رواية أجرام مستباح لثلاث ندبات الفصل العشرون 20 - بقلم الكاتبــة ايلول

مساء الخير ...

#أجرام_مستباح_لثلاث_ندبات

aylol. بقلم الكاتبه

ins: t8_fe3 للتواصل

𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒 𓈓𓈒

اجرامي ليس اختياري هذا ماوضع امامي
جبرت على السير به رغم كل ما انغرس في اقدامي
باحثاً على اثر ندبة لحل عقدة ايامي
في طريقي تعثرت بجمر ليحرق فؤادي
هل حرقه لي من صالحي؟
اما انه ضدي؟
لا أحد.يدري.!!

𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁𓄼𓂁

جــــمرة::- فتحت عيني بتعب راسي حيل يوجعني بقيت بالفراش بــــس فاتحة عيني خاف قصتة خلتني اتعاطف وياه شوية هسه رجع نفس الحقد الگلبي ونفس الكره
يعرف شيسوي بيه المخدر وشكد مؤذي بحيث حتى جفني احسة ثگيل وراسي ينقسم نصين
شكد جبان وخبيث ابسط حل عنده المخدر

سمعت خطواتة اجه غمضت عيني بسرعة ماريد اشوف شكله النحس

دخل وسد الباب اسمع صوت الحركة وحافظة شنو الجاي يسوية حسيتة كاعد گدامي حركت جفني من خله ايدة على كصتي يتحسس حرارتي. وخــــر ايدة

ودنك يبوسني بكصتي وبخدودي لعبت نفـــــسي حيل. جاي ادفعه وابتعد بقيت مغمضة مد فراشة بصفي تمدد وشغل الاغنية نفسها

في حزن وسع المدى
في وجع جوه عميق

الحد ما انطفت فتحت عيني على كيف شفته نايم على ظهره مبتسم يباوع للسگف ويحرك شفايفة بدون صوت بلعت ريك بخوف

دموعة نزلن من طرف عينة ويتخللن بشعرة وهو على نفس الابتسامة بــــس الدموع تتسابق

جر ايدة باوع بيها وباسهن ندبة ندبة ورجع طبگ اصابعة باسهن وشمهن نزل ايدة الكلبة وغمض عينة يحجي بدون صوت

جر نفس بقوة مسح عيونة والتفت عليه لگاني فاتحة عيني اباوعله بلع ريك صافن بعيني مد ايدة يريد يلزم خدي دفعتها وكعدت على حيلي وهو هم وخــــر الغطه منه وكعد يباوعلي

رفعت ايدي بوجهه اصيح
::-اخرررر مرة تخليلي من هذا الزفت فهمت لاتصير حيوان اكثر من هيج جاي تموتني بيه

:-جوعانة اسويلج اكل؟

- هزيت راسي ما مستوعبة
:- انت مريض واللـــه مريض شوكت اخلص منك شوكت ربي يرحم بحالي لو يموتني لو يموتك

:- كـــــافي جــــمرة اسكتي

:- شمرت الغطا حيل وكمت صاح وراي اوكفي ماسمعتله طلعت من الغرفة نار بگلبي. بــــس ردت باب الصالة ينفتح وياي مقفول واني اجر بيه

نهبتت ايدي سحبني للغرفة واني فرفحت اصرخ واغلط واسب طك گـــــلبي دفعني بالغرفة ودار يقفل الباب رجعت هاجمة عليه اضربة واغلط وهو بــــس ساكت اتخبل من يسكت وحتى مايمنعني من اضربة

دفعني وتمدد بفراشة رجعت ادفر بيه واغلط محترگه روحـــــي

:- افتحلي الباب چلب حيوان كوووووم احاجيك لاتغلس لا تغلس

دفرتة حيل بخاصرتة شهك ولزمها بثنين ايديه رجعت ليورة امسح بعيوني واصيح

::-حيل عبالك ضربتي ماتوجع اكسرك واللـــه

ضل يتلوى بفراشة مغمض عيونة وكاتم نفسة
كعدت يم الباب ارطن ما متنازلة

:- كل ماتقفل الباب ادفرك عود تغلس حسبالك من اضربك ماتنوجع انبت رجلي بخاصرتك المجرم الكافر الجبان

لمن فك الوجع منه شوية وهو متمدد باوعلي بخزر وحجة

:- شبيج اليوم. هرموناتج عالگة للستار

:-افتح الباب

::- وين تردين الدنيا ليل وراي شغل أريـــــد انطمر

::- أريـــــد اكعد بالطارمة اختنكت

- هز راسة متحلف ينتر نتر گام فتح الباب وكفت امسح وجهي بردن التشيرت وشعري هوسة كذلتي طولانة صايرة تنزل على عيوني اوخرها وترجع وكفت بصفة فتح الباب ودار باوعلي

:- البسي حجاب

:- رجعت جريت شالي من فوگ الصاية غاسلهن هو ومسفطهن لفيتة. على شعري باوعلي وهز راسة قابل طلعت وراه فتح باب الصالة ونوب. باب المطبخ الخارجي

طلع لطارمة صوت ماطور مال مي مشتغل عند الجوارين سحب بساط خلاة وجر ايدي كعدت عليه رفعت راسي للسما اباوع وهو كابلني وكعد

اجر نفس بقوة صارت شوفة السما ممنوعة عليه
رجعت باوعتلة

::- انت ليش حابسني بالبيت اني اكره البيت اختنگ منه خلصت عمري لو بالدوام لو بالشارع اجيت انت حبستني بغرفة شنو بكيفك

:- جــــمرة سطرتيني شتــــردين"

:- درت عيني منه ساكته ومعدتي تنعصر من الجوع رجعت باوعت عليه شفته مخلي ايدة جوه خدة ومغمض
بــــس طبكت رجلية فتح ولزمهن

:- هــــا

::- اني جوعــــانة سويلي اكل

لم شفتة الداخل حلكة نعسان حيل عيونة ذبلانة
والتعب مبين بوجهه رفع أيــــدة الخدي دفعتها بسرعة

:- اعلگلج جمر هنا واشويلج عليها دجاج اكصصة اسوي شيش

:- اي بــــس مو واحد لان جوعــــانة كلش

ابتسم اميل ركبتة على جهة
:- بعيوني

- كام لم خشب رتبهن واكو اغراض يمهن دبة صغيرة سحبها خله على خشبة وحدة شعلها ورجعها لباقي الحطب وجت النار وصار ضوة الطارمة واضح اكثر

:- تعالي وياي للمطبخ

:- روح ما اشرد شوفني من الشباك

ضحك واجه عليه سحبني من ايدي دخلني وياه للمطبخ طلع نص دجاجة من الثلاجة خلاها على الطباخ ودار طلع سجينة اشرلي براسة تعالي بقيت واكفة بمكاني

:- تعالي الزمي

:- اتزفر

ضحك وكصصها وحدة غسلها وسواهن شيشين
رجعنا يم النار كعدت على جهه وهو يشوي ويباوعلي مبتسم گـــــال

