رواية ابي والغزلان الفصل السادس والعشرون 26 - بقلم ريام هادي

ابي والغزلان
للكاتبة Reem
البارت الثالث والعشرون

بالغربه عشنا هم وليالي طوال
نشتاق لديرتنا والروح تعبانه
يگولون الصبر للفرج مفتاح
صبرنه هواي بس الفرج ماجانه
بيد الله الفرج مو بيد العباد
رب أرحم گلب وعيون سهرانه
فارگنه البيوت وطال الفراگ
والفارگ وطن ماينسه أوطانه
مسقط راسي بيتي وملعب أصباي
وعلى شوفة الدار الروح ولهانه
ياوسفه تفتت شمل الاحباب
وبالغربه الوكت طشاره سوانه
مذله الغربه كلفه وتهدم الحيل
وگلب عاش بقهر والروح خلصانه...

سجاد : مراح ينعدم طه انعادت المحاكمه
وصارت مؤبد مو اعدام
انعام : لطمت على صدرها ولك شون
سجاد : محجيت هندي طه مراح يعدموه تغير الحكم وصار مؤبد
انعام : شون تغير على اي اساس
سجاد : على اساس اكو شى اسمه استأناف واعاده المحاكمه
انعام : يبوووووو راح دم ابنج يأنعام
سندس : هسه اليسمعج يكون طلعوه افراج شو مؤبد يعني عمره كله بلسجن
انعام : انجبي انتي كله من وراج وراه الله يشيلكم بس وتراب ابني ماطول مراح ينعدم طه اله احرك گلبه مثل محرك گلبي
سجاد : كافي صوتج منا الناس شنو عجبتكم الفضايح كل كم يوم وگبت اصواتكم بلشارع انتي ام حسام اخذي بناتج وروحي للبيت
انتي عمة ادخلي جوه وكافي لطم
انعام : لك سجاد ابن عمتك مغدور ونايم بلنجف وانت همك الفضايح والصوت المفروض هسه انت ويايه نحرك گلبة لطه
سندس : ياا فوكاها فوك ما ابنج وجان يعيط سجاد يسكتها
سجاد : كااافي صوتج وكتلج اخذي بناتج وروحي لبيتج
سندس : خليني احجي اكلت راسنا من مات ابنها تكول عبالك شيخ معمم واخذه طه من الجامع وكتله لو ما هو فاسد لا والله هو كل الفساد والسقوط ويستاهل الحرگ

انعام : ترحين فدوة انتي واهلج وعشيرتج للتراب النام بي ابني ام الوصخ بت الفكر والمجاديه وجان تجيت انعام وتكفش شعرها لسندس وعاط سجاد حيل بيهم وجر عمته من ايدها حيل وهزها كااافي وطبي جوه
انعام : وخر اليوم اطيح حظها
سجاد : كتلج كافي عمه شو تعالي جان يجرها من ايدها ودخلها للمطبخ دفعها حيل وسد الباب من بره اندار علينا
يله للبيت گبل مااريد اشوف خيال وحده بيكم بسرعه (بصوت عالي)

سليل : سحبت ريم ورشا وطلعنا وماما ورانا ادردم
طبينا للبيت وجان الزم ريم شفتي شكبرها المشكلة من وراج
ريم : اني شعليه حسوني شافني بلباب وكال جبتلج طباشير بسفسجي وياهم احمر وكيفت وگلي تعالي ورايه وبس دخلت بيبي نعال شافتني
سليل : بيبي انعام عيب جم مره كتلج عيب وتالي وياج بلسانج هذا
ريم : مااا بيبي نعال وما احبها جرت شعري وضربتني وتكول اله امرد گلب ابوج عليجن شنو يعني وبابا ليش مرجع من العسكريه
سليل : اختنكت وهي تسأل عن بابا لان ماما كالت لحسام ورشا وريم ابوكم راح للجبهه بس اني اعرف الحقيقه كالت هيج حتى يبطلون يسألون على بابا
ريم بعد مترحين هناك ابد والله اني هلمره اجر شعرج ولا ازعل منج وبعد ابد مااحجي وياج
ريم : والطباشير

سليل : اني اشتريلج بس يصير عندي فلوس وجان ماما تجي تعيط
سندس : ولج مصخمه وينج وطلعت ماما جرت اذن ريم اااااخ ماما حبابه
اذا وصلتي لذاك البيت اله ازينج واخلي شعرج مثل حسام واخلي الولد كلها تضحك عليج
ريم : لا حبابه كله ولا شعري ما اوصل بعد
سندس : عينج على خواتج بين مااروح لنهر افتهم شنو سالفه ابوج صدك مؤبد 
ريم : شنو يعني مؤبد
سندس : انجبي ولتدخلين
سليل : امشي ادخلي جوه وتعالي اغسلج روحي ماما اني يمهم
سندس : عينج على غزل هوايه تكمز والجو بارد لتتمرض
سليل : ماشي

