رواية اغلال القدر الفصل الثامن عشر 18 - بقلم الكاتبة ديانا

اغلال القدر
البارت الثامن عشر

أمير ..:
مرت الحجي طلعت بنية شابة و عمرها بالعشرين .. هاي صدمة ..
و هنوب حلوة و فيكة .. هاي صدمة ثانية.. و الصدمة الثالثة طلع الحجي ......... يشغلها بال .... استغفر الله ربي ... اكو هيج شي ...
بعد ما انهارت و حجت الحجته ... صارت ترجف و من فوك ليجوة ... كلشي بيها يرجف ... شفافها و ايديها و رجلها وكعت بالكع و كعدت على ركبها ... و انحنت تبجي و تصيح ... ( زينب .... زينب وينج .. تعاي شوفي حالي ... اختج مهانة و كله من ايدي ... اني الوكعت  نفسي بهالهبية ... خالددد الله ينتقم منك يا حقير ...)
اني حرت شأسوي ...
كعد ع القنفه و صفنت ... كتلها هسة المطلوب مني شنووو ...؟
مسحت دموعها بطريقة انفعالية و تقربت مني و باست ايدي و نزلت على رجلي ... كلتلي الله يخلصك من جهنم ... خلصني ...
كتلها شتريدين ... بابا انت عاقلة خالد يلكانه .. و ينتقم منج و مني باسوء انتقام ...
كالت لا عفية لا ترجعني لخالد... انت ما عندك خوات ... اعتبرني اني اختك ... و هزمني ... والله شتريد انطيك ..
باوعت عليها.. و انعصر گلبي .. دتوسل اخلصهامن ايد  خالد و تخايلتها سرور اختي و هي بهالحالة واكعة شسوي ...
كتلها انت تدرين تطلبين مني احطم حياتي ... اني انهزمت من بغداد حتى لا اظل بظيم العراق ..وهنا كاعد و مرتاح و اتحديت كل الظروف السودا .. و خالد هو فرصة عمري و شغلتي عنده هي انقاذ الي ... ما اكدر ... ما اكدر اهوف هولندا و ارجع للعراق ...
كالت ... كل الي تريده اني حاظرة ... و عندي حساب بالبنك اسحبلك بس نوصل للعراق و انت تكدر بهالفلوس تطلع لاي دولة غير هولندا و لا تبقى بالعراق ... الله يخليك  بس لا تعوفني ارجع لهالحقير ...
و كتلها شكد تنطيني.؟ اني بوكتها من فكرت بالمبلغ ... مو طمع بس هي خربت عليه حياتي ... و اني مقبلت تخرب ببلاش .. لازم اامن مستقبلي ياله اخطو هالخطوة ...
صح احنه بديرة الغرب لازم اساعدها و الغيرة و الشهامة و كذا ... بس هذا كله خريط يم المصلحة ...
كلتلي الرقم الي انت تريده .. كتلها اوك .. اني جاهزو رح اطلعج للعراق و اوصلج لهناك .. و توفين بوعدج و تنطيني المبلغ و اني لا اعرفج و لا تعرفيني ..... كالت اي اوك ...
والله طلعنه بهذيج الليلة بالخفية نخاف لا رجال خالد يلكفونه .. نطيتها مني بنطرون و قميص و شالت شعرها و لبست كاسكيته .. هي نبهتني نسافر بالقطار لغير ولاية و مناك نروح لمطار و للعراق... محظرة روحها و جايبة جوازهاو فلوس نقد حتى للسفرة ....
و فعلاً ركبنه القطار و حجزنه مكان منعزل لان الطريق طويل لهذيج الولاية ... المكان اشبه بالغرفة بي مقعدين يتحولن سرير و بيها باب ...
كعدت و اني ما انكر خايف .... و اباوع الها هي متحمسة  و الحماس بس  بعينها.. بس ما حجت و لا حجاية ... الدرب بين الولايتين تقريباً ١٢ ساعه ...