:- بــــس سنايبر من تجوع الساعة 2 بالليل تاكل دجاج شوي

:- حرام عليك تنومني هلكد من الصبح لليل

:- يله هو حتى النفس محسوب على الأبـــــهر حرام "

- باوعت بعينة ساكتة وهو مضيك عينة من الدخان شال اول وحدة طلعها من الشيش احتركت ايدة ويدورها من ايد الايد ينفخ عليها واجة يمي فتحت ايدي اله خلاها بايدي نفخت عليها واكلتها ابتسم ورجع يمهن

:- أبــــــهر سؤال

:- اسألي يابة اسألي

:- اباذر ودرة معقولة من كبروا مادوروا عليك؟

رفع عينة الي مثل الفاز وجــــهة ينعصر وعيونة تنتهي من اجيب طاري أخوانة يضل بــــس يرمش بعينة. سكت شوية وكال

:- وين يدورون حتى اسم قسام جانوا مايعرفونة .ومحد يدري وين وشنو العايشينة

:- المنطقة الجان حابسكم بيها قسام يعرفونها واباذر چبير ماينسه

:- ههه كل عقلج احنا باقين بنفس المنطقة ستالاف مرة غيرنة مكانة

:- يله ميخالف غيرتوا المنطقة اسمك ما معقولة ينساه اخوك ليش مادور عليك يعني هسه هو جبير ليش ما لگاك عقلي يطلع الف حل والف طريقة بــــس انتَ كل مرة تسد السالفة

:- لنفرض دور على اسم الأبـــــهر تــــدرين شراح يلگة .....سجل شخص عايش بالنرويج انسان حياتة بــــس سعادة
مزوج وعندة طفلة مهاجر من العراق بعد ماتوفوا كل اهله هذا الراح يلگاه ....

ومنو الكالج ما مورطهم قسام مثلي وجاي يدورون عليه مثل ما انا ادور عليهم منو يكول يتذكروني منو يكول يدرون بيه عايش .

- نزلت شفايفي بحيرة اباوع للنار رجعت كتله

:-اباذر مايعرف اسمك جـــــندل ؟

:- لا ماجان عندي هذا الاسم تلقبت جـــــندل وره ماراحوا همَ

:- اوووف ولا اكو حل .

ابتسم وشال الشيش شافة مستوي خلاهن بصحن

:- يله كومي

:- لا هنا اكل

:- حارة تسمط

:- ميخالف ماريد البيت ..

هز راسة موافق دخل للمطبخ يدنك ويرجع يباوعلي بسرعة جاب الصينية واجة يمي خلاها كدامي واخذ مي رشة على الجمر طفاة وباوعلي

:- اكلي"

:- تعال وكلني!

- غسل ايدية واجه كعد كدامي سوالي لفات
:- انت ليش ماتاكل

:- ما أريـــــد شبعان اكلي انتي بلكي تصير بيج لحمة

- اكلت اللگمة البيدة رافعتلة حاجبي بــــس كملتها حجيت ::- شسوي باللحمة

:- هههههههه من اذبحج اشويها واكلها اذا انتي،بــــس اعظام لاترهمين شوي لا سلگ شسوي بيج

-ايع اتخيلك تطبخ كراعيني وتكعد تكروش بيهن مثل الچلاب النشوفهن بالشارع من يلزملهن عظم يضلن يومين يكروشن بيه

"ضحك من كل گلبة"

ابـــــتسمت اله

:- حتى اعظامج ايبسهن وبعدين اطحنهن اسويهن خبز واكلهن

:- مجـــرم تسويها

:-اي

:- شبعت كـــــافي .......
دفعت ايدة ورجعت ليورة كعدت امسح ايدي واحجي وياه ::-ها يعني انتَ ماكل لحم بشر؟

::- لا بعدني يجوز بالمستقبل من اذبحج

-حجاها وگام سحبني من ايدي مشاني للمطبخ گدامةغسلت وبتعدت وهو يغسل المواعين

:- انتَ مجـــرم وكلشي تسوي بــــس اني ليش ما اخاف منك؟

التفت عليه ابتسم وسأل
:- ابد ولا تخافين؟

:- ولاشوية

:- زين تخافين من الصرصر

:- لا الزمها بايدي

:- اي هاي هيَ اذا انتِ الصرصر بعظمتة وهيبتة وجبروتة مايخوفج وتلزمينة بايدج قابل تخافين مني انا هل فقير،

:- أريـــــد شغله وماتكول لا

:- لا

- مسح ايدة وقفل الباب اجه عليه سحبني من ايدي اي باب ندخل منه يقفلة وصلنا الباب الغرفة وباوعت للحمام سحبت ايدي منه

:- أريـــــد اسبح

:- مو هسه جــــمرة نعسان

- جريت ياخة ملابسي الخشمي شميتها ونزلتها رجعت باوعتله
::- لا هسه ....صارت بيه ريحة مال نوم وصخونه
مد ايدة الخصري

وسحبني عليه بسرعة فزيت لازمة بزندة نزل راسة شماني بشوغة وحسرة دفعتة لعبانة نفـــــسي
ابتعد مغمض عينة مبتسم وساحب نفس بقوة..... زفره وفك عينة باوعلي وجــــهة ذبلان حجة بثگل

:- اطهر ريحة شميتها "!

- خزرتة ورفعت ايدي بوجهه ::- الف مرة كتلك لا تلزمني

:- اقدس شي لازمة انتِ

- مريض

- حيل

- عفتة وفتت للحمام قفلت الباب وكعدت اشطف بجسمي أريـــــد استغلة بــــس ما اكدر اتنرفز .... مرات حتى من لزمة أيــــدة اضوج ومرات بــــس أريـــــد اتقرب الحضنة من اشوفة ضعيف ومكسور
أريـــــد المه بحضني وانقهر عليه ومن يسوي شي يقهرني اكرهه حيل واتمناله الموت موبيدي شخصيتي تغيرت بالساعة الوحدة عندي الف رأي

دك الباب كمت اخذت الملابس منه لبستهم وطلعت لكيتة واكفلي بالباب
دخلني للغرفة وطلع شوية ورجع بيدة مشط

:- تمشطين انتِ؟

- لا ما اكدر ...

