رواية ابي والغزلان الفصل الثاني عشر 12 - بقلم ريام هادي

ابي والغزلان
للكاتبة Reem

مساء الـ🥀ـورد لأحلى المتابعين

اكيد كلكم تعرفون هذه الايام العظيمه والمصاب الجلل استشهاد سيد شباب اهل الجنه الحسين (عليه السلام)  عظم الله لكم الاجر لهذا راح يتم توقف القصه احتراماً لهذه الايام وكذلك بسبب التزامي بالشعائر الحسينية وانشغالي بشكل كامل لأحياء هذه الايام العظيمة واكيد اكثركم مثلي
ويتم اعادة تكمله نشر القصه يوم الخميس القادم الساعه ١١ مساءاً
ان شاء الله اتمنى تفهموني وبدون تجاوز رجاءاً
البارت اليوم طويل وخففت القفله حتى لتضوجون وانتظروني بأحداث مفاجأه وغريبه من قصه (ابي والغزلان )
استودكم الله وربي يحفظ الجميع
تحياتي

البارت الحادي عشر

گالتله هنيال التحب مثلك ولف
گاللهة يعني بمختصر هنيالچ
گالتله ترضه اتغزلك
گللهة غير انتي الغزل يحلالچ
گالتله بس عندي طلب
گللهة گولي كلشي بي يجرالچ
گالتله تنطيني وعد
گاللهة اوقع ع البياض اگبالچ
گالتله سري بذمتك
گاللهة مو زلمه اليخون اسرارچ

نهر : بدا اليأس يسيطر علية وحالتي صعبه وامي وعلي كوه سكتو اسبوع عني وجان اسمع هوسه جوه فتحت الباب ونزلت اركض
واشوف انعام لازمه طه من بدلته مال عسكريه وتكوله على موتي تاخذها
بقيت فاكهه عيني مدري افرح لان اجه طه وسامي كد كلامه وخلاه ينزل مدري اخاف علية من امي وعلي مشاعري مخربطه ومعدتي انگلبت من الخوف بحيث مكدرت اوكف على رجلي كعدت على الدرج وعيوني تصب دموع ونوريه واكفه ورايه وبس عياط انعام وطه
انعام : انت من كل عقلك تاخذها وتطلع
حجي طه : شوفي ام علي حتى مينطيني گلبي اكول الها يمه من الشفته منها
گلشي اقبل بيه اخذتي فلوس ابويه وگلت الفلوس متعز صاحبها ولا تكبر شانه ومكانته وعوضي على الله طردتيني من بيت ابويه هذا البيت الفتحت عيني بيه وماعرفت غيره وگلت ماطول ابويه وجعفر ماتو شلي بيه مو اغلى من الراحو اجيتج ابوس ايدج بس حتى تنطيني جم فلس تساعديني بتي بين الحياه والموت ذليتيني ولوما ستر الله وهاي المسكينه جان بيتي راح وابقى اني وجهالي بلشوارع تتصدق الوادم علينا وهم گلت  الْحٍمَدٍ للـّہ عدت سلامات كل فتره مسويتلج عركه بس تردين تسوين مصيبه مثل متبليتي علية عود اني ضربتج وخليتي علي يضربني سجينه ولوما ابويه وكف بعيني جان خيسته بلسجن بس گلت شگول لأبويه والناس وهم سلمت امري بيد الله هو ياخذلي حقي
بس مال تزوجين نهر لسعد العرگجي لهنا وكافي وصلت حدها

انعام : ولك حقير تحاسبني اني ابوك كولشي كتب بأسمي عود مسوي خير براسي وساكت امشي لك تريد روح اشتكي ذاك الحايط واركع راسك بيه ومو انت تصير رجال براسي وتمنعني ازوج نهر هاي بتي وبگيفي عسى ما احركها
حجي طه : لا مو بكيفج وغصب عنج اخذها ومتزوجيها لو اعرف اسويها دم
انعام : هاي هيه مبقى علية بس ابن رازقيه صاير رجال ويهدد ولك بلابسته برجلي احطه على راسك وادوسك بيه مو تجي تالي وكت وتمشي كلامك علية امشي لك اطلع بره لا اطيح حظك
حجي طه : (بصوت عالي ) نهر كومي جيبي ملابسج ومستمسكاتج وخلي اشوف شون توكفيني
نهر : اني وكفت على حيلي من عاط وامي لزمته من ملابسه وتعت بيه وهو لازم ايدها ويريد يفكهه منه جان يدفعها
واني كمت الطم شسوي ياربي هي من شافت هيج انزعي النعال واركضي اضربي لزم ايدها واني ونوريه نزلنا نركض نريد بس نفاككهم جان يعيط بيه حيل ولج نهر شگلت اني روحي جيبي ملابس ومستمسكاتج
من الخوف بقيت صافنه بوجهه رجعت عاط بقوه اكبر ودفعني بجتفي روحي

ركضت ليفوك بكل سرعتي وبس اسمع عياط وغلط امي علية لميت كم قطعه جسمي يرجف حتى ماركزت شخذت ركضت وصلت يم الباب مال الغرفه ورجعت المستمسكات واخذتهم باوعت بعدني بجامه البيت نزعتها بسرعه ولبست شون مجان وبلنعال ونزلت اركض وجان تشوفني امي وركضت بأتجاها ولزمت شعري
انعام : بت الگلب وين رايحه عبالج اخليج اطلعين منا لو ميته لو لبيت سعد
نهر : ااااخ يمه عوفيني
انعام : ولج اني تقشمريني بت النعال اني الاكبر منج افرهم بأصبعي تجين تتفقين ويه هذا المهتلف علية ولج شوكت شفتي وشون بلغتي
نهر : اني بس ابجي وشعري بيدها جان يسحب ايدها حيل طه ودفعها وطلع سلاح من ظهره احنا شفنا لو متنا حتى امي صفرت بسرعه
حجي طه : وروح ابويه اذا مديتي ايدج بعد لا اكتلج بمكانج
انعام : ولك تشيل سلاح علية اني الربيتك
حجي طه : هسه يله تكولين ربيتك
انعام : صدك الناقص يضل ناقص غير ابن رازقيه شترجى منك مو اخذت رجلي مني وعاشت سنين خاتله هو الامه ساقطه شتوقع خلفتها
حجي طه : مااجاوبج لان هلمره خلص الحجي كلمة ثانيه اكتلج وخلي شيصير يصير
جان تعيط ولك يمه علي سلام وينكم امك اتعدى عليها الناقص
حجي طه : خلي يجي علي حتى اقلها ارجعله السجينه الشك بيها بطني وافرحج بدمه

