رواية ابي والغزلان الفصل التاسع 9 - بقلم ريام هادي

ابي والغزلان
للكاتبة Reem
البارت الثامن

يمكـن انساك و بعـد متمرنـي طيـف
و يمكـن ابنسيـانك انهض من جديد.
يمكن انسه الصفنه والحسره وجفاك
يمكن انسه اشتاكلك!{بس مو أكيد} ..
لأن مـــا أدري الخلـل و العلـه ويـن
يـاهو راد الفركه؟ يـاهو المــا يريد ؟؟؟
أنـه مـا ردت العشـك لــو مـا ألـوح
وحته ماأدري العنب حامض؟ بعيــد ؟؟
انـه عفــت الحلــم مو قلــة طمــــوح
انمسحـت احلامـي كثـر ما بيهه اعيد

حجي طه : دخلت ركض جبت الجنسيه والفلوس ولبست طلقه وركض وراها جان گلبي يرجف واني اتخيل سندس شراح تسوي بصبا لو شنو حال صبا من تسمع بيه متزوج الطريق مو طويل بس من كثر ماهدني التفكير احس روحي رايح للبصرة همزين قبل مده مرة وصلت صبا للبيت بشارعهم ودلتني البيت واله شون جان وصلت زين سندس منين عرفت شوصلها اله
اخر شى اتوقعه سندس تعرف بصبا وفوكاها تروح لبيتها كل شويه اكول للسايق التكسي استعجل اخويه

وصلت البيت ويم الباب اسمع سندس شون تعد وتغلط دفعت الباب شفت صبا تبجي وتشهك وامها تريد تسكت بسندس ماكو جريتها من عبايتها انتي شجابج هنا اندارت علية
سندس : ها خوش واجه المزيون اجه العريس ها صاحبتك بله مستحيت على روحك من تصادق على مرتك
حجي طه : امشينا وجريتها من ايدها
جان تدفع ايدي حيل
وخر تريد اروح وياك قبل ماافضح هاي ام الشوارع ام الولد ام الدرابين مگضيتها هنا وهنا
حجي طه : لزمتها من شعرها ولج امشي خزيتينا ومااريد اضربج وانتي حامل
ام صبا : يمه اخذ مرتك وروح منا والله اخوها اذا اجه لصبا يذبحها
اباوع صبا تباوع علية بگلب مكسور وعيونها العشكتهم كلهم مو دموع لا والله دم احسهم ينزلون على خدها
امشي سندس عدنا بيت نتفاهم بيه
سندس : اليوم احركها واحرك اهلها وجان تجيت على صبا واسحليها من شعرها وصبا رغم طويله بس ضعيفه وناعمه مباشره وكعت بلكاع على وجهه اريد اوخر ايد سندس من شعر صبا ماكو ملخته كمت اضرب على راسها المشكله اكدر اكطعها لسندس بس هي حامل وبشهرها بس من شفت خبالها متحمل لزمت جتوفها ودك ضرب اريد بس تعوف شعرها موتتها كتل وامها واني كوه مسيطرين عليها مو مره تكول عشر زلم

وخرتها كوه ولزمت سندس ودك راشديات اريدها بس تسكت مو حتى الناس مدت راسها تعرف شكو صوتها جان مسمع المنطقه كلها
سندس : تضربني علمودها ولك لو بيك حظ جان صرت رجال على اهلك مو علية لو بيك خير جان حرت بعيشت جهالك موتفتر بلفرع ويه الكح.. وعايف بيتك وجهالك
حجي طه : ولج كافي الله يشيلج الله ياخذج ساعة السودة الزوجتج بيها انتي انتقام الله مني يحجي بصوت عالي وانهيار ويضرب على راسها يريدها بس تسكت
ولج طايحه الحظ لا احترام ولاخلقه واخلاق يعني الله بلاني بيج شمسوي وبلاني بمره مثلج انتي شجابج هنا بت الگلب
جان تلزم ايده صبا وتبجي
فدوة طة اخذها وروح راح يجي اخويه والله يذبحني
حجي طه : ولج عوفيني شفتي هاي مرتي حتى لتلوميني من مكتلج
صبا : اخذها وروح استر علية الله يستر عليك اخويه اذا اجه تكبر وتصير مصيبه
سندس : وهيج ادورين ستر ام الولد ساقطه
تركضين وره المتزوج خلصت الزلم مسويه نفسج فقيره وانتي يوميه دايحه ويه واحد
حجي طه : كومي لج وسحلتها وكوه تتحرك وتكول عوفني ولكراليوه افضحها واخلي الناس كلها تشوف هاي بت الشوارع شون تفتر عليك لزمت حلكها واسحل بيها جان تعيط سندس اجتها الطلوكه وخرت ايدي وكعت بلكاع وتعيط ولك الحكني راح اموت ااااخ يمه

ام صبا : شبيهه شصار
حجي طه : اثوليت من شفت تعيط ورجلها تنكط مي يمكن راح تجيب
صبا : امشي هنا اكو جده قريبه
ركضت جابت بطانيه ولفت سندس بيها وهاي عياطها ماخذ الدنيا وتطلك وتصيح الله لا يوفقك الله ياخذك كون يجيبوك ملفوف بعلم واخلص منك

