رواية ابي والغزلان الفصل الحادي عشر 11 - بقلم ريام هادي

ابي والغزلان
للكاتبة Reem
البارت العاشر

لعبنه على الحبل بس ما كطعناه
ولا سدينه بيبان الميانه

ولا خنه الوفه والعشك بعناه
نفسك انت انت وانه انه

فتحنه كلوبنه بلا مستحه وخوف
واجو كدامنه الجانو ورانه

جنه انشوف كلشي وكلشي نقراه
عدنه عيون بس مدري شعمانه

قبل ٦ سنوات :

نهر : ١٩٨٠ جنت طالبه مرحله رابعه عمري ١٦ سنه اروح واجي بدربي اني طبعي هادئه وعندي بس صديقه وحده اروح واجي وياها ومرات اشواق ويانا ومرات تعوفني وترجع وحدها جنت حتى من اتمشى بلشارع مدنجه استحي
وعمري مرفعت عيني على ولد رغم شكد اكو يمنا وخاصه الفرع الثاني من مدرستنا اكو اعداديه مال ولد
بيوم راجعه وحدي واتمشى لحكني واحد ضوجني بقيت امشي سريع وهو يذبلي حجي يحلو شنو هذا الشعر بس اوكفي خلي احجي وياج واني طلقه ردت اكوع على وجهي طبيت راس شارعنا وهذا تقرب حيل مني جان اسمع هوسه ورايه انداريت شفت سامي صديق طه اني مت بدمي عزه شراح يكول علية شفته لازمه من ياخته ويعت بيه متستحي ماعندك عرض اني خفت لتوكع براسي سحبت الجنطه وحطيتها بحضني وركض بكل سرعتي والخوف گتلني گلت راح يكول لطه لو لجعفر لان هو حيل صديقهم
حتى جان يطب لبيتنا يبقون بلساعات سوالف ولعب طاولي وشقه ومرات يبات ويه الولد بلهول بس احنا منطلع اذا هو موجود بس علاقتنا طيبه بأهله وبيه مرات ابويه يكول هذا مثل ولدي واحد منهم قبل الناس على فطرتها عدهم الجار اهل واذا يبات بنص البيت ماعدهم يحبسون نسوانهم لان مأمنين من جارهم وحتى يطب ويطلع عادي بدون ميستأذن بس اني طبعي خجول ومااطلع

وره ساعتين سمعت صوته لو دمي نشف گلت اجه يكول الهم من خوفي نزلت الشهريه علية وبقيت حابسه روحي وابجي
وكل مااسمع صوت نهر اكول اجاج الموت ينهر سويت نفسي نايمه واشواق طبت وشافتني ونزلت كالت نايمه وبيومها خلصتها بس بلغرفه وحتى گتلني الجوع ولو يااكل بهذا حالي جنت انتظر طة لو جعفر يصعدون يسألوني عن هذا الولد بس والله مااعرفه شون افهمهم وخاصه قبل لااطب للبيت انداريت وشفت سامي لازمه للولد ويردون يتضاربون
بليلتها گضيتها قهر بقهر لحد ما كعدتني اشواق اروح للمدرسه كتلها مااداوم وهاي اول مره مااروح للمدرسه شويه وصعد طه اني خرسيت
حجي طه : شبيج نهر كومي بله تعبانه شى حبيبتي
نهر : هاا شويه مريضه
حجي طه : اوديج للمستوصف
نهر : لا لا اليوم ارتاح واصير احسن
حجي طه : كومي تريكي ويايه سويلي البيض الاحبه من ايدج مينطيني گلبي اتريك وحدي
نهر : ابتسمت على كلامه وهدأت عرفت ماكو شى
كمت غسلت وجهي ونزلت سويت ريوك وناكل ونزل جعفر وهوسته بلبيت ويصيح اريد بيض لا ابيض عليكم
ولك اسكت هسه ابويه يطلع من غرفته يكسر شكو بيضه براسك
جعفر : لعد سولي بيضه يله بسرعه جووعااان
نهر : اششش هسه هسه
وسويت وكاعد ناكل جان يسولف جعفر
ولك طه مسمعت بسامي متعارك
اني اريد ابلع اللكمه ماكو وكفت بزردومي
حجي طه : ويه منو
جعفر : واحد من اعداديه الرشيد لزمه ضاربه على وجهه مطفي عينه
حجي طه : وليش مكتلي
جعفر : هو اني شمدريني اجيت لكيت العركه فاضه لزمته شبيه وياك كال متحارش بوحده

نهر : اني هنا اريد مي غصيت بلكمه واشرب مي بس مااحس اشرب من الخوف
حجي طه : منو هاي
جعفر : سألته يكول مااعرفها فاتت منا وشفته يتحارش بيها ولزمته وتالي ذاك متعذر من سامي بعد مااكل ضربه على عينه والناس فاككتهم
حجي طه : يعني ميتوب سامي من عركاته واكف براس الركن والرايح والجاي تكول حارس الشارع
جعفر : شتعرف بيه بس والله عاشت ايده ماطول يتحارش بوحدة يستاهل ذاك
حجي طه : اي صدك يستاهل اروح اشوفه هو اجه البارحه بس مگلي
جعفر : مااعرف بعد اني طالع لج ام خشم قميصي الحني وصخ غسلي وياج
نهر : والله خشمي احلى من خشمك
حجي طه : مالج علاقة بيه يغار منج
نهر : فدوة لعمرك دومك رافع معنوياتي
بوقتها ارتاحيت لان مكال لاخوتي ومر اليوم طبيعي وكعدت احظر واجباتي

