رواية اغلال القدر الفصل السابع عشر 17 - بقلم الكاتبة ديانا

البارت السابع عشر

اغلال القدر
رغد ..: ماما ادك على جواد و ماكو ... شلون
ام رغد ..: بنتي انت ليش ننتظر جواد رح اروح اني ... اختج هسة حالتها النفسية اكيد مو زينه ..
رغد ..: اني ماما اروح ... خلي روز و تيم يمج اروح احجز و احضر نفسي و رح اكول لعدي ملاك متخربطة اروح اجيبها و اجي ...
ام رغد و هي تبچي ... : بنتي سودة علية شلون بية ريتني اروح هسة لتركيا ..:
رغد ..: كافي ماما انت مريضة ... بس كم مرة كلتلهة عوفي زيدون شوفي هاي تاليتها ... بنتج متسمع كلام ... البيهة ميخليها ... و عبالج صدكت معتدي عليها ...
حبيبتي بنتج رايحة وياه لتركيا و محضرين من زمان لهالامسية ...
ام رغد ...: لا ماما ... رغد شلج بهالحجي ... اختج بيا حال و انت ممصدكتها ...
رغد ..: لو تحلفلي بمية ايمان ما صدك ... اعرفها شنو ...
ام رغد ...: لا امي فدوة روحي جيبها ترة گلبي تعب والله ... و عوفيج من هالحجي ... انت سمعتيها دتبجي ...
رغد ...: مو وقت هالحجي اروح احجز اجسب الخاتون ...

ملاك ...
اني متت و نسيت حجم الكارثة الي اني بيها و بقيت ابجي و ادعي بس لا جواد يجي ياخذني ... ما اريد يتكشف على العري الي اني بي ... و لا يشوفني بهالحال هذا ... يا رب رغد ما تتهور و تحجيله ...

اليوم الثاني ...
ملاك ....
لميت غراضي و اني بالگوة اگوم و اگعد ... الليل ما نمته بس افكر شلون رح تكون ملاك الجديدة ... شلون رح اكون بعين اهلي ... حياتيش رح اعيش ... هذا الكلب الحقير زيدون النذل ... عباله يفلت من فعلته ...
الا اخلي بابا ياخذلي حقي ..
بابا ... شلون رح اباوع بعينه و اكله الي الصار شلون رح اشرحله .. شاكوله خنت ثقته ... خنت الامانه .. يا ربي ساعدني ...
رغد خابرتني و كالت جواد مدتحصله و هي جاية ...
و فعلاً هسة هي بالاستراحة مال الفندق و اني نازلة حتى تاخذني ...
وصلت يمها و لگيتها مشمئزة و منقرفة مني ... كالت امشي خاتون ... ليش مكتيلنه رايدة تعسلين حتى نحجزلج بجزر المالديف ليش لهنا جاية ملل ...
كتلها شنوووو تقصدين ..؟
رغد ..: امشي كدامي الطيارة ما بقالها غير نص ساعة و تقلع ...

ملاك ...:
استغربت من كلامها ... بس حسيت اكو شي ... ما حجيت ...
صعدنه للطيارة و اني مو اني ... البهجة الي بداخلي انقتلت .. روح الملاك اتدنست ... ما عاد بيه روح بريئة ...
نزلنه لمطار بغداد وشفت رغد طلعت تليفونها خابرت جواد ... كلتله اي احنه رح ننتظرك يساحة عباس ابن فرناس ... و طبكته ..
رحتلها ... كتلها لازم تجيبين جواد ... كومة تكسيات و يتوسلون ...
كالت .. ملاك رجاءاً خليني احير بسالفتج السودة و افكر شلون نطلع منها ...
كتلها ..: تعاي انت شنو ثبرتيني بهالحجي .. رغد انت اختي شنو ممصدكتني ..؟