محاجيتها لان بس احجي اگتلها واكتل حتى الي بطنها وركضنا للجدة بس المصيبه مشايل فلوس ولادة
طبن لبيت الجدة واباوع على حظي يوم ما احب يصير كل هذا بيه باوعت لله واحجي وياه هاي قسمتي اضل طول عمري مشلوع گلب ليش ماخذتني ويه امي المن بقيت حتى اضوك العذاب واكمله بعدها مكافي هيه ماتت بلحسره اجي اني اكمل وراها ااخ شمضموم الي وشراح يصير بحالي اني تعبت كافي جبتها واني جاي ساكت ومتحمل زين لشوكت تمشيت شويه اباوع اكو دكان براس الشارع اشتريت جگاير منه ودخنت واباوع على الجگاره كل ما اريد اعوفج ارجعلج

بقيت اشرب ومااحس بلوكت لحد مطلعت صبا وعيونها الف قصه وقصه
وكفت كبالي واحنا باب بيت الجده وماكو احد بلشارع وكالت على الخير اجتك بنيه الله يحفظها الك اني راجعه للبيت وامي باقيه ويه مرتك بس تكدر تكوم تكدر تاخذها وتروح
لزمتها وهاي اول مره الزم ايدها وگلبي يبجي دم عليها
صبا والله موقصدي أذيج
صبا : بعد ميفيد طه انت كسرتني ودمرت كولشي حلو بداخلي الك بس ليش كذبت علية مااستاهل منك هيج
حجي طه : والله مكذبت بس ضميت خفت اخسرج
صبا : وهسه شنو ربحتني
حجي طه : اجيت اكولج وروح ابويه توصل لحلكي واسكت
صبا : ميفيد بعد شفت مرتك شسوت الله رحمني حامل واله لو مو حامل يمكن تكتلني خلاص روح اخذ مرتك وجهالك وانساني

حجي طه : اني احبج وانتي اول حب بعمري
صبا : مو كولشي الحب شنو الفايده وانت برگبتك عائله
حجي طه : ردت بس الم نفسي واكولج واقنعج واتقدملج
صبا : تتوقع اقبل انزل على مره اتزوج رجال متزوج شنو مجبوريتي
حجي طه : حقج ما الومج بس
صبا : ما كو حجي اي شى تكوله مو من حقك وجان تنزل دموعها اني حبيتك حتى اكثر من روحي كولشي اتوقع بس مال تطلع متزوج ومخلف متوقعته توكف بوجهي وتضحك وتسولف وتتغزل وانت برگبتك مره مكلت اذا عرفت شون حالي شون راح اشوفك شون اصلاً كدرت تضم هاي الاشهر كلها شووووون
حجي طه : بس الله يعلم شجنت احس من اشوفج واعرف حظي تمنيت شايفج قبل مااتزوج بس القدر هيج كتب وافقي نتزوج والله مااقصر وياج واخليج بعيوني انتي حب عمري صبا حب المراهقه والشباب الحب الجنت احلم بيه واني نايم وحتى واني صاحي ارحمي حالي واعذري وضعي واوكفي بجانبي وصيري اليه
صبا : مترهم لتقشمر روحك احنا ما بيوم راح ننجمع لهنا وانتهى كولشي من اليوم لا اريد اعرفك ولا تعرفني وبوضعك هذا لو بعد ميه سنه مننجمع وابوس ايدك ابتعد عني وابعد زوجتك هم مناقصني مشاكل البيه هسه والقهر الاحسه كافي يخليني اكره حتى الساعه الشفتك بيها
حجي طه : اخطبج من اخوج
صبا : اني ارفض كتلك ابوس ايدك ابتعد اذا تحبني صدك عوفني وروح والك الله بزوجتك
مشت وكتلها تبقين احب الناس لگلبي ويبقى هذا بس الج ينبض
صبا : مع الاسف مو ملكي ملك غيري
ردت بس توكف ابد عافتني وراحت

رجعت اضرب بلحايط وعرفت نفسي خسرتها اني غلطت من ضميت عليها او يمكن الي مثلي ممنوع علية يحب لازم يبقى حاير بس بلضيم والقهر
تذكرت مابجيبي فلوس هوايه رجعت بلطريق شفت سامي وركض جابلي فلوس من عنده ورجعت وهم بعدهم دكيت الباب وسألت عنهم طلعت ام صبا سلمت حتى بوجهي مباوعت انطيتها الفلوس ورجعت طبت

