رواية اغلال القدر الفصل الرابع عشر 14 - بقلم الكاتبة ديانا

البارت الرابع عشر
اغلال القدر

ملاك ..: الو جواد
جواد ..: هلو ملاك كولي محتاجين شي
ملاك ..: عفية جواد هاي رغد موصية على كيكة لعيد ميلاد تيم و ام التجهيزات خابرت اختي و كالت روحوا للبيت اخذوهة رح انطيك رقمها و اندل بيتها و جيبها
جواد ..: اي صار ... دزي الرقم هسة و فد ساعه اروح لان  دا اوصل عمي ابو رغد للمطار ...
ملاك ..: ياااا بابا  حيسافر ..؟ اشو ما ادري ... اوك عموماً لا تنسه تجيب الكيكة ..
جواد ..: ان شاءالله ما انسه

مرحبه ...
اني ملاك عمري ٢٠ سنه ... .. طالبة مرحلة ثانية كلية اهلية طب اسنان ... معدلي جان ناصي و مدخلت الحكومي منقبلت .. طلعلي القبول هندسة بابل و مردت الهندسة بابا شجعني ادخل طب اسنان بالرغم اني ما احب هالاختصاص ... بس هو اصر لان اختي صيدلة و مرادني اقل منها ... و خيرني بين الصيدلة و بين طب الاسنان ... الصيدلة شفت اختي بيها تمرمرت فقررت اجرب شي جديد بس طلع طب الاسنان اكثر مرار ... اووووف عاد تكمل الخمس سنوات شيفضها .... المهم ... اني اعيش ببغداد بحي راقي و اهلي ناس اغنياء ... و بابا يملك شركات و املاك هواية ... اهلي ناس متحررين ... ويحبون الكيف ... اني يومي اخلصه اذا بأيام الكلية ارجع من كليتي انام شوية و اطلع افرفر بالسيارة وية صديقاتي  .. و نتعشة برة و ارجع ... و مرات تصدف نسوي حفلات تعارف و تواصل بيناتنه كل اسبوع وحدة ... صديقاتي من طبقة راقية و كلهم بنات ناس معروفين ... و عدنه يومين بالاسبوع نروح للنادي ... كلنه مشتركين بي نادي ترفيهي بي مطاعم و مسابح و من هالسوالف .. نتونس و نرجع .... السفر احد اهم هوايتي بالشته و بعطلة نص السنه اروح للندن  لان بابا عنده هناك فيلا و حساب و فاتحلي الي هم حساب بالبنك ... و بالصيف افتر ما اكعد ببغداد ابد لان حارة ... اخلص الصيف بين عمان يم اهل ماما او لندن او تركيا...
المهم احنه بس خوات اثنين اختي رغد متزوجة من شخص حبته جان وياها بالكلية ... اهله هم ناس معروفين ابوه جان سفير بالمانيا و عاشوا فترة هناك و بعد ما تقاعد رجعوا ... ... اختي كلش تحب زوجها و عيالها رغم عيالها ناس متكبرين و متعالين ... لكن هي ذابت وياهم و تطبعت باطباعهم...
عدها جهال ٢ ولد و بنية ... البنية روز عمره اربع سنوات والولد تيم عمره سنة و اليوم  عيد ميلاده حبيب خالتو .... اني احب الحرية و احب الضحك و الصداقات و الطلعات .. و لبسي كلش متحرر و و شعري كل ٣ اشهر لون داكة وشم فراشة برگبتي .. كل هالامور اسويها بقناعة اهلي ... بابا ما فد يوم كلي شنو هالبس او شعرج ليش هيج لونه ... ابد ...اني مقررة الحياة اعيشها بكل تفاصيلها و كلشي اجرب بيها حتى لا اندم بعدين ... امي ايضاً مثلي تحب تلون شعرها دائماً و نروح سوة نغير المني كير للصالون و مو محجبة على الرغم اهل بابا مو هيج و دائماً ينتقدوهة بس ضاربة حجيهم بعرض الحايط ...
