسانج
سندس : هسه يله قابل هو عبد حمود هو سلام الارعن ميدري بلدنيا وين حاير بروحه
حجي طه :خلي امشط واطلع للولد وانتي حضري الاكل بين مااجي
سندس : هو هذا الحصلته منك بس اكل اكل تكول مطعم اني
حجي طه : شكد تلغين لخاطر ربج

سلام : تعالي يحلوه انتي ياصف صرتي
سليل : بصف الثاني انت منو
سلام : هاي شنو متعرفيني
سليل : لا شايفتك ويه بابا
سلام : اني عمو اخو بابا
سليل : ليش بابا عنده اخوه بس بابا عنده اخت وحده عمه نهر
سلام : اني اخو نهر واخو ابوج
سليل : الله بابا عنده اخوه مثلي
حجي طه : يله سلام
سلام : تعالي انطيني بوسه
سليل : اموووح
سلام : فدوة للحلوات بله بربك متعرف بيه عمها
حجي طه : هو انت وينك حتى تعرف فديوم دكيت بابي وعرفت عندك اخ وتسأل عنه اسكت سلام انت اخر واحد تحجي وتعتب
سلام : لا بعد الايام الجايه اجي واسأل
سندس : خلي نشوف بس كون امك ترضه
سلام : شعليها امي مالها دخل
حجي طه : يله امشي وبعدين نسولف

دخلنا لكيتها لابسه عصابه على راسها وكاعده بلكاع وتون شافتني جان تبجي وتكول
يمه طه مو كتلي اروح اشوف علي وادور علية
حجي طه : مشفتي الحال شون اخذونا لو ما على ايدج اليوم رجعنا ولوما الله رحم بحالنا جان هسه اثنينا مدفونين
انعام : الرحمن عليكم والحمدلله شفتكم سالمين فدوة يمه هذا اخيك الجبير وگلبي نار علية وهلمره الوضع تصخم بلزايد وماعندي بس الله وانت تجيبلي خبر عنه والله راح اطك واموت وهاي مرته طلعت حبله ترضى ولدها يتيتمون مثل جنات
حجي طه : اكيد مااقبل
انعام : فدوة لهلوجه ابوك الله يرحمه دوم جان يكول سندج بكبرتج طه اريد ولدي منك
حجي طه : باوعت عليها اعرف تتلوك اليه حتى اروح واعرف تشوف دم سنونها ولا تشوفني بس هم لازم اروح اقلها لخاطر نهر هم ادور على سامي وهم اشوف علي
حجي طه : ماشي باجر اطلع
انعام : اشواق وينج
اشواق : هاا يمه
حجي طه : جيبي الفلوس من جوه
باوعت عليها خشمها مشدود وعيونها زراك جواه حتى مسلمت هاي شبيه وجهج
اشواق : مابي شى انت شعليك
انعام : ولج على كيفج نسيتي هذا اخوج اكبر منج

اشواق : منسيت بس اني ما اريد احد يدخل بحياتي
حجي طه : ابقي بعنادج لحد ميطيح حظج وهاي البدايه وبعد وبعد
اشواق : المهم ممشيت كلامك
حجي طه : طبج مرض انتي تاكليها قابل اني
يله خلي اروح قبل ماانغث
انعام : اوكف يمه انطيك فلوس
حجي طه : مال شنو
انعام : مال الطريق واخاف هم ترجع اخوك وياك
حجي طه : عندي مااحتاج
انعام : لا ماعندك واعرف حالتك كومي جيبي الجزدان بسرعه كومي
حجي طه : اني صدك ماعندي واضطريت اخذها منها لان ورايه رجعه ومااعرف شيصير
اخذتهم وطلعت
رجعت للبيت اجت سندس تركض علية انت صدك راح تروح للبصره ادور على علي
حجي طه : مو سمعتي كولشي على شنو بعد تسألين
سندس : لتخبلني متروح غير اگلب الدنيا
حجي طه : لازم اروح اذا مو لخاطر علي لخاطر سامي ونهر هم مشفتي حالها اليوم وشون متأذيه علية
سندس : عساهم بلحرك گلهم محد يهمني انت مكان متفكر بعلي ونهر وسامي فكر بناتك بيه بأبنك احنا منو النا اذا صار شى انت حقك متعرف شصار الغوغائين هجوً على كل المحافظات وصلت لكربلا والنجف وديطبون لكل مكان مبقو لا مستشفى ولا دوائر ولا مدارس كلها حركوها وحتى للبيوت كعد يطبون
حجي طه : انتي منين تجيبين هذا الحجي
سندس : نسمع بلراديو وهم الناس هنا تحجي غير الدنيا انگلبت
حجي طه : ولج بابا ذوله اهلنا وناس تريد تغير النظام وهذا الشى ميصرف للدوله
سندس : اكله يطبون على البيوت اذا اني حتى حضرت مكان نختل بيه اخاف يطبون يگلك حتى الجهال يغتصبوهم وخايفه موت على بناتي
حجي طه : لا اله الا الله شغلي عقلج شويه همه هيج يحجون حتى محد يساعدهم هاي انتفاضه والناس من ضيمها انتفضت وماكو اي شى من الي تكولي كلها ناس كسبه وفقره وجنود مثلي شافو الضيم وعشاير تريد تحمي اهلها لتضلين تمشين وره هذا وذاك