كتلها هسة اجي قبل ميحرك القطار اروح اجيب ماي و اكل ... كالت اجي وياك ما اكدر ابقه وحدي .. كتلها تعاي .. و نزلنه رحنه جبنه عصاير و اكل و ماي و رجعنه و احنه دندخل للكابينه و  . جان تجرني و نزعت الكاسكيته نثرت شعرها على وجهي وحطت شفافها على شفافي و باستني بوسة عميقة ......
و خلتني اذوب و انتهي .... شكد اني بحياتي مجرب بس مثل هالبوسة الندية و المليانه عنفوان ما مجرب .... اني بالبداية بهت و صرت حايط بس بعد ثواني و بعد ما دخت تفاعلت بالبوسة و حضنتها بايدي حيل ردت ... و غمضت عيني و شعرها صار محاوط وجهي و بنعومته يداعب بشرته ... استنشقت عطرها .. و تلمست بشفافي شفافها ... امير انت بحلم لو بعلم .. هالفختية مرتك و انت هسة طمست بدبة عسل جبلي لذيذ ..... و على غفلة جان تدفعني حييل و تنطيني راشدي ...
اني فتحت عيني بس بعدني دايخ و ممركز ابلعت ريگي كتلها شبيج ...شنو هالتناقض... جرتني من ياختي و دخلتني الكابينة و قفلت الباب ...كالت لا تتمادى وياية امير لا تشوفني ضعيفة و توسلت بيك حتى تنقذني ... بس ترة ما اسمحلك تتمادى و تستضعفني ...
كتلها هييييييه شبيج بالعة مسجل صبري ... هو منو جر منو ....؟ مو انت جريتيني ... و بستيني ... كالت اي لان شفت واحد من حراس خالد ... و كلت اكيد ديدور علينه ... فسويت هالحركة متعمدة حتى يتركنه ... و ميشك بينه .. و حضرتك عجبتك الشغلة ....
اني صفنت ... كتلها و ان يكن ... انت مرتي ...
جان تقاطعني و كالت بحلمك يا الافندي ...
اسيل بعد محد يتقربلها .... ممنوع احد يلمسها ... كافي الي صارلي مو قليل ...
كتلها اسيل منووو...؟

اسيل .....
مرحبه .. اني اسيل و يمكن تعرفوني و تعرفوني حالي و رافقتوني من جنت زغيرة لحد ما اختفيت ...
رح احجيلكم شلون اختفيت ... و ريتني ما سمعت كلام البنات ... من جنت اكدي ... اختلطت ببنات رعنات و مو راحة ... وزوني انهزم ... و افر من بيت السبيل .. و ما حسبت حساب زينب ... و شلون حتركها وراية ... اتفقت وية البنات ... و انهزمنا بذاك اليوم ...
كل وحدة راحت لمكان ... اني جان بالي اروح وياهم بس همه راحوا لمكان معجبني وضعه بقيت بي يوم و انهزمت ... رحت اكدي على حسابي و اجمع الفلوس بس تاذيت لان هواي مكادي كاموا ياذوني على يابو انت تكطعين رزقنا و من هالحجي ...
فد يوم تعاركوا وياية هذولة المكادي و كتلوني و وكعت بالشارع ..... و دمي بطولي و عافوني و انهزموا ... الكدية عالم بي اشكال و الوان و شفت المرار على اصوله من هالعالم و من الي صارلي بعده...
ورة شوية سيارة شرطة وكفوا يمي و نزل رجال كلي عمو انت ليش هنا وحدج و شنو هالدم منو كاتلج تعاي وياية اني خفت و ردت انهزم و جان يلزمني كلي لا تخافين تعاي ... وداني لبيته و جانت مرته حبابة ... غسلتلي و لبستني هدوم من بنتها ...
و بتت عدهم يومين ...وراها اجة كلي عمو هذولة جيرانه ام حسن مقعدة و تريد احد يساعدها بالبيت امشي اوديج عدهم هناك ترتاحين اكثر حتى ينطوج اجرة على تعبج و همه ما عدهم احد بس هي و زوجها ابو حسن ...
