رواية ابي والغزلان الفصل السابع والعشرون 27 - بقلم ريام هادي

ابي والغزلان
للكاتبة Reem
البارت الرابع والعشرون

مساء الخير والعافيه على احلى المتابعين بالاول الْحٍمَدٍ للـّہ على سلامتكم
ثانياً ليش كميه الغلط والتجاوز والسب والدعاوي بحقي صدمتني اني مكلت شى غلط والي افتهمني غلط هاي مشكلته مو مشكلتي تحسسوني سويت جريمه لان وقفت القصه اني لا وطنيه ولا اتحجج حتى اوقف القصه كل مافي الامر اني عراقيه وانسانه اتأثر حالي حالكم ومن حقي هذا الشى اني متركت القصه متقصده الوضع مكان يسمح اكتب حرف شون اكدر اكتب واني اشوف انواع الصور والفيديوهات لشباب كل ذنبهم طلعو يطالبون بحقهم وينقتلون بدم بارد والله كميه الانهيار عندي كارثيه واكيد حضراتكم مثلي بس الفرق الي يكتب مو مثل الي يقرا شون اكتب حرف واني ابجي على شهدائنا واشوف لقطات مرعبه وموت صّـْْ(☑)ـْْحّ متعلمين ومو وضع جديد لكن كلمن وتأثره وارجع واكول الي يقرأ مو مثل الي يكتب شلون اكتب قصه واترجم مشاعر واني بالي ومشاعري ويه الشهداء
لكن الي صدمني الصراحه التجاوز العجيب بحقي والي يتهمني كسوله واتحجج واصلاً هم النت اسبوع مقطوع وغلط وسب ودعاوي وهي كلها قصه الظروف احياناً تخليك بمواقف غريبه لكن هاي المواقف فائدتها تعرفك منو الي يحبك ويقدرك ومنو لا

على كلاً احب اوجهه الشكر لكل شخص كتب بحقي كلمة طيبه ودافع عني بغيابي والاهم افتهم ريام شنو وقدر وضعي ومشاعري الله لا يحرمني منكم تسلمولي مقصرتم

الله يرحم شهدائنا ويسكنهم الله فسيح جناته ويحفظ الشباب المتظاهرين ويحفظ العراقين جميعاً

نرجع للقصه قراءة ممتعه لًلًـّــ💎ــجٌٓمٍَُٓيِّعَْٓ

البارت الرابع والعشرون

أنه المَطلوب .. وأتكفّل
وانه المالي خلكَ للنسمة وأتحمّل
وانه المالي ذنب وي الهوى اللي يفوت
بس كَضّيت عمري اعتذر وأتوسّل

البوجهي شخص مرتاح
بس بداخلي معلعل

عمر ماشفت راحة .. ولا انكَالت يوم ..
علية كلمة مَدَلل ..
كافي
كافي أتنفّس الغيري.
وأدلّي الضايعين  وآنه ما أندَل

سليل :
واندكت الباب وركضت افتحه عرفت عمو علي بس من مديت راسي واشوف بيبي انعام اول مره اشوفها تجي لبيتنا
ترددت افتح الباب الها
تباوع عليه وحسيتها مو طبيعيه ويخوف شگلها وبقت ادك على لحظة وينكسر الباب تقربت بهدوء وفتحته للباب جان تصير كدامي وتلزمني من قميص بجامتي وتهز بيه
انعام : ولج انتي يافصمه يامتسوين النعال المكطوع سبب موتت ابني
سليل : بقيت ارجف وما اكدر افتح حلكي بس عيوني بلحظتها انترست دموع واروح واجي بيدها لان تهز بيه بقوة
انعام : احجي بت الگلب شگلتي لأبوج وخليتي يگتل اخوه بدم بارد بت سندس بعد اكيد جذبتي علية هاي اذا مو امج معلمتج وذاك مثل الطلي راح يركض وگتل اخوه احجي ليش ساكته
سليل : عوفيني بيبي

انعام : شعوفج اني هسه اذا اشرب من دمج ميبرد نار گلبي جان تلزم شعر سليل حيل وتكطع بيه
سليل : اااااخ فدوة بيبي عوفيني والله ممسويه شى
انعام : اليوم اطيح حظج والله وروح ابويه اطلع حليب امج من خشمج احجي شكذبتي على طه وخليتي يگتل اخوه تلكين يوميه انتي بحضن واحد وشوف من تحارش بيج وذبيتي بلاج على ابني ساقطه تربيه سندس شترجى منها احجي ساقطه

سليل : ابجي واحجي بقهر وبنفس الوقت خايفه لا خواتي يطلعن ورايه ويسمعن كولشي اباوع على الباب وبگلبي اكول ربي لتخليهن يطلعن
والله بيبي هو تحارش بيه وتوسلت بيه يعوفني ومعافني
انعام : انجبي جذابه منو علمج على هاي السوالف بعدج بكد البيضه وهيج تحجين ولعبتي لعب من تكبرين شسوين بس اني لازم اردلج السويتي وابوج الكو.. اله اردها اله واحرگ گلبة مثل محرك گلبي وبيتي وحياتي كلها ولكم اني الي اكبر واحد ادوسه برجلي تجون انتم تگلبون حياتي وتردون اسكت
سليل : فدوة بيبي عوفيني بس انتي منين عرفتي