بقيت ساعه ونص واكف والدمعه بعيني رجعت ايامك سودة ي طه وحتى الشى الحلو بعمرك خسرته طلعت ام صبا خلف الله عليها معافتها غير ناس يطيحون حظها ويشمرونا بلشارع بس همه اوادم رغم كل السوته بيهم والغلط والفضيحه معافتها لحد مطمنت وشايله الطفله هم
اخذت الطفله ولفلفتها زين وجنت قبلها بدقايق جبت تكسي وكفته باب البيت حتى اصعدها وارجعها للبيت تباوع سندس علية درت وجهي منها هسه اني حتى ما اعرف شفكر حيل مبقى بيه صعدتها وام صبا كالت
الله وياكم يمه دير بالك على بيتك ورحمة لأبوك جوز من بتي كافي الصار
حجي طه : دنجت خجلان منها والله خاله مجان قصدي موزين
ياابني زين موزين مترهم انت الها كافي كسرت گلبها عوفها بحالها الله يعلم شراح يصير بيها وره سوايتك
حجي طه : خالة رحمة للاهلج بس كوليلها والله نيتي شريفه وردتها بلحلال
ام صبا : بوضعك حتى الحلال الك مايرهم حياتك ممرتبه والي تعيش وياك هسه وبهذا وضعك وضع مرتك راح تنظلم واني بتي كسرت ظهري عليها وعلى دراستها وما مستعده اعيشها الضيم وخاصه هاي مرتك متسكت روح ابني وحير بجهالك وبتي الها الله يطيب گلبها

حجي طه : صعدت للسياره وسندس دارت وجهه اخذت البنيه بحضني فتحت شوي وجهه اريد اشوفه تذكرت سليل بعمرها بستها على كيفي وصلنا للبيت نزلتها بدون لا هي تحجي حرف ولا اني فتحت الباب اجت امها تركض هابطه المسكينه لان هواي تأخرنا ودخلتها للبيت ودخلت للغرفه وسدت الباب
ام سندس : شصار يمه وشون ولدت واني ماادري روحي فرفحت صارلك اكثر من ٤ ساعات
حجي طه : عمه بتج يمج واني باجر ملتحق ارجع اطلكها اني تعبت منها ما اكدر اعيش وياها
ام سندس : صخام ليش يمه شسوت
حجي طه : اشكال سوت وحتى الاني سويته واذيت غيري هم من وراها من ارجع اطلك خلي تفوت للاربعين ويصير خير
والبنيه سميتها رشا اخاف تسألج
ام سندس : روح التحق ومن ترجع الله كريم ربك موجود تنام نار تصبح رماد
طلعت بقيه الفلوس الي بجيبي قسمتهم وانطيتها لأم سندس وكتلها اكو بعد فلوس بلكنتور تندلهم هي اخاف تحتاج مصرف
واخذت غراضي وقبل اليوم طلعت للجبهه واني حاير بزماني صارت الجبهه سلوتي جبهه الموت هي راحتي اذا كل ماانزل تصيرلي مصيبه كمت حتى اضوج انزل

كاعد بلواجب واجه محسن يمي
محسن : انتبهت عليك من اجيت بس تشرب جگاير وحالك مگلوب ومردت اضوجك بس حالك طول واليوم ثالث يوم على هذا المنوال شبيك شصاير
حجي طه : شيصير بعد اكثر من الصار حب حياتي خسرتها
محسن : لا بربك بس لا انلكفت
حجي طه : مااعرف شون ومنين عرفت وكعدت اسولف كولشي لمحسن
محسن : شوف مصيبتك هاي كل الاطراف بيها صح
حجي طه : شون يعني
محسن : مرتك السوته اي مره بمكانها تسوي كولشي سوي بس لتحب وحده عليها وخاصه ام حسام ماشاء الله عليها عشر نسوان سوه هاي من كلامك يعني ماكو مره تسمع رجلها يحب وتسكت لازم تبدع بطرق الطيحان حظ وتنعل سلفه لرجلها والي يحبها
الطرف الثاني صبا حقها حبت واحد وعاشرته وصغيره وبدايه حياتها وبانيه امال علية ويطلع متزوج ومخلف زين منها وحجت وياك اصلاً وخاصه وره زفت مرتك والفضيحه السوتها
الطرف الثالث انت مشايف حب ولا اهتمام ورحت ادوره بره بيتك وردت تجرب تحب بس هملت اهم شى هو انت متزوج

حجي طه : تدري شون مشكلتي ويه مرتي مشايفتني رجال
محسن : شون
حجي طه : شايفتني واحد جبان ومابيه خير تنازل عن حقه ورثه هي همها الفلوس واني مكدرت اوفره الها وفوكاها سكتت عن اذيتهم
الطيب بهذا الوكت يتسمى جبان
محسن : اكو. طيبه واكو فهاوه
حجي طه : بروح اهلك لو انت بمكاني شسوي يعني اريد احد يفهمني ماكو واحد عاش كل حياته ويه اهله وطلعت امه هي مو امه ويموت ابوه ويحرموه من كولشي شنو البيدي اسوي اخذ السجينه واذبحها شراح احصل لو اشتكي عليها بلمحاكم وهي اوراقها مسويتهم قانونيه
واذا اني نفسي مسجل بأسمها وماعندي حتى ورقه تثبت هي مو امي والوحيد اليكدر يثبت مات لا عم ولا خال ولا اي واحد يعرف اني مو ابنها يعني كدام الناس اني اشتكيت على امي لخاطر الفلوس وياريت راح احصل شى بس المخازي والحجي الفارغ على شون اشتكة على امه وبالاخير حتى انزل من نظر الناس لان قانوناً كولشي بأسمها وماكو اثبات لكلامي ايدي والحايط
واذا اريد اخذ الحق بالايد لو اكتلها خلاص لو اكتل واحد من اخوتي وتاليتي ادخل سجن وهم محصلت شى