وافقت و فرحت و رحت وياه عرفني على ام حسن ... مرة جبيرة و زوجها مو جبير مثلها ... بس الحمدلله سنه بقيت يمهم ارتاحيت دللوني ... اداري ام حسن  و اطبخ و تجي وحدة تنظف ... حبتني ام حسن هواية ... و ابو حسن هم ... مرة سالت ام حسن  على حسن ..؟ و كالت هذا اسم هيج سمونه الناس بي ...
المهم .. عدت السنه و اني الحمدلله راتب شخري ممتاز ... بيت لامني و ناس تحبني .. فد يوم تعرفت على شخص اسمه سالم ولد اكبر مني تقريباً ب ١٥ سنه و اوهمني بالحب و هالسوالف و اني صرت شابة و حلوة و كعت بشباكه و اعترفتله اني هم بالحب ... و فد يوم  جان يكلي تعاي يمي بالشقة عندي حفلة مسويلي عيد ميلاد اصدقائي  و نسوانهم وياهم لا تخافين و هي حفلة عادية ... اني واثقة منه يحبني و ميسوي شي حتى وعدني نتزوج بس ياكاله شغلة ..
و استاذنت من ام حسن و كتلها صديقتي مسوية عيد ميلاد رح اروح ... و نطتني فلوس حتى اشتري هدوم و سويت شعري تسريحة بسيطة و مكياج و كذا و رحت ...
للعنوان الي نطانياه سالم ... ادك الجرس و طلعلي هو كلي هلة بالحب .. اشو هذا تصرفاته مو حلوة .. و ريحة تلعب النفس ... دخلني جوة و الكه الشقة مليانه اوادم ... زلم و نسوان و شرب و دي جي ... اني بهتت على لبس النسوان اشو لابسات هيج كدام العالم .. اتفاجئت بحركاتهم و حجيهم ... ردت اطلع و جرني كلي ووين ...
كتله معجبني الوضع انت مو دكول عيد ميلاد وينه اشو ماكو ... مو دكول نسوان اصدقائي ... وينهم ؟؟هاي الجيفة نسوان اصدقائك .،؟ ما ابقة اني بمكان نگس ..
جرني و طببني بغرفة و راد يتهجم علية ... بس اجاله واحد جان كاعد وية الموجودين بالحفلة كله لك حيوان وخر عنها ..  و عبالي دينقذني .. و فرحت .. كمت ابجي و ادعيله ... اخذني وياه و طلعني من الشقة ركبنه بسيارته و جان يطلع بفروع ظلمة كتله باة زحمة نزلني اني اروح ... كلي لا ... ظليت اكله عفية نزلتي و اتوسل و ما فاد ... ورة شوية وصلنه لبيت نزلني و دخلني جوة ...
بيت جبير و فارغ ... مابي اوادم ...
اني ابجي و اتوسل بس هو كايدني حييل و كلساع يهددني بالسلاح حتى اسكت ...
طببني بغرفة مكتب كاعد واحد هيبة و وقار .. عافني يمة و طلع ... كلي كعدي ..
كعدت و اني ارجف ... كلي اني تاجر ... و غني .. بس ما متزوج .. اريد اتزوج ... و انت كلش مناسبة و سالم ميستاهلج ...
كتله مين تعرف سالم ... كلي هذا خناوة ... ميوصل لوسخ رجلج ... اني رح استتج و اعليج وية النجم ...
و تصيرين مرت حجي خالد ... منو الطول تتزوج الحجي ...
كتله انت اسمك خالد ..؟ كلي اي .....وانت رح  تصيرين لخالد ...
و منا بدت المعاناة ... خالد اتزوجني بعد ما خطبني من ابو حسن  .. و بالبداية كعدني ببيته ... اني ما انكر ارتاحيت وياه لان جان كلشي ما مبين بحياته غامض ... و مداريني بس ورة اشهر كام يختفي اسابيع و من يجي للبيت ميتقرب مني ... اني اكول يجوز تعبان ... يجوز بي شي ... اعوفه و ما احجي طوبت هالحالة سنه ... تخللته مرة بس اتقرب مني بس كلشي مكدر يسوي .. و صار اعصاب وعافني و سافر ......