(قبل نصف ساعه )
سجاد : جنت كاعد اتغدا واباوع تلفزيون وعمتي كاعده قريب مني
شعجب اليوم البيت فارغ اشواق وين
انعام : راحت لبيت رجلها
سجاد : والله كمت اشك بتج متزوجة شو يوم هناك وعشره ايام هنا مقيمه اصلاً كمت استغرب من ما الكاها هنا
انعام : شسوي يايمه غير مشاكل ويه رجلها ولا يكعد راحه ومأذيها
سجاد : متطلك المن باقيه يمه
انعام : لا شنو تطلك وصارت عدها بنيه منه
سجاد : واذا ماطول مأذيها على شنو تبقى زين وعلي شيكول اني هواي اشوفهم سوه ميحجي وياه ميكول اله اختي لتأذيها ارزله يسوي اي شى حتى ميعيدها
انعام : علي يكول هو صديقي لتخربوني وياه انتم حلو مشاكلكم
سجاد : خوش اخ والنعم منه يشوف اخته مطيح حظها رجلها ودك اهانات ودايس كرامتها ويكول لتخربوني وياه
انعام : شيسوي ياابني مو اشواق هم متكعد راحه لسان وتلاسن
سجاد : والله الصراحه حيل لايك الها نفس الاخلاق التعبانه
انعام : شون يعني
سجاد : خليني اكمل اكلي عمة قبل متنسد نفسي

شويه وجان يطب علي يعيط شفتي هذا ابن اخوج الي ادافعين علية ومسويته بس هو وبس ودير بالك ياعلي تزعله وهذا الباقيلي من ريحه اخويه وحسره احجي شى وكتلي ابن اخويه واحبه حاله من حالكم شوفي ابن اخوج شمسوي
انعام : شبيك تخبلت شصار
سجاد : اني كاعد اكل حتى عيوني مرفعتها عفته يعيط ولا كأن الموضوع يمي والله فاصوليه طيبه

علي : ابن اخوج الخير هو سبب الاستئناف مال طه يعني هو لو منجب وكاعد وساكت وممدخل جان هسه طه معدوم
انعام : ولك سجاد صدك هذا الحجي
سجاد : نزلت الخاشوكه من حلكي وشربت مي وانداريت على علي اول شى صح انت اكبر مني بس احترم نفسك شنو منجب اني متجاوز عليك حتى تتجاوز وثاني شى لا انت ولا عمتي اوصياء علية اسوي الي يعجبني اني مو طفل وتردون تتحكمون بيه
انعام : سجاد انتي صدك سويت هيج وتلطم على صدرها
سجاد : على شنو اللطم اي اني سويت ولو اكدر اكثر وروح ابويه مااقصر بس الكدرت علية سويته وهااا تره ممتندم
علي : شفتي لهذا الحقير
سجاد : احترم نفسك تره لهسه ساكتلك لتخليني انسى فرق العمر واشوفك الحقير شيسوي كمت وكفت على حيلي
علي : شتريد تسوي هاا اخويه مات غدر وانت ساعدت الكاتله يعني هسه المفروض احط طلقه براسك على سوايتك

جان تركض انعام ولزمتني من قميصي حيل ولك ليش شنو السويتله الك وتجازيني هيج اني عمتك والمات ابن عمتك توقعت توكف ويايه تصير ابني حالك حال علي وتخلي ايدك بيدي ونخلي طه يبجي على زمانه ونحرك گلبه مثل مأذاني هاي تاليها  فتحت الك بيتي وحضني ولك لو جايبه چلب ومربيته يصير اوفى منك
سجاد : سحبت ايدها حيل ونزلتها شنو عصابه وخلي ايدك بيدي شنو هاي السوالف مال الافلام العربيه القديمه والله ياعمه انتي لو مخلفه چلب احسن من سلام النذل
علي : انجب ساقط تحجي على اخويه الاحسن منك هسه اذا اخلي دمك بطولك احد يلومني
سجاد : اسكت بوخه هو هذا انت جبتها بس تهدد ومابيك كل خير تعرف الغدر اي بس الرجوله ناسيها

انعام : عقلي راح يوكف لك انت ابن اخويه لو ابن حرام لا لا انت اكيد طالع على امك الكح.. الي انهزمت ويه صاحبها دمك مثلها تعضون الايد التنمد الكم ناس قذرين

سجاد : حسيت نار وصارت براسي وعطت بيها اتسكتين لو اراويج ابن الحرام شيسوي لو ما عمتي جان عرفت شون اندمچ على هاي حجايتج وكلام الله ادفنج بمكانج
انعام : والله كولشي اتوقع منك مربيتلي ذيب بلبيت

سجاد : والله ماكو غير ابنج ذيب يعني انتي مسألتي نفسج مره وحده ليش طه گتل سلام انتي وانت هم ياعلي يافهيم الي مسوي روحك تفتهم ورامبو وتهدد وتتوعد وتريد تكتل ومسوي نفسك فدشى مسألتو نفسكم ليش طه كتل سلام شون كدرتو تقنعون نفسكم بأن طه يكتل علمود ورث وفلوس وانتم اكثر ناس تعرفون هو مو بعينه الفلوس ولا تهمه
انعام : هو ابن رازقيه يريد يحرگ گلبي لان ابوه سجل كولشي بأسمي
سجاد : وهسه تذكر يحرك گلبج وره اكثر من عشر سنوات عمه لو تكوليها لمخبل يضحك عليج ولو يريد صدك يحرك گلبج مثل متكولين عندج الجبير الي مسوي نفسه رجال مو غدره وحط السجينه بطنه بوگتها جان يكدر يشتكي علية ويعفنه بلسجن على الاقل ٧ سنوات وصدك يحرك گلبج اذا هو وصلة للموت ومسواها تتوقعين طه الفقير يگتل اخوه علمود فلوس بس انتي من كثر ماحاقده علية حتى متردين تفكرين ليش هيج سوه وبس تردي يموت

علي : وانت على اساس تعرف ولك سجاد هاي سوالفك مال ولد السوك والشوارع بطلها متكدر تلعب بعقلنا انت دكيت دكه ناقصه بينا ومتبقى بعد هنا
سجاد : اني الي مااريد ابقى يمكم بس خلي في بالكم لو اني مكان طه مو بس اگتله لسلام والله اكطع لحمه واذبه للجلاب
انعام : تعال وين رايح اليوم متروح منا الا اعرف شصار انت مبين تعرف كولشي
سجاد : اصعد الم ملابسي واخلص من هذا البيت القذر
علي : متروح اله تحجي
سجاد : وخر من طريقي لا اوخرك بطريقتي تحركت شويه وجان يجرني حيل علي من قميصي شگه من جهه الايد مباشره ضربته على وجهه متحملت

