رواية أفلا تغفري الفصل الأول 1 - بقلم مريم السعدي

بارت  ١

#افلا_تغفري

#مريم_السعدي

محمد اسحب الجباسه طلعهن يم السلال رتبها
علي تعال صيح البنكلادش يمسحون الكع هاي قوطيه عصير مزروفه
يووو دتعال ياعلي فضها ساعتين  دتجي

جنت كاعد وره الميز مال كاشير وارتب النواقص ملتهي وصاير نار  وذوله يفتون الگلب
لمحت اب شايل ابنه

صفنت ونسيت روحي تبسمت الولد چان يؤمر ويتدلل وابوه يجاوب بالموافقه  تذكرت روحي

رجعت عشرين سنه ليوره واني بمكانه
وهذا بابا واكف
شكد جنت اتدلل عليه اني وقيصر
شكد جنت اضوجه بعمره ماصاح بينه او رزلنا وطلباتنا اوامر

حد ما جتي الغبره  واخذته وانكلب علينا رجعت عصبت رجعت عالمجر مال حساب  والولد طشرتهم لشغلهم

عملي  بسوبر ماركت كبير ببغداد معروف ويعود الملك لوالدي والملك لله واني اشتغل بي وي قيصر اخويه الاصغر مني بسنه

اثنينا تخرجنا من كليه اداره واقتصاد وماكو تعيين تشتغل بملك ابونا احسن

والدي جان مثال للاب العطوف  رغم علاقته الفاتره بوالدتي اللي هي تكون بت عمه  بس ويانا چان غير شي

ورغم محاولات والدتي بان تكرهنا بي وتقسينا عليه بس چنا نموت عليه اني واخويه واختي الوحيده

والدي طلق امي مره ورجعها لذمته بعد ما تاذينا..  هالحجي وكت چنا صغار وقبل سنه و نص طلقها بدون علم اي احد من اخوتي غيري اني وياها

ومن كبرنا كثرت سفراته لسوريا  وترك العمل بيدنا وبيد العمال الواثق بيهم يروح شهرين ويرجع  شهر ويرجع يسافر واول ميجي تكب نار ببيتنا من العركات بينه وبين امي

حدما كعدنا كلنا وياها وترجيناها
يمه على بختج ابويه حيطفر  من البيت بسببج حنخسره
جاوبتنا

متعرفون شكد عانيت ويه ابوكم حقير اناني ميفكرر بس بروحه مقتنعنا بكلامها ولا كدرنا نقنعها ولان احنا نشوفها من يطب تفتعل الاشكالات چنا محمليها الذنب بيناتنا لحد مايوم اسود انكشفت الحقيقه

اتصل بيه والدي بليل جان كلامه مبهم غير مفهوم كال

- بابا دبرلي بيت بنفس منطقتنا يكون نفه ومرتب واشتري بسرعه
- بابا شكو بيك شي  ليش تريد بيت هذا بيتنا شكبره

- بابا اسسمع كلام ابني وكت ماعدي بضرف يومين اني راجع وياي ناس دبرلي بيت والفلوس كلها جوه ايدك

بقيت صافن كتله صار هذا هو وفعلا من ثاني يوم بديت اسأل لكيت بيت  ببعد اربع فروع عننا ٢٠٠ متر مرتب  واخذته واتصلت بي كال

جيب عمال ينظفوا   وجهزه مطبخ كاونترات قنفات هالسوالف وغرفتين نوم  هاي اليوم تفتر بالسوك وتفضها بابا اني باجر جاي

اي بابا صار  ييحجي واني صافن ممعقوله متزوج ولا ليش مو معقول هو اصلا وي امي معايش اني رجال و افهم مو زعطوط توقعت توه متزوج حضرو كلشي ورجعت للبيت كلت لامي تخبلت واخوتي  عصبوا

كملت تجهيزه اتصل بيه راد يندل البيت ودليتهه كال
ابقى اريدك بقيت انتظر بداخل البيت وافتر اباوع كعد البيت خوش كعده بالاثاث الجديد  اوضاع سوريا مو زينه لهذا ابويه طفر