ثاني يوم داومت وبلرجعه شفت سامي واكف واني خفت تقرب مني وصاح شونج نهر من المستحه كمت اتلعثم بلكلام هااا علية
سامي : لعد اني اسمي نهر
نهر : خلي اروح
سامي : بس ردت اكولج اي واحد يضوجج بس كولي اني موجود هنا كاعد اطيحلج حظه اعتبريني اخوج
نهر : ان شاء الله وشكراً على البارحه
سامي : ميحتاج الشكر انتي عرضي لتنسين انتي اخت الغالي
نهر : شكراً ومشيت سريع اول مره اوكف ويه ولد غير اخوتي وبهذا القرب هم
من يومها كمت كل ماارجع اشوفه يبتسم بوجهي واني ارد الابتسامه لحد متعلمت على وجوده براس الركن كامت عيوني من وحدهم ادور علية من باب مدرستي لحد مااوصل للركن عيوني مارفعه بس اوصل لهذا المكان غصب عني تنرفع وادور علية اشوفه ابتسم وارجع ادنج لباب البيت

خلصت سنه كامله على هذا المنوال ماكو شى بس الابتسامه احياناً السلام هاي اقوى شى بس الي تغير داخلي اني حسيت بشى غريب تجاه سامي كمت من اسمع صوته بيت اهلي گلبي ينبض بقوه وابقى اروح واجي بس مااخلي يشوفني ومن اشوفه من بعيد بلشارع تثلج اطرافي احس عيوني ادور علية دواره ومن يجبون طاريه بلبيت معدتي توجعني حتى من انام احلم بيه
عرفت روحي حبيته بس بوضعي وبحالتي والوكت الي احنا بيه عيب البنيه تظهر شى يدل على الحب كتمت حبة بگلبي
وصرت مرحله خامسه وصارت الحرب بيومها من سمعنا كلنا خفنا مجنا نعرف شراح يصير ومرت اول ايام صعبه وبمرور الوقت تعلمنا وبيوم بعطلة نص السنه جانت امي طالعه ماخذه اشواق ورايحه تزور وحده مريضة وجعفر نايم وطه طالع هو وابويه اندك الباب واني جنت هسه سابحه وريحه الحنه تكتل وامشط بشعري على كيفي حتى ليتكطع وبقى يندك وهذا جعفر طابوكه ونايم يمعود كوم يأشر بيده انتي فتحي مابيه حيل لميته شون مجان وطلعت فتحت الباب  صار بوجهي دنجت منه وهو بقى ساكت يباوع شفته طول ولا فتح حلكه رفعت عيني وكتله جعفر نايم وطه طالع
جان يكول
همزين حتى انتي تفتحين الباب
رجفت من گلمته وخدودي جمرو صار ايام مشايفته اول مره احس نظره سامي متغيره مو مثل كل مره وعافني وراح ومن يومها صارت نظراتنا علني نحجي عن طريقهم احس من يشوفني يسولف ويايه بعيونه كام حتى الصبح يوكف براس الشارع ويصبح ويدخل مشاعرنا نظيفه نقيه مابيها غير النظرات والسلام لحد مصرت مرحله سادس وكاعده اقرا وجان يكول طه لأبويه اجت مواليد سامي طلبوها بلتجنيد ويمكن اني وراها يابه  اني نشف دمي والدمعه وكفت بعيني حتى الكتاب سديته سمعت ابويه يكول ليش ميكمل دراسه انت وياه حتى تخلصون من التجنيد بوقتها طه كال مالي خلك اكمل كافي وهي برگبتي برگبتي
اخذت كتبي وصعدت ركض وحتى الامتحان مقريته ردت بس يجي الصبح واشوفه بقيت الليل كله نايمه وصافنه على الساعه شگد بطيئه من نريدج تمشين

وطلع الصبح وحتى ريوك متريكت لبست ومنتظرت اشواق ردت اشوفه من استعجالي طلعت بغير وقتي قبل ربع ساعه اتمشى وماكو كمت ابطئ بحركتي بلكت يطلع من بيتهم تجاوزت البيت وهو ماكو حصرتني البجيه ثول الثولج نهر شطلعج من وكت بقيت اتلفت لمحته جاي وبيده الصمون بأتجاهي لا ارادياً ابتسمت مصدكت شفته
صرنا وجهه بوجه جان يكول صباح العافيه
صباح النور بس احس كوه طلعت من حلكي يمكن بوقتها اجرأ شى سويته تمشى وتعداني بعد مسلم بخطوات بسيطه جان اصيحه سامي هو تفاجأ مني رجع باتجاهي
سامي : بيج شى محتاجه شى
نهر : اريد تطلع من حلكي اخرسيت بقى واكف وعيونه قلقه يريد يعرف شبيه
سامي : شبيج نهر خوفتيني احد سوالج شى
نهر : بلعت ريگي وتشجعت وطلعت من حلكي بس بغصه لتروح للجبهه