هز راسة موافق واجة كعد وره ظهري نشف شعري ومشطة بهدوء

:- أبــــــهر أريـــــد مقص

:- المن

- التفتت أريـــــد ادور عليه ماخلاني
:- كذلتي تصير على عيوني تضوجني

- لم شعري بايدة وسحب راسي بهدوء نزلني على رجلة تمددت ...يريد يشوف كذلتي. مشطها عدل غمضت عيني انفخ عليها

:- عندي بــــس خليها تصير طويلة حتى تصيرين بنية

- فتحت عيني وخرت شعري من وجهي اباوعلة مبتسم
:- روح جيبة

كعدت على حيلي وهو طلع شوية ورجع بيدة امراية ومقص مديت ايدي اخذت المراية منه اباوع بملامحي وكلبي يدك بقوة

السواد الجوه عيوني بياض جفني مدري شصاير بيه يخوف وجهي باهت ماحسيت بنفسي شفت جــــمرة هاي شخصية وشكل ثاني نهائيآ مو جــــمرة بنت نــــهله القوية

رفعت وجهي اله واكف بالباب يباوعلي بخوف بــــس رمشت بعيني حجة هوَ

:- اني دمرتج ووصلتج الهالمرحلة وصختج ودخلتج الاقذر عالم ادري ولو تشلعين عيوني ما الومج أذيتج بــــس واللـــه اكلني الندم .

دنكت راسي ساكتة لميت رجليه حضنت اركبي الصدري بــــس ارمش بعيني اجه كعد كدامي اخذ المشط رتب كذلتي. ومد ايدة رفع حنجي وكصاها نفخ على وجهي. فتحت عيني اباوعله

:- هــــا هيج

- اي بعد شعري من وره

كعد وره ظهري مايكص هواي لان اصلا هو هلكدوته كمل وجر المراية كدامي يراويني

:- هــــا هيج؟

- باوعت بالمراية ساكتة رفعت عيني يباوع وياي ولام شفتة الداخل حلگة رجعت باوعت الوجهي وحجيت

:- "صاير عندي شارب"

بقى ساكت ابـــــتسمت يله ضحك من گلبة

:- تلوميني من اكلج رجال هسه فد شهر يصير بثخن شاربي

-عفته وكمت لفراشي وهو يلم بالشعر ويضحك
:- مايصير حتى لو يبقى سنة

:- خلي احفج اعرف

:- مشتغل حفافة قبل؟

:- اي ويا امج

- انجب ولاتجيب طاري امي على السانك تروح فدوة لتراب. رجليها

- عافني وطلع من الغرفة صوج الينطية مجال
لفيت روحـــــي بالغطا اريد انام شوية وحسيت شي على شاربي مالحكت ادفعة شهكت ودفعت ايدة

كعدت على حيلي أريـــــد اعارك
:- شبيييك انتَ؟؟؟؟؟؟

متنرفزة واصيح وهو كوه لازم ضحكتة. والخيط بايدة على شكل مقص. دفعتة من صدرة

:- هواي تماديت تره

:- بــــس شاربج شبيج

- حجاها وطك ضحك أريـــــد اصيح وماكدرت ضحكتة ضحكتني بــــس أريـــــد اعصب واخزرة ماكدر احجي كلمة واضحك

:- وخــــر عني احسن الك لا تتمادى

فلت الخيط من ايدة وگام جر رجلية دفرتة وماكدرت طبك ادية وره ظهري واني اصيح واغلط. ماكدرت اسحب ايدي كعد على بطني

:- وخررر الثور خرب راح اسب اهلك كلهم

:- هشش خلي احف شاربج

:- ايدي راح تنكسر شبيك انتَ شببببببيك

صيحت حيل وخزرتة يضحك رجع لف خيط على اصابعة ودنك. الوجهي بقيت احرك راسي منا ومنا وماثبت روحـــــي شايطة بــــس أريـــــد افلت نفـــــسي واضربة. لزم فكي حيل وحجة

:- اخدرج جــــمرة واحف وجهج كله وحتى جسمج

- ثبتت بمكاني خازرتة بكل عيني يريد يضحك ولازم نفسة كوه اول ماحفني. نزيت درت وجهي لجهة الثانية افور احس الوجع بگلبي

رجع سحب وجهي عليه يحف واني متكسرة جواه وكلبي متگطع من الوجع

:- وراح الشارب

:- وخررررر

كام من بطني يضحك كمت على حيلي دفعتة بقوة
:- لا تهددددني بشي لاتهددني ما اخاف منك لاتستغل خوفي من المخدر

طبك ايدية يباوعلي مبتسم واني مفرفحة مد ايدة على خدي

- اعصابك فدوة الشاربك

- حجاها وضحك رفعت ايدي ضربتة راشدي بقوة جر ايدي حيل لواها وره ظهري ويضحك

:- ايدددج ثگيلة الف مرة كتلج لاتمدينها عليه

:- وخرر عـــــوفني خرب ليش تخليني اغلط

سحبني للفراش شمرني بفراشي. ورفع ايدية مستسلم

:- هاي هي كـــــافي لا اضربج ولاتضربيني حفيت شاربج واخذتي حقج راشدي

- خزرتة وجريت الغطا ساكتة طفة الضوه واجة لفراشة

شوية صار هــــــدوء. تلمست فوك شفتي صارت ناعمة بــــس مصخنة ابـــــتسمت بيني وبين نفـــــسي
وينج غـــــدير تبقين ساعة يله تشيلين الشارب وهذا بدقيقتين خلص احلف علية مشتغل حفافة.

نگلبت للجهة الثانية مانعسانة ماكدر انام
التفتت علية الغرفة ظلمة وبــــس صوت المكيف

:- جـــــندل؟

ماحاجاني سحبت مخدتي بصف مخدتة احجي بصوت ناصي
:- الأبـــــهر ، أبــــــهر حاجيني عود تسوي روحك نايم جذاب واللـــه

صوت نفسة ثگيل خليت اصابعي على ركبتة ماحجة تاكدت نايم صدك

رجعت لفراشي حتى تفكير ما اعرف بشنو افكر
اجوا ابالي اهلي مصطفى حسيت ريحتة صارت بخشمي غمضت عيني حيل حاضنة نفـــــسي واتخيله بحضني واسحب نفس بقوة

"صوفي ياروح جــــمرة "

رجعت اتذكرت شكد جنت قريبة من امي واستحي احظنها استحي ابوسها وهسه بــــس اتمنى ارجع اشوفها. ..

شكد جنت شالعة كلبها
وبيبي والحجية شكد مشتاقة لسوالفهن لريحتهن

وغدير الجنت حتى ما اشاقيها وهبه الو لا مرة حسستها اني اختها

تربيت بضرب وعنف من عمر ال13 ادرس ومن المدرسة اطلع لتقاطعات اركض ابين السيارات اعارك واجاهد جهاد حتى اطلع الربع دينار وارجع للبيت بسرعة ادرس وانام واني افكر باجر بيا تقاطع اروح ابيع شلون اكدر اعيش حياة عادية

ماتعلمت اتصرف بعواطف وحنان گـــــلبي بقساوة الحجر ومو ذنبي هي الدنيا هيج خلته

نعصر گـــــلبي ماردت افكر أريـــــد اي شي انشغل بيه غير التفكير رجعت بصف أبــــــهر ردته يكعد أريـــــد اسولف حتى ما افكر بشي. اتكلب بصفة وادغة بقصد ولا اتحرك

كمت على اطراف اصابعي ادور تليفونة كعدت يم راسة ومديت ايدي جوه المخدة سحبتة ورجعت ليورة بــــس شغلت الشاشة طلعلي رمز بقيت اكتب ارقام من يمي الحد مانقفل شمرتة بصفة حيل مافز

