رواية ابي والغزلان الفصل التاسع والستون 69 - بقلم ريام هادي

ملاحظة / اولاً شكراً من قلبي على تعليقاتكم وتصويتكم للقصه فعلاً يسعدني وحماسكم يًـجّـِ😍ـُننٌٓ مثلكم
وثانياً بسبب طول البارت يسبب مشاكل بلتحميل وماكو بارت مااختم بنهايته كلمة يتبع حتى البارت السابق موجوده كلمة يتبع لكن اغلبكم مطلع عدكم والصراحه مااعرف السبب المهم البارت نهايته كلمة يتبع 😊
احـٍُــبٌــ💘ـٍَــْگُِم
ابي والغزلان الجزء الثاني
للكاتبة Reem
البارت العشرون

نويـت إنســـاه 💔
بــس حيـره  #‏شينسينـي  ؟؟؟؟
وهــو  بكـــل جفــن نعسـان
طــيــف مچـودر  بعينـــي...

سجاد : الووو
سليل : مو كال الووو لا كال هااج روحج ردت الج
مباشره وكعت السجينه من ايدي باوعت على ريم وتأشر براسها جاوبي
سجاد : الوو نهر تسمعيني
نزلت دموعي مباشره اااااااه ياسجاد شكد مشتاقه لصوتك اااااااه ياروحي الرجفت من سمعت انفاسك وخرت ودفعت التلفون من اذني وريم بعدها لازمته وجان اطب ماما نهر
نهر : هاااي بعدج ممكمله يمه اسم الله شبيج تبجين
ريم : هاكم اني معليه وشمرت التلفون لعمه وطفرت ركض فوك

نهر : الوو
سجاد : مو داصيح مسمعيني
نهر : منو سجاد
سجاد : لا ابوه المرحوم
نهر : مداصدك هاي انت ولك ليش هيج هانت عليك العشره يبن خالي هاي تاليها ادير وجهك وتروح لاتكول ماتو احتركو صار عليهم شى ولك ماغز الدم الي بينا ابقى بنت عمتك ودوم تكول انتي اختي خوش اخت عفتها ولا بيوم فكرت تسأل عنها عوف الدم ماغزرت الخبزه الجمعتنا الضيم القهره ماتتذكرنا بضحكه بسالفه بكعده لهاي الدرجه ميغزر كلشي بيك
سجاد : كملتي عتاب
نهر : شكمل لو اضل الباجر مااخلص اعتاب لك كاتلين امك ابوك ادير وجهك وتسافر تلفون متشيل وتكول خلي اشوفهم عدلين لا وشفت الاوضاع بلعراق من خرب غيرتك اذا عندك غيره

سليل : ابجي بهدوء واكفه وظهري على الكاونتر كوه رجليه حاملتني والله حيل مابيه اجر النفس كووه ودكات گلبي سريعه لدرجه اني واكفه بس احس روحي عبالك اركض
نهر : اباوع على سليل كل شويه تمسح وجهه وعيونها بردن ملابسها
سجاد : هسه اني خابرت اريد اسألج شى وبعدين نتخابر واكعدي عاتبي تره كلش صحتي تعبانه

نهر : ليش اسم الله شصار
سجاد : شويه ضغطي صاعد
نهر : ماكو احد يمك تقصدت اسأل ردت اشوف اتزوج شى اباوع على سليل عيوونها تكولي ماما  سألي بس متكدر تنطقها بنتي واعرفها
يعني متزوجت ولو اكيد تزوجت حضره جنابك واله منو ياخذك هاي السنين منه ويجوز جهالك بطولك
سجاد : اي عندي ١٥ واحد اكبرهم لطول مني بمتر هاي شبيج نهر هو اني مال زواج بربج
نهر : هاااي يعني متزوجت بعدك الاعزب الكبير
سليل : ااااخ ياگلبي فوك نبضاته المتخربطه اجت هاي الكلمة خربطته بلزايد ممتزوج بعده دنجت ابجي بلزايد واكتم صوت شهكاتي
سجاد : ارجع لسؤالي دكيت عليج علمود
نهر : انت ليش خابرت على تلفون سليل ماعندك رقمي
سجاد : هااا هذا تلفون سليل
نهر : اي
سجاد : مااعرف اخذته من ريم وهي يمج
نهر : اي سكت شويه وكال

سجاد : وخري منها اطلعي بره روحي لمكان مابيه احد اريد اسألج شى
نهر : مااشي سويت نفسي طلعت ورجعت مردت اعوفها اباوع عليها سوده بوجهك سجاد شمسوي بيها تشهك من البجي مردت اطلع واعوفها بنارها
احجي خير فوك ماعايفنا سنين جاي يسأل ويروح
سجاد : نتخابر غير وقت وسولفي الي تردي
مااحلفج بأحد بس اذا عندي معزه ولو شويه احجي الصدك
نهر : من شوكت اني كاذبه احجي خير والله انلوت بطني من وراك شبيك
سجاد : سليل اتزوجت انخطبت
نهر : بله هسه انت وره ٤ سنوات تسألني سليل انخطبت لو تزوجت انت صاحي بربك صاحي جان يعيط
سجاد : دخيل ربج التحلفين بيه احجي ولتشلعين گلبي
نهر : لتعيط شجاك تخبلت
نفخر بضوجه وحجه بهدوء سليل تزوجت

سكتت وباوعت عليها
سجاد : احجي نهر
نهر : مثل معفتها ترجع تلكاها لا والله مو مثل معفتها جانت ورده مفتحه كدامي هسه ذابله لتخاف يبن خالي سليل لا تزوجت ولا انخطبت ولا حبت ولا احد دخل حياتها مثل ماهيه تخرجت وكعدت بلبيت وبعدين محسن الله ينطي العافيه لكه تعيين الها وهسه تروح تروح وتجي بدربها مالها دخل بأحد انت تعرفها من هي وصغيره حتى صديقات ماعدها يمكن هسه بلدوام تعرفت على كم وحده بس من باب الشغل ونسوان كبار وتعرف سليل واخلاقها دومها ثكيله ومؤدبه
سجاد : وسيف محاول يرجع الها
نهر : فدوه اروحلك سجاد بطل هذا الهوس تره لو تريده مجان عافته وحسب مسمعنا من رشا الولد خطب والله يسهل اله لاتضل كل شويه تسأل اسألة مابيها معنى
اذا مخابر حتى تستفر من هذا الشى جاوبتك وروح ابويه واخويه ماكذبت بحرف
جر نفس قووي وسكت
نهر : متكولي شبيك الله مسودنك من دون خلك الله تشك بأصابيعك اني كلت وره هاي السنين راح تعقل وتتغير ثاري ابو طبع مايغير طبعه غير الجفن اسم الله عليك
سجاد : هي ضلت اسم الله تردين اموت
نهر : هو هاي انت تفتهم الموضوع من ذيله عاف كلشي وجلب بلجفن
سجاد : اروح ونتخابر غير وكت