انعام : ولك تگتل اخوك
حجي طه : طبه مرض هو مو ضربني ومدار بال والله اخلي دمه بطوله وكدامج وعود خلي يفيدج عنادج
نهر : فدوة طه امشي قبل ميجون الولد وتكبر
اشواق : تخبلت هسه الولد يجون يلعبون بيك طوبه ولج نهر اصعدي واستري علينا راح تصيح طواحن من وراج
نهر : مباوعت حتى بوجهه اني بس انتظر شراح يصير ودموعي مراضيه توكف
نوريه : ابوحسام نزل السلاح بروح جعفر شجاگ هاي عود انت العاقل
حجي طه : ذوله يخلون المسلم يكفر وخري نوريه مني انتي حامل ومااريدج تتأذين
انعام : ولج نهر يمصخمه وين موليه وروح ابويه اذا طلعتي لا اخلي اخوتج يكتلوج خلاص وادفنج بيدي
نهر : يله طة امشي
انعام : ولك طه لتاخذها لتفضحنا
حجي طه : انتي تحجين على الفضيحه مستحيتي من تردين تزوجين بتج لسعد ملكيتي غير ابو العرگ هذا وتعرفين اخلاقه زباله وابويه جان صايح الغوث منه شكال گلبج
انعام : الرجال مينعاب وشاريهه انت اطلع منها
حجي طه : يامينعاب وهو العيب نفسه شتكولين لله بعدين من تشوفين بتج مكسوره وتحت رحمة واحد ساقط بس انتي اخرفيتي عمتج الفلوس لان عنده فلوس كولشي لغيتي بس وروح ابويه مااخلي يلزم شعره منها
انعام : ولج نهر اصعدي بت الزفره تردين تسمعين كلام هذا وين ياخذج يم سندس تكفخ بيج تخبلتي تعيشين بحسره الكمه يمه

حجي طه : امشي نهر لزمت ايدها وطلعنا من البيت
جان تركض ورانا وتريد تلزمني رجع دفعها طه اقوى وكعها بلكاع وسد الباب وطلعني اني بس ابجي ولازمه ايده حيل وميته خوف واسمعها حتى كامت تكفر من الاعصاب وتلطم وتصيح ولكم جيبولي علي وسلام اريد ياخذولي حقي اليوم ادفنك يم رازقيه ساقط
طلعنا جان يصير گبالنا سامي متت خجل اكيد سمع كولشي دنجت ومسحت عيوني وبعدني لازمه طه حيل واخاف اعوفه احس بس اعوف ايده راح تاخذي انعام وترجعني للجحيم

سامي : عاشت ايدك يله امشينا
حجي طه : وين
سامي : امشو ويايه للبيت
حجي طه : شعدنا بيتك هذا بيتي وتبقى يمي لحد ماانت تكمل اجراءات العقد
نهر : رفعت عيني لا ارادياً يعني راح نعقد اني وسامي ااخ گلبي مديتحمل مره خوف مره فرح شون بيه احسه راح يوكف من كثر الخفقان
سامي : اني باجر بأذن الله مكمل كولشي بس اذا بقيت هنا شمدرينا شراح يصير هسه كلها ساعه ساعتين يجون اخوتك ومستحيل يسكتون واكيد راح يحاولون ياخذوها منك امشي لبيتي اسلم وأمن ومن نعقد بذاك الوكت يركعون راسهم بلحايط محد يكدر يندك بيها
نهر : وجان نسمع صوت الباب انفتح وركض اجت سندس تعرف شصار جان تمد راسها

سندس : هاا طة شصار وشنو هذا العياط البيت انرج من عياطكم
حجي طه : على اساس مسمعتي شى شو كولشي اتسمعين اول بأول
سندس : ولج نهر شجاج هسه امج تگلب الدنيا فدوة احنا مو كدها ارجعي لبيتج
جان يعيط طه بيها طبي جوه واخذي جهالج ولتدخلين
سندس : وليش تعيط علية فوك ما خايفه عليك هسه يجي علي يحرك البيت عليك وعلينا شنو مجبوريتنا بهاي المشاكل
حجي طه : ادخلي جوه لااذب حركة انعام
سندس : هاي جيتك فوك ماتجي لبيتك وجهالك وبتك المريضة حايرلي بنهر والله متريد تتزوج والله ناس فارغه
حجي طه : والله ماكو لغيرج فارغه ويراد اهطرج حتى تلزمين لسانج
سامي : يله طه استعجل امشي مو وكت عركات
امشونا
نهر : اخذ جنطته طة وسوده علية بعده بهدوم العسكريه وبقينا سندس واكفه بلباب بس تباوع ومشينا جان يجر علاكتي سامي من ايدي اني عفتها لان مابيه حيل اشيل روحي من الهبطه والعركه مو عاد اشيل غراض وصلنا لبابهم جان نتجاوزه وكف سامي
سامي : وين يمعود نسيت بيتنا
حجي طه : بيتك مثل بيتي مسوينا شى واكيد هسه من يدورون على نهر بيتي سندس راح تكول جان سامي وياهم يعني مسوينا شى وفوكاها بنفس الفرع اني راح اخذ نهر لبيت محسن نبقى هنا وبس تكمل الاجراءات تعالي انت تندله
سامي : شون ترحون لهناك طة ميصير
حجي طه : يصير وهمه خوش ناس واعرفهم مو انت تخاف على اختي اكثر مني
دنج سامي مستحي وكال بكيفك بس اريد مستمسكات نهر

نهر : اخذت الجنطه وطلعتهم وانطيتهم لسامي وحتى مباوعت بوجهه استحي واكف طه الماعرف شراح يكون كلامه ويايه من يرتاح راح يلومني لان احب سامي  لو شون
صعدنا تكسي ومشت بينا السياره واني صافنه على الطريق الصار اشهر مطالعه من البيت شون وحده جانت بسجن وهسه طلعت اباوع شون متغيره الشوارع والجو بارد يهدأ الروح
وصلنا لمنطقه صديق طه اني مشايفته بس اسمع عنه
دك الباب طه فتحه ولد شاب بكصه طة واني واكفه بعد مسافه بس اشوف واضح
محسن : ها ولك بشر المن گتلت حتى الم هدومي قبل ما ابوي يطردني
حجي طه : مكتلت احد
محسن : طلعت بوخه بس كادر علية وجيب سلاح ودي سلاح اني گلت هسه كاتل ١٠ وجرحى ٢٠ ومأسر ١٥
حجي طه : شنو بلجبهه اني واحارب وهو مسدس شمنطيني مدفعيه