كمت رجعت لفراشي ضجت حيل اختنكت اجيت المخدتة اباوع بوجهه واحجي
:- يله اكعد صار الصبح وراح يصير الظهر

دغيتة بكتفة
:- اكعد سولف وياي ضايجة. أبــــــهر هيوو المجرم واللـــه جذاب كاعد بــــس انتَ حقير تشلع بكلبي

كمت شغلت الضوة عكد حواجبة ضايج رجعت طفيتة وجريت البردة على جهه دخل ضوة من الصالة

رجعت تمددت يـــــمة وتقربت الاذنة احجي بصوت ناصي
:- جــــمرة شردت ياغبي اكعد.
أبــــــهر جــــمرة راحت جابتلك الشرطة كوم اشرد

نگلب لجهتي مد ايدة حضن خصري وسحبني عليه بقوة
:- هــــا الجذاب عرفتك كاعد

ماحاجاني وخرت ايدة مني وشمرتها عليه بقوة درت صار وجهي مقابيل وجــــهة
مديت ايدي الجفنة ورفعتة حرك راسة حتى ابتعد

رجعت سحبت التليفون شغلت الشاشة واباع بجفنة يتحرك لو لا نايم لو جذاب مركزة كل قوتي وهو ابد ولايتحرك. .درت ضوة الشاشة على أيــــدة. صافنة بالندبات مشيت ايدي عليهن مقشعر بدني

معقوله تلكي اخوانك من مجرد ندبة؟

احرك اصابعي عليهن والتفكير اكل راسي
منو اخوانك ياترى وتصير معجزة وتلتقي بيهم
لو خسرتهم للأبد ...القدر اله لعبة وتنجمعون لو كلشي أنتهى وتبقى بحسرتهم
شنو العاشوه بدونك تعذبوا انضربوا ؟

سديت ضوه الشاشة وفركت وجهي اني. شاردة من التفكير ماريد افكر بشي جريت الغطا وتمددت مخلية راسي على صدرة. واتغطى عدل واتحرك الحد ما ثبتت وركزت ويا دكات كلبه ينتفض بقوة وصوتهن عالي

عرفتة كاعد ابتعدت رجعت المخدتي اغلط. مديت رجلي دفرتة وتغطيت. والساني يرش بالغلط الحد ماغفيت

كعدت الصبح مالكيتة اطلع من الغرفة للحمام للصالة افتر بينهن مختنگة لليل سمعت صوت الباب كمت طلعت لصالة وهو بعده مافاتح باب المطبخ ويصيح بفرح

:- لج جــــمرة

- فتح الباب رفع عينة لمحني واكفة اباب الصالة ساندة ظهري على الحايط باوعلي والابتسامة مالية وجــــهة عيونة مدمعة

:- ههه شلونج

- بقيت ساكتة اجه عليه بيده علاكات دخلني للغرفة يريد يبدل ويضحك نزع قميصة يباوعلي مبتسم

:- شكو؟

فرك وجــــهة يضحك
:- خلي نتعشا واسولفلج

:- لا سولفلي هسه.

عافني وراح للمطبخ خله الاكل بصينية واجه قفلت
:- سولف ماريد اكل

سوة لفة خلاها بحلكي اكلتها وحجيت
:- فضها احجي شنو ليش تضحك

- باوعلي لام شفتة الداخل حلكة عيونة يلمعن بدموع

:- شوفي قسام ورطنا ويا تجار اسلحة من الخارج وفلوسهم اخذوهن والاسحلة ماوصلتهم اذا مارجعنا الفلوس يكتلونا كلنا قسام وحتى اليعرف اسمه

- حجاها بفرح. بلعت ريك مافاهمة راسا كتلة
:- واني منو يرجعني الاهلي

اختفت ابتسامتة صافن بعيني
:- كتلج لاتخافين اذا متت ضامن يرجعونج الاهلج

:- هسه انـــتَ فرحان لان راح تموت ؟

:- ههه لا بــــس انتِ ماسمعتي السالفة راسا فكرتي بنفسج ومنو يرجعج الاهلج

- دنكت ساكتة سوه لفة خلاها بحلكي اكلتها وباوعتله

:- احجيلي السالفة.

هز راسة لا

:- لاتصير خبيث

:- مو خبيث بــــس تذكرت ماكو داعي تعرفين

:- ليش حجيت من الاول وخليت عندي فضول

:- حسبالي يهمج

:- اي أريـــــد اعرف

:- ههه مو اهتمام هسه انتِ كلتي فضول

:- أبــــــهر احجي لاتصير تشلع الكلب

:- ما احجي

- عافني وگام صاح
::-غسلي المواعين مو كله عليه

دفعت الصينية من كدامي
:- واللـــه ولا اغسلهن

:- مره عليج ومره عليه من تزوجتج لليوم انا اغسل

- كمت وراه واكف يغسل دفعته وغسلت ساكتة التفتت عليه يباوعلي بنص عين يريد يضحك

:- يله روح اغسل المواعين

:- الا اخليج انتِ تغسلينهن

:- واللـــه ولا اغسلهن لو تموت

:- اذا غسلتيهن احجيلج السالفة

- باوعتله ساكتة تنرفزت. رجعت للغرفة شلت الصينية واحجي بنتر

:- رايحه اغسلهن ماريد سالفتك

دخلت للمطبخ خليتهن بالسنك لحگني سند ظهرة على الباب يباوعلي من الزم الصحن وحدة من ايدية ابد ابد مابطلت منها الرجفة اذا لزمت بيها شي ترجف حيل ومرات ماكدر اسيطر على العصب ويفلت الشي من ايدي

حسيت بيه وراي لزم ايديه ثنينهن غسلهن من التايت
:- اتشاقة وياج انا اغسلهن عوفيهن

رجعت ليورة وهو غسلهن گـــــال
:- اكو علاكة بالغرفة بيها شغلات الج

:- شغلات شنو؟

:- باجر تحتاجينهم

:- مشيت أريـــــد اشوفهن لحكني ادور عليها وهو سد الباب لكيت العلاكة اخذتها وكعدت أريـــــد افتحها گـــــال

:- لا تفتحينها باجر من تحتاجينهم افتحيهم

- عكدت حاجبي مافاهمه فتحت العلاكة طلعتهن اباوع بيهن ملابس داخلية وحاجات بنات. شمرت الملابس على جهه ولزمت باكيت الحاجات اشر بيه واصيح

:- انـــتَ ماتستحي اشايف نفسك

:- علمودج

- شمرتهن عليه افور
:- خليهن النفسك احتمال انـــتَ تحتاجهن كل شهر مو اني

-: تراهنين باجر راح تحتاجينهن

- يحجي ومبتسم شلت الملابس الداخليات هم شمرتهن عليه
:- البسهن. انـــتَ
ولا تراهن على شي ماتعرفه فهمت

:- شربتج حبـــوب باجر تحتاجينهم

- بلعت ريك اباوعله من مجرد تفكير حسيت بطني تشنجت
:- اشربتني؟

:- مادري مره جنتي تهلوسين نايمه وحجيت وياج كلتج جنج ولد ضحكتي كتيلي اي
حتى الشهرية ماتجي الا كل ثلث اشهر دزيت واحد لدكتورة نطوها حبـــوب مدري شسمهم

:- فكيت عيني كلها رفع ايدة كدام وجــــهة يحسب باصابيعة مبتسم

:- اجتي يـــــوم .....بذاك الشهر واليوم ..... يعني باجر.