احب و اعشگ شخص من ايام السادس اعدادي من جنت اقرة تعرفت عليه بالمحاظرات يم استاذ الرياضيات ... اسمه زيدون ... بالبداية جان معجب بيه و نظراته فاضحته  ...و اني هم انعجبت بي .. لان جريء بنظراته و هذا الشي العجبني الى ان قبل البكلوريا بشهرين اعترفلي ... و اني هم اعترفتله ... و تعلقنا ببعض .. بس خلصنه السادس و هو انقبل كلية ادارة و اقتصاد و اني دخلت طب اسنان .. بس ظلينا على تواصل .. يجيني للكلية و نطلع مناك ... زيدون كلش يحبني و معيشني بحلم وردي ... و الي مريحني وياه هو ميدخل بتصرفاتي ... يعني عاجبته اكون هيج .... يعجبه ستايلي و لبسي و شعري صارلنه سنتين و نص سوة ... حتى اتفقنه نطلع وية كروب كليتي لتركيا سفرة و رح يجي وياية وباجر موعد السفرة ... واني طايرة من الفرح ... رغم انو تركيا مالة منها و شايفتها كومة ... بس حبيبي رح يجي ويانه ... طبعاً اهلي ما حاجيتلهم على زيدون انه علاقتنه طوووخ لا بس كايلتلهم اكو شخص يريدني و ينتظر يكمل كلية و يتقدم ... همه ميدققون .. تركوا الشغلة لحينها ...
وهسة لازم اكوم اتحضر للعيد ميلاد ... اشتريت البارحة فستان اسود قصير مگسم من فوك شيفون وشفاف و الظهر هم شفاف ... و مكياج اني رح امكيج و اسوي شعري بايدي ما روح صالون ...

جواد ..:
سلام ... اني جواد ... تعرفتوا علية من خلال زينب ...
قصتي تعرفوها و تعرفون شلون التقيت بزينب ... و تعرفون شلون ضيعتها ... اني بگلبي نبت احساس اتجاه زينب ملون بلون قوس قزح ينور ظلام گلبي .. زينب مو بس شخص مظلوم حبيت اساعدها .. زينب جانت الي ضوة بظلام حياتي ... حسيتها الام الي ما لكيتها بحياتي .. ما اعرف ليش حسيتها تشبه امي الي ما شفتها ... من جانت تهتم باخوانها جنت اتمنى اكون اني هم احد اخوانه و تهتم بيه هيج ... ما انسى اول يوم الي نزلت بي للشارع تكدي ... صورتها و هي حايرة متعرف شسوي و ضحت بروحها و كعدت اخوانها على صفحة ... سمعت انشودة ع اليتم و كعدت بالكاع تبجي ... منظرها هذا زرع بيه سعور عمره جواد كزيزة ما حاس بي ... ما ادري شنوة ... شكد شايف مناظر الظلم و القهر و اليتم ... بس منظر زينب و هي كاعدة تصيح يمة ... خلت عيني تدمع و اني ما نزلتلي دمعه ابد .... من وكتها ذاك صارت زينب الها بگلبي دگة تصرخ الم و وجع ..
جنت اريد انهزم بيها .. و ما اخليها بهالوضع .. بس مكدرت ... ظليت اباوعها بعين گلبي الي صارت تحبها .. حب فقير لفقيرة ... حب يتيم. ليتيمة ... حب مظلوم لمظلومة .... بس اجة علي و لاحظت لهفة زينب عليه و گلبي كذب خبر و ظل يدگ بأسمها و دمعتها تفطره ... و الى ان انصدمت بيهم اثنينهم لما جان علي مريض ... حسيت بزينب تحفظ لعلي مكان جبير من كلبها هاي اذا مو كله .... المهم اني بيه غصة جبيرة اريد الكاها لزينب و اعرف اخبارها ...لان كلبي معاند مينساها ... و الليل يمر عليه غير ما يمر ع الاوادم ....