محسن : هاي منو وياك
حجي طه : اختي هاي اريد ابقى يمك يوم لباجر نروح اذا مااسوي زحمه
محسن : وحتى لو زحمه قابل ابيتك بلشارع هو اني حسين وماادري بروحي خلفتك ونسيتك تعال ادخل تفضلي اختي البيت بيتج
حجي طه : تعالي نهر ادخلي
محسن : خلي ابلغ الحجيه وزوجتي تعال طب
نهر : بيتهم حلو ونظيف دخلنا للصاله وشويه وكال تفصلي اختي الاهل جوه ينتظروج واشرلي على غرفه ثانيه تمشيت بأتجاها
دخلت لكيت مره بعمر امي وبنيه شابه طلعت زوجة محسن حلو وجهه بشوش حامل مبين بشهرها
ام محسن : هله يمه زارتنا البركه
نهر : شكراً خاله
كعدت يمهم حبابين كولش طارو بيه ويضحكون ويشاقون ابد محسسوني اني غريبه بحيث نسيت كل الصار قبل ساعه وبديت اضحك وياهم تمنيت اهلي هيج مو بس مشاكل وعركات وناس تحقد على ناس

محسن : ولك شصار احجيلي
حجي طه : مصار شى هي يوم وتحملني بدون اي سؤال
محسن : غير اموت مااتحمل اذا ماافهم شصار
حجي طه : هذا فضولك بيوم يگتلك
محسن : هسه اذا محجيت اموت الشغله بيها سامي مو
لتباوع صفح اني حسيت من جيه سامي ولك راد ينجلط بس اخوك انقهر علية ومباشره اجيتك
حجي طه : هسه شتريد محسن ولدوخني
محسن : احجيلي بروح ابوك شصار
حجي طه : وكعدت سولف اله شغلات بسيطه حتى بس اسكته شو هذا كوم اوكف وطك اصبعتين
محسن : يعني باجر عدنا عرس
حجي طه : وانت شكو
محسن : غير اخت صاحبي واذا انت متقبل اروح وياكم اروح ويه سامي اطلبه كراوي الروحه والرجعه اطلعهن من عينه
حجي طه : هو لازم شهود اخذك ويايه امري لله
محسن : ولج اسراء اسراء
جان تمد زوجته راسها واني دنجت
محسن : اليمج عروس باجر كطع المهر مالتها اريدها من ايدج
حجي طه : ولك شهرتنا الله يخزيك منو يكول يكمل المعامله باجر
محسن : مالج دخل بيه باجر او عكبه ماكو فرق اريد سامي اذا شافهه ينثول بلكت الله يزيد الكروه وميدري بروحه

اسراء : صار من عيني
حجي طه : الله يساعد المره عليك شون متحمله خبالاتك
محسن :شبيه اخبل بس انت تستهين بقدراتي المره ايدها ذهب شوف وجهي من تحفه تسوي بقلاوه انوكل من الحسن
حجي طه : ياحسن هذا خليني ساكت موزين مني صار سنين مكابلك وكاعد جنك الشمر
محسن : هو اني لو انت جنك وحشي بس مخلوس وكاعد وعيونك يمنه ويسره  وفجأه كمت تعيط موزين مصار بيه جني من وراك تتذكر مره من كعدت بليل وانت نايم تصيح لا اله الا الله بعلو صوتك اني كعدت مخروع گلت شيعونا اباوع عليك عركان وتصيح گلت هسه اذا ادفرك احد يلومني
حجي طه : على اساس انت كعدت عاقل تتذكر شسويت
محسن : غير اساعدك تصعد روحك الخايسه
حجي طه : كعدت لكيت شمعه يم راسي وتصيح من هو ربك منو هو نبيك خليتني انخلس ويوم كامل كضيتها بلحمام يمكن صعد الضغط من الهبطه

   محسن : گلت اساعدك خاف محتاج مساعده ههههههه شغل وره الجيش تحضير الارواح اني اصلاً زين مني كاعد ويه واحد ميت من الستينات من اشوفك احس القيامه راح تصير ولازم اتوب لله وجه الميت بس تنوح يمي من شفتك ماشفت يوم عدل بيه بس ايام الگليجه وطيرتهم من عدنا رجعنا على صمون الجيش يشبه وجهك الفگر

حجي طه : كوم جيبلي استكان جاي راسي راح يطك
محسن : ليش نفخته زايد هههههه
حجي طه : شكد سفيه يول اثكل موراح تصير اب
محسن : عود احط چم حجاره بجيبي حتى اثكل واذا صرت اب لازم اصير راهب انعل ابو ابني شنو ابن لو سجن اصلاً ابني اله اخلي دايح بلشوارع ومااخلي بنفسه بنيه اخلي يصادقهن گلهن واشرط علية حلوات وعدد زوجي يعني يصادق اثنين اثنين
حجي طه : شمعنه
محسن : وحده الي وحده اله لعد بس اخلف ومااستفاد غير اطيح حظه الصرف الراح اصرفه المن حتى يصادق وحده وابقى اتفرج علية واتحسر
حجي طه : هههههه وين المره خلي تسمعك
محسن : اسكت مثل الجاهل بسرعه تريد تخرب علية اشاقه
حجي طه : متأكد مو تحبها واخذتها عن حب
محسن : غير اساعد ابني قابل اعوفه حتى الله ميرضاها
حجي طه : لا يابوي ساعد عمي احسن اب انت زين واذا اجتي بنيه
محسن : هاي حطيت عينك وتريدها بنيه حتى النسوان اطير
حجي طه : واذا بنيه شون
محسن : اصادق صديقاتها ومعلماتها وحتى المديره مالتها
حجي طه : خرب ببليسك كوم اريد جاي

شويه وجاب اكل وكعدنا ناكل محسن دمه يلعب وطيب وماعنده اذيه يضحك للهوا والله منطي اهل نفس ذبته
نهر : دخلت زوجة محسن علية
يله عروستنا اليوم اسويج تخبلين
ام محسن : ليش باجر عرسج يمه
نهر : خجلت حيل وكوه طلعت الكلمة مني باجر كطع الحق
بلخير حبيبه وبوسني وماكو خلال ربع ساعه حظرن كولشي حتى يرتبوني حفافه وترتيب حتى لجسمي بس اني مقبلت كتلهم بس وجهي لان بعده مو هسه العرس
بدت تحفلي وترتب حواجبي ولان محافه بحياتي تغير وجهي كله
ام محسن : صلوات على النبي يمه طلعتي تخبلين ولو انتي من الاول حليوه
نهر : اخذت المرايه وشفت وجهي شون مرتب ونظيف والحاجب مشمور لزمت شعري تمنيته طويل مثل گبل
اسراء: خلي ادرج شعرج وارتبه مكصوص اعوج
نهر : متدري امي كصته عقوبه لان ساعدت اخويه اشرت براسي بلقبول حتى ترتبه اليه ماشاء الله عليها فنانه ورتبته طلع كولش حلو وجهي كله تغير حبيت التغيير الصار
وكعدو يصفكون ويغنون اليه واني اضحك مستحيه بقينا اليوم كله نسولف ونحجي اشكال محسيت بلوقت يمهم
وصار موعد النوم وحطيت راسي على الفراش الحضروه اليه اباوع على الساعه شون تتحرك وصافنه بزماني وين راح يوديني وامي شراح تسوي اذا عرفت راح اتزوج من سامي هي لهسه عبالها اخذني طه وطلع متدري راح يزوجني