طبيت للبيت واخذت غزل بحضني واباوع عليها فدوة صايره تخبل الخدود ورديه والوجه ناعم والعيون گبار يمكن هي احلانا والشعر على شگار وسرح مي وبيضه مو حنطيه وسمره مثلنا ولج هذا الجمال على منو وابوس بيها وتضحك
شويه واجت ماما ذبت العبايه وكابلت التلفزيون وكعدت بس بالها ابد مو يمه جان شويه ورجعت لبست العبايه وطلعت حتى مكالت وين رايحه
احتاريت بأمرها ومااعرف شبيهه وكل ما اتذكر بعد بابا ميطلع دموعي تنزل وامسحها اخاف احد يشوفها
وره وين من الوكت اجت وكعدت بصفي استغربت هدوئها
سندس : اسمعي ماما سليل انتي كبرتي ولازم تتحملين المسؤوليه ويايه الي صار جبير وابوج مامنه رجعه
نزلت دموعي وغزل بحضني تلعب ومسحتهم وكل عقلي ويه ماما اريد افتهم شتريد
سندس : نحكم مؤبد واذا متعرفين شنو مؤبد يعني طول العمر واحنا خوما نضل العمر كله عاله على اليسوة والميسوه وانتظر نهر وسجاد وغيرهم يوكلونا اني راح اشتغل

سليل : تشتغلين
سندس : اي خالتج انوار لكتلي شغل وراتبه يعيشنا بس الاريده منج عينج على اخوتج اني دوامي من الصبح للسته العصر يعني اكثر الوكت بره اني راح اطبخلج الاكل بليل وعليج توكلين اخوتج اني وياج لازم نربي اخوتج واله يضيعون وماعندي غيرج اعتمد علية انتي مره صرتي واعتمادي كله عليج
سليل : ومدارسنا
سندس :هلسنه راحت عليكم والله كريم للسنه التجي اشوف شون
سليل : بس حسام كال انتي قبل كم يوم رحتي للمديره مال مدرسته وكدرتي ترجعي حتى لو بنهايه السنه مينجح دور اول ينجح دور ثاني لان نص السنه ممتحن يعني صفاره المهم ينجح والمديره قبلت ليش مكلتي على ريم ورشا
سندس : شنو تحاسبيني
سليل : مو احاسبج بس خطيه هنه اوائل وكله عشرات ليش يدوامون ويه الاصغر منهم

سندس : گلت كبرتي بس مو تدخلين بكولشي واني منين اجيب هسه بعدني ممشتغله ولا مستلمه راتب والمدارس يرادلها فلوس خوما اذبها كلها على المدارس
سليل : بس خطيه البنات جان تعيط بيه سكتت ودنجت
سندس : كافي لغوه زايده هسه العليج عينج عليهم ولتدخلين بشى اكبر منج

مجاوبتها وسكتت صارت اعصاب واني اخاف منها
كمت وعفت غزل يمها وطبيت لغرفتي وتمددت وحطيت اللحاف الكطن على راسي لفلفت روحي بيه مااريد اسمع احد اريد بابا اريد يرجع صوته بلبيت وحنانه يملي علينا حياتنا
فات اليوم بهدوء محسيت غير على ايد ماما تكعد بيه وتكولي كومي قفلي الباب ورايه باوعت عليها لابسه قميص وتنوره مو مالتها مال خاله انوار وفاتحه شعرها وحاطه مكياج ومرتبه نفسها
سندس : كومي قفلي الباب والغدا كامل مركة بتيته وطبكت هسه التمن بس يتهدر طفي وساعه وحده غديهم
سليل : والريوك

سندس : شنو قابل متعرفين تسوين بيض شيرادله وحمي جاي واكلو طالعه تأخرت
سليل : اني صفنت عليها والله مااعرف اسوي بيض شون بيه هي معلمتني وحتى متنطي مجال اسألها وهاي ريم تموت على بيض العيون تگلب الدنيا اذا متريكت هي ورشا بيض عيون

كمت غسلت وجهي واباوع على الطباخ والاكل واحس وحده واكفه وتفرك بعيونها
رشا .. ثلل جوعانه وين ماما
سليل : طلعت للشغل ومترجع للعصر
رشا .. والريوك من يسوي
سليل : اكو جبن تاكلين
ريم : صباح الخير ثلل
سليل : صباح النور
ريم : جوعاااااااااااااااانه
سليل : المن تعيطين ادري جوعانه بس ما اعرف اسوي بيض عيون تاكلون خبط اسهل
ريم : ماااا اريد عيون حبابه
سليل : كعدت بلكاع وصافنه عليهن يردن يبجن كمت وكفت انتظرو هنا راح اروح لعمه نهر تجي تعلمني

