رواية ابي والغزلان الفصل العاشر 10 - بقلم ريام هادي

ابي والغزلان
للكاتبة Reem
البارت التاسع

بارت طويل لعيونكم 🌹

اشلونك يا دفو مر بيه رجفة الشوف
يا عشك اليموت ويحتيي بولفة
يا ليل أمن اذكرك شمس صبري تغيب
وتزاحم دموعي بفكر مختلفة
واضحك بألنفس مو لأن عايش بيه
يذكرني أمن اشم بروحك الترفة
امن ابعثر ذكرياتي عذر شرعي وياي
بلكي اطلع بملكه اعثر بصدفة
يل بفراك صوتك مرني اطول ليل
شفزع يا نهار امن السهر كلفة
اذا ضنيت غيرك مرني بألصفنات
اخذ الليل نفسه وبألنجم حلفة

نهر : نزلت حافيه اريد الحك علية قبل ميطب لأمي ويضيع كلشي وسمعت صوته باب المطبخ وركض وصلت يمه اريد اجر النفس هو صفن من شافني هيج نزلت مخروعه واكفه اشواق وامي بعدها بلغرفه جان اشاوره روح افتح الجيس اطلع بسرعه جان اسمع صوت امي تكول هاك الفلوس وين العقد
بقى يباوع بوجهي واني بس عيوني تتحرك حتى مااكدر احرك لا ايدي ولا اندار حتى امي لتحس حجيت شى وياه
اني داخلي نار ولك طه افهمني ابوس ايدك ورجلك ركز بعيوني احاجي بداخلي اتمنى يفهم عيوني وهي تتحرك يمنه يسره وجسمي يرجف نزلت عيوني وشفت الاوراق بيده لا ياالله راح يضيع كولشي باوعت علية جان يبلع ريك وبين التوتر علية
حجي طه : هسه اجي نسيت الطابو مال البيت
انعام : وهاي شنو الاوراق بيدك
حجي طه : هاا هاي التنازل بس الطابو نسيته هسه اجي
انعام : انطيني التنازل وروح جيب الاوراق
نهر : دخيلك لا (احجي بگلبي)
حجي طه : هاا لا اجيبهم كلهم احسن دقايق واجي
طلعت اركض شنو قصدها نهر الجيس اتذكر انطتني قبل كم سنه جيس وضميته دحسته بمكان وره نضدات الفرش ليوره بلحايط بين الميز والحايط

صعدت سويت الدرج شبخه وگلبي يدك سريع دخلت الغرفه دخيلك ياابا الحسن كون الكاه مديت ايدي وكعت كل الفرشات بلكاع ومديت جسمي وايدي حيل ماكو خرب هذا وين صفنت اي من ثول شون نسيت اني شلته وره مده من عرفت سندس روحها بهاي الغرفه تتسنط منها وخليته بين غراضي بلبيتونه واعرف مستحيل تتقرب هناك واصلاً هوسه وغراض هوايه رجعت صعدت للبيتونه وشمرت نفسي بين الغراض بس الزمه واشمر لحد ملكيته اي لزمته وطلعته كوه ايي هذا فتحته اول شى ملفوف بجيسين سود وراها ملفوف بقطعه مال كواني صغيره فتحه اباوع ذهب هاي شنو بس ممبين ناس داخله بناس لان ملفوف لفه وحده بس هذا منين الذهب لزمته ثكيل كولش بتوت (سوارات) على ملاوي اثنين على باون جبير (كلادة كبيره) وكردانه ليرات ومحابس هوايه وتراجي بس ملفوفات ناس بطن ناس بديت احاول افتحهم بس مكدرت كم قطعه فصلت عنهم يراد واحد يكعد ويفكهم يمكن من الضم هيج صارو واني ماعندي وكت زين معقوله هذا ذهب انعام مستحيل جان حركت نهر والمنطقه كلها هذا منين الذهب فتحت عيني مصدوم

ياربي شسوي هسه اصيح نهر تحس انعام واني مااكدر ابيعه اله اعرف هذا منين باوعت اكو علبه خشب صغيره فتحتها بيها كلادة نازكه ايه الكرسي شون بيه عفتهم ونزلت اركض على ذاك البيت اول مدخلت صار انعام بوجهي
انعام : يمعود فضنا وين الاوراق
حجي طه : هااا مو ملكيتهم تعالي نهر دوري ويايه اني عقل مضل بيه من البارحه منايم بلكت تلكي
نهر : اروح يوم
انعام : روحي وفضينا يله انت هم استعجل تره اغير رأي
حجي طه : لا ما اتأخر امشي نهر
نهر : طلعت وياه واني ممصدكه واخيراً تلاحك نفسه اول مدخلت لبيته كال
حجي طه : شنو هذا الذهب تعالي
نهر : ميحتاج شايفته قطعه قطعه
حجي طه : منين جبتي احجي

نهر : تره مو وكتها روح بيعه وكمل عملية بتك
حجي طه : مااتحرك منا اله اعرف مال منو الذهب هذا
نهر : مال امك
حجي طه : ياامي
نهر : هاي شبيك طه ركز ويايه مال امك رازقيه
حجي طه : ليش امي عدها ذهب ومنين جبتي
نهر : ليش تتوقع ابويه مشتره الها وجبته من ابويه
حجي طه : شون
نهر : من وكع سودة علية بلجلطه اول كم يوم افهم كلامه صح بصعوبه بس افهمه جنت حايره بيه وبعلاجه وبيوم كعد اجيب الدوا لزم ايدي واشرلي اول شى سألني عن امي كتله بلسوك هي واشواق ومن عرف بره البيت اشر على المفتاح انت تعرف كنتور ابويه ممنوع واحد يفتحه حتى امي سنين امي تتمنى تفتحه وهو ابد والمفاتيح دوم بجيبه خاف ليصير بيه شى واكيد بذاك الوكت يفتحوه
حجي طه : اي كملي
نهر : واخذت المفتاح ويأشر من بعيد جيس طلعت يمكن ١٠ جياس اريد اعرف ياجيس منهم انشلع گلبي وگلبه تالي لكيت هذا وره ثلث ساعه ادور تكول مو كنتور مغاره علي بابا
المهم لكيته وجبته يمه واشرلي افتحي فتحته ولكيت هذا الذهب انت بوكتها جنت ملتحق وطلب مني انطيك هذا الذهب واكولك هذا مال امك ولتبيعه اله من تحتاج