خلي اسولفلكم علية ... اني كبرت و كبر عقلي وياية و حمل الدنية و همومها علموني دروس ... بعد ما طلعنه من السجن علي سافر وية امير ... و اني مكدرت اسافر ... لان املي الكه زينب جان جبير ... رغم اني. اعرف بعلي يتنفس زينب بدل الهوا و زينب عدها مشاعر لعلي ... بس شسوي لهذا كلبي ...
المهم اشتغلت هنا اشكال ... حمال ... عامل بنه ... عامل بمحل اثاث ... و كل مرة لو يبطلوني همه لو اني ابطل لان اليومية قليلة ... الشغل مو عيب كلشي اشتغلت و اخر شي اشتغلت هنا يم ابو رغد صارلي ثلاث سنوات وياه الحمدلله ابو رغد يحبني لان اني ما اشتكيت فد يوم من الراتب او ردت زيادة شينطيني احمدالله عليه ..اني ايده اليمنة سيارته جوة ايدي و اودي وين ميروح و يدزني مندوب اتعامل وية الشركات الي يتعاقد وياهن ... و حتى سواگة اهله اني وياهم ... مسواكهم طلعاتهم ... زايدة ناگصة ... كلها هو  مأمن عليهم وياية ....
المهم .. اني هسة رجعت من المطار ذبيت ابو رغد عنده سفرة عمل  لدبي و لازم اسرع حتى اجيب الكيكة لان ملاك بنت ابو رغد خابرتني اجيبها ...
طبعاً ابو رغد عنده بنات٢ بس الله يستر عليهن متحررات و طريقة لبسهم متعجبني ... خاصةً ملاك ...بنته الصغيرة ... هههه يا صغيرة عمرها ٢٠ او اكبر .. ما ادري ... بس هي الله يستر عليها حلوة و حركة ... يعني تحب تشاقة و تضحك و تطلع هواية و لبسها مو محتشم و السويج بيدها ٢٤ ساعة تفر ... اني لو واليها جان عرفت شلون اخليها تستعدل ... ما اعرف شلون عمي ابو رغد ميحاسبهم.. رغد رغم زوجها عصبي و حازم بس مكدرلها بهالشغلة يمكن لان همه اهله هم هيج ... شعليه اني هسة خلي احير بعنوان ام الكيك ...
خلي ادك على رقمها ....

جواد ..: الو السلام عليكم
زينب ..: و عليكم السلام تفضل اخي ..
جواد ..: بلة زحمة اريد استلم كيكة مال عيد ميلاد
زينب ..: اي ... باسم منو ...
جواد ..: باسم ام روز
زينب ..: اي اخي رح ادليك البيت .. و روح استلمها مناك لان اني طالعة مو بالمحل و لا بالبيت  ... و لو زحمة و زوجي هناك هو رح يطلعها الك و اعذرني و تأسفلي من ام روز لان ابو التوصيل سيارته عاطلة ...
و اني ممنونه منك
جواد ..: لا اختي ماكو زحمة بس انطيني العنوان ...
اهاااا اوك لعد اني هسة رايح ... مع السلامة ..

جواد ...
نزلت گبال البيت الي دلتني عليه البنية ... حتى اخذ الكيكة من زوجها ... و دكيت الباب ... طلعلي رجال چبير بالعمر و اخلاقه حلوة كلي دقايق و اجيبلك الطلب ..
اجة الرجال ورة دقيقتين و جايب الكيكة جبيرة الكارتونه بحيث ركضت عليه حتى اخذها منه ... اجة باذني صوت زوجته الله يستر عليها صغيرة من صوتها و هو چبير كلش الله يحفظهم شعليك انت جواد .....
حطيتها بالسيارة و سلمته الفلوس و اتشكرته و طلعت ...