عشت حياة عادية و رتيبة .. اغلب وقته هو بالخارج من دولة لدولة .. و اني مبقيني بالبيت وية الخدامة و الحارس برة يجيبلي الاحتياجات ... المهم .. فد يوم كال رح ابيع البيت و اطلع لهولندا لازم تجين وياية كتله اي ميخالف ... طبعاًفكرت اعترض و اكول لا بلكي فد يوم الكي زينب او نونو او شمة ... كم مرة اروح لبيت السبيل و من بعيد اتمنى اشوف زينب .. بس ما لكيت حتى جواد و احمد و نادر ماكو ....
المهم جابني لهولندا ... عنده  قصر مو بيت و حراس كتله هاي شنووو ..كلي هذا من شغلي الجديد كتله ليش شنو شغلتك الجديدة كلي غير التجارة امور انت متعرفيها  ...
  صار عمري ١٧ سنه خالد صار انسان ثاني ... تعامله زفت و اعصاب دائماً ...
يتحجج حتى يتعارك و يضربني ...
المهم .. فد يوم و جان بوقت حنون وياية ... كلي انت اذا تسمعين كلامي تكسبين رضاية ... و رح ارجع خالد اليدللج و رح افتحلج رصيد بالبنك ... كتلة شنو التريده ... ؟ كلي انت تعرفيني احب الونس و الكييف .. كتله اي كلي اريد كل ليلة تسويلي ليلة حمرا ... و اريد بيها مشروب و حبشكلات و تلبسين الاريده ... كتله اي بس عفية المشروب لا ... كلي احنه هنا بدولة اوربية و هذه من اوجه الحرية ... شنو ما اشرب ... رجلج يريد منج ... و اني ترة عرضت حالتي لدكتور و نطاني علاج و كلي خلي زوجتك تتعاون وياك ... واني اريدج تتعاونين ويايه و تعاونج بهالشكل ...
اني بالبداية مقبلت ... بس ردت تتغير حياتي بلكي صدك وضعه يتغير ...
و بديت اول ليلة اسويلة الراده ... طبعاً هو جابلي ملابس نوم اشكال و كلها فاضحة ما بيها شي مستر ... استحيت البس منها  بس هو كلي مو كتلج ساعديني انت مو مرتي ... انقهرت عليه و لبست و حضرت الي راده من مشروب و كرزات و هالخريط ...
جاب السم و بده يصباي و شربني بالكوة ... اول كاس و الثاني و الثالث الى ان ما حسيت بروحي و كمت اترنح و لساني ثكل و عيني مغوشة ... و وكعت ع الجرباية ما حسيت ... ثاني يوم كمت ... حالي مخربط و عندي الام و وجع بظهري ... و بطني ... الهوسة بالغرفة و دايخة كلش ...
اجة من برة و كلي شلونج عروستي ... تسلميلي ع الليلة الحلوة و انت صدك ساعدتيني و فادتني ليلة البارحة ...
لليل اتحضرت و نفس ليلة البارحة ... و هم كعدت ثاني يوم نفس الالم و الوجع ...
استمريت اشهر على هالحالة ... الالم استمر و كتله لازم اروح دكتورة ... كشفت علية الدكتورة  كلتلي ماما انت   صاير عندج التهابات و فطريات و قرحة بعنق الرحم لازم اكويلج ... كوتلي ورجعت كتله الدكتورة دكول ارتاحي ...
خالد صار عصبي و كتل كتل الى ان جزعني اني غلطت عليه ... و جان يرمي عليه الطلاك ...
و ثاني يوم  صالحني و وراها كلي هسة ارتاحيتي رجعي ريحيني مثل قبل .. وهم نفس السالفة و استمرينا سنه الكعدات الاسويها و هالونسة صارت بالاسبوع ٣ مرات و هم اكعد زهكانه من الوجع و التعب ... و هم بعركة فد يوم لان ما ردت اسوي اليريده  و من اعصابة كتلني و طردني برة البيت هو يسوي هيج وياية يعرفني ما عندي احد وهو بس ظهري و ملجأي حتى اظطر ارجع اسوي اليريده ...