حجي طه : وليش مكتيلي بوقتها
نهر : خفت لا امي تدري وضميته لان ابويه كال اياج تدري امج وراها التهينا بمرضه وحالته صعبه حيل صارت وبدا حتى النطق يختفي وبيوم دخلت على امي لكيتها فاتحه الكنتور ادور يعني ابويه جان يعرف هيج راح يصير ولان يعرف احبك واكيد راح اوصلك الامانه
حجي طه : وليش مقبلتي افتحها بوكتها وكلتي اله من تحتاج وحطيتي الف يمين علية تدرين شكد اجاني فضول ايام اريد افتحه حتى بس اعرف شبيه لو ما حلفانج
نهر : مرتك طماعيه وعينها فارغه واعرف اذا عرفت مراح تبقي على حالك وراح تضيعه بشغلات فاكسه لهذا حطيت اليمين لان عرفت راح تجيك ايام سوده مصخمه وخاصه وره ما امي كالت كل الاملاك بأسمها وشفت ربك رحمك لو فاتحه بذاك الوكت مجان هسه تكدر تسوي العمليه وجان راح بيتك
حجي طه : وابويه ليش ضامه مسألتي
نهر : سألته وخطيه كوه حجالي كال من ماتت امك اجت امي ادور بلبيت تعرف عدها ذهب گلب الدنيا عليهم

بس امك من كثر ماطيبه ومو من هاي النسوان الي تضم وتخاف على الذهب حاطتهم بهاي الكونيه الصغيره وشامرتهم كدام العين بحيث محد يتوقع هنا تحطهم لكاهم فوك طلبه عاديه جانت عدها بلبيت ولان يعرف امي تلوب عليهم ضمهن وسوه نفسه دور وياها وملكاهم ضمهن الك ربك بيه حكمه
حجي طه : نزلت دمعتي ومسحتها اااخ يايمه لو عايشه يمكن مجان هذا حالي حتى وانتي ميته حنينه علية
نهر : بس اكو علبة صغيره عفيه هاي هديتي لسليل هاي ابويه صاغها اليه من جنت صغيره وكلت ماكو اعز من بتك تلبسها

حجي طه : واني اكول وين شايفها هاي الكلاده
نهر : فدوة لتبيعها بروح ابويه
حجي طه : بست راسها لتخافين ماابيعها بس تتوقعين هذا الذهب يجيب فلوس العمليه
نهر : هو صح مو هوايه بس حيل ثكيل وذهب گبل يصير تكمه اني كوه طلعته جوه ملابسي جان انعام لكفتني اله شويه
حجي طه : ههههههه اتخيل شكلج
نهر : فدوة لضحكتك تسوه الدنيا كلها عندي
حجي طه : لو ما انتي جان ضعت نهر
نهر : لتكول هيج توكل بالله وبيعهم بلكت الله يكفو واذا مكفت الفلوس انطيك ذهبي المهم متبيع هذا البيت وحق الكاظم ساعه متبقيك انعام هنا تبيتك بلشارع
حجي طه : شكد انكسرت منها وتأذيت بس مثل هاي الكسرة ماكو
نهر : ربك كريم بعباده وانت طيب ومؤمن والله ميعوفك البشر طايح حظه وكطع بس ربك لا احن من الام على ولدها
حجي طه : ونًعــٌٓمُٓ باإٱللـِْﷻـِْﮭﮧ

نهر : خلي اروح للبيت وانت استعجل وراك بيع للذهب تره مضل وكت
حجي طه : ماشي بس انعام شراح انكول الها وهي تنتظر
نهر : والله مااعرف هسه تتخبل
حجي طه : شنكول شنكول
نهر : عرفت نكول كعد اندور على العقد ودك الباب ولد صاحبك ورحت وياه وانت من ترجع كول الها اجاني ولد صاحبي وجابلي الفلوس بعد ما ابيع البيت
حجي طه : ولج شنو هذا العقل الحلو
نهر : اذا عرفت امي راح تكسره لهذا العقل هههههه
حجي طه : ان شاء الله ميصير شى خلي اروح تأخرت
نهر : روح حبيبي الله وياك

طلع واني طلعت وراه وسديت الباب ودخلت لبيتنا لكيت اشواق واكفه وتكرط خيار وتباوع صفح وامي كاعده وتهز برجلها
والفلوس بعلاكه گبالها شافتني هااا
نهر : دورنا وماكو واحنا ندور اندك الباب مدري منه اجه علية صاح روحي للبيت شصار ماادري
انعام : شنو يلعب علية ميستحي مو صار ساعه يتوسل ويبوس الايد خلي يجي اله اطيح حظه وماانطي ولا فلس فوك زينيتي
نهر : ماادري يجي وافتهمي منه
انعام : اني اله بس خلي يجي
نهر : اني فوك صاعده انطف غرفتي وصعدت ركض بدون حتى مااندار

دخلت للغرفه وشمرت نفسي على الجربايه
حسيت براحة عجيبه لان نقذت اخويه وجان تندفر الباب واطب امي بس شنو عيونها براسها وراها اشواق وبدون اي مقدمات الزميني من كصيبتي والله كرهتها من كثر متجرني منها ااااخ يمه اااخ
انعام : شاورتي طه وخليتي يطلع يركض
نهر : هااا باوعت على اشواق عرفت هي الي فتنت علية مشاورته
انعام : احجي لا اطلع ضيم گلبي كله هسه بيج شنو كتيله وخليتي حتى بيعت البيت يلغيها
نهر : يمه مو كتلج اجاه ولد بعد شعليه اني ااااخ ابوس ايدج عوفيني مو راح راسي
انعام : اذا محجيتي يانهر لا وروح ابويه اكطعج تكط
نهر : كتلج ماشاورته ومحجيت وياه ولج صخمان اشواق شگلتي لأمي
اشواق : اني شعليه كولشي محجيت
نهر : الله يشيلج كل الخباثه والبله منج ولج يوم فدوة عوفيني مو راح تنكطع قصيبتي بيدج
انعام : ماشي
شويه وعافتني الوب بلكاع وراسي يموتني جان كمت اريد الزم اشواق اركع راسها بلكاع وجان اشوف امي تصير فوك راسي وبيدها المكص اني شفته لو روحي ساحت اني حيل احب شعري ومداريته بلحنه وماامشط اله بمشط خشب حتى ليوكع وما افتحه دون كصيبه حتى ميتهلس جان تلزم كصيبتي
تحجين لو اكصها
نهر : راحت روحي وكمت اعيط واتوسل لا يمه دخليج عليج العباس عوفيني كله ولا كصيبتي
انعام : احجي شصار وليش طفر ومرجع
نهر : وبدت تقرب المكص اني گلت قابل شتريد تسوي لطه شو الْحٍمَدٍ للـّہ الذهب وصار عنده وراح يبيعه ويسوي عمليه بته
انعام : احجي
نهر : وحجيت كولشي وامي تخبلت
جان تنزع النعال ودك وين ميوجعني اريد بس افك نفسي منها واعيط واشواق الحقيره واكفه بلباب ولا تحركت ولا حتى دافعت عني
انعام : بت الگلب كل هذا يطلع منج ولج لو ما طالگه بيج واعرفج بزر بطني جان گلت بت رازقيه انتي
نهر : ابجي واتوسل بيها والله يمه انقهرت علية اخويه وحرام علية وامانه ابويه انطانياها وصلتها اله

