رواية ابي والغزلان الفصل الثامن والستون 68 - بقلم ريام هادي

ابي والغزلان الجزء الثاني
للكاتبة Reem
البارت التاسع عشر

(بارت طويل لعيونكم 🌹)
بلسان حال سليل :
شلونكم يا اهل الگلوب الدافية
شلون حال گلوبكم ماغافية
ماتنام جروحكم
وبالفراگ شلونكم
هم تنام عيونكم؟؟
وهم تظل حسبات عدكم صافية
بالله جينا ببالكم؟؟
ومن ذكرتو شحالكم
هم بعدنه احنه لجرحكم عافية؟؟
ادري وشصبر هَواكم
والوجع يخدش هِواكم
الشوگ يزرف بالگلب
آخ يا شوگ اليحب
وشيحننلك گلوب الجافية
چن گبل ينشد علينه
وشجرى وسكت انينه
شگد يمر بيكم حنين
شگد تمر بيكم سنين
وعالدرب ماتغفه عين
عدها امل يمكن يرد للعاشگينه
جروح ماتبقى بنظرته الشافيه..
هم صدگ ترجع مثل ضحكة طفل
ومثل نجم وليل يلتم الشمل
بساگ الحديثة لون مال الحجل
هيچ مال گليبكم... ذب الحمل
وهسه گلي جوابكم لو تنسأل
شلونكم يااهل الگلوب الدافيه؟؟؟ (هديه من احدى المتابعات)

وصلنا للكوت واستقبلونا ولد عمام ابوه وخواله بلطلقات تكول جبهه مو عرس طبيو السياره بلكراج نزلت بعتبت باب المطبخ
وجوه رجلنه ذبحو اثنين طليان رفعت البدله خفت تدمر سحب ايدي ونزل البدله
باوعت عليه وهلمره كوه اشوفه اريد اوكع على وجهي من وره الكبوس
رشا : لتدمر
شعلان : يطبها طوب انتي مو اشتريتها
رشا : اي بس حرامات
شعلان : اياج تصعديها وتطلع رجلج
رشا : لابسه ليجوه ستريج والله
شعلان : كتلج متنرفع
رشا : سكتت وذبحو والدم طفر متت قهر بس سكتت شسوي خفت احجي ويعيط رغم ماكو رياجيل كلهم بره بس الكصاب وابن عم ابوه وابنه
دخلنا للبيت دخلتني امه وهند وكعدت بلهول مجنت اندل اي شى وخايفه وحدي تمنيت سليل او عمه ويايه بس مكدرو لان بلكوت
هند : مااوصيج على اخويه مو تشلعين گلبه
رشا : جنت اسمع توصياتهم بس بالي مو يمهم وخايفه وگلبي احس راح يطلع من حلكي من الخوف وحجن شكد دوخني واني بس ساكته لحد مطب شعلان بوسنه وراحن مباشره فتحت الكبوس وذبيته صرت مي من وراه لان شهر السادس وموت حر
شعلان : هله بسورها ونورها
رشا : تعبت حيل وحاره

شعلان : البيت بارد كتلهم يشغلون التبريد وميطفوه
رشا : زينه الكهرباء هنا بحيث كم تبريد مفتوح
شعلان : وين اكو كهرباء زينه بس عدنا مولدات گبار علمود البستان وهم عدنا وحده لبيتنا ربط عليها هذا البيت شغلي شكد متردين
رشا : ذكرتني هناك جنا ساحبين ٥ امبيرات ونتعارك هاي تصيح طفي البنكه والثانيه طفي الضوا حتى لتطفر الجوزه
شعلان : هنا ماكو شغلي الي تردي
رشا : شعلان هاي الغراض مال مرتك الاولى
شعلان : اني صار مطلك ٧ سنوات اكو اثاث يضل لهسه وشوفي بربج كله جديد
رشا : اي ليش سألت

شعلان : من طلكت انطيتها كل اثاث البيت وفوكاها المؤخر ردت بس افلت بجلدي
رشا : لهاي الدرجه ضايج منها
شعلان : مو ضايج بس لا اني تحملت اعيش وياها ولا هي فهمتني
رشا : اخاف اني هم هيج اعاني مثلها
جرني من ايدي وكعدني بصفه
ومد ايده وحاوطني
شعلان : شوفي حبيبي اني طبعي تعرفي عصبي ومااتحمل ومرات اختنك بس وياج يختلف
رشا : ليش

شعلان : لان احبج وروحي تعلكت بيج بس لتستغلين هاي النقطه صيري على ميي التردي يجرالج تعاندين وتكسرين كلامي تشوفين مني الوجهه التكرهي
رشا : احاول افهمك
شعلان : يله كومي اشوفج البيت نورتي بيتج
طبيت افتر البيت جان حلوو وجبير ونظيف ومرتب وغرفه النوم بلطابق الثاني اول مطبينا سد الباب وتقرب
كمت امتمت شعلان تعبانه خليها باجر
شعلان : شنو هيه
رشا : سكتت خجلت شكول جان يطكها بضحكه
شعلان : والله وشفتج خايفه وخجلانه اليوم يوم حظي
رشا : لتنصب عليه فدووه ميته رعب
شعلان : شنو السالفه قابل راح اكلج اني بس راح اكشر كشورج
وبعدين اكلج

رشا : هااي عود كاعد اطمني لو تخوفني
شعلان : تعالي يامهره گلبي وجلاويه
رشا : ههههه صرت جلاوي
شعلان : ومعلاك وبنكرياس وكلشي
رشا : بدا شوي شوي يضحك ويسولف ومحسيت غير بحضنه والبدله بلكااع تقرب مني بهدوء جنت مرعوبه حييل حسيت نبضات گلبي مو طبيعيه ساعه قويه وساعه تخفت وكمت اعرك اكثر رغم الغرفه ثلاجه
شعلان : بيج شى حبيبي
رشا : بلعت ريك لا حبيبي مابيه
شعلان : اكمل
رشا : اي
شعلان : رشاوي باوعي عليه لتغمضين
رشا : فتحت عيووني
شعلان : تحبيني
رشا : امممم
شعلان : علي صوتج
رشا : اي احبك
شعلان : واني روحي بيج
وبدا يثيرني ويبوس بيه بهدوء حاولت اهدي نفسي مردت اخرب كولشي علينا ويه
همساته بأذني ولمساته بديت اهدأ وانسجم ويااه رغم خوفي لحد متم گلشي وصرت مرته