سندس : مالي دخل روحه متروح
حجي طه : الله كريم
سندس : شنو تاخذني على كد عقلي والله متروح لو اعرف اقفل الباب اكله الوضع موزين والله نجاك كم مره من الموت مو كل مره راح ترجعلي انعام شعدها كاعده وساكته بيتها والفلوس ليمها تجي حتى اذا مات علي عدها سلام واشواق وجهال علي وبت جعفر ومتحتاج احد حتى على حياتهم مأمنه اويلي علية اني لا مأمنه لا على حياتي ولا حيات جهالي ولا عدنا الي يكفينا تره والله البيت وشل شوف حالنا وانت حايرلي بعلي وسامي ومدري منو
حجي طه : حقج والله بس انتي هم قدري وضعي
سندس : لا اقدر ولا شى روحه متروح
حجي طه : دخلت وعفتها اصفن على كلامها صحيح من اباوع على جهالي وارجع اكول قابل شيصير اكثر من الي صار كلها يومين وارجع

ثاني يوم كعدت من الصبح حضرت شون مجان كم قطعه ملابس وبعدني راسي بلكنتور ادور جان تعيط سندس وطفرت من فرشتها وجرت الجنطه من ايدي
سندس : متروح طة وروح ابويه مااخليك تروح واذا رحت ادخل هسه على انعام اشعل اهل اهلها بخيرهم ماخيرونا وبشرهم عمو علينا
حجي طه : انطيني ياعيني ورايه طريق
حضنتني حسيت بخوفها علية وتتوسل لتروح
مسحت عيونها كافي ولج اول مره ادري بيج تحبيني
سندس : هسه وكت حب بربك اذا مو لخاطري لخاطر ذوله النايمين لخاطر غزلانك مو تكول ذني غزالاتك ارحمهم بلياك يضيعن
حجي طه : كعدت على الجربايه لازم راسي ومحتار
كعدت يم رجلي فدوة طة اذا رحت ادري مراح ترجع
حجي طه : لازم اروح منو الهم اخاف سامي وعلي بيهم شى اقلها اتلاحك الهم
سندس : والله لو انت الي مراجع وعلي موجود ولا يروح يدور عليك لو تموت والله طيحت حظي بطيبه گلبك
حجي طه : بست راسها وكتلها يومين وارجع
جان تكوم تركض حطت العبايه على راسها طلعت وراها اركض اشوف هاي وين راحت گلت راح تكفش انعام بس من طلعت شفتها اتجهت لنهايه الشارع رجعت گلت خلي اكمل ملابسي واطلع قبل مترجع وتعرضلي

نهر : جنت نايمه تعبانه ومصخنه جان اطب عمتي علية
هاي مرت اخوج بره كسرت الباب وتكول صيحيلي نهر
نهر : طفرت من مكاني بخوف شكد جنت تعبانه بس من عرفت سندس بره وادري بيها متجي اله مصيبه خفت على طه وطفرت ركض الها
هااا خير شصار
سندس : الحكي لأخوج راح يضيع من عدنا هاي امج الحيه واكعه دخيل اله يروح للبصره يدور على علي وهو ديحضرغراضه ويروح وبهاي الظروف
نهر : لطمت على صدري عزه وين رايح دخلت اركض جريت العبايه معلكه مال عمتي بلمطبخ وكتلها عمه هسه اجي وركض وياها