المشكله الكل عبالهم مداير بال وراضي بلي صار ميدرون انضرب بگلبي وبقيت كل هاي الفتره روحي تتكطع بس ماكو حل جبتها منا منا ردت حل ماكو لو قاتل لو مقتول علمود الفلوس تصير لسندس واني زين اني شگول لله كتلت وذبحت علمود چم فلس
مكدرت غير احط وجهي بوجه الكريم وهو ياخذلي حقي اني مغلوب على امري محسن كولشي مابيدي لا القانون بصفي واشتكي ولا اني واحد سرسري ويكدر يذبح ويصلخ علمود الفوس

حتى الخوف من الله الناس كامت تشوفه مو رجوله وماعنده شخصيه ومرتي لو شكد ما اسوي الها لو اشعل مو بس اصابيعي شموع حتى عيوني ميفيد هي تريد فلوس وبس اجيب الها فلوس اطلع خوش ادمي ماكو فلوس اني مو رجال

محسن : انت رجال والنعم منك والله ياخذلك حقك المهم حاول ترتاح شقررت
حجي طه : اطلكها كافي روحي لعبت من كولشي
محسن : وجهالك منو الهم يضيعون طه لتستعجل هسه انت گلبك محروك لتنسى صارو ٣ وذوله يرادلهم ركضه وزوجتك مالها معين واخاف تضيعهم
حجي طه : هسه اني طير مذبوح محسن اخوك انذبح بگلبه ومابيدي اداوي نفسي
محسن : ادري كله بجفه وصبا هسه بجفه ثانيه
حجي طه : البجي والقهره مالتها كسرتني ليش اذيتها والله مقصدت أذيها
محسن : الغلط من الاول جان المفروض تعتبرها وحده عابره وتعيش حياتك
حجي طه : تره اني مو الله ولا نبي ولا امام ومااغلط اني بشر وضعيف ومن اشوف وحده يرف گلبي عليها اني محروم من الضحكه محسن تعرف شنو واحد محروم حتى من الضحكه وهو داخل بيته خليني ساكت مو گلشي ينحجي ياخويه
محسن :تعوذ من الشيطان وكافي وجر الجگاره من ايد طه كوم اكل صار ٣ ايام منتبه على اكلك لو متاكل لو شى بسيط
حجي طه : مجوعان
محسن : بس اني جوعان ومااكل اله انت ويايه
حجي طه : عوفني بحالي وخليني كاعد هاي الكعده بلكت الله يرحم حالي لو يفرجها لو ياخذني
محسن : كوم لا مثل النسوان تونون تنحل متبقى هيج
حجي طه : اي صدك متبقى هيج تصير اتعس
محسن : هههههه كلشي توقع بس والله اشتاقيت للكليجه كطعت بينا اني گلت هلمره تجيبلك كونيه تالي لا حصلنا گليجه وفوكاها الگآبه فول عندك
حجي طه : رايح اتمشى اختنكت
ماشي بس لتروح بعيد

مشت الايام واجه موعد نزولي ومنزلت بس دزيت مصرف بيد محسن للبيت راتبي مااحتاجه همه اهم مني بعدني تعبان رغم صار ٣ اشهر بس عبالك البارحه
اشتياقي لصبا يوم بعد يوم يزداد وحتى حبها بگلبي يكبر وجهالي ادمع من اذكرهم
تالي متحملت وكلت مابيها مجال خلي انزل واشوفهم الى متى ابقى مهزوم هيج
رجعت واول مدخلت اشوف سليل واكفه تلعب بلمي وكبرانه دمعت عيني من شفتها ركضت حضنتها وبستها افيش ياروح ابوج
هنا سليل عمرها ٣ سنوات وحسام سنتين اله كم شهر يمشي ورشا الي لحد الان مشفتها عمرها ٣ اشهر طبيت واحس روحي غريب بيتي وغريب بيه جان اشوف سندس كاعده ترضع الصغيره شافتني تفاجأت بس كالت الْحٍمَدٍ للـّہ على سلامتك
حجي طه : الله يسلمج ودنجت على الصغيره حليوه تشبه سليل بس ماخذه معاني امها هوايه حطيتها على قلبي وبستها
ام سندس : هله يمه عاش من شافك
حجي طه : بست ايدها وراسها تسلمين عمتي انتي العايشه
سندس : شعجب اتذكرت عندك بيت وجهال جان بقيت بعد سنه سنتين