توجهت لبيت ابو رغد ...و اني و بالسيارة دك تليفوني لكيت ملاك تدك ...شلته ..
جواد ..: الو
ملاك ..: هلو جواد ...
جواد ،..: هلو ملاك .. ها محتاجين شي . اني جاي بالطريق و جايب الكيكة ...
ملاك ..: عفية الله يخليك جواد انقذني ...
جواد ..: شكو ملاك ..
ملاك ..: اريد تاخذني ابدل الفستان البارحة اشتريته ... طلع السحاب مشلوع ... وسيارتي مصفرة بانزين
جواد ..: اي ان شاءالله بالطريق جاي ..

جواد ...
هاي دنيتها كلها طلعات و لبس و اكل و سواكة ... الله يعين الياخذها ... لازم يسويلها ميزانية خاصة لهالامور ....
وصلت للبيت و طلعتلي ام نهلة التشتغل عدهم و دخلنه الكيكة اني وياها لان متكدر وحدها ...
امور العيد ميلاد الباقية محضريها همه ظاهر لان مدزوني اشتري شي ... و اكيد مثل كل مرة رح تنكلب الامة .. مثل عيد ميلاد روز العام الفرع انسد من السيارات ... الحياة العايشيهة بعيدة كل البعد عن العالم الي جنت عايشة ... و الظلم القاسيته .. عايشين بترافة و تبذير و اسراف ... و اللامبالاة ... بكلشي حتى بالتعامل بيناتهم ... يعني بنية بعمر خطر يامنون عليها وياية اني شاب ميعرفوني .. حتى لو جنت وياهم صارلي ٣ سنوات بس مو هيج ....
جتي ملاك و استغفر الله البنية متعرف شي اسمه طويل ... لابسة فستان قصير و ربع ردن و مو محتشم ..
درت وجهي غصباً عني ...
كالت ياله جواد عفية خاف يعزلون ... كتلها مين اخذتي ... كالت من الكرادة ... كتلها امشي ...
و صعدنا بالسيارة هي كالعادة كعدت ليورة ... و اني حركت ع السريع ...  اسمعها تحجي بالتليفون وية صاحبها.... اني درت وجهي ع الجامة بس اريد اوصلها واخلص ..
ظاهر رح تسافر باجر لان دتاكد ع الموعد .. اني شكد صارلي وياهم ... بس عمري ما دخلت ... و لا حاجيتها حجاية معجبتها..... اكول اني معلية اني هنا اشتغل عدهم و بس و باجري ...
وصلنه للمحل و نزلت و شايلة علاگة و لابسه مناظر شمسية و شعرها يلعب بي الهوا ... اباوع الدنية كلها تباوع عليها .. و الي يبسم و الي ذبلة حجاية ...
كالت هسة اجي ... كتلها وين المحل ... كالت هناك بذيج القيصيرية ... كلت بكلبي (لا مو هالدرجة .. جواد متدخل ... يعني هي بنت ابو الخبزة مالتي هم الله ميرضاها عرضه كدامك تتعرض للحرشة ... شلون تعوفها تدخل لقيصيرية و وحدها بهاللبس ... و الشعر الهادته ... ما ادري ليش يومية مكفشةشعرها اي ما عندج لاستيك تشيلي بي ...😤)
كتلها اوكفي اجي وياج ... جان تباوعلي من ورة المناظر و كالت ... لييش؟
كتلها ملاك...  عمي موصيني عليكم ... تعرفين انت اكو هواية محلات البسة رجالية هنا و الولد هواية ... اتحمليني شلون ما جان ادري مو من مقامج اني ... قاطعتني و كالت جواد ما اتاخر هسة اجي ... و اندارت ع السريع و رادت تنضرب بواحد اثول فاتح عينه و حلگه عليها الا شوية تحول عينه ... الة اني جريتها من ذراعها و حطيتها ورة ظهري و جان اعيط بهالولد ... كتله بوووومة باوع طريقك .... كلي متباوع هي طريقها ... لو ملتهية بال ...