مديت راسي ماكو احد بلشارع طلعت تمشيت بلبجامه وصلت لبيت عمه باوعت الباب بعده مسدود رفعت نفسي شويه اشوف من فتحات الباب صنطه المطبخ يمكن نايمين اي بعدها الصبح والناس اكثرها نايمه استحيت ادك الباب فكرت كلت شكو بيها خلي اليوم يتريكون اي شى بين ما ماما تعلمني من ترجع رجعت اتمشى ضايجه وحايره ذني العنوديات شون اقنعهن
وصلت قريب بيتنا جان اسمع صوته المعهود رفعت راسي
سجاد : وين جنتي
سليل : باوعت علية مخنزر ومستغرب من طلعتي دنجت استحيت احجي
سجاد : مو احجي وياج وين جنتي من الصبح
سليل : هااااا جنت رايحه لعمه نهر
سجاد : وبهيج وكت
حسيته بدا يتعصب خفت ليعيط علية وكتله والله علمود ريم ورشا رادو بيض عيون واني ما اعرف اسوي وردت عمه تعلمني ومدكيت الباب استحيت گلت خاف نايمه ورجعت
سجاد : وامج وين
سليل : طلعت للشغل
سجاد : شغل هذا ياشغل

سليل : مو اشتغلت بشركة ويه خاله انوار
سجاد : شبسرعه ولا گالت وشون تعوفكم وحدكم يعني تبقى هيج مهمله
سليل : اني موجوده
سجاد : هو انتي يراد واحد يحميج يله ادخلي للبيت كدامي اني اسوي للبنات البيض
سليل : هااا لا عمو هسه ياكلون جبن جان تطلع تركض رشا
رشا .. تره والله طگيت جوع ميصير هيج عمه وين
سجاد : سلمي ام بطن
رشا .. هلو عمو سجاد
سجاد : يله ادخلو تعالي اني اعلمج ميرادلها شى ولا هاي الهوسه كلها
سليل : دخل واني دخلت وراه وميته من المستحه
ريم : هلو عمو سجاد
سجاد : هلا بلزيبك ام لسان الطويل
جان اطلع لسانها وتحجي
ريم : شوفه كصير والله
سجاد : طلعي الطاوه وجيبي البيض وتعالي اعلمج شون تسوي
ريم : عمو سجاد احسن منج ثلل انتي كسوله متعرفين
سجاد : وانتي بس راعيه مشاكل ومصايب
ريم : شنو راعيه عمو
سليل : شراح يخلصك اذا متعرف الكلمة الا تسأل عن معناها
سجاد : يعني تحبين المشاكل

رشا .. جعت والله راح ابجي ولج ريم اسكتي خلي عمو يكمل الريوك
سليل : ثواني وكمل كولشي ويعلمني شون اسوي
تريك ويانا عمو
سجاد : مااحب اتريك الصبح
حطيت الطاوه وذني هجمن حتى بدون انتظار
اكعد حباب شويه
كعد ياكل اباوع علية شون يقسم الخبزه وياكل النص مالتها ميحب طرفها الثخين وهاي ريم تلكط وراه الطرف تحبه
اكل شويه وشرب جاي وكام
بنات بقو لحسام
ريم : خلي يولي اكو جبن يحبه خلي ياكله
سجاد : عيب تكولين على اخوج الجبير هيج
ريم : العفو عمو
سجاد : اروح اني عدكم غدا لو تردين اسوك الج قبل مااروح
سليل : لا مسويه ماما
وصلنا للباب جان يكولي
سليل انتي كبرتي لطلعين بعد هيج بجامه النوم
دنجت على نفسي متت خجل
من اطلعين البسي شى ممنوع بعد بهيج لبس اطلعين
سليل : صار عمو
طلع ورجعت للبيت اباوع حسام كاعد من النوم يعيط عليهن لان اكلو ومعافوله صفنت عليهم شون ياربي اكدر عليهم شون

مر اليوم كله هوسه كل شويه وحده متعاركه وناس كاتله ناس بعدنا بأول يوم واحس تعبت شون راح اخلصها هيج الظهر ردت اصب غدا ادور على ريم ماكو طلعت مثل المخبله ادور عليها گلت اكيد تعاركت طلعت واشوفها حاطه طابوكه صغيره بلباب وحاطه ايدها جوه خدها وتباوع على حلة الطلاب طالعين من المدرسه والدمعه بعيونها

كعدت بصفها شبيج ريمو
ريم : ثلل ليش ما اروح للمدرسه والله اني اخذ كله عشرات والست تحبني
سليل : ان شاء الله السنه التجي ترجعين
ريم : بس حسوني يكول كلهم ينجحون ويرحون للثالث واني ابقى بلثاني ويه الزعاطيط
سليل : ميخالف حبيبتي وراها هم ترحين للثالث
ريم : بس همه يرحون للرابع
سليل : اووف ياريم شبيدي شسوي حيل زهكت بس هي دنجت وبجت وتلعب بطرف اصابيعها بلكاع بلتراب
انقهرت عليها شنو ذنبها يوم بعد يوم اكرهه روحي واحس الديصير كله بسببي