غمضت وردت استجمع قووتي كمت دخت حييل ردت اوكع لزمني
شعلان : بيج شى حبيبي لتخوفيني
رشا : لا بس شويه دوخه
شعلان : گلبج يأذيج
رشا : لا لتخاف
شعلان : كتلج گبل العرس خلي نروح نجيك مقبلتي شكد عنوديه لخاطر الحسين
رشا : مابيه شى عفيه هسه اجر النفس واكووم
شعلان : تردين تغسلين
رشا : هسه بس ارتاح ومحسيت غير شالني مثل الطفله جنت دايخه لدرجه موطبيعيه وخايفه لا يغمى عليه واخرب فرحته لهذا كمت اجر نفس واغمض اخذني للحمام وغسلي جان حنين لدرجه متوقعتها ولا هذا شعلان الي يعيط ويصيح ويهدد

مثل الطفله بيده حتى متت بدمي ومستحيه لان اول مره احد ومباشره ويايه بلحمام كلشي صار سريع سريع بس بسبب الحاله البيها اني مكدرت ارفض ولا اجادل ولا افكر بأي شى غير اغسل وابدل ملابسي اخاف يصير شى اقلها يكدر ياخذني للمستشفى وضعي مابيه اي احراج اليه واله
طلعني ونشفني ولابسه البرنص وكاعده
على الكرسي مال ميز تواليت شفته شال الجرجف وفرش واحد ثاني حيل استحيت المفروض اني اسوي

شعلان : يله حبيبي تعالي ارتاحي
رشا : وين رايح
شعلان : نازل لاهلي
رشا : خير اكو شى
شعلان : هاي عادات وتقاليد لازم النيشان حبيبي
رشا : مااشي
شعلان : مااتأخر عليج دقايق وجاي
رشا : على راحتك شفته لبس الدشداشه البيضا وتعطر وطلع وحاولت ارتاح وسمعت طلقات شكد عيب بله هاي السالفه شوكت تندثر
غمضت وبسبب الحمام البارد كدرت ارتاح تاخر عليه اكيد معافوه
كمت بدلت ومشطت حسيت نفسي ارتاحيت وكدرت اتوازن وكمت افكر هاي كل مره من يتقرب مني هيج يصير بدا الخوف يسيطر عليه لازم اروح طبيب صوجي لو رايحه قبل الزواج بس خفت اكو شى يمنعني ومنتزوج
شويه وطلب ولكاني لابسه دشداشه ستن بيضا قصيره والشعر طويل مفتوح لنصف ظهري وامشط بيه
شعلان : يابنت الناس استري على نفسج

رشا : شبيك حبيبي
شعلان : كل هذا الاغراء كدامي وتكول شبيه شبيهه بس مشتعل شيب الخلفوني
رشا : هههههه ننزل ناكل
شعلان : جااع حبيبي لو تنهزمين
رشا : والله الصراحه اثنينهم
شعلان : اكلي وبعدين نشوف منو ينهزم مني
رشا : نزلنا سوه وجانو اهله محضرين كلشي وره متعشينا متقرب مني بس صاحني ونمت بحضنه رغم اعرف بيه ميت شوق عليه ويرجف مبين من حضنه بس متقرب عرفت خايف عليه واني بحضنه وبدينا نغفى
حبيبي
شعلان : عيونه
رشا : خلي نروح طبيب علمود گلبي
جان يطفر بيج شى
شعلان : لا مابيه والله بس حتى نطمن
شعلان : شحجينا قبل متسمعين الكلام
رشا : نروح واسمع الكلام
شعلان : نامي حبيبي باجر نروح
رشا : من باجر ليش
شعلان : حتى ترتاحين وارتاح والله اعذريني اذا اليوم مقدر وضعج باجر اذا الطبيب كال مابيج شى قطعه ماابقي بيج
رشا : هههههه بس كون مابيه شى واكل براحتك جان يحضني حييل شويه وخفت حضنته وبدا الشخير يعلى ابتسمت على صوت شخيره وين ريم عنك جان سوتك مزق والنصبه بفلس واختفت بسمتي واتذكرت خواتي كمت على كيفي واخذت التلفون واتصلت مباشره شالته سليل
هااا حبيبتي شلوونج

الْحٍمَدٍ للـّہ ليضل بالكم كمت اسولف وياهم وعمه كالت هاا بنتي
رشا : كلشي تمام عمه ليضل بالج مردت اخوفهم وريم تشهك وتحجي ويايه واطمنت عليهم وسديته ورجعت نمت

ثاني يوم رحنا للطبيب وفحوصات وايكو كال الطبيب ماكو شى وضعج مستقر وشرحله الحاله شعلان
وكال بسبب هي مماكله من الصبح ومتوتره وطريق طويل اي وحده بمكانها راح تتعب وتتأذه انطيكم مهله هاي عشره ايام مارسو حياتكم طبيعي واي شى يصير اني موجود
رجعنا فرحانين ومن باب البيت شالني وركض ليفوك واني اضحك اريد بس ينزلني ماكو وبيومها لان ارتاحيت نفسياً تقرب مني والحمدلله اي اعارض موزينه مظهرت عندي ومن يومها والعينتين شعلان ميفك مني ياخه

سليل : ٢٠٠٩ نهايتها صار سنه ونص على زواج رشا وضعها ممتاز وحياتها ماشية وشعلان كلش يحبها وهي هم تحبه ومداريته بس اطفال مديصير وهذا الشى بس المتعبها
وجنات ابنها گبر اموري (امير ) ويمشي حبيبي مالي علينا البيت ضحكه وسوالفه هي الي مخليه للبيت طعم وضحكه وخاصه بعد ما راحت رشا
بابا متكفل بكلشي يخصها وطلب منها ترجع تكمل دراستها بس هي مقبلت وبقت ويانه

اني تعينت والتعيين اجاني عن طريق عمو محسن واسطه ولان عمي شهيد كدر يستغل هاي الفرصه ويعيني تعينت بوزاره الماليه جانت قنبله بلنسبه للكل شلون اتعين على هيج وزاره صعب واحد يتعين بيها وخاصه مو اختصاصي على كوله عمو دومج ماعندج حظ ولو مره خلي يصير عندج
وصار تعيني بيومها فرحت فرحه مو طبيعيه لان التعيين حلم بلنسبه لكل واحد وخاصه بهاي الظروف التعبانه وبهيج وزاره وشرط عمو محسن اول راتب لمده ٣ ايام غدا وعشا عليه كتله انطيك اول راتب احسن
مقبل اله ٣ ايام غدا وعشا عليه وريم الجوعيه طبكت ويااه وصدك لمده ٣ ايام ادز غدا وعشا من عندي الهم للكل لان مااكدر ادز لناس وابقي ناس اول يوم للكل وراها بابا وعمه وغزل وجنات مقبلو ثاني يوم اله عمو محسن وريم متابو مني اله كملت ٣ ايام اكل سفري تكول فاتحه واله يختموها