انعام : يبووو راح يتذابحون ولك سجاد عوف ابن عمتك ولك بس هذا البقالي
سجاد : ضربته ضربتين اذيته جان يدفعني حيل وركض للبوفيه طلع من المجر السلاح الشخصي مالته جان مطلع رخصته بلجديد ويمسح بخشمه كله دم ويحجي
علي : هسه اذا اكتلك يعتبروه دفاع عن النفس احجي لك ليش ركضت على قضية طه شلك دخل بيها
سجاد : اني راح اكول الك مو لان خايف منك لا طز بيك شعره متهز مني وهاي اللعبه البيدك قشمر روحك بيها انت اصلاً مو رجال ولا اعتبرتك بيوم رجال بس حتى تعرفون شكد قذر جان سلام ومو يستاهل الموت لا والله يستاهل الحرگ وهو عايش وحتى تبطلين تتوعدين لجهال طه بالاذيه اعرفج مراح تجوزين منهم وادورين اذيتهم عوفيهم بحالهم مكافي ادمرو وراح يعيشون بدون اب من وره ابنج المنحط من اشتعلت روحه وين منام

بديت اسولف الهم شجان يسوي وسوالفه المكسره بس مذكرت شسويت بيه وشون فقدته رجولته وذكرت شغلات بسيطه عن شغلته ويه سليل وشون عيشها برعب ومعاناتها باوعت على وجوهم الرافضه تصدگني وانعام الي فاتحه عيونها وترجف وتصيح بكل علو حسها جذابه هاي بت سندس جذابه هاي على امها وحده حيه
جان اعيط بيها فقدت اعصابي وكمت اكسر البوفيه الكدامي ولج كافي حطي رحمة بگلبج ابنج واحد ساقط يدور محارم تحارش بت اخوه والله اعلم بيمن بعد متحارش يجوز حتى جنات بت جعفر مسلمت منه بس انتم حايرين بروحكم وبلفلوس وحتى منتبهتو عليها اني من اول يوم اجيت حسيت حركاته مو طبيعيه وحاولت اكذب نفسي لحد مصارت شغله سليل يعني السواه سلام غير ام تغم روحها على هاي الخلفه الجايفه مو تكعد تكذب وتتهم غيرها بيا عين وادافعين عنه

علي : سلام ميسويها ومثل مكالت امي اكيد هاي كذبت واكيد امها علمتها
سجاد : انت مقتنع بكلامك ولك يلطرن حتى على مرتك جان يباوع لتخليني احجي كولشي
جان يلزمني حيل ويريد يضربني تقاوينا اني وياه بس كدرت اسيطر علية وردتها حجة اضربه ولزمته من شعره وركعت راسه بلحايط حيل جنت شايل بگلبي علية ولكيتها حجة قويه وگبل ضربته بمعدته خليته كوه يتنفس اعرفه جبان حتى السلاح وكع من ايده باوعت ورايه لان بس صوت عياطي وعياط علي عمتي ماكو عرفت راحت لذاك البيت وامهم ماكو واكيد راح تأذي سليل دفعت علي حيل وكع على وجهه عثر جان اكو طبله وراه عفته وركضت وراها

سليل : دفعتني بلكاع وشافت خشبه طويله جرتها ودك على جسمي كمت اعيط حيل من حلات روحي مااعرف شسوي بس حميت وجهي حتى لتضربني علية بلعيطه مالتي طلعت رشا وريم عطت بيهم رغم ضربها وتسب بت الگلب بت الساقطه كله من وراج واشكال الفشار جان همي خواتي ميتأذن عطت بيهن واني مدده بلكاع وانعام تتفنن بضربي ادخلو جوه وابجي واشر بحركة گلب يدخلون جان يركضن جوه وثواني واشوف رشا لازمه الماسحه وريم صونده الحمام جارتها من البوري ويركضن بأتجاه انعام بدون خوف رغم عمرهن الصغير ويضربن بيها وهي ادفع بيهن وتغلط اشكال الغلط الي مسامعي بحياتنا
دفعت رشا حيل وكعت واغمى عليها اني شفت اختي مدده ولا ايد ولا رجل كمت من الكاع دفعت انعام حيل وركضت على رشا
واضرب على وجهه على گيفي فدوة رشاوي جاوبيني رشا شبيج رشا اكعدي لتخوفيني

ومااحس غير ضربه من انعام شيغت روحي الخشبه بطرف بيها بسمار يمكن انتبهت انعام علية لهذا تقصدت تضربني بيه واجت الضربه بجتفي حسيت الهوا انكطع مني جان تعيط انعام حيل ريم ضاربتها بكل قوتها بلصونده على ظهرها وبهاي اللحظه دخل سجاد ولزم عمته وهي تعيط بكل علو حسها ولك عوفني اليوم اموتها ضيعت ابني انكتل ابني من وره بت سندس وطه ابني سكن الكبور من وره هاي الساقطه

سجاد : كاافي متخافين الله شو تعالي
سحلها حيل بقوه من ايدها ولازمها حيل ويدفع بيها لحد مطلعها اني غوشت عيني الضربه قويه وبس بالي يم رشا المدده صحت بقوه الحكني عمو

اجاني يركض ويلهث من التعب شبيهه رشا
سليل : اشهك من البجي هم خوف على رشا وهم لان جتفي احس بيه نار من الالم ماادري عفيه شالها ودخل بيها اني حضنتها وكعدت على القنفه اباوع على ريم حاضنه الصونده واكفه بصف التلفزيون تبجي
رش مي على وجهه وغسل رگبتها واني بس لازمه راسها وابجي حتى مكدرت اتحرك گلت هاي هيه ضاعت اختي امسح بدموعي واضرب ضربات خفيفه على وجهه واتوسل بيها رشاوي افتحي عينج بداعتي بداعه بابا حسيتها تحركت