نهر : لا بالله وين فالت
سجاد : تعبااان اريد انام صار ٥ ايام بس الله يعرف شصار بيه
نهر : خير ياستار
سجاد : روحي لبنت اخوج الرعنه الي بس اشوفها مااتسمى سجاد اذا مااشرب من دمها على دكتها الدونيه
نهر : من هيه

سجاد : ريم كليلها ولج تربات ايديه وتلعبين عليه اني الها
نهر : مبين مسويه دكه بيك
سجاد : دكه الناقص ميسويها بعيني وين اطير اذا مااطلع الخمس ايام الشفت الموت بيها من عيوونها
نهر : هسه غير يفهمني شسوت
سجاد : بعدين نهر خلي ارتاح واخابرج اخذي الرقم من هذا التلفون ودكي عود عليه حتى احجز رقمج
نهر : مااشي الله وياك
سليل : سده وكعدت بلكاع وايدي على وجهي اشهك حتى مكال سلميلي عليها انطيني احجي وياها
نهر : كومي يمه فدووه اروحلج
سليل : شيريد هاااا ليش يسأل اتصخمت ولا تعزيت هو بشنو هامه هذا الموضوع مو صار ٤ سنين بعيد شذكره

نهر : والله يابنتي الخبر يم ريم البله لان هو متحلف الها وصاير نار مدري شمسويه كومي شوفي شصار وشمسويه المخبله واني اكمل ثرم العروك لان ابوج جوعان ومن اكمل العشا ماالته اصعدلجن كومي يروح فدووه هو وعشيرته لكل دمعه نزلتيها عليه المصخم صار ٤ سنين غايب وتالي يعيط
والله مو صاحي هلرجال
سليل : كمت غسلت وجهي وصعدت بس احس حيلي مهدود مدري من اشتياقي اله مدري لان سمعت صوته ومكدرت احجي
دفعت الباب وطبيت وينها اباوع غزل تأشر
ورن البرده خاتله
رحت وخرت البرده جان تطفر
ريم : والله ممسويه شى جنت اتشاقه

سليل : هسه ليش تكمزين مثل القرد غير افتهم شنو الشقه الي يخلي سجاد يعيط على عمه شسويتي
ريم : ماسويت شى بس هو ميتحمل شقه
سليل : شوو تعالي اكعدي خلي افهم صاعده فوك الجربايه وشطولج مو حتى عيب شكبرج تصيرين
ريم : عيني ابقى هنا منطقه الامان يصير شى كرندايزر انطلق وافلت ولج خوثه كومي افتحي الباب حتى افلت
غزل : هااا وين لسانج هسه خايفه
سليل : انداريت على غزل غزوله احجي انتي
ريم : بنت ابوها التحجي شايفه الشوايه مال السمج البره احطج بيه واشويج بلتنور
غزل : شفتي ماما تهددني
سليل : مالج دخل بيها هاي بوخه بس تهدد احجي
ريم : اكطعج بعرضي بس تحجين
غزل : كتله وفايته
ريم : هاج ساكته كل الوكت وصارت لسان براسي ام نص لسان اذا حجيتي شارع ابو مهدي ابو الحصه كله نگر ابلط الشارع براسج
غزل : شوفي والله اخاف منها انتي لو شايفه شسوت لعمو
سليل : غير تحجن حتى افتهم مو گلبي ورمتو
غزل : كالت لعمو انت متزوجه ومخلفه وابنج يشبها وعايشه بعد بيتين عنه ورجلج يحبج ومرتاحه وياه

ريم : اصخام بوجهج خلي الزمج اله اسويج نعال بابا المكطوع يم الحمام 
غزل : ماطول هيج واله احجي بعد وهااا بقته ٥ ايام يله بلغته بلجذبه 
سليل : باوعت عليها كتلها ليش هيج
ريم : اشاقه
سليل : عطت ليش هيج سويتي جان تكعد على طرف الجربايه وتحجي بهدوء

ريم : ردت اخذ حقج منه ليش يأذيج ليش يبجيج ليش عافج كل هاي السنين اني كل يوم من اشوفج ذبلانه والضحكه من وره گلبج اموت قهر مرات اتقصد اسوي شى ينرفزج او يضحكج حتى بس تكعدين ويانه وتسولفين وتعيطين وتضحكين ردت اعيشه ولو كم يوم احساس الواحد يخسر الي يحبه ويعيش بدونه ويكمل حياته ردت اكسر الثقه والغرور الي هو بيها لان جان متأكد ممتزوجه بس خابر حتى يستفسر ومن كتله تزوجت حسيت كلشي جان يحسه انكسر وعيشته ولو ايام الفقد الي انتي عايشته من سنين ودوم تفكرين تزوج خلف صار عليه شى ردت اشربه من نفس الكاس الصار ٤ سنوات يشربج منه

سليل : تقربت منها وهي غطت وجهه عبالها راح اضربها
ريم : العباس عليج لتضربين وغطيت وجهي كلت راح تكطعني
سليل : جان احضنها وابجي وهي بهتت
ريم : شبيج سليل فدووه لتبجين العفو والله مو قصدي اقهرج ردت بس يحس بلي سوااه

سليل : ماابجي على السويتي ابجي على حنيتج لان متقبلين احد يأذي خواتج حتى لو هذا الواحد تعتبري اخوج الجبير وعمج
ريم : انتي روحي وامي شحده الي يقهرج ماافوت حقج والله بس لو باقيه شهر جان خليت بيه شلل رباعي جان اقلها الواحد ماخذ حق ٤ سنوات
سليل : كفختها واني حاضنتها وهي ضحكه وهي بجيه
ريم : هاي شبيج جان كتله تحب رجلها وتموت عليه واسمعه صوت اموري ابن جنات على اساس هو ابنج جان شبعت ضحك بشرفي وتونست ضايجين وين انولي
سليل : هههههه والله متحلف الج
ريم : يمعوده هو خلي يجي وراها سهله ادكله اليتيمه وابجيلي جم دمعه واسوي نفسي خربت وكعت من طولي يسامحني مالج دخل هاي الافلام عندي
سليل : والله وحيات عينج الشيطان يحط رجل على رجل ويتعلم منج
غزل : اي والله عقلها يخوف