الفضول عدي  مينوصف والخوف ماكلني وارجع اكول حقه  هو شعايش وي امي بس هو السبب مخله فرصه الها عصبي ميتفاهم هالاثناء طبكت سياره تكسي توجهت للباب بعد مكنت كاعد بالطرمه وانصدم بمنظر ممتوقعه

والدي وياه مره وبنات ثنين البنات نسوان مو صغار بقيت فاك حلكي تقرب مني ابويه بوسني انلجم حلكي

محجيت كال

- فوتي ام سلوى نورتي بيتج

باوعتلي المره ونصت راسها جانت خايفه اكثر مني بناتها طبوا وراها يتشاورون بينهم والصغيره انلطشت بابويه

والصدمه الكبرى من والدي لف ايده على كتفها كاللها ويباوعلي مبتسم

شبيج بابا هذا اخوج الجبير ايسر

التفتت باوعتلي وباوعتله واني جامد صافن حد ما صاح

فوت بابا تعال احاجيك  طبيت والرجال يفوت الجنط طبيت وره ابويه للهول الجهزته شفت المريه جرت بناتها وطبو

واني شخصت عيوني عليهم

تقرب ابويه مني كال

- بابا ايسر انت وكيل اعمالي هنا ولازم تعرف كلشي

طلعت من شرودي وصفنتي باوعتله بحقد
منو ذوله حجي

- ذوله  ... التفت ورجع باوعلي
بابا ذوله عائلتي مرتي وبنتي رضوى الصغيره هاي الشفتها تعاي بابا رضاوي

- نعم بابا جيت
جتي تركض بدلع بقيت صافن عليها ابويه كاللها

- سلمي على اخوج باباتي

رضوى :  هلاو انت ايسر اخويه الجبير

باوعت لابويه نترت
- بالله حارمنا منك بحجه الشغل وانتت متزوج  وعايش حياتك وناطي حياتك لغيرناااا اختي اختي  سنا محاضنها ومشايفه منك حنان مفكرت بيها

ابو ايسر : اكعد بابا اكعد
رضوى- بابا شبي عصب
ابو ايسر- روحي حبيبتي روحي رتبي غراضج

ايسر- هاي بيومين خبصتني خبص بعدني مكاتبه ممكاتب عالبيت علمود هم.  ليش احنا هيج رخاص عدك

ابو ايسر : اذا حتضل هيج يابه مراح نتفاهم

- ولاريد اتفاهم

- ايسسسر اكعد
- ماااكعد خليك بحياتك  عيش وحدك وي بناتك

- اني عدي بنيه وحده افهم بابا الثانيه مو بنتي بس مثل  بنتي

- وانيي شنووو فهمني الوش دتكللي هو اني ششايف منك

- لعد اني المن سويت هالثروه  رغم مطلك امك من سنه ونص بس محد يدري غيرك بس بقيتها معززه مكرمه ببيت ٦٠٠ متر خدم وحشم جواها

- عمي كلشي منريد منك وانت ابقى وزع حنانك وفلوسك لياهو الاجت والراحت

نتر بيه
- ايسسسسر

وكفت بعدما التفتت اطلع كال

- مالك حق تحاسبني ممقصر بشي عليكم

- كلشي منريد حجي اخذ راحتك وانساني

- دتعال تعال
- مااجي بعد يابه هاك مفتاح السوبر ماركت وهذا مفتاح البيت فيماللا انسى عدك ابن بعد خلي بناتك يلزمون اعمالك

- تعاللل ... صاح بعصبيه وكفت كال
ذب سويجك واطلع صايرلي رجال ردتك رجال لكبرتي الي مو عليه امشي اطلع -----

غلط عليه ذبيت السويج وطلعت اعصابي ترجف شفت سياره طبكت وره شوي بيها رجال وبنيه تطلع بكصه البنات جوه طلعت امشي سريع وعفت سيارتي بالباب

والله لو اعرف اشتغل عالتقاطع ابيع جكاير ماارجع خل يفيدو بناته  ومرته اثاري متزوج من سنين واحنا مندري  حقها امي من تحجي وتكول اناني حقها من تتعارك