سامي : ما اروح وين
نهر : لتروح للجبهه عفيه ابتسم ابتسامه ولا انساها حسيته طار من الفرحه من كتله
سامي : غير طلبوني قابل اصير فرار
نهر : لتروح عفيه ونزلت دمعه مني شكت حاولت اقوي نفسي مكدرت فتح عينه مصدوم من ردت فعلي مد ايده يريد يمسح دمعتي رجعها بسرعه انتبه على نفسه
سامي : امسحي دموعج ذوله ليلو مينزلون اله للشى الغالي
نهر : لتروح سامي
سامي : ماشى مااروح بس جاوبيني ليش
نهر : دنجت مستحيه ولو بعد كل السويته ضلت مستحه صح واكفين بلشارع ونسولف بس بذاك الوكت الجيران عادي يوكفون يسولفون ويسلمون مابيها شى وهم من الصبح ماكو احد ناس قليله
سامي : شو سكتي
نهر :ما اريدك تروح وخلص
سامي : وشسوي حتى مااروح
نهر : ادخل معهد كلية اي شى حتى متروح
سامي : تعرفين بيه ما احب القرايه
نهر : من انفعالي كتله لخاطري ارجع وحطيت ايدي على حلكي وضحك على حركتي
سامي : لخاطرج احرك الدنيا مو بس ارجع صار من باجر اقدم اوراقي لأي معهد سنتين بين متخلص ونشوف الحرب شيصير منها
نهر : ابتسمت وخدودي دم صارو من كال احرك الدنيا لخاطرج عرفت هو نفس احساسي ومجنت متوهمه من اشوف عيونه وابتسامته اليه وحسيت براحه اروح اني
سامي : اوكفي وين رايحه

نهر : للمدرسه
سامي : خلي اكولج شى هاي فرصة ومااعرف تتكرر او لا وماطول صارت اسمعيني يابنت الناس اخوتج بعزيه روحي واحبهم كولش وتعرفين متربين سوه وعمري مفكرت اخون الامانه اني احبج وحبي الج طاهر وشريف وستر خواتي ومايوم فكرت غير تكونين حلالي
نهر : هنا رجلي رخت وعيوني فاتحتهم مترمش وگلبي يمكن صوته وصل لأنعام
بس انتي تعرفين اني بدايه حياتي وامكانيتي على كدي واهلج ماشاء الله خير واكيد مينطون لواحد مثلي بس اني گلت لازم اشتغل والم مهرج وكمت اشتغل من سنه والم ويشهد الله الفلس مااصرفه حتى بس اكون نفسي يجوز طريقي طويل ويجوز الله يفتحها بوجهي كله رزق الله شوكت مااكون نفسي اني داك بابج بس الاريده منج تصبريلي  جنت بلبدايه خايف لا يجي الرفض منج بس اليوم الله يحبني واول مره احب العسكريه لان خلتج تجين وتحجين وهذا الشى خلاني اسعد واحد بلدنيا خوفج علية ردت الروح بيه  اني مااطلب شى منج بس انتظريني وكت متحسين اهلج ضغطو عليج بس انطيني خبر ثاني يوم اخطبج عسى ولعل ينطوني

نهر : دنجت وافرك بيدي مااعرف شجاوب بس اريد انهزم لان يمكن اخرب بحضنه اذا ابقى كتله اروح تأخرت وركضت وهو يكولي
سامي : برعايه الله وحفظه يانهر قلبي وفروعه
حسيت روحي فراشه بذاك اليوم حبيت بس مغلطت بقى حبنا بلنظرات ويوم بعد يوم احسه يكبر كمنا نحجي بس كلمات بسيطه لو هو يكول مشتاقلج لو احبج  واني بس اكول اني هم حتى جنت ما اتجرأ اكول نفس عباراته  ومره گلي اذوب على گصيبتج شوكت اشمها وابتسم على كلامه احس من يشوفني ياكلني بعيونه بهاي الفتره دخل معهد اداره جنت خايفه لا ينعجب بوحده ويحبها بس هو ثبتلي العكس وبقى نفس حبه واشتياقه جانت لقائاتنا محدوده الصبح يصبح علية اني اروح للمدرسه وهو للمعهد بس بلرجعه منلتقي لان يتأخر كام يجي للبيت العصر بحجه الولد واني افتح الباب اله المهم املي عيني منه
مايوم لمس شعره مني ولا حاول يأذيني او يسمعني كلمة محرجه احترامه اليه ولاخوتي كبره بعيني دوم يكول اشوفج بس حتى اطفي الشوق الي بگلبي بس يعلم الله مااريد اخون الامانه انتي عرضي وميوكف ابد يمي هي الثواني الي جنا نبوكها من ايامنا بس حتى يهدا گلبنا المشتاق

ومرت الايام وكملت السادس وبطلوني وانحرمت من شوفته بس بقيت على امل اشوفه من يجي للولد وبعدها بدت شوي شوي تتغير حياتي وفاه ابويه وابتعاد طه من البيت وبعدها وفاه جعفر كطعت اي تواصل بينا لان كام ميجي للبيت بس مرات اصعد بلسطح اشوفه من بعيد بوقت المغرب وهو يشوفني بس يدنج حتى ليلفت الانتباه
حب معذب بس صادق وسنين تمشي واي تغير مصار لحد ما تزوج جعفر بيوم عرسه شفته وردت روحي اليه من طب ويه الولد ياخذون الكراسي علمود الكعده لان بلشارع الحنه تجرأت ابقى گلبي طك علية اني مااطلع حكمت علية امي الخدمه وبس بلبيت وصارت فرصه اعتبرها من ذهب دز جعفر سامي علية علمود فلوس بغرفته اجه وصار بوجهي من اشتياقي اله نزلت دمعتي