- بــــس فاكه عيني اباوعله متنرفزة منه وصلت وياه يحسبلي واني بعمري ماحسبت. اتلفتت بالغرفة ادور شي اضربة بيه وهو يضحك

اجه عليه يضحك ويلزم بايدية
:- وخــــر مجـــرم قابل انتظرك تستحي وخرررر

:- هههه هشش يله خلي اسولفلج على قسام

:- نترت ايديه منه ورجعت ليوره خازرته. شال الاغراض رجعهن بعلاكة واجه يمي

:- احجيلج؟

:- درت عليه. عندي فضول اعرف السالفة تربعت كعدت عدل گـــــال

:- شوفي النا خمس ايام اذا ماطلعن الفلوس ننكتل يمسحونا مسح

:- منين هم؟

:- من دولة الـ.......

:ترا اني مافهم منو اخذ فلوس منو انـــتَ ماتحجي شي واضح

:- ههههه جاي احجي بوضوح بــــس لان مو مكانج ولا عالمج ماراح تفهمين

:- كمل اذا ماطلعن الفلوس تنكتلون ليش فرحان؟

:- لان هاي فرصتي جــــمرة ماتتخيلين قسام شلون خايف ويريد الفلوس يرجعن بأي طريقة لان يعرف ومتأكد اذا فلوسهم مارجعت يكتلونة لو يظم روحة بسابع كاع

:- شلون يعني فرصتك.
ابتسم حيل يباوع بعيني وعيونة تلمع بدموع

:- منو يكدر يطلع الفلوس القسام؟

:- انـــتَ!

:- وانا ما اطلع الفلوس اذا مايدليني على اخواني

- فز گـــــلبي. وابتسمت
:- ويقبل يدليك

:- فرصة ونستغلها

:- بــــس شلون خاف يكتلك

:- هههه مايكدر اذا كتلني هوَ ينتهي ينكتل مــــحد يكدر يجيبله الفلوس غيري

:- ابـــــتسمت اباوع بعينة نزلت دمعة من عيونه مسحها بسرعة ويضحك

:- بــــس اكو شي

- اختفت ابتسامتي خفت من حجة بحسرة

:- اول شي لازم اطلع الفلوس واضمنهن عندي يله اكل القسام مانطيهن الا تدليني اخواني
وهن باخطر قطاع اذا دخلتله ما اضمن راح اطلع عايش

- حجاها وكام طلع من الغرفة عايفني بوسط افكار متناقضة ماعرف بشنو لازم افكر رجع دخل بيدة الصندوق الصغير. تقرب كعد كدامي وفتحه طلع هويات اهله والصور يمشي ايدة على صورهم يرجف صوتة احتقن

:- اذا انا متت وكدرتي بشي طريقة تعرفين اباذر ودرة تنطينهم هاي الهويات وتكليلهم

:- الأبـــــهر خلص عمره يدوركم مات وهو بحسرة شوفتكم

- وجعني گـــــلبي حيل اباوعلة كوه يتنفس
:- ليش تحجي هيج موتكول ما اموت اذا ما لكيتهم شو استسلمت

.على شاربة مبتسم

:- عندي امل اذا متت انا ...انتِ راح توصليلهم

:- ردت اكلك ان شاءالله تموت بــــس ضجت عليك ماراح اكلك

:- هههههههه

- ضحك ورفع ايدة يتلمس خدي

:- راح يجي عمر لاتطلعين

- هزيت راسي تمام وهو طلع عايف يمي الصور والهويات. لزمتهن اباوع بيهن.

وين هم هسه؟ الدنيا شمسوية بحالهم ؟
الله يساعد كلب الأبـــــهر شلون متحمل التفكير والقلق والخوف اني من افكر بيهم ينعصر گـــــلبي

طوَل مارجع اسمع صوتة يحجي ويا عمر ويسولفون ساعة يتصايحون ساعة يضحكون ساعة واحد يرزل الثاني مليت من الانتظار لفيت راسي ونمت .....

...

نــــهله ::- من طلعن كمت لميت البيت نومت الجهال وغدير تفتر يمي تلوب تريد تحجي ولازمه نفسها باوعتلها هزيت راسي

:- احجي غدوره شبيج

غـــــدير - دنكت ساكتة احس مو من حقي اتدخل بــــس ما ادري اخاف ما احجي وتصير مشكلة

::- شوفي عــــمة اكو بنية بالجامعة اني اسمع من البنات هي مو خوش ابنيه

::- استغفرلله مايصير تحجين عليها شدراج الكلام الينگال عنها صحيح وحتى لو صحيح مايصير تاخذين غيبتها

:- ادري واللـــه ماحاجية عليها معليه بــــس اسمعيني
هي البنية دوامها بكُليتي مرة شفت وداد اجت للكلية طلعت صديقة هاي البنية بعدين اجه اسمر اخذهن وطلع

:- شعليج بيهم يـــــمة

:- معليه بــــس جاي اشوف اكثر من هيج ما ادري اذا صدفة لو اسمر متقصد يخليني اشوف

باوعي وراها بيومين جنه كاعدين بالنادي واجه اسمر اخذ البنيه هند اسمها اخذها وطلعو من الكلية بنهاية الدوام من طلعت شفتهم بالسيارة كاعدة يـــــمة ولازم خدها واكثر من مره يطلعون سوا

نــــهله ::- خليت ايدي على حلكي مصدومة شبيها الناس تشتري الحرام بفلوس
::- شبيه هذا اذا يحبها ورايدها يگول الابوه ليش يطلع وياها بالحرام

غـــــدير ::- كمت وكفت لازمة صدر دشداشتي انكث بيه

:- ما ادري عــــمة ما ادري ولا الي علاقة المهم. حجيتلج حتى اريح ضميري ومن يصير شي ما الوم نفـــــسي واكول لو حاجيه لو ما ساكته.