انعام : امانه ياگلبه واني سنين اكول وين راحن ذهباتها وشكد دورت وماكو واسأل ابوج يكول ماادري
تحجي وتضرب بلنعال على راسي وعلى ظهري وجتفي كطعتني تسولف وتضرب وفوكاها تنطيهم لطه واني معودت اجه طلب مني فلوس تضيعين هاي الفرصه مني ولج ردت بس اطلعه من المهجوم البصفي
واخلص منه وانتي ضيعتي الاكو والماكو
نهر : يمه ابوس رجلج كافي مو جسمي اطكع من الضرب
انعام : انتي مو ادميه واله اخليج اتوبين من طه شو تعالي
جان تلزم كصيبتي وتكصها وتشمرها بلكاع اني كصتها تكول كصت روحي لطمت لطم تهسترت الطم واني بلكاع اشيل روحي واركعها ليش حرام عليج متخافين الله مسويت شى بس ساعدت اخويه
انعام : حتى مره ثانيه من تفكرين تساعدي تتذكرين هاي كصيبتج واذا تكررت هاي الشغله مره ثانيه اكص رگبتج تفوو ياحقيره

عافتني وطلعت واني ابجي واضرب على وجهي لان فقدت احب شى لگلبي الزم شعري كصير حيل والكصيبه بلكاع شطولها وشثخنها حضنتها واعيط يابه تعال شوف امي شسوت بينا تعال شوف الجنت تحبها وتفضلها على الكل شوفها شون طغت ولعبت بحالنا لعب شوف شون مترحم بحالنا ااااااااااخ يايابه يابويه أذتنا ودمرتنا

اشواق : يمه لو مكاصه شعرها تعرفين بيها روحه بيه
انعام : انجبي انتي تره اسوي بيج مثل مسويت بيها
اشواق : لا لا اني شعليه اني وياج دائماً شلي غرض بهاي الشغلات
انعام : اي لتدخلين تره تصيرين اتعس منها
اشواق : لا وياج امي حبيبتي

حجي طه : رحت ركض واخذت تكسي وصلت لمحلات الذهب طبيت اول صايغ طلعت الذهب بقى صافن بوجهي
هذا الذهب الك
حجي طه : اي الي ليش
شكله ذهب قديم بيه فاتوره لا
حجي طه : هاا لا مابيه فاتوره ضل يگلب بيه شك مو الي وخاصه هو ممرتب ملحكت افك كل قطعه على صفحه
مااشتري
حجي طه : ليش
اله بيه فاتوره طلعت منه وصايغ وره الثانيه وخمس صياغ نفس الكلام زين المن اودي افتر راسي ورجعت دخت ورجع الالم بصدري اخاف مينباع وتضل بتي هاي ضلتها رحمتك ربي بقيت افتر بسوك الصياغ ولمحت واحد جان جيرانه وشال قبل خمس سنوات سلمت علية وكتله شسوي هنا عمي
عمي هذا محلي
حجي طه : الله جابك ودزك اليه تشتري هذا وفتحت الجيس باوع علية مالتك
عمي ابوحسن تعرف بيه اخذ حرام اكيد مالتي مال امي
ماعندك فاتوره بيه ورقه اي شى
حجي طه : عمي وروح ابويه مالتي بس ماعندي اي شى يثبت
شوف طة اني لو ما اعرف ابوك الله يرحمة خوش رجال وانت اخلاقك ذهب مجان اشتري منك لان تعرف هلفتره بسبب الحرب اشكال يجيبون شغلات مبيوكه
حجي طه : على بختك عمي بيتي وتندله اي شى يصير برسم الخدمه اني