رجعت للبيت وحجيت كلشي  البيت احترك  من الهوسه الصارت بي  اختي ضلت تبجي وامي تخربطت وقيصر راحله بسيارته الفاخره لبيته لان من جهزته اجه ويايه كتله لصديق ابويه واقتنع وهسه صار نار كلت بلكن  ابويه من يشوف قيصر هم تركه  يجي يراضينا  ماعرف شسوي نار جانت تاكل بيه

تركنا واحنا بعازته منطانا غير الماده

تخرجي نجاحي مجان غير خوالي ويايه وهو مسافر  والشغل يخلصه عن طريق التلفون حقدت حيل عليه 

حتى اختي بعمرها مشافت منه حنان ليش هلكد عنده رخاص احنا ونطه كل وكته الهم والشهر اذا كمله ببغداد اخرته يتمرض بس يريد يرجع.

كضت فتره شهر ولا سال ولاخابر قيصر خلص فلوس واجاني

قيصر : يول ماعدك جوه ايدك وشللت

ايسر : منيلي هو المصرف كم يوم ويخلص

قيصر : لا يا الله تالي شون نروحله يمعود انت هم ورطتني وخليتها براسي خل نعوفه ونشوف شون يدبر اموره هاك شوف هسه زين هو وشكو عليه عيني كاعد والعمال يشتغلون ويمر باليوم ساعه للسوبر ماركت والايجارات جوه ايده خل يتنعمون بيها مرته اللخ وبناتها

ايسر : قيصر لتثبرنا انت متكدر اذا مو جوه ايدك فلوس اني كرامتي متسمحلي باوع حتى لاختك مخابر ولا طيب خاطرها ادري شسوتله مرته غسيل مخ

قيصر : لاخويه ميحتاج بدلع وكلمه حلوه ابوك يبيعنا حاجه الف تجي لولا اني رايحله

ايسر : امي شكالت
قيصر : امك تكول لحكو على ورثكم ابوكم مستعد مثل ماباعكم يحرمكم من الورث

ايسر : لا يالله واحنا ششايفين من طوله بحياتنا تالي حتى ورث ميوكعلنا
قيصر : يعني تروح

ايسر : امشي امري لله الواحد القهار امشيي

من بعد شهر رحنا لابونا للبيت استقبلنا باحسن استقبال جانت وجوهنا ثكيله ومرته مفاتت النا بس بنته رضوى انحشكت بيه من طبينا وتباوعلنا وتضحك مااتحمل كونها اختي وكلسا وكايللها ابويه

-  هذوله اخوتج السباع لو الوكت اخذني منج عدج ظهرين مو ظهر واحد

جانت تجاوب بخوف

- سلامتك بابا حبيبي

واني وقيصر لعبت نفسنا منها ومن ولواكتها

بيومها سلمني السوبر ماركت بيدي اني والاجارات استلمها بيد قيصر وسياراتنا رجعلنا سويجنا اشترط علينا بيومها

انه مسواك بيته الثاني اسبوعيا بقوائم  تدزها مرته المصون لفايبري واني اوصلها للباب وبالمدارس اوصل بنته واختها للمدرسه وي اختي وطلب منه نجي كل اسبوع بهذا البيت نتغده واختنا ويانا

جننا ننفذ بگلب محروك ومرته مطلعت ابد حتى بنتها الجبيره اللي فهمنا انها كانت ارمله وعدها بنت ساكنه سوريا ووالدي تعرف عليها  وتزوجها من قبل ١٩ سنه واحنا نايمين على اذننا جابها بغداد وكعدها ببيت بصف بيت اختها اللي طلعو  بيت اختها بنفس المنطقه الكاعدين بيها احنا 

واختها توفت واخذها ورجع لسوريا يعني من جننا صغار ونتصل بي يكوللنا عدي شغل ساعتين وارجع كان متزوج  عشنا كذبه جبيره وخيبه امل ونطيت كل الحق لامي