حياتي هادئه اروح للدوام واتعرفت على موظفات اكبر مني بلعمر بلقسم حبابات اني طبعي مااحجي وعلى كد الشغل مالي دخل بفلان وعلان ومن ارجع احجي كلشي يصير ويايه لماما نهر ودوم نصيحتها لتدخلين بأحد اشطبي يومج واطلعي
حياتنا هادئه جداً هاي السنه الاخير لريم كعد اداوم وغزوله خامس علمي كبرت حبيبتي بس متغير طبعها الهدوء دوم يصدر منها
وبابا شغله ماشي ويااه عمو محسن الي ممفاركه ابد
اما علتنا الوحيده جانت رشا

رشا : سنه ونص مرت على زواجي وضعي تمام ويه شعلان يوم نتجادل وراها نصير عسل حياتنا هادئه لولا اخته هند الي معكره كل حيااتي تعبتني ودوم تدخل بكلشي واكثر من مره تسمعني حجي تخليني اكمز بس لخاطر شعلان اسكت ودائماً من اشكيله يكولي
شعلان : شسويلها خليج بمكاني اطردها شلون وهي اختي الوحيده وماعدها والي غيري تحمليها لخاطري
رشا : واني اسكت وكامت بسبب سكوتي تتمادى واني اطحن بروحي من وراها

وبيوم كاعده يمنا وهم اول مطبت كالت عفيه بيت ٢٤ ساعه يصوصي لا بيه جاهل يضحك لا بيه جاهل يوصخ اويلي عليك ياخويه وعلى حظك
مجاوبتها وطبيت للمطبخ شربت مي واتنفس اريد اكطعها شتريد مني مو تدري هي الف مره مابيه شى رحت وسويت تحاليل مثل الورد طلعت الها وصلت قريب الصاله سمعت شعلان يحجي وياها

شعلان : جوزي منها هند
هند : وانه شمسويه
شعلان : عبالج مااعرف بسوالفج وياها يوميه مسمعتها حجايه وغاثتها
هند : تره هي مرتك متستحي تكذب وتنقل حجي
شعلان : لا نقلت ولا كالت ليش مااشوف سوالفج وياها مرات الحجايه تجي ترس الاذن عدا بساميرج يوميه داكه بسمار براسها هسه بس لو افهم شرايده منها هي لايمج ولا كرباج
هند : خويه اريد اشوف خلفتك
شعلان : انتي مو عندج جهال شلج بيه بعد
هند : ياااااا صدك تحجي كبرت والي بعمرك جهالهم بطولهم
شعلان : من جنت متزوج ذيج مافتحتي حلكج شمعنه ويه رشا وثاني شى اني مشاگلي الج مرتاح والحمدلله والبنيه شايلتني بلصلوات ومرتاح وياها ليش تدخلين اني راضي

هند : لا عيني انت مراضي بس مسكتك بلسحوره مالتها
شعلان : هههههه بربج مقتنعه بكلامج هي رشا مال سحوره تعرفين كلش زين هي مو من هذا النوع اعرف بيج كل هاي سوالفج لا علمودي ولا بطيخ انتي تنتقمين من سالفه طالب الله يرحمه من خطب عمتها
هند : هسه شجاب هاي لهاي
شعلان : بروح ابوج حجي مو صحيح محد يعرفج بكدي تره رشا مالها ذنب وحتى عمتها رجلج الله يرحمه كتل نفسه عليها وهي مقابلت المفروض تشكريها مااخذت رجلج منج
هند : رجلي ماتقرب منها لو ما انطته عين وغوته هذني ملعبات اعرفهن يتمسكنن ويتمكنن
شعلان : الرجال وتوفى الف رحمه على روحه بهذا اليوم والشغله صارلها سنين مرتي شعليها
هند : والله موتتنا يامرتي ويامرتي تكول بس هي مره وبس هو متزوج
شعلان : هند ارجع واعيد عليج عوفي رشا بحالها ولا كل متجين ترجفيها واطلعين

هند : هيج صارت هاي مگان متكول خلف الله عليج خيتي نصحيها وعيها
شعلان : على شنو ليش هيج شمسويه
هند : مترهايه كاعده وحاطه رجل على رجل غير وحده صارلها سنه ماعدها خلفه لا تبقي طبيب لا سيد لا امام لا نذوره هي المسعده كاعده وساكته
شعلان : هيه سنه لو عشر شسوي تحرك روحي اذكري الله اكو اوادم عشر وعشرين سنه يضلون وشحلاتهم
هند : صخام بوجهي هاي العايزه غير وعلي سنه التجي اذا ماخلفت ازوجك ياخويه بزره الشيبه يتيم وانت ضال تنتظر بلهوا شوكت يصيرون من سنونك توكع وماتلحك تشوفهم يمشون خصم الحجي
هاي عاگر على عمتهم مو ضلت بليه طفل وتالي تزوج عليها وذبها
رشا : صرت نار ادخل اكطعها تكطع واتفل بوجهه واطردها بس شعلان واكف بوجهي ااخ الله وين اولي اذا ابقى اسمع هسه اطب واحرك الاخضر واليابس
شعلان : شمايكون هاي رزق الله واني راضي بقسمتي

هند : القسمه السوده المصخمه هاي تاليها نسلمك الها تصول وتجول بكيفها بنت سندس
شعلان : يعني صاير راسج راس الثور توهشه يمنه يروح يسره
هند : والله مااجوز منها اله تحبل لو اخطبلك غيرها وهاي عوفها هنا وذاك بيت ابوك الفوك كله فارغ اخذه وخلي مريتك بيه وهاي خلفت ماخلفت يطبها طوب المهم تتزوج عليها