و بعده ما كمل الحجاية و جان انطي بوكس على فچه .. و وكعته هو دمه ... ملاك كامت تصيح ... جواد ... هاي شبيك ... و بعصبية و نار تطلع من خشمي كتلها فوتي روحي حتى تكملين شغلج ... التمت الناس و يهدون بية و هذاك الفارة انهزم .... جبان ...
هي خايفة و راحت و مشيت وراها ...
دخلت للمحل و اني ظليت برة واكف طلعت جكارة اشرب ... و اعصابي نار ... اشو هاي تاخرت ... مديت راسي لكيتها لابسة نفنوف اسود و تفتر بي بالمحل كدام ابو المحلو النفنوف .... استغفر الله الظهر كله طالع ... و قصير و بي فتحة ...
مكدرت احجي او اامرها بشي ... بس البية مخلاني و جماله هستوهة متعرضه لحرشة و اعصابي تلفت من وراها ... دكيت عليها ....شالته كتلهة ع السريع ملاك دا ارجع خابروني من الشركة محتاجيني ... كلتلي اوك جيت ثواني .... ظليت واكف حششت جكاير يمكن حركت ٣ وحدة ورة اللخ ..و الخاتون بعدها هاي الثواني مالتها ...
طلعت و اخيراً شايلة العلاگة و تتبختر بمشيتها  و لا عبالك هستوني تعاركت  وية واحد من ورة هالسوالف مالتها ...
رجعنا للبيت نزلت و جمالة هي الضايجة تركع بالبيبان .. و لا حتى كالت شكراً ... مع السلامة ... ابد ... و اني هم ما انتظر منهة شكر ... اني دا اشتغل بأجر عندهم ....
دخلت للبيت و اني دكيت على رغد كلت خاف محتاجة شي .. كالت جواد تعال انزل اريدك بشغلة ...
نزلت و دخلت للبيت جانوا ديحضرون ام نهلة و وياها خدامتين فيلبينيات لكيت رغد جتني و محتارة .. كالت جواد شبيها ملاك ..؟ كتلها ما اعرف ليش .. كالت اول ما فاتت ثبرتنه بصياحها و عياطها و كالت اني ما احضر العيد ميلاد وصاعدة لغرفتي لا احد يحاجيني ..
(اني عرفت ليش ... الخاتون صايجة لان حاسبت الولد الي راد يصچمها ... تريدني اسكت و اغلس ... شعلية بيها من تتعرض للحرشة و مو كدامي ... بس اني صار الشي كدامي  لو اموت ما اسكت ..)
كتلها والله ما اعرف ام روز ... اني رايح تردين شي ... كالت عفية خليك هنا خاف نحتاجك لان بعد ساعة يجون الضيوف و خاف نريد شي خليك قريب ... كتلها ميخالف لعد رح اكعد بالطرمة .... كالت اوك ...
الحفل بده و بدت الناس تجي ... شي يعجب .. هذوله الناس هم عدهم قهر هم ناموا فد يوم و اكو حسبة ببالهم ... هو عيد ميلاد طفل عمره سنه ... هالشابات بالبدلات شنوو ؟ عبالك عارضات ازياء و المشكلة ينزلن هيج بالبدلات بلة شي يسترهن ... عبالك عرايس ... و الاحلى رياجيلهم وياهم ... يعني قابلين ع هالخريط ...
اني ظليت واكف بس عيني صديتها عن هالنسوان ... مو طبعي اتمعن بمرة ... شلت راسي ليفوك و جان اشوف ملاك واكفة بشباك غرفتها لابسة بجامة و شايلة شعرها ذيل .. متجتفة و تباوع بعصبية علية ... نزلت عيني و حكيت لحيتي و ابتسمت ابتسامة باهتة يعني ممهتم اني ....