تقهرني سنين عمرها الضاعت وياه من تصفن الدنيا توكف بعيني

- ام ايسر ها شو صفنا

ام ايسر : ها يمه لا هيج اكولك هاي مرته بواكه الرياجيل شون صاير شكلها

ايسر : بقيت اباوع لامي ابتسمت

- شلج غرض بيها حجيه مره عاديه اكولج يوم شتكولين اقدملج عالحج هالسنه بلكن يطلع

- كيفك يوم كيفك

كامت امي منكسره وتمشي بهدوء كسرتني اكثر وبدت معاناتي
كمت كل اسبوع وي مسواك بيتنا تجيني رساله من فايبر المدام الشغلات التحتاجها

مخضر واسواق ومنضفات ونساتل كلشي واوصله للباب وابويه يجلب بيه ابقه
ابقه شوي اشرب جاي واطلع  من يمه مدري شون متحمل كعده البيت ولو يوم بكربلا ويوم بالنجف واسبوع بالشمال والمدللات وياه غلسنا اول اسبوعين عن جمعه الخميس الطلبها منا

بس وراها تعارك وي قيصر   واخذت سنا اختي ورحنا  سنا رغم زعلانه عليه بس شافته بجت تقرب منها حضنها ويبوس براسها

بيومها لبسها عشر بتوت ضوت بيدها  وعرفها على بنته الثانيه ماريد اكول اختي ماعدي غير سنا اخت وماريد غيرها

سنا متحملت  غيرتها وحقدها جانت البنيه اصغر من سنا بسنتين  حاولت هواي وي سنا تتبادل اطراف الكلام
وسنا متقبل ترد عليها بس منصيه

قيصر نوعا ما حجه وياها وهي كيفت كامت من يم سنا كعدت يمه

رضوى : انت هم خريج اداره واقتصاد

قيصر : ابتسمت باوعت لابويه شون احب اللواكه عاد
اي اني هم

رضوى : زين اني اريد قسم حلو مو متعب ياكليه تنصحني
قيصر : ليش انتي سادس

رضوى : لا اني خامس بس داافكر من هسه
قيصر : هسه دطلعي من السادس والله كريم

جريت نفس باوعت لابويه طاير بيها مبتسم يباوعلها شوي وسنا وكفت كالت
يله شوكت نروح ماما وحدها

ايسر : يله امشي ترخصت من سياده الوالد وطبت مرته بيدها كيك وعصير باوعتلها تطلع بالاربعين بس مرتبه روحها نظراتي جانت تشرح كرهي وحقدي

هذا مكان امي وكرامتها
هذا  مكانها المفروض
مجنت اكدر اسيطر على عيوني
اذا سيطرت على لساني وسكتت عيوني تحجي

طلعنا من يمه سنا بليل تخربطت وصخنت وامي يمها باتت واني اطب واطلع ردت اتخبل  ومن يومها

كل يوم يمر يتجدد حقد اكبر كل يوم يفوت وابونا مو ويانا وعدهم  وشبعانين منه واحنا محرومين ينولد كره جديد بالاضافه لكلام امي والسم اللي تغدينا بي بجرعات يوميه

ابويه صار بالنسبه النا فقط مصدر مالي تكاتفت عائلتنا اكثر من قبل  وشنينا حرب نفسية عالوالد  قطعنا جياتنا ومن يتصل اكوله تعبان

كمت كل اسبوع اودي الغراض ومن اشوف بنته تطلع اسمها بكلمه او كلمتين كان تكون

اخذي الغراض  وديها مو خادم عدج اني
جانت تسكت وتبتسم بخوف مترد واني ازيد كل مره الجرعه

مره من المرات طببت الغراض للطرمه مرته كالت

ام رضوى : عفيه ميخالف تخليها بالمطبخ

ايسر : نترت ابويه موجود
ام رضوى : للا طالع

ايسر : ومخبل دافوت للبيت ومابي رجال
ام رضوى : انت رجال البيت احنا عرضك ماما

رغم  زمجرتي بردي الموذي الهها بس جاوبتني باسلوب سكتني نترت
- اخذيهن انتي شنو اشتغل خادم عدددج ششايفه روحج