ثاني يوم مكملت المعامله وهم بقينا يمهم اسمع محسن وسامي وطه بلهول يسولفون وخايفه كولش لا متكمل
وثاني اليوم  الْحٍمَدٍ للـّہ كملت معرفنا امي شسوت بعد مامشينا وحتى طة موصل لهناك بس كال سامي اجه علي يدور علينا يمه مثل متوقع طة صار
لبست كوستم نزلته اليه اسراء مال مهرها جان كولش حلو بيجي فاتح تنوره وستره جديد كالت بس لبسته على كد المهر ونزعته واني وياها طلعنا نفس الجسم رغم هي سمنانه لان حامل لبسته ورتبت شعري وحطتلي شويه مكياج كالت وجهج اصفر ونزلنا وصلت يم طة واني ميته من الخجل اول مشافني باسني من راسي وكال يله عروستنا بلحظتها محسيته اخويه حسيته ابويه ولازمني من ايدي
اخذنا تكسي وصلنا للمحكمه وجان سامي وابوه واكفين ينتظرون
رجلي كوه شايلتني اريد امشي مااكدر مدنجه وجان يكولي سامي
سامي : يله يانهر گلبي راح تصير حلالي ابتسمت على كلامه ودخلنا للقاضي لحظات من عمري خوف وسعاده من علن القاضي صرت مرته غمضت مردت افتح عيني ليطلع حلم طلعنا من الباب واسمع هلهوله عاليه ضحكت ودنجت طلع محسن
محسن : ماكو مره تهلهل اني موجود
سامي : ولك انت وين اكو مثلك ابو الشدايد والوكفات الحلوة
بوسه وباركله وجان يكوله بس لتنسى الكروه
سامي : ههههههه والله مناسيها ديانك مينام الليل

نهر : تقرب طة علية ومثل كل مره باس كصتي اعشق بوسته من راسي وكصتي كلها ابوه واخوه نزلت دمعتي وهو يكولي بلخير حبيبة اخوج وروحه حضنته وبسته وكتله الله لايحرمني منك ومن حنانك
باوعت على سامي وهو لو بيده يحضني من الفرحه بس مستحي لان واكفين بست ايد عمي وهو خطيه باس راسي وباركلي
محسن : يله ياجماعه الغدا يمنا اليوم
حجي طه : خلف الله عليك ومقصرت بس لازم نرجع للبيت الحمدلله كطعت مهر بعد ماعدهم شى وميكدرون يسون شى
محسن : ولك طه غير البيت مخبوصين وبلغتهم
سامي : والله انت ذهب واصله عزومتك غير مره
محسن : شوفو اذا متجون تتغدون وروح جدي ازوعكم فلوس الاكل صارف كومه ومتاكلون غير احرگم
حجي طه : والله ماله داعي
محسن :امشي على الغدا لا المره تنومني بلحديقه غير بطنها واصله لخشمها وتطبخ وارجع وحدي لازم انام يمكم وابويه شيخلصني منه امشو لا اعيط هنا واكلهم باگوني
حجي طه : هههههه تسويها يله يابه امشونا
نهر : رجعنا كلنا بس ابو سامي اعتذر لان عنده خطار يجون محافظات
وصلنا لبيت محسن وبلكراج طلعت امه اطش جگليت وتهلهل دمعت عيني شگد ناس طيبه تمنيت امي توكفلي هاي الوكفه وتفرحلي  الْحٍمَدٍ للـّہ على كل حال
واشوف محسن يدبج ويه امي ويهوسون

خدهه طماطه لاتكول محمره
اجه العريس والكذله تهفيله مدري شكالج وانتي غمزتيله
محسن : يمه ياگذله دشوفي جنه ديج مهلس شعرايتين كوه موكفهن
ام محسن : ولك اسكت من دهر صابك شبيه يخبل العريس
سامي : عوفي حجيه بعد محسن يشوف نفسه عمر الشريف
محسن : اسأل مرتي تشوفني حتى احلى من عمر الشريف بله اسكت وحير بكذلتك
ام محسن : كذله العروس مو كذله العريس
محسن : لا يمه انتي گلتي كذلته
حجي طه : يابه ولا تضوج كذلتي اني
محسن : لابربك انت هم عندك گذله خرب حظي البازه اذا صدك
حجي طه : اياك تعيب علية تره واصله حدها وياك
محسن : بس هاي بس هاي الله عليك
حجي طه : اششش اسكت
محسن : يمه مو جنه ام حمزه العوره صاحبتج
ام محسن : ههههههه ولك صخم الله وجهك تعالو يمه ادخلو وليدي طاك بيه فيوز
حجي طه : حجيه الله عليج شونها صاحبتج
ام محسن : يمه خليها سكته وسمي بلرحمن وادخل من الجبهه محسن شخط اذا تشوف صويحبتي تنجلط يمه ادخل وخليها سكته

نهر : دخلنا للبيت نضحك كلنا وخطيه حايرين شمسوين اكل اني كمت ساعدت البنات الي سوه اهل محسن مينسي جانو احسن من الاهل
مكعدت ويه سامي ولا شويه لان الوضع ميسمح وللعصر تشكرنا منهم وطلعنا من البيت اني وسامي وطه كعد بصفي سامي وحسيت نار بيه من الخجل وهو يحاول يطخ ايدي كل شويه يمد ايده على ايدي واسحبها اني وياه كاعدين ليوره بلتكسي وطه ليكدام هو مسوي نفسه كاعد عاقل ويباوع على الشارع بس ايده كل شويه يمدها واني حاصرتني الضحكه واسحبها