حجي طه : باوعت عليها وهم الج عين تحجين
سندس : اني الي عين لو انتي النهزمت وعفت مرتك وحدها وزعلت والله شنو جيف راحت تخرب سوالفك المكسره فوك ماعينك تستحي وتنكسر وتجي تعتذر تصير انت ابو الراهي علية
ام سندس : ولج اسكتي هسه اجه الرجال خلي ياخذ نفس
حجي طه : لا عمه عوفيها خليها تحجي يله كملي اسمع
سندس : شتسمع على ياصخام وجه واكف گبالي فوك مخايني ومصادق فوكايه تدخل بعيني وتسوي نفسك الزعلان
بيومها لو ما الطلوكه جان شريتها على الحبل وروح ابويه اخلي حتى اخوها يذبحها مستحيت من تنزل من اجازتك وتخلصه وياها ليش ماعندك مره ماعندك بيت همه اولى بيك منها شگلت روحك وتسوي سوالف مال مراهقين وفوكاها حاج بيت الله عشتو ويحجي بلعيب والحرام

حجي طه : خلصتي كلامج
سندس : هاا تريد بعد
حجي طه : كل الصار انتي السبب بيه من شفتج وشفتيني حجه الورث حجت امك حجت اختك اخوك هيج جاب اخوك الثاني هيج اشتره ليش ماعنده فلوس ليش عايشه بلفكر الى متى اضل هيج عرفتي بيوم نازل من جبهه من موت بس الله يعلم حالنا شنو تستقبليني بحضنه بأشتياق ولج يامره كل اصدقائي تنزل بلهفه اله اني لان اعرف راح ادخل البيت لو تخلصيها حجت امك واهلك لو تمشين وتأفأفين من العيشه كتلج يابت الناس هاي عيشتي الاكدر علية اسوي

سندس : طلعتني كولشي ماكو لا مداريتك ولا زينه وياك مكافي تعوفني بالاشهر وكاعده وساكته
حجي طه : ليش احد گلج اني عايفج ورايح للديسكو لو للسينما اني رايح للموت ليش هو الواحد يفرح من يروح للموت لج حتى ابسط شى حارمتني منه وهاي اختي تسوي بمكانج غير مره رجلها يروح لو يرجع لو لا الها عين تنام قبل متودعه صار اكثر من ٣ سنوات وياج بيوم فكرتي اطلعين ورايه وتودعيني هاي نهر تسوي هيج فكرتي بيوم من اجي تحسسيني طايره من الفرح بجيتي ابد مرات احس عبالك جنت يم ابو الدكان واجيت من برودج اني شاب مو جبير كل عمري هسه يله صرت ٢٨ سنه شفت وياج من حب من كلمة حلوة من استقبال واشتياق كولشي عندج بطنج ولبسج واني طز بيه

سندس : لو كل واحد مثلك هيج يفكر جان كلها خانت لان النسوان كلهن مثلي تركض على بيتها وجهالها
حجي طه : لا مو مثلج اكو مثلج هوايه بس مو الكل اكو عدها بيت وجهال وحاطه الرجال على راسها وممقصره وياه اني ما اكولج اني مغلطت بس انتي السبب سوالفج السخيفه وصلتني لهيج ولو افكر زين الكه غلطتي الوحيده بقيت من الاول وياج من شفتج ماديه وجشعه المفروض اعوفج بس هذا گلبي الطايح حظه ومخافه الله والله شون قرينا فاتحتها وانعرفت وعفتها وكسرت بختها رجعنا تزوجنا وكلت شون والجهال صوجي اني كل مره احط عذر وابرر الج لو من الاول عايفج مجان هذا حالي

سندس : جان هسه انت وزير مو طلعت اني الموخوش
حجي طه : عمي اني الموخوش اني الماافتهم اني الخاين اني الموخوش ادمي حتى ترتاحين وهاي كدام امج بعد مايجمعنا شى وراح اطلك ماريدج زوجتي بعد
سندس : حتى تتزوج ذيج ام الولد الدايحه مو اعرف هاي حجة
حجي طه : هاج شوفي لسانها من اركعها على حلكها احد يلومني اكو مره بت اوادم تتجاوز على رجلها ويسكت الها ومن اضرب تكول شون تضربها اذا هي حيوانه تحب الكتل شسوي اني ماعندي حل غير اطلك واخلص منج ولا عبالج انتي المانعتني عنها لو بس هي تقبل باجر اتزوجها وروح ابويه بس هي بعد متريدني

ام سندس : لا يمه صدك گذب هاي انت العاقل تفاجأت متوقعت ترجع وهذا حالك ومصر على الطلاك
حجي طه : مرمرت عيشتي تعب منها لا هي راح تنطيني الاريده ولا اني راح اوفر الي تريده بعد على شنو هذا التعب
ام سندس : والجهال هاك شوف ورود وكاعدين تعوفهم
حجي طه : لا تبقى بهذا البيت لخاطر جهالي واني اشوفلي مكان هو كل شهر لو شهرين ونص انزل ١٠ ايام اخلصها شون مجان