ريم : انتي دعسوقه ام نص لسان حسابج بعدين لا عبالج فلتي
سليل : عوفيها بداعتي هسه اني مو عفتج
ريم : يله هاي لخاطرج
غزل : هههههه همزين فلتت منها
ريم :تعرفين بيه اطلعها بغير شغله
غزل : لا ريمو الله عليج العفو
ريم : الله والله حلو قبل شويه اني اتوسل وهسه يتوسلون بيه شلون شعور حلوو

سليل : خلي انزل لماما عفتها وحدها
ريم : هسه وره هذا الفلم كله والطحن وناس نامت بلفراش والامن القوي تهدد والامريكان راح يجددون الاشتباك شصار شكلج
سليل : كلشي ماكو حتى سلام مسلم
ريم : ضربت كصتي امده حظي اي والله هذا عمو من ياطينه مصنوع اااخ
سليل : هذا عمج تعرفي بعد
ريم : اذا رجع للعراق نفرض طبعاً راح ترجعين اله
سليل : شلون يعني
ريم : يعني راح تحاولين تصلحين الصار
سليل : خلي يجي وسهله
ريم : بس لو مره هذا گلبج تقسي جان احنا بخير عفيه گلب شكد حنين وفطير
سليل : بس كثر الضربات تقسي
ريم : هلا هلا شناوي الله عليج
سليل : ناويه اروح اكمل العشا ويه ماما
ريم : والله مايصيرلج جاره لو يحضر الحمزه
سليل : يله امشي ساعديني وكعدي جنات خلي تنزل تتعشى نامت من المغرب
ريم : اريد لفتين اترسوهمً كباب وطماطه وخضره وطرشي وكلاص جاي بداعت ابوج ميته جوع
سليل : شفتج وشفتيني جوعانه
ريم : ااخ يلاكل اكو اطيب منه ياحب يابطيخ
سليل : يله لتتأخرون

نزلت وكملت كلشي ويه ماما بعد محجيت الها وهم استلمت ريم رزلتها بس ريم ردت فعلها الوحيد مدنجه على اللفه وتاكل ولا شالت راسها لحد مكالت فدووه عمه شويه ملح الكباب فاهي من شافتها هيج سكتت اصفن على تصرف ريم الي خلاني ابجي من حنيه اختي عليه وبنفس الوقت انصدم من تصرف سجاد لان مبين اتمرض من عرف بيه متزوجه اذا هيج يحبني ليش هيج يتصرف ويايه ليش دار وجهه ورجع وره سنين
بس كملت شغلي ردت اكعد وافكر صعدت لمكاني المعتاد وبعز شهر ١٢ وبارده حييل ادور على الهوا ردت استجمع قوتي وخاصه صوته لهسه يرن بأذني

بيدي التلفون واباوع على رقمه يعني هسه اذا ادك هو يطلع جريت نفس ااااااه ياسجاد الروح مشتاقه الك لدرجه تبجي عليك حتى بدون ماانزل دمعه أذيتني حييل حيل ظلمتني ومااعرف شنو تاليها وياك
بقيت للفجر صليت ونمت
وثاني يوم سبت كملت شغلي وبالي كله يمه اااخ شسويه بيه اتصاله هسه هو شيريد عرف ممتزوجه زين وبعدين
ريم : لتفكرين يرجع
سليل : هااا
ريم : خمس مرات كنستي الهول لحد ما الزوليه تصيح ابوس ايدج والله نظفت
سليل : منتبهت
ريم : لان بالج يم عمو الوحش
سليل : حييل بعدج تتذكرين
ريم : ليش هو ينسي هذا اللقب جنت من اشوفه واضحك وياه واشوفه حباب اكول بس لو اعرف ليش سليل تصيحه عمو الوحش
سليل : ملاحظة كمتي تكوليل سليل مو ثلل
ريم : غير كبرنا عيب بعد

سليل : والله ولا كبرتي وبعدج مخبله ونص عقل ودكاتج ماتتسولف
ريم : اممم اظلموني بعد الله يسامحكم خلي اخابر ريه اشوفها شلونها يوميه كاعده الصبح  تلعب نفسها تكول حامل بعشره مو واحد
سليل : خطيه متتحمل تعبت
ريم : بعدنا بسم الله ماكلنا حلال يمعوده بالاشهر الاولى الها يارب تطلع بنيه عليه تخبل ونازكه واموره وفقيره ومؤدبه
سليل : اوكفي هاي على منو تحجين
ريم : عليه شنو عندج شك
سليل : لا يابوي وبعد اكثر انتي
ريم : اي عفيه جري عدل تره ادك وياج مثل عمو واخليج شهر متنامين
سليل : قابل شتكولين غير عايشة وياج
ريم : اشوفلي لعبه لحظة هذا سحليه يدك عليه
سليل : جم مره رزلج على كلمة سحليه
ريم : هلوو سحولي
حسين : وتالي وياج متوبين
ريم : لا مااتوب لان احب اصيحلك هيج يله شتريد
حسين : اني جايكم محتاجه شى
ريم : الله عليك هذا سؤال تسأله اكيد محتاجه جيب بيتزا الحجم العائلي وياه لفه همبركر

حسين : لو ممخابر احسن
ريم : هاي مشكلتك ويله لتتأخر ورانا مراجعه للطبيب
حسين : بس لو افهم شوكت نخلص منه مو راح يصير سنتين تعالجين يمه
ريم : لتتأخر سحولي يله باي وسديته
سليل : مو مسويين غدا المن مخسره الولد
ريم : منو كله يخابر ويسأل
سليل : غير من باب الادب واللباقه
ريم : هلوو لباقه حلووه حبيتها ومن باب اللباقه يااختي الجبيره ميجي وايده فارغه
سليل : شكد جوعيه ياربي
ريم : تغارون مني لان اكل ومااسمن اكوم البس الشال اخاف يجي ابو عضلات
سليل : ديتمرن بلقاعه صاير جسمه رياضي
ريم : خلي يطير ضربه مني ارجعه بحضن بيبيته
سليل : صدك شخبارها
ريم : مريضة كل شويه يم طبيب والمصيبه مدتموت يمكن راح تعيش بكد فرعون
سليل : اكول هدوء ومالها حس
ريم : خليها راسنا بارد منها
صعدت كملت شغلاتي وسمعت الهورن ونزلت اركض
وطلعت فتحت باب السياره وكعدت
وين الاكل مالتي
حسين : ليوره تاكلين هسه
ريم : لا من نرجع من الطبيب يصير بيه ريحه اكل
حسين : واذا صار شكوو بيها ماكله عادي لو اله يشتم ريحتج وتعالي شصار هلكد حاطه عطر
ريم : لعد اطلع جايفه غير اسبح واتعطر واطلع
حسين : المن للطبيب
ريم : الي الي لنفسي سمعتني يعني اله اتعطر لاحد شنو هذا العقل وتعال كولي استاذ حسين اخاف اكول سحليه وتعيط
حسين : حتى اركع راسج بلستيرن
ريم : مااجاوبك واتجاوز هاي النقطه واكمل كلامي انت مو غاسل روحك بلعطر
حسين : اني وحد رجال
ريم : اي والمره لازم تطلع بريحه جايفه يله تعجب موو
حسين : اعرف مااحصل منج لا حق ولا باطل
ريم : عفيه لهذا استعجل لا وداعت بابا انزل هسه للبيت اسبح بلعطر واطلع
حسين : كاافي يله وشخط السياره وصلنا للطبيب ومثل كل مره يتنرفز من نروح اله