خلاني برة بالبرد و اني ما قصرت لزمت عودة و كسرت جام البيت كله ... و طلعلي و جرني من شعري كدام الحراس و كتل و كلي ها تريدين اطلكج و اذبج للجلاب كتله اي طلك اني اريد .. و بسط بالحزم و ورمني ..
كلي رح تموتين من الجوع اذا طلكتج اني لفيتج من الشوارع ...
كتله اني اريد... المهم اتحديته و جان يطلكني مرة ثانية ....
و رحت للسفارة و شكيتلهم منه ... كالوا اذا تقدمين بلاغ للشرطةيعتقلوا. واحنه نساعدج نرجعج للعراق ... و اني كاعدة وياهم احجي وية الموظف اجالة اتصال .. و ورة ما سده كلي اختي تكدرين تجيبين هويتج ..؟
كتله ما اكدر اروح .. كلي ما اكدر اسويلج شي بلة هوية .. المهم خلاني ارجع للبيت و ردت افوت بلة ميدري بس حراس هواية صادوني و دخلوني اله ...
و هالمرة حنان العالم كله بعينه و سامحيني و من هالكلام ... و كلي هدية رجعتج حقول الريف كلها باسمج و جابلي اوراق و وقعت عليها ...
و كلي ما اعيدها و حلف و وعدني يتغير ...
و صدك عبرنه السنه الثالثة و دخلنه بالرابعة وهو انعم من الدخنه ...
الى ان صار وكت الله يشيل عني الغمامة ... و الي هو الوقت قبل شهرين من هسة ...
فد يوم كعدت الصبح و اني تعودت ع الوجع و الالام ... لكيت سترة و مشمورة ع الجرباية و ع الكومدي ساعه و محبس و محفظة ... فتحت المحفظة لكيت بيها هوية شخص عربي... شاب عمره بالثلاثين ... من دولة عربية ...
رحت ع السترة ... اباوعها سترة مو لخالد هاي مو قياسه ... حتى هو ميلبس بالبيت ستر .. زين اني ليش ما اتذكر شصار البارحة ...؟
منو هذا المحفظته هنا..؟ هو اكيد نفسه هاي سترته ...
المهم .. ما سالت خالد ظميتهن و صرت ذكية كلت خلي اشوف شديسوي خالد بية صارلي سنتين ليش دا اشرب و مدا احس ....
و بدت الليلة مثل كل  يوم محظرة الكعدة و لبست الهدوم الطايح حظها  ...
و صرت امثل عليه اني دا اشرب لان اخر فترة تعلمت ع المشروب و دمنت ما ظل يكعد يمي و ينتظرني اشرب او يرغمني ... ورة شوية مثلت اني صرت فد نوب شربت و طوخت ..
وهذا طلع من الغرفة و عافني وحدي ... بده الرعب ياكلني و كمت ارجف انفتح الباب و المصيبة دخل شخص ما اعرفه ... و بدة ينزع هدومه ... و يسمعني كلام بذيء ...
و هو سكران و غادي بخته ...
دفعته و حاولت اتملص من ايده ما فاد ... بالاخير يمي مزهرية شلتها و نيمتها براسه ...
طلعت على خالد مثلت اني سكرانه ... و جريته للغرفة هو اخترع و كام يضرب بيه و اشكال الكتل شفته ابجي بس دموع ما طلعت صوت خفت يفتهم اني مو سكرانه و هنوب يزيد ... تاكدت خالد مريض ... و مرضه الفلوس و شلون يجمعها ... يعني وصلت المواصيل بي يشغل مرته ...
المهم وره هالليلة السودة رحت للدكتورة و هم كتبتلي ع ادوية و راحة ... و جيت كتله و هو منا شايط مني من ورة دكت هالزبون الشريف الاخير ... و اني طبعاً ادري بروحي رح اندك ... و وكعلي دك كتل ... و ظليت اصيح كدام حراسه و استفزه لان عرفت هو مريض و عنده نقص جبير برجولته ... كتله انت اذا رجال طلكني...