انطيني الذهب خلي اوزنه
حجي طه : يوزنه واني نار بمعدتي اريد بس اعرف شكد جاب اااخ من العوز شگد يكسر ظهر ويذل
ابوحسن : ذنه يسون بسوك اليوم ٧٩٠٠ دينار
حجي طه : ياالله طرت من الفرحه ردت احضنه دمعت عيني
بس اني عندي بس ٣٠٠٠ هنا تعرف حرب ومنكدر نحط فلوس هوايه بلمحلات كولشي يصير
حجي طه : شون لعد عمي
تعال فهمني شنو سالفتك من اجيت وانت مو على بعضك
حجي طه : عمي اني بتي بين الحياه والموت ولو تصبح لو لا ولازم عملية سريعه واذا محصلت الفلوس اليوم معناها دافنها بيدي باجر
ابوحسن : لا اله الا الله الله يعينك ابني
ماطول هيج حقك امشي ويايه للبيت اكملك الفلوس
تعال بويه حسن ابقى بلمحل
امشينا نستعجل
حجي طه : ناخذ تكسي ونروح
ليش تكسي سيارتي موجوده امشي
ورحنا لبيته ومقبلت ادخل بس هو خطيه لح علية وجاب الفلوس
هاك احسبهم
حسبتهم وطلعت ٥٩٠٠ وحطيت ٢٠٠٠ على صفحه ولو ثقلت عليك بس الله يشهد مضطر
ابو حسن : كول وليدي
هاي ٢٠٠٠ اريدك تضمهم يمك اني هسه راح احير بلعمليه واركض منا ومنا وبيتي فارغ اريدهم امانه يمك بس اكمل ارجع اخذهم
تدلل اسويلك ورقه بيهم
حجي طه : على بختك عمي شنو مااعرفك كافي خلف الله عليك قبلت تشتري واخذت حجايتي راس مال
ابو حسن : والله انت ابن اصول وطيب تعال اوصلك وين راح تروح
حجي طه : اروح احجز يم الطبيب وبعدها ارجع للمستشفى
اني وياك
لا عمي مااريد اكلفك تكسي منا
ابو حسن : تكسي وانت شايل هاي الفلوس امشي
الف رحمة على اهلك ورحنا وخطيه ويايه ويايه ولا عافني رحنا لعيادة الدكتور وانطيته كل الفلوس دفعه وحده بس اريده يبدي العمليه وانطاني موعد باجر ساعه ٨ الصبح ورجعني للمستشفى بلطريق اخذت شغلات للجهال ولسندس اكيد كتلهم الجوع اتشكرت منه ودخلت للمستشفى وصلت للمرات شفت جهالي شون نايمين بحضنها وهي صافنه متت قهر عليهم شافتني طفرت من مكانها
سندس : ها طه بشر
حجي طه : الْحٍمَدٍ للـّہ دبرت لتخافين وباجر الصبح عمليتها
سندس : الف الْحٍمَدٍ للـّہ ومنين جبت الفلوس
حجي طه : بعدين اكولج المهم تكوم رشا بلسلامه
الليل طويل احسب ساعه ساعه للنهار ويه دكات الساعه گلبي يدك خايف لا افقدها ومعودت طلع الصبح سليل نايمه بحضني وحسام بحضن امه صارت ساعه ٦ الصبح دخلو الاطباء مدري شيسون ومنفتهم شى منهم لان بس انكليزي يحجون وطلعوها من الانعاش ونركض وراها وانسدت باب العمليات المفروض عمليتها ساعه ٨ ليش قدموها اكيد حالتها خطره
سندس حالتها مو اقل مني هم تبجي ولحظات تضرب على صدرها اخذتها بحضني ردتها بس تسكت خطيه وهم الجهال صافنين على امهم ويبجون وياها وميعرفون ليش

ساعات طويله جوه واحنا كاعدين باب صاله العمليات بطلت احسب شكد وحتى مااباوع على الساعه لحد متعبنا حتى من الانتظار وبدا گلبنا يخاف ليش كل هذا التأخير وانفتح باب العمليات حسيت روحي انفتحت وياه والطبيب يكول
الْحٍمَدٍ للـّہ على سلامتها جانت عملية فوق الكبرى وحاله الطفله حرجه بس الْحٍمَدٍ للـّہ كدرنا نسيطر على الوضع وان شاء الله كلها مده وترجع بتكم بالف سلامة
من فرحتي سجدت شكر لله وابجي بوقتها تعتبر عملية فتحت القلب من اخطر العمليات ونجاحها ضعيف بس الله رحم بيه وسهل امري من كل الجهات

بعد ساعات من طلعوها من العمليه وشفت حبيبتي شون فاتحين صدرها وهي صغيره گلبي تأذه عليها بس الْحٍمَدٍ للـّہ عايشه
رجعت سندس والجهال للبيت لان تعبو حيل وخاصه الجهال بقيت يومين واتذكرت راح تخلص نزلتي زين ذوله منو الهم وحتى رشا بعدني ممطلعها رجعت للبيت واخذت سندس ودينا الجهال عند امها ورجعتها للمستشفى وعفتها يم رشا ورحت لعمر اعرف بيه نازل قبل يومين بلكت الله يسويلي اجازه اي شى
وصلت لمنطقتهم ودكيت الباب وطلعت امه وخطيه اجه يركض من عرف بيه بلباب شكد حاول ادخل مدخلت وفهمته حالتي
بس رايد منك كم يوم تتوسط عند الامر والله وضعي صعب واعرف بتليت بيه بلوه
عمر : ابوحسام تصدك تكذب عيوني الك سهله هاي
حجي طه : والله متقصر اعرف بيك لو منك حتى سلام مااسلم ابتليت بيه وبمصايبي ويوميه جايك على شى
عمر : اني شما اسويلك ما اوفي حقي وياك
حجي طه : العفو لتكول هيج مابين الخيرين حساب وانت اخويه
عمر : محتاج فلوس الله عليك
حجي طه : لا مستوره الْحٍمَدٍ للـّہ بس انقذني بالاجازه ولو كميه يوم
عمر : صار ولك تعال ادخل اشرب جاي من ايد الوالده يعدل راسك
حجي طه : سالمه وبيت العامر لازم اروح اترخص اني
سلمت ورحت وثاني يوم اجاني للمستشفى رغم حروب والدنيا مگلوبه بس تعلمنا لان المده طولت والناس عايشه ومستمره رغم كولشي وحتى بلجبهه الي عنده جماعه واسطه يكدر يسلك اموره وعمر الله دزه اليه نجده كل متصير مصيبه وركضلي للامر لعبت روحه همزين هو موجود واله جان هربت وصرت افرار من المصايب الي اشوفهن
وكدر يشطب الايام النزلته وانطوني ١٠ ايام ثانيه
بهاي الايام محسن وسامي معافوني وحتى عمر رغم بعدها التحق هم اجاني مرتين
وطلعت رشاوي ورجع حسها ينور البيت بس حذرين وياها فتره نقاهه طويله على الاقل ٦ اشهر لان طفله ومتتجاوزه السنه
تفقدت نهر مأجتي ولا سألت وحتى انعام ولا وصلت ولا سألت على البيت گلبي لعب اخاف عرفت وحرمت نهر من الجيه لان هي مال تعرفني بهيج حاله مستحيل
سبحت وبدلت واني اطلع
سندس : وين رايح
حجي طه : لذاك البيت هسه اجي
سندس : هاا شعجب شنو تصالحتو
حجي طه : لا بس اسأل عن نهر
سندس : وانت هسه كاسر يمينك ومنزل نفسك بس حتى تسأل عن نهر
حجي طه : لتخافين كسرته ليميني ونزلت نفسي مو اليوم قبل ايام
سندس : ليش شصار وصدوك مكتلي الفلوس منين بس من انعام العوبه
حجي طه : لا مو منها خلي اروح هسه اجي
سندس : متفهمني مو راح اطك
حجي طه : من اجي لتلحين