بست خدها وفتت للغرفة حضرت اغراضي وجريت تليفوني گلبت بالفيسبوك وماكدرت امنع نفـــــسي دخلت الحسابة اگلب بمنشوراتة كلهن منشورات حزينة والصور الينشرهن لو داير وجهة والشمس مغطية ملامحه لو بــــس جسمه اخر منشور اله جان صورة غروب وياها كاتب

بكيت وهل بكاء القلب يجدي ؟
فراق أحبتي وحنين وجدي
فما معنى الحياة ؟ اذا افترقنا
وهل يجدي النحيب فلست أدري
فلا التذكار يرحمني فأنسى
ولا الأشواق تتركني لنومي

وجعني گـــــلبي معقولة يحب طليقتة بــــس لو يحبها ماينفصل عنها ..
رجعت للمنشورات القديمه كلها عن الفراق قبل سنة وسنتين وثلاثة كلهن حزينات وفراق ..دخت وضجت. رجعت لصورة الشخصية

مشيت ايدي عليها صافنة بيها واجالي اشعار تم قبول طلب الصداقة. وخرت ايدي من الشاشة مصدومة راسا طلعلي نشط بسرعة لغيت الصداقة وحضرتة افتر. وارجف صخام بوجهي عززا بعيني شسووويت

كعدت شامره التليفون كدامي اباوعله وكلبي يدك حيل هسه يعرفني شلون شسوي
اكل بأظافري وافكر
لا مايعرفني وين يعرفني. دك التليفون صوت رسالة وتساب احس وجهي صار نار فتحتها ارجف كاتب

* السلام عليكم محتاجة شي؟

- يبووي يبوووي صخام بعينج غـــــدير شكول شحجي شسوووي صفنت تنفست حيل ايدي ترجف كتبتله

* هــــا خالة انا ام مصطفى اسفة ولـــــيدي اگلب بتليفون غـــــدير ومو كلش اعرفلة بالغلط دزيتلك طلب

- دزيت الرسالة وصلت خطين وما انفتحت بقيت الوب الحد ماصارن الخطين زرگ وطلع جاري الكتابة دز

* ههههه

- فتحتها وماجاوبت التوبة بعد اذا فتت على حسابة
طفيت تليفوني بــــس ردت انام التفكير اكل عقلي ساعة اتخيله يحبني ساعة اتخيله يجي يخطبني ساعة افكر يحب ومفترق عن حبيبتة الف فكرة براسي مدري شلون نمت

نــــهله ::- اخذتني الحيرة ما عرفت شنو الاسوية دخلت للغرفة وادريس بمكتبة ..كعدت اتصلت على زوج جــــمرة حجيت وياها واطمنت عليها ارتاح گـــــلبي من حاجيتها أريـــــد اكلها شوكت تجين واخاف لشوكت ابقى ضامة عليها سالفة زواجي وين أريـــــد اوصل. فركت وجهي واجت رسالة صوتية للتليفون فتحتها من ادريــــــس

:- نــــهله أريـــــد مي

- عفت التليفون وكمت اخذتله مي وفتت للمكتب
ابتسم وگام
:- ارجعي للغرفة كملت شغلي

- طفة الضوة وطلع تربع على الجرباية نطيتة المي وهو يسولف على اخواته. التفتتلة محتارة

:- اكلك ادريس

التفتت باهتمام ..عفت البيدي ومشيت كعدت كدامة

:- شنو موقفك بالشخص اليحب يعني لنفرض غيث لو غفران كبروا وحبوا تقبل بهل شي

:- اي اكيد مو هاي سمر حبت واجت كالت بابا احب فلان قبلت ليش اوكف بطريقهم

:- هممم ..

دنكت ساكتة وهو ضحك رجعت باوعتلة

:- هــــا تضحك لازم انت هم جنت مصاحب وتحب هــــا هاا

::-وين لحكت اصاحب عمري 17 وابوي زوجني
بــــس هم بوكت المراهقه واول ماشديت رتبة مهتلف اطي مجال

:- هههههه ولا اتخيلك تصادق وهيج سوالف

:- لا واللـــه كل البله بيه من جنت مراهق

:- حيرتني هسه كلت كبل تزوجت ومالحگت اصاحب نوب تكول كل البله بيه اثبت على قرار

ضحك حيل باوعلي وحجة بابتسامة

:- احجيلج بــــس مو تغيرين نظرتج عني عقلت يمكن سنتين استهترت اخذتني الغفلة نوب صحيت

:- احجي احجي نشوف مغامراتك ادريــــــس
يصاحب ويواعد نسوان هههههههههههه ماصدك

:- هسه سوي روحــــــج تغارين بالجذب اكلبي خلقتج عود ضايجة لان زوجج عنده ماضي وي النسوان

:- هههههههههه ....
ضحكت وتربعت عدل سادة حلكي والضحكة لازمتني مستحيل اتخيلة يصادق تحمحم وكال

:- صح تزوجت وانا صغير بــــس جان دوم ابينا زعل وتروح الاهلها شهر وشهرين واكثر وانا بعد الدنيا زاهيتلي وهسه شاد رتبة واعارك الگاع وبس شوفوني وشوفوا رتبتي مــــحد حاملني

صاحبتلي وحيدة مدري ثنين الله يذكرهن بالخير مدري وين راحن
اخذتلي سنه ولزمني ابوي الله يرحمة وين اليوجعك
عاد من وره هاي الكتله صحيت وبطلت السوالف المسربتة .

:- غطيت وجهي اضحك ما ادري شبيه اباوع بوجهه اتخيلة مصاحب واموت ضحك دمعن عيوني وهو يهز بيدة

:- صدك جذب هسه جامليني سوي روحــــــج مقهورة بالجذب اخزريني عود ضجتي

:- ردت احجي ورجعت اضحك غصيت. بــــس افتح عيني اباوع بوجهه انتهي. جبرت تفسي اسكت وهو مبتسم يباوعلي. مسحت عيوني والتفتت علية

ادريــــــس :- ضحكتج طرب تفزز گـــــلبي

- اختفت ابتسامتي اباوع بعينة متأملني بنظراتة رجعت دنكت اعصر اصابيعي لزم ادية ثنينهن سحبهن اله يباوع بيهن

:- نــــهله اكلج شي بــــس لاتفهميني غلط

باوع بعيني وايدية ابيت ادية رجع دنك الهن ياشر على اثار الجروح ويحجي

:- شنو رأيج اخذج لدكتور تجميل يعالجون هاي الاثار وتروح

- بلعت ريك احسه تلعب نفسه ويكش من ايدية ودائما نظرتة عليهن سحبتهن ماعافهن لزمهن قوي ورفع راسة يباوعلي حجيت بسرعة

:- لا بعد البس جفوف حتى بالبيت اذا تضوج تشوفهن. ..