اني دارسة هذا الموقف قبل ايام اخطط اله ... الي عرفته بعد ما بحثت الي يطلك مرته ٣ مرات لازم يتزوجها غير رجل حتى يكدر يرجعها اله بعد ميطلكها هذا الرجل الغريب ...
فكلت هاي فرصتي احصل بيها الفرار و اطلع من هالخنكة و رجال يوصلني للعراق ... و اكيد رح يطلب من واحد بي خير مو حي الله شخص ...
و فعلاً وصلته لحد ان ينطق الطلاق من كثر الاستفزاز ...
طلكني و كتله اني مو مرتك ميصير ابقالك مرة ... لان طلكتني ٣ مرات ... كلي و شنو يعني و منو يدري ... سويت هوسة و كتله اني اطلع من البيت و متلزمني .. و بعد ما اسويلك المعدات الي كالك الدكتور عليها ... هو تخبل ... كلي لا اروحلج فدوة اني الا هاي وين اروح ... طبعاً الافندي طلع مريض نفسي و مهووس بهالاشياء ....
المهم ... طلب من احد عماله يتزوجني و هاي اني وياه بالقطار مهزومين بعد ما ارشيته بس نوصل بغداد رح اخليه يطلكني ...
و اعيش حرة و ببلدي ... وما اريد بعد اسم رجال ينذكر امامي ... لعبت نفسي منهم ... خالد خلاني رذيلة و عاهرة و يجني من هالصفاقة فلوس ... الله يحركه و يحرك امواله هالمريض هذا ..............
*****.      ********^.   

ملاك .....
اهلي رح يزيدون من جرعة اجرامهم و يزوجوني بطريقة اظل طول عمري من وراها اتوجع و بگلي ندم حجمه سنين ... يمكن هو هذا العقاب الي اختاروا الي ... يمكن استاهل .... بس الي صار مو بايدي ... يتحملون همه القسم الاكبر من اثمي ... اني ثمرة زرعهم ... ليش من لگوا الثمرة مرة و فاسدة استغربوا بذركم فاسد ....
ردت اصيح و اعيط بس مكدرت ... و جماله نطوني للانسان الي ميستحق كل هالتعاسة ... ميستحق ان يكون ضمن هاللعبة القذرة  و الوسخة ...
رغد .. ما اعرف ليش هيجي اختي مجانت بهالشكل انانية و تدور مصلحتها ...  غسلت عقل اهلي يزوجوني لمدة شهرين او اكثر نموه العالم اني اتعرضت لاغتصاب ... و منها هم تمسح ذنب زيدون و تسد عنه العقاب ... و اتحمل اني كل الليلة ...
رغد حاولت يكون عرسي فدد شي علمود نقنع العالم اني متزوجة حقيقي مو تمويه ... اشترتلي بدلة و من ارقى ما يكون و ودتني احسن صالون حتى تجيهزات المهر حضرتها و كيك و من هالسوالف و العصر زفة بس حتكون من بيتنه ما رح تكون بقاعه لان ع اساس بابا مريض و نريده يكون حاضر ...
و نطوني لجواد و الثمن منصب بشركة بابا مرموق يليق بزوج بنتهم ... بس وعدوا رح يظل بهالمنصب حتى لو طلكني ...
جواد يمكن هو الشخص الوحيد النظيف بهالجمع الموجود .. تهل امي و اخل ابوية حاضرين و ناس اصدقاء بابا و عيال رغد هذوله اهم شي ..
دخل جواد للصالة الصبح جان لابس قميص ابيض و بنطرون نيلي عقدنه المهر و راح ...
و هسة لابس قاط اسود بس بدون رباط ... حتى القميص اسود ... حقه هي هاي زيجة لو عروس اليفتخر بيها .....