حجي طه : اطلع من الباب بعدني بلكراج جان تصير نهر گبالي
نهر : وين رايح
حجي طه : وخري نهر من دربي
نهر : اگتلني وروح ادفني بيدك وروح
حجي طه : لج بابا لازم اروح واذا مو لخاطر علي لخاطر سامي هو هم اخويه ورجلج
نهر : شوف طة سامي رجلي واحبه وروحي بيه والله اليعلم بحالي بدونه يوميه اشوف الموت لان مااعرف شى عنه وعلي هم مهما كان يبقى اخويه بس انت ابويه انت سندي وظهري انت عكازتي اذا انكسرت بيوم انت تشيلني منو الي بعدك

حجي طه : ياستار ليش تفاولين بلموزين كلها كم يوم وارجع
نهر : كولشي اتحمل والله بس مااتحمل تروح كدام عيني
حجي طه : مو رحت حروب وجبهات شو متسون هيج
نهر : ذاك وحد مجبور والله الي يعلم من جنت تروح شيصير بحالي لحد مترجع ليالي اختنك واني نايمه وروحي تفرفح عليك ومن اخذوك ذاك اليوم تشاهدت لان اعرف بعدك اموت اذا اجاني خبرك مثل جعفر
ارحم بحالي ياابن ابويه ارحم بحال اختك مالي احد بعدك ابوس رجلك
نزلت تبوسها ولزمتها
وحضنتها حيل كافي يبعد روح اخوج ليصير بيج شى والله اكثر شى رايح علمودج حتى ارجعلج سامي
نهر : اشهك بحضنه وابجي سامي حبيبي ورجلي وانت روحي واذا الله كاتبله عمر يرجع لو بعد سنين واذا مكاتبله لو مو انت اكعد واسكت فدوة وابقى فوك راسي وراس مرتك وجهالك مالنا احد غيرك وان شاء الله
الله يردهم سالمين
حجي طه : هذا هو بس اسكتي لتبجين

زين وهاي الفلوس انطتني اياه انعام
سندس : خليها بجيبك وطبها مرض قليل العدها
حجي طه : مستحيل اطلعني مو رجال واخذت فلوس وقشمرتها
سندس : لعد هي مو اخذت فلوسكم وطيحت حظكم لو الها حلال والك حرام
حجي طه : كتلج مااخذهم ولازم ارجعهم
نهر : جيبهم واخذتهم من ايده
حجي طه : وين رايحه
نهر : ارجعهم الها وطلعت ودخلت لبيتنا الي من يوم شغله جنات بعد مدخلت اله لكيتها بلمطبخ كاعده وتشرب جاي حطيتهم على الميز هي بهتت من شافتني كبالها
انعام : ذوله شنو
نهر : ذوله فلوسج وطة ميروح
انعام : شسويتي يمعزايه
نهر : مامستعده اضحي بيه لخاطر ابنج
انعام : مو هذا هم اخوج
نهر : اخويه على عيني وراسي بس طة اعز هو مو بس اخويه وابويه وسندي ومااخلي يروح لخاطرج او لخاطر اي احد
جان تشيل الماعون وتضربني بيه اجه براسي مباشره حسيت حراره صارت براسي
انعام : بت الگلب بت النعال تهدين علية علمود هذا الخايس ولج المفقود ابن امج وابوج وماانهزيتي علية وعلمود ابن رازقيه ترجفين رجف

نهر : اي ارجف واحرك الدنيا هم انتي مو كلتي احنا ميتين بلنسبه الج جوزي من عدنا وانتي حيري بروحج وشوفيلج واحد يدور على علي لتركضين وره الفقير وتقشمري
انعام : بت الزفرة هاي تاليها ولج حليبي وتربيتي ماغزرت بيج ناقصه
نهر : غزرت مغزرت والله لو ادري علي جان سوه مثل ميسوي هسه طة يعني يدور علية لو طة مفقود جان بيدي حضرت الجنطه بس اعرف لو صاير شى علية اول واحد ابنج يفرح هاي اذا مو انتي هلهلتي جان تنزع النعال وكامت عفتها وطلعت اركض
انعام : كح.. حقيره دزج علية لان مو رجال ادري بيه خاف ودزج
حجي طه : اجيت اركض من سمعت انعام شون تعيط بكراجهم