حسين : دكتور متلاحظ علاجك طول
سامر : اخ حسين البهاق من الحالات الي يصعب علاجها اصلاً بلسنين السابقه كانت مستحيله وهسه بتطور العلم نحاول نلكي حل جذري الها والعلاج ماشي على خطوات ثابته
حسين : وتبقى العمر كله تتعالج
سامر : اكيد لا بس لاحظت تقدم بلعلاج
حسين : انريد مده زمنيه تكول انتهى بعد ميحتاج تجين
سامر : حالياً مااكولها لان شفت بعينك بعد بيها
ريم : عادي دكتور اكو هواي صغار اختفو وهذا الشى شجعني بس اكو كبار على حطتهم
سامر : ان شاء الله نحاول مره ومرتين لحد متكونين راضية عن النتائج
ريم : ان شاء الله شكراً دكتور تعبتك
سامر : تعبج راحه وهاي عصاره خبط استخدميها

ريم : ان شاء الله شكراً
طلعنا وحسين انكلبت خلقته تعبتي شكوو جان يسويلج عمليه
ريم : تره كلمة وتنكال من باب الامتنان
حسين : بطلي هاي الخفيه ويااه
ريم : هاي اكثر من مره تكولها اليه تره والقران مره ثانيه اذا انعادت يا حسين مااجي وياج للطبيب افهمت
حسين : شبيج هيج ترجفين حسره اجيب طاري
ريم : استغفر الله هاي شبيك انت صدك تحجي اكله هو طبيب واني مريضة عنده ليش عقلك هيج قافل
حسين : اي كوليلها مخبل

ريم : والله اني مخبله اذا جيت وياك بعد كل منطلع منه نتعارك
يله رجعني للبيت ومن اليوم مالك دخل بروحه الطبيب شكراً تعبناك هااا لا مااكولها طلعت هاي الحجايه عيب تنكال
وصلنا وطول الطريق هدوء بس هو ينفخ وكل شويه فاتح الجامه يتنفس هوا بارد ويسدها على النص
لحد موصلنا وركعت الباب ونزلت سريع وهو راح
سليل : هااا شبيج عصبيه
ريم : هذا ابن عمج حاط عقله ويه الطبيب موتني
سليل : ليش شبيهه
ريم : وبديت احجي كلشي لسليل
سليل : عرفت من كلام ريم وتصرفات حسين مبين يحبها ويغار عليها بس هي مفاهمه عليه شويه واندكت الباب وطلعت هي
ريم : رحت افتح الباب وشفته واكف وبيده الاكل
حسين : نسيتيهم
ريم : مااريد خليهم الك
حسين : شوفي شلون مسويها البيتزا تارسها جبن وكص
ريم : اباوع واحس عصافير بطن كامن يسبن بيه
ماريد
حسين : بكيفج واني جبت الج ويه لفات الهمبركر فنكر والصلصه مالته الخصوص المطعم الي تحبي
ريم : جريت الاكل منه يله شكراً روح مااحجي وياك

حسين : صدك لو كالو عند البطون تعمى العيون
ريم : روح مااحجي وياك زاعلتك
فتح الباب وطب وكعد على المرجوحه الصغيره الموجوده بلحديقه
تعاالي اكعدي بصفي
ريم : رحت دخلت للمطبخ حطيت الاكل على الكاونتر وفتحت الثلاجه طلعت قوطيه ببسي بارده
هااك
حسين : هيج بدون كلاص
ريم : لتسوي نفسك خطار كل وكت تجينا
حسين : شكراً بس لتتعصبين تعالي اكعدي
كعدت بصفه وهو يشرب وكملها بسرعه وشمرها على السطل مال الزبل اجت بنصه
ورجع راسه ليوره
انتي ليش تزعلين بسرعه مني
ريم : لان تضوجني بكلامك عبالك اتقصد اتحارش بلطبيب رغم والله ماعندي شى بس انت متغير صاير بس تتأمر وتتعارك وتعرف بيه اتخبل اذا واحد سوه هيج ويااي
حسين : ريم 
ريم : هااااا
حسين : اني احبج
ريم : اني هم احبك والله وتعرف و جان يقاطعني
حسين : افهمتي شنو اقصد
ريم : هنا انتبهت هااا
حسين : اني احبج مو حب الي بالج اني اعشقج روحي بيك انام واكعد واروح واجي وانتي بالي
ريم : جمدت واباوع بوجهه بس ارمش من الصدمه

حسين : من انتي وصغيره واصيحلج ريمتي
لان دوم جنت اشوفج مالتي الي وبس لهذا اكثر الاوقات اصيحلج ريمتي
لان انتي مالتي صغير وراهقت وكبرت وبس انتي بگلبي حتى من سافرت واشكال البنات بحياه المراهقه من جنت اصفن روحي تلوب عليج ريم اني احبج لدرجه مااشوف بنيه غيرج واغار عليج وبلذات من ترحين للطبيب ويلمس بشرتي والله احس مو يلمس بشرتج يكطع من روحي اصير نار مرات اتخيل روحي مابقى شى واضربه اخرب وجهه وانعل ابوه لا ابو اليطلع وراه
ريم : بلعت ريك واريد استوعب الي يحجي حسين هذا شديكول يحبني واني