شعلان : اني اكول رجال وعيب ادخل بين النسوان اذا شلت ايدي وگلت لرشا منج الها تدرين شسوي
هند : يافدوه شسوي يمه
شعلان : والله مرتي مو فقيره ولسانها مدفع رشاش بس مؤدبه بس ياويله الي يدوس على طرفه بذاك اليوم امه داعيه عليه ليش تخليني اعوفها تنهد بيج وتسكتج بعدني
لهسه ضابها ومااخليها تسمعج گلمة تكسر خاطرج
هند : هاي هيج صارت يبن امي وابوي تاليها تبيعني علمود مره
شعلان : الله اكبر قابل المره من الشارع غير مرتي ولو هي متعديه عليج اكسر ظهرها بس انتي يوميه جايه هنا وهازتها ورايحه وهي تبلعها زين اني رجل كرسي يوميه اشوف مريتي امي واختي لاعبات بيها طوبه واسكت مو حتى عيب بحگي

هند : شتريد هسه ماادخلك البيت بعد حتى ترتاح ست الحسن
شعلان : البيت بيتي واطبي معززه ومكرمه بس حجي زايد مااريد اذا سمعت غاثتها وحاجيه شى يكسر خاطرها لساني ميطخ لسانج ليوم الدين
هند : خوش والله من اكول ملعبات تضوج هاك استلم الزلمه الحوك الجان من يدخل مكان يهزه هز ويسكت اگبر زلمه ويكسر راسه وخشمه مايطخا الهوا صار بيد مريته كماشه
شعلان : وروح ابويه حجايه ثانيه ياهند تشوفين مني الماشفتي

رشا : رجعت للمطبخ امشي على كيفي ومااعرف شصار بعد بس حسيت بقهره كلش جبيره رغم هو دافع عني وحبيت كلامه بس كلامها خوفني وأذاني يعني اني حتى مااروح الهم ومن اروح ساعه واكوم ومااحجي ولا ادخل هي ليش تدخل بحياتي
اختنكت اكثر صعدت للغرفه متحملت ولزمت التلفون ودكيت على ريم
ريم : ياهلا منج من الشيطان صار يومين غايبه هسه اتذكرتي عندج اخت
رشا : هلوو ريمو
ريم : شبيه صوتج صار شى
سليل : شبيهه رشا
رشا : مابيه شبيكم هاي فاتحه حاگيه
ريم : اي اني وسليل وغزل كاعدين نكرز حب مكانج فارغ
رشا : بلعافيه
سليل : صوتج معاجبني شصار
رشا : هاي هند مكعد تجوز مني ولجن تكول لشعلان اتزوج وخلي وحده بيتهم بلطابق الفوك لان والله شنو اني مااخلف
ريم : ياحقيره وسكتي الها
رشا : جنت اسمعهم ميدرون بيه
سليل : وهو شكال

رشا : الشهاده لله دافعلي بس هي متسكت مثل كل مره تهز بدني وتطلع
ريم : والله شعلان سواج فاره وين جانت رشا ام لسان الي ترادد وتهد لو على قبل جان هسه هند مدفونه بلفتحه الثالثه
رشا : والله لخاطر شعلان كل مااحجي يكول لخاطري اسكتي
سليل : زين تسوين مالج دخل بيها اهم شى رجلج على گلبج
ريم : ياگلب سليل مو حتى گلبها ورم من هاي الحيه هند ولج الدغيها اذا هي حيه انتي صيري عگرب
رشا : شلون يعني
سليل : مالج دخل بهاي الرعنه تحجي بكيفها
ريم : اوكفي سليل لو تبقى على نصايحج رشا لو بلشماعيه لو متزوج عليها شعلان
سليل : يعني من اكول الها راعي الله برجلج ومن تجي اخته استقبليها استقبال حلو ولتجاوبين ولتتجاوزين غلط والله الدنيا انگلب
ريم : ياعيني مو غلط بس هذا الحجي لو ويه حمات حبابه مسالمه مالها دخل تجي بأحترام وتروح بأحترام على الاقل محترمه نفسها مو من اطب لحد متطلع تذب سم وترجع ليوره

رشا : اوووف اي والله تسممني وتروح
ريم : اسمعي اول شى ارجعي ريه دور الاميره النائمه تره ميناسبج
سليل : هاي هيه قبضنا راح بيها شعلان
ريم : ميروح عود هي تعرف شلون تقشمره بوسه منا حضنه منا ويصير طلي بيدها
سليل : ولج رعنه عيب وغزل كاعده
ريم : قابل شگلت مو صحيح احجي انتي الفقيره تالي وكت وغزل من صغيره ولو احب خدودها من تورد خجل
غزل : اكوم واعوفكم براحتكم
ريم : اكعدي انتي الثانيه واتعلمي خو انتي اذا تتزوجين رجلج يزوج عشره فوكاج وانتي اطبخين العشا بيدج الهم
سليل : جوزي من غزوله خلي نشوف انتي من تتزوجين شسوين
ريم : اكعده بكفخه وانومه بجلاق خلي اتزوج وشوفي قسم الكسور احجزه بأسمه

غزل : هههههه خطيه والله من هسه انقهرت عليه
رشا : يمعوده جاكي شان فضيني
ريم : هي مو تذب حجي وتغثج اكثر المرات مو كدام شعلان
رشا : اي ومن يجي شعلان ولا كأن حجت شى
ريم : انتي هم سوي مثلها كل متشوفيها رديها وغثيها بسبب وبدون حتى اتوب منج وبينج وبينها ومن يجي شعلان تصرفي طبيعي ولج اشك هدومي تالي عمري اعلم سكينه خرب بلزواج اذا يسوي الاسد صخل
رشا : لتعيطين افتهمت

سليل : لتسمعين كلامها وتخربين بيتج
ريم : اصلاً اذا متسمع والله راح يخرب وتاليها تجي هنا وتگابلنا تنوح مكافي وحده مخلصتها بلسطوح هسه الثانيه وين اخليها فوك البيتونه على التانكي
جان تكفخني حييل سليل
اااخ والله تأذي
سليل : سمعي رامبو اعقلي وكافي تدخلين بشى ميخصج
ريم : والله اني ممدخله منو خابر وراد استشاره مستعجله هاج والدليل هي داكه وعلى تلفوني مو تلفونج يعني تريد خطه صهيونيه مو زياره شعبانيه جان خابرتج

رشا : اي والله سليل طك گلبي منها متعرفين شسوي ومن تجي تفتح مجرات البيت كله اخاف اكو هوسه شى حتى تعيب ذاك اليوم لكيتها طابه بلغرفه صاعد للطابق الثاني وتريد تفتح الكنتور لو ما اني طبيت وخلت وطلعت
ريم : هاي دواها تريد رجال زوجها وهسه تنجب وتكعد
رشا : شلون جان متحملها طالب الله يرحمه
ريم : متشوفي مات راد يخلص الله يحبه لو لهسه عايش جان جلطه وقلب وسكر
سليل : الله يرحمه جان خوش انسان
رشا : اروح ليجي وشكراً على النصيحه
سليل : باع الثانيه تتشكر منها روحي أكليها
ريم : روحي سكينه والهوا بظهرج عليه وعلى اعدائي اريدج منتصره على القوم الكافرين
رشا : صار سكينه بااي