تعالي ندخل حضنتها وطبيت واني ممروده عليها حتى تغدت قليل
للعصر اجت ماما ذبت الجنطه باست حسوني وغزل وسلمت وسبحت ونامت حتى محجت شى وبليل حسيت طكطكه بلمطبخ كعد تسوي غدا ثاني يوم حتى مسألت شصار مصار يومنا شون مشه ولا اهتمت اجيت عليها

ماما روحي للمديره مره ثانيه وخلي ترجع ريم ورشا للدوام اني ما اريد بس همه خطيه
سندس : سليل تعبانه حيل ونعسانه وكوه كعد اسوي اكل روحي من يمي احسن الج
سليل : حسيتها عصبيه وهم مراح تسوي شى گلت ماكو غيره ابتلى بينه بلوه بس لازم احجي وياه اقلها لخاطر البنات هو هيج وكت مرات بلسطح طلعت من المطبخ وصعدت للسطح لكيته يدخن وكاعد يم قفص الطيور
حس بطكطكه مني بدون حتى ميرفع راسه وكاعد بلكاع ومرجع راسه على الحايط ويدخن
هاا سليل محتاجه شى
سليل : شمدريك اني

سجاد : لان بس انتي تصعدين السطح وخاصه هيج وكت احجي محتاجه شى
سليل : كمت افرك ايدي بخجل حسيت هواي كمنا نطلب منه بس ماعدنا احد غيره حجيت واكطع بلكلام وكتله على ريم والمدرسه سمعني للاخير جان يشمر الجكاره بلكاع وكام على حيله وداسها برجله وتقرب مني
سجاد : وانتي متردين ترجعين للمدرسه
سليل : لا ما اريد
سجاد : بس انتي شاطره
سليل : هلسنه مااكدر ومنو هم يبقى يم غزل وماما اكيد متقبل
سجاد : امج علية مالج دخل بيها
سليل : لا اني ما اريد ارجع

سجاد : براحتج خلي اروح باجر للمديره واخذ المختار ويايه لان صعب نرجعهن اكيد غياب هوايه اذا مفاصلتهن بسبب الغياب بس اذا اخذت المختار وكتاب من الحزب بلكت نشوف طريقه نرجعهن امج مثل مرجعت حسام ارجع البنات لو هي الخباثه تجري بلدم
سليل : محجيت شى خجلت من كلامه
سجاد : انزلي نامي وارتاحي الاكدر علية اسوي
سليل : هواي ضوجناك

سجاد : انتم امانه طه عندي لتهتمين مضايج ابد بس اريدج عينج على خواتج لان الظاهر امج بدت ومن اليوم تعيش بغير عالم
سليل : شنو يعني
سجاد : ماكو شى انزلي نامي تصبحين على خير
سليل : وانت من اهل الخير عمو

افكر بكلامه وخايفه من الجاي كوه غفيت من يوم حادثه سلام واني ماانام اله من يطلع الضوا وره صلاة الفجر اخاف انام بليل احسه راح يجيني ويتحارش بيه وراح يرجع بابا يكتله صار النوم عذابي مو راحتي بس كوابيس يطلع ضوا الشمس يله عيني تاخذ نوم وبعدها بساعتين تكعدني ماما علمود الجهال يعني يومي بين نومه الليل والظهر متتجاوز بليوم الواحد اربع ساعات

طلعت ماما وبدت رحلتي ويه الجهال اندكت الباب صحت منو
نهر : اني حبيبتي
فتحتها وحضنت عمه من تجينا احس بابا داخل علينا
نهر : شونكم تعالي وين خواتج
اباوع على ايدها اشكال خطيه جايبه حلويات ومخضر وقراصات وكل وحده بجامه ونعال حايره شمشتريه
شنو هاي عمه هوايه
نهر : لو عندي اجيبلكم الدنيا كلها
سليل : صار يومين ماكو
نهر : على عيني يمه حكم القوي بعد وين امج
سليل : هاااا بلشغل
نهر : يااااا ولج ياشغل
سليل : ماما اشتغلت خاله انوار لكت شغل الها
نهر : ولا كالت ومنو يبقى يمكم
سليل : محد وحدنا

نهر : صخام بوجهه متخاف عليكم زين هي مو تعرف امي وسكتت
سليل : شبيهه بيبي انعام
نهر : مابيها شى حبيبتي عادي المهم متفتحين الباب لأي احد وخاصه بيبيتج انعام او عمج علي او اي احد من ذاك البيت ماشي
سليل : ماشي عمه اكلج عمه تراجي مالتج وينها
نهر : هااا انكسرت وذبيتها بلبيت
سليل : حرامات كولش احبها صلحيها
نهر : الله كريم امج مسويه غدا لو اسويلكم
سليل : لا مسويه مرگة بيتنجان وهسه راح اسوي زلاطه اتغدي ويانا
نهر : هو باقيه وياكم للعصر بين متجي امج افهم منها شكعد تسوي