حسين : ليش ساكته اني حاولت جم مره المح الج اريد اعالج حايره بالاكل والتكمز والكليه والدوام والضحك والمقالب ردت بس مره تصفنين بينج وبين نفسج وتحسين بيه ماكو اليوم بعد مابيها مجال من كلتي ترحين للطبيب ويه غيري تخبلت وجم مره كتلج خلي نغيره ومتقبلين وجارعه على اعصابي وهسه تردين ترحين اله بدون غير ارتكب جريمه بيج وبيه
ريم : انت بيك شى شارب شى

حسين : شفتي هاي سوالفج الي تخليني اتردد كل مره اعترف الج حطي بالج اني احبج واريدج مرتي حبيبتي ام جهالي ولو شلون راح يطلعون وانتي امهم شياطين والكعبه بس يله اتحمل لعيونج
ريم :حسيت بألم بصدري وخوف من شى جنت دوم اخاف منه واتجاهله دنجت واغمض وافتح بعيوني
حسين : بيج شى ريمتي
ريم : ليش اني
حسين : شنو ليش انتي
ريم : ليش اني حبيتني
حسين : اني مو هسه حبيتج من احنا وصغار احبج
ريم : بس هذا غلط واني معتبرتك

حسين : اياج تكولين اخويه لان مااقبلها منج انتي مو اختي ولا راح تصيرين بيوم اختي انتي بنت عمي وحبيبتي وصديقتي ودلوعتي وريمتي الي انام واكعد احلم بليوم التصير مرتي بيها
ريم : مد ايده يلزم ايدي جريتها
لتلزم ايدي شتلزم شووف وطلعت ايدي مديتها شحبيت هااا شووف البكع الي بيدي ومثلها برجلي وبطني وبركبتي انت شايفها شلون راح تتزوج وحده مبكعه
حسين : اشش شنو هذا الحجي
ريم : انت تتوقع امك تقبل لو بيبتك لو ابوك
حسين : محد يهمني
ريم : لا يهموك وفوكاها بنت طه يعني من سابع المستحيلات يقبلون
حسين : اني اقنعهم بس اصبريلي فتره اكمل اموري واجي اخطبج
ريم : نزلت من المرجوحه وكفت گباله صرت اعصاب واحجي بصوت عالي ياخطوبه من كل عقلك اني وياك منتراهم
حسين : ليش متحبيني

ريم : نبض گلبي حييل وسكتت اني شنو احس اتجاهه معقوله احبه
حسين : لتسكتين ريم احجي عيطي خلي اسمعج تحبيني لو لا
ريم : كمت اروح واجي بلحديقه مااعرف شحجي بس مرتبكه واعصاب
انت تعرف اذا اهلك عرفو شواح يصير تعرف اني مااناسبك بكلشي شوفي شوف حالي انت وين واني وين
كام من المرجوحه واجه گبالي
شبيج تخبلين احلى البنات انتي
ريم : منين احلى البنات من البكع الي بيه شوفني صار سنتين اتعالج وهسه يله كم وحده راحت والباقي موجود حتى متغير لونه متلعب روحك مني هاي البنات اشكال والوان احلى مني شفت مني وحبيتني

حسين : انتي بعيني احلى البنات وتره انتي حيل مكبره الموضوع والله انتي تخبلين وهذا الشى ممأثر عليج بلعكس زايدج جمال بعيني
ريم : لعد انت اعمى وارجع البس مناظر عفته وجان يجرني حييل
حسين : وين متفلتين سمعي يابت طه يابت عمي ياريمتي انتي اليه بهوستج بخبالج بوكاحتج بكعج على كولتج اليه بس الاريده منج هلفتره اتصبرين واجي اخطبج
ريم : متحملت كلامه اول مره احس احد يشوفني احلى البنات واحد يحبني ومنو حسين عفته ودخلت صعدت بسرعه حتى سليل صاحتني مجاوبت واول مدخلت شمرت نفسي على الجربايه وابجي
غزل : شبيج ريموو
ريم : مابيه عوفيني

غزل : اذا تردين شى صيحيني رايحه يم جنات العب ويه اموري
سليل : طبيت للغرفه وشفت ريم حاطه المخده فوك راسها وخرتها
هااا شبيج
ريم : كمت على حيلي سليل هذا الخبل يحبني
سليل : ههههههه مبين ليش مستغربه
ريم : شلون يحبني
سليل : مثل الناس واحد وحب وحده شنو الغريب
ريم : مو اني
سليل : ليش شبيج شنو ناقصج حلووه وبت عائله ومتعلمه صّـْْ(☑)ـْْحّ لسان وكحه بس دمج عسل والكل يحبج
ريم : بس حسين
سليل : شبيه
ريم : اني اعتبره اخويه
سليل : متأكده ريم سألتج متأكده
ريم : ماادري والله ماادري

سليل : زين احجيلي وخلي افهم اني شفتج تعيطين همزين ماما نايمه مسمعت شى ومطلعت كلت خلي اشوف شخبلج
وبدت تحجي بحركة گلب واني مبتسمه
ريم : شبيج تضحكين تكول واحد يعرض الها مسرحيه مال عادل امام
سليل : والله وريم راح توكع بلحب
ريم : مااريد لا احب ولا ابجي ولا اصير مثلج
غابت ضحكتها لسليل وتقربت منها ولزمت ايدها
تره والله مو قصدي اني قصدي مااريد اتعذب مثلج
سليل : مو كل الناس سجاد هذا يختلف وضع حسين غير وضع سجاد
وانتي مو سليل كلمن وطبعه وحياته وشفتي رشا  الْحٍمَدٍ للـّہ اخذت عن حب وشعلان يحبها ومراعي الله بيها وحتى هي شلون مداريته وحياتهم حلووه
ريم : هذا يريد يتزوجني
سليل : لعد يفلسج على الباگلا اكيد يتزوجج
ريم : وشكلي وضعي
سليل : عوفح من البهاق انتي شايفه حالج شو تخبلين طول وجسم ورشاقه والشعر يجنن ومعانيج نازكه
ريم : بس مبكعه
سليل : كل حلوو بيه لوله
ريم : اني اللوله نفسها
سليل : لتكبرين الموضوع القاضي راضي حسين وقابل وحابج كما انت المن بعد شايله هم ريمو حبيبتي متلكين واحد يحبج مثل حسين ويتحمل هوستج غيره كافي متربين سوه
ريم : واهله
سليل : هو رجال ويحير بوضعه
ريم : اختنكت
سليل : هههههه اصعدي بلسطح بلخير عليج
ريم : والله مااسوي سوايتج ابد صدك نسيت البيتزا
سليل : والله انتي مو مال حب هذا الولد انظلم لان حب وحده بس تفكر بطنها
ريم : اروح اكل وبعدين افكر
رغم خوف سليل ونصايحها بس اني مرعوبه بشى اسمه ارتباط وحب لان اني احس بيه نقص بيه خلل اختلف عن اقراني شكد مااحاول اتلافه هذا الشى يبقى داخلي يصرخ ويكول لتخدعين نفسج انتي مشوهه
افكر اذا تزوجته شلون يشوف جسمي شلون يتلمسه اذا اني من اشوفه اموت قهر اكيد هو تلعب نفسه الي مثلي محد يحس بيهم وميعرف حجم المعاناه الي يحسوها وكميه الالم الي يعيشوها من ينظرون الناس شلون تشمأز منهم مااريد اشوفها بعين حسين مااتحمل والله