ظلت واكفة تباوع بس لاحظتها من فاتوا صديقاتها ختلت ورة البردة ... هههههه متريد احد يشوفها ...مدرت بال لتصرفاتها الطفولية ...
جتني ورة ساعه  رغد كلتلي عفية بس اريدك تجيب من فوگ كارتون مال هدايا دا اوزعها للجهال  ام نهلة ظهرها متكدر تنزله و هذني الخدم معاندات يصعدن..
كتلها تمام ...
صعدت فوك جان اظلم و بس كم ضوة خافت معلوگ البيت چبير و كله غرف و دهاليز ...
رحت للغرفة المالت عليها رغد ... و شلت الكارتون و مشيت و بهالاثناء طلعت ملاك و صارت بوجهي ... هي سوت روحها مشافتني دارت وجهها و دتنزل الثوب اللابسته نفسه الاسود الي اشترته ظهرها كله مبين لان شفاف و قصير و الحذاء شعلوه دتنزل بي و جان تعثر ... اني لا ارادياً ذبيت الكارتون و تلگفتها بيدي .... و صارت عيني بعينها و خصرها ملأ ايدي. و گلبي گام يدك سريع ... و هي ارتبكت بس بثواني حسيت على نفسي و هديتها ....
و شلت الكارتون و ع السريع نزلت ....
وهي وراية نزلت ....

ملاك ....
من ردت اوكع و لكفني جواد ... ما اعرف ليش حسيت بين ايده باحساس غريب ... هو طويل و جتافاته عريضه ... ما اعتقد يلعب حديد بس هو جسمه خشن و صدره عريض .... من صرت بين ايده و ما اعرف شلون ...؟
حسيت بدوخة و گلبي راد ينفجر من الدگ ... انفاسه استنشقتها ... و دوختني  حرارتها ... ما ادري ليش ردت تطول هالاحضان ... و بهالثواني سحرني لمعة عيونه و عطره الرجولي الخفيف ... ما شامة بجواد عطر قبل ابداً بس من صرت بين ايده ... شميته و دوخني ....
حسيته هو هم ارتبك ... هدني و اخذ كارتونة جان شايلها و نزل .......
نزلت وراه و دخلت للصاله جانت كلها هوسة ركص و غناء و صديقاتي ركضوا علية سحبوني بالنص حتى نركص ... للحظات حسيت بالحنين لهذيج اللحظة الفاتت ... بس نسيت نفسي و دخلت بالجو بسرعه ... لان هالاجواء اعشقها ... و دست على نفسي و بدلت و نزلت رغم جنت ضايجة من العركة السواها هذا المتخلف ... جواد ...
لا مو متخلف .. يمكن من جنت قريبة عليه حسيت برجولته الي ما شفته باي رجل بحياتي ... حتى زيدون مو مثلة ...
اندمجت وية الحفلة و جانت تخبل ... و كملنه و طلعت دا اوصل صديقاتي .. عيني بلا شعور صارت تدور جواد ...
صعدوا بسياراتهم و راحوا .. و اني ظليت ادور بعيني .. بس سيارة الشغل موجودة يعني هو بعده هنا ...
شبيج ملاك ثولة ... عجبج السايق مال ابوج .. امشي عوفي وين ميولي خلي يولي ...
دخلت للبيت و جان الكاه بالمطبخ كاعد ياكل ... اني باعت ريگي بصعوبة لان انصدمت حتى رمشة ما رمشت ... هو هم شافني وكف حلكه و ثواني و جان ترك الاكل و طلع ... من طلع فات من يمي و چتفه طخ يچتفي و نفس دكات الجنون قبل شوية الي اجتاحتني هزت گلبي هز ... عضيت شفتي و خجلت منه ... و صعدت فوك ركض ............

يوم السفرة ....