رشا : نزلت لكيت هند ماكو وشعلان كاعد يسمع اخبار طبيت للمطبخ وكملت الاكل واجيت عليه
يله حبيبي صبيت
شعلان : جيبي هنا مااحب اكل المطابخ
رشا : صاار ورحت حطيته بلصينيه وكعدنا ناكل عجبك
شعلان : كلش طيب عاشت ايدج
رشا : حبيبي اريد اروح لبغداد
شعلان : هااا ليش شصار
رشا : مشتاقه للبنات هوايه
شعلان : مو يوميه تتخابرون
رشا : التلفون شكل والكعده وياهم وبنصهم شكل
شعلان : نروح الصبح ونرجع ثاني يوم
رشا : ليش ياعيني منبقى كم يوم
شعلان : مااكدر عندي شغل
رشا : ابقى وتعالي بعدين تقرب مني ويحجي ويباوع على رگبتي وصدري وبهمس يكول
تكدرين تنامين بليه حظني ينطيج گلبج
رشا : باوعت عليه وابتسمت لا مااكدر
شعلان : خلص نروح ونرجع ثاني يوم ليله اعوفج تسهرين ويه خواتج اتحملها بس ايام مااكدر
رشا : هذا هو حبيبي شوكت ميصير مجال عندك نروح
شعلان : اخااف منج من تحجين بهدوء وعقل
رشا : هههههه مو تخاف تحب اصير نار ونتجادل متعتك

شعلان : شايفه من تتعصبين وتصيرين نار وبعدها اجيت عليج وادفعين بيه عود ضايجه وزعلانه واقشمرج اويلي الله متعتي
رشا : هااا هيج صارت بعد مااتعصب لعد
شعلان : اتحداج بس ابزج تعيطين اعرف دماراتج كلها
رشا : ابو دمارات اذا شبعت خلي اشيل واسويلك جااي
شعلان : مااريد جااي اريد حلوو احلي وماكو احلى منج احلي بيه شوو تعالي
جان يشيلني عفيه شعلان نزلني واعيط شعلان حباب نزلني
شعلان : انتي مره ونزلي
رشا : هههههه نزلني الله عليك وصعدني للغرفه ومثل كل مره يحير شلون يدلعني
حنيته ويايه تجبرني اكون هادئه واتغاضى عن شغلات مااحبها لعيونه

وره يومين اندكت الباب بالاحرى مندكت اندفعت هند من اطب تدفع الباب وتدخل بس اني من يطلع شعلان اقفل الباب الداخلي بس باب الشارع يبقى مفتوح هي ادفعه برجلها واطب
دكت عليه باب المطبخ جنت الف گبه وهستوني غسلت ايدي وشلت الطاوه والغراض ذبيتهم بلسنك
اهووو لا هله فتحت الباب وطبت تهف بعبايتها
هند : هااا شلونج
رشا : الْحٍمَدٍ للـّہ
هند : شسوين
رشا : مو كدامج گبه
هند : اووع هاي شون تلفين هيج عوجه
رشا : اول شى حرام تكولين عوووع نعمه الله وثاني شى شعلان هيج يحبها
هند : واني اكول اخويه ضعفان من اكل النواشف والكبب اكلج عيني تره اخويه متعلم على اكل الدسم كله هبيط وباجات ومعاليك هاي الكرزات مال بغداد خليها الج
رشا : اني ممقصره شيريد اسويله لو يطلب مي عيووني انطي
هند : عود صدك تحجين هو مايريد مي عيونج خلي الج حبيبة هو يريد جاهل يحمل اسمه يصيحله بويه بابا مثل ماتلوين حلكج وتكوليها يريد من صلبه يحمل اسمه مو حايرتلي بلكبب
رشا : ليش تحسسيني اني متقصده مااخلف اكو وحده متريد طفل بس هذا امر الله انت تصلين
هند : يااا ليش مااصلي الْحٍمَدٍ للـّہ

رشا : اذا تعرفين الله ليش تدخلين بأرادته ليش هي الخلفه مو رزق من الله وهو يوزع الارزاق
هند : ونعم بالله بس هم كال اسعه ياعبدي واني اسعه وياك
رشا : واني ممقصره كل ميصير مجال اروح لطبيبه ودوم يكولون ماكو شى
هند : ذني مايفتهمن تعالي اني اوديج لمره لو سيد تقرا عليج باجر تحبلين
رشا :وشعلان يقبل
هند : لا تگليله
رشا : اذا انت ماعندج رجال يحكمج اني عندي ومايقبل اطلع لباب البيت
هند : شنو قصدج تعيريني
رشا : ليش من اكول ماعندج رجال كعد اعيرج اول مره ادري جان يطب شعلان وهي ترجف كامت
هلووو حبيبي وبست من خده عناد بيها
شعلان : هاا يابه الله يساعدهم
هند : تعال شوف مريتك شتگلي
رشا : شكلت ياعيني انت احكم حبيبي تريدني اطلع بليه علمك
شعلان : شنو ياوكت عدنا مره تطلع بكيفها
هند : هااا اني قصدت تقنعك بس هي مافهمتني
رشا : والله ياام علاوي اني الي سمعته منج تردين اروح لزلم ساده ويقرون عليه بدون علم رجلي

شعلان : حتى اكسر رجلج ورجلها
رشا : لتخاف حبيبي مااسويها وتباوع هند تريد تشرب من دمي
هند : واني اخويه لتشوفني اطلع واطب لبيتج هو كم بيت عنا
شعلان : محذرج اكثر من مره ماكو طلعه لحدج لبيتي وبس حتى السوك المسواك ديجي الج لباب البيت
هند : اي اعرف ياخويه بس مريتك تگلب الحجي
رشا : يجوز مفهمتج المهم حبيبي سويتلك گبة اگلي لو اسويلك هبيط على كولت اختك