باجر حظري نفسج نروح للمحكمه نسوي المعامله بعد مااتحمل هاي العيشه
دخلت تركض للغرفه عفتها وبست الجهال واخذت جنطتي وطلعت حتى مكدرت ابقى
رحت لسامي عرف الوضع متخربط بس مسألني
متعلم على اهل سامي دخلت سبحت وبدلت ونمت مكعدت اله ثاني يوم من التعب شفتها ساعه ٦ الصبح صليت وبدلت وطلعت
اتمشى بلشارع والهوا طيب وافكر وين اروح والجهال ااخ ي طه رجعت تنطي اعذار
باوعت ساعه ٧ الاربع اخذت بطريقي كيمر وصمون ورحت فتحت الباب وطبيت كعدت استحيت اتريك بيت سامي اقلها ادبرها اليوم والله كريم لباجر
من الطكطكه حسيت سندس ورايه لزمتني حضنتني من وره وتبجي

سندس : لتعوفني ماعندي غيرك
حجي طه : كافي تعبت منج وانتي تعبتي مني يابنت الناس اني لابيوم راح احقق الي تردي ولا راح اكدر اعيشج احلامج
سندس : بعد ما احجي اسكت بس انسى الطلاك
حجي طه : كرهت عيشتي وياج واعرف طبعج ميتغير من يوم مااخذتج وهذا حالج جنتي بت ١٦ سنه وهسه عمرج ٢٠ ونفس الحال بلعكس من تكبرين تتخبلين بلزايد
سندس : اني هم من حقي ادافع عن بيتي ورجلي
حجي طه : حقج بس مو بهاي الطريقه
بس فهميني منين عرفتي بسالفه صبا ومنو گلج وشون اندليتي بيتها
سندس : جماعه شافوك تتمشى وياها واجوي بلغوني اني جنت حاسه وضعك مو طبيعي المره لو شكد ماتلتهي عن رجلها بحركه وحده تعرف عنده شى لو لا
حجي طه : وعنوانها منين جبتي
سندس : طلبت من نفس الجماعه يمشون وراها ويندلون مكانها
حجي طه : منو ذوله وانتي لا اطبين ولا اطلعين ماكو غير انوار هاي سوالفها واني الف مره گتلج قللي علاقتج بيها
سندس : لا مو انوار
حجي طه : لتجذبين ولوما العيبه اخاف تصير جبيره جان هسه رحت لبيتهم واروح لأبوها اخلي يطيح حظها
سندس : هي شعليها وهي مكذبت قابل تبلت عليك
حجي طه : شفتي يعني هي ممنوع بعد ترحين يمها
سندس : لا فدوة طة هي صديقتي الوحيده وماعندي غيرها
حجي طه : انتي وياها نفس الصنف واني ما اريد مشاكل وياريت مثل الاوادم صديقه بس ستاديه بهجم البيوت اني تعبت منج ومن كلشي تسوي
انتي الوصلتينا لهنا سندس شكد حاولت اتقرب منج وانتي كل همج الفلوس وذاك البيت والي بيه حجيت ردت مليت ولج مليييييت

سندس : انطيني فرصه اخيره ومااتعبك فدوة طه انت رجلي وابو بيتي وابو جهالي ما اكدر استغنى عنك وعدنا هسه ٣ بينا شون تريد تخرب كولشي
حجي طه : هاا طلعت اني الاريد اخرب والله خوش
جان تنزل تبجي وتبوس ايدي
سندس : العفو والله اعقل واتغير بس لطلكني
حجي طه : استغفر الله كافي يمعوده
سندس : التريده يصير بس لطلكني منو الي وبرگبتي ٣ اذا مو لخاطري لخاطر جهالك
حتى الصغيره ملحكت تتعلق بيها مثل سليل
باوعت عليها تبجي وتتوسل اوووف ياربي شمضموم الي
سندس : كل خير بس لطلك فدوة
حجي طه : ماشي كومي سوي ريوك جان تبوسني من خدي وكامت بداخلي تعب وقلة حيله وقهره متروح بس اذا اطلكها جهالي يتعبون وگلت حرام علية خلي انطيها فرصة اخيره بلكت تجر عدل

بقيت حاير بلعيشة والقهر والجبهه والشغل حسيت روحي كبرت ١٠ سنين صبا من يومها مشفتها جنت كل ماالتحق ابقى واكف بلكراج بلكت المح شكلها بس املي عيني منها خسرت جوهره اجتني بلوقت الضائع من عمري ردت بس اكول الها احبج وكل يوم يفوت احبج اكثر من القبله
سندس هاي الفتره كلها ساكته هدأت كامت متسوي مشاكل واني حاولت اوفر الاكدر علية بس هي الحياة صعبه واني على كد امكانيتي

صار عمر رشا ٩ اشهر وكالت الدنيا خلي ازيدها عليك تزحف انباوع عليها من ترضع تختنك ومرات هي نايمه تزرك هاي شبيهه
سندس : فدوة طه مدري شبيهه رشا بس تختنك موتتني
حجي طه : بله انطينياها صفنت عليها تختنك
سندس : يمه بتي هاي شبيهه
حجي طه : البسي وامشي نوديها للطبيب خلي انشوف شبيهه گلبي يدك سريع تعلقت بيها وبسوالفها جانت حركة مو مثل سليل هادئه بس تتحرك هنا وهنا وسوالفها تنحط بنص الروح سحبت الفلوس الجنت ضامهن اخاف يصير شى ورحنا للطبيب
اشوفه يفحصها ومعاجبه الوضع شكو دكتور رحمه لاهلك
نسوي تحاليل وتخطيط للقلب ونشوف
ويوم كامل من مكان لمكان حتى نكمل كولشي هلكنا وصدمنا الدكتور