ام رضوى : براحتك امي هاهي عوفهن عاشت ايدك

رضوى : هلاو ايسر شونك هاك هاي الك

التفتت اباوعلها بغضب تقربت طتني ماعون صغير بي  كيك باوعتلها وباوعت لايدها رافع تك حاحب معاجبني نترت

- ماريد منكم شي لتضلون تتملقون كدام ابويه شتردون بعد

- اني سويته الك

عفتها وطلعت رجعت للسوبر ماركت اعصابي كلش تعبت ابويه اذانا حيل سنا اختي اللي معيشها العاشته ويكول ممقصر ليش هي بالفلوس

دااشتغل وشفت بنيه دتشتري واكفه سفور جانت لابسه شي فوك البنطرون مغطي معالمها الانثويه الواضحه كانت تطلع ب١٨ من عمرها

دتحاسب مهند ابو الكاشير شوي يتداهر ابتسملها

كال

- بقتلج ٢٠٠٠ تردين بيها نستله

جاوبت
- لالا ماحبها
-

زين جبس هذا طيب

- لالا رجعها الي عفيه

انتبهت عليها تضايقت وهو لح هواي نترت بيه

- مهنند انطيها الباقي وخل تروح لتلح

جاوبتني بهدوء وباعت لطولي مستغربه
-

شكرا الك

- هله بيج

اخذت غراضها وطلعت تعاركت وي مهند وطردته طلعت قهري بي يومين ووديت الغراض لبيت ابويه فتحت الباب من جوه

دخلت الجياس  كلهن مرت ابويه طلعت تسلم مبتسمه وراها رضوى وبنتها الجبيره فاتت من يمي همست

- السلام عليكم
رديت -- شون شكول زفره ملفي ببيته وكفت البنيه والتفتت عليه كالت
- ويايه هاي

- شدتشوفين اكو غير شكول فاتت من يمي
-

اني اسفه

- على شنو يابه  باوعتلها مستغرب

- لان احترمتك وسلمت جان مفروض البسك كانما اشوف بزونه وماسلم عليك بس اني شفت بشر وسلمت واني اسفه

بقيت صافن لاسلوبها الاستفزازي مو نفس اختها وامها اليسكتون

باوعتلها من فوك ليجوه معاجبني طلعت جان اكو سياره تنتظرها جتني رضوى كالت
رضوى :  عفيه ايسر حباب ميخالف تجيبلي بليل نستله من هاي
شوفتلي كاغد باوعتلها بغضب هزيت راسي
- عود  بليل ... ابوج موجود؟

- بابا نايم 
-

همم ....  باعي هاي اختج كوليلها لتطول لسانها لا ينكص

رضوى : سلوى حاجتك شعجب
ايسر : سمعتيني شكتلج نترت

رضوى : اوك 

التفتت اطبب الباقي شفت سياره طابكه بالباب بنيه تطلع كد رضوى تحجي وي رجال يطلع بالاربعين باسته ونزلت مدري وين شايف شكلها طبت للبيت وبيدها جنطه جبيره والسياره راحت بطبتها عاطت رضوى

ماماا جتي نور  ماما نور اجتنا

طببت بقيه الغراض واباوع عليهم مو بيدي من ملامحي هنا تغضب لان الكه  عدهم الفرحه الناقصتنا النا البنيه بجت وحضنت ام رضوى ومرت ابويه هم بجت منو هاي

رضوى جتي يمي اخذت الغراض باوعت لمكان نظري المستغرب تبتسم كالت

- هاي بت خالتي خطيه امها توفت قبل سنتين وابوها ديتزوج  جتي عدنا هالفتره جاوبت
- اي خوش ملجا للايتام وتعال عبد العظيم ادفع

عفت البيت وطلعت جان صوتي عالي  مرت ابويه والبنيه سمعوا مو بس رضوى بس ممهتم اصلا صرت متاكد انهم ميكولون لابويه شي لان ميت مره حاجي وميعاتب ومخايف اذا كالوله اني اذا بقيت ساكت اطك من قهري
.
.

.
.

يتبع ...