شعلان : كتلج مشتهي الكبه مال عمتج وانتي مثلها تسويها ياهبيط
رشا : اي والله عمتي فدوة لعمرها معدله متشوف شكد رادوها حتى على نسوانهم اكيد نسوانهم مابيهن خير ولا حظ لهذا رادو يتزوجون عليهن بس هي مرادت تأذي غيرها طيبه مو بيدها
هند: اروح ضلت يمكم العافيه
رشا : اخذيها حبيبتي وياج عدنا خير من الله من عدها
خلت وطلعت تركض حتى الباب بقته مفتوح سده شعلان واجه حضني من وره وحط وجهه برگبتي

شعلان : مبين مهرتي اليوم شايشه واعلنت الحرب شصاير
رشا : احجي بهدوء وابتسامه ليش حبي شسويت
شعلان : لا يابوي مامسويه شى بس طلعتيها تركض
رشا : اختك حبيبتي خوات احنا لتحط بالك يمنا
شعلان : علنت الحرب وعلي ماطول گلتي خوات انلاصت
رشا : ههههههه انداريت عليه وحضنته جووعان
شعلان : لتتموعين تره روحي خضره
رشا : اروح فدووه للروحه خضره وبنفسجي وزركه
شعلان : يوميه راح ادزلج هند حتى تتناقشون واني الصافي الي
رشا : بهند وبدونها اني اموت عليك
شعلان : اشتعلت عشيرتي شوو تعاي
رشا : والكبه
شعلان : ناكلها غير وكت طايرين خلي اكلج هسه والباقي سهل

رشا : مرت الايام وعادي تجي هند حجايه مني وحجايه منها تنلط على حلكها وتروح لحد مكامت تجي غير كل اسبوع او ١٠ مره كم ساعه وتروح وبديت افتك منها يعني مو جنت محترمتها ومااتجاوز واسكت اكلتني اكل بس كمت اعيرها وافشلها جرت عدل اااخ اكو ناس بس بالاهانات يله تمشي

قررنا نزل لبغداد وجان بالي اروح لطبيبه وصفوها اليه
فدوه شعلان خلي نروح
شعلان : بابا لتلعبين بروحج ليصير بيه شى يفيدني طفل بذاك الوكت انعل ابو الطفل
رشا : بداعتي اذا تحبني وديني
شعلان : شكد اكرهه هاي الكلمة اذا تحبني سوي هيج اذا تحبني اريد هيج لو مااحبج المن ذبحت روحي واخذتج
رشا : لعد يله اخذني
شعلان : نروح وهاي اخر طبيبه نروح الها
رشا : اي اخر وحده

وصلنا وانتظرنا جيه الطبيبه لان واصلين من وكت وبعد سره وصلني ومثل كل مره ماكو شى يمنع الحمل بس انطتني مقويات وعلمتني على سلوكيات تساعد طلعت منها ساكته وتوجهنا لبيت اهلي واول مدخلنا ‏أول ما دخلنا استقبلت عمتي كيفت بجيتنا كلش طارت وريم كالمعتاد اتهوس ما مصدگة إني جايه

نهر : شبيج صافنه يمه مو من عوايدج
رشا : خايفه عمه
نهر : ليش بيج شى اسم الله
رشا : طفل مديصير وماكو شى يمنع
نهر : الله كريم يمه كله رزق
رشا : ونعم بالله بس اهله مكعد يرحموني يوميه هذا الموضوع اني حطيت حد لهند وسوالفها بس لشوكت هم بعد مده تجي وتدخل وتحجي
نهر : وشعلان يكول شى
رشا : ساكت بس مااعرف سكوته لشوكت خايفة حيل عمه
حضنتني حيل وكالت لتخافين يمه الزمي صلاتج وتسبيحاتج وادعي من الله يبرد گلبج ويرزقج امشي اليوم اخذج لباب الحوائج (الامام موسى ابن جعفر ) ماطول سبت نزوره ونرجع
رشا : اخاف ميقبل
نهر : هو شكوو بعد وكت لممنوع التجوال وهو خلي يجي ويانه
يله كوومي
كلت لشعلان ومكال شى كال بلعكس صار هواي مرايح زياره
نهر : تجون بنات
ريم : اني مااكدر وغزل هم اخذي سليل يجوز تروح
سليل : اي اجي
نهر : وانتي يمه جنات تجين
جنات : نروح غير وكت اني وياج عمه ماضل وكت وامير بعده منايم يشلع گلبي بلطلعه
شعلان : اني اشيله اذا تردين
جنات : رحمه الله والديك غير مره ان شاء الله
رشا : والله ردتج ويايه
جنات : على الجايات گلبي روحو توكلو بالله
رحنا للامام وصلنا لحضرته لزمت شباكه وابجي من گل گلبي اتوسل برب العالمين بجاه الامام عنده يرزقني

واني ادعي واشكي همي رغم هوسه وادفع وكل شويه اگلي دفره بطني دخيلك ياسيدي ومولاي الناس تتشمت بيه اتعاير بشى مو ذنبي بشى من ارده الله محد يكعد يعوفني بحالي صرت شماته لليسوه والمايسوه يحسسوني اني ناقصه وبيه خلل كامو يخافون على جهالهم مني يعني بعدني سنه وهذا حالي من تمشي السنين شلون دخيلك ياموسى ابن جعفر ياباب الحوائج ياطبيب بغداد اذا بيه عله شافيها بأذن الله واذا مابيه يارب ارزقني وانت الرزاق بجاه باب الحوائج وحضنت الشباك وبجيت من كل گلبي

انداريت واشوف سليل واكفه على الحايط گبال الامام ولازم دعاء الزياره وتبجي بهدوء المشكله اعرفها تعبانه ومقهوره بس هاي سليل متتغير طبعها هذا رجعت لحياتها بس گلبها وروحها وياه سليل من الناس الحبهم يكون نادر مينسون لو شكد متمر السنين