سجاد : رشاوي عمو افتحي عيونج هاج وشربها مي راد يمد ايده ورجعها بحركة سريعه تردد باوع علية جان يأشرلي على صدرها حطي ايدج هنا وفرگيلها
سليل : ابجي وخايفه جان يعيط بيه
سجاد : كاافي تبجين وركزي ويايه فركي صدرها بسرعه بدت تكعد
مديت ايدي وافرك مره برهاوه ايدي ومره شوي اقوى وفتحت الدكم مال بجامتها واغسل الها على گيف لحد مفتحت عينها
رشا .. ولج ريم عضيها لبيبي نعال خلي متنام من عضتج واني راح اكطع الماسحه على راسها
سليل : ابتسمت وبعيوني الدمع سودة علية شون يدافعلي حضنتها

سجاد : على كيفج لتختنك
سليل : رشاوي تسمعيني
رشا .. ثلل بيج شى اذتج الحقيره
سليل : لا حبيبتي بس خوفتيني عليج حيل
شفت سجاد راح بتجاه ريم الي تبجي ومسكتت وكعد بمستوى طولها وسحب الصونده منها وكال الها
الي عنده اخت مثلج ميخاف ابد لازم متبجين انتي سباعيه ودافعتي عن خواتج تعالي يبطله وحضنها وشالها يله امسحي عيونج خواتج كدامج كولشي مابيهم
ريم : اني ردت اضربها بعد بس انت اجيت وكلت اخاف تعيط علية
سجاد : ميحتاج غير تمشي وتفرك ظهرها مبين هوايه ضاربتها بس تره عيب واحد يمد ايده على الاكبر منه
ريم : عمو تضرب ثلل حيل

سجاد : حقج ولج صايرة ثكيله
ريم : اي عمو مو كبرت
سجاد : يله ياجبيره تعالي اكعدي يم خواتج
سليل : تعالي گلبي لتبجين حضنتني حيل عطت ااااااه
سجاد : شبيج
سليل : جتفي عمو يموتني
سجاد : شو خلي اشوفه
سليل : بعدت نفسي بحركة لا ارادياً هو هم افتهم ونزل ايده
سجاد : هسه ادزلج عمتج نهر لازم تشوف شبيه جتفج
وين حسام
ريم : اكيد خاتل جبان
سليل : هسه اكوم اشوفه واشوف غزل باوعت على رشا الي بدت تصحى وتسولف مااعرف سبب اغمائها اول مره هيج
اني رايح لنهر دقايق وارجع لتفتحين الباب لأحد
سليل : ماشي
دورت على حسام لكيته خاتل بلبيتونه تعال انزل حاره واكيد جوعان
حسام : راحت اخاف تجي تضربني
سليل : لتخاف حبيبي مااخليها تضربك تعال انزل مو وجهك دم صار من الحر

نزل واستلمته ريم من الدرج هاا جبان خواف
حسام : انجبي اني ما اخاف
ريم : شوف ثلل جابتك من فوك خاتل مثل الفار انت جيري
حسام : اذا مسكتي والله اضربج
ريم : جان اطلع لسانها وتغمه وتكوله امشي ولي بنيه خواف حتى جيري اسبع منك اله اكول لكل اصدقائك
حسام : والله بس تحجين اشكك كتبج كلها واحرك لعابتج
ريم : شوفي ثلل شيسوي
سليل : يمعودين اسكتو وانت روح غسل كلك تراب واياك تتقرب لغراضها وانتي كافي تحجين عيب اخوج اكبر منج
ريم : والله دوختونا عمو يكول اكبر وانتي تكولين اكبر وهو جبان وبس يبجي شون بعد اكبر مني

سليل : روحي غسلي وتعالو اصب الكم غدا
رشا .. اريد انام
سليل : لا گلبي حاولي تكومين واكلي ويانه فدوة راح اجيب غزل ونكعد كلنا سوه ناكل
رشا ..شبيج تفركين بأيدج
سليل : شوي توجعني
رشا .. وهسه شون صارت افركها الج

سليل : ههههه هو انتي بيج حيل لتخافين صارت احسن والحقيقه ايدي تموتني من الالم بس اضحك كدامهن كافي الرعب العاشو كوه احرك بيدي واصب الاكل بقيت رشا متمدده اخاف تتحرك ويغمى عليها مره ثانيه

صبيت تمن ومرگة شجر  اباوع الوجوه انگلبت الكل ميحب مرگة الشجر بس بعد طبخت ماما
ريم : اييع مااحبها
سليل : حرام نعمه الله لتكولين اييع
حسام : مااريد هذا الاكل سوينا غيره
سليل : صوتكم مااسمعه تاكلون وتسكتون والي متعجبه المرگه خلي ياكل بس تمن
ريم : هاج حتى غزل ذبته من حلكها
سليل : كمت من الكرسي اباوع رشا تلعب بلخاشوكه ومتاكل وحسام يعيط ميريد ياكل وريم اصلاً تكمز توجهت للثلاجه فتحتها باوعت كتلهم تاكلون بيض وطماطه
ريم : ايييي طيبه
سليل : وانتم شفت الكل وافق طلعت الطماطه وغسلتها وثرمتها وبديت اگلي على كيفي كوه احرك ايدي وجان اطب عمه نهر تلهث ودمعتها بعينها وتحضن وتبوس بينا