اليوم يوم السفرة و واهس ما عندي اروح ... بس زيدون كلش متشوق الها و البنات دفعوني تدفع ... ردت اشوف جواد و ردة فعله على البارحة الصار ...
امممم خلي اخابره يجي يوصلني .. للمطار ... لا استحي ... امممم خلي ام نهلة تخابره ... و دكله ملاك نسوها و تريد تروح تعال اخذها ... ااااااي هي ..
رحت لام نهلة و سويت الامر اعتيادي ... كتلها عفية ام نهلة خابري جواد خلي يجي ياخذني لان ماكو احد يجيني ... كالت اي ... و الله و ربع ساعة اجة جواد ...
من صاحتني ام نهلة و كالت اجة اني گلبي رف و ما سكت ... رحت لبست بدي ع البنطرون شوية بي طول و نص ردن و شلت شعري كعكة ... و ظليت كاعدة بغرفتي ... سويت روحي بعدني مو جاهزة ... ايدي بردت ... لييش،،؟ كلت يا ربي قابل اول مرة اشوف جواد .. ليش هيجي .... بلعت ريكي و گلبي من شرايني راد يطلع من الدك ...
صاحت ام نهلة وينج ملوكة ... ياله تعاي ...
اخذت الجنطة و سحبتها و على كيفي امشي بلكي يصعد مثل كل مرة من اسافر يجي يشيل الجنطة ...
نزلت الدرج اول درجة و طلعت صوت بالجنطة ... وماكو ... ثاني درجة و عليت الصوت ... هم ماكو ... اخر شي جتني ام نهلة تركض ... جيبي يمة اني اشيلها ...
نطيتهيا و الدرج مالتنه بي لوفة و بعدين يصير المطبخ بوجه مفتوح عليه ... نزلت الدرج و جان يصير كبالي ... بطوله ساد الباب و واكف متجف لابس قميص زيتوني و بنطرون بيجي و شعره شوية بي طول و ساحبة بالجل .... شنو اول مرة اشوف جواد؟؟؟ مو هو الياخذني للسوك و اصخره يجيب غراض اريدها ..؟  ...  ... اني ادري بروحي  غبية و عيوني رح تفضحني لبست مناظري الشمسية همزين جانت عريضة كلش غطت نص وجهي و كلت... ام احم صباح الخير ...
ردني بكل برود ... صباح النور
اجة اخذ من ام نهلة الجنطة و كلهة جيبي انت ظهرج اني اشيلها ... كلت بكلبي اني بت البطة السودة لو اني فان دام ... 😒😒😒
عفته و مشيت ... صعد قبله للسيارة ... و هو حط جنطة السفر بجنطة السيارة  و رجع كعد ... و كلشي ما حجة ..
الطريق طويل و ضجت هذا شبي ...؟
المهم وصلنه للمطار و نزلني لساحة عباس ابن فرناس كلي محتاجة شي ... كتله هاا لا ما محتاجة .. كلي تكدرين تفوتين مو .. كتله اي بابا ناطيهم خبر ... كتله بس الجنطة ما اكدر اشيلها ... كلي سحبيها سحب ... لا تشيليها و نزل ع الجنطة ديطلع اليدة و صار كلش قريب مني و عطره نفسه الي جان حاطه البارحة طخ بخشمي و ايده طخت بايدي راساً وخر عبالك انتل ... و كال هاي خربانة اليدة ..؟ اني انثولت كتله ها يمكن... لا... اي ... لا هسة جانت تشتغل ...كلي امشي اني اوديج
و دخلنه للصاله ... و بس اطلع هويتي يفوتونه لان يعرفون بابا معلينه بهالامور .. المهم ..
وصلت للمكان الي متفقين عليه و لكيت زيدون كاعد و صديقاتي و الشلة البقية صديقاتي ركضن علية و زيدون وكف يباوعلي و يبتسم .... انداريت لكيت جواد ماكو ... وينه ... الظاهر راح ... ضجت اكثر ... و زيدون لزم ايدي و بلا سابق انذار جريتها بسرعه ... خليته يعبس و يكلي شبيج ... كتله هااا مابية ...