سليل : واكفه گبال الامام وادعيله اي ادعيله بلصحه والسلامه صار سنين مااعرف اي خبر عنه بيه شى متأذي عايش وين ما وين وهذا الشى يتعبني اكثر رغم كل الصار بينا بعده يملك گلبي ليش اغالط روحي مجرد مينذكر اسمه گلبي يكمز من مكانه مااطلب بس يكون بخير وعافيه لان اختفائه حيل طول
كطعت كل اخباره حتى عن اهلي ميسأل زين گلبه ما حن ماكال وينها شلونها لهاي الدرجه مااجي باله ونساني
نهر : هاا يمه گملتي
سليل : اي بس اصلي صلاه الزياره ونطلع
رشا : كمنا الزياره ولكيت شعلان مكمل واكف عند باب القبله احد بوابات الخارجيه للصحن الشريف
شعلان : هااا شبعتن زياره
نهر : هو ينشبع منه ياشعلان لو اضل العمر كله يله امشو نرجع مضل وكت
مشينا ورشا وشعلان ورانا
شعلان : هاا حبيبي ارتاحيتي
رشا : اي الْحٍمَدٍ للـّہ
شعلان : ينطيج مرادج
رشا : ومرادك
شعلان : مرادي واخذته انتي جنتي مرادي وهسه بحضني شريد بعد
رشا : هههههه اوف منك دومك تكدر تسكتني
شعلان : والله انتي اذا انفكيتي شيسكتج لو اعيط لو ابوسج بس بهاي الطريقتين
رشا : هههه كافي عفيه ليسمعون
شعلان : بعيدين ميسمعون
رشا : اخذنا لفات ورجعنا مكدرنا نبقى كاعدين ناكل لان مبقى شى على ممنوع التجوال

ورجعنا للبيت وبابا حبيبي جان جاي حضنته اوووف شكد مشتاقه اله واليل كله سوالف وضحك ويه البنات سهرنا للفجر وشعلان جوه نايم بلهول
وثاني اليوم الصبح تريكنا ورجعنا للكوت تمنيت ابقى بعد مااريد ارجع بس شسوي مجبوره ارجع لبيتي واترك اهلي

وره شهرين كاعده اطبخ واحس نار بجسمي شبيهه ماادري
اجه شعلان وكتله بلبدايه مهتمينا بس زادت الحاله والنفس يضيق عندي والاكل ريحته تضوجني خفت اكول اخااف حامل لان من كثر مسويت اختبارات كمت استحي حتى اطلب اختبار حمل ومدري شلون اجت هند وطلبت منها كلت حتى لو تحجي افشل يمها ولا أمل شعلان وهي مجذبت خبر ركض جابت الاختبار ودخلت كل ثانيه تمر والله اسمع دكات گلبي وجان يطلع خطين من الفرحه طلعت ابجي واحضن بهند الي دوم مكافش اني وياها واكول الها حاامل والله حاامل
هند : كلللللووووش لا لا مااصدك امشينا للمختبر
رشا : وشعلان
هند : ولج امشي هسه نخابره

وخابرناه واجه يركض واخذني وطول الطريق ساكت احس بيه خايف يطلع حمل كاذب واخذو الدم مني اشوفه شلون يمرد بلسبحه لحد ماصاحو اسمي وكالو حاامل طلعنا كاال مبروك بكل هدوء وحتى هند سكتت هذا شبيهه وصلناها لبيتهم خافت تنزل ويانا بس دخلنا للبيتنا جان يحضني ويبجي
شعلان : ممصدك راح اصير اب رشا راح اصير اب مو
رشا : حضنته حييل ياروح رشا اي والله اي والله حاامل واعيط بأعلى صوتي رحمتك ياارب حااامل ياناس اني حااااامل

ريم : ريم : هاي السنه الاخيره الي مبقى شى واخلص سحليه مو مثل قبل ويايه لان ويه ابوه بس بالاسبوع مره يمر عليه يشوف شكوو ماكو ويروح بس سالفه الطبيب دوم ويايه
وبيوم كاعده العب بلتلفون اشتريت جديد بابا بدله اليه جان سامسونك اس 2 وفرحانه بيه ودك تلفوني رقم غريب ومبين مو من العراق ترددت اشيله وانكطع بقيت الوب
غزل : شبيج ترحين وتجين اريد اقرا
ريم : رقم دولي
غزل : جاوبي وشوفي منو اول تالي تخافين
ريم : باع هاي يااخاف يكولون الارقام الدوليه يبوكون رصيد
غزل : هاي شبيج ريمو شيلي على اساس تلفونج مليان رصيد
ريم : هم صدك هو مابيه وجان يرجع يدك فتحته وصحت الو واسمع صوته نبرته ولا تغيرت عرفته بسرعه من كال شلونج زيبك
مباشره دمعت عيني وكلت عموو سجاد
طفرت من مكانها غزل
غزل : عمووو صدك

سجاد : شلونج
ريم : الْحٍمَدٍ للـّہ انت شلونك وينك ضل بالنا لا تخابر لا تسأل منين حصلت رقمي
سجاد : من محسن خابرته همزين رقمه القديم
ريم : اي ممبدله
سجاد : خابرته وكتله اريد ارقامكم انطاني رقم طة وسألته اذا رشا او انتي عدكم ارقام كال رشا تزوجت لهذا كلت اخاف اخابرها زحمه ورجلها ميقبل
ريم : خلي يطير شنو ميقبل غير انت عمنا واخونا الجبير
سجاد : اعرف والله وانتم بعزيه روحي بس هم زحمه
ريم : مبين من هيج طفرت وعفتنا اذا بعزيه روحك
سجاد : طمنيني عنكم
ريم : خابرت بابا

سجاد : لا بعدني كلت اسمع الاخبار منج اعرفج الجزيره مو مثلج
ريم : ههههه والله مشتاقين كولش الك ليش ياعمو هاي تاليها انتم بينكم احنا شنو ذنبنا كلشي منعرف عنك والله خفنا لصار بيك شى
سجاد : مابيه لتخافين
غزل : خلي اسلم عليه الله عليج
ريم : هااج
غزل : هلوو عموو
سجاد : منو
غزل : معرفتني اني غزل
سجاد : ولج كبرانه معرفت صوتج مال وحده شابه
غزل : ههههه غير كبرت ياعمو صرت خامس اعدادي
سجاد : ماشاء الله والله العمر يمشي ومنحس بيه
شلونج انتي باباتي صحتج وضعج بلدراسه
غزل : كلش زينة والحمدلله انت شلونك
ريم : انطيني يمعوده مو وكت سوالف اريد افهم وجريت التلفون
سجاد : ماعقلتي
ريم : وربك تخبلت بلزايد والحمدلله

سجاد : الله يعينهم عليج سمعت تكج اتزوجت
ريم : وانت تزوجت
سجاد : شتتوقعين
ريم : جم حاهل صار عندك بربك
سجاد : ماعندي ولا تزوجت الي مثلي ميتزوج يضل بطرك روحه احسن
ريم : ابتسمت بدون مااحسسه واجه بالي فكررة
سجاد : شلونهم اهلج