وصلنا للبيت نزل سامي براس الشارع واحنا كملنا دخلنا للبيت استقبلتنا سندس
سندس : زين من تذكرت عندك بيت هاي وين جنت
حجي طه : وعليكم السلام
نهر : شونج سندس
سندس : شوني وانتم عفتوني يم انعام وانهزمتم
حجي طه : شكو انهزمنا شصار
سندس : مرت ابوك لعبت فلك گلبت البيت علية وعلى جهالك وانت حايرلي بنهر مخفت يگتلونه يسون بينه شى
حجي طه : شيسون يعني ميكدرون
سندس : لا بالله واخوك الهد علينا الله ستر ماذبح واحد من جهالك
حجي طه : لتكبريها كولشي ماكو طبي نهر حطي غراضج بلغرفه الثانيه
سندس : ليش مبين راح تبنجر هنا
حجي طه : اي وباقيه ومالج دخل شويه وخري
سندس : وانعام شون بيها
حجي طه : مالها سلطه لا علية ولا عليها
سندس : بله انت وافتهمنا بس هاي بتها وهسه تجي تسحلها من شعرها وتاخذها
حجي طه : نهر على ذمه رجال واكبر واحد ميكدر يندك بيه
سندس : لطمت على صدرها عزه ولج المن تزوجتي
نهر : مجاوبتها وسكتت
حجي طه : اليوم كطعت حقها على سامي
سندس : سامي صاحبك
حجي طه : اي
سندس : ومالكيتي غير هذا الحافي تاخذي
نهر : ضجت من حجايتها وكتلها شبيه حافي
شو يشتغل والحمدلله اموره ماشيه
حجي طه : رايح اسبح وخري بله من دربي
سندس : شتسبح انتظر يابه لو تدري انعام بيكم والله تشوي على راسكم بصل

حجي طه : يعني هذا لسانج اله فديوم اكصه يله ارتاح منه
نهر : متكدر تسوي شى هسه اني متزوجه
سندس : ومكيفه المسعده وهاي الهوسه كلها حتى تتزوجين سامي الكحف حسره علية الفلس هسه لو واحد بيه حظ نكول اي والله يستاهل هاي الهوسه
حجي طه : شوفي سندس اني تعبان وزهكان وروحي بخشمي والف شغله بالي تسكتين لو اطيح حظ حظج واخلي هاي الليله عليج سوده مصخمه لتدخلين بشى ميخصج

سندس : اووي عشتوو لا ادخل ولا شى كافي عليكم انعام اذا عرفت حيرو بضيمكم تعالي ماما سليل امشي اوكلج ابوج وعمتج خليهم بمصيبتهم
نهر : اختنكت منها اعرف مراح تجوز مني بس شنسوي وين نروح باوعت على طة وعيوني مدمعه اجه حضني وكال لتضوجين تدرين بيها مشعشعه ولسانها اطول منها
نهر : الله يساعدك عليها
حجي طه : شسوي گتل وكتلتها عقوبه وعاقبتها ميفيد مرض بيها متشوفين مرات ماانزل حتى اخلص من لسانها تعبتني بس مابيدي شى اغيره والجهال منو الهم واني اكثر الاوقات مو يمهم سلمت امري لله وكمت من تلغي انطيها الاذن الطرشه

نهر : شتتوقع امي تسوي اذا عرفت
حجي طه : شسوي خلي تسوي بعد متكدر تفرض شى عليج
نهر : الله كريم
حجي طه : طبي ارتاحي البيت بيتج
ومالج دخل بهاي تلغي لتجاوبيها
نهر : ماشي
دخلت حطيت ملابسي بلغرفه الثانيه اجت سليل تضحك وشمرت نفسها بحضني
اوي ياروح عمتج ولج كبرانه من فدوه للبنات وابوس بيها صار عمرها ٣ سنوات ونص وتحجي لسانها طلقه
ابوس بيها تحبيني
سليل : اي احبج
فدووه لقلبج اني هم اموت عليج تعالي اكعدي يمي

سندس : تعال فهمني لشوكت تبقى هنا نهر
حجي طه : شكد متحب هذا بيت اخوها بيتها ماعسى العمر كله
سندس : وانعام شون بيها وسوايتك عبالك تعبرها الك
حجي طه : ميهمني واني هسه كتلج لتدخلين
سندس : شون ماادخل وهاي الطركاعه اذا وكعت عليك اني وجهالي نروح بلرجلين بله شگلت لروحك من زوجتها وبدون رضات اهلها
حجي طه : اليسمعج يكول اني بايكها وغريب عنها وزوجتها غير اني اخوها
سندس : بس عندك الاكبر منك وهم امها موجوده
حجي طه : شتردين هسه الزبده انطيني
سندس : خلي تروح لبيت رجلها ولتسوينا مشاكل اني گلبي خلصان ومااتحمل مشاكل اهلك
حجي طه : هو احد اجي يمج
سندس : هسه چم يوم وتلتحق واني اكلها تعوفني وتروح لا عيني متروح اله تخلصني من المصيبه البره
حجي طه : لتخافين كلها اسبوع وتروح لبيت رجلها بس اسكتي مو لعبتيها لروحي
راح انام تعبان
سندس : هذا المحصلته منك نام
حجي طه : سندس
سندس : هااا
حجي طه : اياج تغثين نهر اياج سمعتي تجنين على نفسج تره بعدني مناسي سوايتج الاخيره مال صبا خليني عاقل مااريد اطلع القضى والمضى
سندس : انجبيت وسكتت يله ارتاح

نهر : من التفكير والتعب نمت وسليل بحضني حتى مااعرف شكد نمت كعدت الصبح يباوع علية طه ويضحك يكولي صباح الخير اشتاقيت تسويلي ريوك مثل قبل كومي نتريك سوه اثنينا متعشينا البارحه
نهر : صباح العافيه حبيبي تدلل اي والله اشتاقيت اكل وياك بس اخاف سندس متقبل اسوي ريوك
حجي طه : سندس شنو غير هذا بيتج وهي نايمه اصلاً وحتى لو كاعده متحجي شى يله كومي
كمت غسلت وسليل كعدت ويانه ولازمه الصمون وتفتر
عمه اليد بيده (اريد بيضه)
نهر : يمه فدوه للبنوتات اسويلج طبقه بيض تعالي
حجي طه : تحب البيضه مثل جعفر
نهر : سوده علية جان يخبص الدنيا على البيض
حجي طه : اي واله انتي تسوي
نهر : الف رحمه على روحه يله حبيبي خلي نتريك كعدنا نضحك ونتريك وسليل اوكلها وتصفك ويه كل لكمه
نهر : لو مكعد حسام هم ياكل
حجي طه : ذاك روحه بأمه مياكل اله وياها
نهر : كاعده نشرب الجاي وجان تندك الباب حيل باوعنا ساعه ٨ الصبح خبطت معدتي عرفت امي مبين
فدوة طه لتفتح الباب
حجي طه : شكو وليش ماافتح
نهر : هاي امي متأكده
حجي طه : واذا امج ماعدها شى يمنا تعيط وتروح
نهر : ابوس ايدك عوفها خلي ادك تمل وتروح
حجي طه : شبيج بابا شنو مره كدامج واخاف خلي تسوي شى والله احرك البيت عليهم عوفي ايدي خلي افتح الباب
نهر عوفيني خلي افتح الباب
نهر : هديت ايده وهو طلع واني جمدت من الخوف واحساسي صحيح وجان اطب مثل الاعصار تعيط وعيطتها تصحي الميت