طلعت ورحت للبيت دكيت الباب طلعت نوريه مرت علي البنيه ماعندي سلام وياها بس هي اتسلم وحبابه حرامات مرت علي هاي سألتها نهر وين باوعت بوجهي وسكتت
اكو شى
نوريه : والله ياابو حسام مااعرف شكول
حجي طه : صاير شى مو رجلي وكفت احجي
نوريه : امها متقبل تطلع وحابستها بلغرفه
حجي طه : ليش شصار
نوريه : ماادري بس يمكن من وراك
حجي طه : اكيد عرفت هذا الهدوء وراه شى
حجي طه : ام علي هنا كمت حتى مااكدر اصيح امي بدت تثكل بلساني
نوريه : جوه كاعده بلهول تشرب جاي
فدوة لتكول اني كتلك
حجي طه : لا يابه شكول الها صدك بت جعفر شونها
نوريه : جنات
حجي طه : اي
نوريه : متعبتنا حركة بس مشين حالنا وياها
حجي طه : حاب اشوفها كولش هاي من ريحه الغالي
نوريه : اني كولش مستحيه منك بس عمتي متقبل اطلعها لأي احد
حجي طه : وخاصه اني مو
دنجت ومكالت شى عرفت من رخصتج وطبيت جوه هي شافتني جان تنزل الاستكان من ايدها
خير هسه يله شفنه طولك الحلو
حجي طه : وين نهر
انعام : هاا هيج بدون حتى متكول ليش ذاك اليوم طفرت طفره الحرامي بس عرفت تبوس ايدي ورجلي وتتوسل على فلوس وتالي من قبلت صرت انت ابوالراهي علية
حجي طه :مقبلتي لأجل عيني البيت جان مقابل الفلوس
انعام : موزين قبلت اصلاً بس انت مو وجهه نعمه واحد يسوي وياك خير
حجي طه : دبرت الفلوس
انعام : اعرف من ذهب امك الي الادبسسز نهر وصلته الك
حجي طه : نهر وين
انعام : وشعليك انت مو دبرت الفلوس وبعد متبيع البيت يله ولي منا

حجي طه : وين نهر كتلج كمت اعيط نهر نهر
انعام : لو تنبح لباجر متطلع اكسر رجلها والله
عفتها وصعدت وجان تكوم تركض ورايه جرتني حيل من وره دفعت ايدها وصعدت
انعام : ولك ابن رازقيه اطلع بره لا اشهرك شهيره واخليهم يطيحون حظك
حجي طه : ولا درت بال الها وصعدت فتحت باب الغرفه على نهر لكيتها كاعده منكبصه وحصاره روحها بلجربايه وتبجي هي شافتني اجت تركض وحضنتني
نهر : طة انتظرتك تجي
حجي طه : وخرتها من حضني هاي شنو شعرج
نهر : دنجت ابجي وكتله فدوة الك المهم انت
حجي طه : صرت نار ولزمتها من ايدها امشي ويايه ماابقيج هنا هاي راح تموتج
نهر : لا فدوة اروحلك عوفني والله تلعب بحالنا لعب باقيه هنا شكو علية
حجي طه : امج تخبلت ماضل عقل بيها هسه اني وافتهمنا انتي شكو وشون تكص شعرج
نهر : مو مهم بس كولي قلبي نار على رشاوي ومحد يعرف شى
حجي طه : لتخافين ياعيون اخوج انتي زينه رشا بفضل الله وبفضلج امشي ويايه وخلي اشوف شون بعد تندك بيج
نهر : لا فدوة لتسوينا مشاكل خليني هنا وبلكت ويه الايام تجوز مني

حجي طه : ولج شتجوز كعد تتخبل بلزايد
نهر : وهناك يمك هم سندس انعام الثانيه يعني ماسوينا شى اقلها هنا غرفتي وبيتنا مااريد اسمع شى يغثني ويغثك
حجي طه : غير اطيح حظها اذا حجت وياج
نهر : لا فدوه لعينك اذا تحبني عوفني هنا كافي اجيت وسألت عني
صوجي خليت هذا حالج كله من ايدي جان لازم مااجي واطلب منها بس والله نسيت سالفه الجيس
نهر : كولشي قسمه والحمدلله تلاحكنا
جان اسمع صوت امي تعد وتصف تريده يروح خفت ليجي علي ويتعاركون روح طه بعدين اشوفلي صرفه واجيك
حجي طه : ليش خايفه والله مااخليها اطخج
نهر : ميخالف روح فدوة بروح ابويه روح وبعدين نسولف

حجي طه : ماشي بس لتبجين كافي لزمت شعرها انمرد گلبي من شفته بستها ونزلت صارت بوجهي انعام
يعني انتي متخافين الله المن تصلين تقشمرين الله تره يعني من توكفين وتتوجهين للصلاه هم الج عين واطلبين الرحمه منه يعني شنو ذنبها نهر هيج كاسره نفسها
انعام : انجب لك تحجي علية تاج راسك اني حرام التعب بيك والتربيه اطلع اطلع لأصلك ابن رازقيه
حجي طه : ياريت رازقيه عايشه مجان هذا حالي ولتنسين اني تربيتج وكولشي تشوفي مني من وره سوالفج ولوما اخاف من الله جان عرفت شسوي بس اني مخافه الله كاسره ظهري دوم افكر واحسب الف حساب متشوفين لهسه موكفتج عند حدج اروح وارجع واكول يله امي وربت وتعبت بس من اتذكر سوالفج اكره الساعه الصحت بيها يوم او يمه
انعام : شوف طه اذا شفتك تقربت من نهر او واحد من ولدي وحق الله العب بيك جولة واخليك تخيس بلحبوس خاف كل مره بس حجي هلمره اسويها وكول كالت انعام روح حير بنفسك وبهاي الزركه العندك وجهالك وهذا البيت متدخل اله ابد افهمت
حجي طه : اااخ والله وكت بس هينه متضل على هذا الحال الله كريم
عفتها وطلعت شسوي اضربها مره جبيره بس بالي يم نهر وهاي متقبل تجي يمنا شون