اجانه جواد و نظراته الي جانت كلها تساؤلات و استغراب ... و فهمت بعضها ... هاي شرجعها و البارحة سافرت ..؟
شو اليوم متحشمة بلبسها ...؟ مو عادتها
اشو ولا قطرة مكياج بوجهها ...؟ مو عوايدها
كلت بكلبي ... اي جواد ملاك انكسرت ... ما عاد الملاك ملاك ... الشيطان خنك ملاك ...
الطريق كله احسه بالمراية يسترق النظرات بس مو نظرات بيها معنى استغلال ... لا نظرات قلقة.. بس اني ما حاولت ابد ابينله و لا هو نطق حرف و سأل ..
وصلنه البيت و هو راح نزل الجنطة و فات .. من طلع صرنه واحد گبال اللخ و انصدمت بجسمه و صرنه كلش قريبين و ظليت مدنكة و كمت ارجف و هو ظل يباوعلي هو طويل كلش بحيث راسي صار بصدره ..
شكد تمنيت ابقة على هالحالة و اشكيله من ملاك الضيعتني .. مسحت دمعة نزلت مني غصب .. من ورة المناظر .. و هو تفاجىء .. كال احم ملاك بيج شي ... ( هاي اول مرة يدخل صارله شكد ويانه ممدخل نفسه بحالنه ابد لا يسال و لا يحجي ..)
كتله لا ما بية .. و وخر و فسحلي المجال و دخلت ركض لغرفتي صعدت ..ورة اسبوع  اني بالكوة اكوم و اكعد اختفيت عن نفسي حتى ... و ظليت بغرفتي اكل ندم و اشرب حسرة و استنشق اثم ...
انعزلت بغرفتي بس ماما مقهورة علية و مصدكتني و يمكن هذا الي مزيد حالتي النفسية .. ما توقعت اختي متصدكني و هنوب تغسل دماغ بابا  ... و كدرت تقنعه زيدون ما اغتصبني ... قنعته انو اني بارادتي جنت وية زيدون ... و فهمته اني من ورة حسهم وية زيدون جنت .. و الي اكثر من سنه .. طلعت زيدون بوجه الابيض حتى لا ينلامون اهله الي همه كرايب  رجلها .. و قنعته بهذا الشي ... بابا  تخربط و نقلوا للمستشفى و هنوب كمت اكل بنفسي اكثر .. لساني ما حاطة عيني بعين بابا و لا شفته شلونه ...
و هسة رغد يمنه و كاعدة تحجي براس ماما  ... نزلت حتى اشرب مي ... و اسمعها دكول لامي ... شوفي ماما لارا ام الصالون مالتي ذاك اليوم سولفتلي على وحدة نفس قصة ملاك غلطانه وية صاحبها و اتخلى عنها ... بس هي صلحت الموضوع و لا كانه شي صار ...
ماما سالتها شلوووون يعني ..؟
رغد ..: ماما صار كلشي متاح و موجود بهالايام و سهل ...
ملاك من سمعت رغد تحجي هالحجي تخبلت تهسرت .. نزلت ع السريع و بلا وعي كمت اصيح و كلت ست رغد تريدين ترگعين الفتگ الي سوا ابن كرايب رجلج .. اني مو غلطت حتى اصلح غلطتي .. اني مو بارادتي صار الصار ... حتى امسح ذنب الي سواه هذاك النذل ...
.. كمت ابجي و كتلها .. اني مو بس فقدت عذريتي ... اني فقدت نفسي و حالي و روحي و حتى اسمي ... ملاك ما عاد اسمي .... والله احرك روحي اذا كتولي اسوي هالشي ... اني مغتصبة ... مو ساقطة ...
اني انقتلت مو انفلتت ... اني اتعريت و انتهكت عذريتي غصباً عني و حسي بيه ....
و جان بلا شعور و كعت الفازات الي موجودة بالمعرض و كسرت كل كرستالات الموجودة ع الميز ... و صعدت اركض ...

جواد ....
اكو شي غامض بيت ابو رغد .. مدا اعرف شنو .. ملاك قبل اسبوع جابتها رغد من تركيا بعد ما سافرت ع اساس تبقة اسبوعين او اكثر ...  وضعها مريب .. خلتني اضطر اسألها على حالها رغم اني ابد ما احب ادخل نفسي بحالهم .. بس حسيت ملاك تايهة .. و بتفاصيلها لكيت الغموض ما اعرف شنو السالفة .. وراها رجع ابو رغد من السفر و اتخربط اثر عركة صارت بالبيت و نقلنا للمستشفى و طلع عنده ذبحة صدرية ... و طلعنه من المستشفى و راح بيت اخته بغير منطقة و اليوم اروح ارجعه للبيت لان زوجته كلش قلقة عليه ... غموض و مدا افهم شنو السالفة ...
دخلت لبيت ابو رغد و ساند ابو رغد بايدي ... تعبان و بلكوة يحجي ...
تلكته زوجته و رغد ... ملاك ماكو ... و هذا الي داهشني صارلي اسبوع اروح و اجي لهنا بس ما شفت ملاك ابد ... معقولة مسافرة ... ؟
دخلته بغرفته و كتله عمي محتاج شي ..؟
كلي اي ... تعال اكعد هنا ...
و صرف مرته و بنته ...
كلي ابني ... اني اثق بيك و انت ولد امين و شهم و الك معزة بكلبي خاصة الله شاهد ...
كتله تسلم عمي ... اني اعتز بهالكلام و انت الي مثال اقتدي بيك ...
كال و بتعب و عينه دمعت ... لا عوفني اني ... لا تقتدي بيه ...  مسح دمعته و كال ...
عندي طلب يمك بس قبلها ... لا تسأل ليش ... و اتمنى ما ترفضه....كتله انت تؤمر...
بلع ريگة و اخذ نفس ...و كلي اريدك تزوج ملاك و لمدة ثلاث اشهر و تطلگها وراها ... و بس حبر على ورق و اني مقابل هذا رح اخليك بالشركة بمنصب جديد هو مدير العلاقات العامة ... ..............
**********************************
خالد ..: علي وين امير ..؟
علي..:  والله حجي ما ادري اني مجنت بالشقة اني يم صديقي جنت سهرت يمه ع اللعبة ..
خالد ..: عموماً صيحلي ابو سلمان ...
علي ..: اي صار