سامي : ولج عيونج موت مشتاقلهن ومن اشوفهن الكاهن يبجن
نهر : مو بيدي دنجت
سامي : الله يعلم الي بگلبي يانبض گلبي انتي مشتاقلج بكد النفس اليدخل ويطلع
نهر : واني هم مشتاقتلك سامي لشوكت نضل هيج
سامي : شون يعني
نهر : سكتت شكول اله ليش مخطبتني هم عيب بس سكوتي افتهمه
سامي : قصدج ليش متقدمت
نهر : اشرت براسي معناه اي
سامي : كعد تشوفين الحال والصار كله تتوقعين بعد سوايه امج ب طه والي صار كله ترضى بيه
نهر : رفعت راسي وصافنه علية يعني شنو غيرت رأيك
سامي : مو غيرت بس صارت اصعب اني كولشي حجالي طه وعرفت هسه الحل والربط بيد امج وهي بلذات مطيقني صح ممسمعتني شى موزين بس كافي علاقتي بأخوج واني ظرفي صعب هسه شفتي الحال يوم اشتغل ويوم لا والي لميتهم شى بسيط معدت لميت كم فلس ابويه تمرض وراها اخويه اندعم وكل شويه طالعه سالفه وهم رجعت اشتغل
نهر : يعني قصدي اصرف نظر عن الموضوع وانسى كولشي مو
سامي : هاي شبيج نهر مو هذا قصدي اني قصدت وضعي بعده مجاهز وهسه اذا تقدمت راح ميقبلون بيه ويمكن اضيع اخوتج لان راح يزعلون مني لازم امهد الطريق الهم
نهر : شتمهد واحنا صار اربع سنوات واحد يحب الثاني وتكولي انتظريني
سامي : فدوة افهميني وركزي بكلامي اني مكتلج اعوفج بس گلت هسه مترهم اتقدم
نهر : وشوكت ترهم من يصير عمري ٦٠ سنه لو من تشوفني متزوجه غيرك
سامي : هو بكيفج تتزوجين غيري لعد اني جدي مسموط من الشغل والتعب حتى بس اتزوجج وتالي ترحين لغيري
نهر : صرت عصبيه وهاي بسبب الظروف الي مريت بيها وكثر ما واجهت امي ذيج الفترات صرت اجرأ وكتله لعد سوي حل اتجرأ واخطب لو بس تعرف انتظريني وانتظري
استغرب من كلامي وطريقتي وجان يكول
سامي : تره اني مكذبت عليج وكتلج على حالي من اول يوم وارجع واكول كلها مده واتقدم ليش بعد تجرحين بلكلام
نهر : تعبت تعرف شنو معنى تعبت
سامي : شبيج ياعيني اول مره اشوفج هيج
نهر : تعبت من امي ومن حياتي تعب اشتاق الك ومااشوفك تعبت اكعد بالايام والاسابيع افكر بيك ومحد يطمني عليك تعبت سامي من روحي تعرل شنو من روحي

سامي : واني لو بيدي شى والله مااقصر
نهر : بيدك اشياء تقدم واخلي طه يقبل ويساعدنا
سامي : لا اخاف يزعل مني ويفهمني غلط
نهر : هو هذا الهامك يفهمك غلط لعد من حبيتني شو ماكلت يفهمني غلط من طلبت مني انتظرك مكلت يفهمني غلط
سامي : نهر شجاج ليش كوه تسوين مشكله اني صار شهر مشايفج هذا استقبالج اليه مصدكت اكوف يمج واشوفج وانتي هيج تحجين
نهر : هاك فلوس جعفر وروح تأخرت عليهم ليدز احد عليهم واني ارجع ادخل اخاف يصيحوني
سامي : تعالي لترحين
نهر : شوف سامي اذا رحت من ايدك انت السبب ترددك واعذارك وخوفك هو الي راح يضيعني منك
سامي : ولج بابا افهميني
نهر : اني كتلك الي فهمته واي شى زايد راح يأذيني تريدني وتحبني تعال واجهه الناس واهلي واطلبني
سامي : واذا مقبلو
نهر : حاول مره ثانيه وثالثه ليش مااستاهل تحاول اكثر من مره علمودي
سامي : وطه وجعفر وضعهم هسه ميسمح واحد بلجبهه والثاني عريس
نهر : انت بعد بكيفك حطيت الفلوس بيده وحط بالك اذا صرت لغيرك مااسامحك ليوم الدين وطبيت والدمعه مو من عيني تنزل من گلبي
اعرف بيه خايف من امي ويخاف تفشله هو واهله وخاصه بعد سوايتها ب طه بس هو حتى محاول اريد يحارب لخاطري مو بس يحب من بعيد

ومرت الايام وصارت كارثه جعفر الي كسرتني بلزايد ويوم بعد يوم ازدادت المسافه بينا شفته بوقت من جان الكل منهار ويدور على جعفر اعرف متأذي علمودي تمنيت بوقتها اكون زوجته واختل بحضنه ياخذني من هاي الدنيا القاسيه الي دمرت كولشي احبه بس مصار هذا الشى وبقى سامي يخاف يتقدم وبديت شوي شوي التهي عنه بمشاكل طه وامي وحياتي الممله وعدت السنين وبيوم كصت امي شعري انهاريت لان مو بس لان احبه لشعري ومداريته لان اعرف سامي يحبها تخيلت شون راح يشوفني هيج وصارت الاذيه أذيتين
بس الصار الخطوبه الخلتني انشل ومااعرف افكر وانخطبت وكل فكري يمه تمنيت يطب ياخذني من ايدي يبوكني منهم ردته وردت طه ردت احد يحس بلنار الي اخويه وامي شمروني بيها