رجعت للبيت استلمتني سندس من الباب
سندس : بله متكولي ماعندك كرامه طاب لذاك البيت شگلت لروحك وانت تحجي وياها
حجي طه : اششش صوتج مااسمعه وبطلي تتسنطين وهذا الشباك اله ابني حتى اتوبين
سندس : هو ابويه ماكدر بس على امي مطلعت لسانك على انعام اجيت يمي صرت بس انت وبس
حجي طه : رجع نشاطج مو وراح ترجع الخبالات سمعيني زين روحي بخشمي ودنيا مغرب وراح تصير الصلاة ليش تخلين الليل اسود عليج اسكتي وروحي حظري العشا احس ماصدوك اطلع لساني عليج
سندس : متكولي شوكت توكف بوجهم
حجي طه : شتردين اكتلهم روحي جيبي سجينه وخلي اذبحها واذبح علي واذبحهم كلهم صار ست سندس
سندس : خرب حظج سندس هو اني اعرف حظي وين كاعد بقت عليك لاتذبح ولا تصلخ ابقى هيج عايش ياهو الرايح والجاي يحجي عليك ويصعد براسك
باوعت عليها ودرت وجهي منها كولش مالي خلك اتناقش رحت توضيت وتوجهت للقبله واصلي مرات الواحد من كثر الهموم ميريد حتى يحجي بقيت اصلي وكل شويه سلسل ادنج ويايه عود تصلي ابتسمت بداخلي على سوالفها
مرت الايام واحنا هسه بدايه شهر ١١ لعام ١٩٨٦ خلصت اجازتي ورجعت التحقت بس قبلها جبت الفلوس من الصايغ وضميتهم بعيد عن سندس بس سحبت منهم مصرف للبيت لان طول هاي الفتره مشتغلت وعلاجات لرشا خلصت كل فلوسي لهذا سحبت من الالفين مصرف الهم وانطيته الها وهي مستغربه منين الي هاي الفلوس

واني بلكراج واكف انتظر سياره حتى نصعد وتقبط والهوا بارد ساعه ٧ وربع الصبح بدايه شتا وقطرات مي تنزل مغطيه الشارع والجو يخبل ادخن على هذا الهوا العذيبي وصوت فيروز مشغلي بلكراج وصافن شفتها جايه من بعيد تتمشى وحاضنه كتبها گلبي نبض من شهر الواحد مشايفها اشهر هوايه بس احسهم عمر تمشي ومدنجه مثل الوردة الذبلانه وعليها قطرات المطر مكدرت مااروح عليها ولو بس اشوف عيونها واسلم عليها جسمي كله ينتفض ويريدها تمشيت وبيده جنطتي بأتجاها بس هي ممنتبهه علية وصرت گبالها شافتني مثل الفزت وبقت صافنه مباشره عيونها دمعت
حجي طه : مااستاهل هاي العيون الحلوة تنزل دمعه علمودي
صبا : شونك طه
حجي طه : ياروح طة لو تعرفين شگد اشتاقيت لهاي العيون وهذا الوجهه الحلو
صبا : اليوم الالتحاق مالتك
حجي طه : مشتاقيتيلي
صبا : ميفيد بعد الحجي من رخصتك ورايه دوام
حجي طه : صبا والله احبج وبعدني احبج ومانمت ليله اذا ماافكر بيج
صبا : انساني طه محصلت منك بس شلعان الگلب والاذيه تندمت على كل لحظة عرفتك وحبيتك بيها
حجي طه : تقربت منها اكثر اترجاج لتكولين هيج والله اموت الف موته من اسمع هذا كلامج
صبا : مكافي مرتك فضحتني هلمره دمرت مستقبلي
حجي طه : سندس شسوت
صبا : كول شنو الماسوته روح رحمة لأهلك واذا تشوفني بعد اياك توكف بوجهي واصلاً سوي نفسك متعرفني
حجي طه : ليش هيج تحجين والله اعرف غلطت
صبا : هاك وهذا نتيجه غلطك
رفعت ايدها واشوف حلقه بيدها

حجي طه : حسيت هذا الهوا العذيبي اختفى والمطر متنزل قطرات على جسمي مي تحولت تيزاب انخطبتي
صبا : ومرتك السبب مكافي السوته وره مده راحت لأخويه وحجت كولشي اله ودمرتني واخويه بسبب الصار حرمني اروح للكليه وراحت السنه علية شفت شسويت شفت شحصلت من حبك
حجي طه : حسيت صعد الضغط براسي وكمت مااشوف وايدي اسدهم وافتحهم من الاعصاب لو الزم سندس اذبحها
صبا : ومعودت ماما تقنعه حتى ارجع هاي السنه مقبل اله انخطب لأبن عمي وهسه اني مخطوبه لواحد مااطيقه ولا احبه وكله بسببك وبسبب مرتك
حجي طه : اليوم احرك اهله شون تسوي هيج وروح ابويه ماادري وشون وصلت لأخوج
صبا : اكيد مثل موصلت اليه
مرتك رغم صغيره بس وكحه وصلفه ومتخاف وانت مو كادر عليها ولا كادر على بيتك مااعرف ضعف شخصيه طيبه گلب او مرتك هي متنجرع اعذرني على هذا الكلام بس هذا واقع ورجاءاً ابعدني عنها كتلك ذيج المره ابعدها عني بس هي مرتاحت لحد مدمرتني بلكامل عفيه طه بعد بگلبي الك معزه لتحولها لكراهيه خلي الايام الحلوة تبقى بعيني حلوة كافي الصار وبعد حتى اذا شفتني دير وجهك رجاءاً وارجع واكرر ابعد مرتك عني اني كلها كم شهر اتزوج وبعد حتى هاي الوكفه محرمه علية انت عندك حياتك والله يعينك عليها عوفني لحياتي الماعرف شون راح تكون
من رخصتك تأخرت على الدوام
حجي طه : بقيت واكف صافن مدري انصدم على خطوبتها الكطعت گلبي تكطع لو على سوايه سندس الماعرف شوكت طلعت وشون راحت لاخوها لو على حجيها من كالت متكدر على مرتك بقيت واكف دقايق واباوع على الوكت حرگت گلبي منعتني التحق ومحسيت بروحي غير راجع للبيت شايط لله يامن يوصلني للبيت