نهر : بيكم شى سوتلكم شى
ريم : لا عمه اني ضربتها حيل بلصونده بس حسام جبان ختل بغراض بابا
سليل : ريم كافي عيب
ريم : سكتت وحطت ايدها على حلكها وتلعب بعيونها بأتجاه حسام الصار نار من وراها ويأشر بأيده يعني اني الج خزرته نزل ايده وريم تضحك وايدها على حلكها
حضنتني عمه عطت ااااخ
نهر : شبيج يمه شو خلي اشوف ايدج
سليل : جان عمو واكف رجعت ليوره مكدرت انزل البجامه من جتفي كدامه افتهمت عمه لان عمو سجاد موجود
نهر : تعالي للغرفه
سليل : بس اكمل الاكل خطيه جوعانين
نهر : نصي وامشي لازم اشوف ايدج
مشيت وياها وطبينا للغرفه مباشره نزعتلي القميص مال البجامه وجان تضرب على صدرها
نهر : يمه سودة بوجهي هاي شنو ايدج
سليل : شبيهه عمه وتوجهت بأتجاه المرايه واباوعها قطعه زركه ومسافه جبيره ومشخطه محصور الدم من الضربه وصايره زركه حمرة رغم وقت قليل من ضربتني بس بسرعه ازركت
عادي عمة مو مهم هسه اطيب يوم يومين
نهر : ولج ليصير بيدج شى امشي نوديج للمستشفى
سليل : على شنو عمه هي ضربه
نهر : تعالي كعدي يمي
تقربت منها حسيت بعيونها الف سؤال وحيره
نهر : شوفي سليل صح اني عمتج بس يشهد الله محاستج بت اخويه حاستج بتي عبالك اني مخلفتج مو سندس كل جهال طه بعزيت روحي اله انتي احس روحي انقسمت الج ولأبوج لهذا اريد تحجيلي كولشي من الاول حاسه اكو شى مو طبيعي واخويه ميكتل ماكو افقر واطيب من طه والكل يعرف هذا الشى وخاصه اني اعرف اخويه مال يگتل اخوه علمود فلوس وهاي الكلاوات مشالها عقلي وهسه من اجه سجاد وكال امي هدت عليج وضاربتج ومقبل يحجي السبب عرفت شى مترابط بشى اريد اعرف شصار ومن البدايه لتنسين اني منو وشلون احب طه وشنو انتم بلنسبه اليه احجي حبيبتي

ًسليل : دنجت والعبره خنكتني
نهر : ارفع راسج واعتبريني امج وسولفيلي شصار وشنو المتعبج
سليل : نزلت دمعتي تمنيت هاي الكلمة من امي

مديت ايدها عمه ومسحت دمعتي وسحبتني لحضنها وتلعب بشعري وبديت اسولف كولشي من اول لحظه سحبني سلام بيها وهتك طفولتي لحد لحظة ما شفت الدم مغطى ملابسي لحظة ما بابا گتله
رفعت راسي من حضن عمه واشوف عيونها دم تشهك وتضرب على خدها من القهر وسحبتني حيل وحضنتني
نهر : يمه كل هذا مريتي بيه سودة علية ليش مكتيلي
سليل : ردت احجيلج عمه وترددت لحد ما تأذيت وحجيت كولشي لبابا
نهر :  اااخ ياابن ابويه شتشوف ضيم بعد من اهلك ربي الابتلاء بشى واحد مو بكولشي يعني من يوم منولد مشاف يوم عدل ولو يوم واحد ويوميه ضربه شكل وقهر شكل وتاليها اخوه يتحارش بته اااخ ياطه يساعد گلبك شگال من عرفت
سليل : عمه كله من ورايه اني ضيعت بابا وضيعت خواتي

نهر : لتكولين هيج مكافي الصارلج بلعكس انتي سباعيه لان كتيله صح موهينه هسه علينا هو بلسجن ومنعرف حاله بس هم لو صاير بيج شى جان طه مات ميتحمل الهوا يطخج مو عاد يتحارشون بيج ومن منو من اخووه اااااااااااخ يانار گلبي ولك ليش ياسلام النذل ليش
سليل : فدوة عمه على كيفج ليسمعوج البنات تبجين ويجون ركض
نهر :امج شون سكتت
سليل : مااعرف سكتت لهذا رحت لبابا
نهر : تعالي
وبقت تبوس براسي وحاضنتني وتبجي
سليل : كافي عمه ارحمي نفسج
نهر : شرحم والزمن مرحمني ومرحم اخويه وخلانه نتلاطم بلدنيا وهاي تاليها راح اخويه وانتهى عمره وشبابه بلضيم وختمها بلسجن والله اعلم يجي يوم نشوفه ويصير بنصنا لو هذا هو لهنا ونودع ايامه الله يعلم حالي بدونه اني يتيمه سليل بدونه تره مو بس هو ابوج والله هو ابويه مثلج وحتى اذا تشوفين حتى صديقات ماعندي هو صديقي وكاتم اسراري وبعد ماتزوجت عمج سامي وامي تبرت مني واهلي كلهم محد يباوع بوجهي صار هو كل اهلي اذا انتي مضيعه اب اني مضيعه اهلي كلهم لان هو اهلي كلهم

سليل : شمرت نفسي بحضنها وابجي وياها اني يمج عمه مااعوفج والله
نهر : اعرف مو كتلج انتي بنتي يله كومي نشوف الاكل هذوله صوتهم ماكو اخاف صار شى
سليل : يمه نسيت الاكل على النار هسه فحم
مسحت عيوني وركضت للمطبخ لكيت عمو سجاد مسويلهم بيض وطماطه وحتى صاب جاي الهم ومحمي الخبز وياكلون بشهيه وهو وياهم
سجاد : تعالو يفوتكم والله
نهر : اول مره ادري بيك تعرف تطبخ
سجاد : بلعسكريه كولشي تعلمت
نهر : شوكت تكمل خدمتك
سجاد : مبقى شئ شهر بلزايد واگابلكم واكعد تعالو اكلو عفت الفاصوليه من وره انعامو
ريم : محلو انعامو بيبي نعال احلى
سليل : عطت بيها ريم عيب
سجاد : بابا ريم عيب تغلطين على الجبير
ريم : اني مغلطت بس ما اعرف اكول
سجاد : انطقيها انعام اممم
ريم : عمو طيبه الطماطه والبيض
سجاد : خوش تبدلين الكلام اااخ منج من تكبرين شسوين
ريم : اشتري سياره وادعم بيبي انعال
سليل : اگلي وكافي لغوه