انعام : وينج حقيره ولج نهر نهر
حجي طه : شكو وليش تعيطين
علي : انت احسابك بعدين
انعام : گلب تاخذ بتي يومين ومندري وينك مكابله الباب وكاعده وهسه شفتك تجيب سم ولج وينج
حجي طه : شتردين منها
انعام : شنو شريد هاي بتي اريدها مكافي ذاك اليوم اخذتها مني لا عبالك هلمره هم تاخذها
نهر : حبست نفسي بلمطبخ وحاضنه سليل من الخوف هي طفله شسويلي بس من الخوف عبالك احتمي بيها

حجي طه : اطلعو بره
انعام : امشي لك مبقى علية بس انت تطردني لو ما هو عش دجاج
علي : وينج نهر
طلعت سندس مخروعه من النوم
سندس : شكو هلعياط متكولون ناس نايمه
انعام : امشي ام الوصخ نومه اهل الكهف صيحولي نهر لا احرك البيت عليكم
حجي طه : ماكو واطلعو بره
وجان علي يلزم طه ويريد يضربه
علي : لك انت شلون تاخذها من البيت وفوكاها واكف وتشمر علينا وتطرد اليوم اسكطك وكامو ناس تضرب ناس والعياط اخذ الدنيا
نهر : طلعت اركض مااريد يأذون طه جان تشوفني امي وتجرني من ايدي حيل تعاي لج اذا ماخليتج تبجين دم مااتسمى انعام
نهر : عوفيني مااروح
اباوع طة وعلي بلكاع واحد يضرب الثاني وسندس تلطم وتعيط والجهال يعيطون كام طة وضرب علي على وجهه حيل وعلى صدره وكوه فك نفسه منه واني مجلبه بليده مال الباب مااريد اطلع من البيت جان تعيط سندس ولج نهر صيحي رجلج خلي ياخذج
امي جمدت وهدت ايدي وبقت صافنه بوجه سندس
انعام : يارجال
سندس : عيني بتج اتزوجت وهي هسه بذمته رجال وهي خطار يمنه كلها جم يوم ياخذها وتولي عوفي رجلي ماله دخل

انعام : هاي بت الگلب شكعد تحجي ولك طة نهر هاي شتحجي قصدكم على سعد
سندس : ياسعد عيني ذاك بح
حجي طه : اي تزوجت ومالكم دخل بيها بعد
نهر : كمت ابجي واباوع بعيونها وهي كامت اطك سن بسن وتكول المن تزوجتي احجي
حجي طه : سامي صاحبي واسبوع الجاي زواجها البارحه كطع مهر وبعد هي زوجته شرعاً وقانوناً

امي فقدت كامت ادك على راسها ملخت شعرها وتعيط بكل صوتها ولج الله يطيح حظج اخذتي الفكر الصايع ولج هاي تاليها تكسرين كلامي وتتزوجين بدون موافقتنا مالج صداد ورداد مالج جبير بت حسين هيج ماعندج شرف وتنزلين راسنا بلطين
حجي طه : اتزوجت بشرع الله واني موجود كولشي مسوت موزين وهذا حقها مو احسن متتزوج سعد السكير
نهر : يوم  فدوة افهميني
انعام : اششش شفهم ولج هيج تجازين تعبي وترباتي تمشين وره هذا الاغم وتتزوجين زين مكلتي امي شون اذا عرفت اخوتي هيج عايقه انتي ومتخافين هيج احنا مو بعينج

حجي طه : اني موجود وهذا كافي
علي : انت منو خلك واحد فاشل مابيه خير ضيعت اختك وكسرتها شتكول الناس علينا
انعام : اني ماانتظر الناس تحجي هسه تجيبونه هذا الساقط الثاني ويطلكها وهسه ولج اتذكرت من انهزمتي هو جابج مسويه شى موزين وياه
سندس : عزه جنتي مهزومه يمه صدوك لو كالو خوفج من السكوتي
حجي طه : اعرف كولشي وانهزمت من ضيمكم وهي كلها ربع ساعه ورجعت وسامي خطبهز مني وهسه هي مرته وانتم مالكم حق بيها قيد شعره
انعام : امشي لبيت سامي اليوم احرك اهله ناهب بتي واني ماادري

نهر : طلعت امي تركض على بيت سامي وركض وراهم طه وجرهم من ايدهم وكلهم اني اجيبه الكم لترحون بس امي دفعته حيل
اني رحت للغرفه ركض نزعت البجامه ولبست شون مجان وركضت وراهم
وصلت لكيت ابو سامي وامه وسامي يتعاركون ويه امي
انعام : هسه اطلكها ولك شفتنا ماوراها اهل
سامي : اني اخذتها من اخوها وهو بنفسه اخذنا للمحكمه والبنيه مو صغيره وبموافقتها
علي : هسه اطلك لا اشتكي عليكم واذبك بلتوقيف
نهر : وكفت وره طة الواكف يشوف شراح يصير
سامي : طلاك ومااطلك وشسوي ايدك الك
انعام : اي عيني هو انت تحلم بأضفرها تره لا عبالك راح تحصل فلوس من وراها ورث تره كولشي ماعدها بطرك ملابسها الورث كله بإسمي
سامي : واني اريدها بطرك هدومها وخلي الورث الج

انعام : وروح ابني اله افضحكم بلمنطقه واكول نهب بتي
ام سامي : عيني ابني لا نهب ولا سوه شى برضات بتج واني ابني رجال العيبه مو علية العيبه على بتج وعليكم اذا تردين حاسبي نفسج لان خليتي بتج تكسر كلامج مو جايه من الصبح وتعيطين وتصيحين مثل الكح... وتهددين
نهر : انقهرت من كلام امه بس امي هم حيل تجاوزت عليهم
انعام : ابنج ساقط وماعنده شرف والسواه عساه يطلع بعرضه لان ناقص غيره قشمرها واتزوجها ولو يموت ميشوف اضفرها
جان سامي يجي بأتجاهنا وكال لطه من رخصتك وجان يسحبني من ايدي حيل
وخلاني بحضنه
هاي مرتي رضيتي وان مارضيتي مرتي روحي اشتكي وين متردين وعيطي وصيحي وفضحي ومثل مكلت لأبنج اكول الج ايدكم الكم ميهمني مااشتريكم بلي لابسه برجلي والي يوصل منكم ويلمس شعره منها وتراب النبي انعل شرفه واني اشتكي علي حتى بلحزب اشتكي وامشو اطلعو بره على اطلعكم بلقنادر ناس متستحي