وصلت وذبيت الجنطه بلباب ودخلت جانت نايمه اباوع جهالي نايمين سديت حلكها حيل وشلتها من شعرها فزت وفتحت عيونها هي تدري اني هيج وقت المفروض ماكو وسحلتها بره الغرفه وشمرتها بلكاع وخرت ايدي منها
سندس : شبيك شبيك وكعت گلبي شجاك
تخبلت
حجي طه : اي تخبلت ومحد خبلني غيرج ولج شون ترحين لأخو صبا
سندس : مرايحه ومااعرفه شفتها مو عرفت الساقطه مراح تعوفك
حجي طه : دفرتها بسطالي اللابسه مال عسكريه على حلكها رأسن صار حلكهه كله دم
ولج بت الگلب البنيه عفتها ولا يمنا ترحين ادمرين حياتها شنو ضيعتي سنه منها وخليتيها تنخطب
سندس : لازمه حلكهه وتبجي ايي ولو بيدي احركها طبها مرض هي اندكت بيتي ورجلي ومااقبل اي احد ياخذك مني
حجي طه : كمت ادك على راسي ولج لتسوين نفسج تحبيني انت متحبيني انتي وحده حايره بروحها والفلوس بس متردين تنكسرين كدام النسوان على شون زوجج حب عليج وحده
سندس : اي ومااقبل واذا اشوفها احركها واحرك كل واحديوكف وياها بت الشارع
حجي طه : والله ماكو غيرج بت شارع التطلع من بيت رجلها بدون علمه وتستغل عدم وجوده وتروح تقابل رجال غريب وهي مره متزوجه شترجى منها هاا كولي شترجى منج
سندس : من وراك كله من وراك ردتك تعوفها گلت اخاف تقبل تتزوج حتى لو متزوج
حجي طه : متريدني وحده عدها كرامه مو مثلج زباله متريدني من عرفت متزوج كامت حتى متباوع بوجهي كمشتها ودك راشديات فقدت عليها وهي تعيط لك عوفني فوك ماخايني فوك ما عايفني
حجي طه : تعبت من الضرب وكعدت على القنفه اباوع عليها كاعده بلكاع وشعرها مكوش وجهه كله دم اول مره هيج أذيها
تدرين كالت اني مكادر عليج ولا على بيتي يعني مو رجال سويتيني مو رجال سندس

سندس : مسحت حلكهه وتزحف وكعدت يم رجله وكالت مو بيدي من عرفت تحب غيري عقل ما بقى بيه وخفت ترجع الها
حجي طه : ليش ولج گلت انعدلتي وصرتي زينه
سندس : اني ممسويه شى غلط لو يرجع الزمن هم اعيده محد يندك بيتي واسكتله
حجي طه : رجعت راسي على القنفه احس صداع مو طبيعي اريد اشوف ماكو عيوني نار
سندس : فدوة طه انساها مو تكول انخطبت
حجي طه : شنسى انسى طلعتيني صغير كدامها لو انسى طلعاتج بدون علمي لو انسى جسارتج لو طمعج شنسى سندس والله مليت منج ومن اخلاقج كرهت الساعه مو بس التزوجتج بيها حتى الي انولدت بيها
سندس : كوم غسل وتعوذ من الشيطان وروح التحق لتتعاقب
حجي طه : دوم تدعين علية كون ارجع ملفوف بعلم الله يسمع منج حتى بس اخلص من عيشتي هاي الطايح حظها

كمت اخذت جنطتي وطلعت والطريق كله نار بصدري متبرد شيبردها واني حتى مااعرف اتصرف انطي الحق لسندس من وره غيرتها لو انطي الحق لصبا لان دمرت حياتها زين واني من هاي الهوسه كلها وين
وصلت متأخر للتعداد ودز علية الامر المفروض عقوبه واني واكف گباله جان طيك خشمي دم ودخت حيل صاح الجنود وركضو جابولي مي واخذوني للطبابه طلع ضغطي صاعد همزين صار كدام الامر واله جان عاقبني سجن لو تأخير نزول
بقيت اول يوم نايم لان ضربوني ابره حتى ينزل وشويه وكدرت انام بس دنيتي مگلوبه ومابيها شى عدل مدااعرف اتصرف شون ارتب حياتي شون

محسن : هاا خويه كالو راح تموت وجبت مزيقه حتى نشيعك بله مامتت من الدبابات والقاذفات تموت من الضغط لا والحظ
حجي طه : اي والله حظي اسود من يومي
محسن : اصبغه الك اصفر ولا يهمك
حجي طه : عوفني محسن روحي طافره
محسن : شفتك وشفتني روحك طافره وين متكولي تلعب گأس العالم روحك وطفرتهم كوم الولد بره مجموعين وكعد يغنون
حجي طه : وكت غنى
محسن : من ضيمهم ياخويه كوم غير جو وعوفها على ربك تدبر وتخلص وتصير سوالف
حجي طه : يوم بعد يوم تصير اتعس
محسن : ولا يهمك عود من تصير اتعس اركصلك
حجي طه : وشون تركص بله وكام يهز جتف
ههههه يمعود حتى واهس للضحك مالي
محسن : بداعت حظك الاسود المصخم كوم نغير جو
حجي طه : اي مو احنا بلحبانيه
محسن : شوف الهوا بره والوجه الحسن ويأشر على وجهه ترد روحك للدنيا
حجي طه : هاي هي كملت ماطول انت وجهك حسن اتصخمت بلزايد
يله خويه
وطلعنا وكعدنا والكل يسولف ويضحك اله انه روحي هجرها الضحك شضحك منين اتلكاها من بيتي ومرتي لو من امي الربتني لو من حب عمري لو من الجبهه الخلصت شبابي بيها