سجاد : تعالو ليخلصوه
كعدنا ناكل سوه صح اليوم مخربط ومشاكل وخوف بگلبي من بيبي الي مااعرف شناويه تسوي بيه بس لمتنا على سفره وحده وسوالف ريم وضحك غزل الي متفتهم نص كلامنا ورشا ودلعها وحسام رغم سكوته بس وجوده مهم بحياتنا وعمه نهر وحنيتها وعمو سجاد رغم ميضحك واغلب وقته طابك حاجبه و يباوع بس اعتبره هديه الله النا كل ذوله جانو بلسم الي بذاك اليوم هدأ من روحي التعبانه الفاقده للامان

نهر : ليش مگتلي على الصار ليش ضميت كولشي
سجاد : مردتج تتأذين وهم طه نفسه محجالج شون اني احجي ومن حجيت لأمج عبالي تنقهر عليهن تجوز منهن تخبلت بلزايد جنت اعرف بيها مو عادله واعرف شغلات عنها رغم هي تحبني وممأذيتني بس دوم جنت انظر الها مصلحجيه واهم شى نفسها بعد الصار  اول مره اعرف بيها متخاف الله ومجرمه لتضوجين من كلامي

نهر : لا ليش اضوج هذا حق كولي وين راح تروح
سجاد : عندي صديق بيتهم بلكاظميه راح ابقى يمه هلكم يوم راح ارجع اجمع غراضي من ذاك البيت واروح كلها كم يوم والتحق ومن انزل واتسرح عندي كم فلس اشتريلي شقه سر قفليه قريبه منا واكعد واسكت شعندي هو بطرك روحي
نهر : اااخ لو عندي بيت وحدي لحظه مااخليك تروح
سجاد : اعرفج والله متقصرين بس عينج على البنات الله اعلم امج شضامه الهن من مصيبه حقدها مو طبيعي قبل جانت تريد تحرگ گلب طه بيهن هسه بعد معرفت بسليل حتى هي تريد تأذيها
نهر : هي حتى امهن ولا يمهن
سجاد : هاي وحدها فلم ومنتظر الراح تسوي سندس
نهر : شتسوي
سجاد : يجي يوم وتشوفين بعيونج اني عمري مغلطت بلحكم على شخص
نهر : شيصير وكعت گلبي
سجاد : مو وكته يله روحي لبيتج تأخرتي واني هم اخذ غراضي واروح لبيت صديقي
سليل وينج تعالي
سليل : جنت انوم غزل وسمعت صوت عمو طلعت اركض هااا عمو

سجاد : سدي الباب ورانا واياج تفتحي لأحد افتهمتي وصيتج قبل ومسمعتي الكلام هلمره اسمعي اياج تفتحين لباب وخاصه جماعه ذاك البيت
سليل : ماشي
طلعو وبقيت يم خواتي جمعتهم واتفقت وياهم ميحجون شى لماما بس جنت خايفه من حسام لان اعرفه ميضم شى على ماما
رجعت مثل كل يوم وزهكانه وروحها بخشمها باستنا وطبت لغرفتها حتى مسألت اكلتو شربتو صار بيكم شى ابد سبحت ورجعت طبت لغرفتها لحد وره ساعه سمعت عيطتها تصيحني

دخلت واني خايفه منها شفتها صايره نار هااا ماما
سندس : شبيهه انعام وياج
سليل : باوعت على حسام الكاعد بصفها ودنج من شافني باوعت علية بقهره لان گلي مااحجي شى بس جذب علية
اطلع حسام
حسام : مااا كاعد يم ماما
سليل : يوم اني مااحجي اذا هو موجود
سندس : اطلع حبيبي شويه وتعال بعدين خلي افهم من اختك شصار
طلع وكعدت بصفها وسولفت كولشي وهي البسي العبايه واركضي لذاك البيت

جنت خايفه لدرجه دخلت للغرفه وحضنت غزل وكعدت تكول عبالك احتمي بيها مااعرف شسوت امي بذيج اللحظه بس رجعت عصبيه حيل وبس تتأفأف بحيث تروح وتجي تحجي ويه نفسها خفت اسألها وتعيط بيه حتى العبايه بعدها على راسها بقت حدود دقيقه متعرف شسوي تالي عافتنا وراحت لأنوار اني گلت راح تاخذ حقي اقلها اتوب انعام توصل يمنا بس معرفت شنو الصار بيومها وخفت اسألها بقت يومين وماما متوتره واعصاب وتتعارك ويه روحها

مرت الايام وبدت ايدي اطيب بس اكيد جرح روحي ميطيب وعذابي كل ليله يتجدد واني انام بطلعه الصبح نسيت شى اسمه نوم بليل بديت اتعلم على شغل البيت صعب ومتعب بس مابيدي شى عيوني جانت تراقب خواتي بحذر اذا قبل اخاف عليهن مره هسه الف مره لان مااعرف بيبي انعام شتريد تسوي
اجت  امتحانات نهايه السنه وماما التزمت حسام ادرس بيه لان بكلوريا والبنات شاطرات امتحنو قبله بس هم اراجع الهم كل يوم يرحون ويجون ايدي على گلبي ليصير شى عمو سجاد مشفته يمكن التحق وعمه كامت تقريباً يومياً تجي حتى لو نص ساعه وتروح المهم تتأكد من صحتنا وضعنا واگلنا ومرات تنظف ويايه خطيه انقسمت بين بيتها وبينا بس بسبب عمتها المكعد ترحمها مضطره متتأخر