بقى ايام ميجي للبيت وراها بأسبوع اشتاقيت اله متعلمه عليه من يوم مكال احبج واني تفكيري زاد بيه حتى تصرفاته الجنت انتقده بيهم كمت افكر بيهم
وبعدها اجه ونزلت لكيته كاعد ويه عمه بلحديقه
حسين : شلونج ريمتي متسلمين
نهر : شبيج ماما
ريم : مابيه عمه سلامتج
نهر : اروح اجيب طماطه من راس الشارع خلصنا مااتأخر ومااكلج شتردين هسه اتكتبين ورقه اشكال بيها
ريم : لا مااريد
نهر : ياااا لازم الدنيا انگلبت ريم متريد
حسين : اني جايب الها عمه ليضل بالج
نهر : خوش يمه ما اتأخر

ريم : كعدت على حافه الحديقه ومديت ايدي وجبت عوده من زرعه صغيره والعب بلطين وهو بلمرجوحه يباوع عليه
حسين : شبيهه ريمتي
ريم : مجاوبت بقيت ساكته كاام واجه كعد بصفي وطخني برجليه
حسين : الهدوء ميلوك الج والله وين هوستج
ريم : ليش صار اسبوع ماكو
حسين : اشتاقيتيلي
ريم : لا
حسين : ههههه والله اشتاقيتي
ريم : حتى متصلت
حسين : ردت اعوفج تفكرين
ريم : بشنو
حسين : بأسعار الذهب والدولار والبورصه
ريم : ههه متضحك
حسين : لتعبين نفسج وتجيبيها منا وتحطيها منها جان يجر العوده الصغيره من ايده وكتب
ريم لحسين وحسين لريم
ريم : باوعت عليه واهلك
حسين : اني اقنعهم انتي بس فكج من سالفه اخويه وابن عمي
ريم : لعد شنو انت ابني
حسين : حبيبك وزوجج بلقريب العاجل
ريم : لا بالله ضربني حيل برجلي
حسين : ولج مو بعينج
ريم : لا بخشمي
حسين : ريييم
ريم : نعمت صوتي وكتله ينعم
حسين : اموت عليج
ريم : هو كال هيج لو روحي ساحت وجان اكمز هلمره كالها وتقرب مني خرب والله كلت شويه ويبوسني
حسين : وين رايحه
ريم : اجيبلك شى تشربه
حسين : تعالي جبانه ماابوسج من نتزوج عود اشبعج بوس
ريم : والله متستحي
حسين : هااي منو تخجل لا لا ماعرفتج خوش لعد اذا مااطلع القضى والمضى عليج ياريم
ريم : شسوي
حسين : بس الزمج اشبعج بوس
ريم : والله اذا حجيت هيج اله اكول لابويه عليك
حسين : ههههههههه عرفت نقطه ضعفج اليوم وغداً ياريم
ريم : خلي يولن ياحمزه

حسين : اااااخ اموت عليج  لج ريمتتتي اعشقج والله
ريم : فضحتنا امشي جوه
ومن يومها بدت علاقتي بيه وكمت مااشوفه لا اخويه ولا من هاي السوالف التعبانه يمكن عندي مشاعر اتجاهه ومكنت ادري بيها كمنا نسهر الليل كله سوالف وضحك بس انهزم للسطح وخطيه سليل من تشوفني اسولف تنزل
وبإيام الدوام كام يوديني ويجيبني
رغم شك زينه اكو علاقه بيني وبين حسين بس اني طبعي ما أمن بصديقه لهذا سكتت وكل متسألني اكول الها ابن عمي وبس

مرت الاشهر والتهيت بين دراسه وحسين وبلنسبه لرشاوي زينه والطبيب مراقب وضعها رغم تعبها بلحمل وهذا شعلان يحير شيجيب الها وهند نوعاً ما كفت منها شتريد بعد ماكو حجه
وسليل ااااخ هاي وحدها قصه بقت تنتظر على امل يتصل او يصير تغيير كل الي صار يتخابر ويه بابا ويسلم لو ويه عمو ويروح ولا مره اتصل عليها وهي أيست منه وحتى اني أيست اني يصير شى بينهم او على الاقل يرجع للعراق وخلصت ايامها مثل الفاتت دوام وبيت وجنات حايره بأمير واكثر الاوقات بلغرفه

اليوم استلمت النتيجه سنه ٢٠١٠ شهر السادس تخرجت واخيراً وسليل جابت كيكه وكالت نحتفل اول مره نحتفل بتخرج وحده من عدنا رغم سليل قبلي تخرجت ورشا بس من الضوجه كلنا نغير جو
وعمو محسن جاب الدنبك ويدك ويركص طبعاً عمو محسن خلص اغلب وقته ويه بابا بلمطعم وزوجته تروح وتجي بين العراق والسويد لان ابنها هناك ومشفناها بس مرتين او ثلاثه يعني مرات معدوده على الاصابع حبابه ومجامله بس اكيد مو مثل عمو محسن الي صار واحد من افراد البيت
محسن : واخيراً العوبه نجحت وتخرجت خرب مستقبل العراق اذا انتي من الخريجين مالته
ريم : تغار مني لان اعرف كلشي بلحاسبه وانت متعرف ذاك اليوم كتله دوس كوبي داس دليت
محسن : شمدريني اذا انتي تعوجين حلكج بالانكليزي كولي حذف بلعربي الا تعوجين حلكج
ريم : غير لازم انكليزي ياعمو
محسن : انهجم بيت الباميه شكد تنفخ انكليزي ام الوعث انتي اصلاً ناصبه عليه وعلى القصد تسووين هيج
حجي طه : حيل بيك هو انت مال حاسبه هي عيونك وينها
محسن : انت بس اطلع منها وحير بلفلافل والكص مالتك وعوفني اطور نفسي ويه هاي الفاشله بتك