نهر : باوعت امي علية جان تكول هاي كدامهم كلهم لا انتي بنتي ولا اعرفج ولا توكفين على جنازتي واخاف بيوم تجين تبجين وتتوسلين لتوصلين ابد ماراضيه عليج لا دنيه ولا اخره وتفلت علية وطلعت طول ماهي تحجي اني بس ابجي وحاضني سامي حيل طلعو وباوعت على طة وكالت الك يوم واردلك السويته اله ابجيك دم يبن رازقيه

نهر : طلعت وركضت على طه
سامي : اعذرني طة سويت هيج وتجاوزت بس شفت كدامك
حجي طه : هاي مرتك بعد وحمايتها مسؤوليتك ولو ما اعرفك رجال وكدها ماازوجها الك باوعت على امه وابوه الي ساكتين كتلهم هله هله بيها هاي بتكم بعد وانتم اهلها واني لو ما اعرفكم خيرين وخوش ناس ما اعادي الدنيا وازوجها لسامي
ام سامي : يمه عذريني بس امج حرگت گلبي وماكدرت اسكت
نهر : مسحت دموعي ودنجت معذوره خاله
ام سامي : تعالي يمه اباركلج سوده علية مالحكت افرح بيكم
نهر : رحت وباستني وكالت لتضوجين يمه اني امج وهذا ابوج والبنات خواتج اني جان امنيتي تصيرين لأبني جنت اكوم واكعد اصيح كون نهر بت ابوعلي تصير لسامي ردت اجيب واهليه واطشها من بابنا لبابكم بس مصارت بعد  الْحٍمَدٍ للـّہ على كلشي المهم انتي هسه چنتي
ابتسمت على كلامها وشويه ارتاحيت
ابو سامي : تعال ابوحسام ادخل
حجي طه : لا عمي مشكور نروح احنا
سامي : اريد اتزوج هذا الاسبوع قبل متروح
حجي طه : يكون احسن لان كدامك اذا اني ماكو ما اعرف شيسون
سامي : نروح نشتري الذهب
حجي طه : اخذته على صفحه وحجيت وياه انت محظر نفسك عندك فلوس
سامي : والله تعرف الوضع واجتي الشغله فجأه بس اداين وادبرها
حجي طه : لتداين ولا شى اخذ حلقات ولبسها وعود وره العرس اشتريلها
سامي : حضنته والله انت احسن من الاخ
حجي طه : كولشي مااريد منك بس لتخليني بيوم اتندم زوجتها الك
سامي : والله ولا اخليك احطها على راسي متعرف هي شنو بلنسبه اليه
حجي طه : اعرف ناقص ومكتلي
سامي : هههه اعذرني والله مردت اخسرك
يله ماله داعي بعد هذا الحچي المهم مثل ماوصيتك عيونها متشوف الدمع سامي
سامي : من عيوني تدلل

يله خويه نهر امشينا
سندس : واكفه بلباب واجت انعام مورثه وترجف فاتت من يمي وكتلها
شفتي بت الفكر ماكسرت كلام امها وبت الخير اتزوجت وكسرت وجوهكم هههههه
انعام : انجبي وادخلي لااحط راسج بلكاع وامسح المنطقه بيه
سندس : حيري بروحج شراح تكولين للنسوان شون بتج تزوجت بدون موافقتج وتزوجت واحد حافي وهم فگر وعود حطي رجل على رجل وتفاخري مااوصيج
علي : امشي يمه لا الزمها وابتلي بيها
سندس : هو انت كدرتك على النسوان احسن ماتبتلي بيه ابتلي بأختك لتصير رجال براسي راد يضربني لزمته امه
انعام : امشي وعوفها هاي وحده كح.. لتحط راسك براسها
سندس : ههههههه بس اقلها ماكسرت وجه امي وگلمتها
عافتني وطبت تلطم

نهر : رجعنا للبيت وشافتنا سندس
سندس : ها بلخير انحلت
حجي طه : الجهال وين
سندس : كاعدين يلعبون
نهر : اني داخله جوه
سندس : ادخلي عيني عروستنا
حجي طه : اااخ من لسانج
سندس : شبيه يخبل ينكط عسل
حجي طه : احسبي حسابج نهايه الاسبوع عرس نهر
سندس : اي بيها الخير كللووووووووش
حجي طه : طرشتي اذني هاي شنو الهلاهل
سندس : هيج اغث ناس بيها كللووووووش
حجي طه : الله يهديج ويعقلج
سندس : امين كللووووووش

نهر : اسمع هلاهل سندس اعرف حتى تسمع امي شعوري انكسار وقهر مرت توصل الامور لهيج بس همه مرحموني وشمروني بلنار وميردون اطلع منها

مر اليوم هدوء وكاعده بليل والعب ويه رشا كوه اخلص وكتي اجتي سندس يمي
سندس : اكلج نهر
نهر : كولي
سندس : انتي جبتي ذهبج
نهر : ياذهب
سندس : صخام ذهبج ولج شكد عندج خير من الله جبتي وياج
نهر : لا نسيت عفته بلبيت
سندس : من ثول اي والله اكو وحده تعوف هلكد ذهب وتطلع
نهر : بس ردت اطلع ويه طه ياذهب تحجين عنه
سندس : بابا انتي متزوجه واحده ماعنده وعلى كد عيشته على الاقل الذهب يسندكم وميخليج محتاجه شى
نهر : صفنت على كلامها والله صحيح بس بقى هناك
سندس : ومتكدرين تجيبي
نهر : شون اكدر وانتي شفتي الوضع كله كدامج
سندس : اريد افتهم وين عقلج جان حايره بكولشي وناسيه اهم شى ضلي بلفكر مثلي راح تعيشين اتعس مني فوكاها يم عيال اگليها بلعافيه
نهر : صارت بعد مو بيدي الحال الجنت بيها بس ردت انهزم بهدومي غير مشفتي شصار بلبيت
سندس : سمعت خيه سمعت ميحتاج وهم لهسه اخوج ضام السلاح شكد خفت يستخدمه من اجو امج واخوج بس ربج فضت
نهر : اي غير انتي عطتي وكلتي رجلج
سندس : لعد تردين اسكت ورجلي يصير علية شى
نهر : لا ردتي ترديها لأمي وتشوفيها شون متأذيه
سندس : هااا لا شعليه بيها
نهر : عبالج مااعرفج
سندس : هسه عوفينا من هذا الموضوع ذهبج شون
نهر : احاول احجي ويه اشواق لو نوريه بلكت ينطوني الذهب
سندس : اشواق لا سوسه البله تحركج يم امج شوفي نوريه بلكت تكدر
نهر : الله كريم