استلمو الشهايد  رشا وريم ناجحات ننتظر حسام وتكمل فرحتنا نزلت دموعي لو بابا موجود اكيد جان صارت فرحته جبيره جنا كل مننجح نحتفل بلنجاح
ريم : ليش تبجين ثلل
سليل : مسحت دموعي ماكو شى
ريم : تبجين لان ماعندج شهاده هاج شهادتي اخذيها مااريدها بس لتبجين
سليل : ابتسمت والدموع بعيني فدوة للحنينه لا گلبي ابجي لان فرحانه بيكم
رشا .. هسه عمو سجاد يكيف
سليل : اي اكيد ولو صار مده مشايفي
رشا .. اجه مره للمدرسه
سليل : شوكت مكتولي
ريم : اجه للست وصاها علينا
رشا .. والمديره دزت علينا وسألتنا كدامه شيصير منا گلناها عمنا وهو حجه ويه المديره حتى اخاف نحتاج شى والست ساعدتنا
سليل : شوكت يعني اجاكم
رشا : اول يوم امتحان
سليل : ابتسمت الله يحفظه احسن من الف عم
ريم : ليش هو مو عمنا
سليل : اي عمنا اكيد يله روحو انزعو ملابسكم ومن تجي ماما بلكت تقبل تسوينا كيكه
ريم : اريد بيها كاكو هوايه
سليل : لو اعرف جان سويتها الج والله بس ننتظر ماما وهي تسوينا
رشا .. هي ماما وينها بس تجي تسوي غدا مال ثاني يوم وتنام حتى متكعد ويانه بس حسام حتى ينام يمها
سليل : ميخالف غير تتعب بلشغل وتصرف على البيت وحسام ينام يمها واحنا سوه بلغرفه بنات وحدنا مو احلى
رشا .. اني اريد بابا هو جان من ننجح يشتريلنا ويطلعنا
سليل : دنجت مقهوره منين اجيبلهم بابا
حاولت اضحكهن ردت بس يفرحن اباوع بعيونهن الانتظار يردون يشوفون ماما شسوي
واجه ساعه دخولها للبيت والبنات ركض عليها ويعيطن نجحنا ماما
سندس : هم عايزه متنجحن بعد هذا التعب والصرف جان طيحت حظجن
سليل : اباوع على البنات وحده صفنت بوجهه الثانيه
ماما سوينا كيكه نحتفل بنجاح البنات
سندس :اني بيا حال هي مال كيك
سليل :فدوة ماما خطيه جنا كل مننجح تسوينا
سندس : ذاك الوكت وله وهم جان عندي وقت وكاعده بلبيت هسه شعر راسي ما الحك احكه وخرن من يمي ورايه كومن شغل ونعسانه

سليل : باوعت على خواتي الي انكسر خاطرهن حيل ودمعت عيونهن بس گلت باجر ادز على عمه نهر واخليها تسوينا كيكه والله عاده بابا بلنجاح ولا اخليها تروح حتى لو هو مموجود 

ثاني يوم الصبح الكل نايم بس ماما طلعت للدوام مديت راسي حتى اصيح عمه ماكو احد بلشارع ردت اطلع بلبجامه مابيه حيل ابدل طلعت خطوتين وتذكرت عمو سجاد وكلامه رجعت خفت ليسويها الحظ واشوفه ويرزلني لبست على السريع وصحتها خطيه لكيتها كاعده تخبز من الصبح
نهر : ادللي يبعد روح عمتج بس اكمل البيدي واجي اسويلكم احلى كيكه
سليل : ولو نتعبج عمه
نهر : يااا ولج شنو هذا الحجي شنو اتعبيني روحي لأخوتج ساعه واجي

سليل : ركضت للبيت ومثل كل يوم بين الريوك وعركاتهم وانظف باوعت صار اربع ساعات من رحت لعمه وما اجت استحيت بعد اروح أكد عليها اعرف بيها لو تكدر متقصر تجي
ريم : ريم : ثلل وين صارت عمه مو گلتي تسوينه كيكه
سليل : والله رحت الها بس اكيد صار عدها شى ومأجتي
ريم : يعني ماكو كيكة
سليل : كافي ياريم شگد تلحين ماكو يله اسكتي باوعت عليها عيونها دمعت وعافتني ومشت هسه اني منين اجيب الها كيكه هسه لو اعرف والله لو احترك اسويها الها بس مااعرف اخ ياماما شصار لو مسويتها ساعه متاخذ من وقتج

صبيت الغدا وكعدنا ناكل اباوع عليهن كوه ياكلن حتى محجيت شى اكلت كم لكمه وكمت اخذت غزل سبحتها ومشطت شعرها  رجعت نظفت المطبخ وره الغدا والله هلكت من الشغل باوعت على حالي شنو هذا الحال هدومي وصخه وشعري مكفش اخذت المنشفه  طبيت سبحت على السريع مااكدر اعوفهم وحدهم لان يتعاركون ولبست بجامه نظيفه وطلعت واني امشط شعري سمعت دكت الباب طلعت ريم تركض عطت عليها لطلعين اني افتح الباب
بعد الصار كمت كولش اخاف من فتحت الباب باوعت الوقت ساعه ٣ الظهر منو يجينا هسه لميت شعري بلقراصه بدون ضفر لان متعلمه اسوي ضفيره وطلعت باوعت عمه نهر ابتسمت وفتحت الباب جان اطب ويطب وياها عمو سجاد جنت مشتاقه اله هواي صار مشايفته ابتسمت من شفته
شلونك عمو
سجاد : هلو ثلل
سليل : حتى انت تعلمت ياعمو من البنات
سجاد : يله لتضوجين اصيحلج  ام دميعه 
سليل : لا بقيني على ثلل احسن تعالو ادخلو باوعت باكيت جبير بيد عمو ومرسوم كيكه عليه يعني مكتوب محل معجنات وصوره على الباكيت معقوله جابنا كيكه
امشي وافكر واباوع على عمه نهر الي عيونها بيها راحه وبسمه خفيفه على وجهه