شبيج تعيطين
انعام : ولك انت موزلمه واني صوجي اعتمدت على واحد جبان مثلك ادزلي هاي الحقيره علمود تشمر الفلوس بوجهي مجان گلت مابيه خير ومااروح
نهر : طة عوفها وامشي
حجي طه : بس خلي احجي وياها شفتو من وراكم
نهر : عوفها ياعيني بعد امي وانفكت
انعام : تفو عليكم وعلى تربيتكم ياناقصين ان شاء الله يرجع علي ويكسر عيونكم
نهر : كوه جريت طة الصار نار وبقى يعيط علينا لحد محسيت بدوخه وكعت من طولي هم مريضة وهم امي ضربتني طلع دم خفض الضغط عندي محسيت غير سندس وطة يغسلون بوجهي

حجي طه : امشي اوديج للطبيب
نهر : مابيه شى صرت احسن لان مماكله صار كم يوم
سندس : اخاف حبله يخايبه
نهر : لا مو حامل
سندس : منو يكول امشينا نحلل بلمستوصف
نهر : هاي شكول الها واخويه واكف شاورتها هسه غاسله منها
سندس : خرب حظج واني كلت حبله يله كون يرجع رجلج ويحبلج واله عمتج تشعل صفحه اهلج
حجي طه : كومي سويلها شى تاكله
نهر : مجوعانه والله
حجي طه : تكومين لو اروح تحملت حجي واهانات من انعام من وراج ومرحت تالي لخاطري متاكلين
نهر : لا راح اكل تدلل
بقيت بيومها يمهم لليل لحد مطمنت بعد ميروح

حجي طه : شهر رمضان ١٩٩١ ناس صايمه وتموت الاوضاع صارت اسوأ  ويوميه خبر شكل بس جنا نسمع شون الكتل بفلس صار وعوائل بعوائلها تندفن صار الرعب بكل شارع وبيت مكافي الحروب والكل تتختل
ويوم بعد يوم نتأذه من الي نسمعه لحد مصدر بيان انتهاء الانتفاضه يوم ٥ من شهر الرابع والمحافظات الجنوبيه ادمرت وخاصه الاهوار بسبب هروب هواي من الثوار الها وحتى جنود هاربين كامت الحكومه وجففت الاهوار خلت الالاف الناس تعوف مكانها وعيشتها الي صارلها مئات السنين حتى بس تنقذ نفسها وخاصه اصحاب الحلال (الحيوانات) يردون ينقذون عوائلهم وحلالهم
انتهت الانتفاضه بقتل الالاف المدنين ناس بلمواجهات وناس دفن همه وعوائلهم وناس مالها دخل بس مجرد ابنهم شارك وحركو الاخضر واليابس

اااخ يلعراق شكد كاعك تحب دم وموت

وعم الهدوء بكل المحافظات ومر رمضان دامي علينا واجه العيد وجان اسوأ عيد ياعيد والمحافظات الجنوبيه بكل بيت وشارع اله ميت عدا شهداء طريق الموت صرنا منعرف الميت مال شنو المهم كل بيت فقدله عزيز وغالي وحتى المحافظات الشماليه محد سلم من هاي الانتفاضه ١٤ محافظه انتفضت بوقتها وكلها نهايتها الموت
حاولنا نرجع لحياتنا ونهر يوميه تتعب اكثر لحد مايوم اسمع هلاهل واجت سليل تركض بابا بابا
هاا حبيبتي
اجه عمو سامي
ركضت بكل قوتي واشوف نهر واهله شون حاضني ويبجون فرحت لفرحه اختي ولان هو صديقي وخفت حيل علية
اباوع لنهر شون تبجي من الفرح گلت ياربي لاتكسر گلبها كون دوم اشوف هاي الدموع بعينها اشوف بس الفرح ودموعه
بقينا لليل فرحانين بيه وكام يحجينا شون حاله وضعه واثناء مكعد يحجي جان يكول
رجع علي
حجي طه : لا والله بعد وخايفين علية
سامي : يمعود كولشي مابيه وشفته راكب سياره وياه جماعه حاولت اركض حتى احصله مكدرت سألت واحد واكف كال هذا علي كويت
حجي طه : شنو علي كويت
سامي : نفس سؤالي كلي الرجال هذا واحد يجيبلنا شغلات من الكويت ويبيعها اذا محتاج شى كولي ضليت صافن كتله اي والله محتاج مردت اكوله اني رجل اخته كتله شيبيع كال كولشي التريده حتى سبايك ذهب
حجي طه : هاااا سبايك ذهب منيله
سامي : انت افهمها ياطة شنو منيله

يتبع .....