المهم صعدنه بالطيارة بعد المناداة و اني عيني ع الشباك افكر بجواد ... عبالك اول مرة اعرفه ... شخص شهم و الرجولة تقطر من  ملامحه ... و تصرفاته ... كلشي بي حلو ... و البارحة قربه مني و عينه من صارت بعيني عبالك تعرفت عليه بالجديد ... درت وجهي على زيدون اباوعله... و لا شعراية بوجهه شعره بي لون صابغة و بنطرونه رح يوكع منه و العلج بحلكه و الهيدفون باذنه و يهز راسه وية الاغنية ... رجعت افكر بجواد ... قارنته بزيدون ... كلشي بجواد عكس زيدون ...
اتنهدت و غمضت عيني ... وصلنه لتركيا و للفندق ...
استراحينه و وراها طلعنه المغرب للنادي الليلي ... اني متعودة وية الشلة اجي لهنا ...
ركص  و غنه و بنات و ولد و اضوية خافته  .... زيدون كثر الشرب ... اني تعبت ... كتله اريد ارجع للفندق ... كلي بعد وكت ... كتله لا كلش تعبت ... كال اوك اجي وياج ... كتله لا لا اني اروح ... رجعت للفندق القريب من النادي ... و طبيت للغرفة ... نزعت ملابسي حتى ادخل للحمام .... اتفاجئت بالباب انسدت .... لبست البرنص و رحت اشوف منو ...جان الكه زيدون ... عينه حمر و مو بوعيه ... اجة عليه و بحركات و كلام يلعب النفس جرني ... من ايدي و نزعني البرنص بحركات خشنة ... و دفعني ع الجرباية اني كمت اعيط و سادة رجلي حيل و حاضنة نفسي ضامة روحي ... و جان يفقد زيدون ... و صار حيوان و بابشع  صور القذارة و الابتذال ... شكد حاولت اقاوم ... ادفع بي اتهسرت ... مكدرت هو اقوى مني ... و بلحضات سودة قتل الانوثة البية و بطريقة خلت روحي تنقتل و بدم بارد ......
حسيت شي حار نزل مني ... هو ابتعد و عبالك صحى ... عدل نفسه و هدومه اني سحبت الشرشف و غطيت نفسي بعد ما انتكها هالحيوان ...
باوعلي بنظرة مشمئز مني مسح حلكة كتله ليييش عيطت بقوة كذابة كتله حقييييير نذل  ... و طلع ... ورة ما طلع كفشت نفسي و لطمت وجهي
سحبت الجنطة مالتي وبايد ترجف طلعت الموبايل ... صفنت عليمن ادك ... دكيت على رغد ... و بنفس مقطوع و بجي كتلها رغد لحكيلي ... كالت شبيج ... كتلهة هيج و هيج ...
لطمت وجهه كالت ولج شسويتي غبرة ... كتلها والله  مو بارادتي  اتهجم علية ...
كتلهة اريد ارجع ... ما ابقة ... كالت ما اكدر اجيج اني لان روز مريضة و ما اكدر اعوفهة اني بمستشفى اليوم صبحت تيفو ... كتلها رغد رح اموت تعاليلي الله يخليج ...
كالت لا دكولين لاي احد والله يذبحوج اهلي ... اني امهدلهم ... بس لازم احد يجيبج ... كتلها منووو ..
كالت ماكو غير جواد رح ادزه الج ...
كتلها لاااااا لا رغد ... عفية الله يخليج كلشي و لا جواد ...
كلتلي انت انجبي و اسكتي طمستي راسنه بالطين ... رح اكلة يجيج باقرب طيارة ...............

ارجو منكم التصويت اذا عجبكم الجزء
ايدي اتاذت هواية 😢😢و شكرا لكم حبايبي🌹