سليل : البنات طارو بعمه وخطيه شالت الدشداشه مالتها ولزمت البيت من الطابق الفوك تمسح وتنظف وهي سريعه وشاطره وحيل نظيفه واني اساعدها وحبست اخوتي بلغرفه لحد منكمل اني وياها البيت جنت مو حيل اعرف انظف بس هي تعلمني وخاصه جانت تمسح بيدها وسريعه كولش وكل ميفوتني شى تنبهني علية بأبتسامه وتكول معدله بت اخويه من اشوفها احس شايفه بابا

كملنا حدود ساعه ١٢ صار البيت يلمع حتى وجبتين ملابس غسلت خطيه هلكت كالت نتغدا ونرتاح ونكمل الملابس جان البيت هوسه وصخ وهسه صار صدك يلمع وريحته تخبل غسلت واندكت الباب سمعت صوته طلعت اركض
سجاد : هاي شبيج جنج دجاجه شامريها بلمي
سليل : هلو عمو مو جنت انظف ويه عمه وغسلت
سجاد : وين ريا وسكينه
سليل : منو ريا وسكينه
سجاد : رشا وريم
سليل : ومنو ذني ريا وسكينه شبهت ريم ورشا بيهن
سجاد : ذني اثنين خوات اذا اتفقن على احد كولي الله يرحمه
سليل : هههه اي صدك لعد خواتي ريا وسكينه
نهر : تعال اكعد سجودي بشر وين جنت
سجاد : كملت شغلت البنات صيحيهن خلي يسمعن
صحت البنات واجن يركضن
سجاد : من السبت اداومون مدرسه
وعاطن هيييي وركضن بحضنه اني مو قصدي هيج اتصرف بس والله من الشفته

خواتي من فرحتهن ركضن لحضن عمو سجاد واني عطت عيب وخرو اعرف عمو سجاد احسن واحد بلدنيا بعد بابا واعرف يخاف علينا وحريص بس من الشفته من عمو سلام صارت بيه خوفه عليهن ضعف قبل حتى من اقرب الناس من عطت عليهن هو استغرب وبسبب ذكاء سجاد الي يفهم الشغله وهي طايره مباشره خنزر بوجهي وضاج حيل مني وخر البنات من حضنه وكاام
نهر : هااا وين توك جيت
سجاد : اروح عندي شغل ومثل مكلت اريد اوائل بلكت تنجحون من الدور الاول اذا درجاتكم كلها عشرات بلسعي من تتقسم راح يصير كل وحده عدها خمسه وبالامتحان الاخير هم عشره تنجحون لتضيعون تعبي
ريم : اني شطوره وهسه اطلع الاولى
رشا .. واني هم شطوره
سليل : بقيت اباوع علية ميباوع بوجهي عرفت ضاج مني عافنه وطلع

تغدينا وبالي كله يمه مو بيدي اخاف حتى من الخيال على خواتي
حسام ضاج لان البنات راح يرجعون للمدرسه بس ماانسى فرحتهن شون يحضرن الغراض والكتب والصداري رغم اليوم خميس وباجر جمعه والسبت يله الدوام بس هنه طايرات تمنيت دوم يبقن هيج مرتاحات
اباوع على عمتي شون صافنه على كل. ركن بلبيت وتبجي بهدوء اعرف مقهوره على بابا ومكسوره بس اني صغيره ما اعرف شون اواسيها
للعصر طبت ماما تتمخطر
نهر : هلا بلوزيره سندس

سندس : شنو حضرت جنابج تستهزأين
نهر : كولي على الاقل احجي شنو اخويه جان هيج ساجنج بس انحبس سودة علية طلعتي تركضين
سندس : قابل كعد العب غير اشتغل حتى اوكل جهالي قابل اضل تحت رحمتج ورحمة سجاد افندي الشايل خشمه تكول ينطيني الالاف وماادري كلها جم دينار وشايل خشمه علينا
نهر : يعني فوك زينيته للولد تحجين علية
سندس : لا اريده ولا اريد الزين منه خلي يجفينا شره اني كعد اشتغل واعيش جهالي

نهر : ليش مااكيف تعتمدين على نفسج بس على الاقل شويه عينج على بيتج وعلى جهالج لتنسين عندج بنيه مراهقه وبنات صغار كلها ضاربتها عرض الحايط واطلعين من الصبح للعصر ومتعرفين كولشي عنهم
سندس : عيني نهر حيري بروحج وبيتج وبضليمتج وعوفيني وعوفي جهالي مالج دخل بينا
نهر : شون مالي دخل غير ذوله جهال طه وطه عندي اعز من روحي
سندس : وطه راح يبقى العمر كله بلسجن ويجوز يموت هناك شتردين نموت وياه
نهر : اسم الله الرحمن علية من عمري على عمره ولج مصار كم شهر وهيج تحجين بعد كم سنه شسوين
سندس : مالج دخل بله بيه كتلج حيري بروحج واذا على جهال اخوج تعالي شوفيهم محد مانعج بس لتدخلين بحياتي مااشي