دخلنا واجو البنات يركضون
ريم : هاي شنو عمو
سجاد : جم مره كتلج سلمي قبل متسألين
ريم : شونك عمو شنو هاي هااا هيج زين
رشا .. هلو عمو شونك
سجاد : تعالو يااحلى البنات واشطرهم شوفو شجبت الكم
سليل : فتح الباكيت وبيه كيكه مدوره تخبل كاكاو وبيها اسمي بلنص والاطراف اسم ريم ورشا وحسام وحتى غزل
ريم : الله عمو هاي كيكه تخبل
سليل : هاي شنو عمو
سجاد : هاي من ابوكم دزها الكم
سليل : شون دزها
سجاد : يعرف وقت الشهايد واكد علية اشتريها الكم هديه نجاحكم
رشا .. الله ولج ريمو شوفيها كلها كاكاو
نهر : خلي اجيب السجينه حتى نكصها
حسام : بس اني بعدني مماخذ الشهاده
سجاد : اكيد ناجح
حسام : وسليل شكو حاطين اسمها وفوكاها بلنص وجبير هي مكملت هاي السنه
سليل : صح انقهرت من حجايه حسام بس شفت حقه وكلت ماله داعي عمو مكتوب اسمي
سجاد : بلعكس انتي صاحبه الفضل بنجاح اخوتج انكسر ظهرج عليهم وحتى مرجعتي علمودهم
ريم : اي عمو واني انطيتها شهادتي حتى لتبجي
سليل : حضنتني حيل ريم ورشا من وره حضنتني
سجاد : وانت حسام متشكر اختك لان تعبت وياكم
حسام : مقرتني هيه ماما قرتني
سجاد : بس هي تشتغل وتنظف وتغسل ملابسك
ريم : اي وجواريبك الريحتهم ايييع خيسه

حسام : انجبي انتي خيسه
سليل : عيب كافي اسكتو
سجاد : يله كول الها شكراً
سليل : باوع عليه وكالها من وره خشمه عفته صغير بعده يجي يوم ويحس بيه ويقدر تعبي
اجتي عمه نهر وكصتها ماانسى الفرحه بعيون خواتي وخاصه هاي اول مره ناكل كيك جاهز جنا كله مال بيت  ويصفكن ويكمزن فرحانات وغزل الي دمرت نفسها وجهه كله كاكاو هي وريم وحده كاعده گبال الثانيه وياكلن ويصفكن مكيفات
سليل : انتظرتج عمه تجين
نهر : والله ردت اجي واتذكرت سجاد كال من يستلمن شهايد انطيني خبر دكيت من الارضي على الرقم الي انطانياه وسألت عنه وره ساعه خابرني وكلي لترحين نروح سوه وانتظرته طلع جايب كيكه
سليل : باوعت على عمو سجاد الكاعد بهدوء ويباوع على البنات ويبتسم ابتسامه بسيطه على فرحتهن دومه عاكد حاجبه حتى وهو مبتسم وبيده جكاره من يسحبها احسه يجرها من گلبه
جنت صافنه علية وهو انتبه اشرلي بحركه بسيطه براسه معناها شبيج
سليل : گتله بصوت شبه الهمس شكراً عمو
اشر براسه برضا ودار وجهه رجع يباوع على البنات شون يضحكون من گلبهم
وره شويه سألته عمه واسمع كلامهم
نهر : بلعافيه على الشقه وين اخذتها
سجاد : براس الشارع قريب يمكم شبيج وين محل جاسم فلافل الشقه الفوكاه
نهر : هااا خطوتين يمنا
سجاد : اي حتى هم قريب وهم اخاف البنات يحتاجون شى
نهر : والله سوايتك ابن امي وابويه ماسواها الله يحفظك لشبابك
سجاد : ممسوي شى ولتضلين كل شويه شاكرتني دوختيني
نهر : هههه صار استاذ سجاد
بيومها جان مميز بكولشي ساعه وراحو بس زرعو فرحه متنسي بحيث خواتي مسكتو من الضحك واللعب

وبعدها اجت ماما ومن سمعت عوجت حلكها وتستهزأ وطبت وسدت الباب حتى مشاركتنا فرحتنا من يوم مداومت تغيرت صّـْْ(☑)ـْْحّ قبل جانت بس تعيط وتضرب بس اقلها تاكل ويانه تسولف مرات نحس بوجودها بكل حركة تسويها بلبيت قايمه بكولشي هسه ابد مالها وجود بس الطبخ وكالت تعالي من اسوي اكل اوكفي يمي حتى تتعلمين الى متى ابقى اسوي بليل
يعني حتى الطبخ تريد تشيل ايدها منه

مرت الاشهر ونجح حسام وماما طارت بيه وهذا الشى كسر گلب خواتي بس حاولت اتلافه الموضوع رغم هنه كولش ذكيات بس كدرت احاول انسيهم التفرفه الي كعد تصير وتكبر يوم بعد يوم

يتبع ..
ملاحظة / النشر سيكون كالتالي
االبارحه كتب بارت واليوم بارت گلت ليش ابقي انزلهم اثنينهم لهذا هذا بارت وبعد ربع ساعه ينزل الثاني مني الكم

ومن باجر ساعه ١١ مساءاً لحد يوم الخميس يومياً بارت بدون توقف واتوقف جمعه وسبت بسبب اربعينه الامام الحسين عليه السلام يومين فقط وهذا الشى احترام لقدسيه هذا اليوم اتمنى تفهموني ظروف القصه انشرت بوقت مااكدر اكول تعبان لكن انحكمت القصه وطريقه نشرها بهاي الطريقه هذا الي اكدر اقدمه لحضرتكم واتمنى تخفون من التوتر حتى تستمتعون بلقصه وبعد الزياره ان شاء الله نرجع يومين نشر يوم استراحه
رِّبًـــ♡̨ـــٍْيٌٓ يحفظكم

ربع ساعه وينزل البارت ٢٥ قراءه ممتعه لًلًـّــ💎ــجٌٓمٍَُٓيِّعَْٓ