بتكم بيها فتحه بلقلب ولاديه ولازم عملية
حجي طه : شون فتحة وشون هي بهذا العمر تدخل عمليات
حالتها تعبانه واي تأخير منكم يجيب نتيجه عكسيه والعمليه خطره كلش لازم تستعجلون
بلعت ريك ومسحت كصتي من العرك الخبر هد حيلي وكتله
وشكد تكلفتها للعمليه
٥٠٠٠ دينار (كانت العمله بلدينار والفلس )
حجي طه : شنو بس هذا المبلغ كولش جبير
الدكتور : والعمليه كولش خطره والي راح يسويها طبيب هولندي جاي هنا بلعراق وهذا تكلفه عمليته عالية
سندس : ماكو غير دكتور خلي يسويها واحد عراقي
الدكتور : بنتج عمرها صغير ومنكدر ننتظر حتى تكبر لان على لحظه يوكف گلبها وهيج عمليات مو اي دكتور يسويها اله بلخارج اصلاًمن حظكم هذا الدكتور هنا اذا مستعجلتو احتمال تخسروها انتم بعد بكيفكم حياتها بيدكم

حجي طه : طلعنا واثنينا نباوع بلوجوه المن نشكي والمن نحجي زين منين اجيب هيج مبلغ ضخم
رجعنا للبيت وخيم البجي بيه سندس وامها حاضنين الطفله وبس يبجون المن اروح والمن اشكي طلعت بليل امشي بلشارع ساعه وحده بليل اشرب جگاير واتمشى اصدقائي كلهم على كد حالهم والمبلغ لو اموت مااكدر اجمعه بلحظتها حسيت احتاجيت ابويه احتاجيت جعفر يوكفون ويايه بتي كعد تموت ومااكدر انقذها

مريومين وحالت رشا شبه مستقره بس من ترضع تختنك واني عين عليها وعين على قلة حيلتي شسوي حتى ادبر فلوس عمليتها اااخ ربي ساعدني عبدك هلكه القهر وقله الحيله بك استعين يارب العباد
اباوع سليل تلعب ويه اختها وكل شويه ادنج وتبوسها وتجي تركض علية بابا داده احبها وتبوسها وتبوسني وتضحك وترجع تنزع قراصاتها وتحطهم على راس اختها عود تمشط الها
اباوع عليها من هسه حنينه على اختج
صافن واسبح بلسبحه وسندس بلحمام تسبح واني كاعد يم الجهال بس ثواني درت وجهي عليهم ثواني عاطت سليل تجر بأخوها
انتبهت حسام يضرب بوجهه رشا حيل بلمخده طفرت مثل المخبل وشلت رشا اباوع الطفله تشهك من البجي بس زركة وكوه تجر النفس
دخيلك ياابا الحسن اضرب على ظهرها تزرك بلزايد
عطت ولج سندس اطلعي بكل قوتي اني شكد شفت بلحروب ناس تموت وتتكطم بس مو مثل ما اشوف بتي قطعه مني دتموت كمت ارجف وهي طلعت تركض بلبرنص مال الحمام وتعيط
سندس : شبيهه لا ياالله شصار طة
حجي طه : البسي بسرعه كامت تضرب سندس على وجهه وتصيح بتي ماتت ماتت
حجي طه : ولج امشي مو وكتها لبست بسرعه وحتى الجهال اخذتهم ويايه وين اعوفهم بلبيت وماالحك اروح لأمها لان رشا بدت تسكت ومتتنفس حاطتها بحضنها وتلطم بتي ماتت وراحت متحملت سحبتها من حضنها جيبيها يمعوده

كمت فتحت الكماط مالتها وفتحت صدر الدشداشه وافرك بصدرها واعيط على السايق رحمة لأهلك استعجل جسمها احمر ازرك وبس تباوع ومتجر النفس گلت مستحيل توصل عايشة
واول موصلنا اخذوها من ايدنا وهاي خبصت المستشفى بس تلطم حتى مكدرت اسكتها لان اني اريد ابجي من كثر مخايف عليها
نص ساعه نريد احد يرحمنا ويكول شصار ماكو لحد مطلع الطبيب وسألني شصار وفهمته وهم گتله على الطبيب الفحصها قبل يومين
مباشره كال تتحول لمدينه الطب لاجراء اللازم
حولناها ونفس الشى حسيت هاي هيه راح اخسرها انطوني ٤٨ ساعه لو تعيش لو تموت ركضت على الطبيب وكتله احجز الها وسوي العمليه
جان يكول احجز بس مطب للصاله الا الفلوس كامله توسلت ردت مفاد مرات حتى الطبيب تنعدم الانسانيه عنده