سليل : متت قهر على عمه وشتكول ماما تاكلها وتشربها لحد مخلت وطلعت بلباب لزمتها
فدوة عمه لتزعلين ولتعوفينا
نهر : من كل عقلج اعوفكم انتم روحي من الدنيا ريحه الغالي وغزلانه ليضل بالج متعلمه على سوالف امج يله دخلي جوه شويه ارتاحي وجهج صاير ليمونه
سليل : مااشي بستها وطبيت ومر يوم وبعدها يوم وعمو سجاد مبين اصلاً وعرفت ماما برجعه البنات ومهتمت اني گلت ماطول اني مراح اداوم اخلي عيني عليهن حسيت ضياع البنات بسببي وبهذا تصرفي احاول مااخليهن يخسرن كولشي مثلي

الصبح ماما حضرت الريوك واللفات واني ابدل لريم وامشط الها ورشا بس امشط جنت مو حيل اعرف بلكصيبه
ريم : هاي شنو ثلل عوجه جنها مدعومه
سليل : شسوي مااعرف
ريم : سويلي ذيل حصان
سليل : اي هاي سهل وسويته بس شويه اعوج
ريم : راسي ليش اعوج
سليل : اهووو ريم شكد تلغين من الصبح
ريم :انطيني جنطتي
مدت ايدها هااا شتردين
ريم : فلوس مصرف
سليل : باوعت بوجهه وابتسمت بس اليوم روحي هيج ومن باجر اخذ من ماما وانطيج
ريم : شون مااشتري حلاوه لو ضروك الفار
سليل : بس اليوم گلبي حبابه وبستها
ريم : بس باجر تنطيني
سليل : من عيوني
هاا رشاوي كملتي

رشا .. اي واخذت لفتين لان ماعندج فلوس
سليل : عافيات المهم تنتبهون على نفسكم
طلعو وكفت بلباب تمنيت اوصلهم بيدي بس غزل نايمه شافتهم جنات وحده حضنت الثانيه جانت ممنوعه منهم بقيت اباوع من بعيد لمحت عمو سجاد وكفهن وانطاهن بيدهن ركزت زين لكيت منطيهن فلوس حتى لجنات انطاها وباسنه من خده وراحن طبيت للبيت واني خجلانه من تصرف اول البارحه بس موبيدي عايشه برعب وخوف على خواتي

للظهر رجعن مكفوشات ويبجن ركضت هاا شبيكم
ريم : يكولون بابا بلسجن كتل اخوه
سليل : بسرعه دمعت عيني واني اسمع كلام ريم
رشا .. صدك بابا مسجون ليش البنات يحجون علية مو كلتو بلجبهه
ريم : بعد ما احبه لبابا ليش هيج يسوي
سليل : اششش اخذتهم لحضني وهنه يشهكن ومقهورات حيل
ليش هذا حالكم
ريم : ضربنا البنات الي يحجون على بابا صدك بابا كاتل عمو وهو مو حباب ويخوف
سليل : انتي تحبين بابا
ريم : اييي

سليل : اياج بيوم تحجين علية بابا احسن اب بلدنيا ومالكم دخل بلي يحجي ويجي يوم ويرجع ومن تكبرون راح تعرفون كولشي ومو بس تبوسون ايده حتى رجله على السواه اياكم بيوم تخلون احد يحجي على بابا
رشا .. اني هم زاعلت صديقتي لان تحجي علية
سليل : طلعو اوائل حتى بابا ميزعل
ريم : ما احب هاي المدرسه
سليل : كملو هاي السنه واخلي عمو سجاد ينقلكم لغير مدرسه يله طبو بدلو حتى نتغدا مجعتو
ريم : ثلل سبحيني هاي الزماله ذبت طين على شعري اخاف يصير بيه كمل
سليل : تعالي اسبحج
جنت امثل القوه كدام خواتي الصغار بينما اني داخلي يمكن اضعف وحده بلدنيا وكارهه حتى ملابسي اللابستهم

شهر كامل ومااشوف عمو سجاد جان يوميه الصبح ينطي مصرف للبنات ويشترون وماما عليها بس الغدا لان مااعرف اطبخ وبيوم كاعده البنات يقرون واختنكت اشتاقيت لبابا اريد اشوفه تعبت من كولشي لا عندي صديقه احجي وياها وعمه نهر عمتها محاربتها كل اسبوع تجي يوم تنظف البيت كله من فوك ليجوه وتروح حتى ما الحك احجي وياها وذني خواتي صغار كولشي ميفتهمن والشغل تعبني واني صغيره على حمل بيت فوك راسي
صعدت للسطح ساعه ١١ بليل بعد مانامو الكل سمعت صوت مطر واني احبه وبنفس الوقت اريد ابجي مخنوكه
كعدت بمكاني المعهود ابجي بقوه واباوع للسما وقطرات المطر على وجهي  الجو طيب بدايه الرابع مطر نيسان لسنه ١٩٩٦  بحيث اشهك من البجي وامسح وجهي من دموعي والمطر وارجع ابجي لحد مجاني صوته مكافي تبجين متعبتي