حسين : ليش فاشله احس وحده تصمم برامج بلحاسبه
محسن : لدافع عنها هاي فوك متطبك ويايه يول عليها هاي وحده قفاصه تموت على البلاش تلكه شكد ساحبه منك حتى تسوي تصاميم
محسن : بلاش وداعتك عمي
محسن : هااااا ليش بله ويغمز لريم

ريم : جنت اشرب ببسي غصيت وطلع من خشمي واكح
نهر : اسم الله الرحمن على كيفك محسن ويااها
محسن : شسويت شام ريحه حرك بلموضوع
ريم : اعض شفتي لعمو محسن لان بابا كاعد وهو ولا يمه
محسن : نكول بلخير
ريم : شكراً عمو على النجاح موو
سليل : يله نقطع الكيكه
ريم : ابوس ايدج يله وطفرت يم سليل اذا يبقى بعد عمو يحجي كلشي
جنات : هااي المواعين اموري تعال حبيبي
غزل : الله عليج عوفي العب ويااه
حجي طه : تعالي بابا اكلي انتي ويااه
بيومها كعدنا نضحك ونتشاقى جان بابا يلبسني كلاده ناعمه بيها حرفي R كلش حبيتها
حجي طه : هاي هديتج بابا يوم مااجيبلج مثل رشا هديه عرسج
ريم : شكراً بابا ولو مقهوره منها لان ما اجت
سليل : شفتي بطنها لوين واصله خطيه بلثامن وخطيه كوه تجر النفس ومتكدر طريق طويل يتعبها
نهر : كتله لشعلان جيبها هنا خلي تبقى بينا اخاف تولد هناك وحدها
سليل :  كون يجيبها ميعاند
ريم : والله اگلب الدنيا عليه صار شكد مشايفيها
نهر : الله يكومها بلسلامه بجاه الحبيب المصطفى
سليل : امين

هااج عيني ريمو هديتي الكيكه وهاي فلوس اشتري الي تحبي
ريم : هلا بلغالي فديته بلدولار لو عراقي
سليل : احد كال الج اداوم بلبرلمان
ريم : على كيفج عيني هم رواتبكم خير من الله
سليل : شتردين اخذي واجملج تدللين
ريم : فدوه لگلبها لاختي الجبيره الحنينه الحبوبه
سليل : بله صبغ ميحتاج
ريم : صدك يعني منا منا حتى اسيطر والصرف يكثر
سليل : ميحتاج التردي اشتري
ريم : اي والله مابيه حيل اصبغ
محسن : هاج هاي هديتي
ريم : هله بأبو فيصل
محسن : بله لواكه وصبغ على كوله سليل ذني ماازيد فلس
ريم : يله شيطلع منك ينعم الله
نهر : واني هاي ماعندي الميتهن
ريم : تقربت وبست ايدها انتي بلذات انطيج روحي قليل بحقج لوما انتي ولا اشوف هاي الشهاده بعمري كلشي مااريد المفروض اني اجيبلج مو انتي
نهر : ولج بجيتيني
ريم : اروح فدووة لكل دمعه بعينج يااحن الناس كلها

حجي طه : ليش واني مو حنين
ريم : انت الكبد مالتي انت باباتي ابو الحنيه كلها
رشا : زين واني
ركضنا من شفناها فتحت الباب وطبت وبطنها كدامها ولازمها شعلان
شعلان : گلبت الدنيا اله تجي
ريم : حضنتها حيييل اشتاقيتلج مووت اووي شنو هاي بطينج تجنن ولك فصعون اطلع عااد
رشا : ابشرج فصعونه
ريم : اجت ريم الثانيه والله اني اربيها من هسه
شعلان : راحت بنتي وعلي ضاع مستقبلها

رشا : شلونك بابا بوستهم كلهم جان گلبي طاك عليهم يومياً اخابرهم بس مشايفتهم من يوم ماحبلت جنت اخاف من الطريق لان اتعب
سليل : فدووه تخبلين صدك لو كالو ام البنيه تحلوو
رشا : منيلي العب النفس
نهر : تخبلين تعالي بحضني من هسه شعلان مترجع وياك
شعلان : هو جبتها حتى تبقى لان ليل نهار تبجي
جنات: انشيلها بعيونه
رشا : اشتاقيتلج جنووو وين اموري تعال حبيب خالتك راح اجيبلك عروس
جنات : بنتج من هسه محجوزه لابني
رشا : اكيد ماازوجها للغرب
ريم : واني وين غير خالتها والي حكم عليها
حجي طه : تعالي بابا اكعدي ذني راح يتعبنج
سليل : كعدنا البنات وحدنا وبابا وعمو وشعلان وحسين بلاستقبال وبيومها جانت لمتنا تخبل
شويه وصاح حسين لريم

حسين : تعالي هديتي ماااخذتيها
ريم : انت هديتي من الدنيا
حسين : لتحجين هيج والله كوه مصبر روحي ما حاضنج وبايسج الله يقبلها الكل يحضن ويبوس اله اني
ريم : ههههه عود من نتزوج حضن بكيفك
حسين : على اساس انتظر الاوامر منج
غير اكلج
ريم : احد كلك اني لفه
حسين : انتي كيك واني روحي بلكيك
ريم : خجلت وردت ادخل جان يصيح تعالي والله مااسوي شبيج هااج
فتحت هديته جانت سوار ذهب كلش ثكيل وراقي
هااي شنو
حسين : هديتي
ريم : اعرف بس ليش هلكد ثكيل
حسين : والله ردت اثكل واحلى
ريم : رجعته وحطيته بيده مااريده
حسين : تردين هديتي ليش
ريم : لو جان شى بسيط اخذه بس هيج هديه مااخذها
حسين : ليش ريم
ريم : شنو موقفي هسه اذا البسها كدام بايا او كدام عمه وخاصه اغلى من هديه بابا راح اقهره وراح يحس هو مقصر بحقي واني مااخلي بابا يحس بهيج شى لو اموت

حسين : بس اني مو قصدي احسس احد اني ردت شى حلوو وغالي يبقى بيدج وبأسمي من محبتي بيج
ريم : تره اذا على الغلا والمحبه اذا يردون اهلي يجبون هديه لازم يجيبون الدنيا كلها لان يحبوني بكد الدنيا حسين هديتك تخبل وراقيه بس مو بوقتها لا اكو رابط رسمي يربطنا حتى كدام اهلي مااخجل ولا اكدر البسه واقلل من قيمه هدية بابا اللابستها هسه بصدري
حسين : والحل
ريم : رجعها او بيعها بكيفك واذا تحب جيب شى بسيط بسعر هديه بابا او اقل ومن عيووني البسها والله ماانزعها
حسين : زين ضميها يمج
ريم : مااكدر لتزعل مني عفيه والله نستله منك تسوه هذا السوار والذهب كله
اخذ الهديه وطلع اعرف كسرت بخاطره بس مااكدر صعب اخذها منه