نهر : مرت ايام على روحة طه ولأول مره مااطلع وراه اذب مي لان امي مسويه حصار علية بقيت بس اشتغل بدون اي حجي واذا اضوج اخذ بت جعفر بحضني جنات والعب وياها لاحظت نوريه متغيره وياها وتضربها وتأذيها مرات مااقبل الها ومرات اكول هي بمثابه امها واكيد تربيها بس زاد الحد كامت تأذيها وهي طفله شمعرفها صح حركه وتصعد وتنزلهم عمرها صار سنه وخمس اشهر وحركة ودمها يلعب بس مو مال هيج تأذيها وزاد الحد من حبلت نوريه كامت حتى متهتم بيها وامي حايره بروحها وبالاملاك حجت الايجارات وكال الوارد مال المطعم ويوميه تكعد ويه علي بس تحاسب على الفلس
وعايفه هاي اليتيمه الضلت بلا اب وام
امها تزوجت بعد اشهر من رجوعها لبيت ابوها مقبل تبقى وراحت ويه رجلها لكربلاء ونست حتى عدها بنيه
واشواق حايره بلتقديم مال الكليات لان كوه طلعت من السادس بعد سنتين رسوب بمعدل تعبان وامي كالت قدمي واني على حظي بطلوني
صارت جنات سلوتي ونستي حرمو علية طلعت الباب
وبيوم كاعده العب بشعر جنات اسويلها ضفاير جان اطب امي
انعام : كومي غسلي ولبسي شى مرتب اكو ناس جايين يشوفوج
نهر : منو ذولة
انعام : مالج دخل واسمعي الكلام
اني هم تعبت من المشاكل والعياط بدلت مثل مطلبت ونزلت سلمت كاعده مره واثنين نسوان وبنيه بعمري بس المره شايفتها وين مااتذكر
بقت امي تمدح بيه وتحير شتكول واني بس صافنه ولعبانه روحي اريد اصعد تعبت
شويه واشرت براسها كومي اييي واخيراً كمت
لليل سمعت هوسه وحجي جوه جان اسمع صوت علي نهر نهر تعالي
نهر : نزلت بخطوات بطيئه ومستغربه صاحني
خير
علي : خطوبتج الاسبوع الجاي
نهر : ابتسمت شنو خطوبتي
انعام : خطبج سعد صديق اخوج واحنا انطيناج
نهر : لطمت على صدري سعد ابو العرك انتم من كل عقلكم
علي : انجبي شبيه شو خير من الله فلوس وسياره وخوش شاب
نهر : كمت ارجف واحجي انت من تعرف شكعد تحجي ملكيت غير سعد اتزوجه وانت تعرف اخلاقه شون واحد طايح حظ وسكير وابو نسوان وشكو شغله موزينه مسويها لو اموت مااقبل
انعام : مو بكيفج خطوبتج الخميس وبعدها بأسبوع العرس اليوم اهله اجوي وانفقنا على كولشي
نهر : كمت اعيط ولكم سعد لو ذابحيني ولا مزوجيني اله هو هذا شنو الساقط اصير مرته لو تنطبك السما على الكاع مااتزوجه واذا جبرتوني اكول لطه على سوايتكم واحرك الاخضر واليابس وروح ابويه وكولو كالت نهر

علي : هاي شتحجي بتج
انعام : بتي ممربايه واريدك تربيها اليه
نهر : ركض علية واني ركض واصعد مثل المخبله اريد بس اسد الباب تقاويت وياه على سد الباب بس ملحكت جان يلزمني من رگبتي حيل وخنكني كولشي مسوى هو طويل وضعيف بس لزمني بكل قبضه ايده على بلعومي ويطبك حيل حيل لحد مزركيت واني ارفس جوه ايده وهو يباوع بعيني شون ازرك وشون اريد هو وباقي حيل يضغط لحد مبدا الهوا يقل بداخلي وحسيت ودعت الدنيا جان يعوفني اريد اجر النفس ماكو وابجي من الخوف ثواني اي ثواني واموت والله ثواني واموت وكمت ابجي اريد اصرخ بس صوتي راح وبقيت بس ادفر بيدي ورجلي بلكاع جان يدنج علية
علي : قبل متلحكين تفتحين حلكج ادفنج بصف ابويه هلمره هددتي وكطعت الهوا شويه عليج المره الجايه متلحكين حتى تحجين وخلي طه عود يطلع يغسل كبرج ويه كبره ابوه

الخطوبه الخميس سمعتي الخميس
هزيت راسي اي بس روح كعدت ابجي هاي تاليتها اتزوج واحد مثل سعد
مر الاسبوع ركض يمكن اسرع اسبوع بحياتي لان يستعجلون موتي واجه سعد اكثر واحد اكرهه انسان عينه حقيره ماعنده شرف سكير حاير بسوالفه الطايح حظها دومه ويه علي وجان ابويه يموت منه وكم مره طرده ومنع علي منه بس ابويه ومات منو بعد يطرده لو تدري يابه هذا العرگجي راح يصير زوج بتك جان گتلت امي وعلي بيوم واحد

تمت الخطوبه واني جثه كاعده لبسوني كوه وكعدوني حتى مكياج مقبلت احط وامي تعض بأصبعها وترجع ليوره واني بس ساكته ومتكدر تضربني حتى لتبين اثار الضرب بس متحلفه اليه ولا هامني احد حتى من راد يلبسني الحلقه مخليته يطخ ايدي اني لبستها جان يتقرب مني
سعد : اموت على خجلج بس تصيرين بحضني اكلج اكل على هذا الخجل اله اكطع هذا اللحم الحلو واكله
يحجي وريحه انفاسه تلعب النفس ردت اتقيأ منه كل شويه اغمض واكول الصبر ياربي كون هذا كابوس وهسه اكعد منه كابوس متإكده وخرت منه ومباوعت بوجهه اصلاً طول الكعده وهمه ناس تهوس وناس تركص واني لو بيدي اشرب من دمهم

بس طلعو صعدت اركض لغرفتي منهاره هذا يلزمني هذا يمتع نفسه بيه من طيح الله حظي اذا صدوك ماابقى هنا بعد لو اعرف انهزم وماابقى وينك طه ولك داموت الحك لاختك بلحظه ضعف وانهيار مني لزمت علاكه وحطيت جم قطعه ملابس بيها
بس وين اولي بهذا الليل واحنا ماعدنا عرف هنا وطة ماكو حتى يحاميلي
بس هم ماابقى وانتظرت لحد ما نامو ونزلت على كيفي علي طلع ويه العريس الخايس يكملون سهرتهم ويه النسوان الي امثالهم وامي نايمه تعبت من النفاق والفخفخه الجذابه ونوريه اخذت جنات وصعدت وسلام اصلاً ملافي بلبيت هو والماكو سوه نزلت على كيف وجان تشوفني اشواق وعاطت دفعتها حيل وركضت للشارع مثل المخبله
مشفت نفسي غير بلركن وجان يوكفني وهو متفاجأ وفاتح عينه
وين رايحه نهر باوعت علية  احجي وابجي  كله منك كله منك هذا حالي سامي شفت

يتبع ...