وبعد الخطوبه بليل لميت ملابسي نزلت على كيف وجان تشوفني اشواق وعاطت دفعتها حيل وركضت للشارع مثل المخبله
مشفت نفسي غير بلركن وجان يوكفني وهو متفاجأ وفاتح عينه
وين رايحه نهر باوعت علية كله منك كله منك هذا حالي سامي شفت
سامي : فهميني شصار وشون اطلعين بهيج وكت وشنو هذا البيدج
نهر : كمت اشهك واحجي لك اليوم خطوبتي وكله منك وكتلك اذا صرت لغيرك مااسامحك ليوم الدين وكف مصدوم من كلامي وصار عصبي
سامي : ولج ياخطوبه
نهر : كتله ارتاح رحت من ايدك دفعته وركضت خفت ليطلعون ورايه لان اشواق عاطت واركض وهو يركض ورايه جانت بيومها ساعه بلوحده بليل وشتا وبارد الجو
عبرت الشارع الجهه الثانيه جان يلزمني حيل ويعت بيه واثنينا نتنفس سريع من الركض
سامي : ولج اوكفي اوكفي
نهر : شتريد مني
سامي : بابا شون اعوفج شنو خطوبتج وروح جعفر ماادري جنت بديالى صار ٣ ايام فاتحه كرابتنا وقبل ساعتين وصلت بس بدلت وطلعت مخنوك وضايج وتعرفين بيه سولتي بلركن اكعد من زمان واباوع على بيتكم وشفتج تركضين بلبدايه كلت اخاف متوهم مو هي ولج شون اطلعين من البيت بله اني ماكو شجان صار
نهر : دفعت ايده وخر كله منك كتلك تعال اخطب تعال كمت اطلع الف عذر وعذر وهاي تاليتها اليوم انخطبت والمن لسعد العرگجي
سامي : سعد الساقط وشون قبلتي
نهر : لا بالله شون وافقت هذا الهامك
سامي : بس على كيفج والله التردي يصير بس كافي بجي وخلي نرجع
نهر : وين نرجع تخبلت ماارجع لذاك البيت اكوله راح يزوجني الخميس الجاي لسعد

سامي : متتزوجين لو اعرف كتلته على ايدي ولج انتي حلم عمري انام واكعد احلم بليوم التصيرين ام بيتي
نهر : حلمت وشنو النتيجه انت واحد جبان واني صوجي حبيت واحد مثلك جان يضربني راشدي كعدت بلكاع ابجي وهو كام يضرب برجله بلكاع صار نار
وبقيت اشهك جان يدنج ويصير بمستواي
سامي : كومي ياامي وابويه انتي وباس راسها والله مو قصدي امد ايدي عليج ولج لحد هسه ممستوعب كل الصار خطوبتج وانهزمتي من البيت اتخيل شون لو اني مااكو على كيفج ويايه نهر تره حالي انشل واريد اتصرف صح بس كومي وساعديني
نهر : من يوم العرفتك وتكولي ساعديني وانتظريني كولشي محصلت
مد ايده ومسح عيوني
سامي : وتراب النبي متصيرين لغيري كومي گلبي
كمت على كيفي وباوعت علية جره نفس قوي يريد يتنفس ادري بيه اختنك حيل كام يروح ويجي واباوع على ايده دماراتها كلها طالعه من الاعصاب بس كدامي يمثل الهدوء احنا بعد شارع عن شارعنا وهدوء وكلها نايمه
جان يكولي كطعتي مهر
نهر : لا على اساس السبت والخميس الزواج
سامي كولش زين الي اريده منج متكطعين مهر
نهر : شون بله
سامي : تتذكرين جعفر الله يرحمه من دك رجل اله طه يحضر بخطوبته
نهر : اي اتذكر
سامي : اريد انتي هم تكولين هو مثل ابويه وهو وكيلي ولازم يحضر حتى لو مااحتاج وكيل لان بالغه اريد وجوده
نهر : مسحت عيوني زين اريد اركز وياه
بس طه بعد ٨ ايام يله ينزل ومنو يكول ينزل انت تدري مرات ميجي بلشهرين وتلاثه
سامي : عوفيها هاي علية راح أكد جيته بس اجليها ابوس ايدج نهر لتضعفين وصيري قويه اذا تردين ننجمع صيري سباعيه ولتقبلين كطع المهر لحد ميحظر طه
نهر : واذا حظر راح تصيرله مشاكل انت عبالك هو يكدر لأمي وعلي انت متعرف بيه شكد فقير واني هم اخاف علية كولش اخاف توكعه بتهلكه
سامي : مالج دخل المطلوب منج بس تأجلين المهر والعرس والباقي علية يله گلبي ارجعج