هلهلت رغد الي متقمصة الحالة فدنوب .. و هو مباوعت بوجهه .. اجة كعد ع الكرسي اليمي شكله طالع صدك عريس شعره ساحبه بجل و لحيته مزينها بس محدد سكسوكة خفيفة ... و ريحة عطره الهاديء جتي بخشمي و ذكرتني بهذاك اليوم و لا ارادياً نزلت دمعتي و مسحتها .. تذكرت ملاك من جانت نظيفة ... تذكرت البراءة و الصدق من شفتها بعينه و حسيت اني هم عندي ...
المهم ظاهر هو انتبه شفته عدل كعدته و باوعلي بس ما حجة ..
جابوا الكيكة ... و صار لازم نقطعها ...
وكفنه و لزم ايدي حتى نتوجه لمكان الكيكة ... ايدي ترجف هو عصرها حييل و حسيته يطمني .. تقربنه و نغمات الاغنية للاعراس .. قطعنه الكيكة و تبذلت الاغنية ... و صارت اغنية اليسا و ام الدي جي كالت صار وقت العرسان يركصون  ..( ع بالي حبيبي .. ع بالي حبيبي اغمرك ما تركك .. اسرقك ما رجعك .. احبسك ما اطلعك من قلبي و لا يوم ... اخطفلك نظراتك ... ضحكاتك حركاتك ... علقهم بغرفتي .. نيمهم ع فرشتي ...)
هو لازم خصري و مشتت نظره و اني ما اعرف ليش تعلكت نظراتي بتفاصيله و ذبت بين ملامحه ... حسيت بامان واني بهالمساحة الصغيرة الي بين ايده ... حسيت بسلام و صدره قريب عليه و صوت نبضه جان احلى من صوت اليسا الي الناس دكول عليها ملكة الاحساس ....
بلحظة تمنيت انام على صدره و اطيره بهالاحساس الناعم و الهاديء ... ما ادري ليش ميريد يباوعلي ... معقولة هو عرف ... كله بابا ع الي صار ... لا رغد حلفتلي ما حجوا ...
النسوان كامن يصفكن و صديقاتي يهوسن (بوسها ... بوسها ... بوسها ..)
ام التصوير كلتله عيني عريسنه فد حركة حلوة حتى نخلدها ...
جتي شالت البرگع و حطته على راسي و راسه و صرنه اثنينه جواه ... هو هنا باوع بوجهي و بعيني تحديداً و انعادت اللقطة بيوم هيد ميلاد تيم من ردت اوكع ...
و المصورة تصيحله و هو تايه و اني اكثر تايهة و مخنوكة بعبرة اريد ابجي ... بس من ورة هالدفو الضيعته ... دفو عينه الي حاوطني و شال برد الخوف و الرعب عني ...
فزينه اثنينه على رغد دكول عيني انتو ويانه ...؟
كلها جواد اي وياكم .. لعد وين نروح ... و ضحك .. و ذبت بضحكته ..
كالت ام التصوير فد بوسة حتى ناخذ لقطة حلوة ..
قربني جواد و عيني شابكت عينه و ظلت تسولفلها حالي و حالتي ... اعتقد وصله تعبير عيوني بحيث حضني حييل بايده و حسيت براحة بقوة ايده غمضت عيني سارحة بهالامان ... و دفو الشعور .. و حسيت شفايفه على شفتي و حرارة نفسه تداعب بشرتي .. و عطر انفاسه دوخني و ذوبني ...... ما كدرت افتح عيني ... بس جواد حسيته هو هم شعوره مثل شعوري ،.. لان تعمق ببوسته و طول بيها ...
كالت ام التصوير اي عفية عريسنه ممتاز ..
وصفكوا الحضور ..
و كملنه تصوير و رجعنه للكوشة لازم ايدي بحنية و مبتسم ابتسامة حلوة و دافية و عينه حاضنه نظراتي  ... بس اشو على غفلة جواد صاح زينب ...... و نزل بسرعة من الكوشة و طلع من الصالة .................

اعذروني ع التاخير و اعذروني البارحة ما نزلت بارت بسبب ظرف جدا قاسي
اتمنى يعجبكم البارت و تصوتون عليه الف شكر لكل من قرا و اعجب و صوت 😘😘😘