احجي مختنكة حقه ايديه صايرات خرايط من الاثار

:- لااا واللـــه لا ما اضوج عرفت راح تفكرين هيج بــــس واللـــه العظيم لا تكش روحي ولا اضوج منهن شلون افهمج شنو احساسي من اشوفهن

- بقيت مدنكة حزت بخاطري حيل بــــس أريـــــد اسحب ايدية من بين ادية مايعوفهن. رفعهن الوجهه ثنينهن باس باطنهن يبوسهن ويحجي متوتر لان فهمته غلط

:- ماتكش روحـــــي من جروحج بــــس انقهر لان احس من تشوفينهن ماتنسين الماضي هاي الجروح اثر تعبج اثر جهادج للعيشة بشرف شلون تلعب نفـــــسي منهن شلون

- جريتهن بسرعة
::- ادريــــــس شجاي تسوي

.عافهن يباوعلي
:- شسويت

- مسحت وجهي مرتبكة :- بست ايدية لا تعيدها

احجي متوترة حيل هو ابتسم يباوعلي

:- بنفـــــسي ابوس غيرهن

- فكيت عيني على وسعها. ::- شبيك

:- ههههه شبيه

:- ما ادري شبيك

:- ههههه شبيك انگلش

- التفتت ليوره متوتره. جريت البطانية اغطي بيه
:- نام باجر وراك دوام نام تاخرت ضحك حيل

:- اجازتي باجر شنو نسيتي

- عفتة يضحك وكمت. رتبت الملابس مرتبكة من نظراتة عينة عليه الحد ماكملت شفته غافي اجيت تمددت وكعدت للصلاة كعدت الجهال صلوا وراجعتلهم امتحانهم

لمن كعدوا البقية وتريكنا ادريــــــس نزل يم اهله وهم كلمن راح الدوامة كملت شغلي خليت صوفي بالعربانة وطلعته يمي بالصالة

فاتحة الباب صح حارة بــــس احب الشمس تدخل. للبيت وهستوني منظفة ريحته حلوة.

تذكرت غيث خطيه ينسه يحفظ درسة وشحلاتة بــــس شوية وينساة. جبت دفتري وقلم وباكيتات حليب يشربونها يوميه كعدت اقرة عليهن

واكتب بالدفتر الشي القريتة والعدد

للحفظ وعدم النسيان

البسمله 41 مرة
الصلاة على محمد وال محمد 100 مره
اية الكرسي 3 مرات
سورة الفاتحة 3 مرات
وسورة الشرح 3 مرات

بعدني ما مكملة وشفت مرة ابراهيم صعدت عفتهم وكمت تلكيتها
:- يا هلاا ومرحبا

سلمت عليها ورحبت بيها دنكت باست مصطفى. وكعدت جبتلها مي ورجعت كعدت اسولف وياها واسأل على جهالها والامتحانات

:- واللـــه شالعين گـــــلبي امس ردت اصعدهم الج

- دنكت ساكتة ماكدرت اكلها اي وديهم
جهالي مايتوالمون وياهم من ينزلون بالكراج بــــس يتعاركون. التفتت تباوع المصطفى

:- صلوت على محمد وليدج سمين ولاجنه مريض شحلاتة

:- الله يخليج

:- عندي حمودي الصغير موتني جنه عودة ولايسمن وعود واللـــه النهار كله اوكل بيهم ولايبين بيه

:- خاف عنده ديدان اخذية لدكتور ..

:- اي اي اخذة

- رجعت التفتت المصطفي

:- شحلاته احله من هبه

- ابتسمتلها اي

:- بــــس الله يساعدج سمين شلون تنقلينة من الجرباية للعربانة

:- رب العالمين عايني احسه ريشة

:- كون يضعف احسن ماينشلع كلبج وتتعبين

- التفتت المصطفى مبتسمة فداه تعبي عسل على گـــــلبي

:- تشربينة شي انتِ لو هو هيج سمين

:- لا ششربة بــــس لان ملتزمة بوجبات اكله.

:- الله يخليه نوب حلو هو شحلاتة

:- الله يخليج ....
سكتت شوية تحوس كمت للمطبخ اجيبلها عصير كالت

:- انا جايتج بشغيلة

:- كولي خيه بعيووني ...
اخذت العصير ورجعت كعدت يمها شربت متوترة وخجلانة.

:- اريدج تسويلي حرز عوده كون ابراهيم يسمع حجايتي وشكد ماتردين اطيج على راس الشهر

:- فكيت عيني مصدومة وكلبي ينتفض. هزيت راسي لا
:- ماعرف كل الاعرفة تسبيحات من القران

احجي صوتي محتقن والكلمة غاصة بيها طكتني على ايدي

::- شبيج خيه لعد توصل يمي وتصيرين ماتعرفين مو امس حمواتج. يمج اكتارهن مترسة حروزه وعوود واللـــه بفليساتج وداعت جهالي

:- حروزت شنو انتِ شجاي تحجين جاي اكلج كل الاعرفة تسبيحات من القران تردين اعلمج اعلمج سالفة الحرز مالي بيها

:- لا شنو تعلميني هو هذا هم حظي ابد والله ماعندي حظ لا وياج ولا ويا ام فــــــاطمة
امس البنات نزلن من يمج جيوبهن مترسة حروزة و عود شبيج هسه انا كتلج بفلوسج

:- رحمه الاهلج منو كالج حروزة ولج واللـــه العظيم تسبيحات وكتبنهن

:- تسبيحاتيش هن حجن

:- شحجن

:- واللـــه كالن لاوية ذراع ادريــــــس ثاريها مو هينة كله حروزة تسوي

- بعدني ما ناطقة مصدومة بيها بــــس فاكة عيني التفتت على صوت ادريــــــس. هستوه صعد

ادريــــــس::- اول شي اسمهن تسبيحات مو حروزة ثاني شي انا العلمتها عليهن يعني مالاوية ذراعي بيهن ومرة الثانية لا تتهمين اخواتي بكلام ماحاجياته وهاي اخر مرة اشوفج تصعدين البيتي تفضلي انزلي

نــــهله: :- وكفت بسرعة مصدومة وهي وكفت تباوعلة حرف مانطقت دارت وجها ونزلت
بقيت على وكفتي بــــس ارمش بعيني يباوعلي عاض شفتة

::- اخواتي مايحجن هيج واللـــه

- دنكت مسحت وجهي شلت الاغراض فتت للمطبخ صاح

:- نــــهله ثقي بالله اخواتي مايحجن هيج مستحيل

- غسلت وبقيت واكفة بالمطبخ سمعتة يحجي بالتليفون شوية وصاح ::-تعالي نــــهله

- طلعت اشرلي اكعدي يمي تمشيت يـــــمة والتليفون بيدة فاتح مايك. گـــــال

:- موجودات كلجن

ام تبارك ::- اي خوية سلامات شصاير

- البارحة من نزلتن من عدنا جوه حاجيات شي خوية؟

:- لا واللـــه اصلا ماتاخرنا ربع ساعة كعدنا يم امي ورحنا

:- ومرة ابراهيم؟

:- بــــس سلمت علينا من الباب

:- جايبات طاري ام مصطفى بشي؟

نــــهله ::- سكتن كلهن شوية وحجت الهام الصغيرة

:- اي خوية انا حجيت

:- شحجيتي?