ورجعت بين خواتي ضحك وشقى وسوالف بس بالي يمه مااريده يزعل وراح وره ساعه اجه دزلي رساله اطلعي بره طلعت
هااا بيك شى
مدي ايدج مديتها وجان جايب سوار ناعم وبيه حرفي يشبهه كلاده بابا ابتسمت
حسين : هااااا هسه
ريم : يخبل جان احضنه من الفرحه وهو حضني وحسيت على نفسي وخرت وهو ابتسم
حسين : لو ادري هيج جان من زمان جبته اقلها احصلي حضنه مخلصها تمن وفاصوليا ناشفه ليش وخرتي
ريم : دنجت خجلانه ميصير
حسين : مبقى شى واني احضنج كدام الناس كلها
يله ندخل جعت مجعتي ام بطن
ريم : ههههه اي جعت

رجعنا ليجوه وجانت سهره تخبل محسينا بلوكت صار شكد مكاعدين هيج كعده
وثاني يوم كعدت ورشاوي يمنا والله احس البيت رجعت الحياه بيه من هي موجوده وخطيه عمه تنام يم راسها تخاف عليها
وره ٥ ايام بلضبط من نجاحي دك تلفون على عمه جنت اكشر تفاح لرشا واوكلها وسليل تكرز حب وجنات توكل اموري وغزل تمشط بشعرها فتحت الخط وكامت تبلعم
سليل : شبيج ماما
نهر : سجاد بلباب

سليل : قطره دم مضلت بيه اجه لا اني فهمت غلط
ريم : عمو متأكده
اندارت وطلعت تركض طلعو البنات وراها حتى رشا الي بطنها كدامها طلعت وياهم اله اني مكدرت اكوم من الصدمه من اللوعه من القهره من الشوق الف مشاعر صارت عندي واسمع صوته شلون يسلم ويبوسوه وفرحانين بجيته حتى جنات
كمت وكفت واسمع عمه تكوله ادخل والله ممصدكين شفناك
اي هو سجاد رجع لوعه الگلب رجع عذاب الروح رجع الي اتملك حتى النفس اليصعد وينزل
دخل وصرت بوجهه حسيت عيونه ارتبكت اي هذا حبيبي اعرفه واعرف كل حركه منه حافظته اكثر ماحافظه نفسي وجان يكول بصوت حنين
سجاد : شلونج سليل
سليل : داخلي والله يبجي دم يريد تريد روحي تطلع وتستقر بحضنه تشكيله على كل يوم عشته بدونه على كل دمعه نزلت شوق اله على كل لحظه تأذيت وهو مو يمي جاوبت واتصنعت القوه الي مااعرف منين اجت وكدام حبيب الروح

هلو سجاد  الْحٍمَدٍ للـّہ على سلامتك
سجاد : الله يسلمج
سليل : كعد والبنات داير مدايره كعدت مقابيله على القنفه واباوع الكل يضحك ويسولف وطاير ويااه اله اني هادئه لهسه مستغربه شلون مابجيت شوق اله عيووني اثنينهن يتعاركن ويتسابقن حتى يحفظن شكله مثل ماهو بس شويه شيب بسيط بجانب شعره زادته وسامه ورزانه
وريحته مغيرها بس طيبه كلش واناقته الي استغربت عليها مبين وضعه احسن من قبل

نهر : والله لهسه ممصدكه شوكت اجيت
سجاد : قبل كم يوم
نهر : وين كاعد
سجاد : ويه ولد صاحبي
نهر : انت من كل عقلك والله لو يدري طه يلعب بيك طوبه شلون تبات عند الغرب
سجاد : صديقي حيل وكلها كم يوم
ريم : بس لا ترجع تسافر
سجاد : لا ادور على شقه واستقر
جان يدنج على ريم
ريم : دنج وشاورني وكاال
الي احركج حرك على دكتج الناقصه ياريم اله اتوبج تسوين مقالب بواحد
ريم : بلعت ريك وكتله عموو گلبك ابيض تكبر وتنسى حبيبي انت عموو
سجاد : كبرانات ولجن نسوان صايرات وانتي دعبله شصاير بيج
رشا : شفت عمو هاي تاليها توكعني بلكاع ادعبل
سجاد : الله يكومج بلسلامه وين رجلج
رشا : رجع للكوت يومين ويجي
سجاد : مرتاحه ويااه
رشا : نعمه من الله كولش زين ويايه
سجاد : الله يحميكم
وانتي جنات ان شاء الله مرتاحه
جنات : بخير والحمدلله
بدا يسأل كل وحده حتى غزل واني ساكته وره ثلث ساعه رفع راسه وصارت عيوونه بعيوني
سجاد : وانتي سليل شلونج
سليل : حسيت بقهره منه شكد صارت مواقف والم وكسر بس غيابه عني كسرني طول ذيج الايام انوح والله عليه بس اريد اسمع صوته لو كلمة منه بس من اجه وسوه نفسه مداير بال وحالي حال خواتي اذا مو اقل حسيت لازم اتعامل ويااه بلمثل گلبي يحبك اي روحي معلگه بيك اي انفاسي تصعد وتنزل واتنادي بأسمك هم اي بس لدوس على كرامتي كاافي الصار دفعت ضريبه غلطي بما فيه الكفايه

باوعت بهدوء عليه وكتله  الْحٍمَدٍ للـّہ سجاد بخير وضعي تمام واداوم ومستقره بحياتي
باوع صفح نظرته هاي اعرفها حسيته يكول متأكده رفعت تك حاجب وارد عليه اي يسجاد متأكده ومثل مابجيتني دم اله ابجيك اجيت والله جابك الي كلشي العاشقه تتحمل اله ان ادير ظهرك الها وتروح وترجع وكت متحب وتريدها تستقبلك بالاحضان غلطان ياحبيب روح وگلب سليل
سجاد : متزوجتي
سليل : ممحتاجه رجال حتى اتزوج عايشة احسن عيشه شسوي بوجع الگلب خليت الزواج والحب لاهله مو الي
ريم : هاااي منو تحجي اصعقت
يتبع ......