اجيت على سندس كاعده وحاطه الجهال بحضنها وتبجي هااا بشر دبرت الفلوس
حجي طه : من عنده كلها كحف مثلي
سندس : تلومني من احجي على الفگر تلومني وتضرب على رجلها
حجي طه : بقيت اباوع على جهالي الي حتى مكدرت اعالج اختهم وراح اخسرها لان ماعندي فلوس العمليه
هسه جاي
سندس : وين رايح يمعود
حجي طه : رايح ادبرهن عرفت منين اخذهن
ركبت تكسي وركض للبيت وصلت للباب جان صاير الصبح ومتأكد كاعدين دكيت الباب فتحته اشواق تفاجأت بيه من عركه علي مشفت احد منهم غير نهر بين فتره وفتره اشوفها
شونج
اشواق : هلو طه بيك شى شو وضعك مو طبيعي
حجي طه : امي هنا
اشواق : اي وين قابل تروح تعال ادخل
نهر : جنت كاعده اتريك اني وامي وسلام واشواق راحت تفتح الباب وطب طة وكفت شعجب جاي وهاي شبيهه شعره منكوش وعيونه حمر ومتبهذل وجعني گلبي شبيه

شونج يمه
انعام : شجابك وشدخلك بيتي مو كلت متفوت بعد
حجي طه : اريد احجي وياج وحدنا
انعام : ماعندي حجي وياك ولي واطلع بره
حجي طه : بروح ابويه وابوج بس كلمتين
باوعت علية وكالت امشي خلي اشوف شتريد
نهر : اخذته وراحت لغرفه ابويه اني متحملت لازم اعرف شبيه اول تالي طه يجي وهيج مكسور دخلت وراهم طردتني
انعام : اطلعي بره
نهر : مااطلع اله اعرف شبيه
انعام : كتلج اطلعي لا اطيح حظج
حجي طه : مو وكتها فدوة يوم محتاج فلوس
انعام : ههههههه انت من كل عقلك جاي تطلب فلوس مني شنو هاي العين الكويه
نهر : جمدت شجاه شون يطلب منها جان ينزل يم ايدها ويبجي
يمه بنتي دتموت الصغيره حالتها خطره لو تصبح باجر لو لا واذا ملحكو يسون العمليه تموت وتكلفتها عاليه ماعندي فلوس
انعام : وأحد كلك اني فاتحه بيت سبيل واوزع فلوس للمجادي

حجي طه : يمه انه ابنج وابن حسين ترضين ادفن بتي علمود جم فلس بلنسبه الج والي عندج ميساون شى
نهر : كمت ابجي على كسرت اخويه سوده علية هيج صاير بيه وماادري
انعام : باوعت علية وكالت انطيك الفلوس وفوكاها زياده بس تتنازل عن بيتك
حجي طه : وكفت ومسحت دموعي بيتي
انعام : اي وتكتب ورقه هسه تتنازل عنه وتجيب السند وتجيني وانطيك الفلوس وفوكاها كم الف شگلت

نهر : فتحت عيني هاي من گل عقلها تريد تاخذ بيته واضيعه هو وعائلته بلشارع يمه فدوة انطي الفلوس انطي حصتي من ورث ابويه انطي وعوفي بيته لاحكته على البيت
انعام : انجبي واطلعي بره لا اشعل شيب الخلفج امشي طلعي
حجي طه : باوعت شگد جنت اعرف بيها تكره امي بس متوقعت اطلع قهرها بيه مرات البشر يصير قاسي بس بلموت يخشع ينكسر اله هي قوت واستغلت مرض بتي
ماعندي كل خيار لازم اوافق ولو تريد اموت هم اموت بس تعيش رشا
ماشي هسه راح اجيبهم واجي والبيت الج بس انطيني الفلوس
انعام : روح وتجي تلكاهم حاضرات

طلع طه واني كمت اعيط
والله حرام السويتي بيه هو بس هذا البيت عنده ساتر علية وعلى جهاله والله لو ابويه عايش جان حرك البيت على روسنا هيج يمه گلبج اسود هاي بته وهيج تسوين بيه جان تضربني على راسي حيل وعاطت
انعام : انجبي واصعدي بغرفتج واذا فتحتي حلكج اشكه الج
نهر : طلعت ابجي وصعدت الدرج واني اتخيل شگل اخويه وحاله وشراح تلعب بيه من يصير البيت الها
واضرب على كصتي من القهر وابجي واتذكرت شى عزه العزاج نهر شون تنسين الجيس اكيد مستخدمه اكيد واله جان اجه وسالني
ونزلت حافيه اريد الحك علية قبل ميطب لأمي ويضيع كلشي وسمعت صوته باب المطبخ وركض وصلت يمه اريد اجر النفس هو صفن من شافني هيج نزلت مخروعه واكفه اشواق وامي بعدها بلغرفه جان اشاوره روح افتح الجيس اطلع بسرعه جان اسمع صوت امي تكول هاك الفلوس وين العقد

يتبع ..