نهر : مدلي ايده وبقيت اباوع عليها جان يكولي
سامي : وداعت كل دمعه من عيونج مااخذلج ولا اعوفج بس هلمره صدگيني
نهر : مديت ايدي واتمنى ما اتندم طول عمري لان مديتها
ورجعنا وطول الطريق يكولي لتخافين اتحملي بس هلكم يوم زين شون ارجع وهسه امي تكطعني وشون راح اقنعهم علمود طة حسيت راسي راح يطك اني مو كد علي وامي والله مو كدهم امشي واباوع للسما ربي رحمتك ومساعدتك مااريد اضيع
جان ينتبه سامي گصيبتي ماكو لان جنا قبل شويه متوترين منتبه
فتح عينه مصدوم وين كصيبتج نزلت دمعتي ولزمت شعري
وكتله راحت ويه الراحو هي مو اغلى من الراح جان يحط ايده على شعري لتضوجين يطول وبيدي امشطه الج
بس حسيته مات قهر اعرف بيه يصبرني بس على شنو اصبر وحده اثنين

وصلنا راس الشارع لكيت امي واكفه بلباب واشواق وياها ونوريه هد ايدي سامي بس وصلنا يم الباب جان تجرني من شعري
انعام : من صخم الله وجهج بت الگلب بت النعال شون اطلعين بهاي الليالي وين رحتي اديحين تردين تفضحينا جان يلزمني سامي وجرني من ايدها وحطني وراه وكف گبالها

سامي : خاله مصار شى ورجعت سالمه
انعام : شون مصار شى وهي مهزومه ساعه وحده بليله صخام الصخمج انعام هاي تالي عمرج بتج اطمس راسنا بلطين
سامي : انتي هسه بعياطج وهوستج باب البيت راح اطلعين العالم والي مشاف شى يشوف ويعرف ادخلو جوه وتفاهمو ادخلو الناس نايمه
دخلنا للهول واني بعدني خاتله وره سامي ولان امي متتوقع ولا يجي بالها اكو شى بينا تعاملت طبيعي وياه بحكم صديق الولد وسنين هو ويانه
انعام : ولك سامي هاي عايقه وانطيتها عين هوايه صوجي اني كبرت راسها المفروض اسحلها من شعرها وازوجها اليوم حتى خطوبه ماكو
سامي : شصار ياستار هي جانت مخنوكه وعبالها من تنهزم بلكت تلكه طه
انعام : هو محد طيح حظنا ولعب بحالنا غير طة الله لا يوفقه الله ياخذه اخذ ابني جعفر وعافه الموت اله مو لجعفر
نهر : ابجي بسكوت واسمع كلامها وبگلبي اكول اسم الله من عمري على عمرك ياطه
جان سامي يتعامل بهدوء رهيب ويه امي وياخذها على كد اعصابها وسوالفها

سامي : روحي صعدي نهر وعوفيني ويه خاله
انعام : وين تصعد اليوم اشعل جد جدها على هبطتنا تدفع اختها وتنهزم يابويجيبلي علي واخلي ميبقي عظمه صاحيه بيها
سامي : وكسرتوها وبعدين راح العالم تاكل وجهكم وخاصه خطيبها راح يكول ليش وشصاير
انعام :تعض اصابيعها وتتوعد اااااخ لو الزمج اله احرگج
سامي : روحي نهر لغرفتج
نوريه : امشي نهر بسرعه
سامي : خاله هسه من تكولين لعلي راح يأذيها ومتحصلين شى انتي تردين تزوجيها اخذيها على كد عقلها منا لحد متتزوج وتروح لرجلها اذا عاندتيها يجوز تشمر روحها من السطح هلمره انهزمت واني لزمتها ورجعتها شمدرينا مره الثانيه شسوي
انعام : يمه صخام تسوي شى مره ثانيه غير افصمها
سامي : جان فصمتيها هسه مو طلعت وانتم متدرون لو ما اشواق شافتها والله اعلم شصار لو مشايفها تعوذي من الشيطان وبروح جعفر عندج اخذيها على كد عقلها لحد متتزوج وراها شسوين سوي
انعام : اااااخ ماعاش الي يلوي ايدي بس ااخ يبت انعام لويتيها
سامي : مصار شى ومحد عرف وانتي هم لتكبريها
انعام : خوش الله كريم مشكور يمه ماقصرت بس رحمة لصاحبك حبيبك هاي عرضه لتحجي بلصار بلمنطقه
سامي : شون احجي ينكص لساني اترخص
هينه يأنعام بس خليها يمج چم يوم واخذها من عيونج

نهر : دخلت للغرفه وكعدت على الجربايه ابجي وبيدي هدومي اخذتهم نوريه مني واشواق واكفه تباوع لتباوعين لا افكس عيونج
اشواق : ولج مستحيتي من انهزمتي جان خزيتينا شكد ناقصه كون علي : يعرف حتى يطيح حظج
نهر : اطلعي بره شمرت النعال عليها اجه بلباب
اشواق : من امــداج فوك مصيبتها لسانها شطوله هسه امي تعرف شون اطيح حظج وعود صيري سباعيه وياها
نوريه : اشواق روحي هسه وكتها
اشواق : باع هاي عود مسويه نفسها حنينه والله ياالله
نهر : لج اطلعي حقيره رب الخباثه والحقاره انتي تنكطين سم اطلعي لا ابتلي بيج وكمت اعيط بكل قوتي جان اطب امي
وجع وسم وفوكاها حسج عالي مستحيتي مخفتي بله طلع واحد سكران وتحارش بيج شنو هاي الصلافه شخبلج جنتي البزونه تخافين منها
نهر : ميصير شى علية مسحت دموعي وسميت بسم الله بگلبي وگلت بكل قوه بس داخلي ميته رعب احسبي حسابج مااكطع مهر اله يجي طه هو بمثابه ابويه