:- كلت الامي ...الله شكد رحيم ورزق ادريــــــس بيها المثلها ماتعرف شي عنه حتى ماتحجي ويانا وهي كعدت تطينا تسبيحات وتعلمنا وتسولف ويانا عبالك معاشرينها سنين
وامي سألتنا تسبيحات شنو سولفنالها هاي السالفة ادريــــــس صاير شي؟

:- لا حبيبتي ماصاير شي

ام تبارك ::- بروح ابوي. ادريــــــس شنو ام مصطفى نغثت منه

:- لا يابة شسالفة ام مصيفي هاي

نــــهله ::- حجاها ورفع عينه يباوعلي مبتسم سلم عليهن وسد التليفون

:- ترا هي مرة ابراهيم اذا تسمع كلمتين تسوي سالفة من يمها هذا طبعها

:- ليش طردتها عيب من اخوك

:- أخـــوي من ينزلون جهالي ويتعاركون ويا جهاله يطردهم وهي تضربهم كدامة مايفك حلكه بكلمه

- سكتت..ضحك

:- وعلي خنكتيني

:- اني؟

:- اي انتِ رحمة الاهلج نزعي حجابج

:- فتحت الدمبوس ونزلتة على اجتافي

:- هــــا هسه تنفست ...
جر نفس حيل

:- اي هسه وصل الهوا الريتي

:- ههههه مو اني اعوف الباب مفتوح وكلساع افوت من يـــــمة لو اطلع للكعدة لو انزل

:- ميخالف غير تاخذين راحتج ابيتج اني حسبالي تستحرمين مني

:- هههه لا شسالفة ...

كمت من يـــــمة للمطبخ اسولف وياه كعد يشاقي مصطفي واني اطبخ غدا. صحت عليه

:- ماتروح تجيبلنا معجون

:- لا ما اروح

:- عفية. وانطيك الف

:- سويهن الفين

:- روح مسويتلك مركة باميا

كام على حيلة صاح نطيني فلوس يله نطيتة ونزل شوية ورجع اسمع صوت عـــــلي وبسام وياه

بــــسام ::- وصلت غـــــدير لدوامها ورجعت لشغلي وعلي يفتر فوك راسي

عـــــلي ::- بــــس اسمع مني

::- لا تدوخني شتريد

- نزوج بالسر اقصد نزوج سوه شبيك وجهك يتلاطم

بسام- ما أريـــــد اتزوج طالبني بطلابة انتَ

عـــــلي ::- شبيها غـــــدير هي قسمتك من البداية بــــس انـــتَ دورت مثاليات وصرت شريف.... ما اخون ابو اسمر وهل كلاوات اخطبها ونجب كوم يله أريـــــد اخطبلك

بــــسام ::- جريت باكيت الجكاير اضحك وغمزتلة
::- سالمين عـــــلي صاير عندك حماس وطاقة وكلك نشاط هذا كله تأثير فطيم؟

صفن بوجهي وضحك جر ياخة البدلة يشم بيها يجر نفس بشهكة. وانا ضحكت من كل گـــــلبي
:- فضحتنا والعباس مسودن

- عطرها راح من البدلة راجعلها

:- لا تلعب اكعد و الواجب وين مولي. ......
ذبلن عيونة يجر اغراضة ويشم بياخة بدلتة ما مهتملي احجي وياه ولا يسمعني اشرلي بيدة وطلع

ربع ساعة ورجع اتصل ضحكت وجاوبتة
:- هــــا لك *** يله ارجع للواجب

:- يا واجب رايح اخطبلك انا

:- شنو

:- والكفل زينب رايح اخطبلك اكله هوه يستحي يجي ودزاني يكول اذا ابو اسمر يقبل اجيب اهلي

- كمت من الكرسي.
:- لا عـــــلي بشاربك انا زحمة يابة انا الاوصل البنية الدوامها هسه يكول مخلي عينة عليها

:- نام على هل خبر هسه شنو تجي لو اخطب وحدي

:- عليييي بطلهن سويلفاتك انطيك ورقة وارجع

:- وعلي لو تطي راتبك كله خايس اليوم اخطبلك يعني اخطبلك ...أريـــــد نزوج بالسر اقصد نزوج سوه فاطمة تحب غـــــدير تكيف اذا تزوجن بنفس اليوم

:- وانتَ علمود فطيم تكيف تريد تطيح حظي

:- لا غير افكر بيك جا بــــس بالموت اكلك فد تابوت وبالفرح اعوفك ماينطيني گـــــلبي

بالموت انا وياك فد تابوت وبالعرس فد زفة

يله تعال حبيبي منتظرك بركنهم صير ادمي تره اخطب وحدي واكله يحبها ويموت عليها وافشلك

:- جاي جاي طاحظك .....
سديت الخط منه وطلعت فشلان مستصعبها حيل
ماصارلي شهر منفصل والحجي شلون راح يقبل
صح محتاجها علمود امي بــــس محتار

وصلت لركن بيت ابو اسمر شفت عـــــلي يسولف وياه بالباب نزلت مستحي سلمت عليه
لازم بيدة قوطية معجون. وعلي واكف وراه ياشرلي ويضحك. كتلة

:- هاي شنو سيــــدي

دنك باوعلها وباوعلي

:- شتشوف بــــسام؟

:- قوطية معجون

:- تعرفها ليش تسأل

:- هــــا مو حسبالي مشتبهه

عـــــلي::- ضابة الحبل خالة فدوه الايدها

ادريس::- شتردون شعدكم ماخلص منكم حتى بعطلتي

عـــــلي: :- سيــــدي جاين وطالبينك ماتردنا

بــــسام::- صعدنا وياه سلمنا على ام مصطفى ودخلنا للاستقبال منتظرنا نحجي وثنينا اني وعلي ساكتين. وين يله نطق

عـــــلي::- انا جعلنا بينكم مودة ورحمه احنا نريد مودة ورحمه العروستنا وعريسنا ومثل ماتعرف لقد امرونا بالزواج وهذا احد سنن الحياة

بــــسام::- دفرتة برجلة بــــس أريـــــد يسكت وابو اسمر عاكد حاجبة خازرنا

:- شتليث انـــتَ ولـــــيدي

بــــسام::- سيــــدي يريد يحدد موعد العرس

عـــــلي: :- هههه لا ابو اسمر. انا طول عمري ماعرفت اب غيرك ولا اخو غير بــــسام اعزكم اكثر من روحـــــي صح احب فاطمة اكثر منكم بــــس هم احبكم

ادريس::- حبيبي علاوي احجي وعوف فــــــاطمة على جهه

:- سيــــدي تريدها من الاخير بــــسام يحب. غـــــدير وغدير تحب بسام وانا جاي اجمع راسين بالحلال .....

يتبــــــع⋆𓍯

الكاتبة أيـــــــلول⋆𓄼𓂁 💚🌿

كروب الفيسبوك الرابط مالته بحسابي اذا نزل توضيع او فيديو يوضح البارت القادم تلكونه هناك. اسمه ريحانات ايلول

او بحسابي الانستا t8_fe3

او بقناة التليكرام معرفها. aylol_w

💚🌿

.