سليل : باوعت بأتجاه الحايط الفاصل بينا ومن شفته كمت ابجي اكثر
تقربت من الحايط وباوع علية شبيج سليل صاير شى
سليل : لا واشهك واباوع علية
سجاد : شكد تعوين لخاطر ربج من يوم ما شفتج تبجين
سليل : شبيك ويايه عمو ليش تكرهني
سجاد : اني اكرهج من كل عقلج
سليل : كمت من مكاني وتوجهت علية واحجي بحركه اي تكرهني وتضوج مني حتى كمت متسأل علية
سجاد : اول شى نصي صوتج لتنسين اني اكبر منج ومااحب يعلى صوتج وثاني شى مزعلان بس مردت اضايقج
سليل : مسحت عيوني ونصيت صوتي خفت ليعيط بيه ليش تضايقني
سجاد : انتي تخافين على خواتج مني لهذا كمت مااتقرب منكم حتى لتضوجين وبنفس الوقت مضطر مااتركم ابد لهذا الصبح اعرف بيج واكفه وره الباب تباوعين على خواتج واشوفج شكد المسافه بيني وبينهن لان لازم انطيهن مصرف وهم حتى تطمنين عليهن كدام عينج حتى حرمت البيت علية حتى ترتاحين

سليل : رجعت بجيت والله مو بيدي كمت اخاف من خيالي
سجاد : واني عاذرج ومعاتبتج
سليل : عمو لتزعل والله انت احسن رجال بعد بابا
سجاد : اريد تفهمين شى واحد طول مااني عايش مااخلي بشر يلمسكم انتي بلنسبه اليه مثل هبه الله اختي اشوفج بيها وخواتج احسهن مثل بناتي اني مااطلب منج تأمنين مني لان هيج شغلات متنطلب بلوكت تنعرف وتنحس وانتي بعدج صغيره ومتأذيه ومراح تفهمين هذا كلامي بس الاريده منج لتبجين وصيري سباعيه وحافظي على خواتج احتمال راح تجيج ايام اصعب

سليل : ليش شيصير
سجاد : اتمنى الي بالي ميصير بس اني مااغلط بلحكم على بشر بس لأول مره اتمنى اغلط وكعد انتظر اشوف شراح يصير
سليل : عن منو قصدك
سجاد : مو مهم هسه المهم تنكعنا تره وراح تتمرضين وتخلصيها كحه مال عجايز وخشم احمر
سليل : راح انزل بس كولي مزعلان
سجاد : يله مزعلان بس انزلي
سليل : شوكت تشوف بابا
سجاد : تردين شى
سليل : من تشوفه بوسه اليه وكول اله مشتاقه غزالتك الك وتنتظرك لو لأخر العمر
سجاد : يوصل تدللين بس يله انزلي وامسحي خشمج عيع شنو هذا
سليل : مديت ايدي على خشمي شبيه
سجاد : هههه مابي شى اشاقه وياج
سليل : هههههه والله صدكت اول مره اشوف حلكك يضحك صح شى بسيط بس ضحك
سجاد : الضحك هاجرني من زمان لتركزين ويايه حتى لتعبين
سليل : ماشي نعست خلي اروح انام
سجاد : روحي وديري بالج على نفسج وبطلي كل متصعدين السطح وتبجين مو حتى طيوري كامن ميخلفن من وراج كرهن حياتهن ذاك اليوم واحد انتحر كال موتتني بس تنوح يم راسي وشمر نفسه من العش للكاع

سليل : ههههههه خطيه الله يرحمه
سجاد : اريد هيج دوم تضحكين بعدج صغيره على هذا البجي كله تلحكين العمر كدامج والدنيا مترحم احد لتخلصيها من هسه بجي يله انزلي وارحمي طيوري
سليل : شكراً عمو ونزلت مرتاحه احس وجود عمو سجاد بحياتي سبب الهي رحمة منه النا واله مااعرف شجان صار لو هو ماكو

مشت الايام وامي يوم بعد يوم تحير بروحها صح متكفله بمصرف البيت بس عقلها مو ويانه وبعد ايام امتحانات نهايه السنه كلها يومين ويبدي الشفهي اجت ريم تبجي ورشا تسكت بيها
ركضت عليها شكو
ريم : هذا الهبل طلي ضربني وتناشغ
سليل : ولج ياطلي
رشا .. عمو علي هسه ضربها راشدي
سليل : ليش اباوع على خدها طبع احمر صرت نار شصار احجو
رشا .. رجعنا نتمشى اني وريم وجنات وهذا الخبل حسين جلب ويانه وكعد يتشاقه ويه ريم عثر  بنص الشارع وكع وانكردت رجله وانشك بنطرونه هي كومته ونفضت ملابسه هو صوجه يمشي ويكمز جان يبجي وبهاي اللحظه طبك ابوه عباله ريم دافعته كام وضربها واخذ جنات وحسين وعافونا بلشارع وحدنا