انعام : شنوو سمعيني شگلتي يمه
نهر : وروح ابويه وروح جعفر والعباس ابو فاضل اسوي بنفسي شى واخزيكم اذا اكطع مهر وماكو طة يمي اله يجي ويحظر وراها التردي صار وماافتح حلكي ابد
انعام : يعني تتحديني مو بت انعام
نهر : لا تحدي ولا شى اني ردت طة ويايه وهذا من حقي تذكرين جعفر من طلب اني هم مثله لان احنا نعتبره بمكان ابونا
انعام : واخوج الجبير خراعه خضره مو هو بمكانه
نهر : اني طة عندي وبس وذوله مااعتبرهم اخوتي
جان تكول
عبالج طة يخلصج ومتتزوجين سعد لو تموتين تتزوجي
نهر : اني مكلت مااتزوج اتزوجه والتردي يصير بس بحظور طه
نوريه : فدوة عمه اقبلي شكد واخوج ينزل
نهر : اسبوع
نوريه : خاله جفي الشر ومنا العالم وذوله اهل سعد اذا سمعو شى امه لسان ومتسكت خلي نكول اخوها ملتحق وتريد حظوره وهذا الشى ميزعل بس اذا نهر عاندت لو سوت شى والله نصير علچ بحلك نسوان المنطقه كلها حتى اشواق تتأثر وبعد محد يخطبها
اشواق : غير اذبحها اذا ضاعت سمعتي من وراها ومحد رادني
نوريه : مو وكتج اشواق يله فدوة خاله اقبلي
نهر : بگلبي طول مانوريه تقنعها اني اقرا ايات مبقيت سوره قصيره مقريتها وادعي وانذر
لحد مكالت ماشي ننتظر اخوج الشفيه بس اذا منزل نعقد واريد اشوف يابنيه تفتح حلكها
نهر : يارب دخيلك كملها على خير
وطلعت امي واني شمرت نفسي وحاضنه المخده وابجي وادعي ميروح هذا التعب كله بلشط وتاليتي انزف لسعد

مرت الايام واني يومياً من حلات روحي افرش السجاده المغرب بلسطح واصلي اريد بس الله يرحمني ويباوع لحالي ويجي طة وبيه خوف هم علية شون راح يدبرها وياهم ياربي انطيني وانطيه القوة
سامي : انتظرت ايام وكل ميقترب موعد نزول طة گلبي يوجعني واخاف اخسرها واخسر گلمتي كدامها بعد يومين ولازم يبين گلت لازم أكد على نزوله هذا مرات مينزل كمت وكتبت رساله واني اندل بيت صديقة محسن بلكت نازل لان مرات فرق يوم او يومين بينهم اخذت تكسي وگبل لبيت محسن دكيت الباب طلع ابوه سلم عرفني لان مو اول مره اجيه دخلت والحمدلله جان الصبح نازل كعدوه من النوم ونزل يتثاوب

محسن : هله بسامي شونك استريح
سامي : ازعجتك بس ماعندي غيرك
محسن : من ناحيه الازعاج اكيد ازعجتني ولعب روحي هم ولك ياظالم النفس اليوم نزلت انتظر لباجر حتى بعدني مشبعان نوم
سامي : اتحملني رحمة لموتاك
محسن : اذا تسأل عن طة ذاك مثل الارمل كاعد وبس يباوع على السما كولشي ماكو فكرت ابادل بيه الاسرى اقلها ينطونا واحد يضحك يتشاقى مو مخلصها لو جكاير لو يتأفأف خلاني اكره حتى روحي وكل شويه اكول بلكت يجي ايراني ياخذني اخلص الالتحاق يمه
سامي : اريدك تروحله
محسن : هااا انت شارب شى ومبين الشاربه مغشوش بابا اني اليوم نزلت
سامي : محسن احلفك بعزيز گلبك لازم هاي الرساله تروحله شغله حياه وموت
محسن : شفت هذا المشهد بفلم هندي مال اميتاب بس النهايه محبيتها يطلع اخو البطله
سامي : ولك مو وقت شقاك
محسن : لعد هو هذا وكت تجي تكولي لازم ادز الرساله تريد مصار ساعات ارجع للجبهه والله علمود رساله انت عاقل بابا ولو منين العقل يجيج غير صديق المعقد طة شتطلع فيلسوف قابل

سامي : بمحسن بداعت كل غالي عندك تره وضعي حرج والي اطلبه منك حياتي وحياة ناس ثانيه واكفه علية واذا منزل طة هاي النزله كولشي راح اخسر ويمكن حتى يزعل منك
محسن : خوفتني جهاله بيهم شى اهل بيته
سامي : اني الي بيه
محسن : حامل مبروك
سامي : ولك راح تجلطني وحق الكعبه كافي شقه اكله شغله خطره

محسن : احجيلي الصدك واذا اقتنعت اروح
سامي : مااكدر صعبه
محسن : لعد ضل هنا الطم وصيح شغله حياة وموت مثل العجايز
سامي : الصبر يارب ولك طة ملكيت غير هذا تصادقه
محسن : هو كول اني ملكيت واحد فگر واصادقه غير صاحبگ شون لهسه اني مجابوني شهيد ماادري يله سولف حتى اذا الشغله تسوه باجر من الصبح اطلع متسوه ميه جلاق اركعك واركع صاحبك