ثاني يوم صعدنا اني وسندس للسطح بلكت نحصل شى وبقينا بلساعه لحد مكدرنا نأشر لنوريه وتشوفنا
نوريه : هااا نهر بالي يمج خوما أذوج
نهر : لا ليضل بالج شونها امي
نوريه : امج البارحه تخربطت ودوها للمستشفى
سندس : اي بلكت تتوكل والفرحه فرحتين تصير
نهر : انداريت عليها وخزرتها سكتت رجعت انداريت لنوريه وتالي هسه امي شونها
نوريه : لا احسن بس صايره نار منج كسرت غرفتج الصبح تكسر
سندس : خيه نوريه هاي تريد تسولف واني عفت الجهال جوه نهر ذهبها بقى بلغرفه حاولي تجيبي الها تعرفين راح تتزوج ولازم يصير سند الها والذهب ابوها صايغه وتريده
نوريه : اخذته اليوم امج كله بعيني شفتها لو كايله من البارحه جان جبته الج
سندس : خرب بلحظ الاعوج ضلي سولفي خيه انزل اشوف جهالي

نوريه : هاي شبيهه
نهر : مالج دخل بيها احجيلي شصار وكعدت تسولف شون امي تعبانه ومنهاره مهما كان تبقى امي وينمرد گلبي عليها بس مابيدي شى
ونزلت خفت لحد يشوفها ويحجون عليها وصيتها على بنت المرحوم
مرت الايام وبعد يومين عرسي كاعده صافنه وحاطه ايدي على خدي وطب طة وبيده كارتونه كولش جبيره كوه شايلها كمت ساعدته الله يساعدك
حجي طه : ويساعدج تعالي شوفي شجبت الج
نهر : اليه شنو فتحه وطلعت بدله عرس تخبل جايبها من الاورزدي جانت مال ملكانه ومبينه غاليه
هاي شنو طه
حجي طه : اريد اختي احلى عروس
نهر : بجيت وحضنته وانت منيلك
حجي طه : عندي حبيبتي ليضل بالج
وهااا تره هديتج الثانيه دزيتها للبيت
نهر : بعد اكو هديه
حجي طه : انطيت الف دينار وصارت غرفه النوم نص علية ونص على سامي لان اعرف ماعنده
نهر : وانت هم ماعندك منين جبتهم
باس راسي وكال انطيج عيوني ومااقصر
اثاري ست سندس تتسمع علينه وطلعت متخبله

سندس : منيلك توزع الالاف اذا انت هيج عندج متنطي لجهالك لو لمرتك حسره علية اللبسه الزينه شوف حالنا
سحبها من ايدها ودخلها للغرفه بقيت ساكته طفت فرحتي بعياطها
سندس : هد ايدي متريد نحجي كدامها مو منيلك الفلوس هااا
حجي طه : سحبتها من ايدها وكعدتها
جان عندي الف و٩٠٠ وهسه بقت بس ٣٠٠
سندس : هااا ومنيلك وانت اكيد صرفتهن عليها بله منو الاولى اني لو اختك اني العايشه سنين بفكرك ومن يصير عندك كم فلس تضمهم علية

حجي طه : اششش كافي تسكتين لو مااحجي
سندس : سكتت يله
وكعدت حجيت على ذهب امي وشون نهر وصلته
سندس : وانت ليش مكتلي لو تخاف اكول الك انطيني
حجي طه : اعرفج متكعدين راحه
سندس : وشحصلت يمه من ذهب امك كله راح لأختك
حجي طه : حصلتي بتج تلعب وتضحك كدام عيونج لو ما هي جان هسه دافنيها
سندس : اسم الله الرحمن اكو واحد هيج يكول
حجي طه : هذا واقع ولو دبرت الفلوس جان انعام اخذت مني البيت وهسه اني وياج عايشين لو بيت امج لو بلشارع
سندس : بس غصب عليها تجيبهم الك
حجي طه : لا مو غصب تكدر تنطيهم لأمها وتتجنب اعصابها تدرين من وره الذهب انعام كصت شعرها وشبعتها گتل وصلتها للموت يعني فوك مانقذت بتي ونقذت بيتي وخسرت شعرها متردين افرحها

سندس : اني لان ماعدنا
حجي طه : ربج يرزق وكافي رشا كدامنا بصحتها وعافيتها وبيتنا موجود ومنذلينا
تسوه الدنيا اعتبري الفلوس كلها راحت للعمليه هيج فكري هاي اختي سندس وكفتلي وفدتني بروحها شون متردين افرحها وهي يتيمه وبقيت بس اني الها تعوذي من الشيطان واطلعي راضيها لتكسرين فرحتها بس احنا بقينا الها
سندس : استغفر الله مااشي راح اكوم
نهر : شويه وطلعت سندس تهلهل وتبارك راحت دمعتي وحسيت بفرحه الفستان وكفت طه الرفعت راسي يم عيالي

بيوم العرس كاعده وانتظرهم بس تمنيت كلهم ويايه عيوني تنزل دموع لان ماكو احد بس من اشوف طه كدامي ابتسم ما اريد اقهره اني هم حالي حال البنات اريد اهلي وكرايبي موجودين ويفرحون ويايه بس مع الاسف مصار هذا الشى دخل سامي واهله والكل يدك ويركص والمزيقه مسمعه الدنيا لزمني طة وباسني وگل لسامي
هاي عيوني وروحي امنتها يمك
سامي : واني ان شاء الله كد الامانه
حضنته حيل وبست ايده وكتله انت اخويه وابويه الله لايحرمني منك وكفتك ماانساها بعمري
حجي طه : انتي مو بس اختي انتي بتي وامانه ابويه وان شاء الله كدرت أصون الامانه روحي مودعه بالله ان شاء الله اشوفج اسعد وحده
نهر : حضنته حيل بوجودك حبيبي

طلعت لازمه ايد سامي واني عروس اضوي بفستان عرسي الي الكل ضال فاك عينه على جماله ونزاكته طلعت من الباب وعيني على بيت ابويه تمنيت انزف من هذا البيت بس يمكن اني مثل طة انحرمت منه للابد
بس من اشوف فرحه سامي وضحكته احس بسعاده حضني بلشارع وكال ولج انتي مرتي الي حلالي خجلت واهله كلها تصفك وتصوفر وتركص صعدني بلسياره واني اودع بيت اهلي بحلوه ومره

حجي طه :ودعت نهر رغم كم بيت عني بس احس روحي زوجتي بتي ودمعي بطارف عيني اما سندس محلالها الردح والهلاهل اله يم ذاك البيت عفتها خليها شسوي تسوي
ورجعت سديت بابي على حياتي الماعرف شمضموم بيها والقدر شراح يسوي بيه
وشنو الراح اشوفه وخاصه تهديد انعام الي لحد هسه بالي

يتبع ...