سليل : حضنتها حيل مابيدي اسوي شى قابل اروح اتعارك اخاف وهو هم اكبر مني
ريم : يگولي بت طه الگلب اذا مكعدتي راحه احط راسج بلتاير وادوسه يريد يدوس راسي ثلل
سليل : كافي حضنتها حيل وكمت ابجي على بجيتها اباوع على صوره بابا المعلكه بلهول شفت بابا غزلانك وحالهن مسحت دموعها وغسلت الها اباوع خدها حار واحمر بگلبي انكسرت ايدك كون حاولت اطيب خاطرها گلت بس تجي ماما اكول الها

بس اجت ركضت عليها وحجيت كولشي
سندس : سليل تره والله تعبانه وكومه شغل عندي ومالي خلك حتى اتعارك هي ريم هم وكحه ومتكعد راحه
سليل : بس هو أذاها
سندس : شسوي هسه اتعارك وهم يأذيها وهي هم حيل بيها غير تبطل من حسين وجنات روحها بيهم طبها مرض
سليل : باوعت عليها وهي تنزع وتشمر ملابسها بملل وتعب حتى مجاوبتها عفتها وطلعت عرفت من اليوم مالنا ظهر لازم ننضرب ونسكت

مر ثاني يوم هدوء وثالث يوم العصر اسمع طك طك طك طلعت من الغرفه واشوف الهول كله مسامير وريم ورشا كاعدات بلكاع وجايبات خشبتين طوال اكبر من جف ايدي ويدكن كل بسمار شطوله وطالعه روحهن شكعد تسون لتجرحون
رشا .. الست رادت اعمال من عدنا
سليل : هاي يااعمال خشبه وكلها مسامير كل واحد اطول من الاصبع
ريم : غير الست رادت احنا شعلينا ياثلل
سليل : ياست هاي
وحده تباوع بوجه الثانيه جان تكول رشا ام العلوم
سليل : وليش هيج طوال وطالعات من الخشبه
ريم : الست كالت لازم هيج بس الجاكوج جبير ايدي وكعت

سليل : اني هم بفطاريه صدكتهن وكعدت ادك وياهن يمكن اكثر من ساعه لحد مجهزت الخشبتين كل خشبه متروسه من الطرف للطرف ومنبلات المسامير كونكريت منزليها من غراض بابا الي بلبيتونه
وحطيت كل خشبه بعلاكه حتى لتنشك الجنط لان حادات والصبح انطيت كل وحده علاكتها وطلعن اباوع وجهن متتفسر مرتاحيت للنظرات بينهن بس طلعن كتلهن راح ارجع انام حتى يأمنون طلعت وراهن مديت راسي واشوفهن يمشن على كيف داير مداير سياره عمو علي

جانت السياره موديل جديد من مارسيدس وغاليه ويلمع بيها كل وكت واسمعهن يحجن
ريم.. ولج ثوله خشبه بلتاير الوره والثاني ليكدام
رشا .. اي صحيح جيبي وادنج رشا ويحطن الخشبات جوه التايرات وكفن قريب بيت عمه نهر ردت اطلع ركض اجر الخشبات خفت حيل عليهن اخاف يأذيهن اني دافتح الباب انفتح باب ذاك البيت رجعت ختلت

صعد حسين وجنات بسياره عمو علي حتى يوصلهم للمدرسه يمكن خط حسين ماكو بس شغل السياره وتحرك والتايرين واحد امامي واحد خلفي نامن بنص الشارع لطمت على وجهي ومديت راسي واشوفهن ميتات ضحك ومكيفات ويكمزن بلشارع عرفت خواتي ميضيعن حقهن بيوم مدري اضحك على سالفتهن مدري اعاقبهن قررت اسكت واعوفهن يصيرن قويات مو نسخه مني عباره عن كتله خوف ورعب

بيومها رجعن وبس يكمزن من الفرح واني ايدي على گلبي اكول هسه تندك الباب واندكت وركضت افتحه عرفت عمو علي بس من مديت راسي واشوف بيبي انعام اول مره اشوفها تجي لبيتنا
ترددت افتح الباب الها
تباوع عليه وحسيتها مو طبيعيه ويخوف شگلها وبقت ادك على لحظة وينكسر الباب تقربت بهدوء وفتحته للباب جان تصير كدامي وتلزمني من قميص بجامتي وتهز بيه
انعام : ولج انتي يافصمه يامتسوين النعال المكطوع سبب موتت ابني

يتبع ...