سامي : اخته راح تتزوج
محسن : لابربك الله يرحمها وهاي الشغله الكتلت نفسك عليها امشي لك امشي اطلع بره
سامي : بس اسمعني راح يزوجوها واحد مو خوش ادمي
محسن : وانت شعليك وشدخلك بأخته
سامي : هاا مالي دخل بس مثل اختي وهي توسلت بيه اخلي يجي وينقذها
محسن : يابه اكص ايدي واذبها للجلاب وياهم ايد صاحبك الفگر اذا هي مثل اختك شفتني هندي وتعبرها علية ولك سامي ابو البلاوي شوف حالك تريد تبجي وتكول اختي لو امي هسه ماارجف عليها مثلك
سامي : هسه شتكول تروحله باجر
محسن : راح اعبرها الك بمزاجي واعتبرها اختك بلرضاعه ههههههه ولخاطر اختك اروح
سامي : كمت بسته من فرحتي
محسن : بس تعزمني على عرسك وعرس اختك مو تنسى
سامي : بس روح وشتريد حاظر
محسن : واكع اخينا الله يعينك اهل الحب صحيح مساكين صحيح مساكين الله عليج ياست (يقصد ام كلثوم)
سامي : هاك وصلها اله
محسن : كراوي الروحه والرجعه عليك
سامي : من عيني مديت ايدي بجيبي
محسن : مو هسه من تتزوج اختك
سامي : من اشتعلت لشتك طة على صاحبك هذا

طلعت بعد ماموتني بس اتوسل وبقيت انتظر لحظه لحظه
مر يومين وطة ماكو والله سكنت الرگن من وراه اريده بس يجي لا ليلي ليل ولا نهاري نهار
وعبر اول يوم لازم ينزل اني كتبت برسالتي اله بأن انهار راح يزوجوها لسعد وفهمته الصار وهلكد ماروحي لايبه منتظرت من يرجع واكول اله اريدها اليه كتبته اني اريد انهار تصير مرتي ساعدتني ادري راح تزعل مني لان مايوم گتلك بس اني هم مااريد اخسرك وشتريد اني حاظر بس خلي نخلصها من هذا الزواج الطايح حظه

طة : صار موعد نزولي وقررت ماانزل بس اني بوكت استراحتي ومااشوف غير محسن فوك راسي ها ولك شصار
محسن : من ساعه السودة العرفتك بيها وطيح الله حظي اذا ابقى صاحبك وموت الكرفني لان سمعت كلام سامي واجيت مخبل عاقل واحد نازل اجازته الي نحسب الها يوم يوم وتالي ارجع علمودك
حجي طه : وكعت گلبي شكو
محسن : هاك هذا صاحبك مبين مسوي مكسوره ويريدك تساعده

حجي طه : فتحت الرساله وقريت جانت رساله طويله وكل مااتعمق بلكلام اصير اعصاب اكثر كله ولا نهر تحملت اخذت الورث طبه مرض عمر الفلوس موكفت بوجهي طردتني من بيت ابويه اذا هو وجعفر  موبيه شلي بلحياطين بعد نكرتني واستغلت ضعفي الي الله يجي يوم وياخذلي حقي بس نهر هاي الحنينه هيج تنكسر لا وحق تراب ابويه هاي التبجي على بجيتي وتحملت الضيم من ورايه تروح بلرجلين لو اعرف اسويها دم واني اقرا عرفت سامي رايدها مدري افرح لان اعرفه يستاهلها سامي ذهب صافي لو انقهر منه لان كاتب احبها من زمان ومكدرت اكول الك اله اكون نفسي وخفت اخسرك بس اني اعرف صاحبي واختي ميغلطون واني حبيت وجربت الحب اكيد سامي ميطعن بظهري وهو برسالته كاتب اريدها على سنة الله ورسوله وزوجها اليه تعال انقذني وانقذها

محسن : مخلصت حكايه الف ليله وليله
حجي طه : شكو
محسن : صار ساعه راسك مادها بلورقه غير افهم شصار مو جدي احترك من الفضول
حجي طه : عندك سلاح
محسن : اني اعرف تاليتي على ايدك ولك شسوي بيه
حجي طه : محتاجه كولش وشيصير اني اتحمل المسؤوليه
محسن : رجل اختي عنده واكدر احصله منه بس اذا صار شى رجلها يروح بلكشمش واختي تكابلني وتكعد هاي اذا ابويه اصلاً لفاني بيته
حجي طه : لتخاف والله مااسوي شى موزين واذا صار اني كولشي اتحمل بس جيبه اليه وامشي خلي نرجع
محسن : اي مو اني لعبة مال خلفوكم روح محسن تعال محسن
حجي طه : امشي مضل وكت نروح لبيت اختك ناخذ السلاح ونرجع

سامي : كاعد احش بلچكاير واشوفه اجه منك ياالله كمت على حيلي اركض مثل الطفل ممصدك نزل
حضنته وابوس بيه
حجي طه : حسابك بعدين
سامي : راضي والله بس زوجها اليه
حجي طه : اهلك يدرون
سامي : بلغت ابويه وكال التريده اني وياك
نهر : بدا اليأس يسيطر علية وحالتي صعبه وامي وعلي كوه سكتو اسبوع عني كاعده بلغرفه حابسه روحي منتظره شراح يصير وعلى لحظة يكولون يله امشي للمحكمه صافنه وبحضني جنات تلعب وجان اسمع هوسه وعياط جوه عفت جنات بلغرفه وفتحت الباب ونزلت اركض
واشوف انعام لازمه طه من بدلته مال عسكريه وتكوله على موتي تاخذها

يتبع ....