ريم : اووو اذا احجيلك اخبارنا والي صار مااخلص الحجي ب٣ ايام بس بلمختصر عمه زينه كما هي ودوم تدعيلك والله وتفكر بيك وحيل خايفه لا بيك شى بيبي انعال رجعت عسااها لا شافت يوم زين
سجاد : شرجعها
ريم : حظنا
سجاد : خوما مسويه مشاكل
ريم : كاعده وساكته بيتها مخلصتها اطباء وادويه ضغط وسكر بيها هي غير تموت
يااا نسيت هي عمتك
سجاد : بعد وكت كملي
والباقين
ريم : اني اعرف هو شنو يقصد وبقيت اماطل بلحجي وحجيت شويه عن بابا وحسام والخطف وخساره بابا وجنات وسالفتها وزواجها اوووو موعت اذنه اكثر من ٤٠ دقيقه طبعاً قبلها اشرت لغزل تسد الباب مااريد سليل تدخل وتعرف احجي ويااه لحد مطك متحمل وكاال
وسليل شخبارها

ريم : الْحٍمَدٍ للـّہ فدوه لله ابنها يخبل باوعت غزل فتحت عينها
سكت عمو حسيته اختنك كووه طلع الكلمة وكال
ابنها ليش تزوجت

ريم : اووو من زمان وابنها عمره سنتين يخبل عموو ينكرط يشبهه خالته الي هي اني
اباوع غزل تلطم وتعض بأصابيعها اوخرها تريد تجر التلفون وتكل جذب ضربتها على رجلها وكعتها بلكااع
عموو تسمعني
سجاد : من خابرت محسن مكال تزوجت
ريم : يجوز نسه لان هي عايشه بعد بيتين عنا لهذا ميحس بفراغ دوم يجي يلكاها يمنا سمعت صوت طكت الجداحه ابتسمت والله اشتاقيت لصوتها من يدخن جر نفس قووي وكاال
سجاد : تزوجت سيف مو
ريم : لا ياسيف ذاك راح الله يرحمه
سجاد : ماات
ريم : لا قصدي راح لحال سبيله واخر مره سمعنا بيه خطب

سجاد : المن تزوجت
ريم : واحد لا خيره عليك ذهب صافي ويموت عليها والحمدلله مرتاحه وتعينت وضعها كلش زين سكت شويه وكاال
سجاد : اروح اني عود بعدين نتخابر
ريم : هذا رقمك موو متغيره
سجاد : اي رقمي ولتكولين لاحد خابرت
ريم : صاار عموو مو تكطع مع السلامه

غزل : صخام بوجهج ياريم اذا عرفت سليل والله تذبحج
ريم : يمعوده خلي يضوك الي عايشته
غزل : ليش مو خطيه متحبي لعمو
ريم : كلش احبه وتعرفين بيه بس من اشوفها شلون تالي الليل من تختنك وتصعد بلسطح حتى بس تتنفس اموت قهر عليها هلي يعيش الي تعيشه شويه
غزل : وشمدريج هو معايشه
ريم : حتى لو عاش اكيد مو مثلها هو تحمل بحدود ٤ سنوات بدونها شلون ميشتاق يعني هي لو عدها رقمه تتوقعين متخاير متسأل متطمن عاشت ايام سم بدونه
اريده يعيش وكأنه هذا الشى صار يعني لو نفرض اختج الفطيره ناسيته مجان هسه متزوجه وعدها جهال
غزل : بس كذبتج قويه حيل

ريم : خلي يومين واخابره خلي شويه يضوك الضاكته يمعوده لو مستفادين من صعدت السطوح مالتها ومربين دجاج وطيور جان هسه انافس ايران وتركيا بلدواجن غير يوميه صاعده للسطح اقلها تربيهن وتكثر الانتاج
غزل :والله لو تعرف سليل واخاف يطفر وبعد يضل العمر كله عباله تزوجت
ريم : لتخافين عمج راجع وبأقرب وكت مخابرته حتى يعرف الوضع شصار عمج حن واشتاق ومالكه غيري يسأل عنها لان يعرف كلشي ادري بهذا البيت وراد يعرف حبت غيره لو لا

غزل : الله وكعه بيد المترحم الله يعينك ياعمي شراح يخلص هليومين
ريم : يخلصن ذيج اختج خلصت ٤ سنين تلوب وتصيح خاف بيه شى واعرف بيها تفكر اخاف اتزوج ونسانها اله اخذ حقها مربع منه بس الله عليج مو تحجين
غزل : شحجي غير تسحل البيت بيج هسه
ريم : عفيه واني اذا سحلت البيت بيه اسحل الشارع بيج
غزل : سكتت مااحجي
بقيت اليوم كله فرحانه تكول لكيت كنز هم رقم عمو عندي وهم حرگت گلبه
وعفته ٤ ايام ومتصلت خامس يوم دكيت شاله وجان صوته كلش تعبان
هااا عموو شبيك

سجاد : مابيه شويه خربطه بلضغط
ريم : اوي ياعيني عليك عمو حبيبي متستاهل سلامتك
سجاد : الله يسلمج زين حفضتي رقمي
ريم : ههههه غير رقم الهارب من عدنا
سجاد : افضل الي والكم
ريم : يعني مترجع بعد للعراق
سجاد : لا مكاني هنا وحياتي هنا اني كلت اصير زين واخابر نهر انطيني رقمها حتى اطمن عليها
ريم : صار تدلل ودزيت رقم سليل اله
هااك وهسه هي تنتظرك
يله عموو هاااا نسيت شى
سجاد : شنوو

ريم : تره سليل ممتزوجه
سجاد : هاااا شبيج ريم
ريم : عمو سليل اختي الجييره زوجتك سابقاً ممتزوجه
جان يعيط حيل وكاام يغلط بأعصاب ادبسسز طايحه الحظ شوكت تكبرين رغم شكد جان عصبي ومنهار وغلط عليه بس فرحت معناه مرضه وتعبه لان عرف هي متزوجه ولك ياعمو بعدك تحبها وجان يعيط ولي خلي اخابر نهر واتأكد منها وسده بوجهي ركضت طلعت من الغرفه جانت سليل تثرم تسوي كباب عروك وكفت يمها وين تلفونج
سليل : فوك بلغرفه
ريم : صعدت ركض ولكيته يدك اااخ الله وركض تكول عدائه وانطيته الها هاااج
سليل : يمعوده جاوبي متشوفيني اشتغل
ريم : انتي جاوبي
فتحته وحطيه على اذنها
سجاد : الووو
سليل : مو كال الووو لا كال هااج روحج ردت الج

يتبع .....