علي ....
الحجي اليوم صاير بارود ... وهذا الساقط امير نايم بالعسل وية مرته ... شنو هالخريط ... شلون الحجي بعد اله عين و يباوع لمرته ... شمدريني اذا هو يحبها ليش يطلكها و جمالة ٣ مرات ...
المهم هو بيا حال و خابص نفسه بطلبية تاجر بغداد ...
جبت ابو سلمان و جيت و جان
يكول حجي خالد .. ابو سلمان.... هذا مؤنس الخناوة نطاك رقمه ..؟
ابو سلمان ..: اي حجي تريده ...؟
حجي خالد ...: اي اريده ... اريد اضيفه هنا ... و يكولون متزوج وحده بكد حفيداته جماله مو بكد بنته ... و العصفورة كلتلي حلوة و تستاهل نضيفها و لخاطرها رح ادوس على اعصابي و انسى الخلاف البيني و بين ابن خالي مؤنس الشفية و اخابر ... انطيني انطيني ... انطيني الرقم ادك عليه ...
ابو سلمان ...: هاك حجي هذا الرقم ...
اني صدك ضجت من حجيه صح ما اعرف شنو هذاك مسويلة ... بس شنو يجيب طاري مرته و يتمضحك بي ...
ظليت صافن عليه شلون صار ناعم وية ابن خاله بالتليفون و عزمه على سياحة هنا اسبوعين و منها هم يبرم العقد وياه ... و بعد ما سده كال ... اوكفلي .. مؤنس ... تلعب وياية ... مووو اني اراويك ......
ابو سلمان ... حضرلي الشاليه الي بمنطقة (...) حتى نضيف العرسان ... و لا تنسى عود اريد خدمة خمس نجوم ....ههههههههههههاي ..
طلعنه. من يمة و سالت ابو سلمان ... كتله هو مو ميحجي وياه و عنده خلاف شلون رح يضيفه،،؟
كلي علي لا تدخل ترة هذا لعب كبار و بي حياة و موت انت معليك هذا ديصفي  حساباته وية ابن خاله معلينه احنه جاين لا نشتغل هنانه لا نسمع و لا نرى و لا نتكلم ...
كتله اي شعلينه ....
بس اني گلبي لعب و انقهرت عليهم ......
***********************************
مؤنس ... ..: زينب تعالي كافي شغل ... تعاي احجي وياج ..
زينب ..: هسة حجي فد دقيقتين ... هاي زبونه عندي باجر مهر اختها و زفتها و دا اشتغل بكاسات المهر ...
مؤنس ... : ميطيرن ابوية تعالي احجي وياج و روحي ...
زينب ..: جيت والله جيت ..
مؤنس..: شوفي رح احجي و متقاطعيني و متكوليلي لا ...
زينب ..: ليش شكو  ....
مؤنس ..: شوفي بنتي ... اني عندي ابن عمتي تاجر و عنده شركات بهولندا مال البان ... دعاني حتى اروح اوقع عقد وياه
احنه جنه قبل على خلاف و تصالحت وياه هسة ما اريد احد يشيل بكلبه عليه هاي دنية ... فالرجال عزمني على سياحة اسبوع و كال انت و زوجتك ... واني لازم اخذج ...
زينب ..: لا حجي فدوة كومة شغل عندي ... روح انت ...
مؤنس ..: بنتي الشغل ملحوك عليه .. و انت لازم تغيرين جو ... با طابة لا طالعه .. و بس تشتغلين يرادلج فترة ترتاحين بيها .. و اني كتلج ماكو لا ....
زينب .. ؛ اني ليش ميعجبني اطلع ... بس هالدشوف كدامك ما الحك والله ...و هذا رزق و الحمدلله ربي رازقني ميصير ادفر النعمة ...
مؤنس ..: و نعم بالله ليش كتلج اني دفري نعمتج يا بابا ... بس هم لازم تغيرين جو .. حتى ترجعين بنشاط اكبر و تبدعين اكثر ... و هسة ماكو لا عكب باجر السفرة .. حضري نفسج حتى نروح ...
زينب ..: حجي موووو ...
مؤنس ..: ماكو مو و لا اي عذر انتهى و هسة روحي كملي شغلج حتى تحضريلنه الجنط باجر ....
زينب ..: ان شاءالله حجي

اليوم الثاني

زينب ...؛ الو ... ام حسين شلونج ... عفية دزيلي غراض الاوردر هذا البارحة اشتغلت بيهن كاسات المهر و صينة البخت ... لان اليوم رح اروح لبيت البنية ... لان بعد ساعه مهرهم
ام حسين ..: ياااا اكو زفة و مهر بنفس اليوم ....؟
زينب ..: ام حسين احنه ياهو مالتنه .. ناس مستعجلة هسة دزيها بيد حسين فدوة ...
ام حسين ..: اوك ان شاءالله ..
***********************************

اشكر كل متابعي القصة و اذا اعجبكم الجزء صوتوا له حبايبي🌹🌹🌹